မှတ်တိုင်များ
- - - - - - - -
ဖေဖော်ဝါရီလ ၁၀ ရက်၊ ၂၀၂၅ | https://www.springsprouts.info/updates/galon-column-will-fully-cooperates-with-the-mla

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန (MoD) ၊ပြည်သူ့ကာကွယ်ရေး တပ်မတော်(PDF) မှ နုတ်ထွက်ထားသည့် ဂဠုန်စစ်ကြောင်းအနေဖြင့် စစ်အာဏာရှင်စနစ် အပြီးတိုင်ချုပ်ငြိမ်းရေးနှင့် စစ်ရေးဖော်ဆောင်မှုများ ဆက်လက်လုပ်ဆောင်နိုင်ရန်အတွက် မွန်ပြည်လွတ်မြောက်ရေးတပ်တော် (MLA) ၏Chain of Command (COC) အောက်သို့ အလုံးစုံ ပူးပေါင်းကြောင်း ဖေဖော်ဝါရီ ၁၀ ရက်တွင် ထုတ်ပြန်လိုက်သည်။

ဂဠုန်စစ်ကြောင်းအား ၂၀၂၂ ခုနှစ် မတ် ၂၅ ရက်တွင် ကရင်အမျိုးသားအစည်းအရုံး (KNU) ၊ တပ်မဟာ (၆)၊ KNDO တပ်ရင်း(၆)နယ်မြေတွင် စတင်တည်ထောင်ကာ NUG– MoD အမှတ် (၂) စစ်ဒေသ၊ စစ်ဒေသခွဲ (၃) ကွပ်ကွဲမှုအောက်၌ တိုင်းရင်းသား မဟာမိတ်တပ်ပေါင်းစုများနှင့် ပူးပေါင်း၍ စစ်ရေးဖော်ဆောင်ခြင်းများ ပြုလုပ်ခဲ့သည်။

၂၀၂၄ ခုနှစ် နိုဝင်ဘာ ၅ ရက်တွင် NUG-MoD ကွပ်ကဲမှုအောက်၌ ဆက်လက်တာဝန်ထမ်းဆောင်ရန် ဆန္ဒမရှိသည့်အတွက် နုတ်ထွက်ခွင့်တင်ကာ ၂၀၂၅ ဇန်နဝါရီ ၂၉ ရက်တွင် တရားဝင်နုတ်ထွက်ခွင့်ရရှိပြီးဖြစ်ကြောင်းလည်း ဂဠုန်စစ်ကြောင်းက ကြေညာထားသည်။

#Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၃ ရက်၊ ၂၀၂၅ | https://www.springsprouts.info/updates/ethnic-and-federal-councils-announced-that-the-country-will-be-built-bottom-up-federalism-approach

ဗဟိုချုပ်ကိုင်မှုစနစ်သည် ဆယ်စုနှစ် ခုနနှစ်ခုကျော်တိုင် နက်ရှိုင်းသော နိုင်ငံရေးပြဿနာများကို မဖြေရှင်းနိုင်ရုံမက ပိုမိုရှုပ်ထွေးသည့်ပြဿနာများကို ဖြစ်ပေါ်စေသည့်အတွက် ယင်းစနစ်ကို ပြန်လည်အားကောင်းစေမည့် ဗဟိုအခြေပြု ဖက်ဒရယ်စနစ် (Holding Together) ကို လက်ခံကျင့်သုံးမည် မဟုတ်ဘဲ ပြည်နယ်အားကောင်းရေးမှ ပြည်ထောင်စုအားကောင်းရေး(Bottom-up Federalism) အခြေခံချဉ်းကပ်မှုဖြင့်သာ တိုင်းပြည်ကို ပြန်လည်တည်ဆောက်မည်ဖြစ်ကြောင်း တိုင်းရင်းသားတော်လှန်ရေးအဖွဲ့အစည်းများ၊ ပြည်နယ်/လူမျိုးကိုယ်စားပြု ကောင်စီ ကိုးခုက ပြည်ထောင်စုနေ့ဖြစ်သည့် ဖေဖော်ဝါရီ ၁၂ ရက်တွင် ထုတ်ပြန်လိုက်သည်။

ထုတ်ပြန်ချက်အား ကရင်နီအမျိုးသားတိုးတက်ရေးပါတီ (KNPP) ၊ ကရင်အမျိုးသားအစည်းအရုံး (KNU) ၊ ချင်းအမျိုးသားတပ်ဦး (CNF)၊ မွန်ပြည်သစ်ပါတီ (စစ်အာဏာရှင်ဆန့်ကျင်ရေး) (NMSP-AD) ၊ ကရင်နီပြည်နယ် အတိုင်ပင်ခံကောင်စီ (KSCC) ၊ ပအိုဝ်းအမျိုးသားဖက်ဒရယ်ကောင်စီ (PNFC) ၊ မွန်ပြည်နယ်ဖက်ဒရယ်ကောင်စီ (MSFC) ၊ တအာင်းနိုင်ငံရေးအတိုင်ပင်ခံကောင်စီ (TPCC) နှင့် အမျိုးသမီးများအဖွဲ့ချုပ် (မြန်မာနိုင်ငံ)(WLB) တို့က စုပေါင်းထုတ်ပြန်ခြင်းဖြစ်သည်။

ပြည်ထောင်စုတည်ဆောက်ရေးအတွက် တော်လှန်ရေးကာလ/ကြားကာလမှ စတင်ကာ ဖွဲ့စည်းပုံအခြေခံကဲ့သို့ သက်ရောက်မှုရှိသော အုပ်ချုပ်ရေးစာတမ်း (Governing Document) အဖြစ် ကျင့်သုံးဆောင်ရွက်ရန် ဖက်ဒရယ်အသွင်ကူးပြောင်းရေးအစီအမံဆိုင်ရာ အခြေခံဥပဒေ (Articles of Federal Transitional Arrangement – AFTA) ကိုလည်း စတင်ပြင်ဆင်ရေးဆွဲနေပြီဖြစ်ကြောင်း ထုတ်ပြန်ချက်၌ ပါရှိသည်။

#KNPP #KNU #CNF #TPCC #MSFC #PNFC #NMSP-AD #WLB #KSCC #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၃ ရက်၊ ၂၀၂၅ | https://www.springsprouts.info/updates/msfc-announced-only-an-armed-path-for-national-equality

အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ရှိသည့် နိုင်ငံရေးအာဏာ ရယူရာ၌ လက်နက်ကိုင်တော်လှန်သည့်လမ်းစဉ်မှတပါး အခြားမရှိသည့်အတွက် ပြည်တွင်း၊ ပြည်ပရှိ မွန်ပြည်သူများအနေဖြင့် တော်လှန်ရေးအင်အားစုများနှင့် ပူးပေါင်းပါဝင်ကြရန် မွန်ပြည်ဖက်ဒရယ်ကောင်စီ (MSFC) က ဖေဖော်ဝါရီ ၁၃ ရက်တွင် တိုက်တွန်းလိုက်သည်။

(၇၈) ကြိမ်မြောက် မွန်အမျိုးသားနေ့ ထုတ်ပြန်ကြေညာချက်၌ မိမိတို့ စာပေ၊ ဘာသာစကား၊ ယဉ်ကျေးမှုများအား မည်သို့ပင် ထိန်းသိမ်းစောင့်ရှောက်စေကာမူ နိုင်ငံရေးအာဏာ လက်ဆုပ်လက်ကိုင်မရှိပါက အမျိုးသားလက္ခဏာနှင့် လူမျိုးတိမ်ကောပပျောက်မှုများအား နေ့စဉ်နှင့်အမျှ ရင်ဆိုင်ရမည်ဖြစ်ကြောင်း၊ ဗမာစစ်တပ်သည် ၂၀၀၈ ဖွဲ့စည်းပုံအခြေခံဥပဒေဖြင့် နိုင်ငံရေး၌ စစ်တပ်ခေါင်းဆောင်မှုအား ဖန်ထီးထားရုံမက ဒီမိုကရေစီလိုလားသည့် မြန်မာ (ဗမာ) ပြည်သူများကိုပါ ဖိနှိပ်ကာ ၂၀၂၁ ခုနှစ်တွင် အရပ်သားအစိုးရထံမှ အာဏာသိမ်းထားကြောင်း၊ ယနေ့ စစ်အာဏာရှင်စနစ်ကို တော်လှန်တိုက်ခိုက်နေသည့် တော်လှန်ရေးသည် အဖွဲ့အစည်းတစ်ခု၊ တစ်ပါတီအာဏာရရှိရေးအတွက် မဟုတ်ဘဲ တိုင်းရင်းသားပြည်သူများ လိုလားတောင့်တသည့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးပင် ဖြစ်ကြောင်း MSFC ထုတ်ပြန်ချက်၌ ပါရှိသည်။

#MSFC #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၃ ရက်၊ ၂၀၂၅ | https://www.springsprouts.info/updates/magway-forces-sent-an-open-letter-to-singapore-to-take-action-against-interra-resources

အကြမ်းဖက် မြန်မာစစ်အုပ်စုက ကျူးလွန်နေသည့် စစ်ရာဇဝတ်မှုများ၌ အသုံးပြုရန် လောင်စာဆီ ရောင်းချပေးနေသည့် Interrra Resources အား မြန်မာစစ်အုပ်စုထံ ရေနံစိမ်းထောက်ပံ့မှု ချက်ချင်းရပ်တန့်စေရန်နှင့် စင်ကာပူစတော့အိတ်ချိန်းမှ စာရင်းပယ်ဖျက်ပေးရန် အပါအဝင် တောင်းဆိုချက်လေးချက်ပါ အိတ်ဖွင့်ပေးစာအား စင်ကာပူအစိုးရနှင့် စင်ကာပူအိတ်ချိန်းအုပ်စုအား မကွေးအခြေစိုက် အရပ်ဘက်အဖွဲ့အစည်း၊ လူထုတိုက်ပွဲကော်မတီနှင့် သမဂ္ဂ စုစုပေါင်း (၂၀) လက်မှတ်ရေးထိုးကာ ဖေဖော်ဝါရီ ၁၃ ရက်တွင် ပေးပို့လိုက်သည်။

စင်ကာပူနိုင်ငံ ဝန်ကြီးချုပ်နှင့် ဘဏ္ဍာရေးဝန်ကြီး မစ္စတာလော့ရင့်ဝေါင်၊ ဒုတိယဝန်ကြီးချုပ်နှင့် ကုန်သွယ်ရေး/စက်မှုဝန်ကြီးနှင့် စင်ကာပူနိုင်ငံ ငွေကြေးအာဏာပိုင်အဖွဲ့ဥက္ကဋ္ဌ မစ္စတာ ဂန်ယင်ရောင်၊ စင်ကာပူစတော့အိတ်ချိန်းအုပ်စု အမှုဆောင်အရာရှိချုပ် (CEO) မစ္စတာလိုဘွန်းချိုင်တို့အား လိပ်မူ၍ အင်္ဂလိပ်၊ မြန်မာ နှစ်ဘာသာဖြင့် ပေးပို့ခြင်း ဖြစ်သည်။

Interra Resources သည် ၎င်းတို့ ၆၀ ရာခိုင်နှုန် ပိုင်ဆိုင်သည့် Goldpetrol Joint Operation Company Inc. မှတဆင့် မြန်မာစစ်အုပ်စုထံ အမေရိကန်ဒေါ်လာ သန်း ၁၅၀ တန်ဖိုးရှိ ရေနံစည်ပေါင်း ၂ ဒသမ ၃ သန်းကျော် ရောင်းချခဲ့ကာ ယင်းသည် စစ်အုပ်စု၏ အရပ်သားများအပေါ် ပြစ်မှတ်ထားပြုလုပ်နေသည့် စစ်ဆင်ရေးအတွက် အဓိက ကျကြောင်း၊ Interra Resources သည် ဥရောပသမဂ္ဂနှင့် အမေရိကန်ပြည်ထောင်စုက ဒဏ်ခတ်ပိတ်ဆို့ထားသည့် မြန်မာ့ရေနံနှင့် သဘာဝဓာတ်ငွေ့လုပ်ငန်း (MOGE) နှင့် စီးပွားရေးအရ ဆက်စပ်လုပ်ဆောင်မှုသည် နိုင်ငံတကာရာဇဝတ်မှုများ၌ ကြံရာပါ ပတ်သက်မှု ဖြစ်ကြောင်း၊ ၎င်းအား ပြတ်သားစွာ အရေးယူဆောင်ရွက်မှုသည် စင်ကာပူနိုင်ငံ၏ လူ့အခွင့်အရေးအပေါ် လေးစားလိုက်နာ ဆောင်ရွက်မှု၊ ကော်ပိုရိတ် တာဝန်ခံမှုအတွက် သာဓဏကောင်းတစ်ခု ပြသနိုင်မည်ဖြစ်ကြောင်းလည်း အိတ်ဖွင့်ပေးစာ၌ပါရှိသည်။

အိတ်ဖွင့်ပေးစာ၌ (၁) Interra Resources က မြန်မာစစ်အုပ်စုထံ ရေနံစိမ်းထောက်ပံ့မှုကို ချက်ချင်းရပ်တန့်စေရန် (၂) လူ့အခွင့်အရေးချိုးဖောက်မှုများတွင် နောက်ထပ် ကြံရာပါပတ်သက်မှုမရှိစေရေး ကာကွယ်သည့် အနေဖြင့် Interra Resources အား စင်ကာပူစတော့အိတ်ချိန်းမှ စာရင်းပယ်ဖျက်ရန် (၃) Interra Resources ၏ မြန်မာနိုင်ငံတွင်း လုပ်ငန်းဆောင်ရွက်မှုများအပေါ် စနစ်တကျ စုံစမ်းစစ်ဆေးမှုတစ်ရပ် လုပ်ဆောင်ရန်နှင့် ကုမ္ပဏီအား စစ်ရာဇဝတ်မှုတွင် အားပေးကူညီခဲ့ခြင်း၊ ထို့အပြင် MOGE အား အကြမ်းဖက်အဖွဲ့အစည်းဖြစ်သည့် မြန်မာစစ်တပ်က တရားမဝင် ထိန်းချုပ်ထားသည်ဖြစ်ရာ ငွေကြေးခဝါချမှု၊ အကြမ်းဖက်မှုအားငွေကြေးထောက်ပံ့မှုများအတွက် ရာဇဝတ်ကြောင်းအရ အရေးယူ တာဝန်ခံစေရန် (၄) မြန်မာ့ရေနံနှင့် သဘာဝဓာတ်ငွေ့လုပ်ငန်း(MOGE)၊ မြန်မာ့ရေနံဓါတုဗေဒလုပ်ငန်း (MPE) နှင့် မြန်မာ့နိုင်ငံခြားကုန်သွယ်ရေးဘဏ် (MFTB)၊ မြန်မာ့ရင်းနှီးမြှပ်နှံမှုနှင့် စီးပွားရေးဘဏ် (MICB)၊ မြန်မာ့စီးပွားရေးဘဏ် (MEB) တို့အပါအဝင် စစ်အုပ်စု ထိန်းချုပ်ဘဏ်များအပေါ် ပစ်မှတ်ထား ဒဏ်ခတ်ပိတ်ဆို့မှုများ ချမှတ်ရန် တို့အား မကွေးအခြေစိုက်အင်အားစုများက တောင်းဆိုထားသည်။

#Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၃ ရက်၊ ၂၀၂၅ | https://www.springsprouts.info/updates/nug-announced-that-sac-human-rights-commission-was-not-recognized-and-abolished

အကြမ်းဖက်စစ်အုပ်စု ပြင်ဆင်ဖွဲ့စည်းသည့် မြန်မာနိုင်ငံ အမျိုးသားလူ့အခွင့်အရေးကော်မရှင်သည် လွတ်လပ်၍ အမှီအခိုကင်းကာ ဂုဏ်သိက္ခာရှိသည့် အဖွဲ့အစည်းမဟုတ်ဘဲ ပဲရစ်အခြေခံမူများအား ဆန့်ကျင်ပြီး စစ်အုပ်စု အလိုကျ ရပ်တည်ဆောင်ရွက်ပေးနေသည့်အတွက် ယင်းအဖွဲ့အစည်းအား အသိအမှတ်မပြုကြောင်းနှင့် ဖျက်သိမ်းကြောင်း အမျိုးသားညီညွတ်ရေးအစိုးရ (NUG) က ဖေဖော်ဝါရီ ၁၃ ရက်တွင် ထုတ်ပြန်ကြေညာလိုက်သည်။

၂၀၂၅ ခုနှစ် ဇန်နဝါရီ ၁ ရက်က ထပ်မံဖွဲ့စည်းသည့် မြန်မာနိုင်ငံ အမျိုးသားလူ့အခွင့်အရေးကော်မရှင်သည် စစ်ကောင်စီအလိုကျ ရပ်တည်ဆောင်ရွက်ခဲ့သော အဖွဲ့ဝင်ဟောင်းများဖြင့် ထပ်မံ ဖွဲ့စည်းခြင်းဖြစ်ကာ လွတ်လပ်၊ အမှီအခိုကင်းသော ကော်မရှင် မဟုတ်ကြောင်း၊ Global Alliance of National Human Rights Institute (GANHRI) ကလည်း ယင်းကော်မရှင်သည် ပဲရစ်အခြေခံမူနှင့် မကိုက်ညီ၍ ၂၀၂၄ ခုနှစ် ဒီဇင်ဘာ၃၁ ရက်တွင် အသိအမှတ်ပြုခြင်းနှင့် အဖွဲ့ဝင်ဖြစ်ခြင်းအား ပြန်လည်ရုပ်သိမ်းပြီးဖြစ်ကြောင်း NUG ထုတ်ပြန်ချက်၌ ဖော်ပြထားသည်။

နိုင်ငံတကာအစိုးရများနှင့် အဖွဲ့အစည်းများအနေဖြင့်လည်း အသိအမှတ်ပြု လက်ခံခြင်း၊ တွေ့ဆုံခြင်း၊ အစည်းအဝေးများသို့ ဖိတ်ကြားခြင်း မပြုလုပ်ရန်လည်း NUG က တိုက်တွန်းထားသည်။

#NUG #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၄ ရက်၊ ၂၀၂၅ | https://www.springsprouts.info/updates/argentina-issues-arrest-warrant-for-min-aung-hlaing-and-22-others-for-genocide

ရိုဟင်ဂျာလူမျိုးသုဉ်း သတ်ဖြတ်မှုဖြင့် အာဏာသိမ်း စစ်အုပ်စုခေါင်းဆောင် ဗိုလ်ချုပ်မှူးကြီး မင်းအောင်လှိုင်၊ ဒုတိယစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်း အပါအဝင် ထိပ်တန်း စစ်ခေါင်းဆောင် ၂၃ ဦးအား အာဂျင်တီးနား Buenos Aires တရားရုံးက ဖေဖော်ဝါရီ ၁၃ ရက်တွင် ဖမ်းဝရမ်းထုတ်လိုက်ပြီဖြစ်ကြောင်းUK အခြေစိုက် မြန်မာရိုဟင်ဂျာအဖွဲ့ (BROUK) က ဖေဖော်ဝါရီ ၁၄ ရက်တွင် အသိပေးထုတ်ပြန်လိုက်သည်။

ရိုဟင်ဂျာများအပေါ် လူမျိုးသုဉ်း သတ်ဖြတ်မှု၊ လူသားမျိုးနွယ်အပေါ်ကျူးလွန်သည့် ရာဇဝတ်မှုများအတွက် လက်တင်အမေရိက အခြေစိုက် လူ့အခွင့်အရေးအဖွဲ့များက စုံစမ်းစစ်ဆေးပေးရန် ၂၀၁၉ ခုနှစ် နိုဝင်ဘာလကတည်းက အာဂျင်တီးနား တရားရုံးသို့ တောင်းဆိုခဲ့ပြီး ငါးနှစ်ကြာပြီးနောက် သက်သေခိုင်လုံသည့်အတွက် ယခုကဲ့သို့ ဖမ်းဝရမ်းထုတ်လိုက်ခြင်း ဖြစ်သည်။

BROUK ထုတ်ပြန်ချက်၌ ဝရမ်းထုတ်ခံရသည့် စစ်ခေါင်းဆောင်နှစ်ဦးအမည်ကိုသာ အဓိက ဖော်ပြထားပြီး ကျန်သူများအမည် မပါရှိပေ။

#Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၁၇ ရက်၊ ၂၀၂၅ | https://www.springsprouts.info/updates/mohai-announced-that-10-suspects-in-the-killing-of-fathar-martin-donald-will-be-court-martial

ရွှေဘိုခရိုင်၊ ကံကြီးတောကျေးရွာ၊ လုဒ်မယ်တော်သခင်မ ဘုရားကျောင်း၌ ဖေဖော်ဝါရီ ၁၄ ရက်က သတ်ဖြတ်ခံခဲ့ရသည့် မန္တလေးဂိုဏ်းချုပ်သာသနာမှ ဘုန်းတော်ကြီး မာသာရ်မာတင်ဒေါနယ် သတ်ဖြတ်ခံရမှု၌ သံသယရှိသူ (၁၀) ဦးအား အမျိုးသားညီညွတ်ရေးအစိုးရ (NUG) ၊ ကာကွယ်ရေးဝန်ကြီးဌာန၌ စစ်ခုံရုံးတင် စစ်ဆေးကာ ဥပဒေနှင့်အညီ အရေးယူသွားမည်ဟု NUG ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနက ဇန်နဝါရီ ၁၇ ရက်တွင် ထုတ်ပြန်လိုက်သည်။

သံသယတရားခံများမှာ ဒေသကာကွယ်ရေးတပ်ဖွဲ့တစ်ခုမှ အဖွဲ့ဝင်များ ဖြစ်ကာ ၎င်းတို့အား ပြည်သူ့ကာကွယ်ရေးတပ်မတော် (PDF) ရွှေဘိုခရိုင်တပ်ရင်း (၅) နှင့် တိုက်နယ် ပြည်သူ့ကာကွယ်ရေးတပ်ဖွဲ့ (ပကဖ) များက နေ့တွင်းချင်း ဖမ်းဆီးထားကြောင်း၊ လက်ရှိ၌ စုံစမ်းစစ်ဆေးရေးခုံရုံး ဖွဲ့စည်းကာ စစ်ဆေးမှုများ ဆောင်ရွက်နေကြောင်း ထုတ်ပြန်ချက်၌ ဖော်ပြထားသည်။

#NUG #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၂၀ ရက်၊ ၂၀၂၅ | https://www.springsprouts.info/updates/pslf-released-that-only-three-points-were-discussed-in-the-kumin-meeting

နှစ်ဘက်တပ်များ ရောက်ရှိရာနေရာ၌ ရပ်တန့်ကာ အပစ်ရပ်ရေး အပါအဝင် အချက်သုံးချက်အား တွေ့ဆုံညှိနှိုင်းမှုအတွင်း တောင်းဆိုဆွေးနွေးခဲ့သော်လည်း ဆွေးနွေးမှုခက်ခဲသည့်အတွက် တရုတ်အစိုးရ အထူးကိုယ်စားလှယ်မစ္စတာ တိန့်ရှီကျွင်းဦးဆောင်မှုဖြင့် ထပ်မံတွေ့ဆုံရန်ဖြင့်သာ အဆုံးသတ်ခဲ့ကြောင်း ပလောင်ပြည်နယ်လွတ်မြောက်ရေးတပ်ဦး (PSLF/TNLA) က ဖေဖော်ဝါရီ ၁၉ ရက်တွင် ထုတ်ပြန်လိုက်သည်။

တရုတ်နိုင်ငံ၊ ယူနန်ပြည်နယ်၊ ကူမင်းမြို့၊ ဟိုင်ဂင်ဟိုတယ်၌ ဖေဖော်ဝါရီ ၁၆၊ ၁၇ ရက်တို့တွင် တရုတ်စီစဉ်မှုဖြင့် PSLF/TNLA ဒုတိယဗိုလ်ချုပ်ကြီး တားဂျုတ်ဂျားဦးဆောင်အဖွဲ့နှင့် အကြမ်းဖက်စစ်အုပ်စုဘက်မှ ကစထ (၁) မှူး ဒုတိယဗိုလ်ချုပ်ကြီး ကိုကိုဦး ဦးဆောင်သည့်အဖွဲ့ တွေ့ဆုံခဲ့ခြင်း ဖြစ်သည်။

တွေ့ဆုံမှု၌ PSLF/TNLA က (၁) နှစ်ဖက်တပ်ရောက်ရှိသည့်နေရာတွင် ရပ်တန့်ထားပြီး အပစ်အခတ်ရပ်စဲရန် (၂) နှစ်ဖက်စလုံး ထိုးစစ်များပြုလုပ်ခြင်း၊ ဒရုန်းဖြင့်တိုက်ခိုက်ခြင်း၊ လက်နက်ကြီးများ ပစ်ခတ်ခြင်း၊ လေယာဉ်ဗုံးကြဲချခြင်း အစရှိသည့် စစ်ရေးလှုပ်ရှားမှုများအားလုံး ရပ်တန့်ရန် (၃) နှစ်ဖက်ထိန်းချုပ်နယ်မြေဒေသများတွင် ဒေသခံပြည်သူများ စားဝတ်နေရေးနှင့် ဆေးဝါးများ သယ်ဆောင်နိုင်ရန်အတွက် ဖြတ်သန်းသွားလာခွင့်ပြုရန် ညှိနှိုင်းခဲ့သော်လည်း အဆင်မပြေဖြစ်ခဲ့ခြင်း ဖြစ်သည်။ ထပ်မံတွေ့ဆုံမည့် အချိန်ကာလကိုမူ ထုတ်ပြန်ထားခြင်း မရှိသေးပေ။

#PSLF #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၂၀ ရက်၊ ၂၀၂၅ | https://www.springsprouts.info/updates/pdf-gangaw-announced-that-he-will-resign-from-nug-and-join-yaw-army

အမျိုးသားညီညွတ်ရေးအစိုးရ (NUG) ၊ ကာကွယ်ရေးဝန်ကြီးဌာန (MoD) လက်အောက်ရှိ ပြည်သူ့ကာကွယ်ရေးတပ်ဖွဲ့ - ဂန့်ဂေါ (ယောဒေသ) (PDF - Gangaw Battalion – YAW REGION) အမှတ် (၁၂) တပ်ရင်းရှိ တပ်ရင်းမှူး အပါအဝင် တပ်ဖွဲ့ဝင်များအနေဖြင့် MoD လက်အောက်မှ နုတ်ထွက်ကာ ယောတပ်တော် (YA) နှင့် ပူးပေါင်း၍ ယောဒေသနှင့် မြန်မာတစ်နိုင်ငံလုံး လွတ်မြောက်ပြီး ဖက်ဒရယ်ဒီမိုကရေစီရရှိသည်အထိ ဆက်လက်တိုက်ပွဲဝင်သွားမည်ဖြစ်ကြောင်း ဖေဖော်ဝါရီ ၁၉ ရက်က ထုတ်ပြန်ချက်အမှတ် ၁/၂၀၂၅ ဖြင့် ထုတ်ပြန်ကြေညာလိုက်သည်။

ပြည်သူ့ကာကွယ်ရေးတပ်ဖွဲ့ - ဂန့်ဂေါ (ယောဒေသ) အား ၂၀၂၁ ခုနှစ် ဇူလိုင် ၅ ရက်တွင် ဂန့်ဂေါမြို့နယ် အခြေစိုက်တပ်ရင်းအဖြစ် စတင်ဖွဲ့စည်းထားခြင်း ဖြစ်သည်။ ယင်းနောက် ၂၀၂၂ ခုနှစ် ဧပြီ ၁၃ ရက်တွင် NUG အစီအစဉ်ဖြင့် PDF အနောက်ပိုင်းတိုင်း၊ တပ်မဟာ (၇)၊ တပ်ရင်း (၇၀၁) အဖြစ် ပြောင်းလဲ တာဝန်ထမ်းဆောင်ခဲ့သည်။ ၂၀၂၂ ခုနှစ် နိုဝင်ဘာ ၉ ရက်တွင် တပ်ရင်း (၇၀၁) မှ အမှတ် (၁) စစ်ဒေသ၊ ဂန့်ဂေါခရိုင် အမှတ် (၁၂) တပ်ရင်းအဖြစ် ပြောင်းလဲခဲ့သည်။ ၂၀၂၅ ခုနှစ် ဇန်နဝါရီ ၁၉ ရက်တွင် NUG – MoD အား တပ်ရင်း ပြန်လည်အပ်နှံခဲ့သော်လည်း ခွင့်မပြုသဖြင့် တပ်ရင်းမှူး၊ ဒုတပ်ရင်းမှူး၊ တပ်ရေးဗိုလ်ကြီး၊ တပ်ထောက်၊ ဘဏ္ဍာရေးတာဝန်ခံ၊ တပ်ခွဲ (၁) (၂) (၃) (၄) မှ တပ်ခွဲမှူး၊ တပ်စုမှူး၊ ဒုတပ်စုမှူး၊ တပ်စိပ်မှူး၊ ဒုတပ်စိပ်မှူး၊ ရဲဘော်များက နုတ်ထွက်စာတင်ကာ ယောတပ်တော် (YA) တွင် ဆက်လက်တာဝန်ထမ်းဆောင်မည်ဖြစ်ကြောင်း ထုတ်ပြန်ချက်၌ ပါရှိသည်။

#NUG #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၂၆ ရက်၊ ၂၀၂၅ | https://www.springsprouts.info/updates/agreement-between-cc-and-icncc-to-form-a-single-chin-national-council

ချင်းပြည်နယ်၌ ကောင်စီနှစ်ရပ် ရှိနေခြင်း မဖြစ်သင့်ကြောင်း လက်ခံယုံကြည်သည့်အတွက် "ချင်းအမျိုးသားကောင်စီ" အမည်ဖြင့် ပေါင်းစည်းရန် သဘောတူညီလိုက်ပြီဖြစ်ကြောင်း ချင်းပြည်ကောင်စီ (Chinlnad Council – CC) နှင့် ကြားကာလ ချင်းအမျိုးသား အတိုင်ပင်ခံကောင်စီ (InterimChin National Consultative Council – ICNCC) တို့က ဖေဖော်ဝါရီ ၂၆ ရက်တွင် ပူးတွဲထုတ်ပြန်လိုက်သည်။

တစ်ခုတည်းသော ကောင်စီအား "ချင်းအမျိုးသားကောင်စီ" ဟု ခေါ်တွင်ရန် သဘောတူထားပြီဖြစ်ကာ ကောင်စီအမြန်ဆုံးပေါ်ပေါက်လာနိုင်ရေးအတွက် ချင်းအမျိုးသား ဖွဲ့စည်းပုံအခြေခံဥပဒေမူကြမ်းရေးဆွဲရေးအဖွဲ့ ဖွဲ့စည်းရန်လည်း သဘောတူညီထားပြီဖြစ်ကြောင်း ပူးတွဲထုတ်ပြန်ချက်၌ ပါရှိသည်။

#ICNCC #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၂၇ ရက်၊ ၂၀၂၅ | https://www.springsprouts.info/updates/mandalay-interim-plan-has-been-drawn-up-to-chapter-9

မန္တလေးဒေသ ကြားကာလအစီအမံအား အများပြည်သူ အကြံပြုချက် ရယူ၍ ရေးဆွဲလျက်ရှိရာ လက်ရှိတွင် အခန်း (၉) ခု အထိ ရေးဆွဲပြီး ဖြစ်ကြောင်း ကြားကာလ နိုင်ငံရေးအစီအမံ ဖော်ထုတ်မှုဆိုင်ရာ ချိတ်ဆက်ညှိနှိုင်ရေးနှင့် မူကြမ်းရေးဆွဲရေး လုပ်ငန်းကော်မတီက ကြေညာချက်အမှတ် ၄/၂၀၂၅ ဖြင့် ဖေဖော်ဝါရီ ၂၆ ရက်က ထုတ်ပြန်လိုက်သည်။

ရေးဆွဲပြီးစီးသွားသည့်အခန်း (၉) ခုမှာ (၁) ရည်ရွယ်ချက် (၂) စံတန်ဖိုး (၃) အခြေခံမူများ (၄) အခြေခံအခွင့်အရေး၊ ရပိုင်ခွင့်နှင့် တာဝန်များ (၅) မန္တလေးဒေသ ပြည်သူ့တော်လှန်ရေးအင်အားစုများ ပေါင်းစပ်ညှိနှိုင်းမှုစင်္ကြံ (၆) ကြားကာလဥပဒေပြုရေး (၇) ကြားကာာလအုပ်ချုပ်ရေး (၈) ကြားကာလတရားစီရင်ရေး (၉) ဖက်ဒရယ်ပြည်ထောင်စု၊ အခြားပြည်နယ်/ဖက်ဒရယ်ယူနစ်များနှင့် မန္တလေးဒေသအကြား ဆက်သွယ်ဆက်ဆံရေးတို့ ဖြစ်သည်။

မူကြမ်းချထားသည့် ကြားကာလအစီအမံအရ အခန်း (၃) ခန်းရေးဆွဲရန် ကျန်ရှိသေးကာ အသွင်ကူးပြောင်းရေးကာလဆိုင်ရာ ကြိုတင်ပြင်ဆင်ရေး ပြဌာန်းချက်များ၊ ကြားကာလ နိုင်ငံရေးအစီအမံကို ပြင်ဆင်ခြင်းနှင့် အထွေထွေပြဌာန်းချက်တို့ ဖြစ်သည်။

#MFM #AFCC #Updates #SpringSprouts

မှတ်တိုင်များ
- - - - - - - -
ဖေဖော်ဝါရီလ ၂၈ ရက်၊ ၂၀၂၅ | https://www.springsprouts.info/updates/knhrg-releases-2024-annual-report-titled-spirited-resistance

လူ့အခွင့်အရေးအခြေအနေများနှင့် ပတ်သက်၍ ကရင်နီပြည်နယ် အခြေပြု လုပ်ကိုင်နေသည့် ကရင်နီလူ့အခွင့်အရေးအဖွဲ့ (Karenni Human Rights Group – KnHRG) က ၂၀၂၄ ခုနှစ်အတွက် နှစ်ပတ်လည်အစီရင်ခံစာအား "Spirited Resistance” အမည်ဖြင့် ဖေဖော်ဝါရီ ၂၈ ရက်တွင် ထုတ်ပြန်လိုက်သည်။

အစီရင်ခံစာ၌ ကရင်နီဒေသအတွင်း အကြမ်းဖက်စစ်အုပ်စု၏ တိုက်ခိုက်မှုပုံစံမျိုးစုံကြောင့် သေဆုံးခဲ့ရသည့် အပြစ်မဲ့ပြည်သူအရေအတွက်၊ KnHRG ၏တစ်နှစ်အတွင်း လုပ်ဆောင်ခဲ့သည့် လုပ်ငန်းစဉ်များ၊ စိန်ခေါ်မှုနှင့် ၂၀၂၅ ခုနှစ်အတွက် မျှော်ရည်ချက်၊ ဘဏ္ဍာရေးအသုံးစရိတ်ရှင်းတမ်းများကိုပါ ထည့်သွင်းဖော်ပြထားသည်။

#Updates #SpringSprouts

မှတ်တိုင်များ
- - - - - - - -
မတ်လ ၁ ရက်၊ ၂၀၂၅ | https://www.springsprouts.info/updates/prf-issued-a-political-manifesto-with-three-principles

ဆိုရှယ်ဒီမိုကရေစီကို ယုံကြည်လက်ခံကာ စစ်အာဏာရှင်စနစ် အမြစ်ပြတ်တိုက်ထုတ်ရေး၊ ဒီမိုကရေစီရေးနှင့် ငြိမ်းချမ်းရေး မူသုံးချက်အား ကိုင်စွဲထားမည်ဟု ပြည်သူ့တော်လှန်ရေးတပ်ဦး (People’s Revolution Front – PRF) က ဖေဖော်ဝါရီ ၂၇ ရက်တွင် တပ်ဦးနိုင်ငံရေးကြေညာစာတမ်းနှင့်အတူ ကြေညာထုတ်ပြန်လိုက်သည်။

နိုင်ငံရေးကြေညာစာတမ်း၌ တပ်ဦး၏ အတွေးအခေါ်နှင့် မူဝါဒ (၃) ရပ်၊ တပ်ဦး၏ အဓိက လုပ်ငန်းစဉ်များအဖြစ် နိုင်ငံရေးတိုက်ပွဲ၊ လက်နက်ကိုင်တိုက်ပွဲ၊ တပ်ပေါင်းစုတည်ဆောက်ရေး ချမှတ်ထားမှုအပြင် နိုင်ငံတကာနှင့် ပြည်တွင်းအခြေအနေအပေါ် တပ်ဦး၏ ရှုမြင်သုံးသပ်ချက်ကိုလည်း ထည့်သွင်းဖော်ပြထားသည်။

#Updates #SpringSprouts

မှတ်တိုင်များ
- - - - - - - -
မတ်လ ၃ ရက်၊ ၂၀၂၅ | https://www.springsprouts.info/updates/permanent-disbandment-of-the-ypdf

ယောဒေသ ပြည်သူ့ကာကွယ်ရေးတပ်ဖွဲ့ (YPDF) အား ပိုမိုကောင်းမွန်သော အရွေ့သို့ တက်လှမ်းဆောင်ရွက်ရန်အတွက် ၂၀၂၅ ခုနှစ် ဖေဖော်ဝါရီ ဒုတိယအပတ်အတွင်း ပြုလုပ်သည့် တပ်ဖွဲ့ ဗဟိုအလုပ်အမှုဆောင်ကော်မတီအစည်းအဝေး (၂/၂၀၂၅) အရ အပြီးတိုင် ဖျက်သိမ်းပြီဖြစ်ကြောင်း မတ် ၂ ရက်တွင် ထုတ်ပြန်လိုက်သည်။

YPDF အဖွဲ့အား စစ်အာဏာရှင် အမြစ်ဖြတ်တိုက်ထုတ်ရေး၊ ဖက်ဒရယ်ဒီမိုကရေစီ ရရှိရေး၊ ယောဒေသ ပြည်သူလူထု အသက်အိုးအိမ်စည်းစိမ်လုံခြုံရေးအတွက် ၂၀၂၁ ခုနှစ် မတ်လအတွင်းက စတင်ဖွဲ့စည်းခဲ့ခြင်းဖြစ်ကာ ထုတ်ပြန်ချက်အား ဗဟိုအလုပ်အမှုဆောင်ကော်မတီဥက္ကဋ္ဌ ရဲဘော်ယောလေး အမည်ဖြင့် ထုတ်ပြန်ခြင်း ဖြစ်သည်။

လက်ရှိတွင် မိမိတို့ တပ်ဖွဲ့ မျှော်မှန်းခဲ့သည့်အတိုင်း ယောအမျိုးသားနိုင်ငံရေးကို ညီညီညာညာ စုစုစည်းစည်းဖြင့်ဆောင်ရွက်ရန် အချိန်အခါကောင်းသို့ ရောက်ရှိနေပြီဆိုသည့်အသိစိတ်သည် လက်နက်ကိုင်တော်လှန်ရေး ဆင်နွှဲနေကြသည့် ဒေသတွင်း တော်လှန်ရေးတပ်ဖွဲ့များတင်မက ပြည်သူလူထုကပါ အသိအမြင်များ နိုးကြား သန္ဓေတည်လာခဲ့ကြပြီဖြစ်ကာ တော်လှန်ရေး၊ ယောအမျိုးသားနိုင်ငံရေးကို စုစည်းညီညွတ်သော အခင်းအကျင်းဖြင့် ပိုမိုကောင်းမွန်သော အရွေ့ကို တက်လှမ်းကာ တပ်ဖွဲ့ဝင်အားလုံး ဆက်လက်ဆောင်ရွက်နေမည်ဖြစ်ကြောင်း ထုတ်ပြန်ချက်၌ ဖော်ပြထားသည်။

#Updates #SpringSprouts

မှတ်တိုင်များ
- - - - - - - -
မတ်လ ၄ ရက်၊ ၂၀၂၅ | https://www.springsprouts.info/updates/ypdf-and-ya-announced-that-they-will-form-a-single-army

အပြီးတိုင် ဖျက်သိမ်းလိုက်ပြီဖြစ်သည့် ယောပြည်သူ့ကာကွယ်ရေးတပ်ဖွဲ့ (YPDF) နှင့် တပ်တစ်ခုတည်းအဖြစ် အတူတည်ဆောက်ကာ ဆက်လက်တိုက်ပွဲဝင်သွားမည်ဖြစ်ကြောင်း ယောတပ်တော် (Yaw Army – YA) က မတ် ၃ ရက်တွင် ထုတ်ပြန်လိုက်သည်။

ယခု စုပေါင်းနိုင်မှုသည် ယောအမျိုးသား တည်ဆောက်ရေး၊ ညီညွတ်ရေးအတွက် အရေးပါသော ခြေလှမ်းတစ်ခုဖြစ်ကာ စစ်အာဏာရှင်အား ပိုမိုထိရောက်စွာ ထိုးနှက်တိုက်ခိုက်ရန် အင်အားတစ်ခု ဖြစ်ကြောင်း၊ ဖက်ဒရယ်ဒီမိုကရေစီပြည်ထောင်စု တည်ဆောက်ရေးတွင် ယော တို့၏တန်းတူညီမျှစွာ ပါဝင်ရပ်တည်ခွင့်အတွက် ယော ဟူသော ဝိသေသလက္ခဏာ ကိုင်စွဲကာ ဆက်လက်တိုက်ပွဲဝင်သွားမည်ဟုလည်း ထုတ်ပြန်ချက်၌ ပါရှိသည်။

#Updates #SpringSprouts

မှတ်တိုင်များ
- - - - - - - -
မတ်လ ၄ ရက်၊ ၂၀၂၅ | https://www.springsprouts.info/updates/formation-of-the-irrawaddy-based-idla-army

စစ်သုံးစစ် တိုက်ဖျက်ရေး အပါအဝင် ရည်ရွယ်ချက် လေးရပ်ဖြင့် ဧရာဝတီမြစ်ဝကျွန်းပေါ် လွတ်မြောက်ရေးတပ်တော် (Irrawaddy Delta Liberation Army – IDLA) အား ၂၀၂၅ ခုနှစ် ဇန်နဝါရီ ၁ ရက်တွင်စတင်ဖွဲ့စည်းထားပြီ ဖြစ်ကြောင်း ဧရာဝတီမြစ်ဝကျွန်းပေါ် အမျိုးသားများပြည်နယ်ကောင်စီ ဥက္ကဋ္ဌ မန်းဖန်းရှောင်းက ကြေညာချက် အမှတ် (၂) ဖြင့် ဖေဖော်ဝါရီ ၂၈ ရက်တွင် ထုတ်ပြန်ထားသည်။

ဧရာဝတီမြစ်ဝကျွန်းပေါ် အမျိုးသားပြည်နယ်ရှိ စစ်အစိုးရ၊ စစ်အာဏာရှင်စနစ်နှင့် စစ်ဗျူရိုကရေစီယန္တရားအားလုံး လုံးဝ (လုံးဝ) ဖျက်သိမ်းရန်၊ အမျိုးသားများပြည်နယ်ရှိ တိုင်းရင်းသားလူမျိုးပေါင်းစုံပြည်သူလူထု၏ အသက်အိုးအိမ်စည်းစိမ်ကို ကာကွယ်ရန်၊ ပြည်နယ်ဖွဲ့စည်းအုပ်ချုပ်ပုံအခြေခံဥပဒေကို အခိုင်အမာ ကာကွယ်စောင့်ရှောက်ရန်၊ အနာဂတ်ဖယ်ဒရယ်တပ်မတော်တွင် အင်အားစုတစ်ခုအဖြစ် အခိုင်အမာရပ်တည်ရန် IDAL အား ရည်ရွယ်ထားသည်။

ပြည်နယ်ကောင်စီအား ၂၀၂၄ ခုနှစ် သြဂုတ် ၁ ရက်က စတင်ဖွဲ့စည်းထားခြင်းဖြစ်ကာ ကြေညာချက်၌ ကောင်စီအကြံပေးအဖွဲ့ဝင်များ၊ ကောင်စီဝင်များ တိုးချဲ့ဖွဲ့စည်းထားပြီဖြစ်ကြောင်းလည်း အမည်များနှင့်တကွ ဖော်ပြထားသည်။

#Updates #SpringSprouts

မှတ်တိုင်များ
- - - - - - - -
မတ်လ ၇ ရက်၊ ၂၀၂၅ | https://www.springsprouts.info/updates/nug-human-rights-deputy-minister-granted-leave-of-absence

အမျိုးသားညီညွတ်ရေးအစိုးရ (NUG) လူ့အခွင့်အရေးဆိုင်ရာဝန်ကြီးဌာန ဒုတိယဝန်ကြီးတစ်ဦးဖြစ်သူ ခွန်းဗဟန်းထန်အား တာဝန်မှ အနားယူခွင့် ပြုလိုက်ပြီဖြစ်ကြောင်း NUG က မတ် ၇ ရက်တွင် ထုတ်ပြန်လိုက်သည်။

NUG ပြည်ထောင်စုဝန်ကြီးချုပ် မန်းဝင်းခိုင်သန်း လက်မှတ်ထိုးထားသည့် အမိန့်အမှတ် ၁၁/၂၀၂၅ ဖြင့် ဖေဖော်ဝါရီ ၂၁ ရက်တွင် ဒုဝန်ကြီးအား တာဝန်မှ အနားယူခွင့်ပြုခဲ့ခြင်းဖြစ်ကာ မတ် ၇ ရက်ကျမှ တရားဝင်ထုတ်ပြန်ခဲ့ခြင်းလည်း ဖြစ်သည်။

#NUG #Updates #SpringSprouts

မှတ်တိုင်များ
- - - - - - - -
မတ်လ ၁၂ ရက်၊ ၂၀၂၅ | https://www.springsprouts.info/updates/yangon-strike-force-sends-open-letter-to-eu-and-ilo

လုပ်သားပြည်သူများ၏တရားမျှတမှုနှင့် အခွင့်အရေးများအား ကာကွယ်ရန်အတွက် မြန်မာပြည်သူများဘက်မှ ရပ်တည်ပေးရန် ဥရောပသမဂ္ဂ (EU) အစိုးရအဖွဲ့ဝင်များ၊ အပြည်ပြည်ဆိုင်ရာ အလုပ်သမားရေးရာအဖွဲ့ (ILO) အဖွဲ့ဝင်နိုင်ငံများသို့ ရန်ကုန်အခြေစိုက် သပိတ်အင်အားစု ၁၁ ဖွဲ့ စုပေါင်းကာ မတ် ၁၂ ရက်က အိတ်ဖွင့်ပေးစာပို့ ပန်ကြားထားသည်။

“နိုင်ငံသားတစ်ဦး၏ ဒီမိုကရေစီ အခွင့်အရေး၊ လွတ်လပ်ခွင့်များ ဆုံးရှုံးရန် အတင်းအဓမ္မ စစ်ကျွန်ပြုနေသော အာဏာသိမ်းစစ်တပ်အား အရေးယူပေးပါရန် တောင်းဆိုခြင်း" ခေါင်းစဉ်ဖြင့် ပေးပို့သည့် အိတ်ဖွင့်ပေးစာ၌ မြန်မာစစ်တပ်သည် ILO စုံစမ်းစစ်ဆေးရေးကော်မရှင်၏ အကြံပြုချက်များကို လေးစားလိုက်နာမှု မရှိသည့်အပြင် ပိုမိုဆိုးရွာစွာ ချိုးဖောက်နေကြောင်း၊ လာမည့် မတ် ၁၀ ရက်မှ ၂၁ ရက်အထိ ပြုလုပ်မည့် ILO Governing Body – ILO အမှုဆောင်အစည်းအဝေး၌ ယင်းအချက်များ ရရှိရေးအတွက် EU နှင့် ILO အဖွဲ့ဝင်နိုင်ငံများအနေဖြင့် မြန်မာပြည်သူများနှင့်အတူ ရပ်တည်ဆုံးဖြတ်ပေးရန် တိုက်တွန်းတောင်းဆိုထားသည်။

အကြမ်းဖက်စစ်အုပ်စု အာဏာသိမ်းပြီးနောက် လူမဆန်သည့် ရာဇဝတ်မှုမျိုးစုံအား စစ်တပ်က ကျူးလွန်နေသောကြောင့် လိုက်နာလုပ်ဆောင်ရမည့် အကြံပြုချက် တိုက်တွန်းချက် (၁၀) ချက်အား ၂၀၂၃ ခုနှစ်အောက်တိုဘာ ၄ ရက်ကတည်းက ILO စုံစမ်းစစ်ဆေးရေးကော်မရှင်က ထုတ်ပြန်ထားပြီး ဖြစ်သည်။

သပိတ်အင်အားစုများဖြင့် စုဖွဲ့ထားသည့် အထွေထွေသပိတ် ပေါင်းစပ်ညှိနှိုင်းရေးကော်မတီ (GSCB) နှင့် ချိတ်ဆက်ထားသော နိုင်ငံအနှံ့ရှိ အခြားဒေသများမှ မြေပြင်သပိတ်အင်အားစုများ၊ ဒေသခံ တောင်သူ၊ လယ်သမား၊ အလုပ်သမားများကလည်း စစ်အုပ်စုအား ILO ပုဒ်မ ၃၃ အရ ချက်ချင်းအရေးယူပေးရန်အတွက် "ILO implement Article 33 on Myanmar Now 2025” ဆောင်ပုဒ်များကိုင်ဆောင်၍ ဆန္ဒထုတ်ဖော်မှုများလည်း ရှိနေသည်။

ပုဒ်မ (၃၃) တွင် အဖွဲ့ဝင် နိုင်ငံတစ်နိုင်ငံတစ်ခုခုက နိုင်ငံတကာ အလုပ်သမားစံနှုန်းများအား ချိုးဖောက်ခဲ့ပါက ပိတ်ဆို့အရေးယူမှု ပြုလုပ်နိုင်ကြောင်း ပြဌာန်းထားသည်။

#GSCC #Updates #SpringSprouts

မှတ်တိုင်များ
- - - - - - - -
မတ်လ ၂၀ ရက်၊ ၂၀၂၅ | https://www.springsprouts.info/updates/aa-responds-that-drug-issue-is-a-political-attack


ကျပ် ၉၆ ဘီလျံ တန်ဖိုးရှိ မူးယစ်ဆေးဝါးဖမ်းဆီးရမှုတွင် အာရက္ခတပ်တော် (AA) ၏ စီးပွားရေးတာဝန်ခံ ရဲဝင်း (ခ) ကျော်စိုးလင်းနှင့် ဇနီးဖြစ်သူ မသီတာမြင့်တို့ ပါဝင်သည်ဟု မတ် ၁၈ နှင့် ၁၉ ရက်ထုတ် စစ်တပ်အာဘော် သတင်းစာများ၌ ထည့်သွင်းဖော်ပြမှုသည် မိမိတို့ အဖွဲ့အစည်းနှင့် မည်သို့မျှ မဆက်စပ်ကြောင်းနှင့် အငြိုးအတေးကြီးစွာ နိုင်ငံရေးအရ ထိုးနှက်ခြင်းသာ ဖြစ်ကြောင်း ရက္ခိုင့်အမျိုးသားအဖွဲ့ချုပ်/အာရက္ခတပ်တော် (ULA/ AA) က မတ် ၁၉ ရက်တွင် ထုတ်ပြန် တုံ့ပြန်လိုက်သည်။

စစ်ကောင်စီ လက်အောက်ခံ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ ထုတ်ပြန်ချက်အရ မတ် ၆ ရက်တွင် ယင်းမူးယစ်ဆေးဝါးများ၊ ဆက်စပ်သူများအား ဖမ်းဆီးမိပြီး ဖမ်းဆီးမိသူများ ထုတ်ဖော်မှုအရ AA စီးပွားရေးတာဝန်ခံမှာ မူးယစ်ဆေးများအား မလေးရှားပင်လယ်ရေပြင်သို့ ချိတ်ဆက်ပို့ဆောင် ရောင်းချရန် စီမံခန့်ခွဲသူများဖြစ်ကာ ဇနီးဖြစ်သူမှာ ရွှေကောင်းသာ စက်လှေပိုင်ရှင်ဖြစ်ကြောင်း၊ ၎င်းတို့နှစ်ဦးသည် တန့်ယန်း၊ တောင်ကြီး၊ မန္တလေးနှင့် ရန်ကုန်မြို့တို့တွင် ကားဂိတ်များ ဖွင့်ကာ ခရီးသည်တင်ယာဉ် ၁၆ စီးဖြင့် သယ်ယူပို့ဆောင်ရေးလုပ်ငန်းများ လုပ်ကိုင်နေကြောင်း ပါရှိသည်။

စစ်ကောင်စီသည် ခေတ်အဆက်ဆက် တော်လှန်ပုန်ကန်သူများအား ညှိနှိုင်းဆွေးနွေးရန်မလိုသော ရန်ဘက်အဖြစ် သတ်မှတ်ကာ သတင်းအမှားများဖြင့် လုပ်ကြံဖန်တီး တိုက်ခိုက်လေ့ရှိကြောင်း၊ ULA/AA အားနိုင်ငံရေးအောက်လုံးများဖြင့် အချိန်ကိုက် ထိုးနှက်တိုက်ခိုက်သော လုပ်ရပ်၊ နိုင်ငံရေးသိက္ခာချသော လုပ်ရပ်သာ ဖြစ်သည့်အပြင် ၎င်းတို့ ကျူးလွန်သော ပြစ်မှုအားမိမိတို့အပေါ် လွှဲချသောလုပ်ရပ်သာ ဖြစ်သည်ဟု ULA/AA ထုတ်ပြန်ချက်၌ ပါရှိသည်။

AA သည် သီးခြားဆန်သော အဖွဲ့အစည်းဖြစ်ကာ ရိုဟင်ဂျာအရေးနှင့် ပတ်သက်၍ AA နှင့် စကားပြောရမည် ဖြစ်ကြောင်း ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်က မတ် ၁၅ ရက်တွင် ဘင်္ဂလားဒေ့ရှ်နိုင်ငံ၊ ဒါကာမြို့၌ ပြုလုပ်သည့် သတင်းစာရှင်းလင်းပွဲ၌ သတင်းသမားများအား ထုတ်ဖော်ပြောဆိုပြီးနောက် ယခု မူးယစ်ဆေးစွပ်စွဲချက် ပေါ်ထွက်လာခြင်းလည်း ဖြစ်သည်။

လက်ရှိတွင် AA ရခိုင်ပြည်နယ်တစ်ခုလုံး၌ မြိုနယ်သုံးခုမှ လွဲ၍ ကျန်မြို့နယ်များအားလုံးအား သိမ်းယူထားပြီးဖြစ်ကာ မကွေး၊ ဧရာဝတီ စသည့် တိုင်းဒေသကြီးများ၌လည်း ထိုးစစ်ပြုလုပ်လျက် ရှိသည်။

#ULA/AA #Updates #SpringSprouts

မှတ်တိုင်များ
- - - - - - - -
မတ်လ ၂၂ ရက်၊ ၂၀၂၅ | https://www.springsprouts.info/updates/forces-form-new-alliance

တူညီသောပန်းတိုင်အတွက် ရန်ကုန်အခြေစိုက် ရန်ကုန်တော်လှန်ညီနောင်လေးဖွဲ့နှင့် ရန်ကုန်ဒရုန်းတို့အကြား တော်လှန်ရေးပြီးမြောက်ကာ ပြန်လည်ထူထောင်ရေးကာလအထိ ပြည်သူ့အကျိုးအတွက် မဟာမိတ်အဖြစ် အတူလက်တွဲမည် ဖြစ်ကြောင်း မတ် ၂၂ ရက်တွင် ထုတ်ပြန်လိုက်သည်။

ရန်ကုန်တော်လှန်ညီနောင်လေးဖွဲ့၌ Kyimyindaing Networks (KMD18)၊ Mayangone Democratic Front (MDF)၊ Owl Community နှင့် Linn Yaung Ni Youth Organization (LYNYO) တို့ ပါဝင်ကာ လက်ရှိတွင် ရန်ကုန်မြို့ပြ၌ စစ်အာဏာရှင်ဆန့်ကျင်ရေးဆန္ဒပြလှုပ်ရှားမှုများအား ဆက်တိုက်ပြုလုပ်လျက်ရှိသည့် သပိတ်အင်အားစုလည်း ဖြစ်သည်။

#Updates #SpringSprouts