ده خط للتلفون هو عبارة عن الخط بتاع سبوتيفي انا دمجت الخط العربي والخط الانجليزي مع بعض وان شاء الله يعجبكم

دي خلفيات متحركة مش بتأثر ع البطارية خالص.
التأثير بيظهر اول ما تفتح الفون.
اعملهم تثبيت وبعدين
روح الشاشة الرئيسية وأضغط ضغطة مطولة وروح للخلفيات وبعدين اعمل تغيير الخلفية وبعدين اضغط ع التلت نقط اللي فوق واضغط على live wallpaper هتلاقي الخلفيات هناك اعملهم تعيين.

لو عايزين تضيفوا الميزة دي

Object Eraser
Shadow Eraser
Reflections Eraser

كل اللي عليكم تسمعوا الفيديو ده

وتنزلوا الملفات من الرابط ده

الباسوورد estechno

إزاي تقفل الألبوم ف المعرض او ال gallery
اولا روح على الاعدادات 》》 عن المعرض او about gallery 》》دوس على version اكتر من ٥ مرات 》》اقفل البرنامج وافتحه تاني》》الاعدادات》》gallery labs او تجريبي 》》هتلاقي حاجه اسمها gallery entry lock فعلها وبعدين تقدر تقفل الألبوم

فيه مميزات تانية ممكن تضيفها مثلا منها:
١)دعم حفظ الصور كملفات pdf.
٢)طباعة عدة صور مع بعض.
٣)طريقة عرض الفيديو قبل تشغيله ف مشغل الفيديوهات.
ده كله عن طريق labs

ازاي تمنع الإعلانات عن التليفون كله حرفيا اي اعلان بيظهرلك حتى لو على المتصفح؟

اولا ادخل على:

الاعدادات

Connections الاتصالات

More connection settings المزيد من اعدادت الاتصال

Private DNS

اختار private dns provider hostname

وبعدين اكتب الكود ده
dns.adguard.com

وبكده تكون منعت الاعلانات من التليفون كله حتى اللي بتظهر ع النت.


ملحوظة!!
١)لو فتحت البيانات ولاقيت النت ضعيف خليها off وبعدين اعملها تاني لما توصل بالوايفاي.

٢)لو لقيت في موقع مش راضي يحمل معاك اقفل الخاصية ديوهو هيشتغل،،،
عشان المواقع دي بتبقى فيها تولز بتكشف مانع الاعلانات فلازم تبطل الخاصية على ما تاخد اللي انت عايزه وبعد كده ابقى شغلها تاني.

فيه module لبرنامج good lock اسمها
............................... RegiStar .............................

حملوها من الرابط ده

المميزات:

●لما تضرب على ضهر التلفون ضربتين او تلاته ده يعملك حاجه مثلا زي ان هو ممكن ياخد اسكرين شوت او يبدأ يسجل او يشغل الفلاش الى آخره.

●ممكن تعيد تنظيم القوائم اللي ف الإعدادات على مزاجك زي ان انت مثلا ممكن تجيب قايمة (عن الهاتف او about phone) بدل ما هي تحت خالص لأ ممكن تجيبها فوق عند wifi وهكذا....

●تقدر تخصص لما انت تفضل دايس على زرار الباور ايه اللي يحصل يشغل الفلاش او يفتح الكاميرا او .... .

طب لما اثبتها ازاي افتحها؟؟!

انت مش هتلاقيها ف برنامج good lock ممكن تنزل finelock من على
google play
وهتلاقيها ف البرنامج.

ممكن تنزل fine lock من الرابط ده.

ده نفس الخط بس مش بولد bold

..............................《zFont 3》............................
البرنامج ده بيخليك تطبق أي فونت انت عايزه للتلفون بس لازم يكون الفونت بصيغة ttf لو كان بأي صيغة تانية زي otf ممكن تحوله ل ttf ببرنامج zFont tools ممكن تنزله من هنا.

الخطوات::

١-هتنزلوا البرنامج من اللينك ده.

٢-هتدخلوا غلى البرنامج وتروحوا على قايمة local محلي.

٣-إختار الفونت اللي انت عايزة من الجاز عن طريق الضغط على علامة [+].

٤-أعمل Apply تطبيق.

٥-اختار OneUi #All.

٦-أضغط على الخطوات اللي هتظهرلك واحدة وره التانية.

٧-بعد اما تخلص اتاكد ان الخط اللي انت مختارة هو samsung sans من الإعدادات بتاع الجهاز.

٨-لازم تعمل ريستارت للجهاز لازم.
هتلاقي الخط اطبق معاك ان شاء الله...

السلام عليكم ف المنشور ده ان شاء الله هقولكم ازاي تعايرو البطارية او تظبطوا القراءة بتاعة الجهاز للبطارية.

الخطوات:

١) هتستخدم موبايلك لغاية اما يوصل ل ٥%.

٢) متوصلش الشاحن،،،هتكتب ف برنامج الهاتف الكود ده *#8220# من اليمين لليسار، هتطلعلك قائمة اضغط تحت على Quick Start، هتطلعلك رسالة اضغط على Ok ومتخافش.

٣) سيب التليفون لغاية اما يفتح وغالبا هتلاقي نسبة البطارية اتغيرت يعني بقت اقل من ٥% .

٤)هتشحن التلفون لغاية ١٠٠%  ومتفصلش الشاحن واعمل اعادة تشغيل للجهاز وبعد كده افصل الشاحن.

٥) كرر الخطوات ٢ و ٤ تقريبا ٣ مرات لغاية اما تلاقي النسبة معدتش بتتغير ولو لسه بتنزل حاول كزه مره كمان لغاية اما تظبط معاك.

٦) بعد اما النسبة معدتش بتنزل عن ١٠٠%، افتح برنامج الهاتف واكتب الكود ده *#0099# وانزل تحت واضغط علي batterystats reset،،، وبعد كده اطلع من القايمة دي و اعمل اعادة تشغيل.

٧) كرر الخطوات دي تاني بعد اسبوع.

بس كده بعد اما تنفذ الخطوات دي كده انت ظبطت قراية الجهاز للبطارية وهتشتغل معاك ان شاء الله بشكل احسن من الاول...🥰

.....................تثبيت سوفتوير للتلفون..................

مين اللي هيستفاد؟
ده حل لكل شخص
١) تلفونه مش بيجيله تحديثات.
٢) تلفونه بيهنج او بطئ ممكن ينزل التحديث القديم او اول تحديث التلفون طالع بيه من العلبه.
٣) عايز يغير السوفتوير بتاعه لدول تانية زي الهند مثلا.... .

التحذيرات!!
مينفعش تثبت غير السوفتوير بتاع تلفونك انت بس يعني مش تلفونك a20، تروح تنزل بتاع A54 وتقول عشان اخد المميزات اللي فيه لو عملت كده السوفتوير مش هيتثبت معاك.

المتطلبات::
الموبايل مشحون اكتر من ٧٠ %
جهاز كمبيوتر او ولابتوب.
كابل usb اصلي بتاع الجهاز عشان نتفادي اي مشاكل.

الملفات المطلوبة::
هتنزل ملف من الموقع ده وتثبته على الكمبيوتر او اللاب عشان يتعرف ع التلفون وميحصلش مشاكل

https://developer.samsung.com/android-usb-driver

برنامج odin 3 هتنزله من الرابط ده

https://odindownload.com/download/Odin3_v3.10.6.zip

ملف السوفتوير وده هتحمله من موقع sammobile او من موقع Samfw من الرابط ده

https://www.sammobile.com/firmwares/

طبعا لازم تعمل حساب ف الموقع فروح اعمل حساب الأول وبعد كده نفذ الخطوات دي...
ولازم تقفل اي مانع اعلانات انت مشغله ad blocker

هتدخل model number
طب ده هتجيبه منين؟؟؟
هتدخل على الاعدادات 》عن الهاتف》هتلاقي حاجه اسمها MODEL NAME هتلاقيها مثلا كده
SM-A715F
انت هتكتب ف الموقع A715F وتختار من الخيارات اللي هتظهرلك. بص ع السكرين شوت

اكتب اسم الدولة اللي انت عايز السوفتوير بتاعها بالإنجليزي Egypt مثلا او India او اي دوله انت عايزها اهم حاجه متنزلش بتاع الصين china مش هتلاقي عليه خدمات جوجل تمام بلاش الصين.

وتعمل بحث هتلاقيه جابلك كل السوفتويرز بتاعت التلفون بتاعك بتاع الدولة اللي انت كاتبها.

هتلاقيه جايبلك السوفتوير ورقم الأندرويد فأنت نزل السوفتوير اللي انت عايزه.
هتضغط على السوفتوير وبعدين هتمل wait & download وبعدين حمل السوفتوير.

كده احنا معانا الملفات بتاعتنا.

ضبط المصنع او لا؟؟؟

من الاول كده حدد انت عايز تمسح كل البيانات اللي ع التلفون ولا لأ
لو عايز تمسح كل حاجه وده الأحسن والأفضل واللي انا برشحه،،، فلو انت عندك بيانات وصور وملفات مش عايزها تضيع تعمل ايه تنزل برنامج smart switch على الكمبيوتر وتنزله على التلفون وتعمل backup لكل الملفات اللي عندك او اللي انت عايزها تمام وبعد كده ممكن تبقى تعمل restore او استرجاع للملفات دي.

تقدر تحمله من هنا

https://www.samsung.com/us/support/owners/app/smart-switch

طب لو انت مش عايز تعمل ضبط مصنع خلاص كمل ف الخطوات في خطوة قدام هقولك تعمل ايه ومتخفش مفيش ملفات هتتمسح .

الخطوات

ع التلفون هتروح على الاعدادات وبعدين عن الهاتف وبعدين معلومات السوفتوير وبعدين رقم الاصدار او build number وتضغط عليها ٧ مرات لغاية اما يطلعلك رساله لو طلب منك تدخل الباسوورد بتاع الجهاز دخله وبعدين روح ع الاعدادات تاني هتلاقي قايمة تحت اسمها خيارات المطور او developer options ادخل عليها وشغل خيار usb debugging.

ع الكمبيوتر بقى هتثبت samsung usb driver اللي انت نزلته ف الأول خالص

بعد اما تثبته تروح تستخرج او تعمل extract للسوفتوير اللي انت نزلته هيبقى نازل ف صورة zip file اعمله extract here
بعد اما تعمل extract هتلاقي طلع عندك ٥ ملفات هيبقوا متسميين ف الاول كده
AP
BL
CP
CSC
HOME CSC

افتح برنامج odin3.exe بعد اما تعمله extract برضه هتلاقيه فتح معاك نافذة كده اعمل ok او accept.
اول ما يفتح معاك الواجهه هتلاقي ع اليمين كده مربعات فيها
BL
AP
CP
CSC

هتضغط على BL وتروح تختار ملف BL اللي انت استخرجته من السوفتوير وتضغط OK
وكذلك مع CP وال AP بس AP هيغيب معاك شوية ممكن تلات دقايق اربع دقايق او اكتر فسيبه براحته ممكن تقلب الشاشة سوده عادي متخفش متعملش حاجه بس وهو هيعمل لوحده.
هنيجي بقى لل CSC
هتختار
CSC 》》لو هتعمل ضبط مصنع
HOME CSC 》》 لو مش هتعمل ضبط مصنع

وبعدين تقفل تليفونك خالص ولازم يكون مشحون
وتوصل الكابل ف اللاب او الكمبيوتر وبعدين تضغط على زرار تعلية الصوت وخفض الصوت مع بعض ومتجيش يم زرار الباور وتقوم مركب الكابل ف التلفون لازم تركبه بعد اما تضغط مش تركبه وبعد كده تضغط هااا
التلفون هيفتح معاك شاشه لونها لبني كده اضغط على زرار تعلية الصوت مره هتلاقي جاب حاجه اسمها download mode انت كده تمام
وهتبص على odin ع الشمال كده هتلاقي طلع كلمه added كده انت تمام
عايزل بقى تبص فوق كلمة added هتلاقي حاجه اسمها options اضغط عليها اتأكد ان Auto reboot متعلم عليها لو مش متعلم عليها علم عليها خلي جنبها علامة صح.
وبعدين تعمل start هتلاقي التلفون طلع فيه خط من تحت كده بيحمل سيبه خالص وبعد اما يخلص هتلاقي التلفون قفل وهيشتغل لوحده متجيش يمه وهتلاقيه فتح وبكده تكون حدثت التلفون للسوفت اللي انت عايزه.

انا شارح كل حاجه بالتفصيل الممل يعني فيارب تكونوا استفادتوا.....❤️❤️