مُـسْـــلم

= اللي بتحكيه الرسالة هو واقع، حكاية مكررة كريهة وجريمة يرتكبها الاهل بحجة "انت مش عارف مصلحتك"
وهنا مببقاش عارف .. هو لسه في أهل بالشكل ده؟
تعرفو أن النبي قبل ما يوافق على جوازة بناته كان بياخد رأيهم الأول؟ مع ان ده النبي ! مين فينا أحكم واعدل منه ! بس النبي كان عاوز يقولنا أن دي السنة والعدل، اننا نخير بناتنا ومنجبرهمش على عيشة هم مش عاوزينها، حتى لو دي "فرصة متتعوضش" زي ما هم بيقولو

هرد في نقاط
١- ممكن الأهل هنا تحديداً يكون عندهم حق في رفضهم للي بتحبه، لأن الحب لوحده فعلا مبيفتحش بيوت ولا بيبني أسرة فعلا
بمعنى أنه مينفعش يكون مبيصليش مثلا وتصري انك تاخديه عشان الحب، لأن ده هيطلع عينك ويسود نهارك وليلك، ف هنا مثلا الحب مش هيشفع ليه
الحب جميل إذا وُجد، لكنه ليس المعيار الرئيس في الزواج أبداً، لأن الحب كده كده هييجي بعد الزواج

٢- كلامي دلوقت موجه لصاحبة الرسالة ولكل بنت عموماً
لازم اقول ان محاولة تقبل أمر زي ده يعتمد اكتر على الزوج بس برضو ليكي دور فيه
*دور الزوج يتمثل في كونه يقدر يحتوي البنت وميقصرش معاها في حاجة ويكون نعم الزوج، ولو ده حصل ف هنا مينفعش اقول اي حاجة غير "انسى يا بنت الناس وارضى بزوجك الصالح"
*دورك كزوجة يتمثل في انك متتلككيش لأجل الانفصال، ومتقارنيش ده باللي فات ولا تحاولي تخليه زي اللي حبتيه، لأن ساعات العقل اللا واعي بيخلي الإنسان يمشي في الطريق ده وهو مش واخد باله، ف عاوزك تحطي مشاعرك على جنب، وتحاولي تقيمي زوجك الأول، هل هو فعلاً بهذا السوء أم أن حبك لغيره ما يجعله سيئاً؟! دي نقطة، ومهمة

٣- اخطر حاجة في المسج دي هي آخر حتة، بتاعت التواصل دي
تلقيت مئات المكالمات والرسايل تحكي نفس ذات المشكلة، وهكرر كلامي وعاوز كل بنت هنا تحفظه زي اسمها !

اوعي ثم اوعي ثم اوعي تهدي بيتك أو تخاطري بحياتك عشان واحد قِبِل انه يكلمك في السر وانتي واحدة متجوزة !! ده فاقد لأدنى معاني الرجولة والمروءة اصلا وعمره ما يكون رهان كسبان
عارفة هو عاوز يعمل ايه؟
عاوزك تتطلقي وتخسري كل حياتك، وتعلقي كل حاجة عليه وتبقى مطلقة وكمان بتحبيه، ويبدأ المعلم بقا يلعب بحضرتك الكورة، وهيبهدلك ويطلع عينك وابقي قابليني لو اتجوزك !
هو عاوز يكون أملك الوحيد، ف تكوني مضطرة تتحملي كل حاجة والجزمة في بؤقك، مهو خلاص خلاكي تخسري جوزك وخسرتي مع ده اهلك اللي كانو رافضين فكرة طلاقك، ف هيتسلي عليكي .. وهتدمري بشكل أعجز عن وصفه لكي !
مهما وعدك متصدقيش، ولو فرضنا جدلا انه هيقبل يتجوزك "وده احتمال0.0001%"، أهله مش هيوافقو وعلى الأغلب هيختار أهله ويبيعك كما يحدث دوماً
وحابب أضيف انه طول ما انتي مشغولة بالاولاني وحريصك على إعادة وصاله، عمرك ما هتعرفي قيمة جوزك ولا هتقدري تحسي معاه بحاجة نهائي، وبكرر، عمر القلب ما بيكسب رهان قدام العقل، ف خدي بالك

🔵 الحل ايه هنا بعد الحكي ده كله؟؟
= تحاولي ترمي الحب ورا ضهرك، وتشوفي مميزات زوجك ابن الناس اللي دخل البيت من بابه، وتقيميه، وزي ما قلت تبعدي مشاعرك للشخص التاني ده تماماً دلوقت
وعاوز اقولك ان اول سنتين جواز كلهم مشاكل اساساً، ده طبيعي مع أي حد ف متستغربيش
بصي لمميزات زوجك واديلو فرصة مع عقلك وقلبك، متظلميهوش عشان هو ميستاهلش منك اللي بتعمليه ده، ولا يستاهل انه يتخان ولا حتى بمكالمة شات !

وبعد ما تعملي ده، وتحاولي تحلى مشاكلك معاه بهدوء وبعقل، وتدي نفسك فرصة وتديلو فرصة
لو بعد ده كله لسه الوضع كما هو عليه، فهو اختيارك تكملي أو لأ، الطلاق مش عيب، بس ده حل اخير بعد ما الإنسان بيغلب حماره
مش كل مشكلة نقول طلاق ! الكلمة دي والفعل ده مش هزار نهائي وتوابعه مش هزار ابداً
الطلاق ده آخر آخر آخر آخر حل

#الساخر_الهادف
#كن_عوناً

265 views16:34