⭕️اشياء لم نعد نسمع بها عشرة مرات منذ انقلاب الـ٢٥ المشؤوم٠🔈📣📢🔔

١- شكوى البرهان و دقلو من فشل الحكومة اقتصاديا ، و مامحتاج اقول ليك عن الاقتصاد بعد الانقلاب .

٢- توقف ضبطيات تهريب الذهب عبر مطار الخرطوم ، يبدو انو المهربين تابوا بعد الانقلاب ، او اصبحوا هم الحكومة … انت فاهمني ؟

٣- اقتحام المواطنين لمكاتب الكهرباء بسبب القطوعات ، اظن الانقلاب موفر الكهرباء ٢٤/٧… ما تعاين لمروحة السقف كهربتك ما قاطعة بس المروحة ما بتحب اللف و الدوران.

٤- عبارة انعدام الادوية المنقذة للحياة ، فالشعب قرر يتعالج علاج بلدي … ما شايف الناس بقت تمش مايرنو ؟.

٥- الحكومة ما مهتمة بعلاج مصابي الثورة ، وحسب Nazim Sirag و ناس منظمة حاضرين من الانقلاب عندك ٤٠٠٠ جريح، دي ما جروح عاطفية تمام ؟

٦- مناقشة الموازنة و شتم روشتة البنك الدولي ، وطبعا موازنة ٢٠٢٢م لليوم الفكي جبرين عامل قام بالضلام ، و البرهان ما بقدر يقول بغم لي زول عنده جيش و سلاح … يعني في زول ما عارف ؟

٧- عبارة مجلس نظارات البجا يهدد بإغلاق الشرق من جديد ، ربما لأنه الانقلاب حل المشكلة تماما و لم تعد للشرق قضية ، او ربما الموضوع كان محتاج فقط لتهديد بسجن ٢٥٠ الف و تسييح دم للبحر ، شفت كيف ؟

٨- انفراد ٤ طويلة بالحكم هو سبب الازمة السياسية ….
بعد الانقلاب و استلام ٩ طويلة و العسكر الحكم و الانفراد بيهو بقى ما استفراد ، الغريبة ٩ طويلة و العسكر محملين ٤ طويلة استمرار الازمة الانقلابية لرفضهم الرجوع للحكم رغما عن انقلابهم عليهم و سجنهم جميعا ، انقلاب خلاقة مش كدا ؟

٩- اقالة وزير الصحة اكرم بسبب تردي الاوضاع الصحية ( زي ما قلنا بعد الانقلاب الناس قررت تتعالج بلدي ) .، اقالة مدني عباس بسبب ازمة الخبز ، اظنه هيثم مصطفى شايف العيشة رجعت بجنيهين … يعني وزراء ٤ طويلة كانوا هم المشكلة و ووزراء ٩ طويلة كيوت و ممشين الامور عال العال ( كيوت = عندهم سلاح ) اعمل نايم .

١٠- تخصيص مرفق لعضو مجلس السيادة محمد الفكي يعتبر اعتداء على المعاقين ( نفس المرفق يتم تخصيصه للطاهر حجر نمشي نفطر معاهو و نقفل الشارع كمان ، ما الطاهر حجر برضو كيوت .

————————————
دي عشرة من الحاجت المصطنعة الكانوا اذيال النظام السابق و عبدة البوت بشوهوا بيها حكومة الثورة ، لو عندك اضافة زيد ، هو الزيادة بقت على الوقود بس ؟

خليني أشرح ليك امر في غاية الخطورة و الغرابة حول مشروع التسوية البتسوّّق ليهو الجبهة الثورية بقيادة الهادي إدريس اليومين دي, يمكن تفهم مدى الهشاشة الداخلية لبنية الانقلاب وصلت لأي حد ...
قبل فترة بسيطة طلع مناوي و قال في لقاء تلفزيوني أي محاولة لتعديل سلام جوبا حتؤدي لحرب أهلية , و في وقت لاحق طلع مالك عقار و صرّح بكل وضوح انهم مع من ينفذ لهم سلام جوبا و ضد كل من يعرقله , تصريح عقار دا بختصر كل ملامح الأزمة الحالية , بحيث انه بفسر موقف الحركات المسلحة الموافقة على الانقلاب و انها لما ختت يدها مع البرهان كان السبب هو وعده الكاذب ليهم بتنفيذ الاتفاقية المهببة دي .
انتبهت الحركات انه أي محاولة وحدة لقوى الثورة بتعني سقوط الانقلاب , و سقوط الانقلاب بعني قوى سياسية جديدة حتنفض يدها من اتفاق جوبا او تعدّلوا على الأقل , طيب وين المشكلة في كدا ؟؟؟
المشكلة في كدا انه جبرين ابراهيم الجاي بفكرة السيطرة على وزارة المالية عشان يجهز نفسه و بقية الاسلاميين المعاهو للإنتخابات حتفشل , خاصة بعد الفلس و النتائج غير المتوقعة للإنقلاب و تحميل الانقلابيين لجبرين المسؤولية بتاعة الوضع الاقتصادي المتدهور , و ما تنسى كمية الجنود و المنصرفات بتاعين العدل و المساواة اللي حتكون كارثة اكبر على جبريل و ممكن تنهي مستقبله السياسي و النضالي حال عدم تمكنه من الايفاء بإلتزاماته تجاهها .
في جانب تاني مناوي اللي رضي بمنصب حاكم اقليم دارفور و فشله الكان متوقع ح يغري ناس تانية انها تحل محله و الاغلب الجنجويد في ظل تقاربهم مع روسيا المهتمة بثروات الاقليم .
الهادي ادريس و الطاهر حجر و عقار فشلوا تماما حتى في اجبار البرهان على بدء الترتيبات الأمنية و جلب اي تمويل يوفي متطلبات الاتفاقية البتقارب ال 750 مليون دولار سنويا , و البرهان رده ليهم انهم كلهم شركاء في الانقلاب ودا برسم ليهم صورة سيئة في اذهان شعوبهم .
هنا في مشكلة وجودية بتواجه الحركات المسلحة , مشكلة اسمها عبد الواحد محمد نور و عبد العزيز الحلو , ليه الاتنين ديل بمثلوا مشكلة ؟
لأنه عبد الواحد و الحلو اثبتوا بما لايدع مجال للشك إنه قضيتهم قضية أهل السودان ككل و إنهم ضد الانقلابات العسكرية او المشاركة مع أي جهة ممكن تقوض مسار الحكم الديمقراطي, و بالتالي اذا سقط الانقلاب , ستسقط الحركات المرتمية في حضن الانقلاب حاليا , ح يرثها الحلو و عبد الواحد كحركات نضال ذات مصداقية و شريكة لأي حكومة مدنية ديمقراطية مستقبلية , ومكسب لتحصين اي حكومة مستقبلية من غدر العسكر ,و دا مهدد خطير للموقعين على سلام جوبا اللي حيفقدوا كل شيء و مافي جهة تانية من دول الغرب حتدعمهم و حيوصموا بعار الانقلاب ليوم الدين.
انا ما ذكرت ليك التوم هجو و الجاكومي و خالد شاويش لأنه ديل أمرهم في يد دقلو , و دقلو خايف من السكينة , يعني ممكن, بل أكيد حيضحي بيهم عادي .
عشان كدا اتفقت الحركات انها تقدم الهادي ادريس كونه الشخص الأقل كراهية وسط الانقلابيين و الاقرب للحرية و التغيير , عشان يقدم مبادرة كلنا قرينا بنودها اللي اهم حاجة فيها انه مافي زول يفكر يناقش اتفاق سلام جوبا , مما يوضح الإلتفاف الواضح على مسألة الانقلاب و خدع الاحزاب و الشعب السوداني للإبقاء على ما اكتسبوه من خلال الاتفاق رغم تغيير الاوضاع.
لكن المبادرة دي لفتت النظر لي إنه الحركات المسلحة الموقعة على سلام جوبا هي حركات انتهازية ممكن تشارك في أي انقلاب و تتحالف مع من قتلوا الشعوب البتناضل بإسمهم , وتصمت على شهداء الحراك الثوري الجابهم في مناصبهم دي طالما حيتحصلوا على مناصب و مكتسبات عمرهم ما كانوا يحلموا بيها, و انهم شريك غير موثوق يمكن يطعنك في ظهرك في أي لحظة اذا ما لاحت ليهو فرصة الاستفراد بالسلطة و الموارد , والغريبة انه الهادي ادريس و عقار و بقية الانقلابيين من الحركات ما شايفين انهم انتحروا سياسيا لحظة جلوسهم بصف الانقلاب , و انهم الأن جزء لا يتجزأ من المشكلة , و من كان جزء من مشكلة فلايمكنه أن يكون حلا لها.
انقلاب الـ25 من اكتوبر كان مثل حوت عملاق داخل بحر الثورة , الحوت دا ظن انه لجان المقاومة و الاحزاب مجرد اسماك صغيرة و عوالق بحرية ممكن يلتهمها و يسبح بحرية, و ما اتوقع انه لجان المقاومة اصبحت صياد ماهر , و قتلت الحوت منذ لحظات الصراع الأولى , الأن الانقلاب دا عبارة عن جيفة حوت ميتة و متعفنة في قيف الحياة السياسية السودانية , و الحاصل الآن هو محاولة التخلص من العفن بتاع الجثة إما بتفكيكها او حرقها او دفنها , و لجان المقاومة قادرة على كدا فما بالك لو اتوحدت كل قوى الثورة على الهدف البسيط دا...؟
عندها كل الطيور و الكائنات الحايمة حول الجيفة دي سواء احزاب أسر ,او حركات مسلحة ,او منتفعين ,او اسلاميين حيصيبهم الجوع ,و الجوع مُهلك, و مافي زول بقدر يلوم صياد على ما يفعله بجثة طريدته ...

عشان كدا مافي زول يلوم لجان المقاومة (صيادة الحيتان) و قاتلة الانقلابات العسكرية...
السلطة القادمة لهم و الحكم بعد الله عزّ وجل ...
وهم واعين و مكملين
بـ #لاتفاوض_ولاشراكة_ولاشرعية
و الانقلاب سجم خشمو ما عنده

كتير من الناس تلقاهو يردد دائما انه الانقلابيين ديل على قلب رجل واحد, و انهم متفقين و مافي بيناتهم خلافات , لكن الاحصائيات و الحقائق و الأحداث وبعض الاشياء البتحتاج متابعة دقيقة بتقول عكس كدا , بل و بتؤكد إنه الانقلابيين مافي واحد بيناتهم بطيق التاني , و الشيء الوحيد البجمعهم في الانقلاب الميت دا هو انعدام الحلول او عدم وجود مخرج منه, و أول ما ينسحب منه مكون , حتنهار بقية المكونات ...
ليه و كيف خلينا نفكك كذبة انه الانقلابيين متفقين و رأيهم واحد.
انقلاب الـ25 لسوء حظ مرتكبيه فهو بتكون من أكبر خليط غير متجانس لدرجة انك ما تعرف تصفه بإنه انقلاب شنو , لأنه المكونات الرئيسية ليهو هي :
1- الجيش و دا طبعا بشمل المجلس العسكري و اعضاءه من القوات المسلحة بقيادة عبد الوهاب البرهان .
2- الجنجويد بقيادة دقلو أخوان.
3- الأرادلة و الحركات المسلحة الفكي جبرين و مناوي و الطاهر حجرو الهادي ادريس و مالك عقار و الود أردول, ما تحسب ناس هجو و الجاكومي لأنه ديل مسدسات موية ما عندهم.
خلي بالك للثلاثة مكونات دي و ركز عشان تفهم الشربكة الفيها لأنها بتوضح ليك مدى اتساع الهوة بيناتها واستحالة اتفاقها :
(أ) البرهان عنده 3 ضباط تحتو اولهم و اخطرهم ابراهيم جابر الكان وراء الحرب على لجنة ازالة التمكين ورجّع كل الكيزان مفاصل الدولة ,و الكباشي العنده مشاكل شخصية مع البرهان بسبب دقلو, و ياسر العطا الأقرب للأحزاب و مؤخرا بقت عنده مشاكل كمان مع دقلو ( حتلقى تحت ليه الضباط الثلاثة بقت عندهم ميول للجيش و الاحزاب و الكيزان فما تستعجل ) و البرهان قائدهم عنده مشكلة مع الأحزاب كلها ماعدا احزاب الأسر عديمة التأثير على الشارع, و عنده مشاكل مع قادة داخل الجيش و مع لجان المقاومة و ما عنده سند من الادارات الأهلية , و الكيزان بنظروا ليهو كمعبر للوصول إلى الحكم و ليس بينه و بين انه الجميع ينقلبوا عليه و يلتهموه سوى الحركات المسلحة المضطرة تكون مع البرهان على أمل انه ينفذ ليها بند الترتيبات الأمنية , وهو الكرت الوحيد البملكه البرهان كونه قائد الجيش, وبحمي نفسه بالحركات من غدر دقلو , و في نفس الوقت بحمي نفسه بدقلو من انقلاب الجيش لأنهم في مركب واحد .
(ب) الجنجويد حاليا في صراع بين عبد الرحيم و حميدتي بسبب الصرف البذخي البمارسه زعيم الجنجويد لشراء ذمم الإدارات الأهلية و بعض المسؤولين و يلاحظ غياب عبد الرحيم عن الخرطوم بل وعن السودان منذ استقالة حمدوك, حميدتي علاقته مع الجيش سيئة جدا و هي الأكثر خطورة عليهو , و الأرقام و الاحصائيات بتقول انه ياسر العطا و الكباشي سجلوا زيارات للفشقة قبل البرهان , و مع انه البرهان كان بصطحب حميدتي معاهو سواء لوادي سيدنا او سلاح المدرعات الا إنه حميدتي مستحيل يتجرأ إنه يمشي الفشقة مع البرهان او بدونه , لأنه السيناريوهات الأمنية ضد كدا , ولكن منذ فبراير الماضي بعد زيارة البرهان و دقلو لدارفور اصبح واضح للعيان انه الحرب بقت مكشوفة بين الاتنين و ما اجتمعوا تاني في لقاء عسكري ابدا , بل و بقى اي واحد بشتغل عشان يثبت للمحاور اهميته , وبعد انسحاب السعودية و الامارات من دعم الانقلاب و بقاء مصر على مضض وراء البرهان, اصبحت لدقلو مشاكل مع الاحزاب و مع الكيزان و مع لجان المقاومة و مع مصر و مع الجيش و مع البرهان نفسه, ودا السبب البخلي انه ضباط البرهان اي واحد يختار جهة يتقرب منها , فالكباشي لاذ بالجيش لأنه ماعنده غيره , و العطا اختار مهادنة الاحزاب و جابر اختار الكيزان , و إلى حدٍ ما كلهم اعداء لحميدتي اللي اصبح ما بملك سوى الادارة الاهلية و حتى الادارة الأهلية ممكن الجيش و لا الكيزان يحيدوها من دقلو اللي قال بعضمة لسانه انه الادارات الاهلية مع من يدفع أكثر , وهنا لن تفع دقلو امواله و لا الامارات و لا روسيا , وسيكون انهاء وجوده رهن تحرك واحد من الضباط الثلاثة اللي تحت البرهان.
(ج) الحركات المسلحة دي حكايتها حكاية , فهي كان من المفترض إنها تتحول لأجسام مدنية و سياسية , فقررت انها تنتحر و تخسر بقية الاحزاب و لجان المقاومة و حتى المواطن المحايد و المجتمع الدولي كذلك , و في نظرتها الاستراتيجية فالجنجويد ما بعنوا ليها حاجة و ماعندهم اي قيمة و مستعدين يغمدوا خناجرهم في صدر حميدتي و البرهان اول ما تنهار الأمور , و الأهم عندهم انهم يدعموا اي ضابط جيش يمكن ينفذ ليهم اتفاق السلام , ودا الاعلنو عقار بكل وضوح , و الورقة الوحيدة العند الحركات هي شوية الجيوش العندها الممكن توحدها للتمترس حول اتفاق جوبا ودا حيكون اكبر خطأ تعمله لأنها حتكتب نهايتها بيدها إن لم تفعل مسبقا .
انا عارف بدور في ذهنك اني انا غفلت عن ذكر الكيزان ليه ؟؟؟

رغم التهاويش بتاعة انس عمر و بقية دراويشهم إلا إنه الخطة الحقيقية للكيزان هي التسلل الناعم و مفاجأة الجميع بأنهم الأكثر استعداد للإنتخابات حتى ولو قامت بعد 10 سنة هم ماعندهم مانع , فقط ح يعملوا على تقوية من يحالفهم و دعمه دون اظهار دا علنا زي ما بعمل علي كرتي حاليا , لكن الكيزان خصمهم الرئيسي هو الجنجويد و الحركات و مستعدين يعملوا اي حاجة عشان يفصلوا الجنجويد عن أي حلفاء في المرحلة الجاية عشان يكون دقلو اخوان اقل خطرا على البرهان, واشد خطرا على الحركات بأمر البرهان و ينهي سيطرة الحركات على بعض قراراته (لو ما فهمت النقطة دي اسأل و انا بشرح ليك أكتر ), بمعنى انه الكيزان حيعملوا على استغلال الصراعات و المخاوف بين مكونات الانقلاب وتأجيج الصراع بيناتها عشان ينفرد حليفهم بالسلطة , و حيعملوا المستحيل عشان يضعفوا ويشتتوا كلمة الاحزب و لجان المقاومة كونها المهدد الوحيد لكل من ذُكر اعلاه .
بقية الكائنات المجهرية من رجال اعمال و أرادلة و هجوات و جواكمة ما عندهم غير يميلوا مع الكفة الراجحة , و انت شايف كيف اختفوا و بقى مافي زول فيهم بصرح او يتكلم او يدافع عن الانقلاب المجوبك دا , ودي براها علامة على انهم فاهمين انه الأمور ما ماشة لي قدام .
يبقى ياعزيزي القارئ كل مكونات الانقلاب دي مافي واحد منهم راقد بأمان للتاني , وكل زول فيهم بسن في الضلام سكينه و منتظر وقعة الاخر , و دا سبب بقاءهم مع بعض لحد الآن , والتشكيل القدامك دا تشكيل يشبه قطيع الضباع البتلتهم الجريح منها بلا رحمة, ودا واحد من اسباب عدم تمكنهم من تعيين اي حكومة للان , لأنهم مستحيل يتفقوا على شخص ربما يميل لجهة من المكونات الثلاثة و ينقلب على اتنين منهم .
أخطر ما قد يحصل قبل اسقاط الانقلاب هو حدوث انقلاب عسكري , وغالبا الانقلاب دا حيكون من احد ضباط البرهان , عندها الأمور ح تتعقد و ح تتطور لسيناريوهات ما معروفة , و الحل الوحيد لإنهاء الدوامة دي هي وحدة قوى الثورة بأسرع فرصة و تكوين جسم شعبي يعلن عن حكومة او برلمان ثوري , ويعزل الانقلابيين ديل و يجعل بأسهم بينهم, و خلافهم هو المفترض نحن نستغله احسن استغلال و نوحد صفوفنا و نجهز مواكبنا و مليونياتنا ..
و الناس ديل وحدتهم قاعدة على الهبشة ...
و لو فتشت وصف لوضعهم حاليا ما حتلقى أصدق من قوله تعالى في سورة الحشر : (( بَأْسُهُم بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَّا يَعْقِلُونَ )).
هم لو كانوا يعقلون في زول بعمل انقلاب بحميدتي و مناوي و أردول ؟
#لاتفاوض_ولاشراكة_ولاشرعية #ميثاق_سلطة_الشعب
#السلطة_سلطة_شعب و #العسكر_الثكنات و #الجنجويد_ينحل

تحصّل الفريق الاستقصائي الخاص بمنصة موجو بريس - Mujo Press على مستندات و ملفات صور و فيديو لإجتماعات يجري الاعداد لها منذ شهر مارس برعاية المخابرات المصرية و تمويل البرهان و جبريل ابراهيم لما يُسمّى بلجان المقاومة المستقلة بقيادة فتاة التيك توك الشهيرة التي ظهرت في لقاء مع البرهان عقب الانقلاب على انها ممثلة لجان المقاومة .
و تكشف الصور عن وجوه كثيرة نتمنى أن تقوم لجان المقاومة في التدقيق حولها سننشرها مساء اليوم 25 ابريل في تقرير استقصائي مفصل.

تجدر الإشارة إلى أن رئيس الإنقلاب قدم دعوة للجان المقاومة للإفطار في الـ29 من رمضان , وقد رفضت كافة تنسيقيات لجان المقاومة هذه الدعوة , و يتم التحضير لتقديم هذه اللجان الزائفة على أنها لجان المقاومة الحقيقية و هذا ما سنحاول افشاله و قطع الطريق عليه عبر اظهار حقيقة ما يجري و الصرف البذخي على لجان الانقلاب .

و توجد منظمة تعمل كستار بإسم National Youth Assembly مهمتها استجلاب الشباب و تجنيدهم , و اختراق لجان المقاومة , سنكشف عن تفاصيلها ايضا .