YOG‘OCH BESHIK

Yelkadan sirg‘alib kunduzgi tashvish,
Yelkadan sirg‘alib ko‘rpalari-da,
Supachada uxlar erkak va ayol
Yog‘och beshik o‘rtalarida.

Xo‘rozlar bayotin avji - tongotar,
Suyumli nigohi erkalarida,
Nonushta qiladi erkak va ayol,
Yog‘och beshik o‘rtalarida.

Qaydadir traktor guvillar. Endi
Topgan-tutganlari o‘rtalarida.
Dalaga jo‘naydi erkak va ayol,
Yog‘och beshik o‘rtalarida...

✍Muhammad Yusuf

T.me/Muhammad_yusuf_ijodi

​​RUH TO‘TISI

Bosh bir kun tosh yostiqqa yetar,
Ruh to‘tisi tanni tark etar,
Deydilar yosh tanlamas ajal,
Xudo bilar kim oldin ketar...

Oftob yelib tolsa ko‘k uzra,
Unga osmon sandig‘i hujra,
Haqdan hukm, bandadan ijro
Xudo bilar kim oldin ketar?!

Pok dilingni kemirdi hasad,
Qadamingdan topding aziyat,
Do‘stim qilma menga vasiyat,
Xudo bilar kim oldin ketar.

Aso tutmish qancha qaddi dol,
Men bir kuchga to‘lgan navnihol.
Otam meni ko‘mar ehtimol...
Xudo bilar kim oldin ketar.

Ko‘zim ko‘kda, sizda xayolim,
Jujuqlarim — mening kamolim!
Gʻanimatmiz juftu halolim,
Xudo bilar, kim oldin ketar...

Muhammad Yusuf

@Muhammad_Yusuf_ijodi

LOLAQIZG'ALDOQ

Мендан нима қолар:
Икки мисра шеър,
Икки сандиқ китоб,
Бир уюм тупроқ.
Одамлар ортимдан
Нима деса дер,
Мен сени ўйлайман
Ўзимдан кўпроқ –
Лола, лолажоним,
Лолақизғалдоқ!

Мен кетсам, ёмондан
Йироқ бўл, оҳу,
Чунки сен чиройли,
Кўркли бир жувон.
Ёмон кунлар бир кун
Яхши бўлар-у,
Ёмон одам яхши
Бўлмас ҳеч қачон…
Яша чегарада
Тургандек огоҳ,
Лола, лолажоним,
Лолақизғалдоқ!

Уйда ётибман-у,
Сезиб турибман,
Кўкда кетаётир
Қушлар қайтишиб.
Хайрлар ёғдириб
Қанотларидан,
Хаста шоирига
Видо айтишиб.
Бор, менинг учун ҳам
Уларга қўл қоқ,
Лола, лолажоним,
Лолақизғалдоқ!

Уларни мен яна
Кўрарманми-а,
Айвондан одамдек
Кузатолмадим.
Куз. Тўйлар бошланди.
Юрагим пора –
Битта қизимни ҳам
Узатолмадим…
Демак, тақдир экан
Тўй кўрмай ўлмоқ,
Лола, лолажоним,
Лолақизғалдоқ!

Бироқ, кўнглим сезар,
Мендан кейин ҳам,
Бир кун бу ҳовлига
Одам тўлади.
Ҳали тўйлар қилиб
Чарчайсан, эркам,
Менинг қизларим энг
Бахтли бўлади!
Келинлар кўйлаги
Руҳимдай оппоқ,
Лола, лолажоним,
Лолақизғалдоқ!

Гулим, яқинроқ кел,
Қара, не савдо,
Бу ажиб ишларни
Дил лавҳига ёз:
Кимга қаср етмас,
Кимга мол-дунё,
Менга эса ҳаво
Етмайди, холос.
Тириклар мудроқда,
Ўликлар уйғоқ,
Лола, лолажоним,
Лолақизғалдоқ!

Кўксим куйиб борар,
Кўкрак ёнмоқда,
Айтинг дўхтирларга,
Ёришса ёрсин!
Жисм ўз улфати –
Жондан тонмоқда.
Бечора жон энди
Қаерга борсин.
Энди осмон йироқ,
Энди ер юмшоқ,
Лола, лолажоним,
Лолақизғалдоқ!

Буни ҳаёт дерлар,
Унутма асло,
Бир кун очиласан,
Бир кун сўласан.
Қалбимда-ку, фақат
Сен эдинг танҳо,
Қабрим устида ҳам
Ўзинг бўласан.
Сен бизнинг севгидан
Хотира – байроқ,
Лола, лолажоним,
Лолақизғалдоқ!

Аёл қалбинг билан
Сув кеч, олов кеч,
Ғам келса бошингдан
Ҳушинг учмасин.
Худодан сўрадим:
Мендан кейин ҳеч
Номард кимсаларга
Ишинг тушмасин.
Уларнинг қўлида
Ҳамиша тузоқ,
Лола, лолажоним,
Лолақизғалдоқ!

Ишинг тушса, иним
Муҳаммадга бор,
Шоирлар ичида
Ишонганим шу.
Бироз ичишини
Айтмаса агар,
Кўкси тиниқ бола,
Ҳалол бола у.
Фақат сал соддароқ,
Фақат сал ёшроқ,
Лола, лолажоним,
Лолақизғалдоқ!

Жон сўнгги бошпана
Топаркан онгда,
У юрак остида
Дердим мен бўлсам.
Ажабланма агар
Эртага тонгда
Сени ўпиб, Ўшни
Қучоқлаб ўлсам!..
Ўтинчим – тепамда,
Йиғлама узоқ,
Лола, лолажоним,
Лолақизғалдоқ!

Muhammad Yusuf

T.me/Muhammad_Yusuf_ijodi

Гулим, яқинроқ кел,
Қара, не савдо,
Бу ажиб ишларни
Дил лавҳига ёз:
Кимга қаср етмас,
Кимга мол-дунё,
Менга эса ҳаво
Етмайди, холос.
Тириклар мудроқда,
Ўликлар уйғоқ,
Лола, лолажоним,
Лолақизғалдоқ!


📝 Lolaqizg'aldoq
✍ Muhammad Yusuf
🎤 Ahad Qayum

@MUHAMMAD_YUSUF_IJODI

DALADA

Qovushmagan ikkita taqdir
(Balki u ham o‘zicha haqdir),
Orasiga ikki egatni
Atay tashlab o‘tdi brigadir...

Hamma qizning ko‘zi ularda,
Hammasi bir bo‘lib o‘ylardi -
Orasiga ikki egatni
Atay tashlab ketdi brigadir.

Ikki egat oralarida,
Ko‘kka o‘rlab ketguncha xirmon.
Ikki egat oralarida
Besh millionga yetguncha xirmon.

Zorlanadi yalinchoq nigoh
- Kel yonimga, birga teramiz.
Unamaydi tortinchoq nigoh:
- Odamlarga kulgi bo‘lamiz.

✍Muhammad Yusuf

T.me/Muhammad_yusuf_ijodi

#Foto_estalik

Bizni birovlardan ne kamimiz bor,
Ey juftihalolim, ne g'amimiz bor...

T.me/Muhammad_Yusuf_ijodi

* * *

Bahorda ko‘p og‘ir,
Qiqirlab tursa
Tizzangga suykalib lolaqizg‘aldoq,
Beg‘ubor yoshliging o‘tgan joylarda
Qo‘ltiqtayoq bilan hakkalab yurmoq.

Yalang‘och novdalar pichirlab tursa
Kuzda, sukunatga cho‘kkanda chorboq.
Ko‘p og‘ir, indamay ketib borayotgan
Mo‘min turnalarga boqib o‘y surmoq.

Ko‘p og‘ir beg‘ubor qorlar yoqqanda
Qishda, dala-dashtga qo‘nganda tuman,
Sotqinga tegmagan o‘qni siypalab
Urushni eslamoq sandaldan chiqmay
Xunuk va vafodor xotining bilan...

✍Muhammad Yusuf

T.me/Muhammad_yusuf_ijodi

* * *
Hayron bo‘lmam turna kishnasa,
Qahratonda olma gullasa,
Ammo sening sevib qolishing...
Aldab nima qilasan?

Osmonni suv bossa, hayratim yolg‘on,
Quyoshni o‘t bossa, yulduzlar tullasa,
Ammo sening sevib qolishing...
Aldab nima qilasan?..

Toshlar tilga kirsa, ishongum,
Tramvaylar yum-yum yig‘lasa,
Ammo sening sevib qolishing...
Aldab nima qilasan?

Senga qarab ko‘zim pishmoqda,
Seni o‘ylab ko‘ngil uvishmoqda.
Kelin orzu qilib, bag‘rimni tilib
To‘shak qavir qari onam qishloqda...
Aldab nima qilasan?

✍Muhammad Yusuf

T.me/Muhammad_yusuf_ijodi

NIYAT
Aylanar charxpalak kunlarim gali,
Umrim tog‘dan,tushgan soydek yeladi.
Ertakka aylanib qolmasdan hali
Bir qari doyani ko‘rgim keladi...

Ko‘rgim kelar toshni sahroda kuygan,
Va bukri tuyani yantoqqa to‘ygan,
Jayronning oldiga qalandar qo‘ygan —
Bir bog‘lam poyani ko‘rgim keladi...

Karvonlarni ko‘rgim keladi saf-saf,
Va karvonboshilar qilichin sadaf,
Majnunlar kapasi oldida bir kaft
Jannatiy soyani ko‘rgim keladi...

Ko‘nglim yaxshilikni yo‘qlab tolmadi,
Jonni tutdim na do‘st, yot qolmadi,
Unga chang solmagan bir zot qolmadi,
Endi himoyani ko‘rgim keladi...

Orzuim bir uzunki yetmaydi nafas,
Bir g‘arib ko‘nglimda ming oliy havas,
Oynai jahonda gul qizlarnimas —
Lutfixon ayani ko‘rgim keladi!

Muhammad Yusuf

T.me/Muhammad_Yusuf_ijodi

SHIFOXONADA

Shunday bemorlar borki,
To‘shakda mixlanib yotar benajot,
Uyalib ketasan tuzalganingdan.
Shunday shifokorlar borki,
Tug‘ishgan akangday qaraydi senga,
Tuzalib ketasan uyalganingdan...

✍Muhammad Yusuf

T.me/Muhammad_yusuf_ijodi

DO‘ST FIGʻONI

Qani bag‘rim to‘lib yurgan pallalarim,
Mag‘rur qalbim ko‘zdin yoshin halqob etdi,
Qushday uchdi quchog‘imdan bolalarim,
Uchalasi uch tomonga tarqab ketdi.

Bevafo yor peshonamning bo‘ldi sho‘ri,
Rashk azobi xanjar misol ko‘ksim tilar.
Gulday ikki qizim qani ko‘zim nuri,
O‘g‘lim qayda tentir endi, xudo bilar...

Kunda o‘zim bosib yurgan yo‘lagimga
Yo‘qlab borsam yo‘l ham mendan tonib ketdi,
Bevafo yor ermak qilgan yuragimni
Kulga ko‘msam kul gurillab yonib ketdi.

Suv yonardi suvda bolam yonib shu kun,
Ko‘zlarimga mo‘ltirab zor najot so‘rdi.
Yosuman yor kuldi ko‘rib bormay yaqin,
Yosuman yor menga shunday azob berdi!..

Qani bag‘rim to‘lib yurgan pallalarim,
O, bo‘sh ko‘nglim, ko‘zdan yoshim halqob etdi.
Qushday uchdi quchog‘imdan bolalarim.
Uchalasi uch tomonga tarqab ketdi.

Neki bo‘lsa bo‘ldi yurak gunoh menda,
Yana kuymoq qismat ekan — kuygan edim.
Bolam-yorda, yorim-yotda, gunoh-menda,
Bilib turib yosumanni suygan edim...

Muhammad Yusuf

T.me/Muhammad_Yusuf_ijodi

ISTAK

Shotut soyasida beshik bozori,
Sahardan rayhon hidi anqiydi.
Beshiklar tebratib bog‘chaxotin yig‘lar:
Bittagina o‘g‘lim bo‘lsa, mayliydi.

Sarin sabo esa qo‘shiqlar aytar,
Maysaga yonboshlab tinglar shudringlar.
Oq shiypon ortidan mo‘ralab oftob,
Hey, qizlar, turinglar!

Chumoli yopishar yalpiz bargiga,
Irmoq unga suvlar sochib hiringlar.
Brigadir planni o‘ylaydi xunob:
Hey, qizlar, turinglar!

Ey, mening xayolim, suluv, mohitob,
O‘zimga savolim, o‘zimga javob.
Bosgan qadamlari ko‘zimga tavob:
Hey qizlar, turinglar!

Hey, qizlar, turinglar,
To‘ldirib yuringlar O‘zbekistonni.
Istaymanki, doim poroxlar emas,
Sizlarning allangiz tutsin jahonni!

✍Muhammad Yusuf

T.me/Muhammad_yusuf_ijodi

BIZDAN OZOD VATAN QOLADI

O‘tar necha bahorlar gulgun,
Necha umr kuzlari kechib.
Zamin uzra saf tortib bir kun,
Biz ketarmiz qushlarday ko‘chib.

Bir bebaho ma'dan qoladi,
Bizdan ozod Vatan qoladi.

Bizning manzil oq - oydin sahar,
Oftob sari yo‘limiz ravon.
Millat uchun kerak bo‘lsa gar,
Ming bor fido bo‘lmasa bu jon -

Jon chekmasang, qaydan qoladi,
Bizdan ozod Vatan qoladi.

Odam bilan ulg‘ayar makon,
Dunyolarga doston bo‘ladi.
Erkli elning go‘dagi sulton,
Sultoni mard inson bo‘ladi.

Davri dun hammadan qoladi,
Bizdan ozod Vatan qoladi.

Bug‘doy sepsang bug‘doying qiyg‘os,
Arpa eksang - arpasin olar.
Avlodlarga bizlardan meros,
O‘zbekona oriyat qolar.

Erkimiz - gulbadan qoladi,
Bizdan ozod Vatan qoladi.

✍Muhammad Yusuf

T.me/Muhammad_yusuf_ijodi