((.........))
Part | 3
# لازم ان نكتبه حتى وان كي مايقولوا تنذكر وماتنعاد ...كان يوم عيد الأضحى ..حكينا ف القايله نذكرها قبل مانرقدوا مازلنا تعبانين جونا سالك صورنا كل حاجه لبعضنا نوروا ف بعضنا كيف جو العيد عند كل حد منا ...وحكينا ومنسجمين وبدن اسألتي الغيريه الي معترف بروحي اني ديمه هك نا غيره مش طبيعيه ع الأميرة ...سألتها السؤال هذك وجاوبت الأجابه هذك ....معش طقينا ف بعضنا طوول اليوم بس الحق لقيت رساله انها تبيني ف موضوع ضروري ماجابش عقلي الموضوع هذ بككككل ...المهم نبيش نطول ف الكلام ع نفس الموضوع ...نبي النقاط الأيجابيه الي فيه بس ...من لقطة اليوم هذك من اعترافك بيه ..من اعترافك بالغلط الي درتيه قبل بيوم ...بقولتك لي كل الموضوع مع اعترافك القوي رغم كل حد احذاك رفض رأيك ...ادركت ف اللحظه هذ اني مش غالط ف قراري الي هو اني انحبك ..❤️👌..لأن الي يحب حد مايدسش عليه شي وكان هذ اول بوادر الحب والتكبيد مادسيتش علي حكيتي كل شي عرفت ان انتي مافيش منك لأن والله مستحيل بنت ف مكانك ادير وتقول الي قلتيه والله هذا اكبر شي فرحني وفررحني فيك وااااااجد لأن عرفت ف اللحظه هذ انك اتحبيني جديات وماتبيش تخسريني صاااح وخاصة وان تعلقنا ببعضنا واااجد لأن تقريبا او مايقارب عن نص سنه ف وقتها كان لنا نحكوا او بالتدقيق 5اشهر بالضبط ...كان اليوم هذك اول صور منك دزيتيهن لي كانن 4 صور نزلن ع قلبي شعور فرحه خيالي ..نذكرها رقدت ونا مش فاطن كيف طفا الجهاز من كثر مانبحت فيك وماشبعتش .... استمرن الأيام ونحن مع بعضنا ....ايام الأمتحانات كانن قبل العيد وكانن ايام اسماح ع قد ماهن متعبات ....خدمني الحظ وخلاني احذاها ف الدرج ..كانت تغشش في 🙈...كانت شاطره كانت سمحه كانت انيقه اخرى كانت عسل كانت ضحكتها بالنسبه لي تفتح ابواب السعاده في اصعب وقت لي اثناء الأمتحان ...نرجى ف لقطه تسير هك عشان نشوف بسمتها الي ربي مايحرمني منها ويخليني نشبع منها ...انتهن الأمتحانات وطلعت النتيجه ونجحنا نحن لثنين الحمدالله ..توا كل حد منه ف تخصص هي تخصصت لغه انجليزيه ونا هندسة اتصالات ...

يتبع .....

((.........))
Part | 4
#ممكن نخش ف تفاصيلها ...او نحكي ع البنت الي ياااامااا حلمت بيها ....هي اطيب بنت ف الكون ممكن ..قلبها حنيتها طيبتها حنانها غلاها كلامها زعلها ..حتى ضحكتها ادل على طيبة قليبها ... اتعصب لما تغااار لما تسكن تقعد باارده وهذي انحبها بككككككل فيها🙈 ....طبعها هو الحن الرياااف الخوف الدلال ...لما كنت نغيب واااجد نفتح نلقى رسائل ننفجع م العدد نخاف تقعد سايره حاجه ..نفتح نلقاهن رسائل خوف علي ..وينك كنك طولت منشغله عليك راني طمني عليك ....كلااامك هذ كله يدل ع ان مافش حد كيفك ف الكون اي كون ف الكواكب كلهن اخرى ...جتني اجمل هديه منها ف عيد ميلادي لأول مره تجيني هديه وكااانت منها شوف الحظ انها هي الي ياما حلمت بيها جتني منها اول هديه وخلتني امير عندها 🙈...ريحة العطر مازالت ماحودت مني كل لحظه نحسها ف حضني نشمها وااااجد ومانشبعش منها لأنها ريحتك ريحة الغاليه الحنونه ريحة حبيبتي ...ممكن نا تفرغت هنا بأني نحكي عليها.. لا يتسع المقام للحديث عليك اصلا🙈..انتي وعيونك وشاماتك ياام الشامات اكبر من هك بواااااجد تستحقي اكبر من هك بوااااجد ...ولما يقعد النصيب ناوي ان يجمعكم تكونوا متوافقين على كل حاجه لما نقعدوا نحن لثنين برشلونه ..نحن لثنين الأرجنتين ..نحن لثنين ميسي ...نحن لثنين نحبوا اللون الأسود ..عشقت الفراوله عشان انحق فيك فيها لأنك اتحبيها ...لما نقولك انحب اي حاجه فيك يعني انحب الي اتحبيه 🙈❤ف النهايه نحن نشوفوا ف بعضنا ف حوش واااحد يجمعنا ف اخر المطاف بالحلاااال ..والله مش عارف اذا حكيت كل حاجه ف قصتنا 🙈..بس ع العموم حكيت كل الي قاعد في قلبي.. لي سنين معاها ويارب طوول العمر مكتوب لك ومكتوبه لي ❤️ ....
اممم🙈
#توا دوري نا حبيبته نخلي اسمي حبيبته لان كي ما قال هو يغااار.. يغار حتى علي اسمي يغار من هلي امي وبوي وخوتي تهيالي اكثر حد غيوور ف دنيا هذ بس عارف انموووت فيها غيرتك وحق ربي🙈❤️
مش هنقدر نحكي ونعبر زي م عويناتي حكى لاني ديما نقوله اني مايسيرش مني ف تعبير 🙊 .. كل الي بنقوله اني انححححححبه ونحمد في ربي ف كل وقت ان ربي جمعني بيه وزرع حبه في قلبي .. مش عارفه شن دايره بيش ربي كافاني بيه.. اغلى شي ف دنيتي.. نفرح كان فرح ،نزعل لو زعل، نتنكد كان مرض💔 نحن جسدين لكن الاكيد ان نحن قلب واحد 🙈❤️ تفاصيل قصتنا حكاهن وعرفتوهن.. وكان ديما هو الي يعبر عن حبه ويقول نحبها.. هالمره دوري نا نقولها🙈 * انحبك * كل حرف فيها له الف معنى والف شعور .. ربي يخليك لي دنيا وجنه ويجمعني بيك .. وان شالله بإذن الله قصتنا هذي شي يوم نقروها لعيالنا ويعرفوا كيف بوهم السكان حب امهم الهبله 🙊 وجابوا الكتاكيت لسماح هذومي 🙈.. هذي قصتنا مازالت ما انتهت ومستحيل تنتهي لانها كل يوم تبدا من جديد.. ويوم الي نقعد فيه حلالك هو بداية الجزء الثاني من قصتنا... انححححبك ياغيوري السسمح انحححبك يا دلااالي.. ❤️

هذي كانت حيااتنا ونحسابوهاا هتكمل ع نفس السياق وسعاده هذي لكن فجأه....

يتبع ....

((...........))
Part | 5
طبعا شنو حياتناا كانت هكي سسسمحه كلها حب ودلال وحن ورياف اناا كنت أسعد انسانه ف دنياا وكان كلي قناعه ان هذي قصتنا لاخر العمر انا له وهو لياا ونصيبي حلمنا بكل شي مع بعضنا لحد اليوم الي ربي ياخذ فيه امانته ...كان هو فارس احلامي ودنيتي مع ان طوول هالسنين م تلاقيتش معاه ولا مره كانت حياتنا كلهاا ع الموبايل احياانا نشوفه صدفه وهو مخطم علياا بس ف طريق بس ملك قلبي وكل م فياا حكى لأمه وشافتني ف كم مناسبه صارت عندناا وسلمت عليهاا اناا حسيتهاا م حبتنيش هي ممكن نظامها تغار ع ولدهاا اكثر حد ف عيالها غالي عليهاا حست ان يحبني ومهتم بياا وواخذه وقته وتفكيره كانت الغيره واضحه فيهاا وف معاملتها لياا بس كنت نقول عاادي نتحمل عشانه المهم هوو كي م يقولوا عشان عين تكرم الف عين ومرات نقول اني وااهمه ومافش منه الخبر هذاا الحق كنت نعزهاا لمجرد انهاا امه❤ برضو حتى بوه يعلم بالموضوع وموافقين هله وكل شي متوقف ع ان هو يتخرج ويتعين ولان حصل شغل خاص قلناا عادي يغني ع التعيين ف فترة الخطوبه وناا معطيته وعد نرجااه ومانوافقش ع غيره مهماا كان هوو كل م يسمع حد بيتقدملي ينجن ويخااف اني م نكونش له نحسه فعلاً خايف نقعد نقول معقوله يحبني لهدرجه اناا بدوري دائما نطمن فيه اني مستحيل نبدله لو شنو صار ( وهذاا مع بعض الشباب غلط لان يضمن وجودك ومعش يخاف انك تكوني لغيره) ... مشت حياتنا اياام وراا اياام فيهن زعل وفيهن احداث وااجده اهمهن ان طلعتلهم ورثه مبلغ كوويس بكل يعني داروا منه مشروع محل ملابس ووضعهم تحسن يعني شي ف صالحنا ان يكون عنده دخل شهري زمان كان وضعه صعب شوي يعني شاب يقرا وبدون شغل ومصاريف قرايا كان هواا متعقد م الوضع هذاا وانا كنت ديماا ساندته ونهون عليه وبالنسبه لياا الفلوس اخر شي نفكر فيه ونقول فيها له اني مقدره ظروفه ونراجيه عادي نين يتصلح وضعه ونفرحواا بحلمنا و فعلا صبرت معاه والحمدالله جتهم الورثه وفتتحوا المحل وشغلهم ماشي ماشالله كنت معاه لحظه بلحظه مع ان انشغل علياا واجد ومعش قعدنا نحكوا بس قلت عشان مستقبلنا عادي ، المهم ان بعد هذااا كله وبعد ضحكتله الدنياا وقربنا من حلمنا وتريح وضعه المادي تماا بشغله وبسيارته مش ناقصه الا يتخرج و يخطبني تغير علياا فجأه بدون سبب وبدون مقدمات ولا مبررات ...

يتبع......

حنكمل قصه العضوه تقريبا هي امقسمتها ؏ 10 اجزاء وتعطوها النصيحهه وبعدها نبداء نشر تاني 🖤

((...........))
Part | 6
اولهاا اهمال بسيط ع حاجات معودني عليهن كان تمن عنده تواا خبر زايد ومش ضروري اناا هلّبت وقلت عادي لان يمر بظروف ومشغول فالمحل ولان كبير هله معتمدين عليه ف كل شي. وكل م له تما يزيد الاهمال ومازلت نخلقله ف اعذار وهو لما نعاتبه يقولي صار وصار وناا مانقتنعش مرات بس عشانه نقول الله غالب حتى غيرته تغيرت كان متملكني متحكم ف كل شي لبسي ،كلامي، حالات الوتساب، حتى اني انادي لحد بأسم الدلع متاعه كان شي ممنوع عنده، ممنوع نسلم ع اقاربي او نحكي معاهم كانت غيرته تخنق فياا احيااناا بس فرحانه بيها ف نفس الوقت كان حنون ومحتويني كأني بنته ف عشان هكي كنت متحمله ومانرفضلش طلب اصلا م يهونش علياا نرده او نزعله كان (نقطة ضعفي) 💔 ... اخر فتره قعدت حتى غيرته مش زي زمان معش يسأل فيا حتى ع تفاصيل يومي حتى لماا نطلب منه شي حتى لو تسجيل صوت ولا صوره يقولي باهي ويفوت وكي نزعل ونعاتبه يقولي نسيت ويتقعد بحجة اني مش مقدره ظروفه وهن والله مش شي يستاهل ... والابشع بالنسبه لياا والي توجع قعدت نزعل ونرااضي روحي قعد عادي عنده نرقد زعلانه اقصى محاولاته خلاص اسف خلينا منسجمين كانت توجع فياااا بككل منه م كنتش نهون عليه لدرجه هذي قعدت نهون 💔 قعد حتى يزابي فياا نقوله نهون عليك نرقد زعلانه يقولي كنك م حكيتي انتي عشان نا نروق ... قعدت كل يوم ننصدم ف شي معين او تصرف يديره تجاهيي .. ونزعل ونعاتب يقولي تهيالك نا هو نا مش متغير انتي مش عارف كنك لدرجة حسيت روحي انكلبت يعني مش معقوله يكون مش متغير هو كل شي فيه تغير اصلا كلامه دلعه معاملته اسلوبه حتى طريقة تفكيره قناعاته قعد انسان ثااني .. قعد هله وشغله وجماعته بعدهاا اناا اخر اولوياته مع اني كنت اولهن 💔 صبرت واااااجد عليه قيس 3 شهور وهو ع نفس وضعه نكتبله رساله طوويله ونكشيله يرد علياا برساله مافيهش شي يخليني نفرح ونتريح ونعذره كملها مافش شي نا مش متغير انتي تتوهمي ومافش بكل الخبر هذا وانا انحبك وانتي اهم حد عندي وووووو كلام بس مجرد حروف م يطبقش ف شي ف افعاله .. مازالت تحز ف نفسي لما قتله مرايفه عليك خليك اليوم تمشيش لجماعتك عشان نحكواا لنا زماااان م حكينا شوي قالي لا لي زمان ع جماعه تواا يقولوا كي دار محل معش جاناا واااو ع شعوري وقتها يعني فكر فيهم هم وان له زمان عليهم وفكرش فياا انا 💔 مع اني طلبتها منه طلب ان يقعد معاي وياريتني م قلتهاا لان انصدمت ب رده وتفكيره وفعلا مشالهم وروح متأخر وناا ناعسه ونراجي فيه لان كنت فعلا مرايفه عليه حكيت معاه ونا زعلانه كان يحس بياا كي نزعل يعرفني من اول رسالتين يومهاا فاتني وماكانتش اول مره يديرهاا بس يومها وجعتني اكثر لان من مشيته عرفني زعلانه وعدا عادي وروح وكأنه مافش شي حكيت بنشافه معاه ع امل ان يحس بيا شوي بس ابداا كأنه حالف يوجعلي قلبي استسلمت للأمر الوااقع وقعدت نحكي معاه عادي لان قعد يبصر ويحكي قلت م عنديش عليش انكد عليه ونرقدوا متزاعلين وطيت ع قلبي ومشيتهاا وياريتها كانت اخر مره ياماا دارهاا كم ليله ف ليله مشت علياا هكي وفي مرات نتزاعلواا مش ديماا نوطى ع قلبي ونراضي روحي ... هناا بذاات وبعد كل هالتراكمات بديت نثق ونتأكد ان مكاني مش لولي ف قلبه مشى شهر اخرى وتمن 4 شهور وهو من سيئ لأسوأ ... اسوأ فتره اهملني فيهاا بكككل كان شهر رمضان كنا م نحكوش بكككل يروح 2 يسحر ويلهى مع هله ويفتح 3 نحكوا اقل من نص ساعه ويأذن الفجر خلاص طبعا معش نحكوا هو مش معدل يعني شايف ان وضع طبيعي مش فاضي وماعندش كيف يفتح ف نظره ان مفروض مانزعلش بكككل مافش شي يزعل ع قوله... جا العيد و ك غير عادته م صورليش حتى قبل نوعاا عليهن صور متاعاته ومعايدته وكلامه اتصلت بيه عايدت عليه مكالمه عاديه الي نقولها يرد عليها بسس .. كانت مكالمه بارده م حسيتش بأنه هذاا حبيبي الي صوته بالنسبه لياا كان راحه حتى يوم العيد راايح م فتحش رقدت ووعيت م لقيتش ولا رساله منه و ظهوره م له شي كان فاتح نت .. مع ان عيد ومفروض نفرح بس كان يوم شششين بالنسبه لياا لان هو مش زي قبل بكل مشى يوم ثقيل كأنه اسبوع او شهر فالليل قررت معش فيهاا هنقوله اني هنبعد عليه بس ماقلتش له بشكل صريح قتله اني مش متريحه وان هو متغير عليش يديرلي هكي وووو قتله لو قعدت هكي مش هنقدر نكمل معاك دير اي شي عشاني حسسني اني نهمك وتبيش تخسرني زي عادته م قاليش كلام يريحني.. الي قدر عليه قالي هذاا مش كلامك انتِ! !! هه هذاا الي طلع من قلبه يحسابني زي كل مره هبله سمعاً وطاعه نحسب حساب لكلامي قبل م نقوله يحساب ان حد ماليني عليه هالمره معش حسبت حساب شي وقتله انت وانت وانت وكل كلامي م أثرش فيه مُصر ع ان هو منسجم ونحن متريحين ونا الي نتوهم نيين حسيته يبي يطفشني ويبيها تجي مني نا هوو يقولي نبيك وانحبك ووضعنا 💯💯 انتِ الي كنك ... (ع قوله وضعنا جيد واحسن من غيرناا)كانت جمله صعبه علياا من امتى تماا يقارن فيناا بناس غيرناا وحبهم اقل منا وعادي قعد يبيني نشوف الناس الي

علاقتهم سيئه بيش نقول نحن ماشالله علينا.. مازال ف بالي لما قالي (تحسابي الحياه كلها دلع وكلام سمح مش هكي را الحياه ) حتى تفكيره قعد متخلف وسطحي ... اسبلت بإنه ماشيين لخوالي فالعيد ومافش نت وجرب بلاي اياام ممكن حياتك بلاي احسن.. شوي قالي حتى انتي فكري كوويس كان مش متريحه معاي مانضغطش عليك... لماا قريتهاا جملته هذي عرفت ان مستغني ويمثل علي ف دور ان يحبني ومتمسك بيا وهو خلاص مافش ف قلبه حب .. هو قعد ضامن وجودي ومش متخيل اني نتجرأ وننهي الي بينا.. المهم مششيت ونا ع امل ان يقعد يدزلي ف مسجات ع شفره يساعدني ف اني نغير رايي ونكمل معاه وهو دار عكس هكي بكل طبعاً هو م يتصلش الا قليل النادر حياتنا كلها دردشه ع نت عند خوالي كان في نت بس سكرت بالعاني عشان نشوفه شنو يدير وللأسف خذلني 💔 3 ايام دزلي رساله ثاني يوم ورساله شبه يعزر فياا ليش م دزيتلش داير الحق علي تواا يعني بالعقل اناا الي زاعله منه مفروض هو يحن علياا ويخليني نلغي فكرة ان نبعدوا ع بعضناا بس دار العكس دزلي م كانش عندي رصيد توا غير عبيت وكنت نحسابك ادزيلي انتي وتسألي بس مش مشكله شخبارك ونهايتها انحبك... اول شي استفزني ان م تكرمش وعبى رصيد الا ثاني يوم فالليل هو مش مستحق لو ان السبب مادي نقولوا معذور عادي بس يقدر يحصل رصيد يقدر حتى يدزلي من فون خوه ولا امه متعود كي يوحل يدزلي منهم ما دارش ولا حل... رديت عليه ببرود زيه ثاتي يوم دزلي فيت ندز نا انتي ما ادزيش برضو رساله بتعزير .. ااااه عليك اياام كي يخطرن علياا تصدقوا ان وقتي كله كان اني نلاهي ونصبر ف روحي لما نقرا محادثاتنا لقدم اياام وهو حنوني صااح وشاريني 💔 مافش يوم خلال ال 4 شهور الي تغير فيهن رقدت ونا متريحه كل يوم نرقد بدموعي احياناً نقوله اني بكيت وللأسف م نحسش بأن تأثر بدموعي حتى محايلته علياا كانت فوق م نفسه اناا نعرفه من حروفه... معش عرفت كنه مافش سبب والله كنت مهتمه بيه بشكل مبالغ فيه ف كل تفصيله مهتمه بيه ومريحته صاح اني زعاله وحساسه شوياا بس هوو كان يحب الشي هذاا فياا ويحب يراضيني اخر فتره تماا يقولي تزعلي من شي م يستاهلش مافش شي يزعل حتى زعلي مستهين بيه 💔 كنت متعوده كي نروح من خوالي ونكون مسكره نت نلقى عااالم رسائل منه رايفتلك وامتى تروحي خطمت ع شارعكم مظلم بلاك ووووووهذا كان كلامه الي يخلي فياا طايره ف سماا .. روحت بعد 3 اياام ووو....

يتبع .....

((........))
Part | 7
ولقيت منه رسائل اقل م العادي اغلبهن وينك راايحه شكله مافش نت امتى مروحه وانححبك الشي الوحيد الي كاتبه كويس شوي كلمة انحبك مكررها كم مره بنفس عدد الحروف كأنه ينسخ فيهاا نسخ ويدز فيهاا رفع عتب كنت قبل م نمشي دازتله فيديواا اغنيه اسمها كفاياك اعذار لتامر حسني كانت توصف وضعي بالضبط معاه طبعاا متفهها وم كأنش دازتهاا له ... جا الليل وكان يوم 29/5 كان ابشع يوم يمر علياا وابشع ليله نعشيهاا واكثر ليله بكيت فيهاا بعبرتي قريب نخنقت من كثر م نكتم ف صوت بكااي عشان م يفطنليش حد .. تصدقوا حالياا تواا وانا نذكر فالاحداث ونكتب فيهن دموعي نزلن لا اراادي كل م نذكز هالايام ينزلن دموعي...حكيت معاه وتماا يجيبلي ف اعذار امي مريضة وسعفناهاا وامي وامي ونا مضايق وانا وانا تماا انااني فكر بس ف روحه فكرش فياا انا شنو احساسي وشنو احتياجاتي اناا وقتهاا كنت مقرره ننهي علاقتي معاه وميته من جوااي لان نبيه ونحبه نبيش نسيبه اصلا بهذاا كله مش هاين ..بس بعد حكالي مع ان حاجات واجده اوفر فيهن ومش مصدقتهن كنت مش عارفه ليش تملكني الشك قلت مانزيدش عليه وخليني اليوم نواسيه تماا يحكيلي ان ضغط وسكر يرتفعن عند امه ونفسها يريح وشي طبيعي عاد ان الضغط يرتفع م الزعل قتله ساير شي عندكم قالي لا بروحهاا مشيتهاا عادي قلت ممكن صاح شوي قالي شنو قررتي فكرتي ولالا قتله قررت بس خلينا نطمنوا ع امك قبل قالي لا قولي تواا م نبيش كل يوم نجي ونحكوا ف نفس الموضوع طبعا هذاا اسلوبه الجديد معاي قتله نبي نكون جنبك نين تصح امك ونحكوا بعدهاا ونتفاهموا قالي لا ماتقعديش عشان حاسه بشفقه تجاهي.. (عليك سطيحه وصللها وعليك قسوه تمت فيه) ... قتله عليش تفكر هكي انا جنبك لانك م تهونش علياا مش عشان شافقه عليك قالي قوليلي قرارك تواا اناا والله متخذه قرار وعارفته هيوجعني اناا اكثر منه ومانبيش نبعد عليه انححبه ماعمريش حبيت حد ف حياتي نفس م حبيته هو بس هو جبرني ع هكي 💔قتله 123 وحكيتله كل الي جوااي قتله انا انحبك ونبيش نخسرك عليش ادير فياا هكي وتعذب فياا نهون عليك يعني انا مش كنت حبيبتك الي تحملش زعلي وتبي راحتي دير اي شي عشااني حسسني انك تحبني انك تبيني جد خليني نقعد معاك ونكمل حياتي معاك ونكون ام عيالك زي م كنا نحلمواا قالي اكيده تبصري انتي صاح مش من جدك قتله مش هذاا وقتها لبصاره نحن وصلنا لنقطه مسدوده م تبيش ادير شي عشاني كيف تقولي خليك وانحبك وماعندكش نيه فياا تماا يتعذر ف اعذار م يقنعنش فياا قالي مانش ضاغط عليك نين تقتنعي علي كيفك (هه عليك مرحله وصلنالهاا 💔)قتله باهي نعطيك فرصه نبعدواا اسبوع وشوف روحك تقدر بلاي ولالا قالي لا تواا قرارنا ناخذوه اقتنعت ان هوو يطفش فياا هوو بايعني مستغني عني م تمسكش بيااا 💔 واااااو موعرهااا مصدومه كنت معقوله حبه لي كل هالسنين ينتهي هكي نين قعدت نشك ان اصلا م عمرش حبني مافش حب ينتهي بدون سبب عليش جرا ف جرتي وماخلش حد و م دزه لياا عشان نوافق عليه وفالاخير تما هكي .. خششني ف بحر حبه ومسك يدياا نيين همت فيه وحبيته بعدهاا رخالي يدياا وخلاني نغرق بروحي 💔 هذاا اكثر شي ممكن يوصف وضعي معاه... الي تقهر يقولي انحبك ومش هنلقى زيك بكل متنااقض كيف يحبني وعادي يخسرني كيف يحبني ونهون عليه كيف بااعني كيف وكيف وكيف... جاا الصبح ونحن ف صراااع مع بعضناا نحكوا وكانت النهايه 7:00 الصبح ... تاريخ 29/5 ( اخر رساله بينا ) تفارقنااا 💔 اخر شي قلته كلمة انححبك وكنت نعني بيهاا الف شي كان معناها انحبك ونبيك ونبيش نبعد عنك ونبيك حلالي كنت نبيه يقولي خليك م نقدرش بلاك ونرد زي قبل عشاانك بس خليك معاي م قالهنش كلهن حتي آخر انححبك قلتها له م ردش عليها 💔 خذلني وباعني وجرحني وبكااني وقسااني خلا ثقتي معدومه ف جميع عشرة سنييين معاه عدت هك ولا كأن بكيت بكيه ماعمريش توقعت اني نبكيهاا علي رااجل ف حيااتي... حسيته كأنه ينتقم مني انتقام ماعمريش تخيلت اني ممكن ننضر من مصدر أمااني وملجأي والله فعلا نسمع بيهاا نين عشتهاا اكثر خد يضرك ويجرحك هو اكثر حد تحبه ومسلمه روحك... يومهاا م رقدتش من كثر م قلبي واجعني ودموعي م بنش يكفن ااااه عليك يوم وعليك ذكرى شينه.. جا ثاني يوم ونا غارقه ف دموعي وضايقه بيا الدنياا

يتبع ....

((.......))
Part | 8
كان اول يوم لياا من غيره كان غريب وشين وكئيب وكل شي مافش شي ينفس عليا الا البكاا كان هو ملجأي كنت كي نحكيله نتريح يخفف علياا ونسكرش منه الا وناا الضحكه مرسومه ع وجي ورااضيه تواا هو سبب بكاي لمن نبي نشكي .. جا ف خاطري نقوله نبي نشكيلك منك عليش ادير فياا هكي 💔 ... مشن الايام وسمعت ان ساير عندهم خلافات عائليه ف عرفت سبب مرضت امه اكيد منهن والي استغربته ان هو م حكاليش كان كل شي يحكي فيه لي ويفضفضلي وكانت المشكله يعني عاديه مش درجه م يحكيهش لي ... اناا درتله حظر لان انجرحت منه جرح عمري م ننساه كنت متوقعته يدزلي او يرايف بس م صارش ولا شي م الي توقعته.. فاات شهر ع فراقنا احيانا نفك فالحظر ونراقب فيه ف ظهوره ف صوره ناخذ فون اي حد بيش نخش ع صفحته ع الفيس ونشوفه شن منزل كان وضعه فوق الريح ينزل ف منشورات ومغير صورته يعني اناا الي كنت نحبه بروحي ولا شنو قعدت ف دواامه معقوله هو كنه هكي؟؟ ممكن هو متعايش مع الوضع ومش مبين الله اعلم ع الي ف قلبه بس ياريته يكون زعل علياا ولو شوي ومتذكرني... خلال فتره الي سيبنا فيهاا قعدت نسترجع ف اجمل ذكرياتي معاه نذكر كان ف يوم غلطوا علياا ف النتيجة قالولي عندك ماده وناا يومهاا كنت زعلانه ونبكي وحالتي حاله دزيتله رساله قتله راهو صار وصار وعندي ماده وهم فترتها عندهمش نت ولا هو عنده رصيد نذكر والله مشى لصاحبه 3 فالليل وفتح عشاني وحكى معاياا وحفزني كان اكثر مره يكون فيهاا حنون معاي جاني ونا نبكي وماسكرتش منه الا وضحكه مرسومه ع وجي كان كلامه كله دلع وغزل وقعد ينكتلي عشان نضحك ويبصر معايا اخر شي حكالي قصه نين نعست وقالي غمضي وتخيليهاا نين ترقدي تمنيت اليوم هذاا يرد كان زعلان عليا اكثر مني ثاني يوم بشرته اني نجحت وفرحلي اكثر م فرحت لروحي كنت نقول م فش حد زيه ف دنيا... زي م وجعلي قلبي كان له الفضل ف سعادتي فتره طوويله ماننكرش اني عشت ايام مستحيل ننساهن ومش نادمه اني عرفته وحبيته كان تجربه حلوه بس نهايتهاا مره 💔 تعلمت منها وخذيت منها دروس وقوتني واكتشفت اني انسانه قووويه ونقدر نتجاوز اي شي يسير معاي حتى لو من جواا نتقطع بس م حدش يلاحظ علياا شي يجني لحظات ضعف نحنله ونتمناه حذاي او اقل شي نسمع صوته ونحكي معاه بعدها نذكر شنو دار معاي ونتنهد تنهيدة وجع ونقول مش نصيبي خلاص لازم نمحاه من عقلي وقلبي ... بعد صراع شهر قررت اني نفضي الي جوااي ولازم ندزله رساله لآخر مره ع امل اني نتريح بعدهاا ومعش نفكر فيه... استجمعت قواي وكتبت كل الي ف قلبي وفكيت الحظر ودزيتهاا له .. بصراحه كنت متوقعه ان م يردش علي لان قسوته مسيطره عليه بس قلت المهم نتريح ويقرا كلامي لعل وعسى يحس بروحه ويحنلي .. بس الي صدمني ان اصلا م خشش عليها رسالتي خلاها امعقله وقاعد متصل وفاتح للصبح ورسالتي م فتحهش جرحني زياده اكثر م كنت مجروحه منه قبل.. كسرلي خااطري حسسني اني م نعنيلش اصلا لدرجه هذي هنت يعني .. خليته للصبح وعيت لقيته نفس م هي هو مسكر 9 الصبح ورسالتي معلقه مش قاريها قررت ان هيكون حظر نهائي ومعش ف حياتي نفكر اني نسامحه .. كان شاطر ف ان يقسي قلبي عليه ويخليني نكرهه... مش عارفه شنو شعوره لماا تكرم وفتحهاا وقراهاا تهيالي رسالتي لو قراها حد مخطم علياا ف شارع بسس راهو تأثر
وهو م حركتش فيه ساكن.. وهذي كانت رسالتي:

يتبع........

((.......))
Part | 9
((عليش اديرلي هكي يانوني حبيبتك ناااا وجعتلي قلبي ربي يسااامح وخلاص نستاهلش منك هكي ... بعدت عنك وجواا قلبي اموااااس يطعنن في كل لحظه عشاان انت جبرتني عشاان خليتني اخر اولويااتك اهملتني وجرحتني وتقولي مافش شي. . الي تووجع اكثر ماتمسكتش بي 💔 ودرتش شي عشااني م صدقت تخلصت مني يعني هذاا قدري عندك ياروحي وين كلامك تقولي مستحيل نسيبك ومرتي وام عموري حوشنا وحيااتنا فرحنااا وين الي وعدتني بيه كله عليش هذاا كله هان عليك وقعد عنديش قدر عندك ونهمكش الي جااتك جااتك علي كان بنت ربي م يهنيهاا بيك ولا تااخذك وكاانك مليت مني ربي يساامحك بنات النااس مش لعبه والله مانبي ندعي بس ربي هيااخذ حق كل دمعه نزلت مني كنت انت سببها انحححبك ومازلت انحححبك مش هنكذب ونقول نسيت بس مصيري هننسى ويعوضني ربي ب الي احسن منك على قوولتك .. وطول عمري هنذكرك بالخير وكل كلمه ولحظة سعاده عشيتني فيهاا مش هننساها وكل مكالمه لناا نرد نسمع فيهاا ونتخيل كأنهاا توااا وكأنك انت مش متغير وزي قبل بس مايدوم حاال انبشرك اني حذفتهن وبديت نتخطااك الحمدالله قسيت قلبي من افعالك .... هيقعد ف خاطري نعيش ولو يوم معاك طوول م عاايشه من كثر م حلمناا مع بعضناا... وللأسف كلهن وعود كااذبه منك ماوفيتش منهن ولا حااجه طلعت اي كلام زيك زي اي وااحد يعشم بنت ويسحب ويقلب عليهاا ... ياريتني م عرفتك ولا حبيتك 3 سنين مش شوي من عمري كلهن معاك عشتهن ع الحلوه والمره حتى بأسوأ اايام كانن اسمااح لانك جنبي ومعاي فيهن ايام صعبه تواا عايشه فيهن وظروف بغض النظر عن الوجع الي سببته لي انت وضيقتي منك ظروف اخرى يعلمش بيهن غير الله تمنيتك جبني فيهن بعد يومي المتعب نجيك وتخفف عني ونخفف عنك نتريح بييييك.. بس شنو هذاا كله كنت معش قعدت رااحتي لا شي قعدت سبب قل راااحتي وقل سعاادتي كل صفااتك تبدلن بالعكس ... تعرف شنو اكثر شي يووجع انك متصل تماا ظهورك هو وسيلتي ان نطمن عليك مش من حقي اندزلك قعدت... م تخيلش قيس شنو نتوجع بعد تفتح وناا فاتحه نقعد مخنووووقه وقلبي ينغزني ماعمرش مرن علي اياام زي الشهر هذا ... حااستك متريح بلاي ومش معدل هكي غلاي عندك ناا شوي بكل طلع عكس م كنت تقول ياخوفي يطلع حتي هووو كذب ومافش شي من قلبك لان مش معقوله الحب الي كنت امبينه لي ومعيشني فيه ينتهي بسهوله هذي وياريتني حتي درتلك شي بالعكس صاينتك ومهتمه بيك ف كل وقت .. حطيت صورتك ع الوتس ومنزل ع الفيس تقهر في يعني عارفني نغار ع حبيبي كنت ونقولك ماتحطهش لكن شنو مطلوووق سرااحك واصلا انت م صدقت نظاامك جت منك يااجاامع تحررت ... مازلت نقولك حبيبي راا ومازلت نتفرج ع صورك ومازلت نسهري فيك ف خيالي كله ندير فيه مازلت بس نبشرك اخرى اني تواا وحالياا حذفتهن لان اليوم بعد عذااب شهر واكثر من هكي اخرى لان ومن ايام ونحن نحكوااا وناا مكملتهاا ابكاا وقهر قررت نسكر صفحتك بكككل كنت ندعي ونقول ربي يجمع بينااا بس تواا معش نبيك اهااا معش نبيك ومعش نبي نعيش معاك ولا شي م الي تخيلنااه لان وهم وسعاده كااذبه .... انحبك يا كل اوجااعي بس ( ملاحظه ) مش هيستمر حبي لك العمر كله هننسى وقريب اخرى مش بعيد هيعوضني ربي ب الي احسسسن منك رااااجل عند كلمته يصوني ويحاافظ علي ويكمل معاي للنهاايه مايتغيرش علي يحن علي ويحبني ويهتم بي ونكون حلاله وله ... وانت نصيحتي لك غير تفكيرك المتحجر وكانك حبيت كاان مش حااب ولاقي بنت من تواا اصلا ماتعشمهش وتسيبهااا لان ربي فوووق ويشوف ف كل شي كله هتاخذه ذنب فوق ارقبتك ... ربي يسامحني ويغفرلي على كل حرف حكيته معاك نا كنت وااثقه فيك ثقه فوق الخيال متنازله ع كل شي معاك احلام البنات انهن ينخطبن بدري مواعيد ،مكالمات كلهن كنت متنازله عليهن ونقول نراجيه لو 10 سنين وانت بشنو كافيتي استحليت اغيابي ومش جايتك نيه تحاافظ علي م صدقت قتلك بنمشي لان زعلانه منك ومن اهمالك قتلي مانبيش نضغط عليك بارك الله فيك جديات بس شنو الحمدالله اني اكشتفت هذاا كله تواااا مع ان حتي توا مش بدري 3 سنين من عمري عدن هك ياريتك كافيتني بغير هكي ... ماهنتش علي ندعي عليك ولا نذمك ولا شي ناا سامحتت بس تواا طالقتهاا بينك وبين ربي ... ربي قادر ع ان يضمدلي جروحي ويعوضني... انت ان شاءلله بسس تعيش متريح الضمير لان جدد مادرتش في شي ساهل الا اذاا شايف روحك انت صاااح، هه ياربي صاح انت اصلا شايف ان مافش شي وان وضعك تماام ومنسجم نا الي واهمه وندلع 💔... المهم هننسااك ثق وتأكد من هكي ... كي م يقولواا م حد يموت علي حد اقتنعت بيهاا كنت نحساب روحي نموت بلاك بس مازلت عايشه ... الحمدالله صحتي كوويسه وهلي كويسين وامي ان شالله هتقعد كووويسه ولباااقي يتعوض ... ع العموم ربي يهنيك ونرد نقولك كاان حبيت صون مش كل وحده زيي تساامح ف الي تدعي وتقعد متكسر طوول عمرك واسمع.....

يتبع ......

((.......))
Part | 10
واسمع هتعرف الفرق بعد تخش حيااتك بنت اخرى وتعرف الفرق بين السماااا والوطااا لان بككل فخر اهااا والاول مره نعترف فعلاً ان مافش وحده زيي ومش هتلقى زيي ولا تلقى من يحبك ويهتم بيك زيي بس كله طلع فعلاً م تستاهلش ... حالياا ماعنديش ثقه ف حد إلا ف روووحي لأن شنو كنت واثقه فيك وكسرتني ف طبيعي نخاف أن يكسرني اي حد اخرى .. سببتلي عقده ف حيااتي مش عارفه كيف نقد نرد ثقتي ف نااس ... وعلى كل حاال مشكور 💔))


((ياما صـــــــــــار وياما حكينا لبعضــــــــــــــــنا الأسرار عشرة سنين أطوال موش نــــــــــهار بدلتها بفراق من عــــــــــــــــــــاشرت عمرك معايا قبل مـــــــــــــــــــــا تحتار واليوم مانعرفش كيف أحتــــــــــــــرت عاش الغلاء بيناتنا بأقــــــــــــــــــــدار ومات الغلاء عندك وما خبــــــــــــرت كميته اسرار وبحت بيه جـــــــــــــهار أمنت وانت الحب بيه كفـــــــــــــــرت يا ميـــــــــــــم عيني يا زهاء الانظار مشتاقلك وانت علي صــــــــــــــبرت وما عاد جتني من قداك اخــــــــــــبار وماكش بعيد الدار لا ســــــــــــــــافرت عشقتك عزفتك لحـــــــــــــن عل لوتار احساس بيك ع الناس بيه شعرت تمنّيتك معايا في أول المشــــــــــــــــوار لا اخترت غيري لا ســـــــــواك اخترت)) ونهيت رسالتي له بشَعر.

مرن شهر و2 و 3 وهو ع نفس وضعه وانا اصلا خلاص بديت نتخطااه ننكرش ان مرات هكي يجيني له رياف ونحنله بس مسرع م نسيطر ع روحي ونذكر ان م يستاهلش مني حتى مجرد تفكير احياناً نقول مساامحته وبينه بين ربي واحياناً نحس روحي حاقده ومش مسامحه .. ومازلت ف دوامة شنو السبب وعليش تغير علياا ولحد الآن مش عارفه سببه.. فتره الي فاتت سمعت ان دار حادث 💔..الي استغربته من روحي م تأثرتش اناا كان مغير ينجرح ولا يتعوق قلبي يوجعني معاه .. هالمره كي سمعت الخبر كأني سمعته ع حد مجرد اني نعرفه وخلاص حتى صاحبتي الي قالتلي الخبر استغربت قالتلي كنت خايفه شنو تكون ردة فعلك ومتردده نقولك .. هوو قسالي قلبي عليه زعلت عليه بس ك اي شخص عادي مش (كبيدتي الي كانت روحي فداه 💔) يومها فالليل حنيتله وقعد خاطري نطمن عليه حسيت روحى اني كنت انمثل قدامهن واني قلبي وجعني عليه كيف يا ناس هذا حبيبي معقوله يكون شعوري هكي تجاهه جا في بالي زعما لما حس ان ف لحظه ممكن يموت وربي ياخذ امانته زعما خطرت عليه جيت ف باله اذكر ان ظلمني .. نفس الوقت حمدت ربي اننا متفارقين مش عارفه شنو كان صار فياا لو ان نحكوا وسمعت ان صارله حادث بس الحمدالله هو كوويس ومش سايرله شي سيارته بس اضررت .. عمري م دعيت عليه بككل ولا هان علياا ندعي عليه بشر مهماا كان.. كانت دعوتي مختصره ف حسبي الله ونعم الوكيل فقط وحتى هياا لماا نقولهاا نستغفر بعدهاا ونقول ربي يسامحه مازلت حنونه فيه رغم جفاه... اكتشفت ان اوعر شي ان يكون قلبك طيب وتسامح اتضر روحك وااااجد وتكون انت الضحيه ديماا .. القسوه احياناً تكون احسن اقل شي نتريح اناا مش ديما نضحي ونساامح .. هو خلق مني شخصيه جديده اصلا .. الحمدالله عداا الوقت وفعلا يقولك الوقت كفيل بأن ينسيك كل شي وهذاا الي صارلي تعودت بلاه وطلعته من قلبي مازال يخطر علياا بس ك حب خلاااص هو حرق حبي له بيديه م يستاهلش ان يكون ف قلبي ما اعتقدش ان في مجال لفرصه ثانيه بيناا شي مستبعد ومستحيل وهو قاسي بما فيه الكفايه اصلا .. الحمدالله ع كل حااال مقتنعه ان هذاا م كتبلي ربي وان نصيبي مش معاه وان شالله نصيبي يعوضني ع كل شي عشته ف تجربتي هذي.. العبره الي مفروض اي بنت تاخذهاا ان مش اي حد تسلميه قلبك ومش اي حد تثقي الا من رحم طبعا اكيد مش كلهم ونعرف ناس وااجده حبوا ووفوا وكملوا بس وقت تواا حالياا قليل الناادر يعني اكيد مافش بنت م تبيش تحب حبي بس اختاري الشخص الصاح وبرضو بحدود يعني خليك دايره خطوط حمر ماتتجاوزيهنش لان الحب قاعد ف كل مكان ومتوفر بس الشخص الصاح مش ديماا هتلقي قدامك .. و حتى لو عشتي تجربه فاشله مش نهاية الدنياا ربي م ينسى حد واكيد هيعوضك ب الي احسن منه بألف مره ونصيبك م كانش فيه م البدايه وان شالله اي 2 يحبوا بعضهم يكتبهم ربي حلال بعضهم ومايذوقوا نار لفراق ...
قلتلكم فالبدايه اني مش هندير لقصتي عنوان نين تكمل:
قصتنا كان هو مسميهاا ( حب الحياه الأول والأخير)
واناا بعد عشتهاا طلعت مش هياا حب حياتي 💔اخترتلهاا اسم ثاني يليق بيهاا الي هو ( سعاده كاذبه)
كل السعاده والفرح الي عشته فيهااا كانن مشاعر مؤقته هوو ساعدني اني ندفنهن ونتخلص منهن وكانت سعاده كااذبه وحلم وعيت منه متأخر 💔

#النهايه...

*لو كان نا اللي نختار*🤷🏻‍♀️
*نمشي نجيب غياب خاطري*♥️

*حتى وهي خلا تنزار*
*مازالت عزيزه دارهم*♥️

*دير الخير وخله عنك*
*ليام أطوال ويطرنك♥️*

*سماحة الغلا نلقاك*♥️
*وسماحة النصيب يلمنا*♥️

*سماحة الغلا حنون*♥️
*مايرضى فيك التعب وين مايكون*♥️🙅🏻‍♀️

*كل نهار انقولوا هانت*
*لكن مافي حاجة بانت♥️*

ـ نا وياك الليل دونا ، ويش انديرو يَ مطرانا ؟.

ـ مَ تلومها مشتاقة ، و مرايفة اعذرها ، الفراق مر مرار و انتَ يلي شغلها .

ـ عيني تخايل فيك ، و انتَ بعيد عليها ، عيني تخايل فيك .

ـ يبرم و يجي لِديارنا ، يبرم و يجينَا .