ياسيدي يا ابالحسن محتار انه بوصفك صدگ
انته النظر وانته الهوه وانت الحدّر صدري يدگ
شرد اوصفك حيره حرت ياسيدالحب والعشگ
هايم انه بعشگك نعم وگلبي اعله ذكرك يحترگ

هايم بيك او حاير
يالمثلك ماصــــاير - ماتشبه الناس

شما وصفك بحساسي
تطلع شيبه براســــــي - يمشيب الراس

ياسيد الكون - يا ابالحـسن
بيك انه مجنون- يا ابالحـسن
الله انعرف بيك - ياسيدي
ما حبك شلون

يامولاي يا ابالحسـن
ـــــــــــــــــــــــــــ
سويني قمبر سيدي وخليني خادم بس الك
يتعلئ شانه اليخدمك والماخـدم يعني هلك
انته الله حبك ياعلي وبيدك ترك حتى الفلك
يعني اليخدمك مو بشر عند الله لايصبح ملك

خدامك تتباهه
بالمحشر يم طه - عشاگ ابو حسين

والمابايع حيدر
موعد يوم المحشر - وين المفر وين

بحمه الله وحماك - يا ابالحسن
يخسى الي عاداك - يا ابالحسن
احنـه الهويــناك - ياسيدي
رغمن علئ اعداك

يامولاي يابالحسن
ـــــــــــــــــــــــــــ
بالدنيـه اول ماصرت جابتنــي أمـي بياعلـــي
وبالا فتـئ إلا علـــي ربونــي من زغـري هلــي
الاصله حلال ابدنيته ماعنده بس حيدر ولـي
اليبغض علي لو من هلي لا انه اله ولاهوه الي

اتبـــــــره من الوالد
لو حب غيرك واحد - ينساني وانساه

مخلوق آنه الحـبـــك
كلمن يمشي بدربــك - من الله اهواه

حبك للرجــال - يا ابالحسن
تتوارثه اجيال - يا ابالحسن
صار العشگ بيك - ياسيدي
مضرب للمّثــــــال

يامولاي يا ابالحسن
ـــــــــــــــــــــــــــ
ذكرك عبـــاده ياعلي بقول النبي حق نفتخر
الماعنده من حيدر ختم مزور جوازه شينتضر
بالمحشر اهوه وسيده الماواله حيــدر ينشمر
اهناك بجهنم يحترك ويصبح رمــــاد اويندثر

خسران الما واله
الحـق حيدر واله - يضل عمره ندمان

خـل يضل بعنــاده
الواله غير الســاده - يعيش ابوهم جان

اليعشگ علي يصيح - ياابالحسن
يمك فلا اطيــــــــح - يا ابالحسن
الموش انته مولاه - ياسيدي
رمـاد بعصف ريــــــــــح

يامولاي يا ابالحسن
ـــــــــــــــــــــــــــ
محمد المشعلاوي

كل الخير ياناس من جفوف عباس
ــــــــــــــــــــــــــــــــــــــــــــــــــــــ
عباس ياحيد غيره وعزم راعي الشيم
بكل زود من راح جاب النهر يم الخيم
بالعين أتلگــاه لمن أجــه صوبه السهم

الكافـل أشمحلاته
لو تـرف ريـشاتـه
حـيدر بحمـــلاته .. راهــب الحـومه

الحومه من طباها
بس جثث خــلاها
القـاده بس لاگاها .. كلهه مهــزومه
ـــــــــــــــــــــــــــــــــــــــــــــــــــ
يانور عالنور كاسر علئ ضي الشمس
وفاي عباس ومنه الوفـه ماخذ درس
بالسيف كصاي مخوفهه جن اويه الانس

بسيفه كلشي يجيبه
الهـــوه هــم يصيبه
اسمه يعنـــي الهييه .. ورفعــة الراس

بيـه شجـاعه وغيره
الخصم عاش بحيره
شنكـــــتب بتفسيره .. أشجع الناس
ـــــــــــــــــــــــــــ
ريشات عباس صـارن منايـر من ذهـب
والكون محتار واتعجـب اعليـه العجـب
التاريخ باعجاز بوصافه محتار أشكتب

مايوصفه الشــــــاعر
كلشي بيه ضل حاير
دخـيل جفـه الساطر .. دخيـل يمنــاه

ياگــمــــر ناديـــنه
أبابــــه اوصليــنه
ادخيل عم اسكينه .. لذنـــه بحمـــاه
ـــــــــــــــــــــــــــ
اشمحلاه مهيوب من يمشي يدحج بالنجم
عالخيــل خـــيال فارس شجـــاع وبي عزم
ينجاب طـــــــرواه تتخورس احلوگ الزلم

من يسل بتــــــــاره
علي سل فقـــــــاره
من علـي واســـراره .. دخيل عبـــاس

الگنطره اتضل شاهد
ماعبــر ليــه واحــــد
ويه الرگــب متواعد .. اعله الرگب داس
ـــــــــــــــــــــــــــ
شجم جيش مهزوم لو مر فقط طاري الاسم
اللاگـــاه منـــــدوم عدهم شجـــــاع الينهزم
عبـاس معـروف راعي الشجــاعه شكد شهم

ماكـو اليشبهونه
بس علـي تدرونه
بحيدر ايوصفونه .. غيــره واحســاس

راهــب الخيـاله
زلمه گـد افعـاله
اشباه ماكو امثاله .. فقــط عبـــاس
ــــــــــــــــــــــــــــــــــــــــــــــــــــ
محمد المشعلاوي

قصيدة : كل الخير ياناس

اداء الرادود : ملا حسين سهم

الشاعر : محمد المشعلاوي

هيئة حامل لواء الحسين عليه السلام
البصره قضاء المدينه

رابط القصيدة كامله
https://youtu.be/tprul9CzPx0

دخيل الله ودخيل جفه
بالخــوه عبـــاس وفــه
وجهه گمر گمر گمر .. من الباري شرفه
من دمه بركان يدفه

الله  خصه بصفاته .. خلاه  خيمه لخواته
وانطاه هيبت جماله .. شمحلاه ماكو بحلاته

دخيل اعيونك ياگمر  يالمثلك ماكو أحد
لو فر كل هاي البشر ماكو لي شبهك أبد
يحتار اليوصف بشر شيوصف بالله الگمر
سبحان الله خالقك يم بابك كلشي سجد

يامولاي ياقمر بني هاشم
ـــــــــــــــــــــــــــــــــــــــــــــــــــ

نورك عله النور ضوه
ومن عندك ايغاره هوه
نورالـ گمر گمر گمر  .. من نورك انخلق
ونورك يوصفوه اقــوه

الله  خــالق جمالك ..  من نور حيدر خذالك
أشباه بالدنيه مالك  .. عبـاس ماكـــو مثالك

يا مصدر نور الشمس  يالمنك غـــار الگمر
ياكوكب ما تنوصف  يالعلمك فــاق البشر
بعيونك يا ابالفضل  محتار فكري والعقل
قررت اكتبلك شعر  طولت بعيـــونك دهر

يامولاي ياقمر بني هاشم
ــــــــــــــــــــــــــــــــــــــــــــــــــــ

انت الله حط بيك غيره
خـلاهــا للنــــاس سيـره
انتـــه گمر گمر گمر  .. دخيلك يبو الفضل
وبعيونك اتنــــــام ديره

مخلوق غيره وشهامه .. وفاي وضحه الأمامه
ما خاب لي دگـله بابه .. منطيـه ربــــه كـرامه

يترسها اجفوف الطلب  وجفوفه هوه مكطعه
ما راد واحـد لو سئل   بـيـبان گلبه أمشـــرعـه
باب الله أبو الفضـــل  عبــــاس الله امكـرمـه 
والنــــاداه مدد مدد  حــتمـاً هــــــوه يسمعه

يامولاي ياقمر بني هاشم
ـــــــــــــــــــــــــــــــــــــــــــــــــــــــ

شما وصف احتار عقلي
لا مو بشر هـــــــاذ گلي
حتماً  گمر گمر گمر ..  عباس ابن علي
لو اسمه ينجاب صلّي

عباس شيوصف جماله .. لحسين واصل كماله
لو جيب طاري الشجاعه .. يخافون لو مر خياله

لو طب ينهي المعركه من يصيح حيدر ياعلي
مـن هيـج زينـب طلبته العبـاس گـالت كـافلي
ينحب هوه وغيـــرته العبـــــــاس يا هل خلك
فــدوه الطــاري الاســم أنــــروح انـــه وهلـي

يامولاي ياقمر بني هاشم
ــــــــــــــــــــــــــــــــــــــــــــــــــــ

بعشگه الخلك هاي حگها
لو يركـــب الخيـــل ركها
غير الگمر گمر گمر  .. وسيفك ورث علي
وكل معظله اتضيج فكها

الينخاه يرد عنده شاهد .. حاشاه ماردله واحد
عباس بالشده نادي .. تلكاه بعدة مشـاهد

من تنخه الگمر گــــول  سهله وانكضت هـاي
انطه اجفوفه والعين  جي سكنه اطلبت ماي
مارجـع فــارغ الذي دك بابـــه وطلب وطلب
بالشكــر تزداد النـعم  مـولاي مشكور أهــواي

يامولاي  ياقمر بني هاشم
ــــــــــــــــــــــــــــــــــــــــــــــــــ
محمد المشعلاوي

حيــدر فـــارك الدنـــيه
وصارت وحشه عالوادم
كسره بكل گلب فرگــاه
مو بس ابـ بنـي هاشـم
مازل بالعــدل حـاشــاه
سوه السلطان والخادم
اليخدم عد علي مرتاح
بخدمته عمره ما نـادم

حـيـدر هـظـيمه يضمه التـــراب
يغدرونــــه وسفــــه آه يالعـذاب
من اهل السقيفه ساس المصاب
سَنو حقــدهم لاهــل الكـتـــــاب

من الله ما ضل كل خجل
براسه انطبر خيــر العمل
اهـل السقيفه بكــل حقـد
يطلبونه ثــارات الجــمـل
ـــــــــــــــــــــــــــ
العايش بالضلام اسنين
يكــره جيــت الغبشه
يبغضونه علي هالناس
جـي عابـرهم ابرمشه
من اهد يوم الغدير هناك
صابتهم صدك دهشه
ذكرهم لو يمر بابليس
حته ابليس يتغشه

من اخياله يشرد والله زمـان
گالو خليفــه صايــر فُـــــلان
بكـل المعــــارك ماله مجـــان
بالشده نعــرف يتخفـه جـان

بس الغـدر عدهم طبــع
ذيــج السقيــفه والجمع
هجمو عله دار ام حسن
گالو وإن كســـــرو ضلع
ــــــــــــــــــــــــــــــــ
دنيه ابلا شمس شتصير
ضلمه وتنحمــــل گــــوه
ديـن ابلا علــي مابيــــه
خير وكلشي ما يســـوه
لو ما حـــيدر الكـــــــرار
ماكو بالعرب نخــــــــوه
بأيـده مهـدم الاصنـــــام
وسيفه بالحـرب يگــــوه

من سيفه يرجف اكبر شجاع
الاعـوج يعدله وأمره مطـــاع
لوما وجوده دين الله ضـــاع
المثله وسفه تغدره الضــبـاع

غدروه أهل ساس الفـتن
السمو چبد ابـنه الحـسن
نفس العصابه بكـل وقـت
ساس الجريمه بكـل زمن
ـــــــــــــــــــــــــــــــ
الله انطه العلي الافلاك
وأبيتـه أنــزل الكـوثـر
كل هاذا ويكضي اليل
عله الأيتـــام يتحسر
اليكسم خبزته ويالناس
جزاتـــه ابراسه يتطبر
جرحك ياعلي ماطاب
بيــنه او بالگـلب أثـــر

بعدك تيــتم حتـــئ الحمام
بخيـرك يفرفـح جان وينام
وحشه وخليه بعدك حـرام
دارك يحيـدر دار الســـلام

كلشي انـتهه وي موتـته
غربه اصبحت وي طيحته
هاليله حزنــــانه السمه
مَــنْ لليتــــامه ابغيبته
ـــــــــــــــــــــــــــ
محزن كلشي من فرگــاك
السمه عگبك صفت حمره
الدنــيه بفرگــتك مـــولاي
وحشه وتشبهه الصحــره
موش انته التموت ابهـاي
ولاتهمــــك عـلي الطبـره
العمر ما ردته بيك إيطول
من أهـد ما ماتت الزهـره

الفــارك حـبيبه ميـت وراه
دلاله يـنبـــض اه اعـلـه اه
للزهره حيدر شوگـه خذاه
بفرگتهه عايش محني كفاه

ماعنـــدي بالدنيــه وطــن
اخلافج متت اه يم حسن
المن اضل عـــايش بعـد
من افراگج اعيوني عمن
ـــــــــــــــــــــــــــ
محمد المشعلاوي

الملا مرتضى عارف
الشاعر محمد المشعلاوي
الذاكر مسلم جاسم

هيئة الغريبة زينب ع
البصرة - المدينة - ام الشويج

#جديد_1445


صاح ادركني اخوي ومشه ينصره
رد مكســـور محني وكاض ضهره
گتله أشبيــك ذابــل ذبلت اليــاس
صاح أبصوت زينــب راح عبــاس
راح اخــوي ••• راح اخــوي
ـــــــــــــــــــــــــــــ
ذاك الجـان شـاب حـسين ويـــانه
رد شايب ارسومه اهـواي تعبــانه
گتله حسين سولف صاح يـ أم عون
طاح اعله النهر بس يابس اللسانه

راجع وحدك اشلون
وينه حادي الاضعون
ضل ابوحده الحسين
اسمعهم يصيحون

بسيفه من رجــع يتوچه شفته
أثـاري حـسـين هـاذه وماعرفته

شيب راسه من معاين الناس
صاح بصوت زينب راح عباس
ــــــــــــــــــــــــ
خويه ام عون الحگي حسينج ابساع
المجـــانه بالسمه تمدد اعـله الكــاع
الاشد بيه الظهر كـل شده عبـــــاس
طــاح ومني كل شي بكربله ضـــاع

جا ننطي الوجه وين
جاوب خويه يحسين
مادام الگمر طـــــــاح
گلنه احسبنه ميتين

بگـد ما شيــب طـالعله بلحيــته
نسيت امصابي وحسيني بجيته

راح اوردلي اخوي امشيب الراس
صاح ابصوت زينـــــب راح عباس
ـــــــــــــــــــــــــــ
امبينه الفرگـــه بيه والتعب بعيونه
لحــد ينشد اعلـه احـسينه اشلـونه
الصاير مو سهل فـارگ اعــز ناسه
الرايـح منه اخـوه مكسور تلگونه

شيب گلبه والراس
امفارك وجه عبــاس
حگه يشيب حسين
اعرفه اهوايه حساس

يتذكـر الصوت اوتدمـــع العــين
من ناداه اخوي ادركني يحسين

بخوت ابو فاضل ماكو مقياس
صاح بصوت زينب راح عباس
ــــــــــــــــــــــــ
تهدم ركن اخـوي اوطـاح كل حيله
حسـين ابياوكت من يمشي أتجيله
ما صارت گبل بحسيـن هـل حـيره
ابو فــاضل اباله و طـاح شيشيـله

ضل ابوحده محتـــار
بگلبه اشتعلت النــار
هاي بياوكـــت هــاي
اديه طبعت بالاكتـار

بعد كسرة حسين اشباقي بحسين
الميت موش واحـــد ماتو اثنـــين

واحـــد همه جانو نفس الاحساس
صاح بصـوت زينـــب راح عبــاس
ـــــــــــــــــــــــــــ
ياكـــــسرة ضهرنه بــــفرگـــة اعيــــونه
يالـ بالدنيــــــه ماكـــو من اليشبــــهونه
تــره احسين بغيـــــابه كـــبر مية عــام
وتمـنه ايمـــوت هــوه ولا يذبحـــــونه

حـيـل اتغيـر حـسين
شيب رمشه والعين
الرايـــح منه عباس
اجيب الراحله منين

ضل للخيمه رايـح راجــع ينــوح
شيطيب اجروحه الكله مجروح

بيت الخوه طاح بطيحت الساس
صاح ابصوت زينـب راح عباس
ـــــــــــــــــــــــــــ
احس گلبي انمرد من طاحت الخيمه
واتـصـور خـــواتـــــك باجــــر أبهيمه
عمرك باقـــي منه حسين جـم لحظـه
وباجـــر يبـدي بيـنه للسبـي وضيمه

حيله انباگ الحسين
ضل بحـيره ما بيـن
بين اخيامه والماي
قسم روحــه نصين

ماندري بعمرنه بسرعــه ينبـــاگ
ارجع يابو فــاضل عـــوف الفراگ

من ردلي الحسين اكطعت الانفاس
صاح ابصوت زينـــب راح عباس
ـــــــــــــــــــــــــــــــــــــ
محمد المشعلاوي

ليش بوحدك راجع يالحسين
جا وين اخوك احزام ضهرك
متغيره ارسومك يالحنين
مكسور شنهي اسباب كسرك
عباس اخيك ماهو جاوين
جابوني خويه وگلي عذرك

سولفلي يبعد الروح ساكت ليش حاجيني
حسين ابداعت العباس هاي السكته تاذيني

احجي وياك فدوه احچي
عمت عيني صدك تبــچي
شنهي اشصــــار ويـــــاك
بسيـــفك راد متـوچـــــي

اعيونك باچـيه أهـواي
شعايف خـويه عالمـاي
عني اتضم يالحـسين
لا موعـــــادتك هـــاي

اه يحسين ياخويه
ـــــــــــــــــــــــــــ
شيبت گـلبـي ابجيتـــك هـــاي
عبـاس وين احجيلي فـــــدوه
أمتانيه اعيوني وگلت جــــاي
ورديت وحـــــدك تمشي گـوه
عطشانه صح بس ماردت ماي
عطشانه روحـي تريد خـــــوه

اعيوني اعله الدرب يحسين تربي وليكم اتاني
ها هسه عَلـــي يلفـــون واحـــد شابگ الثــاني

جا ليش ارجعت وحـدك
لاحــيـل اونـظـــر عــدك
حيلك من رحت عالمـاي
لــيش الحــــــيل ماردك

اسئل رايده اجواب
جاليش الگمر غـاب
خويه حسين جاوبني
گلبي اتفطر اوذاب

اه ياحسين ياخويه
ـــــــــــــــــــــــــــ
كل حـيلـي زينــب عالنهر راح
فاركنــي اخــوي الجـان حيلي
گوم اعله حيلك گتله مو طاح
گلبي اعله فـگــدك يا خليـــلي
لمن چهــبته الســاني ما صاح
جـدامـي هـد يركــض دليــلي

يازينــب لكيته اهنــاك مثــل المــاي متبدي
دخيلك كتله گوم اوياي غيرك تدري ماعدي

لكـــيته أموذر ودامــي
طايـــح عالنهر ضامـي
زينب خويه من رديت
ما وچــدهـن اخيـامـي

ضايع دربـي يم عــون
لخــيامي ارجع اشلون
رايح منـــي عبــــــاس
واسمعهم يظحــكــون

اه يحسين ياخويه
ـــــــــــــــــــــــــــ
الكـاسرلي ضهري افـراك عبـاس
زينـــب يخويــه وهــاذ حــــالي
مـن عده شيب گلبـــي والراس
الماعندي غيره وحــيل غــــالي
عايفني وحــــدي ابين هالناس
الرافكني دوم اوجــــن خيـالي

الهظمتني يزينب حيــن لگـيت اجفوف ماعنده
وگتله انهظ يبو فاضل اخوك حسين ضل وحده

عليـــــك ابداعت الخــوه
انـهـظ يابــــو المـــــــروه
هس توك طحت عبــاس
شوف افـراگـك اشســوه

لتخليـنــي وتــــــروح
فدوه الطولك انــروح
حيلي اوياك هم طاح
افرگـك طلــع الــروح

اه يحسين ياخويه
ـــــــــــــــــــــــــــ
يمه بطيت اهواي يمّ اعون
ترجـيته بس يـگـــــوم ليه
گتله ابدونك ارجـع اشلون
وزينــب تتــاني تـريد جيه
يمه اگعدت نشفت الاعيون
حاجيني فدوه اشضال بيه

يكاسر ضهري گوم اوياي الحد اخيامي تجيلي
جا شمسويه بيك الناس گوم احجيلي وشكيلي

ياهـو الي طبـر راســك
شلون اتجرئ اوجاسك
گــــوم اولاتـتــعـبـــني
جـا غير انه اعز ناسك

دمـك تارس الكــــاع
يالرايــح بـــلا اوداع
وجـهك تارس الكون
ليش اعله النهر ضاع

اه يحسين ياخويه
ـــــــــــــــــــــــــــ
محمد المشعلاوي

#نزال
شجاعة الامام الحسين ع

الرعب حل الرعب من لكد ميمونه
بالشجاعه وبالحرب قسور ايلقبونه
بخزرته يوكف گلب المايلوحه بسيفه
هيبه بيه لمن يطب حيدر ايسمونه

طب ليهه اوسواها حمره من الدمه
دخــيل الله ودخـيله ليــث الموزمه
مهـزومه خــــلاها قــــادات الخصم
من الخــيمه ويتلامـع شافو صـارمه

ياعلــــي بس نــــاده
هــزم كـل الـقــــــاده
ادخيـل عزمه اوزوده
حسيـن شيـخ الساده

ابو الاكبــــــر دخيل اسمه
ـــــــــــــــــــــــــــ
العـزم شد العـزم والغضب بعيـــونه
من هجم شيخ الزلم فنهم ايلاگــونه
صـار قانـون الهـزم حين غار اعليهم
حسين ابد مايلزم بالحـرب يدرونه

طشاهـم بالهيمه وخـيرهم شرد
يتجادح بالعـرگه حـاشاه مابـرد
دخيل اسمه لو بين بعيونه الزعل
تضل ترعد من صوته يزئر كـ الاسد

ادخيله شد اللثــــامه
وذكـر ذيــــج ايــــامه
اجفوفه تعشگ سيفه
وللحــرب محتـــــامه

ابو الاكبـــــر دخيل اسمه
ـــــــــــــــــــــــــــ
الغظــب حـل الغظــب طب شجـاع الساده
يحوي بيهم جن رطب بالرگــب والقـــــاده
واليــلاگـيــه انـصلـب حسين سل بتـــــاره
الذبــح حل عالرگــب السيـف هد بعنـاده

شد غاره اعله الحومه شيخ المرجله
تـتراجـــف خــــلاها الگــاع ابكربله
مايبـــــرد يفنيـــــهم حالف بالگـــمر
بس وحده وكاسرهم خاضع كلشي اله

الخيل والخيــــــاله
شــرداها اخيــــــاله
الي بايـع روحــــــه
خل يجــي ويدنـاله

ابو الاكبـــــر دخيل اسمه
ـــــــــــــــــــــــــــ
الفحل ابـن الفحل حسين شيـخ الحومه
ينضرب بيه المثل وشــايعـــات اعـلومه
مبين اعليه الزعل طفـح غيض الغــيره
هالقد حان الأجل والوعــد حـل يــومه

العسكــر من شـافـه من ابعيد ارتـعد
اشجعهم من خوفـه ذب سيفه وشرد
أدخيـــلك صاحـولـه ماضـلـت زلــم
عزرائيــــل اتحـــــير مايحسب بعد

اعصـار طگ بالحـومه
والـزلـــم مهـــزومــــه
مـن دخـــل راعيــــها
من الهوه محــــرومه

ابو الأكبـــــر دخيـــل اسمه
ـــــــــــــــــــــــــــ
محمد المشعلاوي

#الغربة

أتأكدت هسه ابدونك كـــل شي غربه
الناس ملتهيه اويه غيرك والله صعبه
ياحــبيـبي المايخــدمك شنـهي گـلبه

العاف امصابك ويضحك
شامـت ينعد الجــــرحك
يرجع تالي ندمـــــــــــان
الكلشي بوكته مو عندي
جرحــك كل وگـت يدّي
ويلــي آه يعطشــــــــان

حُــســَـين

جرحك جــــــرَح دلالي
وغيرك فــــلا يحــلالي
يرخص الك كل غــالي

عايش عله الله وصيتك
كل خيري من تعـــزيتك
واسمك حــــرز يبــرالي

حســـيـن اه اه اه
ـــــــــــــــــــــــــــ
الناس كلها تگلي كافي الدنيه حـلوه
شهل الطم والحــزن المن والله بلوه
المايعـــرفك مايثمنـك هـيه گــــــوه

حـگه المالــطم صدره
بگلبه ما يحس جمـره
من ذيـج الخيــــــــــام
الگال امن الحزن كافي
أگـله بياحلـــم غــــافي
وذبــــحولك أمــــــــام

حُـــسـَــــين

من زغري عـاش بـروحـي
ومن عنده كل اجـروحـي
وخلانـــي أعشكَ نـوحـي

ابنص گلبي عاش امصابه
واشهك واشــم اتــــــرابه
واشتــم عطــر مذبـوحـي

حـــســين اه اه اه
ـــــــــــــــــــــــــــ
الماله بالدنيـــه حـبيب انتــه حبيبه
بعيـده عنك ليش ناسـك مـو قـريبه
وزودو ضيمك يغالي اشجم مصيبه

مواسم حبهم اهـــوايه
ما منطينك احجـــــايه
كل سـاعه بالـــــف راي
جبيره احجاية الخادم
بعيده ليش هالــــوادم
اليعطش يعتني المــاي

حُـــسـَـيـن

المايخـــــدمك خاسر
نادم يرلك باجـــــــــر
وبروحه كاسر خاطر

المــابجــتلك عيـنــه
مو منه هــاذ وبيــنه
المايهظـمه العــــاشر

حــســيـن اه اه اه
ـــــــــــــــــــــــــــ
شكد يلومني اعله عشگي جي عشگتك
ابعـــــاد عنك بس يلومـــــني بمحبــتك
اهـواي من اعيــوني طاحو من عرفـتك

وادم تيهت دربــــــــك
وِي ذمـونه الي حـبـك
مجنون اليحــب صـار
المالاطـــم ابـد صـدره
صايـــر بالـدرب عثـره
بيهم عقلي محتـــــار

حُــسـَـيـن

اهواي الخلك لامـوني
وناس اشكثر ضدوني
جي احبك يعـــادوني

كلمن يعيــــش ابرايـه
وماعوفك انه احجايه
لو اهلي هـم عافـوني

حــســين اه اه اه
ـــــــــــــــــــــــــــ
يامـن الدنـيه بدونـــك صعبه تنحـــب
بلا وجــودك عشنه غـربه وحق زينـب
عمره فانـي المايخـدمك تالــي يتعـب

خـاسـر اول اوتــالي
لو حط غيرك ابالـي
ياسر الحياه يحسين
يامن للبشـــر نـعمه
والحبك صدك زلمه
ويندله الدرب وين

حُــســَيـن

يالعايش ابوجــــداني
غيرك فلا حب ثـــاني
اسمك صبح عنــواني

يالعيشتني بخـيـــرك
جا ليش احبن غيرك
وحبك عدل ربـــــاني

حســـين اه اه اه
ـــــــــــــــــــــــــــ
محمد المشعلاوي

آه ياعبــد الله آه بـ أمـك اشســوه السـهم
جا متت من اشفت ابوك راد ليه وكله دم
من رحت مني شحلاتك راد لونك منخطف
الذابحك يايمه خله بگلبي جـــم لوعة وألم

بعدك ازغير حـــرام ... والسهم مو جيلك
كون عفتك يمه غاد ... وأختك اتناغيلك
ويه العليله أئمن تنام ... لا عطش لا حافر
شيبت گلبي اومشيت ... عبد يمه ادخيلك

وينك اوين الاسهام .. يمدلول يمدلول
بحظني متعود أتنام .. يمدلول يمدلول

ويلي ذابحينك يالولد
ـــــــــــــــــــــــــــ
يمه ياعبد الله ليش ذابحـــينك يالـــولد
فارغ امجانك اشوف اوحشه يايمه المهد
ليش متوسد التراب ياعبد دمعي كضه
ياعزيــز امك تموت كــون ماترجع بعـد

أمنيتي تكبر ياربــاي ... هـاي هيه احلامي
كون ميته ولا اشوف ... موتـتــك جــدامي
والمره احسلهه تموت ... لو يـروح اوليدهه
يبني جا شمسوي هيج ... يذبحونك ضامي

ياعبد بـ أمك اشلون .. يمدلول يمدلول
والعمر راح والعيون .. يمدلول يمدلول

ويلي ذابحينك يالولد
ـــــــــــــــــــــــــــ
ياعبد ضلمه الحياة ابغيبتك ماگمت اشوف
السهم ذابــح رگبتك لاجــرح واكعد واروف
ليش تعطش ياضنـاي اليعطش اهنا ينذبـح
العطش يعني جريمه تنحسب بأرض الطفوف

ياكـطن لونك مشيت ... ورادلي احمر لونك
والشمس جانت تغار ... من الضوه البعيونك
رگبتك جانت تنــور ... شمس تعكس بيهه
منذبح واسأل عليـك ... عبد يمه أشلونــــك

لاجــرح مثل الاجــروح .. يمدلول يمدلول
جابك الوالي مذبـــــوح .. يمدلول يمدلول

ويلي ذابيـــحنك يالولد
ــــــــــــــــــــــــــــــــــ
يانضر عيني يغــــــالي من رحت بعدك عميت
تنذبح كون ادري بيـهه الكـربـله أبداً ما اجيت
حـــزو أوريـــدك ييمه وحَرمو مــاي الشـــرب
راح اضل عطشانه عگبك ريت عمري ما رويت

بعد ما يهدالي بـــال .. راح شــوف أعيوني
السهم بيـــه يـريــت .. وگبـلك أيذبحــوني
رحت انته وراح ابوك .. عايشه الـمـن آنـه
أخذوني وياكم أموت .. وحـدي لتخلـوني

مابطل فيــضّ الدمــوع .. يمدلول يمدلول
الفاگد ابكلشي موجـوع .. يمدلول يمدلول

ويلي ذابحــينك يالولد
ـــــــــــــــــــــــــــ
اخ ياگــطعـــت وريــــدك شـيبــت لب الگـلـب
اعله الرماح ازغير راسك ليش شدوه بالغصب
حـاره اشموس الضهاري وراسك ابلايه غـطـه
ردت اغـطـيك ابعبـاتـي لجــن ما أكـدر صعب

مگابله رمحك والوع ... ما كسرت الخــاطر
يبني ماخلـت حنيــن ... كربـله بالعـــــــاشر
من بعد ذاك العفــاف ... للسبـــي جابــــونه
والعشگ ضل عالتراب ... داس فوگه الحافر

فــوك الارمـاح وأناغيك ... يمدلول يمدلول
گلبي محروگ واحاجيك ... يمدلول يمدلول

ويلي ذابحــينك يالولد
ــــــــــــــــــــــــــــــــــــــ
محمد المشعلاوي

طــاك عــــرج الغيــض بيه اعنــــــاده
وصـاحو احنه انمــــوت گبل الســاده
اتوسـط الميــــدان ويحــشم حـبيـب
لحگـــو خل اندوس فـوك القــــــــاده

بصوت حسين ناداهم ... زلم الحــرب ياهله
انصـــار الله سـمــاهم ... كلهم وفه ومرجله
صوب الجيش منواهم ... ترجف ليش كربله

(( ربــع الحسين ياهلا بطـــاريهم ))
ـــــــــــــــــــــــــــ
حـي ابـن ضـــاهــــر نــزل للحـــومه
شـيــخ والكـــــــل اتعـرفهـا اعلــومه
من الزغر يحسب احساب اليومه هاذ
سمعــت ابأســـمه الزلـــم مهـــزومـه

صاح وكال حيــاهم ... وين الزلــــم يازلم
ذاك الجيـش خلاهم ... خيل وزلم تنـردم
شيخ وكهـل طباهم ... حگهه الخلك تنصدم

((ربــع الحسين ياهلا بطــاريهم ))
ـــــــــــــــــــــــــــ
انجمعت ارجــال الصدك وفــــــــايه
عـهد وي حــســين شـــدّو رايـــــــه
انمـــوت ميــة مره وانـــرد للحيــاة
مانعـــوف حـــســين هـاي احجـايه

احيود اسبـاع بالعركه ... شدو عزمهم سوه
تفـر بالكــــون ماتلـگه ... مثل ابطـال نينوه
ناس وخـيل مختنـگه ... ضايع عليهه الهوه

(( ربـــع الحــســين ياهلا بطــاريهم ))
ـــــــــــــــــــــــــــ

صاح عابس صوت من طب للنـــزال
من عشگت حسين راواني الجمــــال
أجـننـت أي نــعــم هــــاذ الحــســين
المايجن بحـــبه ماهو من الرجـــــال

من هد جون سواها ... الحومه بحر من دمه
نافـــع حــيد راوهـا ... انجوم الظهر بالسمه
المسلم صوت هزاها ... يصرخ مدد فـاطمه

(( ربـــع الحــســين ياهـلا بطــاريـــهم))
ـــــــــــــــــــــــــــ
ضكت الحومه ورجـــف ميدانها
وبلعت الفرســـــان حته اللسانها
طبو اعله الحومه غيره محزمين
ياهلا وميــــة هلا ابشـــــجعانها

عابــس صـاح خلوني ... ومزگ قميصه ونـــزل
شگد مجنون تدروني ... وعالحومه شايل زعل
روحي حسين وجنوني ... مايكضي حتى الازل

(( ربــــع الحــســين ياهــلا بطـــاريــهم ))
ـــــــــــــــــــــــــــ
وصلو طشــــارهم للكــــــــــوفه
وخلـو ابنص المعـــارك خـــــوفه
الشرد منهم سلم والمــــــــاشـرد
مرمي فــوك الكـاع جثه تشوفه

تاه الجـيش مشراده ... من هد عليهم وهب
زلم اسبـــاع هــداده ... نار بكصب جن لهب الكل من طين بالعاده ... وربع حسين من ذهب

(( ربـــع الحـسـين ياهـــلا بطــاريهم ))
ـــــــــــــــــــــــــــ
محمد المشعلاوي

بالك تعيش ابـ وهم
تالي تحس بالنـــدم
بالدنـيه لا تنـشغــل
جرب حياة الخـدم

لاتنغـش دنيــتك هــاي ياما طيحـت وادم
ما عايش حياته انسان الماجرب عشگ خادم
جربنه العشك أنــواع مثل حسين ماشفنه
كلمن حبه عاش أبخير وعـاف الدنيه مانادم

دنيـانه صحــره ابلايه محـبته
والحب لكيته بشخصه وعرفته
ينطي اليجافي وينطي اليحبه
خــدامـه لمهم موطــن رحمتـه

حُـسَـــــــــــــــــــين ... عشگ روحي
ـــــــــــــــــــــــــــ

لتخلي يومك يمر
مابيه دموع اوذكر
من دونه شنهو الحياة
هـوه الحـسـين العمر

الماباجي دمع لحسين ماضايگ طعم عشگه
اليريد يحبه كون اخيام تلگه بروحه محترگه
اليحبله انسان يهتم بيه ومايبعد عليه ودّه
اليحب حسين واجب كون مايعرف شنو الفرگه

ذوب ابأمامك وعشگ قضيته
حسين اليحبه يصفيهه نيته
يرفع مقامه اليبجيله دمعه
خادم حسيني تصبح هويته

حُـسَـــــــــــــــــــين
ـــــــــــــــــــــــــــ

شتجـــازي ارد اســـألك
الضحــه بحـيـــاتـه الك
شمنطي انته غير الدمع
وهوه انطه كلشي الملك

المضحي بحياته اشلون توافي دمعة اعيوني
الراضي بغربــة اعياله الخـــاطـر ما يغربـوني
مقدم كلشي لاجل الدين ضحئ بنفسه واعياله
وانا ابحــبه ما واصل لهسه الغــاية أجنــوني

ضحي ابحياتك خــاطر تنصره
هوه اليريــدك تجبـرله كســـره
الگلـبه بـــــارد لا مــــايــريـده
العاشگ حبيبه بنص گلبه جمره

حُـسَـــــــــــــــــــين
ـــــــــــــــــــــــــــ

حسين المحبه انفهم
من دونه كلشي عدم
تخيــــل حياتك أذا
مابيها حرگــــه والم

ابد ما تســوه هالدنيه بغير الخــدمه واللطمه
نسعئ احنه ونريد ارضاه ونرضي فاطمه أمه
مثل البالبحر غرگــــان احـنه وهوه نجــــــانه
من دونه الحياة اتصير متاهه وموحشه وظلمه

حـبه سفيــنه ونجـــانه بيهه
اليشكـر نعمته يزيـده عليهه
واجب أشكره صاحب نعمتي
من أجله صارن عيني وبجيهه

حُـسَـــــــــــــــــــين
ـــــــــــــــــــــــــــ

عودها روحـــــك بعد
وانطي الامامك وعد
دوم اعله بالك جرح
من گلبك انطيه عهد

عود روحك اعله الـ آه ودوم ابجي عله أمصابه
واتـذكـر بنـات حسين ورقيــة تصيـــح يا بابا
وعودها حزينه اتنــــام وعينك بالدمــع تـغـفه
تخيل اروحك انته اتبــات مو بفراش بتــــرابه

عيش الهظيمه العاشتها زينب
بالهيمه باتت عالخـوة تنحـــب
تحشم باهلها وماعدها والـــي
وجتال اخيها بالخيـمه ينهب

حُـسَـــــــــــــــــــين
ــــــــــــــــــــــــــــــــــــــ
محمد المشعلاوي

#ياوارث_الحسن

جسام شبيه المرتضى وابوه سيد الكــرم
شمحلاه نزل للعركه أسد وتهلهله الحـــرم
ماخاب ابوه من وصه ابد شجاع بغيــرته
جسام وريث المجتبى ويهد حيـل الهـرم

يادخيله .. تجلى ابسيفه حيدر بالحرب
يادخيله .. كلف ماينگدر حيد وصعب
يادخيله .. شجاع ومن هجم سد الدرب

هجم جاسم كفو ابو الغيره الشهم
هزم جيش الخصم ردم بيهم ردم
مثل عمه الگمر كسر ظهر المهر
بزر هاشم نزل سحك روس الزلم

ياجسام ياوارث الحسن
ـــــــــــــــــــــــــــ
جســـام نزل للمعــركه مثل وجــه القمر
كشـــاخ تخيل مهــرته اليــلاگيـه انشطر
عريس أجه بزفة حرب يخط اعله الرگب
عالجيش اذا يخطف خطف ترك بيهم اثر

ياجماله .. يوصفونه بشمس من هيبته
ياجماله .. الزلم ذبحت زلم من مشيته
ياجماله .. لو زليخه شافته هم عشگته

برز شبل الحسـن مثل مـوت الحمر
شمس نوره وسطع عله وجوه البشر
الگرب يمه انجوه اليصد بيه ينعمي
اذا طب للحـرب غلــق بـــاب المفـر

ياجسام ياوارث الحسن
ـــــــــــــــــــــــــــ
مهيوب مثل حيدر علي المراجل شيمته
من ابعيد يشوفنه قمر بجماله وكشخته
عباس اذا حل الغضب يصيـر ابخــزرته

من صفاته .. اذا سل سيفه مارد للغمد
من صفاته .. اليخزره بعينه يقروله حمد
من صفاته .. يلاگي جيوش وحده مستعد

وحق حيدر قسم علئ اعدائه وحمل
بجماله الهاشمي قمر كـــامل نــــــزل
بجماله وغيرته شحلاته ابن الحسـن
ضرب بيهم مثل رمح ذاك الجمـــــل

ياجسام ياوراث الحسن
ـــــــــــــــــــــــــــ
وفاي لأجــل عمه انخلـق ويقدمنه درس
لحسين نذر كــل العمر لحـد آخــر نفس
بدماه تحنه ابن الحسن لأجل عمه قبل
قربان يقدم روحه اجه ورفض طاري العرس

بكل شجاعه .. برز شبل الحسن من خيمته
بكل شجاعه .. شايــل سيــف ابوه ابيمنته
بكل شجاعه .. الزلم ردمت زلم من شافته

هجم شايل غضب علئ اعيونه انرسم
عله السبعين الـف ولا يهتم هجــم
عدد جيش الكفر ولا همه ابد
تركهم بالضهر شسع نعله اهم

ياجسام ياوارث الحسن
ـــــــــــــــــــــــــــ
محمد المشعلاوي

بيـه آخــر رمق جـان - الأكبـر حـيل تعبــان
رجع للوالد أيخبـــره - وليدك بويه عطشان

العطش يابويه تعبنــي - هدم حيلي الي
الحديد وثقله هد متني - وشد حيلي بعلي
وصوتك بويـه يوصلني - من تصـرخ علـي

يعـــز اعله الحـسيـن الاكبــر يــردّه
خشبه السـانه صاير والعطش شدّه
هــاك أبتــل لســـــاني بلكي يرويك
العطش لحظات يبني وينتهي حدّه

يبويه من العطش احس ريجي يبَس
مـن گـد التـعـب أجــر گـــوه النفَـس
مابـيــه أشـــــد بعـــــنـان الفـــــرَس

علئ الاكبــــر وآويــــلاه
ـــــــــــــــــــــــــــ
أدركني بويه يحسين - ركض والدمعه بالعين
وصلّه أبـآخــر أنفاس - صــار امـوادع البيــن

يريد يشبگـه لو جــاسه - خاف اعليه يلجمه
لكـاه أبـآخــــر انـفــاسـه - توسد نـــــام يمه
وذر من جدمه حد راسه - جمد عالكاع دمه

طول ابطـول نـام أمشابكَ اويبنه
وذر متكـطـع حـسيـن شيلـم مـنه
يشمّه أمن النحــر ويكله ها يبني
هـاذا آخــر واداع اويــــاك جنـــه

نرد گتلك سوه گمت بويه وطحت
دخيلك ياعلي اعله جثتك حشمت
ارد وحـدّي وتضل ابـد ماحـســبت

علئ الاكبــــر وآويـــــــــلاه
ـــــــــــــــــــــــــــ
طــاح الاكبـر وراح - تلاگـاه سن الارماح
يطيح امنين ماشيله - تعبت من كض الاصفاح

گــوم اويــاي للخيمه - تـره حيلي ركد
أنهض يا أبو الشيمه - شريد احمل بعد
أمـك ياعــلـي يتيمه - يتيمه من الـولد

يبعد اعيوني ذني كوم رد لينه
غريبه الناس يبني اشمتو بينه
أنهظ يا علي من فدوه لعيونك
باجـر لليسر تمشي تره أسكينه

ردّلــي ياعلــــي بـيه أتـشـمتـو
أعـز ولده انذبح الوادم صيحـو
شوفو كسـرتـه اسمع من حجـو

علئ الاكبر وآويـــــلاه
ـــــــــــــــــــــــــــ
علي يابعد الاعيون - أرد مـن يمك أتــــهون
عمتك وامك اهناك - أشلون اخبرهن أشلون

شكـول الزينب وليله - لو نشـدّني عنك
أكول امنين ما أشيله - وذّر وطيح منك
يبعد أحسينك وحيله - هويت الكاع جنك

يالاكبر تعبت گلبي وحرت حيره
اعوفك طايح اورجع تـره جبيره
اجيتك حيل بيـه وراجع ابدونه
يمك حيلي راح وصعبه تفسيره

علي صارت صدك اعوفك ماردت
اجذب عيني اكول يالاكبر مامتت
اضل يمك اروح حيـره اتحيــرت

علئ الاكبر وآويــــــلاه
ـــــــــــــــــــــــــــ
رد وبوجهه حـسرات - وتـلگـــنه العـزيـــزات
عالدنيه العفه يصيح - الحگـولي علـي مـات

موذر عفته بالحــومه - يازينــب وجــيت
ونمت وياه فرد نومه - تشابگـنه وبجـيت
العطش غيرهن ارسومه - ماي اصبحله ريت

عفته اموذر ابني وعالترب طايح
الحــگنــي يبــويه هاكـثر صايـح
هــذاك اليشبه المختـــار برسومه
دَمّـه اعله الترب متطشر أو رايح

الاكبـر من رحـــل يزينــب شيبت
وصلت المصرعه وعساني لاشفت
شبگت ابني وبجيت يمه جا متت

علئ الاكبر وآويـــــلاه
ـــــــــــــــــــــــــــ
محمد المشعلاوي

#الدفنه
’قصيدة دفن الاجساد الطاهره‘
ـــــــــــــــــــــــــــ

اويلاه … ابو الباقر هدم حيلي
اويلاه … يحشم عمه تجيـــلي
ــــــــــــــــــــــــــــــــ
رجع من دفنت احبابه وعينه من الدمع حمره
يحشم عمه الحگيــلي اجيت وبالگلب جمره
چا هـوه العمـر شيفيد اذا بنادم دفـن عمـره
وانه البيدي دفنته اهناك وي الـوالد ابگبــره

اويلاه ... رجع والحسره بعيونه
اويلاه ... التعب هادلهن امتونه
ــــــــــــــــــــــــــــــــــــ
عمت عيني عليك اهواي امبين تعبك بعينك
سولفلي يعمه اشلون دفنته الوحدك احسينك
عليل انته وغريبه الناس ماكو واحد يعينك
سولفلي يعمه اشصار لاجـــن بيني اوبينك

اويلاه ... تخــاف ارقــيه لاتسمع
اويلاه ... ببوها وجسمه المگطع
ــــــــــــــــــــــــــــــ
وذر متوذر اعله الگــاع بگـد ماخيل ساحگته
ثلث تيام ضل مطروح الشمس ياعمه حارگته
كل وصله بكتر لميت بحصيره حسين جمعته
ابوي امگطعينه اوصال شفته وريت ماشفته

اويلاه ... بحصيره نجمعت اوصاله
اويلاه ... محـــد غسله وشـــــاله
ـــــــــــــــــــــــــــــــــــ
مشيت المصرع العبـــــاس ادور عنه ماشـوفه
هاذاك الي حلف بحسين اخوي حسين ماعوفه
لگيته اعله النهر ياحيف اخوج امگطعه جفوفه
ياوسفه يموت اشلون الخله بكل گلب خــوفه

اويلاه ... على العبـــاس ياعمه
اويلاه ... ضامــي والنـهر يمه
ـــــــــــــــــــــــــــ
جايبلج سلام اويــــــاي من عبـــاس المشكر
سلامي الزينب اخذه وياك وگلها اهواي يتعذر
وگلها كافلج يم عـــون كـون اويـــاج ماقصر
اجفوف وعين ذن اشواي يكول وبعده يتحسر

اويلاه ... ماقصر صدك كافل
اويلاه ... ونعم منك يابو فاضل
ــــــــــــــــــــــــــــــــــــــــ
اجيتج من بعد شوغــات يعمه الحزن غاطيني
ابن يدفـن ابـــوه اشلون حـاله يصير حـاجيني
اخـوي الاكــبر المهيوب دفنته ودمعتي بعيـني
وعمت عيني اعله عبدالله جرحه اهواي ماذيني

اويلاه ... عبد الله انذبح ضامي
اويلاه ... هدم حيلي ندفن دامي
ـــــــــــــــــــــــــــــــــــــــ
دفنت اصحاب ابوي حسين واحد من بعد واحد
هذوله السجلو تاريـــخ وعنهم كربـله الشــــاهد
الرفضو عيشت الذلــه الواحدهم بالـــف قــــائد
ادفنتهم يم عزيز الروح وذكرهم بالگلب كـــاعد

اويلاه ... اجيت وعيني سجـابه
اويلاه ... عله ابوي حسين ومصابه
ـــــــــــــــــــــــــــ
محمد المشعلاوي