🔹ҚАРАҒАНДЫ ЖЭО-3-ТЕ ЖАҢА ЭНЕРГИЯ БЛОГЫНЫҢ ҚҰРЫЛЫСЫ БАСТАЛДЫ

✔️Қарағанды, 2025 жылғы 10 қыргүйек — Қарағанды ЖЭО-3-те жаңа энергия блогының құрылысын бастауға арналған капсула салу рәсімі өтті.

✔️Салтанатты шараға Қарағанды облысының әкімі Ермағанбет Бөлекпаев, ҚР Энергетика вице-министрі Сұңғат Есімханов, Еуразиялық даму банкi басқарма төрағасының орынбасары Руслан Дәленов, «Қазақстандық коммуналдық жүйелер» ЖШС Бақылау кеңесінің төрағасы Дінмұхамед Ыдырысов пен серіктестіктің бас директоры Сабырғали Ыдырысов қатысты.

✔️Ауқымды бастама 2028 жылға дейін жүзеге асырылады. Жоба аясында қуаттылығы сағатына 650 тонна бу өндіретін №9 қазанагрегаты мен №7 турбоагрегатты орнату көзделген. Жаңа энергия блогын іске қосу нәтижесінде 140 МВт қосымша электр энергиясы және 180 Гкал/сағ жылу өндіру қамтамасыз етіледі. Бұл өңірдің артып келе жатқан қажеттіліктерін өтеуге мүмкіндік береді. ЖЭО-3-тің жаңа энергия блогы 400-ден астам тұрғын үй мен әлеуметтік нысанды жылумен қамтамасыз етеді.

✔️Нысан құрылысын «Қазақстандық коммуналдық жүйелер» компаниялар тобына кіретін «Қарағанды Энергоцентр» ЖШС жүзеге асыруда. Ал қаржыландыруды Еуразиялық даму банкі қамтамасыз етеді.

📌Айта кетейік, жоба ҚР Энергетика министрлігі мен «Қарағанды Энергоцентр» ЖШС арасындағы инвестициялық келісім аясында іске асырылып жатыр және ұлттық маңызы бар жоба ретінде танылған. Құрылыс экологиялық талаптарға сәйкес жүргізіліп, заманауи, қоршаған ортаға зиянсыз технологиялар қолданылады.

🔹Энергетика вице-министрі Қарағанды облысының тұрғындарымен кездесті

✔️Қарағанды облысының Теміртау қаласында ҚР Энергетика вице-министрі Сұңғат Есімханов өңір тұрғындарымен кездесу өткізіп, энергетикалық инфрақұрылым нысандарындағы жұмыс барысымен танысты.

✔️Кездесу барысында вице-министр алдағы жылыту маусымына дайындық, жылу көздерін жаңғырту, сондай-ақ жылумен қамту тұрақтылығын қамтамасыз ету бағытында атқарылып жатқан шаралар жөнінде баяндады. Атап айтқанда, Топар МАЭС-інде жаңа турбоагрегат іске қосылды, ал Қарағандыдағы ЖЭО-3 базасында жаңа энергоблоктың құрылысы басталды.

✔️2025 жылы облыста жылу желілерін жаңғырту мен газдандыруға ауқымды инвестициялар тарту жоспарланып отыр. Қарағанды мен Теміртау қалаларында төрт ірі жоба – жылу магистралін және ішкі жылу желілерін қайта жаңғырту көзделген.

✔️Өңірді газдандыру мәселесіне де ерекше көңіл бөлінуде. Қазіргі таңда аймақта 24 іске қосу кешені жүзеге асырылуда, оның 16-сы – Қарағандыда, 8-і Теміртауда. Бұл жобалар 35 мыңнан астам үйді газбен қамтамасыз етуге мүмкіндік береді. Сонымен қатар Қарағанды мен Теміртауда газ тарату желілерінің, Шахтинск қаласында газ құбыры мен автоматтандырылған газ тарату стансасының құрылысы жүргізіліп жатыр.

✔️Кездесу барысында вице-министр тұрғындардың электр және жылумен қамту, тариф саясатына қатысты сұрақтарына жауап берді.

📌Сапар аясында Сұңғат Есімханов Теміртаудағы бірқатар стратегиялық маңызды нысандарды аралады. Qarmet» АҚ ЖЭО-2 стансасында №7 қазандық жұмысын бақылап, №3 жылу магистралін қайта жаңарту жұмыстарының барысымен танысты. Ол құрылыс жұмыстарының сапасы мен мерзімін сақтау қажеттігін атап өтті. Себебі бұл жобалар қаланы жылумен тұрақты әрі сенімді қамтуда маңызды рөл атқарады.

🔹Министрлік жанындағы Қоғамдық кеңесте энергетиканы дамытуға қатысты маңызды мәселелер талқыланды

✔️Бүгін Жақып Хайрушевтің төрағалығымен ҚР Энергетика министрлігінің отын-энергетика кешені мәселелері жөніндегі Қоғамдық кеңесінің кезекті отырысы өтті.

✔️Отырысқа ҚР Энергетика вице-министрі Сұңғат Есімханов, Қоғамдық кеңес мүшелері, сондай-ақ министрліктің құрылымдық бөлімшелерінің өкілдері қатысты.

✔️Күн тәртібінде келесі мәселелер қаралды: ЖЭО үшін техникалық минимум қорытындысын беру процесінің ашықтығын Қоғамдық кеңесті тарта отырып Нарық кеңесі арқылы қамтамасыз ету, жылу жүйелерін жаңғырту мен жылу инфрақұрылымын дамыту жөніндегі бірыңғай мемлекеттік саясатты қалыптастыру және отын-энергетика саласындағы кадрлық мәселелерді шешу. Бұл мәселелерді Қоғамдық кеңес төрағасы Жақып Хайрушев көтерді.

📌Отырыста Қоғамдық кеңес мүшелері талқыланған бастамаларды іске асыру бойынша түрлі ұсыныстар мен идеяларын айтты. Қабылданған ұсыныстар мен ұсынымдар Энергетика министрлігінің одан арғы жұмысында және энергетика саласындағы тиісті шешімдерді қалыптастыруда ескерілетін болады.