السلام عليكم .. 🧡

تخيل من تتزوج تروح انت وزوجتك لمركز ابحاث متخصص ب Biotechnology ينطونك كتلوك ويسئلوك هاي الاسئلة :

👈 شتريد لون عيون ابنك خضر ، زرگ ، صفر ؟
👈 لون شعره و لون بشرته و نسبة ذكاءه ؟
👈 شگد تريد طولة ؟
👈 تريده اخليه الك يقاوم ليامرض ؟
كل شي بسعره خالي 😅

تقنية التعديل الجيني CRISPR-Cas 9 اعتقد اغلبكم سامع بيها
هي اختصار لجملة :
clustered regularly interspaced short palindromic repeats

👈 بعام 1952 عرفنا DNA هو الشفرة الي تحمل المعلومات الوراثية
👈 بعام 1963 عرفنا شكل DNA
👈 بعام 2000 عرفنا نقره DNA
👈 بعام 2012 عرفنا نستفاد من تقنية CRISPR

بهاي التقنية نگدر نوصل لاي جين ونعدل عليه بكيفنا ومثل مانريد
بالثمانينات اكو شكم عالم شاف اكو بالبكتريا طلع فد قطع segments وهي الي يسمونها هسه ب CRISPR
فهاي القطع تكون قصيرة short ومتناظرة palindromic ومتردده كل شوية تلگالك قطعة يعني هنا قطعة تمشي شويه ع DNA تلگه القطعة الثانية ، تمشي شوية تلگه الثالثة وهكذا يعني جاي تنعاد repeated
اذا تريد تفهم معنى palindromic بالوراثة شوف الصورة رقم 1

فهسه ليش سموها تقنية CRISPR
حرف C يشير الى Clustered يعني مجاميع
حرف R يشير الى Regularly يعني منتظمة
حرف I يشير الى Interspace يعني بيناتهن مجال
حرف S يشير الى Short يعني هاي القطع قصيرة
حرف P يعني Palindromic يعني متناظرة وهاي فهمناها من الصورة شني معنى متناظرة
حرف R يعني Repeated يعني هاي القطع جاي تتكرر
المعنى العام يعني اكو قطع منتظمة ومو وحده وانما مجاميع قصيرة متناظرة وجاي تتكرر كل شوية وبيناتهن مجال

بالبداية العلماء ماعرفوا هاي القطع ليش جاي تتكرر repeated بس وره 20 سنة اكو علماء ثانين انتبهوا لشغله وهي شافوا هاي القطع الها دور بالبكتيريا لان شافوها جاي تقاوم الفايروسات

زين شلون هاي القطع الي هسه يسمونها CRISPR تقاوم الفايروسات ؟
كلكم تعرفون من يهجم الفايروس ع بكتيريا يدخل المادة الوراثية مالته للبكتيريا ويحاول يسيطر عليها ويخليها تسوي الي يريده ( يضل يتشرط )
لهنا خوش حجي
زين البكتيريا قابل تگعد وتسگت وتخلي الفايروس يسيطر عليها ؟ شي اكيد لا
فشتسوي ؟
تقاوم هذا الفايروس تكسره وتاخذ قطعة منه وتخزنها بشفرتها الوراثية فالمره الجايه من يجي الفايروس على البكتيريا تبدي طلع Cas 9 هذا حافظ الصور القديمة مال الفايروس فيبدي يقارنها بقطع الفايروس اذا لگه الصورة المحتفظ بيها تشبه قطع الفايروس فيروح يگصها

بعدين العلماء تفطنوا انه يمكن اعطاء اوامر جديدة لهذا البروتين ( Cas 9 ) بحيث يگدر يروح لاي شفرة فايروسية او غير فايروسية ويقوم بتكسيرها او التعديل عليها

هسه تگدر تروح لاي شفره وراثية ( بشرية او حيوانية او نباتية ) وتطلق عليها هذا البروتين بتعديلات واوامر محددة

فرق الهندسة الوراثية عن هاي التقنية : الهندسة الوراثية تأتي بقطعة جينية ( انزع هاي القطعة واخلي هاي بمكانها ) يعني تعويض بس تقنية كريسبر لا ، نبرمج هذا البروتين مثل مانريد

فوائدها :
1. مثلاً اكو نباتات ماتصمد بالحرارة العالية فبهذه الطريقة نغير لها الجين الي يسمح لها بمقاومة درجات الحرارة العالية وبالتالي راح نحصل على انتاج وفير
2. البعوض الي يحمل داء الملاريا يتسبب في اصابة 200 مليون شخص سنوياً يموتون منهم نصف مليون ونسبة من المايموتون يصابون باعاقات مدى الحياة فإذا تجينا لهاي البعوضة وعدلناها جينياً فنجعلها لا تستطيع حمل داء الملاريا

مساؤها :
1. هذه النظرية محرم تطبيقها على البشر عند اكثر من 50 دولة تمنع التعديل الجيني على البشر ( طبعاً الصين مو من هاي الدول ) وحتى الدول الي تسمح فهي تسمح لكن بشكل سري
لان التحكم في التعديل الجيني مو سهل ، تخيل انت تشتغل على الخلايا التكاثرية الي تحمل الشفرة الوراثية يعني هاي الشفرة راح تُورث
تخيل اذا سويت تعديل جيني خاطئ لواحد وهذا تزوج ونقل شفرته لابناءه وابناءه تزوجوا وهكذا
يعني خطأ واحد ممكن يدمر البشرية

بالمستقبل قبل الزواج راح مايسئلون على الخلاقك لا
يسئلك انت مسوي تعديل جيني او لا 😅

اذا تحبون الوراثة وشلون نستخلص DNA من الشعر او الدم وهاي السوالف او عن الجينات كلولي علمود اكثر وراثة 😅

الفيديو الجوه من قناة الدحيح الي يمكن معناها السجاج عدنا 😂
وانا من المدمنين على هاي القناة

#Akram_Hassan_Kadhum
Med. Lab. Technology

السلام عليكم .. 🧡

عندما يشكك 99‎%‎ من الناس في فكرتك فهناك احتمالان ، إما انك مخطئ تماماً أو انك على وشك تغيير التاريخ ! | سكوت بيلسكي

متعة الوراثة والجينات ..
👈 الجين عبارة عن جزء من DNA مو كل DNA
👈 زين ب DNA شكم جين تقريباً ؟
يوجد ب DNA الواحد آلاف الجينات وطبعاً ال DNA موجود بداخل نواة الخلايا وعندنا بجسمنا حوالي 3 ترليون خلية والترليون هو مليون مليون

👈 اكو منطقة قبل الجين اسمها promoter وهاي المنطقة تحتوي على CAT box و TATA box
👈 زين شنو CAT ؟ ال CAT يعني بزونه 🐱
لا جذب 😂
ال CAT box يعني CA CA CA CA جاي تتكرر واقصد ب C هي سايتوسين و A الادنين

👈 زين شنو TATA box ؟
يعني TA TA TA TA جاي تتكرر هواي واقصد ب T الثايمين و A يعني الادنين

هسه فهمنا من نشوف CACACa TATATA يعني نگول هاي منطقة ال Promoter يعني الجاي وراها جين

#الصورة_1 بس اريدك تفهملي ان الجين هو جزء من DNA مو كل DNA
#الصورة_2 اريدك تفهملي ان قبل الجين اكو منطقة اسمها promoter وشتحتوي هاي المنطقة

عوفوا مناطق Exon و Intron بعدين ناخذهن لان هذني من ضمن تركيب الجين

منين يتركب الجين خلوها بمنشور ثاني علمود ماتملون مني 😂
هاي كلها مقدمات وراثية علمود بعدين ناخذ شلون يتم استخلاص DNA من الشعر او من الدم ، تحليل كلش حلو وراح تحبوه والشغل ماله صح طويل بس ممتع لدرجة 😍

وبالمستقبل القريب راح اشرحلهم برنامج CLS من الصفر لان جاي اقره معلومات عنه
وان شاء الله الشرح راح يكون بصمات صوتية
والهدف من هذا البرنامج نبني فرق عمل علمي وجر خطين جوه علمي
مانريد نصير ماكنات بس 🥰

Med. Lab. Technology
#Akram_Hassan_Kadhum

السلام عليكم .. 🧡
الهرمونات النسائية و physiology of gynecology
#منشور_رقم_1

اكو اساتذه مايقتنع اذا تشرحله بالمفهوم البسيط گبل يجيك الصفر يون 😅
فتنجبر تحفظ بدون ماتسئل ليش ( تابع الفيديو )

👈 اي بنيه توصل لل puberty يعني سن البلوغ
ال Hypothalamus تبدي تفرز هرمون اسمه GnRH
👈 يروح لل pituitary gland الي هي النخامية يگلها يابه طلعيلي FSH و LH هذني ثنيناتهن وين يروحن ؟
👈 يروحن لل ovary المبيض
👈 وين بالضبط ؟
👈 لخلايا اسمها Oocyte الي موجودة بالمبيض

👈 هاي خلايا Oocyte موجودة بالمبيض من زمان بس من توصل البنية لل puberty يله تبدي تتنشط وعددها هواي بس من 400 الى 1000 منها تدخل مرحلة النمو ومراحل النمو راح نشرحن بمنشور ثاني

👈 اجه FSH و LH لل Oocyte گله يابه نريدك طلعلنا Estrogen و Progesterone

👈 طبعاً ال Estrogen يشتغل بالنصف الاول من الدورة و Progesterone يشتغل بالنصف الثاني من الدورة

👈 هذني الهرمونات الثنين يسون تأثيرات على Female body
هاي التأثيرات تطلع على شكل شنو ؟
على شكل دورة Cycle

نبدي نشرح Ovulatory cycle الي هي الدورة المبيضية او يسمونها Menstrual cycle الدورة الحيضيه

ال Ovulatory cycle بيها مرحلتين
الاول : Follicular phase وهذا variable يعني متغير
شنو يعني متغير ؟
يعني من 21 يوم لحد 35 يوم

الثاني : Luteal phase وهذا constant يعني ثابت 14 يوم

مثال : فرضاً س من النساء عندها follicle phase 21 يوم الي هو اقل شي راح تلگه ال luteal phase ثابت 14 يوم وفرضاً ص من النساء عندها follicle phase هو 35 يوم والي هو اعلى شي فراح تلگه ال luteal phase ثابت 14 يوم

تقبلوا رسمي المتواضع وشوفوا راح يختصر عليكم الخرط هذا الفوك

هذا يعتبر مقدمة المنشور الجاي نشرح بيه مراحل نمو البيضة

اختصارات الهرمونات :
GnRH : Gonadotropin releasing hormone
FSH : Follicle stimulating hormone
LH : Luteinizing hormone

Med. Lab. Technology
#Akram_Hassan_Kadhum

جمعة مباركة .. 💜
هرمونات نسائية و physiology of gynecology
#منشور_رقم_2

احنا مو بالمنشور السابق گلنا ال ovulatory cycle بيها two phases
الاول : follicular phase
والثاني : luteal phase

الاول راح يقسم الى 5 اقسام ( ما اتعبك واعددهن روح شوف الصورة رقم 1 )

👈 هسه راح نبدي الشغل الثگيل ( شرح مراحل Follicular التابع لل Ovulatory او Menstrual cycle )

#الاولى : primordial follicles يعني الحويصلات البدائية
👈 شيصير بهاي المرحلة ؟
خلايا Oocyte الي حجينه عنها تكون محاطة ب single layer of granulosa cells ( شوف الصورة رقم 2 )

#الثانية : pre-antral follicles يعني قبل مايتكون التجويف cavity
👈 شيصير بهاي المرحلة ؟
راح يجي FSH ويسوي شغلتين
1. يكبر Oocyte ويزيد
2. يزيد عدد خلايا granulosa cells

👈 وهذا FSH راح يگل لل granulosa cells طلعيلي Estrogen
👈 ال Estrogen مايطلع الا اكو Androgen
زين منو يطلعلي Androgen ؟

👈 هنا يجي دور LH الي گلنه عليه انفرز من pituitary وراح لل ovary ، هو بالتحديد راح لخلايا خاصة بال ovary اسمها Theca cells تصير داير ماداير granulosa cells يگلها طلعلي Androgen

👈 هسه طلع Androgen ، هذا Androgen تحت تأثير FSH وغصباً عليه يتحول الى Estrogen
بصيغة ثانية ال FSH يگل لل granulosa cells حوليلي هذا Androgen الى Estrogen ( شوف الصورة رقم 2 )

فدائماً تذكر هاي النظرية " علمود اطلع Estrogen لازم اكو Androgen " حتى وزن وقافية ماتعبك 😅

#الثالثة : Antral يعني مرحلة تكوين cavity
شيصير بهاي المرحلة ؟
راح يتكون عدنا تجويف يصير بين granulosa cells ويكون مملؤ ب Estrogen ( شوف الصورة رقم 2 )

اكو شغلة بالهرمونات اسمها negative feedback
شنو هاي ؟
معناتها اذا زاد Estrogen راح يروح لل FSH يگله يابه يال FSH انت اذا بقيت تجي بكميات كبيرة للمبيض معناتها راح اطلع انه بكميات هواي واصلاً انه هسه مرتفع فيا FSH انت هسه لاتجي ( يعني صعود Estrogen يقلل FSH )

👈 زين احنه مو گلنه الي يحول Androgen الى Estrogen هو FSH ؟
خوش حجي زين هسه FSH قليل فراح يزداد Androgen

👈 هاي الزيادة ب Androgen تفيدني بيش ؟
تفيدني بشغلة ، احنا مو گلنه عدد خلايا Oocyte هي من 400 الى 1000 بس احنه نحتاج بيضة وحدة مانحتاجهن كلهن
فهاي الزيادة ب Androgen تموتلي شكو Oocyte ضعيفة وتخليلي فقط وحدة اسميها Dominant folloicle

نكمل بقية المراحل بمنشور ثالث ان شاء الله

Med. Lab. Technology
#Akram_Hassan_Kadhum

السلام عليكم .. 🖤
هومونات نسائية و physiology of gynecology
#منشور_رقم_3

تكملة المراحل :
الرابعة : Pre-ovulatory follicle يعني مرحلة قبل ان تنفجر follicle وتطلع البيضة الي جواها

الاخيرة : Ovulation يعني مرحلة التبويض
👈 شرط مهم لحصول ovulation هو مستوى Estrogen يبقى عالي عند 200 pg/ml لمدة اكثر من 50 ساعة

👈 شلون تتفجر Follicles وتطلع Ova ؟
1. ياما يصير contraction of smooth muscle مالت ovary
2. او بسبب ضغط الماء
3. او بسبب وجود proteolytic enzymes ، انزيمات تطلع تاكل Follicle فتخرج البيضة بره لل peritoneal

👈 لهنا خلصنه follicle phase ( تابع الصورة رقم 1 علمود تعرف وين وصلنا )

👈 نجي لل luteal phase وهنا ال granulosa cells و theca cell تكثر بالعدد وتكون corpus luteium ( الاجسم الاصفر )

👈 نجي نناقش مصير الجسم الاصفر
انه عندي يأما يصير fertilization او non fertilization للبيضة
👈 إذا صار fertilization للبيضة فالجسم الاصفر هنا يسمى corpus luteium of pregnancy
واذا ماصار fertilization يموت

👈 الخلايا الي طلع Estrogen و Progesterone تموت فشيصير ؟
يصير degeneration يعني تحلل للجسم الاصفر فيتحول من جسم اصفر الى جسم ابيض corpus albicans
👈 فما دام الخلايا الي طلع Estrogen و Progesterone ماتت فهذني الهرمونين يقلن وهنه جانن مسويات negative feedback على FSH و LH فهسه هذا feedback راح ينشال ويرجعن FSH و LH يشتغلن من جديد

بالمنشور الجاي ناخذ الهرمونات ونخلص ..
Med. Lab. Technology
#Akram_Hassan_Kadhum

السلام عليكم .. 🧡

هاي الصورة رقم 2 للناس الي بس تشوف ب CT scan اكو اصابة گبل گالوا corona

اكو شي بالمختبرات اسمه Differential Diagnosis يعني التشخيص التفريقي يعني شلون اطلع هذا المرض من بين 30 مرض يسببن نفس الاعراض !

اقرأ وياي :
يكول اكو 100 نوع من الكائنات الي تسبب community-acquired pneumonia يعني مرض ذات الرئه الي اكتسبته من المجتمع ( يعني انعديت بيه )
من بين هاي الكائنات الممرضه حوالي 30‎%‎ منها فايروسات يعني اكو 70‎%‎ مو فايروس

خوش حجي
زين انطيني فايروسات تصيب الرئه غير كورونا وموجوده بالمجتمع ؟
1. ال common influenza virus
2. ال parainfluenza virus
3. ال adenovirus
4. ال respiratory syncytial virus
5. ال rhinovirus صاحبنا ابو النشله
6. ال humanmetapneumovirus
7. ال SARS-Cov الي هو الكورونا

اذن المفراس يبين لك اكو اصابة بالرئة بس ماتعرف شنو مسببها

#المصدر : كتاب Guidance for Corona Virus Disease 2019

#Akram_Hassan_Kadhum
Med. Lab. Technology

كل عام وانتم بالف خير اعاده الله علينا وعليكم بالصحة والعافية والامن والسلام .. 🧡

موضوع كلش مهم ومن اساسيات برنامج CLS هو شلون احصل على pure serum

👈 اول شي شلون احصل على سيرم اصلاً ؟
الدم إذا تخثر واشيل الخثره ينطني سيرم
الدم إذا ماتخثر ( يعني خليته بتيوب بيه مادة مانعة للتخثر مثل EDTA ) ينطيني بلازما

نحجي شويه بشكل اعمق ..
التخثر اله نقطة بداية واله نقطة نهاية

👈 زين شوكت تبدي coagulation factors تبدي تشتغل وشوكت تخلص ؟
اول ماتسحب الدم وهو بعده بالسرنجة تبدي تشتغل

👈 زين شوكت تنتهي ؟
ساعة كاملة حتى تتكون الخثرة المثالية فإذا استعجلت وفصلته قبل الساعة راح احصل على مركب لا اكدر اكول عليه سيرم ولا اكدر اكول عليه بلازما لان يحتوي على fibrinogen وهذا يستمر بالتحول الى خيوط fibrin الموجودة بالبلازما وهاي تسببلي مشاكل

#المشاكل :
1. مثلاً واحد من الفحوصات يكلي اسحبلي 10 مايكرون سيرم
زين انه السيرم ماكمل ساعة وفصلته يعني بيه خيوط fibrin فسحبت 10 بس هاي ال 10 يجوز فد 4 مايكرون منها خيوط ( طبعاً هاي الخيوط ماتنشاف ) فبالحقيقة انه ساحب 6 مايكرون بدل ال 10

2. اكو قسم من التيستات اصلاً وجود fibrin هو مشكلة لان يسبب تداخل كيميائي مع التراكيب الموجودة ب reagent

👈 اذن هسه عندي خيارين علمود احل المشكلة
1. ياما اخلي التخثر مايصير من البداية باستخدام موانع التخثر ( anti coagulant ) علمود اتكفى شر fibrin واحصل على بلازما

2. او اخلي التخثر يكتمل للنهاية واشيل الخثره علمود احصل على pure serum
بس هنا لازم انتظر ساعة كامله اخلي التيوب يتخثر وبعدين اسنتره وهاي طويله اذا انا مستعجل ، هسه لو عندي بحث ومامستعجل عادي اخلي التيوبات ساعة مابيها اشكال بس اذا انه بمستشفى هاي ماتخدمني مال انتظر كل عينة ساعة يله اسنترها علمود احصل سيرم

👈 زين شنو الحل ؟
الحل هو استخدم معجلات التخثر ( clot activators )

👈 عندي نوعين من clot activators
1. السيليكا ( يختصر الوقت الى نصف ساعة )
2. الثرومبين ( يختصر الوقت الى 5 دقائق بس هذا شويه غالي والي يعرف سعره خل يكتبه )

" وحدة الكيمياء السريرية افضل عينة الها هي البلازما مو السيرم مع مراعاة SOP طبعاً "

#Akram_Hassan_Kadhum
#Med_Lab_Technology

السلام عليكم .. 💛

👈 السكر هي مادة غذائية
👈 كل الخلايا تاكل سكر ( لان غذاء )

👈 ياهي اكثر خلايا تاكل سكر ؟
خلايا الدم الحمراء لان اعدادها بالملايين يعني تنهب السكر نهب
خلايا الدم البيضاء والصفيحات هم تاكل بس مو بكد الحمراء لان اعدادها اقل

👈 السكر هو الفحص رقم واحد بكل المختبرات فلازم نهتم بيه فقرروا العلماء يسون تيوب خاص بالسكر وهو Glycolysis inhibitors يعني تيوب يمنع استهلاك الكلوكوز من قبل الخلايا ( يعني تيوب يسد حلك الخلايا ومايخليها تاكل السكر )

👈 زين شمعنى ماسوينه تيوب خاص باليوريا مثلاً او بالبروتينات ليش بس بالسكر ؟
لان السكر مواد غذائية اليوريا فضلات شفتولكم مره واحد كله يوريا ؟!
يسئلني واحد يكول جا الدهوم والبروتينات مو هم غذاء ليش ماسوينالهن تيوبات خاصة ؟ لان ذني مواد معقدة والخلية ماتاكل مواد معقده

👈 دائماً ونقره بالكيمياء " البروتينات مواد معقده ، الاحماض الامينية مواد معقدة " بس مانعرف هاي الكلمة وين تفيدنا بالمختبر
المعلومات مال CLS احنه دارسينها مو مادارسينها بس مطشره بين المواد لذلك نحتاج برنامج يلم هاي المعلومات المطشرة وهذا البرنامج هو CLS الي يعتبر مقدمة لبرنامج ثاني اسمه QMS وهاي البرامج جاي تدرسها الكليات التقنية الطبية بالدول المتطورة امثال امريكا

👈 زين شوكت تبدي الخلايا تاكل سكر ؟
مجرد ماتسحب دم والدم بعده بالسرنجة تبدي الخلايا تستهلك السكر بس هنا الاستهلاك قليل لان الخلايا توها جانت بالجسم فشبعانه ماتاكل هواي

👈 دكول البحوث خلال النصف ساعة الاولى تنزل نسبة السكر 2‎%‎ هسه هذا الرقم يعتبر قليل لكن بعد النصف ساعة الاولى راح يصير تعجيل باستهلاك وقد تصل نسبة النزول من 25‎%‎ الى 65‎%‎ وتشتد هذه النسبة في المناطق الحارة ( يعني بالصيف يصير استهلاك للسكر اكثر من الشتاء )
لذلك لازم نفحص السكر خلال النصف ساعة الاولى

👈 اذا انا جاي اداوم بمستشفى عام وصعدت للطوابق اسحب دم واول مريض مثلاً عنده سكر فعلما اكمل كل الطوابق خذتلي ساعتين فهذا الي عنده فحص سكر انتهى

👈 زين شنو الحل ؟
يا اما نبعد الخلايا عن السكر ( نفصل السيرم عن الخلايا ومو بس مفصله لا نشيل السيرم ونخلية بتيوب جديد لان اذا بس فصل هم راح يبقى استهلاك )
او نستخدم تيوب Glycolysis inhibitors تيوب خاص بالسكر لونه رصاصي

👈 وهسه عالمياً فحص السكر يُجرى بتيوب خاص اسمه glucose tube

#نحو_بناء_فريق_علمي_CLS
‏#Akram_Hasaan_Kadhum
‏#Med_Lab._Technology