السلام عليكم .. 💛
الموضوع طويل بس تعب روحك لخاطري صارلي ساعة اكتب وامسح علمود اكدر اوصلك الفكره 😅

ورقة طلب الفحوصات الي هي Test Request Form مو بكيفنه نصممها وانما الها تصميم عالمي متفق عليه يعني تصميم Standard
وتحتوي المعلومات التالية :

👈 اول واهم 3 كلمات راح تلگاهن مكتوبات اول ماتفتح ورقة الفحص هنه Routine و Urgent و Stat
شنو معناهن ؟
ال Routine يعني هاي الفحوصات روتينية
ال Urgent يعني هاي الفحوصات مستعجله
ال Stat يعني هاي الفحوصات ملحه جداً
فالطبيب يأشر على وحده من ذني بس يجب ان يكون الملح هو فعلاً ملح لمصلحة المريض مو لان هو يريد يطلع او هو مستعجل

👈 ال Patient ID الي هو تعريف المريض وكل مختبر يجب ان تكون له صيغة تعريفيه ثابته ياما اسم او رقم

👈 ال Clinical Data وهاي مو دائماً نحتاجها لان الشخص الي يجمع العينات هو يجب ان يعرف ياعينة تحتاج معلومات سريرية وياعنية ماتحتاج

👈 ال Contact Information for Requesting Physician يعني لازم اكو بيانات للطبيب الداز الفحص شلون يعني ؟
بكل غرفة طبيب اكو هاتف ارضي فهذا رقم الهاتف واسم الطبيب المفروض ينذكر بهذا الحقل
زين شسوي بيه ؟
اكو هاتف بالمختبر فإذا انه الفاحص احتاجيت معلومة من الطبيب اتصل عليه لان رقمه عندي او مثلاً اجتني عينه كميتها قليله وهو طالبلها 5 فحوصات والعينة تكفي 3 فحوصات فقط فاتصل عليه اكله يابه انت طالب 5 فحوصات والعينة تكفي فقط 3 منو تريدهم بالبداية والبقية مامستعجلين عليهن بين مايسحبون عينة ثانية

👈 ال Test Requested يعني الفحوصات المطلوبة وهاي ماتنكتب كتابة بخط اليد وشخابيط لا
هنه اصلاً كل وحدة من وحدات المختبر مكتوبة فحوصاتها كلها وگدام كل فحص اكو مربع زغير فالطبيب يأشر على المربعات المطلوبة

👈 ال Time and Date وقت وتاريخ العينة كلش مهم علمود انه الفاحص اعرف يمتى اشتغل هاي العينة ويمتى ارفضها على سبيل المثال فحص السكر لازم يُنجز خلال نصف ساعة من تاريخ جمع العينة زين اذا انه ساعتين يله وصلتني العينة وعينة السكر كل ماتتاخر كلما الخلايا الموجوده بالتيوب تبدي تاكل الشكر الموجود يعني من راح افحص فراح يطلع السكر قليل بينما هو عالي فسمعة الفاحص تخرب وهو ماله ذنب بالخطأ

👈 ال Source of Specimen مصدر العينة مهم مثلاً اجتني عينة دم بس غير اعرف مصدرها منين ماخذيه من vein لو من Artery لو من Capillary ؟ يجوز واحد محترگ ومالاگيله وريد فسحبوله من Artery علمود فحص السكر
زين اصلاً اغلب الفحوصات همه حاسبينها على التراكيز الوريديه فقيمة السكر بالشريان تطلع عاليه بينما هو مو عالي بس لان تركيز السكر بالشريان اعلى من الوريد والقيم الطبيعية حاسبينها على الوريد
مثل الي يستعمل جهاز الكلوكوميتر هذا ابو السكر ، هذا منين ياخذون عينة الدم ؟ من وخز الاصبع يعني من Capillary وال Capillary هو شريان فدائماً تسمع يگلك نقص من القيمة ليش ؟ لان تركيز السكر بالشريان اعلى من الوريد
طبعاً اذا fasting ماراح يطلع فرق جبير حتى لو قست السكر باستعمال جهاز الكلوكوميتر بس انه احجي اذا جنت non-fasting

اخر شي هاي المعلومات كلها هي من ضمن برنامج CLS او MT Program فيجوز مستقبلاً اشرحلكم هذا البرنامج كله ونبدي من الصفر

Akram Hassan Kadhum
Med. Lab. Technology
#CLS_Program

المنشور قبل الفطور بدقيقة وحدة 😂

بس باوعوا على جمال طريقة شرح الفيديو
مثل هيج ماراح تشوفون 🧡
من اساسيات Clinical Biochemistry وعلمود تفهم امراض الكبد والقنوات الصفراوية هو موضوع Bilirubin pathway
وين يروح البلروبين ؟

نسولف شوية ع فيديو ..

👈 ال RBC من تكبر لازم تموت
زين من تموت خو مو تضل هيج لازم تتفصخ وترجع لمكوناتها الاولية ( يسولها اعادة تدوير لان الشي البيه فايده وممكن استفاد منه باشياء ثانية ليش اشمره ؟! )

👈 منو الي يفصخها ؟
ال Macrophages تجي تبلع RBC وتكسرها
زين ال RBC شبيها ؟ بيها Hemoglobin
زين Hemoglobin منين متكون ؟
متكون من Heme و Globin

👈 نعوف الگلوبين لانه بروتين ونحتاجه بشغلات ثانية ونحجي على الي يفيدنا وهو Heme
👈ال Heme نقسمه قسمين Fe+2 و Porphyrin وهذه حلقة porphyrin هي الي تحتوي على Bilirubin ( لونها اصفر ) هاي المادة سامة فلازم الجسم يتخلص منها

👈 طبعاً احنا شكو مادة سامعة نذبها ع كبد هو يحير بيها
زين شلون نودي Bilirubin للكبد ؟
فلازم نصعد بسيارة
السيارة منو ؟ هو بروتين Albumin

👈 بعد ماوصل للكبد فالكبد شداله حامض اسمه Glucuronic acid فسموا البلروبين المقترن بهذا الحامض بإسم Conjugated bilirubin اي البلروبين المقترن وهو نفسه Direct bilirubin

👈 هاي بالكبد ، زين قبل الكبد يعني قبل مايقترن بهذا الحامض شجان اسمه ؟ جان يسموه ب unconjugated bilirubin يعني البلروبين الغير مقترن وهو نفسه indirect bilirubin

👈 فخاف تسمع مرات direct اعلى من indirect او بالعكس اذن وين المشكلة ؟
احفظ هاي القاعدة واي مرض تحله (( دور الكبد يحول indirect ال direct ))
يعني إذا لگيت indirect عالي فالمشكلة بالكبد ماجاي يحول لان المفروض هذا indirect يتحول الى direct والي يحوله الكبد فإذا ماتحول يعني صوج الكبد
ومرات الكبد مابيه شي بس لان جاي يوصل للكبد كمية كلش جبيره من indirect فمايلحك الكبد يحوله
يمتى الكبد مايلحك ؟
اذا مثلاً اكو تكسر بالدم يعني هواي جاي يطلع بلروبين من كريات الدم الحمراء فالكبد مايلحك الكبد

👈 زين اذا بالعكس لگيت direct اعلى من indirect يعني هسه الكبد سوه الي عليه وحول بس وين المشكلة ؟
المشكلة هذا ال direct لازم يطلع
زين فإذا اكو انسداد مثل حصوه بالمراة او ورم بالقنوات الصفرواية فهذا ال direct شلون بعد يگدر يوصل للامعاء علمود ينطرح وي stool ؟! ( طريقة مسدود )
اعرف دوخ بس اصفن بيها شوية وراح تفتهمها

نكمل موضوعنا ..
👈 فراح يروح هذا البلروبين المقترن للامعاء
بالامعاء شكو ؟
اكو بكتيريا راح تحوله الى stercobilinogen ومن ثم ينطرح على شكل stercobilin و ال stercobilin هي الي تنطي brown color لل feces
قسم من هذا البلروبين راح يرجع للدم
والدم وين مصيره ؟
مصيره يروح للكلى علمود يتفلتر
فقسم من البلروبين راح يروح للكلى وينطرح مع urine على شكل urobilinogen

يعني urobilinogen هو البلروبين الي جاي من الكلى
و stercobilin هو البلروبين الي جاي من الامعاء

الفيديو مأخوذ من قناة Handwritten Tutorials على اليوتيوب

كل عام وانتم بالف خير ، اعاده الله عليكم بالصحة والسلامة .. 🧡

عدنا ب Anterior Pituitary gland ( الفص الامامي للغدة النخامية ) 5 انواع من الخلايا تفرز 6 هرمونات مهمة

خلايا Thyrotropes الي تفرز TSH
خلايا Corticotropes الي تفرز ACTH
خلايا Somatotropes الي تفرز GH
خلايا Gonadotropes الي تفرز FSH و LH
خلايا Lactotrpes الي تفرز PRL

سؤال : اغلب اورام الغدة النخامية ( Pituitary tumors ) تصير بأي خلايا ؟
الجواب : تصير بخلايا Somatotropes الي تفرز GH ليش ؟ لانها الخلايا الاكثر عدداً

Med. Lab. Technology
#Akram_Hassan_Kadhum

السلام .. 🧡

الفرق بين Peptide و Polypeptide و Protein .. 🧡

جنت ماافرق بين polypeptide و protein صح هنه تقريباً متشابهات بس اكو فرق بينهن

👈 البروتين هو حايط والحايط متألف من طابوگات يعني amino acid
👈 إذا عدد الطابوكات ( amino acid ) من 2 الى 50 هذا peptide
👈 إذا اكثر من 50 هذا لو polypeptide لو بروتين
زين شلون افرق ؟
👈 ال polypeptide مكون من سلسلة وحدة و linear
👈 ال protein مكون من اكثر من سلسلة و folded ملفوفة

خصم الحجي
Peptide 👉 2 - 50 amino acid

More than 50
1. Polypeptide 👉 one chain - linear
2. Protein 👉 more than one chain - folded

الصورة لهرمون السعادة الدوبامين
ياخي حتى اسمه هدوء 🤤

Med. Lab. Technology
#Akram_Hassan_Kadhum

مساء الخيرات .. 🧡

اينشتاين يگول " إذا لم تستطيع شرح فكرتك لطفل عمرة 6 اعوام فانت نفسك لم تفهمها بعد "

تدرون انه شلون حافظ اعراض الغدة الدرقية ( الصعود والنزول ) وحتى ليش تصير هاي الاعراض ، بكلمتين بس ..
الكلمتين هنه midw step ( خطوة ميدو ) ولد اسمه ميدو خطاله خطوة فسموها باسمه 😅

👈 حرف m يعني muscle weakness يعني يگلك من اصعد الدرج صعبة علية
👈 حرف i يعني irritable يعني مامستقر ، مامرتاح
👈 حرف d يعني diarrhea يعني اسهال
👈 حرف w يعني wight loss يعني يگلك اكل هواي بس وزني ناقص
👈 حرف s يعني sleeping problem يعني مشاكل بالنوم
👈 حرف t يعني tachycardia يعني گلبه يدگ سريع
👈 حرف e يعني enlargement of thyroid gland يعني تضخم بالغدة
👈 حرف p يعني poor tolerance to heat يعني حران صيف وشته

هذني العددتهن فوگ اعراض منو ؟
هذني اعرض Hyperthyroidism يعني زيادة في نشاط الغدة الدرقية
جر خط ...

👈 هناك مو گلنه اسهال ؟ هنا امساك constipation
👈 هناك مو گلنه گلبه يدك سريع ؟ هنا لا گلبه يدگ بطئ bradycardia
👈 هناك مو گلنه ياكل ووزنه ناقص ؟ هنا لا وزنه زايد weight gain
👈 هناك مو گلنه حران صيف وشته ؟ هنا لا بردان صيف وشته poor ability to tolerate cold 🥶
👈 هاي الاخيرة بعد احفظها مالگيتلها شي 😂 وهي feeling to tiredness يعني يگلك من اگعد من النوم تعبان

شني هذني الفوگ ؟
هذني اعراض واحد عندة Hypothyroidism يعني عنده قله بنشاط الغدة

خصم الحجي من تسمع ناس تسولف على الغدة الدرقية وجابو بالطاري Hyper او Hypo قبل لايكملها اتذكر ( midw step )
الصورة الي جوه للولد ميدو 😅

ليش تصير هاي الاعراض خلوهن بمنشور ثاني لان اذا صار المنشور طويل محد يقراه 😅

Med. Lab. Technology
#Akram_Hassan_Kadhum

السلام عليكم .. 🧡

امس خذنه اعراض الغذة الدرقية ( Hyper و Hypo )
اليوم نفسر هاي الاعراض ليش تصير

اي شاب عنده tachycardia او bradycardia اول مايدزه الطبيب على Thyroid Function Test

نبدي ..

👈 ليش المصاب ب Hypothyroidism تنخفض حرارته ؟ لان هرمونات الغدة الدرقية ( T3 و T4 ) هنه المسؤولات عن تنظيم حرارة الجسم
زين إذا هنه قليلات ؟! اكيد تقل الحرارة

👈 ليش المصاب ب Hyperthyroidism ترتفع حرارته ؟ ب Hyperthyroidism يعني اكو هرمونات الغدة ( T3 و T4 ) بيهن زيادة مفرطة فيزداد التعرق لغرض التبريد وتزداد ضربات القلب لغرض ضخ الدم لعمل معادلة للحرارة

👈 ليش المريض دقات گلبه تصير قليلة ؟ لان T3 و T4 قليلات فحرق الغذاء قليل فاكيد الطاقة قليلة ولان ماكو طاقة للقلب فاكيد تبطئ من حركته

👈 ليش المريض يعاني من التعب ؟ نفس الجواب اعلاه
👈 ليش المريض يعاني انتفاخ الجلد والاطراف يعني تلگاه مورم ؟ لتراكم المخاط تحت الجلد

👈 ليش المريض يعاني من جفاف الجلد وتساقط الشعر ؟ بسبب وجود المخاط الي يسحب السوائل

👈 ليش المريض ياكل بس هو ضعيف ، اقصد المريض المصاب Hyperthyroidism ؟ بسبب زيادة معدلات اكسدة الغذاء فيستهلك الكلايكوجين ثم الدهون ثم البروتين

ركزلي على الصورة وشوف عظمة هاي الغدة وشوف شكم وظيفة تأدي
واحنا نحتاج هاي الهرمونات بشكل يومي
مصدر الصور : كتاب endocrine and reproductive system one stop doc ، سلسلة كتب stop doc كلهن كتب سهلات هيج تحس روحك تقره منشورات مو كتب 😅

Med. Lab. Technology
#Akram_Hassan_Kadhum

السلام عليكم .. 🧡

تخيل من تتزوج تروح انت وزوجتك لمركز ابحاث متخصص ب Biotechnology ينطونك كتلوك ويسئلوك هاي الاسئلة :

👈 شتريد لون عيون ابنك خضر ، زرگ ، صفر ؟
👈 لون شعره و لون بشرته و نسبة ذكاءه ؟
👈 شگد تريد طولة ؟
👈 تريده اخليه الك يقاوم ليامرض ؟
كل شي بسعره خالي 😅

تقنية التعديل الجيني CRISPR-Cas 9 اعتقد اغلبكم سامع بيها
هي اختصار لجملة :
clustered regularly interspaced short palindromic repeats

👈 بعام 1952 عرفنا DNA هو الشفرة الي تحمل المعلومات الوراثية
👈 بعام 1963 عرفنا شكل DNA
👈 بعام 2000 عرفنا نقره DNA
👈 بعام 2012 عرفنا نستفاد من تقنية CRISPR

بهاي التقنية نگدر نوصل لاي جين ونعدل عليه بكيفنا ومثل مانريد
بالثمانينات اكو شكم عالم شاف اكو بالبكتريا طلع فد قطع segments وهي الي يسمونها هسه ب CRISPR
فهاي القطع تكون قصيرة short ومتناظرة palindromic ومتردده كل شوية تلگالك قطعة يعني هنا قطعة تمشي شويه ع DNA تلگه القطعة الثانية ، تمشي شوية تلگه الثالثة وهكذا يعني جاي تنعاد repeated
اذا تريد تفهم معنى palindromic بالوراثة شوف الصورة رقم 1

فهسه ليش سموها تقنية CRISPR
حرف C يشير الى Clustered يعني مجاميع
حرف R يشير الى Regularly يعني منتظمة
حرف I يشير الى Interspace يعني بيناتهن مجال
حرف S يشير الى Short يعني هاي القطع قصيرة
حرف P يعني Palindromic يعني متناظرة وهاي فهمناها من الصورة شني معنى متناظرة
حرف R يعني Repeated يعني هاي القطع جاي تتكرر
المعنى العام يعني اكو قطع منتظمة ومو وحده وانما مجاميع قصيرة متناظرة وجاي تتكرر كل شوية وبيناتهن مجال

بالبداية العلماء ماعرفوا هاي القطع ليش جاي تتكرر repeated بس وره 20 سنة اكو علماء ثانين انتبهوا لشغله وهي شافوا هاي القطع الها دور بالبكتيريا لان شافوها جاي تقاوم الفايروسات

زين شلون هاي القطع الي هسه يسمونها CRISPR تقاوم الفايروسات ؟
كلكم تعرفون من يهجم الفايروس ع بكتيريا يدخل المادة الوراثية مالته للبكتيريا ويحاول يسيطر عليها ويخليها تسوي الي يريده ( يضل يتشرط )
لهنا خوش حجي
زين البكتيريا قابل تگعد وتسگت وتخلي الفايروس يسيطر عليها ؟ شي اكيد لا
فشتسوي ؟
تقاوم هذا الفايروس تكسره وتاخذ قطعة منه وتخزنها بشفرتها الوراثية فالمره الجايه من يجي الفايروس على البكتيريا تبدي طلع Cas 9 هذا حافظ الصور القديمة مال الفايروس فيبدي يقارنها بقطع الفايروس اذا لگه الصورة المحتفظ بيها تشبه قطع الفايروس فيروح يگصها

بعدين العلماء تفطنوا انه يمكن اعطاء اوامر جديدة لهذا البروتين ( Cas 9 ) بحيث يگدر يروح لاي شفرة فايروسية او غير فايروسية ويقوم بتكسيرها او التعديل عليها

هسه تگدر تروح لاي شفره وراثية ( بشرية او حيوانية او نباتية ) وتطلق عليها هذا البروتين بتعديلات واوامر محددة

فرق الهندسة الوراثية عن هاي التقنية : الهندسة الوراثية تأتي بقطعة جينية ( انزع هاي القطعة واخلي هاي بمكانها ) يعني تعويض بس تقنية كريسبر لا ، نبرمج هذا البروتين مثل مانريد

فوائدها :
1. مثلاً اكو نباتات ماتصمد بالحرارة العالية فبهذه الطريقة نغير لها الجين الي يسمح لها بمقاومة درجات الحرارة العالية وبالتالي راح نحصل على انتاج وفير
2. البعوض الي يحمل داء الملاريا يتسبب في اصابة 200 مليون شخص سنوياً يموتون منهم نصف مليون ونسبة من المايموتون يصابون باعاقات مدى الحياة فإذا تجينا لهاي البعوضة وعدلناها جينياً فنجعلها لا تستطيع حمل داء الملاريا

مساؤها :
1. هذه النظرية محرم تطبيقها على البشر عند اكثر من 50 دولة تمنع التعديل الجيني على البشر ( طبعاً الصين مو من هاي الدول ) وحتى الدول الي تسمح فهي تسمح لكن بشكل سري
لان التحكم في التعديل الجيني مو سهل ، تخيل انت تشتغل على الخلايا التكاثرية الي تحمل الشفرة الوراثية يعني هاي الشفرة راح تُورث
تخيل اذا سويت تعديل جيني خاطئ لواحد وهذا تزوج ونقل شفرته لابناءه وابناءه تزوجوا وهكذا
يعني خطأ واحد ممكن يدمر البشرية

بالمستقبل قبل الزواج راح مايسئلون على الخلاقك لا
يسئلك انت مسوي تعديل جيني او لا 😅

اذا تحبون الوراثة وشلون نستخلص DNA من الشعر او الدم وهاي السوالف او عن الجينات كلولي علمود اكثر وراثة 😅

الفيديو الجوه من قناة الدحيح الي يمكن معناها السجاج عدنا 😂
وانا من المدمنين على هاي القناة

#Akram_Hassan_Kadhum
Med. Lab. Technology

السلام عليكم .. 🧡

عندما يشكك 99‎%‎ من الناس في فكرتك فهناك احتمالان ، إما انك مخطئ تماماً أو انك على وشك تغيير التاريخ ! | سكوت بيلسكي

متعة الوراثة والجينات ..
👈 الجين عبارة عن جزء من DNA مو كل DNA
👈 زين ب DNA شكم جين تقريباً ؟
يوجد ب DNA الواحد آلاف الجينات وطبعاً ال DNA موجود بداخل نواة الخلايا وعندنا بجسمنا حوالي 3 ترليون خلية والترليون هو مليون مليون

👈 اكو منطقة قبل الجين اسمها promoter وهاي المنطقة تحتوي على CAT box و TATA box
👈 زين شنو CAT ؟ ال CAT يعني بزونه 🐱
لا جذب 😂
ال CAT box يعني CA CA CA CA جاي تتكرر واقصد ب C هي سايتوسين و A الادنين

👈 زين شنو TATA box ؟
يعني TA TA TA TA جاي تتكرر هواي واقصد ب T الثايمين و A يعني الادنين

هسه فهمنا من نشوف CACACa TATATA يعني نگول هاي منطقة ال Promoter يعني الجاي وراها جين

#الصورة_1 بس اريدك تفهملي ان الجين هو جزء من DNA مو كل DNA
#الصورة_2 اريدك تفهملي ان قبل الجين اكو منطقة اسمها promoter وشتحتوي هاي المنطقة

عوفوا مناطق Exon و Intron بعدين ناخذهن لان هذني من ضمن تركيب الجين

منين يتركب الجين خلوها بمنشور ثاني علمود ماتملون مني 😂
هاي كلها مقدمات وراثية علمود بعدين ناخذ شلون يتم استخلاص DNA من الشعر او من الدم ، تحليل كلش حلو وراح تحبوه والشغل ماله صح طويل بس ممتع لدرجة 😍

وبالمستقبل القريب راح اشرحلهم برنامج CLS من الصفر لان جاي اقره معلومات عنه
وان شاء الله الشرح راح يكون بصمات صوتية
والهدف من هذا البرنامج نبني فرق عمل علمي وجر خطين جوه علمي
مانريد نصير ماكنات بس 🥰

Med. Lab. Technology
#Akram_Hassan_Kadhum