Med Help

بسم الله الرحمن الرحيم ..
أنا طارق الهنيدي زميلكن من الدفعة الخامسة (Pre5)
وعضو فريق MedHelp التطوعي ..
بفضل الله ترتيب سابع على دمشق بمعدل فصل أول (92.8) وفصل تاني (98)
حابب احكي تجربتي بهالسنة لكل الطلاب اللي حابين يدخلو هالفرع المميز ..
- الصراحة ما بينضاف شي على حكي صديقي أسيد .. يلي حابب يقرأ تجربتو رح الرابط بالتعليقات ..
رح احكي عن [ الدراسة - الضغط والعامل النفسي ]
أولاً. الدراسة والسر بهالسنة :
- السنة التحضيرية متل ما سمعتوا عنها أي أصعب من البكلوريا وأضخم ومعكن بس 4 شهور تقريبا لدراسة مواد كل فصل .. لكن بالوقت نفسو في اشياء صارت اسهل .. نمط الأسئلة المؤتمت بساعد لا شك يعني لازم نتحول من نمط الحفظ البصم لنمط الحفظ الفهمي .. زد على ذلك متعة المواد العلمية اللي بتخفف علينا شوي هالحمل الكبير ..
- هلأ السر بهالسنة او المفتاح .. هو الخروج السريع من صدمة الانتقال من المدرسة للجامعة بأسرع وقت ممكن .. والتركيز العالي على مواد الفصل الأول اللي هية المحددة لفرز الطلاب برأيي الشخصي .. لانو رح تشوفو انو الفصل التاني موادو اسلس وبتنجاب علامات عالية مو بنفس صعوبة الفصل الاول اللي فيه مادتين عملاقتين (الفيزياء والكيمياء) اللي سمعتو عنن اديش صعب ينجاب فيهن علامة عالية ... لكنه ممكن وليس مستحيل اذا اندرسو صح ..
- الغلط الأكبر هو لما طالب قول للتاني : " انت جبت 90 بالبيو كيف طريقة دراستك لحتى ادرس متلك "
مافي طريقة دراسة هيك بتجبلك العلامة العالية .. كل شخص لازم يكتشف ويطور طريقتو الخاصة .. ناس بتحسن تحفظ بسرعة وفهمها صعب .. ناس فهمها عالطاير لكن بتلاقي صعوبة بالحفظ .. كيف الشخصين بدن يدرسو بنفس الطريقة هاد خطأ فادح ..
ثانياً. الضغط والعامل النفسي :
- نظرا لأهمية هالشغلة حبيت احكي عنها منفصلةً .. هالسنة حرفيا هية حرب نفسية مين ثقتو بنفسو أقوى ومين عم يعتمد عحالو اكتر هو اللي بيتفوق بالنهاية .. اللي كلمة محبطة بتهزلو معنوياتو وبتنزلو عالارض .. رح يلاقيها سنة صعبة كتير ومستحيلة حتى .. لانو عنجد رح تشوفو بعينكن اشكال وألوان .. رجاء ابتعدو عن الناس المسمومة اللي بس هدفها تحبطكن وانا بقول هاد الشي خاصة بفترة الامتحانات الطلاب بتكون مضغوطة والكلمة بتأثر عنجد فيها ..
- كلشي بخليك مزعوج بعد عنو اي شي بتلاقي عم يستهلك طاقتك بشي مالو فائدة وما منو هدف كمان ابتعد عنو ..
رح يمرق معكن بقلب السنة ناس يخوفوكم من مواد وفصول ممكن تكون بسيطة بالنسبة الكن (الفصل التامن البيو على سبيل المثال .. ناس لقتو سهل وفهمي وبعض الناس ما قدرت تمشي فيه) لذلك يا ريت هاد الحكي ما تردو عليه ..
- عقلك محتاج رااااااحة مو جلد .. العقل محتاج للراحة ليخزن اللي حفظو ويتهيأ لتلقي معلومات جديدة .. مو شطارة تدرس باليوم 12 ساعة .. مو شطارة تقطع نشاطاتك الخارجية .. سواء نادي، رياضة، لعب، افلام، مشاوير .. هدول النشاطات مهمة متلا متل الدراسة .. عيش حياتك عادي لكن نظم وقتك .. وقت الدراسة عطي كل طاقتك للدراسة واذا درست 3 ساعات او 4 بتركيز عالي احسن من دراستك ل 12 ساعة كل شوي عم تمسك صفحات الكتاب وتقول ايمت رح نخلص هالفصل ..
-ثالثاً. المصادر :
- الكتاب فقط .. خاصة المواد الطبية (بيو ، فيزيو ، تشريح ، وراثة ) انا بس درست الانجليزي وتاريخ الطب من محاضراات Rbcs والاحصاء من نوطة الدكتورة منال البابا والفيزيا من PreX.
- بالنسبة للدورات والكورسات .. برأيي هي شي ثانوي مانها ضرورية .. ممكن يستفاد من هي الكورسات الناس اللي كانو متعودين يجيبو استاذة خصوصي بالبكلوريا بصورة اكبر ..ممكن يساعدوهن شوي بشرح الأفكار وما الى ذلك .. بس لازم الانسان يبلش يحاول يعتمد عحالو بكون أحسن برأيي الشخصي .. حتى ااحضور بالجامعة من الممكن الاستغناء عنه (بالفصل التاني بسبب الكورونا ما نزلت على محاضرة وحدة).
اخيراً.
انشالله رح كون معكن انا وفريق MedHelp هالسنة لنساعدكن لتتجنبو اخطائنا اللي وقنعا فيها .. رح حاول دبلج فيديوهات شرح عاليوتيوب للغة العربية لمختلف موادكم .. ورح قدم بعض الشروحات عن كم فكرة صعبة بمادة البيولوجيا إذا الله راد ... وان شاء الله اقدر فيدكم قدر المستطاع ..
- رابط فريق MedHelp على الفيس ❤:
https://www.facebook.com/MedHelpForPreYears/
- قناتنا عالتلغرام ❤:
https://t.me/MedHelpForPreYears

Facebook

See posts, photos and more on Facebook.

❤8👍7

13.5K views08:31