Med Help

السلام عليكم 💚🌸

موضوعنا اليوم هو عن حفظ الجدول الدوري 💡

كتير طلاب سألت عن الجدول الدوري وشو مطلوب منو وشو نحفظ فيه !
بالحقيقة الجدول بمعظم الدورات كان يجي مع الأسئلة ، ولكن بآخر كم دورة ما عاد جابوه
علماً أنو لو إجا من الأفضل تكون متدرب وحافظ قسم منو لعدم ضياع الوقت أثناء الفحص .

👈🏻 لهيك المطلوب : حفظ أول أربع أدوار بالجدول الدوري .

👈🏻 ولتسهيل عملية الحفظ جمعت عناصر كل دور بجملة :

🟩 منجي لأول دور : طبعا هاد الدور كتير سهل ومعروف انو فيو بس هيدروجين وهيليوم ، يعني HHe (واحد عم يضحك 😂) .

🟩 الدور التاني: لبيب سنو فني .
المقصود بكلمة لبيب Li ,Be, B .
والمقصود بكلمة سنو C, N, O .
أما فني فمعناها F, Ne .

🟩 الدور التالت: نحن مجال سيبس كلار .
نحن يعني Na ، مجال يعني Mg, Al ، سيبس يعني Si, P, S ، وكلار يعني Cl, Ar .

🟩 بالدور الرابع صار عندي عناصر انتقالية وبما أنو صار في عناصر انتقالية أنا حابب أنتقل بالتسمية للغة العربية بقا بقول:

(بوران كانت جاية جري وزارت سليم بكرة)

بوران تعني بوتاسيوم ، كانت تعني كالسيوم .
جاية تعني جاليوم ، جري تعني جرمانيوم .
زارت تعني زرنيخ ، سليم تعني سيلينيوم .
بكرى تعني بروم وكريبتون .

⚠️ زيادة بفيدوا:

🟩 العمود الأول: ليش نحن فريق اربسز .
ليش تعني Li, H ، نحن تعني Na ، فريق تعني Fr, K ، اربسز تعني Rb, Cs (تحية للفريق الرائع RBCs 👋🏻🩸)

🟩 الهالوجينات هي: I, Br, Cl, F
تقرأ إما (يأبر سلفي) من اليسار لليمين أو
(فلكلور بري) من اليمين لليسار .

💡طريقة التوزيع الالكتروني وتحديد الصف والعامود والكتلة وإذا كان العنصر انتقالي أو لا انتقالي

👈🏻 أول شي إذا بدي وزع الكترونياً لعنصر بدي عددو الذري .

لما باخد العدد الذري بروح بكتب (اسين بسين دبسين فدبس فدب) يعني

(s s p s p s d p s d p s f d p s f d p)

👈🏻 هلا بدنا نرقم:

1- أنا بعرف s بيظهر من أول طبقة كمومية رئيسية يعني أول s بشوفها بعطيها الرقم 1 وتاني s بشوفها بعطيها الرقم 2 وتالت s بشوفها بعطيها الرقم 3 وهيك ليخلصوا ...

2- أنا بعرف p بتظهر من تاني طبقة كمومية رئيسية يعني أول p بشوفها بعطيها الرقم 2 وتاني p بشوفها بعطيها الرقم 3 وتالت p بشوفها بعطيها الرقم 4 وهيك ليخلصوا ...

3- أنا بعرف d بتظهر من تالت طبقة كمومية رئيسية يعني أول d بشوفها بعطيها الرقم 3 وتاني d بشوفها بعطيها الرقم 4 وتالت d بشوفها بعطيها الرقم 5 وهيك ليخلصوا ...

4- أنا بعرف f بتظهر من رابع طبقة كمومية رئيسية يعني أول f بشوفها بعطيها الرقم 4 وتاني f بشوفها بعطيها الرقم 5 ...

👈🏻 وهيك بصير الترقيم :

(1s 2s 2p 3s 3p 4s 3d 4p 5s 4d 5p 6s 4f 5d 6p 7s 5f 6d 7p)

طبعاً بيجي واحد بقول أنو هي الطريقة كتير طويلة هيك وبتاخدلي وقت الامتحان ، الطريقة ولا أسرع لأنو أنا لما يعطيني عنصر مو ضروري اكتبلو كل هاد التوزيع يعني أنا إن عطاني الكالسيوم يلي عددو الذري 20 مثلاً عن طريق التقدير انا بكتب اسين بسين فقط وبعدين بوزع الالكترونات ويلي بزيد بشطبو (طبعا هي الطريقة ما بتاخد اكتر من 10 ثواني إن الواحد أتقنها) . وما ننسى أنو كل s بيسع الكترونين وكل p بيسع 6 وكل d بيسع 10 وكل f بيسع 14 .

👈🏻 هلأ بعد ما وزع لحدد الدور بجي باخد أكبر رقم موجود عيسار المدارات بكون هاد رقم الدور .

👈🏻 لحدد العمود هون بدي ميز حالتين:

1- إذا كان العنصر لا انتقالي (يعني ينتهي ب s أو p) :

بجمع الالكترونات الموجودين بأعلى طبقة فرعية يعني المدارات يلي إلها أكبر رقم عاليسار .

2- إذا كان العنصر انتقالي (ينتهي ب d أو f) :

بجمع الكترونات أخر مدارين s و d شو ما كانت ارقامن وإذا كان المجموع 8 أو 9 أو 10 بكون العنصر بالعمود التامن وإذا كان المجموع أكبر من 10 بطرح منو 10 بيطلع رقم العمود وغير ذلك ناتج الجمع هو رقم العمود .

👈🏻 آخر شي لحدد الكتلة بشوف التوزيع الالكتروني يلي عندي إن انتهى ب p فهو بالكتلة p وإن انتهى ب d فهو بالكتلة d وإن انتهى ب s بشوف يلي قبلو إن كان d فهو بالكتلة d وإلا فهو بالكتلة s .

🌟 فيديو كوميدي يسهّل حفظ الجدول لمن أودّ رؤيته :
https://t.me/MedHelpForPreYears/4469

موفقين جميعاً ولا تنسونا من صالح الدعاء 💚🙏🏻

#Chemistry 🧪
#MC_Chapter_3
#Med_Help_Chemistry
@MedHelpForPreYears

❤38👍14❤‍🔥5🔥4

8.19K views11:00