Med Help

السلام عليكم ورحمة الله وبركاته 🌹
بما انو هلا كلو قاعد يا عم يستنى الحل يا يندب ، هات من وقتك ٥د مشان تعرف شو تعمل بمادتك الجاية " يلي هي الفيزياء "

بغض النظر عن ماهيّة خروجك من الفحص ، زعلان او نص نص أو مبسوط ، تذكر مادام أنت أخذت بالأسباب ، الباقي كله توفيق والله بيتولى هالأمور لذلك لا اعتراض ، لعله الخير لك ، بل أكيد هو الخير لك ان شاء الله ❤️

أمامكم الآن أصعب مادة في هذه السنة يلي هي الفيزياء ( أصعب مقارنة مع البقية ولكن سهلة ع يلي دارسها ان شاء الله )

خلينا نناقش كذا أمر
في فصول الضوء والليزرات ضخمين..

أنا مقصّر ، شو أعمل شو أساوي ، في فصول مابلحق إدرسها ، وأنا متيّقن أنو رح أشرد ويضيع تركيزي ، والفيزياء نحن بنحتاج الثانية فيها ؟!
رح جاوب بفرض انو أنا كنت محلك ..هل رح قرب ع ملخصات والذي منه ؟ هل رح اندب ؟ هل وهل؟
صراحة كنت رح ألجأ لفيديوهات د.محمد الحلبي مباشرة وحاول ركز كلشي بيحكيه كونه استاذ جامعي وبيعرف المهم ومضمون الأسئلة ، وبظن مدة الفيديوهات اذا قعدت عليها هي أقل من مدة سرحي بالفصل لحالي ، وبأسوأ الأحوال بعملها × ١.٧٥
بعدين بقلب السلايدات تبعه ( كونه من نفس المصدر يلي عم يشرح ) تقليب قدر الإمكان

في ناس متابعة مع بري اكس ، ودارسة ، لا خليك ع بري اكس اذا دارس منها وتمام ، مشان يكونوا نفس المصدر ، لانو الذاكرة البصرية مهمة باستذكار المعلومات.

وسواء كنت دارس من كتاب ، او بري اكس او سلايدات الدكتور محمد ( كونه هدول ال٣ هنن الأكثر شيوعا )
راجع من مكان دراستك الأول ، يعني اذا دارس سلايدات راجع سلايدات وهكذا

تقسيم الفصول ، مارح قلك قسم هيك واعمل هيك وعممها ع ٨٠٠٠ طالب ، صراحة هي طريقة بالنسبة إلي غير مجدية ، وفي ناس بيعملوها مع احترامي للفزلكة وتضييع الطالب .. برأي وبكل صراحة ، الطالب هو أدرى بنفسه ، ببلش بفصل معين بخلص بفصل تاني ، براجع فصل فلاني ..الخ هو أدرى صراحة..
أكيد كتير مهم تركز ع أسئلة الدورات ..وتحل دورات كتير وتحاول تفهم فكرة السؤال وشو استخدموا قوانين وليش..

مشان قصة الندب ، لما تعرف انو لسا ماتحدد مستقبلك ، هو ساعتها لازم يتحرك الضمير تبعك ، عندك أربع مجالات أمامك يلي هنن بشري اسنان صيدلة هندسة ، وصراحة القرار بيدك ، ومافي شي بروح بسبب مادة او مادتين او او ، مادام لسا في وقت وفي الله عم يشوف كيف عم تتعب وتشتغل ، ف معناتها في أمل ، والله وليُّ التوفيق 🙏❤️

مشان الملاحق يلي سالتوني كثير عنها :
في ملاحق لـ MedHelp لكل قوانين الفيزياء مجمعين ب ملف وفي ملحق علماء وفي ملاحق للفصول الصعبة أو الطويلة ( متل الفصل ٣ +١٤ ) ، هدول المسا بنزلهم ان شاء الله ، أما هلأ ، خود بريك ، تنفس ، إستعد طاقتك ، رتب أولوياتك ، مشان تبلش المسا فيزياء ، وتنسى كل يلي راح 🙏

نهاية تمنياتي لأي حدا فيكم بالتوفيق والنجاح ، ولاتنسونا من صالح دعائكم 🌹

👍7❤5

5.38K views15:48