Med Help

#Cell_Biology 🧬
#Med_Help_Biology 🧬

الفصل الثاني.
بنية البرويتن.

@MedHelpForPreYears

👍2

3.11K viewsedited 17:43

#Cell_Biology
الفصل الثاني

يعطيكن العافية يارب❤
بداية نحنا حكينا مسبقا عن الشحميات او الدسم ...وانو بتتألف من ارتباط الكحول مع احماض عضوية وسميناها *الاحماض الدسمة*
حكينا عن الكحول وانواعا وهلأ حنحكي شوي عن الاحماض الدسمة (شوهية وشو انواعا والخ...) ..لنبلش..
🔵الأحماض الدسمة (Fatty Acids):
الأحماض الدسمة بالمجمل بتتكون من سلاسل كربونية طويلة مفتوحة (غير حلقية ) وغير متفرعة ( بمعنى انو على استقامة واحدة ومالا فروع)
صيغتها العامة : CH3-(CH2)n-COOH
🔵تعد جزيئات الحمض الدسم مستقطبة او ثنائية الطور(Amphipathic) ..شو معناتو هالحكي
(هالحكي معناتو انو حسب الصيفة العامة للحمض الدسم فمنلاحظ انو هو مقسم لقسمين ..قسم يلي هو المجموعة الكربوكسيلة (COOH)وهو قسم قطبي محب للماء ومنسمي بالعادة رأس وقسم تاني يلي هو السلسلة الهيدروكربونية يلي هية هي CH3-(CH2)n
ويلي بتكون قسم غير قطبي كاره للماء ومنسميه الذيل ).
🔵 هلأ بالطبيعة في عنا اكثر من 70 حمض دسم وبيختلفو عن بعضن البعض ⚀ بعدد الروابط اللي بتربط ذرات الكربون ان كانت فردية او زوجية(وحنحكي عنا هلأ )⚁وبعدد ذرات الكربون (يلي بكونو بين ال4 لل26 ذرة) وأكثر الاحماض الدسمة شيوعاً هية الحاوية على 16 و18 ذرة كربون .
🔵هلأ منجي عانواع الحموض الدسمة....
عنا نوعين للحموض الدسمة فقط يلي هنن 🔼حموض دسمة مشبعة (saturated fatty acids) 🔼وحموض دسمة غير مشبعة (Unsaturated fatty acids) .
🔶 الحموض الدسمة المشبعة :
صيغتها العامة نفس الصيغة الي فوق تبع الحموض الدسمة بشكل عام والي هية CH3-(CH2)n-COOH ☣وبهي الحموض بتكون كل الروابط بين ذرات الكربون هية روابط احادية ..ومن اشهرها
حمض الزبدة CH3(CH2)2COOH
وحمض جوز الهند (Caprytic Acid) CH3(CH2)6 COOH
وحمض النخيل (palmitic Acid) CH3(CH2)14 COOH
وحمض الشحم (السيتاريك Stearic Acid )
CH3(CH2)16 COOH
طبعا الاسماء بالانكليزي يفضل تحفظن اما الصيغ بكفي تحفظ الn .
⬅هلأ الخواص تبع هي الحموض المشبعة منقدر نقول بتتعلق بطول السلسلة الكربونية بشكل خاص وبالزمرة الكربوكسيلة كمان (فمثلا كل ما طولت السلسلة الكربونية انخفضت قدرة هالحمض على الذوبان بالمي وبالمقابل ارتفعت درجة انصهارو وغليانو )
طب تضربلنا مثال عهشي ؟ اكيد...
عندك حمض الخل C2H4O2 بيمتزج بسهولة مع المي وبأي نسبة كانت بينما عندك حمض الزبدة C4H8O2 بتنخفض نسبة ذوبانيتو ل 5.6% وهاد بسبب انو سلسلة الكربون او الذيل متل ماقلنا سابقا بحمض الزبدة اطول من سلسلة الكربون بحمض الخل (منلاحظ انو تضاعف عدد الكربونات بالجزيء)
طيب وبالمنطق اكيد عنا حد لعدد ذرات الكربون بجزيء الحمض يلي كلشي فوق هالحد بصير الحمض غير قابل للذوبان بالماء وهاد الحد هو لما عدد ذرات الكربون C=6 (يعني كلشي جزيئات حموض دسمة مشبعة عدد ذرات كربوناتا فوق ال6 فهية غير ذوابة بالمي) ...ومتل ماحكينا كمان فوق انو كل مازادت طول السلسلة الكربونية زادت درجة الانصهار والغليان تبع هاد الحمض .⚠ وملاحظة صغيرة مهمة انو كلشي احماض دسمة مشبعة عدد كربوناتا بالجزيء تبعا اقل من عشر ذرات فبتكون بالحالة السائلة في درجة حرارة الغرفة .
🔶منجي هلأ عالحموض الدسمة غير المشبعة(سهلة وبسيطة مافيا شي) :
اول شي صيغتا العامة CnH(2n-2)O2
اشهرها هنن حمض الزيت Oleic acid وحمض بذر الكتان Linoleic acid .
طيب شو كمان ...ياسيدي قال هي الحموض غير المشبعة ☣بتتميز بوجود رابطة زوجية (ثنائية) واحدة او اكثر بقلب السلسلة الكربونية وهي الرابطة بتخلي درجة انصهارو للحمض تقل وتنخفض بشكل كبير بالمقارنة مع الحموض المشبعة ...ومعظم هي الاحماض بتكون سائلة بدرجة حرارة الغرفة .
تقريبا اخر شي انو الاحماض الدسمة غير المشبعة الرابطة الزوجية (الثنائية ) تبعو بتكون من الشكل cis ...شوهو الشكل cis ..هاد انو وقت يكون ذرتين الهدروجين يلي عطراف الرابطة الثنائية باتجاه واحد فمنسمي هي الرابطة رابطة من الشكل cis والا فهي مالا من الشكل cis وبتكون من الشكل trans وطبعا نحنا بس مطالبين بالcis(متل مو موضح بالصورة )
🔵هلا منجي لأخر شي ...معناتو شو الفرق الجوهري بين الحموض الدسمة المشبعة والغير مشبعة ...الفرق هو الرابطة 😊 بالمشبعة جميع الروابط احادية اما بغير المشبعة فعنا علأقل رابطة ثنائية وحدة ...طيب بتقلي هي الرابطة مابتأثر عشي او بتعمل شي بهاد الحمض بقلك بلى ....متعارف على الرابطة الثنائية انو هية اقسى من الاحادية وبما انو هية اقسى فهي حتغير البنية او الشكل الفراغي للحمض الدسم ...فالحمض المشبع يلي روابطو احادية شكلو حيكون مستقيم (اذا بدنا نلجأ للتشبيه) اما الغير مشبع فمنقدر نقول انو هية بتخلي الحمض ياخد شكل منحني وبتغير بشكلو كل هالشي بسبب صلابة هي الرابطة😐 (متل مو موضح بالصورة) ...
وهيك منكون وصلنا لنهاية فقرة الاحماض الدسمة يلي بتكوّن الشحميات او الدسم ....
وشكرا 💜❤
#Med_Help_Biology 🧬

🙏1

3.92K views17:45