بالنسبة للمواد والمصادر، هنن سبع مواد فصل أوّل سبع مواد فصل ثانٍ، ورح نحكي هلق عن مواد الفصل الأوّل:

تشريح رأس وعنق وأطراف ☠

🫧 العملي: يُعتبر _نوعًا ما_ أصعب عملي بالفصل الأوّل كتحصيل علامة، المذاكرة والامتحان عالجثث بتكون، وتوزيع العلامة 15 ب 15 لكلّ من المذاكرة والامتحان.

🫧 النظري: عنّا غالبًا 10_13 محاضرات رأس وعنق بيعطيهم الدكتور أسامة عُرابي، و14 محاضرة أطراف بيعطيهم الدكتور عبدالله العبدالله، بس الرأس وعنق أطول وأضخم وأصعب متضمنةً أحشاء الرأس والعنق وهي بأغلب الجامعات بيدرسوها فصل ثانٍ.

⚠️ الرأس وعنق مااااا بتنترك لأسبوعها، فيها تفاصيل كثير وطويلة، بدها دراسة خلال الفصل ضروووري.

الأطراف أسهل وبتشبه مقرّر دمشق كتير لذلك أفضل مصدر لدراستها هي فيديوهات د.بيان السيّد، وحتّى أسئلتها حلوة وضروري تكون دارس الدورات 😄 .

كيمياء حيويّة وبيولوجيا جزيئية 🧪

🫧 العملي: بدّه متابعة واهتمام مع الدكاترة لأنّهم بسمعوا كثير بالجلسات، توزيع العلامات غالبًا بكون 5 علامات لاختبار كشف المجهول، 5 مقابلة (ممكن يعملها وممكن لا) و 10 مذاكرة، و10 امتحان.
تحصيل العلامة أكثر شي بدّه شغل ومتابعة مع الدكاترة أثناء الجلسات والتجارب.

🫧 النظري:

🔻 بالنسبة للكيمياء الحيوية بيعطيها د.صفا زودة وعنّا 10 محاضرات، بندرس فيها بروتينات وأنزيمات وسكريّات وشحوم وهيموغلوبين، والسنة الماضية أضاف الدكتور محاضرة بروتينات معدنية وصاروا 11 محاضرة 😄 ، وأسئلتها بدها شغل.

أفضل مصادر الها عاليوتيوب د.محمود الطويل ونينجا نيرد.

⚠️ ضروري تندرس خلال الفصل.

🔻 بالنسبة للبيولوجيا الجزيئية بتعطيها د.ظلال القطّان، عبارة عن 4 محاضرات _قابلة للزيادة😁_ مانها صعبة وممكن تنترك لأسبوع المادة إذا ما بقي وقت، أفضل مصدر لدراستها هو حضور النظري مع الدكتورة (وبتندرس بدون حضور)، وأسئلتها مقبولة وحلوة وضروري تدرسوا الدورات.

جنين 👶

🫧 العملي: نفس مقرّر النظري، غالبًا بكون عنّا مذاكرتين عبارة عن سلايدات وأسئلة نظريّة بسيطة من مقرّر النظري، وامتحان سلايدات.

🫧 النظري: بيعطيه د.محمد العجمي، د.منى سلطان ود.عبد المعين كتيل، 12 محاضرة، بده متابعة خلال الفصل خصوصي قسم العجمي ( أوّل 5 محاضرات) .

● أفضل مصدر للدراسة: إما حضور نظري د.العجمي (الأجزاء البقيّة بتندرس بلا حضور بس كمان الحضور مفيد)، أو عاليوتيوب د.مروان الحلبي دكتور الجنين لجامعة دمشق.

علم النفس 🗣

بتعطيها الدكتورة دارين رمضان ، عبارة عن 11 محاضرة، بتنترك لأسبوعها وضروري تدرسوا دورات.

لغة 3 🗽

بيعطيها د.أسامة عُرابي نفس دكتور الرأس والعنق، المقرر تبعها جديد عمره دفعتين، الدكتور بحبّ الحضور وبدقّق عليه كتير وإذا ما عجبه ممكن يضرب الأسئلة كما حصل في الفصل الثاني باللغة 4 🫠 .

مع العلم أنّ أسئلة الدفعة 12 فصل أوّل إجت نفسها أسئلة الدفعة 11 (أنتو رح تكونوا الدفعة 13 😄) بس عوضلنا إياها بالفصل الثاني الحمد لله 🫠 .

⚠️ المادّة بدها شغل ودراسة خلال الفصل ولو نصها.

● كمصدر مُساعد إلى جانب المحاضرات عنّا فلاش كاردز شغل أحد الزملاء بالدفعة يلي قبلكم:

♡ المحاضرة الأولى بتندرس بعد ما تخلصوا باقي المحاضرات بتصير أسهل ومفردات مكرّرة.
♡ المحاضرة الثانية .
♡ المحاضرة الثالثة .
♡ المحاضرة الرابعة .
♡ المحاضرة الخامسة .
♡ المحاضرة السادسة .
♡ المحاضرة السابعة .
♡ المحاضرة الثامنة .

النسج العام 🔬

🫧 العملي: مانه صعب، عبارة غالبًا عن مقابلة شفهية 5 علامات، ومذاكرة سلايدات مع شرح نظري لبعض الأسئلة وعليها 10 علامات، وامتحان 15 علامة ع نفس نمط المذاكرة.

🫧 النظري: بتعطيه الدكتورة ريم جوبان، المادة بسيطة وسهلة وبتندرس بأيّامها وبتنجاب معدّل بإذن الله.

● أفضل مصدر للدراسة د.إيمان نبيل.

الثقافة 📜

قدمناها السنة الماضية بالفصل الثاني، وممكن يتغير المقرر هالسنة.

كملخّص

المواد يلي ضروري تندرس خلال الفصل هي قسم الرأس والعنق من التشريح1، كيمياء حيويّة، قسم العجمي من الجنين، وقدر الإمكان من اللغة 3، وما تيسّر معكم من الباقي بكون كتير منيح.

وبس 🍃 ..
بالتوفيق يا ربّ ولا تنسونا من صالِح الدعاء 🤍🍃 .

#Med_Help 🤍✨️
#Med_Help_Hama
@MedHelpForPreYears

سلامٌ عليكم 🤍🍃

لـ Pre_10 🔥
إليكم مثبتة البوستات التعريفيّة عن الكليّات لسهولة الوصول إليها 🥰 .

🩺 الطبّ البشري 🩺

🥼 بوستات جامعة دمشق.

🥼 بوستات جامعة حــمـٰاة.

🥼 بوستات جامعة حلب.

🥼 بوستات جامعة حِمص.

🥼 بوستات جامعة اللاذقيّة.

🥼 بوستات جامعة طرطوس.

💊 الصيدلة 💊

🥼 بوستات جامعة دمشق.

🦷 طبّ الأسنان 🦷

🥼 بوستات جامعة دمشق.

🥼 بوستات جامعة طرطوس.

🥼 بوستات جامعة حلب.

بإذن الله كل شي رح ينزل رح نضيفه لهي الرسالة، بالتوفيق ولا تنسونا من صالِح الدعاء 🤍🍃 .

#Med_Help 🤍✨️
@MedHelpForPreYears

رجعنالكم Pre_11 لا تهربوا لــ محل 🌝🩵

مكمّلين بسلسلتنا التعريفيّة بإذنِ الله، ورح نبدأ بنشر تجارب طلّاب متفوّقين سبقوكم بالرحلة، حتّى يكون عندكم فكرة أوضح عن الطريق، وبعدها تصنعوا رحلتكم الخاصّة بأنفسكم 🤩، بعد التعلّم من أخطاء الغير والاستفادة من خبراتهم 🌟 .

↩️ نقدّم لكم تجربة الطالبة " لين خضير " من طلّاب Pre_10 بمعدّل فرز 90.69 🔥 .

👈🏻 رابط المنشور ❤️‍🔥.

بالتوفيق، والتفوّق 🤍🌿 .

#Med_Help 🤍✨️
@MedHelpForPreYears

وبعد ما حكينا عن كليّة الطبّ البشري في جامعتَي دمشق وحماة، هلق رح نحكي عن كليّة الطب البشريّ في جامعة حلب 🔥:

🫧 البوست الأوّل.
🫧 البوست الثاني.

#Med_Help 🤍✨️
@MedHelpForPreYears

🌟الطب البشري - جامعة حلب🌟

يعطيكن العافية، إجى دور حلب لك خيووو 😁
منبلش؟🔥

يالله 🏃‍♂

🪄 مواد الفصل الأول:

نسج عام - تشريح 1 - كيمياء حيوية - انجليزي 3 - علم الجنين الطبي - علم النفس - الثقافة.

🪄 العملي:

نسج عام - تشريح 1 - كيمياء حيوية - علم الجنين الطبي.

▪︎ رح نحكي عن دوام العملي لأن شي مهم تعرفوه.

العملي في حلب

🫧 4 أيّام دوام للأسف 😔
🫧 نقل فئات تبديل إلخ.. مستحيل إلّا باستخدام فيتامين واااو..😎
🫧 يعني رح تداوم أربع أيّام إجباري، ويوم عطلة غير الجمعة والسبت 🤩 ،
يعني ما بتحسن تنزل عأهلك إلّا بأيّام العطل الرسميّة وعطلة مابين الفصلين وما بين السنتين لو كنت طالب محافظات 🍃 .

أمّا النظري

المواد ⤵️

التشريح ☠

تعدّ أصعب مادة بالفصل، ومو متل التحضيرية أبدًا، بتحكي عن الرأس والعنق + والأطراف.

▪︎النظري مستلمها دكتورين:
1⃣ الدكتور هاني مستلم الاطراف، إله الدكتور 40 سؤال وهدول مضمونات بالجيبة 🔥.

برأيي الحضور إذا حضرت بتفهم وكمان إذا ما حضرت عادي بتفهمن لحالك لأن قسمه سهل.

2⃣ الدكتور ناظم مهروسة، كان سابقًا أسئلته سمّ، لكن السنة الماضية الله هداه وصار المستوى طبيعي، الحضور عنده صعب تفهم، فبدّك تحضّّر المحاضرة قبل ما تحضرها لحتّى تفهم.

▪︎بالنسبة لعملي المادة : كان مستلمها د.ناظم ولكن شاء الله أنّه تغيّر وصار العملي للدكتور أحمد غزال،
عدور ناظم إلي بجيب 20 ات هاد نيرد 🔥.

هلق العلامات عند الدكتور أحمد +25 الأغلب
+ نمط الفحص سلايدات مو جثث (الجثث كانت عدور الدكتور ناظم).

▪︎مصدر الدراسة: نوط الفا، في كورس مدفوع بس ما بتحتاج.
وفي شرح د.أحمد فوّاز للسنة الثانية 🍃 .

الكيميا الحيوية 🧪🧑‍🔬

▪︎ النظري: مادة معدل 😉 .
والدكتور كتير منيح ومع الطالب بكلّ معنى الكلمة، المقرر سهل الدكتور اله نوطته الخاصة، الحضور بدك تحضر بتفهم وبتتسلى والحضور ممتع جدًا، وبدك ما تحضر وبتدرس لحالك بتفهم المادة بصير.
العلامات بالمادة هي عالية وممتازة.

▪︎بالنسبة للعملي: العملي ادرس بتجيب فيه 30 بس مو كتير الأغلب بجيب +20 .

الجنين 👼

▪︎ النظري : المادة مستلمها 3 دكاترة 😁 .

1⃣ الدكتور حمدي: مستلم القسم العام من المادة كاملًا بنصحك تحضر الدكتور بحببك بالمادة 😍ومافي أجمل من إعطائه وخصوصًا بيحكيلك حالات من عمله ومنها مضحكة 😁😂 + ببهدل الطلاب كتييير وأغلب الطلاب بتحب البهاديل 🤦‍♂️، الدكتور بجيب من كلامه فلازم تحضر وتدرس لتضمن قسمه، قسمه 15 سؤال.

▪︎ مصدر الدراسة: نوطة الدكتور.

🫧 ملاحظة: الدكتور حمدي من بعد التحرير ما أعطى وممكن هالسنة كمان ما يعطي نتيجة بعض مواقفه (:

2⃣ الدكتور طوني: الدكتور مستلم القسم الخاص، ما بنصحك تحضر لكن جرب قسمه شي 30 سؤال وهو بصممممم أرقام وأيام وأسابيع😴 بدك تبصم لتحلّ صح 💯 .

▪︎ مصدر الدراسة: نوطة الدكتور.

3⃣ الدكتور محمد مرجان: هو نفسه عميد الكلية،
بيعطي قسم من الخاص مع الدكتور طوني،
جرب تحضر، أسئلته أحسن شي 🤩، ومقرره أسهل شي 😆، بجيب 15 سؤال ومضمونين إن شاء الله.

▪︎ مصدر الدراسة: نوطة إلفا.

▪︎ مصادر مساعدة:
🖇 البوت: @Embryologysuperbot
🖇 القناة: https://t.me/Emberology7


▪︎العملي :للأسف رغم جمال المخبر إلي يعدّ الـ1 عمستوى الوطن العربي من حيث توافر عينات حقيقية إلا أنّه صعب تجيب علامات فيه،
النوطة عبارة عن 50 صفحة للعملي ولكن الأسئلة بتكون خط متل راشيتة الصيدلة فتدربوا من هلق 😃 عقراءة خط الدكاترة وهالشي مقصود لتمتلك سرعة البديهة 😇☺️ .

🫧 لكن هاد الشي تغير السنة الماضية لأن الدكتور حمدي غاب عن المخبر نتيجة التحرير، فصار أسهل وسلايدات وما بعرف إذا هالسنة رح يرجع أو لا، عمومًا إذا رجع متل فوق ما رجع بكون سلايدات.

▪︎ مصادر مساعدة للعملي بنفس القناة فوق.

علم النفس 🧑‍⚕

بتحكي عن السلوك الإنساني🧍‍♂🧍
الدكتور كلّ سنة عم يتغير، والمقرر كمان كل دكتور بيعطي مقرره الخاص، الحضور مهم كونه كل سنة دكتور جديد ومحد بيعرف شو المقرر وشو ركز إذا ما حضرتوا.

الانكليزي 🔠

مادة حلوة وكثير سهلة وممتعة وأسهل من التحضيرية، مابدها حضور معروفة المادة بكلّ الجامعات _تقريبًا _معدّل، بتحكي عن مصطلحات طبية وإلخ...فيها أسئلة مكرّرة ودورات، المقرر 23 وحدة.

النسج العام 🦠

▪︎ النظري: المادة بدها شغل وحفظ منيح وزنخة شوي.
مستلمها دكتورين:
1⃣ الدكتور هيثم: مستلم أغلب القسم وأسئلته سهلة ومقرّره سلس، وبيهتم بالإنكليزي بالأسئلة.

2⃣ الدكتورة بيان: مقرّرها حفظ بصم وأسئلتها منطقيّة، عمومًا بتنجاب معدل المادة.

▪︎العملي: قبل كان مذاكرة مجاهر وفحص سلايدات، السنة الماضية كان كلّه سلايدات.

🫧 آخر مادة هي الثقافة، محدا بيعرف إذا رح تتقرر أو لا، وهي ماي صعبة وسهلة.

🫧 دورات جميع المواد عدا الثقافة بتطبيق بيتا.

يُتبع 🍃 ..

#Med_Help 🤍✨️
@MedHelpForPreYears

وهلق رح نحكي عن

الـسـكــن الــجــامــعــي في حلب

🫧 يحقّ لكلّ طالب يبعد 40 كم عن الجامعة التسجيل بالسكن الجامعي.

🫧 لكلّ اختصاص تقريبًا وحدة خاصة فيه (مبنى).

🫧 الطب الوحدة 12 للشباب، والوحدة 8 للبنات.

🫧 كلّ غرفة مساحتها 11-10 متر مربع، وتحوي أربع أسرّة لأربع أشخاص.

🫧 الكهرباء بالسكن 21 ساعة، تقطع في الظهيرة.

🫧 الماء 24 ساعة.

🫧 النظافة الوحدة 12-8 مهتم بهم من ناحية النظافة.

🫧 رسم التسجيل مختلف والسنة الماضية كان 220.

🫧 يغلق السكن من الـ 12 للفجر بالنسبة للشباب،
و من 10 لـ 7 بالنسبة للبنات.

🫧 يحوي سوق يلبي احتياجات الطالب اليومية، يبعد عن الكلية 5 دقائق مشي.

وبس هيك 🍃 ..
بالتوفيق، ولا تنسَونا من صالِح الدُّعاء 🤍🍃 .

#Med_Help 🤍✨️
@MedHelpForPreYears

"إلى طلاب السنة التحضيرية في جامعة حماة، نحيطكم علمًا أنّه تم نقل دائرة السنة التحضيرية إلى مكتب التأجيل الدراسي سابقًا في كلية الطب البيطري - طلعة العلمين."

#Med_Help 🤍✨️
#Med_Help_Hama
@MedHelpForPreYears

وهلّق إجى دور نحكي عن كليّة الطبّ البشري في جامعة حِمص 🔥.

جهزوا كاسة المتّة وتعالوا عنّا حكي كثير 🙂‍↔️🌸 .

🫧 البوست الأوّل.
🫧 البوست الثاني.
🫧 البوست الثالث.
🫧 البوست الرابع.
🫧 البوست الخامس.
🫧 البوست السادس.
🫧 البوست السابع.
🫧 البوست الثامن.

#Med_Help 🤍✨️
@MedHelpForPreYears

يعطيكم العافية 🌸🍃

رح نحكي هلّق عن

🌟 <الطب البشري بجامعة حمص> 🌟

وشرح بشكل شوي مختصر ومفيد عن:
المواد / مصادر الدراسة / وضع السكن / وهل في ضرب علامات؟🤔

🪄 أولًا: عنّا بالفصل الأول 7 مواد وهي:

كيمياء حيوية والبيولوجيا الجزيئية + تشريح وصفي1 + نسج عام + انكليزي3 + علم نفس + ثقافة+ عربي.

أوّل مادّة معنا ⤵️

الكيمياء الحيوية 🧪

▪︎ دكتور المادة: عدنان الحموي

⚡️ النظري

المادّة حلوة كتير وممتعة ولكن ضخمة، بدها متابعة منيح من أوّل الفصل وهيي أوّل مادّة بتقدموها.

▪︎ قسم الدكتور عدنان (الحيوية):

القسم بيحكي عن السكريات والشحوم بشكل بسيط تركيب كل وحدة منن وشو الها دور بالجسم وهدول القسمين أهمّ شي بالإضافة لأقسام تانية متل الph والماء وفيها معلومات فيزيولوجيا وإنزيمات وهكذا.

▪︎قسم الدكتورة (البيولوجيا الجزيئية):

بتعطي 4 محاضرات بتتعلق ببنية الحموض النووية وتعضّي الدنا وتنسخه تمامًا متل الموجود بالوراثة، يعني قسم سهل.

⚡️ العملي

جدًّا ممتع 🔥 .
بتشتغلوا على تفاعلات كشف عن السكاكر والبروتينات بالمخبر بعد ما تعطيكم المعيدة التعليمات.

▪︎ بحال بقي الدكتور مرهف عليكم هالسنة
فحرفيًا حصته لذيذة وممتعة بشكل، بس تنويه صغيييير بس مهم كتيير :

⚠️ ضروري تروح عالجلسة وأنت دارسها من محاضرات السنة الماضية.

▪︎ حاول تحصلهم من شي حدا بعد ما تتأكد أنّه الدكتور مرهف معكم لساته،
لأن الدكتور في مجموعة أسئلة بيسألها بقلب الحصة، مانها موجودة بالمقرر لكنها اسئلة دورات يعني نفسهم بيسألهم كلّ سنة، واللي بجاوب بيكسب علامات حلوة، فلا تضوعوها من أيدكم.

▪︎ الدكتور متعاون ومحترم جدًّا، ومخبر الكيميا لطيف جدًّا بشكل عام 💫.

▪︎ العلامة موزعة على مذاكرتين وفحص وفي عحضور العملي بس عالأغلب بتتوزع.

⚡️ مصادر الدراسة

▪︎ النظري مقرر أو محاضرات دنا.

▪︎ بحال درستوا مقرّر ضروري تسمع الفويسات مشان تفريغات الدكتورين لأنه مهمين كتير وبيجيبوا منها بالفحص وإذا مامعكن وقت ممكن تجيبوا تفريغات، من المحاضرات.
أمّا العملي المقرر كافٍ بس متل ما قلتكم هالكم تفريغة مهمين لتشاركوا بالحصص،
ما بينقصلكم بحال ما جاوبتوا أو شاركتوا
لكن بزيد كم علامة إذا نقصكم بالمذاكرة بعوضوكم.

وتاني مادّة معنا ⤵️

التشريح الوصفي1 (تشريح أطراف و رأس وعنق) ☠

▪︎ دكتور المادة: عيسى موسى، بالإضافة للدكتورين مدين وعلي.

⚡️ النظري

🫧 هلق هالمادّة تغيّر وضعها هالسنة كونه استلم دكتورين جداد.

🫧 بالنسبة لمقرر الدكتور عيسى لمّا يحددلكم شو القسم يلي حياخده،
قريب كتير على مقرّر دمشق يلي بيعطيه الدكتور بيان السيد ولكن بشكل مختصر، والحالات السريرية كانت مطلوبة بس حذفها الدكتور عيسى.

🫧 إذا أنت ساكن بحمص أو الجامعة قريب عليك نصيحة احضر فايدة الك ولدفعتك، ليش؟

🫧 الدكتور بيحب كتير العالم يلي بتحضر، وبس يشوف حضور منيح بيجيب الأسئلة النظري أسهل وأوضح، فهي فايدة للجميع 💫.

🫧 وبشكل عام اعتمدوا فيديوهات بيان للدراسة لأنه غنية عن التعريف.

🫧 وعندكم شرح د.أحمد فوّاز للسنة الثانية كمان.

🫧 بالنسبة لأقسام باقي الدكتورين فللأمانة لسا مو واضح تمامًا مقرراتهم ولا شو حيعتمدوا بالزبط فبدكم تتابعوا معهم لتفهموا الوضع مزبوط.

⚡️ العملي:

🫧 بيعتمد هون عالجسمات مافي جثث.

🫧 بالنسبة لتقسيم العملي فعنّا : 20 لفحص العملي، عبارة عن 20 سؤال وهيي عبارة عن سلايدات لمجسمات مع أسئلة نظري متل أكبر عصب بالجسم ومين الشريان يلي فروعه أكتر بالعضد،
بيجيب شي 4 هيك أسئلة وغالبًا بتكون من التفريغات أو النظري، يفضل تقرؤوا التفريغات آخر شي وأهمّ المجسمات.

🫧 واللاتيني مهمّ لأن بيسألك بعدد من التسميات أنّه اكتبها باللاتيني.

🫧 المقابلة على دور بري 9 التغت، لكن بالمجمل هي عليها 5 علامات، بيتقسموا الطلاب لمجموعات وحسب حظ كل مجموعة بيسألها نظري أو عملي.

شفتو أهمية دراسة النظري مع العملي بهالمادة 🌝 حتّى تضمنوها لاتهملوا النظري والعملي بيصير سهل الوضع.

🫧 هلق بالنسبة للمقابلة بالتشريح فشوي كانت أسئلتها معتّة لهيك ما كتير تدقق على نتيجتها أو تدايق، اعمل يلي عليك وفوت وجاوب بثقة واتكل عالله.

منكمل

⚡️ مصادر الدراسة

🫧 النظري فيديوهات الدكتور بيان أو (د.أحمد فوّاز) + مقرّر الدكتور عيسى المعتمد هوي كلّ سنة بيعتمد فريق شكل، وأقسام باقي الدكاترة متل ما خبرتكم بعدها مو واضحة.

🫧 العملي أهمّ شي تشوفوا صور المجسمات تبع المخبر، فيكم تلاقوها ecg من بوت الكراكيب وتركزوا عاللاتيني.
يعني كونه الامتحان سلايدات ففورًا بتروحوا عالمجسمات وبتحفظوهم.
@albaath_files_bot

🫧 وكمان مهم كتير تركزوا مع المعيد،
وحاولوا تحفظو المعالم التشريحية بوقت الجلسة
بتلاقوا حالكم كارجين فيها.

يُتبع 🍃 ..

#Med_Help 🤍✨️
@MedHelpForPreYears

لنكمّل مع ثالث مادّة 🍃

النسج العام 🧪

▪︎ دكتور المادة: د.رحيل.

⚡️ النظري:

المادة بصميّة والها طريقة خاصّة للدراسة بالتكرار وتلخيص المعلومات بتصير أسهل إن شاء الله، ممكن تعتمدو المقرّر بس تنسيقه مو كتير مريح، فيكن تدرسوا محاضرات، الفقرات بتكون مرتبة ومنسقة بجداول.

نصيحة نصيحة
المادة كتير حلوة إذا فهمتها
كيف بفهمها؟
بتروح لعند د.إيمان نبيل
دكتورة مصرية شارحة كل حرف ومحاضراتنا حرفيًا بنسبة كتير كبيرة مطابقة للمعلومات يلي بتذكرها 🔥

⚡️ العملي:

🫧 عبارة عن 30 علامة موزعين على 15محضر.

🫧 يعني كلّ محضر علامتين وهوي أهم فحص عملي عبارة عن سلايدات (مو عالمجاهر).

🫧 يفضل تتابعوا العملي ولاتراكموه مع كلّ محاضرة بتنعطى.

🫧 اكتبوا مع الدكتور الكتابة الامتحانية يلي بيحكيها عن كلّ محضّر وجيبوا صور من محاضرات العملي وشوفوا صور قد مابتقدروا، وفي ملف كامل فيه أغلب الصور يلي كان يجيبها الدكتور، واتتدربوا عالسرعة بالكتابة مشان تلحقوا
وطبعًا صار في مقرر الها بس لا تكتفوا فيه حاولوا تشوفوا صور كتير.

🫧 حصة العملي لذيذة والله ورايقة
خفيفة نضيفة بس ركزوا فيها لأن بتسهل عليكن.

⚠️ ملاحظة:

▪︎ المادة يمكن تسمعو إنها كانت دورات،
هالشي تغير تمامًا بدءًا من السنة الماضية لما تغير الدكتور وإجى الدكتور رحيل.

▪︎ الدكتور رحيل كتير بحب يركز عالظهارات
عالأرقام، الأطوال، الأقطار، إلخ..
لهييييك مهمممممم تشوف آخر دورة حصرًا حتّى تعرفوا النمط، يعني لازم تتمكن منها خلال الفصل.

مع رابع مادّة ⤵️

الانكليزي3

▪︎ هون بتصير اللغة أحلى لأنّه تمامًا عبارة عن مصلحات طبيّة + حالات سريرية.

▪︎ دكتور المادة: الدكتور عصام.

▪︎ المادة 8 محاضرات خفاف ظراف قصيرة بشكل ولذيذة ومعدّل 🔥.

خامس مادّة ⤵️

علم النفس

▪︎ مادة حلوة بس بصميّة والوقت يلي قبل المادة قليل يمكن ماتلحقوا لهيك يُفضّل تقروها خلال الفصل أو ادرسوها ملخص بأسبوعها إذا انزنقتوا،

▪︎ ويُفضل تندرس ملخص وبتنجاب 100 بإذن الله 🔥 .

سادس مادّة ⤵️

العربي

▪︎ بتدرسوا من أي ملخص.

▪︎والمادة قبلها يوم انتبهوا.

▪︎ ملحق ecg ممتاز 140 صفحة.

▪︎ بس كمان المادة قبلها يوم بس بتلحقوا إن شاء الله إذا ماتلهيتوا أبدًا.

▪︎ المادة عبارة عن قواعد الباك نفسها تمامًا.

آخر مادّة للفصل الأوّل ⤵️

الثقافة

▪︎ مادة صغيرة كتير صارت.

▪︎ ملحق حكيم كااافٍ هو 25 صفحة بحال ضل المقرر المؤقت نفسه.

▪︎ بحال غيروه بقى بدكم تتابعوا أنتم وتشوفوها شو وضعها.
أكيد حكيم بنزلوا ملخص للمقرر الجديد.

يُتبع 🍃 ..

#Med_Help 🤍✨️
@MedHelpForPreYears

🪄 وهلق منكفي مع مواد الفصل التاني يلي هيي:

فيزيولوجيا 1 + سريرية 1 + تشريح 2 + جنين + نسج خاص + مهارات تواصل + إنكليزي 4.

الفيزيولوجيا الطبية والمرضية1 💉🩸

🫧 من أحلى مواد الفصل التاني قريبة على يلي اخدناها بالتحضيري مع أقسام جديدة.

🫧 تعتبر مادة ضخمة و لهيك بدها متابعة من أوّل الفصل وأكتر مادة بدكن تعطوها حقها وهيي سهلة مابتاخد وقت.

🫧 العملي ممتع بتاخدوا طريقة حساب كمية الخضاب بالدم بجهاز خاص وكمان بتعملو تجارب اختبار التصالب بالدم.

🫧 العلامة مقسمة على مذاكرة وفحص و5 علامات بيعطيا الدكتور للكل.

🫧 بالنسبة للفحص هو عبارة عن 5 طاولات كل طاولة عليها أداة أو مجهر وبدكن تذكروا اسم الأداة و وظيفتها وشو شايفين بالمجهر.

🫧 ونظرًا لأنّه الأجوبة بتكون قصيرة يا دوب سطر لكل سؤال لهيك في دقة عالتصحيح عالكلمة بيروح علامات، ويمكن يروح السؤال إذا كنت كاتب شرح زيادة أو كلمة غلط مو مطلوبة بتكون.

🫧 مهم تتدرب عالسرعة لتجاوب وبينجاب عملي عالٍ ساعتا لا تخاف.

سهل بس بس بدو سرعة ودقة 💫.

▪︎ دكتور المادة: برهان كنوزي.

▪︎ مصادر الدراسة: يعتبر الدكتور من أفضل الدكاترة بهالفصل ونصيحة يلي بيقدر يحضر لا يفوت الفرصة، أمّا جماعة المحافظات اسمعوا الفويسات كتير بفيدكن.

🫧 بالنسبة للنظري فجيبوا مقرّر الدكتور كتير مريح ومابيطلع برا المقرر، ولا تجيبوا محاضرات لأنه كتير بتفوت بالحيط، ومانها مريحة وكمان ماديًا عندكن 22 محاضرة.

🫧 يعتبر عم تظلموا الدكتور إذا جبتو محاضرات
العملي الو مقرر كمان مريح للدراسة.

🫧 بحال انزنقتو بالمادة وحاولو لاء، في اكستريات دنا ممتازين ساعتها.

سريرية1 🧪

🫧 بالسريرية بيصير تركيزنا على استقلاب المواد،
من حيث تدرك واصطناع وشو بتنتج عنا حالة إذا صار اضطراب بهالاصطناع.

🫧 تعتبر المادة حلوة ولكن ضخمة وبصمية أكتر من الحيوية، في تفاعلات كتير وأنزيمات وأمراض فالمادة بدها معاملة خاصة كمان هيي أول مادة بتقدموها بهالفصل.

🫧 دكتور المادة نفسه عدنان الحموي كمان ينصح تسمعوا الفويسات مع مقرره أو محاضرات إذا ماعندكن وقت، تنسيقها حلو ومرتب.

🫧 بالنسبة للعملي فهو أمتع من الحيوية وفيه شغل أكتر و بفيدكن لبعدين سريريًا، متل كأنكم عم تشتغلو بمخبر تحاليل.

🫧 بتاخدوا عينات دم وبتحطوا كواشف وبتحسبوا نسبة المادة الموجودة بهي العينة متل غلوكوز وشحوم وخضاب وبولة وكولسيترول وإلخ ..

🫧 وبهاد العملي بتتعلموا سحب الدم لأوّل مرّة، لا تخافوا المعيدين معكم خطوة خطوة.

يُتبع 🍃 ..

#Med_Help 🤍✨️
@MedHelpForPreYears

ونكفي مع مواد الفصل الثاني 🙂‍↔️🌸

تشريح 2 (صدر وبطن وعجان)

🫧 الوضع نفسه بالفصل الأوّل.

🫧 وبشكل مختصر مصادر الدراسة نظري مع بيان السيد (أو د.أحمد فوّاز) + المقرّر المعتمد.

🫧 العملي صور مجمسات ولاتيني.

🫧 كمان عندكم فريقين اعتمدوا عليهم، وكمان برجع بنوه على ضرورة دراسة النظري لأنّه بيسهل معا العملي.

🫧 الفحص تبعها بدّه تركيز وتمكن منيح.

🫧 ممكن الدكتور يطلب دراسة من مرجع سنيل وممكن لاء.

🫧 الوضع شوي صغيرة مكركب بهي المادة إن شاء الله عدوركن يكون أفضل.

الجنين الطبي

🫧 هي المادة جديدة وغريبة شوي عليكم مقسمة على جنين عام وجنين خاص، وطبعًا الخاص هوي الأهمّ وبيجي عليه علامات، ولكن لازم تمشوا بالعام قبل.

🫧 طيب كيف رح تلحقوا كلّ هالدراسة؟🧐
الأفضل تتابعوا كلّ الجنين العام مع مروان هوي كم ساعة وقراية سريعة بعدها لأنه الشغل عالخاص أكتر.

🫧 النظري فيكم مقرّر فيكم محاضرات.
والأفضل؟🧐
ملاحق أسهللكم وشاملين.

🫧 لا تنسَوا التفريغات، الدكتور كمان بيحب يجيب من حكيه برا المقرر حتّى لو كان في تناقض مع المقرر.

🫧 بصمية بحتة، بس الحلو أنّه في كتير فيديوهات بتساعدكم، متل نينجا نيرد وأوسموز،
وفيكم طبعًا تتابعوا مع الدكتور مروان الحلبي.
بصراحة شرحه رائع وبيفيدكم كتير 💫.

🫧 كمان الدكتور عيسى، بيعطي هالمادة كلّ شي انذكر بالتشريح بينطبق هون بس الزيادة أنّه عندكم رسم تنقيط بصير،

عليكم أنكم تعطوا الدفتر لأخوكم الصغير أو حدا من أهلكم 😂
وفي صور تلزيق كمان بتجيبوها من مكتبة طريف.

🫧 المادة الدكتور بيكرّر فيها دورات لحد الأربعين سؤال الباقي لازم تكونوا دارسين ومركزين الخاص أكتر شي.

نسج خاص 🔬

🫧 ممتعة أكتر من النسج العام، بس أصعب طبعًا.

🫧 نفس الدكتور بيعطي المادة، ونفس شغل الفصل الأوّل.

مهارات تواصل

🫧 مادة معدّل 🔥
خفيفة نضيفة، دراستها فيكم تدرسوا بأسبوعها بتتلحق وزيادة إن شاء الله.

🫧 بيعطيها دكتور جديد وهي 10 محاضرات.

انكليزي 4

🫧 نفس وضع الفصل الأوّل لكن بدها شغل شوي أكتر كونه تفاصيلها أكتر، فلا كتير ترتخوا بأسبوعها وركزها منيح.

يُتبع 🍃 ..

#Med_Help 🤍✨️
@MedHelpForPreYears

🌟 السكن الجامعي في حِمص 🌟

🫧 كأوّل سنة بيعتبروكم مستجدين وبيحطوكم بوحدات مؤقتة، هلق هيي مقبولة نوعًا ما وتعتبر أفضل سكن جامعي بين كلّ المحافظات.
لا تقارنها مع غرفة ببيتك طبعًا 🌝😂

🫧 هي غرفة عادية جدًّا بس مقبولة
في كهرباء، ومي شبه دائمة، مابتنقطع إلّا وقت الصيانة.

🫧 وحدات المطالعة مو مخدّمة للأسف.

🫧 بالسنة التالتة بيصير السكن أحسن ومريح أكتر.

🫧 نصيحة دهبيّة وقت بدكم تسلموا الوصول تبع السكن مشان تاخدوا غرف لا تتهوروا وتسلّموا لحالكم، يعني اجمعوا 4 وصول تكونوا كلكم طلاب بشري وبتعرفوا بعض من نفس الدفعة، مشان مايحطوا معكم طلّاب من فروع تانية.

🫧 فيكم تروحوا عالسكن من قلب الجامعة من ورا كلية الطب في شي ربع ساعة مشي أو بتطلعوا وبتاخدوا مكرو.

🌟 المواصلات والطريق 🌟

🫧 بالنسبة للي جاية من دمشق،
الطريق بياخد متوسط من كراج العباسيين لحمص ساعتين ونص.

🫧 لا تاخد من كراج بولمان!
من كراج البولمان لا تاخد!

ليش؟🧐

لأن رح يروحوا على الكراج الشمالي يلي بيبعد عن الجامعة 30 دقيقة بالباص فرح تتأخر إذا مو حاسب هالحساب.

🫧 كراجات العباسيين، باصات سكانيا، أو في بولمانات كبيرة مابها شي، المهم من كراج العباسيين خده ليوصلك عالكراج الجنوبي يلي بيبعد عن السكن والجامعة خمس دقايق بالباص.

🫧 التكلفة 50 ألف روحة 50 ألف رجعة.

🫧 أو اتفق مع شي فان،
في فرسان الشام نزلت جديد بس لسا ما توسعوا مزبوط،
حاولو تتابعوهن لأن رحلاتن بيفتحوها قبل بكم يوم من كل رحلة.

🫧 بياخدكم من كذا موقف وباصاتهم مكيفة وسريعة، بتوصل بساعة ونص بدل الساعتين ونص،
بس شوفوا إذا بيفتحو رحلة عوقتكم أو لا لتحجزو فيها.

برضو يُتبع مع آخر بوست 🍃 ..

#Med_Help 🤍✨️
@MedHelpForPreYears

وهلق مع ٱخر سؤال 👀🌸

في كتير طلاب بتتوتر من الموضوع وبتخاف تسجّل بحمص لقصة "ضرب العلامات " 😞

" للصراحة أنّه تجيب معدل عالٍ صعب بس مانه مستحيل " 🔥 .

🫧 الوضع تمامًا متل آي جامعة تانية، في كم مادة حتكون تقيلة و فحصها صعب، وفي كم مادة رح بتكون دورات، وأكيد في كم مادة وسط.

🫧 فالمهمّ نعرفه أنّه ما في شي من هالتهويل يلي بتسمعوه لأنّه مبالغ فيه بشكل كبير وغير منطقي لذلك من البداية ابعدوا عن أي حكي سلبي 🤗🌸.

🫧 هاد الحكي من طلاب السنة الرابعة والخامسة ويلي معدلاتهم بالـ 85 % وفوق.

🫧 هلأ بالسنين السابقة كان الوضع سيئ والهيئة القديمة عملت كتير قصص  بصراحة والمعدلات كانت منخفضة، بس ٱخر كم سنة تحسن الوضع أكتر، والسنة الماضية كانت الهيئة الجديدة كتير متعاااونة و في معدلات منيحة بالـ 80 وفوق 🔥.

🫧 وأخيرًا التعب عليك والتوفيق من ربّ العالمين، المهمّ ما تقصّر وما تراكم وكمان ما كتير تحمّلها على حالك غلط هالشي، مَعليه إذا نزلت بمادة إن شاء الله بتجيب معدل بيلي بعدها 🍃 .

🫧 وأهمّ نصيحة لا تقارنوا حالكم بغيركم من المحافظات، يمكن حتّى تلاقوا حالكم جايبين معدّل أعلى بمواد وهنن بمواد أعلى منكم، لهيك المقارنة من أكبر أسباب الفشل والاكتئاب يلي بتصيب الطلاب، ركز عحالك وعهدفك ماعليك بالباقي، وبس هيك 😊🤍.

وَفقكم الله، وإن شاء الله يكون الكلام مفيد لإلكم و ما نكون قصّرنا معكم بشي، ولا تنسونا من صالِح الدعاء 🌸🍃 .

#Med_Help 🤍✨️
@MedHelpForPreYears

سلامٌ عليكم 🤍🍃

لـ Pre_10 🔥
إليكم مثبتة البوستات التعريفيّة عن الكليّات لسهولة الوصول إليها 🥰 .

🩺 الطبّ البشري 🩺

🥼 بوستات جامعة دمشق.

🥼 بوستات جامعة حــمـٰاة.

🥼 بوستات جامعة حلب.

🥼 بوستات جامعة حِمص.

مكملين إن شاء الله مع باقي الجامعات 🍃
وبإذن الله كل شي رح ينزل رح نضيفه لهي الرسالة، بالتوفيق ولا تنسونا من صالِح الدعاء 🤍🍃 .

#Med_Help 🤍✨️
@MedHelpForPreYears

ورجعنا لــ Pre_11 بمنشور جديد 👀🌸🍃

مع الطالبة المتميّزة دومًا "جودي الواع" وتجربتها في السنة التحضيريّة، وهي من طلّاب Pre_9 ، بمعدّل فرز 92.56 🔥 .

👈🏻 رابط المنشور ❤️‍🔥 .

قراءة ممتعة، وبالتوفيق يا ربّ 🌸🍃 .

#Med_Help 🤍✨️
@MedHelpForPreYears

نداااء إلى Pre_11 📢

إليكم مثبتة منشورات السلسلة التعريفيّة بالسنة التحضيريّة التي تمّ نشرها لحدّ الآن على غروب الفيس الخاص بالفريق 🤩 :

💭 تعريف بفريق MED HELP وماذا سيقدّم لكم في هذه الرحلة.

💭 تعريف ولمحة عن السنة التحضيريّة وأنسب وقت للبدء.

💭 تجارب طلّاب متفوقين خاضوا الرحلة من قبلكم:

🪻 تجربة الطالبة "لين خضير"بمعدّل فرز 90.69 🔥.
🪻تجربة الطالبة "جودي الواع" بمعدّل فرز 92.56 🔥.
🪻تجربة الطالبة "بُشرى نقرَش" بمعدّل فرز 92.15 🔥.
🪻تجربة الطالب "زين الدين الحوري" بمعدّل فرز 94.09 🔥.
🪻تجربة الطالب "زاهر الغريب" بمعدّل فرز 90.05 🔥 .

💭 حديث عن معدّل الفرز، ومعدل التحضيريّة كَكُل، والعملي.

💭 مرحلة المفاضلة وما بعدها.

💭 حديث عن دوام العملي والنظري والحضور.

💭 بوستات التعريف بالمواد:

🔬 مادّة البيولوجيا 🔬

🩻 مادّة الفيزياء 🩻

🧪 مادّة الكيمياء 🧪

🗽 اللغة والتاريخ 📜

💭 الفرق بين طريقة دراسة التحضيرية والباك: 1 و 2.
🪴 خطّة النشر يلي عم نمشي عليها.

⚠️ ستتم إضافة جميع بوستات السلسلة إلى هذه الرسالة عند نشرها بإذن الله 🌸🍃 .

بالتوفيق ولا تنسَونا من صالِح الدعاء 🤍🍃 .

#Med_Help 🤍✨️
@MedHelpForPreYears

سلامٌ عليكم جميعًا سكّان قناة ميد هيلـ🤍ـب.

ضعتوا بمنشورات القناة 🫨🍃

معكم حقّ، لأن عم ننشر لــ Pre_10 وَ Pre_11 🔥 .

↩️ لذلك 🌿 :

🫧 منشورات Pre_10 للتعريف عن الكليّات ما بعد الفرز 👈🏻 عم ينضافوا لهذه المثبتة.

🫧 منشورات Pre_11 والسلسلة التعريفيّة عن السنة التحضيريّة 👈🏻 عم ينضافوا لهذه المثبتة.

وهيك ما عد نضيع إن شاء الله 🤗🍃 .
بالتوفيق جميعًا والله يخترلكم الخير 🌸🍃 .
ولا تنسونا من طِيب الدعاء 🤲🏻🤍🍃 .

#Med_Help 🤍✨️
@MedHelpForPreYears

والآن حان الوقت لنحكي عن كليّة الطبّ البشري في جامعة اللاذقية 🤗🔥:

🫧 البوست الأوّل.
🫧 البوست الثاني.

#Med_Help 🤍✨
@MedHelpForPreYears