🎉بالنسبة للتشريح
حكينا بهاد البوست عن قناة تشريح شوية حكي عن هالقناة بس :
https://t.me/Ah_Med_Anatomy
■القناة هي للدكتور أحمد فواز الله يجزيه الخير لح تلاقي فيها :
● فيديوهات شرح لمقرر الرأس و العنق و الأطراف 3D
● لح يكون فيها برنامج للتشريح لدراسة التشريح خلال الفصل و تقسيمه و هالقصص إن شاء الله
● + لا ننسى الملفات يلي لح تساعدكم و الملاحظات و التجميعات يلي لح تسهل عليكم شغلات منيح باذن الله

هي أكتر من هيك دلال لجماعة البشري ما في
انطرونا ببوست عن جامعة تشرين اليوم إن شاء الله

#MED_HELP
@MedHelpForPreYears

يعطيكم العافية بري 9 الأكابر

رح نحكي هالمرة عن
«الطب البشري جامعة تشرين»


سكن / مواد / دراسة المقررات وتقسيمهم / دوام النظري والعملي وما إلى ذلك ..


🏠 بالنسبة للسكن والطلاب اللي هتسجل من غير محافظة :
بدايةً في تطبيق للتسجيل عالسكن لازم يكون موجود عندكم أغلب الإجراءات بتعملوها عليه
غالباً وقت تطلع نتيجة الفرز رح يكون السكن امتلى وما عاد في اماكن بالوحدات المخصصة لطلاب البشري
بتنحطوا بغرف الزوائد أو الشواغر و ممكن تنحطوا بوحدات التمريض
+ إذا كان الكم حدا بتعرفوه بالسكن ممكن تنقلو على غرفته
غالباً أقل عدد ممكن يكون موجود بغرفة وحدة هو ٤ طلاب 🤓
ممكن يكون في اختلاف بالأعداد على حسب اذا الأشخاص اللي اخدو السكن عم يستخدموه دائماً ولا هو مجرد يوم اللي بينزلوا ليداومو وبيطلعوا يعني ممكن يكون العدد أقل
طبعاً ممكن الطلاب اللي معك بالغرفة ما يكونوا بشري
فالأفضل وكنصيحة حقها دهب 😂
تتفقوا مع مجموعة من رفقاتكن وتاخدو غرفة الكم وحدة بحيث كلكم بشري رح تنزلوا تداومو يوم واحد بالعملي وحتى جو الدراسة بالغرفة رح يفرق كتير 👀

ثانياً النظري وتقسيم المواد:
كل فصل ٧ مواد ٤ منهم الهم عملي وما تبقى هنن مواد نظرية بحت

بالنسبة للفصل الأول:

تشريح أطراف 💪
نسج عام 🧫
جنين عام وخاص 👶
كيمياء حيوية ١ 🧪
مصطلحات طبية ١🆎
ثقافة 📓
عربي 📕
رح احكي عن كل مادة بشكل مختصر..

تشريح الأطراف:

أحلى مادة بهالفصل مادة ممتعة جداً إذا عرفتوا تدرسوها بشكل صحيح

■دكاترة المقرر: د.بشر شميس "طرف علوي" و د.علي حسن "طرف سفلي" ممكن دكاترة تانية تعطي معهم محاضرات سريريات واللي هنن ١٠٠٪ معتمدين على فهم الطبيعي بدايةً فما فيهم أي مشاكل
■مصادر الدراسة : محاضرات الدكاترة الرسمية / محاضرات الفرق
"بالفصل التاني الدكتور بشر لغى كل محاضرات الفرق لتشريح الجذع واعتمد على الكتاب الجامعي طبعاً هو كتاب قديم ولكن الدراسة منه عادية وسهلة متلها متل المحاضرات "
فربما يصير هيك بالفصل الأول معكم فلا تهلعوا كلشي لازمكم إلى جانب الكتاب هو أطلس التشريح واللي بدونه دراستكن ولا شي حرفياً

النسج العام:

مادة لطيفة
■دكتورة المادة: د.غصون حمود، أنصح بحضور محاضرات النظري شرحها وتعاملها رائع ورح تستمتعوا بالمادة ممكن يعطي معها دكتور وممكن لاء ما حدا بيعرف لسا
■مصادر دراسة المادة :محاضرات رسمية / محاضرات الفرق
رح تشوفوا انو محاضرات الدكتورة تنسيقهم لذيذ وفيهم صور لتوضيح الفقرات وبيندرس منهم برياحة

الجنين العام والخاص:

"هي المادة كانت مادة فصل تاني ولكن عوقت بري ٨ اللي دخلوا بشري انقلبت لمادة فصل أول بالتبادل مع علم النفس وهاد كان أفضل للطلاب طبعاً الفصل التاني دسم أكتر وهي المادة دسمة نوعاً ما "
■دكاترة المقرر: الدكتورتين فلورا "الجنين العام" و روميا "الجنين الخاص" ممكن يقلبوا المقررات بين بعض ويتبادلوا اعطاء الأقسام
المادة بدها دراسة خلال الفصل وبدها إلمام مادة غريبة وجديدة علينا
-أنصح بحضور النظري ل د.فلورا بتعرض فيديوهات أنميشين قصيرة خلال المحاضرة جداً جداً مفيدين بالإضافة لشرحها الرائع
■مصادر الدراسة : محاضرات رسمية / محاضرات فرق

الكيمياء الحيوية١ :

■دكاترة المقرر: المادة بتنقسم لجزأين جزء فهمي وبيعطيه د.فيصل رضوان وجزء بصمي نوعاً ما بيعطيه د.عماد خياط
طبعاً المادة لا تُترك لأسبوعها ولازم تندرس خلال الفصل وخصوصاً القسم الفهمي طويل ودسم وبده متابعة
الدكتورين حضور النظري لإلهم جداً مفيد
وصحيح قسم د.عماد بصمي ولكن الدكتور ومحاضراته فعلاً بتخليكم رايقين لأنه الدكتور رايق وظريف جداً
■مصادر الدراسة : رسميات الدكاترة/ محاضرات فرق

مصطلحات طبية ١ :

أبداً مانها انجليزي بقواعد هي عبارة عن مصطلحات وتعريفاتهم بالانجليزي متل ما تعودنا نحفظ ڤوكاب قبل
أول ٣ محاضرات من المادة أهم من حياتكم هي بتحكي عن القواعد اللي بنشكل فيها هالمصطلحات وكتير كتير كتير في أسئلة عليهم فضروري كتير أننا نأتقنهم

ثقافة:

مادة موحدة بين أكتر من كلية بتندرس كتاب وبتندرس ملخصات للمزنوق والاتنين بجيبوا ٩٠ ات فلا تفكروا فيها

عربي:

المادة كانت تحريري ولكن عدور بري٨ صارت أتمتة
لا تستهونوا فيها ممكن تضيعلكم علامات فادرسوها كويس
■مصدر الدراسة: بينزل نوطة رسمية للدكتور بتدرسوا منها

مواد الفصل التاني :

تشريح الجذع 🩻
نسج خاص 🔬
فيزيولوجيا 🫁
كيمياء حيوية ٢ ⚗️
مصطلحات طبية ٢ 🆎
مهارات تواصل 🗣
علم نفس 🧠

تشريح الجذع:

■الدكاترة نفسهم
المادة سهلة وسلسة وعلى نفس مبدأ الفصل ١ بلا أطلس أنت ولا شي
الدكتور لغىٰ محاضرات الفرق متل مو ذكرتلكم وطالب بكتاب المقرر ودراسته عادية مانها مستحيلة هو سردي وشكله رواية أكيد بس انتوا بدكم تدعموه بصور أطلس وكلشي بكون تمام
#MED_HELP
@MedHelpForPreYears

النسج الخاص:

بعد ما تعلمنا بالفصل الأول صفات كل نسيج بالتفصيل رح نجي بالفصل التاني ناخد أجهزة معينة من الجسم وندرس الطبقات النسجية المكونة منها
■الدكاترة نفسهم بالإضافة للدكتور بسام صارم كان أول مرة بيعطي هالسنة لبري٨ واسألته بدها تدقيق ودراسة مركزة لقسمه فانتبهوا على هالملاحظة

■مصادر الدراسة: رسميات الدكاترة/ محاضرات الفرق
"وجب التنويه أنه محاضرات الدكاترة الدراسة منها جداً سلسة ومريحة"

الفيزيولوجيا السوية والمرضية:

حبيبة الملايين، مادة محور الكون للفصل التاني بجانب الكيمياء مادة ضخمة بدها دراسة خلال الفصل وفهم عمييييق وتركيز
■دكاترة المقرر: د.زينب ياسين ود.عقيل حجوز
قسم الدكتور عقيل بصمي نوعاً ما فيه محاضرات القلب لازمهم فهم
قسم الدكتورة هو الأكبر وهو اللي لازمه دراسة معمقة خلال الفصل وحضور نظري الدكتورة لأنها فعلاً بتشرح من كل قلبها وشرحها رائع رائع
■مصادر الدراسة: رسميات الدكاترة / محاضرات الفرق

الكيمياء الحيوية٢:

■الدكاترة نفسهم
المادة للوهلة الأولى صعبة ولكن صدقاً هي أسهل من كيمياء١ حلوة وبدها فهم وعلى نفس المبدأ قسم الدكتور عماد بصمي وقسم الدكتور فيصل فهمي ولا يخلو الأمر من التداخل بالقسمين، وأكيد بدها دراسة خلال الفصل
■مصادر الدراسة: رسميات/ محاضرات فرق

مصطلحات طبية٢:

على نفس مبدأ مصطلحات١ بس هون ما عاد في قواعد تشكيل مصطلحات ولكن بيجي منها بالامتحان اسئلة فلازم تكونا مأتقنينها من الفصل الأول وفيكم ترجعولها بوقت دراستكم

مهارات التواصل:

■للدكتورة سوسن غزال
أكتر مادة رح تنبسطوا وأنتوا بتحضرولها وأنتوا بتدرسوها مادة جميلة سهلة ومادة ١٠٠ فعلاً، بتتعلموا فيها كيفية التعامل مع المرضى ولغة الجسد وشغلات تانية كتير رح تعجبكم
أكيد حضور النظري مهم للفهم المادة مانها بصمية بحت والحضور فعلاً كتير مفيد الدكتورة بتعمل فعاليات خلال المحاضرة وأسئلة للطلاب لتشرح الفقرة فالشرح تفاعلي جداً، لازم تحضروا 👀

علم النفس:

مادة بصمية بتعطيها الدكتورة عبير زيزفون المادة ١٠٠ كمان وأسئلة الدكتورة دقيقة ركزوا دراستكم فيها

■بالنسبة لحضور النظري
فهو مو إجباري ولكن جرت العادة الدكتورة غصون و الدكتورة سوسن ياخدو حضور


بالنسبة للعملي:

عملي الفصل الاول :

تشريح الاطراف: بناخد العملي على مجسمات او على سلايدات
بينقسم العملي لمذاكرة وامتحان بتعملوهم بنفس اليوم
المذاكرة غالباً بتكون من مقررات العملي او بتُطالبوا بمحاضرات النظري اللي بتوافق العملي
والامتحان سلايدات بتنعرض قدامكم بالمدرج على شاشة إسقاط كل سلايد ٢٠ ثانية مطلوب منكم تعرفوه

النسج العام: العملي على المجاهر وفي قسم نظري كمان
بداية بتاخدو المحاضرة على جهاز الاسقاط مع السلايدات وبعدها بتشوفوا المحضرات عالمجاهر ضروري نركز كيف بقدر ميّز المحضر هالشي بفيدكم بالامتحان
العملي مذاكرة وامتحان كمان بينعملوا بنفس اليوم
المذاكرة أسئلة نظرية من مقررات العملي
والامتحان هو ورق مطبوع عليه صور للنسيج غالباً ٣ بكونوا بظرف مع سؤال أو سؤالين نظري

الجنين الخاص والعام: العملي كله نظري تقريباً مافي شي نشوفه ونشتغله بايدينا يعني، كمان مذاكرة وامتحان بنفس اليوم اسئلة نظرية من مقررات العملي وبكون في رسمات مطلوبين طبعاً

كيمياء١: شغلنا بالمخابر أغلب الشغل عملي في شوية نظري بمقرر العملي مطلوب من أسماء المواد والمشعرات وهكذا
المعيدة بتعطينا فكرة عن كيفية القيام بالتجربة مع الطريقة وبتعطينا رانج معين لازم يطلع فيه الحسابات تبعنا، بنشتغل بمجموعات بتقسمهم المعيدة بأول جلسة للعملي
المذاكرة والامتحان سوا وكله أسئلة نظرية من مقررات العملي

عملي الفصل التاني:

تشريح الجذع: على نفس مبدأ تشريح الأطراف تماماً

النسج الخاص: كمان نفس مبدأ النسج العام بس الامتحان هون مو صور وانما عالمجاهر بتقعدوا وبينعطالكم ٣ شرائح ولازم تعرفوا العضو وتشرحوا مميزاته

الفيزيولوجيا: العملي جزأين نظري مقررات العملي وتجارب بتعملوهم بالمخبر على حالكم😂
المذاكرة والامتحان سوا كلهم اسئلة نظري من مقررات العملي وممكن تطالبوا بمحاضرات النظري "متل ما صار مع بري٨" 💔

كيمياء ٢: نفس مبدأ كيمياء ١ تماماً

دوام العملي

بكون بيوم واحد بالأسبوع هو بينزل التقسيم هيك جاهز ممكن عدد من الطلاب يحكم دوامهم يومين بالأسبوع بيقدروا ينقلوا عيوم واحد بوجود بديل حصراً

■طبعاً الحضور إجباري الغياب لأكتر من ٣ مرات بينحرم نظري والرسوب بالعملي نفس الشي
لا تهملوا العملي هون بقي داخل بالمعدل 🤭

طبعاً مصادر دراسة العملي هنن نوط رسمية للدكاترة بتنزل بمركز تصوير الكلية
في كمان محاضرات بتنزلهم الفرق
#MED_HELP
@MedHelpForPreYears

بالنسبة للعلامات

نظري أو عملي فصدورهم سريع يعني بتخلص امتحان فصل اول ٧ مواد بكون طالع ٦ وانت بتقدم اخر مادة 😂
ممكن يصير ضرب أو أخطاء بالسلم بينزل بوست اعتراض وقت بينزل السلم بتكتبوا فيه الأسئلة وحلها الصحيح مع الدليل من الرسمية وبينرفعوا الاعتراضات للدكاترة وبعدها الدكتور بوافق أو بيرفض على حسب صحة الدليل وشرحه خلال المحاضرة ..

■رح احكي كم كلمة عن المصادر غير الرسمية يلي هي الفرق

👈عنا ٣ فرق أساسية : أربسيز / كيو QRS / ودريم
أكيد في منكم مجرب يدرس محاضرات لحدا منهم بالتحضيرية ممكن يكون ارتاح معهم وعلى طريقة تنسيقهم
ولكن ننوه أنو الرسميات هي الأساس

هاد كلشي لازم تعرفوه عن الكلية أي سؤال نحنا بالخدمة ❤️
لا تنسونا من صالح دعائكم✨

#MED_HELP
@MedHelpForPreYears

السلام عليكم ورحمة الله وبركاته💫
طابت أوقاتكم يا أصحاب

هذا البوست مخصص للحديث عن

كلية الطب البشري في جامعة حماة

💥الإيجابيات:

🌸أولاً:
حماة معروفة ب المعدلات و العلامات العالية .. لكن بنفس الوقت بدك تتعب لحتى تحصل هي العلامات العالية .. مافي شي بيجي ببلاش .. لكن ليس مثل تعب باقي الجامعات

🌸ثانياً:
البعض بيقول انو مقررات حماة ناقصة كتير و الأطباء عم يتخرجوا منها ما بيعرفوا شي .. لكن بالحقيقة يلي بيدرس مقرراتها و بيقارن مع الجامعات الثانية بيلاقي انو هالحكي غير صحيح .. لأن المواد الطبية يلي بتفيدك بحياتك العملية مقرراتها مثل مقررات دمشق و حلب و أحياناً زيادة ببعض المواد مثل التشريح و الفيزيولوجيا و الكيمياء الحيوية و السريرية و مواد الجراحة و الداخليات بالسنة الرابعة.. بس المواد يلي ما الها فائدة عملية قيّمة مثل الثقافة و علم النفس و مهارات التواصل و النسج و ... إلخ ، فهي المواد مقرراتها سهلة جداً و هون بتصير لعبة المعدل .. بهي المواد الكل بيجيب علامات عالية و بيحسّنوا معدلهن

و على كل الأحوال، أنا أنصح كل طالب عم يدرس بحماة أو طرطوس أو حمص أو أي جامعة و ما عم يفهم على دكتور مادتو بنصحو يحضر
شرح دكاترة دمشق و دكاترة مصر و الدكاترة. الإنكليزيين عاليوتيوب ..
كلو متوفر عاليوتيوب بشكل مجاني
مثل
●الدكتور بيان السيد تشريح
●الدكتور ناجي اسكندر فيزيولوجيا
●الدكتورة إيمان نبيل و الدكتور خالد مسالمي نسج
●نينجا نيرد لأغلب المواد و .... إلخ
(بالتعليقات رح اتركلكن كل المصادر الممتازة للسنة الثانية المتوفرة عاليوتيوب)

الحضور و هل أنا ملزم به أم لا ؟

💥الحضور العملي :
أكيد ملزم انك تحضرو و بكل الجامعات هيك ..
💥 الحضور النظري:
مانك ملزم تحضر و ماحدا بياخد تفقد إلا بالنادر .. بس عندك بمادة الفيزيولوجيا الدكاترة بيحاسبوا عحضور النظري و أحياناً بيروّحوا علامات ليلي ما بيحضر و أحياناً لا
و الصراحة إذا كان بيتك بالريف فما بنصحك تحضر نظري لأن مصادر اليوتيوب كافية و زيادة .. و خاصة المواصلات بين الريف و المدينة صعبة شوي و مزدحمة عنا بحماة

العملي بحماة

ممتاز و متوفر فيها جثث و أعداد الفئات قليلة .. و المواد العملية الأخرى كلها كويسة و متوفر فيها كل الأدوات اللازمة (مع بعض التقصير البسيط بتوفير الأدوات لكن محتمل)

💥السلبيات:

🌸أولاً :
سلبية حماة بانو أكثر المواد حضور النظري فيها ما بيفيد كتير .. ف بدك تضطر تحضر شرح اليوتيوب

🌸ثانياً:
يلي ساكن بالريف مشكلة المواصلات بشكل رئيسي هي العائق الأكبر بطريقو .. و ذلك بكل الأرياف

🌸ثالثاً:
السكن الجامعي بحماة سيء جداً و ماحدا بيسكن فيه غير المضطر (بس سكن البنات أفضل من سكن الشباب نوعاً ما)
أغلب المغتربين بيستأجروا بيوت .. و آجارات البيوت ما غالية كتير بحماة

🌸رابعاً:
للأسف لسا كلية الطب البشري قيد البناء و ما جهزت لكن عم يشتغلوا فيها
فنحن مندوام بكلية التمريض ببناء مشترك مع طلاب كلية التمريض و مدرسة التمريض و أحياناً ببعض الفصول بيكون عندك يوم بالأسبوع دوامو بكلية الطب البيطري

#MED_HELP
@MedHelpForPreYears

وهي مثبتة مشان يلي مأجل قراءة البوستات و لسهولة الوصول لكافة البوستات التعريفية يلي نزلت عن الكليات 🥰

🔵كلية الطب البشري :

     🟣جامعة دمشق:

🥼البوست التعريفي عن بشري دمشق الجزء الأول.
🥼البوست التعريفي عن بشري دمشق الجزء الثاني.


     🟣جامعة تشرين:

🥼البوست التعريفي عن بشري تشرين الجزء الأول.
🥼البوست التعريفي عن بشري تشرين الجزء الثاني.
🥼البوست التعريفي عن بشري تشرين الجزء الثالث.

     🟣جامعة حماة :

🥼البوست التعريفي عن بشري حماة .

🟣جامعة حلب :

🥼البوست التعريفي عن بشري حلب .


🟣جامعة البعث :

🥼البوست التعريفي عن بشري البعث .

🔵كلية طب الأسنان:

🟣جامعة دمشق:

🦷البوست التعريفي عن طب الأسنان دمشق.


🔵كلية الصيدلة:

🟣جامعة دمشق:

💊البوست التعريفي عن صيدلة دمشق الجزء الأول .
💊البوست التعريفي عن صيدلة دمشق الجزء الثاني.


🟣جامعة تشرين:

💊البوست التعريفي عن صيدلة تشرين الجزء الأول.
💊البوست التعريفي عن صيدلة تشرين الجزء الثاني.
💊البوست التعريفي عن صيدلة تشرين الجزء الثالث.

وكلشي رح ينزل رح نضيفه للرسالة بإذن الله
لا تنسونا من صالح دعائكم ❤️✨️

#Med_Help 💙✨️
@MedHelpForPreYears

يعطيكم العافية
عودة قريبة 😌🔥
الكثير من الكلام الممتع والمفيد عن
     «طب الأسنان في جامعة دمشق»

وتحديداً عن السنة الثانية 😎
مواد السنة الثانية ١٦ مادة تتوزع على ٨ مواد بكل فصل
خلونا نحكي عن الفصل الأول مبدئياً 😁
ما ح نعجقكم دغري

مواد الفصل الأول يا سادة :

المواد الطبية ٥ مواد :
(تشريح ونحت ورسم أسنان «هي مادة وحدة😉» + نسج عام + فيزيولوجيا الفم + تشريح رأس وعنق + مواد سنية1 )

والباقي بتحسوهم ملحقات لطيفة ظريفة:
لغة عربية + انكليزي3 + الثقافة

منعرف انكم بتحبوا تعرفوا عن المواد الدسمة أول
لذلك ح نبدأ فيهم
وبدايةً مع المادة يلي فرّشت تلت الدفعة الماضية (بيني وبينكم يعني ال60ات كانت فيها معدل 🤧)

تشريح ونحت ورسم الأسنان :

تنقسم علامتها بين :
●60 نظري
●40 عملي
العملي تبعها ح تلاقوه جداً ممتع إذا عندكم شوية ميول فنية
بتبدؤوا برسم الأسنان من خمس جهات (دهليزي، لساني، أنسي، وحشي، قاطع أو طاحن) شغلتها سهلة لو ما بتعرفوا ترسموا لا تخافوا 😌
بعدييين بتبلشوا بنحت الأسنان
حيث الفن والرواق والجمال عنجد
ح تنحتوا كتيير ثنايا وتكبوا صابون كتير ليزبط لا تيأسوا ح تحاولوا كتير لكن ح يطلع معكم نتائج حلوة بإذن الله
وآخر شي لوحة تقطيع الأسنان ح تقطعوا أسنان طبيعية مقاطع أنسي وحشي، دهليزي لساني، ومقطع عرضي

النظري تبعها : ضخم لذلك ننصح بشدة تدرسوها خلال الفصل

يلا حاجة منروح عالمادة يلي بعدها

المواد السنية 1 :

تنقسم علامتها بين:
●60 نظري
●40 عملي
مادة رايقة وجميلة
عن المواد السنية المستخدمة للحشوات أو التبطين أو كحشوة قاعدية والكثير
العملي المتميز برائحة القرنفل
علمياً (اوكسيد الزنك والأوجينول) الحشوة المؤقتة ما غيرها 🙃
ح تعملوا بقبضتكم المعوجة حفرة مستطيلة غالباً وتمزجوا المواد وتحشوا الحفرة
قمة الرواق يعني 🔥
ح تتعرفوا على كتير مواد سنية
كل وحدة تركيبها استعمالاتها ميزاتها وسلبياتها وزمن مزجها وطريقته وزمن تصلبها وكتير أشياء
مذاكرة العملي تحريري وامتحان العملي غالباً مقابلة
النظري لا بأس فيه وبده شغل وحضور هي المادة مفيد (بمقابلة العملي أو الامتحان)
يلا يلي بعدها

تشريح رأس وعنق :

تنقسم علامتها بين :
●70 نظري
●30 عملي
العملي الذي يتميز بالسلايدات فقط
شبَه تبع التحضيرية يا عيني عليك
والمذاكرة والامتحان نفس الترتيب إلا انه منتعمق بالرأس والعنق تحديداً كثيراً
والنظري بده شغل من تخيل وتطبيق 3D
المحاضرات عظام الرأس والعنق والعضلات والأعصاب والتروية الدموية والكثير وأهم محاضرة عمّ جميع أطباء الأسنان عصب مثلث التوائم العصب القحفي الخامس V (بوقتها بتعرفوا ليش .. ما ح قلكم 😎)
يلي بعدو

النسج العام :

تنقسم علامتها بين :
●70 نظري
●30 عملي
مادة المجهر والرسم
منحكي فيها عن أنواع الأنسجة في الجسم بشكل عام
العملي مجاهر والمذاكرة والامتحان مجاهر برضو نفس ترتيب البيولوجيا بالتحضيرية ما حلكم تنسوه 🥲
النظري جميل وعلى وقتنا كانت مادة معدل لكن هذا لا يمنع انها كثيفة وحاولوا تمرقوا قد ما بتقدروا منها خلال الفصل
خدوا نفس لنكمل الباقي 😮

فيزيولوجيا الفم :

●مادة ما لها عملي وإنما 100% نظري
مادة تقيلة دم لكن خدوها بروح رياضية وصبر ونفَس عميق
المادة بتفيدنا بطب أسنان
بتحكي عن العضلات الماضغة والمفصل الفكي الصدغي وإفراز اللعاب والألم والكثير
عنجد مرقوا منها خلال الفصل
زنقة أسبوعها لا تُنسى لذلك اسمعوا مني
يلا هانت ح نخلص باقي المواد شغلتهم فراطة إن شاء الله 🫡
وكلهم 100% نظري فقط

اللغة العربية :

المادة الجميلة الممتعة
مادة المعدل ويلي ممكن تلحق باليومين يلي قبلها
لكن لا ما بيعني ما تدرسوا منها خلال الفصل (حسب الهمة والنردنة والحماس)

اللغة الانجليزية :

جميلة ومعدل وفي اعتماد لا بأس فيه عالمستوى باللغة لكن الاعتماد الغالب عالدراسة
بتلحق بأيامها حسب تجارب الأسبقين

الثقافة :

مادة معدل لمن يبصمها بجدارة
بدها حفظ وتكرار كتير وبصم تواريخ

وأخييييراًاا خلصنا يا رفاق 😌
كيف هالجولة الجميلة
عقبال ما تعيشوها بجمالها وحلاوتها وصعوباتها (اي نعم في صعوبات بكل شيء في الحياة في صعوبات)
بس لما نركّز عأهدافنا و نتوكّل ع ربّ العالمين بهون الطريق قدامنا
موفّقين جميعًا 🌸

#Med_Help 💙✨️
@MedHelpForPreYears

🔴#خبر | #Med_Help

ترتيب طلاب السنة التحضيرية الدفعة التاسعة

وزارة التعليم العالي تصدر ترتيب طلاب السنة التحضيرية الدفعة التاسعة على مستوى الجمهورية العربية السورية


#Med_Help 💙✨️
@MedHelpForPreYears

الطب البشري - جامعة حلب

يعطيكن العافية ، إجا دور حلب لك خيووو😁
منبلش؟🔥 يالله 🏃‍♂

مواد الفصل الأول :

نسج عام - تشريح 1 - كيمياء حيوية - انجليزي 3 - علم الجنين الطبي - علم النفس - الثقافة
العملي : نسج عام - تشريح 1 - كيمياء حيوية - علم الجنين الطبي

رح نحكي عن دوام العملي لان شي مهم تعرفو

🔴العملي اول شي : 4 ايام دوام للاسف😔
نقل فئات تبديل الخ... مستحيل الا باستخدام فيتامين واااو ...😎
يعني رح تداوم اربع ايام اجباري
ويوم عطلة غير الجمعة والسبت🤩 ،
يعني ما بتحسن تنزل عاهلك الا بايام العطل الرسمية وعطلة مابين الفصلين وما بين السنتين لو كنت طالب محافظات .
بخصوص العلامات، بالنسبة الي وكم رفيق الي حسينا فيه تكسير علامات بالتشريح والجنين بس فيه طلاب كثير بتقول فيه تكسير علامات شوي، فيه حظ كثير بعلامات العملي ناس بتجيب متل ما حاسبي وناس بتنظلم بالعلامات .

🔴 اما النظري :

☠ التشريح :

من اصعب مواد الفصل ومو متل التحضيرية ابداً، بتحكي عن رأس وعنق + والأطراف

◾️النظري مستلمها دكتورين:
1-دكتور هاني مستلم الاطراف، اله الدكتور 40 سؤال وهدول مضمونات بالجيبة 🔥
برأيي الحضور اذا حضرت بتفهم وكمان اذا ما حضرت عادي بتفهمن لحالك لان قسمه سهل.
2- الدكتور ناظم مهروسة ومن اسمه بحب يهرس الطلاب ☺️ الحضور عنده صعب تفهم بس بدك تحضر من شان كلامه لان كل سنة غير
لا تعتمد عمراجع لان هو اله مرجعه الخاص

◽️بالنسبة لعملي المادة : كان مستلمه ناظم وكانت العلامات 20ات والي بجيب فوق اسطورة بكون، ولكن هالسنة غالبا99% يتغير
واذا تغير احمدو الله لان العملي كان جداااا صعب لان الجثث مفحمة😇 ورح يكون دكتور غيره اسمه احمد غزال الدكتور كتير كويس وبيهتم بالحالات السريرية فشي تدرس المادة بتسكر العملي معه🔥 (وبتكونوا الدفعة المحظوظة)
طب وين صعوبة المادة اذا قسم هاني مضمون 40وعملي رح يصير مضمون30???

هو قبل كان لهاني 40مضمونين ولناظم 60 30عملي و30نظري وهنن المصيبة هلق غير صار لناظم 30🤓 مصدر ورقي:نوط الفا

🧪🧑‍🔬الكيميا الحيوية :

◾️النظري: مادة معدل😉 والدكتور كتير منيح ومع الطالب بكل معنى الكلمة ، المقرر سهل الدكتور اله نوطته الخاصة ،الحضور بدك تحضر بتفهم وبتتسلى والحضور ممتع، وبدك ما بتحضر وبتدرس لحالك بتفهم المادة سلسة ،والاسئلة بتجي مكررة.

◽️بالنسبة للعملي: العملي ادرس بتجيب في30بس مو كتير الاغلب +20

👼الجنين :

◾️النظري : المادة مستلمها 3 دكاترة😁:

1- الدكتور حمدي: مستلم القسم العام من المادة كاملاً بنصحك تحضر الدكتور بحببك بالمادة 😍ومافي اجمل من إعطائه وخصوصا بيحكيلك حالات من عمله ومنها مضحكة😁😂 + ببهدل الطلاب كتييير واغلب الطلاب بتحب البهاديل 🤣🤦‍♂️، الدكتور بجيب من كلامه فلازم تحضر وتدرس لتضمن قسمه ،قسمه 15 سؤال.
مصدر ورقي: نوطة الدكتور

2-الدكتور طوني: الدكتور مستلم القسم الخاص، ما بنصحك تحضر لكن جرب قسمه شي 30 سؤال وهو بصممممم ارقام وايام واسابيع😴 بدك تبصم لتحل صح 💯
مصدر ورقي نوطة الدكتور

3-الدكتور محمد مرجان: هو نفسه عميد الكلية،
بيعطي قسم من الخاص مع الدكتور طوني،
جرب تحضر ،اسئلته احسن شي 🤩 ،ومقرره اسهل شي 😆 بجيب 15 سؤال ومضمونين ، مصدر ورقي نوطة الفا

مصادر مساعدة للمادة
القناة← https://t.me/Emberology7

◽️العملي :للاسف رغم جمال المخبر الي يعد الـ1 عمستوى الوطن العربي من حيث توفر عينات حقيقية إلا انه صعب تجيب علامات فيه
النوطة عبارة عن 50ص للعملي ولكن الاسئلة بتكون خط متل راشيتة الصيدلة فتدربو من هلق 🤣😃 عقراءة خط الدكاترة وهالشي مقصود لتمتلك سرعة البديهة 😇☺️
مصادر مساعدة بنفس القناة فوق

🧑‍⚕علم النفس :

بتحكي عن السلوك الانساني🧍‍♂🧍 الدكتور جديد اول سنة السنة الماضية بيعطي والمقرر جديد وهو نوطته، الحضور مهم لانه بجيب من كلامه😄، مادة تعتبر معدل ببقية الجامعات ولكن بحلب ممكن يكسر السلم الدكتور او سلمه غير النوطة للاسف 😒 متوسط العلامات هالسنة80 وفي شوية 90

🔠 الانكليزي:

مادة معدل متل الحيوية 😉 كمان وكثير سهلة وممتعة واسهل من التحضيرية مابدها حضور معروفة المادة بكل الجامعات معدل بتحكي عن مصطلحات طبية والخ...فيها اسئلة مكررة ودورات، المقرر 23وحدة

وهلق اجينااا نعملكن عصف ذهني🤣 🤓

الثقافة:

وطنية البشري بتذكرك بوطنية الباك بس هون اسهل والاسئلة اتمتة ،بتحكي عن تاريخ سوريا وفلسطين🔥كمان كثير سهلة وبتنجاب معدل بتدرسو الدورات حصرا من هون

🦠النسج العام :

◼️النظري :المادة بدها شغل وحفظ منيح وزنخة شوي، مستلمها دكتورين:
1- الدكتور هيثم: مستلم اغلب القسم واسئلته سهله ومقرره سلس بيهتم بالانكليزي بالاسئلة وبجيب دورات بالاسئلة.
2-الدكتورة بيان: مقررها حفظ بصم واسئلتها منطقية ... عموما بتنجاب معدل المادة.

◽️العملي: بتدرسو من القناة بصم

دورات جميع المواد عدا الثقافة بتطبيق بيتا

و

بالنسبة للسكن ف انقرني

#MED_HELP
@MedHelpForPreYears

🔴#جامعة_دمشق

نتائج حملة مقرر الإنكليزي 1

#Med_Help 💙✨️
@MedHelpForPreYears

🔴#جامعة_دمشق

نتائج حملة مقرر التاريخ

#Med_Help 💙✨️
@MedHelpForPreYears

🔴#جامعة_دمشق

نتائج حملة مقرر الفيزياء

#Med_Help 💙✨️
@MedHelpForPreYears

🔴#جامعة_دمشق

نتائج حملة مقرر الكيمياء

#Med_Help 💙✨️
@MedHelpForPreYears

🔴#جامعة_دمشق

نتائج حملة مقرر البيولوجيا

#Med_Help 💙✨️
@MedHelpForPreYears

🔴#خبر | #جامعة_دمشق

تم اعلان نتائج المقررات المحمولة من الفصل الاول لمن تقدم اليها من مستجدين السنة التحضيرية للقبول في الكليات الطبية جامعة دمشق .

يتم التقدم للاعتراضات ان وجدت في امتحانات السنة التحضيرية طابق ثاني مبنى الادارة كلية الطب

المشرف العام

#Med_Help 💙✨️
@MedHelpForPreYears

جماعة بري 10🔥🙂
🔴 #عااااااجل || وزارة التربية تحدد موعد إصدار نتائج امتحانات الدورة الثانية من الشهادة الثانوية بفروعها كافة عند الساعة العاشرة من صباح يوم السبت١٧ آب

#MED_HELP
@MedHelpForPreYears

يعطيكم العافية
و هلق صار دور
《 الصيدلة بدمشق 》

1⃣الفصل الاول ٧ مواد (٤ مواد الهن عملي)
2⃣الفصل التاني ٦ مواد (٥ مواد الهن عملي)

🔴مواد الفصل الاول :
عربي
ثقافة
انكلش
حاسوب (الها عملي)
كيميا عضوية (الها عملي)
كيميا فيزيائية (الها عملي )
وصيدلانيات 1. (الها عملي )

اولاً :

*الحاسوب*

●دكتور المادة : ( د.سمير سليمان)
●مصادر الدراسة:اربسيز او سلايدات الدكتور
●الحضور : مفيد الحضور نسبيا بس مو ضروري يعني ما حياثر اذا ما حضرت

دكتور رايق واسئلتو حلوة وسهلة فالوضع رواق ان شاء الله
كعملي مناخد فيها اساسيات الحاسوب واساسيات البرمجة وشغلات بسيطة جدا يعني
وكنظري الشبكات وتطور الحاسوب وهالقصص
واتطمنوا المادة سهلة وممتعة وتعتبر مادة معدل بامتياز!

تانياً:

*العربي*

●دكتور المادة : د. اسراء
●مصادر الدراسة : اربسيز
●الحضور:حسب المستوى

عربي بكل بساطة😁
بس في فكرة انو اسئلة الدكتورة اجت سم حرفيا وفي نسبة منيحة حملوها ويلي ما حملوها فالاغلب كانت العلامات عالحد يعني
لانو وقتها دريت انو في اربسيز وهيك فما جابت شي من المحاضرات 😂

تالتاً:

الانكلش

●دكتور المادة : د . نادرة الفاضل
●مصادر الدراسة :اربسيز
●الحضور :برضو حسب المستوى بس براي مفيد خاصة بموضوع النصوص
واذا ما بدك تحضر فاسمع التسجيلات بوقت المادة

الجديد فيها المصطلحات الطبية وما تبقى متل انجلش التحضيري قواعد ونص ورايتينغ

رابعاً:

الثقافة

مادة موحدة لكل الكليات
(فيكن تسمعو الفويس يلي سجلو الدكتور زاهر بخصوص هالمادة *بدمشق*
اللينك:
https://t.me/c/1693659319/1141534

منجي للمواد الممتعة مواد الصيدلة🔥

خامساً:

*الكيمياء الفيزيائية*

●دكتور المادة: د. ميسم سلامي
●مصادر الدراسة :اربسيز
●الحضور: جدا مفيد بتلاقي حكيها بالفحص
المادة تلت اقسام وهي عبارة عن كيميا وفيزيا مدموجين مع بعض

اول قسم مناخد فيه عن حالات المادة
تاني قسم الحركية وسرعة التفاعل والحفازات ورتب التفاعلات والخ ...
القسم التالت نوعا ما جديد عبارة عن اساليب القياس ونفسن موجودين بالعملي وبالنظري بشكل أوسع واساليب التحليل الكيفي او الكمي للمركبات
متل الانكسار والاستقطاب والامتصاص اللوني وهيك شغلات
هاد القسم بصمي نسبيا بس جميل

المادة ممتعة وفهمية اكتر من بصمية وشبه كبير لكيميا التحضيري خصوصاً اول قسمين وأسئلتها واضحة ورايقة جداً وما فيها اي تعقيد ويلي بيعرف يدرسها صح بتجي معه معدل يعني كان في عنا فيها ٩٥و٩٦ عادي بتجي مو صعبة

سادساً :

*العضوية*

●دكتور المادة : د اياد اللوص
●مصادر الدراسة : اربسيز
●الحضور : حسب يلي منيح بالعضوية مافي داعي براي اما يلي عندو شوي ركاكة فمفيد الحضور والدكتور جيد بالاعطاء
المادة مقسومة عضوية ١ فصل اول، عضوية ٢ فصل تاني
عضوية ١ بتحكي عن الالكانات والالِكنات والالكينات والاغوال وهاليدات الالكيل

المادة نظري وعملي متل ما ذكرنا
العملي جدا ممتع مناخد فيه البلورة وكيف منفصل المواد عن بعضها وهالحكي
النظري متل ما حكينا كيف منسمي الكينات وهالكنات وهيك.. كيف منحصل عليهن...كيف منصنعهن وشو التفاعلات اللي بتصير عليهم وهيك يعني
اسئلة المادة عبارة عن معادلات ونواتج وحفازات ..
ما بتجي اسئلة نظرية الا نااادرا وهي عبارة عن يا تسمية يا عن مصاوغات cis و trans اكتر من هيك نظري ما بيجي
ففي طلاب بتدرسها اكسترا اربسيز بكون فيها بس المعادلات مافيها حكي النظري ابدا ( يلي هو الية التفاعل وهيك شغلات)

سابعاً :

الصيدلانيات1

●دكتور المادة :
د. امل يوسفان
د. هند الزين
●مصادر الدراسة :
د. هند —> اربسيز
د.امل. مانعة اربسيز بتدرس من سلايداتها حصرا
وسلايداتها بالانكليزي
بس اسئلتها بتجي عربي اغلبها وشوية انكليزي
وهي بتاخد رايكم بالسنة انو بدكم الاسئلة انكليزي ولا عربي
●الحضور :
د.هند ما كتير مفيد الحضور
د. امل
دكتورة خارقة حرفيا وبراي الحضور جدا جدا جدا مفيد اولا بحببك بالمادة وبفهمك المادة وبصير القسم البصمي منها اسهل للحفظ
هي محاضرتها بتملل شوي لسبب واحد انو بتعطي فيها معلومات جدا
فالواحد بينعس اخر شي
بس حتاخد معلومات فخمة
فيك تحضر
وبوقت المادة تسمع التسجيلات بتكون امورك لوز

المادة الامتع تقريباً 😁🔥
بتحكي عن الاشكال الصيدلانية للدواء مثلا شراب مسحوق مستحلبات( نوع منها :كريمات) قطرات حثيرات حبوب مضغوطات كبسولات الخ... من اشكال الدواء وكيف منصنع كل وحدة وشو شروط تصنيعها وشو ميزاتها وشو مساوئها

المادة جدا ممتعة لكن بحاجة حفظ منيح
والعملي تبعها نفس الشي ممتع و منحضر فيه وصفات وهالقصص
#Med_Help 💙✨️
@MedHelpForPreYears

القسم الثاني للصيدلة:

مواد الفصل التاني :

كيمياء حيوية 1 (الها عملي)
صيدلانيات 2 (الها عملي)
كيميا عضوية 2 (الها عملي)
كيميا تحليلية 1 (الها عملي)
ال E4
عقاقير 1 (الها عملي)


أولا ً:

ال *E4*

●دكتور المادة : د. نادرة الفاضل
●مصادر الدراسة : اربسيز
●الحضور : نفس وضع E3
اخر انجلش بتاخدوها بسنينكم ، كمان مصطلحات طبية وقواعد ونصوص ورايتينغ بس بشكل خااص عن الامراض النفسية مصطلحاتها ونصوصها

تانياً:

*صيدلانيات2*

●دكتور المادة :د. امل يوسفان
د. انطون اللحام
●مصادر الدراسة: انطون اربسيز
امل نفس وضع صيدلانيات ١
●الحضور : د. انطون بيجي بس ما بيشرح
شي
وبقرر المنهاج وبروح 😂
د. امل برضو نفس وضع صيدلانيات١

كمان بتحكي عن اشكال الدواء بس الاكثر تعقيداً ههالمرة والاكثر دقة بالشغل خلينا نقول
متل الحقن العضلية والوريدية ، القطرات العينية، المعلقات ، الجسيمات الشحمية ، المستحلبات الخ....
كمان مندرس كيف مصنعهم و بأي شروط وهكذا نفس الصيدلانيات ١ بس عم ندرس اشكال جديدة
العملي تبعها شوي مايل للنظري اكتر من الشغل بايدنا
(الاسئلة: د انطون اغلب اسئلته دورات ودوراته مهمة لانو دورات من برا المنهاج في قسم منها
د امل نفس الوضع تبع ال ١ ممكن تجيب شوية انكليزي )

ثالثاً:

*العقاقير*

●دكتور المادة:
د . عصام الشماع
د. لؤي علان
●مصادر الدراسة : د لؤي اربسيز
د عصام نوطة بوزعها عليكم مختصرة شي ٢٥ صفحة ما بيطلع براتها ابدا
●الحضور:ماكتير مفيد
بس د لؤي شوي بجيب من حكيه فاذا صحلكم احضروا او تسجيلات
ود عصام بحب الحضور فاحضروله بس ليرضى عالدفعة ويوزع النوطة ☠️

قسمين المادة
القسم الاول للدكتور عصام مندرس فيها النباتات وفصائلها و وكل نبتة شو بتحوي مواد وشو استخدام كل نبات
القسم التاني للدكتور لؤي عبارة عن تعريف بالمركبات( تانينات وفلافونوئيدات. وسكريات مفردة ومتعددة متجانسة ولا متجانسة وهيك) وكل واحد شو استخدامو وهكذا
العملي فيها سلس وبسيط عبارة عن محضرات نباتات منشوفن تحت المجهر
(الاسئلة: قسم لؤي بيجي في منه سهل وواضح وفي منه بده تركيز وعسنتنا جاب ١٢ سؤال برا المنهاج ☠️ بس مو دائما بيعملها هي
قسم د عصام
كل اسئلته اختر الخطأ بجيب هو ٣٥ سؤال ود لؤي ٣٥)

رابعاً:

*الحيوية*

●دكتور المادة :
د فايزة
د رنوة
●مصادر الدراسة : اربسيز بالقسمين
●الحضور :عند د فايزة مو كتير مهم بس هي بتسجل حضور
د رنوة
مهم جدا جدا جدا جدا جدا برضو جدا 😂
قسمين
قسم الدكتورة فايزة بيحكي عن
الماء وشو فوائدها بالجسم الاستقلاب والوقاءات وهيك حكي فيزيولوجيا يعني
العناصر المعدنية يود حديد زنك الخ ... شو فوائدها ،سبل اطراحها ،شو بحفز امتصاصها وهيك
الاحماض الامينية، عديدات الببتيد، البروتينات والبنى تبعها ،الانزيمات
وشوية تقنيات من تبعات الفصل ٨ وراثة
يعتبر قسم بصمي بحت

القسم التاني للدكتورة رنوة ممتع جدا فهمي وبصمي بيحكي عن الاستقلاب بشكل عام بعدين استقلاب السكاكر بالاخص الغلوكوز بعدين استحداث الغلوكوز بعدها حلقة كريبس والفسفرة التاكسدية لنحول الطاقة وهييك يعني
مخططات الدكتورة كاافية لتفهم محاضرتها تماما لهيك الحضور عندها ضروري

العملي تبع المادة ممتع ممتع جدا 🔥
عبارة عن كيف منكشف عن السكاكر عن الاحماض الامينية ونحددها بتفاعلات كيميائية او بطرق تانية فيزيائية متل الاستشراب وهيك
كيف منحلل دم وكولسترول وكرياتينين والفيتامينات ونستخرج dna الفريز وهالقصص
(الاسئلة: د فايزة اسئلتها واضحة
د رنوة اسئلتها تتطلب الفهم وفهم كل الخطوات يلي عم تصير بكل عملية )


خامساً:

*العضوية*

●دكتور المادة : د اياد اللوص
●مصادر الدراسة :اربسيز
●الحضور :متل عضوية ١

نفس مبدأ عضوية ١ بس لمركبات تانية
فينولات الدهيدات كيتونات حموض كربوكسيلية ومشتقاتها والامينات
العملي تبعها نفس النمط للعضوية ١
الاسئلة تبعها كمان عبارة عن تفاعلات نواتج وحفازات ...
وبشكل عام هي اسهل من عضوية ١

سادساً:

*الكيمياء التحليلية*

●دكتور المادة:
د. جمعة الزهوري
د. فداء عم علي
د. علا
●مصادر الدراسة : اربسيز عدا فداء مانعة اربسيز
●الحضور: مفيد جدا جدا بكل الاقسام بس بالاخص د فداء وعلا
امتع مادة بالفصل التاني 🔥
المادة تلت اقسام علا ٢ فداء ٢
قسم الدكتور جمعة ٧ محاضرات سلس جدا وكلو معروف بيحكي عن المحاليل ، ستكيومترية التفاعل ، التراكيز ، حموض واسس ومخططات الph والمشعرات وطرق المعايرة واخر محاضرة معايرة لامائية
قسم د. علا محاضرتين بيحكو عن الترسيب والتحليل الوزني
قسم د. فداء محاضرتين اكسدة وارجاع ومعقدات
وجزء من النظري موجود كمان بالعملي معايرة وهالقصص
(الاسئلة: د جمعة المعتاد دورات عدا السنة هي غير نمطه ونسبيا ضرب الدفعة نسبة النجاح كانت ٦٠ بالمية وبالسنين قبل كانت توصل لل٩٠
د فداء ود علا بدهم فهم وتحنيك شوي )

ملاحظة اخيرة السنة التانية هي سنة المعدل بامتياز لهيك استغلوها

#Med_Help 💙✨️
@MedHelpForPreYears

مساء الخيرات 💙🌸

نداء هام لكل طالب سنة تحضيرية يبحث عن كتب للتحضيرية 🧐

ولكل طالب Pre_9 والسنوات الأعلى يريد أن يتبرع أو يبيع كتبه 📚.

غروب تبادل الكتب تم تفعيله من جديد 🥳.

⭐️رابط غروب التبادل :
https://t.me/+kpLC0STr7Dg2MzRk
انضموا لتساعدوا بعض ✨️

⚠️ولا تنسوا الإطّلاع على الرسالة المثبتة بالغروب.

وبالتوفيق للجميع 🙏🏻🌸.

#Med_Help 💙✨️
@MedHelpForPreYears

السلام عليكم بري 9 💙✨️

مكملين معكم بالبوستات التعريفية عن الكليات وهالبوست مخصص عن كلية الصيدلة بجامعة تشرين " كوكب زمردة"😊🌸

🔹️بدايةً عنا ٧ مواد بالفصل الأول و ٦ مواد بالفصل الثاني.

🔹️مواد الفصل الأول:

🧪الكيمياء العضوية 1 :《 هي المادة مع عملي 》.

⭐️دكتور المادة : الدكتور محمد الناصر .
⭐️المادة بشكل عام: بتشبه وحدة العضوية بالتحضيرية بس بشكل موسع ، رح نتعرف على المجموعات الكيميائية << ألكانات ، الكِنات ، ألدهيدات ، كيتونات ...>> وطرق تسميتها ، وخواصها الفيزيائية والكيميائية .
⭐️حضور المادة : أنصح بالحضور ، الدكتور إعطاؤه جميل ومفيد .
⭐️العملي : حلو خفيف نظيف تفاعلات كشف عن مواد وتجارب حلوة

🧫الكيمياء الفيزيائية: 《 المادة مع عملي أيضًا 》.

⭐️دكتور المادة: كان السنة الماضية الدكتور حسن جريكوس .
⭐️المادة بشكل عام: سهلة وبسيطة ومقرر هي المادة بتشرين خفيف رح نتعرف على حالات المادة وصفات المحاليل وطرق تحضيرها ومعادلات التوازن الكيميائي و حركية التفاعلات .
⭐️حضور المادة : أيضًا مفيد الدكتور أسئلته دقيقة بالفحص  وبيركز  على ملاحظات ذكرها ضمن المدرج وبيعطيكم أسئلة ضمن المحاضرة لتركزوا عليها .
⭐️العملي : بيحكي عن مفاهيم متل التوتر السطحي والكثافة واللزوجة .. 

💊علم الصيدلانيات 1 :《 المادة معها عملي 》

⭐️دكتورة المادة : الدكتورة سالي داغر .
⭐️المادة : جدا ممتعة وهي المادة يلي رح تفوتنا بجو الادوية و الصيدلة شوي 😁
رح نتعرف من خلالها على الأشكال الصيدلانية من شرابات و مضغوطات وأقراص ..
وطرق إيتاء الدواء والجرعة والعيار وهالأمور  
⭐️الحضور : الدكتورة شرحها رائع جدا
⭐️العملي : حلاوة العملي انه رديف للنظري يعني شي ما فهمتوه بالنظري تفهموه بالعملي والعكس الصحيح و رح ندرس شوية وصفات ونحضرها بشكل مبسط.

💻الحاسوب :《 مع عملي أيضًا 》
⭐️دكتور المادة: الدكتور علي ميا
⭐️حضور المادة: انت ووقتك ،بس عكلٍ المادة بسيطة ولكن الدكتور كان ياخد حضور السنة الماضية 👀
⭐️المادة :  رح نتعلم مكونات الحاسب المادية وبعض البرامج وأنظمة العد و خوارزميات بسيطة.
⭐️العملي : رح تتعرفوا على شوية مبادئ وأساسيات ببرامج الاوفيس مثل اكسل و وورد .

📜العربي :
عربي 😂 متل اي عربي اخدناه بالسنين القبل
⭐️نمط أسئلة الفحص : قصيدة وعليها تطبيقات وإعرابات وبالإضافة لموضوع
⭐️الحضور : مو كتير مهم الحضور ف انت ووقتك .

🆎️الإنكليزي 3 :
⭐️دكتورة المادة: الدكتورة ميس سلهب .
⭐️الحضور : حسب المستوى .
⭐️المادة: قواعد و مصطلحات واحرف جر وأسهل من انكليزي التحضيرية اتطمنوا

📚الثقافة :
المادة ما رح نكتر حكي عليها 
الأسئلة بتجي مركزية ،بتدرسوها من شي ملخص .

#Med_Help 💙✨️
@MedHelpForPreYears