نقدم لكم حل أسئلة مادة الإحصاء لدورة 2024 🧨🧨

إن أصبنا فهو من فضل اللّٰه ، وإن أخطأنا فمن أنفسنا 💙✨

🔥تم جمع فقط ٦٩ سؤال

بالتوفيق ان شاء الله 💫

#Statistics
#Med_Help_Statistics
@MedHelpForPreYears

#علامات ما منعرف ايمتا
#ايمتا العلامات ما منعرف
#علامات ايمتا ما منعرف 🙂🙂🙂

وزارة التعليم العالي والبحث العلمي تصدر نتائج امتحانات السنة التحضيرية للكليات الطبية الفصل الثاني للعام الدراسي 2023-2024.
للاطلاع على النتائج الرابط التالي
http://Results.shern.sy/Intro23S2

🔥🔥🔥لكثرة السؤال
😳كيفية حساب معدل الفرز

1⃣فصل اول بتضرب معدلك ب 0.3
2⃣فصل تاني بتضرب معدلك ب 0.3
3⃣الباك بتعملها من 100 و بتضربها ب 0.4
بتجمع
1⃣+2⃣+3⃣ = معدل فرزك

كيف فيني اعمل الباك تبعي من ١٠٠
معدلك من ٢٤٠ قسمه ع ٢.٤
فرضاً
واحد جايب باك 237
بنقسم
237÷ 2.4 = 98.75
هيك بتطلع معك الباك تبعك من ١٠٠ و بتشتغل بالخطوة 3⃣
@MedHelpForPreYears

🔥رابط علامات الفصل الأول
http://results.shern.sy/intro23s1/

@MedHelpForPreYears

السلام عليكم ورحمة الله وبركاته 🤍✨

كثُرت الأسئلة والاستفسارات وكانت متنوعة مابين 👇🏻

• ماعلاقة علامة النظري بالعملي ⁉️
• ماتأثير علامة العملي على الفرز ⁉️
• ماهي العملية الحسابية التي يجب إجراؤها لنعرف إن كانت المادة مرفّعة أم لا ⁉️
وغيرها ..

على بركة الله نبدأ

📌كل مادة نظري معها عملي فمن المهم أن تعرفوا أنه لترفيع المادة حتى وإن كانت علامة النظري لوحدها أقل من الحد المعروف للنجاح أي 60 فممن الممكن أن تكون المادة مُرفعة إن كان العملي بحدود معينة ( سنفصّل أكثر )

🔴 طريقة حساب المادة يلي معها عملي لمعرفة اذا كانت المادة مُرفعة أم لا

👈🏻بتضرب علامة النظري ب 0.7
👈🏻بتجمع علامة العملي مع الناتج السابق كما هي
👈🏻إذا كانت النتيجة 59 فواصل وأكتر معناها ترفعت المادة يعني 《 إذا العلامة كانت 59.1 فجبر الفاصلة يكون لصالح الطالب 》
👈🏻أما اذا كانت النتيجة 59 و أقل للأسف بتكون انحملت المادة

🔴 علامة العملي مع الحد الأدنى من النظري(من 100) للنجاح

12 عملي بدك 68 بالنظري
13 عملي بدك 66 بالنظري
14 عملي بدك 65 بالنظري
15 عملي بدك 63 بالنظري
16 عملي بدك 62 بالنظري
17 عملي بدك 61 بالنظري
18 عملي بدك 60 بالنظري
19 عملي بدك 58 بالنظري
20 عملي بدك 56 بالنظري
21 عملي بدك 55 بالنظري
22 عملي بدك 53 بالنظري
23 عملي بدك 52 بالنظري
24 عملي بدك 51 بالنظري
25 عملي بدك 49 بالنظري
26 عملي بدك 48 بالنظري
27 عملي بدك 46 بالنظري
28 عملي بدك 45 بالنظري
29 عملي بدك 43 بالنظري
30 عملي بدك 42 بالنظري

🔥🔥📌علامة العملي لاتدخل بالفرز ، الذي يدخل بالفرز فقط هو علامة النظري أما علامة العملي فتدخل فقط في معدل السنة التحضيرية أي تفيد فيما بعد ونكرر لاعلاقة لها بالفرز 《 يعني حتى لو كانت المادة محمولة لاسمح الله وجايب فرضًا 40 نظري ، ال 40 نظري بتفيد بالفرز ومابتم إجراء أي عملية حسابية عليها 》
   
📌المواد يلي ما الها عملي حدّ النجاح فيها  60  كما هو معروف


نتمنى لكم كل التوفيق ودروب مكللة بالنجاح والتيسير 🤍🌸

#Med_Help 💙✨
@MedHelpForPreYears

🔴#إعلان | #Med_Help

نقلًا عن الدكتورة عبير قدسي

اعلنت وزارة التعليم العالي والبحث العلمي عن فتح التقدم للاعتراضات على مقررات الفصل الثاني للسنة التحضيرية للقبول في الكليات الطبية ابتتداء من يوم الاثنين ١٣ من شهر آب ولغاية الخميس ٢٢ آب ٢٠٢٤
يتم التقدم للاعتراض في جامعة دمشق عبر نوافذ شؤون السنة التحضيرية الطبية الطابق الارضي مبنى المخابر في كلية الطب

#Med_Help 💙✨️
@MedHelpForPreYears

بمناسبة خلاصنا من الامتحانات😂
هاتو شو عندكم أسئلة بتخص #بشري_دمشق
مشان ننزللكم بوست بجاوب عن كلشي بخص البشري دمشق
و لح ننزل ان شاء الله لغير أفرع بوستات تباعاً أو فويسات

#جامعة_طرطوس

نتائج الحملة في جامعة طرطوس .

#Med_Help 💙✨️
#Med_Help_Tartous
@MedHelpForPreYears

يعطيكم العافية
عدنا من جديد🔥👀
لح نحكي شوية حكي عن
《الطب البشري بجامعة دمشق》

مواده ك فصل أول / وضع الحضور / مصادر الدراسة

🤔شو مواد الفصل الأول بشري دمشق و شو مصادر دراستها وشو وضع الحضور ؟
عندك ٧ مواد بالفصل الأول هنن :
(عربي + نسج عام + تشريح 1 + كيمياء حيوية + ثقافة + E3 + علم نفس)
هيك جرت العادة التقسيم ك فصل أول

أول شي بدك تحطه ببالك انه هالفصل يعتبر أقل فصل تقريباً ب الطب ك ضغط
مواده الطبية فقط 3 و الباقي تقريباً ملحقات و حلوين

أول مادة يلي هي :

التشريح 1

■دكتور المادة : الدكتور بيان السيد
■مصادر الدراسة : أربسيز أو ملف الدكتور
■الحضور بالمدرج : مفيد و جداً + فيديوهات الدكتور كمان برضو مفيدة و جداً و لح تعيدهم ألف مرة
■القنوات المفيدة :
● قناة ميد هيلب للتشريح 😁❤️
https://t.me/Ah_Med_Anatomy
●قناة مختبر تشريح جامعة دمشق
https://youtube.com/@duanatomylab?si=51dEvRS2U2GJHMMv
■ ملفات مهمة : مرجع غريز و نتر
https://t.me/Ah_Med_Anatomy/1174?single
■شوية حكي عن المادة :
المادة تعتبر من أحلا مواد الفصل الأول و بالمجمل التشريح و الفيزيولوجيا هنن أحلى المواد ب أول ٣ سنين الك بالطب
المادة أغلبكم بيعرف شو وضعها من التحضيرية
بهاد الفصل لح تدرسوا تشريح طرف علوي و طرف سفلي و رأس و عنق ..لح تدرسوا كل تفصيلة صغيرة أو كبيرة بهالأقسام يعني بالمجمل نفس التحضيري و لكن بشكل مفصل و جداً
المادة تحتاج دراسة خلال السنة و بالذات رأس و عنق هنن أصعب شي فيها و الدكتور بيان أسئلته كتير حلوة و بركز ع السريريات يلي بتفيدك لبعدين كتير

المادة التانية يلي هي :

النسج العام

■دكتور المادة : د.عمر الزعبي و قسم صغير د.رغداء الوزة
■مصادر الدراسة : كتاب الدكتور ( الدكتور المفروض هي السنة ينزل كتاب جديد ع دوركم بري ٩ يعني كتب بري ٨ مالح تفيدك)
■الحضور : يختلف من طالب لطالب
■ قنوات مفيدة:
●قناة الدكتورة إيمان نبيل :
https://youtube.com/@dr.imannabil?si=A27GZEoo6wswfCPV
● قناة الدكتور خالد المسلمى : انقرني
■شوية حكي عن المادة:
المادة بالمجمل حلوة و هي فعلاً فيها شغلات لح تمهدلك طريق لأنك تفهم شغلات تانية بالمستقبل
الأسئلة أكيد كلكم سمعان وضع النسج بدمشق
بدك تكون خاتم المنهاج لأدق التفاصيل الأسئلة ممكن يكون فيها البصمية جداً و ممكن الفهمية جداً يعني بدها تركيز جداً جداً جداً جداً لتقدر تجيب علامة منيحة فيها
المادة تحتاج لدراسة خلال السنة و بتركيز

ثالث مادة و يلي هي:

الكيمياء الحيوية

■دكاترة المادة : جرت العادة (ما منعرف اذا بيتغير هالسنة)
د.يوسف بركات (البيولوجيا الجزيئية
د. رويدا أبو سمرة (بروتينات)
د. هنادي مطيط (سكاكر + أنزيمات)
د.درر الصوفي (شحميات)
■مصادر الدراسة :
كتاب + محاضرات أربسيز
١. قسم الدكتور يوسف مانع الدكتور انه ينعمل محاضرات ف اجباري كتاب
٢. أقسام باقي الدكاترة الك حرية الاختيار إما كتاب أو أربسيز
■الحضور : مفيد جداً بقسم د يوسف بركات
باقي الدكاترة يختلف من طالب لطالب
شوية حكي عن المادة :
المادة تعتبر صعبة نسبياً و بدها شغل
قسم الدكتور يوسف هو نفس الوراثة من الفصل ٣ ل ٨ بس في تفصيل شوي🤏😁 و للأمانة محاضرة الدكتور يوسف ممتعة جداً و شرحه و أسلوبه كتير نار ... شوف فيدوهاته بالشحمي نار على نار كمان👀
بس يعني المادة بالمجمل بدها تعب
لازم تدرسها بقلب السنة أو عالأقل تفرم قسم د يوسف فرم و باقي الدكاترة برضو لأن معك وقت فصل أول و في شرح نينجا نيرد بالمجمل بساعدك نينجا نيرد أرجل قناة طبية لح تلاقيها بالشرح 🔥
بس اكتب اسم الشي يلي بدك ياه و بيطلعلك الشرح
■قنوات مساعدة:
●قناة نينجا نيرد :
https://youtube.com/@ninjanerdofficial?si=-aXLFuZ8Z8r6gdGR
قناة الدكتور يوسف : انقر هنا

رابع مادة و يلي هي :

ال E3

■دكتور المادة : هي السنة استلم د أسد ابراهيم (ما منعرف اذا السنة القادمة حدا بيستلم غيره)
■مصادر الدراسة : محاضرات الهيئة أو محاضرات أربسيز أو الكتاب
■الحضور : مفيد و حسب وضعك
■شوية حكي عن المادة :
الدكتور أسد هي السنة هو استلمها لأن الدكتور تبع المادة اتوفى السنة الماضية الله يرحمه .. لا كتير تفرح انها انكلش و انت هكر أوربا..لا تقريباً لح تكون ما بتعرف فيها شي 😂
مادة كلها مصطلحات طبية لاتينية يعني فعلياً مو انكلش اسمها المادة (انكلش مصطلحات)
اكيد تعتمد عالفهم .. الدكتور أسد أسئلته بالمجمل بدها شغل و للأمانة فيها كم سؤال بيجوا للطالب المحنك بس برضو المادة اذا بتتعب عليها بتجيب فيها معدل
ممكن انك تتركها لوقت الامتحان و لكن في حال واحد : لو كان عدد المحاضرات قليل
ع دورة بري ٧ كانو ٢٠ محاضرة
اتوفى الدكتور
ع دورة بري ٨ كانو ٣ محاضرات( لا كتير تفرح🙂😂 الأسئلة 🔥)
ف لو كان هالسنة كمان عدد المحاضرات قليل
غالباً ما يكون هيك لأن كتاب جديد الكم
ممكن تدرسها باسبوعها( يعني ٤ ايام قصدي😁)

#MED_HELP
@MedHelpForPreYears

خامس مادة و يلي هي

عربي :

دكتور المادة : د.منى داغستاني
مصدر الدراسة : نوطة أربسيز ٨٠ صفحة مدققتها الدكتورة
حضور المادة : الشرح بالنسبة للدكتورة حلو ف يختلف حسب وقتك و هل انت قادر تحضرها
شوية حكي عن المادة :
المادة بتنلحش لقبل الامتحان و عادي النوطة كلها بيومين خالصة و الدورات أهم من كلشي ضروري انك تحلهم

سادس مادة :

علم النفس

دكتور المادة : د يوسف لطيفة + د ثائر
مصدر الدراسة : أربسيز
حضور المادة : ممتع جداً و خصوصي قسم د ثائر😁
شوية حكي عن المادة :
المادة حضورها حلو و ممتع يعني الدكاترة شرحهم لطيف😁🔥 و المادة بتحسها فيها ثقافة عامة ف حسب وقتك لو فاضي انزل احضر
المادة لو بدك تشلفها لاسبوعها (يمكن شي ٥ ايام او ٤ او ٣ حسب )
لازم تمرق خلال السنة محاضرة الذكاء و النوم و التفكير و الذاكرة للدكتور يوسف هنن لب المادة و أصعب محاضراتها

آخر مادة و يلي هي :

الثقافة

لح سجل عنها فويس لأنها فيها شوية حكي
هي الرابط تبع الفويس :
https://t.me/c/1693659319/1141534

نهايةً :

كلشي ذكرتلك ياه و شغلات بتفيدك و ال pdf و كلشي حلو بخص السنة التانية بشري دمشق
لح تلاقيه
■ب هالبوت : @Med2028_bot

للأمانة البوت يشمل كلشي بيحتاجه الطالب
ممكن دفعتكم تشتغل بوت خاص فيها

😁🔥و شغلة أخيرة : انه لح يصير الكم غروبات دفعة و كذا ولا تخاف كتير جارك أبو تحسين بتلاقيه عم يقلك (ما فتت ع غروب الدفعة ؟!!)
يعني بيننشر

موفقين بهالخطوة القادمة .. و ان شاء الله بتكون بداية خير❤️

#MED_HELP
@MedHelpForPreYears

🎉بالنسبة للتشريح
حكينا بهاد البوست عن قناة تشريح شوية حكي عن هالقناة بس :
https://t.me/Ah_Med_Anatomy
■القناة هي للدكتور أحمد فواز الله يجزيه الخير لح تلاقي فيها :
● فيديوهات شرح لمقرر الرأس و العنق و الأطراف 3D
● لح يكون فيها برنامج للتشريح لدراسة التشريح خلال الفصل و تقسيمه و هالقصص إن شاء الله
● + لا ننسى الملفات يلي لح تساعدكم و الملاحظات و التجميعات يلي لح تسهل عليكم شغلات منيح باذن الله

هي أكتر من هيك دلال لجماعة البشري ما في
انطرونا ببوست عن جامعة تشرين اليوم إن شاء الله

#MED_HELP
@MedHelpForPreYears

يعطيكم العافية بري 9 الأكابر

رح نحكي هالمرة عن
«الطب البشري جامعة تشرين»


سكن / مواد / دراسة المقررات وتقسيمهم / دوام النظري والعملي وما إلى ذلك ..


🏠 بالنسبة للسكن والطلاب اللي هتسجل من غير محافظة :
بدايةً في تطبيق للتسجيل عالسكن لازم يكون موجود عندكم أغلب الإجراءات بتعملوها عليه
غالباً وقت تطلع نتيجة الفرز رح يكون السكن امتلى وما عاد في اماكن بالوحدات المخصصة لطلاب البشري
بتنحطوا بغرف الزوائد أو الشواغر و ممكن تنحطوا بوحدات التمريض
+ إذا كان الكم حدا بتعرفوه بالسكن ممكن تنقلو على غرفته
غالباً أقل عدد ممكن يكون موجود بغرفة وحدة هو ٤ طلاب 🤓
ممكن يكون في اختلاف بالأعداد على حسب اذا الأشخاص اللي اخدو السكن عم يستخدموه دائماً ولا هو مجرد يوم اللي بينزلوا ليداومو وبيطلعوا يعني ممكن يكون العدد أقل
طبعاً ممكن الطلاب اللي معك بالغرفة ما يكونوا بشري
فالأفضل وكنصيحة حقها دهب 😂
تتفقوا مع مجموعة من رفقاتكن وتاخدو غرفة الكم وحدة بحيث كلكم بشري رح تنزلوا تداومو يوم واحد بالعملي وحتى جو الدراسة بالغرفة رح يفرق كتير 👀

ثانياً النظري وتقسيم المواد:
كل فصل ٧ مواد ٤ منهم الهم عملي وما تبقى هنن مواد نظرية بحت

بالنسبة للفصل الأول:

تشريح أطراف 💪
نسج عام 🧫
جنين عام وخاص 👶
كيمياء حيوية ١ 🧪
مصطلحات طبية ١🆎
ثقافة 📓
عربي 📕
رح احكي عن كل مادة بشكل مختصر..

تشريح الأطراف:

أحلى مادة بهالفصل مادة ممتعة جداً إذا عرفتوا تدرسوها بشكل صحيح

■دكاترة المقرر: د.بشر شميس "طرف علوي" و د.علي حسن "طرف سفلي" ممكن دكاترة تانية تعطي معهم محاضرات سريريات واللي هنن ١٠٠٪ معتمدين على فهم الطبيعي بدايةً فما فيهم أي مشاكل
■مصادر الدراسة : محاضرات الدكاترة الرسمية / محاضرات الفرق
"بالفصل التاني الدكتور بشر لغى كل محاضرات الفرق لتشريح الجذع واعتمد على الكتاب الجامعي طبعاً هو كتاب قديم ولكن الدراسة منه عادية وسهلة متلها متل المحاضرات "
فربما يصير هيك بالفصل الأول معكم فلا تهلعوا كلشي لازمكم إلى جانب الكتاب هو أطلس التشريح واللي بدونه دراستكن ولا شي حرفياً

النسج العام:

مادة لطيفة
■دكتورة المادة: د.غصون حمود، أنصح بحضور محاضرات النظري شرحها وتعاملها رائع ورح تستمتعوا بالمادة ممكن يعطي معها دكتور وممكن لاء ما حدا بيعرف لسا
■مصادر دراسة المادة :محاضرات رسمية / محاضرات الفرق
رح تشوفوا انو محاضرات الدكتورة تنسيقهم لذيذ وفيهم صور لتوضيح الفقرات وبيندرس منهم برياحة

الجنين العام والخاص:

"هي المادة كانت مادة فصل تاني ولكن عوقت بري ٨ اللي دخلوا بشري انقلبت لمادة فصل أول بالتبادل مع علم النفس وهاد كان أفضل للطلاب طبعاً الفصل التاني دسم أكتر وهي المادة دسمة نوعاً ما "
■دكاترة المقرر: الدكتورتين فلورا "الجنين العام" و روميا "الجنين الخاص" ممكن يقلبوا المقررات بين بعض ويتبادلوا اعطاء الأقسام
المادة بدها دراسة خلال الفصل وبدها إلمام مادة غريبة وجديدة علينا
-أنصح بحضور النظري ل د.فلورا بتعرض فيديوهات أنميشين قصيرة خلال المحاضرة جداً جداً مفيدين بالإضافة لشرحها الرائع
■مصادر الدراسة : محاضرات رسمية / محاضرات فرق

الكيمياء الحيوية١ :

■دكاترة المقرر: المادة بتنقسم لجزأين جزء فهمي وبيعطيه د.فيصل رضوان وجزء بصمي نوعاً ما بيعطيه د.عماد خياط
طبعاً المادة لا تُترك لأسبوعها ولازم تندرس خلال الفصل وخصوصاً القسم الفهمي طويل ودسم وبده متابعة
الدكتورين حضور النظري لإلهم جداً مفيد
وصحيح قسم د.عماد بصمي ولكن الدكتور ومحاضراته فعلاً بتخليكم رايقين لأنه الدكتور رايق وظريف جداً
■مصادر الدراسة : رسميات الدكاترة/ محاضرات فرق

مصطلحات طبية ١ :

أبداً مانها انجليزي بقواعد هي عبارة عن مصطلحات وتعريفاتهم بالانجليزي متل ما تعودنا نحفظ ڤوكاب قبل
أول ٣ محاضرات من المادة أهم من حياتكم هي بتحكي عن القواعد اللي بنشكل فيها هالمصطلحات وكتير كتير كتير في أسئلة عليهم فضروري كتير أننا نأتقنهم

ثقافة:

مادة موحدة بين أكتر من كلية بتندرس كتاب وبتندرس ملخصات للمزنوق والاتنين بجيبوا ٩٠ ات فلا تفكروا فيها

عربي:

المادة كانت تحريري ولكن عدور بري٨ صارت أتمتة
لا تستهونوا فيها ممكن تضيعلكم علامات فادرسوها كويس
■مصدر الدراسة: بينزل نوطة رسمية للدكتور بتدرسوا منها

مواد الفصل التاني :

تشريح الجذع 🩻
نسج خاص 🔬
فيزيولوجيا 🫁
كيمياء حيوية ٢ ⚗️
مصطلحات طبية ٢ 🆎
مهارات تواصل 🗣
علم نفس 🧠

تشريح الجذع:

■الدكاترة نفسهم
المادة سهلة وسلسة وعلى نفس مبدأ الفصل ١ بلا أطلس أنت ولا شي
الدكتور لغىٰ محاضرات الفرق متل مو ذكرتلكم وطالب بكتاب المقرر ودراسته عادية مانها مستحيلة هو سردي وشكله رواية أكيد بس انتوا بدكم تدعموه بصور أطلس وكلشي بكون تمام
#MED_HELP
@MedHelpForPreYears

النسج الخاص:

بعد ما تعلمنا بالفصل الأول صفات كل نسيج بالتفصيل رح نجي بالفصل التاني ناخد أجهزة معينة من الجسم وندرس الطبقات النسجية المكونة منها
■الدكاترة نفسهم بالإضافة للدكتور بسام صارم كان أول مرة بيعطي هالسنة لبري٨ واسألته بدها تدقيق ودراسة مركزة لقسمه فانتبهوا على هالملاحظة

■مصادر الدراسة: رسميات الدكاترة/ محاضرات الفرق
"وجب التنويه أنه محاضرات الدكاترة الدراسة منها جداً سلسة ومريحة"

الفيزيولوجيا السوية والمرضية:

حبيبة الملايين، مادة محور الكون للفصل التاني بجانب الكيمياء مادة ضخمة بدها دراسة خلال الفصل وفهم عمييييق وتركيز
■دكاترة المقرر: د.زينب ياسين ود.عقيل حجوز
قسم الدكتور عقيل بصمي نوعاً ما فيه محاضرات القلب لازمهم فهم
قسم الدكتورة هو الأكبر وهو اللي لازمه دراسة معمقة خلال الفصل وحضور نظري الدكتورة لأنها فعلاً بتشرح من كل قلبها وشرحها رائع رائع
■مصادر الدراسة: رسميات الدكاترة / محاضرات الفرق

الكيمياء الحيوية٢:

■الدكاترة نفسهم
المادة للوهلة الأولى صعبة ولكن صدقاً هي أسهل من كيمياء١ حلوة وبدها فهم وعلى نفس المبدأ قسم الدكتور عماد بصمي وقسم الدكتور فيصل فهمي ولا يخلو الأمر من التداخل بالقسمين، وأكيد بدها دراسة خلال الفصل
■مصادر الدراسة: رسميات/ محاضرات فرق

مصطلحات طبية٢:

على نفس مبدأ مصطلحات١ بس هون ما عاد في قواعد تشكيل مصطلحات ولكن بيجي منها بالامتحان اسئلة فلازم تكونا مأتقنينها من الفصل الأول وفيكم ترجعولها بوقت دراستكم

مهارات التواصل:

■للدكتورة سوسن غزال
أكتر مادة رح تنبسطوا وأنتوا بتحضرولها وأنتوا بتدرسوها مادة جميلة سهلة ومادة ١٠٠ فعلاً، بتتعلموا فيها كيفية التعامل مع المرضى ولغة الجسد وشغلات تانية كتير رح تعجبكم
أكيد حضور النظري مهم للفهم المادة مانها بصمية بحت والحضور فعلاً كتير مفيد الدكتورة بتعمل فعاليات خلال المحاضرة وأسئلة للطلاب لتشرح الفقرة فالشرح تفاعلي جداً، لازم تحضروا 👀

علم النفس:

مادة بصمية بتعطيها الدكتورة عبير زيزفون المادة ١٠٠ كمان وأسئلة الدكتورة دقيقة ركزوا دراستكم فيها

■بالنسبة لحضور النظري
فهو مو إجباري ولكن جرت العادة الدكتورة غصون و الدكتورة سوسن ياخدو حضور


بالنسبة للعملي:

عملي الفصل الاول :

تشريح الاطراف: بناخد العملي على مجسمات او على سلايدات
بينقسم العملي لمذاكرة وامتحان بتعملوهم بنفس اليوم
المذاكرة غالباً بتكون من مقررات العملي او بتُطالبوا بمحاضرات النظري اللي بتوافق العملي
والامتحان سلايدات بتنعرض قدامكم بالمدرج على شاشة إسقاط كل سلايد ٢٠ ثانية مطلوب منكم تعرفوه

النسج العام: العملي على المجاهر وفي قسم نظري كمان
بداية بتاخدو المحاضرة على جهاز الاسقاط مع السلايدات وبعدها بتشوفوا المحضرات عالمجاهر ضروري نركز كيف بقدر ميّز المحضر هالشي بفيدكم بالامتحان
العملي مذاكرة وامتحان كمان بينعملوا بنفس اليوم
المذاكرة أسئلة نظرية من مقررات العملي
والامتحان هو ورق مطبوع عليه صور للنسيج غالباً ٣ بكونوا بظرف مع سؤال أو سؤالين نظري

الجنين الخاص والعام: العملي كله نظري تقريباً مافي شي نشوفه ونشتغله بايدينا يعني، كمان مذاكرة وامتحان بنفس اليوم اسئلة نظرية من مقررات العملي وبكون في رسمات مطلوبين طبعاً

كيمياء١: شغلنا بالمخابر أغلب الشغل عملي في شوية نظري بمقرر العملي مطلوب من أسماء المواد والمشعرات وهكذا
المعيدة بتعطينا فكرة عن كيفية القيام بالتجربة مع الطريقة وبتعطينا رانج معين لازم يطلع فيه الحسابات تبعنا، بنشتغل بمجموعات بتقسمهم المعيدة بأول جلسة للعملي
المذاكرة والامتحان سوا وكله أسئلة نظرية من مقررات العملي

عملي الفصل التاني:

تشريح الجذع: على نفس مبدأ تشريح الأطراف تماماً

النسج الخاص: كمان نفس مبدأ النسج العام بس الامتحان هون مو صور وانما عالمجاهر بتقعدوا وبينعطالكم ٣ شرائح ولازم تعرفوا العضو وتشرحوا مميزاته

الفيزيولوجيا: العملي جزأين نظري مقررات العملي وتجارب بتعملوهم بالمخبر على حالكم😂
المذاكرة والامتحان سوا كلهم اسئلة نظري من مقررات العملي وممكن تطالبوا بمحاضرات النظري "متل ما صار مع بري٨" 💔

كيمياء ٢: نفس مبدأ كيمياء ١ تماماً

دوام العملي

بكون بيوم واحد بالأسبوع هو بينزل التقسيم هيك جاهز ممكن عدد من الطلاب يحكم دوامهم يومين بالأسبوع بيقدروا ينقلوا عيوم واحد بوجود بديل حصراً

■طبعاً الحضور إجباري الغياب لأكتر من ٣ مرات بينحرم نظري والرسوب بالعملي نفس الشي
لا تهملوا العملي هون بقي داخل بالمعدل 🤭

طبعاً مصادر دراسة العملي هنن نوط رسمية للدكاترة بتنزل بمركز تصوير الكلية
في كمان محاضرات بتنزلهم الفرق
#MED_HELP
@MedHelpForPreYears

بالنسبة للعلامات

نظري أو عملي فصدورهم سريع يعني بتخلص امتحان فصل اول ٧ مواد بكون طالع ٦ وانت بتقدم اخر مادة 😂
ممكن يصير ضرب أو أخطاء بالسلم بينزل بوست اعتراض وقت بينزل السلم بتكتبوا فيه الأسئلة وحلها الصحيح مع الدليل من الرسمية وبينرفعوا الاعتراضات للدكاترة وبعدها الدكتور بوافق أو بيرفض على حسب صحة الدليل وشرحه خلال المحاضرة ..

■رح احكي كم كلمة عن المصادر غير الرسمية يلي هي الفرق

👈عنا ٣ فرق أساسية : أربسيز / كيو QRS / ودريم
أكيد في منكم مجرب يدرس محاضرات لحدا منهم بالتحضيرية ممكن يكون ارتاح معهم وعلى طريقة تنسيقهم
ولكن ننوه أنو الرسميات هي الأساس

هاد كلشي لازم تعرفوه عن الكلية أي سؤال نحنا بالخدمة ❤️
لا تنسونا من صالح دعائكم✨

#MED_HELP
@MedHelpForPreYears

السلام عليكم ورحمة الله وبركاته💫
طابت أوقاتكم يا أصحاب

هذا البوست مخصص للحديث عن

كلية الطب البشري في جامعة حماة

💥الإيجابيات:

🌸أولاً:
حماة معروفة ب المعدلات و العلامات العالية .. لكن بنفس الوقت بدك تتعب لحتى تحصل هي العلامات العالية .. مافي شي بيجي ببلاش .. لكن ليس مثل تعب باقي الجامعات

🌸ثانياً:
البعض بيقول انو مقررات حماة ناقصة كتير و الأطباء عم يتخرجوا منها ما بيعرفوا شي .. لكن بالحقيقة يلي بيدرس مقرراتها و بيقارن مع الجامعات الثانية بيلاقي انو هالحكي غير صحيح .. لأن المواد الطبية يلي بتفيدك بحياتك العملية مقرراتها مثل مقررات دمشق و حلب و أحياناً زيادة ببعض المواد مثل التشريح و الفيزيولوجيا و الكيمياء الحيوية و السريرية و مواد الجراحة و الداخليات بالسنة الرابعة.. بس المواد يلي ما الها فائدة عملية قيّمة مثل الثقافة و علم النفس و مهارات التواصل و النسج و ... إلخ ، فهي المواد مقرراتها سهلة جداً و هون بتصير لعبة المعدل .. بهي المواد الكل بيجيب علامات عالية و بيحسّنوا معدلهن

و على كل الأحوال، أنا أنصح كل طالب عم يدرس بحماة أو طرطوس أو حمص أو أي جامعة و ما عم يفهم على دكتور مادتو بنصحو يحضر
شرح دكاترة دمشق و دكاترة مصر و الدكاترة. الإنكليزيين عاليوتيوب ..
كلو متوفر عاليوتيوب بشكل مجاني
مثل
●الدكتور بيان السيد تشريح
●الدكتور ناجي اسكندر فيزيولوجيا
●الدكتورة إيمان نبيل و الدكتور خالد مسالمي نسج
●نينجا نيرد لأغلب المواد و .... إلخ
(بالتعليقات رح اتركلكن كل المصادر الممتازة للسنة الثانية المتوفرة عاليوتيوب)

الحضور و هل أنا ملزم به أم لا ؟

💥الحضور العملي :
أكيد ملزم انك تحضرو و بكل الجامعات هيك ..
💥 الحضور النظري:
مانك ملزم تحضر و ماحدا بياخد تفقد إلا بالنادر .. بس عندك بمادة الفيزيولوجيا الدكاترة بيحاسبوا عحضور النظري و أحياناً بيروّحوا علامات ليلي ما بيحضر و أحياناً لا
و الصراحة إذا كان بيتك بالريف فما بنصحك تحضر نظري لأن مصادر اليوتيوب كافية و زيادة .. و خاصة المواصلات بين الريف و المدينة صعبة شوي و مزدحمة عنا بحماة

العملي بحماة

ممتاز و متوفر فيها جثث و أعداد الفئات قليلة .. و المواد العملية الأخرى كلها كويسة و متوفر فيها كل الأدوات اللازمة (مع بعض التقصير البسيط بتوفير الأدوات لكن محتمل)

💥السلبيات:

🌸أولاً :
سلبية حماة بانو أكثر المواد حضور النظري فيها ما بيفيد كتير .. ف بدك تضطر تحضر شرح اليوتيوب

🌸ثانياً:
يلي ساكن بالريف مشكلة المواصلات بشكل رئيسي هي العائق الأكبر بطريقو .. و ذلك بكل الأرياف

🌸ثالثاً:
السكن الجامعي بحماة سيء جداً و ماحدا بيسكن فيه غير المضطر (بس سكن البنات أفضل من سكن الشباب نوعاً ما)
أغلب المغتربين بيستأجروا بيوت .. و آجارات البيوت ما غالية كتير بحماة

🌸رابعاً:
للأسف لسا كلية الطب البشري قيد البناء و ما جهزت لكن عم يشتغلوا فيها
فنحن مندوام بكلية التمريض ببناء مشترك مع طلاب كلية التمريض و مدرسة التمريض و أحياناً ببعض الفصول بيكون عندك يوم بالأسبوع دوامو بكلية الطب البيطري

#MED_HELP
@MedHelpForPreYears