مرة ومرتين وتلاتة وألف .. انتِ بتستاهلي يتحارب عشانك💙🥀

ربنا بيعوض كل واحد عن أي وجع اتوجعهُ و عن كل مرة شال فيها همهُ براهو وقال "يارب" عن كل لحظة يأس مر بيها وحس فيها ان مافي فايدة ، عن كل مرة اتمنى يفرح وما عرف ، عن كل مره اتعشم فيها واتكسر ، عن كل مره ابتلاه ربنا وصِبر ، عن كل لحظة حس فيها ان حياتهُ إتهدت وبرضو وقف كمّل..

‏و في الختام :
ما عاوزين ناس تقول لينا كلام حلو ، عاوزين ناس تشجعنا على القراية ، على الشغل ، تفكر معانا ، تساعدنا نبقى احسن ، ما تتعامل معانا على اننا فاشلين ، تفتح عيونا على الدنيا ، ناس عاوزانا نكون كويسين ، يمشو معانا بي قلب صافي ..
والرفقة لمن تبقى صاح كل الصعاب بتهون ..❤

‏احسن كلمه ممكن تسمعها من أحد عزيز عليك هي "ماهنت علي" كلمه كلها حب وحاجات حلوه كتيره، يعني ماهان علي امشي من غيرك ماهان علي اسيبك زعلان مني عشان بحبك ماهان علي اكمل المشوار ده من غيرك عشان بنكمل بعض ، ماهان علي آكل وانت مش معايا وربنا يكرمنا كلنا بالناس اللي ما نهونش عليهم.🚶‍♂️💙

~ لما ما نقصّر ما ح نندم ..
الاصعب من ضياع فرصة ، او خراب علاقة ، او حدوث فشل .. هو احساس الندم و لوم الذات على الضياع و الفشل ده ..
" ااخ لو عملت كده ، يا ريت لو حاولت آااخر مرة .. يا ريت لو اديت فُرص .. '' ، و دي الحاجة البتصعب علينا عملية النسيان و التجاوز ، و يبقى علينا ألم الفقد ،
+ ألم تقصيرك الح ينتج منو رغبة في المحاولة من جديد ~
مرييحة جدا العلاقات القنعنا من رجوعها تاني ، جميييلة الفرص الراحت للأبد ، لأننا ح نقفل ملفها و تفتح ملف علاقات جديدة ، و فرص جديدة و نركز فيها من غير ما نشتت انتباهنا على الفات ..
~ فعشان ما تلوم نفسك ، و ما تندم ! .. اوووعا تقصّر .. ما تقصّر في حرصك ع استمرار علاقة بتهمك ، عشان لو انتهت يبقى اللوم ما عليك .. ما تبخل بمنح فرص للناس ، عشان لما يجرحوك تكون وااثق تماما انهم ما بستاهلو ، مش انت الما اديتهم فرص كفاية .. ما تقصّر في الجري في طريق هدف بتحبو ، عشان لو طار ، يبقى فعلا نصيب .. استنفذ كل الفرص ، اعمل كل البيدك .. و اوعا تلوم نفسك على حاجة ما بيدك ..
فمن يقصّر اولاً ،، يندم اخيرا ~ 💗
#حياتنا_غير

الانانيه💔
بعرف واحد صحبي كان مرتبط بي بت و كانو بيحبو بعض شديد و بدون سابق انذار عرفت انهم انفصلو ، استغربت شديد لدرجة انى مشيت سالتو عن السبب قال لي "كانت انانيه في مشاعرها".. حسيت انو الجملة دي وراها لغز او سر بس م حبيت ادخل فى تفاصيل.. عدّي اليوم وانا بحاول أترجم الجملة دي..سألت ناس عن مفهوم الانانية بالنسبة لهم وشنو المواقف اللي حسو فيها بالانانية واتصدمت من الاجابات والمواقف..
وحده صحبتي قالت "انا كنت متفوقة ف الجامعه..وفي اخر سنة حصلت مشاكل كتير بسبب رفض اهلي للولد البحبو .. بس انا كملت معاهو واتحديتهم لاني كنت مؤمنة جدآ انه بيحبني وانا فعلآ كنت بحبو .. بس بسبب المشاكل دي ما عرفتا اركز في الامتحانات ولما النتيجة ظهرت اكتشفت اني رسبتا ف مواد كتيره .. يومها قعدت ابكي واتصلت بالولد دا احكيليهو..اتصلت كتير وهو ما رد عليا وبعد اكتر من 40 مكالمة رد وقبل ما اتكلم قال لي"انا بعلب بلاي ستيشن مع اصحابي اول ما اخلص هتصل بيكي..وقفل"..استغربت شديد انو حتي م سألني عن النتيجة مع انو عارف اني ماشه اشوف النتيجه .. دخلت اوضتي ابكي وحرفيآ بقيت منهارة شديد .. المهم اتصلت بيهو وريتو اني مضايقه من الحصل ..قال لي بالنص "عايني انا اصلآ مخنوق الفتره دي..انا فالطريق لي بورسودان هقعد اسبوع لما ارجع نشوف حل للموضوع دا"..غصب عني سألتو مخنوق من شنو..رد بكل جدية "عادي..هنزل شغل الاسبوع الجاي ولسة ما اتمتعتا بالاجازة"..قولتا ليهو "لا انت بتهظر اكيد..اكيد بتهظر انا بموت وانت مضايق علشان م استفدتا من الاجازة"..قفلت الخط في وشو وانا م مقتنعة ولا مصدقة..اخدت منوم من صدمتي والكابوس البعيشو ..اول ما صحيت فتحت الانستقرام بتاعو وفعلآ لقيتو نشر صور وهو ف كورنيش ف بورسودان..اتصلت بيهو وقولتا ليهو "انت بجد ف بورسودان..؟"..قالي اي وم عايز اتكلم في اي مشكلة..انا بغير جو قبل ما انزل الشغل "
يعني بعد ما هو م حاسس بي الحاجات العملتها عشانو واتحديت اهلي وبعد م كسرني قدام اهلي لا وكمان ماشي يغير جو ولا حتى سائل ف نتيجتي وكسره الخاطر العملها لي 💔
يومها بس اتاكدت قدر شنو هوا اناني ما بيفكر غير في نفسو ومصلحتو وحياتو هو بس واخدت قرار اني هبعد ولو كان البعُد دا هيكلفني حياتي..اهون من اني اعيش مع انسان م بيحس واناني..
صحبي لما سألتو قال لي "انا يوم اتشاكلتا مع ابوي وطلعت وخليت البيت يومها ما كان في جيبي غير 15 جنية ..المهم اتصلت بالبت الكنتا بحبها وحكيت ليها كل الحصل وكل ظروفي..قعدت تهون عليا شوية فحسيت انو في حاجة غلط او داسه عني شئ..قولتا ليها "انتي مخبية عني حاجة" قالت لي "لا"..اصريت انو في حاجة المهم قالت لي "م ينفع تستلف قروش من اي واحد من اصحابك..وتجي معاي بكرة السينما..اصحابي كلهم ماشين مع المرتبطين بيهم وانا م عايزة امشي براي".. استغربت من رد فعلها المهم قولتا ليها حاضر وقفلت الخط .. افتكر بعد المكالمة كسرت الخاطر..وقطعت علاقتي بيها تمامآ..لانها ببساطة انسانة ما بتفكر غير في نفسها ومظهرها قدام اصحابها💔
الشاعر هشام الجخ في وحده من قصايدو قال "مش عدل تبقي في ترف وانا بطفح الكوتة..ما ياما نقسمهم واخذة قصاد واخذة..ياما لامواخدة توتة يا حدوتة"..
الشخص الاناني في العلاقة دا اكعب شخص ممكن تتعامل معاة..ما بيشوف نفسو غلطان ولو اعترف بي غلطو هيكون عندو تبرير لي كل غلطة..م بيعترف ابدآ بأي عذر لو زول قصّر في حقو .. وعنده مليون مبرر لتقصيرو واهمالو .. شايف نفسو الوحيد الإتوجع وتعب ف الدنيا وان ماف زول غيرو بيستحق الاهتمام او الحب..لو بتموت قدامو وهو ايدو بتوجعو .. هيضايق انك م جمبو وحيعاتبك وم بيفكر حتي في انك بتموت..ابعدوا عن الناس دي شكلها حلو من بعيد بس لما بتقربو منهم بتشوفو الانانية الفي طبعهم..ابعد قبل ما تكتشف انك مسجون مع انسان م بيفكر غير في نفسو بس..في حياتو هو بس..في همومو هو بس..أبعدوا ولو هتعيشو حياتكم كلها من غير حب دا اهون مليون مرة من انكم تعيشوها مع انسان بيستنفذ كل طاقتكم ومشاعركم..💔
#منقول_بحب

قال :
كنت واحد صاايع ولافي وبتاع بنات، لحدي م قابلتها والله وفجأه حسيت انو الدنيا وقفت وظهرت لي سلمه طلعت فيها وكان بابها بودي ل عالم تاني 💕 عالم كلو احترام وهي،، 💕
حبيتا حب، والغريبه اني م كنت شفتها غير مره بس خطفت قلبي من لما عيني وقعت ف عينها 💕
تعبت شديييييييييييييييد حتى قدرت اعرف حاجه عنها 😢😢😢 وطبعا نسبة لاني صايع وهي بت محترمه م اشتغلت بي كتير وم عبرتني بس انا م خليتا ف حالا اتلحتها لمن رضت انها تتكلم معاي مره 🙈💕وقالت لي : انت مالك؟ ف شنو بتلحقني ليه؟ ماعندك اخوات انت؟ قلت ليها عندي اخوات بس انا بحبك، هي ساعتها اتصدمت وبقت تعاين لي مسافه حسيت انو جاكاتا باظت، قالت لي لو سمحت سيبني ف حالي 😐ومشت،، بس انا اصلا م فقدت الأمل للحظه وخصوصا لما م لقيت دبله على يدها 🙈💕وواصلت جري وراها، كنت راااااقد رز عديييييييييل🙊 وطول الفتره دي هي تصد وانا أجري تاني وراها 💕لحدي م جبت آخرها 💕 بقيت اجيها جمب شغلها،، وبتطلع تتونس معاي شويه،، كانت بت حسب ونسب وواضح عليها،، غيرت نظرتي للبنات كليا وندمت على اي يوم كذبت فيهو على بت 😐 رغم اني كنت بشحد صحبي عربيتو عشان اطلعا لانو كانت م متعوده ع المواصلات،، 😐💕بس الحاجه البحمد ربي عليها اني كنت واضح معاها ووريتا اني زول صايع ساي وشغل م عندي،، وطبع اي بت لو حبت تاني م بتركز مع أي شي،، وانا م كنت طامع فيها حاولت انها تساعدني بكل الطرق تتوسط لي عند اخوها تكلم لي ود عمتها بس بكل الطرق انا رفضت 🌚
يوم وهي ماشه بتتصفح ف الفيس لقت بوست انو وحده ف امريكا قالت حتقدم لي 10 بنات ف اللوتري من هناك لانو نسبه قبوله من هناك عاليه م اترددت ورسلت ليها طلب صداقه😐 سبحان الله من حسن حظها ولا من حسن حظي انا م عارف،، البت قبلت طلب صداقتها ورسلت ليها،، وبعد فتره طويله فعلا فااازت😍😍وابدا م كلمتني بالحاصل دا كنا بنتلاقى ونتونس وكنت بفتش شغل واشتغلت ف كذا حته وم نفعت والشغل زاتو م نفع معاي😂😂😂😂غايتو بس كنت بتأقلم عشانها وعشان اجيب ليها دبله ،، ف نفس اليوم الفازت فيه بليل اتصلت علي وقالت لي بكره من الصباح لازم نتلاقى وانا نعسانه مع السلامه وقفلت وانا م فاهم اي حاجه 😐😐😐😐😳
بكره الصباح ابو صحبي عربيتو خسرت اضطر يشيل عربيه صحبي وانا اتموسسسرت ف اتصلت ليها اني م حقدر اطلعا قالت لي م مشكله عشان م معاي عربيه ، بس كان عشان نقدر نتكلم براحتنا ف العربيه 💗 مشيت ليها وقالت لي جمبهم ست شاي من قبل م تتم كلاما قلت ليها لا 😒😒😒 مشينا قعدنا ف كافتيريا قالت لي شوف انت فوزت ف اللوتري 😭💕 انا عاينت شمال يمين لوتري شنو الفوزت فيهو وانا اصلا م قدمت 😂😂😂 قلت ليها بسم الله انتي محمومه؟ وحكت لي بالتفاصيل من منشور البت لحدي اقناع البت بانو تقدم ليها باسمي وانها اصلا شاركت عشاني
😢😢😢💜
صراحه م عرفت ولا عارف لحدي اللحظه انا من دونا كانت حياتي ح تتبنى كيف😭😭😭💜
الحمد لله وافقت وسافرت وسبحان الله اموري اتسهلت بسرعه 💗
وانا هناك كنت ماعارف ارد ليها الدين كيف 😢 اكيد ح اجي واجيب دبلتي وأهلي بس دي حاجه مفروغ منها بس كنت عايز حاجات تخليها تفرح وتتبسط 💗 ضربت لصحبي و وسألتو قالي م عارف بس شايف البنات قايمين ف حاجه اسمها قفه فرح 🙊❤️
قفلت منه وبقيت اتذكر اسم واحده من صحباتا قريبه ليها،، خشيت صفحتا ولقيت البت ورسلت ليها طلب ووافقت واتكلمت معاها بس من غير م تجيب سيره ليها 💗
وفعلا مشت الاء السراج وانا بقيت اشوف الحاجات البتحبها وعملت ليها قفه فرح م حصلت 💗 وكلمت صحبتها تعمل لي فيديو لرده فعلها 😍
وفعلا شوفتا الفرحه في عيونا،، ❤️
بقيت كل شهر لازم اجيب ليها قفه فرح،، بعد 12شهر كلمت ناس بيتنا انو ف بت كدا كدا وانا عايزه،، فعلا مشوا وطلبوها لي 💗 الحمد لله ف النهايه ابوها وافق بعدما سأل عني ولقى ماضيني الأسود ورفض لكن الناس اقنعوه اني اتغيرت والسبب بتو 💜

#كسره
واحد زي دا لو سمحت 😐
#كسره_تانيه
انهي الكسره😭

#لين_نزار

لما تلقى زول زهجان والد نيا قافلاها معاه بسبب وبدون سبب، انت عايز تطبطب عليه صح؟
م تقوليه اصلا دا حال الدنيا وم مستاهله وكلنا الدنيا مديانا بالشلوت واصبر واجمد وأثبت!! ،، حبيبي من الاخر م تقعد تنهال عليه بالنصايح هو تلقائيا عارف انو دي دنيا وانها م مستاهله بس مرات الوجع يكسر قيود القوه كلها،، 😭
طبطب عليه بقلبك، حسسه انه قوي وانو جميل وربنا هيعوضو ويفرح وطيبه قلبو دي ح تسهل عليه كل شي صعب وهكذا،، من الاخر شنووو احتوووويه 💗
في فترات الضعف حقتنا كلنا عارفين النصايح وممكن برانا نقوم نفسنا بس احنا محتاجين ل موتيفيشن واحتواء عشان نقدر نتخطى الوجعه دي❣

#لين_نزار

انا بستحق..

بستحق يكون في حياتي شخص واحد على الأقل انا مميزه عندو، من النوع الحنين ال ما بيقسي على لو غلطت، ويقول لي : " م مشكله المهم الغلط م يتكرر".، ال لما يشوفني ح اقع يلزني ل قدام ويشد على أيدي ويقول لي : ما حتقع، اصلو ما بخليك تقع وانا معاَك، البتوفر لي حتى لو ما طلبت وجودو، ال لما يعرف اني في ازمه نفسيه يجي على ويسعدني اتخطاها ويسعدني اتخطي الانتكاسة دي،. شخص م يتهمني ب التعاسه م يسخر من أسباب اكتئاب حتى لو كانت تافهه.

انا بستحق والله ان يتواجد ف حياتي شخص يصفق لي انجازاتي حتى لو كانت صغيره، وغير ملاحظه، ولما يشوفني بك؛ ي ل قدام ويتغير للأحسن ما يزكرني ب الماضي القاسي أو ب افعالي الطايشه والغير مسؤوله اللي ارتكبتها تحت تأثير الضعف واليأس والاحتياج، بحتاج ال بيؤمن بي ويثق فيني ويشجعني دايما للأفضل،، بستحق شخص اقدر ابكي قدامو اقدر اتكلم معاو عن كل حاجه بتزعجني مهما كانت تافهه يهون علي عقابي القاسي لي نفسي ويرجع لي ثقتي ب نفسي لما احس اني بلا قيمه وبلا اهميه، بستحق يحبني بمساوئي وعيوبي وأكتئابي العظيم.. 💚🐥

#Reema_Abbase

محتاجين ناس تحبنا زي ما نحنا بشناتنا وصوتنا الشين العالي شديد
بكلامنا اللي ما عندو علاقه باللطف بنفسياتنا وعصبيتنا بي عفويتنا وهظارنا الكتير ❤✨

سااعاات بنسرح في نااس ماا بنعرفم ولا حصل شفنااهم يعني نااس يمكن تلاقيهم في الموااصلات او اي حتة لكن بنسرح فيهم وده ما معنااهو اننا معجبين او كده نحن في معظم الاحياان بنشوف ملامح ناس بنحبهم في ملامح نااس تانيين..❤️

انا مش عارف دا صح ولا لا بس انا ملاحظ ان الناس اللي قلوبها كويسة حظها قليل جدا في الدنيا زي ما يكون اخدت نصيبها من الحظ كله في نضافة قلبها🤦‍♂️💔

العلاقات عموما ايا كانت تحت اي مسمى عشان تستمر لازم يكون في اتفاق في احترام في تقدير في مقابل لكل شي بمعنى اديك وتديني , تاخد مني و اخد منك , تحتاجني حتلاقيني معاك , احتاجك الاقيك , تكسرك الايام والظروف اجبر كسرك انا , وتجبر كسري , تكون سندي واكون سندك , وقت الزعل م تسيبني للحزن ياكلني خليك معاي حتى لو م حتتكلم وجودك ممكن يطمني , نواجه كل شي مع بعض , زعلت مني كلمني عشان الزعل بتراكم وبتحول لي حاجز بينا وبتحصل جفوة م عادية يعني حتى لو بنتكلم مع بعض كلامنا حيقل ولو م قل حيكون في احساس بانك بعيد لكن انت قريب . 💜

#heba_abubakr

زوج يحكي : خاصمت زوجتي شهرين لأمر ما ... لا أكلمها ولا آكل في البيت ... و بعدها تحاورنا واتفقنا و تصالحنا و تم حل هذا الأمر الذي غضبت لأجله و لكن .....
وجدت أن زوجتي اعتادت النوم وحدها ؛ تقول طول حياتي كنت أقرأ حتى أنام و لكن منذ تزوجتك كنت لا أريد أن أزعجك بالضوء ... و في فترة هجرك رجعت لقرائتي و ارتحت لما اعتدت عليه ، كما كنت أشعر انها عندما تدخل الغرفة تستنكر رائحة نفسي فيها و هي التي كانت لا تنام إن بعدت عنها 20 سنتيمتر،،
لم تعد تعلق على الأكل ، كفاية ملح ... حاسب صغطك سيرتفع ، فهي اعتادت أني آكل بالخارج لمدة شهرين فما عاد يفرق معها ملحي في الطعام زاد أو نقص ،، و بعد أن كانت لا تكف عن خلق أحاديث معي أصبحت صامتة في وجودي منشغلة بقرائتها أو حياكتها ،،
شعرت أني بخصامي لها إنتصرت في أمر لكني خسرت أمامه الكثييييير جدا الذي لم اكن أشعر بقيمته و كان الثمن أغلى بكثييير مما جنيته ...

ليتهم يدركون أن المرأة مرآة الرجل ... و كل ما يحدث لها ما هو إلا نتيجة لأفعالهم ليس إلا...💔🥀

منذ تلك الانجذابات الأولى التي قدرت لقلبين ان يجتمعا.
كان عنيد كالعادة لا يعير تلك الأشياء نصيبها من الاهتمام و يهمل تلك ،لم تكن من بنات أفكاره ان يرتبط بأنثى تلين و تحن له قلبه .إذ أنه يتهرب دوما من مشاعره ، متناسيا حنين قلبه ،منشغلا بمستقبله .
قابلته منذ فترة فكانت اجمل صدفة في حياتي ؛شيء ما اخرجه من روتين حياته الممل، شعور ايقنت تماما انك لم تجربه حيث ان عيناك فضحتاك في ذلك اللقاء، فصرت مرتبكا و مشتت الأفكار، لا أنكر أن تلك المرة الأولى التي وقعت فيها بالحب من اول نظرة كما يسمونه "حقا كان كذلك " بالرغم من استعجالك للعمل الا انك لا تفوت نصيبك من قهوة الصباح عند "مقهى المدينة" ،و ههمت تاركا المكان راسما على وجهك ابتسامة كانت كفيلة ان تعدل مزاجي عام للإمام. كنت مُدينة لهذا المقهى إذ انني صرت ازوره يوميا عَلِّي المح طيفك و كنت لا تخيب ظني .ظللنا نلتقي دوما و زاد الرابط بيننا إلى أن اعترفت لي يوماً بحبك لي ، تمهلت بعض الشيء ثم اعترفت له بالمثل لطالما كنت احلم بهذه اللحظة.
أخبرتك ذات ليله أنك ستمل وتتغير ،لطالما يحدث هذا الشيء للمرتبطين في زماننا هذا فاخبرتني بأنني الشخص الوحيد الذي طالما انتظرته و لا يمكن أن افرط فيه .
كنصيحة مني "حِبّوا بعض ..."
و في الختام ..
-وجمالُ حُسْنُك صورةً أسهو بها
‏في صَحوتي حتى وفِي أحلَامي".

#جوطة_مشاعر

بساطةة قلوبنا مابتسمح لينا نكره، ومابتسمح لينا نحقد، ولاحتي حتي نفكر غلط في زول، ولا بنقدر حتي نشيل فكره غلط، بساطة قلوبنا بتمنعنا من حاجات كتيييييره يااخ

احساس الضعف البراودنا دايماا , كبت المشاعر والكلام الكان لازم يتقال , الدمعة البتنزل فجأة وبتحس ان قلبك هو اللي بيبكي , قبضة القلب البتجينا لما يمر بينا موقف مشابه لمواقف كتيرة تعبتنا , الصداع الملازمنا طوالي , الانفعالات الناتجة بسبب الغيرة , اول يوم من الفراق , غدر الاصحاب , احساس الغربة والوحدة ونت قاعد وسط اهلك و ناسك , احساس ان ماف زول فاهمك مهما اتكلمت وعبرت وحاولت , الاحباط البجينا من اول فشل لمحاولات اسعاد نفسنا ومساعدتها على تحدي و مقاومة كل شي صعب , لما نعاين لنفسنا في صورة قبل سنتين وصورة لينا هسي بنلاقي كل حاجة حلوة فينا انطفت وملامحنا اتغيرت الحزن استعمرنا وغيرنا من جوا ومن برا , البرود تجاه كل حاجة , انتهاء الشغف تجاه حاجاتنا البنحبها .
بإختصار كل ما حدث و ما يحدث معنا الان يقوم ب قتل شئ جميل ب ارواحنا الامر الذي يجعلها مميزة عن غيرها , يقوم بإطفائنا كليا .
اليس الوقت مناسبا لتعقد معنا الحياة هدنة ?!!!

#heba_abubakr

بجي المحاضرات متأخر وبطلع أول واحد م كان عندو احتكاك بباقي الدفعة كان وحيد وفوق دا كلو كان بتعاطى ، دايما  شارد ، كان حنيق وبغضب بسسرعة عشان كدا الناس كلها بتتفاداو ،كنت براقبو دايما ، حنني وحبيت أغيرو ، حاولت أتقرب منو حذروني بس م سمعت، حاولت أدخل فيو ، لقيتو ف الكافتيريا سلمت بس م رد السلاام ، قعدت جنبو ،عملت كل شي بلفت النظر بس م انتبه ولا حتى عاين لي ، زهجت وقلت ليو :ع الأقل كان تقدر قعدتي دي ومشيت زعلانة..
شكلو حس😂 تاني يوم الصباح لما جيت لقيتو واقف ليي قداام القاعة واعتذر ع البرود😌 ، دخلنا وقعدتا جنبو وبقيت اتكلم معاه..
كيفك؟
كويس 😊
انت لييه كئيب كدا "سكت فترة وقال:
أصل أمي وأبوي مختلفين وعايشين ف حتات مختلفة ،وأنا هنا مع حبوبة أم أبوي .. إتعرضت لأبشع أنواع المعاملة من عماتي وأولادهم .. وفقدت اهلي من وانا صغير ودا ولد فييني احتقان كافي عشان اتعاطي
هي: بس دا م حل للمشكلة 💔
هو:عارف بس م ليي حل غير دا
"دي كانت أول مرة يتكلم فيها عن حالتو"
بمرور الأيام هيي ساعدتو وقدر يتجاوز مرحلة التعاطي و بقى يحضر محاضراتو كلهاا و ف النهاية معدلو كان زابط شدييد .. وبيها انفتح ع الدفعة واتعرف ع أصحاب وبقى اجتماعي وخلى وش الكآبة وبقى إنسان كويس 💜
ركنية أولى: الحنية الفي البنات قادرة تنتشل روح من عز جهنم وترجعها للحياة .. ف بس احسنوا اليهن😂💜

ركنية تانية: م أي زول بقعد براه وبختصر الناس معناها مفتري وبارد ، دي نظرة خاوية جدا ، غالبا النوع دا بكون اتعرض لما فيه الكفاية من الحزن والاكتئاب ف حاولو طلعوه من الحالة دي اذا قدرتو ورجعو لطبيعتو💜

#أنفال_محمد

الكاتب كلايف لويس قال: (الحياة فى جنب الله ليست فى الحصول على حصانة من المحن، ولكن التحلى بالسلام فى أثناءها)...
القُرب من ربنا م بيخلي الواحد بعيد عن الإبتلاء والمصايب، لكن بيعمل الأهم من كدة ،القُرب من ربنا بيبث فى النفوس الراحة والطمأنينهه والسلام البيسندوا ويرمموا ويصبّروا،خت معاها زول يكون سند حقيقي وإتفرج علي نفسك وإنت ماشي على الجمر...❤