•{ديرة عذاب}•
《 شور 》

١/ هذا المصاب خله دموعي همّاله
و ديرة عذاب گلبي و حالتي حاله
هاي الهزل و هذا الليل آه الليل
هذا المصاب و هذا الحادي و احباله

هاي غربة و بعد بأرض الشام غربة
والله صعبة بت علي و يسبوني صعبة
ظامي گلبه مات أخوي و ظامي گلبه

الموت باگ اخواني
شال في صيواني
احبال خشنة انطاني...خويه يحسين

شلون يالعفتوني
هاي تعمي عيوني
أنشاف و يسمعوني...خويه يحسين

عليّه انكتبت مصيبة
أعيشن و أموتن غريبة
يا خويا

٢/ حان الوداع بيني و بين ولياني
درب الضياع لباب الشام ودّاني
عندي أخو عفته يلوج حدر الخيل
متضمها گاع أثر خطوات نسواني

هاي محنه و بالسبي اتانينا محنه
اهواي صحنا رايحين اهواي صحنا
شلون رحنا بلا كفيل و رايه رحنا

شلون عفت خيامي
و نار حدر اجدامي
وين ذيچ أيامي...خويه يحسين

دموع گلبي و نوحي
تصيح يا مذبوحي
الشام كل جروحي...خويه يحسين

أروحن منكم عجيبة
أعيشن و اموتن غريبة
يا خويا

٣/ ما گمت أشوف أمشي و أسحگ ذيالي
و الدنيا خوف و ظعن من الزلم خالي
شفت الگمر گام و طاح ما بيه حيل
تذبحه السيوف و آنه الشام كتالي

يبچي شفته و أنا فوگ الناگه شفته
كافل اخته لو عدل ما تنسبي اخته
هيچي گتله تبقى ستر احجابي انته

هناك بس تعذرني
الشام لو يكسرني
ببيت بيت يمرني...خويه عباس

بنار گلبي اتچوه
اهناك عگب الخوه
الشام أدخل گوه...خويه عباس

أنوحن أخوي شيجيبه
أعيشن و اموتن غريبة
يا خويا

٤/ صار اللي صار ذبحت كربلا ايامي
بضلوعي نار فرگه و نار بخیامي
راح الخدر شفت الويل عگب الویل
ما ظلي دار و ابن أمي انذبح ظامي

ما بقالي شي أعيشن لجله تالي
لا دلالي لا إبن أمي و دلالي
ما إجالي شگد ندبته و ما إجالي

الشام هدّم صيتي
باگ كل عافيتي
و شال خدري و بيتي...خويه يحسين

الموت من يلفيني
اندار صوب احسيني
و هيچ تغمض عيني...خويه يحسين

دليلي يناطر حبيبه
أعيشن و اموتن غريبه
يا خويا


*الشاعر الموفق أحمد الهلباوي*


رابط قصيدة "ديرة عذاب":
https://youtu.be/6qJOjgtFJKY
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{الله يكثر أعيادك}•

١/الله ايْكثِّرَ اعْيَادَكْ...يَا شَعْبَانْ
جَابِ الفَرْحَة مِيلَادَكْ...يَا شَعْبَانْ
الأشْهُرْ كِلْهَا حِسَّادَكْ...يَا شَعْبَانْ
نِدْعِي نُبْقَى عُوَّادَكْ...يَا شَعْبَانْ

حَتَّى الأَشْهُر صَاحَتْ...يَا شَعْبَانِ اشْگَدْ مَبْخُوتْ

٢/اللِّيلَة يِنْبُضِ احْسَاسِي...بِالحْسِينْ
اللِّيلَة اتْسَبِّحَ انْفَاسِي...بِالحْسِينْ
الخِيرِ الصَّايِرِ ابْرَاسِي...بِالحْسِينْ
صِيتِي اوْ قَدْرِي عِدْ نَاسِي...بِالحْسِينْ

حُبَّكْ مَا يِتْعَوَّضْ...مِثْلِ الخُبْزَة بوَكْتِ العُوزْ

٣/بمَهْدَكْ تِجْدَحِ اعْيُونَكْ...يَا عَبَّاسْ
مَا تِقْبَلْ يِلَعْبُونَكْ...يَا عَبَّاسْ
المَايِ شمَا يِصَلْ دُونَكْ...يَا عَبَّاسْ
ترُفْضَه اوْ مِنْ يِشَرْبُونَكْ...يَا عَبَّاسْ

المَايِ اوْ إنْتَه بزُغْرَكْ...صَاحِ ادْخِيلَكْ يَالعَبَّاسْ

٤/ألِفْ مَبرُوكْ أبْدِيلَكْ...يَسَجَّادْ
وَرِدْ هَاللِّيلَة اوَدِّيلَكْ...يَسَجَّادْ
لُو سِجَّادَة أهْدِيلَكْ...يَسَجَّادْ
الصَّلَاة هيَة التِصَلِّيلَكْ...يَسَجَّادْ

إنْتَ المَاطَخْ رَاسَكْ...بَسْ مِنْ تِسْجِدْ لِلْمَعْبُودْ

٥/بَعَدْ چَمْ لِيلَة شِنْگِلَّكْ...يَا مَهْدِي
أخْجَلْ مِنْ أبَارِكْلَكْ...يَا مَهْدِي
تِمَنِّيتْ آنَه أنْدَلَّكْ...يَا مَهْدِي
عَدِلْ لُو مَيِّتْ أوُصَلَّكْ...يَا مَهْدِي

لِسَّه دمُوعَكْ حَمْرَة...اوْ تِبْچِي ابْصَحْنِ احْسِينْ


*الشاعر الموفق السيد محمد المنصوري*


رابط قصيدة "الله يكثر أعيادك" :
https://youtu.be/80aH7JkuIdQ
____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
____

•{چفينك وفايه}•

چفينك وفايه...للجود و للراية
عباس عباس...يسبع الغاضرية

١/ما تغيب حروفك
كل زمان نشوفك...آيه
و المجد ميعوفك
و انت بين چفوفك...رايه

يالبقيت بكربله...تضوي يا كوكب عله
يا هلا و مية هلا يا بو فاضل

حيرني تفسيرة
عباس أبو الغيرة
يا تاج عالراس...يسبع الغاضرية

٢/ما عرفنه اسرارك
يا گمر و انوارك...تزهر
شرف الله يزيدك
ظل يبوس بإيدك...حيدر

ربنا رافع رايتك...خيمه إلنه گبتك
غيرة الله غيرتك يا بو فاضل

ساحرني بعيونك
مجنونك مجنونك
عايش بالأنفاس...يسبع الغاضرية

٣/فدوه اروح الإسمك
ما يفارگ رسمك...بالي
إنت إنت الساقي
و بالضماير باقي...غالي

حبك بگلبي كبر...يا أحلى منّ الگمر
چفك اليروي النهر يا بو فاضل

غيرة علي شايل
حياك أبو فاضل
قرآن الاحساس...يسبع الغاضرية

٤/هالعشگ من ربي
و بودادك گلبي...هايم
إنت نور عيوني
و افتخر سموني...خادم

أذّن آذان العشگ...روحي شمعة و تحترگ
گلبي يهتف من يدگ يا بو فاضل

لو ينگطع راسي
عباسي عباسي
للدنيا نبراس...يسبع الغاضرية

٥/يا أعز من عمري
سلمت كل أمري...بيدك
يا طبيب اجروحي
مو بديها روحي...تريدك

هذا من عندي وعد...ما أعوفك للأبد
كربلائي هالعهد يا بو فاضل

مولاي عيديه
للكربلائية
يا آية إحساس...يسبع الغاضرية


*الشاعر الموفق كرار حسين الكربلائي*


رابط قصيدة "چفينك وفايه" :
https://youtu.be/WdRyZ1Lu3Wg
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{كل عام}•

كل عام و احنا وياك يا مولانا
بكربلا يوم اخمسطعش تلگانا

يا آخر إمام
يا مسك الختام

١/من مياه الجنة يا غصن يسگونك
اليمنه عينك فاطم كوثر و يقرونك
اليسره عينك حيدر و بعلي يشبهونك
المختصر يالغالي الله بين عيونك

بهذا وجهك يلالي محمد جبهتك
بهذا وجهك ملامح خديجة جدتك

كل هذا الكلام
يا مسك الختام

٢/يا سفينة غيرة من سفن أجدادك
و الله لو ما عندك ولد إحنا ولادك
يا غريب بگاعك و السمه مگعادك
يا صفات الباري جينا نحيي اعيادك

يا هلا بيك ينادي الموالي بفرحته
الله حياك قبل لا يحيي بيمنته

من رب الأنام
يا مسك الختام

٣/يا عديل الگمره اخمسطعش شعبانك
من العرش و لمهدك غيروا عنوانك
يا أمير و تاجك عالبشر قرآنك
يا بخت تسبيحة فاطمة بلسانك

نور العيون و العيون يعمدة كل زمن
للحسن أب صرت دوم يا إبن الحسن

يمحلي الغرام
يا مسك الختام

٤/يا غزل يا شاعر يا قلم يا ورقة
ايوصفك من گلبك الله وزع رقّه
يا بقية ربك إنت وحدك فرقه
يعني كلشي يفنه و انت بس التبقى

يا بو صالح يسموك وكت إنت طفل
بعدك زغير يشوفوك جبل ما تنحمل

يا عالي المقام
يا مسك الختام

٥/يا نبي يا آدم و انت عيسى بعصرك
إنت يعگوب اول من نسولف صبرك
نوح شيخ بعمرك و انت شيخه بعمرك
گلبك شگد يشبه البياض بشعرك

تبقى غالي بالحسين نأديلك قسم
كلها كلا تظل دوم فقط إنت نعم

و بآخر سلام
يا مسك الختام


*الشاعر الموفق حمزة السماوي*


رابط قصيدة "كل عام"
https://youtu.be/cNT7QWoPXCc
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

•{هوسات}•

١/يا ما حاولو عنك يمنعونه
ابهواك عگولنه ما درو مجنونه
صحنا يا حسين الكل يسمعونه
《بأولها وياك و تاليها》

٢/كلمن راد الله يغفر ذنوبه
يگصد للحسين و يعلن التوبه
يموت و بس أبو السجاد محبوبه
《حيدر و الزهره ايحضرونه》

٣/عطر الجنة بس ابتربته انشمه
و ندعي يا إلهي انموت بالخدمه
ندري اعلى الجسر خدام أبو اليمه
《يحضرهم شيال الراية》

٤/نزل جبريل يخدم ساعت اصيارك
و گل جدك محمد عيدك امبارك
من بيت الولاية شعت أنوارك
《و الكون بنورك ضويته》


*الشاعر الموفق السيد رضا البوشوكه*


رابط "الهوسات" :
https://youtu.be/_-1iku5uWmA
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

•{هلا يبن السادة}•

صوت زينب ناده...هلا عمه يا هلا
هلا يبن السادة...هلا عمه يا هلا

هلا يالزودك فخر كل هاشمي
عسكري و زينبي و فاطمي
و صوت زينب ناده هلا عمه يا هلا
هلا يا بن السادة هلا عمه يا هلا

١/ انهض بغيرة علي خل تشوفك ناسي
خل اگولن إبن اخوي عمه و ارفع راسي
هلا ياللي بدم وِريدك يجري دم عباسي
يلا شد اعلى النواصب يا شريك انفاسي

هلا يا بو الغيرة...هلا عمه يا هلا
الكون خله بحيره...هلا عمه يا هلا

و گوم و ارفع بالزعل فقارك
عمه وِ اخذ من النواصب ثارك

و صوت زينب ناده...هلا عمه يا هلا
هلا يبن السادة...هلا عمه يا هلا

٢/ گوم يا محيي الشريعه خل يطخ عاليها
و حشّم العباس عمك خل يردّ اعليها
الحومه منتظره وُجودك سيفك يحليها
من تشب نيران يومك يا هو اللي يطفيها

و الهلاهل تحله...هلا عمه يا هلا
و العدونا نذله...هلا عمه يا هلا

يلا يا ضنوة علي حبل المتين
يمته تصرخ يا لثارات الحسين

و صوت زينب ناده...هلا عمه يا هلا
هلا يبن السادة...هلا عمه يا هلا

٣/ صد يبِن صگر المنايا الكون يصبح عيدك
شد يمن سيف أبو الحمله يحلى عمه بإيدك
ذيچ راية أبو فاضل عالنهر وِ تريدك
كربلا يا كربلا هيّه ملعب صيدك

و خزرت البعيونك...هلا عمه يا هلا
بعمك يشبهونك...هلا عمه يا هلا

و گوم ردّ اعلى الزنود چفوفه
ايده بيدك من تطب للكوفه

و صوت زينب ناده...هلا عمه يا هلا
هلا يبن السادة...هلا عمه يا هلا

٤/ گوم چم عين بغيابك بالدمع سهرانه
گوم صيح الله و محمد و علي ويانه
گوم خلّي العزم سيفك ينحني العادانه
الما قبل جدك خليفة عمه گص السانه

صيح و الكل سامع...هلا عمه يا هلا
أول و مو رابع...هلا عمه يا هلا

انهض بزودك و شيل الراية
تزحف الشيعة الك مشاية

و صوت زينب ناده....هلا عمه يا هلا
هلا يبن السادة...هلا عمه يا هلا


*الشاعر الموفق السيد رضا آل بوشوكه*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
رابط قصيدة "هلا يبن السادة":
https://youtu.be/e0rpbk9J96U
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{شيخة الناس}•

امية هلا في شيخة الناس
طلگت عجيدن إسمو عباس

لحسينها ربت خوي...تشيم بها كل ابدوي
طلگت عجيدن إسمو عباس

١/طلع البدر علينا من ثنياتچ ترى
لون ما موجوده إنتي ماكو سبع الگنطره

ربيتي الخوه...و رضعتي مروه
يا أكرم حوة...كريمه

لحسين اخدمتي...و بعينه كبرتي
يم عباس إنتي...عظيمة

في داخلك گلبٍ كقديس
لحسينكي تهدين بالعيس

روحك بوصلا ترتوي...تشيم بها كل ابدوي
طلگت عجيدن إسمو عباس

٢/ ثمانيه و عشرين حرفا من أوصفچ عاجزات
و بالشعر ما تكفي وصفچ فاعلاتن فاعلات

يا كهف الغيره...و الدوم چبیره
حيرتي الديره...بوفائچ

أم أربع قادة...و الزود أوتاده
يحبوچ الساده...لولائچ

يا هيبخت يا عالي الشان
سلطانةٍ في آل عدنان

عيناك للعزم تحتوي...تشيم بها كل ابدوي
طلگت عجيدن إسمو عباس

٣/ الراد إبنه يصير گدها يتركه فترة بالبدو
يطلع بجوده و لسانه و حكمته و باسه كفو

إنت البدويه...بهيئة علويه
و عشتي حسينية...سنينچ

من أول آدم...و ليوم الخاتم
أبطال العالم...بنينچ

بدويةٍ ولدك ميامين
رحّالةٍ في صحرة احسين

رچابةٍ عيسٍ ضوي...تشيم بها كل ابدوي
طلگت عجيدن إسمو عباس

٤/ يعني شاركتي الزچیه سيدة و تستاهلين
مو عقيل الله گله علي أخذ أم البنين

اتقدملچ حيدر...و الباري قرر
يا حيدر إحضر...زوجتك

گلچ و افرحتي...هل أنتِ اقبلتي
و مستحيه و گلتي...بخدمتك

گلتي يبو حسينٍ يالكبير
وياك في ملحٍ على اشعير

گلبي بلاكم يلتوي...تشيم بها كل ابدوي
طلگت عجيدن إسمو عباس

٥/ كربلائيه گضیتي رغم يثرب و السنين
متي مو عن كبر عمرچ إنتي متي عالحسين

گلبچ ضل حاير...و احسين مسافر
أذاچ الحافر...حزينه

دمعاتچ تنصب...و دلالچ يلهب
مشتاگه الزينب...حنينه

صرتي من الويلات كالعود
يا ناطرة راياتٍ و جود

صبرك بلاها مو گوي...تشيم بها كل ابدوي
طلگت عجيدن إسمو عباس


*الشاعر الموفق ميثاق الحمداني*


رابط قصيدة "شيخة الناس" :
https://youtu.be/05VBXJyh7VY
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{عطش رمضان}•

عطش رمضان وكت المغربيه
يذكرني بصباح الغاضريه

بذاك الطف يا رمضان...حسين انذبح عطشان
و چان الماي بس عد آل أمية

١/ هذا رمضان و ذكرتك
تشبه هلاله لگیتك
هلال رمضان بطلعته
منحني يشبه مشيتك

من طلعت من المخيم
صايم و مخنوگه ريتك
إحنا نشرب ماي و انته
فطرت بدمك لحيتك

المغرب من يأذن تلتم الناس
و الطف طشر حسين اعلى عباس

يعالم گبل الآذان...حسين انذبح عطشان
و چان الماي بس عد آل أمية

٢/ أنهضم كل مغريبه
يالبناتك عطشوها
إحنا نفطر وي أهلنا
و إنته شفتك فطروها

و بالشمس للشام راحت
و لموا احجار و رموها
و القصر بالخيزرانه
شفافك شگد لوعوها

مثلك وين أكو يبن الزچیه
صايم يفطر بدمعة رقية

و فوگ اشفافه نيشان...حسين انذبح عطشان
و چان الماي بس عد آل أمية

٣/ الصايم يتاني المؤذن
المغرب امنيسمعه ينسر
و انت وجهك صار مغرب
من وگفت متاني الأكبر

و من إجت ليلى تنشدك
هيه تنشد و إنته تفتر
يعينك الله من گلتها
بالسيوف ابنچ تطشر

نذكرك من يصير متانه الغروب
من تانيت الأكبر و انته متعوب

نبي و متاني قرآن...حسين انذبح عطشان
و چان الماي بس عد آل أمية

٤/ إحنه نعطش مره وحدة
و إنت مو عطشان ذابل
مره تعطش للعليله
و مره تعطش للمحامل

و تعطش من تشوف زينب
تصيح وينك يا بو فاضل
يا غريب إنته و بناتك
كلها عطشانه اعلى كافل

عطشان اعلى أخيك موش للماي
لأن ماكو مثل عباس وفّاي

غريب مفارگ اخوان...حسين انذبح عطشان
و چان الماي بس عد آل أمية

٥/ إنته زمزم ما تريده
إنته عبدالله زلالك
و السهم طشّر وريده
و انچفه من ايدك حلالك

فارگت كل الغوالي
و كلشي ظل يبچي اعلى حالك
من كثر ما بيك طعنوا
الضوه يمر من خلالك

موذر كلشي بيك شلون تنشال
الشمس لو لاحتك ما يطلع خيال

طعن و سيوف عدوان...حسين انذبح عطشان
و چان الماي بس عد آل أمية


*الشاعر الموفق محمد الموسوي*


رابط قصيدة "عطش رمضان":
https://youtu.be/fNSym8aZCes
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{أغله من كل غالي}•

١/ سولف من زغر گالو هلي
صوتك خله بالحگ يعتلي
كونك خايف تمر بالشدد
نادي لا فتى الا علي

حيدر مشرد الأحزاب
شالع الحايط و الباب...معروفه

چا يلا صيحوا يا ناس
حيدر عگال العباس...و اچفوفه

الله عنك شاهد
ماكو غيرك قائد
غصبا اعلى خشومهم
إنته أول واحد

يا أبا الحسن...ماكو غيرك والي
يا أبا الحسن...و اغلى من كل غالي

٢/ خاسر كلمن يضد حيدرة
عاثر يبقى دنيا و آخرة
يا هو مثلك مخلف أسد
هيبة و إسمه سبع الگنطره

يمخلف هواي سباع
واحدهم يشرد الگاع...لو عارك

سيفك مأشر اثنين
عباس يعني و حسين...فقارك

يالمعزب ضيفك
سكتاهم سيفك
انته عزرائيلك
من إجاك بكيفك

يا أبا الحسن...ماكو غيرك والي
يا أبا الحسن...و اغلى من كل غالي

٣/ حيدر حبك بگلبي انطبع
صاحك يونس و بسمك طلع
إنته الما يذكرك بالفرض
المن يسجد و المن ركع

قاسم الجنة و النار
دنيا و بدون الكرار...شتفيدك

يتباهى الله بطاريه
كونك تريد تواليه...شيل إيدك

و اكتب اعلى الرايه
شيعتك وفايه
و لضريحك حيدر
تركض المشايه

يا أبا الحسن...ماكو غيرك والي
يا أبا الحسن...و اغلى من كل غالي

٤/ فارس لو حمل يجزي الهوه
تاخذ الشمس من عنده ضوه
حيدر إسمه قتال العرب
هيبه لا فتى إلا هو

كل الوصف حاير بيك
وحدك طينه مسويك...بارينه

ما راح دم الكرار
باچر يجيب إلنه الثار...مهدينه

شيعتك و انصارك
يا علي و زوارك
و المجالس هايه
بيها ناخذ ثارك

يا أبا الحسن...ماكو غيرك والي
يا أبا الحسن...و اغلى من كل غالي

٥/ صوتك تعب من گد الهلا
والد و اليتامى مدلله
طالع من ظهر حيدر أسد
كافل باچر يهز كربله

فارس جبت للميدان
تشرد گباله الفرسان...مهزومه

سبعين ألف راس براس
باچر يطگها العباس...بالحومه

قبلتي و قرآني
لو تهت دلاني
إحنه عدنا الكافل
هوه حيدر ثاني

يا أبا الحسن...ماكو غيرك والي
يا أبا الحسن...و اغلى من كل غالي


*الشاعر الموفق السيد محمد الموسوي*


رابط قصيدة "أغله من كل غالي":
https://youtu.be/lcun_9USmRo
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{اجانه العيد}•

اجانه العيد بس تحصيل حاصل
لا أم لا أبو مثل العوائل

علي و فاطمة بالگبر عيدو
و الاعزاز إذا سافرو ما إجو
لا أم لا أبو مثل العوائل

١/ وكح يا موت تركض تاخذ الزين
اجانه العيد و اهل العيد ميتين
شكثر بالمگبره ضيعنا غالين
اليتيم اتموته لو كتله هلك وين

بيوت امنوره جانت بالحبايب
غزتنه الظلمه من كل الجوانب

و الارواح و العيون خذو ما خذو
و الاعزاز إذا سافرو ما إجو
لا أم لا أبو مثل العوائل

٢/ يموت احنه تيتمنه بزغرنه
و رجعنا هم تيتمنا بكبرنه
على امنه انكسر منه ظهرنه
و على الوالد مثل راسه انطبرنه

جرح يلحگ جرح و الدنيه ركضه
العبد ما يرضه الله شلون يرضه

اراده اله بكلشي لمن هاجرو
و الاعزاز إذا سافرو ما إجو
لا أم لا أبو مثل العوائل

٣/ عمرنه بالعكس يا وادم ايدور
و صباح العيد يشبه عدنا عاشور
تعيد الناس ملگه و فرحة اشهور
و احنا اعيادنا كلها بالگبور

نشم اترابهم بس ما نشمهم
نضيع ارواحنا و نلگاها يمهم

العمر راح معانات و لا ناشدو
و الاعزاز إذا سافرو ما إجو
لا أم لا أبو مثل العوائل

٤/ قبل جم عام شيعنا الزجية
و قبل أيام حماي الحميه
نخلصها الليالي الفاطمية
تجي يمنا الليالي الحيدرية

غركنا مثل يونس و الزمن حوت
و حسبنه اسنينه تابوت تابوت

و الاحباب من دموم عليهم بجو
و الاعزاز إذا سافرو ما إجو
لا أم لا أبو مثل العوائل

٥/ نسينه الليل و الراحة بهجرهم
نعم ميتين لكن ننتظرهم
شحلات الدنيه لو يمنا و نمرهم
ابد متعوض الراحو صورهم

أخذهم ما خذانه الموت و انضيع
شحلات الگبر لو ياخذ مجاميع

سوه نعيش سوه نموت اذا فارگو
و الاعزاز إذا سافرو ما إجو
لا أم لا أبو مثل العوائل


*الشاعر الموفق حمزة السماوي*


رابط قصيدة "اجانه العيد":
https://youtu.be/vPurWNWh0b0
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{عيونك وطن}•

رحت وضلت جروحي
جريت إيـدك وروحـي
الدمع ... بـعـدك ضعـن
علي ... عيونك وطـن ..
______
وين أمشي وأتنفس عدل .. والفرگه ترحم بيه
بيك إحنا نتـنفـس عـمـر .. وأنت الهوه البالريه
معـقـولـه هالعيد اليجـي .. مالك يحـيـدر جيـه
ومـا أفـتـح الباب وعلـي .. جايب اوياه عيديه

چـا مـتـمــر بـعـد بالعـيـد
بعد متجيب حلم اجديد
بـعــد ... أمـشــي لــمـــن ؟
علـي ... عـيـونـك وطــن ..
______
قوسين أديك أجمل وطن .. تدفيني حتى بحلمي
أيدك عـلـى راسـي شكـثـر .. خلتني أحبـن يتـمـي
أمــــي حـنـيـنــه وداعتك .. شوفـتهـا تجلي بهمي
ومـن أحضنتنـي يـا عـلـي .. نسيتنـي حضن أمـي

حط أيدك على گلـبـي
وتشوف شكثر تعـبـي
إذا ... جــار الــزمـــن
علي ... عيونك وطن ..
______
بچـتـنـي أمـي يا عـلـي .. وخطارنـه نضيـفـه منـيـن
مـولاي ما عـدنـه الاجـه .. گتله أهلي ما مـوجوديـن
ما عدنه خفنه اعله الگصص .. من الفـقـر خجلانيـن
من أدخل البيت انهظم .. يبچي الفقر يا أبو حسيـن

بـس نصبـر يوالدنـه
ميخالف علي عـدنه
دمه .. دموعي جرن
علي .. عيونك وطن ..
______
يا إيليا ضـل يا علي .. يالمـا لگـيـت إحـسـاسـك
تـذكـــر إذا بــردن إدَي .. تـدفـيـهــن بـأنـفـاسـك
ما خلت النه بسمـتـك .. غـدرت يحـيـدر ناسـك
مو طبره والله يا علي .. المفروض قُبله براسك

لـيــش إلا يـطـبـرونــك
ما شـافـوهـن عـيـونـك ؟
صحت .. كلشي اندفن
علي .. عـيـونـك وطـن ..
______
رايح يمن چنت الفجر .. النا تـصـيـح ونلـتـم
يا عمرو يا عيسى أخذ .. يا فاطمه ويا مريم
واحــد يـگـلك يا أبـه .. و واحـد يگلك يا عـم
إحنا الفـقـراء الـذي .. بحبك علينه الله أنـعـم

چان القاسـمـه الله هـواي
علي وتمره ورغيف وماي
عـلــي .. مــن الأم أحـــن
عـلـي .. عـيـونــك وطــن ..
______
بمصباح عيدي يا علي .. راح انعرف ذاك انه
ذاك اليـدگ ظهر الاخو .. ذاك الـدمـع بـردانـه
بالعـيـد وادم تبتـهـج .. وادم تـظـل حـزنـانـه
وانـه بـوداعـك ياعلي .. مـن الـوادم الذبلانـه

رايح گتلي وانه أسمع
أمـوت وياك اذا تـرجـع
عـيـونــي .. غـمّـضـــن
علي .. عيـونـك وطـن ..
______


*الشاعر الموفق ميثاق الحمداني*


رابط قصيدة "عيونك وطن":
https://youtu.be/bZQI5ZCIgaM
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{عالترب طايح حسين}•

عالترب طايح حسين...و ينظر بطارف العين
خيل وصلت خيمته...خيل إجتي و داسته
و ينظر بطارف العين

١/ دمه يجري و من وگع ظل گلبه محتار
راد ينهض شاف جسمه صار طشار
الگاعرمله و هوّه نايم و الرمل حار
و جرحه مفتوح و رمل فوگ الجرح صار

جسمه من كثر الجروح...تطلع و ترجع الروح
و شكبرها شوغته...خيل إجتي و داسته
و ينظر بطارف العين

٢/ عشرة خياله يا ويلي من إجته
داسته و واحد يگلهم ما سحگته
راح أرد و ابدي أدوسه من جبهته
و اطلع بوجهي ووجر خيمة اخته

ما رضه بحرگ الخيام...و بألف يا علي گام
لاكن اثناء گومته...خيل إجتي و داسته
و ينظر بطارف العين

٣/ اخته صاحت لو عدل الحگ علينه
فتح عيونه و اجه تراب اعلى عينه
ينهض و يرجع يطيح على جبينه
و اثنعش طبره اعلى راسه مطبرينه

من سمع صوت الأطفال...بگلبه ما نعرف شگال
ظل يون بنومته...خيل إجتي و داسته
و ينظر بطارف العين

٤/شاف زينب من اجته بهالرزية
گلها خويا وداعة الله و هاي هيه
گومي من يمي و رجعي يم رقية
خاف تلفيني و يسحگونه سويه

شافته و الگلب ذاب...من الضمه يشهگ تراب
من عسن لا شافته...خيل إجتي و داسته
و ينظر بطارف العين

٥/ من رفس صدره الشمر طاح اعلى ظهره
شتّم الزهره و تربع فوگ صدره
خنجر بچفه و طعن چم مرة خصرة
و مد رگبته و خله سيفه فوگ نحره

گله راح اگطع الراس...و بيدي اشمره اعلى عباس
و الشماته سمعته...خيل إجتي و داسته
و ينظر بطارف العين

٦/ حز رگبته من الگفه و من الألم صاح
يا شمر مثلك أبد ما شفنا ذباح
و شال راسه برمحه و الدم عالأرض طاح
و شاف زينب من ولوها و الخدر راح

و ظلت تون الضلوع...خنصره و نحره مگطوع
و من بعد حز رگبته...خيل إجتي و داسته
و ينظر بطارف العين


*الشاعر الموفق السيد محمد المنصوري*


رابط قصيدة "عالترب طايح حسين":
https://youtu.be/dFGvxEFJvYY
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{هالمرة سامحني}•

بغيرك يا مهدي منشغل بالي
ما همني حالك همني بس حالي
آنه اعتذر يالمدمعك غالي
سامحني سامحني هالمرة سامحني

١/ عن كلشي يالمهدي اعتذر منك
شگد أفرح و ما أحترم حزنك
أنشد على اصحابي و أدورهم
و لا دوّرت لا ناشدت عنّك

آنه اعتذر...چي نسيتك أعتبر ناسي صلاتي
آنه اعتذر...ما قبلتك صاحب تصير بحياتي

شگد خيبت ظنك
شگد زيدت حزنك
آنه اعتذر منك

صمتك يگلي اعتدل كافي
مشكلتي ما عندي گلب صافي
يالتسهر و جفني يظل غافي
أخذتني أخذتني هالدنيه أخذتني

٢/ من فضّلت حب نفسي عن حبك
زعلتك أدري و انكسر گلبك
أفعالي مو بس تجرح بروحك
حتى الهوى مانعته عن دربك

يا للأسف...من أريد أغفه و لا مرة ذكرتك
يا للأسف...لا تصدگني إذا گلت انتظرتك

يا سيدي القائم
خليني الك خادم
صح عاصي بس نادم

لو من صدگ آنه انتظر جيتك
چا ما نسيتك مرة لا عفتك
ردت الأحبهم و انته ما ردتك
عذبني عذبني تقصيري عذبني

٣/ من الخجل تتغير احوالي
لو مرة ذكروا اسمك گبالي
إيدي أخليها على راسي
و شتفيدك إيدي رايد اعمالي

كافي بعد...ما أريد الدنيه بس إنت أريدك
كافي بعد...محلفك بعمتك رقية انطيني إيدك

هارب من ذنوبي
العطفك يا محبوبي
استرهن عيوبي

تقبل أعوفك حاشى ما تقبل
لو ما تحبني مني ما تزعل
تسئل عليه و آنه ما أسئل
حاسبني حاسبني عن كلشي حاسبني

٤/ متندم اعلى الماضي يا مهدي
صفحة جديدة بعمري راح أبدي
لله أتوب و أعلن التوبه
لازم أصحح كل غلط عندي

كلشي مهم...مو مهم عندي المهم ترضى عليه
كلشي مهم...ينّسي و دعيلك بصبح و مسيه

يا صاحب الرايه
أخرتك هوايه
و جروحك بهايه

يالما صفالك بالعمر صاحب
وجهك صدگ من التعب شاحب
گلبي و لا گلبك يظل ذايب
عايفني عايفني لا تگلي عايفني


*الشاعر الموفق السيد محمد المنصوري*


رابط قصيدة "هالمرة سامحني":
https://youtu.be/zRKZ-KF4B0Y
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{من ذاك عاشور}•

مِن ذَاكَ عَاشُور أدعِي مَولَايْ
لُو بَس عِشِت لِمْحَرَّمِ الجَايْ
نَاذِر نِذُر لَبْچِيلَكِ اهْوَايْ
يَا أبَا عَبدِ الله...يَا أبَا عَبدِ الله

١/مِثِل أم ضَايِع وَلَدهَا اوْ تِنتِظُر رَجعَه
بلَهفِتِي امْتَانِي ليَالِي الحِنَّه وِ الشَّمعَه
هِيچَ ارِيدَ اجْرِي دَمِعتِي بمَجلِسَك وَ انْعَى
يِختِلِف عنِّ المَوَاسِم موسِمِ الدَّمعَه

وِ المِنكِسِر مِن أجلِي ضِلعَه
شلُون أعز اعْلِيه دَمعَه
بَلچَن دَمِعتِي اتْصِير إلَك مَايْ
يَا أبَا عَبدِ الله...يَا أبَا عَبدِ الله

٢/حَضَّرِت ثوبِي السَّوادِ اوْ هَيَّأت أمْرِي
هاللَّيالِي اسْتَقْبَلِتْهَا بدَمْعِتِي التِّجْرِي
لِيلَه لِيلَه مِن تِمُرنِي يِختِنِگ صَدرِي
و يِنْشِغِل بَالِي اعْلَى زِينَب يَا بَعَد عُمْرِي

عَيِّشنِي جَرحَك شِلِّي بِالحِيلْ
زِينَب وَرَاهَا امْرَاكَضِ الخِيلْ
باچِر تِحِيرِ اوْ مَا يِظَل رَايْ
يَا أبَا عَبدِ الله...يَا أبَا عَبدِ الله

٣/ابْعِينِي تِتزَاحَم دَمِعتِي لُو نِعَى النَّاعِي
چِلمَةِ الطَّاحِ اعْلَى وَجهَه تِلْچِمَ اسْمَاعِي
سيِّدي اوْ عِنْدَك عَلِيلَه اتْهَيِّجَ اوْجَاعِي
گاعِدَه ابْعِتبَةِ البَابِ اوْ تِنتِظُر سَاعِي

وِ اتْنَادِي بُويَه المَن عِفِتنِي
ويَّه خَواتِي مَا خَذِتنِي
ميِّت حِلِمهَا ابْرُوحِتَك هَايْ
يَا أبَا عَبدِ الله...يَا أبَا عَبدِ الله

٤/اليِحْتِرِگ گَلبَه ايْتِضَاعَف بِالحَشُر أجرَه
مِن يِموتِ اتْصِير شَمعَه دَمْعِتَه ابْگبْرَه
كِلشِي ما ريدِ ابْمُحَرَّم غِير بَس عَبرَه
بَلچَن أجبُر بِيهَا خَاطُر فَاطِمَه الزَّهرَه

يَارِيتْ دَمعَاتِي الجِرِيَّه
يِشفَن جَرِح سِكنَه اوْ رُقَيَّه
العَبْدَالله تِجرِي ادْمُوع عِينَايْ
يَا أبَا عَبدِ الله...يَا أبَا عَبدِ الله

٥/هالشَّهَر شَهرِ المُصِيبَه البَچَّتِ الدِّنيَه
ويَّه ضَعنَك يا حُسيْنِ اجْرُوحِي مسبِيَّه
سيِّدِي اعْلِيكِ العَلِيلَه التِّنْتِظُر جَيَّه
كون تِحسِب حتَّى نبضَة گلبِي لطمِيَّه

وفِّقنِي فِدوَه ابْرُوح عَابِسْ
أبچِي اعْلَى زِينَب وِ المَجَالِسْ
بلكِي انْحِسِب لِلزَّهرَه وَفَّايْ
يَا أبَا عَبدِ الله...يَا أبَا عَبدِ الله


*الشاعر الموفق السيد علي الموسوي*


رابط قصيدة "من ذاك عاشور " :
https://youtu.be/LhAeV7CK5-4
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{تعال بروح الحسين}•

الليلة جمعة
و بحساسي دمعة
يمهدي تعبت الوين...تعال بروح الحسين

مو قصدي ازيدك
بس والله اريدك
جمعه مباركه عليك...راح اسهر و تانيك

١/ هالليلة گلبي يدگ
نتلاگه باچر صدگ
يعني اگعد وي العشگ...و ما نفترگ للأبد

الليله احط بيهن ملح
و ملهوف اجي من الصبح
نتلاگه جرح بجرح...منك أريدن وعد

يگول الصادق لو أدركته
المهدي اخدمته و ما عوفه
چا باچر من تظهر سجّل
خادم عندك بالكوفه

حاضر يمهدي
خادم و جندي
أتاني بدمعة العين...تعال بروح الحسين

٢/ يا بو الملاگه الحلو
بچفاك ألاگي منو
بالصورة و ألگه الدفو...دخيلك إذا بالصدگ

مخنوگ چي مو سوه
يا مو بشر يا هوه
مجروح أريدك دوه...ليا يوم أظل محترگ

ليلة جمعه و يم حسينك
ما ناسيك بهالليله
مذبوح و غايب متحير
أبچیلك لو أبچيله

يبچيني جدك
تبچيني وحدك
حاير بين الإثنين...تعال بروح الحسين

٣/ مكروه يوم السبت
چي بالجمع مطلعت
بالله عليك اقسمت...إرجعلي كافي بعد

أتخيلك جاي إلي
و اركض يتيم لعلي
بجيتك أعوفن هلي...و لديرتي ما أرد

يالمهدي و على طاري الفقره
حيدر ما عدهم هسه
و حتى اليذكرهم بالخبزه
يالمهدي يصور نفسه

تريد اليتامه
تعيش بسلامه
أجيبن عدلك منين...تعال بروح الحسين

٤/ يمتى تخلص السفر
گلبي المحطة انكسر
ما تاني غيرك بشر...يا موعدي و منهجي

بشعر الفراگ تعبت
شعر الملاگه شوكت
طلع البدرُ ردت...أكتبها لمن تجي

أربعطش انتم ما شفنه
منكم واحد و انشبگه
يمتى نشوفك و نسولفلك
شسوت يالمهدي الفرگه

يالمهدي إظهر
وجهك تأخر
نطلبك عشرتك دين......تعال بروح الحسين

٥/ لا تُرى صعبه تره
و وجوه كلحه نره
تساون يبن حيدرة...الجوهرة اويه الفحم

أحچيها حظ و بخت
الساحة خطره اصبحت
بالله ناس اشركت...و البعض عاش بوهم

بس عندك خدام و گدها
منبرهم محد هزه
متعلمين الخدمه الزينه
من عبود و من حمزة

و المنظور كاظم
و الناعي جاسم
نصيح بصوت ياسين...تعال بروح الحسين


*الشاعر الموفق ميثاق الحمداني*


رابط قصيدة "تعال بروح الحسين":
https://youtu.be/t3iSLHjftjI
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{محرم الذهب}•

لنشطب...كل جمل
من الحب...والغزل
ونكتب...مستهل
ويبقى الحسين

محرم...اقترب
محرم...الذهب
محرم...عطره هب
ويبقى الحسين

١/الشهر إجه اسمعت
وصفنت ودمعت
ورحت رايه ارفعت...اعله حايط منزلي
أشم ريحة سبي
وركضت لموكبي
أحسّه صاحبي...اليحب أبو علي

أحضّر ملبس الخدمه
واتحزم لبو اليمه
واگولن يا علي الهمه
مثل كل عام عالنيه

أحس ينلچمن جروحي
امن أمسح صور مذبوحي
و اطب لكربله بروحي
امن ادخل للحسينيه

جنوني...بخدمته
عيوني...بصورته
جفوني...لدمعته
اعله طول السنين

٢/ خفگ گلبي أنه
شهر حزني دنه
الاله متاني سنه...قريبًا يبتدي
امن اروح لكربله
الحسين اتأمله
اريد اگول اله...انعم الله سيدي

يالمخليني اخدمنك
ازرعني بدرب حزنك
انه الما شابع منك
اليكتب اسمك و يشهگ

قريب وحاسبك جاري
وتمد ايدك دفو لداري
لو شفتك نهر جاري
اشگ القارب واغرگ

حبيبي...الاولي
ونحيبي...بداخلي
طبيبي...بو علي
اليسمونه حنين

٣/ بمحرم استمع
قصيده بكل فرع
ومسيرات وشمع...حزن ما اجمله
حزن طول وعرض
مشاهد تنعرض
احسّ كل الارض...صفت چن كربله

سواد يغطي الولايه
قرايه تلحگ قرايه
جو حسيني للغايه
تمنيته السنه كلها

حب حسين ابو النعمه
الينزل مطرة الرحمه
حلاة الدنيا بالخدمه
ومواكبنه ومشاعلها

المجالس...للنحر
مدارس...للبشر
تنافس...عالاثر
مع العاشقين

٤/ الاماني بهالشهر
يجينه المنتظر
بحق هوه الگمر...العليه كلشي صفن
متى نركض اله
بچفوفه نقبّله
ونروح لكربله...ونطب سوه الصحن

يا گلبي البعد يكفي
رافع بالدعا چفي
اللهم عجل في
ظهور الطوّل اعلينه

يا قيّوم يا واحد
اظهره البالحزن گاعد
موش لخاطر اي واحد
لخاطر دمعة اسكينه

لظهوره...ننتظر
نزوره...ونفتخر
شعوره...بالصبر
يشيب الجنين

٥/ بعد هذا الشهر
بحزن يقبل صفر
ونروح امن البحر...الى النحر مشي
الگرايب والغرب
گلب لازم گلب
مواكب عالدرب...الحزن بيها احلى شي

نزور حسين نتعنه
مشي امن البيت للجنه
طريقه ما نزل عنه
الغريب وما نسى احبابه

الوسيله حسين والغايه
نروح لگبره مشايه
ورايه تسلم لرايه
مشي الحد لزمة ابوابه

زياره...امن العمر
بمساره...ننتصر
غياره...وللگبر
نجي زائرين


*الشاعر الموفق ميثاق الحمداني*


رابط قصيدة "محرم الذهب":
https://youtu.be/f0Cw5CehBPU
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{حنينات}•

حنينات حنينات خواتك يا أبو فاضل حنينات
غريبات غريبات خواتك يا أبو فاضل غريبات

١/ رد يا هوه التارس الريه...آه يا عباس
رد يالتكفه الهاشميه...آه يا عباس
ضليت أتاني شلون بيه...آه يا عباس
بين التجي و ما بيك جيّه...آه يا عباس

أتنطر و دمعي اعلى خدي...آه يا عباس
اتعنيت بس گالولي ردي...آه يا عباس
گلتلهم أبقى هناك ودي...آه يا عباس
هوّه آنه چم عباس عندي...آه يا عباس

إذا مات إذا مات تظل المن بعد زينب إذا مات
حنينات حنينات خواتك يا أبو فاضل حنينات

٢/ حگهن اعيوني يعاتبنك...آه يا عباس
مو ماي ردنه اخبار عنك...آه يا عباس
راح و اجاني حسين منك...آه يا عباس
بس رايتك ما جاي چنك...آه يا عباس

ها گتله خويه و گال زينب...آه يا عباس
گولي الخدر راح و تسلّب...آه يا عباس
بس شوفي ظهري شلون حدّب...آه يا عباس
و النار البدلالي تلهب...آه يا عباس

يتيمات يتيمات بچن من سمعن بإيمه يتيمات
حنينات حنينات خواتك يا أبو فاضل حنينات

٣/ چلمة الخويه شلون چلمة...آه يا عباس
من گالها و ظليت أشمه...آه يا عباس
لو ما انتن چا ظال يمّه...آه يا عباس
بچفوفي بس رايته و دمه...آه يا عباس

رديت بس شلون ردّة...آه يا عباس
ردت الماكو اخوان عنده...آه يا عباس
من جدمي عالشامت تعده...آه يا عباس
يصيحون ضل حسين وحده...آه يا عباس

يشمات يشمات افرحوا راح أبو فاضل يشمات
حنينات حنينات خواتك يا أبو فاضل حنينات


*الشاعر الموفق أبو معصومه الفريجي*


رابط قصيدة "حنينات" :
https://youtu.be/AOTZUe_l1f8?si=J-_9TuayxyuopfES
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

•{بويه حبيبي}•

بويه حبيبي...آنه بنيتك...اسال عنك
شيخلصهه...وللشام اوصل...حتى احضنك

انت مواعدني
ترجع تاخذني
استعجل موتني...بويه حبيبي

١/تذكر من طبيت الخيمه...وزينب كعدت وتداويك
من كلتلهه شويه واوكع...هيه شجانت شتحاجيك
من كالتلك عدنه ازغيره...واكثر وحده تموت عليك

جا هيج اتسافر
من حضني لحافر
خلاني العاشر...بس ثوب وصوت
بويه اتلاحكني
فكدك هالكني
ارجع شابكني...مو كافي تموت

انت كلتلي...انه اجيلج...وانه بمنحر
انه انتظرك...فدوه عليه...لا تتأخر
يمطيح جفني
هم تتذكرني
استعجل موتني...بويه حبيبي

٢/ما شفتك من صارت ركضه...وما كالو راسك منحور
بس هسه اتفاجئت اكبالي...راسك فوك ارماح يدور
ولحيه الجنت بأيدي الزمهه...بيهه رماد من التنور

مو بس اهدومك
مسلوبه ارسومك
يومي الوي يومك...جا يمته ايحين
بعدك اذوني
بكد ما ضربوني
مسدوده عيوني...ضليت اونين

من حركونه...ناديت شكد...يابويه اكعد
الخيمه جبيره...وانه زغيره...بالكوه اشرد
فكدك غيرني
اهواي امكبرني
استعجل موتني...بويه حبيبي

٣/من هديت ايدي لحد هسه...بس تهد دموع العين
ومن كد ما امسح بدموعي...ما ضل ردان وجفين
زينب عمتي احتارت بيه...اكبالي وتسال راحت وين

نتراكض كلنه
و كدامك طحنه
چا غير انت احنا...جوتنا النار
يا دلالي الطف
بالحال وتعرف
يا سوط الاشكف...واجفوفي ازغار

يمعودني...تنزل ليه...اتضمني لصدرك
رمحك عالي...انزل بويه...وضمني لنحرك
ردتك تحضني
حتى اترجعني
استعجل موتني... بويه حبيبي

٤/من الطف مطفيه الدنيه...وبعدك كل الوادم ليل
عشره الخيل السحكن الصدرك...اعليه ايركضن نفس الخيل
ما عنده بنيه بكد عمري...المن اوكع ويصيّح حيل

ادري اليتيم
الوادم بي ترحم
شو انه اتشتم...تسمع يحسين !
شيكضي الفركه
ويصير الملكه
كلبي ايطك حكه...اشافت هالعين

شوف الدنيه...شلون اندارت...كلمن جرحه
تقبل بويه...انته بصفحه...وانه بصفحه
احجيلك ذني
وما تسال عني
استعجل موتني...بويه حبيبي

٥/امشي بسرعه ولو مجتوفه...نتشاوف هاي الايام
كلت الشام البي النتلاكه...كون اليوم نطب الشام
مرات اصدق من الواقع...يابويه تصير الاحلام

الموعد باحلامي
ضامي ايضم ضامي
وتكعد كدامي...وتاخذهه الروح
واسال تسمعني
ياهو اليتمني
اعرف يذبحني...حضن المذبوح

ابقه بغربه...ومحد يمي...من احبابي
جا تاليهه...ميته بكبري...وينسد بابي
عطرك يوصلني
واكتبله بحزني
استعجل موتني...بويه حبيبي


*الشاعر الموفق حمزة السماوي*


رابط قصيدة "بويه حبيبي" :
https://youtu.be/XAAPCCpONKU?si=PBu1kARToKIQ5kEs
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______

*{تمنيت}*

تِمَنِّيت...أزورِ اللِّيلَة سَامرَّة
وِ الأنفَاسْ...تِتنَفَّسْ هَوَى الحَضرَة

١/روحِي تِتْمَنَّة تِشِمْ رِيحَة تُرُبْهُمْ
شوگِي أوْسَع صَارْ وَ اطْوَلْ مِنْ دَرُبْهُمْ
الله يِعْلَم مِن كِثُر مَا صِرْتَ احِبْهُمْ
تِلْمَعِ ادْموعِي مِثِل لَمْعَةْ گُبَبهُمْ

وِ الفرَاگْ...مِحْبَسْ ضَيَّعِ الشَّذْرَة
وِ الأنفَاسْ...تِتنَفَّسْ هَوَى الحَضرَة

٢/لَهفِتِي لَحْبابِي مِن يُوصَف ألَمْهَا
چَنْهَا كِلْمَةْ أخْرَسِ اوْ مَحَّدْ فِهَمْهَا
بلايَه حُبْهُم هِيبِتِي يِزْغَر حَجِمْهَا
كِل مَنارَة تِفْخَرِ ابْهِيبَةْ عَلَمْهَا

بِالعْيُون...إلْهُم بَيِّنَتْ حَسْرَة
وِ الأنفَاسْ...تِتنَفَّسْ هَوَى الحَضرَة

٣/وَصِّفَوا لِبْنِ الحَسَنْ سِرْدَابَة جَنَّة
اتْمَرْكَزِ ابْأربَعْ مَرَاقِدْ يِحْتِوَنَّة
مَرْقَد أمَّه و عَمِّتَه وِ الهَادِي وِ ابْنَه
و ألِفْ هِنْيَالَه الگُصَدْ وِ اسْتَقْبِلَنَّه

وِ اليْزُور...بِيهُم يِعْتِلِي قَدْرَة
وِ الأنفَاسْ...تِتنَفَّسْ هَوَى الحَضرَة

٤/السَّيِدَة نَرْجِسْ لَوَنْ أوصَلْ لَحِدْهَا
مَا أرِد إلَّا و أشِمْ رِيحَة وَلَدْهَا
وِ الدّعَاءِ الفَرَجْ أقْرَا و مِنْ بَعَدْهَا
أگصِدِ العَمْتَه حَكِيمَة و أدْعِي عِدهَا

البُعُدْ طَالْ...يَرَبِّي عَجِّلِ بأَمْرَه
وِ الأنفَاسْ...تِتنَفَّسْ هَوَى الحَضرَة

٥/ألِف هِنيَالَه الگُصَد حضْرَة إمَامَه
فاطِمَه تجَازِيه وِ اتْرُفعَه لْمَقَامَه
مُخْتَصَر موضُوعِي عَن هَايِ الخِدَامَه
بغِير أهْلِ البِيتْ مَا عِدْنَه كَرَامَه

وَ لَيْضِيعْ...تَعَب كِلْمَنْ أخَذْ أجْرَه
وِ الأنفَاسْ...تِتنَفَّسْ هَوَى الحَضرَة


*الشاعر الموفق السيد محمد المنصوري*


رابط قصيدة "تمنيت":
https://youtu.be/IQ8fRu4cj_U
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

*{من فاطمٍ للمهدي}*

تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ

١/ فَمُ الأرزاءْ ... مِنَ الزَّهراءْ
يُنادي القائِمَ المهديَّ يا إبني

أتى الكُفار ... لحرقِ الدّار
و ضربًا موجِعًا قد أشبعوا مَتني

و أشقاها ... أترضاها
بكَفٍّ صلفةٍ قد نالَ من عيني

و مُحْسِنُ غاب ... على الأعتابْ
برفسةِ ظالمٍ قد طاح من بطني

يا غيرَة الجّبارِ ذا كُلّهُ قدْ صارْ
و فوقَ حرقِ الدّارِ قد قيّدوا الكرّار

وغدٌ حقيرْ ... قادَ الأميرْ
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٢/ أيا أُمّاه ... غدًا والله
بثاراتِ الضّلوعِ سيعتلي صوتي

يكونُ الثّار ... على الأشْجار
سأصلبُ جُثَّةَ الطاغوتِ و الجبتِ

فقُرّي العَينْ ... إلى الضّلعينْ
سأكسِرُ ألفَ ضِلْعٍ عندما أأتي

أنا حيدَرْ ... و هُم خَيْبر
و كَفّي سوفَ تقلعُهُم إلى الموتِ

ثارُ الجنينِ المُحسِنْ ، يلوحُ في عيني
غدًا سآتي مُعلِن ، للثارِ بالحُزنِ

فوقَ العَلمْ ... خطَّ الألَم
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٣/ مِنَ اللحدِ ... إلى المَهدي
لقدْ قالَتْ بتولُ اللهِ بالحَسْرة

على زندي ... و في خَدِّي
علاماتٌ إلى الضربِ و للسطرَة

و هذا البابْ ... عليهِ خِضابْ
أيا إبني خِضابٌ مِنْ دمِ العصرَة

و في الأسماعْ ... مِنَ الأضلاع
يرنُّ الصوتُ وا لهفي مِنَ الكَسرَة

بُنَيَّ عَجّل عَجّل ، بالسيفِ و الصَّارمْ
بالصّوتِ قُلْ بل زلْزِل ، إنّي أنا القائم

قمْ يا إمام ... و ابنِ المقام
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٤/ إِليها قالْ ... أنا الزّلزالْ
و صَوْلاتي غدًا كالمُرتَضى جَدِّي

يرَاني النّاسْ ... كمَا العَبّاس
و صَوتي حينَ تكبيري كما الرَّعدِ

و هذا الثارْ ... من المِسمار
سأطلِبُهُ و أطلبُ لطمَةَ الخدِّ

أيا فاطِمْ ... أنا القائم
و وعدي قائمٌ يا سورَةَ الحمدِ

على أهالي الشرِّ ، إنّي أنا كالمَوتْ
و عن حلولِ الثّأرِ ، لا لن يفوتَ الفَوْت

لو يبقَى يوم ... حتمًا أقومْ
بالأدمُعِ الحمراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


٥/ أيا إبني ... أنا إنّي
على إبني الحُسينِ و ثارِهِ أنحبْ

و ذا هَمّي ... على غَمّي
سمعتُ بأن زينبَ مَتنها يُضرَبْ

و ما مِن حُرْ ... تُقادُ الطُّهر
بحبلٍ بينَ أرجاسٍ غَدَت تُسْحَب

و بالكفِّ ... ووا لهفي
تُسَتِّرُ وجهها بِنتُ العُلا زينبْ

أهمُّ ثارٍ عندي ، ثارُ ابنيَ العباسْ
لا تنسى ثارَ الزّنْد ، يا سيّد الإحْساسْ

همُّ الطّفوف ... حولي يطوفْ
بالأدمُعِ الحمْراءْ


تروي دموعُ الخَدِّ ما حلَّ بالزَّهراءْ
من فاطمٍ للمهدي بالأدْمُعِ الحمراءْ

جارَ الزَّمن ... يا بْنَ الحَسَن
بالأدْمُعِ الحمراءْ


*الشاعر الموفق محمد الصفار القطيفي*


رابط قصيدة "من فاطمٍ للمهدي" :
https://youtu.be/JnMEJuyAog8
______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______
القناة الرسمية للملا مصطفى السوداني على telegram :
https://t.me/Mustafa_Sudane
______