•{أكبر جرح}•

إنتَه اكْبَر جَرِح هَد حِيلِ العْيُونْ
وِ العِنْدَه الحْسِينِ ايْوَادْعَه اشْلُونْ

لُو يِلبَسْ سَوَادِ الدِّنْيَا كِلَّه
تِبَيِّن كَسْرَةِ المَفگُود خِلَّه

١/ يَالمتَعِّبِ اعْيُونِي امْنِ البَچِي اعْلِيكْ
تِكْتِلْ ذِكْرَيَاتَكْ
أنَا مَالِي عِرِفْ وَيْ چَفِّ الوْدَاعْ
چفُوفِي خَادْمَاتَكْ
دِرِت ظَهرَك إلِي وِ اتْشَمَّتِ اللِّيلْ
اسْتَوحَدنِي اوْ غَلَاتَكْ
إخِذْنِي ويَاك زِينَب لَيَّه تِحْتَاجْ
وَ اخْدِمْلَكْ بَنَاتَكْ

ما أگدَر أحَلفَك بِالزِّچِيَة
أخَاف ألچِمْ جَرِح گَلْبَكْ بِدَيَّه

إذَا مَا يُبقَى يَمَّك حَتَّى ظِلَّه
تِبَيِّن كَسْرَةِ المَفگُود خِلَّه

٢/ لو گايِلِّي موتِي ارْتَاح يَحسِينْ
و لا چِلمَة تِظَلِّينْ
أنَا بلَيَّاك مَكَّه بدُونْ حِجَّاجْ
ظَلَّت بَسْ حِيَاطِينْ
فَقِيرِ ابْلَايَا حِيدَر حَالتِي اليُومْ
تِعَشَّه ابْدَمْعَةِ العِينْ
أبچِي اگْبَال وَادِم مَا يِعَرفُونْ
شِنهِي افْرَاگِ الحْسِينْ

أركُض رِكْضَةِ الضَّايِعْ وِلِدهَا
وِ الثَاري الصَّحرَاء مَا تِسْمَع نَشِدْهَا

مِن يِبعِد عَزِيزِ اوْ مَا تِدِلَّه
تِبَيِّن كَسْرَةِ المَفگُود خِلَّه

٣/ اعْلَى عُطْرَك گِمْتَ أفَتِّشْ هَبَّتِ الرِّيحْ
وَ اشِمْهِنْ نَسْمَه نَسْمَه
وَ اصَلِّي آنَه الظُّهُر وَ احْسِبْ بِالنْجُومْ
ابْجِفَاكِ الدِّنيَا ظَلْمَه
الصَّمِت بَانِيلَه خِيمَه ابْعِتْبَةِ اشْفَايْ
و گُوَّه احْچِيلِي چِلمَه
كِلمَا يِنلِچِمْ گلبِي اعْلَى فَرْگَاكْ
أصِيحِ احْسِينْ يُمَّه

لو يِنفَعِ الصُّوتِ اهْوَايْ صِحْتَه
احْسِينِ اتْأَخَّرِ اعْلَيَّه ابْرَجِعْتَه

شَكوَةْ فَرْگِتَكْ مَا بِيهَا ذِلَّه
تِبَيِّن كَسْرَةِ المَفگُود خِلَّه

٤/ وِ اجَه نَاعِي المُصِيبَه ايْعِد بِالأسْمَاءْ
و ذِكَر وِلْدِي سِمَعْتَه
البُگَه ابْرَاسْ اللِّي إبْنَه إسْمَه عَبَّاس
طِحِتْ كِلِّي اوْ سِأَلْتَه
گِتْلَه احْسِين وِينَ اشْتَمْ عطُرْ مُوتْ
ذَبِيحِ ايْگُول عِفْتَه
و گَالِ الرَّاسْ بَايِتْ فُوگِ الرْمَاحْ
و سِبَوْا نِسْوَانَه وِ اخْتَه

المَا يَمَّه أخُو تِكثَر جُرُوحَه
و حَتَّى النَاصِي يِجَّاسَرْ يِلُوحَه

المْتَانِي الحْسِينِ اوْ مَا وِصَلَّه
تِبَيِّن كَسْرَةِ المَفگُود خِلَّه

٥/ طَالِب مَايْ بِالطَّفْ گَالَوِ احْسِينْ
ارْسُومَه الحَرْ چِوَاهِنْ
نَهَر هَاشِمِ اوْيَاهِ اوْ مَاتْ عَطْشَانْ
لو حَاضِر رِوَاهِنْ
المَا سِاحِگ جِدَمْهِنْ عِتْبَةِ البَابْ
عَدُوَّك رَكِّضَاهِنْ
بنَاتَكْ مَا بُرَد مِحْرَابْهِنْ حَارْ
المَا صَله سباهن

بَنَاتْ الزَّهْرَه هِيچْ ايْصِيرْ بِيهِنِ
عِمَتْ عِينِي الحَبِلْ جَارِحْ إِدِيهِنْ

الغَمِيجْ اصْوَابَهْ يَا چَفْ اليِشِلَهْ
تِبَيِّن كَسْرَةِ المَفگُود خِلَّه



*الشاعر الموفق محمد البطحاوي*


رابط قصيدة " أكبر جرح " :
https://youtu.be/6FO8qw1dSv4
___________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

•{محتاجك بگد غيبتك}•

وينك...طال إنتظارك و العمر يگصر
وينك...محتاجك بگد غيبتك و اكثر
وينك...أمه اليجيب المهدي للمضطر
وينك؟

١/دمعي يجري و بيك أسولف دمعه دمعه
خوفي بس لا من مغيبك ماكو رجعه
أندعيلك ليله ليله و جمعه جمعه
آنه أحبك و اليحبك ما تضيعه

ظليت أدورلك أثر
و ارسملك بعيني صور
ما شفتك و گلبي انكسر...تعرفني

كلشي خسرته بهالوضع
ما أمتلك غير الدمع
لا عندي صحبه و لا ربع...تعرفني

حالي...وضعي اختلف من حالك الحالي
بالي...ما مستقر بيك انشغل بالي
غالي...و محتاجك بگد دمعك الأحمر
وينك؟

٢/ذاب صبري و بغيابك الله يعلم
گمت أجدِّي امن الليالي بشوفك أحلم
أرد أعاتب ليش غايب يمته نلتم
عطشتني و انت وجهك ماي زمزم

كاتب على جروف النهر
ما رد حبيبي امن السفر
جبت العمر دمعه و قهر...يالمهدي

حاچيني يا نسمة صبح
صمتك على جروحي ملح
و اليسكت بگلبه جرح...يالمهدي

صمتك...بس اليحبك يفتهم صمتك
جيتك...هلهوله مذبوحه بأمل جيتك
شفتك...بحساسي چف شايل علم أخضر
وينك؟

٣/حسين ردتك حتى أبقى وياك عابس
تعبتني و جيت أدورك بالمجالس
الخوف أخذني و إيدي ترجف و ريگي يابس
ما لگيتك و بحياتي مالي واهس

إنطيني من گلبك صبر
و انطيني ساعة امن العمر
بيها أشوفنَّك تمر...گدامي

كل ما حضرت بمجلسك
موجود يمي اتحسسك
مثل الهوي و أتنفسك...گدامي

إلمن...إلمن أسولف حالتي إلمن؟
بيمن...أگدر أخففلك جرح بيمن؟
يعمن...اعيوني لو مثلك أظل أسهر
وينك؟

٤/آه يمهدي شلون عينك تگدر تنام؟
من تغمض يچوي گلبك حرگ الخيام
شلون تغفه و انت تسمع صرخة ايتام
شلون تغفه و عمه عندك دخلت الشام!

بالله يغمض يا جفن
و ابالك سياط و متن
و ايامك المحسوبه من...شيباتك

اليمته تظل تشتم حرگ
و تسمع صدر ظل ينسحگ
وحده اعلى وحده تختنگ...شيباتك

گلبك...شتحمل الله يساعده الگلبك
دربك...من دمعك لحد كربله دربك
ربك...بيا ساعه ينطيك الأمر تظهر
وينك؟

٥/بهالليالي الفاطميه شكبره همك
و انت تندل وين حيدر دافن أمك
من تجيها تگول يبني خذني يمك
ظهري محني مدلي چفك خل ألزمك

خليني بيدك أنتچي
نتگابل و نشبع بچي
عن أمك شسامع حچي...حاچيني

ترضاها بچفوف الغرب
يالمهدي أمك تنضرب
حاچيني يالساكت غصب...حاچيني

ضلعي...من انكسر بابي انكسر ضلعي
دمعي...صار أحمر بلون الجفن دمعي
وضعي...مثل الضلع كاسر گلب حيدر
وينك؟

٦/العذب أمك خله لسه يصب دمعها
الباب خشنة و من رفسها طگ ضلعها
شال سوطه و شافت إيده من رفعها
ظل يطگها و اعلى محسن رد دفعها

البيت انترس نار و حطب
ضلع انكسر خد انضرب
أم و تون بين العرب...يوليدي

شايف اذا طاح الإبن
أمه گلبها ينسحن
تفت الحجر لمن تون...يوليدي

دارك...و بيا بخت من احترگ دارك
ثارك...و اليمته نبقى ننتظر ثارك
نارك...أمه اليجيب المهدي للمضطر
وينك؟


*الشاعر الموفق السيد محمد المنصوري*


رابط قصيدة " محتاجك بگد غيبتك " :
https://youtu.be/xDRwvJPa2Jk
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{راحوا الغاليين}•

بَعَدْ يَاچَفْ يِدِگِّ البَابْ شِدَّه اِوْ جَرْحِيْ مَا يِنْشَدْ
عُگُبْ مَا رَاحَوا الغَالِينْ عِشِتْ بَسْ آنَـه وِ المَحَّدْ

١/غَرِيبَه اِوْ بيتِيْ تَابوتِيْ و احِسْ بِالموتْ كِلْ لَحْظَه
وَ آنَه الرَّاحْ مِنِّيْ اِحْسينْ مُوْ يَاهُوْ اليِجِيْ اِيْعَوْضَه
عِجْبَه اِوْ گلْبِيْ ظَلْ يِنْبُضْ زينِ اِوْ مَـا وِگفْ نَبْضَه

هَذَا احْسين اخُوْ النَّسْمَه
أمُـوتِ اِبْـيـومْ مَـا اشِـمَّـه
مِثْل إِبْـنِـيْ اِوْ مِثِلْ أُمَّــه

عُگبَه اللّيلْ يِتْبَعْ ليلْ وَ آنَه اِعْيُونِيْ مَا تِنْسَدْ

٢/حَرَامِ النّومِ اِذَا مَرْنِيْ وَ اشُوفِ الرَّاحَه وَ اَتْهَنَّه
اِوْ طَبْعِ الفَاگِدَه يَانَاسْ تِلْگه الرَّاحَه بِـالـوَنَّـه
صَحْ گالَوا عَزِيْزِچْ مَاتْ بَـسْ مَـا أيَّسِتْ مِنَّه

أشُوْ مَا تِقْتِنِعْ رُوحِيْ
مَا يِرْجَعْلِيْ مَذْبُوحِيْ
أشِدِّ اِجْرُوحِيْ بِجْرُوحِيْ

نِذَرْت امْلِيْ الدَّرُبْ رِيْحَانْ لوْ رَدْ بَسْ بَعَدْ مَا رَدْ

٣/گِضَتْ سَنْتينْ عَالفَرْگه اِوْ هَاي الثَّالِثَه اِتْمُرْنِيْ
وَ اخَافِ اِحْسينْ نَاسِينِيْ لـوْ لَا بَعْدَه يِـذْكُـرْنِيْ
مِثِلْ كَسْرَةْ غُصِنْ يَابِسْ عُگُبْ عينَاه كَاسِرْنِيْ

گِلِتْ مِشْتَاگه لَانْفَاسَه
گالَوا عَـالـرُّمُـحْ رَاسَـه
گِلِتْ چَا وينَه عَبَّاسَه

گالَوا عَالشِّرِيعَه اِهْنَاكْ شَيَّالِ اللِّوَه اِسْتَشْهَدْ

٤/مَلْكِ الموتِ اِجَه البَابِيْ قُبَضْ رُوحِيْ اِوْ مِتِتْ يَمَّه
وَ اسْبَابِ الـوَفَـاةِ اِتْگُولْ كِتَلْهَا اِفْـرَاگ ابُـوْ اليِمَّه
غَرِيبَه اِوْ صِحِتْ يَـوْلَادِيْ لُـمْكُمْ فِـزْعُـوا يَـايُـمَّـه

رِدِتْهُمْ لوْ يِحِلْ موتِيْ
يِنُوحُونِ اِعْلَه تَابُوتِيْ
صِحِتْ بَسْ مَا وِصَلْ صوتِيْ

أمِدِّ اِچْفُوفِيْ بَسْ مَا اشُوفْ ليَّه اِچْفُوفْهُمْ تِنْمَدْ

٥/يَادَفَّانِيْ رِدْت اوْصِيكْ قَبِلْ لَا أنْزِلِ اِبْـلِحْدِيْ
مِنِّ اِتْرَابْ گبْرِ اِحْسينْ كُونِ اِتْحُطْ تَحَتْ خَدِّيْ
هَاي الدِّنْيَه مَالِ اِفْرَاگ وَ اخْذَتْ أغْلَه مَا عِنْدِيْ

گِلْتِ اِبْگبْرِيْ رَاح انْسَه
بَسْ شِفْتِ الحِزِنْ نَفْسَه
رَاحَولي وِلِـدْ خَمْسَه

فِدْوَه الأرْبَعَه اِيْرُوحُونْ عَالخَامِسِ الحيلِ اِنْهَدْ

٦/عليْمَنْ كَـرْبَـلَـه اِبْعِيدَه اِوْ يَاريتَه الدَّرُبْ يِگصَرْ
حَتَّى اطْلَعْ وَ امُوتِ اِهْنَاكْ يَمْ شُبَّاچ ابُوْ الأكْبَرْ
مَرَّه انْحَبْ عَلَى اِضْلُوعَه مَرَّه انْحَبْ عَلَى المَنْحَرْ

أدَاوِيْ اِجْرُوحِ البْصَدْرَه
وَ ارَجِّعْ رَاسَه يَمْ نَحْرَه
وَ اسَاعِدْ فَاطِمَه الزَّهْرَه

أحْزَنْ بِالگبُرْ لِحْسينْ وَ الْتَفِّ اِبْـچِفَنْ أسْوَدْ


*الشاعر الموفق كرار حيدر الخفاجي*


رابط قصيدة " راحوا الغاليين " :
https://youtu.be/INIG5KZJIPo
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{من ذاك عاشور}•

مِن ذَاكَ عَاشُور أدعِي مَولَايْ
لُو بَس عِشِت لِمْحَرَّمِ الجَايْ
نَاذِر نِذُر لَبْچِيلَكِ اهْوَايْ
يَا أبَا عَبدِ الله...يَا أبَا عَبدِ الله

١/مِثِل أم ضَايِع وَلَدهَا اوْ تِنتِظُر رَجعَه
بلَهفِتِي امْتَانِي ليَالِي الحِنَّه وِ الشَّمعَه
هِيچَ ارِيدَ اجْرِي دَمِعتِي بمَجلِسَك وَ انْعَى
يِختِلِف عنِّ المَوَاسِم موسِمِ الدَّمعَه

وِ المِنكِسِر مِن أجلِي ضِلعَه
شلُون أعز اعْلِيه دَمعَه
بَلچَن دَمِعتِي اتْصِير إلَك مَايْ
يَا أبَا عَبدِ الله...يَا أبَا عَبدِ الله

٢/حَضَّرِت ثوبِي السَّوادِ اوْ هَيَّأت أمْرِي
هاللَّيالِي اسْتَقْبَلِتْهَا بدَمْعِتِي التِّجْرِي
لِيلَه لِيلَه مِن تِمُرنِي يِختِنِگ صَدرِي
و يِنْشِغِل بَالِي اعْلَى زِينَب يَا بَعَد عُمْرِي

عَيِّشنِي جَرحَك شِلِّي بِالحِيلْ
زِينَب وَرَاهَا امْرَاكَضِ الخِيلْ
باچِر تِحِيرِ اوْ مَا يِظَل رَايْ
يَا أبَا عَبدِ الله...يَا أبَا عَبدِ الله

٣/ابْعِينِي تِتزَاحَم دَمِعتِي لُو نِعَى النَّاعِي
چِلمَةِ الطَّاحِ اعْلَى وَجهَه تِلْچِمَ اسْمَاعِي
سيِّدي اوْ عِنْدَك عَلِيلَه اتْهَيِّجَ اوْجَاعِي
گاعِدَه ابْعِتبَةِ البَابِ اوْ تِنتِظُر سَاعِي

وِ اتْنَادِي بُويَه المَن عِفِتنِي
ويَّه خَواتِي مَا خَذِتنِي
ميِّت حِلِمهَا ابْرُوحِتَك هَايْ
يَا أبَا عَبدِ الله...يَا أبَا عَبدِ الله

٤/اليِحْتِرِگ گَلبَه ايْتِضَاعَف بِالحَشُر أجرَه
مِن يِموتِ اتْصِير شَمعَه دَمْعِتَه ابْگبْرَه
كِلشِي ما ريدِ ابْمُحَرَّم غِير بَس عَبرَه
بَلچَن أجبُر بِيهَا خَاطُر فَاطِمَه الزَّهرَه

يَارِيتْ دَمعَاتِي الجِرِيَّه
يِشفَن جَرِح سِكنَه اوْ رُقَيَّه
العَبْدَالله تِجرِي ادْمُوع عِينَايْ
يَا أبَا عَبدِ الله...يَا أبَا عَبدِ الله

٥/هالشَّهَر شَهرِ المُصِيبَه البَچَّتِ الدِّنيَه
ويَّه ضَعنَك يا حُسيْنِ اجْرُوحِي مسبِيَّه
سيِّدِي اعْلِيكِ العَلِيلَه التِّنْتِظُر جَيَّه
كون تِحسِب حتَّى نبضَة گلبِي لطمِيَّه

وفِّقنِي فِدوَه ابْرُوح عَابِسْ
أبچِي اعْلَى زِينَب وِ المَجَالِسْ
بلكِي انْحِسِب لِلزَّهرَه وَفَّايْ
يَا أبَا عَبدِ الله...يَا أبَا عَبدِ الله


*الشاعر الموفق السيد علي الموسوي*


رابط قصيدة "من ذاك عاشور " :
https://youtu.be/LhAeV7CK5-4
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{وينك علي}•

مثل نار الضمير أحسه ابداخلي
كلما شفت فقير صحت وينك علي

۱/ للأسف بعض البشر بالفقره تهزه
والله ذوله عد علي إلهم معزه
آه يابويه اليتيم اشگد يعزه
علي چفينه صواني وحچيه خبزه

على الفقره الأمير چذب ما يعتلي
كلما شفت فقير صحت وينك علي

٢/ هذا يا إسلام هسه ابگاعه فقره
علي باني ابحضنه للأيتام حضره
علي اتلث تيام ما ماكلّه تمره
امن اليتامه يستحي خافن تشكره

علي ايگول الحصير ذهب أصبح إلي
كلما شفت فقير صحت وينك علي

٣/ نور يتحول علي ابليله وظلامه
وما تجوع ابدولته حتى الحمامه!
عنده تسوه الدنيه ضحكات اليتامه
يگلب الدنيه و يجيب إلها ابتسامه

ابوجوده ما يحير يتيم وسائلي
كلما شفت فقير صحت وينك علي

٤/ علي مستشفى الفقير او شاع صيته
يگضي أكبر حاجه بچفوفه البخيته
علي نص الليل يتفگد رعيته
الله جاب الرحمه خلاها اعلى بيته

يجير التستجير يگلها اتدللي
كلما شفت فقير صحت وينك علي

٥/ ما يخيب الراحله وحاشه يرجعه
علي دكتور و فقط كشفيته دمعه
صار للأيتام أبو و الفقره ربعه
علي حبه ايصير يوم الگبر شمعه

شفيعي بالأخير أنا و ناسي و هلي
كلما شفت فقير صحت وينك علي


*الشاعر الموفق السيد علي الموسوي*


رابط قصيدة "وينك علي " :
https://youtu.be/PCrplCGIaC8
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{يا ناعي}•

يا ناعي...إترك مصابي بهالمسية
يا ناعي...إقرالي عالطلعت سبية
يا ناعي...يا يوم مثل الغاضرية؟

١/جعفر الصادق آنه بليلة وفاتي
إقره مقتل جدي و انسى كل مماتي
داري حرگوها و بناتي بسد عباتي
و لبنات احسين فدوه كل بناتي

يا ناعي...مثل الخيم حرگوها داري
يا ناعي...و عماتي هامن بالصحاري
يا ناعي...و النار شيطفيها بيه

٢/إي يا ناعي اقرالي عن ذيچ المصيبه
البيها جسم اعلى الترب بس راسه هيبه
عالرمح مرفوع ليل و يضوي شيبه
الوطن فوگ الرمح بس إخته غريبه

يا ناعي...فوگ الرمح قرآن يقره
يا ناعي...حتى الرمح يبچي اعلى نحره
يا ناعي...واگف سمه فوگ البريه

٣/أرد اسئلك بس سؤال و هاي هيه
هم سمعت بيوم طلعت هاشميه؟!
المصيبه الشيبت ولد الزچية
بعشره عاشور اطلعت زينب سبيه

يا ناعي...عاده القتل سهله علينه
يا ناعي...بس السبي ما شايفينه
يا ناعي...فرحوا بسبي الهاشميه

٤/الزهره طبت إنحني يا ناعي إلها
مبين عليها الكسر محنيه كلها
أمي ماتت بالرفس هيه و طفلها
صيح واويلي على الما تم حملها

يا ناعي...أمي انكسر من عدها ضلعين
يا ناعي...و يطيب من تنعى على حسين
يا ناعي...من الحچيته شيبقه بيه

٥/آخر المجلس خبر إلكم أذكره
لون شاهدتوا شخص إيده اعلى ظهره
هذا قائمنا حضر و ادموعه حمره
بالفرج إدعوله كون الله يصبره

يا ناعي...بعيونه واضح إنكساره
يا ناعي...أفضل الأعمال إنتظاره
يا ناعي...نتنطر الطلعة البهية


*الشاعر الموفق حسين الفتلاوي*


رابط قصيدة " يا ناعي " :
https://youtu.be/VELIy1hI8u4
_________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________________________
القناة الرسمية للملا مصطفى السوداني على telegram :
https://t.me/Mustafa_Sudane
_________________________

•{شهر البچي}•

كون البچي بشهر البچي من دم نهله
منهو الإله انطگت مرى و تبچي اعلى تلة

{ويلي على زينب}

١/من بيكم العنده إخت شلعوا گلبها
هذا اليطگها اعلى الوجه هذا اليسبها
واحد دفعها بالرمح واحد سلبها
بس شبديها ام الخدر أخوتها قتلة

{ويلي على زينب}

٢/من بيكم العنده إخت تركض وحيده
حيرة و عليها المشرعة صارت بعيده
وصلت لخوها بلا وعي و ترجّع إيده
و الحيرة مو بس خايفة الحيرة شتگله

{ويلي على زينب}

٣/گالتله إگعد يالأخو و انظر دمعتي
و لتگلي لو شفت المتن عذريني يختي
و لتگلي لو تشتم حرگ وين إنت چنتي
حرگوا خيمنا و الشمر سلّبني ثكلة

{ويلي على زينب}

٤/هاي التنوح اعلى الولد و يشب حزنها
و هاي التحنّي بالدمة چفين إبنها
و ذيچ التلولي عالمهد ميتة أظنها
طفل انذبح و تسلبت من عدنا طفلة

{ويلي على زينب}

٥/احسين أخوها اعلى الترب جثته رمية
و ركضت رقية لجثته ركضت سبية
گاملها و بلاية نحر شابگ رقية
و تگله نومك عالترب لا مو محلة

{ويلي على زينب}


*الشاعر الموفق السيد محمد المنصوري*


رابط قصيدة " شهر البچي " :
https://youtu.be/V_N0yl3dnjY
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

▪︎{إدفني بيدك يا علي}▪︎

هالليلة لو تحضر إلي
شيعني و قرة بمقتلي
و ادفني بيدك يا علي...هاي المسية

يالبيدك آثار السبي
ريتك تحقق مطلبي
أنصب عزائي زينبي...بالكاظمية

١/عافوني طايح عالسطح محد يهمه غيابي
صح غربة لكن من طحت ما سلبوها ثيابي
بمصابي ثاني كربله بس الفرق بمصابي
ما سدوا اعليه نهر سدوا اعليه بابي

ليلي مثل ليل اهدعش
ريگي يبس من العطش
بس ما شفت جسمي انفرش...بالأعوجية

ظامي بقيت اعلى السطح
بس جسمي ما بيه أي جرح
لا منسلب لا منذبح...بالكاظمية

٢/يالبيدك حسين اندفن لمن دفنته اخبرني
واگف چنت لو منتچي ظهرك عدل لو محني
أتمنى صدري منسحگ حتى امن اگول ادفني
أعضائي تبقى مطشرة و مثله بحصيرة اتلمني

صح جسمي هم مثله وگع
بس گلبي مو نحر انگطع
لا بالرمح راس انرفع...و اختي سبية

ما تلگة بچفوفي حبل
لا ركبوني اعلى الهزل
عالصدر ما ذبحوا طفل...بالكاظمية

٣/أنصب عزائي زينبي و بمقتلي من تبدي
ما تلگه خيمة تحترگ لا عالترايب خدي
ما تلگه تله لا مرى لا حيرة تلگه عندي
و ما تلگه من سوط الشمر طفلة تلوذ بسدي

تلگاني بس طف مختصر
ما عندي طفلة عالنحر
اتشمني و تموت امن القهر... آه يا رقية

ماتت على راس الأبو
و اندفنت بچف الأخو
هم تعرف الليلة شكو...بالكاظمية

٤/غسلني من ماي النهر هالليلة من تلفيني
زينب و ابو فاضل تظل قصتهم اتبچيني
جرحي تشوفه مشرعه بس من تغمض عيني
ما تلگه بعيوني سهم و مگطعه چفيني

آخر ثواني و يحتضر
ما قصر و ظل يعتذر
عذريني يا أم الخدر...گطعوا إدية

مثل اخته من راحت إله
جسمي أريدك توصله
خليني اشاهد كربله...بالكاظمية

٥/أدري اعلى حالي تنهضم عالجسد من اتصلي
تذكر علي الأكبر وگع و بدمعك اتباوعلي
وسدني مثله باللحد و بطيحته سولفلي
جسمه تطشر عالترب حيرة شتريد تگلي

دمعه عمه عيون المهر
مو للخيم رد للشمر
و براسه كل ما ينطبر...ينظر لخيه

يا ليتني وياه چنت
يا ليتني گبله متت
يا ليتني شگد رددت...بالكاظمية

٦/كل عمري من يوم الصرت حزني عليكم دايم
و هالليلة لمن نلتقي ما ندري الله شقاسم
شيعني بيدك يالوفي ماكو وفه بالوادم
و گبري أريده ينحفر يم جدي موسى الكاظم

أنفاسي ظلت تنذبح
تصعد جرح تنزل جرح
راح انشمر من السطح...لحگ عليه

أسرع عليك بفاطمه
حاير و باوع للسمه
هاي الثواني الخاتمة...بالكاظمية


*الشاعر الموفق السيد محمد المنصوري*


رابط قصيدة " إدفني بيدك يا علي " :
https://youtu.be/FakpIGoAkfE
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{عشاگ النوح}•

هذَا احْنَا عِشَّاگِ النُّوح نِتْنَفَّسِ اللَّطمِيَّة

١/و الدِّنيَا مَتْهِزنَه اليِهِزنَه البِسْمَارْ
هذَا الجَزَع مِن الله وَي دَمنَا انْدَارْ
مَا عِدنَا قِدوَه غِير أبُو رَاسِ الحَارْ

مَركَز قِوَانَا العَبَّاسْ
وِ الرَّاضِيَه المَرْضِيَّه

٢/مَا عِدنَا قَائِد فَاطِمَه قَائِد عَامْ
مَكسُورَه لَكِنهَا سَنَد لِلْخِدَّامْ
تِشْفِي ألَمْنَا و هِيَّه مَترُوسَه آلَامْ

هِيَّه أمْنَا أمِّ الكَلْفَاتْ
تِمطُر وِفَه و حِنِّيَه

٣/حيَّ عَلَى فَرضِ الجَزَع نَادِينَا
و صِحنَا يَا فَاطِم لِلَّطُمْ حَزمِينَا
الخِدمَة حَيَاةِ اوْ عَنهَا لَتْبِعدِينَا

عِيشَتْنَا كِلْهَا اعْلَى النُّوحْ
و مَسْكَنَّه الحْسِينِيَّه

٤/هَايِ البِشَارَه لِلِّزَم عُوچِيَّه
يِرجَع شَبَابِ اليِلْطُمِ ابرُوحِيَّه
وِ اتْقَوِّي حِيلَه فَاطِمَه القُدْسِيَّه

لُو حَاجِتَه بِالمَرِّيخ
وَي فَاطِمَه مَگْضِيَّه

٥/اليِحْچِي عَلِينَا شمَا حِچَه مَا نِنْقَصْ
الهِمَّه تِكبَر والله مَا تِتقَلَّصْ
الْسَانَه خَيْ كُفَّه قَبِل لَا يِنگَصْ

خَل يِحذَرِ امْنِ الزَّهرَاءْ
لَيْزَعِّلِ العِلْوِيَّه

٦/بَدِّي دِمُوعَك لِلضِّلِع مَا نَادِمْ
بِالجَنَّه تِلْگِيهَا قَصُر يَالخَادِمْ
مَالَكْ عِلَاقَة و لَا تِهِم لِلوَادِمْ

لَتْشِغْلَكِ "القِيلِ اوْ قَالْ"
و لِلدَّمْعَة صَفِّي النِيَّه


*الشاعر الموفق عبدالله الشويلي*


رابط قصيدة " عشاگ النوح " :
https://youtu.be/zQAemmW5T5U
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{أذكر الغياب}•

ساعه أون...ساعه أحن...واتذكر الغياب
كلي احترگ...لمن يدگ...صوت الهوه عالباب

يل وياكم ما خذتوني
و بعلتي الكلفه تعوفوني

١/ما بين دموعي و حر ناري
أمشي وأرجع فوگ آثاري
شگد مهضومه وشفت بداري...عذاب

الينعاف و علّه التبراله
محد يسأل عن أحواله
فراگ أهله وناسه شخلاله...عذاب

الغربه غربة أهل مو غربة ديار
المشكله يا ناس مو بيدي القرار
متت مو من علّتي امن الإنتظار

يعني شكثر...للينتظر...وبجفنه دمعة عين
كلش صعب...عندي گلب...و مفارگه الحسين

ها تدروني ما تدروني
و بعلتي الكلفه تعوفوني

٢/أفتر واتلمس حيطاني
من حايط واركض للثاني
يرجعلي الصوت بأحزاني...وداع

ما بيهم رده ايردولي
لا وادم عنهم يحچولي
أقبل عنهم لو گلولي...وداع

جروحي أكبر من نعي وچلمة تعال
بلا جواب يصير يكتل كل سؤال
حيل تجرحني صفت چلمة دلال

صوت الدمع...ماينسمع...بس يهضم المشتاگ
مات الورد...من هالبعد...صار النفس حرّاگ

تثگل دمعاتي البعيوني
و بعلتي الكلفه تعوفوني

٣/لو طير يودولي بدمه
أقبل بس أسمع أي چلمه
واتخيل واصل من يمه....سؤال

ضليت بنوحي و آهاتي
يا هو اليسمعهن وناتي
للعتبه وترجع چلماتي...سؤال

لو خبر منهم يجيني أستراح
چان ودولي الرسايل بالرياح
عالأقل أشعر تذكرني اللي راح

صار العمر...حسره وجمر...ومعاتب ودمعات
وي كل فجر...أنذر نذر...يرجع حچي النسمات

چن ميته وما شيعتوني
و بعلتي الكلفه تعوفوني

٤/لو حنيت تهيج جروحي
و اكسر گلب الطير بنوحي
اتعذب چن طلّع روحي...الغياب

أكثر چلمه تأثر بيه
لو گالو هاي العلويه
خلوها بدمعتها و هيه...الغياب

آنه ذيچ الظلت اعليهم تنوح
لا مشيت وياهم و لا عندي روح
آه من الفرگه و اشكال الجروح

لبسي الچفن...و بلا وطن...چي ما خذاني وياه
عمري جرح...و بلا صبح... ليل و عذاب و آه

ولا گلتلهم عذبتوني
و بعلتي الكلفه تعوفوني

٥/يا هو اليسمعهن آهاتي
أطول من يومي وناتي
يخلص يومي تظل دمعاتي...جروح

وعيوني الملت شتّاني
ما ردلي الغالي الخلاني
مليت وملت أحزاني...جروح

ما أريد العافيه خلوني أموت
من أموتن گولو موّتها السكوت!
أرفع اجروحي صرت وي القنوت

هذا الهوه...ما بيه دوه...ما بيه عطر الاحباب
شتحسسه...شتنفسه...يخنگني كلّه اغياب

يا أهلي ارجوكم رحموني
و بعلتي الكلفه تعوفوني


*الشاعر الموفق علي عباس الربيعاوي*


رابط قصيدة "أذكر الغياب" :
https://youtu.be/gsAB884o1UA
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{شكرا جزيلا عباس}•

شُكراً جَزِيلاً عبَّاس مَا قَصَّرِت وَيَّانَه
صَاحِب فَضِل مَا نِنسَاكْ كِل شِدَّة مَا تِنسَانَا

١/بِالحُب إلَك هَالخِدَّام كِلْمَن يِمَثِّل دُورَه
وَاحِد كِتَب "يَا عبَّاس" وَاحِد رِسَملَكْ صُورَه
وِ الغَذِّتَك حُبِّ احْسِين مِطَّمِنَه اوْ مَسْرُورَه
مَشكُورَة أمَّك عبَّاس چِي جَابِتَك مَشكُورَه

وِ اللِّي يِنِكرَك عَبَّاس الله يِخَرْسِ الْسَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٢/مَا دَامَكِ انْتَ مَوجُود كِل حَاجَه مَا مَرجُوعَه
عِندَ الله رَاسَك مَرفُوع وِ احْچَايِتَك مَسْمُوعَه
إحْسِبنَا أيتَامِ احْسِينْ لمَّن غِزَتْهَا اللُّوعَه
نِتوَسَّلَك وِ امْچَلبِين بِچفُوفَكِ المَگْطُوعَه

وِ الحمدلله مَشْكُور كِلشِي بُقَه بِمْچَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٣/خَلِّينَا دُومِ احْنَا اوْيَاك يَالرَايِتَك خِيمَتْنَا
ظَلَّت سِتِر يَا عَبَّاس مَا فَرَّقِت لَمَّتْنَا
خِدَّامَكِ انْظَل وِ اليُوم نِتْوَحَّدِ ابْكِلْمَتْنَا
إحْرُمْنَا مِن كِلشِي اوْ لَا تِحْرُمنَا مِن خِدْمَتْنَا

لُو فَزَّعِتنَا عَالمُوت كِلمَن يِگِلَّك آنَه
صَاحِب فَضِل مَا نِنسَاكْ كِل شِدَّة مَا تِنسَانَا

٤/غَالِي اوْ سَلامَ الله اعْلِيكْ گَد مَا أخُوكِ اتْعَذَّبْ
گَد مَا نِزَف جِسْمَه اجْرُوحْ گَد مَا رقَيَّه تِنْحَبْ
غَالِي اوْ سَلامَ الله اعْلِيكْ وِ اعْلَى الخِيَامِ التِّلْهَبْ
انْحِبَّكِ ابْگَدِّ احْسِينْ وِ ابْگَد مَدَامِع زِينَبْ

حَرْگِ المُخَيَّم للآن بِينَا تِوِج نِيرَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٥/گُربَت مَوَاجِع عَاشُور مِن هَسَّه عِشْنَا ايَّامَه
هذَا اليِحَضُّر زِنجِيل هَذَا اليِحِدِّ القَامَه
بعَاشِر مُحَرَّم عَبَّاس مَا تِكْتِفِي اللَّطَامَه
شنِلطُمْ بَعَد مَا نِرتَاح إلَّا نِطَبرِ الهَامَه

عِشَّاگَكِ احْنَا وِ احْسِين هُوَّه العِشِگ عِنوَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٦/عَلَّمنَا چَفَّك عبَّاس لِلغَالِي نرفَع رَايَه
بِالأربِعِينِيَّه انْرُوح ثَورَة عِشِگ وَفَّايَه
مُو كِلمَنِ ايْمُوتِ ايْعِيشْ وَ احْبَابَه تُبقَى اهْوَايَه
اهْوَايَه وِ شمَيْرِجعُون مَا تِنْقَصِ المَشَّايَه

دَربِ الوِفَه دَربَك صَار بَس عَالشَّرَف دَلَّانَه
صَاحِب فَضِل مَا نِنسَاكْ كِل شِدَّة مَا تِنسَانَا


*الشاعر الموفق السيد محمد المنصوري*


رابط قصيدة "شكرا جزيلا عباس" :
https://youtu.be/KFuli2l9Q_o
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{مشاي و متعني حسينك}•

مشاي ومتعني حسينك
هلا يالشايل رايه
خدام حسين امتانينك
هلا يالشايل رايه

بكل موكب نادينه -٢-
هلا يالشايل رايه

١/ كل سنه انتاني وجودك
وندعي من الله يعودك
بالمشي سر الخلودك...رايتك

عالم الخدمه خذاني
او نحسب أيام او ثواني
ننصب الموكب نتاني...جيّتك

يالجاينه الهذا المضيف العامر
و صوت اليخدمك كله صار و تامر

يالگاصد للجنه نشوفك
خير و طب للديره
والرايه من ترف بچفوفك
خير و طب للديره

والجيتك تانينه
بكل موكب نادينه
هلا يالشايل رايه

٢/ إنته أهم من كلشي عدنه
خطوة اجدامك عشگنه
وخدمتك صارت رزقنه...و نفتخر

يا هلا بجيتك يزاير
كلشي تطلب گلنه حاضر
او نفتخر بالخدمه باچر...بالحشر

شله بحياته الما خدم لحسينه
و بأربعين النوح يفرش عينه

سجلك موقف يبن آدم
باچر يم الزهره
بالمحشر أعمال العالم
باچر يم الزهره

لخطواتك حنينه
بكل موكب نادينه
هلا يالشايل رايه

٣/ خدمتك يالتمشي واجب
كل سنه تشوف العجايب
الخيم صارت مواكب...كربلا

ويّه زينب عدنه غايه
ننتظر جيت السبايه
الكم بكل خطوة رايه...يا هلا

فوگ السمه مكتوبه هاي الكلمه
خدمة الزاير عدنه أعظم نعمه

مكتوبه بدمعة خدامك
شكراً يبن الزهره
ردينه و نخدم بيامك
شكراً يبن الزهره

شرفنه او مُر بينه
بكل موكب نادينه
هلا يالشايل رايه

٤/ بخيمة حسين الچبيره
ننجمع مثل العشيره
بانتظارك ديره ديره...بس تجي

الأي أمر سمعاً و طاعه
والكرم عدنا شجاعه
بخدمتك بس الشفاعه...نرتجي

يالسفرتك صارت نهر مو سفره
يا هو المثلك شانه عند الزهره

هنيالك يالتمشي بغايه
ومحد يوصل قدرك
بچفوفك محلاها الرايه
ومحد يوصل قدرك

العباسك وحسينه
بكل موكب نادينه
هلا يالشايل رايه

٥/ بكل درب تلگونه يمكم
لو عطش مر بضعنكم
ننذر ادموع العطشكم...يا عذب

عفنه البيوت او إجينه
مقصرين اشما حچينه
باربعينك لو بچينه...ننتحب

ويلاه يضعن الشام من رد شيّب
وياها روس اخوتها ردّت زينب!

ردو للطف أهل الغيره
روس اوياهم ردت
زينب يم گبرك و بحيره
روس اوياهم ردت

وتگلك ردينه
بكل موكب نادينه
هلا يالشايل رايه


*الشاعر الموفق مصطفى العيساوي*


رابط قصيدة "مشاي و متعني حسينك" :
https://youtu.be/P-5NA9XbOZ4
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{واحد ما عاف الثاني}•

واحد ما عاف الثاني...بس باچر ما تلگاني
من روحك تطلع روحي
و بالجنة انتظرك آني

١/سوه نبچي گعدنا و شفنا الدنيا ضدنا
كلشي ماكو عدنا..عدنا بس الله كريم
كلام الباري يشهد بأول آية حدد
بسم الله محمد و احنا رحمن الرحيم
نسعى للسلامة مو بس لليتامة
مشبعين الحمامة صرنا عشاگ اليتيم

سبحان اللي خالقنا...اثنين بروح مجمعنا
عنوانك بس دين الله
ما يفرق عن عنواني

٢/يمراية صفاتي إذا تخلص حياتي
تظل بس ذكرياتي و ما تموت الذكريات
و المفارگ خليله خطواته ثجيله
من يمشي اعلى حيله يوگع امن اربع جهات
قبل ما اريد اعوفك سد عيني بچفوفك
صعبة من أشوفك ميت و إنت الحياة

يا حيدر صير اگبالي...وضُم دمعك دمعك غالي
أحزانك تجرح گلبي
و بگلبك جرحه أحزاني

٣/بده هالليلة حزنك قبل ما أمشي عنك
أشبع نظرة منك يا علي تدري شريد
بهالفرگه يا حيدر مو إنته الما تگدر
أنا الما بعدك أگدر لو صرت عني بعيد
بقت ساعاتي تگرب و عليك افراگي يصعب
إنت المنّي أقرب حتى من حبل الوريد

سامحني لو فارگتك...لو بيدي چا ما عفتك
دهري الرايد يبعدنا
خلاك و ما خلاني

٤/لتگول ارد اخبرچ على الفرگه شعذرچ
من عمري اعلى عمرچ ما أكابر يالبتول
إذا رحتي من إديه بحلم مري عليّه
لا تگطعين بيه أرد احلفچ بالرسول
نصبر و شبدينا بأمر الله رضينا
متنا و حتيينا يا علي بعد شتگول

صدگتچ الله الشاهد...واحد ما عايف واحد
ما تبرد نار الفرگه
منهو يعوض خلاني

٥/أوصيك بوصية شوف أطفالي بيه
صبرهم عليه ها يبو گلب الچبير
عوضهم حنيني زينب من تجيني
و آنه مغمضه عيني بيها ما أدري شيصير
يون چم غالي يمي يصيح اشبيها أمي
و عليك شکبره همي گلبك و ضلعي كسير

أطفالك تحتاج الله...لو ونو صيح اسم الله
قرآنك رتل بيهم
و رتلتك يا قرآني

٦/دمعك ما يفيدك و بالدفنة أريدك
تگود اطفالي بيدك أمرك و أمري عجيب
تحس نعشي يشيعك يحيدر يحني ضلعك
تمشي و يجري دمعك و الهوا بصدرك غريب
بعد يا هو اليسئلك و اشلونك يگلك
يشيب حتى ظلك ايعينك الله يالحبيب

أيامك تكسر ظهرك...يا حيدر الله يصبرك
من يجبر كسر الخاطر
و آنه اعرف ما تنساني


*الشاعر الموفق السيد محمد المنصوري*


رابط قصيدة "واحد ما عافي الثاني" :
https://youtu.be/oInx7FVPbb8
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{من البحر إلى النحر}•

من الحسين إلى الحسين
رحلة إسمها الأربعين

إلك نتعنى...مشينا و صحنا...اليريد الجنه
من هنا كربلا

١/ يحسين..من واحد صفر مشايه جيناك
يحسين..خلصنا المجالس و اعتنيناك
يحسين..و ضمينا دمعنا الكربله اهناك

ركعتين ركعتين...تسهيل أمر نوينه
كلمتين كلمتين...بأول درب حچينه
للحسين للحسين...كلنا مشي إجينا

من البحر إلى النحر
يبدي المشي بواحد صفر
المشه المحبوبه...تطيح اذنوبه...قطع مكتوبه
{من هنا كربلا}

٢/ خطوات..نتعب و التعب ما ياخذه الريح
خطوات..يثبتنك ابيوم الغيرك يطيح
خطوات..بيهن كل شبر لحسين تسبيح

إجيناك إجيناك...من كل أرض بعيده
كتبناك كتبناك...فوگ السمه قصيده
قريناك قريناك...بنبرة حزن جديده

حتى الهوه بدربك كتب
تراب المشى يسوه الذهب
بفخر نحچيها...الأرض و البيها...الهوى يدليها
{من هنا كربلا}

٣/ زوار..عين العقل لو گالو مجانين
زوار..أجمل كلمه هاي بدرب الحسين
زوار..فوگ العرش مو عالگاع ماشين

علامات علامات...العرف حق هالزياره
روايات روايات...كأن عرش الله زاره!
معانات معانات...تجارة بلا خسارة

گالو مرض كلنه وفه
تراب اليزور هوه الشفه
المريض المثله...الدرب نندله...الشفاء العله
{من هنا كربلا}

٤/ خدام..شفنه بالطريق هواي خدام
خدام..بكل خطوه تشد للزاير حزام
خدام..مو ببيوتنا بعيونا تنام

يخدمون يخدمون...حتى الهوه اليجيهم
يرفعون يرفعون...راية گمر بديهم
يعزبون يعزبون...عين الحسن عليهم

يچوي الوجه حر الشمس
بهالنعمه هنياله اليحس
ألف هنياله...التغير حاله...السئل گلناله
{من هنا كربلا}

٥/ مشكور..كلمن نصب موكب و الضعن جاي
مشكور..كلمن عطش خيمه و وزع الماي
مشكور..كلمن صاح شد حيلك يمشاي

كله الطير كله الطير...من سفرة المواكب
أهل خير أهل خير...من الطفل للشايب
تره الغير تره الغير...تفهم عشگنا واجب

نزحف زحف يم مصرعه
من الجهات الأربعه
الفرض ميفوتنه...نعاند موتنا...نصيح بصوتنا
{من هنا كربلا}


*الشاعر الموفق مصطفى العيساوي*


رابط قصيدة " من البحر إلى النحر " :
https://youtu.be/ff84kfPIY1g
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{واويلاه جاسم يبني}•

جاسم يا شباب الدين يبني و يا ضوه عيني
أريدك تنذبح لحسين و بدمك تحنيني

١/ دگرب خل أشم ورود...خدك وانسل اجعودك
فگدتك و العگل مفگود...مني و هايم بزودك
و اعلگ يوليدي بحدود...عمك شمعة وجودك
لتنام على ردن الدين...أوفي حسين توفيني

{واويلاه جاسم يبني...واويلاه لا تخيبني}

٢/ صد لمه الولد بعيون...نار و نور تتواگد
يهون الأمر يمي يهون...ماني ابنچ و حامي الحد
إلچ عين التشوف شلون...أسوي للطعن مشهد
وگف وگفة علي بحنين...لمحمد و ذِب عن ديني

{واويلاه جاسم يبني...واويلاه لا تخيبني}

٣/ هلهل گلب رمله و هل...دمعها بشوفة هلاله
يروح الروح يا منهل...نمير الگلب و آماله
يا مرتوب يا مكمل...يسور الخدر و ظلاله
و اعز منك يا ماي العين...انتصار احسين يكفيني

{واويلاه جاسم يبني...واويلاه لا تخيبني}

٤/ ماني ابنچ وگر عيناچ...هودي من الفزع هودي
ثمر گلبچ نمير حشاچ...رواني و انعش وجودي
الگطع النفس حدي وياچ...ما گصر بمجهودي
يمي و لا بد تشوفين...لو عمرت مياديني

{واويلاه جاسم يبني...واويلاه لا تخيبني}

٥/ صاحت هلا بهالنيه...و هلا بهمته الناويها
روح اچسب مراضيه...العمك و امك إرضيها
بيك جروح مدميه...تصير و دمعي جاريها
عليك انرسم بالكونين...و بتنفيذه هنيني

{واويلاه جاسم يبني...واويلاه لا تخيبني}

٦/ عليه فرضت الأحكام...شهاده و كون أأديها
و شما تخبط الأيام...بالصارم لصفيها
چفوف الدين و الإسلام...من دمي لحنيها
و خلد شرف بالدارين...و بالفردوس تلگيني

٧/ لوح بظهر المسفسر...يبني و عالمخيم طوف
هز الرمح و اتبختر...و خل عين العيال اتشوف
يسكن روعها و تستر...بيك و تامن من الخوف
نودعه الباري الكونين...يرعاك و يراعيني

{واويلاه جاسم يبني...واويلاه لا تخيبني}


*المرحوم الشاعر كاظم منظور الكربلائي*


رابط قصيدة "واويلاه جاسم يبني" :
https://youtu.be/RvvjpR_SO_Q
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{ما تغمض العين}•

ما تغمض العين...كل ليلة يا حسين...نسهر سوية
بدرب اليسر...حد الفجر...نسهر سوية

١/ أعتذر مرات من أعتب و أذيك
فرصة عندي الليل بيه أگعد و حاچیك
أحچي وي راسك و گله شبيك ما بيك
من الرمح إنزل يا بعد اختك أداويك

نحرك أسمعه...لمصابي ينعه...و يبچي عليه
حسره و صبر...حد الفجر...نسهر سوية

٢/ مو سوالف أگضي ليلي دمعه و احساس
أحچي بالنظرات و احذر تسمع الناس
الليل كله وياك أحچي و انته بس راس
آه يالجسمك نظرته بخيل ينداس

جسمك عالرمال...و بلا دفن ظال...بالغاضرية
محله العمر...حد الفجر...نسهر سوية

٣/ إنت يا أكثر بشر بالناس احبه
يا هو مثلك منذبح و اعليه گلبه
نحرك ويه الشمر يحچي والله صعبه
متن زينب عوفه و الراسي اضربه

أصرخ أويلاه...سوط الشمر آه...شمسوي بيه
واعلى الجمر...حد الفجر...نسهر سوية

٤/ من السبي تتعب أراملنا و الأيتام
و آنه وي راسك أظل سهرانه ما نام
خويه شوف شلون من تندار الأيام
بيا زمن مسبية بين الكوفه و الشام

و اتغير الحال...تاليها بحبال...مچتوفة اديه
و آنه بعسر...حد الفجر...نسهر سوية

٥/ قصة امصابي بعد عينك أليمه
و ارد اسولفلك بعد عندي هضيمه
وين نغفه بالسبي و ما عدنا خيمه
شما أنيملي يتيمه اتفز يتيمه

ما شايفه النوم...و تسألني كل يوم...عنك رقية
شنهو العذر...حد الفجر...نسهر سوية


*الشاعر الموفق كرار حسين الكربلائي*


رابط قصيدة "ما تغمض العين" :
https://youtu.be/e2TUPIy7mzg
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{محرم فاطمة}•

عاشورين مو عاشور عدكم
المحرم فاطمة شدو حزمكم

للكسروا ضلعها و تمشي محنية
نفتر من حسينية الحسينية
محرم فاطمة

١/يا راية الخدمة
لا تنزل الهمة
كلمن يشد حيله يستقبل النعمه

قادم محرمكم
كسرة ضلع أمكم
للزهره شدوا احزام ردوا المآتمكم

مثل الفزعة و الركضة بمحرم
العاشور الضلع خلونا نلتم
مو إحنا النبات بلايه مأتم

من يغفى حبيب ابن مظاهر
خيفز بينا عمار ابن ياسر
لا يخفت جمرنا و نبقى ليلية
نفتر من حسينية الحسينية
محرم فاطمة

٢/من اليحبي للحدب
فزعتنا الأم زينب
گد الأربعينية و اكثر بعد نتعب

نركض مثل فضة
تستاهل الركضة
نسند مجالسها و هيه المهم ترضه

ما نترك ليالي الفاطمية
زحمة و عيب شنگل للزچية
ننعد شيعة بس اعلى الهويه

عاشور الضلع أذن أذانه
كلمن بالعزه ياخذ مكانه
واحد يبچي واحد يقره لطميه
نفتر من حسينية الحسينية
محرم فاطمة

٣/نذكر محرمنه
بليل اهدعش متنا
نسمع صدى زينب تصرخ يكافلنه

و الزهره صرختها
طبق الأصل بتها
مهضومه مظلومه هالدنيا عاشتها

كلمن وسل ادموعه اعلى زينب
كون اعلى الزچية اعيونه تنذب
و بخت لليبح صوته و هوه ينحب

من جرح الغريبه للغريبه
هنياله اليموت الها بنحيبه
وينه الينطي روحه بلايه منيه
نفتر من حسينية الحسينية
محرم فاطمة

٤/للركبت الهزلة
ننحب صفر كله
الحرمه و چبيرة طيحتها مو سهله

دور البچي نديره
للماتت زغيره
مسبيه ما طلعت مسبيه بالديره

لو لاح الملل واهس گلبكم
ذكرو الميته بس مدللتكم
خير الزهره بيه مغرگتكم

عدكم فاتحه لتلث روايات
ترسوها الچوادر و العزيات
للماتت غريبه بعين مدميه
نفتر من حسينية الحسينية
محرم فاطمة

٥/و المهدي مولانا
ما غايب ويانه
مجلسنا لا يلگه مسدوده بيبانه

بالعتبه اذا يگعد
وين الخدم ينشد
لا ملا لا شاعر لا ناعي لا سيد

تعالو انساعد اجروحه الوسيعه
و ننوح بلا وقار اعلى الوديعه
حتى نحسسه هم عنده شيعة

غريب و ضاگت الدنيا اعلى صدره
صباحا و مساءًا عينه حمره
دعاء الفرج خل نقراله للجيه
نفتر من حسينية الحسينية
محرم فاطمة


*الشاعر الموفق ياسر المطوري*


رابط قصيدة "محرم فاطمة" :
https://youtu.be/3y0FJik1HKk
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{قصة جريمة}•

١/ قُصَّة جَرِيمَه اتْهِز سِمَه مَصْدَرهَا حُرمَه
و مَحمَل حِزِنهَا
قُصَّه الوِگَع بِيهَا سَحِگ مِحسِنِ اوْ أُمَّه
المَا دَر لِبَنهَا
مِن طَاحْ مِحسِن فَاطِمَة رَادَت تِضُمَّه
تِحمِي إبِنهَا

هُوسَة زِلِم وِ المِحسِن ضَايِعْ
أوَّل طِفِل وَي بَابِي ايْصَارِعْ
بِينِ الجِدَم رَايِح مِحسِنهَا
ثَارِي الطِّفِل وَي أُمَّه وَاگِعْ

مَا شَم هَوَه بَعْدَه...مَا هَز أحَد مَهْدَه
حِفرَوْا گُبَل لِحْدَه...بِيه مَا تِهَنَّوْا

{وَاوَيلَاه يَا فاطِمَة}

٢/ هِيَّه المُصِيبَه يَم عَلِي وِ اشْحَالْ گَلبَه
مِنهِدِم حِيلَه
مَا صَايِرَه ابِّيتَه گَبُل اِيْدِخلُونَه غُربَه
و مَا بِيدَه حِيلَة
يِضْرُب حُرُمْتَه أنْذَلْ بَشَر لِلْمِثلَه صَعبَه
اشْصَارِ ابْدِلِيلَه

صَدمَه چِبِيرَه وَ لَا عَالخَاطِرْ
قَالِع خِيبَر مَكسُورِ الخَاطِرْ
وِالتِّهْضُم گَلبَه اتْفَرْهَد بِيتَه
فَاتِح صِفِّينِ ايْدَوُّرْ نَاصِرْ

وَسْفَه احْتِرَگ بَابَه...و دَاسُوهَا إلَه اعْتَابَه
يَا لُوعَةِ امْصَابَه...و يِحمِي عِيَالَه

{وَاوَيلَاه يَا فاطِمَة}

٣/ أوَّل سَبَب كَسرِ الضِّلِع أهْلِ السَّقِيفَة
وِ البَاب يِشهَدْ
حُرمَه الوَحَدهَا تِنْوِلِي ابْأمْرِ الخَلِيفَة
و عَافَوْا مُحَمَّد...نِكْرَوْا مُحَمَّد
جِيشِ ابْمَحَامِل وَ اسْلِحَة اوْ حُرمَه ضَعِيفَه
و مَا إلهَا أحَّد

حِيدَر وَصِيَّه الكِسرَةْ ظَهرَه
اگبَالِ اعْيُونَه ايْضِرْبُونِ الزَّهرَه
اگبَالِ اعْيَالَه اوْ بِيتَه ايْچَتفُونَه
حَگهَا الوَادِم مَا تِعرُف عِذْرَه

حَامِي الحِمه الصِندِيدْ...و راعِي الكَفالَه الحِيدْ
يِصْفُگهَا إيدِ ابْإيدْ...ما بِيدَه أيْ شِي

{وَاوَيلَاه يَا فاطِمَة}

٤/ بِالعَرَب لُو تُوگَع مَرَه اتْطِيحِ العَشِيرَه
و تِغتَاضْ أهَلهَا
و لُو بِيتْ وَاحِد يِحتِرِگْ تِفزَعْلَه دِيرَه
تِطفِي أجَلْهَا
بَسْ فَاطِمَة اتْطِيحِ ابْزِلِم مَا عِدهَا غِيرَة
تِترَحَّمِ الْهَا

بِيتِ احْتِرَگ هُوَّه اوْ بِيبَانَه
وِ التِّهضُم مَا فِزعَوْا جِيرَانَه
وِ ابْحِجَّت مَا سِمْعَوْا بِالصَّايِرْ
بَابِ الزَّهرَه اوْ هَايِج نِيرَانَه

شَحَّت ضَمِيرِ الجَارْ...مَا طَفَّه ذِيچِ النَّارْ
فُوگِ الجَّرَه وِ الصَّارْ...نِكْرَوْا كَسِرهَا

{وَاوَيلَاه يَا فاطِمَة}

٥/ لِيشِ النَّبِي مِن فَاطِمَه يِطْلُبِ الرُّخصَة
بوَگتِ الزِّيَارَة
مِن كِثُر خُوفَه بفَاطِمَة اعْلَى البَابْ وصَّه
يبقَى وُقَارَه
صَارِ العَكِس حَچِي النَّبِي مَا صَار نَصَّا
و حِرگَوْا دِيَارَة

انْتِهكَوْا حُرُمتَه اوْ حُرمَةْ بِيتَه
مَقْصَد حِقِدهُم مُوتِ ابْنَيْتَه
روحَه امْنِ الدِّنْيَا اعْيُونِ الزَّهْرَا
لْهَذَا السَّبَبْ سِلْبَوْا عَافِيتَه

أبشَع فِعِل وِ امْصَابْ...عِصْرُوهَا وَيَّه البَابْ
مَا مِش أثَر الأصْحَابْ...مِنْ حِرْگَوِ البِيتْ

{وَاوَيلَاه يَا فاطِمَة}


*الشاعر الموفق علي الحسن*


رابط قصيدة " قصة جريمة " :
https://youtu.be/R6_GwRT_X4c
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________