*{يَا مَحْبُوبِي}*

يَالتَارِسِ اعْيُونِي اوْ إِيدَيْ وِ جْيُوبِي
كِلْ عَامْ وِ انْتَ بخِيرْ يَا مَحْبُوبِي

١/ كِلْ عَاشِگِ ابْمَعْشُوگَه بِحْسَاسَه ايْذُوبْ
و كِلْمَنِ و لُونِ محَبِّتَه ويَ المَحْبُوبْ
برَاسِ السَّنَة و كِلْ عِيدْ لِلنَّاسِ اسْلُوبْ

بِالتَّهْنِئَة و آنَه الدَّمِعْ بِاسْلُوبِي
كِلْ عَامْ وِ انْتَ بخِيرْ يَا مَحْبُوبِي

٢/ دُورَةْ سَنَة اشْتِعْنِيلِي خَلِّيهَا اتْدُورْ
هَذَا آنَه عَايِشْ عُمْرِي عَشْرَةْ عَاشُورْ
بِيش أحْتِفِلْ ؟ غِير إنْتَ ضِلْعَكْ مَكْسُورْ !

بنَبْرَةْ حِزِنْ كَاتِبْلَكِ بْإسْلُوبِي
كِلْ عَامْ وِ انْتَ بخِيرْ يَا مَحْبُوبِي

٣/ دَمْعَةِ المَأْتَمْ تُبْقَى حِنَّة اعْلَى البُوبْ
المَا فُگَدْ يُوسِفْ مَا يِحِسِّ ابْيَعْگُوبْ
وِ الكَشْخَه كَشْخَةْ سُمْعَه مُو كَشْخَةْ ثُوبْ

و هَذَا آنَه كَاشِخْ بِيكْ وَ اسْوَدْ ثُوبِي
كِلْ عَامْ وِ انْتَ بخِيرْ يَا مَحْبُوبِي

٤/ كِلْ يُوم مو كِلْ عَامْ وِ انْتَ الغَالِي
تَارِسِ اعْيُونِي و دُومْ شَاغِلْ بَالِي
لو مَا خِدِمْتَكْ آنَه يَا هُو بحَالِي

خِدْمِتَكْ خِيرِ اوْ سَاتْرَتْلِي اعْيُوبِي
كِلْ عَامْ وِ انْتَ بخِيرْ يَا مَحْبُوبِي

٥/ كِلْ عَامْ وَ آنَه اعْلَى العَهَد وِ الخِدْمَة
أدْعِي الله لا يِحْرُمْنِي هَايِ النِّعْمَة
حَتَّى أبْچِي حَدْ مَا تِطْفَى عِينِي و تِعْمَه

حَتَّى آنَه اگُولَنْ حَقَّقِتْ مَطْلُوبِي
كِلْ عَامْ وِ انْتَ بخِيرْ يَا مَحْبُوبِي

٦/ كِلْ عَامْ وَ آنَه بكِلْ خَمِيسِ ببَابَكْ
أبْچِي اعْلَى نَحْرَكْ وَ احْتِرِگْ لِمْصَابَكْ
بِسْمَكْ أسَبِّحْ وَ اسْجِدِ اعْلَى اعْتَابَكْ

وَ اطْلُبِ بجَاهَكْ تِنْغِفِرْلِي ذنُوبِي
كِلْ عَامْ وِ انْتَ بخِيرْ يَا مَحْبُوبِي


*الشاعر الموفق محمد الفاطمي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " يَا مَحْبُوبِي " :
https://youtu.be/KHqNiBBoySw
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{عَمْ يَا حَبِيبْ}*

عَمْ يا حَبِيبِ احْسِينْ ظَلْ وَحْدَه
بَس آنَه و الله و خِيمِتَه عِنْدَه

لا جَاسِمْ لا أكْبَرْ
و ظَهْرَه بظَهْرَه ما يِحْضَرْ

١/ امْنِ المُخَيَّم مَا إجِيتَكْ لأَن مَا عِدْنَه مُخَيَّمْ
هَا يَبِنْ ظَاهِر نَخِيتَك لا تِخَيِّب ظَنِّي يَا عَمْ
أدْرِي مَا اتْقَصُّرْ و اعُرفَكْ عَاشَتِ ايدَكْ عَمِّي تِسْلَمْ
بَسْ تَرَى احْسِينِ التِّحِبَه عِفْتَه عَارِي و لابِسِ الدَّمْ

تِقبَل يِظَل عَالغَبْرَة مَحْبُوبَكْ ؟
إنْطِينِي يَا عَمْ بِالعَجَلْ ثُوبَكْ

جِسْمَه و مَظْهَرَه اتْغَيَّرْ
و ظَهْرَه بظَهْرَه ما يِحْضَرْ

٢/ اطْلَابَه يَا عَمِّي چِبِيرَة شگَدْ خَذِتْ مِنْ حِيلْ حِيلِي
مَا طِلَع مِنِّ المُخَيَّمْ طِلَع مِن رُوحِي كَفِيلِي
حسِينْ رَاحِ اوْ مِنْ إجَانِي صَاحْ زِينَبْ عَايِنِيلِي
بوَجْهِي تِلْگِين أبُو فَاضِلْ مِنْ غِيَابِچْ يِشْتِكِيلِي

هَذَا العِذُرْ مُو بَس عِذُرْ أدْرِي
كَاسِرْ ظَهَرْ مَعْصُومْ وَي ظَهْرِي

قَبْلِ الحَافِرِ اتْكَسَّرْ
و ظَهْرَه بظَهْرَه ما يِحْضَرْ

٣/ مِن قَبِلْ سَاعَاتِ الأكْبَرْ مَوَّتِ احْسِينِ ابْغِيَابَه
طَافَتِ اسْيُوفِ اعْلَى جِسْمَه ذِبْحَوِ الشِّيبِ بشَبَابَه
گَلِّي زِينَبْ شِنْهُو اسَوِّي شَدْ عَلَى عيُونَه العِصَابَه
امْنِ البُوَاچِي عِينَه نِزْلَتْ و طِلَعْ لِلْحُومَه ابْتَرَابَه

مِنْ حِيرِتَه امْنِ اِيدَه فِلَتْ مُهْرَه
بَس شُمَرْ روحَه اعْلَى ابْنَه عَالغَبْرَه

شلُونِ احْسِينْ يِتْحَيَّرْ
و ظَهْرَه بظَهْرَه ما يِحْضَرْ

٤/ يَا إبِنْ ظَاهِرْ أزِيدَكْ تِذْكُرِ الشَّابِ اتِّحِبَه
چِنِتْ مِتْوَقِّعْ تِزِفَّه إگعِدِ اوْيَايِ و نِنِدْبَه
القَاسِمَ الله مَا قِسَمْلَه و بَيَّنِ اعْلَى حسِينْ تَعْبَه
هِيَّه هَايِ الكُوفَه عَمِّي تَالِي طِلْعَت کِلْهَا چِذْبَه

و الله وَكِتْ خُولِي يِمِد إيدَه
عَنِّ الحُسَينِ الوَادِمِ ابْعِيدَه

الكُونِ اشْمَكْبَرَه يِزْغَرْ
و ظَهْرَه بظَهْرَه ما يِحْضَرْ

٥/ عَمْ حَبِيبِ اشْلُون أصلِّي وَگْفَةِ التَّلْ تَعِّبَتْنِي
إي صِدِگْ چَانَتْ دَقِيقَة بَسْ دَقِيقَة و شَيِّبَتْنِي
رايِدِ اعْلَى حسِين أحَشْمَكْ مَا أحَشْمَنَّك عَلَى ابْنِي
عون إبنِي شگَدْ يِحِبْنِي گِتْلَه يُمَّه لا تِحِبْنِي

فِدْوَه الوِلَدْ لِلْخَال آنَه ادْرِي
و مو أحْسَنِ امْنِ الزَّهْرَه يَا عُمْرِي

گِلْتِ ولِيدِي وِ المَنْحَرْ
و ظَهْرَه بظَهْرَه ما يِحْضَرْ

٦/ مَا گِمِتْ آنَه و أعَاتِبْ رَاح أرُوحَنْ أنْخَى عَابِسْ
مِنهُو يِجْسَر عَالتَّرَاچِي لَوَنْ مَا سِلْبَوْا مَحَابِسْ
حسِين مَاتِ اوْ كِلْشِي مَيِّت مَا بُقَى بِالدِّنْيَه وَاهِسْ
التَّارِسِ الكُونِ ابْتِسَامَه حِزِنْ صَارِ الكُونْ تَارِسْ

حَتَّى الوحوشِ البِلْفَلا نَاحَتْ
و مِنِّ السِمَا دمْعَتْنَا بِيه طَاحَتْ

يالمَا بِيكْ تِتْعَذَّرْ
و ظَهْرَه بظَهْرَه ما يِحْضَرْ


*الشاعر الموفق حمزة السماوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " عَمْ يَا حَبِيبْ " :
https://youtu.be/nHezYi9Tveo
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{لا يَگَلْبِي}*

لا يَگَلْبِي اثْمُنْطَعَشْهَا بِالتُّرُبْ مَا تِنْدِفِنْ
اشْمَاخِذِ اوْيَاكِ ابْنَعَشْهَا لْمَگْبَرَه اتْشَيِّعْ غُصِنْ
لا يَگَلْبِي مَا أرِيدَكْ
تِدْفِنِ اجْرُوحْ الله بِيدَكْ

١/ آنَه يَا گَلْبِي الصُّمِيدَه يَالطِعِتْنِي ابْكِلْ حَرُبْ
لِيش أحِسَّكْ مو إلِيَّه و تُطْلُبِ المَا يِنْطُلُبْ
اتْگِلِّي إِدْفِنْهَا وَ اگِلَّكْ فَاطِمَة مو لِلتُّرُبْ
فَاطِمَه ادْفِنْهَا بِدَيَّه بِاخْتِيَارَكْ لُو غَصُبْ

يَا خَلِيلِ اللِّي دِفَن بِيدَه خَلِيلَه
و يِنْطُلُبْ مِنَّه طَلَبْ مَاكُو مَثِيلَه
كُون أضَيْعِلْهَا الگَبُرْ وَ اخْفِي دَلِيلَه
يَا هو السَّواهَا گَبْلِي اوْ نَامْ لِيلَه

بِالظَّلَامِ اتْرِيدَ أشَيِّعْ شَمِسْ رَادَتْهَا السِّمَه
و يِنْطِلُبْ مِنِّي أضَيِّعْ گَبُرْ وَسَّدْ فَاطِمَه
زِيدْ بِدْمُوعِي و أزِيدَكْ
تِدْفِنِ اجْرُوحْ الله بِيدَكْ

٢/ لا يَگَلْبِي اللِّيلْ غُرْبَه و فَاطِمَه بأحْلَى عُمُرْ
يُبْقَى غَالِي و يُبْقَى إسْمَه الغُصُنْ لَمَّن يِنْكِسُرْ
فَاطِمَه كِسْرَوا ضِلِعْهَا و لِيلِي رَايِدْهَا لْگَبُرْ
بيَا زَمَنْ صَارَتْ يَا گَلْبِي اللِّيلْ نِدْفِنْ بِيه فَجُرْ

مَيِّتِ اوْ حَيْ أنْحِسِبْ هَايِ العَجِيبَه
هَذَا حَالِ الوَدَّعِ ابْسَكْتَه حَبِيبَه
سَكْتَه أدْفِنْ مَا گِدَرْتَ أنْعَى المُصِيبَه
اللِّيلْ غُرْبَه و رُوحِي وَيْ فَاطِمْ غَرِيبَه

اتْعَذَّبِتْ لِيلَةْ دَفِنْهَا صَبْرِي مَا كَفَّه الحِزِنْ
جَرِحْ مَا يِنْشَافْ بِيهَا ، أظَنْ مِنْ چِلْمَةْ "وَ إِنْ" !
يَا صَبُرْ يُبْقَى اوْ يِفِيدَكْ
تِدْفِنِ اجْرُوحْ الله بِيدَكْ

٣/ العَذَابِ اللِّي ابْوَجِهْهَا وُضَحْ كِلِّشْ بِالغَسِلْ
مبَيْنَه أمْ يَابِسْ لِبَنْهَا يَعْنِي مَيْتِلْهَا طُفِلْ
المَيِّتِ اوْ مَكسُور ضِلْعَه اتْعَدْلَه بَسْ مَا يِنْعِدِلْ
مَايْلَه لْجَانِبْهَا مَاتَتْ و بِيدِي دَمْعَتْهَا تِهِلْ

گبَالِي تِنْعَادِ المُصِيبَة و عَصْرَةِ البَابْ
مَا شِكَتْلِي و چِنْتَ أظِنَّنْ بِالضِّلِعْ طَابْ
چَفِّي مِنْ مَرْ يَمْ ضِلِعْهَا فَزِّ الصْوَابْ
رَاحْ أدْفِنْهَا بكَسِرْهَا اضْمَادْهَا اتْرَابْ

طَيْبَه مَاكُو اجْرُوحْ بِيهَا آنَه اوَدِّعْهَا رِدِتْ
مَايْلَه حَتَّى ابْگَبُرْهَا هِيچْ مَيِّتْ مَا شِفِتْ
الآه لِلزَّهْرَه نَشِيدَكْ
تِدْفِنِ اجْرُوحْ الله بِيدَكْ

٤/ گَبُلْ مَا أضْعَفْ يَا گَلْبِي و دَنَّگِتْ وَ آنَه عَلِي
جِفِنْ أزْرَگْ لِلزِّچِيَّة مَا يِرُوحِ اوْ يِنْجِلِي
اليِشَاهِدْ هِيچْ مَيْتَة يگُولْ مَا عِدْهَا وِلِي
شلون أغَمْضِلْهَا جِفِنْهَا و عِينْهَا اتْعَايِنْ إلِي

مَيْتَة وِ اتْعَايِنْ إلِي اوْ أزْرَگْ جِفِنْهَا
حَيِّرَتْنِي بكِلْشِي حَتَّى بلَفْ چِفَنْهَا
مَا أظَنِّ البَاقِي سَالِم مِنْ بَدَنْهَا
سوط أظَنْ تَارِكْ وَرَمْ بَعْدَه ابْمَتِنْهَا

ضَعَفْ حِيلِي شلُون أحِمْلَه شلُونْ يِنْشَالِ الكَسُرْ
و الله حِرْتِ اشْلُون أنَزِّلْ بَدَنْ فَاطِمْ لِلْگَبُرْ
يَا عَلِي خُطِّ اعْلَى جِيدَكْ
تِدْفِنِ اجْرُوحْ الله بِيدَكْ

٥/ آنَه عَايِشْ وَيْ ضُوَاهَا ابْلَا ضُوَه ايْمُوتِ الشَّمِعْ
مِثِلْ وَرْدَه اوْ عَاشِرَتْنِي و نِدَه عِشْرَتْنَا دَمِعْ
الوَرْدَه مِنْ أوَّلْ عُمُرْهَا و هِيَّه تِدْرِي تِنْگُطِعْ
تِفْرُقِ اعْلَى الوَرْدَه فَاطِمْ اتْمُوتْ لَمَّنْ تِنْدِفِعْ

فَاطِمَه وَرَّدْ عُمُرْهَا ابْمَايْ دَمْعِي
لِيشْ مَا صَاحَتْ عَلِي إنْهَضْ يَا دِرْعِي
تِدْرِي مَچْتُوفِ ابْوُصِيَّه اوْ هَذَا وَضْعِي
ادْرِكْنِي مَا صَاحَتْ تِخَافِ اتْجُرْحَه سَمْعِي

احْسَاسِي مَا مَجْرُوحْ مِنْهَا حَتَّى مِنْ طَاحَتْ أرُضْ
الزَّهْرَه رَاحَتْ بَالِي عِدْهَا أوَّلِ اوْ أوْجَبْ فَرُضْ
يَا گَلُبْ هَالرَاحْ عِيدَكْ
تِدْفِنِ اجْرُوحْ الله بِيدَكْ


*الشاعر الموفق أحمد اللامي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " لا يَگَلْبِي " :
https://youtu.be/A54kPv2zuUM
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{البسمار و الحافر}*

البسمار للحافر حجه   أحزان
گله عله طولي جم ضلع  لان

والحافر روى للبسمار
بنص كربله شنهو الصار
أحزان

١/ صنف الحَديد بكربله سوه اجتماع ومأتم
البسمار اجه بس منثني الحافر اجه يگطر دم
كلمن يسولف قصته وصار الحجي هم بهم
الحافر اول ما حچه بسحگ الصدور التنشم

گال اني بيه شجم صدر  راح
وجم طفل جواي الهوه  وطاح

الدنيا  دخلت انذار
بنص كربله شنهو الصار
أحزان

٢/ البسمار حين اليِّ نطق صارت اجزائه حمره
كال اني دفعوني غصب وطگيت ضلع الزهره
وبعدين طحت اعله الصدر وفوگاي باب شكبره
من ثبتوني  ما مِلت  اني الثنتني  العصره

بضلع الزجيه منعووج   حيل
عَوجَت ضلوع بحافر  الويل

وهسه اني اسأل محتار
بنص كربله شنهو الصار
احزان

٣/الحافر بچه وگال بهمس عندي المصيبه الكبرى
احسين بعده بي نَفَس واني انكسرت بصدره
زين انت فوگاك الجذع فوگاي ثِگل العَشره
ما طلع من جواي ابد ساويت صدره وضهره

انطحن حيل وعالارض  ساح
طرفي طرف گلبه ترا   لاح

هم سامع بخيل و نار ؟
بنص كربله شنهو الصار
أحزان

٤/البسمار گال إمنُم الحسن طاح الجنين وشهگت
رادت تشيله وانسطر خدها وابد ما لِحگت
والموقف الأصعب بعد عليهم جِذوع انطبگت
انغمى عليها منِ الجرى واجفوف اديها احترگت

واعله الزجيه من دِوَت  نار
داسوا على الباب بحقد  حار

وهسه انت تروي الاخبار
بنص كربله شنهو الصار
أحزان

٥/ قبل انتهاء الاجتماع الحافر حچه جم جلمه
طشرت الحسين وحِرت منهو اليجي ويلمه
من كثر ما دست الجثث زلمه وصل يم زلمه
اني السمعت بكربله يحسين يمه يمه

امك واجيتك يالوفي  كوم
گالولي عطشان وبَلا  هدوم

موَزَع وصاير طشار
بنص كربله شنهو الصار
أحزان

٦/ الرأي مو يمنه ابد من صعبه طحنه بصعبه
لو بيدنه نبدل الصنف ونصير خيط بجربه
بمتن أبو فاضل نستقر وِيحبنه واحنه نحبه
ننطحن وي عينه طحن ونعيش ذكره بگلبه

نتمنه   چنه   بكربله  ماي
ونروي الطفل منِ الضمه هواي

تمنينه نطفيها النار
بنص كربله شنهو الصار
أحزان


*الشاعر الموفق عبد الله الشويلي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " البسمار و الحافر " :
https://youtu.be/kVexqZW40R4
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{لُو نُوصَلِلْهُمْ بِالعُمُرْ مَرَّة}*

لا ظَلْ صَبُرْ بِالرُّوحْ لا زِرْنَه لَحْبَابْ
نِگْصِدْهُمِ ابْيَا يُوم وِ نْشِمِّ التْرَابْ
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة

١/ طَبْعِ اليِظَلْ مِشْتَاگْ مَا يِعْرِفِ النُّومْ
وِ اليَمْتَى بِيشِ اتْفِيْد لِلْگَلْبَه مَلْچُومْ
مِنِّ الغُوَالِي سنِينْ يَا رَبِّي مَحْرُومْ
لِيشِ الزَّمَنْ مَا رَادْ يِجْمَعْنَه فَدْ يُومْ
حِيرَة .. و يِلْهَبْ .. شُوگِ الزِّيَارَة بِالگَلُبْ جَمْرَة
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة

٢/ بيوتِ الإذَنْ الله يِرْفَعْ قَدِرْهُمْ
مِتْسَاوِي وَيَّه الگَاعْ صَايِرْ گَبُرْهُمْ
لا حَضْرَه بِيهَا انْطُوفْ وِ نْشِمْ عِطِرْهُمْ
وِ اليِجِي مُو شُبَّاچ يِشْبُگ حَجَرْهُمْ
ظَلَّتْ .. يَمْهُمْ .. بَسِّ الحَمَامَاتِ اوْ تِجُرْ حَسْرَة
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة

٣/ أتْمَنَّى عِنْدِي اجْنَاحْ وَ اگْدَرْ أسَافِرْ
تِبْتِشِرْ بِالزّوَارْ أهْلِ المَقَابِرْ
مَا رَادَوِ ابْهَاليْوُمْ گُبَّه و مَنَايِرْ
أرْضِ البَقِيعِ اتْرِيدْ يِگْصِدْهَا زَايِرْ
رَادَتْ .. شِيعَة .. تِعْلِگ شَمِعْ وِ تْوَاسِي بِالزَّهْرَة
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة

٤/ هَاللِّيلَة أمِّ حسِينْ تِگْصِدْ نَزِلْهُمْ
وِ ابْگَدْ دَمِعْهَا الطَّاحْ مِشْتَاگَه الهُمْ
يَا وَسْفَه چَفِّ المُوتْ گَاطِعْ وَصِلْهُمْ
وِ انْدِعِي المَهْدِي بيُومْ يِجْمَعْ شَمِلْهُمْ
تِدْعِي .. رَبِّي .. مَهْدِينَة رِيتِ اتْعَجِّلِ بْأَمْرَة
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة

٥/ لِلْمَهْدِي أمِّ حسِينْ تِبْچِي اوْ تِعَاتِبْ
رِفْ بِيرَغِ العَبَّاسْ يَبْنِ الأطَايِبْ
يَمْتَى البَقِيعِ ايْصِيرْ مُلْكَكْ يَغَايِبْ
و لِلزَّايِرَ انَه ويَاكْ نِنْصُبْ مَوَاكِبْ
رِفَّة .. شُوفَة .. چَمْ غَالِي بِيدَكْ يِنْبِنِي گَبْرَة
نِدْعِي .. رِدْنَه .. لُو نُوصَلِ الهُمْ بِالعُمُرْ مَرَّة


*الشاعر الموفق السيد محمد المنصوري*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " لُو نُوصَلِلْهُمْ بِالعُمُرْ مَرَّة " :
https://youtu.be/JUNBgOeqz4I
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{لُذْ بالعليِّ}*

١/ لُذْ بالعليِّ الذي فوقَ العُلى ارتَفعا
حتى رآهُ رَسُولُ اللهِ إذْ رُفِعا

وَ اقْصِدْ لقبتهِ البيضاءِ مبتهلاً
فنورُ ربِّكَ منها للسَّما سَطعا

-علي يا مولاي-

٢/ أنصِتْ لِتَسْمَعَ صوتاً دامَ قائلهُ
مجلجلاً في حنايا كلِّ من سَمِعا

فلتخلعِ النعلَ ذي أرضٌ مقدسةٌ
من قبلُ فيها كليمُ اللهِ قَدْ خَلعا

-علي يا مولاي-

٣/ هنا السماءُ هنا الأفلاكُ دائِرَةٌ
هنا ذُكاءُ و بدرُ الليلِ قد سطعا

ومهبطُ الوَحيِ للأملاكِ قاطبةً
ومعدنُ العلمِ حيثُ السرُّ قد وُدعا

-علي يا مولاي-

٤/ وكعبةُ الحقِّ في هذا مجسدةٌ
تحوي الفضائلَ والأخلاقَ والورعا

هنا الكتابُ وصُحْفُ اللهِ أجمعُها
والأنبياءُ معاً والأوصياءُ معا

-علي يا مولاي-

٥/ هنا (الغديرُ)، هنا (دارٌ) و (منزلةٌ)
هنا (التباهلُ) بادٍ ، و (الكسا) اضطجعا

هنا المجدِّلُ في بدرٍ فوارسَها
ومن تسايفَ مع عَمْرٍ ومن صرعا

-علي يا مولاي-

٦/ وَمَنْ أماطَ لحصنِ الشركِ برقُعَهُ
في يومِ خيبرَ لمّا بابهُ خَلَعا

هنا الأميرُ هنا المولى أبو حسنٍ
خيرُ البريَّةِ منْ زكّى وَمَنْ ركعا

-علي يا مولاي-

٧/ وحينَ تنصفُهُ باسمينِ تندهُهُ
(محمدٌ) و (علِيْ) في واحِدٍ جُمعا

فشدَّ رحلكَ واقصدْ صحنَ حضرتهِ
وافزعْ لكهفٍ إليهِ الأمنُ قَدْ فزِعا

-علي يا مولاي-

٨/ وادعُ الإلهَ بمنْ في قبرهِ سكنوا
أنْ يكشفَ الضُّرَّ والبلواءَ والجزعا

فلا نبيٌّّ أتى، أَوْ منْ وصيٍّ تلا
إلاّ وباسمِ أميرِ المؤمنينَ دعا

-علي يا مولاي-

٩/ فذاكَ آدمُ ناجى عندَ توبتهِ
بجاهِ حيدرةِ الغابِ الذي شفعا

وذا المسيحُ قُبيْلَ الصَّلْبِ ناشدهُ
وصاحَ منْهملَ الدمعاتِ منقطعا

"نادى أغثني، أغثني يا أبا حسنٍ
ولا تخيبْ مُريداً بابَكمْ قرعا"

وإذْ بكفٍّ من العلياءِ نازِلة
بها تمسكَ عيسى الطهرُ وارتفعا


*الشاعر الموفق علي عسيلي العاملي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " لُذْ بالعليِّ " :
https://youtu.be/irEFyjet2xw
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{مَا أگْدَر أنْسَاهَا}*

صُورَة و مَا أگْدَر أنْسَاهَا
زِينِ اوْ مَا دِفْنُونِي اوْيَاهَا
و مَا طِلْعَتْ رُوحِي

عَلَى نَگْلَةْ جِدْمِي و مَا بِيَّه
ثِگْلَنْ حَتَّى اهْدُومِي اعْلَيَّه
و عَايِشْ بِجْرُوحِي

١/ شلُونْ أَنْسَى صُورَة امْ بِيتِي و عِيَالِي
و هِيَّه كِلْ تَسْبِيحَةِ الزَّهْرَه اعْلَى بَالِي
امْبَيِّنِ امْنِ ادْمُوعَهِ الفَارَگْلَه غَالِي
مَرَّة أبْچِي الفَاطِمَة و مَرَّة اعْلَى حَالِي

وَرقَة و تِلْچِمْ بِيَّه النَّسْمَه
چَا رِيحَ الله شلُونَ أشْتَمَّه
و تِسْأَلْنِي شلُونِي ؟

خَمْسِ احْرُوفِ ابْإسْمِ الزَّهْرَه
كِلْ وَاحِدْ مِنْ عِدْهِنْ ذِكْرَه
ايْرَفْرِفْ بِعْيُونِي

٢/ زِلْمَه آنَه و تَارِسِ الحِيطَانْ دَمْعِي
و نَاعِي يَا سَلْمَانْ صَارِ ابْگَلْبِي يِنْعِي
بعِينِي شَايِفْ فَاطِمَة ابْفَرْدِ ايدْ تِدْعِي
الزَّهْرَه مِنْ تِلْزَمْ ضِلِعْهَا ايْهِيجْ ضِلْعِي

آنَه الشَّايِلْ نَعْشَه بإيدَه
ايْمُوتِ و شَهْگَةْ حِزْنَه اتْعِيدَه
و عَايِشْ عَالمَدْمَعْ

أمْشِي و أتْلَفَّتْ كِلْ لَحْظَة
قَنَّعْتِ برُوحِي و مَا تِرْضَه
الرَّايِحْ مَا يِرْجَعْ

٣/ إسْمِي بِحْلُوگِ الشِّمَاتَه شلُون ألِمَّه
المَالَه وَيَّه الله شَرِيعَه شلُون أفَهْمَه
مِن يِگِلِّي اشْمَوَّتِ المِحْسِنِ اوْ أمَّه
يِعْرُفِ اسْمِ ابْنِي ، و يِگِلِّي شْچَانْ إسْمَه ؟

مَا لَحَّگْت أتْهَنَّه بإبْنِي
مَا طَوَّلْ لَحْظَة و فَارَگْنِي
مَا كَمَّلْ سَاعَه

اتْمَنِّيتَ اسْمَعْ بُويَه بحَلْگَه
مَا چِنْتَ ادْرِي البَابِ اتْخِنْگَه
وِ ايْمُوتِ بسَاعَه

٤/ بكِلْ حَرُبْ مَا رِمْشَتِ امْنِ اعْيُونِي رَمْشَه
و شَيَّعِتْهَا و چَنْ عَلِي المَشْيُولْ نَعْشَه
و مِنْ كَسِرْتِي گِمِتْ مَا وَچِّدِ المَمْشَه
الطِّيرْ وِينِ يرُوحْ إذَا مَا يِلْگَه عِشَّه ؟

گَامِ ايْوِنِّ ابْرُوحِي عوِيدِي
مَا صَدِّگ دَافِنْهَا بإِيدِي !
مَكْسُورِ اعْلِيهَا

اعْتَابِي اوْيَ اچْتَافِ الشَّالَتْهَا
زِينَبْ رَادَتْ بَسْ شِيلَتْهَا
ذِكْرَة اتْخَلِّيهَا

٥/ لَمَّنِ اتْسَلِّمْ عَلَيْ تِخْفِيهَا الاِيدِينْ
مِن لِزَمْتِ اچْفُوفْهَا مِحْتَرْگَه الاِثْنِينْ
چَانَتِ الزَّهْرَه تِعَايِنْلِي ابْطَرَفْ عِينْ
ثَارِي مَصْفُوعَه اعْلَى خَدْهَا أمِّ الحْسِينْ

تِرْجِفْ إِيدِيهَا امْنِ اتْمِدْهَا
مَا گَلَّتْلِي بسَطْرَةْ خَدْهَا
و مَا گَالَتْ هَمْهَا

مَا مَرَّة اتْسُولِفْلِي شبِيهَا
تِخْفِي الآهِ اوْ جَرْحِ البِيهَا
مِنْ أگْعِدْ يَمْهَا


*الشاعر الموفق علي الحسن*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " مَا أگْدَر أنْسَاهَا " :
https://youtu.be/-6KWPJyRvD4
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{أوَصِّيكُمْ عَلَى الخِدْمَه}*

قَبِل موتِي أوَصِّيكُمْ عَلَى الخِدْمَه
تَرَى نِعْمَه اوْ حرَامِ اتْضِيعْ هَالنِّعْمَه
محرَّم يِجِيكُمْ
وِ العْيُونْ عَلِيكُمْ
قَبِلْ موتِي

١/ يا شِيعَه أوصِيكُمْ ... و الله يِخَلِّيكُمْ
و عِندِي أحَادِيث عَلِيهَا خَطِيرَه
هِيبَتْكُمِ الخِدْمَه ... نِعْمَه عَلَى النِّعْمَه
وِ النِّعْمَه تِحْتَاج مُراعَاةْ چِبيرَه
مَاكو نَدَم بِيهَا ... وِ الجَنَّه تَالِيهَا
يومِ اللِّي لا مَال يِفيدِ اوْ عَشِيرَه
معروفَه أخبَارِي ... امْسَوِّي عَزَا بْدَارِي
مَيْهِم چِبِيرَه المجَالِسْ زِغِيرَه

قَبِل كِلشِي دِ رَاجِعْ نَفْسَكِ اوْ شَاهِدْ
و محرَّم بِالسَّنَه عِدنَه تَرَى واحِدْ
المَفَاتِيحْ بِدِيكُم
وِ العْيُونْ عَلِيكُمْ
قَبِلْ موتِي

٢/ يَا سَامِعِي اتْعَلَّمْ ... مِنِّ الدَّرِسْ إِفْهَمْ
مِنْ تِخْدِمِ احْسِين إخِدْمَه ابْحَيَاتَكْ
لِلْعِندَه غِيرَتْنَا ... وَاجِبْ شَفَاعَتْنَا
و لا تِسْتِخِفْ يوم يشِيعِي بصَلاتَكْ
يالعَايِشِ اوْيَانَا ... إِذْكُر يِتَامَانَه
لْخَاطِر رقُيَّه تِدَلِّلْ بَنَاتَكْ
أوگَفْ جِبَل لِاخْتَكْ ... وِ الجِرْبَه سَالِفْتَك
خَلْ زينَبِ اتْصِيرْ مِثَالِ لْخَواتَكْ

إِذَا ما اتْوَافِي أَخوكِ و توفِي مَعْروفَه
فَلا تِبچِي عَلَى العبَّاس وِ اچْفُوفَه
وِ الأفعَالْ حَچِيكُم
وِ العْيُونْ عَلِيكُمْ
قَبِلْ موتِي

٣/ يَالخَادِمِ العبرَه ... بِاللَّطْمَه وِ الطَّبْرَه
مِنْ دَرْسِ الأصْحَاب تِعَلَّم موَاقِفْ
جُرعَه إِخِذْ واهِسْ ... مِن جونْ مِن عابِسْ
وِ من توبَةِ الحُرّ دُروسِ اوْ عَوَاطِفْ
ما تِكْفِي بِالتَوْبَه ... بَس سِبْحَه بَسْ تُربَه
دينِ الخِدَامَه فِعِلْ مو سِوَالِفْ
عَالدِّنْيَه لا تِعْتِبْ ... و ما يِنْبِنِي مَوْكِبْ
مِن هَذَا لو ذَاك اذَا تُبْقَه خَايِفْ

شُجَاعِ اللِّي يِحِبِّ احْسِينْ مِنْ طَبْعَه
و لا كِلْمَنْ حِچَه و گال آنَه مِنْ رَبعَه
إذا صَارْ بَچِيكُمْ
وِ العْيُونْ عَلِيكُمْ
قَبِلْ موتِي

٤/ اتْفَرِّحْنَه لَمَّتْكُمْ ... عَاشَتْ تِجَارَتْكُمْ
حُبِّ الحُسَيْنِ و رِبِحْ هَالتِّجَارَه
يَا شِيعِتِي فِدْوَه ... صِيرُو مِثِل اخْوَى
وِ اذْكُرْ اخُوكِ بدُعَاءِ اوْ زِيَارَه
مَا يِنْقِبِل حُبَّكْ ... لو مَا طُهَرْ گَلْبَكْ
وِ المَنْبَرِ الطَّاهِرِ ايْرِيدْ طَهَارَه
كِل حَاجَه مَگْضِيَّه ... بَسْ اِصْدُقِ النِّيَه
بَسْ اُطْلُبِ اوْ شُوفْ تِجِيكِ البِشَارَه

وِ اذَا چَانِ الحَرَامِ ابَّطْنَكِ اتْمَادَه
فَلَا تَاكِلِ ابْزَادَه و تِطْلُبِ امْرَادَه
يَشِيعَه ارْتِجِيكُمْ
وِ العْيُونْ عَلِيكُمْ
قَبِلْ موتِي

٥/ لازِمْ إلَكْ جَيَّه ... بِالأَرْبَعِينِيَّه
مو مستَحَبَّه واجِبَه يفْتِي شُعُورَكْ
وَاجِبْ تَرَه تِحضَرْ ... وِ المَا گِدَر یِگْدَرْ
لو عَالعَصَا تِتِّكِئْ لازِمْ حُضُوركْ
اِرْخَصْهَا عَافِيتَكْ ... عوف اهْلَكِ اوْ بِيتَكْ
الزّرتَه يِجِي يوم يِجِيكِ و يِزورَكْ
كِلشِي اِلَه حسَابَه ... وِ الدِّنْيَه چذَّابَه
و بسِّ الحُسَيْنِ الصِّدِگْ بِينْ أمورَكْ

محَرَّمْ يِخْلَصِ اوْ مَا يِخْلَصِ احْسَاسَكْ
و عَلَه طولِ السَّنَه خَلْ كَرْبَلَه برَاسَكْ
يِظَلْ دوم نَعِيكُمْ
وِ العْيُونْ عَلِيكُمْ
قَبِلْ موتِي

٦/ آخِرْ وصِيَّه الْكُمْ ... عَالمَهْدِي مُنْقِذْكُمْ
لو ادْرِكَه بيُومْ يَشِيعَه اخِدْمَه
امْنِيتِي لو جُنْدِي ... و سَلْمولِي عَالمَهْدِي
لَمَّن تِشُوفُوه تِوَصْلُولَه كِلْمَه
يَالمَهْدِي لَتْبَالِي ... ثَارِ النَّحَرْ غَالِي
وِ المَا رِحَم عَمِّتَكْ لا تِرُحْمَه
بَسْ اِنتُو بِالعَسْكَرْ ... خِدَّامْ ابُو الأكْبَرْ
يَا نِعْمَةِ احْسِين فَلا مِنْهَا نِعْمَه

يَهَالخَادِمْ عَزَاكِ ايْنَاصِرِ الغَايِبْ
بِسيفِ اللِّي تِطَبُّرْ بَاچِرِ اتْحَارِبْ
يِجِي يُومْ وِلِيكُمْ
وِ العْيُونْ عَلِيكُمْ
قَبِلْ موتِي


*الشاعر الموفق حمزة السماوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " أوَصِّيكُمْ عَلَى الخِدْمَه " :
https://youtu.be/-genL8_57xs
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{وِينَكْ بويَه}*

ليل وغربه وحمل اغيابك
ها يالماخذ روح ابنيتك
ناس التمت تحرگ بيتك
وينك بويه شگد حشمتك
عندك گلب عندك صبر
يا وسفه ويأخرك گبر
وينك بويه شگد حشمتك


١/ بس غمضت بويه الجفن
ما چنه توك مندفن
نزعوا قناع الصحبه ربعك تره
چم ليله بعدك بالگبر
ويهلهل السان الكفر
الكرسي الخلافه كلها متحضره
لا حيدر ولا فاطمه
كون الحكم بس نلزمه
وابن السقيفه ما يهم المره

حيدر مشغول وي جروحه
يجمع بالقرآن وينحب
متغير من بعد عيونك
وهوه وگاعد والگاه يتعب
بين عليه شيب الكبر
يا وسفه ويأخرك گبر

٢/ دارت زلم دار الوكت
يم بابك اصياح سمعت
جيبو الحطب نحرگ علي وفاطمه
حسيني لزم بيد الحسن
وانظر بناتي اتشابگن
ومتوني احس من هسه متورمه
يمي علي بس خايفه
وگلبي حدر ضلعه اختفه
ترجف ادي مدري الأرض والسمه

دگو بابي ورادو حيدر
يمشي يبايع ويجتفونه
ولو ما يقبل بويه اسمعهم
حيدر ناوين يذبحونه
تفزع يبويه شمنتظر
يا وسفه ويأخرك گبر

٣/ سكته وعلي يرفض گعد
وتكاثر اعلينه العدد
حرگوها بابي ونار تعمي النظر
صار الهوى البينه يمر
نتنفسه ارماد وجمر
وزينب اختنگت بالدخان الكثر
لون اسود البيت انصبغ
ومن الهوى الصافي فرغ
وبطني محسن يبچي حس بالخطر

وثلثمية الوادم هدت
واحد يحرگ واحد يشتم
بين جروحي ودارت عيني
لحيدر بويه الكل متحزم
والوجهي احط ايدي ستر
يا وسفه ويأخرك گبر

٤/ الباب اندفع بويه علي
ثگل الجذع متحمله ادي
ضلعي انكسر بالعصره صوته أسمعت
محسن وگع مدري علي
مدري سوه طاحو الي
بنار الحطب وجهي احترگ من طحت
غير القهر كلمة و إن
بالسوط اجه فوگ المتن
الحگني بويه امروتك شگد صحت

خلف الباب ومغمي اعليه
وليراويك الله انه شحالي
سطره بعيني وينزف متني
وكل هذه ويم حيدر بالي
وانت سمعت صوت الكسر
يا وسفه ويأخرك گبر

٥/ لن فزت عيوني بأمل
بلكي حلم كل الحصل
ودمي شفت يجري اعله طول الهدم
ولدي وبناتي اتجمعوا
طور النعي يمي نعوا
يا يمه مو ما بينه حيل اليتم
بعيوني الهم التفت
وماكو علي يمهم شفت
وگمت اعله طولي بحيلي المنهدم

ركضة فاگد صوب المسجد
ردو الغالي يصيح احساسي
لو ما يرجع حيدر يمي
أتوجه لله واكشف راسي
مو سهله حيدر ينقهر
يا وسفه ويأخرك گبر

٦/ صوتي اعتله وآخر حچي
ردولي حيدر بالبچي
وسلمان اجه وصبرني حيدر يرد
ساعتها روحي اتذكرت
ولن زينب ابالي اجت
بالعاشر وسبعين الف تستعد
من توگف بشمس الظهر
لكن يجي خالي المهر
دم الاخو مغرگ السرج بي تصد

ها يا بويه وزينب تركض
وسط الهيمه ومحد الها
صوب الشاطي وصوب التله
يم حسين ويم كافلها
تلچمها ضحكات الشمر
يا وسفه ويأخرك گبر



*الشاعر الموفق ياسر المطوري*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " وينَكْ بويَهْ " :
https://youtu.be/Zf0LQimXWkk
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{لا يرحَمُ اليتامَى}*

في الدُّجى ضَمَّ حسينٌ حَسَنَهْ
يُجْريانِ الدَّمعَ لِلْمُمْتَحَنه

ما أصعب الظَّلاما!
لا يرحَمُ اليتامى!

١/طَالمَــا نامَ على صوتِ الأنينِ
آهِ يا ضلعي وَ آهٍ يا جنيني
ساهراً يصرخُ : يا أمِّي خُذيني
لكِنِ الْيَوْمَ على جمرِ الحنينِ

مُذْ تــركْتِ الدارَ أُمي لوْ تَرَيْــنْ
وقعَ "البابُ" على رأسِ الحُسينْ

طالَ النَّوَى ..على مَا؟؟
لا يرحَمُ اليتامى!

٢/كحُسينٍ حسنٌ ناحَ ملِيّـا
ينظرُ المحرابَ محنِيّاً شجِيّا
بيتُنا صارَ مِنَ النُّورِ خلِيّا
عظَّمَ اللهُ لَكَ الأَجْرَ أُخيَّا

قَسَتِ الدُّنيا علينا ظالمهْ
أخذتْ مِنْ كلِّ عينٍ : فاطِمهْ

قوسٌ رمى الكراما
لا يرحَمُ اليتامى!

جواب المجتبى:
٣/كيفَ أغفو يا حُسينٌ في منامي
وعيوني شاهدتْ فعلَ اللَّئامِ
حينَ نادتْ أمُّنا : خلَّوا إمامي
صرخَ الطاغوتُ جرُّوه أَماَمي

إنَّ هذا صاحبُ البأسِ الكبيرْ
قيِّـــدُوهُ بحبـــالٍ كالأســـيرْ

مَنْ قيّدَ الإماما
لا يرحَمُ اليتامى!

٤/يا أخي ما لي سوى صبِّ الدموعِ
بعدَ أُمِّي كيفَ أسْلو في هُجوعِ (نوم)
وبِأُذني صوتُ تكسيرِ الضُّلوعِ
كالقواريرِ بِــبابٍ مِـــنْ جُــــذُوع!

رغمَ جُرحٍ ، رغمَ خدٍّ قدْ لُطِمْ
آهِ ظلَّتْ حينَ آتي تبتَسِــمْ

أَفتقِدُ ابتساما
لا يرحَمُ اليتامى!

٥/مُحسنٌ ثالثُـنا بالموتِ عجَّلْ
ما حسبنَاهُ على الأعتابِ يُقْتَلْ
ذاكَ رزءٌ في خيالٍ مـا تمثَّلْ
كيفَ بنتُ المصطفى المختارِ تُرْكَلْ!!

مَظهرُ الرحمانِ هذي والرَّحيمْ
كيفَ يُدمي متنَها سوطُ اللئيمْ

لا يعرفُ الحراما
لا يرحَمُ اليتامى!

٦/وكأنِّي أنظرُ الحوراءَ زينبْ
للحَبيبيْنِ دنَتْ تشكو وتنْحَبْ
مشهدٌ يبقى ببالي ما تغيَّبْ
جَنْبُ أُمي بِقِرابِ السيْفِ يُضْرَبْ!!

بعد طٰه ألْفُ يا بئساً وحيفْ
بينَ سوطٍ تُصبحُ الزهرا وسيفْ

مَنْ أنكَرَ الذِّماما
لا يرحَمُ اليتامى!


*الشاعر الموفق علي عسيلي العاملي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " لا يرحَمُ اليتامى " :
https://youtu.be/OJnisxHJRLE
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{حبيبي يحسين}*

تِبْچِي وِ تسُولِفْلِي أمِّي و إيدْهَا اعْلَى مَتْنِي
وِينْ مَا تِنْدَلْ يَمَهْدِي عَزَا احْسِينْ إخِذْنِي

تِحْچِي وَيَّايِ ابْقَهَرْ
و آنَه إيدِي اعْلَى الظَّهَرْ
وِ الحَچِي اعْلَى النَّحَرْ
{يَحسِينْ يَحسِينْ حَبِيبِي يَحسِينْ}

١/ أمْشِي بِدْرُوبِ السِّمَه
اسْمَعِتْ وَنَّةْ فَاطِمَه
گُوَّه تِمْشِي صَادَفِتْهَا و دَمْعِي اضُمَّه
چَفْهَا الاوَّلْ عَالضِّلِعْ
و ثَانِي چَفْ مَا يِنْرُفِعْ
عَالأصَابِعْ سُوطْ طَابِعْ وِيلِي يُمَّه

مَا چَنْهَا أمّ اثْمُنْطَعَشْ يَا حَسْرَه
چبِيرَه ابْكُبُر لِيلِ اهْدَعَشْ عَالحُرَّه
صَاحَتْ يَا يُمَّه و رَكُضْ رِحِتْ اِلهَا
لو مَا رحِتْ چَا طَاحَت امِّي الزَّهْرَه

بِالوَجِه نَفْسِ المَلامِحْ زِينَبِ اوْ عَلَى التَّلْ
زِينَبِ اتْحَشِّمْ أخُوهَا و أمِّي تِقْرَه مَقْتَلْ

رِدْتَ أكَابِرْ بَسْ مِتِتْ
و آنَه وَيَّاهَا طِحِتْ
و هَم مِثِلْهَا صِحِتْ
{يَحسِينْ يَحسِينْ حَبِيبِي يَحسِينْ}

٢/ حَچْيِ العْيُونِ اتِّضَحْ
الحَالِي گَلْبُ امِّي انْجِرَحْ
البِيهَا سَكْتَه بَس سِمَعْتَه الكِلْمَه نَظْرَة
يُمَّه يَالمَهْدِي اشْحِصَلْ
امْنِ شوَكِتْ وَجْهَكْ ذِبَلْ
حَمْرَه عِينَكْ چَنْهَا عِينِي البِيهَا سَطْرَه

لابِسْ قَمِيصِ احْسِينِي الله ايْصَبْرَكْ
الحَافِر عُبَرْ مِنِّ القَمِيصِ الصَّدْرَكْ
بوَجْهَكْ رَمَادِ الخِيمَه مِلْتَمْ كِلَّه
وِ اثْنَعَشْ طَبْرَه يُمَّه اشُوفِ ابْنَحْرَكْ

رِدْتَ أصَبُّرْهَا اعْلَى حَالِي الضَّيِعَتْ صَبُرْهَا
اشْمَالَه فُوگِ احْسِينْ إبِنْهَا مَا رِدِتْ كَسِرْهَا

عَالبَچِي و دَمْعِ الحِزِنْ
گُوَّه الزْمَنَّه الجِفِنْ
إبْتِسِمْ لا تِوِنْ
{يَحسِينْ يَحسِينْ حَبِيبِي يَحسِينْ}

٣/ تِحْچِي وِ بْحُرْگَه اسْتِمِعْ
يُمَّه مَاذِينِي الضِّلِعْ
شَتِّمُونِي كَسِّرُونِي و جِسْمِي نَاحِلْ
وَ التِفِتْ و الگَه عَلِي
يِبْچِي وِ عْيُونَه إلِي
گَلْبَه وَاگُفْ حِيلَه طَايِحْ طُولَه مَايِلْ

وَكْتِ الغَسِلْ يَالمَهْدِي شَيَّبْ حِزْنِي
يَا يُمَّه گِعْدِي يِصْرَخِ احْسِينِ ابْنِي
و آنَه بوَكِتْهَا منِ الصَّبُرْ شِلْتِ إيدِي
وِ شْبَگْتَه لِحْسِينْ و خَذِيتَه بْحُضْنِي

تِدْرِي گَلْبِ الأم لِابِنْهَا مَا يِقِل حَنِينَه
وِ اشْيِصَبُّرْهَا اللِّي تِسْمَع لِلْوِلَدْ وِنِينَه

عِينَه تِشْبَه بِالأَلَمْ
جُرْبَه بَدَّاهَا السَّهَمْ
و صُوتَه صَرْخَةْ خِيَمْ
{يَحسِينْ يَحسِينْ حَبِيبِي يَحسِينْ}

٤/ تِحْچِي أمِّي فَاطِمَه
وَ اسْتِمِعْ وَ ابْچِي بدِمَه
المَهْدِي يُمَّه تِدْرِي زِينَبْ عَذِّبَتْنِي
ويَاهَا چِنْتِ بكَرْبَلَه
و چِنْتَ الِمْ بِالعَايِلَه
و طِفْلَه تِصْرَخْ عَمَّه زِينَبْ لِحْگِي مَتْنِي

و لَمَّنْ خَذُوهَا امْچَتِّفَه اعْلَى الهِزَّلْ
إبْدَال أخُوهَا چِنْتَ أعَدْلِ المَحْمَلْ
لِلْكُوفَه وِ الشَّامِ انْسِبِيتِ ويَاهَا
وِ الكَافِلِ ايْرَاقِبْهَا خَايِفْ تِزْعَلْ

مِن نِكَثْ بِالخِيزَرَانَه رَاس أخُوهَا شِفْتَه
رِدْتَ أصَبُّرْهَا و لَكِن آنَه صَبْرِي عِفْتَه

بِالطَّشِتْ چَانِ العُمُرْ
و كِلْهَا شِيبَاتَه حُمُرْ
مَا نِفَعْ كِلْ صَبُرْ
{يَحسِينْ يَحسِينْ حَبِيبِي يَحسِينْ}

٥/ گَالَت إِمْشِي خَلْ نِوِنْ
وِينْ أكُو مَأْتَمْ حِزِنْ
و رِحْنَه نِمْشِي و بِينَه كِلْشِي امْنِ المَوَاجِعْ
مَأتَمِ المَأتَمْ رِحِتْ
فَاطِمَه ويَايَه خَذِتْ
مَرَّه تُوگَعْ هِيَّه مَرَّه آنَه أوُگَعْ

و كِلمَا يِوِنِّ النَاعِي تِلْزَمْ بِيَّه
و خُوفِي تِمُوتِ ابْنُصِّ الحْسِيْنِيَّه
يِخْلَصْ گَلُبْهَا امْنِ البَچِي وَ الْگَاهَا
ابْكِلْ عَزَه مِنِّ اتْخَلِّصِ اللَّطْمِيَّه

أمِّي مَا بِيهَا الوَحَدْهَا تِمْشِي لِلْمَآتِمْ
آنَه أوَصِّلْهَا و سِوِيَّه نلاگِي خَادِمْ خَادِمْ

نِلْطُمِ اوْ نِبْچِي سِوَه
و نِشْهَگِ ابْگُوَّه الهَوَه
و چَفْنَه شَايِلْ لِوَه
{يَحسِينْ يَحسِينْ حَبِيبِي يَحسِينْ}

٦/ مِنْ بَعَدْ هَذَا الحَچِي
رِدْتَ اسِدْ بَابِ البَچِي
يُمَّه آنَه ودَاعَتَ آنَه أطْفِي نَارِچْ
وُضْحَتِ الصُّورَة و شِفِتْ
وِ السَّبَبْ هَسَّه افْهَمِتْ
إلْمَن أوَّل ثَارَه رِدْتِي و تَالِي ثَارِچْ

يَالگِلْتِي لِلْوَالِدْ مِنُو يوَاسِينِي
مَا عِنْدِي اليْسَاعِدْنِي أبْچِي حسِينِي
يَا يُمَّه أبَشْرِچْ عِدْنَه صَارَتْ شِيعَه
تِبْچِي ابِّدَالِي اشْمَا انَه تِعْبَتْ عِينِي

كِلْ صَدِرْ بِيهُمْ عَلَى ابْنِچْ بِيه أثَرْهَا إيدَة
يِنْغِمِي علِيهُمْ يَيُمَّه بحُرْگَةِ القَصِيدَة

مُو مُحَرَّمْ لو صَفَرْ
مَأْتَمِ اثْنَعَشْ شَهَرْ
مُو رِيَاءِ و صُوَرْ
{يَحسِينْ يَحسِينْ حَبِيبِي يَحسِينْ}


*الشاعر الموفق ياسر المطوري*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖
رابط قصيدة " حبيبي يحسين " :
https://youtu.be/0TcqbqJ48pM
➖➖➖➖➖➖➖➖➖➖➖
https://t.me/Mustafa_Sudane

*{إعترافات}*

إِعْتِرَافَاتْ مُذْنِبِ ايْرِيدِ الهِدَايَة
إِعْتِرَافَاتْ عَاشِگِ ايْحِسْ بِالنِّهَايَة

جِيتِچِ بْرُوحِي ضِمَه
أعْتِرِفْلِچْ فَاطِمَه
عَنْ ذِنُوبِي

١/ أعْتِرِفْلِچْ آنَه اذِكْرِچْ مِن أمُرِّ ابْعَازَة
و مَا تِجِي ابَّالِي عَظَمْتِچْ إلَّا مِنْ أتْوَازَة
و هَسَّه جِيتِچْ حِيلِي طَايِحْ وِ النَّدَمْ عِكَّازَة
كِلْهَا چَمْ دَمْعَة اوْ أمُوتِ اوْ أعْتِنِيچِ اجْنَازَة

كِلْهَا چَمْ آه وَ اعْتِنِيلِچْ شَايْلِينِي
و يُمَّه وِيلَاه لُو رِفَضْتِي اتْسَامْحِينِي

وِين أرُوحِ اليَا سِمَه
أعْتِرِفْلِچْ فَاطِمَه
عَنْ ذنوبِي

٢/ آنَه مَا أنْكُرْ ذُنُوبِي اوْ أعْتِرِفْلِچْ بِيهَا
چِنِتْ مَا أنْدَلْ طَرِيقِي وْ رَحْمِتِچْ نَاسِيهَا
بَسْ إجِيتِچْ آنِي نَادِمْ وِ الحَقِيقَة احْچِيهَا
اسْنِينْ مَا تِگْضِي بْخِدِمْتِچْ الله لَيْخَلِّيهَا

آنَه نَدْمَانْ جِيتِچِ ابْرُوحِي العَنِيدَة
و دونِ الألْحَانْ حَضَّرِتْلِچْ هَالقَصِيدَة

بِالدُّمُوعِ النَّادِمَه
أعْتِرِفْلِچْ فَاطِمَه
عَنْ ذنوبِي

٣/ چِنِتْ كِلْ مَا طِيحْ أشُوفِچْ فَازْعَة بْچَفِّينِچْ
و مَا تِفُضْحِينِي بْذِنُوبِي وْ تُبْقَى بِينِي وْ بِينچْ
و هَسَّه حَايِرْ بِيمَنَ أبْدِي شْلُون أسَدِّدْ دِينِچْ
و يَا طَرِيقَة البِيهَا أمْسَحْ دَمْعِتِچْ مِنْ عِينِچْ

يَا هَوَه الرُّوحْ مْحَلْفِچِ بْغُرْبَةْ رُقَيَّة
دَاوِي الجْرُوحْ بدُورَةِ اعْيُونِچْ عَلَيَّه

يَالرَّحِيمَه اوْ رَاحِمَه
أعْتِرِفْلِچْ فَاطِمَه
عَنْ ذنوبِي

٤/ آنَه ارِيدَ اسْتِحِي مِنِّچْ لُو صِرِتْ خَدَّامِچْ
مُو وَرَاچِ لْسَانِي سَمِّ وْ بِيه عَسَلْ گِدَّاِمچْ
قِمَّةَ أحْلَامِي أصِيرَنْ وَاحِدِ امْنَ ايْتَامِچْ
و كِحْلَةِ اعْيُونِي رَمَادِ امْبَارَكِ امْنِ اخْيَامِچْ

رَايِدَ ارْضِيچْ مَا بُقَتْ حِيلَه بْإِدَيَّه
و آنَه أدْرِيچْ أحَنْ مِنْ أمِّي عَلَيَّه

أقْسِمِ بْحَامِي الحِمَه
أعْتِرِفْلِچْ فَاطِمَه
عَنْ ذنوبِي

٥/ يَالحَزِينَه المِنْ حِزِنْهَا گِمْتَ اشُوفِ دْرُوبِي
و مِنْ رِضَاهَا اتْصِيرْ شَمْسِي وْ مِنْ زَعَلْهَا اغْرُوبِي
هَذَا مَكْتُوبِي لْحَضِرْتِچْ إقْبَلِي مَكْتُوبِي
يَالزِّچِيَّه و هَايَه إدَيَّه لُو أعِيدِ اذْنُوبِي

يَمِّ الحْسِينْ إطِرْدِينِي لُو عِدِتْهَا
آنَه مُو زِينْ بَسْ زَعِلْتِچْ مَا رِدِتْهَا

يَالحَكِيمَه وْ حَاكِمَه
أعْتِرِفْلِچْ فَاطِمَه
عَنْ ذنوبِي

٦/ شُكْرًا لْحُسْنِ اسْتِمَاعِچْ لْمُهْجِتِي المَذْبُوحَه
هَسَّه رُخْصِينِي كِلِمْتِي مُو إلِچْ مَطْرُوحَه
لْكِلْ مُقَصِّرْ بِالمَجَالِسْ خَلْ يِلَحِّگْ رُوحَه
وْ يِعْتِذُرْ مِنِّ الزِّچِيَّة التِنْتِظُرْ مَجْرُوحَه

خَلْ يِجِي اهْنَا و يِعْتِذِر مِنْهَا اعْلَى ذَنْبَه
بَلْكِي تِرْضَاه و مَا يِظَل ذَنْبَه اعْلَى جَنْبَه

و يِصْرَخِ بْهَالخَاتِمَه
أعْتِرِفْلِچْ فَاطِمَه
عَنْ ذنوبِي


*الشاعر الموفق محمد البشير*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " إعترافات "
https://youtu.be/agc55oRGn7k
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{حسينيتك وطنها}*

كل مجلس نعتبره بيت أحزان الزهره
و تتفجر دمعتنا من مولاتي تحظره
آه حسينيتك وطنها
آه واسيها بحزنها

١/ اتفضلي يا مولاتي إبچي الدار دارچ
كل حسينيه و أهلها بانتظارچ
إبچي بيها و أمني ما تنعاد نارچ
بلكت ابمجلسنه يجبر إنكسارچ

هدمو بيت أحزانچ و ابنينه حسينيه
نعرف منچ رايح مذبوح و مسبيه

آه و الهزّل خذنها
آه واسيها بحزنها

{آه حسينيتك وطنها...آه واسيها بحزنها}

٢/ شكو احسينيه انبنت معناها دمعه
طاحت و تشرح هظم من عين بضعه
بيت الحسينيه للزهره نرفعه
بالملامه الباب لا ترجع تدفعه

ما ظل بيت لفاطم بس حسينيتنه
خليها اتصب دمعه و تستقبل دمعتنه

آه لمصيبة إبنها
آه واسيها بحزنها

{آه حسينيتك وطنها...آه واسيها بحزنها}

٣/ كلنا نسأل لو بمجلسنه حضرتي
ليش يم الباب يُم زينب گعدتي
عليچ منها انخاف لن بيها انعصرتي
گومي يم المنبر و بچينا إنتي

كل اجروح البينه يا فاطم من بابچ
و نعرف يا مظلومه مصاب احسين مصابچ

آه و زينب يا محنها
آه واسيها بحزنها

{آه حسينيتك وطنها...آه واسيها بحزنها}

٤/ شوفي دمع اعيونه و شوفي المآتم
ذاك يطبخ هذا يبچي و ذاك لاطم
كل دمعنه للحسين انوشله لازم
لأن ندري ايطيح بچفوفچ يا فاطم

كل دمعه النجريها ندري بچفچ طاحت
بس دمعة زينبكم وي الراحو راحت

آه ما ينشف جفنها
آه واسيها بحزنها

{آه حسينيتك وطنها...آه واسيها بحزنها}

٥/ إحنه نلطم بس كسر ماكو بضلعنه
و عين ما مسطوره منها ايهل دمعنه
يا هو اليعينچ على السّابين ضعنه
لا تلطمين الضلع كسره فجعنه

و اتلطمين اضلوعچ عالضاعن بالهيمه
و ابناتچ هم ظلن لا دار و لا خيمه

آه و الغرّب ضعنها
آه واسيها بحزنها

{آه حسينيتك وطنها...آه واسيها بحزنها}


*الشاعر الموفق أحمد اللامي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " حسينيتك وطنها " :
https://youtu.be/YmdEHdHsE-Y
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{أرِيدَكْ تِرْضَه عَنِّي}*

حَاسِبْنِي بْرَحِمْتَكْ
خَلِّينِي اعِيشِ وْيَاكَ ارِيدِ بْعَالَمِ الخِدْمَة
هَذَا آنِي المُقَصِّرْ
العَطْفَكْ يَبُو صَالِحْ إجِيتِ اوْ أطَلُبِ الرَّحْمَة

إخْذِ الغَالِي مِنِّي
أرِيدَكْ تِرْضَه عَنِّي

١/ خَايِفْ جَارِحَكْ خَايِفْ مَرَّة مِنْ تَقصِيرْ أذِّيتَكْ
آنِي الهَاجِرَكْ مَا هَاجِرْنِي آنِي بْذَنْبِي جَافِيتَكْ
نِسِيتِ امْوَاصَلَكْ تِبَعْتِ الرَّغْبِتِي وِ بْظَهْرِي خَلِّيتَكْ
كَسِيرِ وْ گَاصِدَكْ دَمْعَاتِ النَّدَمْ بِعْيُونِي مِنْ جِيتَكْ

ضَيَّعْنِي زِمَانِي
آنَه الغَرِيبِ ابْنِ السَّبِيلِ التِهِتْ بِدْيَارَكْ
نَدْمَانِ اعْلَى بَابَكْ
و كَلْفَه أبِيعَنْ مَايْ وَجْهِي و آنَه خُطَّارَكْ

إرْحَمْ كِثُرْ وَنِّي
أرِيدَكْ تِرْضَه عَنِّي

٢/ عَزِيزِ بْدِيرِتِي كِسَرْ جِنْحِي الزَّمَنْ وِبْجُورَه گَيَّدْنِي
آنِي بْشِيمِتَكْ عَنْ خِيمَةْ خِدِمْتَكْ لَا تِبَاعِدْنِي
إحْفُظْ هِيبِتِي أرِدْ مِنَّكْ ذِلِيلِ انْچَانْ تِطْرِدْنِي
ذِلِيلِ وْ گَاصِدَكْ و گَلْبَكْ عَالسَّمَاحَه هْوَايْ عَوَّدْنِي

إمْسَحْ رَاسِي بِيدَكْ
احْسِبْنِي يَتِيمِ و انْتَ ابُوي وْ إرْحَمِ بْحَالِي
إلَك مَدِّيتَ چَفِّي
و يَا فَشْلِتِي مِنَّكْ لَوَن چَفِّي يِرِدْ خَالِي

يَمَّكْ رَاسِي مَحْنِي
أرِيدَكْ تِرْضَه عَنِّي

٣/ صِدْلِي بْنَاظِرَكْ أبَدْلِ الدِّنْيَا كِلْهَا بْنَظْرَه مِنْ عِينَكْ
تِكْسُرْ خَاطُرَكْ لَا بُدْ دَمْعِتِي وِ تْمِدْلِي چَفِّينَكْ
آنِي الخَادِمَك آنَا اليَامَا بَاچِي اوْيَاكْ لِحْسِينَكْ
دِلِيلِي نَاطُرَكْ أكْثَرْ كِلْمَة نَادَاهَا الگَلُبْ (وِينَكْ)

لُو حَاسَبْنِي عَدْلَكْ
أدْرِي هَلَاكِي و تِنْغِلِقْ كِلْ بَابْ لِلْجَنَّه
طَمْعَانِ ابْحَنَانَكْ
آنَه أدْرِي گَلْبَكْ طَيِّبِ وْ مَاكُو أحَنْ مِنَّه

يَمَنْ عَطْفَكْ شِمَلْنِي
أرِيدَكْ تِرْضَه عَنِّي

٤/ آنِي مْعَاشِرَكْ و عِشْرِتِي مَا اظَنْ مَوْلَايْ نَاسِيهَا
آنِي و نَاظُرَكْ سِوَه الزِينَبْ يَمَهْدِي چِنَّه نِبْچِيهَا
تِوِنْ بِحْچَايِتِي امْنَ اگِلَّكْ بِالحَبِلْ زِينَبِ مْچَتْفِيهَا
وَ اوِنِّ الحَالِتَكْ امْنَ أشُوفَنْ دَمْ دَمِعْتَكْ إلهَا تِجْرِيهَا

آنِي وْ إنتَ وِ الطَّفْ
نِسْهَر يَمَهْدِي وِ النَّفَسْ بِيه جَمْرَةِ اخْيَامَكْ
لَا تِتْخَلَّه عَنِّي
وِ ارْزُقْنِي أحِسِّ بغُرْبِتَكْ وِ ارْزُقْنِي آلامَكْ

حِزِنْ عَاشُورْ حِزْنِي
أرِيدَكْ تِرْضَه عَنِّي

٥/ بِچِيتِ ابْغِيبِتَكْ بَچِي الفَاگِدْ أبُو وْ مِحْتَاجْ حِنِّيتَه
يَمَن رَبِّيتْنِي المِثْلَكْ مَا يِهُونِ اعْلَيَّه تَرْبِيتَه
أظَلْ مِشْتَاگِلَكْ شُوگِ الغَارِگِ وْ شَحِّ الهَوَه بْرِيتَه
صُبَرْتِ وْ نَاطَرِتْ الصَّبُرْ دُومِ الفَرَجْ يَالمَهْدِي تَالِيتَه

أدْرِي الدِّنْيَا سَفْرَه
و بَاچِرْ إمَامِي نِلْتِقِي و أسْجِدْ عَلَى اجْدَامَكْ
و أعْرُف تِعْفِي عَنِّي
گَلْبَكْ چِبِيرْ أدْرِي و تِسَامِحْ دُومْ خِدَّامَكْ

أبَدْ مَيْخِيبْ ظَنِّي
أرِيدَكْ تِرْضَه عَنِّي


*الشاعر الموفق السيد موفق الموسوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " أرِيدَكْ تِرْضَه عَنِّي " :
https://youtu.be/fiWQV-6QPEE
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{يا فاطمة نظرة}*

يا فاطمة نظرة بالدنيا تكفيني
مولاتي يالزهرة خادم إحسبيني

١/ ما أنسة فضلچ ياللي كل دربچ صحيح
علّيتي شاني و انتِ ما عندچ ضريح
فوگ المنابر فاطمة مظلومة اصيح
أبچي لمصباچ و ابچي لمصاب الذبيح

و المنگطع نحرة دايم يبچيني
مولاتي يالزهرة خادم إحسبيني

٢/ هيبة زماني خدمتچ و الهيبة نور
دمعي النواظر عاشگ و لطم الصدور
بس گولي والله أعبر السبع البحور
أخلع حياتي مو مداسي من أزور

گبرچ أشم عطره بس مرة خليني
مولاتي يالزهرة خادم إحسبيني

٣/ أطوي البراري معاشر جناح الحمام
نورس أشوفن خدمتچ و آني بظلام
يمچ يفاطم ينتهي بالي الكلام
بابچ أشاهد كربلا و حرگ الخيام

يا خيمة العترة بالخيمة گعديني
مولاتي يالزهرة خادم إحسبيني

٤/ لمن أگولن فاطمة الدنيا تغار
و اعلى القوافي بخدمتچ أفرض حصار
كل السوالف من تمر بالي نار
أعرف ظروفة و ما أعاتب ذو الفقار

شگ الگلب صبرة سيف اليحاميني
مولاتي يالزهرة خادم إحسبيني

٥/ عبد المجالس و آني طمعان برضاچ
ليل المگابر رايد أتنفس ضواچ
يخنگني صبري فاطمة و اشتم هواچ
تنطق دموعي الصامدة و تركض وراچ

يا خبزة الفقرة و شوگ اليسليني
مولاتي يالزهرة خادم إحسبيني

٦/ ضلعچ ترافة و لاحة بسمار الحديد
بعينچ عذوبة و طگها شيطان مريد
أهل السقيفة معاوية و شمر و يزيد
بيهم جهنم تمتلي و تطلب مزيد

و لحضرتچ ذكره تبقى بوسط عيني
مولاتي يالزهرة خادم إحسبيني


*الشاعر الموفق محمد الجماسي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
رابط قصيدة " يا فاطمة نظرة " :
https://youtu.be/HpIlv8dY5ZA
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

*{جمرةُ النَّهرِ}*

لَمْ أَكُنْ أدري ما تُرى يجري بقلبي بقلبي
جمرةُ النَّهرِ نارُها تسري بقلبي بقلبي

١/يا زمانَ الغدرِ يا غدرَ الزَّمانِ
فاطمٌ قابَلْــتَها باللاأمانِ
لا فلَمْ أعجبْ لِجُرْفٍ قد رماني
في فؤادي اصطادَ أطيارَ الأماني

إبتغى قَتلي...بأبي الفضلِ...بقلبي بقلبي
غيْبَةُ البَدْرِ...نارُها تسري...بقلبي بقلبي

٢/إنني ربَّيتُ عباساً بِعَيْني
غايتي: يَكْبُرُ عبداً لِلْحُسينِ
قيلَ : وفَّى بِعيونٍ ويدينِ
قسماً لَمْ أُوفِ للزهراءِ دَيْنِي

فاطِمُ الزَّهرا...وحْدَها أدرى...بقلبي بقلبي
طيلةَ العُمْرِ...نارُها تسري...بقلبي بقلبي

٣/طَبعُكَ اللؤمُ فما قُلتُ تطبَّعْ
يا زماناً فِيهِ نحرُ السِّبطِ يُقْطَعْ
فاطمٌ شاهدتِ الشِّمرَ تربَّعْ..
وأنا لَمْ أنظُرِ العبّاسَ يُصْرَعْ

لَمْ أرَ المذبحْ...حسرتي تجرحْ...بقلبي بقلبي
أشعلتْ صدري...نارُها تسري...بقلبي بقلبي

٤/عندما بِشرٌ نعى الليثَ صَريعا
مِنْ يَدي للأرضِ أسقطتُ الرَّبيعا
ذَلِكَ "الفضلُ" هَوى منِّي سريعَا
موقناً قَدْ ذبَحُوا "الطِّفلَ الرَّضيعا"

بسمةُ الطِّفلِ...ساعةَ القتلِ...بقلبي بقلبي
رَفَّةُ الطَّيرِ...نارُها تسري...بقلبي بقلبي

٥/صرتُ عمْيا لا أرى في الأفق كوكبْ
في عُبابِ القهرِ لمْ أركبْ بِمَركبْ
لمْ يزلْ قلبي بسوطِ الشِّمرِ يَلْهَبْ
كُلَّما يَطْرُقُ سمْعِي إسْمُ "زينبْ"

إسْمُها اللَّوعهْ...ذكرُها الدَّمعهْ...بقلبي بقلبي
ربَّةُ الخِدْرِ...نارُها تسري...بقلبي بقلبي

٦/حينَ قالوا "رايةُ العباسِ" طاحتْ
عينُ قلْبي "لِقميصِ السبطِ" ناحتْ
سَحَقتْهُ الخيلُ والخِدرَ استباحتْ
ليتَ روحي قبْلَ هذا الرزءِ راحتْ

آهِ واويلي...مشهدُ الخيلِ...بقلبي بقلبي
خيمَةُ السِّتْرِ...نارُها تسري...بقلبي بقلبي


*الشاعر الموفق علي عسيلي العاملي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________________________________
رابط قصيدة " جمرةُ النَّهرِ " :
https://youtu.be/_0tqYUPv2nY
_________________________________
القناة الرسمية للملا مصطفى السوداني على telegram :
https://t.me/Mustafa_Sudane
_________________________________

*{هذا المنحني منين}*

هذا المنحني منين...يشبه مشية حسين
يالنسوان عيننّي...للسجاد ودّني
هذا المنحني منين

١/ رد للمدينة منحني و ام البنين اتناطر
عطشان و مغمض تعب و المشية تكسر خاطر
گالتله يمه مروتك باوعلي و احچي الصاير
فتش و بعيونه طلع مشهد بيوم العاشر

شافت خيل...عمية و تركض صوبين
تركض حيل...و اتدوس بصدر حسين
و بنيات طلعن من گد الخوف
مچتوفات بالطف ثنين ثنين

الله يساعد أم عون...بهيمه و تركض شلون
شهگت حيل من شافت...أمكم زين ما ماتت
هذا المنحني منين

٢/ گاللها عباسچ وگع و اعلى الخدر من خوفه
مأشر لگيته اعلى الخيم و مگطعات اچفوفه
رحت ادفن حسيني و خفت علّا سكينه تشوفه
شلته بحصيره لوحدي كل الحرم مچتوفه

ما ينشال...حيرني حسين هواي
لميناه...من الخيمه لحد الماي
و العباس من شلته بلايه چفوف
هذا الچان واگف عالخيمه فياي

و اسمع صاحت الناس...باچر ماكو عباس
چان هواي يشبگني...هسه هواي تعبني
هذا المنحني منين

٣/ عباس عمي بكربلة وصاني چم احچاية
سلملي گال اعلى الوفة و انطيها هاي الراية
گلها الولد ما قصرو و انتي ام ولد وفاية
أربعه نطيتي بكربله بس الحسين هواية

لا تبچين...تتشمت بيچ الناس
صح ميتين...بس ولدچ رفعة راس
تروح سنين و ترد يا يمه سنين
نفس الزود عباس يظل عباس

بحياته و مغيبه...هوه الهيبه هيبه
جوه الخيل ذب روحه...وفه حسين بجروحه
هذا المنحني منين

٤/ مرسال ودة احسين إلچ و اعلى الوفه يتشكر
ألف انعم الله اعلى الگمر عباس أبد ما قصر
من شاف أبوي لوحده و الخيل گامت تكثر
سلم و ذب چفه و ركض و جوة الخيول اتوذر

سهم العين...فدوه و ما مهتم بيه
سهم الجود...هذا الچان مأذيه
جاب الماي و تبدة الجود و طاح
بس من طاح دارو بالخيل اعليه

گطعو منه چفين...كله الخاطر احسين
طاح الچان هيبتنا...صارت نار خيمتنا
هذا المنحني منين

٥/ آنه ادري بالغايب يظل مرسال لاهله يودي
و انتم و لا طارش وصل يالغيركم ما عندي
عباس آنه اول مرة يوصل الضيم الچبدي
باچر تشيعني الغرب و العازة عازة ولدي

يالسجاد...ما وصيك آنه بهاي
لجل احسين...لترش يم گبري الماي
هذا تراب من حجاب المسبيات
جيبه وياك و دفني و نزله وياي

تراب و من ظعنهن...أتذكر تعبهن
و اشتم عاد ريحتهم...تكسر ضيم عازتهم
هذا المنحني منين

٦/ ماتت و مو گالو إلي لا شوف عيني و سمعي
و الوحدي ظليت أنتظر و ابچي و افرع و ادعي
وجهت وجهي الكربله و يكسر الخاطر وضعي
كلما تذكرت السحگ ألزم متوني و ضلعي

يم عباس...كلش مو وكت افراگ
ما ظل حيل...بالطف الحيل نباگ
چنتي وياي كل ما شوفچ تمشين
أفرح بيچ چيه للعباس أشتاگ

و ارفع چنت هامي...من أذكر عمامي
يالمكسور ظهري عليچ...و اذكر دوم ولدچ بيچ
هذا المنحني منين


*الشاعر الموفق السيد محمد الموسوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
رابط قصيدة "هذا المنحني منين":
https://youtu.be/ns6Di6pMGUM
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

*{فارگونا}*

الچانوا بوسط العيون...فارگونا
من سفرهم هم يجون...لو نسونا
آه يدمعي صب عليهم

١/ القاسمتهم فرحتي...الشاركوني ابّسمتي
يبعد الهم لمن أشتم عطر إديهم
روحي مشتاگه و تحن...و تارس اعيوني الحزن
بيدي شمعه بگلبي دمعه تواسي بيهم

ما ألگه مثلهم وين ما أمشي
لمن ضيعتهم ضيعت كلشي

لمن يصير الغروب...أفتقدهم
و شمعة اسنيني تذوب...من بعدهم
كل حياتي ابين إديهم
آه يدمعي صب عليهم

٢/ البلگلب تركوا أثر...والله يحنون الظهر
أنتظرهم و بصورهم بس أعاتب
توكلوا بالله و مشوا...شمو ادموعي و بچوا
ربي يدري شكبره كسري اعلى الحبايب

تري يموت الورد لو فارگ الغيمه
عمت عيني عليهم ناموا بهيمه

أرد احلفك يالتراب...بدمعة أمهم
إرحم بحال الشباب...اليجري دمهم
بالدفن لا تگصي بيهم
آه يدمعي صب عليهم

٣/ والله اموت من القهر...من أگلب بالصور
ذكرياتي و امنياتي كلها راحت
و بجنايزهم أسف...بس أشيع للنجف
وداعة الله يالحبايب روحي صاحت

بهونك يا تراب المگبره عليهم
لا تلچم جرحهم من تغطيهم

ظلمه يا ناس الديار...من بعدهم
الخاطر دموع الزغار...ربي ردهم
شمعه شايل من اجيهم
آه يدمعي صب عليهم


*الشاعر الموفق محمد الجماسي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__________________________
رابط قصيدة "فارگونا":
https://youtu.be/8P2XtCiNihw
__________________________
القناة الرسمية للملا مصطفى السوداني على telegram :
https://t.me/Mustafa_Sudane
__________________________

*{ماكو عباس}*

ماكو عباس وشفت ناس اليوافونك قليله
اتصير الحسين آنه ما اگدر اصيرلك عليله
كلشي منك ما أريد
راح أحبك من بعيد
وابدي صفحه من جديد
بالغرام بالغرام

١/ ما يظل نفس الوضع توبة العاشگ دمع
يعني اخونك لو إسم غيرك گعد بانفاسي
دمعتي التركض بطت و الاوراق اتخالطت
اختلفت النيه واجيتك دنگتلك راسي
ما ردت منك اجر مثل كل مره اعتذر
من رضاك ومن نظرتك أعلنت افلاسي

وترجع اردود وتسامحني شكبر گلبك يمهدي
ضايع وجيت اعله بابك نظره من عينك أجدّي
انته واجروحك صفيت
بيت للما عنده بيت
و آنه بحكامك رضيت
بالغرام بالغرام

٢/ اسنيني متوقفه بقت والايام اتساقطت
عمري شجره بنص خريفك يا ربيع ايامي
بين تشويش الذنب و بين ضحكاتي الچذب
صرت ما اشوفك وأنته بكل كتر گدامي
جرحك الغافي گعد وآنه مو قصدي أبد
النهر شمدريه شيسولف بگلبه الظامي

مثل الحسين انته عايف جرحك اداوي بجراحي
بالمقابل آنه يا مولاي مو حر الرياحي
ما ردت منك شفاء
ولا ردت منك عطاء
بس ردت دمعة عزاء
بالغرام بالغرام

٣/ آسف لكل ما جره ومنك أرجو المعذره
سيدي و عليك امشي ادموع يوم العاشر
شلون صاير منظرك أدري كاسر خاطرك
ذنبي يوميه اعله صدرك يغفه مثل الحافر
انته عايش بالألم وانه ماكلني الندم
باچر أرجعلك وصار سنين هذا الباچر

من چنت شاب آنه ناسيك واذا تعتب جوابي
اعذرني مولاي انه مو جاسم واضحيلك شبابي
ولا علي الأكبر أصير
آنه عد نفسي أسير
سيدي وعقلي زغير
بالغرام بالغرام

٤/ أدري لو واحد إجه ما تسد باب الرجه
عندك اويه الباب قصة وسالفه مجروحه
الباب يعصر فاطمه و چنت گاعد بالسمه
من وكتهه قررت بابك تظل مفتوحه
الخير يجري بدمعتك وهوسة الله بصفنتك
شگد حلو يالغالي بس احچايتك مملوحه

إنت إنسان استحاله الگه بشر يشبه صفاتك
بكل أرض لمن تصلي مو قصر تخلص صلاتك
يعني كل هذا الوجود
إلك من عندك يعود
ساجد بلايه سجود
بالغرام بالغرام

٥/ ليلي وي گلبك سوه منك ايريدن ضوه
خادمك مولاي و انه شعندي اروح لغيرك
لا تهمك حالتي و لا تهمك دمعتي
الحمد لله وإلك عايش كل سنيني بخيرك
الحگ لثارك بعد قل هو النحر أحد
راح اذكرك وانته ما تحتاج ابد تذكيرك

شلون اجازيك بظهورك حتى تجعلني بخدمتك
و اليحبون شيحبون انته ماكو من محبتك
يختلف حبك أكيد
راح احبك من بعيد
وابدي صفحه من جديد
بالغرام بالغرام

٦/ بكل شهر عندك جرح و ليلك ايدور صبح
امفصله اعليك المصايب أكثر امن اهدومك
بس حزن گلبك صدگ و شنهو عندك من خلگ
ألف واربع ميت عام و ما تمر بنومك
أرد اسالك والتفت وجهك بيوم الغبت
نفسه بعده لو تغير ارد اشوف ارسومك

بخدك انهار الفرات و دجله و النيل اعله دمعك
أعتقد لو شافتك نرجس يبن نرجس تضيعك
سومرت من الشموس
بكربله عندك طقوس
بالنجف بغداد طوس
بالغرام بالغرام


*الشاعر الموفق حمزة السماوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
رابط قصيدة "ماكو عباس":
https://youtu.be/v_Pz1YhcuBg
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

*{كله عندك كربله}*

نسهر آنه وانتظارك نحچي بيك
و دمعه دمعه الليل يبچيني عليك
يا مكان اتروح إله
و كلهه عندك كربله

١/ أسهر الليل اويه چلمة إنته وينك
وجرحي بدموعي إنسگه
إگبال تل الزينبي يحلى ونينك
لو اگبال الخيمگه
ايعز عليّه لا أسمعك لا أعينك
والخيام امحرّگه
امغورگه اعيوني ابدمعتي وانته عينك
بالدموم امغورگه

بالهوى اسأل بلچي مر بيك ابمكان
غيبتك تجرحني ياجرح الزمان
يا هضم متحمّله
وكلهه عندك كربله

٢/ عنك اسأل بالليالي ليله ليله
والجواب اتوقعه
انته يم راگ الخيم دمعك تسيله
لو ابراگ المشرعه
لا إلك دار ابسلف حته اعتنيله
اولا أثر نتبعه
الفرگه توجعني يبو الغيبه الطويله
والگلب شيقنّعه

گلبي شيقنعه وليالي الفرگه نار
ايفززن جرحي دموع الانتظار
يمته أگلك ياهله
وكلهه عندك كربله

٣/ اعليك اسلّم وانته راكع وانته ساجد
وارفع ايدي للسمه
سيدي إذكرني ابدعائك وانته گاعد
اتزور أمك فاطمه
انته تتقرب عليه واني شارد
عسى بعيوني العمه
اقسم اعليك ارد اظلن دوم گاصد
للحسين ومأتمه

الما بچالك لا يسولف عالغرام
كل جزع مو لاجل ابو اليمه حرام
الله بالطف حلّله
وكلهه عندك كربله

٤/ الگلبه شايل كربله ماظن يلمه
لا مچان ولا سكن
التسعر ابروحه خيام ايصير همه
اشلون مر ليل الضعن
الجرحه ديوان وخرابه ايصيح عمّه
الخدّر اويامن مشن
العينه شافت عاري وامغسل ابدمه
ايصيرن اثيابه چفن

اشخله بيك الطف يوعد الله الاكيد
فوگ ماذبحو هلك تصبح طريد
عشت هايم بالفله
وكلهه عندك كربله

٥/ اشلون حالك يبو الغيره الهاشميه
من تشوف اعله الثره
أثر خطوات السبي لعمتك رقيه
من خذوهه اميسره
نوجعك لو صحنه زينب يا سبيه
وهيه اسمها امخدره
درّه من إيد الوصي حامي الحميه
لإيد سبع الگنطره

راح عمك واحترگ خدر الكفيل
والخيام احترگن وبيهه العليل
وبيها چم امدللـه
وكلهه عندك كربله


*الشاعر الموفق أحمد الهلباوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
رابط قصيدة "كله عندك كربله":
https://youtu.be/wdMccEciP5s
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

*{شاء الله}*

١/ مَدْرِي جرُوحَكِ شْگَد الله يِعْلَمْ
يَالكِلْ حَسْرَة مِنَّكْ غِيمَة مِنْ دَمْ
وَ اشْلائَكِ اهْوَايَه صَعْبَة تِلْتَمْ

جَسَدْ مِنْ غِير رَاسِ اوْ خَالِي نَحْرَه
وِ الخُنْصُرِ بچَفَّكْ خَلَّه ثَغْرَه
طِحِتْ وِ النَّاسْ صَاحَوْ رِضَّوا صَدْرَه

وَيْ كِلْ حَافِرْ...صَدْرَكْ يَامِرْ
رَضْ يِكْرِمِ لْخُطَّارَه
جُوفَك ضَامِي...نَحْرَك دَامِي
وَجْهَك تِشِعّ انْوَارَه
بِين أيْتَامَكْ...نَارِ خْيَامَكْ
نَظْرَاتَكِ المِحْتَارَه

وِ خيَامَكْ...بِعِيدَه
وِ عيَالَكْ...وَحِيدَه

٢/تُرَابِ الصَّحْرَه بِيكِ هْوَايَه عَايِلْ
و جِسْمَكْ يَا تُرَى شْچَمْ نَبْلَة شَايِلْ
گَدْ مَا وَصِّلُولَكْ مِنْ رَسَايِلْ

مِنْ يِمْشِي الضَّعَنْ بِينِ المِنَايَا
عيَالَكْ مَا تِظَلْ وَيَّاهَا رَايَه
شَاءَ الله يَرَاهُنَّ سَبَايَا

ضَعْنَكْ يِبْعِدْ...صَمْتَكْ يِرْعِدْ
حِزْنَكْ بِدَا رَبِيعَه
طَفَّكْ شَاهِدْ...عَنْ كِلْ وَاحِدْ
عَهْدَكْ رُفَضْ يِبيعَه
لِيلَكْ ذَابِلْ...ضَيِّ الكَافِلْ
طَايِحْ عَلَى الشِّرِيعَه

بروحَكْ ظَلْ...أمَانَة
مَا يِنْسَدْ...مَكَانَة


*الشاعر الموفق إيهاب المالكي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________________
رابط قصيدة "شاء الله":
https://youtu.be/fdRFkDu0wuY
_______________________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________________