•{يا سلاب تاج حسين}•

يا سلاب تاج حسين...گلي وين لباسه
يگلها التاج شلچ بيه...ذاكه اعلى الرمح راسه

يا يمه...يا أبا عبد الله

١/ گالتله يا سلاب تاج اولدي عمامه
عمامة رسول الله و مفصّله اولامه
گاللها اخذت التاج من راسه گدامه
من النزف ما گام بس حرك اسهامه

شفته امن العطش ذبلان گوه يشهگ انفاسه

يا يمه...يا أبا عبد الله

٢/ وگفت جريب الراس صاحت يسلّابه
هسه انته اخذت التاج ما تترك اثيابه
خليلي ثوب احسين يعوضني بغيابه
گللها هذا الثوب و مدمّه بخضابه

شافت ثوب كلّه جروح صاحت وين عباسه

يا يمه...يا أبا عبد الله

٣/ گالتله يا سلاب دير الرمح ليّه
خليني ابرّد نار گلبي بمعانية
شافت ملامح غير و الهيئة مو هيه
دم و عطش و تراب و الشيبة مدميه

متغير عليها اهواي من حر الظهر جاسه

يا يمه...يا أبا عبد الله

٤/ گاللها درنه اعليه من أربع اكتاره
ما لحگ و يرتاح غاره بأثر غاره
حاول يريد يگوم من عاين ازغاره
و شيگوم المذبوح و مگطع اوتاره

من صد عالخيم حسيت يحچي وياهم احساسه

يا يمه...يا أبا عبد الله

٥/ شافت مره اعلى التل و تگربت ليها
عرفتها زينب هاي من "شبچت اديها"
بنت اكبر من الأم شنهو الجرى اعليها
چا هذا فگد احسين غيّر معانيها

ركضت عالرمح بس حيف ما خلوها حراسه

يا يمه...يا أبا عبد الله

٦/ تلاگن سوى بالنوح أم فاجده و بتها
أم عدها ابن مذبوح و الثانيه اخوتها
بس البنت عالأم فاقت مصيبتها
زينب وراها الشام لمتاني جيّتها

سموهم سبايا الروم شر خلگ الله و ارجاسه

يا يمه...يا أبا عبد الله


*الشاعر الموفق حسين حازم البوشي*


رابط قصيدة "يا سلاب تاج حسين":
https://youtu.be/sf_1-hxw0z4?si=GVxe29RvgFuxPLtL
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{طيور و نحب المنارة}•

بالكتب نقرى الزيارة...بس گلبنا شيطفي ناره
إحنا ما نصبر مِنِ بعيد...طيور و نحب المناره
وينه الإمام المهدي وينه؟
ياخذنه يم أمه الحنينه

١/ ضمه ضمه ضمه...بدليلي شگد ضمه
بكبر هاي السِّمه...زيارة فاطمة
كسر كسر كسر...غياب أمنه كسر
بده يگضي العمر...متى نشوف الگبر

يا صاحب زماني...لظهورك نتاني
متى نروح لفاطمه و إلها ندانه يعتلي
أجيها بدموعي...و لطمتي بضلوعي
و أقدّم إلها ورد جايبه من مرقد علي

هناك أگلها و ضلعي الطمه...وين هاي الغيبه يمّه
بدونچ احنا يم الحسين...عايشين بدنيا ظلمه
المهدي شوكت ينظر علينه
ياخذنه يم أمه الحنينه

٢/ غبت غبت غبت...يمهدي شگد غبت
و حگك طولت...تعود النه شوكت
وطن وطن وطن...غريب بلا وطن
متى نمشي معا...نزور ام الحسن

ظهورك يسُرها...تِعاين گبرها
و "هُنا ترقد فاطمه" بيدك إسمها تكتبه
بهذيچ المسيه...لعيون الزجيه
و علي عمّاله نجي و إحنا نشيد العتبة

ما نسوي ابواب إلها...الباب يا عالم كتلها
و كل صباح و ليل بالآه...ضلعچ شلونه نگلها
و للمنتظر نرفع إدينه
ياخذنه يم أمه الحنينه

٣/ هضم هضم هضم...بُعُد فاطم هضم
حياة بلا طعم...فگدنه أغلى أم
شمع شمع شمع...شوكت نعلگ شمع
لگبرها و ننفجع...على كسر الضلع

نراها قريبة...و نزور الحبيبة
بلطم و بحرگة نجي و نبچي على الممتحنة
نجيها بكسرنا...و نعوض صبرنا
نريد اهناكه اول زيارة نظل يمها سنة

ان شاء الله نوصل گبرها...ونبچي للموت لعصرها
و نلعن الأذاها بالباب...و بيده الثگيلة سطرها
و نتاني أبو صالح يجينه
ياخذنه يم أمه الحنينه

٤/ حلم حلم حلم...زيارتها حلم
تعبنا من الرسم...صحنها و بيه نشم
خبر خبر خبر...متى نسمع خبر
أبو صالح ظهر...نريد المنتظر

أملنا نريده...و فرجنا اعلى إيده
قبر أمه فاطمه هوّه يظهره للعلن
و انا بهالحكايه...شوكت أحچي هايه
دعيت الكم يا هلي هوايه بصحن أم الحسن

زيارة الزهره حلمنا...هوايه من عدها انحرمنا
نريد يمها ننعى و نطيح...و الها ما يخلص لطمنه
و راعي الأمر يتواسى بينه
ياخذنه يم أمه الحنينه

٥/ إلك إلك إلك...يمهدي العين إلك
بحلم نتأملك...اعلى فاطم نسألك
أفي أفي أفي...المدينةِ أفي
طوى في النجفِ...گبر أمنه الخفي

وعدنه ايتجدد..اويه آخر محمد
اعلى منبرها يرتقي و احنه خطبته نستمع
أبد مو بعيده...طلعته الرشيده
و نزور أمنه فاطمه و نبچي اعلى خدها البيه طبع

انگله أول طلب عدنا...لفاطمه زيارة إخذنا
صعبة الزيارة من السطوح..نطيح يم الگبر ردنه
ما ينسى خدام الحزينه
ياخذنه يم أمه الحنينه


*الشاعر الموفق ميثاق الحمداني*


رابط قصيدة "طيور و نحب المنارة" :
https://youtu.be/1CJw19lcMuc?si=pg76Pb3L7fUEuMEb
_____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____
القناة الرسمية للملا مصطفى السوداني على telegram :
https://t.me/Mustafa_Sudane

*{يَا مَحْبُوبِي}*

يَالتَارِسِ اعْيُونِي اوْ إِيدَيْ وِ جْيُوبِي
كِلْ عَامْ وِ انْتَ بخِيرْ يَا مَحْبُوبِي

١/ كِلْ عَاشِگِ ابْمَعْشُوگَه بِحْسَاسَه ايْذُوبْ
و كِلْمَنِ و لُونِ محَبِّتَه ويَ المَحْبُوبْ
برَاسِ السَّنَة و كِلْ عِيدْ لِلنَّاسِ اسْلُوبْ

بِالتَّهْنِئَة و آنَه الدَّمِعْ بِاسْلُوبِي
كِلْ عَامْ وِ انْتَ بخِيرْ يَا مَحْبُوبِي

٢/ دُورَةْ سَنَة اشْتِعْنِيلِي خَلِّيهَا اتْدُورْ
هَذَا آنَه عَايِشْ عُمْرِي عَشْرَةْ عَاشُورْ
بِيش أحْتِفِلْ ؟ غِير إنْتَ ضِلْعَكْ مَكْسُورْ !

بنَبْرَةْ حِزِنْ كَاتِبْلَكِ بْإسْلُوبِي
كِلْ عَامْ وِ انْتَ بخِيرْ يَا مَحْبُوبِي

٣/ دَمْعَةِ المَأْتَمْ تُبْقَى حِنَّة اعْلَى البُوبْ
المَا فُگَدْ يُوسِفْ مَا يِحِسِّ ابْيَعْگُوبْ
وِ الكَشْخَه كَشْخَةْ سُمْعَه مُو كَشْخَةْ ثُوبْ

و هَذَا آنَه كَاشِخْ بِيكْ وَ اسْوَدْ ثُوبِي
كِلْ عَامْ وِ انْتَ بخِيرْ يَا مَحْبُوبِي

٤/ كِلْ يُوم مو كِلْ عَامْ وِ انْتَ الغَالِي
تَارِسِ اعْيُونِي و دُومْ شَاغِلْ بَالِي
لو مَا خِدِمْتَكْ آنَه يَا هُو بحَالِي

خِدْمِتَكْ خِيرِ اوْ سَاتْرَتْلِي اعْيُوبِي
كِلْ عَامْ وِ انْتَ بخِيرْ يَا مَحْبُوبِي

٥/ كِلْ عَامْ وَ آنَه اعْلَى العَهَد وِ الخِدْمَة
أدْعِي الله لا يِحْرُمْنِي هَايِ النِّعْمَة
حَتَّى أبْچِي حَدْ مَا تِطْفَى عِينِي و تِعْمَه

حَتَّى آنَه اگُولَنْ حَقَّقِتْ مَطْلُوبِي
كِلْ عَامْ وِ انْتَ بخِيرْ يَا مَحْبُوبِي

٦/ كِلْ عَامْ وَ آنَه بكِلْ خَمِيسِ ببَابَكْ
أبْچِي اعْلَى نَحْرَكْ وَ احْتِرِگْ لِمْصَابَكْ
بِسْمَكْ أسَبِّحْ وَ اسْجِدِ اعْلَى اعْتَابَكْ

وَ اطْلُبِ بجَاهَكْ تِنْغِفِرْلِي ذنُوبِي
كِلْ عَامْ وِ انْتَ بخِيرْ يَا مَحْبُوبِي


*الشاعر الموفق محمد الفاطمي*


رابط قصيدة " يَا مَحْبُوبِي " :
https://youtu.be/KHqNiBBoySw
➖➖➖➖➖➖➖➖➖➖➖➖➖
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
➖➖➖➖➖➖➖➖➖➖➖➖➖
القناة الرسمية للملا مصطفى السوداني على telegram :
https://t.me/Mustafa_Sudane
➖➖➖➖➖➖➖➖➖➖➖➖➖

•{مو مثل زينب}•

ردنه من نار المخيم جمرة تچوينه بگلبنه
شما تعبنه بالمجالس مو مثل زينب تعبنه
خل نواسيها...و نعرف شبيها
مو مثل زينب تعبنه

١/ لو بينه جمرة امن الخيم
چا هسه غيّرنه الألم
و اعلى الألم ما نگدر

لو نعطش و نسحگ جمر
چا شفنه شمسوي الشمر
من ما رحم بت حيدر

لو نلطم بحر الشمس
يكشط جلدنه من أمس
چا ما تحملنه الحار

لو نمشي ساعة عالهزل
چا ما نظل نفس الشكل
منّ التعب نتغير

كل هذني و بيهن اكثر مرن بزينب سويه
و لو ردت أعرف لطمها ألطم و مگيوده اديه
نسأل عليها...و نعرف شبيها
مو مثل زينب تعبنه

٢/ لاگانه بالمجلس شخص
چان الحچي بزينب يخص
يبچي و سألنه عليها

گال شتعيشون الألم
جاوبته جمرات الخيم
تحرگ گلب راعيها

مهيوبة طبت كربله
و طلعت أسيرة بسلسلة
و السلسلة تجر بيها

گتله مشت بين الغرب
جاوبنه و دموعه تصب
كافي عرفت شبيها

گال معقولة أخوها راحت و ما يفزعلها
گتله راسه ما تركها عالرمح يمشي قبلها
ظل يباريها...و نعرف شبيها
مو مثل زينب تعبنه

٣/ يا من عزاكم بيه سگف
و زينب عزاها يختلف
ماكو سگف فوگاها

مجلسها ما بين الغرب
برض الخرابة منّصب
بس اليتامه وياها

مجلسنه إحنه بي ضوة
و براحه نشتم الهوى
و اللمة يا محلاها

بالظلمة تبچي أم الخدر
و من تبچي يمنعها زجر
و بسوطه يتلگاها

إحنه لو يا حسين صحنه نصرخ براحه لخوها
و هيه لو يحسين صاحت بالسياط ايسكتوها
السوط ياذيها...و نعرف شبيها
مو مثل زينب تعبنه

٤/ وين اليموت امن الجزع
بلوعة رقية من سمع
شنهو الجرى بحالتها

ياريت اموت و لا عشت
الجابوا أبوها بالطشت
ما أوصل الحرگتها

لو شفت أبويه بس نحر
و راسه يضربونه بحجر
چا وصّفت لوعتها

و شلون أوصّف هالجرح
طفله و أبوها ينذبح
و توجّرت خيمتها

الطفلة لتباوع أبوها باقي بس راس بديها
منهو يتحمل حزنها چا رقية شصار بيها
تموت تاليها...و نعرف شبيها
مو مثل زينب تعبنه

٥/ عندي وصية بهالعزة
و كون الكلام انميّزة
و الكل يسولف بينه

لو نسمع الناعي يون
ويّاهم نعيش بحزن
نعرف ألم مهدينه

چي عاش هوّه بهالوضع
بچفوفه يلطم عالضلع
و من دم دمعته بعينه

كون احنه مثله باللطم
بصدرة ينرج العظم
من يلطم بچفينه

بحرگه يبچي عالسبيه و البچه عليها يشوفه
على حسين العنده غيره اتبين بلطمة چفوفه
و لو لطم ليها...و نعرف شبيها
مو مثل زينب تعبنه


*الشاعر الموفق السيد محمد المنصوري*


رابط قصيدة "مو مثل زينب":
https://youtu.be/e8_CmV_lSRI?si=czdnzCG6d8jnuZDk
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{من أجل المهدي}•

كتبت دموعي على اوراق الحنين
هل أنا فعلا من المنتظرين؟
ما ريد أيامي تعدّي
نادم من أجل المهدي

١/ لمني بهواك اتطشرت و اجمعهن اجزائي
ما رايد لغيرك أبد تتشتت اهوائي
الغفلة دائي مروّتك خلّصني من دائي

خذتني بعيد دنياي
و الك ردّيت مولاي
أحبك كلش هواي...أهل يكفي الندم؟

إجيتك و آنه خجلان
مثل هدهد سليمان
إخذني ابّين الأحضان...يمهدي امن العدم

طير أهاجر باحثا عن السلام
و لا أمان إلا تحت ظل الإمام
صفحة جديدة أريد أبدي
نادم من أجل المهدي

٢/ أما بعد يبن الحسن ضايع أنا بدونك
ما ريد أصيرن سيدي منّ اليغيبونك
خليني وكت المعصية أتذكر اعيونك

كبرت و بيّن الشيب
وين إيماني بالغيب
إمامي يشوفني عيب...أسيء بأدبي

المتى و شلون و الوين
شنفعها و آنه مو زين
أزعّلك ألف عين...بأمي انت وأبي

أخسر الدنيا المهم أكسب رضاك
آنه عايفها يبو صالح وراك
بالحب راح أبذل جهدي
نادم من أجل المهدي

٣/ عبدك و ابن عبدك أبد ما طبقتها بيوم
توگف تصلي انت الفجر و آنه بسبات النوم
شگد صعبة مرتاح العبد و الينجرح معصوم

أبد ما فكرت بيك
حبيبي جاي أأذيك
منو آنه و أبچيك...يمهدي المعذرة

حيائي وياك محدود
و لا محسسني مطرود
إلي تستغفر اردود...رغم كل الجره

يا حنين الما يصح مثلك حنين
آنه خايف يا أمان الخائفين
ما رايد أخلف وعدي
نادم من أجل المهدي

٤/ رحلة مقصر و انتهت و من بيتي اريد أبدي
رايد أأسس عائلة بس تحچي بالمهدي
و بالندبة كل جمعه سوى يقرون الك ولدي

و بناتي مهدويات
اعلى ذكرك نصحى و نبات
و تكون أجمل نهايات...البيت المهدوي

المدينتنه إذا جيت
و وحشه و غربه حسيت
يفرحك كون هالبيت...لذكرك يحتوي

البيت اليذكرك يصير أحلى البيوت
و اللي ناسينك كبيت العنكبوت
يا روحي و لهنا حدي
نادم من أجل المهدي

٥/ متى للمتى أن تنتهي محتاجك اهوايه
هل من سبيل لشوفتك فرحني بحچايه
رايد أدورك سيدي من ولايه لولايه

مناجاة المحبين
قريت و آل ياسين
و عفت كل العناوين...أريد أوصل إلك

ردت ما أحچي بفراگ
لچن جبرتني الأشواگ
دخيلك والله مشتاگ...تعال أتوسلك

لا يطاق البعد عنك لا يطاق
و أبقى أكتبلك رسائل إشتياق
أكتب و الدمعة بخدي
نادم من أجل المهدي


*الشاعر الموفق ياسر المطوري*


رابط قصيدة "من أجل المهدي":
https://youtu.be/hG2rxkolj_4?si=li09hZpMGs_IlvIb
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane

•{موطني يا بو علي}•

موطني يا بو علي يالبيك روحي تستقر
انت حبي الأولي و أول وطن ما بيه هجر

انت حبي الأولي يالبيك روحي هايمه
آنه ما أدخل إذا ما ترضى أمك فاطمة
هذا قانون الهوى مولاي يجري اويه الدمه
إحنه نخدم للعشگ لا للإسم لا للأجر

إحنه نخدم للعشگ مو للأجر و المصلحة
إحنه لو ضگنه الملح هيهات نكسر مملحة
هالعشگ مو بالحچي بالموت كون انوضحه
لآخر أنفاس التجي مولاي بالحب نستمر

آنه عايش للعزه و الروح تنعى بالهضم
الكون كلّه دوّره ما تلگه أحلى امن اللطم
أنحرم منّ الهوى و منّ العزه لا أنحرم
إنت يا طعم الحچي يمحلّي ديوان الشعر

إي نعم خادم أنا، لاچن ملك طول الدهر
عمري بالموكب گضه أطبخ لبو اليمه الفخر
يوم تسوَدّ الوجوه و يوم ما عندي مفر
راح أبيّض هالوجه يا ناس بصخام الجدر

و أربعينه لو گرب يا ناس نطويها الفله
تلگه يم باب الولي جن و إنس تتوسله
الكون كله ينتظر و يريد يدخل كربله
بالمشي انتعب المشي هيهات منّه نعتذر

على عتبة كربله كل الخدم تلزم سره
و ابو فاضل بالعجل يكتب أسامي بدفتره
و اشكبر اسمك اذا يختاره سبع الگنطره
تفوز دنيه و آخره و يعبّرك من الجسر

إنت مسك الخاتمه و الدنيه كلها بصايتك
لو وگفت بكربله تنشر علينا رايتك
سيدي يا بو الوفه كل احنه جوه خيمتك
بيرغك لمن يرف حب و حنانك ينشر


*الشاعر الموفق حسين الساعي*


رابط قصيدة "موطني يا بو علي":
https://youtu.be/rm2pzAv5Gwc?si=Qd6XN3OHsi8qAM7w
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{محرمنا العشگ}•

إلى من ينتظر   بأحر من الجمر   شهر يسوه العمر
                    محرمنه العشگ

بلطم نستقبله   هله ومية هله    محرم بوصلة
                   الى الحب الصدگ

١/ وين اليتانون
امن العام المضه من عزّلت كل المواكب
لمعه بالعيون
لمعة بعين عاشگ ينتظر  هيچي نراقب
لازم تسجدون
مو سجدة شكر سجدة دمع للزهره واجب

غيرك عوفه اذا عيّد
من هسه البس الاسود
يخلص عدنه رمضان معناه عاشور

البيوت بصدق نية
تتحول حسينية
بينه لخدمة حسين بركان ويفور

مشه گوه الوكت
لمحرم نلتفت
تعال اتأخرت على الحايط ندگ

٢/ ما نلتهي دوم
تفكير الخدم كله عزه ودمعه ومجالس
وانخيط الهدوم
وبالركضه نشگهن بالعشگ علمنه عابس
ما نعرف النوم
شهرين احنه ما نغفه أبد للخدمه واهس

صح طول السنه اللطمه
بس عاشور اله طعمه
كلشي يختلف بيه و النوح و الآه

كلشي يروحله فدوه
حتى الشعر هم أقوه
شنقره فاطمه تصيح الله الله

اجه اكبر السفن
ومنبّه للحزن
يضل بينه يون الى ان نحترگ

٣/ شيخلص الأيام
أصعب شي اذا گلنه اسمنه بلايه خادم
وفرحو يخدام
عندي الكم خبر من هسّه بالأيام قادم
أكثر من العام
عدنه هالسنه أكثر تره تصير المآتم

بكل شارع أكو موكب
ما يبقه شبر يعتب
علگنه السوادات واتگول تشييع

الصعبه تصير اله سهله
فرات نوزعه وي دجله
يخلص عدنه نهرين لحسين توزيع

بعد ماكو ضمه
مطرنه وي السمه
نفرّح فاطمه بنواعي ونختنگ

٤/ عِشره اويه عاشور
العِشره ما تهون الا على الما عنده دمعه
ياربي مشكور
چي عاشور رد وبيه حيل بمجلس أنعه
ما ريد معذور
ما تعذرني اريد الزهره اذا ما بيه فزعه

مهما يحصل ويايه
لازم أرفع الرايه
لو بجنازه محمول أبچي على الحسين

طول السنه امداريني
لازم ابچي لحسيني
اسمك تاج مولاي عالراس والعين

أبو گلب الأبو
منو بگده منو
الي واگف كفو و لا عنه افترگ

٥/ نختمها بدموع
لمن نندعي للغايب الحاضر عزانه
موضوعه موضوع
الله يسهل النه طلعته ويرفع لوانه
ما يعبر اسبوع
الا و تنقري الندبه ونتانيه بزمانه

محرم أحلى بالمهدي
جنه استوه من يبدي
جدي ايصيح عطشان عريان مسلوب

وكلنه بكربله نلتم
نشوف عيونه تنزف دم
شكد باچي على الحسين مولاي متعوب

ويجي اجمل خبر
بحضور المنتظر
سنه يصير الشهر الگلب بسمه يدگ


*الشاعر الموفق حمزة السماوي*


رابط قصيدة "محرمنا العشگ"
https://youtu.be/qKANWD3A73s?si=Iq4PL-iwXdoh2tkn
__
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
__

•{شكرا لكم}•

شكرا لكم...للشكر آن الأوان
شكرا لكم...بسمِ صاحب الزمان
شكرا لكم...كلمة من گلب و لسان...شكرا لكم
شكرا لمن يخدم صدگ
من فاطمة رتبة عشگ

١/ البچانه يوم العاشر...بأجمل هديه يفاخر
و المهدي لا ما ينسه...ينطي قلم للشاعر

الشاعر يتبعه الغاوون بالآيه لمّن نقرى
بس اللي كتبوا لحسين تتبعهم أمي الزهره
تحضر مجالسهم دوم و تلطم بدمعه و حسره
الما يكتب لطف حسين يا ناس منهو يحضره

اليكتب عدل...و ما تجرأ عالسماء
اليكتب عدل...عدنه أغلى الشعراء
اليكتب عدل...يحبه سيد الشهداء...شكرا لكم
شكرا لمن يخدم صدگ
من فاطمة رتبة عشگ

٢/ الملا ننطيه غتره...و الغايه عند الزهره
اتشد اديه بالمنبر...و تگله ظل دوم اقره

تصعّد رتبته الزهراء اليقره و أبيض نيه
و اليتعب و دوم يگول أتعب لجل مسبيه
الحنجره البيها احساس و بيها دفو و حنيه
خالقها الله يا ناس كي تصبح احسينيه

الملا الصدگ...بالطرح قدوه يصير
الملا الصدگ..نسجله وي حمزه الچبير
الملا الصدگ...هذا باچر ما يحير...شكرا لكم
شكرا لمن يخدم صدگ
من فاطمة رتبة عشگ

٣/ الصار اللطم تعويده...إلمهدي راح يزيده
الشال إيده يلطم بيها..هذا اللي عاشت إيده

الرتبه تحطها الزهراء كلمن بأجره و تعبه
و اللي يوزعون الماي من الگمر حصلوا جربه
و الكنس موكب يا ناس هذا چبير الرتبه
يوم القيامه الخدام بيها الخلگ متعجبه

حي الخدم...و الهديه امن الحسين
حي الخدم...باچر يگر الها عين
حي الخدم...يوفي الها الضامي دين...شكرا لكم
شكرا لمن يخدم صدگ
من فاطمة رتبة عشگ

٤/ المهدي ينطي رايه...للي مشه مشايه
و اليفتح حسينيه...بالجنه عنده ولايه

و احنا وعدنه ام حسين و بالوعد تعلم هيه
بعاشور نخدم و تصير كل صفر نفس الجيه
بدلنه قبل اشكم عام اسم الكره الأرضيه
وكت المشي الإسم يصير ألكرة الحسينية

خدمه و مشي...و نوح و اقرايه و دموع
خدمه و مشي...و لطم يكسر بالضلوع
خدمه و مشي...و ليل لطميه و شموع...شكرا لكم
شكرا لمن يخدم صدگ
من فاطمة رتبة عشگ

٥/ المثلّه دور نوفقه...الوثّق قصيده نوثقه
إلخدمه رزق الخادم...الزهره التوسع رزقه

أفضل رتب للخدام للي اجتهد و اللي جد
الگالوله لا تنعى احسين بس بوعوده جدد
اللي حچه و چانت نار مو يحچي لمن تبرد
و الزهره تنطي الخدام كل ناعي أجره لوحّد

نال الأجر...اليحچي بالحق و القرار
نال الأجر...الينوي تصحيح المسار
نال الأجر...ما تمسّه اهناكه نار...شكرا لكم
شكرا لمن يخدم صدگ
من فاطمة رتبة عشگ


*الشاعر الموفق ميثاق الحمداني*


رابط قصيدة "شكرا لكم":
https://youtu.be/QD52AF203F8?si=VSfqt0Ntj5HPQRXy
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{الطير دلاهم عليك}•

يا هضم روحك...و انت بجروحك
بغربتك محّد يجيك...وين اهلك
عالسطح حاير...تكسر الخاطر
الطير دلاهم عليك...وين اهلك

١/ غريب لوحدك...منو اللي يساعدك
و عليك مقفّله البيبان مولاي
ضمه و حر و شمس...منو بجرحك يحس
تريد الماي محّد جابلك ماي

بعمر العشرين و أيامك ذبلن يا عود الياس
و حتى الجلمود اعلى مصابك ذاب وظل يبچي احساس
يا هضمة روحه ابن آدم من يوگع و تعوفه الناس

بموگد احزانك...شيطفي نيرانك
دمعتك عالخد تصيح...وين اهلك
و تنظر بعينك...محّد يعينك
يا أبو الگلب الجريح...وين اهلك

٢/ چنت صايم چنت...و على السم افطرت
و بقيت من الألم تتلوى بالبيت
تنازع بالأجل...غريب بلا أهل
أهل بغداد فزعتهم تمنيت

أيام تلاثه و ما گالو شو ما شفنا المعصوم
ما يدرون بسطح ديارك ميت ضامي و مسموم
حتاجيت الهم من ضليت تطيح من السم و تگوم

رايد احبابك...تحضر امصابك
تلتفت عينك غريب...وين اهلك
جرحو احساسك...و شيبو راسك
و تندعي بأمّن يجيب...وين اهلك

٣/ حمامات السمه...إلك يبچن الدمه
عليك تجمعن و يسوّن فياي
لمن صوتك سكت...نواعيهن علت
و هذا اول عزاء عليك مولاي

جنح الطير عليك اتكسّر و تكسّر گلبي عليك
يالما جارح گلبك واحد ليش الناس تأذيك
نزلت من الجنه الزهره و صاحت بيّه و لا بيك

چم حمامه تون...و مأتمك تعلن
و تسأل جروحك سؤال...وين اهلك
ظلن بصحنك...ينعن لحزنك
و حتى صحنك چنه گال...وين اهلك

٤/ علي الهادي إلك...إجاك و غسّلك
و دمعتك سالت اعلى الوجنه مهضوم
شفت طف كربله...و جسد ظل بالفله
و تغسّل بالدفن من فيض الدموم

من شالوا نعشك بضلوعك حسيت تدوس الخيل
شفت حسين شلون تطشر و ظل عاري نهار و ليل
محّد شيّع جسمه و زينب ما عدها متون وحيل

نعشك اتهزهز...ما قبل يركز
تنعه لحسين و تگول...وين اهلك
ميت و تبچي...و بالدمع تحچي
يالخذت صدرك خيول...وين اهلك

٥/ على مصابك مضه...زمن يبن الرضا
و إلى إبن الحسن وصلت المأسآة
مثل حالك و أشد...جرح ثالث ولد
ورث منك غربتك و المعاناة

ماهي جديدة الغربة عليكم و اجيال تورث اجيال
و المهدي اليوم من غيابه ما شايف راحة بال
و مثل الغربة البيكم بينا و نعيش بأصعب حال

المهدي بجروحه...عايش بروحه
و يسمع بأذنه كلام...وين اهلك
غربته صعبه...و دمرت گلبه
كلشي يسأل بالإمام...وين اهلك


*الشاعر الموفق ياسر المطوري*


رابط قصيدة "الطير دلاهم عليك":
https://youtu.be/iLLFZKKVSc0?si=ulrKKhdUxuNYsgxD
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{لولا محرم}•

١/ أعدّ الليالي بطريق الظعون
و اريد بدمعتي ألاگي اليجون
من الصادق أطلب لمحرم دموع
فلولا محرم أنا من أكون

أتاني و أعد أحسب
أريد انصب الموكب...و اسهر

أرد آدمي بدمعي
أنا ازكه من أدگ ضلعي...و أطهر

شنو عمري من دونه
بلا مجلس جنونه...شگدر

في محرم عمري ألگاه...من أصيحن واحسيناه
بگلبي يطهر ويّه كل آه...من أصيحن واحسيناه

-بأبي أنت و أمي يا أبا عبد الله-

٢/ أتاني الضعينه بقلق و اشتياق
مخطره الصحاري و درب جيته شاق
أعلگله رايه و احضّرله ماي
هلا يبو الأكبر تشرف العراق

هلا بآل أبو طالب
تحط يمتى و نراقب...رحلك

نتاني يطل نورك
هلا بصحبك و سورك...و اهلك

هلا بريحة الزهرة
أنا برايته الخضره...اتبرك

عمري كلّه مو مواسم...آنه لضعون الهواشم
عمري كلّه أبقى خادم...آنه لضعون الهواشم

-بأبي أنت و أمي يا أبا عبد الله-

٣/ الحياة مو حياة بدون العزاء
الوطن مو وطن بلا كربلاء
بغير الحسين أنا لا أكون
أنا من أنا بغير البكاء

لطم دمعه و اقرايه
و إله أمشي مشاية...عمري

ثواب امي و انذوره
و حطب نار الجدورة...ذخري

علگ صحنه و امراده
و عطر راية السادة...عطري

غيري لأهل الدنيه داخل...و آنه يمك يبو فاضل
وكتي يعدل وكتي مايل...و آنه يمك يبو فاضل

-بأبي أنت و أمي يا أبا عبد الله-

٤/ عليل البواچي محرم دواه
يضيعني وكتي و أظلن معاه
و إذا گلبي صاير حجر أبقى انوح
عذر مالي كون الحجر هم بچاه

يفت الحجر حاله
بقت عينه لعياله...حاير

و لا غالي للغالي
وحيد الظهر خالي...شصاير

توسد رمل هيمه
و طرف عينه للخيمه...داير

لرقية بقه مهموم...واغريباه وامظلوم
بعياله غفه مهضوم...‌‌‌‌‌واغريباه وامظلوم

-بأبي أنت و أمي يا أبا عبد الله-


*الشاعر الموفق مصطفى صادق اللامي*


رابط قصيدة "لولا محرم":
https://youtu.be/8CEKuMcv4YA?si=G5h7c2JJCalAqzVa
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{شاهین القبیلة}•

حسينية شمرته حسينية
يشاهين القبيلة القريشية
ملامح من علي بيك وابوفاضل
الهواشم قمة وانتَ سيلها النازل

١/ مسلم يلمنومس عمامه...ويلاه ويلاه
مسلم يلمعلم الشهامه...ويلاه ويلاه
طبيت عالكوفة قيامه...ويلاه ويلاه
الرجال خل ليله ينامه...ويلاه ويلاه

كالوا بالازقة تضيع لا ما صدكت بيها
هيه البوصلة من اتيه انت اللي تدليها
هلا يمضيع الكوفه و ميبّس شواطيها

بديهيه سريع البديهيه
يماخذ من عمامك ميه بالميه
مثل ريح بجهات الاربعة تقاتل
ملامح من علي بيك وابوفاضل

٢/ يا مطر واعله الصحره نازل...ويلاه ويلاه
ما جابتك والله الرسايل...ويلاه ويلاه
لحسين انته خبر عاجل...ويلاه ويلاه
يا منخل تغربل مراجل...ويلاه ويلاه

هوه اللي علي رباه بالاصلاب هم عالم
وهوه اللي ابو نسّاب بالأنساب هم فاهم
اختصاراً انته بخت حسين اليفضح نية الوادم

علويه علومك علويه
يكشاف النوايا تيهو النيه
يجيتك حب علي و تبين العاذل
ملامح من علي بيك وابوفاضل

٣/ شرّاي وتگلب بضاعه...ويلاه ويلاه
چانت صلاتك باب طاعه...ويلاه ويلاه
الما حملو تصلي جماعه...ويلاه ويلاه
شيبقون ويّه حسين ساعه...ويلاه ويلاه

گلت اللي يريد حسين خلي يصلي ويايه
وانقلبوا على الأعقاب يمكن رددت آيه
انته هوايه ما محتاج تصلي خلفك هوايه

حسنيه حكمتك حسنيه
الفراسه التمتلكها مو طبيعيه
تميز ابن الحرام الچان ما قابل
ملامح من علي بيك وابوفاضل

٤/ عُربي وتعرف الحجي ورايه...ويلاه ويلاه
يا ماي هذا يا سِقايه...ويلاه ويلاه
وابّاب طوعه وگفت غايه...ويلاه ويلاه
لنها لعلي عدها ولايه...ويلاه ويلاه

هيه الچانت اتّانيك مو انته الذي اتّاني
وانتو بعالم الأصلاب واحد يعرف الثاني
يمكن جيت للكوفه لخاطر طوعه ولهاني

ولائيه نجمعتوا ولائية
يبيعتكم للحسين غديريه
بس تلاثه جنتو ضد ألف قاتل
ملامح من علي بيك وابوفاضل

٥/ ياقصر هذا المنه تهوه...ويلاه ويلاه
عاشو سراب بدون صحوه...ويلاه ويلاه
ماطيحوك وطحت كوه...ويلاه ويلاه
هوه الثگيل يصير جوه...ويلاه ويلاه

فشله الطيحه عند الناس بس طيحتك مو فشلة
الثگل لمن يطيح بماي وجه الماي بي يعله
اذان انت وسبگت حسين حتى الصلاة تتصلة

ختاميه عظيمه الختاميه
زياره للحسين وداعيه
سلام الله عليك ودوم متواصل
ملامح من علي بيك وابوفاضل


*الشاعر الموفق الملا مصطفى السوداني*


رابط قصيدة "شاهين القبيلة":
https://youtu.be/hVqeuNqcT_w?si=OsxMYdAU4Bk6RcRp
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{يلايم يلايم}•

-أنه الغديري-

يلايم يلايم...خُف لومك عليه
أنا حبي و غرامي...للهادي و وصيه

١/ يفرحة حياتي...صارت أمنياتي
أنا كِملت صلاتي...بحب حامي الحمية

يلايم يلايم...خُف لومك عليه
أنا حبي و غرامي...للهادي و وصيه

٢/ يعيش بضميري...بس حيدر أميري
آنه الغديري...و الحد المنية

يلايم يلايم...خُف لومك عليه
أنا حبي و غرامي...للهادي و وصيه

٣/ أنا واحد كلامي...بس حيدر غرامي
يعشگي و إمامي...يا روح الزچية

يلايم يلايم...خُف لومك عليه
أنا حبي و غرامي...للهادي و وصيه

٤/ أشوفه البداية...و اشوفه النهايه
أجدد ولايه...و الرايه بِدَيّه

يلايم يلايم...خُف لومك عليه
أنا حبي و غرامي...للهادي و وصيه

٥/ أبد ماكو غيره...شيخ النه و عشيرة
وگفاته الچبيره...واگفهن إليّه

يلايم يلايم...خُف لومك عليه
أنا حبي و غرامي...للهادي و وصيه

٦/ يا أول خليفه...غصبا عالسقيفة
و النطفة الشريفة...تحب الرافضية

يلايم يلايم...خُف لومك عليه
أنا حبي و غرامي...للهادي و وصيه


*الشاعر الموفق حمزة السماوي*


رابط قصيدة "أنه الغديري":
https://youtu.be/vBeJeWeFN4I?si=WwBHiKuMSiqqh6MU
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

*{طاح القائد العام}*

طيحن ها يالخيام ... طاح القائد العام

مات .. مات ... الچان اذا يمشي شْحلاتَه
مات .. مات ... اليِنسِبَن بعده خواته

بعيونه السهم نام ... طاح القائد العام

١/ نحره من اتقرَّبِت يابِس لگيته
بچيت بالجّربه و دمع عيني رُويته
ما بُقى بعيني بچي كلّه بچيته
من شِفِت آخر سَهم صَوَّب لحيتَه

شفته حاضن الجود .. مو بيده بالزنود

خلها ببالك هذي يا ماي
منّك عباس اكبر هواي

بحضرته تلبس حرام ... طاح القائد العام

٢/ تحضري يا زينب للسياط الثّگيله
راحتَ أيام ابو فاضل يالعقيلة
مگطّعينه و ردت المَّه بْكل وَسيلة
ما شِفت بي لَزمه خاطِر منها اشيله

گِتله بْداعتي گوم .. مو للمثلك النوم

آه آه ليده من مدّيت اِديّه
آه آه بس رِدانِ و ماكو هِيَّه

راحت ذيچ الأيام  ... طاح القائد العام

٣/ چانت أمنيتي أحُط ساعِدِ بْساعِد
بوّست زنده و حُضنته و آنا گاعد
امْوادعِ وْ صارِ الشّبگ من طَرَف واحِد
ردت اموت من البواچي الله شاهد

سمعتَه يگلّي ممنون .. مروتك جيبلي امْ عون

فراگج منّه هوايَ موجوع
زينب غيرچ ماكو موضوع

ذِبحوا مِلحِ الإسلام ... طاح القائد العام

٤/ منين ما باوِعْله توجَع ذِكرياته
الأخو مْن يموت الأخو يكرَه حَياته
لحظَة ما نتفارگ شْلون بمماته
راحِ المدلِّلني و مدلِّل خَواته

يرفس شِفْته مذبوح .. وضعه يطلّع الرّوح

ظلمه حياتي شْما شِفت ناس
شتسوه الدّنيا بلايَه عباس

أبقه بدونه محتام ... طاح القائد العام

٥/ بين أوَدعه و بين أبقه وياه حايِر
خاف أرِد للخِيم واعْثر بالضَّمايِر
خاف أعوفه وْ تِرجع تْسحگه الحوافِر
مْن القهر عباس أخوچِ بْكبري صايِر

و من تْگرّبِت ليه .. شِفِت مگطوعه رِجْليه

زينب گومي و نشفي العيون
زينب بس حَضريلچ مْتون

و تحضري السّبي الشام ... طاح القائد العام

٦/ عِفته عالشّاطي و جِبت ويّاي ونّي
للخيم رِجْليَّه گُوّه وصّلنّي
عطرچ و صوتچ يا زينب عذِّبنِّي
كلهِن بْعباس أخويَ يذكرنِّي

جيت و دمعتي تْفور .. زينب ظهري مكسور

بغيره بريتي يا هوى يْفوت
امنيتي عالشاطي سِوه نموت

شيحقِّقلي الأحلام ... طاح القائد العام


*الشاعر الموفق السيد رفعت الصافي*


رابط قصيدة " طاح القائد العام " :
https://youtu.be/qZyW4aXA4VA

القناة الرسمية للملا مصطفى السوداني على telegram :
https://t.me/Mustafa_Sudane

قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane

•{ها يروحي}•

ها يروحي...الليلة أول ليلة نبقى بدونها
ها يروحي...الليلة گلبي ايدوّر اعلى عيونها
شيقنعه گلبي اليشتاگ
كل ملگه تاليته فراگ
ها يروحي

١/ حاچيتها و حيلي ارتعش
و طاحت اعيوني اعلى النعش...مو دمعتي
و من غمّضت بيدي الجفن
گلبي انكسر مرتين أظن...يا كسرتي
و ما باوعتلي و غمّضت
منانه و الغربه ابتدت...يا غربتي

مو ثگل اجنازه الهد حيلي
من ثگل العِشره انهديت
اجدام اتردني الباب الحجره
كلما اطلعها من البيت
رايح راد و جرحي بطولي
بذاك الليل شگد عانيت

الدنيا صنته...و صحت يا فاطمه بجرحي الهايم
الدنيا صنته...و الصدى يرجعلي ماتت فاطم
جاوبني دمعي الحرّاگ
كل ملگه تاليته فراگ
ها يروحي

٢/ يا روحي شيفيد الصبر
اليشتاگ ما يقبل عذر...و الهجر طال
يا روحي بالله آنه اقتنع؟
شيقنع الحدر الضلع...جرحه چتال
ما يدري بالصاير عليْ
دافن حياتي بذنّي إديْ...و راحة البال

هم زين و ما يدري گليبي
احْبَيبَة نبضه راح تموت
چا گلي المن باقي بصدرك
خليني امشي وي التابوت
فوگ چتافك آنه و فاطم
و انته الوحّيدك زاتوت

گوه اكابر...و المكابر ما يطول ساعه
گوه اكابر...و العزيز شطوله خلگ اوداعه
و آنه ادري حال العشاگ
كل ملگه تاليته فراگ
ها يروحي

٣/ من هدأت الناس و غفت
لعيونها جروحي مشت...ديرة اعتاب
عن الگبر خطوه ابتعد
لكن عشر خطوات ارد...و احضن اتراب
بگلبي أكو ثلثين إلچ
لا والله شو كله إلچ...ردي الجواب

گاعد يم فاطم و متاني
و مفرعات اجروح كبار
ما ريدن شي غير احچايه
حچايه تبرد گلبي الحار
بلكي الله و يقنع ياخذني
و رد آنه وياها للدار

شگد حچينه...و هيّه تسمعنه و تعرف البينه
شگد حچينه...ما ترد فاطم يگلبي مشينه
حگه يون نبضه انباگ
كل ملگه تاليته فراگ
ها يروحي

٤/ وداعة هذني الما غفن
مشتاگ لعيون ام حسن...و ذيچ الأيام
العلمتني شلون أحب
و عذيبي بسنيني تهب...لمن أنضام
و الخل إذا فارگله خل
المن بعد باقي عدل...يبقه بوهام

الغربه من تفارگلك غالي
عشرة حب و روح بروح
لا تگدر و تخلي يرجع
و لا تگدر و تعوفه يروح
شلون تلزمه و حيلك طايح
شتصيحه و صوتك مبحوح

هذا وضعي...هذا شيبي البيّن اعلى فراگها
هذا وضعي...ويه كل نسمه التمر أشتاگها
و بين الألم و الأشواگ
كل ملگه تاليته فراگ
ها يروحي

٥/ رديت أجر بخطوتي
آنه و احلامي و دمعتي...و هاي الجروح
و كسرة الخاطر تختلف
لا تنسمع لا تنعرف...تبقى بالروح
اليا بيت يا روحي نرد
بيت الگبر بيت الولد...خاطر انروح

خاف ارجع يا روحي البيتي
و ينعاد اگبالي الموضوع
أفتح گلبي اتحمل جرحه
و لا أفتح بابي المدفوع
هذا الباب الكاسر ظهري
مو بس كاسر منها اضلوع

والله حيره...خاف أظل يمها و اموت بحزني
والله حيره...و لو أرد باب الخشب يكتلني
و بحر الدمع ما بيه راگ
كل ملگه تاليته فراگ
ها يروحي


*الشاعر الموفق حسين حازم البوشي*


رابط قصيدة "ها يروحي":
https://youtu.be/vgRrss27yjs?si=GaHEQpJvaP8vx4oH
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane

•{ما عفتيني}•

قصرت وياچ كل هاي اسنيني
ضلعچ مكسور بس ما عفتيني
آسف آسف...على كل هذا التقصير
خايف خايف...من خدامچ ما صير
بس ما عفتيني

١/ شنو هاي الرحمه...العندچ يا يمه
الچم ضلعچ و تحضنيني مثل البسمار
شگد ألهى و أنسى...و گلبچ ما يقسه
أسلوبچ أسلوبچ نفسه حب و إيثار

بتقصيري...وي ضلعچ ما أدري منين أبدي
كل خوفي...تلوميني و ساعتها شنو ردي
لِمصابچ...من يمتى ما باچي اوْيَ المهدي

وافاطمتاه التنعش وجداني
أفضل نعمه ذكرچ بلساني
رايد رايد...أبدي اليوم التغيير
خايف خايف...من خدامچ ما صير
بس ما عفتيني

٢/ روحي الملتهيه...في حب الدنيه
خلتني بعيد و ما أعرف شنو منزلتچ
يا سر الباري...عنچ ما قاري
معلوماتي بسيطه هوايه بحق معرفتچ

أوصافچ...ما ممكن يحسبهن كائن حي
و يا فشله...ما أعرف من عدهن بس شوي
غيثيني...و اسقيني من كأسچ شربة ماي

عن حب غيرچ فاطم فطميني
شلون التسليم المطلق علميني
عاجز عاجز...ما يسعفني التعبير
خايف خايف...من خدامچ ما صير
بس ما عفتيني

٣/ يالطحتي ابابچ...و ثگيل صوابچ
على أيامي الفاتت أبدا لا ما راضي
رجعت أيامچ...و دمعة خدامچ
رايد أبچيلچ يالزهره و عوض الماضي

خليني...أتراكض من مأتم للمأتم
خليني...بالدنيه و البيها ما أهتم
خليني...أبچيلچ مو دمعه جربة دم

أبچي و أنعاچ و اتمنى جوابي
إرحم يا رب اليبچي اعلى مصابي
شكرا شكرا...لله على هالتقدير
خايف خايف...من خدامچ ما صير
بس ما عفتيني

٤/ يا أعظم نعمه...و مشكاة الرحمه
إسمچ زهراء چي أزهرتي الكوكب كله
نوريني دخيلچ...بوهجة قنديلچ
ظلمة الدنيا و خايف دربچ ما أندلّه

إخذيني...من العتمة و دليني على دربچ
أعمالي...طيحتني ابير أظلم مو گلبچ
تدريني...يا زهراء ما أملك بس حبچ

نورتي الكون و عينچ مطفيه
گلبچ عالناس يگطر حنيه
بيدچ بيدچ...كل هذا الكون ايدير
خايف خايف...من خدامچ ما صير
بس ما عفتيني

٥/ آخر كلماتي...آسف مولاتي
أبقى مقصر آنه بحقچ مهما سويت
تأذّيچ اضلوعچ...و بس تجري دموعچ
إلا من أرضي المهدي أكون جروحچ داويت

ما تشفه...يا فاطم عينچ منّ السطره
للمهدي...لو ما أصبح خادم طوع أمره
أمنيتي...بالرجعه نتلاگه يالزهره

بالكره وياچ أتمنى ختامي
و اصرخ زهراء ثبتيها اقدامي
صاير صاير...بأفضالچ إسمي چبير
خايف خايف...من خدامچ ما صير
بس ما عفتيني


*الشاعر الموفق ياسر المطوري*


رابط قصيدة "ما عفتيني":
https://youtu.be/LoF02re_B5s?si=dSb9hphXV0rDjmNB
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane

•{حسينيتك وطنها}•

كل مجلس نعتبره بيت أحزان الزهره
و تتفجر دمعتنا من مولاتي تحظره
آه حسينيتك وطنها
آه واسيها بحزنها

١/ اتفضلي يا مولاتي إبچي الدار دارچ
كل حسينيه و أهلها بانتظارچ
إبچي بيها و أمني ما تنعاد نارچ
بلكت ابمجلسنه يجبر إنكسارچ

هدمو بيت أحزانچ و ابنينه حسينيه
نعرف منچ رايح مذبوح و مسبيه

آه و الهزّل خذنها
آه واسيها بحزنها

{آه حسينيتك وطنها...آه واسيها بحزنها}

٢/ شكو احسينيه انبنت معناها دمعه
طاحت و تشرح هظم من عين بضعه
بيت الحسينيه للزهره نرفعه
بالملامه الباب لا ترجع تدفعه

ما ظل بيت لفاطم بس حسينيتنه
خليها اتصب دمعه و تستقبل دمعتنه

آه لمصيبة إبنها
آه واسيها بحزنها

{آه حسينيتك وطنها...آه واسيها بحزنها}

٣/ كلنا نسأل لو بمجلسنه حضرتي
ليش يم الباب يُم زينب گعدتي
عليچ منها انخاف لن بيها انعصرتي
گومي يم المنبر و بچينا إنتي

كل اجروح البينه يا فاطم من بابچ
و نعرف يا مظلومه مصاب احسين مصابچ

آه و زينب يا محنها
آه واسيها بحزنها

{آه حسينيتك وطنها...آه واسيها بحزنها}

٤/ شوفي دمع اعيونه و شوفي المآتم
ذاك يطبخ هذا يبچي و ذاك لاطم
كل دمعنه للحسين انوشله لازم
لأن ندري ايطيح بچفوفچ يا فاطم

كل دمعه النجريها ندري بچفچ طاحت
بس دمعة زينبكم وي الراحو راحت

آه ما ينشف جفنها
آه واسيها بحزنها

{آه حسينيتك وطنها...آه واسيها بحزنها}

٥/ إحنه نلطم بس كسر ماكو بضلعنه
و عين ما مسطوره منها ايهل دمعنه
يا هو اليعينچ على السّابين ضعنه
لا تلطمين الضلع كسره فجعنه

و اتلطمين اضلوعچ عالضاعن بالهيمه
و ابناتچ هم ظلن لا دار و لا خيمه

آه و الغرّب ضعنها
آه واسيها بحزنها

{آه حسينيتك وطنها...آه واسيها بحزنها}


*الشاعر الموفق أحمد اللامي*


رابط قصيدة " حسينيتك وطنها " :
https://youtu.be/YmdEHdHsE-Y
--------------------
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
--------------------
القناة الرسمية للملا مصطفى السوداني على telegram :
https://t.me/Mustafa_Sudane

•{رايحه}•

رايحه...بعد مو وكتچ ييمه و رايحه
الفاتحه...ايطيح گلبي و ما تطيح الفاتحه
بدمعتي غرگت عباتي
و البقيه في حياتي...رايحه

١/ يا يمه اموت بدونچ
و فدوه رحت لعيونچ...من غمّضن
لِبنيه من دون امها
محّد يحس بهمها...امضيعه وطن

أوصل افراشچ ييمه آنه و ارجع خايفه
هيچي منظر شگ دليلي عمري لا ما شايفه
غمّضت عينچ يويلي و بچت كل الطايفه
يالمشيتي بلا وداعي زينب المن عايفه

خاليه...الديره ظلمه و من حنانچ خاليه
غاليه...ارخيصه روحي يمه و انتي الغاليه
ابروحتچ گرب مماتي
و البقيه في حياتي...رايحه

٢/ شحّت بريتي انفاسچ
و الشيب تارس راسچ...و ضاگ الهوه
مات الورد وي روحچ
ازغيرة و چبيره جروحچ...و مامش دوه

ضاگت ابعيني دمعتي و الهوه البنفاسي
يالحنينه و گلبچ أبيض چنه يشبه راسي
انتي جنه و بيها تلتم كل هلي و كل ناسي
و تالي نمتي بالترابه و فز جرح بحساسي

العافيه...ابروحتچ يا يمه تمشي العافيه
غافيه...و آنه كل ظني يا روحي غافيه
أبچي يمچ و بصلاتي
و البقيه في حياتي...رايحه

٣/ تغفه الشمس بحضانچ
و الدمع وازه اردانچ...من البچي
لمّانه بيت احزانچ
و ظهره انكسر دفانچ...و ظل ينتچي

گلت كلشي يروح فدوه و هايه موش ابالي
مني اتروحين يمه و تبچي خوتي گبالي
حسين غالي حيل عندي و حگه فاگد غالي
و يبچي الحسين اوي ابونه و الحسن يبرالي

گبالچ...گابليناچ و گعدنا گبالچ
اطفالچ...گومي فدوه و مسحي دمع اطفالچ
شيّعت كل أمنياتي
و البقيه في حياتي...رايحه

٤/ ناس السلف محتاره
و الجار ينشد جاره...شنهي الحصل
مكسوره كل القاده
چن ميته أم الساده...و حيدر زعل

أحچي وياچ بدمعتي و تبچي كل الديره
يمه مو مالت مگابر انتي حيل ازغيره
بدمعتي مدري بسبحتچ رايده اخذ خيره
الأم اذا ماتت يعالم بتها تبقى بحيره

راسها...اتعيش بالذله و يشيّب راسها
ناسها...يعني دفنت بالگبر كل ناسها
و الگبر ماخذ حلاتي
و البقيه في حياتي...رايحه

٥/ چانت تجي يوميه
تغطيني بالحنيه...من البرد
يم راسي تبقى تساهر
حد ما يبيّن باچر...تروح و ترد

من اغيبن چنت لحظه امي تلفي اطروشها
اتگلي امچ بالمدامع غرگت كل حوشها
حافيه اركض و اجيها و انشد اويه هروشها
آنه من أبرد تضمني أمي بين ارموشها

خيمه...أمي يا هالناس چانت خيمه
ايتيمه...تالي زينب من عگبها ايتيمه
بالگبر يا يمه باتي
و البقيه في حياتي...رايحه


*الشاعر الموفق ماجد حبيب الخيگاني*


رابط قصيدة "رايحه":
https://youtu.be/w-ax5z_xtzs?si=P1H6dk1V2ladFLXz
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane

•{هم تزورون}•

همّ تزورون لولا هالعام
وين الزوار خانگني الشام
والله صعب...كلها غرب...يمتى تطب خدامي
وحدي ترى...و آنه مرى...شنهو جرى خدامي
خانگني الشام

١/ بالشام محّد إلي...حرمه و بعيده هلي
من ما تجون و علي...خيمه الگلب يحترگ

صعبه امن أظل وحّدي...و طافي ضوه مرقدي
و ليل اهدعش يبتدي...بيباني من تنطبگ

ما ريد يوصلني رجب و انتم بعيدين
منهو اليواسيني على ظيم الدواوين
و هالشام أبد مو ديرتي ودوني لحسين

فزعولي دموع آنه أم احزان
فزعوا مشيعين ما عندي اخوان
ما ظل ولي...لا بو علي...لا كافلي و لا خيامي
وحدي ترى...و آنه مرى...شنهو جرى خدامي
خانگني الشام

٢/ مشتاگه الكم أنا...و متانيتكم سنه
گلبي منو ايطمنه...لو خالي يبقى الگبر

تعالو محّد يحن...بالشام شحّة حزن
يخلوني وحدي أون...و اهنا شماتة شكثر

معقولة سكته و ما تجي زواري هالعام
معقولة اموتن وحّدي و ما يمّي خدام
الحزن العراقي هالسنه أفتقده بالشام

أنده زوار و ما ألگه جواب
و افگد بالليل الگعده اعلى الباب
ماكو جزع...ماكو هلع...ماكو فزع گدامي
وحدي ترى...و آنه مرى...شنهو جرى خدامي
خانگني الشام

٣/ العباس يمته يمر...گولوله أم الخدر
بأيام صعبه تمر...مو ماي محتاجه أخو

گلّوله تالي الزمن...طبوا عليْ للصحن
گولوله آنه بوطن...يبغضلي أم و أبو

گولوله زينب بالگبر و ايديها عالراس
ما ريد مرتين أنسبي لحّگ يعباس
يا مايله الدنيا صدگ مالت يهالناس

مالت دنياي چن ميلة نوگ
وگفت دنياي چن وگفة سوگ
ليلي قهر...عوزه گمر...تگضي سهر أيامي
وحدي ترى...و آنه مرى...شنهو جرى خدامي
خانگني الشام

٤/ شيجيبني لكربله...ابن أمي مشتاگه اله
بگبري و أريد أوصله...شگد صحت يا بو علي

يمتى يجي المنتظر...و ينقلني يم الگمر
گولوله لاون ظهر...بين الحرمين إلي

كافي يظل گبري بغرب و عيوني تندار
و لو تجي الزوار برجب لو ماكو زوار
بس كربله ترهم دوه لجروحي الكبار

الغربه تعرفون أنساها شلون
حسين و عباس و بالنص أم عون
عندي أمل...لمّة أهل...الله كفل أحلامي
وحدي ترى...و آنه مرى...شنهو جرى خدامي
خانگني الشام


*الشاعر الموفق ميثاق الحمداني*


رابط قصيدة "همّ تزورون":
https://youtu.be/SyE6D3jFab4?si=yIpr5wB9yFSPC0dr
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_

•{يا هلا بجيتك}•

١/ غيرك والله ما عندي...يمهدي
انتظرك لو أظل وحدي...يمهدي
يومي ينتهي و يبدي...يمهدي
بس المهدي يا مهدي...يمهدي

ها خوتي ها

يا هلا بجيتك گمر مثل العباس

٢/ هاي الدنيه ما تسوه...يمهدي
لو ما عينك الحلوة...يمهدي
افراگك عالگلب بلوه...يمهدي
فدوه كلشي الك فدوه...يمهدي

ها خوتي ها

مبروك هاشم صار عدهم مولود

٣/ وجهك للعشگ قسمه...يمهدي
احروفك تسوه ألف كلمه...يمهدي
محبتك مستوى القمة...يمهدي
عيونك واهس النجمه...يمهدي

ها خوتي ها

يعگال اهلنه الما يطيح امن الراس

٤/ أجمل ما خلق ربي...يمهدي
و أجمل ما دخل گلبي...يمهدي
مو بس بالحچي حبي...يمهدي
محبتك نوّرت دربي...يمهدي

ها خوتي ها

فرحو يهلنه اليوم حلوه الهوسات


*الشاعر الموفق حيدر العماري*


رابط قصيدة "يا هلا بجيتك":
https://youtu.be/h6zSLnEq8Q8?si=ZU2rjaOGVamSOoi9
_
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_
القناة الرسمية للملا مصطفى السوداني على telegram :
https://t.me/Mustafa_Sudane
_