•{باچر ذبح ودعيني}•

زينب...باچر ذبح ودعيني
زينب...كل ما رحت صيحيني

ودعيني باچر غربة..غربة
يا بعد أخوچ و گلبه..گلبه
كل ما رحت صيحيني

١/ شبگني باچر نفترگ والليلة آخر ليلة
باچر حسينچ ينذبح من هسّه خويه ابچيله
باچر الشايلكم عمر حافر الخيل يشيله
و فياي عن حر الشمس من العبي سويله

باچر الخيل تجيبني عليچن
باچر مچوّايات رجليچن

باچر...ينسحگ صدري هوايه
باچر...بيد الشماته الرايه

و حسين أخوچ هدومه..هدومه
يتسلبن بالحومه..بالحومه
و من أنسلب غطيني

٢/ زينب الليلة اتأخري كل ما أگلچ روحي
باچر فراگ من الصبح و انّوب تبدي جروحي
من صدري باچر للرمح تطلع و ترجع روحي
راسي بكتر و آنه بكتر و ينوح كلشي لنوحي

باچر السيف يمرمر بحالي
و بهداي يذبح بيّه چتالي

حاير...من هسه أخوچن حاير
حاير...يكسر ضلوعي الحافر

يهضمني زينب موتي..موتي
شينفع صياحي و صوتي..صوتي
و من أنسحگ لمّيني

٣/ تراب وهوه وغربه وعطش ولوحدي مخليني
ما أدري أرافس منذبح مدري الرمل يچويني
ينشال راسي و طيحتچ يا زينب اتبچيني
یچتفونچ و فوگ الرمح تبچي يا زينب عيني

باچر أشوفن ولدي واخواني
ميتين واحد شابگ الثاني

راحوا...چا ما خذوها اجروحي
راحوا...تكسر الخاطر روحي

أنعاف أول تالي..تالي
شگد صيحولي الغالي..الغالي
يالكلكم متعبيني

٤/ عادات عد أهل العرب وكت الحرب مفهومه
يگولون ذلة اعلى الرجل من ياخذون هدومه
و باچر احسين بكربلا يسلبون خويه اهدومه
و يلتمن عليه الحرم مهضومه يم مهضومه

و التهضم أكثر ها يعلويه
من يمي و تروحين مسبيه

خويه...تمشين درب الكوفه
خويه...ويّه العده مچتوفه

حيرتچ باچر حيرة..حيرة
من ديرة خويه لديرة..لديرة
خدرچ تره يبچيني

٥/ دم على عيني و الضعن لا يعبر و ما شوفه
چا ياهي تمسح عيني إلي كل الحرم مچتوفه
تمرين خويه اعلى الجثث و من الجثث للكوفه
و ياهو اليحاميلچ بعد عباس ماكو چفوفه

باچر بناتي بعازة الوالي
و الروس يفتر بيها چتالي

باچر...بالقصر بت السادة
باچر...وين الگمر نشّاده

سوط العده من جاسچ..جاسچ
يعني انكتل عباسچ..عباسچ
و لو قصّر اتعذريني


*الشاعر الموفق السيد محمد الموسوي*


رابط قصيدة "باچر ذبح ودعيني" :
https://youtu.be/4nQHuxeYCBI
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{الولد يمه}•

عيُونَك...شگَد حِلْوَه لَتْغَمُّضهِنْ
عيُونَك...رَاح أصْفِنْ وَ اشْتَاگِلْهِنْ
يُمَّه الوَلَد يُمَّه

١/ يَوْلِيدِي الأُمْ شِتْرِيدْ
تِگعِد وِ ابْصَفْهَا اوْلِيدْ
چَا لِيشِ اتْرُوحِ ابْعِيدْ...الوَلَدْ يُمَّه

يَوْلِيدِي اليِشْتَاگُونْ
المُغْرِب وِينِ ايْرُوحُونْ
إرْجَع خَلِّيلِي اعْيُونْ...الوَلَدْ يُمَّه

تِرِدلِي لُو عَلِيكَ ازْعَلْ
أظَل أتْخَيَّلَك تِقْبَلْ
و لَوْ سَمِّعْنِي بَسْ صُوتَكْ
أنَا بهَذَا الفَرَاغ أذْبَلْ

عَبْدَالله شلُونَكْ
شُو ذَابِل لُونَكْ
فَتِّحلِي اعْيُونَك عَبْدَالله اوْلِيدِي

چَا حُضْنِ اتْترْكَه
و ثَغْرَك مَتْحَرْكَه
چَا وِينِ الضِحْكَه عَبْدَالله اوْلِيدِي

{يُمَّه يُمَّه يُمَّه}

٢/ نَايِم عَلَى صَدرِ احْسِينْ
أعْرُف مَا نَايِم زِينْ
خَايِف تِلْچِم ضِلْعِينْ...الوَلَدْ يُمَّه

بَس هُوَّه ايْحِبَّك حِيلْ
صَح صَدْرَه انْدَاسِ بخِيلْ
بَسِّ ايْحُضْنَكْ بالِّليلْ...الوَلَدْ يُمَّه

شِلَع مِنْ صَدْرَه بَعْضِ اسْهَامْ
مكَانك هَذَا حَتَّى اتْنَامْ
لَچَن سُولِفلِي بِيَّه اشْلُونْ
أرِيدَك مَا أرِيدَ احْلَامْ

اتْبَچِّينِي طيُوفَكْ
امْنَ اصْحَى اوْ مَا شُوفَكْ
وَ ابْچِي اعْلَى اچْفُوفَك عَبْدَالله اوْلِيدِي

عَبْدَالله أحِبَّكْ
وِ ابْعِشْرَه أطُلْبَكْ
خَلِّينِي بگَلْبَكْ عَبْدَالله اوْلِيدِي

{يُمَّه يُمَّه يُمَّه}

٣/ سِتّ أشهُر يَا مَدْلُولْ
وَيْ سَهْمَكْ نَفْسِ الطُّولْ
كِلْشِي ابْإحْسَاسِي ايْگُولْ...الوَلَدْ يُمَّه

آنَه أرْدَ افْهَمْ بَسْ هَايْ
شلُون يِحِرْمُوكِ المَايْ
اصْغَيِّر يَا ضَيْ عِينَايْ...الوَلَدْ يُمَّه

وِ التْهَوِّنْ عَلَيْ حزْنِي
يِجِي المَهدِي و يِشِيلِ ابْنِي
يِصِيحِ ابْأَيْ ذَنِب ذَبحَه
مِنُو البِيكُم يِجَاوُبنِي

لِيشِ ايْعَطْشُونَه
و لِيشِ ايْذِبْحُونَه
بدَمَّه ايْرَوُّونَه عَبْدَالله اوْلِيدِي

عَبْدَالله و دَمَّكْ
مَا تِنسَاك أمَّكْ
بِالجَنَّه اتْشِمَّكْ عَبْدَالله اوْلِيدِي

{يُمَّه يُمَّه يُمَّه}


*الشاعر الموفق ميثاق الحمداني*


رابط قصيدة "الولد يمه" :
https://youtu.be/RK5CJEe8Rsg
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{يا صديقي}•

١/ يا صديقي
و انتهت عشرة عمر ويه النحيب
يالگضيت اسنين تبچي اعله الغريب
الليله عندك بالگبر موعد لقاء
يا حبيب الراح يتلاگه بحبيب

إسمع إفهم يا فلان ابن فلان
لا تخاف حسين للخايف أمان
راوي دمعك من يجوك الملكان
خدمتك في عالم البرزخ ضمان

هل أنت عالعهد الذي فارقتنا عليه؟
بعدك تگول بلا بچي وبلا عزه اتيه
اهناكه تره غالي الدمع والغالي يشتريه
والغالي يشتريه

خادم حسين بالحياة والممات ما يعوفه
يوفي بالدين والدخيل مستحيل ما يعوفه

{حبيبي يا حسين}

٢/ يا صديقي
إنت يم حسين هالليله تبات
و انت تدري المنذبح عطشان مات
شوفهن بعده شفاهه ذابلات!
گله نبچي شما يمر طاري الفرات

إسمع إفهم هذا عهدي بالسنين
راح أذكرك كل محرم هذا دين
راح أذكرك لو زرت گبر الحسين
واهدي خطواتي إلك بالاربعين

كل عام أشيلن صورتك واتعنه للذبيح
والصوره تبچي بحضرته من توصل الضريح
مكانه مو خالي تره يا بو علي أصيح
يا بو علي أصيح

بعالم الموت ما تموت إنت صوت من محرم
إنت عنوان بالعزاء والبكاء من محرم


*الشاعر الموفق كرار حسين الكربلائي*


رابط قصيدة "يا صديقي" :
https://youtu.be/BY6jfRhnfAA
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{بناتي}•

١/ يا نار يا مي يا شمس
يا ريح إسمعن زين
لمن أطيح امن المهر
دارن بنات حسين

أمس لميت كل الشوك و وصيت الرمل بيهن
برّد يا رمل روحك باچر خاف تچويهن

بناتي وبيهن آنه أدره مو مالت ركض هيمه
يگعدن لو بفص العين لو يم إختي بالخيمه

عزيزات عزيزات...لا تجرح اجدام اصغار
عزيزات عزيزات...يا رمل أبرد يا حار

{بناتي..بناتي..بناتي..بناتي}

٢/ يا نار أمر الله بعد
وادريچ ما تطفين
لو بالخيم لو بالگلب
واختاري شتحرگين

بهيده اويه الخيم يا نار هذن مالت رسول الله
لتحرگین كل خشبات خشب كاروك عبد الله

بهيده بهيده وي لگلوب هواي الصاير البيهن
باچر منچ الدخان يعمي وما يدليهن

عزيزات عزيزات...يا نار طيحي الدخان
عزيزات عزيزات...رحمي بعيون النسوان

{بناتي..بناتي..بناتي..بناتي}

٣/ يا ماي ما جيت بضمه
وهم طيحتلك هاي
بس افزعلهن بالحرگ
طفي الخيم يا ماي

موقف سوي مره وياي يالماخذ كفيل اختي
ما ريدك تروي اشفاي طفي اخيام عايلتي

ولو ما تطفي هاي النار بموقف لا تمر بيهن
اگبال الرمح لو صبوك تدري شگد تبچيهن

عزيزات عزيزات...لا تفزع اطفي خيام
عزيزات عزيزات...بس إرحم ابوب الشام

{بناتي..بناتي..بناتي..بناتي}

٤/ يا شمس أيام السبي
بس ليل مشّيهن
والليل صح خوف ورعب
بس إستر اعليهن

وادري اعليهن اطلعين وطول اختي تره يعثرچ
العلاوي كل عبيهن سود لتغيريهن بحرّچ

ها يشمس موقف عاد من تركض تجيني اختي
طفي اضواچ لا تنشاف وسبب شوفتها من جثتي

عزيزات عزيزات...يا شمس هالعلويات
عزيزات عزيزات...وعالسبي ما متعودات

{بناتي..بناتي..بناتي..بناتي}

٥/ يا ريح لا تنقل حچي
يجرح مسامعهن
بسرعه گلبهن ينكسر
وتصب مدامعهن

إذا صاحو غريبه اختي لتوصل الحچي لام عون
ولو أشرو هب يا ريح ونزل إيد اليأشرون

تره بس العليل الظل وي نسوة ضعن عدنان
وما وصيك اذا ركضن لا توگف اوي الدخان

عزيزات عزيزات...واحچاية الغربة تعيل
عزيزات عزيزات...آخ المعزه امن تشيل


*الشاعر الموفق مصطفى صادق اللامي*


رابط قصيدة "بناتي" :
https://youtu.be/ZOjQruosxSA
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{أحلى مشاية}•

واحد إنوي واتحضر
اثنين بيا علي توزر
ثلاثه أرفع الرايه
بدرب الأربعينيه
شغل أحلى لطميه
وامشي احلى مشايه
مشي مشي مشي مشي...محلى المشيه لحسين
مشي مشي مشي مشي...خل نتعب يرجلين

١/تره احلى درب بالعالم درب مشيك شنو المنظر
ولا ريد الدرب يخلص أريد امشي بعد أكثر
المشي للناس النحبها حلو تعبه يبو الأكبر

جيتك يمحبوب الروح يالإسمك اعله الرايه
مو راكبًا لا يحسين عاشگ واجي مشايه

دربك لون صعدة جبل...اصعد
والكلمن سأل...كتله
رايح مشي للجنه
رايح للمحلي العشگ...وادري
بس حبه الصدگ...ادخيله
لا ما ينشبع منه

مشي مشي مشي مشي...رايح لليگر عين
مشي مشي مشي مشي...محلى المشيه لحسين

٢/ملايينك بعد تكثر والزياره بعد تحلى
وحلاتي امن افتخر زرتك واليناشد انه اگله
شكر ناس اعله شباچه وانه الزمته وخذت قبله

صوره آخذ اباب حسين واعليها أكتب شعري
شنهو بظهر هاي الناس انه الحسين بظهري

لزيارتك عمري انوجد...عايش
حتى اخدم بعد...عمري
للخدمه الحسينيه
امن الآخر احچي قصتي...دوّر
لذة خدمتي...ماكو
مثل الأربعينيه

مشي مشي مشي مشي...أتنطرها كل حين
مشي مشي مشي مشي...محلى المشيه لحسين

٣/مو بس أمشي أروح أخدمها زوارك واخدمنك
المواكب مائدة مريم أشوفنها امن ازورنك
حتى الچاي بالموكب اِله لذه لأن منك

ويا موكبك يا محلاه ينحب تره اعله الفطره
وبيه بركه هذا الزاد لازمته إيد الزهره

كلشي التصق بيك انرفع...شآنه
وبإسمه لمع...مايك
فوگ الماي تعظيمه
بزادك يضربون المثل...لذته
ويشافي العلل...كم من
مريض وشافته القيمه

مشي مشي مشي مشي...آيات وبراهين
مشي مشي مشي مشي...محلى المشيه لحسين

٤/الدول كلمن وجنسيته لچن حُبك وطن ثاني
تشوف الأجنبي يمشي والعراقي والإيراني
خليجي يطعم اليمشي ويوزع ماي لبناني

كل اليحبون حسين واحد يحب الثاني
الله عليك شگد خير يحسين أحبك آني

جامع الناس بكربله...منهو
قدرك يوصله...إنت
التنحب وبعد كافي
هاي الملايين التطب...صحنك
حاضنها بگلب...كلها
ادخيل احساسك الدافي

مشي مشي مشي مشي...أمشيلك أنا اسنين
مشي مشي مشي مشي...محلى المشيه لحسين

٥/يروح التعب من أوگف على العتبه بدمع هامل
وحلاة الگعده ما بينك و بين الحب أبو فاضل
السنه الجايه أعد گلي واجيك ورايتي شايل

وفقني اجيلك كل عام وامشيلك اعله النيه
لو ما أجيلك مشاي شلفايده برجليه

تقبلها مني زيارتي...و اقبل
مشيي ودمعتي...وباچر
اقسملي بعد جيه
لا تحرم العاشگ هوه...تدري
بس بنينوه...والله
شايف راحه نفسيه

مشي مشي مشي مشي...ماكو لكربله اثنين
مشي مشي مشي مشي...محلى المشيه لحسين


*الشاعر الموفق ميثاق الحمداني*



رابط قصيدة "أحلى مشاية" :
https://youtu.be/mjSo88m_eCU
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{حبيتكم}•

حبيتكم چا ليش ترحون
وفراگكم بيّن بالعيون
ياللي تحبوني...لازم تتعبوني
حبيتكم

١/وين اديكم...إيدي فرغت صارت بإيد الهوه
وين اديكم...صوتكم ضحكتكم الگعده سوه
وين اديكم...منهو يلزمني لأن ظهري انلوه
وين اديكم...ليش بعيوني بده يغيب الضوه

يا من تركتوا و انتو ماشين
سبعين كسره بطول الحسين
وحدي تركتوني...لازم تتعبوني
حبيتكم

٢/وين اخوتي...ما معوديني على هذا الجفه
وين اخوتي...بعد وين الگه المثلكم بيه وفه
وين اخوتي...گعدوا من النوم زينب خايفه
وين اخوتي...خيول وسيوف وحرب ما شايفه

بعيونها الصيوان محروگ
وركضة الشام وطبة السوگ
ياللي كفلتوني...لازم تتعبوني
حبيتكم

٣/خويه عباس...مدلي إيدك ظهري يوجعني بده
خويه عباس...إنت هم تعوف أخيك وحده
خويه عباس...شويه ويصيحون يا خويه العده
خويه عباس...يبقى واگف لو بسهم انمدده

افگدت الأنصار وشيب الراس
شتسوي بيه اليوم عباس
يا كحلة عيوني...لازم تتعبوني
حبيتكم

٤/شگد أحبكم...چنتوا يمي واستحي ما سولفت
شگد أحبكم...واحد وسبعين مره آنه متت
شگد أحبكم...شگد اودعكم وبيكم رجعت
شگد أحبكم...وي ولدكم أركض اعليكم گمت

صحبان چنتو شلون صحبان
واحدكم يطيب جرح چان
چنتوا تواسوني...لازم تتعبوني
حبيتكم

٥/أصدقائي...بيا علي گمت آنه اجرنه النفس
أصدقائي...مو عطش بس ريگي عالخوه يبس
أصدقائي...يا زهير ويا حبيب و يا أنس
أصدقائي...شويه وتسمعون أبو اليمه انرفس

يسحگون صدري على البيده
الحافر ملبسينه حديده
ليا غربه عفتوني...لازم تتعبوني
حبيتكم


*الشاعر الموفق ميثاق الحمداني*


رابط قصيدة "حبيتكم" :
https://youtu.be/X-KYxfurqr0
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{لا تحرمني قربك}•

يا مولاي...مشيني اعلى دربك
يا مولاي...و إزرع بيه حبك
يا مولاي...لا تحرمني قربك

١/أوگفلك اوگوف العبد و اتذلل ابرحابك
خل تنسد ابواب البشر بس تنفتحلي بابك
إسمحلي أحط خدي و أظل أتمرّغ ابترابك

ابحثت بس ما شفت واحد بديلك
أنا الطامع يبو اليمه بقليلك
ذليل و قمة العزة ذليلك

يا عطشان...عطشني المصابك
يا عطشان...و اسگيني ابعذابك
يا عطشان...گلبي ايواسي گلبك

٢/احسبني يتيمك سيدي و امسح عليه بيدك
لا تگطع افضالك عليْ يالمنگطع وريدك
إقبلني لو آخر إسم من قائمة عبيدك

أخدمك و انته متفضل عليّه
ألف شكرا إلك يا بو رقية
ولي النعمة و يمالك كلشي بيه

يا مظلوم...عيشني المواجع
يا مظلوم...و اسگيني المدامع
يا مظلوم...أبچيك و أندبك

٣/عن كل ملذات الوكت بعدني يا حبيبي
أرتاح إذا أتعب إلك و اتونس بنحيبي
الحمدلله و الشكر حط خدمتك نصيبي

و لا غرني الزمان ابمغرياته
أنا الناذرلك اعيونه او حياته
اليعوفك ينحسب تارك صلاته

يا مذبوح...إذبحني اعلى حزنك
يا مذبوح...لا تبعدني عنك
يا مذبوح...إنت الروح أحسبك

٤/مهما عشت يا بو علي ما افرّط ابعزائك
و مهما تغربني المدن ملاذي كربلائك
سجع الحمام أستهجنه من أستمع رثائك

وحگك ما ردت جنة و سعادة
لإن حبك يكفيني و زيادة
يمن نوحي على مصابك عبادة!

يا مسلوب...لا تسلبني عشگك
يا مسلوب...ما عوفك و حگك
يا مسلوب...انطالك كلشي ربك


*الشاعر الموفق كرار حيدر الخفاجي*


رابط قصيدة "لا تحرمني قربك" :
https://youtu.be/8SuGlabWWwg
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{يا نرجس الحنان}•

خايف واريد أمان...من صاحب الزمان
وختم القرب رضاچ...يا نرجس الحنان

١/ گلبي ادخيل ابابچ نرجس
ضمي عن نفسي الأماره
وهوه الله بعظمه ومنزلته
ضم يمچ آخر أسراره
علمي عالحب النصراني
البأول نظره تصير اقداره
وكون اول ما شوف المهدي
آنه وگلبي نصير أنصاره

هيچ و اشوفه جاي...واركضله بيدي ماي
إدعيلي حلمي هاذ...يا نرجس الحنان

٢/ يالربچ اخفالچ حملچ
ابقداسچ مجروح اتذلل
يا ريحانة گلب المهدي
گلبي شوي شوي ظل يذبل
إخفيني الدنيا اندلتني
ومن خدمتكم خوفي اتبدل
بجاهچ راح أطرق باب الله
لا يستبدلني بغيري أسئل

خايف بعيد أروح...لا أبچي لا أنوح
وانسى انتظار إمام...يا نرجس الحنان

٣/ محد يندل عالم حبچ
يا نرجس بس دليتيني
آنه المحد يقبل بيه
نعم الله اعليچ اقبلتيني
آنه الچان املثگ گلبي
ومن دون العالم جبتيني
ومعروفه المذنب يتعاقب
بس ليش أذنب وترحميني

يوميه إعتذار...مو هيچ الإنتظار
كون اليحب يطيع...يا نرجس الحنان

٤/ العاشگ ما يوصل معشوگه
إلا ايحرك شوگه اونينه
وعالمهدي مكلفچ مولاتي
أم و تمونين اتحاچينه
يالمسجونه لخاطر طوله
ميردچ من اتطلبينه
لو يظهر باچر مولانا
خل يقبل يا نرجس بينه

وي جيشه اريد أصير...لو إسمي بالأخير
عندي المهم رضاه...يا نرجس الحنان

٥/ حبيتچ بس أبقى مقصر
امن القله آنه اللي يذكرنوچ
أعتب مولاتي اعلى امثالي
ينسوچ و ما يندلونچ
بسامره ومحد دگ بابچ
بس وين القله يزورونچ
أم آخر معصوم لله
ووسفه العالم ميعرفونچ

أم صاحب العصر...ناسيها بالذكر
مولاتي نعتذر...يا نرجس الحنان


*الشاعر الموفق مصطفى صادق اللامي*


رابط قصيدة "يا نرجس الحنان" :
https://youtu.be/WLWLDHHzVUc
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{طايح عامود البيت}•

يالتطرق باب الدار...رفقا ويّاه
طايح عامود البيت...اليكتل فرگاه

على الدمعه..و على الونه..تعوّدنه

١/ آه يا خنگة الغروب من يشيل المحبوب
و عله المو غالي انطيح عالغالي الحال اشلون
عايف گلبي بيا حال خيمه و من دون احبال
لو حنيت الملگاك من وجهي اتطيح عيون

چبير اخواني إنت الدللت إختك دلال
علي تركض أشوفك من گبل كلمة تعال
إذا ما تلزم إيدي حصه تصبح للحبال

يا وجه الخير اشلون...أصبر بچفاك
وآنه المتعوده اعليك...و من صغري وياك

منو يعوضك..يهالواحد..و لا منه
على الدمعه..و على الونه..تعوّدنه

٢/ تطلع روحي اتمنيت يفرغ كل يوم البيت
شال الوالد و النوب أكبر خوّاني يموت
وحدي تخليني شلون يا كسرة ظهر ام عون
ما ترهم كون اتصير يشيل اثنين التابوت

بكثر ما دللتني چنت أشوفك مو أخو
أخويا ما أصيحك چنت أصيحك يالأبو
و لا أشعر يتيمه عوّضت ذاكه الدفو

ما ترضى بزعلي و دوم...توگف ويّاي
و من أعطش أمري تگول...هاي إخذي و هاي

أبو ثاني..لهب بُعدك..القرب جنه
على الدمعه..و على الونه..تعوّدنه

٣/ شكرا يا ماي العين دللت هواي حسين
و من تشعر بيه تعبان تنطي من حيلك حيل
لاخوانك في اجناح و تركض لو واحد طاح
و اليتمرض بالبيت تسهر يم راسه الليل

إمام و طاعه أمرك و الملائك تحت إديك
و لا تأمر أخوتك عجبه هالحنيه بيك
التريده إنت تجيبه ما تتعبهم عليك

لمن يغفه العباس...تمشي تغطيه
أكثر من أمه عليه...چنت مداريه

منو مثلك..يبو محمد..يدللنا
على الدمعه..و على الونه..تعوّدنه

٤/ آخر لحظاتي وياك تشهگ و تذب حشاك
ضم طشتك عني حسين شايل چبدك مفتوت
يم راسك أنعى عليك أبچي و اعصر بيديك
بحضني تنازع و تلوج بيه و لا بيك الموت

مثل ما غدروا الوالد يبو گلبي إجوك
ضحكهم يلچم بنعشك شماته و شيعوك
لأن چبدك تسميني يا خويه سمموك

أصعب موقف لانسان...يصدف وياه
بين أحضانه من ايموت...واحد يهواه

والنحبه..إذا يمشي..يتعبنه
على الدمعه..و على الونه..تعوّدنه

٥/ نعشك متروس اسهام يشبه زفة جسام
وآسيت اجروح احسين الينزف من كل مچان
يم جدك ردت اتبات بس طردوك الشمات
و تمنو گبرك كون بالهيمه بلا جيران

تمنيت النعش نعشي و سهامك بيه كون
ظفر ما ينلمس منك و إلك زينب تهون
المثيلك هالوكت كلش صعب يتعوضون

چنت أتمنى بعاشور...طولك موجود
محد يتجرأ چان...يضربلي ازنود

على الخيمه..حرس توگف..يكافلنه
على الدمعه..و على الونه..تعوّدنه


*الشاعر الموفق ياسر المطوري*


رابط قصيدة "طايح عامود البيت" :
https://youtu.be/jQ1T5wW-9BU
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{صدمة عمري}•

لليوم من الميلاد عايش صدمة عمري
شلون أطيب شي مخلوق ما يردوه ما أدري
عالم...من دم وجلد
عجبه...يسحگون الورد
صدمة عمري

١/ متفاجئ ومنذهل
من وآنه عمري طفل
ما صدگت بالخبر
يا أهلي ما ينعقل

ورده بترافة نده
ومنها الضوه مولده
ما بيها شي ينكره
عجبه العليها اعتده

مسطورة عالخد يگلولي هلي مسطورة عالخد
الله ولحد صحت وينه علي الله ولحد

أبحث بين الأخبار توني اتعلم أقره
بلكي كتاب التاريخ مابيه ماتت زهره
بصغري...أبحث واجتهد
عجبه...يسحگون الورد
صدمة عمري

٢/ من حگي اچذب الحصل
و ارفض حديث الأهل
معقوله زرع السمه
ثمنطعش عام و رحل

بكل الصحف منكتب
ما مره سوت ذنب
ليش بصلافة و حقد
اعليها الحطب يلتهب

كسروا ضلعها على الحايط ركل كسروا ضلعها
واحد دفعها و كتل منها طفل واحد دفعها

قرط الزهره المنثور طاح بچف المحسن
ضماه صوغه لعاشور لرقيه العم يحن
ينجر...تالي وتنجلد
عجبه...يسحگون الورد
صدمة عمري

٣/ ذبحتني حالة علي
بصحبة چذب مبتلي
يسمعها صاحت إله
الحگني محد إلي

موقف يشيب الصبر
من تسكت و منجبر
وتدري انت خد حرمتك
بچف صاحبك منسطر

طگوا حرمته أبو حسين و وسف طگو حرمته
جروا غترته مثل شيخ بسلف جروا غترته

الله يعين المچتوف لمن ينطگ خِله
يسمعه من آلامه يصيح وما يگدر يفزعله
حيدر...ممرود الچبد
عجبه...يسحگون الورد
صدمة عمري

٤/ كلما خذاني العمر
يكسرني طاري الكسر
أبچي و أگل للگلب
لهنانه حد الصبر

اليحچيلي عن الضلع
لا يسأل اعله الدمع
الما منچوي بفاطمه
يستغرب من الوضع

كل عمري صايح لحد يوم الچفن كل عمري صايح
غير الفواتح فاتحة أم حسن غير الفواتح

ما يشعر بالملچوم بس العاش اللچمه
الما جاس بگلبه النار تلگاه بارد دمه
مجلس...أنصب باللحد
عجبه...يسحگون الورد
صدمة عمري

٥/ عند العرب والعجم
ماتت عجيبه القيم
ما رجعوا من الخجل
من شافوا العتبه دم

حاير چنت بالفعل
من ذبحوا أم وطفل
و بالعاشر استوعبت
ثاري الذبح شي سهل

بالمقتل أقره عجايب و انهضم بالمقتل أقره
عبدالله نحره بسهمهم ينفطم عبدالله نحره

زينب ما بين الخيل تركض ويلحگوها
الطگو أمها الزهراء مو عجبه يطگوها
وادم...تتوارث حقد
عجبه...يسحگون الورد
صدمة عمري

٦/ للمهدي فكري سرح
وجهة بخيالي نلمح
أتخيله بكربله
يزور الغريب انذبح

والضامي أتصوره
يطلع بلا منحره
يستقبل إبن الحسن
بضلوعه المكسره

ثار الزچيه متى يرد لهله ثار الزچيه
بالفاطميه عزائه بكربله بالفاطميه

چنهم بين الزوار نصبوا مأتم حسره
ومن يلطم صدره حسين توصل إيده لظهره
يمته...يالمهدي ترد
عجبه...يسحگون الورد
صدمة عمري


*الشاعر الموفق ياسر المطوري*


رابط قصيدة "صدمة عمري" :
https://youtu.be/euJSnfH_WKU
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{رجعلي حبيبي}•

يا عم يا سلمان ما تسمع نحيبي
يالتدري بالشوگ رجعلي حبيبي

إحنا أول اثنين نتنفس سوه
نفرض علي اهناك اهنا ماكو هوه
رجع حبيبي

١/ تدري إحنا نصين گلب التقينا
و من صار الفراگ سكته بچينه
يرجعلي لو موت موتة حنينه
خل نمشي مجروح لازم حزينه

اصبرت من كسرولي ضلعي و گلت فدوه اتحملي
و على المحسن من هوه و مد إيده الزغيرة إلي
بس علي لا علي أريده خل يرجعولي علي

حيدر من أخذوه مچتف مر عليه
لا مو للحبال والله چفوفه ليه

نساني الضلوع و ابني اللي هوه
گتله امشي وياك اهنا ماكو هوه
رجع حبيبي

٢/ أبچي اعلى فرگاه و بشوگي ما ضم
بس تدري سلمان السطرة تهضم
مسطوره و دموع خدي يورّم
گله لعلي يعود گامت تظلم

احچیله لكن لا تگله اشسوه بالزهره الجذع
راح أضم عيني بحجابي حتى ميشوف الصفع
و طولي اعدله ما أبيّن مرة مكسورة ضلع

گدامه ما ريد أشكيله و أعاني
و الوحدي بالليل أبقى اتلوه آني

خلهم يرجعون ما ريد الدوه
گله من اچفاك اهنا ماكو هوه
رجع حبيبي

٣/ راح أگلب الکون برفعة حجابي
گلهم يرجعون بعلي اعلى بابي
و الله يأذيه ينظر عذابي
سوه الله هالكون كله بثوابي

علي من يتأذى گلهم أرض أطبگها و سمه
آنه إيدي الأولى جنه و ثاني إيد الحاطمه
و چان هذا الكون ماكو و آنه إسمي فاطمه

تجمعنه بالبيت بالثوب اليماني
والله اوي جبريل چنت أسمعهم آني

محبوبة الله و حورية ضوه
و يا عطري لولاك اهنا ماكو هوه
رجع حبيبي

٤/ مولاتي زهراء رفقا بالأمه
يا بنت من جاء للأمه رحمه
مو آنه اليگول للزهره كلمه
حيدر يوصيچ يم الأئمه

لا تكشفين الإلهچ علي من شده طلع
و من غضب ربچ المسجد حايطه متر ارتفع
تقوم يالزهره القيامه لو حچي البيچ انرفع

گله يسلمان رايح كلشي احسبه
كلشي إله يهون و ام محسن تحبه

العالم لعيناه لو ردت انطوه
و گله بلياك اهنا ماكو هوه
رجع حبيبي

٥/ ردلها ابو حسين و هذا التريده
و اتبسم الكون من لزمت إيده
تضمه و تنادي آه يالصميده
باچر لعيناك أصبح شهيدة

العصره چانت صعبه لكن تحله لجلك مو عجيب
أمنيتي هاي و چنت أدافع عن إمامي و الحبيب
حتى لو قله أصحابك آنه يمك مو غريب

گلها أم الحسين يا زهرة سنيني
حب و ضمه و خوف اعليچ مدمعه عيني

يالعايش اعليچ احساسي ارتوه
وجهچ الشباچ اهنا ماكو هوه
رجع حبيبي


*الشاعر الموفق ميثاق الحمداني*


رابط قصيدة "رجعلي حبيبي" :
https://youtu.be/DY83ezXxdXs
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{يا كل الأحباب}•

مدري شردت بالمگبره و عاشرت التراب
يمچ علي عايف علي يا كل الأحباب
يا كل الأحباب-٢-

١/ بچيتچ...بگد عمري بچيتچ
نخيتچ...أگعدي شگد نخيتچ

شما ريد أنسى وأمشي ابعيد ابالي اسنينچ يعرضن
اجدامي بكل درب ميتات وبس لگبرچ ايركضن

كون العمر هم ينشري واشريلچ اسنين
لا حسن من عندچ شبع ولا شابع احسين
لا شابع احسين-٢-

٢/ وگفتچ...شمحلاها وگفتچ
دمعتچ...ذبحتني دمعتچ

شعوفچ يا بعد گلبي أوياچ أدفنت لوني
شلون ارجع الذاك البيت و آنه امضيع اعيوني

و الثامي طاح أمن البچي مو بيدي حنيت
ما دامچ اهنانه بعد ظل المن البيت
ظل المن البيت-٢-

۳/وحگچ...وما أحلف وحگچ
يإسمچ...يرد عافيتي إسمچ

ما متعوب و انتي وياي بس هسه شكثر متعوب
فرگتچ فاطمه كلفه يرادلها عشر اگلوب

ابيناتنه كلشي حلو چا ليش الفراگ
يم حسن وعيون الحسن لأم حسن مشتاگ
لأم حسن مشتاگ-٢-

٤/ أكابر...بكلشي اگدر أكابر
أكابر...ويمچ ما أكابر

احچيلچ چلمه ارد اوگف كلشي ولا تعوفيني
ينقطة ضعفي قويني عليچ اعيوني قويني

شيسوي بلّه المنهضم و العنده شمات
گوميلي رجعي الروح إلي مو حيدرچ مات
مو حيدرچ مات-٢-

٥/ بنيني...الون ماخذ بنيني
اونيني...شسولف عن ونيني

شيبي واصل لگلبي هينه الشيب البراسي
و عاشرت الگبر مجبور چي بيه نام أعز ناسي

راح أگضي عمري مختنگ مات الهوى وياچ
جيبيلي واحد يقتنع آنه أگدر انساچ
آنه أگدر انساچ-٢-


*الشاعر الموفق أحمد ماجد الكلابي*


رابط قصيدة "يا كل الأحباب" :
https://youtu.be/vSCrz4n3C_w
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{شريان الدمع}•

گالولي متعوب وگلت غير التعب ما عندي
عافيتي مزروعه بشخص إسمه الامام المهدي
گاضيها حسبه بحسبه...بين العهد والندبه
يالـمهدي شريان الـدمع غيّـر ملامـح خدي

١/ عاشگ والعاشگ بدموعه يسولف من يشتاگ
وگلبه يصير شلون النورس يم شاطي العشاگ
يم نهر الحب خطيت إسمك يالمهدي عله الراگ

مجموعه المواجع بيّه مجموعه
والعاشگ تفضحه عيونه ودموعه
يا مسلم حياتي وگلبي چن طوعه
بحبك حطمت يالمهدي موسوعه

مثل الفراشه اعله الورد هيچ اعله حبك هايم
يالجاذبيتك مو قمر جذبت گلوب الوادم
إسمك يمهدي نكتبه...بين العهد والندبه
يالمهدي شريان الدمع غيّر ملامح خدي

٢/ لا إنت الجاي ولا إنت الماخذ گلبي وياك
لأجلك ساكن وادي السهلة وأتمنه أتلگاك
هاي السهله وهلگد حلوه چا إنت شمحلاك

وصورة جمكران المستعز بيها
كل ما أختنگ يم گلبي أخليها
وصورة گبة السهله و ضواحيها
من أشتاگلك بدموعي أغطيها

بوادي انتظارك منصلب گلبي بصليب الفرگه
الحب حلاته بـحرگته وجيب اليحب بحرگه
الينسه لأجلك گلبه...بين العهد والندبه
يالمهدي شريان الدمع غيّر ملامح خدي

٣/ بيّــن بيه غيابك وردة وذبّلها الـهجران
والانسان يظل متعذب من يعطش لانسان
بحبك غرگان وهم سامع؟ غرگان وعطشان!

مو حگي امن أجر ونه بأثر ونه
وأنا امفارگ شخص ما ينشبع منه
لو هيچ العشگ لو ما أريدنه
أنا مفارگ بشر تشتاگ إله الجنه

بدوحة غرامك منشغل عن الكرة الأرضيه
مر بيه يا بعد الـهَوه ال بين الگلب والريه
تلگاني شايل تربه...بين العهد والندبه
يالمهدي شريان الدمع غيّر ملامح خدي

٤/ أول مره أشتاگ لواحد ما شايـفته الـعين
أول مره يمرضني الحب ماچنت اعرف زين
أوگع والناس توديني يم شباچ حسين

وينك يا طبيب الوادم الفقره
أشم عطرك يمهدي من أدخل الحضره
ظلام الدنيا لو ما وجهك الگمره
المحلي المحابس لمعة الشذره

والله الـحياة بلا طعم بـس حبّك محليها
تخلص هواءٌ في شبك لو ما وجودك بيها
الفرگه كلش صعبه...بين العهد والندبه
يالمهدي شريان الدمع غير ملامح خدي

٥/ يمته اتمر ابّير دموعي قافلتك مولاي
وتشمر دلْوَك وأطلعني وأتگلي أمشي وياي
يالمهدي أمنيتي من الدنيا وياك أطلع مشاي

يمته بكربله نتگابل وننعه
بچيت عليك من الجمعه للجمعه
أنا الوديت إلك وي النهر شمعه
بدعاء الندبة عفت بكل سطر دمعه

أسأل كتاب الأدعية عن دمعتي المملوحه
هو حلاته اللي يحب من ينسه گلبه وروحه
شمحله اليهيم بحبه...بين العهد والندبه
يالمهدي شريان الدمع غيّر ملامح خدي


*الشاعر الموفق عباس فاضل الكندي*


رابط قصيدة "شريان الدمع":
https://youtu.be/xMPFbapjaWA
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{نظرة مولاتي}•

نظرة مولاتي
بعينچ الحمرة بقت من المصيبة
العبدچ الماله بخت لو ما نحيبة
نظرة مولاتي...نظرة مولاتي

١/ حامل بچفي دموعي...و جاي أستجدي رضاچ
استوحديتي بعرش گلبي...لا مليكة الا سواچ
و المشي صار اله قيمة...من مشيت آنه وراچ

طولچ بقه ينگط شمع من هدت الظلمه
و بصورتچ نلزم عشگ لزمة طفل بأمه
حبچ مثل شيب البخت ما نگدر نضمه

خدمه رزقيني
والصبح خادم صدگ طاهر حليبه
العبدچ الماله بخت لو ما نحيبة
نظرة مولاتي...نظرة مولاتي

۲/ من لگيت الدنيا غربة...گمت بحزانچ أعد
و السهر مولاتي صاير...موطن ادموع العبد
الفاتح اجروحه لمصابچ...بالبچي ظل ينسعد

الما حبچ و ما يعشگچ هم گلبه عود يحب
و گد ما يحبچ حيدرة من دفنچ مشيب
نصد صورتچ كلها حزن بس حلت الموكب

و حچیي ظل يحلى
چي بكل سالفتي اسمچ گمت اجيبه
العبدچ الماله بخت لو ما نحيبه
نظرة مولاتي...نظرة مولاتي

۳/ چوي گلبي بنار حزنچ...حتى لا أنسى المصاب
ومن أغمّض كون أذكرچ...رسمي چوه اجفوني باب
انطيني بس اليرضي گلبچ...و اخذي ريعان الشباب

يا واهس اسوالف علي يا فرحته و حزنه
بس دمعتچ بيها طعم ما ينشبع منه
أفرح دمع أحزن دمع و بالدمعه أتحنه

و ما أريد أُجره
امن اشوكت يُستأجر الحب للحبيبة
العبدچ الماله بخت لو ما نحيبه
نظرة مولاتي...نظرة مولاتي

٤/ وين ما موجود مجلس...مشّي روحي بلايه راي
و ريت أرد البيتي مُنهك...و تخط دمعاتي وراي
كون كلشي بعيني رايح...و بس حزنكم يبقى جاي

دمچ تناثر عالترب و كلبچ يلم بينه
ما مرة منطينچ أبد بس انتي تنطينه
مدت امصلاية بعسر مدينه إدينه

حرگه انطيني
خلي گلبي منچوي و زايد لهيبه
العبدچ الماله بخت لو ما نحيبه
نظرة مولاتي...نظرة مولاتي


*الشاعر الموفق مصطفى صادق اللامي*


رابط قصيدة "نظرة مولاتي":
https://youtu.be/R7XvN__h7iM
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{عفتيني أحترگ}•

كل مغربية اعيونچ
تاخذني مدري اليا وطن
كل مغربية اعيونچ

و ادري الهجر مو لونچ
و عفتيني يا أم الحسن
و ادري الهجر مو لونچ

ليش...يا أول عشگ
ليش...عفتيني أحترگ
و ادري الهجر مو لونچ

١/ بعد الغياب...عيني عالباب
و النفس بالگوه أشهگه بذاك الغروب
دمها و النار...ظلن آثار
و ذكره عالباب لعلي من أغلى محبوب

و كلما أفك باب الهجر
ينشدني كل شامت يمر...حيدر سلامات

و آنه أسكت و يحچي الدمع
عن فاطمة و كسر الضلع...ماتت حرامات

و بالفرگه يوميه انذبح
و احتار أسولف يا جرح...كلهن عزيزات

تاخذني و ترد بيه
كلما تهب ريح الهجر
تاخذني و ترد بيه

و يتعثرن بالريه
أنفاسي كل مغرب يمر
يتعثرن بالريه

ليش...گلبي ما يدگ
ليش...عفتيني أحترگ
و ادري الهجر مو لونچ

٢/ للدمع كون...فزعت اعيون
لأن ما ظلت بعد عد حيدر اعيون
هنّه خطوات...و حگه لو مات
الشايل اجنازة عزيزة فوگ المتون

جنّاز بالزهره رحت
و كلما أريد أوگف طحت...يم عتبة الدار

شايل على اچتافي السمه
ما چني شايل فاطمة...و چان الدمع حار

مثل المضيعله ولف
بديره و شحيحه من العرف...حيره المن اندار

من الهجر و ايامه
گمت ارسم الخطوه ابدرب
من الهجر و ايامه

و طبع التموت أحلامه
ما يشفه جرحه البالگلب
طبع التموت أحلامه

ليش...تالي نفترگ
ليش...عفتيني أحترگ
و ادري الهجر مو لونچ

٣/ ابدمع العيون...صاحت أم عون
بويه من الفرگه صاير چنك اهلال
و التجاعيد...بلا مواعيد
الشيب ما خلّه اعلى حالك چلمه تنگال

مجبوره أسد باب الدمع
و ما سولف بكسر الضلع...لا زينب اتموت

أسكت و احسنه حلم
بالفرگه باچر ينرسم...بعيوني تابوت

و دمعاتي عالخد تنقره
و صرت ابطريق المگبره...يوميه زاتوت

يم اللحد و ترابه
كلما أسولف عالهجر
يم اللحد و ترابه

يوجعني حيل اعتابه
و اتبده شيب اعلى الگبر
يوجعني حيل اعتابه

ليش...نتفارگ صدگ
ليش...عفتيني أحترگ
و ادري الهجر مو لونچ

٤/ آنه ابو تراب...الجرحه ما طاب
و آنه ذاك الباگوا من عيونه الأحلام
و آنه سويت...للحزن بيت
و عايش اعلى الله كريم و تگضي الأيام

ما عدها ذرة مستحه
و دارت مثل دور الرحه...بالفرگه دنياي

خلت علي اعيونه اتهمل
و يدور ابكل دمعه خل...و ايرد بلا راي

و يوميه اخط اعلى الدرب
يا فاطمه و يدري الگلب...ما ترجع وياي

ليليه دمع اعيوني
عالباب يرسملي صور
ليليه دمع اعيوني

الله اليكون بعوني
چم ضلع للزهره انكسر
الله يكون بعوني

ليش...بابي بيه حرگ
ليش...عفتيني أحترگ
و ادري الهجر مو لونچ

٥/ بوحشة الدار...المن أندار
و آنه يامه و يامه تربي اعيوني عالباب
بلكت أحلام...بلكت أوهام
بلكت الله افراگها و لن حلم چذاب

ما مش اسوالف للهجر
و لا مات حيدر عالگبر...من بعد الوداع

و لا غابش بذاكه النعش
و لا طول فاطم تنفرش...و ملامس الگاع

و ما بين دمعات الخجل
و ما بين نظرات الزعل...حيدر علي ضاع

الشايلها دوم بروحي
ما لايگ اعليها النعش
الشايلها دوم ابروحي

الچانت دوه لجروحي
شو خدها بالگاع انفرش
الچانت دوه لجروحي

ليش...گلبي ما يطگ
ليش...عفتيني أحترگ
و ادري الهجر مو لونچ


*الشاعر الموفق علي الأكبر الغرابي*


رابط قصيدة "عفتيني أحترگ":
https://youtu.be/WtznqBcJnlc
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{مظهر العجائب}•
-شور-

١/ سيف الله مات بگرابه...يا حيدر حرگوا بابه
من صاحوا فاطم و إن...ضج الكون عنده طلابه

علي يا مظهر العجائب...علي يا غالب كل غالب
علي يا كشاف النوايا...علي يا حلال المصاعب

لا فتى إلا علي لا سيف إلا ذو الفقار

بيوم الشد الصفره گام و يسطر راس براس

《 علي يا علي 》

٢/ طه اللي رافع اچفوفه...يا وسفه إيده مچتوفه
ثار الله ثارك علي...و يجيبه المهدي معروفه

علي يا مبيد الكتائب...علي يا صاحب المناقب
علي يا كشاف البلايا...علي يا واهب كل واهب

لا فتى إلا علي لا سيف إلا ذو الفقار

چف الشالت خيبر شتظن تعصى اعليها ارگاب

《 علي يا علي 》


رابط قصيدة "مظهر العجائب":
https://youtu.be/xuk1aSBWrBw
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{اكسر غصن}•

إكسر غصن و انت استمع
هيچ انكسر ذاك الضلع

الضلع كسره...حنه الزهره
و طول سهرها

١/ الثگیل...انطبگ حيل...بجذوعه اعليها
اليعصرون...يگولون...انلوت إيديها

گالوا عن الباب مجمر يعني الحايط أصبح حار
من جهتين الحر يعصرها و اتخيل بالزهره شصار

باب بجمر حايط حجر
مكسور أظن حتى الظهر

الألم فتره...حنه الزهره
و طول سهرها

٢/ جذع نار...ويه بسمار...تخيل شترد
من الصواب...ورا الباب...تگوم و تگعد

سامع صوت الجمره التطفي من تلامس گطرة ماي
هيچ الباب بدم الزهره بس چانت جمرات هواي

بين البچي و بين العصر
محسن وگع فوگ الجمر

انچوه بجمره...حنه الزهره
و طول سهرها

٣/ اليسطرون...يهضمون...الزچیه ناحت
القهرها...بسطرها...التراچي طاحت

تخيل خد الزهره مورم و اتطيح الدمعات اعليه
يگولون الحاقد صافگها يعني السطره اثنين اديه

...

٤/ يخدام...ثلث عام...احدعش للهجره
من الآلام...و علي تنام...و تفز الزهره

شايف من تتنفس و تفز و تهيج ضلوعك بالليل
ما يشعر بضلوع الزهره بس الداست فوگه الخيل

البسمار أنا قاري گبل
چبیر الحجم و اعلیه ثگل

أحس كبره...حنه الزهره
و طول سهرها

٥/ أويلاه...إلى الله...تگول اسمعني
بچي و صوت...متى الموت...الضلع يوجعني

شيعوها و زينب صاحتهم بويه شماخذ و شخليت
البيت بلا فاطم هم ميت حيدر اخذ وياك البيت

الدنيا هوا و ما ظل هوا
جوا الترب راح الضوه

الزمن قهره...حنه الزهره
و طول سهرها


*الشاعر الموفق ميثاق الحمداني*


رابط قصيدة "اكسر غصن":
https://youtu.be/fW4jUO_vjb0
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{ليلة موتي}•

ليلة موتي راح احچي و أبچّيكم
يخوة زينب بزينب أوصيكم
تموت بلا حناني -٣-
ويظل خالي مكاني -٣-
أوصيكم أوصيكم

١/ ليله وحده ورايحه
اعليّه اقرو الفاتحه
نعشي ما بي صايحه بالتشييع

بعمري راحه ما شفت
تعبتكم وتعبت
آني أدري لو متت كلشي يضيع

يا ويلادي الحنان أموت و بالگبر گلبي عليكم
وينچ من تصيحون روح بلا ضلع مكسور أجيكم
وكتي شسوه وياي وما أدري بعد شيسوي بيكم

الله اوياي مدري الله ويّاكم
أموت و كل عزيز بوطن ألگاكم
من الدنيه شتاني -٣-
ويظل خالي مكاني -٣-

٢/ گِعدو گدامي سوه
منكم أرد اشبع هوه
الأم ضوه يموت الضوه من تموت

من تدفنوني بگبر
بيتي هم ايظل گبر
من تشيعون العمر بالتابوت

الحسن يعيوني الاثنين يأول عطر تارس بيتنه بهيل
إليّه راح تشتاگ ييُمه وآنه راح اشتاگلك حيل
تعيش العمر لچمات وحلم عينك يمرها النوم بالليل

أوصيك اعله زينب يبو الحنيه
يُمه اخلاف أمها اتموت البنيه
يعذبها زماني -٣-
ويظل خالي مكاني -٣-

٣/ حسين شمامة علي
حسين يا شمعة هلي
حسين يُمه اتدنه الي يُمه حسين

من أشوفك تنهظم
ينكسر بيّه عظم
من تظل بلايه أم تبچي سنين

اوصي زينب اعليك لو اوصيك يا يُمه اعله زينب
من اتشوفك تعيش ومن تروح عنها اتموت تنحب
الله يعين الأيتام لو ظلو بلا أم و بلا أب

أريد تصير خيمه فوگ اليتيمه
اذا عنها رحت تبقه بلا خيمه
شكثر بعدك تعاني -٣-
ويظل خالي مكاني -٣-

٤/ آني عنكم راحله
واللقاء بكربله
راح اجيكم ثاكله بذاك الليل

انت وحدچ بالغرب
متون ميته من الضرب
والحسين اعله الترب جوه الخيل

حسين يموت عطشان راسه اعله الرمح بالغاضريه
اركض بين الخيول لا حافر يجي ويسحگ رقيه
يوم اهدعش لو صار وي زينب يگودوني سبيه

بدورب السبي وياها اتلاگه
وخاف اتطيح زينب من عله الناگه
احس الطف سباني -٣-
ويظل خالي مكاني -٣-


*الشاعر الموفق كرار حسين الكربلائي*


رابط قصيدة "ليلة موتي":
https://youtu.be/ajHKUFLKJ-M
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{شيب گلبي الفراگ}•

من أكتب اسمك عالنهر يتحسر الماي
يالغالي ما أدري شوكت أسمع خبر جاي

وينك وينك...تدري الوجهك أشتاگ
وينك وينك...شيب گلبي الفراگ

١/ نطيت أربع ولد...گلت هلبت ترد
و لا رديت يمه و عيني عالباب
مشه وياك الهوه...و طفه بعيني الضوه
و لا يبرد گلبها العدها غياب

انتظرتك لحظة لحظة ليش ما جيت
أشوفه بغير وجهك مگبره البيت
أنا الكلمة اليُمه هواي حنيت
أريدك تجيني

الفارگله غالي ما تنام عيونه بالليل
و المثلك فراگه صعب ينرادله حيل
روحي روحي...شالت ديرة اشواگ
وينك وينك...شيب گلبي الفراگ

٢/ و حگك من رحت...على وجهي طحت
و اشم آثار جدمك بين الدروب
عشت مثل الشمع...على الله و عالدمع
و اموتن مية موته من يجي غروب

الفرح مبعد عليْ ما دامك ابعيد
و رچیچ الشوف صار و ترجف الإيد
ييُمه و وجهي ترسنه التجاعيد
غيابك سباني

و من أهد ما عني رحت ما نامت العين
و بيقضتي و نومي كلمتي آخ يحسين
بعيني بعيني...ليش الحلم ينباگ
وينك وينك...شيب گلبي الفراگ

٣/ صحت يهل البلد...أنا مضيعه ولد
يسمونه ضوه اعيون الزچیه
تركني بلا رجه...اليبشرني إجه
هذنّي بشارته عيوني هديه

تعال لخاطري و مر بيه لحظات
صفه ينشاف دمعي و عندي شمات
غريبه و گاعده ابين الغريبات
ييُمه ييُمه

يا طيب العشره الجرح يكبر بالوداع
و بين انتظارك و البعد كل العمر ضاع
بعدك بعدك...طعم الغربه ينضاگ
وينك وينك...شيب گلبي الفراگ

٤/ عفتني و آنه أم...و على العشره انهظم
و أبد ما فارگني ذكرياتك
أجي البيتك و أحن...و اموت امن الحزن
و علي يلتمن و يبچن بناتك

اسكينه تگول شفته گبالي مذبوح
اگعدت يا جده يَمه و احسب اجروح
بچه لمن گلتله للسبي انروح
سكينه العزيزه

أما العليله تگلي جده شلون بيه
عبدالله ما ردلي و لا ردت رقيه
و زينب زينب...اعليها السبي ما لاگ
وينك وينك...شيب گلبي الفراگ

٥/ خلص وكت الحچي...و متت من البچي
ييُمه و عازتك هالساعه عازه
غريبه بدنيتي...و غريبه جنازتي
بلا هلها صدگ وحشه الجنازه

انعم الله من تجيني بآخر انفاس
ميخالف ولو جثة بلا راس
إلك مشتاگه أكثر منِ العباس
يشمعة بنيني

بفگدك متت يوليدي من گبل المنيه
آخر نفس و اعيوني صوب الغاضريه
أبچي أبچي...بفگدك بچي العشاگ
وينك وينك...شيب گلبي الفراگ


*الشاعر الموفق كرار حسين الكربلائي*


رابط قصيدة "شيب گلبي الفراگ":
https://youtu.be/adL4rspJvmo
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{إسمك موضوعي}•

وشلت دموعي
إسمك موضوعي
يا مولاي

أتوسل بيدك
إحسبني وليدك
يا مولاي

دمع أصب لغيابك
عبد أنا على بابك
يا مولاي

١/ تشوفك اعيوني...والله خيعوني
يمنعني ادري منك ذنبي و ما شوفك

گلبي ما يگدر...و جيتك اتعذر
آنه العاصي بس و عيونك ما عوفك

مدلي چفينك و اخذني لا تخليني اتاني
دنيه ظلمه بلا وجودك والله يا صاحب زماني
روحي يالساكن بروحي بس على فراگك تعاني

روحي المشتاگه
و اتريد ملاگه
وين الگاك

آنه من احبابك
ذابحني اغيابك
وين الگاك

أريد أظل بحسابك
عبد أنا على بابك
يا مولاي

٢/ يا حلم عمري...وين ما أدري
لو صار اغروب اليا ديره تتعنه

روحي محتاره..كلمن الداره
يرحع بين أهله و أحبابه يتهنه

و انت يا باب التدگه من تصير المغريبة
هواي اهل عندك يا مهدي تذبحوا بالغاضرية
يدگ باب حسين چفك لو كفيل الهاشمية

متغير لونك
و ذبلانه عيونك
ما مرتاح

تلچمك انفاسك
و مشيب راسك
ما مرتاح

بدمعتي اشم بثيابك
عبد أنا على بابك
يا مولاي

٣/ من تعب حيلك...ما نمت ليلك
سهران و دمعاتك حمره تجريها

شصاير بروحك...يزيدن اجروحك
من تسمع زينب و الغربه تسبيها

عمتك بلا أخوه ظلت ميسره و طايح وليها
من بعد چف الكفلها صارت احبال بإديها
بت أميرة و هيه اميرة الوادم تعاين عليها

و بسوگ الكوفه
زينب مچتوفه
صعبه هواي

هاي اخت الكافل
رداد العايل
صعبه هواي

أنوح أظل لمصابك
عبد أنا على بابك
يا مولاي

٤/ بيا جرح أبدي...حيره يالمهدي
گلبك كلها كبار اجروحك و ملچومه

عايش سنينك...و دمعك بعينك
الفاگد كل أهله تظل روحه مالومه

الیا نحر يا چبده تنظر سيدي من الهواشم
من الضلع و الكربلائك ماكو راس بجسمه سالم
الناس لو تحزن لحزنك بيوتها تصبح مآتم

گلبك يالصابر
من يوم العاشر
شايل ضيم

شيداوي جروحك
و انت بنص روحك
شايل ضيم

قاسي الزمن بصوابك
عبد أنا على بابك
يا مولاي

٥/ كلشي ما عندي...والله يالمهدي
لليسألني هذا اجوابي و تدريني

روحس و احساسي...و شهگة انفاسي
حبيتك و ادري بنفس الحب اتجازيني

هواي اجت ناس بحياتي و عاشرتها و مشت عني
و انت الك صورة بخيالي ما املها و لا تملني
أنفرد بيها بدمعتي و اذكر اسمك يعله وني

أقسم بعيونك
ضايع من دونك
بين الناس

بس ردتك يمي
و ما ريدن إسمي
بين الناس

إسم ردت بكتابك
عبد أنا على بابك
يا مولاي


*الشاعر الموفق محمد هادي العقابي*


رابط قصيدة "إسمك موضوعي":
https://youtu.be/7VuFJ6n79i8
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________

•{ديرة عذاب}•
《 شور 》

١/ هذا المصاب خله دموعي همّاله
و ديرة عذاب گلبي و حالتي حاله
هاي الهزل و هذا الليل آه الليل
هذا المصاب و هذا الحادي و احباله

هاي غربة و بعد بأرض الشام غربة
والله صعبة بت علي و يسبوني صعبة
ظامي گلبه مات أخوي و ظامي گلبه

الموت باگ اخواني
شال في صيواني
احبال خشنة انطاني...خويه يحسين

شلون يالعفتوني
هاي تعمي عيوني
أنشاف و يسمعوني...خويه يحسين

عليّه انكتبت مصيبة
أعيشن و أموتن غريبة
يا خويا

٢/ حان الوداع بيني و بين ولياني
درب الضياع لباب الشام ودّاني
عندي أخو عفته يلوج حدر الخيل
متضمها گاع أثر خطوات نسواني

هاي محنه و بالسبي اتانينا محنه
اهواي صحنا رايحين اهواي صحنا
شلون رحنا بلا كفيل و رايه رحنا

شلون عفت خيامي
و نار حدر اجدامي
وين ذيچ أيامي...خويه يحسين

دموع گلبي و نوحي
تصيح يا مذبوحي
الشام كل جروحي...خويه يحسين

أروحن منكم عجيبة
أعيشن و اموتن غريبة
يا خويا

٣/ ما گمت أشوف أمشي و أسحگ ذيالي
و الدنيا خوف و ظعن من الزلم خالي
شفت الگمر گام و طاح ما بيه حيل
تذبحه السيوف و آنه الشام كتالي

يبچي شفته و أنا فوگ الناگه شفته
كافل اخته لو عدل ما تنسبي اخته
هيچي گتله تبقى ستر احجابي انته

هناك بس تعذرني
الشام لو يكسرني
ببيت بيت يمرني...خويه عباس

بنار گلبي اتچوه
اهناك عگب الخوه
الشام أدخل گوه...خويه عباس

أنوحن أخوي شيجيبه
أعيشن و اموتن غريبة
يا خويا

٤/ صار اللي صار ذبحت كربلا ايامي
بضلوعي نار فرگه و نار بخیامي
راح الخدر شفت الويل عگب الویل
ما ظلي دار و ابن أمي انذبح ظامي

ما بقالي شي أعيشن لجله تالي
لا دلالي لا إبن أمي و دلالي
ما إجالي شگد ندبته و ما إجالي

الشام هدّم صيتي
باگ كل عافيتي
و شال خدري و بيتي...خويه يحسين

الموت من يلفيني
اندار صوب احسيني
و هيچ تغمض عيني...خويه يحسين

دليلي يناطر حبيبه
أعيشن و اموتن غريبه
يا خويا


*الشاعر الموفق أحمد الهلباوي*


رابط قصيدة "ديرة عذاب":
https://youtu.be/6qJOjgtFJKY
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________