•{الله يكثر أعيادك}•

١/الله ايْكثِّرَ اعْيَادَكْ...يَا شَعْبَانْ
جَابِ الفَرْحَة مِيلَادَكْ...يَا شَعْبَانْ
الأشْهُرْ كِلْهَا حِسَّادَكْ...يَا شَعْبَانْ
نِدْعِي نُبْقَى عُوَّادَكْ...يَا شَعْبَانْ

حَتَّى الأَشْهُر صَاحَتْ...يَا شَعْبَانِ اشْگَدْ مَبْخُوتْ

٢/اللِّيلَة يِنْبُضِ احْسَاسِي...بِالحْسِينْ
اللِّيلَة اتْسَبِّحَ انْفَاسِي...بِالحْسِينْ
الخِيرِ الصَّايِرِ ابْرَاسِي...بِالحْسِينْ
صِيتِي اوْ قَدْرِي عِدْ نَاسِي...بِالحْسِينْ

حُبَّكْ مَا يِتْعَوَّضْ...مِثْلِ الخُبْزَة بوَكْتِ العُوزْ

٣/بمَهْدَكْ تِجْدَحِ اعْيُونَكْ...يَا عَبَّاسْ
مَا تِقْبَلْ يِلَعْبُونَكْ...يَا عَبَّاسْ
المَايِ شمَا يِصَلْ دُونَكْ...يَا عَبَّاسْ
ترُفْضَه اوْ مِنْ يِشَرْبُونَكْ...يَا عَبَّاسْ

المَايِ اوْ إنْتَه بزُغْرَكْ...صَاحِ ادْخِيلَكْ يَالعَبَّاسْ

٤/ألِفْ مَبرُوكْ أبْدِيلَكْ...يَسَجَّادْ
وَرِدْ هَاللِّيلَة اوَدِّيلَكْ...يَسَجَّادْ
لُو سِجَّادَة أهْدِيلَكْ...يَسَجَّادْ
الصَّلَاة هيَة التِصَلِّيلَكْ...يَسَجَّادْ

إنْتَ المَاطَخْ رَاسَكْ...بَسْ مِنْ تِسْجِدْ لِلْمَعْبُودْ

٥/بَعَدْ چَمْ لِيلَة شِنْگِلَّكْ...يَا مَهْدِي
أخْجَلْ مِنْ أبَارِكْلَكْ...يَا مَهْدِي
تِمَنِّيتْ آنَه أنْدَلَّكْ...يَا مَهْدِي
عَدِلْ لُو مَيِّتْ أوُصَلَّكْ...يَا مَهْدِي

لِسَّه دمُوعَكْ حَمْرَة...اوْ تِبْچِي ابْصَحْنِ احْسِينْ


*الشاعر الموفق السيد محمد المنصوري*


رابط قصيدة "الله يكثر أعيادك" :
https://youtu.be/80aH7JkuIdQ
____
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
__
القناة الرسمية للملا مصطفى السوداني على telegram :
https://t.me/Mustafa_Sudane
____

•{ثوب الحسين}•

غصّيت ودرتها الكربله العين
منو يوديلي ريحة ثوب الحسين
اثيابه البالحوافر مزّگوها
مامش وصله للحنّت لخوها
ثوب الحسين

١/غص گلبي واحساسي انچوه
وسكته انگطع عني الهوى
حيلي انچفه وعضمي خِوه
حن الدليل النينوى

اتلفت دموع وقهر
والذاكرة تلم بالصور
من أهلي واحد ما حضر
هلبت يسير لو نحر

أيس دليلي بفرگة احبابي
الما عنده خنصر ما يدگ بابي
وضليت ادور عطره بثيابي

ذاك اللملمت جسمه الحصيره
أرد اشتمه باللحظة الأخيره
گتله عمامتك من فرهدوها
مامش وصله للحنّت لخوها
ثوب الحسين

٢/ يا خويه يالما تنجمع
ظل راس الك وشچم ضلع
السانك يبس مثل الجذع
ومن العطش ما تنسمع

حنيت ابوس عمامتك
انتَ الهوى الله برگبتك
طيبه وتونس خوتك
گطع الهوى ولا گطعتك

بثيابي عطرك خويه من جينه
دورته بعدك ماكو چا وينه
السوط اخذ عطرك يبو سكينه

بس ريحة حرگ خيمه اعله الثياب
موش احسين اشم من تالي عطّاب
من خيمة اخوي الحرّگوها
مامش وصله للحنّت لخوها
ثوب الحسين

٣/ لمن رجعت من النهر
بثوبك شفت وجه الگمر
يمكن حضنته من القهر
حد ما طبع بيك الأثر

تحچي ودليلك محترگ
اخ العطر لو ينشبگ
ريحة ابو فاضل صدگ
وصفة عليل ومختنگ

عباس اخوي اليخنگ فراگه
مشتاگه موت لعطره مشتاگه
كد ما تعلعل گلبي عالناگه

وي عطرك عطر عباس اريده
مشتاگتله من گلبي لوريده
من راية چفيلي الطيّحوها
مامش وصله للحنّت لخوها
ثوب الحسين

٤/ من ودّعت ابنك متت
طوله اعله طولك شابگت
من البچي وياه طحت
وبلايه ظهرك من گمت

الاكبر مدَلل عمّته
عافيتي كلها بضحكته
عنك نيابه زيارته
لو جتني ريحة غترته

لمن اشمه الاكبر اوليدي
چن غافي احسًّ راسك ب ايدي
المن فرگته طلعن تجاعيدي

لو يدري شكثر محتاجه جيته
چا هد گبره وركاض اعله عمته
هلبت من ثيابه الخضّبوها
مامش وصله للحنّت لخوها
ثوب الحسين

٥/ ثوب بتراب الطف هوه
يغنيني عن شم الهوه
عطرين بيه شايل سوه
للمختنگ ينطوه دوه

ابن الحسن وجه البدر
ركضة اعتنيته اعله المهر
امگطعينه اشچم شبر
ضل بس دمه وثوب وعطر

وآنه اعله ريحة ثوبه المدمه
اشتم حسن وحسين إذا شِمه
ذاك اليطير ب عفيه يا عمه

يكفيني ثوبه بساعة العازة
ماريد اتعبه بشيل الجنازة
من هندام ابوه الترّبوها
مامش وصله للحنّت لخوها
ثوب الحسين

٦/ اخر عطر مشتاگه إله
وياي اجه من كربله
جان اعله ثوبك بسمله
من تشمه تنسه اي مشكله

راح اعتني لعطر الولف
عطر البرائه اليختلف
لطفله گضّت من النزف
مسطورة عالخد الترف

مشايه للنهبوا تراچيها
هلبت عطر منك بگه اعليها
اخر نفس ليه ارد اشم بيها

ارد اغفه اعله عطرك بالمنيه
وآخذ للگبر ريحة رقيه
من ثوب الگضّت يم نحر ابوها
مامش وصله للحنّت لخوها
ثوب الحسين


*الشاعر الموفق ياسر المطوري*


رابط قصيدة "ثوب الحسين" :
https://youtu.be/LItA8WApUlo
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{الهوى بعيد}•

بصدري الجهه اليسرى تدور الإيد
وين امشي واتنفس و الهوا بعيد
أريد أركض عليكم...واغمض بين اديكم

١/ البعد كله ليل وختام الجروح
أموتن و لا تگلي اروح

بدورة وجه احبابك عنك تشعر روحك ترحل
منين يروحون اعله الراحه تبقى بگلبك تسأل
وين گبور اولاد الزهره ويا يوم الهم أوصل
من تشاهدهم بالصوره حتى أنفاسك تثگل

وسفه مراقدهم صارت تراب
هدموهن بساعه أجمل قباب
أنا اتمنى أجيكم...واغمض بين اديكم

٢/ عالملاگه اعيش واموت بغياب
أريدن إدين تجي تدگلي باب

أحبابي اندفنوا بالغربه وراحت عني السلوه
يا گلبي اسنينك بچفاهم مُره ولا تظن حلوه
لگبور العتره ارفع عيني من اگصد و البلوه
من انظر لگبور الغرقد ليش انظر ليجوّه

ويلي عله الساجد زين الابرار
بگبره و لا يخلص من الحجار
ردت موتي بسبيكم...واغمض بين اديكم

٣/ الهوا اهنا غريب أشمه و يضيع
أريدنلي يوم أشم البقيع

وين الحسن النور الأخضر تشكي عيوني الظلمه
يمته اگصدهم و آخذ تربه امن العباس لأمه
هضمة مسبي بگبر الباقر منهو يواسي الهضمه
والسجاد بگبره ويشكي من الكاسر عضمه

من يدرك الصادق الگلبه مكسور
يندب رَحِم اللهُ اليبني الگبور
عيوني گتله ليكم...واغمض بين اديكم

٤/ بقية الله وين شبعد للظهور
متت عالبقيع و اريدن ازور

وينك يا مهدي ونگصدهم يالطولك غيبته
يعز اعلينه نشوف الوادم بس ما تنشاف إنت
خسران هواي الما شافاك واكثر لو ما شفته
خدامك و گبور الساده نشيّد بيهن يمته

مو فقط خدامك بينه آمال
من ينبني الغرقد إحنا عمال
يكل حزامي بيكم...واغمض بين اديكم

٥/ أخاف اعله يوم أغمض العيون
مثل طفل انوح إذا ما تجون

يهل الغرقد حتى بموتي ما راح اصبر عنكم
لتخيبون العبد الرايد نظرة والد منكم
يا حظي امن ابچي اعله حسين او وياي اسمع ونكم
ويا ضيمي بگبري امن اتچفن وانا ابّالي احضنكم

حضروني يا أهلي وسادة الناس
محلفكم بعمكم الغالي عباس
أريد اشكر سعيكم...واغمض بين اديكم


*الشاعر الموفق ميثاق الحمداني*


رابط قصيدة "الهوى بعيد" :
https://youtu.be/E-4xZcZr0o8
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{الموت خطار}•

جَاوبنِي لو مِنِّي خَذَوْا حَنَانَكْ
يَا بُويَه يا هو اللِّي يِسِد مَكَانَكْ
وِ المُوت خطَّار...يَبُويَه يَبُويَه
خَل بِيَّه يِندَار...يَبُويَه يَبُويَه

١/ رَايِد مِن ألَم گلبَك بَلچَن گلْبَكِ ايْهَوِّدْ
وِ اذَا عِندَكْ إلِي خَاطِر يَبُويَه الخَاطِرِي إِگعِدْ
ضُوَه يِتْرِسْهِنِ اعْيُونِي إذَا وَجْهَك عَلَيَّه ايْصِدْ
أبُويَه اللِّي حِلُو طُولَه هَسَّه اگْبَالِي مِتمَدِّدْ
آنَه ابْنَكِ الكَاظِم وَ ارِيدَ انِشْدَكْ
يَا جَعْفَرِ الصَّادِقْ شَكَابِر بَعْدَكْ
وِينِ الألَم صَارْ...يَبُويَه يَبُويَه
خَلْ بِيَّه يِندَارْ...يَبُويَه يَبُويَه

٢/تَرَه الفَاگِد أبُو امْبَيِّنْ يِظَل كِلْ عُمْرَه مَالَه افْيَايْ
مِنِّ المَگبَرَه لِلْبِيتْ ايْگَظِّيهَا رَايِح جَايْ
يِتمَنَّه الگَبُر بِيه بَابْ يُوصَلَّه و يِگِلَّه ابْرَايْ
يِگِلَّه لُو أظَل يَمَّك يَبُويَه لُو تِگُومِ اوْيَايْ
لَمَّن أدِفْنَك گلبِي شَرْدَ أگِلَّه
وِ بيَا وَجِه بِيتَك بَعَد أطُبْلَه
هَمَّك عَلَى الدَّارْ...يَبُويَه يَبُويَه
خَلْ بِيَّه يِندَارْ...يَبُويَه يَبُويَه

٣/يَصَادِقْ بِالفِعِل وِ القُولْ لَوَنَّك تُغفَه بِترَابَكْ
دِيوَانَك يِظَلْ خَالِي وِينِ اتْرُوحْ طُلَّابَكْ
بَعَد مَاكُو اليِعَلِّمْهُمْ مَجَالِس مَاكُو بِغْيَابَكْ
وِ الوَحْشَه عَلِينَه اتْزِيدْ إذَا مَحَّد يِدِگ بَابَكْ
وَجهَك تِغَيَّر وَاصْفَرِ المَلَامِحْ
أنظُر مُصَابَك يِجِي وِانْتَ رَايِحْ
جَرْحِ ابْنِ الأَبرَارْ...يَبُويَه يَبُويَه
خَلْ بِيَّه يِندَارْ...يَبُويَه يَبُويَه

٤/غَمَّضْ عِينَه وِاحْمَلْتَه رِحِتْ لِلْمُغْتَسَل مِحتَارْ
جِسْمَه امْنِ الضُّعُف ذَبلَانْ وِ ابْرِجْلَه لِگِيتَ آثَارْ
أثَارِي امْنِ احْتِرَگْ بِيتَه يِركُضْ چَانْ فُوگِ النَّارْ
رُقَيَّه يَا رُقَيَّه ايْصِيح مِنْ فَرَّن بَنَاتَه ازْغَارْ
گال آنا جَدِّي هوايَه نَايِبَاتَه
خِيلِ التِّدُوسَه اتْطَشِّرِ ابَّنَاتَه
يَالبِيكْ أثَر نَارْ...يَبُويَه يَبُويَه
خَلْ بِيَّه يِندَارْ...يَبُويَه يَبُويَه

٥/بَعَد مَا غَسَّلِت جِسمَه شُبَگْتَه وآنَه مِعتَازَه
ثِگِيلَه اتْصِيرْ خُطْوَاتَه الرَّايِح يِدْفِنِ اعْزَازَه
أتمنَّى نِرِد لِلْبِيتْ سِوِيَّه اوْ گبرَه نِچتَازَه
تَرَه المَاشِي ببُو جَنَّازْ يِتعَثَّر بِالجْنَازَه
مِنْ وَسَّدِت خَدَّه و بِسِت جَبِهْتَه
ويَّاه نِمِت وَسْطِ اللِّحِد شُبَگْتَه
گِتلَه الدَّهَر جَارْ...يَبُويَه يَبُويَه
خَلْ بِيَّه يِندَارْ...يَبُويَه يَبُويَه


*الشاعر الموفق السيد محمد المنصوري*


رابط قصيدة "الموت خطار" :
https://youtu.be/GiUKB4TAiJM
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{يالرباب}•

يالعلى الناگه ريضولي
و خلوني آخر مرة لولي
يالرباب...إنطيني عبدالله
يالرباب...لا يگعد اسم الله
خلوني آخر مرة لولي

١/عبدالله فك اگماطك اشبگني
بلكت أبوي احسين ياخذني
و اكسر خاطره يگلي تعالي
إبچي بحضني عبدالله يا غالي

و يگلي أبوي حسين صعدي
يم عمتچ المهيوبه گعدي
يالرباب...انطيني عبدالله
يالرباب...لا يگعد اسم الله
خلوني آخر مرة لولي

٢/إنت الأمل و دموعك تحلها
ياخذني لو تبعد محاملها
يبعد امناشغك رجواي انته
حلات الأخو كون ايرافگ اخته

مرتبطه روحي وياك كلها
البنيه شلها خلاف اهلها
يالرباب...انطيني عبدالله
يالرباب...لا يگعد اسم الله
خلوني آخر مرة لولي

٣/خلوا ينام ابين ذرعاني
عطري يعرفه و يغفه بحضاني
و لوليله بونيني و اشتكيله
دللو يالهلك عافوا عليله

بس لو فتح عينه و ضحكلي
تخلونه يبقى وياي يهلي
يالرباب...انطيني عبدالله
يالرباب...لا يگعد اسم الله
خلوني آخر مرة لولي

٤/الغروب عندي اتبين الوحشه
و الدمع يبقى مخاوي وي رمشه
صعبه المغرب من ايمر عليه
لا عبد الله يمي و لا رقية

كل ساع تعرضلي صوركم
و شلون لو طول سفركم
يالرباب...انطيني عبدالله
يالرباب...لا يگعد اسم الله
خلوني آخر مرة لولي

٥/لا سامح الله و ما تردولي
ساعتها يهلي ينكسر طولي
و يشح وكت الصدگ و يغرب الخير
و سبايه يردن الما شافهن طير

يا أهل يثرب و المدينه
لحگو الحسين مسلبينه
يالرباب...انطيني عبدالله
يالرباب...لا يگعد اسم الله
خلوني آخر مرة لولي


*الشاعر الموفق علاء شهيد الحجامي*


رابط قصيدة "يالرباب" :
https://youtu.be/3mNvstRuwfQ
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{ها رايح يا عباس}•

عباس...شمتوا حيل بيه و انكسر ظهري
عباس...يا وجه الخيام اتحيرت بأمري
ها رايح يا عباس

١/بين الشريعة و الخيم
عباس كل حيلي انهدم
شفت العلم طاح
بالحومه فارگني الضوه
كلشي اختلف حتى الهوى
احزام الظهر راح

خويه صوتك بين عدواني اسمعت
حيل ياخذني إلك خويه ردت
عالدرب چفك يخو زينب شفت
بالثلث مرات بالحومه اعثرت

عباس..هذا آنه عضيدك خويه تسمعني
عباس..آنه حسين إگعد يا گمر ظعني
ها رايح يا عباس

٢/عباس يا صوغة أبو
يا حيلي يا هيبة أخو
يا شوف العيون
يالتارس اخيامي إسم
يالعايش بروحي حلم
بفراگك شلون

خويه جيتك و الدموع الحمره هاي
و شابحه اعيون الخيم طلعت وراي
يا گمر ظعني و عضيدي يا ضواي
وسفه طايح چف المخاوي لواي

عباس..إرجع چم گلب ينتظرك و ظامي
عباس..كلها تهون بس ام عون بخيامي
ها رايح يا عباس

٣/عباس قلة حيلتي
و استوحدوني بغربتي
كل همي لخيام
إرجعلي يا ربح العمر
عباس مو غالي الخدر
و اعيونك اتنام

طاحت ايدك يا أمل سكنه يَحيد
و ظهري خويه منحني و بعازة إيد
مو لأن سبعين ألف و آنه وحيد
يا بو فاضل بالشمر تدري شيريد

عباس..شسولف للغريبه و شنهو اضم عنها
عباس..خاف اتموت زينب من كثر ونها
ها رايح يا عباس

٤/محتاجك بگد غيرتك
بگد ما حنين احچايتك
بگد ما وِفه بيك
يا آخر ارسوم لهلي
عباس يا ريحة علي
يالروحي أسميك

يا بو فاضل بيش أرد للضاميات
غير عين تضملي دمعه يم خوات
كلشي بيه يصيح أخوي الغالي مات
مشيتي و صوتي و متون المايلات

عباس..تبين فرگتك بأول حچي شفافي
عباس..تبين فرگتك من ميلت اچتافي
ها رايح يا عباس

٥/يالظعني وي طولك حده
لخيامي يا أول نده
چم عين برجاك
تارسني حنية گلب
عباس چم دمعه تصب
منتظره يمناك

العين إنت و راح أرد من غير عين
سكنه عطشت شوفتك حد الونين
و خضّرت بدموعها الچا عمي وين
اليمسح ادموعچ شگلها بلا إدين

عباس..بچه الميمون خويه الونتي و حالي
عباس..أرد بلايه رايه و الوجه خالي
ها رايح يا عباس


*الشاعر الموفق عبد الخالق الحريشاوي*


رابط قصيدة "ها رايح يا عباس" :
https://youtu.be/_qbpoY6reEM
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{كافي تبچين}•

كافي تبچين أمانه
مسلم حسين مكانه
يلزمچ بإيد حنانه
وبيده تغفين
ديري العيون عليه
منهو أبو يصير إليه
من يصيحون رقيه
مات الحسين

١/لا تونين تره أبچي لو بقيتي بهالبواچي
حسين موجود و لمن نرجع مثلي يهديلچ تراچي
يگول الحسين ليش هاي السكته يا حلوة محاچي

هالليله نغفى سوا...وي الأبو و طيبته
بكتره أنا نومتي...وانتي الچ شبگته

حسين هوّه و عيونه
مو أبويه أبونه
سوا نشتم متونه
ونغمض العين
مو بنت عم أخيّه
والزم ايديج بديه
من يصيحون رقيه
مات الحسين

٢/كلها وياچ هنا رباب وزينب تشبگچ بديها
احچيلي بعدين حسين من يوگع رقيه شلون بيها
محّد اوياي رجلي مچويه و أظل أنفخ عليها

زينب تطفي الخيم...رمله اعله جاسم تون
صغيره و ركضتي شبر...هواي انضرب عالمتن

ويجي سلابي آني
بقرطي يجرح اذاني
لو تصيرين مكاني
شگد تموتين
إنتي هسه بأذيه
آنه بعدين خطيه
من يصيحون رقيه
مات الحسين

٣/صاحچ حسين من رحل مسلم و گلچ يمي گعدي
ومسح عالراس وگلچ اليوم إنتي مثل ابناتي عندي
بوگعة حسين آنه ما گالوا إلي ضربولي خدي

محد مسح راس إلي...بالسوط راسي انضرب
گالوها بس بضحك...هاي الأبوها انسلب

الشمر جرني امن اديه
يگلي شوفي رقيه
تدوس أبوچ أعوجيه
لا تغمضين
واصرخ امن الرزيه
خلوا أبويه إليه
من يصيحون رقيه
مات الحسين

٤/چنتي تبچين ومن تعبتي نومتچ عمتي بخيمه
و آنه من طاح هيّه بچيه وهيّه ركضه على الهيمه
أتعب هواي و هاي وادم أبد ما ترحم يتيمه

لمن رحل والدچ...بالأم لگيتي الدفو
بس آنه يا هظمتي...ما عندي أم و أبو

قبل ركضتنا بالدار
صارت الركضه عالنار
منين إجانا هالحجار
انشمر صوبين
حجاره بيها المنيه
و آنه أوگع رميه
من يصيحون رقيه
مات الحسين

٥/الأهل داروچ عمتي غسلت وجهچ من بچيتي
و اجه عباس شربچ ماي و بعد زعلچ رضيتي
حسين من راح اركضت من الخيم مخنوگه ريتي

بالكوفه ماي اطلبت...وبداه اگبالي الشمر
مي ماكو و اغسل وجه...بس شيلة أم الخدر

بشيلتي و وجهي التراب
وگلبي من العطش ذاب
ومحد يفك الأبواب
أرتوي امنين
ماي وشسوه بيّه
تصدقوا بيه عليّه
من يصيحون رقيه
مات الحسين

٦/باچر الشام ولو متت عالنحر ممكن يختي تقرين
الفاتحه هاي إلى المرحومه رقيه بنت الحسين
الماتت هواي وكبرت امن الظيم بس هيّه اربع سنين

بالشام من التعب...عكازه بيدي الزمت
أذكر صحت عمتي...والله يعمه اتعبت

بنحر أبوي وخضابه
موتتي بالخرابه
آخر حچايه بابا
الصاير اثنين
راسه ما بين إديه
و جسمه بالغاضريه
من يصيحون رقيه
مات الحسين


*الشاعر الموفق ميثاق الحمداني*


رابط قصيدة "كافي تبچين" :
https://youtu.be/AILMEdH-r68
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{عركة الشياب}•

شدوها العصب عالراس
و الهُم مبتسم عباس
رافع إلهم ايمينه

بجيشه تلگه مو بس شاب
حلوى عركة الشيّاب
ذوله الوي أبو سكينه

هلا هلا هلا هلا...ذوله انصار الحسين
هلا هلا هلا هلا...سبعين اعلى سبعين

١/زلم ترهب زلم وتعدل الميله..زلم هدوا
إجه اليرعب سمع من الطرف عيله..إجه وسكتوا
هذوله البالشدد خيالة اكحيله..إذا شدوا

عابس چفت للميدان ضهضب حبيب الهيبه
ترخصنا هالمره حسين راس الشمر خنجيبه

طبهم زهير ودخّنت غاير و عيونه دوت
جونك...ظل يتباها بفنونه
الحر الرياحي من نزل شايل بعيونه زعل
صاحوا...هذا الما يگدرونه

هلا هلا هلا هلا...طب شيخ الميادين
هلا هلا هلا هلا...سبعين اعلى سبعين

٢/جزوا عالحد غضنفر واحد تشوفه..جزوا عالحد
ردم ردموا خذوا كربلا عله الكوفه..جزوها شگد
زلم صياده واحدهم علي اچفوفه..ولا يبرد

شربوا املوحة عباس من طبوا اعلى الحومه
والراد يشرد بالجيش لازم يذب اهدومه

صلوا عله اظهور الشگر غيره ومحليه المهر
عابس...شد اعصابته براسه
طلعوا أراضي كربلا و شافوا ريشه بالفلا
و صاحوا...طبها دخيل عباسه

هلا هلا هلا هلا...يعگال الدواوين
هلا هلا هلا هلا...سبعين اعلى سبعين

٣/أنشف الشط حلف عباس أبو الشاره..أنشف الشط
واحطن خط واريدن زلمه بصياره..يجي عله الخط
ودخل بيها وتلاگه الگمر بانصاره..ولا تفحط

غاصوا ابنص الميدان والرايه ما هدوها
خياله ما بيهم روس تركض رگب خلوها

وين الكلف وابن الكلف هدوا والسبعين ألف
ضاعوا...يمكن عبروا الكوفه
من الشام وترد الزلم حاروا تعبها الشهم
شالت...غيرة حيدر اچفوفه

هلا هلا هلا هلا...ضربته اتعدل الدين
هلا هلا هلا هلا...سبعين اعلى سبعين

٤/عرب عركه إذا طبوا يطيْحون الشمس بالبر
زلم خشنه إذا واحد يطيح الثاني رد خضّر
النهر ينجر نجيبه لخيمة سكينه النهر ينجر

تأمرنه ونجيب الغيم والعركه الك مگضيه
يحسين ندخل والجيش ينسحل بالچفيه

ضلوا رمح يسبگ رمح جابوا لحسين الصبح
حطوا...جربه وعصروا الغيمه
صلوا عله عيونه عشگ صاحوا يحسين الصدگ
إنت...تستاهل يبو الشيمه

هلا هلا هلا هلا...و تنحط هاي بالعين
هلا هلا هلا هلا..سبعين اعلى سبعين

٥/حرس نحرس خيامك وانته قائدنا..حرس نحرس
زلم تخلس يويله اليوصل لحدنا..زلم تخلس
نجي نهوس إلك وانته التشاهدنا..نجي نهوس

ميدانه ايريد ازماط وينه اليزامط وينه
عبدالله يطلع بگماط و يحط إصبعه بعينه

تستاهل انته الهوسات حيهم زينب لو نخت
صاحوا...جرينه الشط يم سكينه
يحسين إلك كلها تطيح نركض نسبگها الريح
رايه...فوگ النهر دگينه

هلا هلا هلا هلا...بحبك إحنا ميتين
هلا هلا هلا هلا...سبعين اعلى سبعين


*الشاعر الموفق محمود الموسوي*


رابط قصيدة "عركة الشياب" :
https://youtu.be/NHFP6jsa4Zw
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{باچر ذبح ودعيني}•

زينب...باچر ذبح ودعيني
زينب...كل ما رحت صيحيني

ودعيني باچر غربة..غربة
يا بعد أخوچ و گلبه..گلبه
كل ما رحت صيحيني

١/ شبگني باچر نفترگ والليلة آخر ليلة
باچر حسينچ ينذبح من هسّه خويه ابچيله
باچر الشايلكم عمر حافر الخيل يشيله
و فياي عن حر الشمس من العبي سويله

باچر الخيل تجيبني عليچن
باچر مچوّايات رجليچن

باچر...ينسحگ صدري هوايه
باچر...بيد الشماته الرايه

و حسين أخوچ هدومه..هدومه
يتسلبن بالحومه..بالحومه
و من أنسلب غطيني

٢/ زينب الليلة اتأخري كل ما أگلچ روحي
باچر فراگ من الصبح و انّوب تبدي جروحي
من صدري باچر للرمح تطلع و ترجع روحي
راسي بكتر و آنه بكتر و ينوح كلشي لنوحي

باچر السيف يمرمر بحالي
و بهداي يذبح بيّه چتالي

حاير...من هسه أخوچن حاير
حاير...يكسر ضلوعي الحافر

يهضمني زينب موتي..موتي
شينفع صياحي و صوتي..صوتي
و من أنسحگ لمّيني

٣/ تراب وهوه وغربه وعطش ولوحدي مخليني
ما أدري أرافس منذبح مدري الرمل يچويني
ينشال راسي و طيحتچ يا زينب اتبچيني
یچتفونچ و فوگ الرمح تبچي يا زينب عيني

باچر أشوفن ولدي واخواني
ميتين واحد شابگ الثاني

راحوا...چا ما خذوها اجروحي
راحوا...تكسر الخاطر روحي

أنعاف أول تالي..تالي
شگد صيحولي الغالي..الغالي
يالكلكم متعبيني

٤/ عادات عد أهل العرب وكت الحرب مفهومه
يگولون ذلة اعلى الرجل من ياخذون هدومه
و باچر احسين بكربلا يسلبون خويه اهدومه
و يلتمن عليه الحرم مهضومه يم مهضومه

و التهضم أكثر ها يعلويه
من يمي و تروحين مسبيه

خويه...تمشين درب الكوفه
خويه...ويّه العده مچتوفه

حيرتچ باچر حيرة..حيرة
من ديرة خويه لديرة..لديرة
خدرچ تره يبچيني

٥/ دم على عيني و الضعن لا يعبر و ما شوفه
چا ياهي تمسح عيني إلي كل الحرم مچتوفه
تمرين خويه اعلى الجثث و من الجثث للكوفه
و ياهو اليحاميلچ بعد عباس ماكو چفوفه

باچر بناتي بعازة الوالي
و الروس يفتر بيها چتالي

باچر...بالقصر بت السادة
باچر...وين الگمر نشّاده

سوط العده من جاسچ..جاسچ
يعني انكتل عباسچ..عباسچ
و لو قصّر اتعذريني


*الشاعر الموفق السيد محمد الموسوي*


رابط قصيدة "باچر ذبح ودعيني" :
https://youtu.be/4nQHuxeYCBI
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{الولد يمه}•

عيُونَك...شگَد حِلْوَه لَتْغَمُّضهِنْ
عيُونَك...رَاح أصْفِنْ وَ اشْتَاگِلْهِنْ
يُمَّه الوَلَد يُمَّه

١/ يَوْلِيدِي الأُمْ شِتْرِيدْ
تِگعِد وِ ابْصَفْهَا اوْلِيدْ
چَا لِيشِ اتْرُوحِ ابْعِيدْ...الوَلَدْ يُمَّه

يَوْلِيدِي اليِشْتَاگُونْ
المُغْرِب وِينِ ايْرُوحُونْ
إرْجَع خَلِّيلِي اعْيُونْ...الوَلَدْ يُمَّه

تِرِدلِي لُو عَلِيكَ ازْعَلْ
أظَل أتْخَيَّلَك تِقْبَلْ
و لَوْ سَمِّعْنِي بَسْ صُوتَكْ
أنَا بهَذَا الفَرَاغ أذْبَلْ

عَبْدَالله شلُونَكْ
شُو ذَابِل لُونَكْ
فَتِّحلِي اعْيُونَك عَبْدَالله اوْلِيدِي

چَا حُضْنِ اتْترْكَه
و ثَغْرَك مَتْحَرْكَه
چَا وِينِ الضِحْكَه عَبْدَالله اوْلِيدِي

{يُمَّه يُمَّه يُمَّه}

٢/ نَايِم عَلَى صَدرِ احْسِينْ
أعْرُف مَا نَايِم زِينْ
خَايِف تِلْچِم ضِلْعِينْ...الوَلَدْ يُمَّه

بَس هُوَّه ايْحِبَّك حِيلْ
صَح صَدْرَه انْدَاسِ بخِيلْ
بَسِّ ايْحُضْنَكْ بالِّليلْ...الوَلَدْ يُمَّه

شِلَع مِنْ صَدْرَه بَعْضِ اسْهَامْ
مكَانك هَذَا حَتَّى اتْنَامْ
لَچَن سُولِفلِي بِيَّه اشْلُونْ
أرِيدَك مَا أرِيدَ احْلَامْ

اتْبَچِّينِي طيُوفَكْ
امْنَ اصْحَى اوْ مَا شُوفَكْ
وَ ابْچِي اعْلَى اچْفُوفَك عَبْدَالله اوْلِيدِي

عَبْدَالله أحِبَّكْ
وِ ابْعِشْرَه أطُلْبَكْ
خَلِّينِي بگَلْبَكْ عَبْدَالله اوْلِيدِي

{يُمَّه يُمَّه يُمَّه}

٣/ سِتّ أشهُر يَا مَدْلُولْ
وَيْ سَهْمَكْ نَفْسِ الطُّولْ
كِلْشِي ابْإحْسَاسِي ايْگُولْ...الوَلَدْ يُمَّه

آنَه أرْدَ افْهَمْ بَسْ هَايْ
شلُون يِحِرْمُوكِ المَايْ
اصْغَيِّر يَا ضَيْ عِينَايْ...الوَلَدْ يُمَّه

وِ التْهَوِّنْ عَلَيْ حزْنِي
يِجِي المَهدِي و يِشِيلِ ابْنِي
يِصِيحِ ابْأَيْ ذَنِب ذَبحَه
مِنُو البِيكُم يِجَاوُبنِي

لِيشِ ايْعَطْشُونَه
و لِيشِ ايْذِبْحُونَه
بدَمَّه ايْرَوُّونَه عَبْدَالله اوْلِيدِي

عَبْدَالله و دَمَّكْ
مَا تِنسَاك أمَّكْ
بِالجَنَّه اتْشِمَّكْ عَبْدَالله اوْلِيدِي

{يُمَّه يُمَّه يُمَّه}


*الشاعر الموفق ميثاق الحمداني*


رابط قصيدة "الولد يمه" :
https://youtu.be/RK5CJEe8Rsg
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{يا صديقي}•

١/ يا صديقي
و انتهت عشرة عمر ويه النحيب
يالگضيت اسنين تبچي اعله الغريب
الليله عندك بالگبر موعد لقاء
يا حبيب الراح يتلاگه بحبيب

إسمع إفهم يا فلان ابن فلان
لا تخاف حسين للخايف أمان
راوي دمعك من يجوك الملكان
خدمتك في عالم البرزخ ضمان

هل أنت عالعهد الذي فارقتنا عليه؟
بعدك تگول بلا بچي وبلا عزه اتيه
اهناكه تره غالي الدمع والغالي يشتريه
والغالي يشتريه

خادم حسين بالحياة والممات ما يعوفه
يوفي بالدين والدخيل مستحيل ما يعوفه

{حبيبي يا حسين}

٢/ يا صديقي
إنت يم حسين هالليله تبات
و انت تدري المنذبح عطشان مات
شوفهن بعده شفاهه ذابلات!
گله نبچي شما يمر طاري الفرات

إسمع إفهم هذا عهدي بالسنين
راح أذكرك كل محرم هذا دين
راح أذكرك لو زرت گبر الحسين
واهدي خطواتي إلك بالاربعين

كل عام أشيلن صورتك واتعنه للذبيح
والصوره تبچي بحضرته من توصل الضريح
مكانه مو خالي تره يا بو علي أصيح
يا بو علي أصيح

بعالم الموت ما تموت إنت صوت من محرم
إنت عنوان بالعزاء والبكاء من محرم


*الشاعر الموفق كرار حسين الكربلائي*


رابط قصيدة "يا صديقي" :
https://youtu.be/BY6jfRhnfAA
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{بناتي}•

١/ يا نار يا مي يا شمس
يا ريح إسمعن زين
لمن أطيح امن المهر
دارن بنات حسين

أمس لميت كل الشوك و وصيت الرمل بيهن
برّد يا رمل روحك باچر خاف تچويهن

بناتي وبيهن آنه أدره مو مالت ركض هيمه
يگعدن لو بفص العين لو يم إختي بالخيمه

عزيزات عزيزات...لا تجرح اجدام اصغار
عزيزات عزيزات...يا رمل أبرد يا حار

{بناتي..بناتي..بناتي..بناتي}

٢/ يا نار أمر الله بعد
وادريچ ما تطفين
لو بالخيم لو بالگلب
واختاري شتحرگين

بهيده اويه الخيم يا نار هذن مالت رسول الله
لتحرگین كل خشبات خشب كاروك عبد الله

بهيده بهيده وي لگلوب هواي الصاير البيهن
باچر منچ الدخان يعمي وما يدليهن

عزيزات عزيزات...يا نار طيحي الدخان
عزيزات عزيزات...رحمي بعيون النسوان

{بناتي..بناتي..بناتي..بناتي}

٣/ يا ماي ما جيت بضمه
وهم طيحتلك هاي
بس افزعلهن بالحرگ
طفي الخيم يا ماي

موقف سوي مره وياي يالماخذ كفيل اختي
ما ريدك تروي اشفاي طفي اخيام عايلتي

ولو ما تطفي هاي النار بموقف لا تمر بيهن
اگبال الرمح لو صبوك تدري شگد تبچيهن

عزيزات عزيزات...لا تفزع اطفي خيام
عزيزات عزيزات...بس إرحم ابوب الشام

{بناتي..بناتي..بناتي..بناتي}

٤/ يا شمس أيام السبي
بس ليل مشّيهن
والليل صح خوف ورعب
بس إستر اعليهن

وادري اعليهن اطلعين وطول اختي تره يعثرچ
العلاوي كل عبيهن سود لتغيريهن بحرّچ

ها يشمس موقف عاد من تركض تجيني اختي
طفي اضواچ لا تنشاف وسبب شوفتها من جثتي

عزيزات عزيزات...يا شمس هالعلويات
عزيزات عزيزات...وعالسبي ما متعودات

{بناتي..بناتي..بناتي..بناتي}

٥/ يا ريح لا تنقل حچي
يجرح مسامعهن
بسرعه گلبهن ينكسر
وتصب مدامعهن

إذا صاحو غريبه اختي لتوصل الحچي لام عون
ولو أشرو هب يا ريح ونزل إيد اليأشرون

تره بس العليل الظل وي نسوة ضعن عدنان
وما وصيك اذا ركضن لا توگف اوي الدخان

عزيزات عزيزات...واحچاية الغربة تعيل
عزيزات عزيزات...آخ المعزه امن تشيل


*الشاعر الموفق مصطفى صادق اللامي*


رابط قصيدة "بناتي" :
https://youtu.be/ZOjQruosxSA
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{أحلى مشاية}•

واحد إنوي واتحضر
اثنين بيا علي توزر
ثلاثه أرفع الرايه
بدرب الأربعينيه
شغل أحلى لطميه
وامشي احلى مشايه
مشي مشي مشي مشي...محلى المشيه لحسين
مشي مشي مشي مشي...خل نتعب يرجلين

١/تره احلى درب بالعالم درب مشيك شنو المنظر
ولا ريد الدرب يخلص أريد امشي بعد أكثر
المشي للناس النحبها حلو تعبه يبو الأكبر

جيتك يمحبوب الروح يالإسمك اعله الرايه
مو راكبًا لا يحسين عاشگ واجي مشايه

دربك لون صعدة جبل...اصعد
والكلمن سأل...كتله
رايح مشي للجنه
رايح للمحلي العشگ...وادري
بس حبه الصدگ...ادخيله
لا ما ينشبع منه

مشي مشي مشي مشي...رايح لليگر عين
مشي مشي مشي مشي...محلى المشيه لحسين

٢/ملايينك بعد تكثر والزياره بعد تحلى
وحلاتي امن افتخر زرتك واليناشد انه اگله
شكر ناس اعله شباچه وانه الزمته وخذت قبله

صوره آخذ اباب حسين واعليها أكتب شعري
شنهو بظهر هاي الناس انه الحسين بظهري

لزيارتك عمري انوجد...عايش
حتى اخدم بعد...عمري
للخدمه الحسينيه
امن الآخر احچي قصتي...دوّر
لذة خدمتي...ماكو
مثل الأربعينيه

مشي مشي مشي مشي...أتنطرها كل حين
مشي مشي مشي مشي...محلى المشيه لحسين

٣/مو بس أمشي أروح أخدمها زوارك واخدمنك
المواكب مائدة مريم أشوفنها امن ازورنك
حتى الچاي بالموكب اِله لذه لأن منك

ويا موكبك يا محلاه ينحب تره اعله الفطره
وبيه بركه هذا الزاد لازمته إيد الزهره

كلشي التصق بيك انرفع...شآنه
وبإسمه لمع...مايك
فوگ الماي تعظيمه
بزادك يضربون المثل...لذته
ويشافي العلل...كم من
مريض وشافته القيمه

مشي مشي مشي مشي...آيات وبراهين
مشي مشي مشي مشي...محلى المشيه لحسين

٤/الدول كلمن وجنسيته لچن حُبك وطن ثاني
تشوف الأجنبي يمشي والعراقي والإيراني
خليجي يطعم اليمشي ويوزع ماي لبناني

كل اليحبون حسين واحد يحب الثاني
الله عليك شگد خير يحسين أحبك آني

جامع الناس بكربله...منهو
قدرك يوصله...إنت
التنحب وبعد كافي
هاي الملايين التطب...صحنك
حاضنها بگلب...كلها
ادخيل احساسك الدافي

مشي مشي مشي مشي...أمشيلك أنا اسنين
مشي مشي مشي مشي...محلى المشيه لحسين

٥/يروح التعب من أوگف على العتبه بدمع هامل
وحلاة الگعده ما بينك و بين الحب أبو فاضل
السنه الجايه أعد گلي واجيك ورايتي شايل

وفقني اجيلك كل عام وامشيلك اعله النيه
لو ما أجيلك مشاي شلفايده برجليه

تقبلها مني زيارتي...و اقبل
مشيي ودمعتي...وباچر
اقسملي بعد جيه
لا تحرم العاشگ هوه...تدري
بس بنينوه...والله
شايف راحه نفسيه

مشي مشي مشي مشي...ماكو لكربله اثنين
مشي مشي مشي مشي...محلى المشيه لحسين


*الشاعر الموفق ميثاق الحمداني*



رابط قصيدة "أحلى مشاية" :
https://youtu.be/mjSo88m_eCU
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{حبيتكم}•

حبيتكم چا ليش ترحون
وفراگكم بيّن بالعيون
ياللي تحبوني...لازم تتعبوني
حبيتكم

١/وين اديكم...إيدي فرغت صارت بإيد الهوه
وين اديكم...صوتكم ضحكتكم الگعده سوه
وين اديكم...منهو يلزمني لأن ظهري انلوه
وين اديكم...ليش بعيوني بده يغيب الضوه

يا من تركتوا و انتو ماشين
سبعين كسره بطول الحسين
وحدي تركتوني...لازم تتعبوني
حبيتكم

٢/وين اخوتي...ما معوديني على هذا الجفه
وين اخوتي...بعد وين الگه المثلكم بيه وفه
وين اخوتي...گعدوا من النوم زينب خايفه
وين اخوتي...خيول وسيوف وحرب ما شايفه

بعيونها الصيوان محروگ
وركضة الشام وطبة السوگ
ياللي كفلتوني...لازم تتعبوني
حبيتكم

٣/خويه عباس...مدلي إيدك ظهري يوجعني بده
خويه عباس...إنت هم تعوف أخيك وحده
خويه عباس...شويه ويصيحون يا خويه العده
خويه عباس...يبقى واگف لو بسهم انمدده

افگدت الأنصار وشيب الراس
شتسوي بيه اليوم عباس
يا كحلة عيوني...لازم تتعبوني
حبيتكم

٤/شگد أحبكم...چنتوا يمي واستحي ما سولفت
شگد أحبكم...واحد وسبعين مره آنه متت
شگد أحبكم...شگد اودعكم وبيكم رجعت
شگد أحبكم...وي ولدكم أركض اعليكم گمت

صحبان چنتو شلون صحبان
واحدكم يطيب جرح چان
چنتوا تواسوني...لازم تتعبوني
حبيتكم

٥/أصدقائي...بيا علي گمت آنه اجرنه النفس
أصدقائي...مو عطش بس ريگي عالخوه يبس
أصدقائي...يا زهير ويا حبيب و يا أنس
أصدقائي...شويه وتسمعون أبو اليمه انرفس

يسحگون صدري على البيده
الحافر ملبسينه حديده
ليا غربه عفتوني...لازم تتعبوني
حبيتكم


*الشاعر الموفق ميثاق الحمداني*


رابط قصيدة "حبيتكم" :
https://youtu.be/X-KYxfurqr0
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{لا تحرمني قربك}•

يا مولاي...مشيني اعلى دربك
يا مولاي...و إزرع بيه حبك
يا مولاي...لا تحرمني قربك

١/أوگفلك اوگوف العبد و اتذلل ابرحابك
خل تنسد ابواب البشر بس تنفتحلي بابك
إسمحلي أحط خدي و أظل أتمرّغ ابترابك

ابحثت بس ما شفت واحد بديلك
أنا الطامع يبو اليمه بقليلك
ذليل و قمة العزة ذليلك

يا عطشان...عطشني المصابك
يا عطشان...و اسگيني ابعذابك
يا عطشان...گلبي ايواسي گلبك

٢/احسبني يتيمك سيدي و امسح عليه بيدك
لا تگطع افضالك عليْ يالمنگطع وريدك
إقبلني لو آخر إسم من قائمة عبيدك

أخدمك و انته متفضل عليّه
ألف شكرا إلك يا بو رقية
ولي النعمة و يمالك كلشي بيه

يا مظلوم...عيشني المواجع
يا مظلوم...و اسگيني المدامع
يا مظلوم...أبچيك و أندبك

٣/عن كل ملذات الوكت بعدني يا حبيبي
أرتاح إذا أتعب إلك و اتونس بنحيبي
الحمدلله و الشكر حط خدمتك نصيبي

و لا غرني الزمان ابمغرياته
أنا الناذرلك اعيونه او حياته
اليعوفك ينحسب تارك صلاته

يا مذبوح...إذبحني اعلى حزنك
يا مذبوح...لا تبعدني عنك
يا مذبوح...إنت الروح أحسبك

٤/مهما عشت يا بو علي ما افرّط ابعزائك
و مهما تغربني المدن ملاذي كربلائك
سجع الحمام أستهجنه من أستمع رثائك

وحگك ما ردت جنة و سعادة
لإن حبك يكفيني و زيادة
يمن نوحي على مصابك عبادة!

يا مسلوب...لا تسلبني عشگك
يا مسلوب...ما عوفك و حگك
يا مسلوب...انطالك كلشي ربك


*الشاعر الموفق كرار حيدر الخفاجي*


رابط قصيدة "لا تحرمني قربك" :
https://youtu.be/8SuGlabWWwg
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{يا نرجس الحنان}•

خايف واريد أمان...من صاحب الزمان
وختم القرب رضاچ...يا نرجس الحنان

١/ گلبي ادخيل ابابچ نرجس
ضمي عن نفسي الأماره
وهوه الله بعظمه ومنزلته
ضم يمچ آخر أسراره
علمي عالحب النصراني
البأول نظره تصير اقداره
وكون اول ما شوف المهدي
آنه وگلبي نصير أنصاره

هيچ و اشوفه جاي...واركضله بيدي ماي
إدعيلي حلمي هاذ...يا نرجس الحنان

٢/ يالربچ اخفالچ حملچ
ابقداسچ مجروح اتذلل
يا ريحانة گلب المهدي
گلبي شوي شوي ظل يذبل
إخفيني الدنيا اندلتني
ومن خدمتكم خوفي اتبدل
بجاهچ راح أطرق باب الله
لا يستبدلني بغيري أسئل

خايف بعيد أروح...لا أبچي لا أنوح
وانسى انتظار إمام...يا نرجس الحنان

٣/ محد يندل عالم حبچ
يا نرجس بس دليتيني
آنه المحد يقبل بيه
نعم الله اعليچ اقبلتيني
آنه الچان املثگ گلبي
ومن دون العالم جبتيني
ومعروفه المذنب يتعاقب
بس ليش أذنب وترحميني

يوميه إعتذار...مو هيچ الإنتظار
كون اليحب يطيع...يا نرجس الحنان

٤/ العاشگ ما يوصل معشوگه
إلا ايحرك شوگه اونينه
وعالمهدي مكلفچ مولاتي
أم و تمونين اتحاچينه
يالمسجونه لخاطر طوله
ميردچ من اتطلبينه
لو يظهر باچر مولانا
خل يقبل يا نرجس بينه

وي جيشه اريد أصير...لو إسمي بالأخير
عندي المهم رضاه...يا نرجس الحنان

٥/ حبيتچ بس أبقى مقصر
امن القله آنه اللي يذكرنوچ
أعتب مولاتي اعلى امثالي
ينسوچ و ما يندلونچ
بسامره ومحد دگ بابچ
بس وين القله يزورونچ
أم آخر معصوم لله
ووسفه العالم ميعرفونچ

أم صاحب العصر...ناسيها بالذكر
مولاتي نعتذر...يا نرجس الحنان


*الشاعر الموفق مصطفى صادق اللامي*


رابط قصيدة "يا نرجس الحنان" :
https://youtu.be/WLWLDHHzVUc
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{طايح عامود البيت}•

يالتطرق باب الدار...رفقا ويّاه
طايح عامود البيت...اليكتل فرگاه

على الدمعه..و على الونه..تعوّدنه

١/ آه يا خنگة الغروب من يشيل المحبوب
و عله المو غالي انطيح عالغالي الحال اشلون
عايف گلبي بيا حال خيمه و من دون احبال
لو حنيت الملگاك من وجهي اتطيح عيون

چبير اخواني إنت الدللت إختك دلال
علي تركض أشوفك من گبل كلمة تعال
إذا ما تلزم إيدي حصه تصبح للحبال

يا وجه الخير اشلون...أصبر بچفاك
وآنه المتعوده اعليك...و من صغري وياك

منو يعوضك..يهالواحد..و لا منه
على الدمعه..و على الونه..تعوّدنه

٢/ تطلع روحي اتمنيت يفرغ كل يوم البيت
شال الوالد و النوب أكبر خوّاني يموت
وحدي تخليني شلون يا كسرة ظهر ام عون
ما ترهم كون اتصير يشيل اثنين التابوت

بكثر ما دللتني چنت أشوفك مو أخو
أخويا ما أصيحك چنت أصيحك يالأبو
و لا أشعر يتيمه عوّضت ذاكه الدفو

ما ترضى بزعلي و دوم...توگف ويّاي
و من أعطش أمري تگول...هاي إخذي و هاي

أبو ثاني..لهب بُعدك..القرب جنه
على الدمعه..و على الونه..تعوّدنه

٣/ شكرا يا ماي العين دللت هواي حسين
و من تشعر بيه تعبان تنطي من حيلك حيل
لاخوانك في اجناح و تركض لو واحد طاح
و اليتمرض بالبيت تسهر يم راسه الليل

إمام و طاعه أمرك و الملائك تحت إديك
و لا تأمر أخوتك عجبه هالحنيه بيك
التريده إنت تجيبه ما تتعبهم عليك

لمن يغفه العباس...تمشي تغطيه
أكثر من أمه عليه...چنت مداريه

منو مثلك..يبو محمد..يدللنا
على الدمعه..و على الونه..تعوّدنه

٤/ آخر لحظاتي وياك تشهگ و تذب حشاك
ضم طشتك عني حسين شايل چبدك مفتوت
يم راسك أنعى عليك أبچي و اعصر بيديك
بحضني تنازع و تلوج بيه و لا بيك الموت

مثل ما غدروا الوالد يبو گلبي إجوك
ضحكهم يلچم بنعشك شماته و شيعوك
لأن چبدك تسميني يا خويه سمموك

أصعب موقف لانسان...يصدف وياه
بين أحضانه من ايموت...واحد يهواه

والنحبه..إذا يمشي..يتعبنه
على الدمعه..و على الونه..تعوّدنه

٥/ نعشك متروس اسهام يشبه زفة جسام
وآسيت اجروح احسين الينزف من كل مچان
يم جدك ردت اتبات بس طردوك الشمات
و تمنو گبرك كون بالهيمه بلا جيران

تمنيت النعش نعشي و سهامك بيه كون
ظفر ما ينلمس منك و إلك زينب تهون
المثيلك هالوكت كلش صعب يتعوضون

چنت أتمنى بعاشور...طولك موجود
محد يتجرأ چان...يضربلي ازنود

على الخيمه..حرس توگف..يكافلنه
على الدمعه..و على الونه..تعوّدنه


*الشاعر الموفق ياسر المطوري*


رابط قصيدة "طايح عامود البيت" :
https://youtu.be/jQ1T5wW-9BU
_______
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______
القناة الرسمية للملا مصطفى السوداني على telegram :
https://t.me/Mustafa_Sudane
_______

•{صدمة عمري}•

لليوم من الميلاد عايش صدمة عمري
شلون أطيب شي مخلوق ما يردوه ما أدري
عالم...من دم وجلد
عجبه...يسحگون الورد
صدمة عمري

١/ متفاجئ ومنذهل
من وآنه عمري طفل
ما صدگت بالخبر
يا أهلي ما ينعقل

ورده بترافة نده
ومنها الضوه مولده
ما بيها شي ينكره
عجبه العليها اعتده

مسطورة عالخد يگلولي هلي مسطورة عالخد
الله ولحد صحت وينه علي الله ولحد

أبحث بين الأخبار توني اتعلم أقره
بلكي كتاب التاريخ مابيه ماتت زهره
بصغري...أبحث واجتهد
عجبه...يسحگون الورد
صدمة عمري

٢/ من حگي اچذب الحصل
و ارفض حديث الأهل
معقوله زرع السمه
ثمنطعش عام و رحل

بكل الصحف منكتب
ما مره سوت ذنب
ليش بصلافة و حقد
اعليها الحطب يلتهب

كسروا ضلعها على الحايط ركل كسروا ضلعها
واحد دفعها و كتل منها طفل واحد دفعها

قرط الزهره المنثور طاح بچف المحسن
ضماه صوغه لعاشور لرقيه العم يحن
ينجر...تالي وتنجلد
عجبه...يسحگون الورد
صدمة عمري

٣/ ذبحتني حالة علي
بصحبة چذب مبتلي
يسمعها صاحت إله
الحگني محد إلي

موقف يشيب الصبر
من تسكت و منجبر
وتدري انت خد حرمتك
بچف صاحبك منسطر

طگوا حرمته أبو حسين و وسف طگو حرمته
جروا غترته مثل شيخ بسلف جروا غترته

الله يعين المچتوف لمن ينطگ خِله
يسمعه من آلامه يصيح وما يگدر يفزعله
حيدر...ممرود الچبد
عجبه...يسحگون الورد
صدمة عمري

٤/ كلما خذاني العمر
يكسرني طاري الكسر
أبچي و أگل للگلب
لهنانه حد الصبر

اليحچيلي عن الضلع
لا يسأل اعله الدمع
الما منچوي بفاطمه
يستغرب من الوضع

كل عمري صايح لحد يوم الچفن كل عمري صايح
غير الفواتح فاتحة أم حسن غير الفواتح

ما يشعر بالملچوم بس العاش اللچمه
الما جاس بگلبه النار تلگاه بارد دمه
مجلس...أنصب باللحد
عجبه...يسحگون الورد
صدمة عمري

٥/ عند العرب والعجم
ماتت عجيبه القيم
ما رجعوا من الخجل
من شافوا العتبه دم

حاير چنت بالفعل
من ذبحوا أم وطفل
و بالعاشر استوعبت
ثاري الذبح شي سهل

بالمقتل أقره عجايب و انهضم بالمقتل أقره
عبدالله نحره بسهمهم ينفطم عبدالله نحره

زينب ما بين الخيل تركض ويلحگوها
الطگو أمها الزهراء مو عجبه يطگوها
وادم...تتوارث حقد
عجبه...يسحگون الورد
صدمة عمري

٦/ للمهدي فكري سرح
وجهة بخيالي نلمح
أتخيله بكربله
يزور الغريب انذبح

والضامي أتصوره
يطلع بلا منحره
يستقبل إبن الحسن
بضلوعه المكسره

ثار الزچيه متى يرد لهله ثار الزچيه
بالفاطميه عزائه بكربله بالفاطميه

چنهم بين الزوار نصبوا مأتم حسره
ومن يلطم صدره حسين توصل إيده لظهره
يمته...يالمهدي ترد
عجبه...يسحگون الورد
صدمة عمري


*الشاعر الموفق ياسر المطوري*


رابط قصيدة "صدمة عمري" :
https://youtu.be/euJSnfH_WKU
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{رجعلي حبيبي}•

يا عم يا سلمان ما تسمع نحيبي
يالتدري بالشوگ رجعلي حبيبي

إحنا أول اثنين نتنفس سوه
نفرض علي اهناك اهنا ماكو هوه
رجع حبيبي

١/ تدري إحنا نصين گلب التقينا
و من صار الفراگ سكته بچينه
يرجعلي لو موت موتة حنينه
خل نمشي مجروح لازم حزينه

اصبرت من كسرولي ضلعي و گلت فدوه اتحملي
و على المحسن من هوه و مد إيده الزغيرة إلي
بس علي لا علي أريده خل يرجعولي علي

حيدر من أخذوه مچتف مر عليه
لا مو للحبال والله چفوفه ليه

نساني الضلوع و ابني اللي هوه
گتله امشي وياك اهنا ماكو هوه
رجع حبيبي

٢/ أبچي اعلى فرگاه و بشوگي ما ضم
بس تدري سلمان السطرة تهضم
مسطوره و دموع خدي يورّم
گله لعلي يعود گامت تظلم

احچیله لكن لا تگله اشسوه بالزهره الجذع
راح أضم عيني بحجابي حتى ميشوف الصفع
و طولي اعدله ما أبيّن مرة مكسورة ضلع

گدامه ما ريد أشكيله و أعاني
و الوحدي بالليل أبقى اتلوه آني

خلهم يرجعون ما ريد الدوه
گله من اچفاك اهنا ماكو هوه
رجع حبيبي

٣/ راح أگلب الکون برفعة حجابي
گلهم يرجعون بعلي اعلى بابي
و الله يأذيه ينظر عذابي
سوه الله هالكون كله بثوابي

علي من يتأذى گلهم أرض أطبگها و سمه
آنه إيدي الأولى جنه و ثاني إيد الحاطمه
و چان هذا الكون ماكو و آنه إسمي فاطمه

تجمعنه بالبيت بالثوب اليماني
والله اوي جبريل چنت أسمعهم آني

محبوبة الله و حورية ضوه
و يا عطري لولاك اهنا ماكو هوه
رجع حبيبي

٤/ مولاتي زهراء رفقا بالأمه
يا بنت من جاء للأمه رحمه
مو آنه اليگول للزهره كلمه
حيدر يوصيچ يم الأئمه

لا تكشفين الإلهچ علي من شده طلع
و من غضب ربچ المسجد حايطه متر ارتفع
تقوم يالزهره القيامه لو حچي البيچ انرفع

گله يسلمان رايح كلشي احسبه
كلشي إله يهون و ام محسن تحبه

العالم لعيناه لو ردت انطوه
و گله بلياك اهنا ماكو هوه
رجع حبيبي

٥/ ردلها ابو حسين و هذا التريده
و اتبسم الكون من لزمت إيده
تضمه و تنادي آه يالصميده
باچر لعيناك أصبح شهيدة

العصره چانت صعبه لكن تحله لجلك مو عجيب
أمنيتي هاي و چنت أدافع عن إمامي و الحبيب
حتى لو قله أصحابك آنه يمك مو غريب

گلها أم الحسين يا زهرة سنيني
حب و ضمه و خوف اعليچ مدمعه عيني

يالعايش اعليچ احساسي ارتوه
وجهچ الشباچ اهنا ماكو هوه
رجع حبيبي


*الشاعر الموفق ميثاق الحمداني*


رابط قصيدة "رجعلي حبيبي" :
https://youtu.be/DY83ezXxdXs
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{يا كل الأحباب}•

مدري شردت بالمگبره و عاشرت التراب
يمچ علي عايف علي يا كل الأحباب
يا كل الأحباب-٢-

١/ بچيتچ...بگد عمري بچيتچ
نخيتچ...أگعدي شگد نخيتچ

شما ريد أنسى وأمشي ابعيد ابالي اسنينچ يعرضن
اجدامي بكل درب ميتات وبس لگبرچ ايركضن

كون العمر هم ينشري واشريلچ اسنين
لا حسن من عندچ شبع ولا شابع احسين
لا شابع احسين-٢-

٢/ وگفتچ...شمحلاها وگفتچ
دمعتچ...ذبحتني دمعتچ

شعوفچ يا بعد گلبي أوياچ أدفنت لوني
شلون ارجع الذاك البيت و آنه امضيع اعيوني

و الثامي طاح أمن البچي مو بيدي حنيت
ما دامچ اهنانه بعد ظل المن البيت
ظل المن البيت-٢-

۳/وحگچ...وما أحلف وحگچ
يإسمچ...يرد عافيتي إسمچ

ما متعوب و انتي وياي بس هسه شكثر متعوب
فرگتچ فاطمه كلفه يرادلها عشر اگلوب

ابيناتنه كلشي حلو چا ليش الفراگ
يم حسن وعيون الحسن لأم حسن مشتاگ
لأم حسن مشتاگ-٢-

٤/ أكابر...بكلشي اگدر أكابر
أكابر...ويمچ ما أكابر

احچيلچ چلمه ارد اوگف كلشي ولا تعوفيني
ينقطة ضعفي قويني عليچ اعيوني قويني

شيسوي بلّه المنهضم و العنده شمات
گوميلي رجعي الروح إلي مو حيدرچ مات
مو حيدرچ مات-٢-

٥/ بنيني...الون ماخذ بنيني
اونيني...شسولف عن ونيني

شيبي واصل لگلبي هينه الشيب البراسي
و عاشرت الگبر مجبور چي بيه نام أعز ناسي

راح أگضي عمري مختنگ مات الهوى وياچ
جيبيلي واحد يقتنع آنه أگدر انساچ
آنه أگدر انساچ-٢-


*الشاعر الموفق أحمد ماجد الكلابي*


رابط قصيدة "يا كل الأحباب" :
https://youtu.be/vSCrz4n3C_w
___
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___
القناة الرسمية للملا مصطفى السوداني على telegram :
https://t.me/Mustafa_Sudane

•{شريان الدمع}•

گالولي متعوب وگلت غير التعب ما عندي
عافيتي مزروعه بشخص إسمه الامام المهدي
گاضيها حسبه بحسبه...بين العهد والندبه
يالـمهدي شريان الـدمع غيّـر ملامـح خدي

١/ عاشگ والعاشگ بدموعه يسولف من يشتاگ
وگلبه يصير شلون النورس يم شاطي العشاگ
يم نهر الحب خطيت إسمك يالمهدي عله الراگ

مجموعه المواجع بيّه مجموعه
والعاشگ تفضحه عيونه ودموعه
يا مسلم حياتي وگلبي چن طوعه
بحبك حطمت يالمهدي موسوعه

مثل الفراشه اعله الورد هيچ اعله حبك هايم
يالجاذبيتك مو قمر جذبت گلوب الوادم
إسمك يمهدي نكتبه...بين العهد والندبه
يالمهدي شريان الدمع غيّر ملامح خدي

٢/ لا إنت الجاي ولا إنت الماخذ گلبي وياك
لأجلك ساكن وادي السهلة وأتمنه أتلگاك
هاي السهله وهلگد حلوه چا إنت شمحلاك

وصورة جمكران المستعز بيها
كل ما أختنگ يم گلبي أخليها
وصورة گبة السهله و ضواحيها
من أشتاگلك بدموعي أغطيها

بوادي انتظارك منصلب گلبي بصليب الفرگه
الحب حلاته بـحرگته وجيب اليحب بحرگه
الينسه لأجلك گلبه...بين العهد والندبه
يالمهدي شريان الدمع غيّر ملامح خدي

٣/ بيّــن بيه غيابك وردة وذبّلها الـهجران
والانسان يظل متعذب من يعطش لانسان
بحبك غرگان وهم سامع؟ غرگان وعطشان!

مو حگي امن أجر ونه بأثر ونه
وأنا امفارگ شخص ما ينشبع منه
لو هيچ العشگ لو ما أريدنه
أنا مفارگ بشر تشتاگ إله الجنه

بدوحة غرامك منشغل عن الكرة الأرضيه
مر بيه يا بعد الـهَوه ال بين الگلب والريه
تلگاني شايل تربه...بين العهد والندبه
يالمهدي شريان الدمع غيّر ملامح خدي

٤/ أول مره أشتاگ لواحد ما شايـفته الـعين
أول مره يمرضني الحب ماچنت اعرف زين
أوگع والناس توديني يم شباچ حسين

وينك يا طبيب الوادم الفقره
أشم عطرك يمهدي من أدخل الحضره
ظلام الدنيا لو ما وجهك الگمره
المحلي المحابس لمعة الشذره

والله الـحياة بلا طعم بـس حبّك محليها
تخلص هواءٌ في شبك لو ما وجودك بيها
الفرگه كلش صعبه...بين العهد والندبه
يالمهدي شريان الدمع غير ملامح خدي

٥/ يمته اتمر ابّير دموعي قافلتك مولاي
وتشمر دلْوَك وأطلعني وأتگلي أمشي وياي
يالمهدي أمنيتي من الدنيا وياك أطلع مشاي

يمته بكربله نتگابل وننعه
بچيت عليك من الجمعه للجمعه
أنا الوديت إلك وي النهر شمعه
بدعاء الندبة عفت بكل سطر دمعه

أسأل كتاب الأدعية عن دمعتي المملوحه
هو حلاته اللي يحب من ينسه گلبه وروحه
شمحله اليهيم بحبه...بين العهد والندبه
يالمهدي شريان الدمع غيّر ملامح خدي


*الشاعر الموفق عباس فاضل الكندي*


رابط قصيدة "شريان الدمع":
https://youtu.be/xMPFbapjaWA
_________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________
القناة الرسمية للملا مصطفى السوداني على telegram :
https://t.me/Mustafa_Sudane
_________