•{سجلينا}•

سجِّلينـا
بــينَ نَـــاعٍ ، بـَــينَ رَادُودٍ ولاطِــمْ
سجِّلينـا
في كِتابِ العِشْقِ"خُدَّاماً لفاطِم"

١/فاطمٌ والكَوْنُ يرجو منكِ لُقْمَهْ
بدّدي بالنُّــورِ يا زهــراءُ عتْمَهْ
في الورى قَدْ بُعِثَ المُختارُ رَحْمَهْ
أيُّ سرٍّ فيكِ حتّى كُنْتِ أُمَّهْ؟!

ويلُ قومٍ
هاجموا دارَ المعالي ، والمكارِمْ
ويلُ قومٍ
ما درَوا في العرشِ "خدّاما لفاطمْ"

٢/بِكِ قَبْلَ الخلقِ قرَّ الأنبياءُ
كَيْفَ يحْويكِ تُرابٌ أَوْ سماءُ؟
دونَ معناكِ يتيهُ العُقلاءُ
أنتِ ماءُ الماءِ للضَّوْءِ ضياءُ

حاربوها
بَعْدَ عِلْمٍ أنَّها غَيْبُ العوالِمْ
حاربوها
فَنَصَبْنا الحُزْنَ "خُدّاماً لِفاطِمْ"

٣/كَيْفَ ننسى المحسنَ المقتولَ عصرا؟!
كَيْفَ لا نلعنُ رِجْساً قَدْ تَجرّا؟!
ما وَفَيْنا إِنْ نُقِمْ حُزْنَكِ عشْرا
ربِّ وفِّقنا للَطمِ الصَّدْرِ دَهْرا

كمْ عيونٍ
ليسَ تبكي لَنْ ترى في الحشرِ راحِمْ
كم عيونٍ
صنَعتْ بالدَّمِعِ "خُدّاماً لِفاطِمْ"

٤/ضلعُكِ المكسورُ نهْجٌ وقضيَّهْ
فهْوَ قُطْبٌ للأصولِ الرّافضيّهْ
قَدْ رفعْنَاهُ شعــاراتٍ أبــيّه
أَلْفُ "كلاّ" يا شيوخَ الناصبيّهْ

أرفضوهم
منْ يعادي ضلعها حتّى العمائمْ
أرفضوهم
وارفعوا الأصواتَ "خُدّاماً لفاطِمْ"

٥/فاطمٌ جئناكِ يا أُمّاهُ ولْدا
فاحضنينا إنّنا نرجفُ برْدا
أَشْبعي أَرْواحنا حُبّاً وودّا
كبّرينا لابْنِكِ المهديِّ جُندا

بانتظارٍ
كيْ نزورَ القبرَ أنصاراً لقائِمْ
بانتظارٍ
أنْ نلبِّي الثَّأْرَ "خُدّاماً لِفاطِمْ"

٦/في سماءِ الطُّهْرِ طِرْنا كالنّوارسْ
ما درسنا الحبَّ يوْماً في المدارسْ
إنَّها فطْرتُنا الأولى كـ(عابسْ)
ولذا نُدعى مجانينَ المجالسْ

عَرِّفينا
أنَّ سرَّ اللهِ في هذي المآتِمْ
عَرِّفينا
كيْ ننالَ الفَوْزَ "خُدّاماً لفاطِمْ"


*الشاعر الموفق علي عسيلي العاملي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
رابط قصيدة "سجلينا":
https://youtu.be/UZxIy5ua044
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{عايفني و رايح}•

رَايِحْ عَايِفنِي اوْ رَايِحْ
وَاضِحْ مَا تِرْجَعْ وَاضِحْ

وِ الچَانِ بخِيرْ بَعْدَكْ ضَيَّعْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

١/سِرّ...مَنْ رَأى وَجْهَكْ...مَحَّدِ ايْشِبْهَكْ
أرْبَعِينَكْ كِلْهُمِ انْتَه
يَمَّكْ...يِسْتِقِرْ حَالِي...تِدْرِي يَالغَالِي
عُمْرِي چِي بِيه إنْتَ عِشْتَه

و الله يَا بُويَا ضِعِتْ دَمْعَه ابْمُطَرْ
ثَارِي فَگْدَكْ هُوَّه كِسْرَانِ الظَّهَرْ
العَسْكَرِي اوْ مِنْ إسْمِي يَا بويَا ابْجِفَاكْ
عَسْكَرِ اهْمُومِي يِجِينِي بكِلْ سَهَرْ

وِينَكْ مِحْتَاجَكْ وِينَكْ
عِينَكْ مِشْتَاگِ العِينَكْ

لَتْظِنْ يِرْتَاحْ گَلبِي الفَارَگْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٢/تِذْكُرْ...مِنْ چِنِتْ يَمِّي...لُو صِحِتْ بِسْمِي
أَرْكُضِ بوَاهِسْ حَمَامَه
بحُضْنَكْ...إنْتَه تَاخِذْنِي...و مِنْ تِلَعِّبْنِي
اتْصِدْ عَلَيَّه بِبْتِسَامَه

رَغُمْ عِشْنَه بدِيرَه غُرْبَه بهَالزَّمَنْ
چَانَتِ اعْيُونَكْ إلِي أكْبَرْ وَطَنْ
بَعْدَكِ المَنْ عَايِشِ اوْ گَلْبِي يِدِگْ
وِ الهَوَه التِتْنَفَّسَه الرِّيَه انْدِفَنْ

وَحْشَة مِنْ بَعْدَكْ وَحْشَة
عِشَّه طِيرِ ابْلَا عِشَّه

يَا غُصْنِ الخِيرْ طِيرَكْ حَيَّرْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٣/غُرْبَة...چِنْتَ احِسْ تِشْتَدْ...وِ الحِزِنْ يِصْعَدْ
مِنْ يِوَدُّوكِ اعْلَى سِجْنَكْ
وَحْدِي...أگْعِدَ ادْعِيلَكْ...بويَه وَ ابْچِيلَكْ
يشَيِّبِ بْكِلْ مُغْرِبِ ابْنَكْ

بِيتِي مِنْ دُونَكْ تَرَى مِثْلِ السِّجِنْ
وَ انْضُرُبْ كِلْ لَحْظَة بِسْيَاطِ الحِزِنْ
تِدْرِي وِ السَّجَانْ إسْمَه الإشْتِيَاقْ
و أبَدْ مَا يِرْحَمْ گَلُبْ لَمَّنْ يِحِنْ

ذِكْرَة تُوجَعْنِي الذِّكْرَة
فَتْرَة مِتِّ ابْهَلْ فَتْرَة

بدُونَكْ مَسْجُونْ كِلْ عُمْرِي العِشْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٤/يَمَّكْ...آخِرَ انْفَاسَكْ...آنَه يَمْ رَاسَكْ
وِ الدَّمِعْ بِخْدُودِي يِچْوِي
چَبْدَكْ...فَتِّتَاهَا السَّمْ...گبَالِي تِتْأَلَّمْ
و كِلْشِي مَا بِيدِي أسَوِّي

مِنْ عِرَگْ بُويَه جِبِينَكْ وِ ارْجَفِتْ
بِيهَا طِلْعَتْ روحِي لَمَّن غَمَّضِتْ
وِ اللِّي يَمْنَه احْتَارَوِ ابْسَاعَتْهَا حِيلْ
مَا دِرَوْ هُوَّه انْتَ لُو آنَه المِتِتْ

مَاتَتْ رُوحِي آنَه المَاتَتْ
رَاحَتْ وَيْ رُوحَكْ رَاحَتْ

أقْسَى امْنِ المُوتْ مِنْ يِمْشِي الرِدْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٥/لَمَّنْ...آنَه شَيَّعْتَكْ...و عَالمَتِنْ شِلْتَكْ
أمْشِي وِ الهَمْ يِمْشِي ويَّايْ
صُورَة...مَرَّتِ ابَّالِي...بَهْذِلَتْ حَالِي
امْنِ النَّعَشْ حِيل أثْگَلِ اهْوَايْ

لَنِّي شِفْتِ احْسِينْ جِسْمَه بَسْ نَبِلْ
تلَتِّ ايامِ اعْلَى التُّرُبْ وِ بلَا غسِلْ
رَاسَه بَسِّ اتْشَيَّعِ بدَرْبِ السَّبِي
اعْلَى الرُّمُحْ تَشْيِيعَه وِ اخْتَه اعْلَى الهِزِلْ

حسِينِي امْنِ اذْكَرْتِ حسِينِي
عِينِي مَا سِكْتَتْ عِينِي

بُويَه تمَنِّيتْ مِثْلَكْ شَيَّعْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ


*الشاعر الموفق ياسر المطوري*


رابط قصيدة "عايفني و رايح":
https://youtu.be/i9Ya1q0hDjs
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{أويس الشوگ}•

أُوَيسِ الشُّوگْ يَالمَعْشُوگْ أمْنِيَة شَائِقْ تِمَنَّه
حَبِيبِ اوْ هَايِمِ ابْمَحْبُوبْ سِلَبْ حُبِّ الدِنْيَه مِنَّه
هَمْ أحِبَّكْ مِثل أُوَيسِ اوْ أشَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

١/قُصَّة عِشِگْ
بِحْسَاسِي أُوَيسِ اوْ گَلبَه الذَّابْ
حُبْ مِنْ صِدِگْ
غَايِبْ مَحْبُوبَه اوْ مَا چَنْ غَابْ

لا مَسَافَه اوْ لا دَرُبْ...وِ التَّوَاصِلْ بِالگَلُبْ
يِلْتِقِي ابْصَاحِبْ زَمَانَه ابْلَايَه مَلْگَه
و آنَه يَالمَهْدِي هِمِتْ...و مِثْل أُوَيسِ اتْأَمَّلِتْ
بِيكَ احِسْ يَمِّي و لَا تِبْعِدْنِي فَرْگَه

إِيْحِسْ چَانْ حَبِيبَه ويَاه يِسْمَعَه و عِطْرَه يِشِمَّه
يَمَهْدِي وكُون أعِيشِ الحَالْ و عُطْرَكَ اشْتَمْ مِنَّه نَسْمَه
مَا رِدِتْ أشْعُرْ حَنِينِي بُرَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٢/وَكْتِ الفَرُضْ
يِرْكُضْ جِدْمَه اوْ گَلْبَه الوَلْهَانْ
يِخْشَعْ نَبُضْ
و يِتْرِكْ كِلْشِي بوَكْتِ الآذَانْ

وِ بصَلَاتَه الوَاجِبَه...مَا يِزَعِّلْ غَايِبَه
و يِبْتِعِدْ عَن كِلْشِي مَا يِرْضِي حَبِيبَه
هَمْ أصِيرِ ابْهَالشِّكِلْ...وَمْشِي يَالمَهْدِي عَدِلْ
ومَا أجِرْحَه الگَلْبَكِ اوْ بِذْنُوبِي اصِيبَه

أُوَيْسِ ايْعَامِلِ بأَخْلَاقْ و مَا جِرَحْ وَاحِدْ كَلَامَه
و قَبِلْ لَا يِحْچِي أيْ كِلْمَه ايْحَطْ عَلَى بَالَه إمَامَه
و خَاطِرَكْ مَا كِسْرَه رَايِدْ أَبَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٣/بحُبَّه مَرَه
هَامَتْ بَسْ مَا دَارِلْهَا البَالْ
بگَلْبَه قِرَه
گَلْبِي لْمَحْبُوبِي و مُو مَيَّالْ

مَا تِبَعْ حُسْنِ الشِّكِلْ...مِلْتِهِي چَانِ العَقِلْ
و صَارَوِ ايْسَمُّونَه مَجْنُونِ ابْغَرَامَه
يَا حَبِيبِي اوْ أعْتِذُرْ...مِهْتَمِ النَّاسِي اشْكِثُرْ
و آنَه گلبِي المُفْتَرَضْ بِيكِ اهْتِمَامَه

يَرِيتِ النَّاسْ أبَدْ مَا شُوفْ و عِينِي بَسْ إنْتَ تِشُوفَكْ
أُوَيسِ الثَّانِي ارِيدِ اوْيَاكْ الدِّنْيَا اعُوف اوْ مَا أعُوفَكْ
وَحْدَكِ اوْ لَا غِيرَكَ اعْشَگْ أحَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٤/عَنَّه رِضَه
مَحْبُوبَه أُوَيْسِ المُخْلِصْ چَانْ
بگَلبَه حِضَه
وچَانِ ايْسَمِّي نَفَسِ الرَّحْمَنْ

أسْأَلِ اوْ تِرْجِفْ إدَيْ...إنْتَ هَمْ رَاضِي عَلَيْ
هَمْ إِلِي ابْگَلْبَكْ يَمَهْدِي حُصَّه مِنَّه
رِدْتَ اجَرُّبْ هَالشُّعُورْ...مَا تِحِسْ مِنِّي قُصُورْ
وِ بْقَلِيلِي اللِّي أقَدْمَه رَاضِي عَنَّه

أبَدْ مُو عَنْ فَرَاغِ الصَّارْ هوَاي أُوَيْسِ بحُبَّه ضَحَّه
وِاذَا مَحْبُوبَه حَسْ مَخْنُوگْ الهَوَى العَابِرْ يِذِبْحَه
بَسْ رِضَاتَكْ مَا أدَوِّرْ بَعَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٥/چَانِ اشْكِثُرْ
يِخْدِمْ وَالِدْتَه انْهَارِ اوْ لِيلْ
طُولِ العُمُرْ
دَوَّرْ رَاحَتْهَا لْتَالِي الحِيلْ

وِ اليِطِيعِ الوَالِدِينْ...عيُونْ إمَامَه اتْصِدْلَه زِينْ
و يَا كُبُر حَظَّه العَلِيه يِنْظُر إمَامَه
بگَدْ دَلَالِ الدَّلِلُوه...يِتْعَبِ لْأُمَّه اوْ أبُوه
يِزْرَعِ لْمَحْبُوبَه شِجْرَة إبْتِسَامَه

عَسَه و أگْدَرْ أعَوِّضْهُمْ و تِرْضَه يَالمَهْدِي عَلَيَّه
لَمَن عِكَّازَه اصِيرِ الهُمْ إيدَكَ الگَاهَا بِدَيَّه
أفدِي رُوحِي لْحَد هَلَاكِ الجَسَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٦/آخِرْ حِلِمْ
بِي شُوگ أوَيسِ اوْ أتْمَنَّاهْ
لا لِلْمُهِمْ
شَارَكْ مَحْبُوبَه اوْ مَاتِ وْيَاهْ

كُونْ أذِبْ رُوحِي عَلِيكْ...كُونْ أمُوتِ ابِّينْ إدِيكْ
مِثْل أُوَيسِ لْخَاطِرِ اعْيُونَكْ يَغَالِي
تِحْلَمِ اعْيُونِ الگَلُبْ...اتْخَلْنِي دِرْعَكْ بِالحَرُبْ
حِلْمِي بِيدَكْ أنْدِفِنْ يَالمَهْدِي تَالِي

هوَايِ اگْلِيبِي يِتْمَنَّى مِثْل أُوَيسِ ايْصِيرْ حُبِّي
وَ اگَضِّي سنِينِي يَالغَالي بَسْ إلَكْ دَگَّاتْ گَلْبِي
يَمْتَى أسْمَعْ كِلْمَةِ (المَهْدِي رَدْ)
و مِنْ بَلَدْ أفْتَرْ عَلِيكِ لْبَلَدْ
يَا مَهدِي


*الشاعر الموفق ياسر المطوري*


رابط قصيدة "أويس الشوگ" :
https://youtu.be/GBcIgQEtpjM
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{الله يكثر أعيادك}•

١/الله ايْكثِّرَ اعْيَادَكْ...يَا شَعْبَانْ
جَابِ الفَرْحَة مِيلَادَكْ...يَا شَعْبَانْ
الأشْهُرْ كِلْهَا حِسَّادَكْ...يَا شَعْبَانْ
نِدْعِي نُبْقَى عُوَّادَكْ...يَا شَعْبَانْ

حَتَّى الأَشْهُر صَاحَتْ...يَا شَعْبَانِ اشْگَدْ مَبْخُوتْ

٢/اللِّيلَة يِنْبُضِ احْسَاسِي...بِالحْسِينْ
اللِّيلَة اتْسَبِّحَ انْفَاسِي...بِالحْسِينْ
الخِيرِ الصَّايِرِ ابْرَاسِي...بِالحْسِينْ
صِيتِي اوْ قَدْرِي عِدْ نَاسِي...بِالحْسِينْ

حُبَّكْ مَا يِتْعَوَّضْ...مِثْلِ الخُبْزَة بوَكْتِ العُوزْ

٣/بمَهْدَكْ تِجْدَحِ اعْيُونَكْ...يَا عَبَّاسْ
مَا تِقْبَلْ يِلَعْبُونَكْ...يَا عَبَّاسْ
المَايِ شمَا يِصَلْ دُونَكْ...يَا عَبَّاسْ
ترُفْضَه اوْ مِنْ يِشَرْبُونَكْ...يَا عَبَّاسْ

المَايِ اوْ إنْتَه بزُغْرَكْ...صَاحِ ادْخِيلَكْ يَالعَبَّاسْ

٤/ألِفْ مَبرُوكْ أبْدِيلَكْ...يَسَجَّادْ
وَرِدْ هَاللِّيلَة اوَدِّيلَكْ...يَسَجَّادْ
لُو سِجَّادَة أهْدِيلَكْ...يَسَجَّادْ
الصَّلَاة هيَة التِصَلِّيلَكْ...يَسَجَّادْ

إنْتَ المَاطَخْ رَاسَكْ...بَسْ مِنْ تِسْجِدْ لِلْمَعْبُودْ

٥/بَعَدْ چَمْ لِيلَة شِنْگِلَّكْ...يَا مَهْدِي
أخْجَلْ مِنْ أبَارِكْلَكْ...يَا مَهْدِي
تِمَنِّيتْ آنَه أنْدَلَّكْ...يَا مَهْدِي
عَدِلْ لُو مَيِّتْ أوُصَلَّكْ...يَا مَهْدِي

لِسَّه دمُوعَكْ حَمْرَة...اوْ تِبْچِي ابْصَحْنِ احْسِينْ


*الشاعر الموفق السيد محمد المنصوري*


رابط قصيدة "الله يكثر أعيادك" :
https://youtu.be/80aH7JkuIdQ
_____________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{چفينك وفايه}•

چفينك وفايه...للجود و للراية
عباس عباس...يسبع الغاضرية

١/ما تغيب حروفك
كل زمان نشوفك...آيه
و المجد ميعوفك
و انت بين چفوفك...رايه

يالبقيت بكربله...تضوي يا كوكب عله
يا هلا و مية هلا يا بو فاضل

حيرني تفسيرة
عباس أبو الغيرة
يا تاج عالراس...يسبع الغاضرية

٢/ما عرفنه اسرارك
يا گمر و انوارك...تزهر
شرف الله يزيدك
ظل يبوس بإيدك...حيدر

ربنا رافع رايتك...خيمه إلنه گبتك
غيرة الله غيرتك يا بو فاضل

ساحرني بعيونك
مجنونك مجنونك
عايش بالأنفاس...يسبع الغاضرية

٣/فدوه اروح الإسمك
ما يفارگ رسمك...بالي
إنت إنت الساقي
و بالضماير باقي...غالي

حبك بگلبي كبر...يا أحلى منّ الگمر
چفك اليروي النهر يا بو فاضل

غيرة علي شايل
حياك أبو فاضل
قرآن الاحساس...يسبع الغاضرية

٤/هالعشگ من ربي
و بودادك گلبي...هايم
إنت نور عيوني
و افتخر سموني...خادم

أذّن آذان العشگ...روحي شمعة و تحترگ
گلبي يهتف من يدگ يا بو فاضل

لو ينگطع راسي
عباسي عباسي
للدنيا نبراس...يسبع الغاضرية

٥/يا أعز من عمري
سلمت كل أمري...بيدك
يا طبيب اجروحي
مو بديها روحي...تريدك

هذا من عندي وعد...ما أعوفك للأبد
كربلائي هالعهد يا بو فاضل

مولاي عيديه
للكربلائية
يا آية إحساس...يسبع الغاضرية


*الشاعر الموفق كرار حسين الكربلائي*


رابط قصيدة "چفينك وفايه" :
https://youtu.be/WdRyZ1Lu3Wg
_____________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{كل عام}•

كل عام و احنا وياك يا مولانا
بكربلا يوم اخمسطعش تلگانا

يا آخر إمام
يا مسك الختام

١/من مياه الجنة يا غصن يسگونك
اليمنه عينك فاطم كوثر و يقرونك
اليسره عينك حيدر و بعلي يشبهونك
المختصر يالغالي الله بين عيونك

بهذا وجهك يلالي محمد جبهتك
بهذا وجهك ملامح خديجة جدتك

كل هذا الكلام
يا مسك الختام

٢/يا سفينة غيرة من سفن أجدادك
و الله لو ما عندك ولد إحنا ولادك
يا غريب بگاعك و السمه مگعادك
يا صفات الباري جينا نحيي اعيادك

يا هلا بيك ينادي الموالي بفرحته
الله حياك قبل لا يحيي بيمنته

من رب الأنام
يا مسك الختام

٣/يا عديل الگمره اخمسطعش شعبانك
من العرش و لمهدك غيروا عنوانك
يا أمير و تاجك عالبشر قرآنك
يا بخت تسبيحة فاطمة بلسانك

نور العيون و العيون يعمدة كل زمن
للحسن أب صرت دوم يا إبن الحسن

يمحلي الغرام
يا مسك الختام

٤/يا غزل يا شاعر يا قلم يا ورقة
ايوصفك من گلبك الله وزع رقّه
يا بقية ربك إنت وحدك فرقه
يعني كلشي يفنه و انت بس التبقى

يا بو صالح يسموك وكت إنت طفل
بعدك زغير يشوفوك جبل ما تنحمل

يا عالي المقام
يا مسك الختام

٥/يا نبي يا آدم و انت عيسى بعصرك
إنت يعگوب اول من نسولف صبرك
نوح شيخ بعمرك و انت شيخه بعمرك
گلبك شگد يشبه البياض بشعرك

تبقى غالي بالحسين نأديلك قسم
كلها كلا تظل دوم فقط إنت نعم

و بآخر سلام
يا مسك الختام


*الشاعر الموفق حمزة السماوي*


رابط قصيدة "كل عام"
https://youtu.be/cNT7QWoPXCc
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{هوسات}•

١/يا ما حاولو عنك يمنعونه
ابهواك عگولنه ما درو مجنونه
صحنا يا حسين الكل يسمعونه
《بأولها وياك و تاليها》

٢/كلمن راد الله يغفر ذنوبه
يگصد للحسين و يعلن التوبه
يموت و بس أبو السجاد محبوبه
《حيدر و الزهره ايحضرونه》

٣/عطر الجنة بس ابتربته انشمه
و ندعي يا إلهي انموت بالخدمه
ندري اعلى الجسر خدام أبو اليمه
《يحضرهم شيال الراية》

٤/نزل جبريل يخدم ساعت اصيارك
و گل جدك محمد عيدك امبارك
من بيت الولاية شعت أنوارك
《و الكون بنورك ضويته》


*الشاعر الموفق السيد رضا البوشوكه*


رابط "الهوسات" :
https://youtu.be/_-1iku5uWmA
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{شجاعة الحسين}•

بُركَان مِشتِعِل
طوفَان مِنفِعِل
شِفنَا القُوَّة رَايِح تِغلِبِ الكَثرَة
زَعْلَان مِبتِسِم
وِ الطول وِ الجِسِم
مَا فَاگِد إبِنْ لَا مِنْكِسِرْ ظَهرَه

١/ طلَع فوگِ المُهُر غَاضِبْ
حُسين إبْنَ أبِي طَالِبْ
رامِي اوْ طَاعِنِ اوْ ضَارِبْ مُقَاتِلْ
صَدْرَه عَالعَدُو نَقْمَه
ظَهرَه لِلْخِيَمْ رَحْمَه
مَا كَفَّه الدِّرِعْ جِسْمَه مَرَاجِلْ

مِنْ كِلْ كِتُرْ تِجِيهُمْ...و مَحَّدْ يِشُوفَه وِينْ
رَبَّكْ غِضَبْ عَلِيهُمْ...صَارِ القَدَرْ حُسينْ

بلَا صُوتْ مِنْ يِمُرْ
غَضْبَانْ بَسْ حَذِرْ
الطِّبرُولَه إبِنْ شِيرَجِّعِ الطَبْرَه
مَا فَاگِد إبِنْ لَا مِنْكِسِرْ ظَهرَه

٢/ كِلْ خُطوَه مِشَى مُهْرَه
ايْخَلِّي بِالأَرُضْ ثَغْرَه
تِجَاوَز قَسْطَلِ الغَبْرَه اوْ عُبَرْهُمْ
يِجِيبِ الجِيشْ وِ ايْرِدَّه
وَ لَا چَنْ فَارِسِ لْوَحْدَه
ذَكَاءِ المُصْطَفَى عِنْدَه كِسَرْهُمْ

مَا وَاگُفِ ابْوَسَطْهُمْ...و مَا سَيْطِرَوْا عَلِيه
يَمِّ النَّهَر أخَذْهُمْ...و كِلْهُمْ تَحِتْ إِدِيه

مِرتَاح مِنْ يِطُبْ
فَنَّانْ بِالحَرُبْ
وِ ابْگلْبِ النَّهَرْ صَاعِدْ عَلَى مُهْرَه
مَا فَاگِد إبِنْ لَا مِنْكِسِرْ ظَهرَه

٣/ لُو مَا حِكْمِتَكْ يَا رَبْ
تِشُوفِ احْسِينْ يِتْسَلَّبْ
يِظَلْ لِلْحَشِر مَا يِتْعَبْ يِقَاتِلْ
حَتَّى مِنْ وِگَعْ يِنْزِفْ
القَادَه بجِيشْهُمْ تِرْجِفْ
نِظَامِ الكُونْ مِتْوَقُّفْ مَرَاحِلْ

مَا تِنتِهِي صِفَاتَه...و لَا يِنتِهِي الكَلَامْ
مَكْثُورْ مِنْ جِهَاتَه...وِ امْسَيطِرِ الإمَامْ

مَا مَاتْ يِحْتِضِرْ
مِنْ مَاتْ يِنْتِظِرْ
قُرْبَانِ الظُّهُورِ بكَربَلَه نَحْرَه
مَا فَاگِد إبِنْ لَا مِنْكِسِرْ ظَهرَه


*الشاعر الموفق حمزة السماوي*


رابط قصيدة " شجاعة الحسين " :
https://youtu.be/2bdMcXoTOzs
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{أكبر جرح}•

إنتَه اكْبَر جَرِح هَد حِيلِ العْيُونْ
وِ العِنْدَه الحْسِينِ ايْوَادْعَه اشْلُونْ

لُو يِلبَسْ سَوَادِ الدِّنْيَا كِلَّه
تِبَيِّن كَسْرَةِ المَفگُود خِلَّه

١/ يَالمتَعِّبِ اعْيُونِي امْنِ البَچِي اعْلِيكْ
تِكْتِلْ ذِكْرَيَاتَكْ
أنَا مَالِي عِرِفْ وَيْ چَفِّ الوْدَاعْ
چفُوفِي خَادْمَاتَكْ
دِرِت ظَهرَك إلِي وِ اتْشَمَّتِ اللِّيلْ
اسْتَوحَدنِي اوْ غَلَاتَكْ
إخِذْنِي ويَاك زِينَب لَيَّه تِحْتَاجْ
وَ اخْدِمْلَكْ بَنَاتَكْ

ما أگدَر أحَلفَك بِالزِّچِيَة
أخَاف ألچِمْ جَرِح گَلْبَكْ بِدَيَّه

إذَا مَا يُبقَى يَمَّك حَتَّى ظِلَّه
تِبَيِّن كَسْرَةِ المَفگُود خِلَّه

٢/ لو گايِلِّي موتِي ارْتَاح يَحسِينْ
و لا چِلمَة تِظَلِّينْ
أنَا بلَيَّاك مَكَّه بدُونْ حِجَّاجْ
ظَلَّت بَسْ حِيَاطِينْ
فَقِيرِ ابْلَايَا حِيدَر حَالتِي اليُومْ
تِعَشَّه ابْدَمْعَةِ العِينْ
أبچِي اگْبَال وَادِم مَا يِعَرفُونْ
شِنهِي افْرَاگِ الحْسِينْ

أركُض رِكْضَةِ الضَّايِعْ وِلِدهَا
وِ الثَاري الصَّحرَاء مَا تِسْمَع نَشِدْهَا

مِن يِبعِد عَزِيزِ اوْ مَا تِدِلَّه
تِبَيِّن كَسْرَةِ المَفگُود خِلَّه

٣/ اعْلَى عُطْرَك گِمْتَ أفَتِّشْ هَبَّتِ الرِّيحْ
وَ اشِمْهِنْ نَسْمَه نَسْمَه
وَ اصَلِّي آنَه الظُّهُر وَ احْسِبْ بِالنْجُومْ
ابْجِفَاكِ الدِّنيَا ظَلْمَه
الصَّمِت بَانِيلَه خِيمَه ابْعِتْبَةِ اشْفَايْ
و گُوَّه احْچِيلِي چِلمَه
كِلمَا يِنلِچِمْ گلبِي اعْلَى فَرْگَاكْ
أصِيحِ احْسِينْ يُمَّه

لو يِنفَعِ الصُّوتِ اهْوَايْ صِحْتَه
احْسِينِ اتْأَخَّرِ اعْلَيَّه ابْرَجِعْتَه

شَكوَةْ فَرْگِتَكْ مَا بِيهَا ذِلَّه
تِبَيِّن كَسْرَةِ المَفگُود خِلَّه

٤/ وِ اجَه نَاعِي المُصِيبَه ايْعِد بِالأسْمَاءْ
و ذِكَر وِلْدِي سِمَعْتَه
البُگَه ابْرَاسْ اللِّي إبْنَه إسْمَه عَبَّاس
طِحِتْ كِلِّي اوْ سِأَلْتَه
گِتْلَه احْسِين وِينَ اشْتَمْ عطُرْ مُوتْ
ذَبِيحِ ايْگُول عِفْتَه
و گَالِ الرَّاسْ بَايِتْ فُوگِ الرْمَاحْ
و سِبَوْا نِسْوَانَه وِ اخْتَه

المَا يَمَّه أخُو تِكثَر جُرُوحَه
و حَتَّى النَاصِي يِجَّاسَرْ يِلُوحَه

المْتَانِي الحْسِينِ اوْ مَا وِصَلَّه
تِبَيِّن كَسْرَةِ المَفگُود خِلَّه

٥/ طَالِب مَايْ بِالطَّفْ گَالَوِ احْسِينْ
ارْسُومَه الحَرْ چِوَاهِنْ
نَهَر هَاشِمِ اوْيَاهِ اوْ مَاتْ عَطْشَانْ
لو حَاضِر رِوَاهِنْ
المَا سِاحِگ جِدَمْهِنْ عِتْبَةِ البَابْ
عَدُوَّك رَكِّضَاهِنْ
بنَاتَكْ مَا بُرَد مِحْرَابْهِنْ حَارْ
المَا صَله سباهن

بَنَاتْ الزَّهْرَه هِيچْ ايْصِيرْ بِيهِنِ
عِمَتْ عِينِي الحَبِلْ جَارِحْ إِدِيهِنْ

الغَمِيجْ اصْوَابَهْ يَا چَفْ اليِشِلَهْ
تِبَيِّن كَسْرَةِ المَفگُود خِلَّه



*الشاعر الموفق محمد البطحاوي*


رابط قصيدة " أكبر جرح " :
https://youtu.be/6FO8qw1dSv4
___________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

•{محتاجك بگد غيبتك}•

وينك...طال إنتظارك و العمر يگصر
وينك...محتاجك بگد غيبتك و اكثر
وينك...أمه اليجيب المهدي للمضطر
وينك؟

١/دمعي يجري و بيك أسولف دمعه دمعه
خوفي بس لا من مغيبك ماكو رجعه
أندعيلك ليله ليله و جمعه جمعه
آنه أحبك و اليحبك ما تضيعه

ظليت أدورلك أثر
و ارسملك بعيني صور
ما شفتك و گلبي انكسر...تعرفني

كلشي خسرته بهالوضع
ما أمتلك غير الدمع
لا عندي صحبه و لا ربع...تعرفني

حالي...وضعي اختلف من حالك الحالي
بالي...ما مستقر بيك انشغل بالي
غالي...و محتاجك بگد دمعك الأحمر
وينك؟

٢/ذاب صبري و بغيابك الله يعلم
گمت أجدِّي امن الليالي بشوفك أحلم
أرد أعاتب ليش غايب يمته نلتم
عطشتني و انت وجهك ماي زمزم

كاتب على جروف النهر
ما رد حبيبي امن السفر
جبت العمر دمعه و قهر...يالمهدي

حاچيني يا نسمة صبح
صمتك على جروحي ملح
و اليسكت بگلبه جرح...يالمهدي

صمتك...بس اليحبك يفتهم صمتك
جيتك...هلهوله مذبوحه بأمل جيتك
شفتك...بحساسي چف شايل علم أخضر
وينك؟

٣/حسين ردتك حتى أبقى وياك عابس
تعبتني و جيت أدورك بالمجالس
الخوف أخذني و إيدي ترجف و ريگي يابس
ما لگيتك و بحياتي مالي واهس

إنطيني من گلبك صبر
و انطيني ساعة امن العمر
بيها أشوفنَّك تمر...گدامي

كل ما حضرت بمجلسك
موجود يمي اتحسسك
مثل الهوي و أتنفسك...گدامي

إلمن...إلمن أسولف حالتي إلمن؟
بيمن...أگدر أخففلك جرح بيمن؟
يعمن...اعيوني لو مثلك أظل أسهر
وينك؟

٤/آه يمهدي شلون عينك تگدر تنام؟
من تغمض يچوي گلبك حرگ الخيام
شلون تغفه و انت تسمع صرخة ايتام
شلون تغفه و عمه عندك دخلت الشام!

بالله يغمض يا جفن
و ابالك سياط و متن
و ايامك المحسوبه من...شيباتك

اليمته تظل تشتم حرگ
و تسمع صدر ظل ينسحگ
وحده اعلى وحده تختنگ...شيباتك

گلبك...شتحمل الله يساعده الگلبك
دربك...من دمعك لحد كربله دربك
ربك...بيا ساعه ينطيك الأمر تظهر
وينك؟

٥/بهالليالي الفاطميه شكبره همك
و انت تندل وين حيدر دافن أمك
من تجيها تگول يبني خذني يمك
ظهري محني مدلي چفك خل ألزمك

خليني بيدك أنتچي
نتگابل و نشبع بچي
عن أمك شسامع حچي...حاچيني

ترضاها بچفوف الغرب
يالمهدي أمك تنضرب
حاچيني يالساكت غصب...حاچيني

ضلعي...من انكسر بابي انكسر ضلعي
دمعي...صار أحمر بلون الجفن دمعي
وضعي...مثل الضلع كاسر گلب حيدر
وينك؟

٦/العذب أمك خله لسه يصب دمعها
الباب خشنة و من رفسها طگ ضلعها
شال سوطه و شافت إيده من رفعها
ظل يطگها و اعلى محسن رد دفعها

البيت انترس نار و حطب
ضلع انكسر خد انضرب
أم و تون بين العرب...يوليدي

شايف اذا طاح الإبن
أمه گلبها ينسحن
تفت الحجر لمن تون...يوليدي

دارك...و بيا بخت من احترگ دارك
ثارك...و اليمته نبقى ننتظر ثارك
نارك...أمه اليجيب المهدي للمضطر
وينك؟


*الشاعر الموفق السيد محمد المنصوري*


رابط قصيدة " محتاجك بگد غيبتك " :
https://youtu.be/xDRwvJPa2Jk
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{راحوا الغاليين}•

بَعَدْ يَاچَفْ يِدِگِّ البَابْ شِدَّه اِوْ جَرْحِيْ مَا يِنْشَدْ
عُگُبْ مَا رَاحَوا الغَالِينْ عِشِتْ بَسْ آنَـه وِ المَحَّدْ

١/غَرِيبَه اِوْ بيتِيْ تَابوتِيْ و احِسْ بِالموتْ كِلْ لَحْظَه
وَ آنَه الرَّاحْ مِنِّيْ اِحْسينْ مُوْ يَاهُوْ اليِجِيْ اِيْعَوْضَه
عِجْبَه اِوْ گلْبِيْ ظَلْ يِنْبُضْ زينِ اِوْ مَـا وِگفْ نَبْضَه

هَذَا احْسين اخُوْ النَّسْمَه
أمُـوتِ اِبْـيـومْ مَـا اشِـمَّـه
مِثْل إِبْـنِـيْ اِوْ مِثِلْ أُمَّــه

عُگبَه اللّيلْ يِتْبَعْ ليلْ وَ آنَه اِعْيُونِيْ مَا تِنْسَدْ

٢/حَرَامِ النّومِ اِذَا مَرْنِيْ وَ اشُوفِ الرَّاحَه وَ اَتْهَنَّه
اِوْ طَبْعِ الفَاگِدَه يَانَاسْ تِلْگه الرَّاحَه بِـالـوَنَّـه
صَحْ گالَوا عَزِيْزِچْ مَاتْ بَـسْ مَـا أيَّسِتْ مِنَّه

أشُوْ مَا تِقْتِنِعْ رُوحِيْ
مَا يِرْجَعْلِيْ مَذْبُوحِيْ
أشِدِّ اِجْرُوحِيْ بِجْرُوحِيْ

نِذَرْت امْلِيْ الدَّرُبْ رِيْحَانْ لوْ رَدْ بَسْ بَعَدْ مَا رَدْ

٣/گِضَتْ سَنْتينْ عَالفَرْگه اِوْ هَاي الثَّالِثَه اِتْمُرْنِيْ
وَ اخَافِ اِحْسينْ نَاسِينِيْ لـوْ لَا بَعْدَه يِـذْكُـرْنِيْ
مِثِلْ كَسْرَةْ غُصِنْ يَابِسْ عُگُبْ عينَاه كَاسِرْنِيْ

گِلِتْ مِشْتَاگه لَانْفَاسَه
گالَوا عَـالـرُّمُـحْ رَاسَـه
گِلِتْ چَا وينَه عَبَّاسَه

گالَوا عَالشِّرِيعَه اِهْنَاكْ شَيَّالِ اللِّوَه اِسْتَشْهَدْ

٤/مَلْكِ الموتِ اِجَه البَابِيْ قُبَضْ رُوحِيْ اِوْ مِتِتْ يَمَّه
وَ اسْبَابِ الـوَفَـاةِ اِتْگُولْ كِتَلْهَا اِفْـرَاگ ابُـوْ اليِمَّه
غَرِيبَه اِوْ صِحِتْ يَـوْلَادِيْ لُـمْكُمْ فِـزْعُـوا يَـايُـمَّـه

رِدِتْهُمْ لوْ يِحِلْ موتِيْ
يِنُوحُونِ اِعْلَه تَابُوتِيْ
صِحِتْ بَسْ مَا وِصَلْ صوتِيْ

أمِدِّ اِچْفُوفِيْ بَسْ مَا اشُوفْ ليَّه اِچْفُوفْهُمْ تِنْمَدْ

٥/يَادَفَّانِيْ رِدْت اوْصِيكْ قَبِلْ لَا أنْزِلِ اِبْـلِحْدِيْ
مِنِّ اِتْرَابْ گبْرِ اِحْسينْ كُونِ اِتْحُطْ تَحَتْ خَدِّيْ
هَاي الدِّنْيَه مَالِ اِفْرَاگ وَ اخْذَتْ أغْلَه مَا عِنْدِيْ

گِلْتِ اِبْگبْرِيْ رَاح انْسَه
بَسْ شِفْتِ الحِزِنْ نَفْسَه
رَاحَولي وِلِـدْ خَمْسَه

فِدْوَه الأرْبَعَه اِيْرُوحُونْ عَالخَامِسِ الحيلِ اِنْهَدْ

٦/عليْمَنْ كَـرْبَـلَـه اِبْعِيدَه اِوْ يَاريتَه الدَّرُبْ يِگصَرْ
حَتَّى اطْلَعْ وَ امُوتِ اِهْنَاكْ يَمْ شُبَّاچ ابُوْ الأكْبَرْ
مَرَّه انْحَبْ عَلَى اِضْلُوعَه مَرَّه انْحَبْ عَلَى المَنْحَرْ

أدَاوِيْ اِجْرُوحِ البْصَدْرَه
وَ ارَجِّعْ رَاسَه يَمْ نَحْرَه
وَ اسَاعِدْ فَاطِمَه الزَّهْرَه

أحْزَنْ بِالگبُرْ لِحْسينْ وَ الْتَفِّ اِبْـچِفَنْ أسْوَدْ


*الشاعر الموفق كرار حيدر الخفاجي*


رابط قصيدة " راحوا الغاليين " :
https://youtu.be/INIG5KZJIPo
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{من ذاك عاشور}•

مِن ذَاكَ عَاشُور أدعِي مَولَايْ
لُو بَس عِشِت لِمْحَرَّمِ الجَايْ
نَاذِر نِذُر لَبْچِيلَكِ اهْوَايْ
يَا أبَا عَبدِ الله...يَا أبَا عَبدِ الله

١/مِثِل أم ضَايِع وَلَدهَا اوْ تِنتِظُر رَجعَه
بلَهفِتِي امْتَانِي ليَالِي الحِنَّه وِ الشَّمعَه
هِيچَ ارِيدَ اجْرِي دَمِعتِي بمَجلِسَك وَ انْعَى
يِختِلِف عنِّ المَوَاسِم موسِمِ الدَّمعَه

وِ المِنكِسِر مِن أجلِي ضِلعَه
شلُون أعز اعْلِيه دَمعَه
بَلچَن دَمِعتِي اتْصِير إلَك مَايْ
يَا أبَا عَبدِ الله...يَا أبَا عَبدِ الله

٢/حَضَّرِت ثوبِي السَّوادِ اوْ هَيَّأت أمْرِي
هاللَّيالِي اسْتَقْبَلِتْهَا بدَمْعِتِي التِّجْرِي
لِيلَه لِيلَه مِن تِمُرنِي يِختِنِگ صَدرِي
و يِنْشِغِل بَالِي اعْلَى زِينَب يَا بَعَد عُمْرِي

عَيِّشنِي جَرحَك شِلِّي بِالحِيلْ
زِينَب وَرَاهَا امْرَاكَضِ الخِيلْ
باچِر تِحِيرِ اوْ مَا يِظَل رَايْ
يَا أبَا عَبدِ الله...يَا أبَا عَبدِ الله

٣/ابْعِينِي تِتزَاحَم دَمِعتِي لُو نِعَى النَّاعِي
چِلمَةِ الطَّاحِ اعْلَى وَجهَه تِلْچِمَ اسْمَاعِي
سيِّدي اوْ عِنْدَك عَلِيلَه اتْهَيِّجَ اوْجَاعِي
گاعِدَه ابْعِتبَةِ البَابِ اوْ تِنتِظُر سَاعِي

وِ اتْنَادِي بُويَه المَن عِفِتنِي
ويَّه خَواتِي مَا خَذِتنِي
ميِّت حِلِمهَا ابْرُوحِتَك هَايْ
يَا أبَا عَبدِ الله...يَا أبَا عَبدِ الله

٤/اليِحْتِرِگ گَلبَه ايْتِضَاعَف بِالحَشُر أجرَه
مِن يِموتِ اتْصِير شَمعَه دَمْعِتَه ابْگبْرَه
كِلشِي ما ريدِ ابْمُحَرَّم غِير بَس عَبرَه
بَلچَن أجبُر بِيهَا خَاطُر فَاطِمَه الزَّهرَه

يَارِيتْ دَمعَاتِي الجِرِيَّه
يِشفَن جَرِح سِكنَه اوْ رُقَيَّه
العَبْدَالله تِجرِي ادْمُوع عِينَايْ
يَا أبَا عَبدِ الله...يَا أبَا عَبدِ الله

٥/هالشَّهَر شَهرِ المُصِيبَه البَچَّتِ الدِّنيَه
ويَّه ضَعنَك يا حُسيْنِ اجْرُوحِي مسبِيَّه
سيِّدِي اعْلِيكِ العَلِيلَه التِّنْتِظُر جَيَّه
كون تِحسِب حتَّى نبضَة گلبِي لطمِيَّه

وفِّقنِي فِدوَه ابْرُوح عَابِسْ
أبچِي اعْلَى زِينَب وِ المَجَالِسْ
بلكِي انْحِسِب لِلزَّهرَه وَفَّايْ
يَا أبَا عَبدِ الله...يَا أبَا عَبدِ الله


*الشاعر الموفق السيد علي الموسوي*


رابط قصيدة "من ذاك عاشور " :
https://youtu.be/LhAeV7CK5-4
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{وينك علي}•

مثل نار الضمير أحسه ابداخلي
كلما شفت فقير صحت وينك علي

۱/ للأسف بعض البشر بالفقره تهزه
والله ذوله عد علي إلهم معزه
آه يابويه اليتيم اشگد يعزه
علي چفينه صواني وحچيه خبزه

على الفقره الأمير چذب ما يعتلي
كلما شفت فقير صحت وينك علي

٢/ هذا يا إسلام هسه ابگاعه فقره
علي باني ابحضنه للأيتام حضره
علي اتلث تيام ما ماكلّه تمره
امن اليتامه يستحي خافن تشكره

علي ايگول الحصير ذهب أصبح إلي
كلما شفت فقير صحت وينك علي

٣/ نور يتحول علي ابليله وظلامه
وما تجوع ابدولته حتى الحمامه!
عنده تسوه الدنيه ضحكات اليتامه
يگلب الدنيه و يجيب إلها ابتسامه

ابوجوده ما يحير يتيم وسائلي
كلما شفت فقير صحت وينك علي

٤/ علي مستشفى الفقير او شاع صيته
يگضي أكبر حاجه بچفوفه البخيته
علي نص الليل يتفگد رعيته
الله جاب الرحمه خلاها اعلى بيته

يجير التستجير يگلها اتدللي
كلما شفت فقير صحت وينك علي

٥/ ما يخيب الراحله وحاشه يرجعه
علي دكتور و فقط كشفيته دمعه
صار للأيتام أبو و الفقره ربعه
علي حبه ايصير يوم الگبر شمعه

شفيعي بالأخير أنا و ناسي و هلي
كلما شفت فقير صحت وينك علي


*الشاعر الموفق السيد علي الموسوي*


رابط قصيدة "وينك علي " :
https://youtu.be/PCrplCGIaC8
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{يا ناعي}•

يا ناعي...إترك مصابي بهالمسية
يا ناعي...إقرالي عالطلعت سبية
يا ناعي...يا يوم مثل الغاضرية؟

١/جعفر الصادق آنه بليلة وفاتي
إقره مقتل جدي و انسى كل مماتي
داري حرگوها و بناتي بسد عباتي
و لبنات احسين فدوه كل بناتي

يا ناعي...مثل الخيم حرگوها داري
يا ناعي...و عماتي هامن بالصحاري
يا ناعي...و النار شيطفيها بيه

٢/إي يا ناعي اقرالي عن ذيچ المصيبه
البيها جسم اعلى الترب بس راسه هيبه
عالرمح مرفوع ليل و يضوي شيبه
الوطن فوگ الرمح بس إخته غريبه

يا ناعي...فوگ الرمح قرآن يقره
يا ناعي...حتى الرمح يبچي اعلى نحره
يا ناعي...واگف سمه فوگ البريه

٣/أرد اسئلك بس سؤال و هاي هيه
هم سمعت بيوم طلعت هاشميه؟!
المصيبه الشيبت ولد الزچية
بعشره عاشور اطلعت زينب سبيه

يا ناعي...عاده القتل سهله علينه
يا ناعي...بس السبي ما شايفينه
يا ناعي...فرحوا بسبي الهاشميه

٤/الزهره طبت إنحني يا ناعي إلها
مبين عليها الكسر محنيه كلها
أمي ماتت بالرفس هيه و طفلها
صيح واويلي على الما تم حملها

يا ناعي...أمي انكسر من عدها ضلعين
يا ناعي...و يطيب من تنعى على حسين
يا ناعي...من الحچيته شيبقه بيه

٥/آخر المجلس خبر إلكم أذكره
لون شاهدتوا شخص إيده اعلى ظهره
هذا قائمنا حضر و ادموعه حمره
بالفرج إدعوله كون الله يصبره

يا ناعي...بعيونه واضح إنكساره
يا ناعي...أفضل الأعمال إنتظاره
يا ناعي...نتنطر الطلعة البهية


*الشاعر الموفق حسين الفتلاوي*


رابط قصيدة " يا ناعي " :
https://youtu.be/VELIy1hI8u4
_________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_________________________
القناة الرسمية للملا مصطفى السوداني على telegram :
https://t.me/Mustafa_Sudane
_________________________

•{شهر البچي}•

كون البچي بشهر البچي من دم نهله
منهو الإله انطگت مرى و تبچي اعلى تلة

{ويلي على زينب}

١/من بيكم العنده إخت شلعوا گلبها
هذا اليطگها اعلى الوجه هذا اليسبها
واحد دفعها بالرمح واحد سلبها
بس شبديها ام الخدر أخوتها قتلة

{ويلي على زينب}

٢/من بيكم العنده إخت تركض وحيده
حيرة و عليها المشرعة صارت بعيده
وصلت لخوها بلا وعي و ترجّع إيده
و الحيرة مو بس خايفة الحيرة شتگله

{ويلي على زينب}

٣/گالتله إگعد يالأخو و انظر دمعتي
و لتگلي لو شفت المتن عذريني يختي
و لتگلي لو تشتم حرگ وين إنت چنتي
حرگوا خيمنا و الشمر سلّبني ثكلة

{ويلي على زينب}

٤/هاي التنوح اعلى الولد و يشب حزنها
و هاي التحنّي بالدمة چفين إبنها
و ذيچ التلولي عالمهد ميتة أظنها
طفل انذبح و تسلبت من عدنا طفلة

{ويلي على زينب}

٥/احسين أخوها اعلى الترب جثته رمية
و ركضت رقية لجثته ركضت سبية
گاملها و بلاية نحر شابگ رقية
و تگله نومك عالترب لا مو محلة

{ويلي على زينب}


*الشاعر الموفق السيد محمد المنصوري*


رابط قصيدة " شهر البچي " :
https://youtu.be/V_N0yl3dnjY
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

▪︎{إدفني بيدك يا علي}▪︎

هالليلة لو تحضر إلي
شيعني و قرة بمقتلي
و ادفني بيدك يا علي...هاي المسية

يالبيدك آثار السبي
ريتك تحقق مطلبي
أنصب عزائي زينبي...بالكاظمية

١/عافوني طايح عالسطح محد يهمه غيابي
صح غربة لكن من طحت ما سلبوها ثيابي
بمصابي ثاني كربله بس الفرق بمصابي
ما سدوا اعليه نهر سدوا اعليه بابي

ليلي مثل ليل اهدعش
ريگي يبس من العطش
بس ما شفت جسمي انفرش...بالأعوجية

ظامي بقيت اعلى السطح
بس جسمي ما بيه أي جرح
لا منسلب لا منذبح...بالكاظمية

٢/يالبيدك حسين اندفن لمن دفنته اخبرني
واگف چنت لو منتچي ظهرك عدل لو محني
أتمنى صدري منسحگ حتى امن اگول ادفني
أعضائي تبقى مطشرة و مثله بحصيرة اتلمني

صح جسمي هم مثله وگع
بس گلبي مو نحر انگطع
لا بالرمح راس انرفع...و اختي سبية

ما تلگة بچفوفي حبل
لا ركبوني اعلى الهزل
عالصدر ما ذبحوا طفل...بالكاظمية

٣/أنصب عزائي زينبي و بمقتلي من تبدي
ما تلگه خيمة تحترگ لا عالترايب خدي
ما تلگه تله لا مرى لا حيرة تلگه عندي
و ما تلگه من سوط الشمر طفلة تلوذ بسدي

تلگاني بس طف مختصر
ما عندي طفلة عالنحر
اتشمني و تموت امن القهر... آه يا رقية

ماتت على راس الأبو
و اندفنت بچف الأخو
هم تعرف الليلة شكو...بالكاظمية

٤/غسلني من ماي النهر هالليلة من تلفيني
زينب و ابو فاضل تظل قصتهم اتبچيني
جرحي تشوفه مشرعه بس من تغمض عيني
ما تلگه بعيوني سهم و مگطعه چفيني

آخر ثواني و يحتضر
ما قصر و ظل يعتذر
عذريني يا أم الخدر...گطعوا إدية

مثل اخته من راحت إله
جسمي أريدك توصله
خليني اشاهد كربله...بالكاظمية

٥/أدري اعلى حالي تنهضم عالجسد من اتصلي
تذكر علي الأكبر وگع و بدمعك اتباوعلي
وسدني مثله باللحد و بطيحته سولفلي
جسمه تطشر عالترب حيرة شتريد تگلي

دمعه عمه عيون المهر
مو للخيم رد للشمر
و براسه كل ما ينطبر...ينظر لخيه

يا ليتني وياه چنت
يا ليتني گبله متت
يا ليتني شگد رددت...بالكاظمية

٦/كل عمري من يوم الصرت حزني عليكم دايم
و هالليلة لمن نلتقي ما ندري الله شقاسم
شيعني بيدك يالوفي ماكو وفه بالوادم
و گبري أريده ينحفر يم جدي موسى الكاظم

أنفاسي ظلت تنذبح
تصعد جرح تنزل جرح
راح انشمر من السطح...لحگ عليه

أسرع عليك بفاطمه
حاير و باوع للسمه
هاي الثواني الخاتمة...بالكاظمية


*الشاعر الموفق السيد محمد المنصوري*


رابط قصيدة " إدفني بيدك يا علي " :
https://youtu.be/FakpIGoAkfE
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{عشاگ النوح}•

هذَا احْنَا عِشَّاگِ النُّوح نِتْنَفَّسِ اللَّطمِيَّة

١/و الدِّنيَا مَتْهِزنَه اليِهِزنَه البِسْمَارْ
هذَا الجَزَع مِن الله وَي دَمنَا انْدَارْ
مَا عِدنَا قِدوَه غِير أبُو رَاسِ الحَارْ

مَركَز قِوَانَا العَبَّاسْ
وِ الرَّاضِيَه المَرْضِيَّه

٢/مَا عِدنَا قَائِد فَاطِمَه قَائِد عَامْ
مَكسُورَه لَكِنهَا سَنَد لِلْخِدَّامْ
تِشْفِي ألَمْنَا و هِيَّه مَترُوسَه آلَامْ

هِيَّه أمْنَا أمِّ الكَلْفَاتْ
تِمطُر وِفَه و حِنِّيَه

٣/حيَّ عَلَى فَرضِ الجَزَع نَادِينَا
و صِحنَا يَا فَاطِم لِلَّطُمْ حَزمِينَا
الخِدمَة حَيَاةِ اوْ عَنهَا لَتْبِعدِينَا

عِيشَتْنَا كِلْهَا اعْلَى النُّوحْ
و مَسْكَنَّه الحْسِينِيَّه

٤/هَايِ البِشَارَه لِلِّزَم عُوچِيَّه
يِرجَع شَبَابِ اليِلْطُمِ ابرُوحِيَّه
وِ اتْقَوِّي حِيلَه فَاطِمَه القُدْسِيَّه

لُو حَاجِتَه بِالمَرِّيخ
وَي فَاطِمَه مَگْضِيَّه

٥/اليِحْچِي عَلِينَا شمَا حِچَه مَا نِنْقَصْ
الهِمَّه تِكبَر والله مَا تِتقَلَّصْ
الْسَانَه خَيْ كُفَّه قَبِل لَا يِنگَصْ

خَل يِحذَرِ امْنِ الزَّهرَاءْ
لَيْزَعِّلِ العِلْوِيَّه

٦/بَدِّي دِمُوعَك لِلضِّلِع مَا نَادِمْ
بِالجَنَّه تِلْگِيهَا قَصُر يَالخَادِمْ
مَالَكْ عِلَاقَة و لَا تِهِم لِلوَادِمْ

لَتْشِغْلَكِ "القِيلِ اوْ قَالْ"
و لِلدَّمْعَة صَفِّي النِيَّه


*الشاعر الموفق عبدالله الشويلي*


رابط قصيدة " عشاگ النوح " :
https://youtu.be/zQAemmW5T5U
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{أذكر الغياب}•

ساعه أون...ساعه أحن...واتذكر الغياب
كلي احترگ...لمن يدگ...صوت الهوه عالباب

يل وياكم ما خذتوني
و بعلتي الكلفه تعوفوني

١/ما بين دموعي و حر ناري
أمشي وأرجع فوگ آثاري
شگد مهضومه وشفت بداري...عذاب

الينعاف و علّه التبراله
محد يسأل عن أحواله
فراگ أهله وناسه شخلاله...عذاب

الغربه غربة أهل مو غربة ديار
المشكله يا ناس مو بيدي القرار
متت مو من علّتي امن الإنتظار

يعني شكثر...للينتظر...وبجفنه دمعة عين
كلش صعب...عندي گلب...و مفارگه الحسين

ها تدروني ما تدروني
و بعلتي الكلفه تعوفوني

٢/أفتر واتلمس حيطاني
من حايط واركض للثاني
يرجعلي الصوت بأحزاني...وداع

ما بيهم رده ايردولي
لا وادم عنهم يحچولي
أقبل عنهم لو گلولي...وداع

جروحي أكبر من نعي وچلمة تعال
بلا جواب يصير يكتل كل سؤال
حيل تجرحني صفت چلمة دلال

صوت الدمع...ماينسمع...بس يهضم المشتاگ
مات الورد...من هالبعد...صار النفس حرّاگ

تثگل دمعاتي البعيوني
و بعلتي الكلفه تعوفوني

٣/لو طير يودولي بدمه
أقبل بس أسمع أي چلمه
واتخيل واصل من يمه....سؤال

ضليت بنوحي و آهاتي
يا هو اليسمعهن وناتي
للعتبه وترجع چلماتي...سؤال

لو خبر منهم يجيني أستراح
چان ودولي الرسايل بالرياح
عالأقل أشعر تذكرني اللي راح

صار العمر...حسره وجمر...ومعاتب ودمعات
وي كل فجر...أنذر نذر...يرجع حچي النسمات

چن ميته وما شيعتوني
و بعلتي الكلفه تعوفوني

٤/لو حنيت تهيج جروحي
و اكسر گلب الطير بنوحي
اتعذب چن طلّع روحي...الغياب

أكثر چلمه تأثر بيه
لو گالو هاي العلويه
خلوها بدمعتها و هيه...الغياب

آنه ذيچ الظلت اعليهم تنوح
لا مشيت وياهم و لا عندي روح
آه من الفرگه و اشكال الجروح

لبسي الچفن...و بلا وطن...چي ما خذاني وياه
عمري جرح...و بلا صبح... ليل و عذاب و آه

ولا گلتلهم عذبتوني
و بعلتي الكلفه تعوفوني

٥/يا هو اليسمعهن آهاتي
أطول من يومي وناتي
يخلص يومي تظل دمعاتي...جروح

وعيوني الملت شتّاني
ما ردلي الغالي الخلاني
مليت وملت أحزاني...جروح

ما أريد العافيه خلوني أموت
من أموتن گولو موّتها السكوت!
أرفع اجروحي صرت وي القنوت

هذا الهوه...ما بيه دوه...ما بيه عطر الاحباب
شتحسسه...شتنفسه...يخنگني كلّه اغياب

يا أهلي ارجوكم رحموني
و بعلتي الكلفه تعوفوني


*الشاعر الموفق علي عباس الربيعاوي*


رابط قصيدة "أذكر الغياب" :
https://youtu.be/gsAB884o1UA
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{شكرا جزيلا عباس}•

شُكراً جَزِيلاً عبَّاس مَا قَصَّرِت وَيَّانَه
صَاحِب فَضِل مَا نِنسَاكْ كِل شِدَّة مَا تِنسَانَا

١/بِالحُب إلَك هَالخِدَّام كِلْمَن يِمَثِّل دُورَه
وَاحِد كِتَب "يَا عبَّاس" وَاحِد رِسَملَكْ صُورَه
وِ الغَذِّتَك حُبِّ احْسِين مِطَّمِنَه اوْ مَسْرُورَه
مَشكُورَة أمَّك عبَّاس چِي جَابِتَك مَشكُورَه

وِ اللِّي يِنِكرَك عَبَّاس الله يِخَرْسِ الْسَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٢/مَا دَامَكِ انْتَ مَوجُود كِل حَاجَه مَا مَرجُوعَه
عِندَ الله رَاسَك مَرفُوع وِ احْچَايِتَك مَسْمُوعَه
إحْسِبنَا أيتَامِ احْسِينْ لمَّن غِزَتْهَا اللُّوعَه
نِتوَسَّلَك وِ امْچَلبِين بِچفُوفَكِ المَگْطُوعَه

وِ الحمدلله مَشْكُور كِلشِي بُقَه بِمْچَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٣/خَلِّينَا دُومِ احْنَا اوْيَاك يَالرَايِتَك خِيمَتْنَا
ظَلَّت سِتِر يَا عَبَّاس مَا فَرَّقِت لَمَّتْنَا
خِدَّامَكِ انْظَل وِ اليُوم نِتْوَحَّدِ ابْكِلْمَتْنَا
إحْرُمْنَا مِن كِلشِي اوْ لَا تِحْرُمنَا مِن خِدْمَتْنَا

لُو فَزَّعِتنَا عَالمُوت كِلمَن يِگِلَّك آنَه
صَاحِب فَضِل مَا نِنسَاكْ كِل شِدَّة مَا تِنسَانَا

٤/غَالِي اوْ سَلامَ الله اعْلِيكْ گَد مَا أخُوكِ اتْعَذَّبْ
گَد مَا نِزَف جِسْمَه اجْرُوحْ گَد مَا رقَيَّه تِنْحَبْ
غَالِي اوْ سَلامَ الله اعْلِيكْ وِ اعْلَى الخِيَامِ التِّلْهَبْ
انْحِبَّكِ ابْگَدِّ احْسِينْ وِ ابْگَد مَدَامِع زِينَبْ

حَرْگِ المُخَيَّم للآن بِينَا تِوِج نِيرَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٥/گُربَت مَوَاجِع عَاشُور مِن هَسَّه عِشْنَا ايَّامَه
هذَا اليِحَضُّر زِنجِيل هَذَا اليِحِدِّ القَامَه
بعَاشِر مُحَرَّم عَبَّاس مَا تِكْتِفِي اللَّطَامَه
شنِلطُمْ بَعَد مَا نِرتَاح إلَّا نِطَبرِ الهَامَه

عِشَّاگَكِ احْنَا وِ احْسِين هُوَّه العِشِگ عِنوَانَه
صَاحِب فَضِل مَا نِنسَاكْ كِل شِدَّة مَا تِنسَانَا

٦/عَلَّمنَا چَفَّك عبَّاس لِلغَالِي نرفَع رَايَه
بِالأربِعِينِيَّه انْرُوح ثَورَة عِشِگ وَفَّايَه
مُو كِلمَنِ ايْمُوتِ ايْعِيشْ وَ احْبَابَه تُبقَى اهْوَايَه
اهْوَايَه وِ شمَيْرِجعُون مَا تِنْقَصِ المَشَّايَه

دَربِ الوِفَه دَربَك صَار بَس عَالشَّرَف دَلَّانَه
صَاحِب فَضِل مَا نِنسَاكْ كِل شِدَّة مَا تِنسَانَا


*الشاعر الموفق السيد محمد المنصوري*


رابط قصيدة "شكرا جزيلا عباس" :
https://youtu.be/KFuli2l9Q_o
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{مشاي و متعني حسينك}•

مشاي ومتعني حسينك
هلا يالشايل رايه
خدام حسين امتانينك
هلا يالشايل رايه

بكل موكب نادينه -٢-
هلا يالشايل رايه

١/ كل سنه انتاني وجودك
وندعي من الله يعودك
بالمشي سر الخلودك...رايتك

عالم الخدمه خذاني
او نحسب أيام او ثواني
ننصب الموكب نتاني...جيّتك

يالجاينه الهذا المضيف العامر
و صوت اليخدمك كله صار و تامر

يالگاصد للجنه نشوفك
خير و طب للديره
والرايه من ترف بچفوفك
خير و طب للديره

والجيتك تانينه
بكل موكب نادينه
هلا يالشايل رايه

٢/ إنته أهم من كلشي عدنه
خطوة اجدامك عشگنه
وخدمتك صارت رزقنه...و نفتخر

يا هلا بجيتك يزاير
كلشي تطلب گلنه حاضر
او نفتخر بالخدمه باچر...بالحشر

شله بحياته الما خدم لحسينه
و بأربعين النوح يفرش عينه

سجلك موقف يبن آدم
باچر يم الزهره
بالمحشر أعمال العالم
باچر يم الزهره

لخطواتك حنينه
بكل موكب نادينه
هلا يالشايل رايه

٣/ خدمتك يالتمشي واجب
كل سنه تشوف العجايب
الخيم صارت مواكب...كربلا

ويّه زينب عدنه غايه
ننتظر جيت السبايه
الكم بكل خطوة رايه...يا هلا

فوگ السمه مكتوبه هاي الكلمه
خدمة الزاير عدنه أعظم نعمه

مكتوبه بدمعة خدامك
شكراً يبن الزهره
ردينه و نخدم بيامك
شكراً يبن الزهره

شرفنه او مُر بينه
بكل موكب نادينه
هلا يالشايل رايه

٤/ بخيمة حسين الچبيره
ننجمع مثل العشيره
بانتظارك ديره ديره...بس تجي

الأي أمر سمعاً و طاعه
والكرم عدنا شجاعه
بخدمتك بس الشفاعه...نرتجي

يالسفرتك صارت نهر مو سفره
يا هو المثلك شانه عند الزهره

هنيالك يالتمشي بغايه
ومحد يوصل قدرك
بچفوفك محلاها الرايه
ومحد يوصل قدرك

العباسك وحسينه
بكل موكب نادينه
هلا يالشايل رايه

٥/ بكل درب تلگونه يمكم
لو عطش مر بضعنكم
ننذر ادموع العطشكم...يا عذب

عفنه البيوت او إجينه
مقصرين اشما حچينه
باربعينك لو بچينه...ننتحب

ويلاه يضعن الشام من رد شيّب
وياها روس اخوتها ردّت زينب!

ردو للطف أهل الغيره
روس اوياهم ردت
زينب يم گبرك و بحيره
روس اوياهم ردت

وتگلك ردينه
بكل موكب نادينه
هلا يالشايل رايه


*الشاعر الموفق مصطفى العيساوي*


رابط قصيدة "مشاي و متعني حسينك" :
https://youtu.be/P-5NA9XbOZ4
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________