*{شاء الله}*

١/ مَدْرِي جرُوحَكِ شْگَد الله يِعْلَمْ
يَالكِلْ حَسْرَة مِنَّكْ غِيمَة مِنْ دَمْ
وَ اشْلائَكِ اهْوَايَه صَعْبَة تِلْتَمْ

جَسَدْ مِنْ غِير رَاسِ اوْ خَالِي نَحْرَه
وِ الخُنْصُرِ بچَفَّكْ خَلَّه ثَغْرَه
طِحِتْ وِ النَّاسْ صَاحَوْ رِضَّوا صَدْرَه

وَيْ كِلْ حَافِرْ...صَدْرَكْ يَامِرْ
رَضْ يِكْرِمِ لْخُطَّارَه
جُوفَك ضَامِي...نَحْرَك دَامِي
وَجْهَك تِشِعّ انْوَارَه
بِين أيْتَامَكْ...نَارِ خْيَامَكْ
نَظْرَاتَكِ المِحْتَارَه

وِ خيَامَكْ...بِعِيدَه
وِ عيَالَكْ...وَحِيدَه

٢/تُرَابِ الصَّحْرَه بِيكِ هْوَايَه عَايِلْ
و جِسْمَكْ يَا تُرَى شْچَمْ نَبْلَة شَايِلْ
گَدْ مَا وَصِّلُولَكْ مِنْ رَسَايِلْ

مِنْ يِمْشِي الضَّعَنْ بِينِ المِنَايَا
عيَالَكْ مَا تِظَلْ وَيَّاهَا رَايَه
شَاءَ الله يَرَاهُنَّ سَبَايَا

ضَعْنَكْ يِبْعِدْ...صَمْتَكْ يِرْعِدْ
حِزْنَكْ بِدَا رَبِيعَه
طَفَّكْ شَاهِدْ...عَنْ كِلْ وَاحِدْ
عَهْدَكْ رُفَضْ يِبيعَه
لِيلَكْ ذَابِلْ...ضَيِّ الكَافِلْ
طَايِحْ عَلَى الشِّرِيعَه

بروحَكْ ظَلْ...أمَانَة
مَا يِنْسَدْ...مَكَانَة


*الشاعر الموفق إيهاب المالكي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________________
رابط قصيدة "شاء الله":
https://youtu.be/fdRFkDu0wuY
_______________________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________________

*{ما شفت الخير يا عمه}*

يا محنتي...ومحد يحس بحالتي
بس انت يالمهدي
بهاي البشر...و عيونك و ذاك النَّحر
محد بچه بگدِّي

مِن شفت الخيل ملتمّه
ما شفت الخير يا عمّه

١/ من يمر طاري البچي تلگه زينب بالحچي
كلشي زينب...يعني أنحب...يعني غربه
و انت يالمهدي التون الوجه الآخر للحزن
يشهد التل...آنا مقتل...وانت ندبه

صار ألف عام و تبچي من الحافر
بس انا شفت بعيني يوم العاشر
شفت الحسين و ريت أبد ما شفته
چان الحسين و شفته مدري شصاير

أهلي مشو...ما عندي بن ما عندي اخو
و الينولي يعاتب
العاشر أخذ...بس المعدَّل و الكَفو
من بيت ابو طالب

مو شفت الماي مو نعمه
ما شفت الخير يا عمه

٢/ آنه ميته من قبل و عايشة بس بالشكل
الموت إجاني...من إجاني...حسين وحده
راح عباس اعرفت اهنا يبو صالح متت
راح طولي...يعني اصلي...الليله گعده

عباس گلبي و چان كلشي بعمري
مو عالنهر عمك مكانه بصدري
اليمسح أثر رجليه من چنت امشي
ما أعتقد يقبل أنام بگبري

چفه وگع...بس وگعت اعليه السمه
و حتى السمه تنحب
متنه سوه...عباس حتى بالشعر
إسمه وي اسم زينب

من شفت الجود مو يمه
ما شفت الخير يا عمه

٣/ حسين هدّ إيدي وطلع ،وطلع گلبي من الوجع
يا بو صالح...گلّي رايِح...و ما رِجعلي
بين ميْقاتِل سِكَت و عيني وحّدها بچت
طاح طيحه...و هيّه صيحه...رِگضو يَهْلي

مو طاح جدّك وحّده من مهره
برماح دفعوهِ و وگع عالغبره
سحگوه مرْتين و سمعت الحافر
مرّه يدوس بصدره مرّه بظهره

جدك علي...ناداني عمه استعجلي
خل نترُك الخيمه
وادم إجت...ما عدها حظ ولا بخت
و ملگانه بالهيمه

من شفت النار متقدمه
ما شفت الخير يا عمه

٤/ رگضه چانت موتتي هيّه للتّل روحِتي
من شِفِتْهم...أهلي كِلهُم...عالترايب
ضيعتني كربله بين شمر و حرمله
براس أخويه...وابن ابويه...صرت اعاتب

فجر اهدعش يالمهدي فوگِ الناگه
طلعت الما ويّه الزلم تِتلاگه
يمهم و صحت بصوت يهلِ الغيره
من هسه زينب يخوتي مشتاگه

دربِ العِسُر...ما چان ابد دربِ اليسر
بي ميِّته هوايه
بذاك القصر...أصعب ألم شفتِ الشمر
من مزَّگِ الرّايه

شفت الديوان و الزحمه
ما شفت الخير يا عمه

٥/ الله كاتبلي الحزن و ارد بالشام اندفن
أبقى وحدي...وحتى ولدي...ماكو يمي
حتى يبقالي ذكر بيدك اكتب عالگبر
إسم زينب...عوف زينب...الفاگده اسمي

و لو رحت يم حسين ليلة جمعه
من متني إخذ وياك و ادفن قطعه
و تاخذ عباتي اوياك عند العباس
بس هيه تگدر شوف عينه ترجعه

و مني إخذ...العبد الله ماي و شرّبه
من يگعد يشوفك
بماي الغسل...اثياب العزيز امترّبه
غسلها بچفوفك

و يمهم لتگول هالكلمه
ما شفت الخير يا عمه


*الشاعر الموفق حمزة السماوي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
رابط قصيدة "ما شفت الخير يا عمه":
https://youtu.be/kGygGejst4I
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

*{تمنيت}*

تِمَنِّيت...أزورِ اللِّيلَة سَامرَّة
وِ الأنفَاسْ...تِتنَفَّسْ هَوَى الحَضرَة

١/روحِي تِتْمَنَّة تِشِمْ رِيحَة تُرُبْهُمْ
شوگِي أوْسَع صَارْ وَ اطْوَلْ مِنْ دَرُبْهُمْ
الله يِعْلَم مِن كِثُر مَا صِرْتَ احِبْهُمْ
تِلْمَعِ ادْموعِي مِثِل لَمْعَةْ گُبَبهُمْ

وِ الفرَاگْ...مِحْبَسْ ضَيَّعِ الشَّذْرَة
وِ الأنفَاسْ...تِتنَفَّسْ هَوَى الحَضرَة

٢/لَهفِتِي لَحْبابِي مِن يُوصَف ألَمْهَا
چَنْهَا كِلْمَةْ أخْرَسِ اوْ مَحَّدْ فِهَمْهَا
بلايَه حُبْهُم هِيبِتِي يِزْغَر حَجِمْهَا
كِل مَنارَة تِفْخَرِ ابْهِيبَةْ عَلَمْهَا

بِالعْيُون...إلْهُم بَيِّنَتْ حَسْرَة
وِ الأنفَاسْ...تِتنَفَّسْ هَوَى الحَضرَة

٣/وَصِّفَوا لِبْنِ الحَسَنْ سِرْدَابَة جَنَّة
اتْمَرْكَزِ ابْأربَعْ مَرَاقِدْ يِحْتِوَنَّة
مَرْقَد أمَّه و عَمِّتَه وِ الهَادِي وِ ابْنَه
و ألِفْ هِنْيَالَه الگُصَدْ وِ اسْتَقْبِلَنَّه

وِ اليْزُور...بِيهُم يِعْتِلِي قَدْرَة
وِ الأنفَاسْ...تِتنَفَّسْ هَوَى الحَضرَة

٤/السَّيِدَة نَرْجِسْ لَوَنْ أوصَلْ لَحِدْهَا
مَا أرِد إلَّا و أشِمْ رِيحَة وَلَدْهَا
وِ الدّعَاءِ الفَرَجْ أقْرَا و مِنْ بَعَدْهَا
أگصِدِ العَمْتَه حَكِيمَة و أدْعِي عِدهَا

البُعُدْ طَالْ...يَرَبِّي عَجِّلِ بأَمْرَه
وِ الأنفَاسْ...تِتنَفَّسْ هَوَى الحَضرَة

٥/ألِف هِنيَالَه الگُصَد حضْرَة إمَامَه
فاطِمَه تجَازِيه وِ اتْرُفعَه لْمَقَامَه
مُخْتَصَر موضُوعِي عَن هَايِ الخِدَامَه
بغِير أهْلِ البِيتْ مَا عِدْنَه كَرَامَه

وَ لَيْضِيعْ...تَعَب كِلْمَنْ أخَذْ أجْرَه
وِ الأنفَاسْ...تِتنَفَّسْ هَوَى الحَضرَة


*الشاعر الموفق السيد محمد المنصوري*


رابط قصيدة "تمنيت":
https://youtu.be/IQ8fRu4cj_U
_______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________________

*{شكرًا أبا عبد الله}*

شكرًا أبا عبد الله فضلك أبد ما أنساه
ممنون منك
وياك أخدم شهرين شكرا احسين اعلى حسين
ممنون منك
سنه شطول السنه
و بديت اشتاگ أنه

١/ يا حبيبي خلصن الشهرين ركضه
و نقص عندي بخدمتك رايد أعوضه
شلون أنسه ايامك و يا روح ترضه
انته هم شايف إمام و ينسى فرضه

ما ريد كلمة مأجور ، يحسين انته المشكور
خليتني اخدم
هذا الرزق يا مولاي أتذكرك وكت الماي
خليتني اخدم
واذا ظهري انحنه
و بديت اشتاگ أنه

٢/ أنه عبدك و ابن عبدك منك و ليك
لا إراديه امن ازورك بويه اناديك
اي و حگ الوگفت اعله التل تحاچيك
امقصر بگد شعر راسي و ما أجازيك

يحسين إرزقني احساس و رجعلي يوم العباس
بس رايد أبچي
رجعلي عاشر عاشور مو حلوه اظل مو مطبور
بس رايد أبچي
العمر ما أمنه
و بديت اشتاگ أنه

٣/ محد اتفضل عليه غير فضلك
ما أضم شي عنك و كلشي أگلك
لو أدور الدنيا كلها ماكو مثلك
إرزقني يا مولاي أشم تراب رجلك

مولاي غيرك ما ريد دمعة إلك تسوى العيد
يا عين زمزم
يمبچي حتى القرآن بس اليحبك إنسان
يا عين زمزم
ولو عمري انفنه
و بديت اشتاگ أنه

٤/ ريت الايام لبداية صفر ترجع
وصوت تنصيب المواكب ابقه اسمع
عيني مو عيني اذا ما تبقه تدمع
[طلعَ البدرُ علينا] الحسره تطلع

عيشني جرحك كل يوم يمك و منك محروم
آه يا عشگنه
بدمعة فرح اتلگاك والزهره ابد ما انساك
آه يا عشگنه
الگلب مستوطنه
و بديت اشتاگ أنه

٥/ ردلي ايام المشي يحسين اليه
بيتي ما ينطب اذا ما بيه عزيه
مو قصورًا بالليالي الفاطميه
بس شهر عاشور احسه ايعيش بيه

مشاي لو ارجع كون امشيلك آنه الممنون
و رجلي اعلى راسي
عافيتي أسهر بالليل يعيوني يا عطر الهيل
و رجلي اعلى راسي
الوعد ما ضامنه
و بديت اشتاگ أنه


*الشاعر الموفق حمزة السماوي*


رابط قصيدة "شكرًا أبا عبد الله":
https://youtu.be/4bp7CJqAojc
_______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________________

*{كل مغربية}*

كِل مُغرِبِيَّة...أرفَع إِدَيَّة
يَا رَبِّي طَالَت غِيبَةَ احْبَابِي عَلَيَّه

١/ أوگَفْ عَلَى البَابَ انْدِعِي مِنْتَظْرَه چَمْ دُوبْ
دَعْوَة غَرِيبَة امْفَارِگَه اسْبَعْطَعَشْ مَحبُوبْ
وَ انْذُر وَرِد لو عَاوِّدَوْا أزْرَع بِالدْرُوبْ
وِ اسْبَعْطَعَشْ مَرَّة انْعِمِي لُو صَارِ الغْرُوبْ

گَلبِي تِعَذَّبْ...يَا يُمَّه زِينَبْ
چَمْ يوسِفِ بْيوسِفْ رِحَلْ وَيَّاچ إلِيَّه
يَا رَبِّي طَالَت غِيبَةَ احْبَابِي عَلَيَّه

٢/ بَابِي لَوَن هَزَّه الهَوَى گَلبِي يِشِلْعَه
چَنْ هَذَا صوتِچْ وِ الگُمَرْ عَبَّاس اسِمْعَه
وَ اعْثَرْ وَ اطِيحِ اعْلَى الوَجِه وَ انْهَضْ مِسِرْعَه
يُمَّه وَ اصِيحَنْ يَا هَلَا برِيحَةِ البَضْعَه

وَ ارْكُضْ عَلَى البَابْ...مَا ألگَه الاحْبَابْ
ظَهرِي انْكِسَر يَا زِينَبِ شسَوِّيتُوا بِيَّه
يَا رَبِّي طَالَت غِيبَةَ احْبَابِي عَلَيَّه

٣/ كِلْ مَا أشِدَّنْ مَعْصَبِي تِنْفَلْ عُگُدْتَه
يَعْنِي الضَّعَنْ مَيْرِدْ بَعَد مَاتَانِي جَيْتَه
رَبِّي قَبِل هَذَا الخَبَر أتْمَنَّى مَيْتَه
يَعْنِي أبُو فَاضِلْ وِگَعْ وِ مْضَيِّعِ اخْتَه

زِينَبْ سِبُوهَا...و مَذْبُوح اخُوهَا
وِ چفُوفْ أبُو فَاضِل عَلَى الشَّاطِي رِمِيَّه
يَا رَبِّي طَالَت غِيبَةَ احْبَابِي عَلَيَّه

٤/ أمَّنْ يُجِيبُ أنْدِعِي الغَالِي يِجِينِي
و لَنَّه إبِن حَذْلَمْ إجَه مَمْصَدْگَه عِينِي
عَنْ وِلْدِي خَبَّرْنِي و يِگِلِّي سَامِحِينِي
گِتْلَه عَلَى حْسِينْ أسْئَلَكْ مُو عَن بِنِينِي

مُو عَنِّ البْنِينِ...أسْئَلْ عَلَى حْسِينْ
فِدْوَه بِنِينِي الأرْبَعَة لِبْنِ الزِّچِيَّه
يَا رَبِّي طَالَت غِيبَةَ احْبَابِي عَلَيَّه

٥/ امْنِ الدِّنْيَا مِنْ بَعْدِ المِشَوْا مَا أرْجَى كِلْشِي
اتْمَنِّيتْ أبُو فَاضِلْ يِجِي يشَيِّعْلِي نَعْشِي
وِ حْسِين ارِيدَه اوْيَ النَّعَشْ گِدَّامِي يِمْشِي
مُو مَايْ يَا زِينَب دَمِعْ بِتْرَابِي رِشِّي

أَهْلِ الجَنَازَة...عَازَتْهَا عَازَة
و لَا زِينَبِ اليَمِّي وَ لَا سِكْنَه و رُقَيَّه
يَا رَبِّي طَالَت غِيبَةَ احْبَابِي عَلَيَّه


*الشاعر الموفق ناجي العتّابي*


رابط قصيدة "كل مغربية":
https://youtu.be/eahuIS7e5ms
_______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________________

*{ما هجرتك}*

ما هجرتك و انتظرتك
دمعه دمعه و يخلص الليل ابغيابك
گلبي ذايب جيت اعاتب
عذّبتني و الدمع يحله بعتابك

١/ جارحني لا مو عن قصد بس المهم جارحني
بغيابك اتنفّس عتب لو عاتبت سامحني
سهمك يدگ ويّه النبض ما يقبل يبارحني
نايم أون گاعد أون وتزاعلن جفن وجفن
يالمهدي ذابحني الحزن هالبت تجي تفرّحني

آنا أنشد وانت تبعد
خطوه خطوه ومتله گلبي بعذابك
ارجع ارجع كافي مدمع
مرمرتني والدمع يحله بعتابك

٢/ خو تدري نظرات الحقد تتعارك بدلالي
نظرة برمح نظرة بسهم والكل صُبَح چتالي
ما ترجع و كافي السفر طال السفر يالغالي
يالما تمر يمته تمر يالمهدي وغيابك جمر
لو انت يحلالك هجر صدگني ما يحلالي

جفني ساهر و أبقى ناطر
وينه باچر ظامي واتنطر سحابك
ها يمهدي هذا حدي
ضيعتني والدمع يحله بعتابك

٣/ حنيت الك حنّة نهر وتفارگ وي الجاري
ونيت الك ونّة وِسف وتعثرت باعذاري
وادري دريت بمحنتي لكن گلت ما داري
كل باب اشوفنه صحت ويلي على الزهره وطحت
يالمهدي ليش تأخرت ظل بالصدر بسماري

وينه چفك بيش احلفك
يا حبيبي لحظة خليني بحسابك
عمري عفته وينك انته
يالعفتني والدمع يحله بعتابك

٤/ ردتك تجي ويه الدمع حتى الدمع يحچيلك
حسبالي عني من رحت وياك تاخذ ليلك
چم شمعة غطّت بالنهر چم طارش موديلك
ردتك تجي ويه الصبح تتصابح بآخر جرح
سامحني يالوجهك سمح مشتاگه اون و ابچيلك

وانا روحي ويه روحي
عودتها تشتعل شمعة على بابك
وابقى تالي هذا حالي
شيبتني والدمع يحله بعتابك

٥/ مرات ارش بابي وگلت ها هسه يرجع ليّه
ومرات اگولن ما يجي ما ظن بعد لي جيّه
وازعل واروح لكربله يم ريحة المسبيّة
عندچ يا زينب يا خبر ضاع الامر شو ما ظهر
عمري خلص هم وقهر ابقى انتظر ليليه

وابچي من دم بالمخيم
من اذكرك اشعر بدمعة مصابك
دمعي يجري وانا ادري
سامحتني والدمع يحله بعتابك



*الشاعر الموفق السيد عبد الخالق المحنه*


رابط قصيدة " ما هجرتك " :
https://youtu.be/6zc2yiahij8
___________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

*{يزينب خدمكم}*

١/ وعدنه يزينب ... واجينه ... ابمواكبنه اعله هذا الوعد
خدمكم ... نصيح وننادي ... تعاهدنه ونضل عالعهد
طلعنه ... المشاعر عشگنه ... وضمايرنه على المعتقد
يزينب ... أبد مانسينه ... وله انعوفچ يزينب أبد

يازينب خدمكم يازينب

٢/ وحگچ ... يبنت الزچيه ... خدم وانتي تأمرين أمر
مشينه ... ابدربكم يحره ... على الدنيه نضل نفتخر
ميمحون ... ذكركم والاشهود ... خطابچ كل وكت ينتصر
لگينه‌ ... خدمتچ يزينب ... أعز من الهوه والعمر

يازينب خدمكم يازينب

٣/ مواكب ... مجالس مئاتم ... ومثل صرخه و تضل تعتلي
فخرنه ... ابشعائرنه هايه ... نعاند بيهه كل عادلي
هتفنه ... ابشرف رافضيه ... علي مانرضه غيره ولي
تعبنه ... التعب عدنه راحه ... وحگ الزهره فدوه العلي

يازينب خدمكم يازينب

٤/ لجلكم ... يحره انخلقنه ... ابولاكم حتى گلب اليدگ
نحبكم ... نموت اعلى حبكم ... بعد عنكم چذب نفترگ
خطيه ... تره الما هواكم ... هواكم هو أصل العشگ
تره الحب ... وهم أغلبيته ... فقط حبكم يزينب صـدگ

يازينب خدمكم يازينب

٥/ أملنه ... وسندنه بالاحساب ... چبير وداعة الله الامل
وجهنه ... تبيضه الموده ... نودكم أكثر امن الاهل
دربكم ... هدى وكله رحمه ... بلياه العقل ماقبل
يزينب ... هويتنه باچر ... ختم خاتمهه خير العمل

يازينب خدمكم يازينب



*الشاعر الموفق السيد علي الموسوي*



قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
رابط قصيدة " يزينب خدمكم " :
https://youtu.be/bQHO7s59Dk8
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

•{تانيتكم}•

يالمَا عَلِيكُمْ هَانَتِ العِشْرَة
وَ ادْرِي المَحَنَّه العِدْكُمِ بكَثْرَة
چَا شُو گِطَعْتُوا بگَلْبِي هَالمَرَّة

١/تَانِيتْكُم جَيَّةْ هَوَه اعْلَى احْسَاسْ وَاحِدْ مَخْنُوگْ
تَانِيتْكُم مِنْ كَرْبَلَه الحَدْ بَابْ گلبِي المَحْرُوگْ
لِيلِيَّه مِنْ گَدْ مَا أحِنْ توجَعْنِي روحِي امْنِ الشُّوگْ
و طَبْعِ اليِحِنْ مَا يِسْتِقِرْ لُو بَابَه ظَلْ مَا مَدْگُوگْ

يَالمَا شِفِت مِنكُمْ و لَا جَيَّه
بَسْ بِيكُم ادْرِي هوَايْ حِنِيَّه
حَسِّيت رُوحِي ابْرُوحِي چَمْ كَسْرَة
چَا شُو گِطَعْتُوا بگَلْبِي هَالمَرَّة

٢/تَانِيتْكُمْ وِ اليِنْلِچِمْ مَعْذُورْ يُبْقَه ايْتَانِي
غِير ادْرِي مِنْ طَبْعِ الأهَلْ وَاحِدْ يِحِن عَالثَّانِي
ابْگَد مَا شِفِت بِيكُمْ عطَشْ مِشْتَاگَتِلْكُمْ آنِي
وَ ادْرِي بطَبُعْكُمْ كِلْ وَكِت مَا بِيكُمِ اليِنْسَانِي

ابْگَد مَا رِدِتْكُم عِينِي مَا نَامَتْ
عِشْرَة عُمُر وِ العِشْرَه مَا دَامَتْ
عِشْنَا العُمُر عَالحِلْوَه وِ المُرَّه
چَا شُو گِطَعْتُوا بگَلْبِي هَالمَرَّة

٣/حَاچِيتْكُمْ بَسْ مَا شِفِتْ مِنْكُمْ بَعَد چِلْمَة رَدْ
وَ ادْرِي الحَچِي مِنْ يِنْحِسِبْ مِنْ طَرَفْ وَاحِدْ يُبْرَدْ
يَالنَّايْمِينِ اعْلَى الرَّمُلْ نُومِ الرَّمُلْ مَا يِنْوَدْ
و ظَلْ گَلْبِي مُو كِلِّشْ گَلُبْ مِثْلِ اليِظَلْ مَالَه احَّدْ

حَاچِيتْكُمْ بَسْ مَا وُصَلْ صُوتِي
بَسْ حَلَّفِتْكُمْ يُمَّه بِمْرُوتِي
مِنْ تِگْضِي حَسْرَة تِبْتِدِي حَسْرَة
چَا شُو گِطَعْتُوا بگَلْبِي هَالمَرَّة

٤/سَكْتَه الدُّرُوبِ بكِلْ وَكِتْ وِ اللِّيلْ مُو صَاحِبْ رَايْ
ابْگَدْ مَا بِچِيتِلْكُمْ گِمِتْ أخْتِنِگْ مِنْ أشْرَبْ مَايْ
لُو حَرَّكِ ابَّابِي الهُوَه حَسْبَالِي رِيحَتْكُمْ هَايْ
بِفْرَاكُمْ حَتَّى السَّهَر خَلِّيتَه يِسْهَرْ وَيَّايْ

ظَلْ كِلْشِي بَارِد مَا عَدَه احْسَاسِي
و مِنْ ضَيَّعِتْكُمْ ضَاعَتَ انْفَاسِي
وِ عْيُونِي مِنْ گَدِّ السَّهَرْ حَمْرَه
چَا شُو گِطَعْتُوا بگَلْبِي هَالمَرَّة

٥/لِيلِيَّه ادَوُّرْكُمْ حِلِم وِ اعْيُونِي تِرْكُضْ عَالطِّيفْ
وَ الْگَاكُمِ اگْبَالِ العُطَشْ بِشْفَافْكُمْ صَفْنَةْ صِيفْ
يَالمِنْ مَحَنْتِي الكَرْبَلَه وَ آخِرْ وَطَنْ چَانِ السِّيفْ
وِ انْتُمِ ضيوفِ ابْكَرْبَلَه بَسِّ انْسِحَگْ صَدْرِ الضِّيفْ

وَ احْلَامْكُمْ كِل مَا تِجِي بعِينِي
ألْگَه الحَوَافِر تِسْحَگِ اسْنِينِي
وِ احْسِينْ هُوَّه ابْحَالْتِي أدْرَه
چَا شُو گِطَعْتُوا بگَلْبِي هَالمَرَّة

٦/كِلْمَا تِجِي ابَّالِي الخِيَمْ أرْسِمْ نَهَر مَا بِيه نَاسْ
وَ اتْخَايَلْ أرْسِمْ كَرْبَلَه وِ اصْدُورْكُمْ بِيهَا انْفَاسْ
وَ ارْسِمْ رُقَيَّة امْنِ الخِيَمْ شَايِلْهَا يِطْلَع عَبَّاسْ
و عَبْدَ الله مَا رَاضِعْ سَهَمْ وِ امْبَلِّلَه اشْفَافَه حْسَاسْ

مِنْ أرْسِمِلْكُم خِيمَه يَمْ بَالِي
ابْخِيمَةْ رُقَيَّة العُطَشْ يِبْرَالِي
و مَا أرْسِمِ احْسِينِ ابْكَسِرْ ظَهْرَه
چَا شُو گِطَعْتُوا بگَلْبِي هَالمَرَّة

٧/كِلْمَا شِفِتْ يِمْشِي العُمُر أدْرِي العُمُر مُو مَرْتِينْ
هُوَّه العُمُر مَرَّه و خُلَصْ مِنْ لَمَّوِ افْرَاشِ احْسِينْ
مِنْ گَالَوِ بْلِيلِ اهْدَعَشْ مَا بِينْ عَبَّاسِ اوْ بِينْ
زِينَبْ عَلَى التَّلْ وِ النَّهَرْ ظَلْ مِسْتِحِي امْنِ الچَفِّينْ

مِنْ گَالَوِ العَاشِرْ بِدَه اعْلِيكُمْ
غَمَّضِتْ عِينِي اوْ گِمْتَ احَاچِيكُمْ
و مِنْ خِيَمْ زِينَب رِدِتْ چَمْ جَمْرَه
چَا شُو گِطَعْتُوا بگَلْبِي هَالمَرَّة


*الشاعر الموفق محمد العقابي*


رابط قصيدة "تانيتكم":
https://youtu.be/mFvwuruIO2s
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane

•{سجلينا}•

سجِّلينـا
بــينَ نَـــاعٍ ، بـَــينَ رَادُودٍ ولاطِــمْ
سجِّلينـا
في كِتابِ العِشْقِ"خُدَّاماً لفاطِم"

١/فاطمٌ والكَوْنُ يرجو منكِ لُقْمَهْ
بدّدي بالنُّــورِ يا زهــراءُ عتْمَهْ
في الورى قَدْ بُعِثَ المُختارُ رَحْمَهْ
أيُّ سرٍّ فيكِ حتّى كُنْتِ أُمَّهْ؟!

ويلُ قومٍ
هاجموا دارَ المعالي ، والمكارِمْ
ويلُ قومٍ
ما درَوا في العرشِ "خدّاما لفاطمْ"

٢/بِكِ قَبْلَ الخلقِ قرَّ الأنبياءُ
كَيْفَ يحْويكِ تُرابٌ أَوْ سماءُ؟
دونَ معناكِ يتيهُ العُقلاءُ
أنتِ ماءُ الماءِ للضَّوْءِ ضياءُ

حاربوها
بَعْدَ عِلْمٍ أنَّها غَيْبُ العوالِمْ
حاربوها
فَنَصَبْنا الحُزْنَ "خُدّاماً لِفاطِمْ"

٣/كَيْفَ ننسى المحسنَ المقتولَ عصرا؟!
كَيْفَ لا نلعنُ رِجْساً قَدْ تَجرّا؟!
ما وَفَيْنا إِنْ نُقِمْ حُزْنَكِ عشْرا
ربِّ وفِّقنا للَطمِ الصَّدْرِ دَهْرا

كمْ عيونٍ
ليسَ تبكي لَنْ ترى في الحشرِ راحِمْ
كم عيونٍ
صنَعتْ بالدَّمِعِ "خُدّاماً لِفاطِمْ"

٤/ضلعُكِ المكسورُ نهْجٌ وقضيَّهْ
فهْوَ قُطْبٌ للأصولِ الرّافضيّهْ
قَدْ رفعْنَاهُ شعــاراتٍ أبــيّه
أَلْفُ "كلاّ" يا شيوخَ الناصبيّهْ

أرفضوهم
منْ يعادي ضلعها حتّى العمائمْ
أرفضوهم
وارفعوا الأصواتَ "خُدّاماً لفاطِمْ"

٥/فاطمٌ جئناكِ يا أُمّاهُ ولْدا
فاحضنينا إنّنا نرجفُ برْدا
أَشْبعي أَرْواحنا حُبّاً وودّا
كبّرينا لابْنِكِ المهديِّ جُندا

بانتظارٍ
كيْ نزورَ القبرَ أنصاراً لقائِمْ
بانتظارٍ
أنْ نلبِّي الثَّأْرَ "خُدّاماً لِفاطِمْ"

٦/في سماءِ الطُّهْرِ طِرْنا كالنّوارسْ
ما درسنا الحبَّ يوْماً في المدارسْ
إنَّها فطْرتُنا الأولى كـ(عابسْ)
ولذا نُدعى مجانينَ المجالسْ

عَرِّفينا
أنَّ سرَّ اللهِ في هذي المآتِمْ
عَرِّفينا
كيْ ننالَ الفَوْزَ "خُدّاماً لفاطِمْ"


*الشاعر الموفق علي عسيلي العاملي*


قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
رابط قصيدة "سجلينا":
https://youtu.be/UZxIy5ua044
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{عايفني و رايح}•

رَايِحْ عَايِفنِي اوْ رَايِحْ
وَاضِحْ مَا تِرْجَعْ وَاضِحْ

وِ الچَانِ بخِيرْ بَعْدَكْ ضَيَّعْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

١/سِرّ...مَنْ رَأى وَجْهَكْ...مَحَّدِ ايْشِبْهَكْ
أرْبَعِينَكْ كِلْهُمِ انْتَه
يَمَّكْ...يِسْتِقِرْ حَالِي...تِدْرِي يَالغَالِي
عُمْرِي چِي بِيه إنْتَ عِشْتَه

و الله يَا بُويَا ضِعِتْ دَمْعَه ابْمُطَرْ
ثَارِي فَگْدَكْ هُوَّه كِسْرَانِ الظَّهَرْ
العَسْكَرِي اوْ مِنْ إسْمِي يَا بويَا ابْجِفَاكْ
عَسْكَرِ اهْمُومِي يِجِينِي بكِلْ سَهَرْ

وِينَكْ مِحْتَاجَكْ وِينَكْ
عِينَكْ مِشْتَاگِ العِينَكْ

لَتْظِنْ يِرْتَاحْ گَلبِي الفَارَگْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٢/تِذْكُرْ...مِنْ چِنِتْ يَمِّي...لُو صِحِتْ بِسْمِي
أَرْكُضِ بوَاهِسْ حَمَامَه
بحُضْنَكْ...إنْتَه تَاخِذْنِي...و مِنْ تِلَعِّبْنِي
اتْصِدْ عَلَيَّه بِبْتِسَامَه

رَغُمْ عِشْنَه بدِيرَه غُرْبَه بهَالزَّمَنْ
چَانَتِ اعْيُونَكْ إلِي أكْبَرْ وَطَنْ
بَعْدَكِ المَنْ عَايِشِ اوْ گَلْبِي يِدِگْ
وِ الهَوَه التِتْنَفَّسَه الرِّيَه انْدِفَنْ

وَحْشَة مِنْ بَعْدَكْ وَحْشَة
عِشَّه طِيرِ ابْلَا عِشَّه

يَا غُصْنِ الخِيرْ طِيرَكْ حَيَّرْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٣/غُرْبَة...چِنْتَ احِسْ تِشْتَدْ...وِ الحِزِنْ يِصْعَدْ
مِنْ يِوَدُّوكِ اعْلَى سِجْنَكْ
وَحْدِي...أگْعِدَ ادْعِيلَكْ...بويَه وَ ابْچِيلَكْ
يشَيِّبِ بْكِلْ مُغْرِبِ ابْنَكْ

بِيتِي مِنْ دُونَكْ تَرَى مِثْلِ السِّجِنْ
وَ انْضُرُبْ كِلْ لَحْظَة بِسْيَاطِ الحِزِنْ
تِدْرِي وِ السَّجَانْ إسْمَه الإشْتِيَاقْ
و أبَدْ مَا يِرْحَمْ گَلُبْ لَمَّنْ يِحِنْ

ذِكْرَة تُوجَعْنِي الذِّكْرَة
فَتْرَة مِتِّ ابْهَلْ فَتْرَة

بدُونَكْ مَسْجُونْ كِلْ عُمْرِي العِشْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٤/يَمَّكْ...آخِرَ انْفَاسَكْ...آنَه يَمْ رَاسَكْ
وِ الدَّمِعْ بِخْدُودِي يِچْوِي
چَبْدَكْ...فَتِّتَاهَا السَّمْ...گبَالِي تِتْأَلَّمْ
و كِلْشِي مَا بِيدِي أسَوِّي

مِنْ عِرَگْ بُويَه جِبِينَكْ وِ ارْجَفِتْ
بِيهَا طِلْعَتْ روحِي لَمَّن غَمَّضِتْ
وِ اللِّي يَمْنَه احْتَارَوِ ابْسَاعَتْهَا حِيلْ
مَا دِرَوْ هُوَّه انْتَ لُو آنَه المِتِتْ

مَاتَتْ رُوحِي آنَه المَاتَتْ
رَاحَتْ وَيْ رُوحَكْ رَاحَتْ

أقْسَى امْنِ المُوتْ مِنْ يِمْشِي الرِدْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ

٥/لَمَّنْ...آنَه شَيَّعْتَكْ...و عَالمَتِنْ شِلْتَكْ
أمْشِي وِ الهَمْ يِمْشِي ويَّايْ
صُورَة...مَرَّتِ ابَّالِي...بَهْذِلَتْ حَالِي
امْنِ النَّعَشْ حِيل أثْگَلِ اهْوَايْ

لَنِّي شِفْتِ احْسِينْ جِسْمَه بَسْ نَبِلْ
تلَتِّ ايامِ اعْلَى التُّرُبْ وِ بلَا غسِلْ
رَاسَه بَسِّ اتْشَيَّعِ بدَرْبِ السَّبِي
اعْلَى الرُّمُحْ تَشْيِيعَه وِ اخْتَه اعْلَى الهِزِلْ

حسِينِي امْنِ اذْكَرْتِ حسِينِي
عِينِي مَا سِكْتَتْ عِينِي

بُويَه تمَنِّيتْ مِثْلَكْ شَيَّعْتَه
و شِتْفِيد أيَّامْ مَا بِيهِنْ إنْتَه
عَايِفنِي اوْ رَايِحْ


*الشاعر الموفق ياسر المطوري*


رابط قصيدة "عايفني و رايح":
https://youtu.be/i9Ya1q0hDjs
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{أويس الشوگ}•

أُوَيسِ الشُّوگْ يَالمَعْشُوگْ أمْنِيَة شَائِقْ تِمَنَّه
حَبِيبِ اوْ هَايِمِ ابْمَحْبُوبْ سِلَبْ حُبِّ الدِنْيَه مِنَّه
هَمْ أحِبَّكْ مِثل أُوَيسِ اوْ أشَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

١/قُصَّة عِشِگْ
بِحْسَاسِي أُوَيسِ اوْ گَلبَه الذَّابْ
حُبْ مِنْ صِدِگْ
غَايِبْ مَحْبُوبَه اوْ مَا چَنْ غَابْ

لا مَسَافَه اوْ لا دَرُبْ...وِ التَّوَاصِلْ بِالگَلُبْ
يِلْتِقِي ابْصَاحِبْ زَمَانَه ابْلَايَه مَلْگَه
و آنَه يَالمَهْدِي هِمِتْ...و مِثْل أُوَيسِ اتْأَمَّلِتْ
بِيكَ احِسْ يَمِّي و لَا تِبْعِدْنِي فَرْگَه

إِيْحِسْ چَانْ حَبِيبَه ويَاه يِسْمَعَه و عِطْرَه يِشِمَّه
يَمَهْدِي وكُون أعِيشِ الحَالْ و عُطْرَكَ اشْتَمْ مِنَّه نَسْمَه
مَا رِدِتْ أشْعُرْ حَنِينِي بُرَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٢/وَكْتِ الفَرُضْ
يِرْكُضْ جِدْمَه اوْ گَلْبَه الوَلْهَانْ
يِخْشَعْ نَبُضْ
و يِتْرِكْ كِلْشِي بوَكْتِ الآذَانْ

وِ بصَلَاتَه الوَاجِبَه...مَا يِزَعِّلْ غَايِبَه
و يِبْتِعِدْ عَن كِلْشِي مَا يِرْضِي حَبِيبَه
هَمْ أصِيرِ ابْهَالشِّكِلْ...وَمْشِي يَالمَهْدِي عَدِلْ
ومَا أجِرْحَه الگَلْبَكِ اوْ بِذْنُوبِي اصِيبَه

أُوَيْسِ ايْعَامِلِ بأَخْلَاقْ و مَا جِرَحْ وَاحِدْ كَلَامَه
و قَبِلْ لَا يِحْچِي أيْ كِلْمَه ايْحَطْ عَلَى بَالَه إمَامَه
و خَاطِرَكْ مَا كِسْرَه رَايِدْ أَبَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٣/بحُبَّه مَرَه
هَامَتْ بَسْ مَا دَارِلْهَا البَالْ
بگَلْبَه قِرَه
گَلْبِي لْمَحْبُوبِي و مُو مَيَّالْ

مَا تِبَعْ حُسْنِ الشِّكِلْ...مِلْتِهِي چَانِ العَقِلْ
و صَارَوِ ايْسَمُّونَه مَجْنُونِ ابْغَرَامَه
يَا حَبِيبِي اوْ أعْتِذُرْ...مِهْتَمِ النَّاسِي اشْكِثُرْ
و آنَه گلبِي المُفْتَرَضْ بِيكِ اهْتِمَامَه

يَرِيتِ النَّاسْ أبَدْ مَا شُوفْ و عِينِي بَسْ إنْتَ تِشُوفَكْ
أُوَيسِ الثَّانِي ارِيدِ اوْيَاكْ الدِّنْيَا اعُوف اوْ مَا أعُوفَكْ
وَحْدَكِ اوْ لَا غِيرَكَ اعْشَگْ أحَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٤/عَنَّه رِضَه
مَحْبُوبَه أُوَيْسِ المُخْلِصْ چَانْ
بگَلبَه حِضَه
وچَانِ ايْسَمِّي نَفَسِ الرَّحْمَنْ

أسْأَلِ اوْ تِرْجِفْ إدَيْ...إنْتَ هَمْ رَاضِي عَلَيْ
هَمْ إِلِي ابْگَلْبَكْ يَمَهْدِي حُصَّه مِنَّه
رِدْتَ اجَرُّبْ هَالشُّعُورْ...مَا تِحِسْ مِنِّي قُصُورْ
وِ بْقَلِيلِي اللِّي أقَدْمَه رَاضِي عَنَّه

أبَدْ مُو عَنْ فَرَاغِ الصَّارْ هوَاي أُوَيْسِ بحُبَّه ضَحَّه
وِاذَا مَحْبُوبَه حَسْ مَخْنُوگْ الهَوَى العَابِرْ يِذِبْحَه
بَسْ رِضَاتَكْ مَا أدَوِّرْ بَعَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٥/چَانِ اشْكِثُرْ
يِخْدِمْ وَالِدْتَه انْهَارِ اوْ لِيلْ
طُولِ العُمُرْ
دَوَّرْ رَاحَتْهَا لْتَالِي الحِيلْ

وِ اليِطِيعِ الوَالِدِينْ...عيُونْ إمَامَه اتْصِدْلَه زِينْ
و يَا كُبُر حَظَّه العَلِيه يِنْظُر إمَامَه
بگَدْ دَلَالِ الدَّلِلُوه...يِتْعَبِ لْأُمَّه اوْ أبُوه
يِزْرَعِ لْمَحْبُوبَه شِجْرَة إبْتِسَامَه

عَسَه و أگْدَرْ أعَوِّضْهُمْ و تِرْضَه يَالمَهْدِي عَلَيَّه
لَمَن عِكَّازَه اصِيرِ الهُمْ إيدَكَ الگَاهَا بِدَيَّه
أفدِي رُوحِي لْحَد هَلَاكِ الجَسَدْ
و مِنْ بَلَدْ أفْتَرْ عَلِيكِ لْبَلَدْ
يَا مَهدِي

٦/آخِرْ حِلِمْ
بِي شُوگ أوَيسِ اوْ أتْمَنَّاهْ
لا لِلْمُهِمْ
شَارَكْ مَحْبُوبَه اوْ مَاتِ وْيَاهْ

كُونْ أذِبْ رُوحِي عَلِيكْ...كُونْ أمُوتِ ابِّينْ إدِيكْ
مِثْل أُوَيسِ لْخَاطِرِ اعْيُونَكْ يَغَالِي
تِحْلَمِ اعْيُونِ الگَلُبْ...اتْخَلْنِي دِرْعَكْ بِالحَرُبْ
حِلْمِي بِيدَكْ أنْدِفِنْ يَالمَهْدِي تَالِي

هوَايِ اگْلِيبِي يِتْمَنَّى مِثْل أُوَيسِ ايْصِيرْ حُبِّي
وَ اگَضِّي سنِينِي يَالغَالي بَسْ إلَكْ دَگَّاتْ گَلْبِي
يَمْتَى أسْمَعْ كِلْمَةِ (المَهْدِي رَدْ)
و مِنْ بَلَدْ أفْتَرْ عَلِيكِ لْبَلَدْ
يَا مَهدِي


*الشاعر الموفق ياسر المطوري*


رابط قصيدة "أويس الشوگ" :
https://youtu.be/GBcIgQEtpjM
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{الله يكثر أعيادك}•

١/الله ايْكثِّرَ اعْيَادَكْ...يَا شَعْبَانْ
جَابِ الفَرْحَة مِيلَادَكْ...يَا شَعْبَانْ
الأشْهُرْ كِلْهَا حِسَّادَكْ...يَا شَعْبَانْ
نِدْعِي نُبْقَى عُوَّادَكْ...يَا شَعْبَانْ

حَتَّى الأَشْهُر صَاحَتْ...يَا شَعْبَانِ اشْگَدْ مَبْخُوتْ

٢/اللِّيلَة يِنْبُضِ احْسَاسِي...بِالحْسِينْ
اللِّيلَة اتْسَبِّحَ انْفَاسِي...بِالحْسِينْ
الخِيرِ الصَّايِرِ ابْرَاسِي...بِالحْسِينْ
صِيتِي اوْ قَدْرِي عِدْ نَاسِي...بِالحْسِينْ

حُبَّكْ مَا يِتْعَوَّضْ...مِثْلِ الخُبْزَة بوَكْتِ العُوزْ

٣/بمَهْدَكْ تِجْدَحِ اعْيُونَكْ...يَا عَبَّاسْ
مَا تِقْبَلْ يِلَعْبُونَكْ...يَا عَبَّاسْ
المَايِ شمَا يِصَلْ دُونَكْ...يَا عَبَّاسْ
ترُفْضَه اوْ مِنْ يِشَرْبُونَكْ...يَا عَبَّاسْ

المَايِ اوْ إنْتَه بزُغْرَكْ...صَاحِ ادْخِيلَكْ يَالعَبَّاسْ

٤/ألِفْ مَبرُوكْ أبْدِيلَكْ...يَسَجَّادْ
وَرِدْ هَاللِّيلَة اوَدِّيلَكْ...يَسَجَّادْ
لُو سِجَّادَة أهْدِيلَكْ...يَسَجَّادْ
الصَّلَاة هيَة التِصَلِّيلَكْ...يَسَجَّادْ

إنْتَ المَاطَخْ رَاسَكْ...بَسْ مِنْ تِسْجِدْ لِلْمَعْبُودْ

٥/بَعَدْ چَمْ لِيلَة شِنْگِلَّكْ...يَا مَهْدِي
أخْجَلْ مِنْ أبَارِكْلَكْ...يَا مَهْدِي
تِمَنِّيتْ آنَه أنْدَلَّكْ...يَا مَهْدِي
عَدِلْ لُو مَيِّتْ أوُصَلَّكْ...يَا مَهْدِي

لِسَّه دمُوعَكْ حَمْرَة...اوْ تِبْچِي ابْصَحْنِ احْسِينْ


*الشاعر الموفق السيد محمد المنصوري*


رابط قصيدة "الله يكثر أعيادك" :
https://youtu.be/80aH7JkuIdQ
_____________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{چفينك وفايه}•

چفينك وفايه...للجود و للراية
عباس عباس...يسبع الغاضرية

١/ما تغيب حروفك
كل زمان نشوفك...آيه
و المجد ميعوفك
و انت بين چفوفك...رايه

يالبقيت بكربله...تضوي يا كوكب عله
يا هلا و مية هلا يا بو فاضل

حيرني تفسيرة
عباس أبو الغيرة
يا تاج عالراس...يسبع الغاضرية

٢/ما عرفنه اسرارك
يا گمر و انوارك...تزهر
شرف الله يزيدك
ظل يبوس بإيدك...حيدر

ربنا رافع رايتك...خيمه إلنه گبتك
غيرة الله غيرتك يا بو فاضل

ساحرني بعيونك
مجنونك مجنونك
عايش بالأنفاس...يسبع الغاضرية

٣/فدوه اروح الإسمك
ما يفارگ رسمك...بالي
إنت إنت الساقي
و بالضماير باقي...غالي

حبك بگلبي كبر...يا أحلى منّ الگمر
چفك اليروي النهر يا بو فاضل

غيرة علي شايل
حياك أبو فاضل
قرآن الاحساس...يسبع الغاضرية

٤/هالعشگ من ربي
و بودادك گلبي...هايم
إنت نور عيوني
و افتخر سموني...خادم

أذّن آذان العشگ...روحي شمعة و تحترگ
گلبي يهتف من يدگ يا بو فاضل

لو ينگطع راسي
عباسي عباسي
للدنيا نبراس...يسبع الغاضرية

٥/يا أعز من عمري
سلمت كل أمري...بيدك
يا طبيب اجروحي
مو بديها روحي...تريدك

هذا من عندي وعد...ما أعوفك للأبد
كربلائي هالعهد يا بو فاضل

مولاي عيديه
للكربلائية
يا آية إحساس...يسبع الغاضرية


*الشاعر الموفق كرار حسين الكربلائي*


رابط قصيدة "چفينك وفايه" :
https://youtu.be/WdRyZ1Lu3Wg
_____________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_____________________________
القناة الرسمية للملا مصطفى السوداني على telegram :
https://t.me/Mustafa_Sudane
_____________________________

•{كل عام}•

كل عام و احنا وياك يا مولانا
بكربلا يوم اخمسطعش تلگانا

يا آخر إمام
يا مسك الختام

١/من مياه الجنة يا غصن يسگونك
اليمنه عينك فاطم كوثر و يقرونك
اليسره عينك حيدر و بعلي يشبهونك
المختصر يالغالي الله بين عيونك

بهذا وجهك يلالي محمد جبهتك
بهذا وجهك ملامح خديجة جدتك

كل هذا الكلام
يا مسك الختام

٢/يا سفينة غيرة من سفن أجدادك
و الله لو ما عندك ولد إحنا ولادك
يا غريب بگاعك و السمه مگعادك
يا صفات الباري جينا نحيي اعيادك

يا هلا بيك ينادي الموالي بفرحته
الله حياك قبل لا يحيي بيمنته

من رب الأنام
يا مسك الختام

٣/يا عديل الگمره اخمسطعش شعبانك
من العرش و لمهدك غيروا عنوانك
يا أمير و تاجك عالبشر قرآنك
يا بخت تسبيحة فاطمة بلسانك

نور العيون و العيون يعمدة كل زمن
للحسن أب صرت دوم يا إبن الحسن

يمحلي الغرام
يا مسك الختام

٤/يا غزل يا شاعر يا قلم يا ورقة
ايوصفك من گلبك الله وزع رقّه
يا بقية ربك إنت وحدك فرقه
يعني كلشي يفنه و انت بس التبقى

يا بو صالح يسموك وكت إنت طفل
بعدك زغير يشوفوك جبل ما تنحمل

يا عالي المقام
يا مسك الختام

٥/يا نبي يا آدم و انت عيسى بعصرك
إنت يعگوب اول من نسولف صبرك
نوح شيخ بعمرك و انت شيخه بعمرك
گلبك شگد يشبه البياض بشعرك

تبقى غالي بالحسين نأديلك قسم
كلها كلا تظل دوم فقط إنت نعم

و بآخر سلام
يا مسك الختام


*الشاعر الموفق حمزة السماوي*


رابط قصيدة "كل عام"
https://youtu.be/cNT7QWoPXCc
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{هوسات}•

١/يا ما حاولو عنك يمنعونه
ابهواك عگولنه ما درو مجنونه
صحنا يا حسين الكل يسمعونه
《بأولها وياك و تاليها》

٢/كلمن راد الله يغفر ذنوبه
يگصد للحسين و يعلن التوبه
يموت و بس أبو السجاد محبوبه
《حيدر و الزهره ايحضرونه》

٣/عطر الجنة بس ابتربته انشمه
و ندعي يا إلهي انموت بالخدمه
ندري اعلى الجسر خدام أبو اليمه
《يحضرهم شيال الراية》

٤/نزل جبريل يخدم ساعت اصيارك
و گل جدك محمد عيدك امبارك
من بيت الولاية شعت أنوارك
《و الكون بنورك ضويته》


*الشاعر الموفق السيد رضا البوشوكه*


رابط "الهوسات" :
https://youtu.be/_-1iku5uWmA
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{شجاعة الحسين}•

بُركَان مِشتِعِل
طوفَان مِنفِعِل
شِفنَا القُوَّة رَايِح تِغلِبِ الكَثرَة
زَعْلَان مِبتِسِم
وِ الطول وِ الجِسِم
مَا فَاگِد إبِنْ لَا مِنْكِسِرْ ظَهرَه

١/ طلَع فوگِ المُهُر غَاضِبْ
حُسين إبْنَ أبِي طَالِبْ
رامِي اوْ طَاعِنِ اوْ ضَارِبْ مُقَاتِلْ
صَدْرَه عَالعَدُو نَقْمَه
ظَهرَه لِلْخِيَمْ رَحْمَه
مَا كَفَّه الدِّرِعْ جِسْمَه مَرَاجِلْ

مِنْ كِلْ كِتُرْ تِجِيهُمْ...و مَحَّدْ يِشُوفَه وِينْ
رَبَّكْ غِضَبْ عَلِيهُمْ...صَارِ القَدَرْ حُسينْ

بلَا صُوتْ مِنْ يِمُرْ
غَضْبَانْ بَسْ حَذِرْ
الطِّبرُولَه إبِنْ شِيرَجِّعِ الطَبْرَه
مَا فَاگِد إبِنْ لَا مِنْكِسِرْ ظَهرَه

٢/ كِلْ خُطوَه مِشَى مُهْرَه
ايْخَلِّي بِالأَرُضْ ثَغْرَه
تِجَاوَز قَسْطَلِ الغَبْرَه اوْ عُبَرْهُمْ
يِجِيبِ الجِيشْ وِ ايْرِدَّه
وَ لَا چَنْ فَارِسِ لْوَحْدَه
ذَكَاءِ المُصْطَفَى عِنْدَه كِسَرْهُمْ

مَا وَاگُفِ ابْوَسَطْهُمْ...و مَا سَيْطِرَوْا عَلِيه
يَمِّ النَّهَر أخَذْهُمْ...و كِلْهُمْ تَحِتْ إِدِيه

مِرتَاح مِنْ يِطُبْ
فَنَّانْ بِالحَرُبْ
وِ ابْگلْبِ النَّهَرْ صَاعِدْ عَلَى مُهْرَه
مَا فَاگِد إبِنْ لَا مِنْكِسِرْ ظَهرَه

٣/ لُو مَا حِكْمِتَكْ يَا رَبْ
تِشُوفِ احْسِينْ يِتْسَلَّبْ
يِظَلْ لِلْحَشِر مَا يِتْعَبْ يِقَاتِلْ
حَتَّى مِنْ وِگَعْ يِنْزِفْ
القَادَه بجِيشْهُمْ تِرْجِفْ
نِظَامِ الكُونْ مِتْوَقُّفْ مَرَاحِلْ

مَا تِنتِهِي صِفَاتَه...و لَا يِنتِهِي الكَلَامْ
مَكْثُورْ مِنْ جِهَاتَه...وِ امْسَيطِرِ الإمَامْ

مَا مَاتْ يِحْتِضِرْ
مِنْ مَاتْ يِنْتِظِرْ
قُرْبَانِ الظُّهُورِ بكَربَلَه نَحْرَه
مَا فَاگِد إبِنْ لَا مِنْكِسِرْ ظَهرَه


*الشاعر الموفق حمزة السماوي*


رابط قصيدة " شجاعة الحسين " :
https://youtu.be/2bdMcXoTOzs
______________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
______________________________
القناة الرسمية للملا مصطفى السوداني على telegram :
https://t.me/Mustafa_Sudane
______________________________

•{أكبر جرح}•

إنتَه اكْبَر جَرِح هَد حِيلِ العْيُونْ
وِ العِنْدَه الحْسِينِ ايْوَادْعَه اشْلُونْ

لُو يِلبَسْ سَوَادِ الدِّنْيَا كِلَّه
تِبَيِّن كَسْرَةِ المَفگُود خِلَّه

١/ يَالمتَعِّبِ اعْيُونِي امْنِ البَچِي اعْلِيكْ
تِكْتِلْ ذِكْرَيَاتَكْ
أنَا مَالِي عِرِفْ وَيْ چَفِّ الوْدَاعْ
چفُوفِي خَادْمَاتَكْ
دِرِت ظَهرَك إلِي وِ اتْشَمَّتِ اللِّيلْ
اسْتَوحَدنِي اوْ غَلَاتَكْ
إخِذْنِي ويَاك زِينَب لَيَّه تِحْتَاجْ
وَ اخْدِمْلَكْ بَنَاتَكْ

ما أگدَر أحَلفَك بِالزِّچِيَة
أخَاف ألچِمْ جَرِح گَلْبَكْ بِدَيَّه

إذَا مَا يُبقَى يَمَّك حَتَّى ظِلَّه
تِبَيِّن كَسْرَةِ المَفگُود خِلَّه

٢/ لو گايِلِّي موتِي ارْتَاح يَحسِينْ
و لا چِلمَة تِظَلِّينْ
أنَا بلَيَّاك مَكَّه بدُونْ حِجَّاجْ
ظَلَّت بَسْ حِيَاطِينْ
فَقِيرِ ابْلَايَا حِيدَر حَالتِي اليُومْ
تِعَشَّه ابْدَمْعَةِ العِينْ
أبچِي اگْبَال وَادِم مَا يِعَرفُونْ
شِنهِي افْرَاگِ الحْسِينْ

أركُض رِكْضَةِ الضَّايِعْ وِلِدهَا
وِ الثَاري الصَّحرَاء مَا تِسْمَع نَشِدْهَا

مِن يِبعِد عَزِيزِ اوْ مَا تِدِلَّه
تِبَيِّن كَسْرَةِ المَفگُود خِلَّه

٣/ اعْلَى عُطْرَك گِمْتَ أفَتِّشْ هَبَّتِ الرِّيحْ
وَ اشِمْهِنْ نَسْمَه نَسْمَه
وَ اصَلِّي آنَه الظُّهُر وَ احْسِبْ بِالنْجُومْ
ابْجِفَاكِ الدِّنيَا ظَلْمَه
الصَّمِت بَانِيلَه خِيمَه ابْعِتْبَةِ اشْفَايْ
و گُوَّه احْچِيلِي چِلمَه
كِلمَا يِنلِچِمْ گلبِي اعْلَى فَرْگَاكْ
أصِيحِ احْسِينْ يُمَّه

لو يِنفَعِ الصُّوتِ اهْوَايْ صِحْتَه
احْسِينِ اتْأَخَّرِ اعْلَيَّه ابْرَجِعْتَه

شَكوَةْ فَرْگِتَكْ مَا بِيهَا ذِلَّه
تِبَيِّن كَسْرَةِ المَفگُود خِلَّه

٤/ وِ اجَه نَاعِي المُصِيبَه ايْعِد بِالأسْمَاءْ
و ذِكَر وِلْدِي سِمَعْتَه
البُگَه ابْرَاسْ اللِّي إبْنَه إسْمَه عَبَّاس
طِحِتْ كِلِّي اوْ سِأَلْتَه
گِتْلَه احْسِين وِينَ اشْتَمْ عطُرْ مُوتْ
ذَبِيحِ ايْگُول عِفْتَه
و گَالِ الرَّاسْ بَايِتْ فُوگِ الرْمَاحْ
و سِبَوْا نِسْوَانَه وِ اخْتَه

المَا يَمَّه أخُو تِكثَر جُرُوحَه
و حَتَّى النَاصِي يِجَّاسَرْ يِلُوحَه

المْتَانِي الحْسِينِ اوْ مَا وِصَلَّه
تِبَيِّن كَسْرَةِ المَفگُود خِلَّه

٥/ طَالِب مَايْ بِالطَّفْ گَالَوِ احْسِينْ
ارْسُومَه الحَرْ چِوَاهِنْ
نَهَر هَاشِمِ اوْيَاهِ اوْ مَاتْ عَطْشَانْ
لو حَاضِر رِوَاهِنْ
المَا سِاحِگ جِدَمْهِنْ عِتْبَةِ البَابْ
عَدُوَّك رَكِّضَاهِنْ
بنَاتَكْ مَا بُرَد مِحْرَابْهِنْ حَارْ
المَا صَله سباهن

بَنَاتْ الزَّهْرَه هِيچْ ايْصِيرْ بِيهِنِ
عِمَتْ عِينِي الحَبِلْ جَارِحْ إِدِيهِنْ

الغَمِيجْ اصْوَابَهْ يَا چَفْ اليِشِلَهْ
تِبَيِّن كَسْرَةِ المَفگُود خِلَّه



*الشاعر الموفق محمد البطحاوي*


رابط قصيدة " أكبر جرح " :
https://youtu.be/6FO8qw1dSv4
___________________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
___________________________
القناة الرسمية للملا مصطفى السوداني على telegram :
https://t.me/Mustafa_Sudane
___________________________

•{محتاجك بگد غيبتك}•

وينك...طال إنتظارك و العمر يگصر
وينك...محتاجك بگد غيبتك و اكثر
وينك...أمه اليجيب المهدي للمضطر
وينك؟

١/دمعي يجري و بيك أسولف دمعه دمعه
خوفي بس لا من مغيبك ماكو رجعه
أندعيلك ليله ليله و جمعه جمعه
آنه أحبك و اليحبك ما تضيعه

ظليت أدورلك أثر
و ارسملك بعيني صور
ما شفتك و گلبي انكسر...تعرفني

كلشي خسرته بهالوضع
ما أمتلك غير الدمع
لا عندي صحبه و لا ربع...تعرفني

حالي...وضعي اختلف من حالك الحالي
بالي...ما مستقر بيك انشغل بالي
غالي...و محتاجك بگد دمعك الأحمر
وينك؟

٢/ذاب صبري و بغيابك الله يعلم
گمت أجدِّي امن الليالي بشوفك أحلم
أرد أعاتب ليش غايب يمته نلتم
عطشتني و انت وجهك ماي زمزم

كاتب على جروف النهر
ما رد حبيبي امن السفر
جبت العمر دمعه و قهر...يالمهدي

حاچيني يا نسمة صبح
صمتك على جروحي ملح
و اليسكت بگلبه جرح...يالمهدي

صمتك...بس اليحبك يفتهم صمتك
جيتك...هلهوله مذبوحه بأمل جيتك
شفتك...بحساسي چف شايل علم أخضر
وينك؟

٣/حسين ردتك حتى أبقى وياك عابس
تعبتني و جيت أدورك بالمجالس
الخوف أخذني و إيدي ترجف و ريگي يابس
ما لگيتك و بحياتي مالي واهس

إنطيني من گلبك صبر
و انطيني ساعة امن العمر
بيها أشوفنَّك تمر...گدامي

كل ما حضرت بمجلسك
موجود يمي اتحسسك
مثل الهوي و أتنفسك...گدامي

إلمن...إلمن أسولف حالتي إلمن؟
بيمن...أگدر أخففلك جرح بيمن؟
يعمن...اعيوني لو مثلك أظل أسهر
وينك؟

٤/آه يمهدي شلون عينك تگدر تنام؟
من تغمض يچوي گلبك حرگ الخيام
شلون تغفه و انت تسمع صرخة ايتام
شلون تغفه و عمه عندك دخلت الشام!

بالله يغمض يا جفن
و ابالك سياط و متن
و ايامك المحسوبه من...شيباتك

اليمته تظل تشتم حرگ
و تسمع صدر ظل ينسحگ
وحده اعلى وحده تختنگ...شيباتك

گلبك...شتحمل الله يساعده الگلبك
دربك...من دمعك لحد كربله دربك
ربك...بيا ساعه ينطيك الأمر تظهر
وينك؟

٥/بهالليالي الفاطميه شكبره همك
و انت تندل وين حيدر دافن أمك
من تجيها تگول يبني خذني يمك
ظهري محني مدلي چفك خل ألزمك

خليني بيدك أنتچي
نتگابل و نشبع بچي
عن أمك شسامع حچي...حاچيني

ترضاها بچفوف الغرب
يالمهدي أمك تنضرب
حاچيني يالساكت غصب...حاچيني

ضلعي...من انكسر بابي انكسر ضلعي
دمعي...صار أحمر بلون الجفن دمعي
وضعي...مثل الضلع كاسر گلب حيدر
وينك؟

٦/العذب أمك خله لسه يصب دمعها
الباب خشنة و من رفسها طگ ضلعها
شال سوطه و شافت إيده من رفعها
ظل يطگها و اعلى محسن رد دفعها

البيت انترس نار و حطب
ضلع انكسر خد انضرب
أم و تون بين العرب...يوليدي

شايف اذا طاح الإبن
أمه گلبها ينسحن
تفت الحجر لمن تون...يوليدي

دارك...و بيا بخت من احترگ دارك
ثارك...و اليمته نبقى ننتظر ثارك
نارك...أمه اليجيب المهدي للمضطر
وينك؟


*الشاعر الموفق السيد محمد المنصوري*


رابط قصيدة " محتاجك بگد غيبتك " :
https://youtu.be/xDRwvJPa2Jk
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{راحوا الغاليين}•

بَعَدْ يَاچَفْ يِدِگِّ البَابْ شِدَّه اِوْ جَرْحِيْ مَا يِنْشَدْ
عُگُبْ مَا رَاحَوا الغَالِينْ عِشِتْ بَسْ آنَـه وِ المَحَّدْ

١/غَرِيبَه اِوْ بيتِيْ تَابوتِيْ و احِسْ بِالموتْ كِلْ لَحْظَه
وَ آنَه الرَّاحْ مِنِّيْ اِحْسينْ مُوْ يَاهُوْ اليِجِيْ اِيْعَوْضَه
عِجْبَه اِوْ گلْبِيْ ظَلْ يِنْبُضْ زينِ اِوْ مَـا وِگفْ نَبْضَه

هَذَا احْسين اخُوْ النَّسْمَه
أمُـوتِ اِبْـيـومْ مَـا اشِـمَّـه
مِثْل إِبْـنِـيْ اِوْ مِثِلْ أُمَّــه

عُگبَه اللّيلْ يِتْبَعْ ليلْ وَ آنَه اِعْيُونِيْ مَا تِنْسَدْ

٢/حَرَامِ النّومِ اِذَا مَرْنِيْ وَ اشُوفِ الرَّاحَه وَ اَتْهَنَّه
اِوْ طَبْعِ الفَاگِدَه يَانَاسْ تِلْگه الرَّاحَه بِـالـوَنَّـه
صَحْ گالَوا عَزِيْزِچْ مَاتْ بَـسْ مَـا أيَّسِتْ مِنَّه

أشُوْ مَا تِقْتِنِعْ رُوحِيْ
مَا يِرْجَعْلِيْ مَذْبُوحِيْ
أشِدِّ اِجْرُوحِيْ بِجْرُوحِيْ

نِذَرْت امْلِيْ الدَّرُبْ رِيْحَانْ لوْ رَدْ بَسْ بَعَدْ مَا رَدْ

٣/گِضَتْ سَنْتينْ عَالفَرْگه اِوْ هَاي الثَّالِثَه اِتْمُرْنِيْ
وَ اخَافِ اِحْسينْ نَاسِينِيْ لـوْ لَا بَعْدَه يِـذْكُـرْنِيْ
مِثِلْ كَسْرَةْ غُصِنْ يَابِسْ عُگُبْ عينَاه كَاسِرْنِيْ

گِلِتْ مِشْتَاگه لَانْفَاسَه
گالَوا عَـالـرُّمُـحْ رَاسَـه
گِلِتْ چَا وينَه عَبَّاسَه

گالَوا عَالشِّرِيعَه اِهْنَاكْ شَيَّالِ اللِّوَه اِسْتَشْهَدْ

٤/مَلْكِ الموتِ اِجَه البَابِيْ قُبَضْ رُوحِيْ اِوْ مِتِتْ يَمَّه
وَ اسْبَابِ الـوَفَـاةِ اِتْگُولْ كِتَلْهَا اِفْـرَاگ ابُـوْ اليِمَّه
غَرِيبَه اِوْ صِحِتْ يَـوْلَادِيْ لُـمْكُمْ فِـزْعُـوا يَـايُـمَّـه

رِدِتْهُمْ لوْ يِحِلْ موتِيْ
يِنُوحُونِ اِعْلَه تَابُوتِيْ
صِحِتْ بَسْ مَا وِصَلْ صوتِيْ

أمِدِّ اِچْفُوفِيْ بَسْ مَا اشُوفْ ليَّه اِچْفُوفْهُمْ تِنْمَدْ

٥/يَادَفَّانِيْ رِدْت اوْصِيكْ قَبِلْ لَا أنْزِلِ اِبْـلِحْدِيْ
مِنِّ اِتْرَابْ گبْرِ اِحْسينْ كُونِ اِتْحُطْ تَحَتْ خَدِّيْ
هَاي الدِّنْيَه مَالِ اِفْرَاگ وَ اخْذَتْ أغْلَه مَا عِنْدِيْ

گِلْتِ اِبْگبْرِيْ رَاح انْسَه
بَسْ شِفْتِ الحِزِنْ نَفْسَه
رَاحَولي وِلِـدْ خَمْسَه

فِدْوَه الأرْبَعَه اِيْرُوحُونْ عَالخَامِسِ الحيلِ اِنْهَدْ

٦/عليْمَنْ كَـرْبَـلَـه اِبْعِيدَه اِوْ يَاريتَه الدَّرُبْ يِگصَرْ
حَتَّى اطْلَعْ وَ امُوتِ اِهْنَاكْ يَمْ شُبَّاچ ابُوْ الأكْبَرْ
مَرَّه انْحَبْ عَلَى اِضْلُوعَه مَرَّه انْحَبْ عَلَى المَنْحَرْ

أدَاوِيْ اِجْرُوحِ البْصَدْرَه
وَ ارَجِّعْ رَاسَه يَمْ نَحْرَه
وَ اسَاعِدْ فَاطِمَه الزَّهْرَه

أحْزَنْ بِالگبُرْ لِحْسينْ وَ الْتَفِّ اِبْـچِفَنْ أسْوَدْ


*الشاعر الموفق كرار حيدر الخفاجي*


رابط قصيدة " راحوا الغاليين " :
https://youtu.be/INIG5KZJIPo
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{من ذاك عاشور}•

مِن ذَاكَ عَاشُور أدعِي مَولَايْ
لُو بَس عِشِت لِمْحَرَّمِ الجَايْ
نَاذِر نِذُر لَبْچِيلَكِ اهْوَايْ
يَا أبَا عَبدِ الله...يَا أبَا عَبدِ الله

١/مِثِل أم ضَايِع وَلَدهَا اوْ تِنتِظُر رَجعَه
بلَهفِتِي امْتَانِي ليَالِي الحِنَّه وِ الشَّمعَه
هِيچَ ارِيدَ اجْرِي دَمِعتِي بمَجلِسَك وَ انْعَى
يِختِلِف عنِّ المَوَاسِم موسِمِ الدَّمعَه

وِ المِنكِسِر مِن أجلِي ضِلعَه
شلُون أعز اعْلِيه دَمعَه
بَلچَن دَمِعتِي اتْصِير إلَك مَايْ
يَا أبَا عَبدِ الله...يَا أبَا عَبدِ الله

٢/حَضَّرِت ثوبِي السَّوادِ اوْ هَيَّأت أمْرِي
هاللَّيالِي اسْتَقْبَلِتْهَا بدَمْعِتِي التِّجْرِي
لِيلَه لِيلَه مِن تِمُرنِي يِختِنِگ صَدرِي
و يِنْشِغِل بَالِي اعْلَى زِينَب يَا بَعَد عُمْرِي

عَيِّشنِي جَرحَك شِلِّي بِالحِيلْ
زِينَب وَرَاهَا امْرَاكَضِ الخِيلْ
باچِر تِحِيرِ اوْ مَا يِظَل رَايْ
يَا أبَا عَبدِ الله...يَا أبَا عَبدِ الله

٣/ابْعِينِي تِتزَاحَم دَمِعتِي لُو نِعَى النَّاعِي
چِلمَةِ الطَّاحِ اعْلَى وَجهَه تِلْچِمَ اسْمَاعِي
سيِّدي اوْ عِنْدَك عَلِيلَه اتْهَيِّجَ اوْجَاعِي
گاعِدَه ابْعِتبَةِ البَابِ اوْ تِنتِظُر سَاعِي

وِ اتْنَادِي بُويَه المَن عِفِتنِي
ويَّه خَواتِي مَا خَذِتنِي
ميِّت حِلِمهَا ابْرُوحِتَك هَايْ
يَا أبَا عَبدِ الله...يَا أبَا عَبدِ الله

٤/اليِحْتِرِگ گَلبَه ايْتِضَاعَف بِالحَشُر أجرَه
مِن يِموتِ اتْصِير شَمعَه دَمْعِتَه ابْگبْرَه
كِلشِي ما ريدِ ابْمُحَرَّم غِير بَس عَبرَه
بَلچَن أجبُر بِيهَا خَاطُر فَاطِمَه الزَّهرَه

يَارِيتْ دَمعَاتِي الجِرِيَّه
يِشفَن جَرِح سِكنَه اوْ رُقَيَّه
العَبْدَالله تِجرِي ادْمُوع عِينَايْ
يَا أبَا عَبدِ الله...يَا أبَا عَبدِ الله

٥/هالشَّهَر شَهرِ المُصِيبَه البَچَّتِ الدِّنيَه
ويَّه ضَعنَك يا حُسيْنِ اجْرُوحِي مسبِيَّه
سيِّدِي اعْلِيكِ العَلِيلَه التِّنْتِظُر جَيَّه
كون تِحسِب حتَّى نبضَة گلبِي لطمِيَّه

وفِّقنِي فِدوَه ابْرُوح عَابِسْ
أبچِي اعْلَى زِينَب وِ المَجَالِسْ
بلكِي انْحِسِب لِلزَّهرَه وَفَّايْ
يَا أبَا عَبدِ الله...يَا أبَا عَبدِ الله


*الشاعر الموفق السيد علي الموسوي*


رابط قصيدة "من ذاك عاشور " :
https://youtu.be/LhAeV7CK5-4
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________

•{وينك علي}•

مثل نار الضمير أحسه ابداخلي
كلما شفت فقير صحت وينك علي

۱/ للأسف بعض البشر بالفقره تهزه
والله ذوله عد علي إلهم معزه
آه يابويه اليتيم اشگد يعزه
علي چفينه صواني وحچيه خبزه

على الفقره الأمير چذب ما يعتلي
كلما شفت فقير صحت وينك علي

٢/ هذا يا إسلام هسه ابگاعه فقره
علي باني ابحضنه للأيتام حضره
علي اتلث تيام ما ماكلّه تمره
امن اليتامه يستحي خافن تشكره

علي ايگول الحصير ذهب أصبح إلي
كلما شفت فقير صحت وينك علي

٣/ نور يتحول علي ابليله وظلامه
وما تجوع ابدولته حتى الحمامه!
عنده تسوه الدنيه ضحكات اليتامه
يگلب الدنيه و يجيب إلها ابتسامه

ابوجوده ما يحير يتيم وسائلي
كلما شفت فقير صحت وينك علي

٤/ علي مستشفى الفقير او شاع صيته
يگضي أكبر حاجه بچفوفه البخيته
علي نص الليل يتفگد رعيته
الله جاب الرحمه خلاها اعلى بيته

يجير التستجير يگلها اتدللي
كلما شفت فقير صحت وينك علي

٥/ ما يخيب الراحله وحاشه يرجعه
علي دكتور و فقط كشفيته دمعه
صار للأيتام أبو و الفقره ربعه
علي حبه ايصير يوم الگبر شمعه

شفيعي بالأخير أنا و ناسي و هلي
كلما شفت فقير صحت وينك علي


*الشاعر الموفق السيد علي الموسوي*


رابط قصيدة "وينك علي " :
https://youtu.be/PCrplCGIaC8
_______________________
قناة تعتني بنشر القصائد المكتوبة التي قرأها خادم الزهراء الموفق الملا مصطفى السوداني
https://t.me/MSudane
_______________________
القناة الرسمية للملا مصطفى السوداني على telegram :
https://t.me/Mustafa_Sudane
_______________________