مخاطبة علي الاكبر مع القاسم ابن الحسن"ع'


جاســـــــم يبن عمّي    شِدْ عزمك ابعزمي
والحـومه آنـه اويـاك    نِدخـلـها يل نشمي
__


إلمــن نـريد الحــيل والحــيل اِجه وكــته
خـل ابـرز بمـهــــرك وِبمهـــري طـب إنته
نتگاسـم الســـــــبعـين كل واحد وحُصْته
دمنه اعله ثار ايفـــور شيـسكته شيـسكته

حَـيـهُم يصـيح الـدم    حي الله وِلْـد العَـم
وِتشـــاهِدوا للموت      والصــارم ايسمِّي
ــــــــــــــــــــــــــــــــــــــــــــــــــــــــــــــــ

شتــگول اذا بالســــيف نتبادل ابكيــفك
انته ابرز ابســـــيفي وآنه ابرز ابســيـفك
روس اشتهت ذباح گصهن واخذ حيـفك
خل تنرعب بالنـــــوم لو شاهِدوا طيـفك

إرعبهم إرعــبهـم       وبســــيفك أدّبـهم
مايبــرد إلّا ابثـار        دمَّــك مثــــل دمي
ــــــــــــــــــــــــــــــــــــــــــــــــــــــــــــــــ

عمنه البطل عبــاس عالغـــيـره علمـــنه
لمن يصـــــــير ازماط نتـزامـط ابعـمـــنه
مات ابكلبنه الخوف وتغـســـــل ابدمــنه
احنه اعله حگ مادام لو متـنه ميهــمــنه

حـط ظهرك ابظهري   وادفعهم ابصدري
آنه ادري انته ازغير     بس سطرتك تعمي
ــــــــــــــــــــــــــــــــــــــــــــــــــــــــــــــــ

كلفه الحرب جسـام الما بي عزم يتعب
والصِيته باشــط موت يم حدّه مايگرب
اليوم اليِخـــون الظيف بالحـومه يتأدب
لازم نطلع احگــوك عالحـــگ اذا نغضب

والطايل إلســـــــــانه    بالسيف أگصه آنه
والتصعب انته اعليك   حلها الصعب يمي
ــــــــــــــــــــــــــــــــــــــــــــــــــــــــــــــــ

صِيت العرس ميدوم وآنه ادري مو نِيتَك
لمّن شهيد اتطيح يصعــــد شرف صيتك
بالجنه تلگه اهناك مَنصــــــوبه صينيتك
والزهره عدها اشــــمـوع تعـلگهن ابيتك

شتــســــوّي بالحِنّه   واگبـــــالك الجَـنّــه
باجــر على الرايات    تلگه اِسمك او إسمي
ــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــ

خادم الامام الحسين"ع
مرتجى الحســّــــاني

خادم الزهراء مرتجى الحسَّاني
https://t.me/MM_lt5

شكراً إلاهي بِسم اَبو اليمه
                              وِبمنحره ودمَّه

كلما يرد عاشور أرد وابچي اعله الِحسين

=======================

ما أريـد أتفـاخـر بلـبـس الحـرير

ولا أدوِّر شُـهره حتى اَصبَح أمــير

خلني وي حسين عايش عالحصير

حتى اَخدمه بعمري لليــوم الأخير


جبريل چان أوَّل ملَك خادِم 
                            يتباها عالـوادِم
      
وهذا الشرف دايم يظل مو يوم يومين
كلما يرد عاشور أرد وابچي اعله الِحسين

========================

خادم إحسبني إلاهي اويه الخَدَم

ومن جراحات الحسين آخذ سهم

بگلبي خلّي اتطيح جمره امن الخيم

أرد اعيش الدنيا كلها بهالألم


خليني اعيش الدنيا بجروحه
                           وابچي لألم روحه


عالنهـــر طايحـلـه علَـم وبصفّه چفّين
كلما يرد عاشور أرد وابچي اعله الِحسين
=========================

ربي لاتحــرمني من حَـر جمــرته

خلني هــايم بالجَـزَع لمصــيبته

بلكي أخفَّف من جروحه ومحنته

ومارِدت بس القبــــول بخدمته


يستاهل حسين الحزن كـلَّه
                            والمدمع انهـلَّه

بالدمعه لجل امصيبته ماعندي وجهين
كلما يرد عاشور أرد وابچي اعله الِحسين

========================

شكـراً، اِبگد رحمِتَك ربّ السماء

طوَّلِت عمري او صحت يـاكربلاء

وابتـديت اِبخــدمـتي بلا كـبـرياء

وشاركِت بالخدمه أصحاب العزاء


اشگد حلوه لمّن تخدم احسينك
                              وادموعك بعينك

وتِـندفع بالمحشر نقِد وتحصّل الدَين
كلما يرد عاشور أرد وابچي اعله الِحسين

=======================

يم حجِم تضحيته ما إلنه إسم

إحـنـه ذرّه بـلا وزن وبـلا حجِم

واليريد بروحــه يكــبر (يلتـزِم)

يخدم حسين بعمَـل مابي إثـِم


وحسين رايد كلمن ايخدمه
                          يمشي بأثر جدمه

ولّي انحرف عن منهجه خل ينتبه وين
كلما يرد عاشور أرد وابچي اعله الِحسين

========================

ياحزن يوفـيلــه يادگّـت صدر

ويادمع يكفي لمحــرَّم ياكسر

بينه كسره اعليه أبـد ماتنجبر

ومو خساره ايروح لحسين العمر


مو ندمه لمّن تخلص اَيامي
                       أبچي على الظامي

بس ندمه لمّن ألتهي وماحاسب اثنين
كلما يرد عاشور أرد وابچي اعله الِحسين

========================

آنه لحسين أنتمي وعن معرفه

أحزَن لحزنه واعيشن موقفه

اليفرح بموته ويسولف عالوفه

تره ابوجه اسود يلاگي المصطفى


حسين اِنطه أعز مايملِك لدِينه
                          وضم أُمّـته بعينه


حسين اِبحياته وبمماته ايكحّل العين
كلما يرد عاشور أرد وابچي اعله الِحسين

=======================


خادم الحسين "ع
مرتجى الحسَّاني
https://t.me/MM_lt5

القصيدة على لحن تراثي(دنياك عندك فاكره وتدري بخبرها)


يـانـار  .. لا تِستـعجِلِي بحقدِچ عَـلينه

هاي اِبيوت الٱسلام     بس بـهـيئة اِخيـام
          لاتستعجلِي بحقدج علينه
__

1-

بالله يانار اَرد اســألج   وادري ماعنـدج إجـابه
بالحَرِگ يابيت أولَى   إحنه لو ذيج العِـصـابه
الْخيم بيت الله ومحمّد  وانتي مشتعله اعله بابه

اتعـدّيتي حدّچ عالنبي
وطاوعتي راي الأجنبي
وذاك اللهَب لاح العبي

                        آخ يحسين ومُصـابه

ينـدار  ..  من بعده الزمن ياوسفه بِينه

شَـبَّت نار الأحقاد   وصارت خيمِتي اِرماد
           لاتستعجلي بحقدج علينه
__
2-

يل حرگتي دار فاطـم     وْمن محمد ماخِجلتي
هسه اجيتي بكل صلافه  بالخيم حقدج شَعَلتي
گَـلُب ماعندج واكســره   وْلا تشعرين بكسرتي

اتحزَمتي ضِدِّي اويه العـدو
من شفتي ماظل عندي أخو
لُـو بالخـــــيـم حـمّـــاي أكو
                         مايِطوُل إلسـانج إنتي

أقــدار  .. دارتنـه عگب حامي الظعينه

لو عبـاس موجــود      ماتـدنِين اِلِـحدود
        لاتستعجلي بحقدج علينه
__
3-

الله من نـوره خلقـنه    اوخالق املاكه الخَفِيه
وانتي ويه ابليس عندچ  نَسَب سابق وآل اميه
لهل سبب جيتي وْحرَگتي  اخيامي برض الغاضريه

نــور الله إحـنـه بهالأرض
وطاعتنه مفروضه فَرُض
معركه اويه الذِّل ماتِفُض
                         من أجل حفظ القضيه

ثــوّار  .. وِبـغير الشهاده مارضينه

نور او من أصِل نور   وْضد كل ظالم انثـور
        لاتستعجلي بحقدج علينه
__
4-

ماخُـمَد بالطف لهـيبـچ    عجـب لمَّن لِمَحـتيني
وْلاحرگتي چف عَدوِّي وانه إجيتي وْحرگتيني
ضيعيتي أطفالي بالطف  وبالدواهي تركتيني

يانـار وانتي ابـلا خجـل
خلِّـيـتي عيــلتـنه بوجل
مِن هَجمِتِچ شِفْت الأجل
                         وِللـكفـيل اتـدير عيني

والصــار  ..  مايِخْفَه اعله جدنه اوْ لاوِلينه

بس لـحكمـــة اللهْ      صبراً حبـسـوا الآهْ
لاتستعجلي بحقدج علينه
__
5-

إحنه نوگف لليحبنه      واليعادينه نِذلّه
وماتدوم أيامـه كلمن     سيفه ضد الحگ يسلّه
ولازم الحگ يعله صوته   حتى لو أنصاره قلّه

الباطل فقط جَوْلَه إله
وصولات للحگ قاتِله
وبهايه تشـــهد كربله
                     حسين خلّه بخصمه علّه

أســـرار  .. مامون الركب هاي السفينه

حسين الضَحَّه للدِين    وانصــاره قَـليلِـين
لاتستعجلي بحقدج علينه
__
6-

حايره الليله بمصـــابي    وين أضمَّن هاليتامه
وانتي ماخلّيتي خـيمه     بيها نِلـتَّـم بســلامه
كلشي بالطف گمت اسمعه  اينادي يارب الظُّـلامه

مِن ناس ذبَّـاحــــة طفِـل
وِتگـيِّـــــــد الدِين بحَــبِل
يتجـاســـر اعليَّـنه النـذِل
                       بلايا نخوه ولاشهامه

راضين .. سلّمنه الأمر لله ومشينه

وهوه ايعوّض الصار    ومنهم ياخذ الثار
        لاتستعجلي بحقدج علينه
__

*زهيري

زينب بنص القَصُــر ماظل أخـــو حَيْ لَـها
وْرغم السـبي والحزن مثل الجـبل حـيلَها
اشما تلتفت تِنصـدم شـــامت تَجِـد حيلها

وراس السبط بالطشت تدري بگلبها شفت
وِيْـگـلها إبن الخَـنـا روحي بقــتـلكم شِفَت
گالتله وبكل فخـر بالطف جمـــــيـلاً شِفِت
حسين انكتبله القَتِل واخته الصبر حيـلَها
____

خادم الحسين ع
مرتجى الحسَّاني

https://t.me/MM_lt5

لإستشهاد الإمام زين العابدين "ع'


من واحـد وستين هجـريه  
تنصب عزاء وتبچي يوميه

امن العباده   //   للشهاده
تنصب عزاء وتبچي يوميه

=========================

شلِت رايـة أبوك بزود يمـناك

وتسلّمت الرساله وگتله عيناك

عَهَد للموت أظل بالدمعه وَياك

ودَمِعتك سيف بيها انقهرت اعداك


بلا سيف رِحْت ولادرِع لابس
بس بدمعتك بالحزن فارس

حاربتهم    //    ماعفتهم

وحسين للحگ عنده ذريه
تنصب عزاء وتبجي يوميه

=========================

يالمْـرَسخِ الشـعـائر والمُـناجاة

اِبنفوس الأُمَّـه وأحكام العبادات

إلك منبر وصَل صوته السماوات

قِـمِت بي المجـالس والعزاءات


من دمعتك ظلّـت شعايرنه
ومن منبرك صدحت منابرنه

قـوّه عدها  //  تسـتمدها

من دمعك بحكمه إلـهيه
تنصب عزاء وتبجي يوميه
=========================


يالمخـلّي المنــابر تحچي لليوم

او تنادي اوياك (مات حسين مظلوم)

تره مـايكـفي بس انصلّي وِنصوم

الماينصر إمــامـه ايموت محروم


يالناصر حسين بمُـناجـاتك
واسهام ضد عدوانه دمعاتك

ابظِلْ بكائك  //  ظَلْ عزاءك

يتجــدّد بكل عـــام لطميه
تنصب عزاء وتبجي يوميه
=========================

حفَظ ربّك مقامك مِن الأشرار

حتى المـنبر ايظل هذا تذكـار

إذا مو دَمْعِـتك مانعرف اشصار

نعيش بلا وعي وماصرنه أحرار


منك عرفنه العـزه وتكوينه
يقلب على الظالم موازينه

الدمعه لجله  //  ماهِي سهله

للدمعه منطي اشگد أهـمّيه
تنصب عزاء وتبجي يوميه
=========================

مصابك والسبي والغربه والداي

خَذَن من حيلك المتدَهْوِر اهواي

وَعي الأمّـه اختلف واتبدّل الراي

وگمت بالتربيه اتـعالجها مولاي


اتبِث القيم والوعي بداخلها
والثـار شـفته مو علاج إلـها

إنته أعرف  //  بيها ألْـطف

اتحرّرها من بيـر العبوديه
تنصب عزاء وتبجي يوميه

=========================

خادم الحسين "ع
مرتجى الحسَّاني
https://t.me/MM_lt5

مِن كل بُـقعه بالكون جِمعَت كربله الناس
اَللَّه اِشخلَّه بِـ حسين شنهو السر يعـباس
____



نِمشيلك مِـنّ البحــر إلـى النحـر
نمشيلك وانحـطِّم أَصنـام الخَطر
نمشيلك ما نتعب، اِنْـتَعبِ الدهر
نمشيلك يدفعنه حبنه بهل سَفَر .. نمشيلك


شَدِّينه الحيازيم لِلطف يابو الاَحرار
اوْنشرب بالدرب ماي بس مايبـرد الثـار
يا سِر عشگ الگلوب ياتاج العلَى الراس
الله شخلّه بحسين شنهو السر يعباس
____


بگلوبنه إنته اَوَّل او آخر عشِگ
بگلوبنه مُوته ونبض حبك يدِگ
بگلوبنه يوميـه خيمــه تحـترِگ
بگلوبنه نِسمع اضلوعك تنسحِگ.. بگلوبنه

مَشَّايه او حفظناه اوننـدَل دربك منين
طعم السَفره وَياك مثلِ الجنَّه يحسين
يمك راحت البال ياسلطان الاِحساس
الله شخلّه بحسين شنهو السر يعباس
____


راياتنه بِسم العشِگ لجلك ترِف
راياتنه حرَّه اِو أبـد ما تنچـتِف
راياتنه لو طاحت اتخظّـر ألِـف
راياتنه كلها اعله حـبك تِئـتلِف ..راياتنه

سَدِيناها الِبيوت ولگبرك حدَه الشوگ
اگلوب اولاگت اعليك وِانته اعليهن اتلوگ
نعمه امن السَّمَاوات بالطف وسفه تنداس
الله شخلّه بحسين شنهو السـر يعباس
____


خطواتنه. تَسبيحه تِخلص بالدرب
خطواتنه. مرتبطه وي نبض الگلب
خطواتنه. بحاصِل تَعـبهِن تنـظرب
خطواتنه. يلگَنْ أجرهِن من نطب..
خطواتنه

اِنعيد الماضي وِنزود نِنطي اچفوف وِعيون
وننزل علْ خيم ماي مابِينه الْيِحـرگون
ليش اليِخْدِمَك صار من اِجدامه ينباس
الله شخلّه بحسين شنهو السر يعباس
____


شباچك. والله اِشتهينه اِنشِم عطُر
شباچك. لِلـزايـر ايظل ينتــظُر ...!!
شباچك. بي جمره من ذاك الخِدُر
شباچك. دايِـر اضلوعه اعله الگبر
..شباچك

هنياله اليجي ايزور منـك ياخـــذ امراد
عشرين بصفر صار للشوگ اَحله ميعاد
بي تتلاگه الِگلوب وي اَغله امن الاَنفاس
الله شخلّه بحسين شنهو السر يعبـاس
____

خادم الحسين ع
مرتجى الحسَّاني
https://t.me/MM_lt5

قصيدة شور
شكوة مولاتنا زينب عليها السلام لأخوها الامام الحسين"ع' عند عودتها من السبي


ياموت اِخذ روحي   هوَّه اِشبقه بروحي
      
=========================

طـبّينه للشام او عِلَه ابچانه

والنـوگ گامت تبچي ويانه

لاگـتني كل النـاس فرحانه 

واختك يخوها اعليك حزنانه


واحد حضن واحد   ايباركله وِيعايد

واِجروح گلبي إلتمّن اهنـانه
مايسوه عمره اليفگد اخوانه

ياموت اِخذ روحي   هوَّه اِشبقه بروحي
========================

لاگونـه بِطبـول وفَـرَح قاسي

وآنه الجمر يطلـع اويه انفاسي

جرحوني خويه وجرحوا احساسي

حگّي عليك ألطُـم على راسي


التفگد أخـو مثلك    حگ تبچي دم لجلك

وبالرغم دمعي ايفــرّح الشامِت
بس ظل يضج بعيوني ماساكِت

ياموت اِخذ روحي   هوَّه اِشبقه بروحي
=========================

خَـوْلِي وشمر بِحبـال چتفونه

وبالسوگ بين النـاس طـبّونه

مِنّ السطوح احجــار يرمونه

وراسك أشوفه اِيغمّض اعيونه


صعبه تشاهدني   وماتجي اِتساعدني

لاكن صبرت لخـاطر اعيونك
خل اَنجرح بس لا يجرحونك

ياموت اِخذ روحي   هوَّه اِشبقه بروحي
=========================

يحسين باعوا واشتروا بينه

وايزيد عمــــداً ظل يـأذينه

طگ راسك وحاول يبچينه

ومحّد تِشيله الغِيره يحمينه


بس إحنه ظلّينه    محّـد فِـزَع لينه

كل حرمه أخـذوها عشيرتها
بس بت علي مافزعوا اِخوتها

ياموت اِخذ روحي   هوَّه اِشبقه بروحي
========================

طحنه ابّشر ماتعرف الغِيره

من ديره نطلع ندخل بديره

وحيّرني ذاك الشايلك حيره

كلما يصد راسك إلي ايديره


اتعـمّد يأذّيني    ذاك اليعاديني

ناس انعمت وإبليس عاميها
والنعمه بالطف داسوا اعليها

ياموت اِخذ روحي   هوَّه اِشبقه بروحي
========================

ردينه ليك اَرواح خلصانه

منّ السبي وآلامه واحزانه

زوّار إجينه وجينه دفّانه

فك الگبر خويـه وتلـگّـانه


جيت وجبت راسك    يالگاطع أنفاسك

يحسين ماظل مدمع انصبّه
گدما بچينه اعليك بالغربه

ياموت اِخذ روحي   هوَّه اِشبقه بروحي
========================

لتگول زينب ناسـيه الخوّه

ولتگول ماعد اِختك امروّه

الشام تدري اخلافك اشسوّه

أخّـرني عنّ ازيـارتك گـوّه


الشام عـذّبني     وفرگاك شيّبني

لو مو غصب گادوني ماعفتك
اثلاثين ليـله وعشره فارگـتك

ياموت اِخذ روحي   هوَّه اِشبقه بروحي
=========================

خادم الحسين "ع
مرتجى الحسَّاني

https://t.me/MM_lt5

" وَ أَمَّا يُوسُفُ فَبَكَى عَلَى يَعْقُوبَ حَتَّى تَأَذَّى بِهِ أَهْلُ السِّجْنِ ، فَقَالُوا إِمَّا أَنْ تَبْكِيَ اللَّيْلَ وَ تَسْكُتَ بِالنَّهَارِ ، وَ إِمَّا أَنْ تَبْكِيَ النَّهَارَ وَ تَسْكُتَ بِاللَّيْلِ ، فَصَالَحَهُمْ عَلَى وَاحِدٍ مِنْهُمَا" .


ليل اِونَهَار ايظل حزِن فگده
                  لا مانصالحـهم على وِحْدَه  
أَهلِ السجِن من يوسف إتأذّوا
            والمهدي ألف عام او يوِن بَعدَه

========================

لحَّد يلوم المنجرح    مايشعر بلچْمِ الجرح
             بس اليعيش آلامه

وهوَّ البچي مو عن بَطر  شَرعِـيَّه إنطوا للدمع
          أهل الشرِع وَأعلامَه

ايگولون مكروه البچي  للزلمه، لاكِن مستحَب
            بس للسبط واَيتامه

مو حگّي أجزَع ياخلگ  مذبوح إمامي بكربله
            وسِلْبوا هَـلَه واِخيامه


عِوفوني ويّه اِجروحي وآلامي
               مذبوح إمامي اعله النهر ظامي
وثلث ليـالي بلا دفِـن باقي
               ومن بلْـدَه راسه ينهـدي لبَلْـده

=======================

عـد العرب سامِع قَبِل   لو طاح جندي بمعركه
               والجـثه ظلّت بيها

من عدها شي ماينسلِب  عدهم إهانه تعتبر
               من تمتد إيـد اعليها

وحسين سِلْبوا كلشي اِله  اِثِيَابه وخِيَامه وعيلته
               وإعمامته امسلبيها

وادم وِصَل بيها الحقِد   بالخيل طحنوا جثِّـته
            ومحّد فِزَع يحميها


ظَـنّوا إذا سلبوه يقِـل شانه
             الـ هيهات ظلّت كلمه بلسانه
مثلِ الحُسين لمثله مَيـبايع
                 والمايوافق منهجـه اِيردّه

======================

دم نحره يتفايض حزن  ماسِكَن بعد امصيبته
               إلاّ الله ياخذ ثـاره

واِتعجّـبوا بعد الذبِح  كلما يرفعون الحجر
                يلگون دم يتجاره

والحُمرَه هاي البل سِمَه   بالسمَه ماچانت قَبِل
              سر ظلّت اِمن أسراره

وجازاه اَلله اعله الوفه  بالطف تسد عين الشمس
              مِن تلـتقي زوّاره


ذاك الغريب المنسبي اِسبايه
                الله خِـلَـقـله اهوايه مشايه
يم گبره تلتـم چنهم أولاده
              وحسين خيمه بكربله لوِلْده

========================

گالوا تَخلُّف عاللطم  معركه صارت وإنتهت
           إنسوا البچي وعاداته

يردوني أنسه كربله  والمهدي كل صبح او مِسَه
            يتفـطّـر بدمعــاته

وِيلـومني المـامِنچـوي  بنـار المُخيم والعطش
            وِيطـلّع اشكالاته

ياناس عدنه فاجعه  والمـنذبِح إبن النبي
             وتخضبَّن شيبـاته


يالمعترض لو عندك امروّه
                   صِد واِنظر المذبوح ياهوّه
جـدّه محمّد سيّد الساده
               الچان اِبرگبته ايقَبْـلَه وِبخدَّه

========================

دِيني الشعائِر واللطم   ماجابرَك بي تعـتقِد
                 خَـلَّك بعـيد بدِينك           

وحسين قِبْـلَه لكل وَفِي   مو حَكر بس لشيعته
             وشوف الزياره بعينك

كل الطوائف تجـتمِـع     يوم اَربعـينه بكربله
             وتلگاهم امضيفينك

موعدنه عشرين بصفَر   وي زينب بلهفه نجي
              ونگلّه ماناسـينك


اِبغضّ النظر عن دِينه واَفكاره
                  كل زاير الطف يعتبر داره
هوّه الحُسين بصحنه لمّاهم
                ولبّـوا دَعوْته بساعة الشدّه 
=======================

مأتمنه باقي ومستمر   بي فاطمه تنصب عزه
                وأگعد أنوح اوياها

وأبچي وأبلِّـل بالدمع   اشفاف الِحسين الذابِله
                  والماي ماروّاها

واشلون أَمسِك دمعتي   اوينحب رسول الله وعلي
               من كربله وبلواها

وياحال زينب والحرم  من طشّروهن بالفَـلَه
               وين الدهر ودّاها


كل هذا وِ اتريد أگطع ادموعي
          والرايح امن اِيدي ضوه اشموعي
واللي إِمامَـه يبچي يوميـه
                  حگّـه الحُسَيني ينمرد چبده

=======================

خادم الحسين "ع
مرتجى الحسَّاني

https://t.me/MM_lt5

المنظورات الحسينية
للمرحوم الشاعر ألأديب
الحاج ألشيخ كاظم منظور الكربلائي
المجلد ألأول

ديوان المنظورات الحسينية ٤ أجزاء.pdf

ديوان_المنظورات_الحسينيه_المجلد_الأول.pdf

اخواني الرواديد✋

هذا الديوان درة عظيمة👆
والشعر الموجود بي مساحات تلحين عظيمة
شعر خالي من التقريرية والتعبوية والسهولة، بل هو السهل الممتنع الحقيقي

حرامات هيج قصايد ما تنقره على المنبر