للقاسم "ع" عن لسان أمّه


طولك غصِن بس تارس الدنيـا افيـاي
عرس الشهاده امن الفرح أحله اهواي

يل كشخِتَك يم الخيم
چن الحسن شايل علَم
__________________________


إنهض يل ولَد قد حان الوَعد
وِبوجه الفرسان …..طگ بركــان

عمَّـك ينتـظر إرخصله العمر
لاتبخل بالروح ..........فدوه اتروح

شيل السيف .. يبن الچان ..يضرب بالسيفين
يومك هـاذ .. والميدان.. يسأل عنك وين
بهاي العين..خلّي حسين ..وخلّي الدين بعين
وظل عطشان .. تلگه الخير .. كلّه بوجه حسين


خل موقفك مابي نَـدَم من تخـتار
واثِـق الخطوه امبـيِّن اوما تحـتار

يل موقفـك مابي ندم
چن الحسن شايل علَم
__


يل طولك غصِن يتمايل حِسِن
من عنده النسمات……….خجلانات

أحله امن النـهر وارقى امن الگمر
يكشخ بيك النور ...….كل عاشـور

الْثوره اتريد..مثلك شاب.. يحيي عقول الناس
واتعــــنيت .. للميـــدان .. دگيتـلها الساس
يتباهــــون .. ظـلَّـوا بيك ..إحسين او عبـاس


هل دمع ابو اليمه إلك من شافاك
وشَم بيك عطر الحسَن لمّن باساك

واتجدد بروحــه الألم
چن الحسن شايل علَم
__


بعيونك هـدف تضحيتك شرف
تثبِت للأجيـال ………بالأفعــــــال

لابـس لامـتك عايف دنيتك
يوليدي بمگفاك .......تِتـمـــــنَّـاك

صح ازغير .. من تِنشاف .. بس عزمك ينهاب
ذاك الجيش ..شفته اگبال.. عينك صم اتـراب
مامر بيك .. إسم الخوف.. جدَّك داحي البـاب!

من نَسلَه إنته اوطالع ابزود اعليهْ
من دنَّگت! گِلت العدد ماهِـمْ بِيهْ

چان النصر عندك أهَم
چن الحسن شايل علَم
__


ياشبل الحسن يل روحك وطن
وِمظيفه الطعنات………...والطبرات

تدري اِبوگفتك صعدت رتبتك
يل بالدم وَفِّيت ...........لأهل البيت

عن إيمــان .. وِبـعرفـان .. للحگ من لـبِّـيت
رحت بشوگ ..صوب الموت..وْمستشهد رديت
واجب چان .. يبني اعليك .. وِلدِينك ضَحـيت


تضحـــيتك لعـمـك درس للشُـبّـان
من نهر مَجدك يرتشِف كل عطشان

ومن هالنهر تجري القيم
چن الحسن شايل علَم
__


روحي بكل فخر لو هلّ الشهر
تحـييلك تذكار ….........عن الصار

وابچـيلك دهر حد موت النظر
تستاهل دمعات ……….اوْ تعزيّـات

ما أنساك .. عيني اعليك .. تبجي بلايه احدود
وعندي اشهود .. شيب الراس .. وهاي اهدومي السود
وِعله الباب .. أگضي الليل ..هلبت يبني اتعود


كل عاشـر أنصبلك حزن ماموصوف
واتحزم احزامين الك وانته اتشوف

وانصب عزَه وي الخَدَم
چن الحسن شايل علَم
__


خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://t.me/MM_lt5

نخـوة الأنصار للسيدة زينب ع"

خل تظل مامونه ..... خيمتج
محد ايمس طارف ... شيلتج
مولاتي يازينب || مولاتي يازينب
________


إي وحگ خدرج يفخر الساده
مانخيبچ ، والرگَبْ سدَّاده
إطمئني وخلّي گلبج يستراح
لازمه احدودج أبطال وقاده

وأبو فاضل حارس .... ثايتج
محد ايمس طارف ... شيلتج
مولاتي يازينب
____

الليل يشهد عنَّه سِأْلي انجومه
امن اختبرنه حسين وسط الحومه
گال هذا الليل واتَّخْذُوه جَمَل
وعابس امن الغِيره شگ هدومه

حگه لو شگ ثوبه .... لغربتج
محد ايمس طارف ... شيلتج
مولاتي يازينب
____

غاليه او خدرج يعـزّ اعلينه
وساتر ، اگبال الخيم تلگينه
انصير سَد مانع إذا صار الهجوم
مانفشلج والله من تنخينه

بالشرف مرفوعه ..... هامتج
محد ايمس طارف .. شيلتج
مولاتي يازينب
____

واحد وسبعين يم صيوانج
مستعده اتضحي لجل اخوانج
گولي يامولاتنا خدّام إلـچ
مايردِّچ والله بس إلســانج

لا تظل بعــيونج .... حيرتج
محد ايمس طارف ..شيلتج
مولاتي يازينب
____

مايمر بس الهوى اعله اخيامج
وگبل إِخوتج ننذبِح جدامج
لو ألف مَرَّه لجل عينج نموت
هم نرد وِنـزيل ظيـم أيامج

حرمـة الله العــالي .. حرمتج
محد ايمس طارف .. شيلتج
مولاتي يازينب
____

للشهاده انطينه أخوج احچايه
اشما يبـيـعونــــه نِـرد شـرَّايه
انعاهدج مانِخذِل حسين الغريب
ومن دمانه انحـنِّي چف الرايــه

موتَه ونلَبـيـلِچ ....... نَخوتج
محد ايمس طارف .. شيلتج
مولاتي يازينب
____

لو أكو غير النَفِس ، ننطيكم
فَخُذِي مولاتي كيْ يرضيكم
آنه يخت حسين اِليْ كَلْمچ حبيب
روحي فدوه اشما يمر طاريكم

والمهم يازينب ....... راحتج
محد ايمس طارف .. شيلتج
مولاتي يازينب
____

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر ) تروينه بس عطشانه !!
https://t.me/MM_lt5

من سابع المُستحيلات يِنذلَّـن الفاطمـيات

كافل خدرهن ولْسترهن أفدي الِزنود
يازلمه يگرب لَختي زينب وانه موجود
ـــــــــــــــــــــــــــــــــــــــــــــــــــ

اتكفلتهن وانه مســـــؤول اعله كلشي
مايمــــر بيهـــن خطر إلّا اعله نعــشي
آنه أمشي او إختي جَـوّه الرايـــه تِمشي
زينب المفروض تگعـــــد جـوّه رمشي

بعيوني محروسه ياناس ماتنـذل او يمها عباس

زينب وصيتي وبحميتي ظِلـها معگـود
يازلمه يگرب لختي زينب وانه موجود
ـــــــــــــــــــــــــــــــــــــــــــــــــــ

آنـه گِـلْـت احچــايتي اوماثَـنِّي بيـها
بالله يازلمـه اليجي ويگـــرب عليـها
إختي مامســموع حـسها ولابچـيـها
إختي تامِـــــر وانـه حاضر بين اديها

لو عُطشت ورادت الماي .. تِلگه الفرات اعله يمناي

تدلل إختــي وبرگبتي أوفي الِعهــــود
يازلمه يگرب لختي زينب وانه موجود
ـــــــــــــــــــــــــــــــــــــــــــــــــــ

گبل موسى اثنـعـــــش عين اتفجرتـله
ابگد الٱسباط وعـــــــــددها اتوزعـتـله
ابسيفي من اضرب الطف عيون أحوْلَه
ابگد عدد جيش الحسين وعندي سهله

لو اَلله وِحسيني يِرضون أترس أَرُضْ كربله عيون

وافجر عيوني للنخوني اونطروا الجود
يازلمه يكرب لختي زينب وانه موجود
ـــــــــــــــــــــــــــــــــــــــــــــــــــ

يامكانه البيها أخوي اخـتصني وحدي
آنه قائد وانه كافــل بيهـــــــم أحدي
راي أبو الســــجاد نَـص قُـراني عندي
وِنعـگَــــد بالـرايه وِانشَــد اعله زندي

لارايه لا كِلْمِته اتطيح واحضر إذا (ياأخي) ايصيح

سـمعاً وطاعه مو إشاعه كلمة احيود
يازلمه يكرب لختي زينب وانه موجود
ـــــــــــــــــــــــــــــــــــــــــــــــــــ

حاول اوياي الشـمر يبعـدني مـرّه
گَلي عوف حسين وانه اَنطيك إِمْره
گِتله آنه امعاهده وعمري اعله عمره
أَنطي دمّي وماانطي بحسين شَعره

منطيهْ عهد من كلمتين أحيا او أموت اويه الِحسين

لا ما أبايع جاي ادافـع واحمي الِحدود
يازلمه يكرب لختي زينب وانه موجود

ـــــــــــــــــــــــــــــــــــــــــــــــــــ

خادم الحسين ع
مرتجى الحسّاني

خادم الزهراء مرتجى الحسَّاني
يازينب إنتي أول ( نهر ) تروينه بس عطشانه
!!https://t.me/MM_lt5

نزله للأكبر ع..


ياهله بشبل حسين من طب عليهم
______________________________

هذا الأكـبر شــاب بَـعـدَه بحيله
علي چـنَّه اوصاعد اعله اكحـيله
رمـح سمْهَـر طولــه مابي مَيـله
حســين مِتـشـيِّم وفرحـت ليلى

ابشريانه .. نبض دم الغِــيره
وميـدانه .. وگف كلَّه بحيره

شايل بچفّـه الموت واتعـــنه لـيهم
ياهله بشـبل حسين من طب عليهم
__

وخّـر إلـثامه او نزل للســاحه
اليوم أميـه ماتشـــوف الراحه
مثل سيفه اعيـونه هَم ذبّـاحه
واليخزره ايطـيح مِنه اسلاحه

بفعـــاله .. خِسَف ظهر الحومه
اليدناله .. الله كـــــاتب يـومه

رِجفوا او طاح السيف من بين اديـهم
ياهله بشـــــبل حسين من طب عليهم
__

يرهِـب او هيبـــة نـبـي بعــيونه
اوْ بالمراجـل حيــدر ايوصفـونه
مثل صُلْب ايمـانه صَلْبه امـتونه
امن الفرس ماگـدروا ايطيحونه

شِيْـنحره .. چن أسـد بل غـابه
وِبـزغره .. والأبطال اتـهــــابه

شافوا ابهذا الشاب هيبـــة نَـبـيهم
ياهله بشبل حسين من طب عليـهم
____

الدِين يتفـــاخَـر ابظِـلْ اوجوده
ماگِـدر واحـــد يِمـس احـدوده
لَـوَن عادت خـيـبر المشــهـوده
بـابهـا بالطـف يِـقـلـعـه ابـزوده

مايتـعــب .. والحرايب عِـيده
لو يغضب .. يقلـع الطف بيده

چفه چف الكــــرار قــرَّر مَحِـــيـهم
ياهله بشبل حسين من طب عليهم
__

رايتــه الشـــايلـها بي تِـتــبــاها
اشما تِميل ايميل گـلـبه اويــاها
مِـثل ســـيـل الْجـارِف او ردَّاها
تـيِّـهَـت يمـنــاها من يســـراها

چم فارس .. صافن اعله افعاله
بي واهس .. يشمر الخَـــــيَّـاله

زوده زود العـباس ظل يگصي بيهم
ياهله بشبل حسين من طب عليـهم
__

امن الغضب صعدت بصدره انفاسه
فـدوه اروح الغِـيـــرته واحســـاسه
إبن غـانـــــم وي علي حـط راســـه
مِن بَـرز صـــوته انگطـع مِن سـاسه

لَـخـيامه .. رجـع بِـيــده ابشـاره
وَايَّــامه .. ســــولِـفَت بَـخــبـاره

آل هاشــم عالناس يمشي حَچِـيهم
ياهله بشبل حسين من طب عليهم
__


خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://t.me/MM_lt5

للقاسم عليه السلام


يـايُمـــه يـارمـلـه امسافر أنا برِحله

دفنيهن اِثياب العرس ثوب الشهاده اَحله
ـــــــــــــــــــــــــــــــــــــــــــــــــــ


ابصدري أحس نِفسي اختنگ لبسيني لامَت حربي
عمّي ينــادي ابغُربته وِعيونـــه بالطف تربي
بين الشـهـاده اودِنْيتي خيّرت عـقـــلي وگلبي
وثنينهن صاحَـن سِــوَه حســين، وتوحَّد دربي

حزميني حَزميني ولـعــمّي وَدِّيـني
شاب آنه وأهلي امصيِّته عندي الحرب سهله
ـــــــــــــــــــــــــــــــــــــــــــــــــــ

ابثالث سنه من فارگـــت والــدي بذيـج الفـتـره
وعشت بحضن عمي السبط حَدما بلغت العشره
عمــي أبـــــــو ثـاني إلي يگسملي حتى النظره
وِيصيح (أَلَا مِن ناصــرٍ) شلون أسمع ومانصره

وتلـثطعـش عمــري جيت أرخص بنحري
مثل إبنه آنه أنحسب وما أركض أفزعـله
ـــــــــــــــــــــــــــــــــــــــــــــــــــ

يايمــــه عمي ماقِـبــل أبـرز وَاضحِّـــي بدمي
گال أمّك اتريدك ذخــر رد يبني صوب اخيَّمي
ٱنطيني وصيــــة والـدي أرد اراويها لـعـــمّـي
يْشوف الحسن بيها شكتب وبكربله اشوصّه أمي

طلعيلي الِوْصـــــيه خل تشــــهد اعليه
يقراها عمّي او أنتظر هالمطلب ايقبــــله
ـــــــــــــــــــــــــــــــــــــــــــــــــــ

شاف الوصــية بدمعـته وكل كِلمه يشـهـگ بيها
قَـبَّـلـني وانطــاني الإذِن من قرّر ايوفّـيـــها
للخيمه گـاداني ومِشــه چانت إلي امسـمّـيها
ناده الشهاده لحضرتي وبالطف عقـدني اعليها

يازفَّـــــه يــاحـــــنّه نتلاگــــه بالجـنّه
عمّي وحيد بكربلــه وما أنقـتل قَـبــله
ـــــــــــــــــــــــــــــــــــــــــــــــــــ

إنْ تنكـــــــــروني فأنا نجل الحسن گلتلهم
وعـباس گَلي من تطب صدر بصدر گابلـهم
دَنگت أشده امن انگطع ماداير البــال إلهم
شاب آنه مابـالِـــغ حُلُم بس بالــغ اوواصلهم

شَد نَـعـلِي ذَلَتــــهم دِسْـت اعله كثرتهم
انذلّت إلي السبعين ألف وآنه أرفـض الـذلّــه
ـــــــــــــــــــــــــــــــــــــــــــــــــــ

خادم الحسين ع
مرتجى الحسّاني

https://t.me/MM_lt5

تقول مولاتنا زينب "ع ( سمعنا اضلاع أخي الحسين يوم العاشر تتكسر كما تتكسر القوارير)
*****

[ مِثْـل القَــوَارِير لَـضلوعه تكسِـير ]

بالخيمه واسمع طَگ ضلِع
والصوت بالطف يِنســمِع … مثل القوارير
__

مِن خيمتي .. واسمع كَسِر .. هَد حيلي وِدموعي
والصوت اِجه .. بِذني تَـرِس .. حَـسِّيته بضلوعي

مِن طاح اخوي ٱمن المُهر فوگ الگاع
بالخيمـه واسمع تـنـكسِـر منّه اضلاع
والـدنيـا حَمــره اوشالت الـدم اشراع
يحســـين ميِّت لو عدل رِدلي ابسـاع

[بِعيوني ماشـوف بس حَمره اِلِسيوف]

خيل اعله صدره تِـنـدفِع
والصوت بالطف ينسـمِع … مثل القوارير
__

ماظل بعد ..فَيْ لِلخدِر .. صرت أشعر بهيمه
وصدري اِختنگ ..وين المَفر .. لو طاحت الخيمه

إرفَـعِـت طَـرْفِ الخـيـمه بٱمر الســجاد
مـن عِـدها شاهَـد والـدَه وحزنــه ازداد
گَـلِـي يعمــــه حـان وكـت المِـيـــعــاد
گـومي اســتعــدِّي للـسَــبِي المـا يـنراد

[ حـضريلچ امتـون باچـر يضــربون ]

وْللشـــام ظُمّـيلچ دَمِـع
والصوت بالطف ينسمِع … مثل القوارير
__

هاج الألـم .. وتذكرِت .. ضلع أمي الـ اتكسـر
هاليوم ماتت فاطمـه .. ومات الوصي حيـدر

اتمنيت اموت ولانَفَـس عمري ايطـول
وماشوف أخوي اگبالي طايــح مقتول
امحضرين إله بعد الذبح عشـر اخيول
لُطفك إلاهي بْصَـدر اِلِحســين انـگول

[ لو عندي نص حيل أمشي ادفع الخيل]

داسَــن أخـوي بيا شَرِع
والصوت بالطف ينسمع … مثل القوارير
__

ظِـلَّك رحل .. والشـر بـزغ .. ياوحشتي بليلي
وبياوكت .. ماعندي أخو .. أُوگَع وٱشد حيلي

ابآخر اوشـالت حيــل اجيتـــك يحسين
أَمشي عله شوف الگلب مو شوف العين
"غربه وخطر" وِإلـتَمَّـن اشـــلون اثنـين
لمّــن وصلـتـك حِيــره تِنـشـال امـنين

[ قِطعَه امن الِجروح واگبــالي مذبـوح ]

صَـدرك ابظهرك منطـبِع
والصوت بالطف ينسمع … مثل القوارير
__

جيـتك جرح ..وِتـوسدِت .. يم عَتـبت اجــروحك
من كل عضو ..تنزف دِمَه ..ٱلْدِين أغله مِن روحك

يم نحـرك المگطـوع أسـولِـف بِـهداي
يبن أمي شِنهي اليوجعك إحچي اوياي
محـتـاره أشــدِّن يـانـزِف بيـك اهـواي
ولاراس عِـنـدك حتـى أنَـگُـطـلك مـاي

[ ماعنــدي يحسين بس دمعـة العين ]

خاف أبچـي يمك وانمـنِـع
والصوت بالطف ينســـمِع … مثل القوارير
__

خويه اشعجب .. ماحَرَّكِتْ .. چفك وَنَـا اگبالك
بس يا أسف .. صـاير وِذَر .. شِـيحـرِّك اوصالك

راح أمشي واصبــغ شِيلتي بدم وِتْـراب
ٱمن اشتاگلك أشتـمَّه بي عطـر احباب
كـل يـوم أعَـلِّـگْ ذِكــريــاتك عل بـاب
واتـلـهَّـفَـك لَـهفة علي اويه المِحـراب

[ لو ضَـكـني الِـفراگ لَـعيـونك أشـتاگ ]

مِن شِيلـتِي عطرك يشِــع
والصوت بالطف ينســمع … مثل القوارير
__


خادم الحسين ع
مرتجى الحَسَّاني

خادم الزهراء مرتجى الحسَّاني
https://t.me/MM_lt5

زيارة صاحب الزمان لجده الحسين"ع"

القصيدة فيها مضامين واقتباسات من زيارة الناحية المقدسة المروية عن صاحب الزمان فيخاطب جده بلسان الحال ويقول:
========================


بِـدمـوعي أزور گـبرك بالمَـغيب
وأبعثـلك سَـلام للطف ياغــريب

بالطف لو چِنت حاضِر أُوگَـفْ للخـيم ســاتِر
( ياغريب ياغريب)
=======================


اعليك اسلِّمْ كل وَكِت واقــرأ الزياره
اوياك أجَدِّد حزني وارفعــلك شِعاره
آنـه ياجـدِّي الأبــد ماينـســــه ثــاره
ابغـيـبته ايْـنِدبَـك يظل ليـله ونهـاره

جرحك ياحسـين جمرهْ او ماتهِـيد
وْثـارك مايمــوت يرجع من جديد

وارجع علْ عهَد ثائِـر أُوگَـفْ للخـيم ساتِـر
(ياغريب)
=======================


أَلسَّـــلام اعله التِـغـسَّـل من دِمــائَه
أَلسَّـــلام اعله الـذي هِـتْـكوا خِـبـائَه
مِـنَّه سِـلْـبوا خاتَـمَـه او سِلـبوا رِدائَه
اوْطِلعَن امن اخدورهن بالطف نِسائَه

من رَدّ الجَــوَاد مُـعـوِل لِلـخُـدُور
طلعَن ناشِـرات بالطف الشُـعُـور

چِنْت أتْمَـنَّه بالعاشِر أُوگَـفْ للخـيم ساتِـر
(ياغريب)
=======================


شفـتك اِتدِير بطرف عينك عليــهن
وانته مشــغول بجراحك ياولِيــهن
بادِرَن للمصـرع او تسـمع بَچـيـهن
لاطِمـات اوْجـوهِّن بـثـنين ادِيــهن

شافـنَّك جـريح طايـح علْ تُـــرَاب
عطشـان وتِلوج من عُظْم الْمُصاب

ومِثلك عالألـم صابِـر أُوگَـفْ للخـيم ساتِـر
(ياغريب)
=======================


سِـبَـوْا أهلك ياوسـافه وچتّـفوهم
(فَوقَ أقْتابِ المَطِـيَّاتِ) خَــذوهم
بالٱسـوَاق او بالمجـالس طوِّفُوهم !
وِعلَـه باب الشـام بالحَّـر وَگِّـفوهم

وادِم عِـدها عِـيد وِتْـدِگ الْـطِّبول
وِبقـتل الحُسَـين مقتول الرسول

حتـماً مِن أَرِد باچِـر أوگف للخـيم ساتِر
(ياغريب)
=======================


لُـو تِـأخِّـرنِي الـدِّهـور وْمـا أحـضـرك
والقَــدر عـائِـق يِصـــــير وما أنصرك
كل صباح وكل مِسـه ياجدي أذكــرك
حتى اموت بلوعة امصابي اعله گبرك

دم تِجري الدِّمُوع واتـأسَّـف علـيك
أتمـــنَّـه شـــهيد أوگـع بين اديك

لمَّن تِـطلب الناصِر أُوگَـفْ للخـيم ساتِـر
(ياغريب)
=======================


أَخْـتِم بحزنك واَظل لابـس سوادَه
والغِـيَاب اعليك اَخلصه بلا سعاده
أفرش اترابك وانـام بلا وِســــــاده
يل تُـرَابـك بي أشـم عطر الشـهاده

يَـمْطَهْـر ابْـدِمَـاك تُـربـة كـربـلاء
يـاوارث صِفَـــات كِـل الأنبـيــاء

ضِد كل طاغيَه وجائِر أوگَف للخــيم سـاتر
(ياغريب)
=======================

خـادم الحسين ع
مرتجى الحَسَّـاني

خادم الزهراء مرتجى الحسَّاني
https://t.me/MM_lt5

الْبَكَّاءُونَ خَمْسَةٌ : "آدَمُ ، وَ يَعْقُوبُ ، وَ يُوسُفُ ، وَ فَاطِمَةُ بِنْتُ مُحَمَّدٍ ( صلى الله عليه و آله ) ، وَ عَلِيُّ بْنُ الْحُسَيْنِ ( عليه السَّلام )"
وأما علي بن الحسين فبكى على الحسين (عليهما السلام) عشرين سنة أو أربعين سنة، وما وضع بين يديه طعام إلا بكى، حتى قال له مولى له: جعلت فداك يا بن رسول الله، إني أخاف عليك أن تكون من الهالكين. قال: إنما أشكو بثي وحزني إلى الله، وأعلم من الله مالا تعلمون، إني لم أذكر مصرع بني فاطمة إلا خنقتني لذلك عبرة


ياخامس البكّـائِين مِن آدم ليوم الدِين

تبچي كلما زادك ايقدمونـه إلك
تعرض اگبالك صوَر مقتل هلَك

ياخامس البكّائين
========================

لدمْعِـتَك كل الفضِل يرجع يسجَّاد

كربله لهالساعه ظـلَّت لوعـه تزداد

حسين مظلومِيته وصلت أقصى الِبلاد

ومابقت مدفونه جمره تحت الِرماد


من دَمْعِتَك ينرعبون ماتسكت اِلهم يدرون

ايزيد خايف حتى واِنته بمنزلك
تعرض اگبالك صوَر مقتل هلَك

ياخامس البكّائين
======================

إنته خامس مَن بِچه لبچَّه السماوات

وچنت إنته وگلبك اتعيش المُعاناة

سيدي او حتى بمنامك تطلَـع آهات

چنَّـك اتگــول الحزِن ماله نهــايات


وكلما يقدمون الزاد دمعك يصب يالسجّاد

دمع عينك يختــلط وي مأكـلَك
تعرض اگبالك صوَر مقتل هلَك

ياخامس البكّائين
========================

ندري يعگوب اعله إبنه ابيضَّت العين

وچان يعلَم بعده عايش ماخَذَه البين

واِنته بالعاشر عَكِس عشت الأَمـرِّين

ابعينك اتشوف الشمر حز راس الِحسين


جدّامك اتسحگه الخيل ياوسفه واِنته بلا حيل


گمت تتوچَّـه او تطيح اتخيّـلك
تعرض اگبالك صوَر مقتل هلَك

ياخامس البكّائين
========================

سيدي اثلاثين عــام لحزنك اتنــوح

شايل بصدرك گلب لو عالَم اجروح

تحچي ويّ الناس بس بالفرگه مذبوح

والبچي بس لْمُصاب حسين مسموح


مامتت من حد السيف بس متت من گد الحيف

وندري الله (لحكمه) أخَّر مقتلك
تعرض اگبـالك صوَر مقتل هلَك

ياخامس البكّائين
======================

والله لوما دمعك اِنسد مَلَف عاشور

او تِـنِّسيْ كربله وطفها بعـدَّة اشهور

خَذَت من گلبك حراره وظلّت اتفور

ومن بكائك ردت تـهلَك واِنته معذور


صح مابديت بثورات بس حقَّقِت إنجازات


واِنته تعرف بيش تضرب قاتِلَك
تعرض اگبالك صوَر مقتل هلَك

ياخامس البكّائين

========================

متت مسموم وعفِت لچمه اعله فرگاك

والإمام الباقـر بكل حزنـــه ينعاك

والصحيفه اشما توِن تتـألم اوياك

ولسَّه مفجوعه الرساله امن الخبر ذاك


يالجرحك بكبر الكون يتضمَّد اشلون اشلون

وبالمُـقابل، صبرك بكبر الفلَك
تعرض اگبالك صوَر مقتل هلَك

ياخامس البكّائين

======================

خادم الحسين "ع
مرتجى الحسَّاني
https://t.me/MM_lt5

مِن كل بُـقعه بالكون جِمعَت كربله الناس
اَللَّه اِشخلَّه بِـ حسين شنهو السر يعـباس
____


نِمشيلك مِـنّ البحــر إلـى النحـر
نمشيلك وانحـطِّم أَصنـام الخَطر
نمشيلك ما نتعب، اِنْـتَعبِ الدهر
نمشيلك يدفعنه حبنه بهل سَفَر .. نمشيلك


شَدِّينه الحيازيم لِلطف يابو الاَحرار
اوْنشرب بالدرب ماي بس مايبـرد الثـار
يا سِر عشگ الگلوب ياتاج العلَى الراس
الله شخلّه بحسين شنهو السر يعباس
____


بگلوبنه إنته اَوَّل او آخر عشِگ
بگلوبنه مُوته ونبض حبك يدِگ
بگلوبنه يوميـه خيمــه تحـترِگ
بگلوبنه نِسمع اضلوعك تنسحِگ.. بگلوبنه

مَشَّايه او حفظناه اوننـدَل دربك منين
طعم السَفره وَياك مثلِ الجنَّه يحسين
يمك راحت البال ياسلطان الاِحساس
الله شخلّه بحسين شنهو السر يعباس
____


راياتنه بِسم العشِگ لجلك ترِف
راياتنه حرَّه اِو أبـد ما تنچـتِف
راياتنه لو طاحت اتخظّـر ألِـف
راياتنه كلها اعله حـبك تِئـتلِف ..راياتنه

سَدِيناها الِبيوت ولگبرك حدَه الشوگ
اگلوب اولاگت اعليك وِانته اعليهن اتلوگ
نعمه امن السَّمَاوات بالطف وسفه تنداس
الله شخلّه بحسين شنهو السـر يعباس
____


خطواتنه. تَسبيحه تِخلص بالدرب
خطواتنه. مرتبطه وي نبض الگلب
خطواتنه. بحاصِل تَعـبهِن تنـظرب
خطواتنه. يلگَنْ أجرهِن من نطب ..خطواتنه

اِنعيد الماضي وِنزود نِنطي چفوف وِعيون
وننزل علْ خيم ماي مابِيـنه الْيِحـرگون
ليش اليِخْدِمَك صار من اِجدامه ينباس
الله شخلّه بحسين شنهو السر يعباس
____


شباچك. والله اِشتهينه اِنشِم عطُر
شباچك. لِلـزايـر ايظل ينتــظُر ...!!
شباچك. بي جمره من ذاك الخِدُر
شباچك. دايِـر اضلوعه اعله الگبر
..شباچك

هنياله اليجي ايزور منـك ياخـــذ امراد
عشرين بصفر صار للشوگ اَحله ميعاد
بي تتلاگه الِگلوب وي اَغله امن الاَنفاس
الله شخلّه بحسين شنهو السر يعبــاس
____

خادم الحسين ع
مرتجى الحسَّاني
https://t.me/MM_lt5

((لقاء الأحباب بالأحباب يوم الأربعين))


اَحباب وِمْلاگـه احباب وِالِگـبـور ابـلا بــاب
زينب امن الشام ردَّت وِبگلبها ألْفِ اصواب
_____

سَلِّـمَت والدمعه نزلت جمره فوگ الخَد
هـذا إبنكــم علي السـجّاد بظعنــكم رد
جايب الروس لجـثثها وحزن گلبه اِشـتد
ومو طـبُـع أولاد حيـــدر بابـهـم يِـنسَّـد

گوموا لُو بس اَجساد طَيْـبُـوا جرح السجاد
الفرگه هدَّت حيل إبنكم والْگلب شمعه وذاب
_

والله ضعنه واِختزينه امن السبي وأمره
الشام آه يالشام خلَّه بگلبي ألف حسره
بي شفت كل المصـــايب لاهله بذكره
وإلمن ايعيش اِبزمـانه الفرهدوا عمره

المثلك اشلون ايروح وماخَذَه اوياه الروح
چم گمر عفت وكواكب ماشفِت بس اتـراب
_

فوگ گبر حسين طاحت مثل خيمـتها
تاخــذ اتراب اوتـديره فـوگ هامتـــها
حسين مَيِّت بس سِمعها اوعرف وَنَّتها
هَـلا ابـإختي الطابت اجروحي بزيارتـها

ياهلا ابأغـله النــاس جايبـــه اوياها الراس
وإبتـشر گلبي ابرَجِعْتِچ وإلتـأم جرحه وطاب
_

تشتكي لـعباس أخـوها اوگـبره شابگـتَه
وابو فاضل من سِمعها مارِضَه اعله اخته
گَـلْـها راسـي اعليــج حـارس آنـه أمَّـنْـتَه
خاف حسبـالچ نســيتـچ ظعني ماعِـفـته

كلشي بِـيَّـه ايحـــيِّيچ إختي واتنومَس بيچ
غِيرتي امْچَلْبه بعباتِچ خاف يِنجَـرّ احجاب
_

ياعـلي الأكـبر يعـمَّــــه إِنفُـض اتـرابك
وفُكلي گبرك أرد أشمَّــك يذبح اغيابك
اليـوم إجيت بنـــار گلبي وحايره ابّـابك
عمّه أنوح اعليك وانحب واذكر امصابك

وجهك اليسطع نـور طُـفَـه بعشرة عاشـــور
والله فَت گلبي غيابك عالگبر بعدك شاب
_

گابُلَـت جاســم اوطاحت هِيه والدمعه
من جَمُر گلب المصيبه عِلگت الشـمعه
عفيه بِـبـني العاف عرسه وْكاشخ بدرعه
ازغير بس اسنين عمـرك حلوه بالفـزعه

جيت أرش گبرك ماي مـن مَدامـــع عينـاي
بلكي تِنـــزلَّك ابـروده أدري گلبــك لَـهّـاب
_


خادم الحسين ع
مرتجى الحسَّاني
https://t.me/MM_lt5

قالت لمن أراد ان يشمت بها(( مارأيت إلاّ جميلاً ))

زينب بنص القَصُــر ماظل أخـو حَيْ لَـها
وْرغم السـبي والتعب مثل الجـبل حيلَها
اشما تلتفت تِنصدم شـامت تَجِـد حيلها

وراس السبط بالطشت تدري بگلبها شفت
وِيْـگـلها إبن الخَـنـا روحي بقــتـلكم شِفَت
گالتله وبكل فخـر بالطف جمـــــيـلاً شِفِت
حسين انكتبله القَتِل واخته الصبر حي لَها
______________________________

الْبَكَّاءُونَ خَمْسَةٌ : "آدَمُ ، وَ يَعْقُوبُ ، وَ يُوسُفُ ، وَ فَاطِمَةُ بِنْتُ مُحَمَّدٍ ( صلى الله عليه و آله ) ، وَ عَلِيُّ بْنُ الْحُسَيْنِ ( عليه السَّلام )"
وأما علي بن الحسين فبكى على الحسين (عليهما السلام) عشرين سنة أو أربعين سنة، وما وضع بين يديه طعام إلا بكى، حتى قال له مولى له: جعلت فداك يا بن رسول الله، إني أخاف عليك أن تكون من الهالكين. قال: إنما أشكو بثي وحزني إلى الله، وأعلم من الله مالا تعلمون، إني لم أذكر مصرع بني فاطمة إلا خنقتني لذلك عبرة

[ياخامس البكّائين]

أداء الرادود الحسيني الحاج عمار الكناني
كلمات الشاعر الحسيني مرتجى الحساني
_________
مجلس عزاء شهر محرم لعام 1446هـ
هيئة جامع الإمام علي [علية السلام ]
بغداد شارع فلسطين

https://youtu.be/wzi4tszSBL0

طلب الإمام زين العابدين "ع" من سهل ابن سعد الساعدي ان يدفع الى حامل الرأس الشريف بعض من الاموال لكي يقدّمه أمام السبايا حتى يشتغل الناس بالنظر إليه، ولا ينظروا إلى حُرم رسول الله "ص" بقوله:فقد خزينا من كثرة النظر إلينا



عَمْ ياسَهَل روح إخبرِ الحرَّاس
خَل يقَدمون الراس بي تِـنشغل هالناس


واتبطّل اتعاين عَلِينه مِنّ النَظَر والله اِخـتزينه

خَل يقَدمون الراس
=======================

بالسبي عنَّه تنشد واَدري مِستغرب چنِت

ياعَجَب اتگول عند الشام عيد اِمن اِشوكِت

ياسهَـل آنه إبن حسين إِمامك بس ضعِت

وعالهزل بالدرب عشــرين يـوم اتعذّبِت


لو جدّي طه اموصّي نفرض كِون
بالعتره ينقـتلون ماچانوا ايفعـلون


ويمكن فلا حتى انسبينه مِنّ النظر والله اِختزينه

خَل يقَدمون الراس

=======================

مو حزِن اتزيِّـنَت كـل الشــــوارع بالفـرح

اتباشروا عيـد عدهم چي أبو اليمـه انذبَح

ياوسف الباع دِينه وعاف درب الله اشربح

وبالنصر الله يختِـــم بينـه لَن بينـه فِـتَـح


والرايد اِيعرفَ الله والقرآن
يـتبعنه بالإيمان حجَّه اعله كل إنسان


يهلَ الله بالشام انولينه مِنّ النظر والله اِختزينه

خَل يقَدمون الراس

========================

ياسهَـل وكت خلّه الناس تـرمينه بحجَـر

وبالدرب نســـمع اليشتمنه وِنغض النَظَر

مِن هَلِي صح بقـيت وما مِتت يـم النـهر

مامتت ! بس حچي الشمَّات مـوّتني قهر


عجبه الأرض ماتنخسِف وِاِتـمُور
من فاجعة عاشور بينه الدواهي اتدور


مَـل الدمع گدما بِـچينه مِنّ النظر والله اِختزينه

خَل يقَدمون الراس

========================

بالشمس اِبلاغِطَـه وِبلاوِطَـه اِبحـرّ الظهر

نشـتكي الحال يـا أُمـة محمَّـد ما يِـسُر

اتمحَّنت ياخلگ وينه اليــدوِّر عـن أجـر

يلتفِـت لـيَّـه، وِيساعدني مهضوم اشكثر


عم ياسهَل والله الجروح اهواي
أوَّلـها دم وليـاي وآخرها ذلّ اعداي


بس الألم والهم لگينه مِنّ النظر والله اِختزينه

خَل يقَدمون الراس

========================

بكربله عطّشــونـه او ذبّحــونـه بكربله

نبچي دم وحتى وَجْـهِ الگاع من دمنه امتِله

أسْـأَلَك ياسهَل عمــرك شفِتـلك عـايـله

بلا حِـمَه تمشي مسـبيه وزلمـها امچـتّـله


شفت اِبحياتك هيچي علْويات
عالنوگ مسبيات ويطوفن البلْدات


سلَّمْنه لـ أمر الله ورضينه مِنّ النظر والله اِختزينه

خَل يقَدمون الراس
========================

امن الألم يـاسهَـل غيَّـر ملامحنـه الـدرب

وعالرمح راس أبوي اگبالي شيظل بالگلب

فاجعه فوگ كل هذا الألم مچتوف أطب !

وعالمتِن اِگبال كل الشام بالسوط انضرب


شيَّـبنه من محنة طريق الشام
بس والله ما نِـنضام مادام أكو خدّام


هيه التشافي اجروح اِدينه مِنّ النظر والله اِختزينه

خَل يقَدمون الراس

========================

خادم الحسين "ع
مرتجى الحسَّاني
https://t.me/MM_lt5

لسان حال أم البنين تروي لأمها تلك الرؤيا العظيمة التي رأتها في المنام ! فتقول لها?
===========================

چِنْت بمنامي او صافْنَه بهذا الكون
وِبحجري لَنْ طاح الگمر مدري اشلون

وِثْلَث نِجُوم اِتشِع ضِوَه
وَيه الگمر طاحن سِوَه !! ..نُورٌ على نُورْ
____________________

يايمه فَسرِي رؤيتي بتفسيرچ الإيماني
چَنِّي بخَضَار اوجالِسَه وطاح الگمر بحضاني
وِثلَث نِجُوم اتساقطَن اوضَيْ نورهن أَغْشَاني
بشريني خليني أطمئِن ظلّ بقلق وجداني

جيت بشعوري اوسلفتلج رؤياي
گالت: عقيل لوالدچ يخطب جاي

وْراد إيدچ لحامي الحمه? مِن حلگچ لباب السمه
ياربي مشكور نورٌ على نور
___________

يُمه وبعد شِفْت العَجَب هاتف هتف وِاسمعته
(بُشْراكي بالساده الغُرَر) صاح اِسمي بس ماشفته
وفزّيت مرعوبه اوگِلِت خير ، او يجيني بوكته
وِاليتِّصِلْ بآل النبي يكبر شَرَف مَنْزِلته

والعارف بحق فاطمه ايشوف الخير
تِلتقطه باچر مِثِل... حبَّات الطير !!

عنها اسمعِت هذا الخبر وبگلبي حب فاطم كُبَر

نَص عنها مذكور نورٌ على نور
___________

گالتلي اِبشرِي ابرؤْيتِچ مُستقبلچ بي شاهِد
عندچ يصيرون أربعه والگمر أوَّل واحِد
وِتصير بعده اِثلَث وِلِد ساعِد يِعاوِن ساعِد
وبيهم تگر عينج إذا كبروا اِبظِلّ الوالِد

گلتلها ، هنيالي بهذوله الشُبَّان
لَحسين وِلزينب يصيرون اِخوان

بهاي البشاره استبشَرِت بس رايِدَه لزينب إخِت

وي وِلْدي اِلِبْدور نورٌ على نور
______________

وِتحقَّق ابّالي الحلم وطبِّيت دار الزهره
وَأوّل طلب گِلْت لعلِي غَيْر اِسمي يابو العتره
كلما صحتلي فاطِمَه بحسين أشوف الكسره
آنه اَرد اصيرن أمّ إلَه ماريد أصيرن عثره !!

ومن باب خوفي اعله اِخته زينب بالدار
ماريد بيها ايظل يحيدر بسمار !!

امن الباب لوما ينشلِع لَبنيتي هَمْ يكسِر ضلع

گلبي إلها ناطور نورٌ على نور
___________

من خيمتي لدار الوحي يافاطمه اشهلْ نعمه
أُم صِرِت لَحفاد النبي اوزوجة أمير العصمه
كلما حِزَن وَجه الحسن لشفافه اَصيرن بَسمه
وِبصدره لوضاگ النفَس من صدري ياخذ نسمه

كلمه او گلتها اوگلبي أبد مامرتاب
أحيا او أموت بحب علي داحي الباب

سِلمٌ لِمَن سالَمَهُمْ حَربٌ لِمَن حارَبَهُمْ

واليهوى معذور نور على نور
_________

وصاروا أَولادي الأربعه اوحيدر تِنُومَس بيهم
وِب(قُل أعوذُ) امن الحسد من خوفه يقرأ اعليهم
قبَّـلهم بثغره النَدِي وِبفرحته ايناغيهم
وِاسمَعته بَشَّر فاطِمَه يالزهره شِنْسمِّيهم

گالتله من وحي الخيال ابأحساس
سمِّي البقيه وآنه أسمِّي العباس


هذا إبني واَعرف غيرته بالدم يوَفِّي لخوِّته

اويشهدله عاشور نورٌ على نور
__________

خادم الحسين ع
مرتجى الحَسَّاني


078 54824915
https://t.me/MM_lt5

يقول إمامنا الصادق عليه السلام ((لاتنال شفاعتنا مستخف بصلاته))


من بين الوصايا الحَثْ عليها
صلاتك گال هاللّه هاللّه بيها

إمامـك وَصَّـه بِـثنين
الصلاة ويوم الِحسين

صلاتك گال هاللّه هاللّه بيها

=========================

١_
شرف كل خدمه مرهون بشرف طاعه

او صلاتك مَركَبْ او تطبيقك اشراعه

فرض عَيْنِي اعله كل مسلم الى الساعه

تره المايقــوَه بـالله تنـلّــوِي اذراعه


القوي يقوه بصلاته او إلتزامه
يطيع الله بمثل طاعة إمامه

عَلِيهن إنتبه زين     الصلاة ويوم الحسين
صلاتك گال هاللّه هاللّه بيها
=========================

٢_
اليشغلك عن صلاتك نَبِّـهَه اِو گِلّه

الصلاهْ عندي أهَم مِنّ العمل كِلّه

وإذا تلگه بطريق الحگ زلم قِـلّه

لا تستـوحشه مادامـك بظِـلّه


طريق الحگ يريد العنده غِيره
على دِينه وصلاته وحَي ضميره

وحفاظاً على السِرِّيَن   الصلاة ويوم الحسين
صلاتك گال هاللّه هاللّه بيها
=========================

٣_
(عمود الدِين) واَعمالك رَهِـن بيها

وَأهَل بيت النبي اشگد حثّوا اعليها

تره اليخدِم إمـامــه وما يـأديها

بلاشك هايه خدمــه لايسمّـيها


وصَيَّةْ جعفر الصادق عقيده
اِلْيِضَيِّعها يِضَـيْع آخرته بيده

مِثِل فضل الله عالعين   الصلاة ويوم الحسين
صلاتك گال هاللّه هاللّه بيها
=========================

٤_
اشحلات اليخدم امخلّي الله بعيونه

نمـوذج تفتـخـر بيه اليحـبـونه

تره اَهل البيت خادمهم يعرفونه

اليحبهم مايصلّي مايريدونه


إذا تنطي لصلاتك أهَمِّـيَّه
كل اعمالك اتهون البقيه

إهتم بالوصيتين    الصلاة ويوم الحسين
صلاتك گال هاللّه هاللّه بيها
=========================

٥_
تعال لـكربلـه او طالِـع مَـشاهدها

وشوف احسين إمامك من لزم حدها

أقـام احـدودها او ثَـبَّت قواعدها

رساله اِنطانه حتى نرتقي اِبسِدها


توضَّه وأدى فرض الله بسلامه
رغم يگــدر يصلِّــيها اِبخِـيَامه

اشحدّه ايفرّق البين    الصلاة ويوم الحسين
صلاتك گال هاللّه هاللّه بيها
=========================


خادم الحسين عليه السلام
مرتجى الحسَّاني
07878503032

https://t.me/MM_lt5

قام العباس بتحريك خيل الثورة بأمر أخيه الحسين ابن علي دفاعاً عن الاسلام.
---------------------------------

راعيها ساگ الخَيل راعيها

خل تستعِد كربله والْبِـيها

              __


شَـد العهــد تعويذه بِزنوده

والرايه رفَّت واِبتـسَم جوده

ماينعـبر خط أحمـر احدوه

تحسبله مِيْةِ اِحساب خليها

***

خل تحسب او تجمع كتايبها

يوصـلها عبـاس او يحـاسبها

بالسـيف لـو عـالَـت يـأدِّبــها

ومن ألَـم علَّـتـــــها يـداويها

***

حط إخته بالهودج على الناگه

او يسگيها ماي ويابسه ارياگه

ترتــــاح مِن وَيَّــاه تـتــــلاگه

وكل خوف مايوصل بعَد ليها

***

للطف طلَـع غاضب لجل دينه

من شاهــدَه اِختـلَّـت مَـوَازينه

ودِين الله لاذ بســــاعد اِيـمينه

ويدريه غيــور بدمَّه يگضيها

***

لجل القِـيَم والمبدأ السامي

چان اِندفـاعه بدافع اِسلامي

إلجـود بيـده والعدِل ظامي !!

والأمَّــه رادت مــاي يرويـها

***

طب كربلـه واِخيـــامه دگّـاها

وشيخ العشيره حسين حياها

دنّـگ وأخــذ تُـربتـها شمَّـاها

وصاح الشهاده بدمّـي شاريها

***

وزّع القـــــــادَّه كلمـن او دوره

واتحدَّه بيهم خصمه واِقصوره

چانت امفَرعَه او ردها مستوره

إلدنيا ، من ذب صـايته اعليها

***

هاي الحـرب مـاهِيْ إعتبـاطيه

عن مصلحه أَو رغبه شخصيه

چانت حرب ضد ( العبوديه )

وحسين بَـيَّـن كـل معــــانيها

***

گاللـهم الحگ هذا والباطل

من قَبِـل لاينــزل أبو فـاضل

اعله احساب دِينه والله مَيجامل

والمارضت بالسيف يرضيها

***

مو خـوف راد ايبـيِّـن الحجَّه

خاف اِلها راي اتردله محتجّه

كلما يحــذرهم تِهِـب ضجّه

عن لاتسمعه وصوته يهديها

***

كتبوا نصرهم بالدِمَه الغالي

وماخلّوا افراش المجد خالي

ماتــوا عَليهْ بالموقف العالي

والحگ شُكرها او قبَّـل ايديها


                 ***

خادم الحسين "ع
مرتجى الحسَّاني

https://t.me/MM_lt5

مسلم طِوَه الكوفه   حيل الله بِچفوفه
____

سلّ الغضب وي سيفه    والغِيره جدحت نـار
وبيهم فـتح ميـــدانه      حيّ اِبن أخو الكـرار
ماسِك زِمـام الكــوفه       چن مَسكَت البتــار
گص بيده خيط الرحمه   سبحه وصفوا طشَّار


تنبض وِفه احروفه     حيل الله بجفوفه
___

هـيبـــة علي بعــيـونه     وِبروحه صبر حسين
وزود الگـمـــر بِزنـوده      يـطبگ اِثنين اِثنين
هذا الوگــع من خـوفه     وذاكه الشرد لاوين
ظل كوفي يسأل كوفي    هذا الشجاع امنين


بيـهم تـرك خوفه      حيل الله بجفوفه
__

طوعه بشغف تربـيله     واِتشَجِّعه اعله اعداه
حرمه وخذتها الغِيره      رادت تطـب اِويـــاه
بس هيه عكس الوادم     ماطِعـنَت بمگفــــاه
صارتله سيف او رايه      عن يمنته ويســراه


بالشـده مَـتـعوفه        حيل الله بجفوفه
__

صاحب رساله وزوده    گــدها وثلث تنـعـام
طاع الحُسَين وشوره     وشد للمهمَّـه اِحزام
عن حُـبَّـه مايثـنـــونه     مسلم أسـد ضرغام
يشبه علي بصـــولاته     ضرباته فوگ الهـام


ضرباته معـروفه      حيل الله بجفوفه
__

وَحـده ومِئات اگبـاله    ياعــازت العـبــاس
لو ينتخي بزود اسمه      چا طگها راس براس      
وِيطب قَصرهم گوّه      وِيـفــرِّق الحـراس
عالحگ يگطْعِ اجفوفه    والرايـه ماتنجاس


بالمعركه اتـشوفه      حيل الله بجفوفه
___

خادم الحسين ع
مرتجى الحسَّاني

https://t.me/MM_lt5

عندما لم يجد مسلم ابن عقيل من يوصل رسالته الى الامام الحسين فقد دفعه الأمر أن كلَّف الريح بحملها إليه ويقول فيها:


ياريح گلّيـله الحچي اتبــدَّل

وحِبرِ الْرسايل خنجر اتحوَّل

گلّيله كلشي اِختلف   ومسلم وگع وانچتف
                    ياريح گـلّيله

=======================


ماظـلّي صاحب كلهـا خانت ياريح

وماي الِوجوه البلگصص شفته ايطيح

إبليس شاهر حقــده ضدّ التسبيح

ومسلم (أما بيكم شرف) ظل ايصيح


سلمي الرساله لحضرت اجفوفه

وگلّـيله مسـلم باعـتـــه الكوفه


والشمس ضَيها انكسف  ومسلم وگع وانچتف
                        ياريح گـلّيله
======================

گلّيـله مسلم للقصر طب مچـتوف

واِجروحه تنـزف والصبر بيها ايروف

والنـاس ذبَّـت منهـا ثوب المعروف

والنخوه ماتت والوفـه بلايه اچفوف


مو سلعه، ليش انباعت الشيمه!

والدِين عدهـم مـالـه كل قيمه


ماي الحميه نِشَف   ومسلم وگع وانچتف
                     ياريح گـلّيله
======================

گلّيله ماكو أنصــار كلهم عدوان

غرّتهــم الدنيـا وخِداع الشيطان

تلهث وره الدينار مثل العطشان

ومحّد يســـولف بالقيم والقرآن


الظاهر شكِل، مايشبه النِـيّه

والنـاس ماتستـاهِـل الجـيّه


وانحرفوا بمنـعطَف   ومسلم وگع وانچتف
                     ياريح گـلّيله

======================

گلّيله يرجــع لايجي ، النـاس اِذياب

عافوني وحدي وسدّوا بوجهي الباب

الغـدروا گبل عمّي عـلي بالمحـراب

عن دِينك أهل الكوفه صاروا اَجناب


گلّيلـه مامــدّوا يـد البيـعه

گالوا نذبحه ويحلم انطيعه


طعنوني والدم نزف   ومسلم وگع وانچتف
                     ياريح گـلّيله

======================

گلّيـله كـلها اتآمـرت ضـدّه ايگــول

وعن الرسايل ماكو شارب مســؤول

الباطل يجول بطوله والحگ مشلول

انگلبت على الإسلام وادم واخيول


بالجاهليـه وچانت النخوه

عند العرب، ماتنكر الخوّه


گلّيله مات الشرف   ومسلم وگع وانچتف
                    ياريح گـلّيله

=======================

گلّيــلـه دوَّر راد واحــــد يـوصيهْ

حتى القريب الغِيره هم ماتت بيهْ

طبـع الخفافيش، الضوه ماتِـدنيه

اتعيش بظلام الليل متعوده اعليه


گلّيلـه ماتلگــه اليـحبـونك

بس توصل اتفقوا يذبحونك


وجه الحقيقه انكشف   ومسلم وگع وانچتف
                        ياريح گـلّيله

======================

خادم الحسين "ع
مرتجى الحسَّاني
https://t.me/MM_lt5

ياحسين اِبخدمِتَك   ماردت بس نظرِتَك
            
                ماردت بس نظرِتَك
========================

ماخِدَمتك لجل غايه وشُهره واِعجاب

بس لگيـتك باب رحمـه وفاتـح الباب

البيك يلـزم مايميل اويه الهوى الهاب

مِنتـبه زين لخدمتي وحاسب احساب


خَلْني جوّه رايتك    ماردت بس نظرتك

========================

مِن تشاهدني اشْعلَيه بنظرت الناس

ما امْخلي الشُهره دوم بديني مقياس

للإخـلاص أم البنين الوِضعَت الساس

وخل نشوف شلون چان اِيخدمه عباس


ايگلّه آنه بطاعتك  ماردت بس نظرتك

========================

الشُهره مو مقيـاس لازم نِنـتـبه زين

أكو مغـمورين عنهم راضي الِحسين

لو ردت توصـل لـگلبه الطاهر منين

خلّي تجري المعرفه وي دمعة العين


مِن أوِن لمصيبتك   ماردت بس نظرتك

========================

كون نهتــم بالقضيــه بگـد الَالحان

چان ماظل ينتـقـدنـه افـلان وافـلان

بالاَدب والمَعرِفَه اشگد عدنه نقصان

وعلى اِخيامه البعض يشمر حچي ونيران


ياحسين امروّتك   ماردت بس نظرتك

========================

لو خدمت حسين وإسمك لامِع ايصير

إحــذر ايذبَّـك غُـرورك داخِـل البير

تره اهوايه صعدوا وطاحوا مشاهير

الخدمه جنحان الكرامه وبيهن اتطير


احسبني نسمه بحضرتك  ماردت بس نظرتك

========================

اِتواضع اشما ترتفع بس تِغـتَر اتطيح

المو صلب إيمانه يهوَه بعاصف الريح

كن حذر من تلفظ إسم حسين واِتصيح

واِبتـعـــد عنّ القصيده البيـها تجريح


وگلّه أطلب رحمِتك  ماردت بس نظرتك

=======================

اِخذوا خدمة حمزه قدوه يالتخدمون

او أي إســـاءة للشـعـائر لا تسمحون

يل ترســتوا اِسـهام گلبـه ماتشـعرون

تره بلحظه حسين عنّه ايديـر العيون


آنه ضد الجرحتك   ماردت بس نظرتك

=======================

خادم الحسين "ع
مرتجى الحسَّاني

https://t.me/MM_lt5