Glucose Metabolism

ماهو مصير السكر في الدم ؟

لنفرض انك اكلت سكريات او سكريات معقدة مثلا بولي سكرايد وهذه بدورها بالجهاز الهظمي تحولت الى كلوكوز . هذا الكلوكوز وصل الى الدم ،

لمن وصل الى الدم نريد نشوف هذا الكلوكوز وين يروح ؟ شراح يصير بيه ؟ شنو الطرق الي يذهبلها ( مصيرة ) ؟

🔹اول معلومة اكلكم بيها ان الكلوكوز يعتمر مونوسكرايد
Monosaccharide (C6H12O6)
من السكريات الاحادية

📍 فالكلوكوز لمن وصل الى الدم مصيره هو اما
1- يتكسر وناخذ منه طاقة ( بطريقتين راح نتكلم عنهن )
2- ينخزن وهذا الشي عملي ،
3- يتحول بشكل Fatty Acid
فانت
فانت لو تكسرها لو تخزنها لو تحوله الى شي وراح نتكلم هسه بالتفصيل

اول شي خلينة نتكلم ان هذا الكلوكوز تريد تكسرة

طبعا هو تكسيره وخزنه اعتماداً على عدة امور ( ماراح نتطرقلهن )
لكن الاهم على حسب كميات الكلوكوز الي راح تدخل الجسم ، شلون يعني ؟ 🤔
يعني انت اذا اكلت نص كيلو من الحلويات فهذه الكمية كبيرة والجسم ما راح يكسرها كلها لان هوايه والجسم ما يحتاج هيج كمية كبيرة فالجسم هنا بمكان ما يتلفها راح يخزنها ، اما اذا اكلت كمية قليلة من الحلويات وسويت رياضة وجهد فانت هنا تحتاج طاقة وهنا اغلب الكلوكوز راح يتكسر

هسه كافي مقدمات خل اطب بالمفيد 😅
هذا الكلوكوز اول شي يتكسر ، ويتكسر اما
1- بدورة كربس ( تنفس هوائي )
2- او يتكسر Anaerobic ( لا هوائي بدون اوكسجين )

🍂 فعملية تكسر السكر نسميها (Glycolysis )

وهسه ركز وياي بهذه المعلومات
هذه ال Glycolysis اما بدورة كربس في المايتوكوندريا
فالكلوكوز من يتكسر بالمايتوكوندريا راح نحصل كميات كبيرة من الطاقة بقدر 38ATP لكن من بعكس اذا تكسر بطريق ال Anaerobic ( لا هوائي ) لان راح نحصل ع فقط 2ATP

طبعا راح ادكولولي احنه هذا الكلوكوز الي يدخل للجسم نحب يدخل بدورة كربس بالمايتوكوندريا لان نحصل كمية كبيرة من الطاقة ،
بس بالحقيقة هنالك شرطين او مفتاحين اذا توفرن فالكلوكوز راح يدخل بشكل اساسي في دورة كربس في المايتوكوندريا !
زين الشرطين شنو هي 🤔 ؟
🔸 اول شرط هو وجود الاوكسجين حتى الكلوكوز يدخل دورة كربس
🔸 والشرط الثاني هو وجود فيتامين B1
فوجود هذين الشرطين راح يخلون الكلوكوز يدخل دورة كربس وينتح كمية ضخمة من ATP

🍂بس هنا الاوكسجين اذا ما موجود بكيمة كافية
فالكلوكوز راح ياخذ طريق
Anaerobic Metabolism
ويتكسر بطريقة غير هوائية
او اذا الخلية اصلا ما عندها مايتوكوندريا

مثل RBCs تكلك اني قنوعه 😅 ماحتاج مايتوكوندريا وماريد كمية هواية من الطاقة واكتفي بطريقة
Anaerobic Metabolism
واكتفي ب 2ATP
طبعا هنا ال Anaerobic راح ينطينة نتيجة اللكتيت Lactate الي هو اللكتيت اسد ( مادة حامضية ) واذا زادت يزداد اللكتيت اسد
هذه دلالة ان الجسم جاي يكسر السكر بطريقة لا هوائية

✴️لحد هسه عرفت مصير السكر انه يتكسر بطريقتين !

زين 🤔

اذا انت اكلت كمية كبيرة من الكلوكوز
مثلا نص كيلو من الحلويات ( شنو من معدة 🤣) ، بعد ما اكلت رحت حطيت راسك على المخدة ونمت فانت بهذه الحالة الكلوكوز ما راح تحتاجه عضلاتك تمام او دماغك لان انت ما متحرك ولا مشتغل حتى ينصرفن او يتكسرن ويطلعن طاقة ، انت كاعد ومرتاح وهذه الكمية للمرتاح هواية ،
فهنا الكلوكوز راح ينخزن

طيب هنا شلون ينخزن ؟
الكلوكوز لمن يريد ينخزن اما :
1- ينخزن بطريقة Glycogenolysis
او
2- يتحول الى Glycogen
شنو هو الكلايكوجين ؟ هو مخزون السكر او مخزون الكلوكوز يجمع السكر ويخزنه بمكانين بشكل اساسي في Liver وفي ال Muscle

🍂اذا خزنه الكلوكوز .
او
الكلوكوز يروح Fatty Acid Synthesis اي الى الدهون

وهذه مشكلتنه احنه كبشر لمن ناكل كمية كبيرة من السكريات . هذه السكريات اكثر من حاجتنه بكثير فالكلوكوز ينخزن بال liver ولمن يقبط الكبد 🤣
يروح ينخزن كدهون
بس وين ؟ 🤔
في الخلايا الدهنية( Adipocyte)

📌طبعا هنا ملاحظة مهمة :- الكلوكوز من يتحول الى Glycogen اوحتى يتحول الى Fatty Acid من الاشياء الي تحفز هذا الشي هو هرمون الانسولين ، واضح ؟

الطريق الاخيرة الي ممكن يروحله الكلوكوز وهو طريق نسمية HMP shunt
ماراح ندخل كثير بهذه التفاصيل لكن
HMP shunt
يعطيك اشياء وهي
الرايبوز ( السكر الخماسي ) مهم جدا .
ف هذا ال HMP shunt يحول الكلوكوز الى رايبوز

زين شنو فائدة الرايبوز ؟🤔
الرايبوز سكر مهم جدا جدا يدخل بال DNA و RNA
ال RNA هو رايبوز وال DNA هي الدياكسي رايبوز
لهنا عرفنه مصير الكلوكوز

الهرمونات الخمسة المسؤولة عن تنظيم السكر في الدم

كلنا نعرف ان السكر مادة مهمه في جسم لانسان ، اذا قلت نسبة السكر بالدم فراح تقل نسبة الطاقة في الجسم وهذا الشي خطير وايضا اذا ازدادت نسبة السكر على المدى البعيد ايضا راح يؤدي الى مضاعفات خطيرة
🔹 وايضا نعرف ان نسبة السكر للانسان الصائم تقريبا من 70-126 mg
فهذه النسبة الطبيعية الي لازم تكون موجودة ومنتظمة
فلهذا هنالك خمس هرمونات هذه الهرمونات تنظم عمل السكر فخلينه نشوف الصورة ركزلي بيها

بالجانب الايمن عندنه الانسولين ( يُفرز من البنكرياس )
وبالجانب الايسر عندنه 4 هرمونات وهي الكورتزول والادرينالين والكلايكون وهرمون النمو

زين بالجانب الايمن عندنا الانسولين الي هو الوحيد الي يخفض السكر
وعندنا بالجانب الايسر 4 هرمونات تزيد نسبة السكر

مثل ما تشوفون ان هرمون الانسولين هنا وحيد فهو كلش مهم يعني يقابل 4 هرمونات على الجانب الاخر الي ترفع السكر ونكدر نضيف الاكل للهرمونات ال 4 وتصير 5 امور ترفع السكر لكن الاكل ليس هرمون
♦️ عندنا ال cortisol و Adrinalin تزداد في حالة ال stress طبعا هنا نقصد بال stress الجسمي
مثل شخص صار عندنه حادث او عملية او التهاب او القلق او الضغط النفسي وما شابه ذالك
هذول الكورتزول و الادرينالين يزداد ويزداد نسبة السكر ک تاثير لل stress

🟧 زين الكورتزول من يا غدة يُفرز ؟ يُفرز من قشرة الغدة الفوق الكلى الي نسميها الغدة الكضرية ( Adrenal gland )
🟪 زين الادرنالين منين يُفرز ؟
يُفرز من الغدة نفسها لكن من منطقة اللب (madlea )
🔹ال Glycogon يُفرز من البنكرياس !

واحد يكول الانسولين يفرز ايضا من البكرياس ، شلون بهذه الحالة ؟
🔅نعم ، لكن الانسولين يُفرز من خلايا بيتا اما ال Glycogon يُفرز من خلايا الفا ، ومثل ما تشوفون واحد معاكس للاخر !
♦️ اما هرمون النمو (Growth Hormone ) الي يُفرز من غدة النخامية ( pituitary gland ) وايضا اله وضيفة برفع السكر

🔅طبعا هذول الهرمونات اكثر واحد بيهم ما يحب الانسولين ومضاد للانسولين هو الكورتزول ، بحيث يخلي الانسولين ميشتغل ، اما الادرينالين تاثيره قليل تقريبا لساعات اما الكورتزول فيضل لايام بسبب الصيغة الكيميائية للهرمون .

💠 الكلوكوكون ( Glycogon ) ينفرز في حالة المجاعه الشديدة ( الستارفيشن ) ، في انخفاض نسبة السكر مثل في الصيام الطويل فراح ينفرز ويزيد نسبة السكر ،

🔹 اما هرمون النمو فسيلوجيا عند الانسان الطبيعي ما عنده ذاك التاثير في رفع السكر ولكن الرياضيين الي ياخذون كميات كبيرة من هرمونات النمو او بعض الاورام في ال pituitary الي تؤدي الى افراز هرمون النمو بكيميات كبيرة ممكن تزيد نسبة السكر !

♦️طبعا هذه الهرمونات ال 4 يختلفون بطريقة زيادتهم للسكر .

🔹مثلا هرمون النمو يخلي الكبد ما ياخذ السكر فالسكر يرتفع بالدم

▫️ الادرنالين والكورتزول يقومان بعملية تصنيع سكر جديد بالكبد يحفزون الكبد ويكلوله يا كبد زيد السكر بالدم عن طريق عملية كلوكونيوجنسز
ايضا الادرينالين يكسر السكر ويساعد على تكسير وبذالك مخزون السكر يتكسر فيزداد السكر

💠 طبعا كل واحد من هذه الاهرمونات اله امراض اذا ازدادت مو بس ال stress

🔹مثلا الكورتزول اذا ازداد يسوي مرض اسمه كوشنغ ( Cushing Syndrome)
الادرينالين اذا ازداد عندنه مرض اسمه pheochromocytoma
والكلوكوكون من يزداد ايضا يسبب مرض نادر اسمه
Glucagonoma
ورم بالكلوكون
وهرمون النمو اذا زاد يسبب acromegaly

ممكن شخص من عامة الناس مالة عرف بالمجال الطبي ويسال ، اني طيب اذا عندي مرض سكري لازم احلل هذه الاربع هرمونات ؟
الجواب اكيد لا ، حسب الاعراض ، احنه بالطب نشك بوحده من هذه الهرمونات ونفحصها اذا طلع السبب بهذه الهرمونات

لكن احيانا السبب الانسولين ما يقوم بوظيفته مثل حالة مرض السكري النوع الاول او الثاني فالمشكلة بالانسولين
وهذه الهرمونات الاربعة طبيعيين
لكن الانسولين بالحالة الطبيعية ما يقوم بوظيفته وبذالك السكر يضل مرتفع

🔸فهسه بموضوع ارتفاع السكر لازم نفكر باغلب الاحيان بالانسولين خاصة مرض السكري وايضا الهرمونات الاربعه مهمة في رفع نسبة السكر

♦️ واخر ملاحظة احجيها بشرح اليوم ، هي ان السكر لمن يرتفع بكميات عاليه في الدم يمكن يسبب مضاعفات منها مضاعفات تخدش جدران الشرايين يزيد الجلطات وياثر على الاعصاب ايضا وياثر على العين وعلى الشرايين الصغيرة وارتفاعه موزين
مومعناها واحد يكول عندي سكر فاني عندي طاقه اعلى ، غلط
لان سكر زيادة عن حاجة الجسم يؤدي الى مضاعفات

🟪وملخص لهذا الحجي هو
الانسولين هرمون وحيد يخفض السكر
وهذه الهرمونات الاربعة تزيد السكر ولكن كل واحد اله حالة مثل ما شرحنه فوك مو اربعتهم ينفرزون مره واحده

اي سؤال اكتبوا بالبوت

Glucose transports
انواع قنوات السكر وتاثير الانسولين عليها

راح نتكلم عن قنوات السكر ال 6 وتاثير الانسولين عليها وموقعها من ناحيه الانفنتي للكلوكوز ( Affinuty )
طبعا هذه تعتبر مثل البيبان الي يدخل بيهن الكلوكوز للخلايا
طبعا عندنا بالبداية 5 انواع من القنوات يرمز لها ( Glut ) وعندنا ( SGLT) الي هو السادس

اول شي خلينه نجي على Glut4 و Glut2
عندنا النوع الثاني والرابع راح نبدأ بيها وبعدين نرجع للبقية والاهم هو

النوع الرابع Glut4

لان موجود بال muscles
وايضا بالخلايا الدهنية Adipocyte .

زين شنو اهمية Glut4؟
- طبعا بيها شغله مهمة وهي ان هذه ال Glut4 تعتمد على الانسولين .
لو فرضنا خلية ( اي خلية ) وعندنا قناة قناة الكلوكوز ( ايا كانت )
فالكلوكوز يدخل بحرية للخلية عن طريق ال Glut
هذه بالنسبة للقنوات مال السكر
بس من نجي لل Glut4 مسدودة بالقفل 😅 ،

🔸لكن الي ساعدها حتى تنفتح هو الانسولين ( مثل مفتاح يفتح باب الخلية ويطبب الكلوكوز )

🔺اذا افتهمنا ان ال Glut4 يعتمد على الانسولين وبدون الإنسولين ما نكدر ندخل الكلوكوز للخلية !

🔻اما باقي القنوات البقية ما تحتاج انسولين فلهذه ال Glut4 تكون مهمه وهي الوحيده الي تحتاج انسولين

النوع الثاني Glut2
ايضا مهمة وتكون موجودة بالبنكرياس ( pancrease) وبالكبد (liver) !
زين وين يعني بالبنكرياس تحديدا ؟
- يعني موجودة بخلايا البيتا Beta cells
زين خلايا البيتا Beta cells شنو كانت وظيفتها ؟
ال Beta cells هي الي كانت تفرز الانسولين 😯
ومعناها خلايا ال Beta cells الي تُفرز الانسولين تحتوي على Glut2 من اجل السكر يدخللها
زين راح تسالوني اكيد وبالكبد وين موجودة ؟
#سجاجة_لو_الله_خلاكم 😏
موجدة بالهيباتاسايت Hepatocyte في الكبد

🟦 خلينه نجي نشوفكم القنوات كلهن ووين موجودات
Glut1 : RBC , Brain , cornea , placenta
Glut2 : pencrease , liver
Glut3 : Brain , placenta
Glut4 , muscles , Adipocyte
Glut5 : Spermatocytes , GIT
SGLT : Kidney , GIT

طبعا هسه خلصنه الشرح الخنفشاري
نجي لمعلومات نركز عليها


🟦عندنا ال Affinuty 🟦

اي رغبة القناة بادخال الكلوكوز.
كل قناة والها افنتي خاص بيها
يعني مثلا لو فرضنا ان ال Glut هي بوابة تسمح بمرور الاشخاص .
هذه البوابة مثلا باب خاصة بالبنك
والباب بيها حمايو ما يسمحون لاي شخص يدخل او باب حديقة عامة ويسمحون للناس يدخلونها .
فاذا هذه البوابات بغض النظر عن موضوع الانسولين وتاثيرة ، هذه البوابات الهم رغبة ( بمزاجهم ) بادخال الكلوكوز .

يعني بعض البوابات الهم High Affinuty يعني رغبة عالية بادخال الكلوكوز و يدخل بسهولة لمن يزداد .

وطبعا عندنا بعض القنوات الها Low Affinuty يعني الها رغبة قليلة ويحتاج السكر بكثرة يحتى يدخلون 😐
خلينه نشرح بتركيز اكثر

🔸لمن نكول High Affinuty
مثلا Glut1 و Glut4
يعني هذول القناتين شوية بس السكر يزداد بالدم يدخل للخلايا ، ولكن لا ننسى ال Glut4 تحتاج انسولين الهم رغبة عالية بادخال الكلوكوز الى الخلايا

🔹 وعندنا ال Low Affinuty مثلا Glut2

شنو يعني ؟
يعني السكر يحتاج يزداد بكثررة بالدم حتى هذه القناة تسمح للكلوكوز بالدخول وهذه فائدتة مهمه ،

شلون يعني فائدة ؟ 😐

لان ال Glut2 موجوده بال Beta cell وال Beta cells تفرز الانسولين .
احنه منريد ان بس السكر يزداد تفرز الانسولين يُنفرز
لهنا تمام مو ؟ 🥰

زين بقت قناة ال SGLT نسيتوها لو شنو ؟ 😏

خلينه نحجي شويه ونتكلم عنها الي هي
(Sodium Glucose transport)

شوفوا هذه القناة موجودة بالنيفرون ومسؤولة على التصفية
ف بالنفرون عندنه تيوبات الانبوب البعيد والقريب للنفرون
🟦 القناة موجودة بالبروكسيل تيوب اسمها SGLT
🔸احنه منريد نخسر كميات كبيرة من الكلوكوز باليورن فلهذا الكلوكوز يبدا يمر بهذه القناة لمن يتصفى الكلوكوز ويرجع للدم
( يعني القناة ادكله وين رايح اليورن تعال ارجع محتاجيك وترجمعه من خلالها لمجرى الدم )

طبعا عندنا عدد قليل من هذه من هذه القنوات ( محدودة العدد)
فمن يزداد الكلوكوز ادكوم القناة متلحك ترجعه للدم ويبدا يهرب اليورن

( انتبوها للصور ، القناة موجود بمنطقة بروكسيل فقط وما موجودة باي مكان بالنفرون بعد كما موضح واذا الكلوكوز عبر هذه القناة فمصيرة يخرج من اليورن لان بعد ماكو قناة على طول النفرون حتى ترجع تمتصه من اليورن )

فمريض السكري يعاني من هذه الحالة

🔸اكو بعض الادوية تسد هذه القنوات

فالمريض العنده كلوكوز كثير لو سديت هذه القنوات فالكلوكوز بعد ما يمتص ويرجع للدم فالجسم يبدا يتخلص شوية من الكلوكوز ، مثلا دواء الكليفلوزين Gliflozins الي هي تكون SGLT inhaitore فهذه القنوات مهمه للشخص العادي حتى ما تخسر كلوكوز ويصير عندك Hypoglycemia

هسه بعد ما عرفنه الميتابولزم مال السكر والهرمونات المسيطرة عليه وعرفنه
القنوات الخاصة بيه هسه نجي نعرف

كيف يتم تصفية وامتصاص السكر في الكلية ؟ في الطبيعي ومرض السكري

الكلوكوز موجود بالدم وهذا راح يتم تصفيته من الدم بالكلى فتصير بيه عملية اسمها Filtration
هسه الكلوكوز تصفى بالكلى تحديدا في انبوب PCT
زين لهنا تمام 🤓
جسم الانسان لمن يشوف الكلوكوز نزل بالنيفرون ، طبعا هذا الكلوكوز الي نزل المفروض يخرج باليرون خارج الجسم .
فالجسم راح يكول هذا الكلوكوز مادة مهمه ما نريد نخسر هذا الكلوكوز ف يجب ان هذا الكلوكوز نرجعة الى الدم ( نعيد امتصاصة )
فعندنا ببداية انبوب ال PCT قناة واحنه ماخذينها بالقنوات الي فوك وايضا عندنه بنهاية الانبوب هم قناة ، اذا عندنا قناتين وهذه القناتين مسؤولة عن ارجاع الكلوكوز ( لنفرض نسميها قناة 1 وقناة 2 ) فتسمى قنوات SGLT فادكول للكلوكوز ارجع للدم ،
لكن هذه القنوات راح ترجع الكلوكوز وراح ترجع ويا الصوديوم
فهسه رجعنا الكلوكوز والصوديوم
فصار عندنه داخل الخلايا ( خلايا الي تكون بين النفرون و الاوعية الدموية الي تكون محيطة بالكلى ) كلوكوز وصوديوم

زين احنه نريد هذا الكلوكوز الحصرناه بهذه الخلايا نرجعه للدم .
فراح نرجعة بعميلة اسمها اعادة الامتصاص ( Resorption )
فعندنا قناة اخرى ترجع الكلوكوز للدم طبعا اسمها SGLT2 Type 2
هسه رجعنا الكلوكوز للدم مبروك 😅

الي صار بعد ما رجعنا الكلوكوز للدم ان هذه القنوات الها قدرة استيعابية
مثلا لو عندنا 5 قنوات منها وعندنا 5 كلوكوز
فالكلوكوز ممكن رجع للدم !
تخيل وياي ان هذا المريض صار عنده ارتفاع بالكلوكوز الدم بدلا من 5 كلوكوز صار عنده 8 كلوكوز ( مثال هذا طبعا)
واحنه عندنه 5 قنوات . ف 5 من الكلوكوز رجعوا بقت 3 كلوكوز ما كدروا يرجعون .
ليش ما كدروا يرجعون ؟
لان هاي القنوات تشتغل بماكسيمام كاباستي ،يعني ما عندنه بعد قنوات اخرى ترجع هذا الكلوكوز اذا زاد للدم ع طول النفرون .
فالمريض عنده زيادة مفرطة بالكلوكوز Hyperglycaemiaفالي صار الكلوكوز الي زاد ما لكه قنوات ترجعه فشراح يصير بيه ؟
راح يخرج باليورن فرصتهم خلصت بالرجوع
لان القنوات ماموجوده غير بس بهذا المكان بال PCT فصار بيه Execration
يسمونه خروج السكر في اليورن
الملخص كل تركيز السكر بالدم زاد زادت ال التصفية Filtration
وكل ما زاد تركيز السكر بالدم كل ما اعادة الامتصاص موجودة لكن بكمية محدده
وطبعا بالواقع القنوات تفقد السيطرة عن اعادة امتصاص السكر من الادرار بعد ما يكون تركيزة بالدم 300
يعني اكثر من 200 يبدا يخرج باليورن

هسه افتهمنه؟ 🌝
وبعد شي مرات تكون حالة نادرة
وهي لنفرض السكر بالدم طبيعي ( مثلا 100mg) بس هذه القنوات ما تشتغل بيها ( Defect ) فراح نشوف الكلوكوز بالدم طبيعي بس جاي يخرج بالادرار فلهذا تسمى الحالة Renal DM
بس هذا ما بيه سكر بس المشكلة بالكلى

Diabetes mellitus Type 1 & Type 2
الفرق بين السكري الاول والثاني

خلينه نشرح فد شغلة وهي الارتباط بين الانسولين والكلوكوز .
الشخص من ياكل كاربوهيدرات ( سكريات ) فبذالك الكلوكوز بالدم راح يزداد .
الانسولين راح يجي وياخذ هذا الكلوكوز ( طبعا هو كلتلكم ينفرز من البنكرياس من خلايا Beta cells)
راح ينفرز الانسولين من ال Beta cells بالبنكرياس ويروح الى الكلوكوز الي بالدم وياخذ هذا الكلوكوز ويضعه داخل الخلايا ، بعد فتره من الاكل بالطبع هذا الكلوكوز راح ينخفض بالدم ، ليش ؟ لان الكلوكوز راح الى داخل الخلايا .

🛡️فالي يصير بمرض السكري هي اما الانسولين غير موجود ( خلايا ال Beta cells الي بالبنكرياس تدمرت ) ف الانسولين ما عاد ينفرز .
او المشكلة هي مستقبلات الانسولين يعني راح الانسولين يريد يدخل الكلوكوز داخل الخلايا لكن مستقبلات الانسولين بيها ممانعه وما راح الكلوكوز يدخل .

الان المشكلة بالكلوكوز النوع الاول والثاني هي :
الكلوكوز ما يكدر يدخل الى الخلايا وبذلك نسبة الكلوكوز بالدم راح تكون عالية لفترات طويلة وهذا يؤدي الى مضاعفات ومشاكل كثيرة .

🟦خلينه هسه نبدا بالتفريق وراح نحجي الفروقات بالنسبة
للسبب و نسبة حدوث المرض ووجود الانسولين وعدم وجودة والكيتواسدوسز ووزن المريض والعلاج
نبدا
1- السبب Etiology

💜بالنسبة لل Type 1
يحدث نتيجه Autoimmune disease
يعني الجهاز المناعي يهاجم خلايا ال Beta cells بالبنكريات ويكسرها فيبدا الانسولين يقل بالبداية وبعد فتره من تدمر Beta cells ف الانسولين بعد ما ينفرز

💙بالنسبة لل Type 2
خلينه نفرض ان هذه خلية 👈🏻🟦 وعندنه عليها مستقبلات للانسولين على سطحها
المشكله هنا الانسولين من يجي ويريد يتفاعل مع هذه المستقبلات ما تستجيبله هذه المستقبلات وبذالك ما راح يدخل الكلوكوز
يعني اكو انسولين بس الخلية ما تستجابله فما تنفتح القناة الخاصة بالكلوكوز حتى يدخل الكلوكوز للخلية
والسبب هذه المستقبلات يصير بيها ممانعه Resistance

2- نسبة حدوثة ( Prevalence )
💜بالنسبة لل Type 1
5% من الحالات المصابين بالسكري تكون من نوع الاول

💙بالنسبة لل Type 2
95% من الحالات المصابة بالسكري
طبعا لو شفنه مريض سكري فاغلب الحالات الي راح نشوفها هي Type 2 ونسبة قليلة من الي ينصابون بال Type 1

3- Diabetic ketoacidosis (DKA)

قبل لا اشرحها فهي بالنوع الثاني هي نادرة الحدوث اما بالنوع الاول شائعة
الي يصير بسبب غياب الانسولين الدهون ال Fatty Acid و ال Lipid راح تبدا تتحول الى مواد اخرى تسمى Ketons body تعتبر مواد حامضية ولما تزداد بالدم بكيمه كبيرة راح تسوي مشاكل فالانسولين اذا كان موجود هذه العملية ماراح تصير ولكن بالنوع الاول الانسولين غير موجودة وبذالك الدهون راح تتحول الى Ketons body مثل استون استيك كمثال
وقد تسبب مشاكل كثيرة مثل Tachycardia و Dehydration وهذه الحالة تعبر خطرة .

4- الوزن Weight
طبعا اغلب المرضى الي يكون عندهم النوع الاول وزنهم يكون قليل وما عندهم سمنه زائدة اما النوع الثاني فيكون عندهم وزن عالي
وبالعمر اغلبهم بالنوع الاول اصغر من 35 سنه اما النوع الثاني فاكبر من 50 سنه

5- Treatment
💜نجي للعلاج وهي اهم نقطة
نجي للنوع الأول وهي الانسولين غير موجود فاكيد نعالج المريض عن طريق اعطاءة الانسولين وطبعا اكو عدة انواع من الانسولين مثلا Long-acting و Intermediate-acting و Fast-acting
حسب احتياج المريض وتقييم الطبيب لحالة المريض

💙اما النوع الثاني فمشكلتنه هي الممانعه
لان المستقبلات غير قابلة على استقبال الانسولين Resistance
فالانسولين موجود واذا انطيته انسولين ماراح نستفاد ذيج الفائدة الكبيرة لذالك يحتاج ننطية ادوية تقلل الكلوكوز وتساعد هذه المستقبلات على ان تكون حساسة للانسولين فلذلك اهم الادوية هي Metformin و Sulfounlurea

🟣زين بالنوع الثاني كلنه الانسولين موجود . زين كعلاج هم احتاجه ؟
نعم احتاجه ، احيانا نحتاج ننطي انسولين لان مثل ما كلتلكم بالبداية الإنسولين يكون موجود والبنكرياس يحاول يفرز الانسولين اكثر وره فتره البنكرياس بال Beta cells يصير بيها تعب فبعد فتره حالة المريض تتطلب تحتاج ننطية انسولين بس مو كلهم وانما قسم منهم

الفرق بين السكر الحقيقي والسكر الكاذب
DM vs DI

طبعا مو كل شخص يصير عندة كثرة عطش وكثرة تبول ، مباشرة ان هذا عنده سكر حقيقي ومرض خطير بالفعل !

فاليوم راح نتكلم عن مرضين اساسيين ممكن تؤدي الى كثرة التبول وكثرة العطش وتظهر عند المريض اعراض السكري ولكن بالحقيقة مو سكري فراح نتطرق لموضوع السكر الكاذب والسكر الحقيقي ونسوي مقارنه ( شوف الصورة ام الجدول )

خلينه نبدا بالسكر لحقيقي DM
طبعا قبل ما نعرف كلشي نسوي مراجعة سريعة
البنكرياس بيها خلايا اسمها ال Beta cells وهذه تفرز الانسولين ووظيفة الانسولين ان يخفض السكر
فرضا واحد اكل كميات من السكر كبيرة يجي الانسولين ويدخل السكر بالخلايا فبدون الانسولين هذا السكر ما يدخل للخلايا وكنتيجة راح يضل السكر عالي بالدم
🔸 زين لعد شنو كثرة العطش ؟ وشنو سبب كثرة التبول ؟ اذا سكر عالي بالدم ؟

🟠 الي يصير كالتالي : ان لمن يصير سكر عالي بالدم راح يروح للكى ويخرج من الكلى ،
زين هو خرج وبعدين شراح يصير ؟
لمن السكر يخرج من الكلى راح يسحب وياه الماء ولمن يسحب وياه الماء اكثر من اللازم راح يصير عند الانسان تبول كثير والانسان لمن يتبول بكثرة راح يعطش واصلا السكر لمن يزداد ينطي اشارة لل Hypothalamus الموجودة بالدماغ من اجل ان الانسان يشرب كميات ماء كبيرة ،

🔸اذا كثرة التبول والعطش تعتبر دلالة مهمة على السكر 🤔 هسه نجي نعرف من نشوف السكر الكاذب

السكر الكاذب DI

اول شي احنه ليش سميناه كاذب ؟ 🤔
شنو الكذب بالموضوع ؟ 🤔
سميناه كاذب بسبب ان هذا النوع ماله علاقة بالانسولين ولا بالكلوكوز ولا بالبنكرياس
- طيب منين المشكلة ؟ 🤔
شوفوا 😌
بالدماغ عندنه غدة اسمها pituitary gland تتكون من فصين كالاتي :
1- Anterior pituitary gland
2- posterior pituitary gland

وبما ان الشغل كله بال posterior لان بيها السبب خلينه نفرضها كدامنة ( شوف الصورة )
هذه الغدة وبهذا الفص تحديدا تفرز هرمون اسمه ADH هذا يكون مضاد للادرار !
يعني هذا الهرمون من ينفرز الشخص ما يصير عنده ادرار ، السوائل ما راح تخرج برة الجسم ،

زين ليش هيج سميناه ؟ 🤔
-هذا الهرمون سميناه هكذا لان هذا الهرمون يسوي احتباس الماء ، يعني اي واحد بينه راح ياخذ هذا الهرمون راح الماء ينحبس بجسمة .

طيب ليش يكون هيج شغله ؟
-الماء دائما مفيد لجسم الانسان ونحاول ما نخسر الماء باستخدام هذا الهرمون !

تشوفون بهذه الصورة الثانية النفرون طبعا هذا وحده عمل الكلى وكل كلى تحتوي ع مليون ونص نفرون و ¾ شغل الكلى بيه
يمر الدم بالنفرون يتصفى ويطلع ويطلع ويكون البول !
ف ال ADH بشكل عام يجي يكله للنفرون ، يا نفرون اني ال ADH فمن فضلك لا تطلعلي اي ماء حافظلي على الماء ، ممنوع اي ماء يطلع من من هذه المنطقة 😂 ( خوش تهديد بنزاكه )
اني ال ADH اريد احتفظ بالماء 😌 .

المهم ال ADH يجي يعمل على المنطقة الاخيرة من النفرون اسمها كولكتنگ داكت
ف ADH يجي يمنع خروج الماء وبذالك يحافظ الانسان على الماء !

🔸زين خلينة نفرض ان ال pituitary gland ماتت او صار بيها مشكلة سواء مرض او ورم او حادث او التهاب
فبهذه النتيجة ال ADH بعد ما ينفرز وبعد ما عندنه شخص يحافظ على السوائل وهذا النفرون ما راح تجيه اشارة من ال ADH من اجل يحافظ على السوائل . فلهذا النفرون يبدا يطرح السوائل بكمياة كبيرة . الانسان راح يصير عندة كثرة تبول وبالنتيجة راح يصير عنده كثرة بالعطش ف غياب ال ADH يؤدي الى اعراض مشابهه للسكر الحقيقي .

🔸 فينبغي قبل لا نكلة يا مريض انت عندك سكر خلي نجي نقيسلك الانسولين ومشتقاته !
راح نلكاهن طبيعيات !
اذا نبدا نشتغل ونفكر ان المريض ممكن عنده خلل بال ADH عدم افرازه من مصدرة .

🟠 بس اكو شغله ننتبهلها ! وهي 🤔
مرات نشك عنده المرض ونجي لل ADH نلكاه طبيعي 😳 زين شلون ؟ 🤔
عجيب شنو القصة
مع ذالك هنالك مشكله 😏
فنجي نقيس الانسولين هم طبيعي 😳

لعد وين المشكله ؟ 😒🤔
احيانا المشكله بهذا النفرون . شلون ؟
احنه مو اتفقنه ان ال ADH يجي يكلة يا نفرون اسمع كلامي 😅 وحافظ على السوائل .
فاحيانا هذا النفرون ما يستجيب لل ADH ، بالنفرون اكو مستقبلات هذه المستقبلات بيها مشكلة وما تستجيب لل ADH ،

🔸ف ADH يجي يحفز النفرون لكن دون اي استجابة فنا السبب بالكلية ( نفروجنيك ) مشكله يعني بالنفرون هو سببها
واذا السبب بالغدة الي تفرز ال ADH نسميها (نيروجينك )

لهنا كملنه الشرح اتمنى استفاديتوا 😘