السلام عليكم ..
شفت كتب عربية وشفت كتب انكليزية في مجالنا مجال المختبرات
لگيت الكتب العربية تركز على البروسيجرات ! عكس الكتب الانكليزية الي اصلا ماشفت بروسيجر واحد مكتوب بيها ! تدرون ليش ؟
لان همه فاهمينها صح
يكلك البروسيجر هو اصلاً مكتوب بال SOP أو Leaflet الي تجي وي Kit وهذا شغل شركة فهي ادرى بطرق العمل ، فماكو داعي اذكرها اصلاً ، لان ممكن تتغير
وفوك هذا الكتب العربية مع الاسف ضعيفة حيل تعلمك تشتغل مثل الآلي

اعرض عليكم طريقة #كتاب_ديفز

👈 اول شي يكتبلك اسم الفحص مثلاً Alanine Aminotransferase
👈جواه يكتبلك الرمز لهذا التحليل الي هو ALT

👈جواه الفائدة من هذا التحليل مثلا ALT هو لتقييم
وظائف الكبد

👈جواه تحظير المريض : يگلك لاتاكل ولاتشرب ولاتسوي اي نشاط او تاخذ علاج قبل اجراء التحليل

👈 جواه اسم الطريقة الي يتم فيها اجراء الفحص وفي مثالنا هذا هي spectrophotometry يعني باستخدام الاجهزة الي تعتمد على امتصاص اللون

👈جواه بالمربع الاخضر القيم الطبيعية لهذا التحليل في حديثي الولادة والاطفال والبالغين والي اكبر من 90 سنة في الذكور والاناث

👈 بعدها راح تلگه كلمة overview يعني راح يحجيلك شوية ع فحص : يكلك العينة هي blood نخليها في تيوب ذهبي او احمر ..
بعدين بنفس الحقل راح يشرحلك شنو ALT ؟ يكلك هذا انزيم يكونه الكبد يوجد بتركيز عالي داخل خلايا الكبد ويوجد في تراكيز متوسطة في الكلى وكمية قليلة منه توجد في القلب والبنكرياس والطحال الى اخر الكلام ( يعني يشرحلك هذا التحليل شنو بطريقة علمية لان مايصير انت تشتغل تحليل وماتعرف شي عنه او معلومات ركيكه )

👈 وراها راح تلگه كلمة Indication يعني توصيات او بالمعنى العامي اصلاً انه ليش اسوي ALT ، يكلك مثلا انت جاي تتعالج بادوية تسبب سموم بالكبد فلازم افحص ALT علمود اعرف انت الكبد مالي مامتأثر من هاي الادوية او لا

👈 بعدها راح تلگة كلمة Interference Factors يعني اكو شغلات تخلي هذا تحليلك يطلع خطأ
مثلاً اكو ادوية هي تصعد ALT بينما الكبد مابيه شي .. الى اخر الكلام

👈 بعدين راح يگلك بيا امراض يصعد ALT وبيا امراض
ينزل الى اخر الكلام ..

كتابين مالگيت لغاية كتابة هذا المنشور افضل منهن في مجال المختبرات وصورهن بالمنشور

1. Davis's Comprehensive Manual of Laboratory and Diagnostic Test
2. Differential diagnosis by the laboratory medicine

السلام عليكم 💜

تحليل Alanine Aminotransferase .. 💜

#مختصره 👈 ALT أو SGPT
#استعماله 👈 لتقييم وضائف الكبد ( يعني هل اكو مرض أو مشكلة بالكبد او لا )
#العينة 👈 1 مل سيرم أو بلازما هم مقبولة
#اسم الطريقة 👈 spectrophotometry يعني طريقة تعتمد على اللون ( يجوز نشرح مبدأ عملها بعدين )
#القيم_الطبيعية 👈 موجودة بالصورة جوه

💜 شوية حجي عن هذا التحليل : ال ALT سابقاً جان يسمونه SGPT الي هو انزيم ينتج من قبل خلايا الكبد ويوجد بتراكيز عالية في الكبد وبتراكيز متوسطة في خلايا الكلى وبتراكيز قليلة في القلب والبنكرياس والطحال والعظلات الهيكلية وكريات الدم الحمراء
من يصير اكو تحطم بخلايا الكبد ( مرض بالكبد ) مستوى ال ALT يزداد تقريباً 50 مره مما يجعل هذا الفحص sensitive
شنو معنى كلمة sensitive المعنى الطبي مو الترجمة الحرفية ؟
يعني فحص حساس جداً
يعني هي اقل تركيز ممكن قياسه
شويه قربها الي بعد
يعني يلگف المرض حتى لو كان تركيزه قليل
ال ALT هو واحد من مجموعة فحوصات تسمى ب LFT اختصار ل Liver Function Test الي تستعمل لتقيم وضائف الكبد الي هنه ALT و Albumin و ALP و AST و Total bilirubin و Direct bilirubin و Total protein

💜 نجي على indication يعني ليش اسوي هذا الفحص ؟
1. نسوي AST وي ALT لان هنه ثنينهن موجودات بالكبد علمود إذا لگيناهن زايدات فاكو مشكلة بالكبد فنعرف طريقنه بمعالجة المشكلة
2. مرات واحد ياخذ ادوية تأثر على الكبد فلازم نسويله تحليل ALT باستمرار ماطول جاي ياخذ العلاج علمود نراقب الكبد هاي الحالة يسمونها ب monitoring يعني المراقبة
3. مرات واحد هو مشخص بيه مشكلة بالكبد فننطيه علاج للكبد ونفحصله ALT علمود نشوف العلاج جاي يشتغل لو لا ( الكبد جاي يتشافى لو على حطته ) هاي الحالة يسمونها ب prognosis يعني التنبؤ أو معرفة المستقبل المرضي

💜 زين بيا امراض يزداد وبيا امراض يقل ALT ؟
يزداد بالامراض التالية :
1. التهاب البنكرياس الحاد acute pancreatitis
2. الايدز الي اله علاقة بفايروس HBV
3. انسداد القنوات القنوات الصفراوية
4. الحروق ( إذا كانت شديدة )
5. الي يشربون كحول
6. تشمع الكبد cirrhosis
7. دهون الكبد fatty liver
8. سرطان الكبد hepatic carcinoma ( ليش يسمون سرطان الكبد carcinoma مو sarcoma علماً ان ثنينهن معناتهن سرطان فكر بيها .. )
9. التهاب الكبد hepatitis
10. داء القبل infectious mononucleosis الي سببه فايروس EBV
11. اصابة العضلة مثلاً حادث أو infection أو صرع
12. ضمور العضلات muscular dystrophy
13. احتشاء عضلة القلب MI
14. التهاب العضلات myositis
15. التهاب البنكرياس pancreatitis
16. مرض Pre-eclampsia الي هو اضطراب يصير عند الحامل فيصعد ضغطها
17. ال shock وخصوصاً إذا كانت severe

يقل في حالة واحده وهي Pyridoxal phosphate deficiency ( لان نقص pyridoxal phosphate يؤدي الى قله انتاج انزيم ALT )

💜 هسه نجي على interfering factors يعني اكو شغلات إذا موجوده بالعينة راح طلعنه الفحص غلط وهي :
1. الادوية لان اكو ادوية تزيدنا ALT لان تسبب cholestasis يعني ركود صفراوي ومن هاي الادوية هي ( anabolic steroids و dapsone و estrogens و ethionamide و icterogenin و mepazine و methandriol و oral contraceptives و oxymetholone و propoxyphene و sulfonylureas و zidovudine )
2. اكو ادوية تزيد ALT بس ماتسوي ركود صفراوي لا وانما تسوي hepatocellular damage يعني تحطم بخلايا الكبد ومن هاي الادوية هي ( acetaminophen يعتبر toxic و acetylsalicylic acid و anticonvulsants و asparaginase و carbutamide و cephalosporins و chloramphenicol و clofibrate و cytarabine و danazol و dinitrophenol و enflurane و erythromycin و ethambutol و ethionamide و ethotoin و florantyrone و foscarnet و gentamicin و gold salts و halothane و ibufenac و indomethacin و interleukin-2 و isoniazid و lincomycin و low-molecular-weight heparin و metahexamide و metaxalone و methoxsalen و methyldopa و methylthiouracil و naproxen و nitrofurans و oral contraceptives و probenecid و procainamide و tetracyclines )
3. واكو ادوية تقلل من مستويات ALT مثل ادوية cyclosporine و interferons و ursodiol و metronidazole طبعاً الميترونيدازول يأثر على enzymatic test methods
بعد ماكتب علاجات تعبت 😅

💜 مصطلحات ..
Alanine aminotransferase ( ALT )
Aspartate aminotransferase ( AST )
Alkaline phosphatase ( ALP )
pyruvic transaminase ( SGPT )

#المصدر هو كتاب ديڤيز ، الطبعة السادسة ، الصفحة 21
تحبون المنشور اگصگصه واسويه اجزاء علمود لايصير طويل لو اخليه كله هيج ؟

السلام عليكم .. 🧡
الجزء الاول | شرح CBC

👈 اكو مادة جيلاتينية داخل bone 🦴 يسمونها bone marrow اي نخاع العظم من هنا تنتج كل خلايا الدم RBC و WBC و Platelet هذني ال 3 خلايا يرحن الى مجرى الدم بعد ماتم تصنيعهن ( شاهد الصورة رقم 1 )

👈 وظيفة RBC هي حمل O2
👈 وظيفة WBC مناعية
👈 وظيفة Platelet هي تكوين clot

👈 كرية الدم الحمراء شكلها مو دائري وانما biconcave يعني مقعر الوجهين
افرض ان كرية الدم الحمراء هي الباص وهذا الباص مليئ ب المقاعد ( Hb ) وانت ( O2 ) تجي تگعد على المقعد مالك ( القصد من هذا ان الهيموغلوبين يحمل O2 وهاي هي وظيفة RBC )
شاهد الصورة رقم 2

👈 ال RBC عمرها 120 يوم وعندها خاصية المرونة
لان تدخل في اوعية وشرايين صغيرة فلازم تكون مرنه

👈 زين هاي المرونه منين اجتها ؟ من بروتينات موجودة على غشاء RBC نسيمها ب membrane proteins وهنه 4 بروتينات
1. الانكرين Ankyrin
2. سبكترين Spectrin
3. الباند ثري Band 3
4. بروتين 4.2

👈 منو يحفز BM على انتاج كريات الدم الحمراء ؟
هرمون اسمه Erythropoietin يرمزوله EPO موجود بالكلى ينفرز في حال قل O2

👈 شنو سبب RBC عند الاناث اقل من الذكور ؟
بسبب menstrual cycle الدورة الشهرية حيث تفقد الانثى مايقارب 150 CC من الدم

👈 ليش الدم لونه احمر ؟
لان كريات الدم الحمراء لونها احمر وعددها بالملايين فاكيد لونها يطغي على الكل

👈 الدم مو عبارة عن جزئين :
الاول : بلازما وتشكل 55‎%‎ من حجم الدم
الثاني : خلايا وتشكل 45‎%‎ من حجم الدم
ف PCV هو نسبة ال RBC من كل الدم ( احفظ النسب الطبيعية )

👈 ال MCV هو حجم RBC والمعدل الطبيعي لحجم ال RBC من 80 الى 100 fl ( ال fl يعني فنتو لتر )
ترتيب الوحدات :
1. لتر
2. مليلتر
3. مايكرولتر
4. نانولتر
5. بيكولتر
6. فنتولتر ( الفنتو يعني 15 صفر )
ال MCV اذا طبيعي يعني بين 80 و 100 نگول عليه normocytic واذا اقل من 80 نگول عليه microcytic يعني حجم الكريات صغير واذا فوك 100 نگول عليه macrocytic يعني حجم الكريات كبير

👈 ال MCH معناته RBC شگد بيها هيموغلوبين
انطيتك كرية وگتلك اعصرلياها وشوفلي شگد طلعلي منها هيموغلوبين
احفظ ال MCH على انه عصير ( MCH = عصير )
على سبيل المثال لو انطيتك RBC حجمها 90 fl وگتلك شوفلي شگد بيها هيموغلوبين فراح يطلع تقريباً ثلث يعني 30 ( خو مو كل الكرية هيموغلوبين ) مثلاً انطيتك كليو برتقال خو مو هذا الكيلو تسويلياها لتر عصير جا الكشور وين راحت فراح يطلع تقريباً ثلث الكيلو عصير
القيمة الطبيعية لل MCH هي من 27 الى 34 pg
فهسه عدنا ال MCH ثلاث انواع
اذا طبيعي اسميه normochromic يعني صبغة طبيعية
واذا اقل من 27 اسميه hypochromic
واذا اعلى من 34 اسميه hyperchomic

👈 ال MCHC
مثلاً طلعلي ال MCV 90 و MCH 30 فهاي ال 90 و 30 سويناها نسبة وهي 1/3 يعني ثلث فهذا الرقم الي طلعلي هو MCHC

‏👈 RDW
مثال عندك 4 ولد اسئلك شگد اعمارهم ؟
تگلي الاول 37 سنة والثاني 36 سنة والثالث 5 سنوات والرابع 3 سنوات
فمن هذا الاختلاف مابين الاعمار استنتجت انت لو متزوج زوجة ثانية وذولة اخر طفلين منها او زوجتك جانت مريضة
ف RDW هو الاختلاف مابين كريات الدم الحمراء

ركز عندي مريضين :
المريض الاول : شفت MCV لكرية من كرياته 97 و MCV لكرية ثانية 93 و MCV لكرية ثالثة 99
اوك نجي على
المريض الثاني : لكيت MCV لكرية من كرياته 81 و MCV لكرية ثانية 99 و MCV لكرية ثالثة 60
فمن هذا الحجي استنتج ان RDW بالمريض الاول بيه اختلاف قليل يعني كل كرياته الحمراء تقريباً بنفس الحجم بينما بالمريض الثاني اكو كرية جبيرة واكو زغيرة يعني ال RDW عالي يعني اكو اختلاف بحجم الكريات الحمراء ( تابع الصورة رقم 3 )

👈 شنو اسباب زيادة RDW
1. الي ينقلولهم دم
مثلاً انت حجم كرياتك 90 يعني MCV مالك 90 ونقولك دم من واحد ثاني حجم كرياته 60
فصار قسم من كرياتك 90 وقسم 60 يعني كبر الاختلاف يعني زاد RDW
لان محد ينقلك حجم كرية نفس حجم كريتك
قابل تروح تشرط ع واحد شرط 😅

2. قبل لا اسولف السبب الثاني خل احجيلك قصة مثلا انت قررت تعزم اصدقائك واصدقائك 6 فجبتلهم 6 دجاجات فكلولك نجي ب 6 العصر فراح ياكلون براحتهم ويشبعون لان الدجاجات ع عددهم بس لو انت جبت 4 دجاجات و 4 من اصدقائك كلولك نجي ب 6 والثنين البقو كلولك احنه نتأخر شويه نجي ب 8 فالاربعة ذولة راح ياكلون ويشبعون والثنين البقو راح تنطيهم تمن ومرك يعني صح همه ماجاعوا بس هم ماشبعوا
القصد الخلايا الي تجي اول شي راح تاخذ الحديد والي يجي بعدين مايبقى اله حديد فحجمة راح يزغر

👈 ال Hb عدنا نوعين ياما ال Hb قليل واسمي الحالة anemia او ال Hb عالي واسمي الحالة erythrocytosis

وال erythrocytosis يقسم الى نوعين :
الاول primary يعني زيادة بس مجهولة السبب
والثاني secondary يعني زيادة معلومة مثلاً hypoxia الي هي نقص الاوكسجين فنقص الاوكسجين تزيد كريات الدم الحمراء وبالتالي يزيد Hb لان الكريات مملؤه بال Hb
مثلاً انت واصدقائك طلعتوا سفره للشمال وصعدتوا فوك الجبل وفوك الجبل الاوكسجين قليل فراح جسمك يزيد من انتاج RBC ( كلما ارتفعت عن سطح الارض كلما قل الاوكسجين )
او مرات واحد ماصاعد فوك جبل بس كانما هو صاعد مثل الي يدخنون هذوله هم عندهم الاوكسجين قليل لان جاي يدخلون لجسمهم CO2

👈 عمر RBC هو 120 يوم وعمر Platelet هو من 7 الى 10 ايام

👈 شلون تشخص واحد مصاب بفقر الدم ؟
اول شي اروح لل RBC و HB اذا شفتهن قليلات يعني هذا فقر دم
بعدين لازم احدد سبب الفقر فلازم اسوي MCV اذا قليل عندي مجموعة امراض واذا عالي هم عندي مجموعة امراض ( تابع الصورة رقم 4 )

اذا طلع MCV قليل يعني كريات الدم زغيرة وهاي يمتى تصير كريات الدم زغيرة حجيناها ؟ نقص الحديد ففقر الدم بسبب نقص الحديد هو اكثر الاسباب شيوعاً ، شلون اتاكد ؟ افحص الحديد

زين اذا طلع MCV عالي يعني الكريات كبيرة بالحجم وهاي يمتى تصير ؟ تصير بفقر الدم بسبب نقص فيتامين B12 و folic acid وعلمود اتاكد افحص فيتامين B12
وهواي امراض ثانية موجودة بالصورة فوك

كيس : شخص هذا المريض
1. RBC decrease
2. Hb decrease
3. MCV less than 80
4. RDW increase
شنو تشخيصك للحالة ؟
مادام ال RBC و HB قليل اذن فقر دم
مادام حجم الكريات زغير ( MCV قليل ) و RDV عالي فغالباً فقر دم بسبب نقص الحديد
شنو الفحوصات الثانية الي تنصح بيها المريض ؟
يسوي فحص حديد ferritin

👈 الي يشرب جاي هواي يصير بيه فقر دم ليش ؟لان الجاي بيه تيتانك اسد الي يمنع امتصاص الحديد ، زين اذا حديد ماكو شيصير ؟ يصير فقر دم بسبب نقص الحديد
👈 الحديد الي هو iron يخزن بالكبد على شكل ferritin

كيس : اجتك حالة بيها WBC و RBC و Platelet كلهن قليلات ( اذا كلهن قليلات يسمونهن pancytopenia يعني قله في كافة الخلايا ) وين المشكلة ؟
هو ياهو يصنع الخلايا هاي كلها ؟ نخاع العظم
اذن اكو bone marrow failure

👈 كلنا نعرف القيمة الطبيعية لل WBC هي من 4 الف الى 11 الف فإذا صعدت اكثر من 11 الف نسميها Leukocytosis
زين اذا صعدت لل 50 الف او 60 الف فهاي شنو ؟ هاي ياما Leukemia الي هو سرطان الدم او ابياض الدم بالعربي نسبتاً الى زيادة اعداد الخلايا البيض أو حالة هي مو سرطان بس تشبه السرطان اسمها Leukomoid ، مصطلح oid يعني شبيه شلون اندرويد يعني شبيه الانسان هاي نفس الشي يعني شبيه اللوكيميا

👈 ال Leukemia يعني خلايا دم بيض ماتشتغل بينما Leukomoid خلايا دم بيض تشتغل working
زين انا شلون اعرف هاي الزيادة لوكيميا لو مو لوكيميا ؟

نسولف قصة
عندي تركترات 3 ومحملات بالقش يعني شنو استنتجت انه هسه ؟ يعني التركترات جاي تشتغل

زين اذا عندي 3 تركترات طلعن الصبح فارغات وجعن الضهر هم فارغات شفتهن العصر هم فارغات فشنو استنتجت انه ؟ استنتجت انه التركترات ماجاي تشتغل
والدليل شنو ؟ مابيهن قش
فشنو الشغلة الي اذا لكيتها ب WBC تكول هاي شغالة مو cancer ؟
هو انزيم ALP الي هو Alkaline phosphatase اذا لكيته موجود يعني Leukomoid واذا ماكو يعني Leukemia

👈 معلومات جانبية
ال neutrophil تزداد بالاصابات البكتيرية لان هي تحب تهاجم البكتيريا
ال Eosinophil تزداد ب allergy و parasitic infection
ال lymphocyte تزداد بالاصابات الفايروسية وتقل هم بالاصابات الفايروسية
يمتى تزداد ويمتى تقل ؟
تزداد ب acute وتقل ب chronic

يافايروس يسوي قله ب lymphocyte ؟
1. ال HIV
2. ال SARS-COV-2 ( COVID 19 )
طبعاً فايروس كورونا يقلل Lymphocyte و Neutrophil

ال Monocyte تزداد ب TB و Syphilis لان هي من اكثر الخلايا الي تهاجم TB و Syphilis

👈 ال macrophage كل ساعة الها اسم حسب المنطقة الموجودة بيها
مثلاً اذا بالدم يسمونها monocyte واذا بالنسيج يسمونها macrophage وهكذا ( تابع الصورة رقم 5 )

👈 الصفيحات الدموية platelet اسمها الثاني thrombocyte الخلايا الخثرية لان تسبب clot

👈 زيادة ال platelet يسمونها thrombocytosis
👈 قلة ال platelet يسمونها thrombocytopenia

👈 منو يكسر platelet ؟ ال spleen
زين اذا واحد شايل spleen ؟ يصير thrombocytosis لان ماجاي تتكسر فتزداد
انطيني علاج يوقف صفائح الدم ؟ Aspirin

#المصدر محاظرة مجانية للدكتور عبد مازن