السلام عليكم ..
#الجزء_الاول_SOP 💜

شغلتين إذا عرفت شلون تقراهن فأنت في الطريق الصحيح في علم المختبرات وهنه : شلون تعرف تقره ال SOP ( الورقة الي تجي وي Kit ) وشلون تعرف تقره User manual ( الورقة الي تجي وي الجهاز ) وهذا مايُدرس عالمياً ، واكو انظمة خاصة بذلك هي CLS و QMS الي يقودنك لشهادة ASCP الي هي زمالة البورد الامريكي في طب المختبرات كما يسميه بروف فنست ماركس وبروف دوسان مسكو وبروف رودلف بولمان وآخرين ( مثل ما اكو بورد للاطباء فاكو بورد للمختبرات )
بسم الله نبدي ..

شلون تقره ال SOP أو Leaflet ( الورقة الي تجي وي ال Kit ) ؟
مثالنا اليوم هو من كتات المناعة الي هو RF ..
راح نسويها سؤال وجواب

👈 س1 : شنو اسم شركة هذا Kit ؟
ج : اسم الشركة هي cromatest ( تابع الرقم 1 في الصورة التي في الاسفل )

👈 س2 : شنو اسم الفحص مال هذا Kit ؟
ج : اسمه RF ( تابع الرقم 2 بالصورة )

👈 س3 : اجاك واحد گالك المن يستخدم هذا الفحص ؟ تگله لاكتشاف الروماتيزم ( تابع الرقم 3 بالصورة )

👈 س4 : اجاك واحد گلك هذا الفحص اجريه بيا طريقة على سلايد أو تيوب ؟ تگله مكتوب بالورقة مال الكت slide method يعني على سلايد ( تابع الرقم 4 بالصورة )

👈 س5 : واحد گلك شنو هاي العلامة Ce المكتوبة فوك بالورقة مال Kit ؟ تگله هاي معناتها ان هذا Kit محصل على شهادة جودة ( تابع رقم 5 بالصورة )

👈 س6 : شنو معنى هاي الجملة in vitro diagnostic ؟ يعني هذا الفحص يجرى في المختبر للتشخيص ( فحص خارج جسم الانسان ، تابع رقم 6 بالصورة )

👈 س7 : من واحد يگلك بله احچيلي شويه عن هذا الفحص ، وين اروح ليا حقل ؟ تروح گبل بوجهك على principle الي هو مبدأ عمل الفحص ، هنا مكتوب يگلك هذ الفحص يعتمد على التحبب السريع .. الى نهاية الكلام

👈 س8 : من واحد يگلك شني مكونات هذا Kit وكل عبوة شتحتوي ؟ تروح عدل لحقل Reagent composition ( مكونات Kit )
يگلك اكو عبوة R الي هي RF-Latex محتوياتها هي خليط من polystyrene وضايفين وياها human gamma globulin ( يعني Ab مال انسان ) بمحلول سلاين وتحتوي 0.95g/L من sodium azide
بالاضافه الى عبوتين اضافيتين الي هنه control positive ( تصير لونها احمر ، دلالة على الانذار محتوياتها سيرم مال واحد متأكدين منه 100% مصاب بالروماتيزم )
وعبوة control negative ( يصير لونها ازرق ، ومحتوياتها سيرم مال واحد متأكدين منه 100% سليم )
#ملاحظة : ال Control Positive و Negative نستخدمهن علمود نعرف هذا الكت شغال أو لا ( مثل الدرنفيس الفاحص 😅 )

#الجزء_الثاني_SOP 💜

👈 س9 : يجيك واحد يگلك يابه هذا Kit من استخدمة بيه مخاطر عليه لو آمن ؟
تروح گبل لهذني الكلمتين precautions و warming معناهن التحذيرات والمخاطر ( تلگاهن جوه حقل المكونات )
التحذيرات : هنا يگلك احنا فاحصين كل المحاليل ومسويلهن anti-HIV Ab النوع الاول والثاني و anti-HCV وكذلك HBsAg ومع ذلك تعامل بحذر وياهن ( هذا حجي الشركة )
المخاطر : يگلك كل المحاليل الي بال Kit تحتوي على Sodium azide وهاي المادة تسبب حساسية فتجنب ملامستها للجلد والاغشية المخاطية

👈 س10 : اجاك واحد گلك هذا Kit وين اضمه بالثلاجة او اخليه بره بالمختبر ويمتى الاكسباير مالته ؟ تروح لحقل Storage & stability يگلك يخزن ال Kit بدرجة من 2-8 يعني جوه مو بالفريز

زين شيقصد بال stability ؟ من تفتح Kit تسجل عليه تاريخ الفتح الي هو يختلف عن تاريخ الاكسباير ، يعني هسه صار عندي تاريخين .
فأكو كتات تكلي ال stability مالتها مثلاً 3 اشهر يعني اذا Kit فتحته مثلاً يوم 1/12/2019 فبعد 3 اشهر ويتلف واكو كتات تگلي تاريخ ال stability هي لحد نهاية تاريخ الاكسباير
فهنا بمثالنا هذا يگلي كت RF يبقى مستقر لحد تاريخ الاكسباير ..

#ملاحظة : الاكسباير تلگاه على الباكيت وعلى العبوات هم ، مرات يكتبوها Exp ومرات يرسملك ساعة رملية

👈 س11 : زين انه اشتريت هذا kit استعمله گبل لو يحتاج تحضير ؟ اروح گبل لحقل Reagent preparation هنا بمثالنا هذا جاي يگول ال kit جاهز للاستعمال مايحتاج تحضير

👈 س12 : يجيك واحد يگلك اريد اسوي تحليل RF شنو العينة المطلوبة سيرم ، بلازما ، دم . ويصير مثلا العينة اسحبها واشتغلها عگبه او بعد اسبوع مثلاً ؟ تروح لحقل Samples بهذا الحقل يگلك العينة Fresh وسيرم واذا خزنتها بدرجة 2-8 راح تضل صالحة لمدة اسبوع واحد وإذا اريد اخليها صالحة لفترة اطول اخزن العينة بدرجة 20-

👈 س13 : زين إذا اريد اشتغل هذا الفحص شنو الادوات الي احتاجها وماموجودة بال kit ؟ اروح لحقل Material Required راح يگلي تحتاج pipette و محلول saline و rotator و ساعة منبهه

👈 س14 : شلون اشتغل هذا الفحص ؟ وشنو نتائج هذا الفحص يعني ينطيني نتيجة بس positive و negative لو ينطيني رقم ؟
اروح لحقل procedure راح يگلي الطريقة الاولى هي Qualitative Test يعني نتائج positive و negative وشارحلك طريقة العمل المعتاد عليها ..
والطريقة الثانية هي semi-quantitative يعني معناتها تقادير ، شلون تقادير يعني فرضاً بالمختبر او 34 موظف فانه راح ماانطيك الرقم المضبوط بس اقدرهم الك اگول هذا المختبر بيه تقريباً فد 30 موظف ، وشارحلك طريقة التقادير الي هي طريقة التخفيف .
اذن هسه نتائج هذا الفحص هي positive و negative و كذلك تقادير

#ملاحظة : اكو رقم مكتوب على الباكيت وعلى العبوات الي هو LOT .. المفروض هذا الرقم الي على الباكيت هو مطابق للرقم الموجود على العبوات
شنو معناه ؟ معناه يگلك يابه تره هذا الباكيت هو صح لهاي العبوات وماصار بيها اي تبديل
فمن اشتري Kit جديد انتبه لهذا الرقم علمود اضمن ان عملية الرزم صحيحة وماصار بيها خطأ سواء ان كان الخطأ مقصود مثلاً بمذخر المختبر شايلين عبوة RF وحاطيلك عبوه هم RF فتبين عندك الاختلاف بال LOT Number أو خطأ غير مقصود عن طريق الشركة مثلاً

#ملاحظة : ال Kit هو مصطلح تجاري ، المصطلح العلمي له هو Test system اي منظومة الفحص

استاذ اكرم

الموضوع طويل بس يستاهل تعب نفسك عليه لان اكو شغلات ربما لاول مره راح تسمعها ..

اكثرنا ننشر فيديوهات او منشورات تعليمية عن
كيفية اجراء التحاليل بس ماشفت واحد نشرها بطريقة علمية صحيحة ومتكاملة للاسف .. فراح اتبنى هذا الشي
قبل مانبدي خلي بالك قراءة SOP كلش مهمة واذا تردون اشرحها الكم بالخدمة 😋

الفحوصات التي تعتمد على agglutination reaction 🌸🌸
مثال على ذلك CRP ..
خل نتفق قبل لانبدي .. الشخص الي يشتغل بال Lab يحتاج قوة تخيل ليش ؟ لان الطبيب ويامن يشتغل ؟ وي مريض يجيه ويشوفه ويحجي وياه بينما انت تشتغل وي ال Molecule الموجودة بالعبوة ، ال molecule لاتحجي وياها ولاتحجي وياك
ال fluid الي داخل عبوة Latex هذا المفروض مااشوفه Fluid وانما بحر 🌊 وبيه غواص ( Ab ) وانه اريد هذا الغواص يروح يجيبلي السمجة 🦈( Ag ) الي موجودة بالبحر ( عينة المريض )
فانه لازم اداري الغواص
شلون ادارية ؟
إذا بردان ادفيه وإذا نايم اكعده وإذا مامرتاح اريحه ..
يمتى ينام الغواص العفو قصدي ال Ab ؟ إذا عفت عبوة Latex فتره طويلة فراح يترسب جوه فلازم استعمل Mixer علمود اكعده من نومته
زين يمتى يبرد ؟ إذا توني مطلعه من الثلاجة واستعملته ، هسه انت اذا بردان هم الك خلگ تمد ايدك ، اصلاً حتى لو يشوف Ag هم ماله خلگ يكضه وبالتالي راح يطلع Negative بينما هو بالحقيقة Positive
زين يمتى مايرتاح ؟ إذا اكو واحد وياه مضوجة ( تلوث العبوه ) ، هسه انت واخلي وياك واحد ماترتاحلة هم الك خلگ تشتغل صح ؟! طبعاً لا

#طريقة_العمل ::
👈 1. استخراج kit من الثلاجة واتركه علما تصير درجة حرارته معادلة لدرجة حرارة الغرفة
👈 2. اخذ Control +ve ( حجم القطرة حسب SOP ) واخليها على الدائرة رقم 1
👈 3. اخذ Control -ve ( حجم القطرة حسب SOP ) واخليها على الدائرة رقم 2
👈 4. اخذ قطرة من سيرم المريض رقم 1 ( حجم القطرة حسب SOP ) واخليها على الدائرة رقم 3
👈 5. اخذ قطرة من سيرم المريض رقم 2 وهكذا لبقية المرضى
👈6. اضيف قطرة من Latex ( حجم القطرة حسب SOP ) بس من اضيف القطرة مااضيفها فوك السيرم مباشرتاً وانما بطرف الدائرة علمود مااخلي التفاعل يبدي وانه بعدني مامكمل اضافات
👈 7. اسوي Mixing للقطرات المضافة باستعمال Stick
👈 8. اسوي Mixing ( المدة حسب الكت ) عادتاً تكون دقيقتين
هسه نجي للقراءات اشيل كل شي كأنما عندي بس Control +ve و Control -ve
المفروض + يطلع + و - يطلع - اذن Kit مضبوط
هسه نجي للبقية
اباوع على عينات المرضى ياهي البيها تحبب فهي + وياهي المابيها تحبب فهي - ( هاي بالظاهر فقط )
هل الظاهر يشبه الباطن ؟ يعني + هي فعلاً + وهل - هي فعلاً - ؟
خل نجي لإثبات ال positive اول شي
هسه اجي اشوف منو المريض الي طلع التحبب ماله 100% يشبه Control +ve هذا هو positive بالظاهر والباطن
مثلا طلع عندي مريض رقم 2 التحبب ماله مو كلش يشبه Control +ve مثلاً نسبة التشابه هي 60% فهنا راح يصير تفسيرين ربما هذا التحبب هو فعلاً Ag-Ab وربما جزيئات اخرى تشكلت وظهرت كأنها تحبب
شنو الحل ؟
قاعدة علمية دگول Ag-Ab complex is irreversible يعني اذا اضيف قطرتين من Normal saline إذا بقه هذا التحبب فهو تحبب حقيقي يعني True Positive وإذا تفلش هذا التحبب فمعناتها هذا pseudo-agglutination يعني ظهر + لكن هو بالحقيقة -

هسه نجي على اثبات Negative
اكو ظاهرة ثانية اسمها Prozone ( عدم التكافؤ بين Ag و Ab ) يعني يظهر - لكن بالحقيقة +
إذا اكو لعبة مثلا ١١ ب ١١ فاراح اشوفها بشكل طبيعي بس اذا ١٠٠٠ ب ١١ راح ماتشوف شي
الحل شنو ؟
لازم اشيل ذولة ٩٨٨ واحد
زين شلون اشيلهم ؟
اسوي Dilution لكل عينة تظهر Negative
زين احنه بالواقع العملي يطلع عدنا هواي Negative يعني لازم كل عينة اسويها تخفيف الى 5 عينات واشتغلهن ! هاي طريقة ليست عملية ولاتجارية وعامل الوقت جداً مهم بالمختبر ..
زين شنو البديل ؟
اكو شغلتين كلش مهمات ..
الاولى هي Linearity ( اعلى تركيز يقيسه Kit مالتي ) , ثاني شي Critical value ( اعلى تركيز يوصله الانلايت ويكون فيها حياة المريض في خطر ) 😟 بصيغة اخرى كلنا نعرف القيمة الطبيعية للسكر هي تقريباً من 70-110 زين يوصل 200 ؟ اي نعم يوصل ، زين يوصل 300 ؟ اي نعم يوصل ، زين شكد اعلى قيمة يوصلها السكر ؟ القيمة هي 950 يعني 960 ماكو " اذا تردون انزللكم ال Critical value لكل التحاليل بالخدمة " 😋
زين ذني شنو علاقتهن بالبروزون ؟!
فرضاً Critical value لل CRP هو 1000 يعني فوك هذا الرقم ماكو وال Kit مالتي ال Linearity مالته 1600 اذن اكو احتمالية بعد للبروزون ؟ شي اكيد لا يعني الي يطلع Negative فهو 100% Negative . زين اذا لا ال Critical value لل CRP هي 2000 وانه الكت مالتي ال Linearity مالته 1600 هنا يحتاج اسوي تخفيف للعينة لان اكو احتمالية للبروزون ..

#نحو_بناء_فريق_عمل_ينافس_العالم_CLS
منقول ،
استاذ اكرم

السلام عليكم ..
شفت كتب عربية وشفت كتب انكليزية في مجالنا مجال المختبرات
لگيت الكتب العربية تركز على البروسيجرات ! عكس الكتب الانكليزية الي اصلا ماشفت بروسيجر واحد مكتوب بيها ! تدرون ليش ؟
لان همه فاهمينها صح
يكلك البروسيجر هو اصلاً مكتوب بال SOP أو Leaflet الي تجي وي Kit وهذا شغل شركة فهي ادرى بطرق العمل ، فماكو داعي اذكرها اصلاً ، لان ممكن تتغير
وفوك هذا الكتب العربية مع الاسف ضعيفة حيل تعلمك تشتغل مثل الآلي

اعرض عليكم طريقة #كتاب_ديفز

👈 اول شي يكتبلك اسم الفحص مثلاً Alanine Aminotransferase
👈جواه يكتبلك الرمز لهذا التحليل الي هو ALT

👈جواه الفائدة من هذا التحليل مثلا ALT هو لتقييم
وظائف الكبد

👈جواه تحظير المريض : يگلك لاتاكل ولاتشرب ولاتسوي اي نشاط او تاخذ علاج قبل اجراء التحليل

👈 جواه اسم الطريقة الي يتم فيها اجراء الفحص وفي مثالنا هذا هي spectrophotometry يعني باستخدام الاجهزة الي تعتمد على امتصاص اللون

👈جواه بالمربع الاخضر القيم الطبيعية لهذا التحليل في حديثي الولادة والاطفال والبالغين والي اكبر من 90 سنة في الذكور والاناث

👈 بعدها راح تلگه كلمة overview يعني راح يحجيلك شوية ع فحص : يكلك العينة هي blood نخليها في تيوب ذهبي او احمر ..
بعدين بنفس الحقل راح يشرحلك شنو ALT ؟ يكلك هذا انزيم يكونه الكبد يوجد بتركيز عالي داخل خلايا الكبد ويوجد في تراكيز متوسطة في الكلى وكمية قليلة منه توجد في القلب والبنكرياس والطحال الى اخر الكلام ( يعني يشرحلك هذا التحليل شنو بطريقة علمية لان مايصير انت تشتغل تحليل وماتعرف شي عنه او معلومات ركيكه )

👈 وراها راح تلگه كلمة Indication يعني توصيات او بالمعنى العامي اصلاً انه ليش اسوي ALT ، يكلك مثلا انت جاي تتعالج بادوية تسبب سموم بالكبد فلازم افحص ALT علمود اعرف انت الكبد مالي مامتأثر من هاي الادوية او لا

👈 بعدها راح تلگة كلمة Interference Factors يعني اكو شغلات تخلي هذا تحليلك يطلع خطأ
مثلاً اكو ادوية هي تصعد ALT بينما الكبد مابيه شي .. الى اخر الكلام

👈 بعدين راح يگلك بيا امراض يصعد ALT وبيا امراض
ينزل الى اخر الكلام ..

كتابين مالگيت لغاية كتابة هذا المنشور افضل منهن في مجال المختبرات وصورهن بالمنشور

1. Davis's Comprehensive Manual of Laboratory and Diagnostic Test
2. Differential diagnosis by the laboratory medicine

السلام عليكم 💜

تحليل Alanine Aminotransferase .. 💜

#مختصره 👈 ALT أو SGPT
#استعماله 👈 لتقييم وضائف الكبد ( يعني هل اكو مرض أو مشكلة بالكبد او لا )
#العينة 👈 1 مل سيرم أو بلازما هم مقبولة
#اسم الطريقة 👈 spectrophotometry يعني طريقة تعتمد على اللون ( يجوز نشرح مبدأ عملها بعدين )
#القيم_الطبيعية 👈 موجودة بالصورة جوه

💜 شوية حجي عن هذا التحليل : ال ALT سابقاً جان يسمونه SGPT الي هو انزيم ينتج من قبل خلايا الكبد ويوجد بتراكيز عالية في الكبد وبتراكيز متوسطة في خلايا الكلى وبتراكيز قليلة في القلب والبنكرياس والطحال والعظلات الهيكلية وكريات الدم الحمراء
من يصير اكو تحطم بخلايا الكبد ( مرض بالكبد ) مستوى ال ALT يزداد تقريباً 50 مره مما يجعل هذا الفحص sensitive
شنو معنى كلمة sensitive المعنى الطبي مو الترجمة الحرفية ؟
يعني فحص حساس جداً
يعني هي اقل تركيز ممكن قياسه
شويه قربها الي بعد
يعني يلگف المرض حتى لو كان تركيزه قليل
ال ALT هو واحد من مجموعة فحوصات تسمى ب LFT اختصار ل Liver Function Test الي تستعمل لتقيم وضائف الكبد الي هنه ALT و Albumin و ALP و AST و Total bilirubin و Direct bilirubin و Total protein

💜 نجي على indication يعني ليش اسوي هذا الفحص ؟
1. نسوي AST وي ALT لان هنه ثنينهن موجودات بالكبد علمود إذا لگيناهن زايدات فاكو مشكلة بالكبد فنعرف طريقنه بمعالجة المشكلة
2. مرات واحد ياخذ ادوية تأثر على الكبد فلازم نسويله تحليل ALT باستمرار ماطول جاي ياخذ العلاج علمود نراقب الكبد هاي الحالة يسمونها ب monitoring يعني المراقبة
3. مرات واحد هو مشخص بيه مشكلة بالكبد فننطيه علاج للكبد ونفحصله ALT علمود نشوف العلاج جاي يشتغل لو لا ( الكبد جاي يتشافى لو على حطته ) هاي الحالة يسمونها ب prognosis يعني التنبؤ أو معرفة المستقبل المرضي

💜 زين بيا امراض يزداد وبيا امراض يقل ALT ؟
يزداد بالامراض التالية :
1. التهاب البنكرياس الحاد acute pancreatitis
2. الايدز الي اله علاقة بفايروس HBV
3. انسداد القنوات القنوات الصفراوية
4. الحروق ( إذا كانت شديدة )
5. الي يشربون كحول
6. تشمع الكبد cirrhosis
7. دهون الكبد fatty liver
8. سرطان الكبد hepatic carcinoma ( ليش يسمون سرطان الكبد carcinoma مو sarcoma علماً ان ثنينهن معناتهن سرطان فكر بيها .. )
9. التهاب الكبد hepatitis
10. داء القبل infectious mononucleosis الي سببه فايروس EBV
11. اصابة العضلة مثلاً حادث أو infection أو صرع
12. ضمور العضلات muscular dystrophy
13. احتشاء عضلة القلب MI
14. التهاب العضلات myositis
15. التهاب البنكرياس pancreatitis
16. مرض Pre-eclampsia الي هو اضطراب يصير عند الحامل فيصعد ضغطها
17. ال shock وخصوصاً إذا كانت severe

يقل في حالة واحده وهي Pyridoxal phosphate deficiency ( لان نقص pyridoxal phosphate يؤدي الى قله انتاج انزيم ALT )

💜 هسه نجي على interfering factors يعني اكو شغلات إذا موجوده بالعينة راح طلعنه الفحص غلط وهي :
1. الادوية لان اكو ادوية تزيدنا ALT لان تسبب cholestasis يعني ركود صفراوي ومن هاي الادوية هي ( anabolic steroids و dapsone و estrogens و ethionamide و icterogenin و mepazine و methandriol و oral contraceptives و oxymetholone و propoxyphene و sulfonylureas و zidovudine )
2. اكو ادوية تزيد ALT بس ماتسوي ركود صفراوي لا وانما تسوي hepatocellular damage يعني تحطم بخلايا الكبد ومن هاي الادوية هي ( acetaminophen يعتبر toxic و acetylsalicylic acid و anticonvulsants و asparaginase و carbutamide و cephalosporins و chloramphenicol و clofibrate و cytarabine و danazol و dinitrophenol و enflurane و erythromycin و ethambutol و ethionamide و ethotoin و florantyrone و foscarnet و gentamicin و gold salts و halothane و ibufenac و indomethacin و interleukin-2 و isoniazid و lincomycin و low-molecular-weight heparin و metahexamide و metaxalone و methoxsalen و methyldopa و methylthiouracil و naproxen و nitrofurans و oral contraceptives و probenecid و procainamide و tetracyclines )
3. واكو ادوية تقلل من مستويات ALT مثل ادوية cyclosporine و interferons و ursodiol و metronidazole طبعاً الميترونيدازول يأثر على enzymatic test methods
بعد ماكتب علاجات تعبت 😅

💜 مصطلحات ..
Alanine aminotransferase ( ALT )
Aspartate aminotransferase ( AST )
Alkaline phosphatase ( ALP )
pyruvic transaminase ( SGPT )

#المصدر هو كتاب ديڤيز ، الطبعة السادسة ، الصفحة 21
تحبون المنشور اگصگصه واسويه اجزاء علمود لايصير طويل لو اخليه كله هيج ؟