በማኅበረ ቅዱሳን አውስትራሊያ ማዕከል የሜልበርን እና የፐርዝ ንኡሳን ማዕከላት የ2018 ዓ.ም ጠቅላላ ጉባኤያቸውን አካሄዱ
(ሐምሌ 19 ቀን 2018 ዓ.ም / July 26, 2026)
+++++++++++++++++++++++++++++++++++++++++++
በትናንትናው ዕለት (ሐምሌ 19 ቀን 2018 ዓ.ም / July 26, 2026) በማኅበረ ቅዱሳን አውስትራሊያ ማዕከል ሥር የሚገኙት የሜልበርን ንኡስ ማዕከል እና የፐርዝ ንኡስ ማዕከል 2ኛው ጠቅላላ ጉባኤያቸውን አካሂደዋል፡፡ የሜልበርን ንኡስ ማዕከል ጉባኤ በዙም (Zoom) የተካሄደ ሲሆን፣ የፐርዝ ንኡስ ማዕከል ጉባኤ በአካል ተካሂዷል፡፡
የጉባኤዎቹ ዋና ዋና መርሃ ግብሮች እና ዝርዝር እንቅስቃሴዎች
1.         ጸሎት፡- የሜልበርን ንኡስ ማዕከል ጠቅላላ ጉባኤ ቀሳውስት አባቶች በበይነ-መረብ (Zoom) በተገኙበት በጸሎት ተከፍቷል፡፡ የፐርዝ ንኡስ ማዕከል ጠቅላላ ጉባኤ ደግሞ  አባቶች በአካል ተገኝተው ጸሎተ ወንጌል በማደረግ ተከፍቷል፡፡
2.        ስብከተ ወንጌል፡- በሁለቱም ጉባኤዎች አባላትን በመንፈሳዊ ሕይወት የሚያነቁና የሚያጸኑ፣ እንዲሁም በአገልግሎት እንዲተጉ የሚያደርጉ ስብከቶች ተደርገዋል፡፡ እንዲሁም በዕለቱ ለተሰበሰቡት ምዕመናንና አባላት የማኅበሩን ዓላማ፣ የአገልግሎትን አስፈላጊነት እና የእርስ በእርስ መመካከርን የሚያስረዱ አስተማሪ ትምህርቶች ተሰጥተዋል፡፡
3.        መዝሙር፡ ያሬዳዊ መዝሙራት በአባላት ቀርበዋል፡፡
4.       የ2018 ዓ.ም የሥራ አፈጻጸም ሪፖርት፡- በ2018 ዓ.ም የአገልግሎት ዘመን የተከናወኑ ዋና ዋና ተግባራትን የሚዳስሱ አጠቃላይ ሪፖርቶች በጉባኤዎቹ ቀርበዋል፡፡ አባላት በቀረቡት ሪፖርቶች ላይ ጥያቄዎችንና አስተያየቶችን በማንሳት ሰፊ ውይይት አድርገውበታል፡፡
5.        የ2019 ዓ.ም ዕቅድ ማቅረብ፣ ውይይትና ማፅደቅ፡- ለቀጣዩ የአገልግሎት ዘመን የተዘጋጀው ስትራቴጂካዊ ዕቅድ ለጉባኤው ቀርቦ ውይይት ተደርጎበታል፡፡ በቀጣዩ ዓመት የሚከናወኑ መንፈሳዊ፣ ማኅበራዊና መዋቅራዊ ተግባራት ተዘርዝረው የቀረቡ ሲሆን፣ የአባላትን ተሳትፎ ይበልጥ ለማሳደግ በሚቻልበት ሁኔታ ላይ ሰፊ ውይይት ተደርጓል፡፡ አባላት በማኅበሩ ብቻ ሳይሆን በየአጥቢያ ቤተ ክርስቲያኑም ጭምር ገብተው በአገልግሎት መሳተፍ እንዳለባቸው ከነባር አባላት ተጠቁሟል፡፡ ጉባኤው በዕቅዱ ላይ አስፈላጊውን ውይይት ካደረገ በኋላ ገንቢ አስተያየቶችን በመጨመር ዕቅዱን በሙሉ ድምፅ አጽድቆታል፡፡
6.       የ2019 ዓ.ም አዳዲስ ሥራ አስፈጻሚዎች ምርጫ፡- የሁለቱን ንኡሳን ማዕከላት አገልግሎት የሚመሩና የሚያስተባብሩ አዳዲስ ሥራ አስፈጻሚዎችን የመምረጥ ሥነ-ሥርዓት ተካሂዷል፡፡ አባላት ለአገልግሎቱ ብቁና ታማኝ የሆኑ ወንድሞችንና እህቶችን በማኅበሩ ምርጫ ሂደት መሠረት መርጠዋል፡፡ አዳዲስ ተመራጮች የተጣለባቸውን ታላቅ የቤተ ክርስቲያን አደራና ኃላፊነት በሚገባ እንዲወጡ እና እግዚአብሔር እንዲረዳቸው ከምርጫው በፊትና በኋላ ጸሎት ተደርጓል፡፡
7.        አጋፔ (የፍቅር ማዕድ)፡- በፐርዝ ንኡስ ማዕከል የተካሄደው ጉባኤ መርሃ ግብሩን ሙሉ በሙሉ አጠናቆ ሲያበቃ፣ አባላት በፍቅርና በአንድነት የተካፈሉበት አጋፔ (የፍቅር ማዕድ) ተዘጋጅቶ ጉባኤው በደስታ ተጠናቋል፡፡