الرسالة :- السلام عليكم

ممكن تحجيلنا عن الزواج وتنصحنه و على إي اساس نختار الشريك وشلون نعرف اذا جان الزوج او الزوجة المناسب و هل الشهادة ضرورية او العمل يكفي؟
المهم اشي تحسه مهمه احجي النا والله يجزيك الخير

عليكم السلام

أحاول ما أحجي بالخط العريض ولو هذا واقع، البنية إذا تقدم الها ولد فتقريبًا أخوانها وأهلها عليهم مسؤولية معرفة الولد زين لو لا

القاعدة الي تتفرع منها الصفات هي الدين والخُلُق، هذه من تلك إذا ذني مضمونات ينضمن كلشي وراهن، بس الأمر يحتاج له دقة أكثر من هيج، الولد هسة بالمجتمع كلش طبيعي تلكين شخص سمعته حلوة ويطلع يشرب، لو يكبسل، لو يدور ولد، لو ملطلط مال بنات وبس هاي النقطة شكد يرادلها حجي، لو أخلاقه سز وما عنده غيرة، لو ما يصلي
لو وحدة من الصفات تواجدن بي فهذا أستحي أصاحبه مو أزوجه بنية من عدنا، والحالات هاي يا مكثرها وما جاي أبالغ والله لأن أطلع بالشارع وأسمع وأشوف

هواي أكو نماذج متدينة بالمجتمع أعرفها شخصيًا بس من الباطن لا، حدّث ولا حرج حتى زحمة أحجي هنا، قاعدة الدين والخُلُق منتفية عدهم، حتى الإمام من يجون يمدحون يمه شخص يكلوله هذا الشخص كثير الصلاة والصوم يگلهم عوفوا ذني شوفولي عقله، والكلام هذا دقيق لأن مرات يتواجد الدين تختفي الأخلاق فالتأثير جذري

من ناحية شخصية الزوج تقريبًا الشخص ينعرف من أخلاقه بالمجتمع فالأهل ماعرف شلون يسألون يدبرون نفسهم، بالوقت الحالي ماكو شي ينضم فلازم يتعبون نفسهم

من ناحية الشهادة والعمل، بوقت الحياة التعجيزية الي تداهم حياة هاي الأجيال الجديدة فالعمل ضروري صراحةً، الناس تلتجئ للشهادة لأنها أكثر ضمان (نوعًا ما) من العمل الحر الي يعتمد على السوگ

الشخص لازم يكون شايل نفسه على الأقل علمود يتحمل مسؤولية عائلة، لأن كلشي حاليًا بتضخّم أبسط شي مراجعة الدكتور هسة تستنزف حتى صاحب الراتب، غير المدارس والمصاريف، أكو هواي ناس ما عدهم شهادات بس خلولهم بيوت وسيارات ورب العالمين رازقهم بس هاي يرادلها زلم مو واحد متختخ بالبيت، فالتقييم مالكم خلوه واقعي مو يجيكم شاب گبل كلتوا نريد بيت وسيارة، الي مشتري قصر قبل 30 سنة هسة ما يكدر يحط له بيت متوسط

بالنسبة للولد إذا ردتم تتزوجون ف الله يكون بعونكم

الرسالة :- هاي من ناحية الزوج من ناحية الزوجة شلون ؟

والله خوية هذا الجيل صعب، المرأة كائن معقد الإختيار يخليك بحيرة لأن يجوز هي ذات أطباع معينة ورا فترة كيانها كله يتغير بيوم وليلة، تنام تكعد تكلك اخذني للمحكمة

ما أحجي بالعموم أكو بيهن زينات بس الوضع بانحدار مو طبيعي فهاي حيرة خليها لذاك الوقت

الرسالة :- المرا كائن معقد جا والزلم هم ما ينحملون

فعلًا حتى اني ما جاي أحملهم صايرين خيسة

لذلك جاي أكلكم خلوا اختياركم دقيق ترى مستقبل الزواج يعتمد على الاختيار، مو تتزوجين واحد ما يكدر حتى يربّي نفسه وتكولين قسمة ونصيب، أعرف زلم ينكال عنهم زلم بصفاتهم الزينة، لذلك اني على گد ما عندي أصدقاء كلش هواي بس الأثق بيهم وأمشي وياهم كلش قليلين

الرسالة :- اكو اشخاص جنت متعجبة بأخلاقهم وإلتزامهم وشلون اكو بعد شباب هيج بهل الزمن بس بعدين طلعوا لا يم الأخلاق ولا الإلتزام ،فهسة صايرة ما تنعرف الزين من الموزين لأن يظهرلك نفسه بأحسن صورة وبعدين تنصدم بيه فاللّٰه يعين الي يريد يتزوج سواء كانو من الرجال او النساء لأن الوضع للأسوء صاير والناس متخبلة

بالضبط، وبالذات المتدين هذا يجي نفس الأفعى للحجر، آخر فترة تقريبًا طلعاتي قلّت خصوصًا بعد بداية الجامعة فهسة من أطلع كلما أمدح شخص يكلولي أوه هذا هيج سالفته ويطلعن سوالفه التعبانة، الدين هسة غالبًا صار مو معيار للشخص الزين للأسف

الرسالة :- هم شايف نسوان صدك يستحقن الاحترام

اني اتوقع صارن كلش نادرات

بالأجيال الي قبلنا موجود، بس هذا الجيل ما أدري بس ملاحظ سوء الشخصية والأخلاق بشكل مقرف

الرسالة :- حرفيا متلبسين بالدين، اللهم لا تفجعنا بنصيبنا

آمين، اسألوا هواي ويفضّل تجيبون الأخبار من الشباب لأن الكبار نايمين ورجليهم بالشمس

الرسالة :- هو الموافقة على الشريك المفروض تكون على حسب دينة واخلاقة بس هسة حتى ذولي ما تگدر تتأكد منهم 🥴 ما عدنا غير الدعاء بعد
وهم العزوبية والگعدة يم الأهل بعد ما تنراد هههه اللّٰه يعين

الله يساعدكم

أكو سالفة نبهت عليها توني ماعرف إذا منتشرة بكثرة يمكم لو لا، هي سالفة الرجال يدوّر ولد، يعني مثليين

هاي أكرر عليها صراحةً الوضع مخيف بشكل ما تتوقعونه، هسة اني أمشي وي ولد والله أحتار بي إذا دربه ولادي لو لا، تكررت حالات يمنا أن بعض الزوجات يوصلن للطلاق لأن زوجهن يدوّر ولد وجداً أعتذر على هيج طرح بس ما خُفي أعظم، نسبة كبيرة من الشباب وحتى الكبار اتجهوا بهذا الدرب التعبان فهاي خلوها بالحسبان لا بعدين تنفتح السجلات وتنصدمون

الرسالة :- يتم تمديد العزوبية مدى الحياة

مو خوش

رسول الله (صلى الله عليه وآله): لركعتان يصلّيهما متزوّج أفضل من رجلٍ عَزَبٍ يقوم ليله ويصوم نهاره(1).
وعنه (صلى الله عليه وآله): المتزوّج النائم أفضل عند الله من الصائم القائم العزب(2).
وعنه (صلى الله عليه وآله): من تزوّج فقد أحرز شطر(3) دينه، فَلْيَتَّقِ الله في الشطر الثاني(4).
 وعنه (صلى الله عليه وآله): من تزوج فقد أعطي نصف العبادة(5).
وعنه (صلى الله عليه وآله): خيار أمتي المتأهلون، و شرار أُمَّتِي العُزاب(6).
وعنه (صلى الله عليه وآله): من تزوج أحرز نصف دينه.
وفي حديث آخر: فليتق الله في النصف الآخر ــ أو الباقي ــ(7).
الإمام السجاد (عليه السلام): من تزوّج لله عزّ وجلّ، ولصلة الرحم، توجه الله تعالى بـتـاج الملك(8).
الإمام الباقر (عليه السلام): إن ركعتين يصليهما رجل متزوّج أفضل من رجل يقوم ليله ويصوم نهاره أعزب(9).
الإمام الصادق (عليه السلام): ركعتان يصليهما المتزوج أفضل من سبعين ركعة يصليها أعزب(10).

الرسالة :- بالنسبة للقنادر حشاك الي تدور ولد هاي كارثة وشفتها دا تنتشر مثل مذكرت بشكل مخيف واللّٰه ادخل للتيك توك كاااارثة المنشورات والتعليقات كبار وشباب وأطفال وشياب كلها تدور انوب يفتخرون بالمعصية ويكتب اني هيج سويت وهلكد لزمت وعادي مخلي صورته وماخذ راحتة كأن موضوع طبيعي يحجي بيه انوب تشوفه شكله مرتب ورجولي ولا عبالك يم هاي السوالف لو اذا ميدور يروح يشجعلي الي هيج مثل هاي النماذج التعبانة الي طلعت بآخر فترة والطامة الكبرى حتى بعض البنات يشجعونهم والعباس فد لعبان نفس حطب جهنم وما ادري هل فعلًا هاي الأشياء منتشرة بكثرة يمنا غير عن باقي الدول لو هم يطمطمون لو شنو الوضع لأن دا اشوف العراقيين عدهم هل الشي بكثرة وهسة مو بس الشباب حتى البنات عدهم هيج والمدارس تشهد كمية قرف مو طبيعية گبر طمكم كون واللّٰه حارگين گلبي