حسيت روحي ندير في مقدمة فلسفة / اجتماعيات في البدية يادرا التساؤل و.. 😂
لمهم ضك نكمل علاه بزاف طلبة تجيهم صعيبة

بالنسبة للـمحاضرات والأعمال الموجهة

راح يكون نفس التوقيت، المحاضرات يكونوا في الصباح، والأعمال الموجهة العشية، وعندكم TD في Anatomy - Histology فقط، عادة Physiology يديروهم على أساس درس (ما عدى في U5 Neuro)
TD Histology :
عادة يكون في اخر الوحدة، ونصيحة أخ تبعوا فيه لأنه عادة يلخصوا فيه Histology كامل الوحدة، واذا شايف نفسك ما راح تبع ، ما تفسد على زملاءك والزم الصمت
TP Anatomy :
راح يكون تقريبا Auto-formation ، يعني يعطوكم المجسمات ونتوم أدرسوا وحدكم، يمكن Prof يجيكم retard بنص ساعة أو أكثر عادي ما تخرجوا وتحسبوه ما جا (تلقاو رواحكم غياب وتجروا باه تعوضوا 😂)، أستغلوه حتى تراجعوا وش قريتوا ولا قروا بعضاكم وحاولوا تاخذوا ذاكرة بصرية لواش راكم تقراو لأنها تفيدكم بزاف في Anatomy (لي معظم الطلبة يكرهوها في 2ème)
ولما يجي Prof حاولوا تطرحوا عليه كامل أسئلتكم وراح يجاوبوكم باذن الله ويشرحولكم 🤍

هل 2ème صعيبة ؟

اختلاف النظام بين السنتين هذو لي راح يخلق الصعوبة، لأنه أغلب الطلبة في النظام السداسي يكونوا مرتاحين في البداية وان تأخروا بشهرين أو أكثر، راح يكون عندهم مدة كافية يتداركوا فيه ما فاتهم
ناهيك على الدروس القليلة في 1er
لكن 2ème؟ الوحدة عندها وقت محدود يعني لو تتأخر بأسبوع أو أسبوعين راح تلقى نصف البرنامج فاتك 😐 فتدارك في الوقت المتبقي صعب كثير وحتى اذا قدرت تلحق تقرا كل شي، راح تكتشف أنك قريت بشكل سطحي وهنا تدخل في حيط لما يجيك الامتحان..

🔻لما يبدا العام دير في حسابك بلي راك متأخر، ما تقتل روحك بالدراسة وفي نفس الوقت ما تأجل، الوحدة الاولى فيها 40 درس فلك ان تتخيل لوكان تأجل ✨
🔻خصك تلقى النظام لي يناسبك في الدراسة، وتدرس بذكاء وجهد في نفس الوقت
🔻معظم الناس يديروا خطأ أنهم يفهموا برك بلاما يحفظوا ويقراو الدرس مرة وحدة حتى يقرب الامتحان باه يقراوه للمرة الثانية وهنا ينصدموا ، راح يفيقوا برواحهم بلي نساو وش قراو ومع ضغط الامتحان هذاك هو ✨
🔻في السنة الأولى كامل الامتحانات كانت 20 / 30 QCM تقريبا ، عمركم لا وصلتوا لـ+70 فلما تجوز أول امتحان لك راح تنصدم خاصة مع ضيق الوقت (مثلا الوحدة الأولى 80 QCS في ساعتين؟ نسيت) راه يلزم تحل Simulations حتى تعود نفسك على المدة هذي، يعني ما يكون Examen هو أول تجربة ليك تحل هذ القدر من الأسئلة

بالنسبة لنا Lumed

باذن الله نكونوا معكم كيما كنا مع Promo لي قبلكم، سواء من ناحية كتب Réorganisations أو QCMs ، حتى النصائح كيفه تدرسوا ، الأخطاء لي تتفادوها ... يعني ما تخافوا وباذن الله يعقب من أحلى العوام 🤍🫡

المفيد

🔮 استغلوا الصيف في تعلم مهارات أخرى، وخاصة خاصة اللغة ، طوروها باه ما تصادفوا أي مشكلة وحتى تسهال عليكم الدراسة (يكذب عليكم لي يقول ما عندها تأثير كبير)
🔮 ارتاحوا في العطلة وما تخمموا في 2ème بزاف، وما تعبوا رواحكم قبل الوقت لا يصرالكم Burn out وسط العام
🔮 لما تقرب القراية (Sept) وقتها أرجعوا للـMessages هذوا لأنه الهدف منهم تهزوا نظرة فقط على 2ème ، وأكيد وقتها راح نتفصلوا أكثر في كل وحدة، طرق الدراسة الخ..

لي عنده أي تساؤل يتفضل يبعثلنا في Direct messages / NGL

هي على حسب نوع الخدمة لي راح تديري
هل دوام كلي ولا جزئي (نصف نهار) ، هل الخدمة متعلقة بالـMed ولا لا..
لازم حساب وتنظيم بين الخدمة والدراسة، لما تشوفي انه الخدمة ما تضر دراستك وعندك الوقت تقراي عادي فهنا تقدري ايه
اذا كلي (خدمة 8h يومي) هنا مستحيل لانه ما راح يكون عندك وقت تحضري المحاضرات، ما يكون عندك وقت باه تقراي أصلا
اذا جزئي هنا كاين أمل ، على حسب Managing للوقت تاعك والأيام لي تخدميهم

باه تكوني في الصورة تقريبا يلزم 8 سوايع دراسة يوميا، سواء درستهم وحدك بلاما تحضر les cours ولا اذا حضرت

بالنسبة لكل وحدة وشحال فيها دروس (قادر يتغير العدد لكن يكونوا مقاربين)
U1 Cardio : 40 Cours
U2 Digestive : 34 Cours
U3 Urinaire : 28 Cours
U4 Endocrino : 40 Cours
U5 Neuro : 55 Cours
Génétique : 13-15 Cours
Immunologie : 15-18 Cours

بالنسبة للسطاج راح يكون في أخر العام، اذا في حياتك سطاجيت وما تعرف ولا شي، يفضل تتعلم في سونتر صغير ، أما لي ستاجاو السنة / راح يستاجوا في الصيف هذا لي قبل 2ème ، يمكن يجرب يدخل services خلاف، شوفوا وش حكينا لجماعة 2ème على stage كي خلصوا عامهم :
❗️Part 01
❗️Part 02

https://docs.google.com/file/d/1NAxC0KX0s7X7jn2jMlE-CKzVa6nVKlMT/edit?filetype=msword
الطلب

السلام عليكم ورحمة الله
الـ Canal هذي راح تبقى خاصة بـ 1st year students، اما الخاصة بالسنة الثانية فهذا هو الرابط تاعها :

Lumed — 2nd Year : https://t.me/Lumed2nd

باذن الله مستمرين معكم دائما ، والقادم أجمل 🤍😍

مبروك للمقبولين في أنبل تخصص 🤍
ومرحبا بكم في افضل قناة طبية وباذن الله تستفادوا الكثير كيما لي قبلكم 💫😍

🎓 اليوم راح نحكوا على الطب وكل واش يلزمكم تعرفوه
راح نقسموا كلامنا إلى 3 أجزاء رئيسية:
1️⃣ الجامعة بشكل عام
• الفرق بين الجامعة والطور السابق
• طريقة الدراسة والتنظيم

2️⃣ الطب 🩺
• نبذة عامة على الطب والنظام فيه
• بصفة خاصة على 1ère année: واش تستناو، كيفاش تقراو، وواش لازم تعرفو من البداية

3️⃣ نصائح من تجربتنا السنوات الماضية
• واش لازم ويفضل تديروا في ما تبقى من العطلة باش تدخلو مرتاحين
• ونصيحة عامة مبنية على واش تعلمناه خلال هذي السنوات، والأخطاء لي تمنينا لو تجنبناها من البداية.

الجامعة بشكل عام 🎓

أول حاجة لازم تعرفوها هي بلي الثانوي والجامعة مختلفين كليًا في عدة نقاط:

1️⃣ النظام
• الثانوي: التلميذ ملزم ببرنامج واضح وثابت على المستوى الوطني، سواء من ناحية المواد أو الدروس. والحضور إجباري، وأي غياب لازمله مبرر.
• الجامعة: كل كلية عندها البرنامج وطريقة التدريس الخاصة بها. صح المواد مشتركة، بصح الدروس تقدر تختلف من كلية لكلية.
البرنامج فيه Les cours وين الغياب غالبًا مسموح، وكاين TP / TD وين الحضور إجباري.
وفي La medecine، إذا تجاوزت الغيابات 1/3 من العدد الكلي للحصص في مادة معينة، تقدر تتعرض للإقصاء (Exclu) وبالتالي تعاود العام.

2️⃣ المسؤولية
• الثانوي: كاين عدة أشخاص يتابعوا مسارك الدراسي: الوالدين، الأساتذة، الإدارة... ويوجهوك واش تقرا ووقتاش تقرا.
• الجامعة: المسؤولية تولي بدرجة كبيرة على عاتقك. الأستاذ يجي يقدم الدرس ويعطيهلك (وكاين حتى لي ما يمدوه / يمدوه أخر دقيقة 🗿) والباقي عليك: واش تقرا، كيفاش تقرا، وقتاش تراجع، وكيفاش تنظم وقتك...
وهذا هو المعنى الحقيقي لـ Auto-formation: الجامعة تعطيك الإطار والمحتوى، بصح أنت المسؤول على تكوينك.

3️⃣ الفائدة والأهمية
• الثانوي: بصراحة، كنا غالبًا نقراو على جال النقطة، حتى لو كانت المادة ما نحبّوهاش 😂. وكاين مواد كثيرة ما يكونش عندها ارتباط مباشر بالمجال اللي راح تخدم فيه مستقبلًا.
• الجامعة: اكل شي تدرسه مهم وعنده علاقة بالميدان الوظيفي المتعلق بهذاك التخصص. الا أنه الأهمية تختلف نسبيا بين المواد (الأهم ثم المهم)

ملخص لواش حكينا

راح تلقوا فراغ عظيم في البرنامج ومام حرية الغياب مقارنة بالسابق، لكن صدقني تقع على عاتقك مسؤولية عظيمة ويلزم تضبط نفسك بالطريقة الصحيحة حتى :
ما تخليش القراية تاكل حياتك كامل، وما تخليش حياتك تاكل قرايتك كامل.

الطب 🩺

1️⃣ Système :
كامل عبالكم بلي l'étudient en medecine يدرس سبع سنوات حتى يتخرج ويصبح طبيب عام، وهذ السبع سنوات مقسمة الى :
✅ 3 années cycle pré-clinique
✅ 3 années cycle clinique
✅ 1 année internat

🔮 1er année et 2ème année
راح تدرسوا فيهم الحالة الطبيعية لي يكون فيها الجسم، من واش يتكون، كيفه يخدم..

🔮 3ème année
يعتبر عام انتقالي بين Cycles ، بحيث راح تتعلموا فيه كيفه تتعاملوا مع المرضى واستخراج معلومات منهم، وثاني تدرسوا بعض الأمراض وتدوا عليهم نظرة

🔮 4ème, 5ème et 6ème année
هنا راح تدرسوا بـ Système modulaire ، يعني المادة لي تقراها (مثلا Cardio) ما راح تزيد تقراها نهائيا، يعني فات وتخلصها صاي راك تعتبر طبيب عام فهذيك المادة

1ère année 🩺

🔮 النظام : Semestriel
راح تدرسوا بنظام السداسيات (Semestres)، بمثابة الفصول في السابق.
في العام كاين 2 EMD:
• EMD 1 → حتى نهاية جانفي تقريبًا
• EMD 2 → في منتصف جوان تقريبًا

🔮 المواد (Les modules)
هنا عندكم نوعين:
1️⃣ Les modules annuels
• Anatomie — علم التشريح
• Biochimie — علم الكيمياء الحيوية
• Biophysique — علم الفيزياء الحيوية
• Biostatistique et informatique — علم الإحصاء الحيوي والمعلوماتية
• Cytologie — علم الخلايا
• Chimie — علم الكيمياء
هذو راح تدرسوهم طوال العام، وتدخلو فيهم في EMD 1 و EMD 2 بمعامل 2

2️⃣ Les modules semestriels
• SSH (Santé, Société et Humanité)
• Embryologie — علم الأجنّة
• Histologie — علم الأنسجة
• Physiologie — علم وظائف الأعضاء
هذو راح تدرسوا زوج modules في كل semestre، بمعامل 1.

وفي سطيف:
• S1 → SSH + Embryologie
• S2 → Histologie + Physiologie

+ المواد لي درسوهم بالانجليزية :
Anatomy , Histology, Embryology, Cytology
الباقي مخلطين بين فرنسية - انجليزية

🔮الامتحانات : QCMs / QCS / QROC
في الرسالة لي بعد راني نشرحهم + طريقة التصحيح

بنا أنو قربو امتحاناتكم حبيت نهدرلكم على :
ℹ️ نظام تصحيح الامتحانات في كلية الطب :
الأسئلة تقدر تكون على هاد الأشكال :

• QROC = Question à réponse ouverte courte

تكون الإجابة على شكل فقرة من واش حفظت ، نادرا وين يديروه ف
pré-clinique

• QCS = Question à choix simple

وهو الأسهل تكون الإجابة واحدة فقط

• QCM = Question à choix multiple

وهنا يقدرو يكونو 3 طرق للتصحيح:
ندو مثال نمشو بيه ، الإجابة الصحيحة A B C = 0,99 :
🔻 Tout ou rien :
لازم دير كل الاختيارات صحاح باش تدي العلامة ، أي زيادة أو نقصان = 0
A B = 0
A B C = 0,99
A B C D = 0

🔹 Partiel :
ادا درت الإجابة صحيحة لكن ناقصة تدي نقطة جزئية لكن اذا كانت معاها وحدة غالطة تدي 0
A B = 0,66
A B C = 0, 99
A B C D = 0

✨ Partiel amélioré/positif :
اذا درت الإجابة صحيحة لكن ناقصة تدي نقطة جزئية لكن اذا زدت معاها
وحدة غالطة تنقصلك نقاط
A B = 0,66
A B C = 0,99
A B D = 0,33

ℹ️لذلك كي تدخلو الامتحان لازم تعرفو قبل وشنو هو نظام تصحيح باش تقدرو تربحو اكبر عدد من النقاط ، و متحطوش إلا الاجابات لي راكم متأكدين منهم

Credit : Hopital | سبيطار

ملاحظة هذي راها منقولة من الـ Canal الكبيرة لي يتحط فيها اي حاجة متعلقة بالطب عموما وأعمالنا و.. (هذي احدى قنواتنا الثانوية لي موجهة لاحد السنوات) 😍🫡

Make sure to join us : https://t.me/LumedD

نحس أنه يكفي لنهار اليوم حكيت بزاف ، حبيت نجاوب على البعض لي رسلولي في NGL ولي متحمسين 😂

🔮 فخلي نختموا كلامنا بنصيحة مهمة ليك فهذي العطلة ولاحقا لما تقرب القراية نتفصلوا في Les modules أكثر وطريقة الدراسة و...

1️⃣ استمتع بالعطلة تاعك، لما ترتاح نفسيا وجسديا بعد تعب عام كامل، راح تدخل بقوة مبعد وتقرا وأنت مرتاح ✨
❗️أحسن من أنكم تعبوا رواحكم قبل الوقت لا يصرالكم Burn out وسط العام!

2️⃣ ما تبدا تقرا في العطلة لأنه الوقت في 1er كافي ، عكس باقي السنوات بسبب نظامهم (Modulaire)
❗️طور لغتك صح خاصة الانجليزية حتى ما تلاقي أي صعوبة لاحقا

3️⃣ في أخر شهر أوت / بداية سبتمبر أرجعوا للرسائل هذوا وتعمقوا أكثر وجهزوا نفسكم للدراسة 🫡 وأي سؤال أكيد راسلونا وباذن الله نردوا عليكم ✅

🔹 Contact
🔻 NGL : your opinion matters

باه ترجعولهم في أخر الشهر و يكون كلش بترتيب (عطلة سعيدة 🤍🔮)
1️⃣ النظام الجامعي
2️⃣ الطب بصفة عامة
3️⃣ السنة الأولى
4️⃣ نظام الامتحانات
5️⃣ نصائح متعلقة بالعطلة

وما تبخلوا زملاءكم وابعثولهم حتى يستفادوا حتى هم 🤍🫡

Make sure to join us
🔹 Lumed | Official
🔹 Lumed — 1st Year

أسئلتكم 👀✨
https://ngl.link/lumed33

ايه كامل تخرجلكم لي سجلو طب

تخرجلكم فبروقرس قروب و ساكسيو تاعكمم