نبداو نحكيو على كل وحدة وش تقراو فيها

اذا نبداو بأول وحدة :
Cardio-Respiratory System 🫁🫀:
تعريف بالوحدة :
هي أطول وحدة من ناحية الدروس والوقت بعد النورو
معلوماتها يحتاجو حفظ وفهامة وممكن فهم أكثر من غير اناطو
عندكم فيها زوج محاور اساسية✨ :
Cardio + Respiratory
يكما شرحتلكم الوحدة متكونة من اربع مواد وكل مادة تقراو فيها محور cardio ومحور repiratory

Anatomy

🫀Cardiac anatomy :
- تقراو بالتفصيل القلب من داخل والخارج و الدورة الدموية تاعه
🫁Repiratory anatomy :
بالتفصيل الجهاز التنفسي + rib cage
تزيدو تقراو ايضا المقاطع العرضية وتحتاجوهم يااااسر

Physiology :

⭐️Cardiac physio :
هنا تقراو على الدورة الدموية + cardiac output + Coronary pressure
خفيفة وحلوة وفيها خمس كورات 🥹🫶 تزيدو معاهم Td ecg لي يعبتر الأساس تتعلمو كيفاه تبلاصيوه وتقراوه ووش معنى تاعو ..
بزاف هايييلة 😍🫶
⭐️Respiratory :
هنا تقراو على الغازات فالدم واهميتها Co2 O2 وكيفاه يمشي فالجسم تاعنا وش حوايج لي يريقلوه وايضا عملية التهوية ventilation ف lungs .. 👀✨

Histology :

هنا تزيدو نعاهم محور ثالث لي هو Hematology ( الدم )
صو يولي عندكم
💫Cardiac histology :
تقراو فيها Dev embryonnaire وهد الكور راح تقراوه فجميع لي زينيتي كل اينيتي تقراو فيها dev embryonnaire
لس هوا بالانجليزية
embryonic development
يعني تطور الجهاز فالمرحلة الجنينية
بزاف مهم 👀 وكيما عبالكم ايستو علم الانسجة يعني تقراو نسيج القلب و الأوعية الدموية و تفرقو بين الشريان والوريد على المستوى النسيجي ..
وطبعا ايستو ليبروف تاعها هاييلييين 😻

💫Respiratory :
كيف كيف تقراو embryoniv dev وتزيدو الأنسجة تاع الأعضاء التابعة للجهاز التنفسي

💫Hematology :
هنا تقراو كل ما يتعلق بالدورة الدمية تصفية الدم وأين تتم صناعته وومن واش يتكون .. والاعضاء لي داخلة فيه تقراو الأنسجة تاعها كيما thyumus و Spleen ..

نفوتو لآخر حاجة لي هيا

Biophysics

راح تقراو فيها على فيزياء الدم فالاوعية الدموية و كيفاه يمشي والسرعة تاعو و قوانين الفيزيائية بصفة عامة ..
تحت اشراف استاذكم القدير بلقط 👀❤️

وباه نقلكم برك Lumed راح تكون دايييماا معكم 😍

اذا كاينين أسئلة بخصوص السنة الثانية ولا وحدة الكارديو قولولي قبل منفوتو للديجاستيف ✨🤍
https://ngl.link/lumed33

بالنسبة للدروس لي تحتاجوها :
مكمش رايحين تحتاجو بزاف
عندكم أهم موديل لي هو فيزيو وكور ANS راح يبقا يمشي معاكم تسما لازم تكونو فاهمينو 🫶
ايضا امبريو وايستو رايحين تحتاجوهم فموديل ايستولوجي قتلكم بلي ديما فموديل ايستو عندكم أول كور هو embryonic dev تاع الجهاز لي راكم تقراو عليه ✅️ طبعا متحتاجوش تكونو عارفين كامل لي ديتاي بصح باه تفهمو برك الرسومات والاتجاهات
عندكم بيوستات ، شيمي مكمش رايحين تحتاجوهم نهائيا
بيوفيزيك راح تحتاجو مفاهيم optique فالنورو
كي نقلكم تحتاجوهم يعني مش نقلكم تحتاجو تكونو حافظين الكور لا تحتاجو غير مفاهيم معنى الكلمات هدوك مثلا اذا قريتوهم خلاص كي تدخلو وتبداو تقراو تتفكرو مع لي بروف
لكن ناس لي مقرااااتش خلاااص هد حوايج لي لي راح تلقا صعوبة
أيضا اناطو تحتاجو فيها مفاهيم تاعها يعني terminology ولي بزاف مهمين هوما anatomical sections :
Sagittal coronal transverse...
هدو بزاف مهمين اجماعة متهملوهم !!! لأنو فدوزيام لي بروف مش رايحين يبقاو يفهموكم كيفاه تندار
يقلك هاهي sagittal section تاع العضو لفلاني ولي ميكونش قاري هد مفاهيم فعوض ما يسيي يفهم شيما يولي يفهم كفاه راهي مدايرة

ايه عندك تيديات عندكم سمانة بسمانة ولكن مش مؤكدة لأنو عددكم قليل ممكن يكون كاين اختلاف
عندكم تيبي اناطو هدا ديما
تيدي فيزيو قليل مشي بزاف كورات برك وين يديروهم تيدي كيما ecg , egg ..
تيدي ايستو كيما اناطو يعني كل سمانة
بيوفيزيك معندكمش

السلام عليكم 👀🤍
شويا ونزيد نحطلكم على الوحدة الثانية Digestif 🌷✨

الوحدة الثانية راح تحكي على الجهاز الهضمي 🫶
Digestive system 🍏
تعريف بالوحدة :
هي ثاني أسهل وحدة
مهيش طويلة بزاف فيها تقريبا 4 أسابيع
تحتاج حفظ خاصة فالأناطو وفهم في باقي ليموديل
عدد الدروس : من 32 - 35
الوحدة كي العادة متكونة من أربع مواد

Anatomie

تحتااج بزاااااف حفاظة لأنو رايحين تقراو
Topographical anatomy
يعني رايحين تحتاجو تعرفو الجهاز الهضمي مكانه و الأعضاء المجاورة ليه من الامام الخلف ..
وكل عضو تقراو اناتومي تاعو وأعضاء مجاورة ليه
عدد ليكور : 9

Histologie :

كل عضو فالجهاز الهضمي تقراو النسيج تاعه بالتفصل الممل 😭
ليبروف راح يبقاو نفسهم تاع ايستو
عدد ليكور 11

Physiologie

بزااف حلوة وهااايييلة 😭😭😭🫶🫶
مفيهاش خلاص حفاظة بزاف تفوتو وتفهمو صاي 👀
ليبروف تاعها عندكم بوشيحة وبن سواق
اذا قراكم فيها راكم تحتاجو تحضرو معاه وتكتبو لأنو الكور تاعو فارغ
عدد ليكور : 8

Biochimie :

2 كورات ميغركمش العدد لأنو كور واحد بربع كورات 🙂 طويلة طويييييلة طويييلةةة 😂
تقراو فيها
Les vitamines
Les oligo élements 🥲
الأغلبية يديو فيها مليح لأنو ساهلة وأسئلتها ساهلين

الإمتحان :

60-70 SCQs

هنا كل واحد وطريقة تاعو ونا نفضل انو تقراوهم مع بعضاهم
اقراو كور ايسطو تاع هداك العضو هو لول ومبعد روحو اقراو اناتو تاعو وفيزيو تاعو باه تجيكم ساهلة تفهموهم 🫶
بصح اهم حاجة متقراوش موديل طووول ومبعد باه تبداو موديل اخر
اقراوهم مع بعض مثلا يوم اقراو ا كور ناتو كور ايستو ولغدوة كور فيزيو وبارتي من بيوشيمي
نشوفها افضل نصيحة باه متطيحوش فروطار وفلخر تلقاو روحكم ايليمينيتو موديل كامل !
اونكا طحتو فروطار هنا سييو تركزو على زوج موديلات مليح باه تطلعو الاينيتي

وأهم حاجة
Quality over quanitity
اقراو مليح زوج كورات فهامة وحفاظة خيرمن تقراو خمسة ونتوم مكمش شافيين على حتى حاجة فيهم

وباه تحافظو على قراية تاعكم مثلا تقراو كور فيوم ابقاو تروكوشيو فيه
على الأقل 3 روكوشات لكل كور ( تقراوه ثلث مرات ) وتحلو ليكيسيام تاعو كامل
هكا تكونو ضمنتو انكم راكم فاهمينو وحافظينو ✅
كون تقراو كور ومتوليوش ليه طول حتا للية ليكزامان هنا كي تجيو تراجعو ليلة ليكزامان تلقاو رواحكم تقراو فيه من جديد
ولذلك لازم ديما تروكوشيو 🫶

هذا لينك الأسئلة 🫶❤️
https://ngl.link/lumed33

بالنسبة للدوزياماني بزاف ساهلة 🫶
مهيش صعيبة كيما لبروميار لأنو بروميار نظام جديد وكامل موالفين بالدروس الخصوصية كي طيلعو للجامعة يلقاو رواحهم مجبرين يقراو وحدهم يعني يتبدللهم سيستام
ضكا فدوزيام راكم تلقاو رواحكم موالفين شويا
دةزيام هي أسهل سنة فالميدسين كامل يديو فيها مليح
خصكم فقط تروكوشيو بزاف ليكور وتقراو مليح وتكتشفو طريقة دراسة لي توالمكم بما أنو سيستام جديد اينيتار تبقاو بيه سنة ثانية وثالثة
❤️
بالنسبة كي يجيك ليكزاما ساهل ونبعد تلقاي حاجة اخرى هنا ممكن مكيش تعرفي تكوشي
ضكا دوزيام عندكم كسياس يعني اجابة وحدة صحيحة تجيكم ساهلة 🫶

تكوني اجور ؟
اسيستي
خصك تاسيستي وديري ليفوكو تاعك خاصين بيك واذا نتي متحبيش تاسيستي لازم لكور لي يقراوه فلومفي تروحي تي تقرايه
فدوزيام عندكم تقراو فترة صباحية وعشية تيديات ( اذا كان كاين راهم قليل مش ببزاف )
يعني خلاص فترة صباحية ديجا تكوني قارية تروحي تريحي شويا ساعتين ولا ثلاثة وتحطي تشوفي الكورات لي محتاجين لينوت تعاودي فوكال وتسجلي لينوت ولبروف لي معجبكش شرح تاعو وشفتيه ميستاهلش متزيديش تروحي تاسيستي عندو واقراي كور تاعك لي قريتيه عادي جدا
وهكا تكوني اجور مع قرايتك ومع لخر متنضغطيش ياسر
بالنسبة للمصادر عندكم الكتب تاعنا Lumed رايحين يكونو متوفرين بالنسختين فرنسية وانجليزية هذ العام بإذن الله
كامل لي قراو منهم داو علامات مليحة فقط خصك تقراي يعني مش تجيبيه ديكور
رايح يكون فيه الشرح ولينوت يعني ينقص عليك بزااااف
لينوت تاعي الخاصين كنت نديرهم وزظت عليهم لينوت تاع العام هذا
الشروحات ، المخططات ، qcm مع justification
يعني كامل وش يحتاج الطالب للتميز تلقاوه عندنا بإذن الله
ضك نحطلكم فتعليقات أراء الطلبة العام الماضي 🫶

Dokk nkmlo na7kiww ala urinaire
Li 3ndhom des qsts ykhliwhom hna
https://ngl.link/lumed33

الوحدة الثالثة راح نحكي على الجهاز البولي والتناسلي
Système rénale
أسهل وحدة وأقصرهم، فيها أربع أسابيع و حوالي 26 درس فقط !!

Anatomie

كالعادة نظن راكم حافظين الدرس، تحتاج حفاظة، فيها 4 دروس فالجهاز البولي و 3-6 في الجهاز التناسلي الخاص بالذكر والأنثى
(كل عام وكيفاه ، مرات يقراوهم مع بعض، مرات الذكري فقط والأنثوي مع الوحدة الرابعة)
الحاجة المليحة فيه سهل، صعوبته تكمن في Les rapports فيلزمكم ذاكرة بصرية مليحة (وباذن الله كاينة في كتبنا أفضل وأدق الصور) 😍

Histologie

كل عضو راح تقراو النسيج تاعه وبالتفصيل الممل، راح تدرسوا تاع الكلية (Kidney) وملحقاتها، ونفس الشي بالنسبة للجهاز التناسلي الذكري، والدروس راح يكونوا مربوطين مع الفيزيولوجية تاع هذاك العضو ، حلوة وساهلة بزاف
الحاجة المليحة راح تلاحظوا أنه النسيج متقارب ، كل مرة يتطور تدريجي فقط (يزيد حجمه ينقص ...)، هذ المبدأ راح يسهل عليك الحفاظة
عدد الدروس : 9

Physiologie

أكيد أحلى Module كي العادة 😍
يعتمد على الفهامة وبيه راح تسهال حفاظة الدروس الباقي فما تفرطوا فيها نهائيا، ومام أهم درس وأصعبهم Equilibre acido-basique وان كان أخر درس في الوحدة، الا انه ما تفوتوه لانكم تحتاجوه بزاف في السنوات الجاية، وعلى قد صعوبته على قد ما بسطناه وكالعادة Promo لي قبلكم شهود 🔥
عدد الدروس : 7-8

Biochimie

2 دروس الأول طويل حق زوج كورات ، الثاني قصير، ساهلة وحلوة وعندها علاقة مع Clinique أكثر حاجة فراح تستمتع وانت تقرا فيها

الامتحان

60-70 SCQs
الفرق هنا أنه الأسئلة متقاربة بين كامل Les modules! عكس لي قبل وين يكون Module 4 مهمش عادة 😂

ما بين وأنا نحكي على Urinaire تفكرت الكتاب لي خدمناه وقصته (نغيروا الجو شوي 🤍😂)

الكتاب المفروض يخرج في بداية الوحدة الا انه وللأسف كنا مضغوطين بالامتحان (كان صعب ونظام التصحيح أصعب 😂)
الحمد لله جاز الامتحان بعد تعب و سهر ونوم بالساعتين فقط ، الا انه عوض ما نرتاحوا بعدها لا، رحنا نكملوا الكتاب (كان باقي القليل فقط) 😂 وزملاءنا في الدفعة لي قبلكم ينتظروا فيه بفارغ الصبر عند المكتبة (ينتظروا بالساعات حتى)، وحد الضغط منهم حتى نكملوه قبل العطلة حتى يقدروا يقراو بيه كان رهيب وما يتنسى أبدا 🤍😭 ضغط هذاك كان أسوء من ضغط Contrôle حتى 😂
والحمد لله على توفيقه لنا باه نكملوه في الوقت 🤍

شوفو جماعة بخصوص اللغة الإنجليزية :
من تجربة تاعي ونا نترجم خدمتنا والكتب تاعنا من فرنسية للإنجليزية لاحظت حاجتين :
اذا كنت تفهم اونجلي يعني لي نهدرو بيها راح تجيك ساهلة وشنو terminolgie هي لي تتبدل
خاصة أناطومي كاين البعض فترجمة ميتولهوش بلي مصطلحات مهيش كيف كيف كاين بفرنسي تلقاها tubercule بصح مصطلح العلمي بالانجليزية تلقاها processus مالقري كاينة ايضا tbuercle فالانجليزية
لذلك هنا وش ننصحك ؟
اناطومي راح تتعرفي على مصطلحات جديدة ممكن !!!
وكلمات لي مشتقة من لاتينية مش راح تتبدل تبقا نفسها
الباقي راكي متلقايش مشكل كبير فيزيو و ايستو اذا عدتي تفهمي انجليزية لي نحكيو بيها ومام تلقاي مصطلحات نفسهم غير يتبدل نطق
قتلك المشكل كاين شوي فأناتو ومام ترجمة تاعها لازم تكون ترجمة بروفيسيونال لأنو تلقاي مصطلح مختلف تماااامااا على الفرنسية ميشبهلوش

ليموديل منشوفش انك تحتاجي تعاودي
كاينة صح بيوستات و شيمي وهدو لي ترحمة تاعهم ومصطلحاتهم جدااااا فرق كبييير بين فرنسية وانجليزية
ولكن منشوفش انك تحتاجي تعاودي
اذا نتي انسانة متفهميش لومجلي يعني مكش مالفة تستعمليها ولا تسمعيها فحياتك ليومية هنا اقرايها فيما تبقى من العطلة اقراي مصطلحات terminolgie مثلا عبالك
Liver بالانجليزية
Foie بالفرنسية
زيدي سيي تسمعيها بزاف اسمعي دي بودكاست فيها توالفي تلقطي الكلمات منهم وتفهمي
وهديك تاع تسجيلات الانجليزية الطبية فالجامعة لي قراوها قالولي بلس ميقريوهمش terminologie لي يحتاجوها فالميدسين
يقريوهم انجليزية وقواعد 🥲
تسما شوفي اتعلمي برك انجليزية والفيها اذا عدتي متستمعليها خلاص ومبعد اي تجيك سهلة

بإذن الله رايحين يتوفرو بالنسختين فرنسية وإنجليزية
الكتب تاعنا كامل تلقاوهم عند مكتبة ماستر وفقط
كسيام - ريزيمي - كتب الدروس هدو كامل تلقاوهم عند مكتبة ماستر بسعر في متناول الجميع 🫶
باقي الولايات اذا لقيتا طلب توفرو توصيل لجميع ولايات الوطن 🫶

لااااااا وألف لا
كاين بزاف لي يعاودو ونقلك حاجة ؟ احسن من أنو تطلعي براطراباج 🫶
هكا راح تعاود وتكون عندك الفرصة تقرا من جديد وش مقريتيش
هي صح السنة ثانية ساهلة ولكن نعرف بزاف عاودو فيها منهم لي متأقلموش مع وضعية الدراسة
وحدة نعرفها مطلعتش عامها فدوزيام تدي غير 5 و 6 ومبعد فلخر مكملت عقبت والو كي عاودت ربي يبارك 16 و 17
ولذلك عادي هدي فرصة ثانية ليك تتعلمي تصححي أخطائك وديما فيها خير ليك بلاك مكنتيش واجدة للطروازيام بما أنو هي أصعبة سنة هكا أحسن الطبيبة 🫶
ربي يوفقك ومديريش كلمة فاشل في بالك ديما قولي بلي هدي فرصة من عند ربي 🤍