التقانات الحديثة و الزراعة العضوية
يبدو لي إنه حكاية هلال مريخ ، أنصار ختمية و صوفية سلفية بالنسبة السودانيين سيك سيك معلق فيك . لحقتنا حتي في الزراعة . 

م تفتكروا انا بقصد مروية مطرية ، الحكاية أكبر من كده . أنا اكتشفت إنه أخواننا الزراعيين ديل ، هم ذاتهم فريقين أو خلونا نقول مدرستين . المدرستين ديل أنا سميتهم ناس التقانات الحديثة و ناس الزراعة العضوية . 

التقانات الحديثة معناها التكنلوجيا الحديثة ، كدي ولا ما كدي ؟ ياللا زي م الزول العادي لمن يسمع كلمة زراعة عضوية طوالي يفكر في الخضروات و الفواكه ، برضه لمن يسمع كلمة التقانات الحديثة مخو بمشي للموبايلات و الكمبيوترات و الأجهزه و الماكينات والإختراعات الحديثة ….. ياهو ولا ما ياهو ؟ 

انا والله العظيم لحدي قريييب ده ، كنت لمن أسمع أخواننا الزراعيين بتكلموا عن إستخدام التقانات الحديثة ، كنت مفتكر انه الموضوع متعلق بإستخدام آليات حديثة للزراعة و الحصاد و التسميد و استخدام نظم الري الحديثة و البيوت المحمية و الزراعة المائية و حاجات زي دي . 

ما علينا …. خلونا نشوف الفرق بين ناس التقانات الحديثة و ناس الزراعة العضوية شنو . 

الزراعة العضوية
طبعا ناس الزراعة العضوية معروفين . هم بقولوا نحن ما عايزين لا أسمدة لا مبيدات كيميائية نهائي في زراعتنا ، و علي كيفهم . بس مشكلتهم في السودان انهم ما عارفين أسمدة عضوية يعني شنو و ما عارفين كيف ينتجوها و ناس المواصفات و المقاييس قالوا زول يستوردها مافي . و حتي روث الحيوانات (الزبالة) الهم بقولوا عليه سماد عضوي قاعدين بضيفوا ليهو يوريا عشان يتخمر،  فكيف يكون سماد عضوي ؟ والأخطر من كدا إنه إستخدام الزبالة بدون ضوابط تأثيرو مدمر لتربتنا القلوية فى السودان. كبسولة رقم ١٣:
https://t.me/AgriCapsuls

نصيحة لي ناس الزراعة العضوية
أنا شخصيا ما من أنصار الزراعة العضويىة و كتبت مقالة كاملة بعنوان "خرافة الزراعة العضوية" و رسالة تانية بعنوان "عبثية الزراعة العضوية في السودان" وتالتة بعنوان "الأرباح المليارية للتجارة العضوية" و غيرها للزول الداير يعرف تفاصيل أكتر . ولكن هذا لا يمنعني أن أوجه النصائح التالية للمهتمين بالزراعة العضوية في السودان:

١- لا توجد زراعة عضوية بدون أسمدة عضوية و مخصبات عضوية و مخصبات حيوية ومبيدات طبيعية الحاجات دى ما موجودة عندنا في السودان ولا قاعدين ندرسها لاولادنا فى جامعاتنا علي الرغم من بساطتها وسهولة تصنيعها . 
بالنسبة للمخصبات العضوية، واسمها بالإنجليزي  organic soil amendments وترجمتها الحرفية "معدلات تربة عضوية" نحن فى السودان وفى كل العالم العربى بنسميها اسمدة عضوية، و التسمية دى خطأ كبير . لو عايز تعرف ليه التسمية دى خطأ،  أقرا ملف "الفرق بين الأسمدة والمخصبات". أو شوف كلام الذكاء الاصطناعى عنها فى الرابط دا:
https://share.google/aimode/De4zrd1gyJDjPOptA
 
وحتى أسمدتهم البقولوا عليها عضوية دى،  هى ذاتا ما عضوية.  لأنه في ناس قاعدين يلخبتوا معاها يوريا، ولو ناس الزراعة العضوية عرفوا الكلام ده ، مافي سوداني ح يقدر يطلع شهادة زراعة عضوية لمزرعته .  مزيد من المعلومات تجدونها في مقال لي بعنوان  "الفرق بين الأسمدة و المخصبات" فأرجو الإطلاع عليها .
٢- تعريف الهيئة السودانية للمواصفات و المقاييس للأسمدة العضوية خطأ ف خطأ ، و قد أوضحت ذلك في خمس رسائل بعنوان "هو حساب ولا كوار" جمعتها لاحقا فى ملف "كارثة المواصفة السودانية للأسمدة العضوية":
https://t.me/LiveCompost1/185
هذا الخطأ في التعريف أدي لأن تمنع الهيئة استيراد الأسمدة العضوية الحقيقية ،علي الرغم من أن هناك أسمدة طبيعية متطورة (بودرة أو حبيبات أو سائلة) يسمح بإستخدامها في الزراعة العضوية ليس لدينا الإمكانات العلمية و التقنية لإنتاجها في السودان . وقد تحدثت عن ذلك بالتفصيل في مقالة بعنوان "الحصة سماد عضوي" ، أرجو الإطلاع عليها .

٣- هناك "مخصبات عضوية" Organic Soil Amendments (ليست أسمدة عضوية) من روث الحيوانات ، يتم تصنيعها بإضافة اليوريا ، و يتم تسويقها تحت إسم أسمدة عضوية . فيجب الضغط علي هيئة المواصفات بإلغاء تعريفها للأسمدة العضوية، وبالتالي منع إضافة الأسمدة الكيميائية للمخصبات العضوية أثناء عملية التصنيع و كذلك فتح الباب لإستيراد الأسمدة العضوية المتطورة . كما يجب الضغط علي الجامعات السودانية لتغيير مناهجها الخاصة بالأسمدة و المخصبات حتي نستطيع مواكبة التطور العلمي العالمي في هذا المجال . 
٤- في الزراعة العضوية لايسمح بإستخدام المبيدات الكيميائية سواء كانت لمكافحة الحشرات أو مكافحة النباتات الطفيلية . لذلك من المفترض أن نستخدم المبيدات المصنعة من مواد طبيعية زى النيم أو المبيدات الطبيعية زى الكبريت بدلاً عن الكيميائية .  هذه أيضاً ، حسب علمي ، غير متوفرة في السودان . فكيف نستطيع مكافحة آفات الزراعة العضوية في السودان ؟   

التقانات الحديثة

كدى قبل م نبدأ ، شوفوا حمدوك قال شنو فى المؤتمر الزراعى الشامل الإتعقد في شهر مارس ٢٠٢١م عن تقاناتنا الحديثة الداوشننا بيها 👇🏽


ناس التقانات الحديثة ديل هم وزارة الزراعة . الجماعة ديل غيروا إسم قسم الإرشاد الزراعي الزمان لي الإدارة العامة للإرشاد الزراعي و نقل التقانة .
طبعا من الإسم ، الزول بتخيل إنه هدف الإدارة دي هو نقل آخر ما توصل إليه العلم في تكنلوجيا الزراعة للمزارع السوداني البسيط عشان يقدر يطور نفسه و زراعته . لكن الظاهر انه الناس ديل فهمهم غير . 

كدي قبل م نتكلم ، ركزوا في صورة تقانات السمسم و الفول الحديثة الفوق دي . هسه لو الزول عنده فد فدان داير يزرعه سمسم ولا فول ، داير ليهو كم يوم عشان يقعد يحسب حبات السماد في كل حفرة ؟
لو قالوا لينا في زَرَّاعة تكنلوجية حديثة فيها خزان للبذور و خزان للسماد تلزها بي يدك أو تجرها بي تركتر ، بتحفر الحفرة و تكب فيها البذور و السماد و تدفنها اوتوماتيك كان نقول ….. ولا شنو يا جماعة ؟

خلونا من المكنات و الأجهزة ، العالم كله عارف إنه في إكتشافات و إختراعات حديثة أصبحت جزء أساسي من المدخلات الزراعية لدرجة انه الدول بتسن قوانين لإجبار المزارعين علي إستخدامها زي المخصبات الحيوية Biofertilizers ، ناس الإرشاد الزراعي ما جايبين ليها خبر و ما جايبين ليها سيرة في حزمهم التقنية الكاملة . 

و الأدهي و أمر ، إنه الحزم التقنية الكاملة حقتهم دي ما بتشير من قريب ولا من بعيد لأهمية لإستخدام المخصبات العضوية Organic Soil Amendments أو المخصبات الحيوية Biofertilizers أو المحفزات الحيوية Biostimulants بالتوازي مع إستخدام الأسمدة ، و المزارع المسكين يشتكي مر الشكية من ضعف إنتاجية الفدان و ما عارف المشكلة وين . 

ناس الزراعة المطرية ممكن الواحد فيهم يفقد زراعته كلها لو المطرة ما نزلت لمدة أسبوع واحد ، أو لو المطرة ما وقفت لمدة لمدة تلاتة أو أربعة أيام ورا بعض برضه ممكن يفقد زراعته . فهل الحزم التقنية الكاملة ورتهم انه في تكنلوجيا جديدة إسمها المحفزات الحيوية Biostimulants ، زى شاى البرسيم،  لو استخدمها المزارع ممكن زراعته تقاوم العطش و تستحمل الغرق؟ وحتي ممكن تقاوم الأمراض والآفات الزراعية؟ الغريبة إنه عندنا محفزات عضوية طبيعية زى شاى البرسيم (كبسولة رقم ١٤ بعنوان: وما أدراك ما البرسيم). و زى الحرجل. برضه عندنا النيم كطارد للحشرات.

نصيحة لي ناس التقانات الحديثة 
الزراعة عندنا زمان كانت بدون أسمدة كيماوية و بدون مخصبات ، جبتو لينا الأسمدة الكيماوية بدون استخدام المخصبات  فدمرت أراضينا و أمرضت مواطنينا .  ولي هسه تقاناتكم بتقول لينا استخدموا أسمدة كيماوية بدون مخصبات عضوية . 

بالله شوفوا ليكم طريقة تنقلوا لينا بيها تقانات العالم الحديثة بدل نشراتكم المطبوعة بطريقة حديثة . قولوا لينا استعملوا المخصبات الحيوية عشان تقللوا من الأسمدة الكيماوية ، و استخدموا المخصبات العضوية وغير العضوية عشان نباتاتكم تستفيد من كل العناصر الغذائية الموجودة فى الأسمدة، واستخدمو الكبريت العفريت والجبس الزراعى عشان تحلو لينا مشاكل تربتنا القلوية وتستصلحوا لينا أراضينا الملحية. و استخدموا الأسمدة  الكيماوية المتخصصة بدل الأسمدة الكيماوية المتعادلة عشان م تسمموا تربتكم بفائض العناصر الغذائية ، و استخدموا المحفزات الحيوية عشان نباتاتكم تكون قوية وتسحتمل الحراية النهارية ، و جيبوا لينا المبيدات الحيوية بدل المبيدات الكيماوية عشان ما نمرض نحن و تمرض بهايمنا و واطاتنا . 

نصيحة للمزارعية المساكين
اتعلمو كيف تصنعوا المخصبات العضوية زي الكومبوست و الزبالة المكمبسة و استخدموها في زراعتكم . و لو ما عارفين تعالوا لينا في قروبات live compost في الواتساب أو امشو لمكتبة LiveCompost الرقمية على تطبيق تيليقرام  ، وح نوريكم كيف تنتجوا مخصباتكم العضوية ومحفزاتكم الحيوية براكم . ح تقلل ليكم كمية الأسمدة و بإذن الله تضاعف ليكم محاصيلكم علي بال ما ناس التقانات الحديثة ديل يشوفوا لينا حنك ال Biofertilizers و يجيبوا لينا زيت ال Biostimulants. 

تنبيه:
أرجو قراءة المقالات التالية:
الفرق بين الأسمدة و المخصبات 
الحصة سماد عضوى
خرافة الزراعة العضوية
عبثية الزراعة العضوية في السودان
الأرباح المليارية للتجارة العضوية 
كارثة  المواصفة  السودانية  للأسمدة 
رد الأمين
مصيبة المواصفة السودانية للأسمدة  العضوية 
 

محجوب عبدالقادر سليمان أورتشي 
مزارعي جربندي

 تحديث ٣ يونيو ٢٠٢١م
آخر تحديث ١٢ أبريل ٢٠٢٦

تنبيه هام:
١- الملفات المذكورة كلها موجودة فى مكتبة LiveCompost الرقمية على تطبيق تيليقرام.  تخش ليها بالرابط دا:
https://t.me/LiveCompost1
بعد م تخش اشترك فى القناة وفى خانة البحث أكتب إسم الملف أو جزء من إسمه.

٢- الكبسولات موجودة فى قنوات "كبسولات زراعية/ هاك من الآخر" على التطبيقات التالية:
واتساب:
Follow the كبسولات زراعية/هاك من الآخر channel on WhatsApp: https://whatsapp.com/channel/0029VbAlKkq7Noa8Cmap3H2T

تيليقرام:
https://t.me/AgriCapsuls

فيسبوك:
https://www.facebook.com/groups/728543003535364/?ref=share

‎⁨التقانات الحديثة و الزراعة العضوية ⁩.pdf

خدوهم بالصوت
تسجيل صوتى للدكتورة بلقيس بخصوص إنتاج الكومبوست فى ٢٠ يوم

خدوهم بالصوت
الرد على تسجيل دكتورة بلقيس أعلاه

خدوهم بالصوت
الرد على تسجيل دكتورة بلقيس أعلاه

خدوهم بالصوت:
هذا الملف يمثل الرد على التسجيل الصوتى للدكتورة بلقيس، صاحبة مصنع الخيرات للأسمدة العضويةاعلاه.

ما استوجب علينا أن نرد على دكتورة بلقيس هو هذه الجملة التى وردت فى تسجيلها الذى لا تكاد قروب زراعية لم تشاركه:
"أى زول بقول أنتج كومبوست فى ٢٠ يوم دا.... دا كومبوست أى كلام"

هذه الجملة تعنى ضمنيا إتهامى شخصيا وإتهام لجنة إشراف قروبات LiveCompost بأننا نقوم بتضليل المزارع السودانى، كما أنها تعتبر دعاية سلبية ضد منافسيها فى سوق الكومبوست من خريجى مدرسة LiveCompost.

بالإضافة إلى إحتواء التسجيل الصوتى لجملة من الأخطاء العلمية والتناقضات، فإن خطورته تكمن فى إنه مضلل، مما يجعله أداة تثبيط للمزارعين حتى لايقوموا بإنتاج مخصباتهم العضوية بأنفسهم من ناحية، وكذلك تثبيط كل من يفكر فى الإستثمار فى هذا المجال من ناحية أخرى. وبذلك يكون مصنع الخيرات هو المهيمن على السوق.

للاستماع لرسالة دكتورة بلقيس الصوتية وقراءة ملف *خدوهم بالصوت*، أرجو الإشتراك فى مكتبة LiveCompost الرقمية على تطبيق تيليقرام بإستخدام الرابط ادناه:
https://t.me/LiveCompost1

محجوب عبدالقادر سليمان أورتشي

مزارعى جربندى

١٥ أبريل ٢٠٢٦

خدوهم بالصوت
الرد على تسجيل دكتورة بلقيس أعلاه
ملف pdf محسن

هدى مأمون محمد إبراهيم تجربتي مع الكمبوست.
محاضرة بجامعة القصيم بالمملكة العربية السعودية سابقا عدت للسودان منذ ٣ سنوات و بحاول اتأقلم مع ظروف الوطن
(مقيمة منذ ٤٠ عاما بالمملكة حيث درست الجامعة و الدراسات العليا أيضا إلى العمل ٢٧ عاما بجامعة القصيم )

*حاليا*
بذرة جربندية صغيرة.
*
كما اعمل متطوعة كمفوض لوالي ولاية الجزيرة لتنفيذ برنامج سلعتي لولاية الجزيرة للجمعيات التعاونية
منذ عام و نصف تقريبا و اعتقد و الحمد لله اني قد وفقت في ذلك
حيث اسست ست مكاتب بكل محلية لإدارة و تنفيذ العمل بها.
*
أنشأت جمعية تعاونية بقرية زوجي.
*
تم ترشيحي و تعيني رئيس للجنة تسير الجمعيات التعاونية بمحلية الكاملين عام ٢٠٢١ تمكنت من التعرف على كل الجمعيات النشطة بالمحلية و حصرها و تحويل بياناتها لملفات اكسل ...الخ ثم بعدها كلفت بتنفيذ برنامج سلعتي

و نسأل الله التوفيق والسداد في كل مناحي حياتنا.

https://youtu.be/JGKvvSQhM78?si=06wh-m6tCXk8dPpf

معرض قروبات LiveCompost فى معرض الخرطوم الدولى فى ٢٠١٩. نترحم على أثنين من أعمدة ثورة الكومبوست فى السودان وهما الأخوين إيهاب البشيرابى وحسن محمد زين. نسأل الله أن يجعل ما قدموه فى هذا المجال فى ميزان حسناتهم

ماذا قالوا عن قروبات LiveCompost:

https://www.facebook.com/share/p/1DuKetZXrL/

قابلني شخص غير زراعي ⁉️متميز جداً في انتاج السماد العضوي وزارع شتول كميه كبيرة ، أتونست معاه وسألتوا العلم ده كلو ما شاء الله جبتو من وين ؟ تخيلوا قال لي من قروب واتساب إسمو ( لايف كمبوست ) ❤️💚 تحية من هنا لأصحاب القروب والمهندسين المشرفين ( 💚❤️ ) تحية للمزارع الجربندي .

قروب واتساب مفيد وفيه علم ومعرفة وعلم ينتفع به ( علم نافع ) .

على دياب
مؤسس مبادرة بيتنا أخضر

#لايف_كمبوست
#مبادرة_بيتنا_أخضر
#الجربندي

ماذا قالوا عن قروبات LiveCompost:

تحية وتقدير - وصوت شكر كبير من بيتنا اخضر

على دياب
مؤسس مبادرة بيتنا أخضر

قابلت شخص مميز جداً

ماذا قالوا عن قروبات LiveCompost:
السلام عليكم
جانب من الدورة التدريبية الاقيمت ف
الشمالية - دنقلا - كانت دورة تدريبية اكثر من ناجحة وكان للمزارع الجربندي نصيب الاسد من الاهتمام من قبل المدربين هههههه
ياخ الناس دي انزهلت ومتحيرين شديد كيف مخلفات نباتية تصبح تربة بديلة
.....
وحاليا عايزين ننفذ الفكرة ف ارض الواقع كمشروووع قومي يخدم السودان ف المقام الاوووول
ياريت تساعدوني وتدوني افكار ودراسة شاملة وكاملة

ماذا قالوا عن قروبات LiveCompos:

ماذا قالوا عن قروبات LiveCompost:
الإخوة السعوديون أيضا يتابعون قروبات LiveCompost.

*الفرق بين الأسمدة ومعدلات التربة*
هذه الرسالة موجهة أساسا لبناتنا وأبنائنا المهندسين الزراعيين.
خلاصتها:
*الهدف من الأسمدة هو إضافة العناصر الغذائية التى يحتاجها النبات للتربة، بينما الهدف من المخصبات (معدلات او محسنات التربة) هو جعل تلك العناصر الغذائية متاحة للنبات.*

لإثبات ذلك، فقد قمت بإجراء حوارات مطولة مع عدد من برامج الذكاء الإصطناعى حول الهدف من إستخدام معدلات التربة.
وكنت فى نهاية كل محادثة اختم بهذا السؤال:
*بناء على ما ذكر أعلاه، هل يمكن أن نقول أن الهدف من معدلات التربة هو جعل العناصر الغذائية متاحة للنبات؟*
وكانت النتيجة النهائية واحدة، طبعا مع اختلاف الصياغة، وهذه👇🏾 هى صياغة قوقل:
نعم، هذا الاستنتاج دقيق جداً. في الواقع، الهدف الأساسي من محسنات أو مُعدلات التربة هو "الإتاحة الحيوية" (Bioavail
ability).
يمكن تلخيص هذا المفهوم في النقاط التالية:
*الفرق بين "الوجود" و"الإتاحة":*
قد تحتوي التربة على كميات هائلة من العناصر الغذائية، لكنها تكون "محبوسة" كيميائياً. المُعدلات تعمل كمفتاح يفك هذا الحبس (مثل تعديل الـ pH لتحرير الفسفور).
*تحسين الوسيط الناقل:*
بما أن النبات لا "يأكل" بل "يشرب" العناصر ذائبة في الماء، فإن المُعدلات (مثل الكمبوست) تحسن قدرة التربة على الاحتفاظ بهذا المحلول المغذي حول الجذور.
*توسيع نطاق البحث:*
من خلال معالجة الانضغاط، تتيح المُعدلات للجذور مساحة أكبر للحركة، مما يجعل العناصر الموجودة في طبقات بعيدة "متاحة" فعلياً للنبات.
*الدعم الميكروبي:* المُعدلات تخلق بيئة مناسبة للكائنات الدقيقة التي تقوم بتحويل العناصر من صيغ معقدة (غير قابلة للامتصاص) إلى صيغ بسيطة يسهل على الجذور سحبها.

*باختصار:*
السماد يضيف "الطعام"، أما المُعدلات فهي التي تضمن أن يكون هذا الطعام جاهزاً وقابلاً للأكل وبالقرب من فم النبات (الجذور).

وبما أن برنامج الذكاء الاصطناعي الخاص بمحرك البحث قوقل متاح لكل من يستخدم تلفون ذكى أو كومبيوتر، فقد رأيت أن أضع بين أيديكم رابط الحوار معه حتى إذا أراد أى شخص التأكد من صحة المعلومة أو يريد أن يواصل الحوار مع البرنامج عليه أن يضغط على هذا الرابط:👇🏾 https://share.google/aimode/5yJrQITVbDyx0GJru

*لماذا أنا مهتم بأن تصل هذه الرسالة لكل مهندس زراعى؟*
فى مقالات عديدة تحدثت عن أهمية التفريق بين الأسمدة والمخصبات(معدلات التربة) وذلك لأن عدم التفريق هذا أتى بكارثة حقيقية على الزراعة فى السودان تمثلت فى أن معدل إنتاجية الفدان عندنا أقل بمراحل عن مثيلاتها فى العالم.
لتوضيح جزء أساسي من الأسباب التى ادت لذلك التدهور المريع فى معدل إنتاجنا الزراعى يمكن أن أذكر العوامل التالية:

1. على الرغم من أن كل تربتنا الزراعية قلوية ومن ضمنها مساحات شاسعة من التربة الملحية والصودية، فلن تجد نشرة إرشادية أو حزمة تقنية واحدة توضح للمزارع أهمية تعديل التربة من ناحية القلوية أو الملوحة قبل تحضير الأرض واستخدام الأسمدة. وهذا يعتبر أحد الأسباب الرئيسية لإنخفاض إنتاجية الفدان.
2. فى كل التقانات الحديثة، تصنف الزبالة وزرق الدواجن، سواء كانت مخمرة أو لا، كأسمدة عضوية. ويوصى بإستخدامها بكميات تحسب بالطن، مما يؤدى إلى ظاهرة سرقة النيتروجين المؤقتة، وزيادة قلوية وملوحة التربة على المديين المتوسط والبعيد. وذلك مما يساهم فى خفض إنتاجية الفدان. أرجو قراءة الكبسولة ١٣
3. تسمية الكومبوست بالسماد العضوى أدى لفهم خاطئ لدى الزراعيين والمزارعين على حد سواء، بأن الكومبوست يمكن أن يغنى عن إستخدام الأسمدة، خصوصا مع الدعاية التى يروج لها أنصار الزراعة العضوية، مما جعل البعض يعزف عن التسميد، وفى أحسن الحالات يقلل من إستخدام الأسمدة بنسب غير مدروسة. وهذا سبب آخر لتدنى إنتاجية الفدان.
4. تسمية الزبالة المكمبسة (المتحللة فى بيئة هوائية) بالكومبوست، مصحوبا بالدعاية التى يروجها المنتجون، أدى إلى الإسراف فى إستخدام الزبالة المكمبسة مما أدى إلى إرتفاع قلوية وملوحة التربة، فكانت النتيجة أيضا تدنى إنتاجية الفدان.
5. هناك سبب آخر له علاقة غير مباشرة بتدنى إنتاجية الفدان. هذا السبب هو أن إعتقاد المهندسين الزراعيين بأن الأسمدة العضوية هى الكومبوست والزبالة المخمرة. هذا الإعتقاد حرم السودانيين من معرفة الأسمدة العضوية المركزة مثل سماد الدم وسماد القرون والأظلاف، التى بها نسبة عالية نسبيا (ما بين ١٢% و ١٣%)من النيتروجين، كان ومازال من الممكن أن يساهم هذا فى زيادة إنتاجية الفدان، خصوصا فى مناطق الزراعة المطرية.

📢*نداء للمهندسين الزراعيين الشباب:*