معناها يمكن للأنسان ان يعرف مقدار نفسه بالتجربة، كل ما يخش في تجارب حياتية مختلفة، و يجرب حاجات جديدة يعرف بزبط من هو.

جميل

توا زي ماقلت بنهدرزوا على النقطة اللي بتصير فيها لحظة الادراك

من الممكن فيه شخص مايعرفش ان الخطأ هوا في الفعل الفلاني يشبح في روحه ماشي صح

يعني وصل للمرحلة اللي بينتقل فيها من الصح الى الاصح بس مش عارف كيف؟

الإنسان حيقدر يكتشف حد قدرته وإمكانياته لمّا يوصل للحد الأقصى؛ يعرف لأي حد يتحمّل الضغط لما يضغط على نفسه للحد الأقصى، ويعرف مقدار إنجازه لما يجرّب هلبا. مش حيعرف لين يجرّب، وكل تجربة حتعلمه درس جديد.

اجابة مفصله اكثر نقدر نقول تجاوب حتى السؤال الثاني صح ولا؟

اجابة مفصله اكثر نقدر نقول تجاوب حتى السؤال الثاني صح ولا؟

شن هو السؤال الثاني؟

هوا هذا غير نسيت علامة الاستفهام معليش

يقولوا ان معرفة السؤال او فهم السؤال هو نص الإجابة.
كان البني آدم عرف شن مشكلته يقدر يحلها عن طريق مثلاً انه يسأل من أكبر منه في المجال هذا، و يطلب مشورتهم.
لكن كان ما عرفش شن مشكلته بزبط، اهني يولي تغير امر صعب.

فعلا وهذه اكبر مشكلة في الموضوع

بما ان الموضوع متعلق بمهنة/مهنة/حرفة
ضروري تشوف للمهارات والاسعار الموجودة في الوسط الي انت فيه

اول شي، ممكن قيمتك او قيمة الخدمة الي توفر فيها مزال حتى اكثر من السوق، لكن بتراعي بدايةً الرينج الموجود


ثاني شي ماتبخلش بنفسك او تنقص من سعرك ظنّاً ان والله الزبون هذا اني نبي نكسبه ولا اي سبب لان اي حاجة تنقصها من قيمة الي انت تخدم فيه حتخلي الزبون يشوفله بنقس النظرة، وتقل قيمته عنده

بما ان 'محمد' قاعد في البداية، صح مايقدرش يعرف قدرته بالزبط او يعرف يحط قيمة للي يوفر فيه، لكن قدامه الناس الي زيه وللاكثر والاقل منه، ويقارن

ولو هو مش عارف ان عنده القدرة من الاساس يعني مش واعي للمستوى الي هو فيه

مثلا عطوه 3 اشخاص بمستويات مختلفة، مايقدرش يصنف روحه معاهم

اول شي يشوف هو يقدر يصنفهم اصلا؟ يعني قادر يقيم او يعرف مستويات وقدرات الناس وجت عليه بس؟ ولا كله لا

ولو على روحه بس نشوف فيها جانب نفسي او تواضع فوق اللزوم (مع تخوّف شوية) وهذا طبيعي فا تبيلها push وينحط في حاجات بالسيف عليه في الامر الواقع ياش يقتنع وينطلق بعدها

عجبتني الاجابة حقيقةً

هوا نعرف عقدتها لكن السؤال هذا جوهرة الموضوع كيف يدرس النقاط هذه ويكتشفها اساسا موضوع التطوير يصبح ساهل بعدين زي مايقولوا
اذا عُرِفَ السبب بُطِلَ العجب

هو على الأغلب مش حيعرف كيف يستغل هذه النقاط ويحسّن من نفسه إلا لو استمر في اكتشاف قدرته. مثلاً في موضوع الدراسة والضغط على نفسه: لو شخص عادةً يدرس حوالي ساعتين يومياً، لو يضغط على نفسه حيكتشف إنه يقدر يدرس لمدة خمسة - ستة ساعات، لو كرر الضغط على نفسه حيتعوّد على عدد الساعات هذه وحيعرف كيف يستغلهم ويوزّع طاقته عليهم

منطقي ولكن يتطلب على الشخص ان يطلع من منطقة الراحة او الاعتياد ويحاول يعطي جهد اكثر مع استمرارية

كل شي في الحياة يتطلب النقطة هادي (ان يطلع من منطقة الراحة)

اتفق
ظاهرها بسيط ولكن فعلها صعععب

I miss my old me