المهم بدينا نتعرفوا بالطريقة هذه

اكتشفت ان يحاول يتعلم العربي على خاطر القرآن وتجويده

ياجماعة طلبت منه يقرالي وفوجئت باتقانه والله

رغم ان مايفهمش الا في شووية حاجات ومايعرفش يرد ولا يجاوب

شفتوا الجهاد وين واصل بيه

تمينا هدرزة وعرفني على خوه الكبير فرحانين بيا بشكل رهيب مافهمت علاش

طلب يصور معايا وخدينا ارقام بعض لان خطير ماسح برامج السوشل ميديا قالي سبب في اهدار الوقت والوقت مهم

سبحان الله الراجل هذا اطلع من وراه عبر وحكم

كفاح واهتمام بالدين والقرآن ونظام

قلتله كان سخر الله وجيت لاذربيجان حنتواصل معاك توريني فرح

بدي يوري فيا من توا من اليوتيوب

بعدها خلاص كل واحد لهي في روحه

بدي يسمع فيا نقرا في القرآن ومركز

(قبل مش حنقولها الجملة هذه باش ماتقولوش رياء ومش عارف شني لكن ماتعرفونيش مني ف ملحوا 😂)

قعد فترة لين قاطعني قالي انا ضروري نمشي طالب رضاك وشكرااا

استغربت من كلامه قلتله مشكور جزاك الله خير الا وان الراجل حضني ومشي

حني في ليبيا مش متعودين بالشي هذا صارلي ستك وشعور غريب

والله حبيته في الله الراجل هذا ونسأل الله ان يعينه ويثبته على الدين

نسيت لما قرا القرآن اعجبت بمستواه واتقانه ف شجعته هلبا وشكرت مستواه فرح بيطير

الشي هذا يخلينا نتأملوا في النعمة اللي عندنا

احني نقدروا نقروا القرآن بكل سلاسة وفاهمين اغلب الكلمات الا اللي تحتاج تفسير وللاسف ما اكثر المقصرين من قراءته

رحبوا بناطق او (Natlq كيف ماكتبهولي) وباباشكي وقولوا ما شاء الله