🔘 ندر پـہ ھُدا مُرزی واجهیں استاد مولانا جلال الدین شاہ بکش یاتءَ:

رپتے تو ناگهانءَ دیم په مُـدامی هنـکین
چو جمبرءَ شلانءَ دیم په مدامی هنکین

اومــان بـیت تـرا کـه دیـدار پــاکـیں ربءِ
رپتے چو شهم گرانءَ دیم په مُدامی هنکین

زنـدانی ات اے دنـیا په تو اَے مرد مـومن
سر کت وتا دمانءَ دیم په مُدامی هنکین

گـواریـت رگـام رگـامءَ دارالعـلوم ارسـاں
چه هِجرءِ مهربانءَ،دیم په مُدامی هنکین

په دیـنءِ مُستپیءَ گمواری اَت شپیکیں
گموار شت جهانءَ،دیم په مُدامی هنکین

مئے بس دوا همیش انت گوں پاکیں کردگارءَ
سربـاتے شـادمانءَ دیـم په مُـدامی هنـکیـن

جاپَر گشیت په سوزے گالاں زهیری مرچی
رپـتے تـو ناگـهانءَ دیـم پـه مُدامی هنـکین

✍ جاپَر ساچان
@Labzank
telegram.me/Labzank

☀️☀️☀️ گموار نہ بنت ☀️☀️☀️

وشّیاں نوش کن اَنت سکّی ءَ گموار نہ بنت
بیل ءُ دز بْرادرءُ سنگت گوں کس ءَ یار نہ بنت

گْوات گراں بُرزیں کلاتانی بہ پُرس اِت ھالاں
کہ گَل ءُ وژدلـیں باریگ کسی پادار نہ بنت

پہ دل ءِ ریشاں تئی شھدیں ھبر زیمیگ اَنت
چـو نزوراں بلـے سگّگ تئی گُپتار نـہ بنت

رَند چَہ مرگ ءَ منی، تئی نام دپی شرّ نہ اِنت
پمّنی یکّیں سر ءَ دل چـہ گماں بار نـہ بنت

اگاں بیگْواہ بـہ بیت واھگ ءِ نام امروز ءَ
چـہ دل ءَ کاریگیں ٹپّانی نشان گار نـہ بنت

تئی گْوشتن سر ءُ چمّان اَنت بلے چـہ بکناں
گونمن دارگ گُلیں ھمبل منی اُپّار نہ بنت

ھانل ءِ تْرانگ ءَ بـے وار کُتگ بسّ کناں
دیمتر ءَ گال منی ھمرِد ءُ کتّار نـہ بنت


✍ سید ھاشمی
کلاکوٹ ـ کراچی
۱۵ جنوری ۱۹۵۳




@Labzank
telegram.me/Labzank

علی اکبر

وتی چُکاں میارات علی اکبر پیداگ انت
شُما بَٹّاں بیار ات علی اکبر پیداگ انت


بَٹّ انگہ نہ گرستگ نارُشت تیاراں
تو دستاں بِشودی من سُپرہءَ کاراں
سالاداں ھیارے
علی اکبر پیداگ انت

پیرمحمد نیاتکہ، دُرمحمد کُجاے
لال محمد نہ گِشیت شمُا جلدی بیاے
ھمراہ انت بلارے علی اکبر پیداگ انت

بوہ گِرانءَ کیت ایں عاشق اِنت گوشتے،
راہءَ چاراں کنتی یکے ڈَنءَ اوشتے،
لالــــــوءَ بِدارے علی اکبر پیداگ انت


✍لالــــــو پیشُکانی
Besam:
@Labzank
telegram.me/Labzank

مئے نگدکار ھمے گُمان بیت کہ جج اَنت . کسے ءَ با عزت بَری کن اَنت ءُ کسے ءَ کُتہ کار ( مجرم ) قرار دی اَنت ءُ لہتین چہ اشاں ھوں دستے ھما دیم روت لہتیں مزنیں نام ھست اَنت کہ آیانی بابت ءَ اگاں تو گپّ بہ جنئے. توبہ نعوذ باللہ تو کفر ءَ داخل بئے. دمان ءَ مردم تئی کدّ ءُ بستار ءَ ترا پیشدار اَنت .
نگدکار ءِ کار کسے ءِ ایر جنگ ءُ بالا برگ نہ اِنت. بلکیں ساچشتے ءِ ھما چیریں تک ءُ پہناتانی باروا گپّ ءُ باوست کنگ اِنت .. کہ یک لس (عام) وانوکے ءِ دز رس ءَ نہ اَنت . بلئے مئے گْورا اول ساچشتکار ءَ چار اَنت کہ کے اِنت . ساچشت ءِ ساچشتی بود ءُ سنچ ءَ کس نہ چاریت. مزنیں ساچشتکارے ءِ ساچشت تری ہر وڑ بہ بیت. آ چہ دراہیناں پولنگاں پَلک شود کنگ بیت
@Labzank
telegram.me/Labzank

(شهید مولانا عبدالخالقءِیاتءَ)

مدامءَ گیرکئیت انت جورجوابے
زبادءِ دامنءَوابیں نـــــوابـــــے
په وابیں راجءِ گمزیری دراتکگ
سگارانت دستیءَ،دستے کتابے
مں جزماں حونءِ هر قطره شهیدئے
په جوریں دژمناں بیرے،زرابے
کیا اے گت دلءَ هست ات چوزیتءَ
بهشتءِ رنگ دنت هشکیں گیابے
Besam:
@Labzank
telegram.me/Labzank

آزگ اَنـت پُکِّی زَیمیگ نـہ سَگّ اَنـت پھنات
بات وَش واب ماں آبریشُماں پُلّیں سوگات

پـہ لَگت مالی ءَ نازاکیں جگر جَـہ ندر اَنـت
پہ تئی دستاں دل ءَ ھون تاجگ ءُ زگریں پالات

تئی زوراکی ءِ زِر چَنڈ ءُ رگامـیں شَرتگ
واھگ ءِ دلجمـیں بوجیگ ءُ نزوریں آلات

تئی زھیـراں اگاں چمّ کُور نـہ اَنـت کُور بہ بنت
سُتکگـیں دِل پـہ تو نـہ زَریت اِنت بـہ سُچات

چـو مَگِر دُرگُل ءَ نام ءَ دَپ ءِ پُرّ ءَ ھمبل
کہ نہ بیت اِنت منءَ ھِچ رَنگ ءَ گُلیں ھانُل شات

اے مُرادے کـہ بِگنداں گُل ءِ گوناپ ءَ سید
ساھوں نَدر ءُ دِلوں شَنک ءُ سَروں سَد بَر ھیرات

✍ سید ھاشمی



@Labzank
telegram.me/Labzank

دستونک...

مھلبیں یاتے دل ءَ انگَاراتگ
دوریں دراہ باتے دل ءَ انگَاراتگ

بوہ سمارایت بیگاہ ءِ پلاں درھیں
چونیں سوگاتے دل ءَ انگَاراتگ

کلکِشّان سنج بستگیں دروازگاں
دردءِ شھماتے دل ءَ انگَاراتگ

سرمہ دانےِ چم ءِ آدینک ءَ پرش ایت
انچوشیں یاتے دل ءَ انگَار اتگ

تئی جدائی یےِ گباراں من گپور
ندرءُ ھیراتے دل ءَ انگَار اتگ

گپور درملکی
Besam:
@Labzank
telegram.me/Labzank

گِندگ ءَ دیـوان زُلم ءِ پُر زوریں
وشّیں گْورمانی آپ مرو سوریں
بِینگ گوں بَنگءَ وزنءُ ھَمتوریں
دَور ءُ باری ءُ دھر دگـہ رنـگے
بُرزیں ماتکوھاں کَس نہ گِپت درنگے
چہ وانگَ ءَ مُشتک مستریں سِنگے
پاسپان ماھیگ ءِ کتگ کَنگے
زور کرار داتگ بینگ یک بنگے
زُرتگ دَجُک ءَ یک جیڑہ ءُ جَنگے
پُگلّاں گْوپتگ ماں سر ءَ پَنگے
مُشک ءِ اَولاداں ساز کُتگ چنگے
کِیپُک ءَ سیاہ مار ءَ جتگ ڈنگے
روباہ سِرّان اِنت شِیر گْوشے لنگے
ھُکمران پیشی تو گْوشے گُنگے
شوانگ ءِ چُک یک تیپ ءُ سرھنگے
بلے از بُن ءَ تولگ دُزّ ءُ بـے ننگے
پہ کرگُشک ءَ ھچ کس ءَ نہ جت زنگے
اَنّی گوں گُرک آسک ءَ گُلائیشیں
انگت ماں دست ءُ شانگاں پیشیں
آ نر پُلنگ کوھی وپتگ ھاموشیں
جُمبگاں کپتگ لیڑو نوک نیشیں
بربری گْونڈیں مٹّ ءِ گامیشیں
چہ ھزاری آسپ ءَ ھَرے گیشیں
راست کس ءَ در کار نہ انت زباد موشیں
دروگ چو مانند ء پوڑراں جوشیں
مَھلوک چہ ھالِک ءَ پَراموشـیں
بازے چَرسی ءُ باز شراب نوشـیں
بـے ھَرد گیشتر مست ءُ مد ھوشیں
ھر یکے دومیگ ءَ جَن ءُ پروشـیں
زندگی دنیا ءَ مـہ بات چوشـیں
انسان مرو مَگرور ءُ ھوسناکـیں
پہ دولت ءُ مال ءَ جیڑہ ءُ جاکیں

✍ مُلّا آبابگر کلمتی



@Labzank
telegram.me/Labzank

گـوَشـکـَـنـد – ادَبــی هَـکـیـم
مَـردے ءِ هُـشـتـر گـار بـوُت بـازیـں وَهـدے ءِ شـوهـاز کـنَـگ ءَ رَنـد هُـشـتـر دَرکـَـپـت بـلـے مـرد هُـشـتـر ءِ سـرءَ سَـکّ زَهـر گِـپـت ءُ گـوَشـت تـو مـن ءَ بـاز سـیـہ دِل کـُـرتـگ مـن ءَ سـوگِـنـد اِنـت کـہ بـانـدات سُـهـب تـرا پـہ 10 دیـنـار مـاں بـازار ءَ بُـهـا کـن آں ، دومـی روچ ءَ مَـرد چـہ سـوگِـنـد ءِ وَرَگ ءَ پَـشـومـان بـوُت مـرد ءَ یَـک وَڑے دَرگِـپـت کـہ هُـشـتـر ءِ نِـهـاد تـاوان مـہ بـیـت گـڑا آ یَـک گـُـربَـگـے گِـپـت ءُ گـوں هُـشـتِـرءِ دُمـب ءَ بَـسـت مـاں بـازار ءَ تَـوار جَـنـان بـوُت ، هُـشـتِـرے گـوں گـُـربَـگ بُـهـائـیـگ اِنـت هُـشـتِـرءِ نِـهـاد 10 دیـنـار اِنـت ءُ گـُـربَـگ ءِ نـهـاد 100 دیـنـار اِنـت هَـرچـکـس ءَ سُـجّ ایـت دوئـیـنـاں هُـور بـہ زوُرایـت جُـتـا جُـتـا بُـهـا نـہ بَـنـت مـن سَـوگِـنـد وارتـگ کـہ دوئـیـنـاں هُـور بُـهـا کـن آں.



@Labzank
telegram.me/Labzank

لولی لول منی چُک ئے چک
چُک ئےچُک منی مردئے برات
مرچی سے شپ انت بے وابئے
ماتئے دروشمٰ ءَ بے داب ئے

لولی لول منی دُر دانگ
لال ءُ کہر با ئے دا نگ
پت تی چرچے ءِ منجارانت
مات تی لکی ایں راج ءِ زھگ

من تی بلّکاں مات ئے مات
لولی لول منی مرد ئے برات
بے وابی تی پمن با ت
من تی اندوہ ئے حق داراں

قول انت من ترا رو د یناں
شیریں سرشپاں نازیناں
تو کہ بیرگ ءَ بالگ بئے
پہ تو بانک ے شوھازاں

لولی لول منی چم ئے نور
پاکیں کعبہ ءِ با ھوٹ ئے
مات تی مہدی ءُ نورپاک ئے
پت تی جُڈی ءِ باھوٹ انت

مات ئے نام تی شیرماہ انت
پت تی جیکلک جےکے انت
نام تی واھگ ءُ دیدار انت
مہکان منتگیں دشتار تی

جےکے جلالی
Besam:
@Labzank
telegram.me/Labzank

پنت کسہ

نگاہءُ راستی

من چہ موکلاں واتر وتی کارءِ سرا اتکگ ات آں،بلئے دیر کنگءِ سببءَ منی کارءِ جاگہ بدل بوتگ ات.
منا ھمک سھب چہ ھسپتالءِ لوگاں دو نرس چست کنگیءُکارءِ سرا برگی ات ءُ پدا چھٹیءِ وھدءَ چہ ھسپتالءَ چست کنگی ءُ لوگءَ آرگی ات آں.
ھما مردمءَ کہ چہ من پیسر ھمے کار گون بوتگ گڑا منا گشت ئِے چرئے نرساں روزِل شریں زالے نہ انتءُ ٹونی شریں زالے...
من ھم ھمائی ءِ گشگءِ پدا گوں روزِلءَ بدمھریءُ گوں ٹونی ءَ پچیں پیشانی ءَ تران کتءُ گیشتر گوں ٹونی ءَ ھوارءُ نزیک بوت آں.
ٹونی سکیں ھاموشیں زالے اتءُ روزِل سکیں رپٹوکے ات.منا آئیءِ ھچ تب نیست ات.وھد وتی گاماں دیمءَ جنزان اتءُ منی گوں ٹونیءَ نزیکی،کندگءُ مسکرا ودان ات آں ءُ گوں روزِلءَ بدمھریءُ بیزاری ھم گیش بوھان ات آں.
یکروچےچہ کارءَ واتریءَ روزِل ءَ منا دزبندی کت ءُ گشت: سلمان!منا گژن ءَ گپتگ،جاگھے بہ دار ورگ زوراں.بَلے من آئیءِ گپ نہ زرتءُ گشت کہ من نہ داراں،منا دیر بیت. پرچاکہ منا آئیءِ ھچ تب نیست ات.
ٹونی ءَ گشت پرواہ نیست کمے بہ دار.من ھمائیءِ گپ زرتءُ داشت.
آئیءَ پہ وت ورگ زرتءُ پہ من اوں تیوگیں پتکگیں مرگے زرت ئِے.منی سرا ھیرانیءُ پشلیءِ جمر ھواریءَ گرندگءَ بوت انت.
دگہ یک رندے ٹونی ءَ مارکیٹ ءَ کارے کپت ءُ گوں من دزبندی ئِے کت.
من گوں پچیں پیشانیءَ راہءِ سرءِ مارکیٹ ءَ برت.آئیءَ وتی کار شر کت انت بَلے ھشکیں دستءَ دراتک.
بوتءُ بوت منی چھٹی پدا دراتکاں ءُ من پدا پہ ملکءَ سرگپتاں گڑا روزِلءَ پہ منی لوگ بانکءَ لوشن یے زرتءُ من ءَ دات کہ پہ تئی لوگیءَ ٹیکی یے بلے ٹونی ءَ پہ منی لوگیءَ سلامے اوں گون نہ کت..
من ھیران ات آں کہ مھلوکءِ نگاھاں شریءُ ھرابیءِ لیکہ کجام انت؟آیا ھاموشیءُ رپٹگ شریءُ ھرابیءِ لیکہ انت؟ یاکہ شریءُ ھرابی باتنی چیزے؟
پرچاکہ من کہ پدا واتر اتک آں داں منی لوگی ءِ نادراھیءُ چُکءِ زیان بوھگءِ سببءَ سک پریشان ات آں گڑا روزِل ءَ منا جست کت کہ تو مرچاں دگہ وڑئے....سبب چے انت؟
من وتی گپ جت انت گڑ روزِلءَ گریتءُ وتی زبانءَ ھاسیں رنگءَ دوا لوٹگءَ لگ ات بلے ٹونی ءَ ایوکءَ اپسوزکتءُ پدا چو سنگیں بُتءَ بوت..
روزِل ءَ ھمک روچ منی لوگیءِ جان سلامتیءِ بابتءَ جست کتءُ ٹونیءَ اناگتی....
نوں من سرپد بوتگ اتاں کہ ٹونی سنگء بُتےءُ روزِل سکیں نرم دل،زوت ماروک،درد وارءُ چہ مارشتاں سرچکاریں زالے...سرریچ انت پمکشہ اینچو رپٹ ایت....
آسرال:مہ رو پہ اش کنگ،برو پہ گندگ
اصغر زھیر
Besam:
@Labzank
telegram.me/Labzank

اےشیشگانی زردی انت کہ موجءُمست گلاس بنت
بنوش بنوش چہ نوشگ ءَ غمءُ زھیر ھلاس بنت

آمومن ے جلالی ے اے جیکلک یک نا شرے
چہ شیشگ ءِ کرامت ءَ دو دشمناں کہ براس بنت
جے کے جلالی
Besam:
@Labzank
telegram.me/Labzank

عشق عشقےعشق عشقےعشق آسءُانگرے
عشق پلیں شے مریدئے زرنبشتیں چادرے

وشیانی شپ چراگ پہ دیم بلاناں واھگ ءِ
کئے بزانت کہ زندمان ءِ چے بلاھیں آسرے

Besam:
@Labzank
telegram.me/Labzank

(حاجی ءِ موتک)
حاجی نامانی میرھمّل کلمتی ءِ گوھارزتک اَت کہ سیر ءِ روچ ءَ کَورگان ءِ وھد ءَ اسپ ءِ سواری ءَ زین آئی ءِ دلبند ءَ لگّ ایت۔۔۔وھدے آ پہ نکاہ ءَ نادینگ بیت گڈا گوش ایت یک برے منی نکاہ ءَ مہ بنداِت گوں ھمے ھبر ءَ سرجھل بیت ءُ ھمدا دیوان ءَ بیران بیت۔۔۔۔اے موتک ھم بلوچی ءِ یک بے دروریں لچّھے۔۔۔۔
کولواہ ءُ گزدان آ جھان رندیں
ملکمیت ڈھدار ءُ ھسدّیگیں
چو صیاد ءَ ماں تُمپگ ئے پُشتیں
نئے کہ روت فرضی میڑھے نندایت
نئے گھتریں مردے لیکہ ئے گِندایت
ایرشُتگ گوْنڈیں روچ زمستانی
مئے سرئےمولشتےنہ کُت سالی
پُرْشتگاں چنگ ءُ رُستگاں زاری
پُرْوشتگ انت کاڑاں نُھہ تلیں باھی
جَمّو ءُ پُلّ بندیں نکیب شاھی
چہ بُزرْگی موردانگاں مُندری
دُرّ گوْن آ پَوراں ماھْکی گوشاں
بے نصیب بیتاں چہ سیچکی گوشاں
بِلّے ایر اَنت ماں تنک دپیں دُرْجاں
تنک دپیں دُرْج ءُ پیلھیں سالاں
پیلھیں سال ءُ قادر ءِ سوباں
باز اتاں راجی مرد سوارانی
ھاکمیں حاجی اَت مڑایانی
کئے بہ بیت کوٹانی اڑ ءَ توس ایت
آپاں ماں روکیں انگراں ریچ ایت
سیاہ اگاں سیگین اِنت ھمک وقت ءَ
چانک نہ کنت مُوری گُنبدیں دُمب ءَ
دُمب ءَ ماں نیلاں جنت سراپیناں
داں نیم شپی درْپشوکیں سُھیل گوش کنت
اے لاٰئقِ حاجی اَنت مُلوکین ءَ
شر بہ چاراھیت باھڑاں نیک نام
سیاہ ءَ گوں پرّگاں چکّریناں
رہ جتی اولاکاں بہ لڈّیناں
لَڈّ اِت اَت بیگاھاں بُنگ کشّاں
بلّ ءُ بشّی ءُ ھَنجری تشّاں
درکپاں کُلّ ءَ چُست ءُ اِشتاپ ءَ
شانک دیاں دیرگِنداں خُماریناں
پہ پَٹ ءُ ھِینّاریں نِگور دیم ءِ
داں اتکگاں بور ءُ چبراکیں واجہ
دُرْست کناں سالونک ءَ مُلوکین ءَ
درْوت دے آں ھاجی ءَ گنی بکّیں
پھک کناں قبر ءِ کلّر ءُ ھاکاں
واجہ ئے لاڈین ءَ بیجیکاراں
بور ءَ بنداں ماں کاپری درْمبکاں
روچ درآتک مامکی جڑکوکیں
ھمّل ءِ مات گوں شادھاں مین اِنت
رُمباں پہ پھر ءِ بندگ ءَ شین اِنت
ھئےھئے او کھریں دِل ھیالانی
ھاجی پہ نہ چونائیں گورے رپتگ
کوکری اِستیناں نہ کنت پیداک
نئے پِڑے شیریں چوٹو ءَ رند ایت
وتی سیاہ ءُ انکاسیں پیلو ءَ بندایت
دِل منی موجیں دائم ءَ جنگ اِنت
پرتو او ھاجی دل منی رنج اِنت
ھمّل ءَ میسک پُلّ ءُ شمال بیار ایت
ھاجی ءَ کَوش ءُ نود مُلیباری

(چہ کتاب''دَمبانی میار''زیرگ بیتگ)
Besam:
@Labzank
telegram.me/Labzank

مروچی ما چہ وتی جند ءِ پت ءُ پیروکی مال ءُ ملکیت ءَ زبھر ایں ءُ بے ھسابیں کدرتی ازبابانی چوش کہ زر ءُ ھندانی سیمسر انت واھندی ءَ ابید مئے ڈیھ ءِ مھلوک نیزگاری ءُ پدمنتگی ءِ آماچ اَنت.

پہ یک کساں کسانیں نادراھی یے ءِ درمان ءَ منی ڈیھ ءِ مھلوک پہ الاج ءُ دوا ءُ درمان ءِ واستا ماں دگہ شھر ءُ ھنداں در پہ در اَنت، کے ءَ میاریگ بہ کن آں؟

پہ وتی لاپ ءِ شوھاز ءِ ھاتر ءَ ماں دگرانی ملک ءُ ملکیت ءَ گلامی ءَ اَنت کہ ماں مروچگیں دیم ءَ شُتگیں دگنیا ءَ نزانتکاری ءُ جھالت ءُ ژیمبیں کور چاتانی تھا بُڈّ اتگ انت.

منی ڈیھ کہ پلیں بلوچستان بہ بیت چہ وتی لاڈُکیں بچّانی رتگیں ھوناں کہ پہ وتی لاپ ءُ وتی پجار ءِ شوھاز ءَ وتی تلاھیں زند اش پہ وتی سوگاتیں ڈیھ ءِ ننگ ءُ راج ءِ شرپ ءُ شان ءَ ندر ءُ کربانی کتگ، مئے زندمان ءِ متاہ ءُ مڈی بزاں راجدپتر، زبان، دود ءُ ربیدگ ءُ ... لگتمال کنگ بیتگ اَنت ءُ آیانی اسلی دروشم بدل کنگ بیتگ!

اے دپ چَٹ ءُ بے ننگیں مزن لاپانی چم پہ مئے مال ءُ مڈی بزاں پہ من ءُ تئی ڈیھ ءِ ونڈ ونڈ کنگ ءَ سک اِنت کہ ایشی ءَ ھم ( کہ مئے سروک اِش سیر کتگ انت لاپ اش پُر اِنت چہ ھر نیمگا رسگ اِنت اِش) چہ ما پچ بہ گر اَنت.

ما ءُ شما چماں پچ بہ کن این ءُ شر بہ چار ایں کہ بلوچستان ءِ چار کُنڈ ءَ وڑ وڑ مردم آرگ ءَ اَنت، کار ھمایاں دیگ اَنت، مئے بھر ءُ ونڈ ءَ ھمایاں دیگ ءَ اَنت دگہ نیمگے مہ چار اِت پاد ءِ سرمب ءَ بچار اِت کہ مئیگ ءُ شمئے جھگیرانی دپ اِش بستگ ءُ بیچارگ ھچ گوشت نہ کنگ ءَ اَنت بلے دگے نیمگے نیکراہ اِش پہ الکاپ ءَ داتگ اَنت اِش ءُ آیانی چکاں ھم انچوش دیگ اَنت کہ مہ گوش، ایشی ءَ ما ءُ شما گندگ ءَ ایں ماں تامر ءُ ...کہ مئے ڈیھ ءَ آبات کنگ ءَ اَنت تانکہ ماں وتی جند ءِ پٹ ءُ پیروکی ھندانی تھا ما انچوش درآمد ءَ بہ بہ ایں کہ بوتگ ایں، ءُ در کومی راج مئے راج ءِ واھند وت واجہ اِنت.

بلے اسر ءَ ایشی ءَ پہ دل ءُ ستک گوشگ لوٹ آں کہ مولانا کوھی ءِ کربانیانی آسر انت کہ بلوچستان ءِ ٹل مروچی گوں آزمان ءَ تران ءَ انت ءُ بلوچ راج ءِ نام ماں میان استمانی مراگش ءُ دیواناں پہ اِزّت ءُ شاں پہ ھاوند امیت ءَ گرگ بیت....
ھارون اخلاقی#
لبزانکی مجلس کلمتی کاروان.

سِیمک۔۔
چہ مُجاں اِستینے سر ءَ کشّ ایت
بُرز چَما ماران ءِ خَمیں کوھاں
کوکر نَتّھا ءِ بیرمیں پاگیں
جیھڑ تئی امبوھیں گُلالِکّاں
ترْمپ تئی مورتیں جابہ ءِ تیراں
شپ گِروک میان ءِ گوھریں تیگیں
گرْند چو نتھا ءِ توپک ءِ گوانکیں
دِرْین چو مَلّ ءِ سُورمگیں واگیں
یک دمے مونجانی کن اِت ترْمپاں
شُما زباد بوھیں جیھڑاں بِلّ اِت
اَچ سمینانی گُلگُل ءُ ھُلّاں
در کپ ایت تنگہ درْوشمیں نتّھا
گیمران ءَ چہ تنک دپیں قبر ءَ
گیگ نہ اِنت براھندگ ھمے گیگ ءَ
گپتگ آ گور ءِ کلّر ءُ ھِیسپاں
دنزئے ماں ڈالشاھیں برْوتان اَنت
ماں برْوتان ءُ برْنگنیں ریشاں
چوٹوئے دنزین اَنت زباد بوھیں
گال ءُ بولی بیت گوں تانھی نوداں
شما کئی تُنیگیں دل ءَ کا اِت
شما کئی چمّ ءِگریتگیں ارس اِت
شُما کئی مِنّت ءَ من ءَ مین اِت
چو جواب داتگ تانھی نوداں
ما سِیمک ءِ تُنّیگیں دل کایاں
ما سِیمک ءِ چمّ ءِ گریتگیں ارساں
ما سیِمک ءِ مِنّت ءَ ترا میناں
ما جنے ویران گوْنگیں دیستگ
رنگ ئے چو آسانی پُر ءَ بیتگ
پرتوئے نتّھا ءَ گنوک بیتگ
بچّ کہ سینگار اَنت وتی بوراں
کاراَنت منی کُلّانی سر ءَ تاچاں
پرمن ءَ کاراَنت شُوتگیں زرّاں
ھَلوانی آ پکّگیں ونگاں
ھرّگیں رانڈو باز من ءَ ریپّ اَنت
کہ دیرو ءِ ورنایاں گِچین یکّے
اے دیرو ءِ ورنا کُلّ منی برْات اَنت
پرمنی نِزّ ءَ نتّھا مھمانیں
پرمن ءَ کارایت چیٹ ءُ چُنّیاں
سرمنی چُنّیاں نہ بیت بازار
پادگوں لاھڑی رَتکگیں کَوشاں
چمّ اوں پہ سیاھیں سُرمگاں سکّاں
من وتی جیگ پہ نُھمتے بستگ
موت گیش بیت یا سورھیں نتّھا
(اچ اسحاق رحیمءِ منتءَ)

Besam:
@Labzank
telegram.me/Labzank

درآمد

۔۔۔۔۔۔۔۔۔۔۔۔۔

زمانگاں ھست ات یک بادشاہ ئے
یک روچے درآمدے
بادشاہ ءِ دیوان ءَ اتک
ءُ بادشاہ ءَ گوشت ئے
واجہ من تنگدست آں
من ءَ وتی گورا کار ءَ بہ دار
بادشاہ ءَ جُست کُت مردک تو چہ کار زان ئے
مردک من سیاسی مردمے آں
سیاسی" اربی ءِ تہ ءَ سیاسی ءِِ متلب سوچ ءُ پگر ءَ پد جیڑھانی گر ءُ گیش کنوکیں زانوگر"
ھدا ءِ کنگ ءُ مردک ءِ بد بَھتی
بادشاہ ءِ گورا سیاسی کار ءِ لوٹوکیں مردمانی
یک لڑے ھست ات
ھمے امیت ءَ ودار ءَ نشتگ انت
ءُ تلب اش داتگ پہ کار ءَ
اناگتی گپ اش ات
بادشاہ ءِ ھر ءُ اپسانی چار ءُ گزار
کنوکیں ڈبہ گر بیران بیتگ ات
بادشاہ ءَ ھمے درآمد وتی ھاسیں اپسانی
ڈبہ گر جوڑ کُت
چیزے روچ ءَ پد بادشاہ ءَ وتی دوستناک تریں
اَپسے باروا جُست کُت
مردک ء گوشت تئی اَپس شر زات ءُ شر نسلیں اَپسے نہ انت
بادشاہ ءَ اے اَپس گرانین نھادے ءَ زُرتگ ات
ءُ مردک ءِ گپّ یے تور انت ھمے دمان ءَ
بادشاہ ءَ سپاھیگ رواں دات انت
ھما مرد ءَ بیار ات کہ من اَپس زُرتگ
آ مرد آرگ بوت مردک دیریں جنگلے ءَ اَپسان یے
چار ءُ تپاس کنوک ءُ بھا کنوک ات
بادشاہ ءَ مردک گوشت تو اے اَپس من ء شر نسل ءُ
شر زاتیں اَپسے نام ءُ نھاد ءَ پہ بھا داتگ
بلے اے اَپس شر زاتے نہ انت
مردک بادشاہ سلامت
اَپس شر زات ئے شر زات یے ءَ ھچ شک ماں نیست
بلے وھدے کہ اے پیداگ بیتگ
ایشی یے ءِ مات مُرتگ
ءُ اے اَپس ءَ گوکے ءِ شیر میتگ ءُ وارتگ انت
ءُ اے اَپس رُستگ ءُ مزن بیتگ
ءُ کسانی ایشی ءَ گوک ءِ گورا گوازینتگ

بادشاہ ءَ مردک رزا دات ءُ اپسانی چار ءُ گزار
کنوکیں ڈبہ گر لوٹاینت
مردک تو بہ گوش کہ تو چوں پجّا آورتگ
کہ اے اَپس شر زات ئے نہ انت
ڈبہ گریں مردک۔ اپس ھر وھد ءَ کہ کاہ وارت
من دیستگ چو گوکانی پیما سر ءَ جھل کنت ءُ وارت
شرزاتیں اَپس دایم کاہ ءَ کہ دپ ءَ کن انت
سر ءَ بُرز کن انت ءُ ور انت
بادشاہ مرد ءِ زانتکاری ءَ متاسر بیت
ءُ آئی ءِ لوگ ءَ بکشش دان روگن شکر لھتے پتکگیں
گٹّور یی گوشت ءُ مُرگ رواں دات
ءُ اشانی گوم ءَ بانُک ء ماڑی ءِ ڈبہ ھم دات ئے گوں
چیزے وھد ءَ پد بادشاہ ءَ جُست کُت
کہ بانُک ءِ باروا تو چے گوش ئے
مردک۔۔گپ اش انت بانک ءِ نند ءُ پادا
بانُک یے انت بلے بانک ھچ اینگل ءَ بادشاہ یے
جنکے نہ انت
اے گپان یے اش کنگ ءَ پد بادشاہ ءِ پادان یے
چیر ءَ زمین در اتک
پرچا کہ بادشاہ ءِ زال بادشاہ یی چُکے ات
بادشاہ سارت بیت ءُ وتی تری
زال ءِ مات کلوہ دیم دات ئے
ءُ ھمے گپ گوشان یے جت انت ئے
تری ءَ پسو دیم دات
ھکیکت اش انت
تئی پت ءَ منی مرد ءِ گورا منی چُکے گواجار دیم داتگ
من چُک مات بیتگ آں چُک پیداگ بوھگ ءَ ساری
بلے مئے جنک شش ماہ ءَ پد بیران بیتگ
ما تئی پتین بادشاہ ءِ گوم ءَ نزیک یے کنگ ءِ ھاترا
اے چُک وتی جنک جوڑ کُتگ
ءُ رودینتگ ءُ مزن کُتگ مزن بوھگ ءَ پد ءَ گوں
تو سانگ داتگ

بادشاہ ءَ مردک جُست کُت تو چون زانت
کہ منی زال بانُکے نہ انت
مردک ۔ بانُک ءِ چار ءُ گزار وتی کارمند ءُ نوکرانی
گوم ءَ شر نہ انت
بادشاہ چوش نہ کن انت
آ وتی کارمندانی سک ھیالداری ءَ کن انت ایں

بادشاہ ءَ بکشش دان آرت روگن لھتے پس مردک ءِ لوگ ء رواں دات
ءُ اے مردک دیوان ءَ نیکراھی کاران یے ڈبہ ھم دیگ بیت
چیزے وھد گوست بادشاہ ءَ مردک جُست کُت
تو منی باروا چے گوش ئے
مردک تُک ءُ نُک بیت
کمو دیر ءَ پد گوشت ئے
بادشاہ تو اگاں دلگران نہ بہ ئے
ءُ من ءَ زند ءِ زمانت ءَ دے ئے
ءُ کول کن ئے
من ترا ھچ نہ کن آں
گڑا چیزے درشاں کن آں
بادشاہ ءَ زبان دات
کول دات کہ من ترا ھچ نہ کن آں
مردک ۔تو بادشاھے ھست ئے
بلے تئی رمپرد بادشاہ یے نہ انت
ناں کہ تو بادشاہ یے چُکّے ئے
بادشاہ گوں اے گپّانی اش کنگ ءَ ھُشک ترّ اِت
لبز وا داتگ ات ئے
بادشاہ ءَ ماڑی نہ زورگ اَ ت
پوچان یی تہ جاہ یی نہ بیت
جان ءَ آس کپت ئے
بادشاہ گپ ءِ پدّری واست ءَ
وتی مات ءِ گورا شُت کہ
بزان آں گپ چے انت
راستی ءَ شوھاز بہ کن آں
مات کہ جُست یے کُت
مات ءَ گوشت تو بادشاہ یے چُکے نہ ئے
تو شپانک ءِ چُکے یے ئے

بادشاہ ءَ مردک لوٹاینت
تو چوں مار ات ءُ زانت کہ من بادشاہ یے چکے نہ آں
مردک ءَ گوشت
بادشاہ وھدے کہ مردم ءَ داد دے انت
بکشش دے انت
آ ھیرہ تلاہ ءُ اشرپی دے انت
تو ھر وھدے کہ داد داتگ یا دے ئے
دان آرت روگن پس دے ئے ءُ داتگ
اے کُل وراکی چیز انت
اے کاراں ھجبر شاھی چُک نہ کن انت
اے شپانکانی کار انت

ناکومُراد
Besam:
@Labzank
telegram.me/Labzank

شُکر اِنت کریم ءِ برکت ءَ
سَبر ءُ سکوت ءُ ھلوت ءَ
سَلوات پہ نام ءِ ھَزرت ءَ
راستے کہ مرگ ءِ ساھت ءَ
دل جوش جنت وت پہ وت ءَ
دُرست چہ ھُدا ءِ ھِکمت ءَ
گوار انت رگام بـے مُدّت ءَ
سبزیں بھار ءُ بَر نوبت ءَ
پانی بنت پہ مُھلَت ءَ
بیا اِت اریپـیں ھَمبلاں
جَزماں کہ یک روچے مِراں
رُوھ چہ کَپس ءَ بال کنت
اے کالب ءَ کَے سوال کنت
دُرست گُش انت کہ لاشَھے
دِیرئے کن ‌اِت کہ سِلّھے
مَرگ ءَ کس ءَ نیست گِلّھے
بند اَنت کَنِک ءُ کِلّھے
گُسلان پہ تازیمے دینت
مَھرم منی چار ءُ سے اَنت
من وت نزاناں کے کے اَنت
ھِیش ءُ کس اَنت یا ڈنی اَنت
وھدے جنازہ دُرست بیت
مھپَل کبیھیں سُست بیت
تھت چہ دوار ءَ چِست بیت
چار مردمئے کنت کوپگ ءَ
ھَلک ءِ نہ چار اَنت گریوگ ءَ
بَر اَنتی پہ یک گرم ءُ جلے
دار اَنت یہ سیہ ڈنّی سرے
کاینت مُسلمان یک دَرپے
پہ مَیت ءَ بند اَنت سَرپے
پیر ے اگاں پیر زالَگے
گُوالے یا کہ شُوانگے
یا سیدے اوبادگے
مالے سِپیدیں جامگے
روت پہ مُکیمی ھانگے
مُلا چار تَکبیر گُشیت
سَرپ بستگیں رند ءَ پروشیت
بَر اَنتی مں قبر ءِ لَب ءَ
سر دستی زور انت مَرھب ءَ
ایری دیئنت گُور ءِ تہا
ناد اَنتی مں ھَند ءِ بُنا
دیمِ دئینت مں قبلہا
سِگان دئینت ھندِ رھا
پانیگی بنت چو مونسا
اُستا بمینیت ھاک ؤ گِل
باری دئینت پہ جان ؤ دل
واننت درودا حُرمتا
بخش اَنت پہ روحِ میتا
آئیِ سپارت پہ خُدا
وت بزانت وتی نیک ؤ بدا
سے روچا پُرس ؤ مجلس انت
دوستاں پہ زار ؤ بش بش اِنت
غم گوں پِت ؤ ماتاں بیت
تاوانی گوں براتاں بیت
سر روت ھماکہ زیان بیت
زالِ خبر آسان بیت
زال کہ مُقیمی کرگز ایت
چندے دگے روچ گوزیت
آ چندان شموشکار بیت
بِیکاں مُشیت سیاه‌مار کنت
سر چادرے اَلبار کنت
سر کوپگاں سیمکار کنت
سر پنجگاں رنگ دار کنت
چم کنجل ؤ انوار کنت
بَچ ؤ جِنکان وار کنت
سوسن رواجے یار کنت
جُست چہ ھمک بازار کنت
ٹِل ملگے درکار کنت
درقدا آ جود سگے
زال ءَ دل ءَ شیرِ مَلّگے
کوم ءِ دل ءَ بد مردگے
آ مُرتگ ءُ اے زندگے
پازُل مکن گمراھی ءَ
گال ءُ شَکر گُپتاری ءَ
گِپتگ ترا را واری ءَ
انچو ملک دیناری ءَ


@Labzank
telegram.me/Labzank

$ سُنَت $
# آبد میر #
رجانک اکبال ھاشمی

ابا، دو سِیر شِیرءَ چینچو آپ مان بکناں؟

منی چو دو سِیر مان کن ۔

ڈالاں ریک چینچو بِباں؟

ھمینچو کہ سَنگ گِران تر بہ بیت،

بلے باز مہ کن اِش کہ زانگ مہ بنت ۔

داناں ڈال ھوار بِکناں؟

ھَو بلے پہ وڑ ۔

شکراں چوں بِکناں؟

سیرءِ سَے چار روپیہ گیش کن کس جُست نہ کنت ۔

ءُ روگنءَ بازیں سِیت نیست، بیست سیری ڈبہءَ بیست کلدار نہ رس ایت ۔
اِشیءِ اسلی کیمتءَ کور کن پنجاہ روپیہ گیش بہ لِک، بگوش چہ کمپنیءَ ھمینچوکہ رَسگ ایں ۔

شریں ابا ۔

شر منی چو بیا دَبّوج کن ایں، بانگ ءِ وھد اِنت ۔

شریں ابا تَو برو من پہ نمازءَ دست دیم کناں کا آں ۔

پِتءَ مُشت رِیشاں ترّینت گوشت،

گوشدار منی چو ناہءَ یات کن بیار گوں ، ناہءَ گوں دَبّوج سُنَت اِنت ۔

جُست : آیا بلوچی زبان ءِ بُنکی جیڑہ سیاھگ اِنت ؟ اگاں تئی پسّہ ھو اِنت چیا۔۔۔۔؟ ءُ اگاں انا اِنت چیا۔۔۔۔۔۔؟

اناں
سیاھگءَ وتی راہ گشینتگءُ روگءَ انت..گیشتر نبشتہ کار سید ءِ راست نبیسیءَ کارمرزگءَ انت.
بس ھمے رھبند کمے نوکازگ لوٹیت.
اسل جیڑہ من نہ کشتگ ھلار نہ انتءِ سرا انت.
انوں زبان باز جاگھاں بھر کنگ بوتگءُ سیاھگ پہ زوریں زانتکاریاں مانگشینگ بوتگ کہ چریشیءَ نوکیں نبشتہ کار سمگو بہ انت.
منی ارز ھمیش انت کہ درست ھم پت بہ بنت ءُ ھمے سیاھگ کہ رواج گپتگ ھمیشیءَ دیمروئی بہ دئے انت.
انوں بلوچی لبزانک اسل جیڑہ ایش انت کہ آئیءَ را نوک دورءَ گوں ھمگام کنگی انت.سائنسی چیلنجاں گوں دیم پہ دیم کنگی انت.
گالبندانی سرا کار کنگی انت..نوکیں ردومءُ لبزانءَ وتی کنگی انت..
اگں کسے بہ گشیت کہ اے سیاھگءَ بلوچی لبزانک دیمروئی کت نہ کنت ..رد انت..
فارسیءَ عربی ءِ درور مئے دیما چو روچءَ پدر انت کہ ھمے سیاھگءَ کارمرز کنگءَ انت. بس راست نبیسی اش دگر انت.
سیاھگ مئے جیڑہ نہ انت بلکن راست نبیسیءِ سرا ما کار کنگی انت.

ازگر زھیر


@Labzank
telegram.me/Labzank

#شکاری

[ ءِ ، ے، ئے ، ئِے ]

#ءِ : اے دو گال ءِ میانجی ءَ کیت ءُ دوئیں گالانی سیادی ءَ پدّر کنت بزاں منسوب ءُ منسوب الیہ ءِ درمیان ءَ کیت چوش کہ:
پس ءِ شِنک
اد ءَ ھمزہ زیر پس ءُ شنک ءِ میان ءَ آتکگ ، بزاں مارا گوشگ اِنت کہ شنک پس ئیگ اِنت.
کتاب ءِ پوش / پوش ءَ کتاب ءِ نیمگ ءَ نسبت کنگ ءَ اِنت.

#ے : اے گال وھدیکہ نامگال “اسم” ءِ گُڈ سر ءَ کیت گڑا آ نامگال ءَ یکّے کنت چوش کہ:
کتاب: کتابے بزاں یک کتابے
پسے بزاں یک پسے
ملکے بزاں یک ملکے۔

البت ھما نامگال کہ آئی ءِ گُڈّی آب “الپ، ی، ے ” بہ بیت گڑا پہ چشیں گالانی یکے ءَ “ے” ءِ چیر ءَ دو ٹِک (نقطہ) جنگ بیت چوش 👈 یے۔

دروَر:
ورنایے بزاں یک ورنایے
دانایے بزاں یک دانایے۔
ملایے بزاں یک ملایے

وانگی یے بزاں یک وانگی یے
مندی یے بزاں یک مندی یے
گْوادری یے بزاں یک گْوادری یے

بَے یے بزاں یک بَے یے۔
سے یے بزاں یک سے یے.

#ئے : انچش کہ “ اِت ” پہ دیم ءِ مردم ءَ گْوشگ بیت ھما وھد ءَ کہ آ مردم باز بہ بنت ( باز ساڑی )
دروَر:
وش اتک اِت بزاں شما وش اتک اِت.
شت اِت بزاں شما شت اِت

ھمے رنگ ءَ “ ئے ” ءِ گال پہ دیم ءِ مردم ءَ کارمرز بیت بلے وھدیکہ آ مردم یکّے بہ بیت بزاں پہ یک ساڑی ءَ
دروَر:
وش اتک ئے بزاں تو وش اتک ئے
شت ئے بزاں تو شت ئے۔

بزاں “ئے” پہ یکے ءَ “ تو ”
ءُ “ اِت ” پہ باز ءَ “ شما” ءَ کار مرز بیت.

نوں اے گالاں چُش نبیسگ رد اِنت کہ
وش اتک ءِ،، یا “ وش اتکے”

پرچا کہ “ ءِ ، ے ” دگہ جاگھاں کارمرز بہ اَنت کہ آیانی وتی جاگہ اِنت.

#ئِے ( ءِے ): اے یک ناساڑی ءِ لِچّوکیں پنامگال اِنت.
"آئی ءِ" ءُ "آئی ءَ" ءِ بزانت ءَ دنت ، اے واھندی ءُ کنوکی دوئیں جاوراں زیر ایت.
چوش کہ:
پس ئِے مُرت بزاں آئی ءِ پس مُرت
پس ئِے کُشت بزاں آئی ءَ پس کُشت.

لھتے واجہ ایشی ءِ جاگہ ءَ "ی، ئے، ئی" ءَ نبیس اِیت کہ سید ءِ رھبند ءَ رد اِنت ءُ اے گال ھجبرانی ھجبر "ئِے" ءِ جاگہ ءَ گپت نہ کن اَنت
پس ئِے مُرت: ایشی ءِ جاگہ ءَ پسی مُرت ، پس ئے مُرت یا پس ئی مرت نبیس اَنت کہ چو روشنیں روچ ءَ رد اَنت.

جھد ءِ کاروان



@Labzank
telegram.me/Labzank