★★★ دلـدار نـہ بیت ★★★

سروں بـے سار اِنـت دِلوں سار نـہ بیت
دلوں بـے سار اِنـت سروں سار نـہ بیت

اگاں چم جَہل سَتر چم جَہل اِنـت
چم پِردارے ءِ چمـدار نـہ بیت

گم چـہ گمدوست ءِ گم ءَ پْروشت گماں
کَے گْوش اِیت گَم گم ءِ گموار نـہ بیت

بےسراَنـت سرکہ سر اِش سُتکگ سر انت
سراں بـے سر دریں سردار نـہ بیت

گار ءُ گار اتیں دِل ءَ گار کُتگ
گار ءُ گار ات دو بـر گار نـہ بیت

رَد ءُ بیراہ، رَد ءُ بــے راہ اِنــت
رَد ءَ رھـدر بـر ءُ رھـدار نـہ بیت

انگریں واھگ ءِ سوگات انگر
دِل اگاں انگر اِنـت انگار نـہ بیت

گُلـگُل ءَ ارس گُل ءِ گُلریچ اَنـت
گم ءِ گُلباگ چـوں گلـزار نـہ بیت

دِل پـہ دِلـدِل دل ءَ دلـوار مـہ کن
دلـبر ءِ دِل، دِل ءِ دلـدار نـہ بیت

رَنج ءُ آزار سید ھمـــراہ اَنـــت
اِے ھم گنجے کـہ دِل آزار نـہ بیت

شمبے ۲۱/ اکتوبر ۱۹۶۱
✍سیدھاشمی



@Labzank
telegram.me/Labzank

ــــــــ وطن / رفیق رھچـار
ــــــــــــــــــــــــــــــــــــــــــــ
وطن بهشتءُ مادَر اِنت
وطن طِلاهءُ گُوهَر اِنت
منی زمین مکّھیں
وطن زهیرءُ زیمِر اِنت

✔وطن بهشت و مادر است
وطن طلا و گوھر است
چو مکه سرزمین من ( مقدس است )
وطن دلتنگی و ریتم( موسیقی)من است
ــــــــــــــــــــــــــــــــــــــــــــ
تیاب ءِ گَنْجیں زِر مَنی
داں چابھار ءُ جِیْوَنی
من چینچو گُژن سَگ اِتگ
گوشئے که تیرے لَگ اِتگ

✔دریای با ارزش ساحلش مال من
از چابھار تا جیوانی
چقدر سختی کشیدہ ایم
انگار کہ زخم خوردہ ایم
ــــــــــــــــــــــــــــــــــــــــــــ
بلوچءِ پَُسّگاں بِچار
که بزَّگِ اَنت ءُ بَزََکار
نہ زانَگے نہ وانَگے
نہ هست اِنت روزگارءُ کار

✔فرزندان بلوچ را بنگر
کہ بی پناہ و درماندہ اند
نہ دانشی نہ آموزشی
نہ کہ کار و کسب دارند
ــــــــــــــــــــــــــــــــــــــــــــ
من سنگرے آں مُحْکَمیں
بلوچے آں من سَرجَمیں
نہ بیت ماپِ هَکِّ مئے
تَرا که چـمّ سَکَّ مئے

✔من جان پناہ محکمم
من کاملاً بلوچ ھستم( بلوچ واقعی )
حق ما گذشت ندارد
کارھایتان را زیر نظر داریم

( همیشه بدنبال حق و راستی اند)
ــــــــــــــــــــــــــــــــــــــــــــ
مکّهیں ماتیں
وطن ماتیں
بلوچستان مئے
سورْمَگیں ھاکاں
کناں بوسہ
توئے ایمان مئے

✔چو مکّہ مام وطن من
بلوچستان مادر ماست
خاک چون سرمہ اش را می بوسم
تو باور ما ھستی
ــــــــــــــــــــــــــــــــــــــــــــ
چو شیرزال مئے ماتءُ گُھار
مئے ننگ ءِ پَردگْ دِلءِ تَوار
مئے بچ شْیر اَنت چو نر مزار
اے جان َبکْش اَنت پہ سرڈگار

✔ مادر و خواھران ما چون شیرزال ھستند
پردہ ناموس ما و صدای قلبھای ما ھستند
فرزندان ما بسان شیرھای نر ھستند
کہ برای سرزمین خود جانشان را میدھند
ــــــــــــــــــــــــــــــــــــــــــــ

بہ بات ئے آباد گُلزَمین
وطن چو هانُل چو مہ جبین
مَن مَستءُ شیدا مُریدْ باں
اے ھاک پہ مَنْ چو مثل ءِ دین

✔ سرزمینم آباد باشی
وطن مثل معشوقہ ام است ( عاشق وطن ھستم )
من سرگشتہ و شیدا مریدش ھستم
این خاک برایم چو دین من است
ــــــــــــــــــــــــــــــــــــــــــــ
مئے کُلّیں شهرءُ میتگ اَنت
عجب اے رنگ ءَ پُرُوشْتَگ اَنت
اے دُرُسْتیں گار ءُ سربِتگ
اے دُرُسْتیں آپ ءَ بُرْتَگاں

✔ تمام شھر و روستا
تعجبم بہ چہ شکلی گشتہ اند
تمام اینا سرگردان و واماندہ
تمام اینارا انگار آب گرفتہ است
ــــــــــــــــــــــــــــــــــــــــــــ
ترا وتی دِل ءَ دِے آں
تئی مُشکلءِ سر ءَ گِراں
تَیے اَرْسیں گِریْوَگ اَنت چی ءَ
گُوشئے که بَستگْ جمبراں

✔ دلم را فدایت میکنم
پیشگیر مشکلت ھستم
چرا با اشکھایت گریہ میکنی
انگار کہ ابرھا جمع شدہ اند
ــــــــــــــــــــــــــــــــــــــــــــ
اے کَوْرءُ کََلگُ آ ڈوک ءُ ڈن
من ءَ که دوست اِنت وَتِی وطن
مئے دل سَراوانءُ نِیْکشَهر
مِئے پُلّیں سَرباز گُلیں چمن

✔ این رودخانہ، آبادی، سنگلاخ و کویر
من وطنم را دوست دارم
قلب ماست سراوان و نیکشھر
سرباز زیبایم و چمن چون گلش
ــــــــــــــــــــــــــــــــــــــــــــ
چو داداشاهءُ چو کَمْبرءَ
تَپاکَ بات ئے گوں مَردماں
اے جنگءُ جیڑہ مَباتَ هِچْ
ما یکّ بات اِنت گوُں همبلاں

.✔ مثل دادشاہ و مثل قنبر
با مردمان متحد باشی
این جنگھا و جدل ھا ھیچ نباشد
ما با دوستان یکی باشیم
ــــــــــــــــــــــــــــــــــــــــــــ
هُدا دَوْا همے مَنی
بِہ باں بلوچے دِلْ جمیں
برو زَمانَگءَ بِہ گر
پَهْ عِلْمءُ وَانَگءَ بِِگرْ

✔ خدایا دعایم ھمین است
یک بلوچ واقعی باشم
برو ھمگام با زمان باش
با علم و آموزش باش
ــــــــــــــــــــــــــــــــــــــــــــ
بزور رَسْماں پیْسَری
مہ تَر تو گوھار سردری
تو لَجّءِ چادرئے منی
تو گوھارءُ مادرئے منی

✔آداب قدیمیت را حفظ
خواهرم بی حجاب نباش
تو حافظ ننگم ھستی
تو خواھر و مادرم ھستی
ــــــــــــــــــــــــــــــــــــــــــــ
جهان ءِ چَمّ ھون بنت
ترا کتاب گون بنت
سَبق ءَ مهر ءِ یات گِر
گُڑا برو کلات گِر
✔ چشم جھان( ھمہ) خیرہ میشود
وقتی صاحب علم باشی
درس محبت را فرا بگیری
آنگاہ صاحب مقام میشوی
ــــــــــــــــــــــــــــــــــــــــــــ
مکّهیں ماتیں
وطن ماتیں
بلوچستان مئے
سورْمَگیں ھاکاں
کناں بوسہ
توئے ایمان مئے

✔چو مکّہ مام وطن من
بلوچستان مادر ماست
خاک چون سرمہ اش را می بوسم
تو باور ما ھستی
ــــــــــــــــــــــــــــــــــــــــــــ
Besam:
@Labzank
telegram.me/Labzank

بُنگیج

بْیا ھمبل ءُ بْیا ھمدل ءُ بیا ھم سرءُ ھمکار
گـالانی رَزینـاں پَتـو ، گُلـکار ءُ چکـنکار

گال بُنگش ءُ گال آسر اِنت بودشت ءِ بھارءَ
گوں گالے پد ءَ مُرتگیں ھردَھل کنت تیجار

بنگــیج کنـاں نـام ءَ ھمـا بُنگـش ءِ گـال ءِ
ھمگرنچ اِنت ھمے گال گوں بے دَروریں گالار

دلگوش بکن ، گوش بدار، بْوان گوں نام ءَ
گـوں نام ءَ جھاں پَروریں ، مھران ءُ پَھِلکار

سـاڑاھگ ھـُدا کـرز اِیت جھانانی جھـان ءِ
رودینوک اِنت بے کچّھیں بکشوک انت ءُ مھرار

مُزّروچ ءِ گھیں واجہ انت بے جیڑہ ءَ بے تْران
تئی ھزمت ءَ دست بستگ ، کُمَک ّءِ تئی واستار

تچکیں رہ ءُ رھبند ءَ مئے رھدربری ءَ کَن
آیانی راہ ءَ کہ تئی مھر بوتگ اَنت گنج گْوار

آیانی راہ ءَ اِنّاں کہ زھر اِش سر ءَ ساھیل
نے کہ راہ ءَ آیانی کہ وت گار اَنت ءُ گُمسار

نی بـوان گـوں بے کـِچّہ ءُ آریپـیں زُبـانے
یا گوں دلے بوھیـریں ءُ منّوگریں گوشدار
........ ســیدھـاشمــی ..........
🌴 کــــورُشـــیں گـــال 🌴

* چتور *

دَر بِگیشّاں واھگ ءِ تْرندیں گِر ءُ بنداں چتور
اَھد ءُ اِکرار ءُ ھزاری کَول ءُ سوگنـداں چتور

بـے وسیں زند ءَ اگاں گَھ کُت من ءَ دَر گْوز بکن
روچے سد بر پْرشتگیں اَھداں تئی، ننداں چتور

چمّ منی بـے روک بوت اَنـت راہ ءِ بازیں چارگ ءَ
نـی اگاں کائے منـی دیدگ ترا گنـداں چتور

تْرانگ اِت اِے سِستگیں دلبند ءِ بندوکوں کُتگ
تئی زھیراں چہ وتی شُومّیں دلءَ سِنداں چتور

ایر دنت اِنـت شپ جِتائی ءِ چو مَرگ ءِ پْریشتگ ءَ
بـےتئی اوستءَ من سگّاں زندءِ گْورگنداں چتور

مُوہ نہ دنت تْرانگ جگر سِندیں کہ دلگوشے کناں
شھدءُ شیریں، جَور ءُ تھلیں گال پِربنداں چتور

وش نیتکانی رَدیں کار اَنت سروں رَھن اِنت انگت
تاں نہ موکان ئے میاری چوٹواں رَنداں چتور

وژدلـیں باریگ بُرت اَنـت ھانل ءَ گوں وت سید
گْریتگـیں چَمّ ءُ لگت مالـیں دِلے کَنداں چتور

✍سید ھاشمی
بھرن ءِ تْرھجاہ
سےشمبے ۵/ اگست ۱۹۵۷

@Labzank
telegram.me/Labzank

Besam:
☀️☀️ سَر سُچگ بـے ننگی یـے☀️☀️

سر سُچگ
سر سُچگ بـے ننگی یـے بـے آسریں،
پھک سُتکین ئے ......
کہ پُر تئی سْریمّگیں،
دشت ءِ گرماگی شمالاں رُپت اِت اَنت،
چَنڈ اِتین اَنت اِش......
ماں مِسکیں کیلّگاں،
پہ مَڑا......
ھر پْرشتگیں پوڑ ءِ شم ءَ،
نوکیں زند ءِ نوکیں دَھلاں جَھ جَتیں،
بُن شُتیں وامان ءُ بیرانی پد ءَ
بِیڑ بُرتین اِش......
پہ جوریں دُژمن ءَ،
گوں ملَندْروہ ءُ مزاری پنجگاں،
بِلّے چُک چین ءُ دیار سوچ اِش کُتیں،
تا کہ ......
پولنگ اِش بہ شُشتین اَنت تئی،
آس دَے......
آس دئے بـے ننگی ءِ زِند ءَ وتی،
شَر بِہ سوچ ءُ شَر بِہ سُچ ......
کہ سر سُچگ،
سَر سُچگ......
بـے ننگی یـے بـے آسریں

✍سید ھاشمی
بھرن تْرھجاہ
۱۰/ جولائی ۱۹۶۰


@Labzank
telegram.me/Labzank

شاھر: آبد آسکانی
توار: آبد آسکانی
Besam:
Besam:
@Labzank
telegram.me/Labzank

(نی وا قیامت ءَ اوں کانٹ رودینتگ)

ناھدا دلوش : ناھدا ھال کن۔۔۔ اِش کنگ ءَ پاکستان نیوی ءَ اوں گوادر ءَ پلاٹ ءُ زمین داھگ ءَ اِنت گڑا باریں مارا ءُ شمارا رس ایت؟
ناھدا وژدل : مارا ءُ شمارا؟۔۔۔ تو اوں سار نہے ناھدا ۔
ناھدا دلوش : وے گوادر مئیگ اِنت پلاٹاں دیگراں دنت.؟۔۔ گڑا وا شر نہ بیت ناھدا ۔۔۔۔۔ بائد اِنت لیڈر چیزے بکن انت ناھدا ۔۔۔
ناھدا وژدل : لیڈر؟؟؟؟؟ ۔۔۔۔ تئی لیڈرانی دست بس وتی برات ءِ گورجیگ ءَ رس ایت۔۔۔ اِشاں چہ چُشیں امیت مدار ناھدا ۔۔۔۔
ناھدا دلوش : گڑا ما چی بکنیں؟؟؟ ۔۔ لیڈر دانکہ چیزے نہ کن انت مارا ھچ نہ رس ایت ناھدا ۔۔
ناھدا وژدل : تئی لیڈراں پیش ءَ کتگ ترا رستگ ؟؟؟؟۔۔۔۔ تو مانبر شموشتگ زاناں؟ ۔۔۔۔ تئی لیڈراں ھر روچ جلوس ءُ کوکار کت کہ پلاٹ غریباں داھگ بہ بنت۔۔ بلے چی بیت؟۔۔۔ چیروکائی ءَ درستاں وتی ءُ وتی چُکانی نام ءَ پلاٹ زُرت ۔۔ منا ءُ ترا چی دات اِش؟؟؟؟۔۔۔
ناھدا دلوش :(کمو بے تواری ءَ پد) بلے چیزے کنگ لوٹ ایت ناھدا چو مارا ھچ نہ رس ایت۔ ۔ اگاں لیڈر نہ کناں گڑا پریس کلب ءَ رواں صحافیاں گشیں کہ مئے پریات ءَ برز ءَ بہ بر انت۔۔
ناھدا وژدل : پریس کلب ؟؟؟؟؟۔۔۔۔۔۔ تو وا پورا ملک ءَ نہے ۔۔۔ تو زاناں سہی نہے کہ اِشاں اوں وتی دیم سیاہ کتگ؟؟؟.۔۔۔۔۔
ناھدا دلوش : اننا ناھدا ۔۔۔ اِے الزام دروغ ئے ۔ اِشاں پلاٹ نہ زُرتگ اے چُشیں بدیں کار نہ کن اَنت۔۔
ناھدا وژدل : بدیں کار نہ کن اَنت؟؟؟؟؟۔۔۔ اڑے لیڈراں وا یک یک پلاٹے رستگ ۔۔ اِشاں دو دو پلاٹ رستگ۔۔ برو اسٹیٹ ایجینسیاں جست بکن گڑا ترا باور بیت۔
ناھدا دلوش : دو دو پلاٹ؟؟؟؟؟؟؟؟
ناھدا وژدل : اھو ناھدا دو دو پلاٹ۔۔ یک یک ریزینٹشل پلاٹے یک یک کمرشل پلاٹے ۔۔۔۔
ناھدا دلوش : گڑا وا قیامت اِنت ناھدا ۔۔۔۔
ناھدا وژدل : قیامت اِنت؟؟؟۔۔۔ قیامت ءَ تو نوکی سہی ئے ؟؟؟؟؟۔۔۔ نی وا قیامت ءَ اوں کانٹ رودینتگ ناھدا !!!
Besam:
@Labzank
telegram.me/Labzank

گـوشکنـد 😄😜

مـلالُـتر گـرماگـی شپے گـوں وتـی لـوگ بـانـک ءَ لـوگ ءِ سـر ءَ وپتگ اِت اَنـت. مـلالُتـر ءِ لـوگ بـانـک ءَ جسـت کُـت!

منـی لُتـروک پـل تـرا مـن ءَ چینچـک دوسـت بیـت؟

ملالُـتر ءَ گـوشـت: چمـاں دیـم پـہ آزمـان ءَ بـہ کـن ءُ اسـتالاں ھسـاب بـہ کـن ...

لُتـر ءِ جنیـن ءَ گـوشـت بـزاں تـرا مـن ءَ بے انـدازہ دوسـت بیـت! بـزاں ھمینچـک کـہ اسـتال اَنـت ؟

مـلالُتـر ءَ گـوشـت: درد، نـاپـگ، انـاں ھسـاب اش بـہ کـن داں اینچـک ریـک ء راک مـہ کـن ئے ...😂😂😂

رجـانـک / ھـارون اخـلاقـی .
*کــورُشــیں گــال*

دستونکے پہ شہیدیں سعید امیر ءِ نام ءَ
(خالق ارمان)

دیدگانی گریوگاں ہلوت کنئے
سرگرئے بچکندگاں رُکست کنئے

ہون تُنّیگیں نگاہ گیمُرتگ اَنت
گُلزمین ءِ مَلپداں زیارت کنئے

گوں کپوتی مہر موتکیں کوکواں
جنگل ءِ شیزارگاں کِیامت کنئے

پہ شہیدیں توکل ءِ وشّاتکی ءَ
ملکموت ءَ ہم شِگانے جت کنئے

ٹیسَریں تیراں زَرئے پہ چم ءُ سر
کَبرزِندیں مانِش ے گوں وت کنئے

ما نزانت ارمان ، چو تہنائی ءَ
دُور پاندیں موسم ے سنگت کنئے


Besam:
Besam:
@Labzank
telegram.me/Labzank

گوش :

گوشکند

یلی رئیسی

گوش بنی آدم ءُ درستیں ساھدارانی یکے چہ شریں آزایان انت ۔ءُ درستان دو گوش پِرانت ۔ اگان مردم یا دگہ جناورے ءِ یک یا دوئین بُرّگ بہ بنت آئی ءَ کُرّی ءِپنام دمب ءَ لچیّیت ۔گوش اشکنگ ءِ کارءَ کنت ۔ھما مردم کہ مادر موجودی ءَکرّ بہ بیت ِ گونگ ھم بیت ۔لھتے مردم پیری ءِ سَوَب ءَ یا ناجوڈی ءَکرّ بینت ۔ھما کہ ھچ مہ اشکنت آئی ءَ ھامپین ھم گش انت ۔ گوستگیں زمانگان بادشاھان ، بلوچانی بادشاھان ھم گناھکارین مردمانی یک یا دو گوش برتگ ۔بلوچانی کُریاں پہ وتی بے گوشی ءِ چیر دیگ ءَ مزنین پاگ بستگ ۔بازیں کشت کوش ھمے گوش ءِ سرءَ بوتگ ۔بلے مروچان علم ءَ دیمروی کتگ نکلی پلاستیکی گوش اڈ بیت ءُ برتگین ءِ جاگھ ءَ لچینگ بیت ۔
من یک روچے چہ وتی دوئین بچکان کہ لندن ءِ زانتجاھاں وانتگ جست کت یک گوشے ءِ ڈنڈ انگریز ءِکانون ءَ چی انت ؟ ھملّ ءَپسہ دات میران ءَ جست بکن ۔میران ءَ پسہ دات انگریز ءِ کانون ءِ متابک ءَ اگاں یکے پہ زانت کنتّ یکے ءِ گوش ءَ بہ بُرّیت شش سال بندیگ زندان بیت ۔اگان دو گوش ببریت ۱۲ سال جیل بیت ۔بلے پرچا اے جست ءَ کن ئے ۔من گوشت منی دل چہ لھتے بلوچان سک پّرانت ،ھما بلوچ کہ یورپ ءَ نندوک انت ،ایرانیان تاچینتگ ءُ درانڈیھ کتگ انت بلے انگت ایران ءُ ایرانی اش چہ ساہ ءَ دوست ترانت ، گوش انت بلوچ ملتے نہ انت ، بلوچ ٹک ءُ قوم ایں ،من ءَ اگاں گوشے برّگ ببیت چہ ھمے مردمان کہ سیاستدان ءُ زانتکارانت ھم ،یکے ءِ گوش ءَ بُراّن ءُ شش سال ءَ بندیجاہ ءَ شش ناول پہ بلوچی زبان ءَ ندر کنان ۔


Besam:
Besam:
@Labzank
telegram.me/Labzank

هارون ا:
گـوشکنـد. 😄😜 😂

مـلالُٹّر شتـگ اَت ھَـجّ ( حج) ءَ
وھـدے کـہ چـہ ھَـج ءَ پہ سلامتی واتر ئَے کـت، شَُـت ھمـا دُکان ءَ کہ وام ءُ شَین ئَے کتـگ اَت!

دکان دار ئَے گوشت ھما دپتر ءَ درگیـج ءُ بیار کہ منی وام نبشتگ اَنت!

دُکاندار ءَ گَلے چِت کہ ملالُٹّر ھج ءَ شتگ ءُ آتکگ نی اَلم ءَ وتی واماں ساپ کنت.

بیچارگیں دکاندار ءَ پہ گَلے وامانی دپتر پیش کت،
ملالُٹّر ءَ گوشت منی نام ءَ درگیج!

دکاندار ءَ گوشت لُٹّر پُل اے ھم تئی مبارکیں نام!

ملالُٹّر ءَ گوشت شاباش!
نی منی نام ءَ چہ ملالُٹر ءَ ھاجی ملالُٹر بہ نبیس!!
😜😜😜😄😄😄😄😄😂
رجـانک / ھارون اخلاقی#



@Labzank
telegram.me/Labzank

🌳🌳🌳 چِش 🌳🌳🌳

کاڑ ءُ گُل پَریّانی پُلّـیں دزگْوھاراں مـن
پہ بلوریں بانوراں دوستیں دیمداراں من

دُژمنیں چِگردانی دُژمنی پَمَن سُوتّ اِنت
سرجمیں کھیر بَلّ ءِ پُلّیگیں نِشاراں من

پـہ بلوچـی دیواناں منگہ ءُ مـڑایانـی
پُـر تپاک ءُ ھونکّـیں مَنَّھے پتاراں مـن

انگت ھم دل ءَ کَھر اَنت چمّن نابزانتکاری
پـہ تْرپوکیں اَلماساں گردن ءَ شھاراں من

آگھیں شپاں دْراجیں،راجءُ واھگءِ کوھیں
سوچکءُ سوزمان داریں دَرد ءِ گُمگُماراں من

بَیرم ءُ تلاہ سیِچکیں شیپگ اَنت پہ مھماناں
دُژمن ءِ جگر بنداں زُومّاں ایر کاراں من

چو کہ واھگدارے ءِ ھِیتّ وارتگـیں لُنٹاں
تاکوں شِمشُکیں لرزاَنت سبز ءِ مِنّت واراں من

کاڑی زاں سریں کُنٹوں پُشت تِکّہ لالانی
مَنگھیں نِیادانی سَیمی راز داراں مــن

سَمّڑاں چُلُمبیناں ، آ کھیب ءُ کْـرامانـی
ماھـیں سُومری سِند اَنت ھچ دل ءَ نیاراں من

پُل منـی زباد بوئیں پُلّک اَنـت پَـریانـی
دُرّ ءُ کُنّلاں کیدی ، پھک بـے کِماراں مـن

چو گُلانـی چو ٹیلّ اَنت ھجگ ءُ نازُکیں سرٹال
لَمب ءُ شاھاں چو شنگیں مھپراں سماراں من

سارتیں ساھگوں ندرْ اِنت پاکیں واھگدارانی
پـہ گُلاں مُرادیگ ءُ دیر اِنت راھچاراں مـن

کـد کـدیں سید بْیارئے ھانل ءَ کھیبانـی
گُل پری ءِ وَشّاتک ءَ سارتـیں پُلّ گواراں من

✍ سید ھاشمی
مَتَْرہ مشکت
۱۷/ دسمبر۱۹۶۴


@Labzank
telegram.me/Labzank

(تژن ءُ بچکند,, بڈّواریں لَٹّ، طارق پیشکانی)

مات ءُ پت ءِ سردیں ساھگ ھر زھگ ءِ سر ءَ ساھل بات شالا آمین ءُ انچوش بات-،، بلے ھر دوھینانی مھر پہ وتی زھگ ءَ جُتا اَنت- بزاں یک وڑ نہ اَنت- مات مُدام وتارا زھگ ءِ دیم ءَ پیش داریت کہ بابل! من ءَ چنکس دوست دار آں، بلے پت ناں چُش نہ کنت، بلکیں آ ھمے سرپد بیت کہ ما دوھیں اگں وتی زھگ ءَ مھر بدئیں بلکیں مئے زھگ شُردو یے دربئیت، پمیشکا آ وتی مھر ءَ چیر دنت،
اے گپّ ءَ باز دیر اِنت اے 1990 ءِ گپّ اِنت کہ من ءَ وتی پت ءَ چو ولایتی کُنر ءِ پیم ءَ چوپتگ،بلے نوں 15 ءَ سال چہ بُرز اِنت کہ منی پت بیران بیتگ، من وتی پت دل ءُ دپ ءَ چہ پھل کتگ، بلے منی لپّڈیں بَڈّ ھجبر منی پت ءَ پھل کنگ ءَ تیار نہ اِنت، آ گشیت تو داں وتی پت ءِ زُلم ءُ جبرانی کسّواں نیار ئے من تئی پت ءَ نہ بکش آں،
نوں من وتی لپّڈیں بڈّ ءَ چہ مجبور آں ھُدامُرزی ءِ لھتے کسّو شمئے دیم ءَ بیار آں،،
مئے پت ءَ مئے دو برات چہ ساری مشکت ءَ بُرت اَنت کہ آ وتی واستا کار ءُ روزگارے بہ کن اَنت ءُ بِلّے وتی پادانی سر ءَ وت اوشت اَنت، بلے ناکو احمد ءِ سوجانی سر ءَ من ءَ ءُ منی کستریں براتے گوں مات ءَ مارا ھمد ءَ بزاں ملک ءَ ئِے یلہ یے دات،
نوں من وتی کستر ءُ مستر وت بیت آں بزاں من ءَ کسّ گشونک ءُ مکن جنوک نیست اَت من ھَری ءُ اَپسی کتگ اَت- بلے وھدے کہ کدی سالانی ءُ کدی دو سال ءِ سر ءَ مئے پت ملک ءَ آتکگ، گڑا آئی ءَ یکپاریگ ءَ سجھّیں سال ءِ راشن بزاں لَٹّ من ءَ جتگ اِت اَنت،
یک روچے نیمروچ ءِ وھد اَت سُبارگ ءِ نزّیک اَت، داں پت ءَ چو کُورانی پیم ءَ منی دست گپت ءُ من ءَ گوں لوگ ءِ جِنّی ایں شِریش ءَ بَست ءُ وت شُت ءُ سبارگ ءَ لگّ اِت، دیم منی گوں شِریش ءَ ءُ بڈّ منی گوْات ءَ داتگ اَت، من ٹیمب پاس ءِ ھاتر ءَ شِریش ءِ سُسراں ککّرّگ ءَ اِتاں ءُ شریش ءِ بُنڈاں گوں من عجبیں لکیر کشّگ ءَ اِتاں داں یک اناگت ءَ پت لگّ اِت منی پادانی شودگ ءَ من دل ءَ ھمے مار اِت کہ من تیوگیں روچ ءَ پاد شپادی گولاں پمیشکا منی پاد پُلکاں گوں سیاہ رُو اَنت، ءُ آ سوابی کار کنگ ءَ اِنت، بلے نہ کن ئے آ بزاں مورانی ھونڈاں آپ مان کنگ ءَ اِنت- دمانے ءَ پد موراں انچُش منی سر ءَ اُرش کت گش ئے زاناں ھما غزوہ ءِ جنگ بندات بیتگ کہ مسلمان 350 ءُ کافر 5000 اَنت، اُود ءَ انگت واجھیں ھُدا ءَ ابابیلانی لشکر دیم داتگ بلے اد ءَ من تھنا ءُ منی رکّینوک منی مات اَت کہ آ پت ءَ سوگنداں گوں بندیگ کتگ اَت- من لگّ اِتاں وتی سُر ءُ پُر کہ مور دیر بیا اَنت بلے آ گیشتر من ءَ سر ریچان اِت اَنت، لھتے مور من گوں وتی دستاں شِرچینت ءُ لھتے من گوں وتی نیش ئِے دنتاناں گوں آیانی سر سِندان کت اَنت، دگہ وَ راہ ھم نیست اَت، داں بیگاہ ءِ قضا ءَ منی پت چہ لوگ ءَ دراتک دیم پہ بازار ءَ کماشانی دروگانی بُنجاہ ءَ ءُ مات ءَ من ءَ اے زالمیں موراں چہ آجو کت بلے منی بڈّ ھون ءُ ھون چیر بیت،
دگہ رندے پد ءَ من ءَ اسحاق سنی ءَ انور شنکر ءَ ھال دات کہ اِنشپی حاجی موسی ءِ لوگ ءَ مَتن چکر بتی (مھتن چکرورتی) ءِ نوکیں فلمے لگّ اِتگ، گڑا وھدے کہ شپ بیت پت منی گوں بی بی سی لندن ءِ گوشدارگ ءَ دزگٹ اَت ءُ من دل ءَ جیڑ اِت کہ کلاکے ءَ داں پت بی بی سی ءَ گوشداریت، بی بی سی کہ ھلاس بیت گڑا منی پت "دل ترا عاشق،، ءِ سوتاں گوشداریت ءُ داں من وائی باں کہ فلم ءَ ھلاس کناں ءُ واتر باں، بلے نہ کن ئے اے شپی منی بھت ءِ کپگ کہ بی بی سی موسم ءِ ھراب بیگ ءِ سوب ءَ گِژ گژ ءَ اَت ءُ گڑا پت ءَ کہ ریّل ٹیپ ءِ دپ ءَ دات ٹیپ ءَ ریّل گپت ءُ آئی ءَ من ءَ توار جتگ اَت کہ من ریّل ءَ چپسے بہ جن آں وھدے کہ من ءَ ئِے نہ دیستگ گڑا زانتگ ئِے کہ من کج ءَ باں آ کیت ءُ من ءَ وتی ھمرائی ءَ لوگ ءَ کاریت ءُ من ءَ گُشیت منی چکّ! پَشک ءَ لگوش کہ ترا گرم کنت من گش آں اے زمستان ءَ سردی ءَ چہ تئی نقلی دنتان چامپ جنگ ءَ اَنت اد ءَ گرم کُج اِنت، بلے آ من ءَ زور دنت کہ بابل! پشک ءَ کش من ترا جاپانی کمبل ءَ پِر دیاں تو وت باپ بئے، من نوں دل ءَ ھیران آں پت منی انکس پرچا منی سر ءَ مھربان اِنت، وھدے کہ من وابینگ ءَ لگّ آں داں من ءَ سما کپ ایت کہ منی بڈّ چو ڈھول ءِ وڑ ءَ ڈمنب ڈمنب ءَ اِنت، مات چہ یک نیمگے ءَ کوکّار کنت کہ تو منی چُکّ کُشت، پت گشیت اے تئی چُکّ نہ اِنت من تھت ءَ تنچگ ءَ آں، چوکہ شپ تھار ءُ لُنج اَت پت ءَ مات رد دات ءُ مات ءَ باور بیت،،
سھب کہ بیت من وتی بڈّ وتی کستریں برات ءَ پیش داشت ءُ گشت "
تھا چہ پُرشتگ ءُ سر زاھر ءَ تیار آں من
اگں تو لوٹئے پشکءَکش آں پیش دارآں من،،

برات کہ منی بڈّ کہ دیست لگّ اِت کندگ ءَ ءُ گُشت ئِے، لالا! تئی بڈّ ءَ گند آں من ءَ ھمے سما بوھگ ءَ اِنت کہ بازیں ھوراں چہ آپاں راہ نہ بوتگ گڑا آیاں وتی واستا چمگ کشّ اِتگ ءُ راہ اِش کتگ،،
من وانگ ءَ چہ سکّ دلپروش اِتاں،
گڑا بزاں یک روچے مشکتی سینٹ ءُ صابونانی لالچ ءَ ماسی گنجی کیت

ءُ منی پت ءَ ھال دنت کہ بیا کہ اتئی چُک وانگ ءَ نہ روگ ءَ اِنت من آئی ءَ سجھّیں روچ ءَ رونگ ءِ راہ سر ءَ گند آں وھدے کہ اسکول ءَ چھٹی بیت گڑا آ لوگ ءَ کیت،
اے روچی ھمے ڈول ءَ وانگ ءِ ھلاس بیگ ءِ وھد ءَ کہ من وھدے وتی لوگ ءَ سر بیت آں داں منی پت چو کانگی ایں مُرگ ءَ منی راہ چار اِنت، من ءَ جست ئِے کت مرچی شما کجام سبک یات کتگ ؟
من گُشت ھمے سبک بوتگ کہ
"کوئی بھی لطیفہ یاد کریں،، پت ءَ پد ءَ جست کت کہ تو گڑا کجام لطیفہ ونتگ؟
من گُشگ ءَ لگّ اِتاں:
"باپ بیٹے سے :-
بیٹا! بتاو واحد کیسے کہتے ہیں؟
بیٹا:- ابّا جان! شاہد کے بھائی کو واحد کہتے ہیں "،،
پت ءَ چیر بروتاں بچکندگے جت ءُ پد ءَ من گوں دریگ ءَ بست ئِے شرو بیت منی چوپگ ءَ، ،
اے سجھّیں منی پت ءِ زلم ءُ ستم اِت اَنت کہ آئی ءَ منی نا ھکّیں بڈّ ءَ گوں کتگ اِت اَنت، نوں بلے من ءَ ستک ءُ باور اِنت چو منی وڑ ءَ منی لپّڈیں بڈّ منی پت ءَ چہ وتی ھکّاں پھل کنت-،،
Besam:
@Labzank
telegram.me/Labzank

جولاھگ دشتی

اسل ءَ شاعری ءِ آ پجار انگت منی ھیال ءَ تنیگہ کس ءَ نہ کتگ کہ ما بگشیں ھو اے چیز شعر ءِ ھاتر ءَ ھژدری انت .....چو وا شاعری ءِ ٹولز ءُ ازبابانی بابت ءَ باز گپ بوتگ .....کہ آ شعر ءِ تہا دومی درجہ ءِ چیز شمار بنت ....اے ٹولز ءُ ازباب مثلاً ردیف قافیہ وزن وغیرہ اے درہ محوری ءُ گردانکیں چیز انت کہ جاہے است انت ءُ جاہے نیست انت اے ٹولز شعر ءِ ھاتر ءَ ضروری نہ انت ....بلے شعر ءِ جند چی ےِ!؟ آئی ءِ سائنسی تعریف چی انت ؟ شعر ءِ مرکزیت چی انت؟
کولرج گشیت کہ تخیل، امیجینشین یا فینسی شعر ءِ ھاتر ءَ المی انت، ارسطو گشیت کہ ھما غیر نثری دانک کہ ترا یک تاھیر ءُ وشی ے بہ دنت آ شعر گشگ بیت...دگہ یکے گشیت کہ شاعری یک قسم ے لبزانی ٹپاں چینی یا ٹپاں پاپلی لیب ے، یکے گشیت کہ شاعری چہر و شبینانی ٹہینگ ءِ نام انت، قدیم یونان ءِ فلاسفراں گشتگ کہ شاعری دیوتاہانی گُفت ے کہ بنی آدم ءِ سرا الہام بیت ......چہ اے دراہیں گپاں در ابید ھم اے چیز انگت نہ گیشیتگ کہ آ کجام نقطہ انت کہ ہرکس ءُ ناقص ءَ اے سما ءَ بہ پرینیت کہ اے چیز گپے نہ اے یک شعرے .....انچش کہ منیر ءِ کتاب پیاپیں لچہ انت انچش ھم سید ءِ کتاب گاریں کلدار انت اشانی تہا تپاوت چی انت؟ یکے ردانک گشگ بیت دومی ءَ شعر گشنت .....
نوں شاعری ءِ کہ باندات ءَ گپ کیت ءُ سر بیت گڈا گپ ھمدا یکبرے یلہ دیگ بہ بیت تا وھدیکہ نکان ءُ ساچشت ءِ جند مئیت ءُ تی دیم ءَ مہ بیت تو ھچبر اے گپ ءَ گشت نہ کنے کہ شعر ءِ نبشتہ کنگ ءِ رھبند اش انت یا تو چشیں گپ ھیال کن اے یک شعرے بیت.....اے گپ ماقبل از وقت گیشنگ نہ بیت ....یعنی گوں سادہیں لبزان شعر ءَ انگت وتی سائنسی فارمیٹ ءُ قالب نیست ...اے یک تجربہے ءِ نام انت انچش کہ ھمے تجربہ نون میم راشد ءَ کتگ یا کہ خلیل جبران ءَ کتگ ......اسلیں گپ اش انت کہ شعر ہیت ءِ پابند نہ انت آ یک کیف ءُ چاڑے ءِ نام انت ....ھنچیں تاھیر بکشیں ھیال ے گپ ے کہ تو آئی ءَ کجام ھم فارمیٹ ءِ تہا ایر کتے کنے لچہ ے کنے ءِ گزل ے کنے ءِ ...بیت ِ ....آ نو تی کار انت ....ہاں البت اگن تو آئی ءِ تہا وزن مان کنے قافیہ ءُ ردیف مان کنے آ چد ءُ زیب تر بیت......
منی ھیال ءَ باز کس ءَ اھمد اقبال ءِ ھشک ءَ گُٹ ءِ مہرگ داشتہ



@Labzank
telegram.me/Labzank

گال

منیر مومن

موجریں دردے ءِ تماھاں مـن
شینکی راڑے وت ءَ پتاھاں من

نوبت ءَ ھورکیں کاسگے گون اِنت
بیا کہ ھئیرات بووگاھاں من

تو گوں کندیلیں لنککاں گْوپت اَنت
ہنچیں وابانی پیژگاھاں من

کُلّیں ارواہ منـی تھا وپس اَنت
چـہ ھمک کبر ءَ پادکاھاں مـن

آس ءُ کُنٹگ منی کِشک ءُ ہنکین
اھد ءِ سرجم تریں گُناھاں من

اے منـی دوست ءِ مھربانی اِنت
دشمنے ءَ گـوں آشناھاں مـــن

چـو مچار ءُ منارا پاشک مکن
اچ وت ءَ چِیر بووگاھاں مـن

زھم ھر شپ منا واب ءَ گند اَنت
ھنچیں وھـدے ءِ جنگجاھاں من


@Labzank
telegram.me/Labzank

🔘 ندر پـہ ھُدا مُرزی واجهیں استاد مولانا جلال الدین شاہ بکش یاتءَ:

رپتے تو ناگهانءَ دیم په مُـدامی هنـکین
چو جمبرءَ شلانءَ دیم په مدامی هنکین

اومــان بـیت تـرا کـه دیـدار پــاکـیں ربءِ
رپتے چو شهم گرانءَ دیم په مُدامی هنکین

زنـدانی ات اے دنـیا په تو اَے مرد مـومن
سر کت وتا دمانءَ دیم په مُدامی هنکین

گـواریـت رگـام رگـامءَ دارالعـلوم ارسـاں
چه هِجرءِ مهربانءَ،دیم په مُدامی هنکین

په دیـنءِ مُستپیءَ گمواری اَت شپیکیں
گموار شت جهانءَ،دیم په مُدامی هنکین

مئے بس دوا همیش انت گوں پاکیں کردگارءَ
سربـاتے شـادمانءَ دیـم په مُـدامی هنـکیـن

جاپَر گشیت په سوزے گالاں زهیری مرچی
رپـتے تـو ناگـهانءَ دیـم پـه مُدامی هنـکین

✍ جاپَر ساچان
@Labzank
telegram.me/Labzank

☀️☀️☀️ گموار نہ بنت ☀️☀️☀️

وشّیاں نوش کن اَنت سکّی ءَ گموار نہ بنت
بیل ءُ دز بْرادرءُ سنگت گوں کس ءَ یار نہ بنت

گْوات گراں بُرزیں کلاتانی بہ پُرس اِت ھالاں
کہ گَل ءُ وژدلـیں باریگ کسی پادار نہ بنت

پہ دل ءِ ریشاں تئی شھدیں ھبر زیمیگ اَنت
چـو نزوراں بلـے سگّگ تئی گُپتار نـہ بنت

رَند چَہ مرگ ءَ منی، تئی نام دپی شرّ نہ اِنت
پمّنی یکّیں سر ءَ دل چـہ گماں بار نـہ بنت

اگاں بیگْواہ بـہ بیت واھگ ءِ نام امروز ءَ
چـہ دل ءَ کاریگیں ٹپّانی نشان گار نـہ بنت

تئی گْوشتن سر ءُ چمّان اَنت بلے چـہ بکناں
گونمن دارگ گُلیں ھمبل منی اُپّار نہ بنت

ھانل ءِ تْرانگ ءَ بـے وار کُتگ بسّ کناں
دیمتر ءَ گال منی ھمرِد ءُ کتّار نـہ بنت


✍ سید ھاشمی
کلاکوٹ ـ کراچی
۱۵ جنوری ۱۹۵۳




@Labzank
telegram.me/Labzank

علی اکبر

وتی چُکاں میارات علی اکبر پیداگ انت
شُما بَٹّاں بیار ات علی اکبر پیداگ انت


بَٹّ انگہ نہ گرستگ نارُشت تیاراں
تو دستاں بِشودی من سُپرہءَ کاراں
سالاداں ھیارے
علی اکبر پیداگ انت

پیرمحمد نیاتکہ، دُرمحمد کُجاے
لال محمد نہ گِشیت شمُا جلدی بیاے
ھمراہ انت بلارے علی اکبر پیداگ انت

بوہ گِرانءَ کیت ایں عاشق اِنت گوشتے،
راہءَ چاراں کنتی یکے ڈَنءَ اوشتے،
لالــــــوءَ بِدارے علی اکبر پیداگ انت


✍لالــــــو پیشُکانی
Besam:
@Labzank
telegram.me/Labzank

مئے نگدکار ھمے گُمان بیت کہ جج اَنت . کسے ءَ با عزت بَری کن اَنت ءُ کسے ءَ کُتہ کار ( مجرم ) قرار دی اَنت ءُ لہتین چہ اشاں ھوں دستے ھما دیم روت لہتیں مزنیں نام ھست اَنت کہ آیانی بابت ءَ اگاں تو گپّ بہ جنئے. توبہ نعوذ باللہ تو کفر ءَ داخل بئے. دمان ءَ مردم تئی کدّ ءُ بستار ءَ ترا پیشدار اَنت .
نگدکار ءِ کار کسے ءِ ایر جنگ ءُ بالا برگ نہ اِنت. بلکیں ساچشتے ءِ ھما چیریں تک ءُ پہناتانی باروا گپّ ءُ باوست کنگ اِنت .. کہ یک لس (عام) وانوکے ءِ دز رس ءَ نہ اَنت . بلئے مئے گْورا اول ساچشتکار ءَ چار اَنت کہ کے اِنت . ساچشت ءِ ساچشتی بود ءُ سنچ ءَ کس نہ چاریت. مزنیں ساچشتکارے ءِ ساچشت تری ہر وڑ بہ بیت. آ چہ دراہیناں پولنگاں پَلک شود کنگ بیت
@Labzank
telegram.me/Labzank