سما

استاد منھاج مختار

من دیریں شیشگ ءِ کلاتاں
وپتگوں پہ ایمنی
منا پہ کوہ ءُ کوچگاں
پہ سنگتاں زھیر کنت
روچ ءُ شپ جیڑگیں ھمے وڑا
چُکّی گِرّ زرتگوں وتی دل ءَ
رَوَگ کپیت
وتی دیار ءَ جنّتیں
کہ رسترانی ٹولیاں
چو دوزھی کُتہ
سِدَگ کپیت
چہ واھشانی مُچّیاں
مِڑَگ کپیت
دیریں سِستگاں چہ ٹولیاں
گُمان بیت ھمے وڑا


Besam:
@Labzank
telegram.me/Labzank

میر چاکر ء شیھکّ ءِ پسّو پہ میر گوھرام لاشاری ءَ

چہ مُلّا کمالان ءِ منّت ءَ

زیان کت گوھرام گوں وتی بَڈّ ءَ
پہ بلوچی ءِ مِنّگ ءُ سڈّ ءَ
کَدّ اِت چہ نود بندگ اَبُر بستہ
چہ نلی ءَ ءُ تنک دپیں گَٹّ ئے
تو دپ ءَ ہپتاد شائر ءِ مَٹّ ئے
نے کہ پہ دروگ ءِ بندگ ءَ گَٹّ ئے
حق اِت گوں ناحق ءِ پدا گور بات
تئی دپ ءِ چَرّوکیں زبان لِل بات
زی ھما بشّی کوکراں گورتہ
تئی سر ءَ توپانے اَبُر پرشتہ
من ہپت بر ءَ چنڈینتہ تئی بالاد
تو یکبرے ناسینتہ منی بازی
اتکگ اَنت رند ءُ بلہڑی تازی
اے ھما رند ءُ بارگیں بور اَنت
گاھے سوار اَنت ءُ گاھے پادان اَنت
گاھے ماں زین ءَ گاہ در ء زین ءَ
گاھے ماں سوتان اِنت تئی بالاد
گاھے تئی تاواناں شریداراں
گوھرام وتی پیشیگیں براں گیر آر
مئیگ ءُ وتی جنگانی پداں شر چار
پِت تئی نود بندگ مڑاھداریں
ماتو سرکن گوں زرگری سَہتاں
گوش گونا ڈانڈاری کڑولیاں
پاد گونا پادیکّاں دو کُبلیناں
بند کت منی رِنداں ھومرائیناں
شِپت اِش ماں مَلّ ءِ ھیبریں ونگ ءَ
من ترا چو سِیسیگ ءَ ڈھور دات
درکّ اِت چہ گاجان ءِ کَلات ءَ زرت
ساہ اِت ماں مولا ءِ دپ ءَ ساسارت
تیر چہ تئی شوکانی شم ءَ گوست اَنت
کس مَگِندانی نرمگیں جاھاں
جُست بکن باگی آ حسن نوتک
زینب ء کَلّوہی مزار پوتک
پیروز ءِ زھمانی اَسا گُرزیں
اِشتہ تو بوری دِکّہ یے رُمباں
دانکہ منی مولا ءِ دپ ءَ اتکئے
من ترا آہوگے نہ چِت چوشیں
زاناں ترا بیھے گَندگیں مان اِنت
نشتگ ءُ ساڑائے وتی بیلاں
ایر جنئے رِنداں ھومرائیناں
ایر جنئے سیبی ءِ ھُدابنداں
من وتی بیلانی نس ءَ زاناں
کسملیکانی آدت ءُ ھیلاں
رند نہ تتک اَنت گوں موزگی پاداں
داشتگ اَنت لُڈّوکیں جَنی اھداں
چِشّگ ءُ چَپّگ ئِے نہ پَہریزتاں
کُہہ گُرانڈانی اگربیں راستی
شیر مُرگانی داتگیں اھوال
چہ کمانی آزمودگیں بردست
ماسگ ءُ شومّیں پال بَد بیت اَنت
سَیہ زبانانی پَھر ءَ توئے دات اَنت
کوچوی زِر توسیں کھیری آں
بور اِش سول اَنت موزگ اِش دار اَنت
چابُک اِش شِزّی یکزدیں مار اَنت
مُچّ اِتنت مُلّا گوں شے کھیری آں
اتک ءُ منی پُلّیں پتّر ءَ نشت اَنت
دست اِش گوں شاھیں قادر ءَ بست اَنت
پتّر نہ زرت رِنداں شے کھیری ءِ
پُشت اِش ماں دات ءُ چادر اِش چنڈ اِت
دعا اِش منی بیلانی سر ءَ گوند اِت
شالا او رِند ءُ بارگیں بوراں
گوں سر ءُ مندیلاں مہ تَرّات اِت
شما کڑب بہ اِت گوھرام داس باتیں
چونا منی عقل چہ زانگ ءَ رپتیں
رِند گونا تازیاں ھزاریاں
ایر رِتک اَنت ماں برھنگیں ڈنّے
بور اِش گوں چِلّبُرّاں اڑاہینت اَنت
لیڑہ اِش کونڈ بند کت اَنت نیشیں
رِند رِتک اَنت گوں اسپری گواپاں
تَل تَل اِتنت چو واڑھی شاگاں
تو وتی چمّاں زاھر ءَ دیتّاں
کہ تئی دیم ءَ چو ریزوو بیتّاں
کُشت اَنت تئی جونپادیں نمک ریشّاں
شر ھیال کن او شئیر گُشیں گوھرام
شر ھیال کن دَور چو فلک گَرداں
ماں تنوبان اِنت تئی مَلّگی بالاد
تئی تنوباں غرق کن اَنت آھِرّ
دَور ترا چو جَلّکی چَکَرّین اَنت
لُنجمیں دریا اِت بہ پِرّین اَنت
ہپت زِر ءُ ہپتاد کُہہ بگوازینئے
مں پہ وتی گُھار زتک ءَ مُلّوکین ءَ
چہ ھِرات گرانیں لشکرے کاراں
پہ سَرَگ مردی چیدگے بنداں
چہ نلی ءَ پہ جاک اِت گَلّیناں
سر ڈھور بئے ماں گُجرات باگیں
یا ھما مُلکاں کہ گون پشّ اَنت
الّڑووانی شیرگ پِٹّ اَنت
چہ بروتان ءُ برنگنیں ریشّاں
دست اِت پہ دازی ژپّگ ءَ ریش بنت
چو بزّگیں شاتو ءَ زھیر نال بئے
چو کپوت ءَ کوکو کنئے پاساں
مات پرا چُکاں چُکّ پرا ماساں
کائے منی پاد ءِ موزگاں چُکّ ئے
چم جَن ءُ ڈومبانی سوالی بئے
گڑا ترا گاجی کوردپاں کِلّاں
من پرا میران ءَ نوابین ءَ
رند ءِ سردار ءَ سر نتابین ءَ
تو پما گنداوگ وفاہانی


Besam:
@Labzank
telegram.me/Labzank

دروت ءُ دراه بات اِت پلّیں باسکاں
بتل
گَرّ ءَ دو بر گَرّ ءِ نہ بیت
نود بندگ ءَ زَرّ ءِ نہ بیت !
شکاری جان منی هیال ء اے بتل ءِ پژدرانک ءُ کارمرز ایش اِنت :
گَرّ هما پوستی نادراهی اِنت کہ منی هیال ءَ گجر آئی ءَ " جُزام گوش اَنت گوں اے نادراهی ءَ مردم ءِ پوست لَپّڑ ءُ گرّ گرّ بزان زبر بیت ءُ نودبندگ هم بلوچی دپترانی چہ درستاں مستریں داددیوکے بیتگ ءُ نودبندگ ءَ بلوچی "حاتم " گوش اَنت . گڑا آ مردمی ءَ کہ گرّ ءِ نادراهی ءَ گپتگ ءُ چہ گرّ ءِ نادراهی ءَ درد کشّگ ءَ انت آئی درد ءُ نگیگی گیشتر نہ بہ انت ءُ بزان آئی ءَ پدا گرّ ءِ نادراهی نہ گر ایت ءُ چِد بدتر نہ بیت .وهدے کہ نودبندگ ءِ دست مدام پچ اِنت ءُ هچ پکیر ءُ ملنگے ءَ بے هچ نہ کنت گڑا نودبندگ هجبر پولدار ءُ مال دار نہ بیت .
کارمرز : اے بتل هما وهدی کار مرز بیت کہ مردمے بلاهین ءُ هترناکیں کارے کنت ءُ اِے دگہ مردم آئی چہ کار ءَ مکن کن اَنت گڑا کار ءِ کنوک گُش ایت ....بزان منی هال ءُ اهوال چِد گنتر نہ بیت . رئیسی 💐
کــورُشــیں گــال #
لبزانکی مجلس کلمتی کاروان.

یاتانی دپتر

بھر 55

" نادراہ ءِ نادراھی "

دود انسانیت بہ بنت یا اسلامی
بلوچیگ بہ بنت یا در کوم ئے
دودانی تہ ءَ یکے اش انت کہ میتگے ءُ بازارے ءَ
مردمے نادراہ بیت سیاد وارس میتگ ءِ مردم
ھمساھگ نادراہ ءِ چارگ ءَ رو انت
اے دود مرچاں نزور ترّ اتگ
تُشے کہ پشت کپتگ آ پہ امیت یا کہ دومی رسم
پلانی منی چارگ ءَ اتکگ من آئی کماش ءِ چارگ ءَ
رواں بزاں رسمانی بندوک انت
دین ءَ نادراہ ءِ گندوک ءُ دیداربینی چہ پنچ ھکّ ءَ
یک ھکّے گوشتگ (عیادۃ المریض) نادراہ ءِ چارگ
دومی ھساب ءِ روچ ءَ ھم واجہ ھدا چہ بندگ ءَ گلگ
کنت تو منی چارگ ءَ گندُک ءَ پرچا نیاتکگ ئے
بندگ گوش ایت واجہ ھدا من چوں تئی گندگ ءَ
نیاتکگ آں
واجہ ھدا پلانی تئی میتگءَ نادراہ بیتگ
تو چارگانی بیاتکیں ئے من ھمود ءَ ات آں
تو من ءَ دیستگ ات
ھمے چارگ ءُ گندگ ءِ تہ ءَ لھتے بدیں رسم
جوڑ بیتگ
اشاں پھریز کنگ لوٹ ایت
انسانیت ءُ اسلام ءِ رھبندانی ھلاپ انت
نادراہ ءِ چارگ ءَ بازینے روت کمرزانی بند ایت
نادراہ نشت نہ کنت
تکانسر بیت
بزگ میار کنت مھمان نشتگ انت
آ دراج بہ کش ایت ءُ تچک بہ بیت
اے پمّن ائیب ئے

دومی بزگیں نادراہ ءَ دوا ءُ درمان پہ وام بدل کنگ انت
کمرزانی جنوک چلیم چاہ ءُ شربت لھتے نان ءَ ھم نند
ایت
مگربی بلوچستان ءَ من شُت آں گوش گپت انت
انچو ھرچ نادراہ ءِ نادراھی ءِ سر ءَ ھررچ نہ بیت
اینچو کہ چاروکانی ھزمت ءَ لگّ ایت ءُ ھرچ بیت

نادراہ ءِ چارگءِ مستریں مول آئی واستءَ دراھی ءِ
دُوا انت دلبڈی انت تو زوت وش بہ ئے
نادراہ ءِ دل ڈڈ بیت آ زوت وش بیت
مرچاں گیشتر چاروک دلبڈی،کار نہ کن انت
ھمے نادراھی ءِ کسھاں کار انت
پلانی اےنادراھیءَ گور جت شھران اش بُرت
پشتنہ کپت
اے نادراھی ءَ کزا یکے پشت بہ کپ ایت
نادراہ کہ گپّاں اشکنت آ دلءَ کپ ایت
کم کم موشن ڈون بیت نادراھی گیش بوھاں بیت ئے

من ءَ شر یات انت سندھ ءِ وارسے ءَ من ءَ کال کُت
تو کجا ئے من گوشت لوگ ءَ
گوشت ئے تو بیا منی برات زتک نادراہ انت
من پلان نادراہ جاہ ءَ آں سے روچ بیت
من شُت آں نادراہ چار ات
من دیست وارس ءِ گپ چو جنینو انت
نادراہ ءِ کرّءَ ھر چاروکے کیت
آ کسھہ کنت پلانی پلانی نادراہ بیتگ انت
نادراھی ھمے بیتگ پشت نہ کپتگ انت
پلانی ھم گوشتگ مپتین زرّ ھرچ مہ کن ات
پلانی چوش گوشتگ
من نادراہ ءِ چھرگ ءِ تاسراتاں چارگ ءَ آں
من دیست چاردہ سالیں کسانین بچک دل ءَ
کپتگ ءُ کپگ انت موت ءَ چم وت گندگ انت
ءُ ناکو موت ءَ پیش ئے دارگ انت ئے
کلاکے ءَ من ھمد ءَ ات آں
منی تبیت ھمے بانپان ءِ گپّاں ھراب کتگ ات
من ڈنّ ءَ بُرت گوں ڈنّ ءِ برگ ءَ نادراہ ءِ پت
ءُ دومی ناکو رس ات انت
من دراھبات کُت انت
من گوشت پلانی ترا دگہ مردم نہ رس اتگ
یا ترا وتی چُک کُشگی انت
گوشت ئے واجہ گپ چے انت
من گپ جت انت نادراہ ءِ چارگ ءَ روچے ھپتاد
مردم کیت اے تئی شر نُگلیں برات بانپان
کسھہ کنت چوشیں نادراہ پشت نہ کپ انت
تئی چُک کہ ھبراں اش کنت
وت وش نہ بیت دل ءَ کپ ایت
شاباش کن ایشے ءَ ٹیکسی کن ملک ءَ رواں دے
چُک ءَ اد ءَ کش دگہ نادراہ جاھے ءَ بر

پتءَ منی گپ زُرت
دومی شپ ءَ من ءَ کال کُت ئے
واجہ چُک گھتر انت
من چارک ءَ کس ءَ نیلگ ءَ آں
ڈاکٹر ءَ گوشتگ دو روچ ءَ پد چُک ءَ بر لوگ ءَ
چارمی روچ ءَ من گوں نادراہ ءَ ھم گپ جت
نادراہ سھی بیتگ ات من اے کار کتگ انت
منتی گپت
واجہ تئی باز منت
من گوش سلامت بات ئے

ناکو مُرادShah bux Kalmati baloch:
Besam:
@Labzank
telegram.me/Labzank

سھب تئ وش بــات شادمان باتئے.
گوں مناں دلبر ساہءُ جـــــان باتئے

زندگیءَ تئ مھبــــتـــــــاں لوٹ آں
گون مناں شررنگ زان پہ زان باتئے.

مئیت چشیں روچے تو ببئے گســـتاء
تو منی شئرءُ کــــسھـــــــــاں باتئے.

تو پمن بیایاتے مدام دلــــــــــــــبــر
تو منی عشــقءُ مـھــــرءِ شان باتئے.

اف تئ لــــنــٹـاں من بہ چُــــکاتـاں.
مثلءِ چــو شِیــر ءُ شــکَّلاں باتئــے.

من عــزیــز استاں داں وفا دار باں.
تو پمن انـچو مــھـــــربــــان باتئے.

عزیزشادکلانچی


Besam:
@Labzank
telegram.me/Labzank

استاد منظور بسمل است بات ئے داں جہان مانیت

اے پیرزال ءَ را چے سما اِنت؟
کہ زھریں ترنداپ
نرم کنت گُٹّگان جاڑیں
موچ کنت سَیہ تلاریں جگر ءَ
درشیت مجگ ءَ مثال ء گندیم
ءُ ژند کنت بے کراریں ارواہ ءِ لہڑ ءُ جوشاں
کہ زندگی ءِ تلب ہمیش اِنت

اے پیر زال ءَ را چے سما اِنت؟
کہ کدہ ءِ زہر انگہ است اَنت
ہدا زمانگ
زمانگیں اے ہدا کہ دائم
زمانگانی ہساب ءُ دادانی مِنّہ وار اِنت
ازاب ءُ وار اِنت
روان آیان ، گران سندان
بلئے زمانگ کہ شہسوار اِنت
گوں کئے ھوار اِنت؟
کئی توار اِنت؟
کئے پکار اِنت؟
ہمے زمانگ کہ پائدار اِنت؟
ہدا ءِ کہرانی وامدار اِنت
ہدا کہ مہر اِنت
ہدا کہ بنی آدم ءِ پکار اِنت

اے پیر زال ءَرا چے سما اِنت؟
کہ روچ روزی رسیں ہدایے،
روچ آس ءُ جسیں ہدایے
اے روچ گردش کہ گلزمینانی مانزمان اِنت
ڈس ءُ نشان اِنت
مدام جِکّ اِنت
مدام مِکّ اِنت
شپے تہ سہب اِنت
سباہ بیگاہ
سِدوک ہمراہ

اے پیر زال ءَرا چے سما اِنت؟
اے سیاھیں منگڑ کہ مان رتکہ گس ءِ پترکاں
پتینک ءُ پرتک نہ منتہ ہچی
اے سَک مِریں لُولُک ءِ تب ءُ میل رستری اَنت
کافری اَنت
اے ھون چُنسیت زندگی کنت
زالمی کنت
کچین ٹپّ ءَ سچیت ہمینچو
کشان بئے در رچیت ہمینچو
بہ ریچ زہر ءَ تچیت ہمینچو
بدل کن لوگ ءَ بہ بیت ہمینچو
بلئے کجا اینچو لوگ ءُ بندر بدل کنگ بیت
نپاد ءُ بونڈُک چگل کنگ بیت
ہمے کہ منگڑ اجل کنگ بیت
یل کنگ بیت
بگش کہ ھئو سر گچل کنگ بیت

اے پیر زال ءَ را چے سما اِنت؟
کہ نشتگ شپ روچ ریسیت جَلّک
کٹیر ءُ چہر اِنت
ٹپیت ٹپّر
نزانت کہ میش ءَگرک چیلّنت
نہ مانیت پژم ءُ پٹ ءِ نشانے
نہ بیت شیر ءُ پنیر ءُ روگن
اے کہریں ڈکال ءَ کانٹ رودینتہ تول کشتہ
چیا بہ گرادیت گواز پہ مَشک ءُ اینزک ءُ زک
کپن بہ مینیت

اے پیر زال ءَ را چے سما اِنت؟
اے جنتری گردشانی نیام ءَ
رُجنت کوہیں ھیال ءُ واھگ
درشگ بنت کوگیں گمان ءُ واہش
کسے بہ پہمیت تہ جنتر ءَ اِنت
گوں پرشتگیں شاگے ءَ زِر ءَ اِنت
کسے نہ اِنت پوہ تہ رستگار اِنت
میار بار اِنت
مُج ءُ گبار اِنت
بلئے پہ زانت ءُ نزانتی
اے کور ہاریں گردش
بے اوژناگ ءَ پتار ءُ لیپگ کنان روت اِنت
جنان روت اِنت
کئے ءَ سما اِنت؟
کئے اِنت کہ واب اِنت؟
کئے ازاب اِنت؟
سما ءُ واب ءُ ازاب
ہر سئے نہ اَنت پہ وت
نہ اَنت پہ کسّ ءَ

نہ اَنت پہ کس ءَ
زمانگ ءِ چہر گردیں جنتر
زمانگ ءِ آس رشتیں بوجیگ
گراب اینژاب تیر بالیں
وکاب لہڑیں ہوس مانیت
جنان پروشان
پند بران
پیادگیں اے مساپر ءَ
رہگوزے بہ پرسیت
گدان نشینے توار پر کنت
دمے بہ ساسار
سپر بنا اِنت
ہبر بنا اِنت
دور منزل
بلئے اے آبند ءُ آپسرانی
ربیدگ ءُ دود ہمے وڑا اَنت
کسے بہ جلّیت
کسے بہ داریت
ادارکی کسہے بیاریت
سواسی تاہے بہ کنت چیرا سر ءِ بہ وپسیت
بہ جنت کمرزانی یے بہ نندیت
ہچ مہ جیڑیت
کسے دمو کہ بہ بیت بہ جنزیت
سَلا مہ چاریت
مڑا مہ پرسیت
روان دیما
تاں چم کنت کار
اے سیرکیں کپ
سیرگیں گیابان کئیت ورگ ءَ
روان ، جلان ، واب گندان
تاں بئیت منزل
ءُ کئیت منزل

گشنت دیہہ ءُ بلاہ باز اِنت
اے راہ ءُ رنداں
گشنت جِنّ ءُ ملائکانی دوار جاہ اِنت
گشنت گیبی کمک ہم بیت
بلئے اے کامپول ءُ ہڈّ انچو ڈسنت راہ ءِ
کہ آپ ءُ توشگ مہ بیت گارۓ
ناں تیر سوہان جابگ ءَ اَنت
نہ آپ ترمپے ماں کَلّی ءَ ماں
گوزان ، گندان
رم ءُ رمگ
گوتو ءُ گرازاں
تہ بیم زور اَنت
چار اَنت پشتا
نہ راہ ءِ پد است نہ راہ ءِ دیمے
بلئے ھمے جاگہ ءَ کہ سر بئے
ہدائی دستے کمک کاریت
گشئے دگہ توکلے ودی بیت
پدا دگہ سگ ءُ ہاٹی یے کئیت
سپر بنا بیت ، ہبر بنا بیت

اے پیر زال ءَ را چے سما اِنت؟
کہ جنتر ءِ نالگانی پُشت ءَ
زھیر وابیں سباہے ترکیت
سمایے ترکیت
ماہے ترکیت
جاہے ترکیت

اے پیرزال ءَ را چے سما اِنت؟
کہ شہسواریں زمانگ ءِ گم
کجا شپاد اِنت
کجام شہزادی ءِ تماہ انت؟
کہ کوہ ء کاپ اِنت ، ریکنی بیٹ،
جورکان اِنت
ءُ کسہانی مترسیں سیمرگ ءِ چُک
ھر سال وارتگ اَنت اہد ءِ سیہ مار ءَ
چہ شہسوار ءِ سگار ءِ آسیں زِہ ءَ نہ رکیت
کمک بنا بیت
ءُ شہسوار چیلکان ریسیت
ءُ بادشاہ ءِ توامیں رہنیں سپاہاں موکیت
کشیت بلاہ ءَ
ءُ کَٹّیت شہزادی ءَ تلاہیں

اے پیرزال ءَ را چے سما اِنت؟
کہ زہریں ترنداپ
گُٹّگاں نرم کنت جاڑیں
موچ کنت جگر ءَ
درشیت مجگ ءَ
ءُ شہسوار نادراہی جان کَشّے ءَ گوں وپسیت
واب گندیت
بلاہ مرتہ ، من بادشاہاں

دستونک ( خالق ارمان )

★

اے درد ءُ دوراں کرامتے گوں
پکیری پِریاتاں زیارتے گوں

منارا ہمساہگ ءَ چو چاریت
تئ مہروانی ءَ آدتے گوں

توامیں بازار ءَ دست سرایاں
اے زندگی ءَ چے کِیامتے گوں

ہمے چراگاں کہ گوات نئیلیت
ہمے چراگاں بشارتے گوں

مئے واب انگہ نہ وپساں چماں
زہیراں گریواسکیں ہَلوتے گوں

نگاہاں دیدارے ماں پتات ئِے
مئے لنٹاں بچکندے ماں جَت ئِے گوں

من روچ بلکیں نہ دیستہ ارمان
شپاں تہاری ءِ ہاجتے گوں

-----------★-----------
--------------------------

Ali Juma Zamurani
بلوچ راج ءِ گموار ءُ نیکراھیں شائر
واجہ ملا مھمد کلمتی
,,,,,,,,,,,,,,,,,,,
بلوچ راج ءِ تہءَ بازیں نیکراھی ءُ نیک ترانیں شائر بوتگ ءُ آیاں وتی شائری ءِ مارشت ءُ. ھیال نیکراھی رھبندءَ بیان کتگ اَنت ءُ گوشتگ اَنت ءُ آیاں وتی بلوچی شائری ءِ تہءَ باز جوانیں بلوچی گال آورتگ ءُ باز گال پارسی ءُ اربی ھم وتی شئیرانی تہءَ بلوچی کالب ءَ آورتگ ءُ ھور کتگ اَنت آیانی شائری ءِ تہ ءَ وانوک ءَ بلوچی بازیں لال ءُ یاکوت ءُ گوھر کیمتی اِیں گال دست کپ اِیت ءُ آیانی بازیں شئیرانی رِد ءُ بند ءُ ھیال بتل جوڑ بوتگ اَنت اے تھرءِ شائری ءِ تہءَ یک نامے واجہ ملا مھمد کلمتی اِنت کہ آ 1910ءَ ماں باگیں دشت درابول پیداگ بوتگ ءُ آئی آریپ ءُ بوھیریں کماش ءِ نام واجہ میرسلیمان کلمتی بوتگ ءُ آ چہ کلمتی ٹک سوبانزئی کٹم ءَ سیادی کن اَنت واجہ ملامھمدکلمتی ءَ نیکراھی ءُ کلام پاک ءِ وانگ ءِ باز ھُب ءُ واھگ بوتگ ءُ آئی مدام کلام پاک ونتگ واجہ ملا مھمد کلمتیءَ چہ دشت درابول ءَ گوں وتی کھول ءَ بزاں گوں برات ءُ مردماں لڈاِتگ ءُ روبرکتی بلوچستان ءَ میتگے ھست کہ نام ےءِ کلّانی اِنت آتکگ اَنت ءُ جاھمنند بوتگ اَنت ءُ پد ءَ سال 1379شمسی ءَ چہ کلانی لڈاِتگ ءُ گواتر ءَ آتکگ اَنت ءُ گواتر ءَ جاھے ھست کہ یک کوھے ءُ نام ےءِ ھَنّ ءِ کوہ اِنت ءُ ھمے کوہ سرءَ ھَنّ ءَ لوگ جاگہ بستگ ءُ جاھمنند بوتگ اَنت ,واجہ ءَ وتی زند ءَ بازیں بلوچی شئیرءُ لچہ نبشتہ کتگ ءُ آئی ءَ وتی زند ءَ اوھنگ ءِ نام ءَ وتی اولی لچھانی کتاب شنگ کتگ کہ پہ بلوچی زبان ءَ یک بے دروریں کتابے چی کتاب ءَ رند ھم واجہ ملا مھمد کلمتیءَ بازیں لچھے نبشتہ کتگ ءُ ایر اَنت ءُ لھتیں بیگواہ انت واجہ ءَ وتی زیادھیں وھد پہ نیکراھی ءُ کلام پاک ءِ وانگ ءَگوازینتگ بلے تاں گڈی وھد ءَ شائری ءِ نیمگ ءَ کمک کمک دلگوش ےءِ کتگ لچہ ءُ شئیرےءِ پر بستگ ,واجہ ملامھمد کلمتیءَ یک برے گوشتگ کہ منی آریپیں کماش واجہ میر سلیمان کلمتی ءَ شکار ءُ زمینداری ءُ کشاورزی ءِ باز شوک بوتگ وھدیکہ آئی ءَ زمینداری کتگ ءُ دشت درابول ءَ کمب ءَ آئی زمین ءُ ڈگار اَنت کہ ڈگار نام کُمب اِنت گُڑا واجہ میر سلیمان کلمتی ءَ شکارءَ کم دلگوش داتگ ءُ کشاورزی ءُ زمینداری ءَ دلگوش ےءِ کتگ ھمے پیم واجہ ملا مھمد کلمتی ءَ کلام پاک ءِ وانگ ءِ شوک ءَ شائری نیمگ ءَ کم دلگوش کتگ بلے وھدیکہ آئی چیزے دیستگ یا ماراِتگ یا وتی ڈیھ ءِ جوانیں ندارگ ءُ بلوچ راج ءِ مڑاداری ءُ مھمان جلیءُ گریبی ءُ بزگی دیستگ آئیءَ ھمے مارشت ءُ ھیال ءُ ندارگ ند ءِ شھارءَ کرتاس ءِسرءَ آورتگ اَنت ءُ نکش کتگ اَنت کہ پہ بلوچی زبانءَ بلاھیں مڈی اَنت ,
واجہ ملا مھمد کلمتی ءَ وتی زند ءِ مزنیں وھدے پہ زمینداری ءُ کشاورزی ءُ نیکراھی ءُ شائری گوازینتگ ءُ آ ھرچ پڑ ءَ سوبمند بوتگ ءُ آ یک مھربان ءُ بلوچ راج دوستیں انسانے بوتگ ءُ آئی ءَ وتی راج ءِ بزگی مدام مار اِتگ ءُ وتی لچھانی تہءَ اے درد ےءِ درشان کتگ اَنت ءُ ھوری ءُ تپاکی ءِ درونت ےءِ داتگ کہ. ھوری ءُ تپاکیءَ راج ءُ ٹک ءُ کُٹم ءُ کاروان کامیات ءُ سوبمند بنت ءُ آئی ءَ بازیں شئیرے وتی گُڈی وھد ءَ نبشتہ کتگ کہ آئی زند ءِ نمرانیں مڈی اَنت,,

بلوچ راج ءِ اے گمواریں مونس واجہ ملا مھمد کلمتی 10ستمبر2013 ءَ بیران بوتگ ءُ وتی بُنکی ھنکین ءَ شُتگ ءُ چہ آئی بیرانی ءَ ساری آئی ھمسپر ءُ چکانی مات20/4/1385شمسیءَ بیران بیت گُڑا آ وتی چُک ءُ نماسگاں وسیت کنت ءُ گوش اِیت وھدیکہ من بیران بوتاں من ءَ منی چُکانی مات ءِ مانش ءِ کش ءَ کبر کن اِت وھدیکہ واجہ ملامھمد کلمتی بیران بیت چُک ءُ نماسگ ءُ کھول ءِ مردم آئی ءَ ھمائی گُپت ءُ وسیتءِ پدءَ کلانی ءِ کبرستان ءَ آئی چُکانی مات ءِ کبر ءُ مانش ءِ کش ءَ کبر کن اَنت ءُ واجہ ملامھمد کلمتیءُ آئی ھاتونیں لوگ بانک ءِ کبر ءُ مانش ماں کلّانی کبرستان اَنت ءُ وپا ءُ مھر ءِ یک بے دروریں درورے پیش دارگ ءَ اَنت ءُ واجہ ملا مھمد کلمتی ءِ شئیرانی دپتر اوھنگ پہ راج ءَ وپا ءُ مھر ءِ ٹیکی ءُ سوگات اِنت ءُ آئی ءَ وتی راج ءَ وپا ءُ مھر ءِ درونت داتگ پاکیں ھاوند آئی ءَ گلباگ ءَ کنات آمین,,,
واجہ ملامھمد کلمتی ءِ چار مردین ءُ دو جنین چُک اَنت واجہ ءِ چک ءُ نماسگ ءُ اے دگہ کھول ءِ مردم گواتر ھَنّ ءُ کلانیءَ جاھمنند اَنت ,,
شوھاز کار,, رھمان نسار
ندکار,,, اَلی جُمّا زامرانی

بے سریں واب پَش کپ اَنت
تہنا.......!!

زندگی.....تئ شُـــھازءَ ما دراہ یل دات اَنت.ــــــ. نہ مھــروانیں ماتےءِ بھشتــیں ساھگ پش کپت ءُ ناں کہ قبلھیں پتےءِ نیکیـں دست کہ سرءِتہا بہ سماریتے........!!

تئ شُھــازءَ ما میتگ ھم یلدات.....دورءُ دریں شھـــرےءَ درامدانی ھمساھگان........ نہ ھمبلے،نہ سنگتے نہ مھـــروانے.

لھــتیں گرنچ بستگیں واب اَنت کہ پہ اشانی راست کنگءِ ھاترا ما چہ دُرستاں گــسر کپتگیں....... سی ایس ایس، پی سی اپس ءُ دگہ باریں چے چے........ما ھمے وابانی اندرءَ برے برے آزمانءَ ھم سرکپگءِ جُھدءَ کَنــیں.

ھُــدا بزانت کہ مئے واب راست بنت کہ نہ بَنت......... باریں مارا درپہ دریءِ مُز رسیت کہ نہ رسیت.....!!

ھواڈئے زندگی..........تئ ھاترءَ ما وتءَ چہ اندرءَ ھم گِسر کُتگ.........................برے برے دل گُشیت درستیں واباں کَل کن بلئے پدا جیڑاں مارا دگہ ھچ نیست ابید چہ واباں......

مَــرچی پِتءَ فون کتءُ گپ گپءَ جُستے کُت کہ "ائیــدءَ گِسءَ واتــر کن ئے"
من پہ بے ھاٹیگی درائینت ...."اناں اَبا ائیــدءَ منا چُٹی نہ رسیت"

پتءَ اے گپءِ اش کُنگءَ پَد گوں دمبُرتگیں توارےءَ منا گُشت " شـــریں منی پِت سلامت بات ئے،بلئے پہکءَ پراموش مہ کن"

اُف........ پِت گُش ئے زاناں گوں من گِلھے کنگءَ اِت ءُ من نہ اش کنگءَ اتاں............آئءَ ھمے گپاں گوں فون بند کُت......

دریگتــیں ما وتــی بے سریں واب ھاکوٹےءِ سرا چگل داتیناں ءُ کشکءَ واتر بہ کُتیں.......پرچہ کہ زندگیءِ شُھازءَ ما باز چیز پُشتءَ یل داتگ.
ــــــــــــــــــــــــــــــــــــــــــــــــــــــــــ.بالاچ قادر.

بام الّم ءَ آسیت

ـــــــــ-------------- اِسحاق خاموشؔ
بُودِشتی ئیں ورنا یک راجے ءِ باندات گُشگ بنت..... چہ کیچؔ ءَ سْیادی داروکیں سئے ورناہاں کہ بلوچستان شاہ دربرجاہ ءِ نودربر اَنت کمپیوٹر سائنس ءِ گُڈّی ءَ یک پروجیکٹے جوڈ کنگءِ گُشگ بیت گڑاآہاں چار ءُ بیچارکُت کہ آہاں چے کنگی اِنت کہ راج ءِ تب ءَ بہ کپیت ءُ نوکیں وہد ءِ لوٹ ءُ تب ءَ ہم بہ بیت ۔۔۔۔۔ مزنیں پگر ءُ حہال ءَ پد ہمے ورنا کہ میوزک ایپ یے جوڑ کنگ ءِ سَوڑگ کننت کہ آ ئی ءِ توک ءَ وتی ھند ءُ دمگی سؤت پہ ارزانی شوہازگ ءُ درگیجگ بہ بنت ءُ دومی ایش کہ ہر کسے وت وتی دوستی ئیں سوتاں ھمود ءَ ایرکُت بکنت۔ مادیستگ کہ قومءَ بازیں اڈ ءُ جنجال بوتگ پہ کہُنیں ءُ نوکیں سؤتانی شوہازگ ءَ ءُ ہما مردم ءِ کرا کہ سک باز سؤت بوتگ اَنت آہانی پہریزگ ءُ ایر کنگ ءِ ہاتر ءَ جاہے در کار بُوتگ ۔۔۔۔ گُڑا آ وتی دِلپسندیں سؤت اں تاہیر ءِ تہا گوں وتی جوڑ کُتگیں آئی ءَ ڈی ءَ ایر کُت ءُُ شِنگ ءُ تالان کُت کنت۔ تاہیر ءِ جوڈکنگ 2016 ءَ بندات ءَ بندات کنگ بُوت ءُ 2017 ءِ دومی ماہ ءِ 29 ءَ اے کار سرجم کنگ بوت ءُ مہلوک ءَسک باز دوست داشت ، ساڑات ءُ اے ورناہان ءَ دِلبڈـی دات۔مستریں گپّ ایش اِنت ہمے زُوتاں Microsoft Imagine Cupءِ تہا اے ورناہاں بَہر زُرت ءُ بلوچستان ءِ تہا اوّلی نمبر باج بُرت ءُ پدا گوں سرجمیں پاکستان لیول کمپیٹیشن ءَ سربوتنت ءُ پورہیں پاکستان ءِ یونیورسٹیانی 300 سوفوٹیئرانی تہا" تاہیر" ءَ دومی نمبر باج بُرت۔
"تاہیر" ءَ چہ ابید تاہیر ٹیم ءَ دگہ ہم ایپ جوڑ کُتگ اَنت کہ آ FAST Quiz اِنت کہ آ پہ میڈیکل ءِ نودربرانی ہاترءَ جوڑکنگ بُوتگ کہ آہاناں پیسرءَ باز اڑءُ جنجالی بوتگ ءُ ایشی ءَ چہ پد آہاں جیڑ اِتگ ۔۔۔۔۔ یکروچے چہ ہمے ورناہاں فاروق عباسؔ گوں من دُچار کپت ہمے واہگ درشان کُت کہ مئے راج ہاسکن بلوچ ورنائین نودربراں یک آن لائن لبز بلد (ڈکشنری) یے ءِ سکّ باز زلورت اِنت ۔۔۔۔ اگاں تو ما را کُمک کُت کن ئے گُڑا ما " بلوچی لبز بَلد" ءَ دُنیا ءِ دیما شِنگ ءُ تالان کن ایں آ، وہدی من یکبرے جیڑ اِتگ ات کہ اے ورنا اے کار ءَ چون کُت کننت ۔۔۔۔لہتے روچ ءَ پد فاروق ءُ اعظم من ءَ دُچار کپتنت آہانی واہگ ءُ جَوزگ چہ زیکّ ءَ گیشتر مُہکم اِتنت۔۔۔۔راج ءِ سئے پُر جوزگیں ورناہاں، فاروق عباس بلوچ،اعظم بلوچ ءُ اورنگزیب منیربلوچ ءَ چار پنچ ماہۤءِ کسانیں مُدّت ءِ تہا گوں وتی مزنین جُہد ءُ کوشست ءَ اوّلی آن لائن " بلوچی لبز بَلد " دُنیا ءِ دیما آؤرت ۔۔۔ اے اکیڈمک کار ءِ بار وتی نِزوریں کوپگاں زُرت۔۔۔منی راج ءِ اے سئے ورنائیں بامرداں چہ بلوچستان یونیورسٹی ءَ کمپیوٹر سائنس ءَ بی ایس کُتگ ءُ زِند ءِ باندات ءِ دروازگاں پہ بلوچ نودربراں نوکین کِشک شوہازگ ءِ جُہد ءَ اَنت۔
فاروق عباس، اعظم بلوچ، اورنگزیب مُنیر، شُما راج ءَ مزنیں مڈّی یے سر کُتگ ۔۔۔۔ اے نزّآرتگیں لبز منی میرا س نہ اَنت ۔۔۔۔ شُما اِشان ءَ پہ من ءَ منی راج ءِ ہاتر ءَمیراث یے جوڑ کُت۔
"بلوچی لبز بَلد" زی نیمروچ ءَ گوگل پِلے اِسٹور ءَ ایر کنگ بُوتگ تاں مرچی نیمروچ ءَ 831 مردُم ءَ ڈاؤن لوڈ کُتگ ۔۔۔۔الّم اے کِساس لکّانی حساب ءَ گْوزیت۔۔۔
دیما جُنزان بِت۔۔۔۔ باندات ءِ نوکیں کِشک ءُ در شُمئے وداریگ اَنت۔
٭٭٭

میر ھمّل ء جیّند ءُ چاکر ء اساک کولواہی

مُلّا کمالان ءِ منّت ءَ

کندھاری سیاہ ءُ بزیں نوداں
رُمب بند اِت چو ماہلیں گوراں
کے چدا روت ءُ بارت منی دروتاں
پہ مڑاھداریں کلمتی ہوتاں
ہوتانی توسیپ ءُ ستاہیگیں
کلمتیانی پُلّ ءُ شاہیگیں
ھمّل ء جیّند ءَ سلام سر کن
کہ من تئی بگّانی غماں کِجّاں
بگّ تئی سور کُمب ءَ چریت باگیں
منی تیگ نُرُنڈیت ماں سرومگیں جُتک ءَ
بور نہ وارت شاریں تورگ ءِ داناں
نوش نہ کنت کنڈی ترونگلیں آپاں
گیپت لگام ءَ گوں موزگیں نیشاں
گوں غلام چُکّ ءَ پہ نُگدھے جیڑیت
کد کدی بیت ءُ کد ھما باندات
من ھما باندات ءَ نہ گوازیناں
جَم جناں بُرّے زھرکنیں ورناہ
ھاری مَلّاں باں کَوردپے پراہیں
چہ بسول ڈاچیگاں بہ رُمبیناں
جَتّاں پہ زھم ءُ چابُک شیرازی
من وتی مصری ءَ نہ پھریزاں
جَتّی بردست ءُ ڈاچی ئیں کُپتاں
ڈاچی چہ کُپتاں ھون دی اَنت زگریں
ڈاچی پہ اوماں زنزر اَنت ھِرّاں
من پَرے ھِرّان نباں نگران
نے کہ منی ماتی ءُ پِتی مال اَنت
ناں ھید ماں چمّاں رِتکگنت سوریں
نے ترات منی پاداں پرشتگنت توسکیں
راہ دگہ باز ءُ کَندہ فراوان اِنت
مالاں چہ رُنگراھاں نہ گوازیناں
تئی کلات ءِ دیم ئِے بہ گوازیناں
دنز اش چو لاٹوری رو اَنت بُرز ءَ
چو مسکی ایر بنت ماں تئی پاگ ءَ
جھل ءَ ماں کاڑانی بزیں بیکّاں
ھمّل نہ اوشت ئے گوں لاگریں اُزرے
گر نہ اوشت ئے منی میڑو ءَ بیائے
دیم کنئے ھول ءَ گوں سر اِت چوپاں
پُشت کنئے ٹیٹان اِت بہ گاڑیناں
مَٹّ ئے منی زنگباری نکیب چُکّ ءِ
کہ پاری ماں تیس ءِ بندن اِت کُشتہ
کُشتگ ءُ دبّوج اِت کُتہ تیگ ءِ
من تئی سنج ءَ زندگ ءَ بوجاں
کاراں وتی سَیہ گوات ءِ گورئِے بنداں
میر اساک ءِ دروازگ ئِے درنجاں
چو جواب داتہ ھمّل ء جیّند
او چاکر ء کولواہی مہ جن شئیراں
دار وتی بے سیتّیں دپ ءِ پھراں
تئی سر نہ کپتہ گوں ہمسریں مٹّاں
تئی داوا بوتہ گوں چورہ ءُ جَٹّاں
گوں شپانکان ءُ کوہی بُز لَٹّاں
نوں لانک اِت بستہ پہ تیھریں گَٹّاں
تئی دپ ءَ دروگے زیادہیں بستہ
تئی سر ءَ گرانیں اُگدھے زرتہ
کہ ھمّل ءِ سنج ءَ زندگ ءَ بوج ئے
بے مِڑ ءُ داوا ءُ گلائیش ءَ
زندگ ءَ منی سنجانی برگ سکّ اِنت
کُش گڑا سنجانی برگ حق اِنت
کَول اِنت منی کاریگر ہَرنّانی
من چہ ھدا شِرّ ءُ شِدتّ لوٹاں
جُلّی منی لانک ءَ کُلکُچیت ماری
زھر ئِے ماں الماسی رَہ ءَ گواریت
منی بگّ ءَ چہ جوکجاہ ءَ رُمبین ئے
منی لاگریں جتّاں دستپَچ ءَ بِلّ ئے
جَتّ وتی ھالاں پہ منا بیاریت
من نہ داران ءُ سنج کناں سیاہ ءَ
بنداں لانک ءَ من تیگ ء گُمراہ ءَ
او نکیب کمے درک مکن سیاہ ءَ
بند ئِے ماں ھونَکّیں چِش ءِ ساہ ءَ
دئے کدیماں ماں سُہب ءُ بیگاہ ءَ
جَتّ اگاں بیاریت چاکر ءِ ڈاہ ءَ
ما ءُ چاکر پہ زانگ ءُ دُرستی
سیاہ ءَ گوں سوگات ءَ دیاں کُستی
سیاہ تَگ ءُ میدان ءَ شکاریگیں
دَور نہ کنت چیلّ ءَ وت میاریگیں
یات بکن بُن بُرّاں بُگانیگاں
ماش ءُ پرماشاں کیلّگانیاں
ساھگاں ھونَکّیں چِشانیگاں
تُتّر ءُ بینگ نیم شپانیگاں
نُکّ ئِے پُرّ اَت چہ کرگزی شیر ءَ
دَور کُتہ سوگات ءَ گنوکی ءَ
چاکر ءُ سوگات کپتگ اَنت چیلّ ءَ
دَور کُتہ ہوتیں ھمّل ءُ سیاہ ءَ
ہَپت کدم گوستہ سیاہ ھما دیما
چاکرئِے چست کت چیر ء سوگات ءَ
چاکر ءِ سر ماں ھمّل ءِ کونڈ ءَ
شرّیں وھدے کہ سار کُتہ میر ءَ
گُشتگ اَت ہوتیں ھمّل ء بیر ءَ
اگاں چیر اِت دیاں جُلّی ءَ بروکین ءَ
گِرد اِت چہ جاڑیں گُٹّگاں سندیت
آ مزن دُرّیں جَن ترا گِندیت
گِندگ ءَ ترا بُرتہ منی تیگ ءَ
چو جواب داتہ چاکر ءِ جند ءَ
ھمّل منا بے اِزّت مکن راج ءَ
ھمّل منا میری نامزَدے پَشتیں
چو مڑاھداریں ھمّل ءَ گُشتیں
زیر منی رزمیگاں تئی اُزر اَنت
بَلئے سُہبی پہ گزدان ءَ پدا بیار اِش
سُہبی پہ روچ ءِ روشنیں ٹِکّ ءَ
بیا اَنت وتی پیشیگیں چراگجاہ ءَ
اگاں نیارے اِش دنزوں پیداگ اِنت
دنز نہ اَنت ہوتیں ھمّل ءِ پاگ اِنت
دنز نہ اَنت سیاہ ءِ ھُکّہیں نال اَنت
ھمّل ءِ بگّ کہ چاکر ءَ رُپت اَنت
پہ وتی فوج ءُ لشکر ءِ بُرت اَنت
لشکر ءِ مرداں شادھے زُرتہ
گُشت اِش کہ ہوت ھمّل بَگا بیتّہ
کہ چاکر ءَ میریں بگّ رُمبینتہ
چو مڑاھداریں چاکر ءَ گُشتہ
بس کن اِت ڈیکی ھامدپیں بچّاں
او جنوزام ءُ چورہی چُکّاں
ھمّل نہ اِنت دستیگ ءُ دپی مردے
شما سیاہ نہ دیستہ گوں ھُکّہیں نالاں
ھمّل گوں میری بستگیں سنجاں

‌ترانگءِ سیکارچءٰ دلوں ھون انت
شَکّلـیں مِہر ءِ جَوریں نیمون انت

وش نیاتکانـی تُرنـدیں ٹاکوراں
دلـجماں اھوال ءِ بدیـں گون انت

مکّہـیں مات ءِ مِسکـیں دلـبنداں
کُشتگیں بَچّ ءِ بـے وسـیں جون انت

چـون نـہ بیـت زُلمانی وتـن آماچ
رَھبر انـت مُنڈ ءُ گُنگ رھـشون انت

✍قادربخش کلمتی

Besam:
@Labzank
telegram.me/Labzank

M.sh:
سید ءِ رھبند تچک اِنت !!!!!
بس وت ءَ بلوچ بہ کن اِت
زبان ءِ سرپدی ءُ زبان زانتی ءُ زبان دوستی بہ بیت ھندی ءُ دمگی گالواراں رھبند وت گیش ءُ گیوار کنت وھدیکہ ما وت ءَ بلوچ بہ کنیں .ھنچُش کہ اربانی گالواراں تپاوت ھست چوشکہ مِسر ءُ شام ءُ جزائر ءُ تونس ءُ سودان ءُ لبنان ءُ مورتانیہ ءُ لیبیا ءُ چاڈ ءُ مشکت ءُ اِراک ءُ کویت ءُ بھرین ءُ امارات ءُ سئودیہ ءُ اِدگہ ارب ھند ءُ ملک اَنت بلے رھبند یکے چے ءَ کہ نبشتہ ءِ وھد ءَ آ وت ءَ درست ارب گوش اَنت بلے وھدیکہ گپ کن اَنت ھرکس وتی ھندی ءُ دمگی گالواراں گپ کن اَنت مکرانی ءُ بگٹی ءُ سرائیکی ءُ مری سرھدیءُ اے دگہ بلوچ راج ءِ ٹک ءُ کٹم اگاں وت ءَ بلوچ گوش اَنت گُڑا آیاں درستاں یک رھبندے سر ءَ تپاک کنگ لوٹ اِیت ءُ مرچگیں وھد ءِ لوٹ ھمیش اِنت

اَلی جُمّا زامرانی

Besam:
@Labzank
telegram.me/Labzank

Saeed hout:
سلام پہ تو اے منی چُکّ
سلام پہ تو اے میانمار ئے گونڈیں دوست!

سلام پہ تو کہ روچاں تئی لیب گوں تپنگ ءَ ٳنت ءُ شپاں وپسگ ءَ مات ئے لیلوک ئے جاه ءَ ٹوپ ءُ تیرانی توار ٳنت.

أے منی دوست
وهدے کہ کہ تئی گریوگ ءُ نالگاں پلم ئے توک ءَ گند آں دل گوش ٳیت ترا کمک کن آں بلہ وهدے ‎کہ گند آں نہ بیت گڑا لبز چہ گُٹ ءَ ٳیر نہ روت.

وهدے کہ لوٹ آں پہ تو ءُ تئی ملک ءَ بہ نبیس آں کَلم گریت ءُ جوهر ئے جاه ءَ اَرس ریچ ٳیت.

شمئے ملک هونانی تہ ءَ بُڈّ ٳتگ
بلہ مئی چماں واب أنت ءُ مئی دل گوش ئے بَرپ ئے چیرا گار ٳنت.

شیتان اوشتاتگ ءُ سَیل چار ٳیت.

ما ٳے دگہ مسلمان وتی لوگاں سارتیں آپ ءُ سارتیں ساهگ ءِ چیرا واب ٳیں.

بلہ بہ زان ٳت کہ مئی دل گوں شما ٳنت ءُ مئی دُوا چہ واجہ هاوند ءَ همیش ٳنت کہ شما کامیاب بہ بہ ٳت ءُ وتی ملک ءَ پہ وشی ءُ آرامی زندگی بہ کن ٳت

ءُ ٳے دُوا ءَ هم ما لوٹ ٳیں کہ الله مئی سرجمیں مسلماناں چہ واب ءَ پاد بہ کنت ءُ دروستاں یکدل ءُ تپاک بہ کنت.

z.kk📝

Besam:
Besam:
@Labzank
telegram.me/Labzank

گال

مجید عاجز

تابتائیں کشک ، پنداں چپّی ئیں گراں ترّ اِتہ
کوہلیں تہنائی ءِ تیرے ، دل ءَ ماں ترّ اِتہ

گواڑگیں آساپے ، ہیسکاراں نہ پیڑاتہ وتی
کُنٹگیں ارسے ، شپاد ءَ کوریں چمّاں ترّ اِتہ

اے کئی ھونانی زھراپ اَنت ، ھُلُکّاں زھرگ ءَ
کَے چو ھونیگ ءَ رگ ءُ بنداں ، منی جاں ترّ اِتہ

ترّگایاں ، بچّی کبرستانے بَڈّا اِنت من ءَ
نزّ ء من ، تہ گوانزگیں کوپگ منی گراں تّر اِتہ

گوں کجام زیم ءَ بہ ساٹاں ،ٹپّ ءُ ٹوراں چورہیں
زئیپ چینچو ، کے بہ زانت ، ماتویں ایماں ترّ اِتہ

ٹُکّراں باندا چِن ءُ نزّار ، ما کہ شنگ اِتیں
مرچی بِلّ کہ ، گوں زمیں جُمبے ءَ آزماں ترّ اِتہ

رَھن بیتّہ گوں کُلاہ ءَ سر ، اے سودایے چُنیں
چہ تئی سیتّاں گسر ، مَے نگد ، تاواں ترّ اِتہ

زندگی چو کُورکیں بانجیگے گشئے ، ڈکّیت دل ءَ
پِر چَکَرّینیت ہمودا ، جنتریں ناں ترّ اِتہ

گوں کئی چمّ کُٹّیں یاتاں ، اُمر گوستہ عاجز ءِ
چہ کجام وت کُرتن ءَ ، باریں پشوماں ترّ اِتہ


Besam:
Besam:
@Labzank
telegram.me/Labzank

انگليسى يا بلوچى؟

چند وقت پيش از يك بيمارستان، در لندن ، تماسى داشتم در مورد ترجمه. وقتى فرم ترجمه ، نام بيمار و ساعت حضور براى ترجمه را برام ايميل كردند ، متوجه شدم زبان مبدأ ترجمه را بلوچى نوشته شده اند. برايم يك كمى جالب بود ، چون بلوچهاى كه اينجا زندگى مى كنند اصلا مشكل زبانى ندارند و نياز به مترجم نيست.
در ساعت تعيين شده حضور يافتم ، خانم مسنى بود سنش ٧٣ سال بود، (روى فرم تاريخ تولدش نوشته شده بود). تقريبا يك ساعت كار ترجمه طول كشيد، وقتى كار را تموم كردم ، سوالاتى از قبيل ؛ محل سکونتت کجاست ؟ و چند سال اينجا زندگى مى كنيد ؟ أهل كجا هستى و ......را از من پرسيد.
من هم پاسخ هاش را دادم. در وسط صحبت هاش متوجه شدم بيش از ٤٠ سال است كه در بريتانيا اقامت دارند ، برايم جاى سؤال بود كه با اين همه مدت اقامت ، چرا زبان را ياد نگرفته ، يك كم تو دلم تريد داشتم كه اين سوال را ازش پرسيدم يا نه ؟ چون يك سؤال كاملا شخصى بود ( ما بعنوان مترجم رسمى و حرفه اى أين حق را نداريم كه سؤالات شخصى را بپرسيم ، البته اگر طرف مقابل اجازه پرسيدن اينگونه سوالات را بدهند )
ازش اجازه خواستم و گفتم سؤالى كه ميخواهم بپرسم كاملا شخصى است ،اگر اجازه دهيد مى پرسم و اگر نه ازش صرف نظر ميكنم ، گفت: هر سؤالى دارى ، بپرس، گفتم بيش از چهار دهه است كه شما در اينجا زندگى مى كنيد ، چرا زبان انگليسى را ياد نگرفتى ؟
جوابى قانع كننده اى داد ، جوابى كه به ارزش حفظ زبان مادرى صحه گذاشت ، گفت ؛ من بچه هام تحصيل كرده و متولد اينجا هستند و حالا چندين نوه دارم ، زمانى كه بچه هام به مدرسه ميرفتند تو خونه انگليسى صحبت مى كردند، در همان اوايل متوجه شدم اگر من هم پا به پاى اينها حركت كنم بايد زبان بلوچى را بپيچم و روى طاقچه قرار دهم . از همان روز تصميم گرفتم فقط به اندازى احوال پرسى ، انگليسى ياد بگيرم و بس ، حال همه در خونه با يك ديگر به انگليسى صحبت مى كنند وقتى كه با من مى خواهند صحبت مى كنند مجبورند زبان بلوچى را بكار ببرند .
حال نه تنها بچه هام بلوچى را فراموش كردند بلكه نوه هام هم زبان بلوچى را قشنگ صحبت مى كنند. اگر من به دنبال يادگيرى زبان ميرفتم و با بچه هام به انگليسى همكلام مى شدم ، حال بايد زبان مادريم را فراموش مى كردم.
وقتى زبان فراموش بشه "فرهنگ هم فراموش خواهد شد " براى حفظ فرهنگ بايد زبان را نگه داشت ، اگر زبان نماند فرهنگ قوميت هم از دست خواهد رفت. " گفت : مهم نيست كجا و با چه مليتى زندگى مى كنيد در آخر تو بلوچ هستى بايد از "دود و ربيدگ " خود "پاسپانى" كنى ."

بايد بگم : ما هويت كمال و ريشه هاى فرهنگى بلوچى خودمان را از گنداب سرگذر پيدا نكرده ايم كه در فاضلاب فرهنگى پوسيده غوطه ورش كنيم.

عبدالغفار بهزادى کنارکی ...دانشجوی دکتری زبان انگلیسی.لندن
--------------------
انگریزی یا بلوچی ؟
چیزے وهد پیسر ماں لندن ءَ اچ نادراهجاهے ءَ پہ رجانکاری ءَ من اش لوٹ ءَ اینت . وهدے کہ
رجانک ءِ کاگد ، نادراه ءِ پجّار ءُ نادراهجاه ءِ آیگ ءِ وهد اش پہ من دیم داتگ ات اَنت من دیست زبانے کہ رجانک کنگ لوٹ ایت بلوچی زبان اِنت من کمکے هبکہ بوت آں . پرچا کہ آ بلوچانے کہ برتانیا ءَ زند گوازینگ ءَ اَنت انگریزی زبان ءَ شرّشرّ ءَ زان اَنت ءُ آ رجانکار نہ لوٹ اَنت .
واده داتگیں وهد ءُ دمان ءَ من نادراهجاه ءَ شت آں ، من زالبولے دیست کہ آئی ءِ سند۷۳ سال اَت ( کاگد ءِ توک ءَ آئی ءِ سند نبشتگ اَت ) . کساس دمانے رجانک ءِ کار ءَ وهد برت ، وهدے رجانک ءِ کار من کُٹّ اینت من ءَ اے وڑیں جست ئِے کت : کجا نشتگ ئے ؟ ءُ چینچک سال اِنت ادا زند گوازینگ ءَ ئے ؟ ءُ کجام ملک ءِ مردم ئے ءُ .....
من هم آئی ءِ پسّو دات اَنت . اچ آئی ءِ گپّاں من دربرت کہ چلّ سال اِنت ماں برتانیا ءَ زند گوازینگ ءَ اِنت ، بلے من سرکچ نہ وارت کہ پرچا گوں چلّ سال زند گوازینگ ماں برتانیا ءَ پدا هم انگریزی نہ زانت ، من دودل اتاں کہ اچ آئی ءَ اے باره ءَ جست بہ گر آں یا مہ گر آں ؟ پرچا کہ اے جست اهوتی جستے اَت ( سرکاری ءُ سوهوگریں رجانکاں اے موکل نیست انت اهوتی جست بہ کن انت البت اگاں دیم ءِ مردم موکل دنت پرواه نیست انت کہ اچ آئی ءَ اهوتی جست بہ گر انت )
اچ آئی ءَ موکلوں لوٹ ات ءُ گوشتوں من ء جستےَ هست اِنت بلے اهوتی جستے ، اگاں موکل دئے ترا جست ئِے کن آں اگناں ترا جست ئِے نہ کن آں ، گوشت ئِے : ترا هر جستے هست اِنت بہ گوش ئِے ، گوشتوں : گیشتر چہ چلّ سال اِنت کہ تو ماں برتانیا ئے بلے پدا هم انگریزی نہ زان ئے ، پرچا ؟
منّگی پسّوے دات ئِے ، هما پسّو کہ ماتی زبان ءِ بستارئِے پدرا کت . گوشت ئِے : منی چکّانی پیدائش برتانیا ءَ انت ءُ آ وانوگر اَنت ءُ انوں من ءَ بازیں چکزاتکے هست اِنت ، وهدے منی چکّ وانگ ءَ ات اَنت آیاں ماں لوگ ءَ انگریزی هبر کت ، هما وهدی من دربرت اگاں من هم آیانی گون ءَ انگریزی هبر بہ کن آں گڑا بلوچی هب

ر ءَ بہ پیچون ءُ دریگ ءَ بہ نادین آں . من هما روچی شور کت بس جوڑی ءُ ڈڈّی ءِ کساس ءَ انگریزی زبان در بہ بر آں ، انوں مئے لوگ ءِ سجهیں مردم انگریزی گپّ کن اَنت بلے وهدے کہ لوٹ انت کہ گوں من رهوت بہ کن اَنت لاچار اَنت بلوچی گپّ بہ کن اَنت .
انوں هم منی چکّاں بلوچی زبان بے هیال نہ کتگ ءُ هم منی نماسگ وشّ وشّ ءَ بلوچی گپّ کن اَنت . اگاں من انگریزی زبان دربرتگ ات ءُ گوں وتی چکّاں انگریزی زبان ءَ گپّ جتگ اَت ، گڑا من وتی ماتی زبان بے هیال کتگ اَت .
وهدے زبان شموشگ بہ بیت دود ءُ ربیدگ هم شموشگ بہ اَنت . پہ دود ءُ ربیدگ ءِ پهازگ ءَ لاچار ایں زبان ءَ بہ پهاز ایں ، اگاں زبان گار ءُ بیگواه بہ بیت دود ءُ ربیدگ ءُ کوم ءُ راج هم بیگواه بنت . " گوشت ئے : اگاں بلوچ گوں هر راجے ءَ زند بہ گوازین ایت ءُ ماں هر هند ءُ دمگے ءَ زند بہ گوازین ایت پدا هم بلوچے ءُ لاچار انت کہ وتی دود ءُ ربیدگاں بہ پهاز ایت .
اے گوشگی گپّے : ما وتی پجّار ءُ دود ءُ ربیدگی آهنڈ اچ سلّ آپ ءَ درنگیتکگ اَنت کہ پوس اتگیں دود ءُ ربیدگانی گیش آپ ءَ چگل اش بہ دئیں .
ابدالگپّار بهزادی کنرکی ... انگریزی زبان ءِ دکتری ءِ نودربر . لندن
رجانکار : سدیک رئیسی
کـورُشـیں گـال#

بـے سَر اَنت سَر کہ سَر اِش سُتکگ سَر اَنت ۔
سَراں بے سَر دَریں سردار نہ بیت ۔
سید ھاشمی



@Labzank
telegram.me/Labzank

❊❊❊ دَستونک ❊❊❊

بیا کہ تی مھر ءِ نشانے رُوک بیت
تو نیائے زندمانے رُوک بیت

تو پہ سینگارگ دل ءِ گپاں مکپ
ماھکان ءَ ماھکانے رُوک بیت

کینگ ءُ کَستانی آس ءِ ساھگ ءَ
مھر بکشیں ، مھروانے رُوک بیت

شھم کنت آجوھی ءِ رُژنے کدی ؟
گُلزمین ءُ آزمانے رُوک بیت

چو چراگ ءَ من بَلیناں اے دل ءَ
پتو منصور یک دمانے رُوک بیت

### منصور حیدر ###

★★★ دلـدار نـہ بیت ★★★

سروں بـے سار اِنـت دِلوں سار نـہ بیت
دلوں بـے سار اِنـت سروں سار نـہ بیت

اگاں چم جَہل سَتر چم جَہل اِنـت
چم پِردارے ءِ چمـدار نـہ بیت

گم چـہ گمدوست ءِ گم ءَ پْروشت گماں
کَے گْوش اِیت گَم گم ءِ گموار نـہ بیت

بےسراَنـت سرکہ سر اِش سُتکگ سر انت
سراں بـے سر دریں سردار نـہ بیت

گار ءُ گار اتیں دِل ءَ گار کُتگ
گار ءُ گار ات دو بـر گار نـہ بیت

رَد ءُ بیراہ، رَد ءُ بــے راہ اِنــت
رَد ءَ رھـدر بـر ءُ رھـدار نـہ بیت

انگریں واھگ ءِ سوگات انگر
دِل اگاں انگر اِنـت انگار نـہ بیت

گُلـگُل ءَ ارس گُل ءِ گُلریچ اَنـت
گم ءِ گُلباگ چـوں گلـزار نـہ بیت

دِل پـہ دِلـدِل دل ءَ دلـوار مـہ کن
دلـبر ءِ دِل، دِل ءِ دلـدار نـہ بیت

رَنج ءُ آزار سید ھمـــراہ اَنـــت
اِے ھم گنجے کـہ دِل آزار نـہ بیت

شمبے ۲۱/ اکتوبر ۱۹۶۱
✍سیدھاشمی



@Labzank
telegram.me/Labzank