''مرگ تئی منّتاں پرچی بزیراں مفت ءَ
دلجماں رفتگیں ارواہ پدا ساہ نہ باں،،
اے نبشتانک ئے سرنامہ ءَ چہ زاھر اِنت کہ من یک انچیں شخص ئے بارہ ءَ نبشتہ کنگ ءَ آں کہ آ مرگ ءَ وتی ارجان جتگ بلے لھتے انچیں انسان اَست آں کہ چہ مرگ ئے گار ءُ بیگواہ کنگ ءَ ھجبر گار ءُ بیگواہ نہ بنت داں جہان استیں آ زندگ ءُ نمیران اَنت منی سرا اے واجب بیت کہ زلور من اے ھستی ءِ بارہ ءَ چیزے نبشتہ بکناں تاکہ نا سرپد، سرپد بباں کہ آئی تہ ءَ چنچو خاصّیت بوتا ءُ آئی ءَ وتی میتگ ءِ باندات ءِ واست ءَ چنچو جُھد ءُ خدمت کُتگ مروچی ھمائی ئے جُھدانی بروردیں کہ مئے چم پچاں وتی نام ءِ نبشتہ کنگ زانیں مشرقی بلوچستان ئے مغربی کُنڑا بزاں گوادر ءَ تقریبا چـھل (۴۰) کلومیٹر گِست ءَ مگربی نیمگا ءُ مفربی بلوچستان ءَ چھــل کلومیٹر دور گوادر ءِ نیمگ ءَ یک جاگہ ئے اَست کہ آئی ءَ پلیری گْوش اَنت ھمے پلیری ءِ پنچ میتگ ءَ چہ ھمے میتگ آں یکّے مُلّا ملک محـمّد میتگ پلیری ءَ زانگ بیت منی موضوع ھمے میتگ ئے سرکماش ءُ مستر بزاں مُلّا ملک محمّد (ھُدامرزی) اِنت کہ چار ءُ پنچ روچ ساری اے کوڑھیں دگنیا یلہ دات ئی ءُ شُت چند سال ءَ پیش پلیری یک انچیں جاگہ ئے بوتگ کہ اُود ءَ وانندگیں مردم باز کمّ بوتا، وانندہ پہ ھسابی بوتگاں آ ھم قرآن شریف ئے سیاھی ئے وانگ زانتگ ئے ءُ بس! دگہ نبشہ کنگ ءُ کتاب ئے وانگ چُشیں ھساب ءُ کتاب نہ زانتگ ئے اگاں زانتگ گُڑا ھمے یکّیں واجہ مُلّا(ھُدامُرزی) گوں دگہ دو سئے نفر ءَ باقی ھر کس ءَ چو مرچیگیں وڑا پہ وت ءَُ دیم نہ زانتگ، آ زمانگ ءَ نامہ ئے، خط ئے یا قبض ئے نبشتہ کنگی یا وانگی بوت ءَ گُڑا ہمے واجہ ( ھُدامرزی) مرہون ءِ منّت بوت ءَ آ زمانگ ءَ (ھدامرزی) ءَ بازار ئے چُکّاں دینی تعلیم ہم داتگ، بازار ئے نکاح، نماز ئے جنازہ ءُ وتی میتگ ءِ پیش امام ئے زمّہ واری دراہ ھمے مرد ءِ گردن ءَ بوتگ اے یک قومی خدمت ئے بوتگ کہ واجہ ءَ پہ مردماں کُتگ، چر ایشی ءَ ابید دگہ چُشیں مردم ئے نہ بوتگ کہ اے کاراں انجام بدنت، مُلّا ملک محمد (ھدامرزی) سماجی ءُ زباندوستی ءَ ابید موسم زانتی ءُ ھوا شناسی ءَ ہم مشہور بوت ءَ، سماجی پڑا ہم واجہ ءَ وتی فرض ایمانداری ءِ سرا ادا کُتگ وھدے مئے میتگ ءَ وانگجاہ ئے منظوری دیگ بوتگ گُڑا آ وھد اسکول ءِ واست ءَ کوٹی (بلڑنگ ) نہ بوت ءَ ھُدامرزی ءَ وتی زاتی لوگ ءِ پہ وانگجاہ واست ءَ وقف کُتگ،من وت ہمے اسکول ءَ چہ وانگ بُنگیج کُتگ دو سئے سال ءَ چکّاں ہمے لوگ ءِ تہا علم در بُرتگ من ءَ یات اِنت وھدے ماسٹر پہ کاری ءَ بزانکہ اسکول ئے کاری ءَ یا وتی زاتی کاری ءَ گوادر ءَ یا دگہ جاگہہ ئے شُتگ گُڑا آ روچ ءَ مئے اسکول ءَ چھٹّی نہ بوتگ مُلا (ھدامرزی) وت اتکگ کلاس گپتگ وھدے شپ ءَ ھور بوت ءَ گڑا سُھب ءَ مکتبی وانگ ءَ نہ یتکگ آں آ روچ ءَ مُلّا ( ھدامرزی) لوگ پہ لوگ ءَ ترّاِتگ چُکّ یکجاہ کُتگ آں سُھب ءِ بدل ءَ بیگہ ءَ کلاس ایر کُتگ مروچی کئے چُش کنت مروچی نا بلکہ ھما زمانگ ءَ ھم دگہ کس ءَ انچو نہ کُتگ، مُلّا (ھُدامرزی) زبان دوست ءُ ادیب ایں مردم ءِ بوتگ آئی ءَ گوں بلوچی زبان ءَ مزنیں ھُبّ ءُ واھگ ءِ بوتگ بلوچی زبان ءَ کلاسیکل شاعری ئے ھم کُتگ آئی ءِ شئیرانی دفتر ''تـــــرونگـــل،، بلوچستان ئے کُنڑ کُنڑ ءَ شِنگ ءُ تالان بیتگ مُلّا ءَ بلوچی زبان ءِ بازیں کلاسیکل شاعر ونتگ ءُ در دربرتگ چوش کہ، مُلّا ابابگر، عبداللہ پیشنی، مُلّا فازل ءُ گُل خان نصیر و ھمے پیم ءَ دگہ باز شاعر! شاعری ءَ ابید مُلّا ءَ تاریخ دانی ءَ ھم مزنیں دز رس ئے بوتگ تاریخ بلوچستان، تاریخ سندھ ءُ ھند و دگہ مُلک ءُ قومانی تاریخ ءَ سہیگ ءُ سرپد بوتگ پرچ ءَ کہ ھر تاریخ ءِ بارہ ءَ آئی ءَ ونتگ ءُ مطالعہ کُتگ، مُلا ءَ وتی قوم ءِ شجرہ ءِ بارہ ءَ ہم بازیں علم ءِ بوتگ آئی ءَ بازیں گاریں قوم در گیتکگ ءُ داتگ اَنت، شجروئے سلسلہ ءَ چہ ایــــران، ســندھ، کراچی ءُ دگہ بازیں ھلک ءُ دمگاں مردم واجہ ءِ پتّرا اَتکگ ءُ سوب مند بوتگ ءُ شُتگاں اے کُلّیں چیزاں ابید مُلّا ہوا شناسی ءُ استار شناسی ءَ ماہر بوتگ اے فیلڑ ءِ تہا آئی ءِ مزنیں نام ئے بوتگ مئے مکران بِلٹ ءَ ھور ءُ ھارانی یک محدودیں مدّت ءِ ھست کہ ہمے واجہ ءَ درانی صورت ءَ تشخـیص داتگ اَنت، خاصّیں اِسـتارانی کپگ ءُ درآیگ ءِ وھد ءُ پاس ءَ ھم شرّی سر ءَ پوہ ءُ سرپد بوتگ دنز ءُ دوھپانی و دگہ موسم ئی چست ءُ ایرانی بابت ءَ مزنیں علم ءِ داشت ءَ بوتگی، چُشیں ہستی مرچیگیں دور ءَ باز کمّ اِنت کہ آئی زانت ئے کدح ءَ ھر وڑیں مڑّی ءَ سر ریچ بہ بیت ما مزنیں خوش قسمت بوتگیں کہ خدا ءَ مارا چُشیں ہستی ئے دات ءَ بوت ءَ مئے وتی جرند ءِ نزوری ءُ بدقسمتی بیتگ کہ ما آئی ءَ چہ ھچّ وڑیں علم ءِ حاصل نہ کُتگ مردم چہ دُور ءَ اَتکگاں واجہ ئے گْورا وڑ وڑیں علم ءُ فاھدہ چِست کُتگ اِت، ما وت ءَ چہ واجہ ءَ دُور ءُ گِـستا داشتگ، واجہ ھُدا ءَ مارا ھرچ وڑیں گنــج داتگ بلے ما آھانی استفادہ کنگ نہ زان

تگ مروچی مُلّا ھُدامرزی مئے درمیان ءَ موجود نہ اِنت بلے آئی ھزمت، محنت ضلور مارا گِندگ ءَ کاینت،
من یکبرے کہ گارباں امروز ءِ رنگانی تہا
رندا کُجا دنیا من ءَ ارزانی شوھاز کنت
واجہ ھُدا مُلّا ءَ جنّت الفردوس نصیب بکنات ءُ آئی آئی پُشپداں صبر ءُ تحمّل ءِ ھاٹیگ بدنت،
گُلیں وانوکاں من ءَ پھل کن اِت کہ من چُشیں نبشتہ کار ءِ نیاں بلکہ اے نبشتانک تہا کمّی گیشی بوت ءَ بلے منی دل اِنت کہ ھچ پیم تاھیر نہ گپت تاکہ من ھمے نبشتانک نبشتہ نہ کُت
دل ءَ بلّیں کہ دل ءَ روک بیت ھزار چراگ
📋جے ایچ پلیری 📋

@Labzank
telegram.me/Labzank

کتاب ءُ کتاب ءِ وانگ ماں مئے چاگرد ءَ ما بائد وشبھت ءُ وشھال بہ بہ ایں کہ اے کتاب ءِ وانگ ءَ ماں مئے دود ءُ ربیئت ءِ تھا نارک جتگ ءُ اے نارک رو در رو مستر بیان اِنت ءُ مردماں ھم گوں وانگیاں ھیل کتگ پہ چی ءَ کہ اے کار چہ ھما بنگیج ءَ مھترانی کار بیتگ ءُ اے کار اِش ھم پہ وتی راج ءُ مھلوک باز سپارش کتگ کہ اے دود اللہ ءِ پاک ءُ مھربان ءَ پہ ند " کلم " ءَ کہ وانگی گوں ھمائی ءَ نبشتہ کنگ بیت سوگند ئَے یات کتگ.

دود ءُ ربیئتے کہ مئے دُریں نبی ءِ ھدائی دادے چہ آئی برزیں زات ءَ پہ ارس رس اتگ اے وت کتاب ءِ بستار ءَ برز بارت انت بلے کسے کہ بزانت ءُ وتی چک ءُ چکزاتک ءَ پہ کتاب ءِ وانگ ءَ شون بہ دنت.

کتاب انسان ءِ زانت ءُ زانشت ءَ برز بارت ءُ چہ انسان ءَ ھما چیز جوڑ کنت کہ آئی ءِ جایگاہ بہ بیت، بلے ھر چیز ءَ ھد ءُ ھسابے ھست انت چی ءَ کہ اللہ تعالی گیشین ءَ وت نہ من ایت.

اگاں واھگیں اے بہ بیت کہ ماں وتی چاگرد ءَ سرپد ءُ آجو زند گوازین ایں الم بائدیں کتاب ءَ پہ دگہ چمے بہ چاریں، کتاب ءِ کدر ءُ کیمت ءَ ھما کس زانت کہ مدام کاری گوں ند ءَ انت، اگاں ھمے سسائیں بہ بیت الم ماں آ چاگرد ءَ مردم دیمروئی کنت.

ما ءُ شما پھک زان ایں کہ کتاب انسان ءَ وڑ وڑیں سرپدی یے دنت ءُ واک ئَے ھم سوبین کنت ءُ ھمے پگر ءُ سسا ءَ ماں وتی زھگاں سرپدی بہ دئیں کہ اے راہ انچوشیں راھے کہ انسان ءِ ھوش ءَ برز بارت ءُ تچکیں راہ چہ چوٹیں راہ مارا پیش دار ایت.

ھارون اخلاقی#
کورشیں گال #
لبزانکی مجلس کلمتی کاروان.

------- کسہ رمیزاں گپتگَنت ---------

واب ءَ کہ اَسپے زین بیت
پیڑاں رکابیں دیدگاں
اہدانی تابے پَرّ رِچیت
سکّی ءِ دیمپان ءَ کُجا
براتے گوں اوشتیت مرکب ءَ
نازانی ہاتونیں جَنے
نوشیت زگریں وشیاں
سالے گوں کرناں مٹّ بیت
دَور ءُ زمان ہمراہ نہ بنت
پیر ءُ کماشیں زندگی
گپّ ءُ کمرزانی نہ اِنت
سَیلی ءُ دیوانی نہ اِنت
لُنٹانی ہورکیں دامن ءَ
لبزانی مانا رِتکگَنت
لیگاریں زند ءِ کوڑو ءَ
کِسہ رمیزان گپتگَنت

عبدالخالق ارمان



Besam:
@Labzank
telegram.me/Labzank

اگاں پیگمبرے بہ بیت نازل
بکنت تئی سرءَ مِھنت
ھزار ءُ دوسد سال ءَ
چو فرعون ءُ ابولہب پیم ءَ
تی شرّی دروگے
تو شیتان آپ وارتگ
نوں تو کُتگ ھیل ءُ عادت
دو تل ءُ دو پوستی
پلینڈی
دو دیمی آدینک پیم ءَ
تو بیتگے ھر دیوان ءَ زاھر
تو شیتان آپ وارتگ
تئی شرّی دروگے
تو آدینک ءِ بکن دیم ءَ
بچار تئی رنگ بَر گَشتگ
تئی ماں صورت ءَ
انسانی ڈول ءُ داب
ھِچ نہ بیت گِندگ
تئی کار ءُ کار پداں مرچاں
جمبری پُٹّ ئے نہ گواھیت
سمین پہ ما آس گوار ایت
وش کَوش دنز ءُ لوڑ کار ایت
تئی شرّی دروگے
تو شیتان آپ وارتگ
تو شیتان آپ وارتگ

✍ قادربخش کلمتی

Besam:
@Labzank
telegram.me/Labzank

(آزمانک,,سریچگ،،غنی پرواز)

آ..... دُرستی وَ گیشتر اِتنت، بلے آئی ءَ وتی ھواری ءَ بس پنچ منّ اِت ءُ وتا مستریں برات گُشت-ءُ ھرسھب ……تاکلاکےءَ انچیں دیوان کت، گشئےزاناں بادشاہےکہ دربار برجم دارگ ءَ اِنت-وت سکّیں بُرزیں تلّویےءِ سرءَگالی یے پچے کنائینت، آئی ءِسرءَ ٹوھیں بالشتےایرئِے کنائینت ءُ گوں آئی ءَ تِکہ ئِے دات ءُ پہ بے کِماری نشت-وھدے کہ آدگہ دُرست زمینءِ سر ءَ پچیں تگرد ءِ سر ءَ پہ بزّگی نشت اَنت-
آوت جنگلءِبادشاہ اَت، کہ وتا ,,شیرخان،، ئِے گشت-ءُ ھرچی دل ئِے لوٹیت، کت ئِے، بلےآ دگرئے وتی کسترپادلکیہت اَنت، نیم نام کت اَنت ءُ دل ءِ مئیل ءَ رنگارنگیں حکم دات اَنت-
"بشک! مرچی تو دار ءَ مرو...،،
"شیزّک! مرچی تو شکارءَبرو..،،
"گزّک! مرچی تو ناہ ءِ روچگ ءَ برو...،،
"جمُکّ! مرچی تو ڈگار ءِ کِشگ ءَ برو...،،
"روزُک! مرچی تو کنوربکن …،،
"سارُک!مرچی توسوت بجن....،،
گُلک! مرچی تو منی پاداں بہ پِرنچ ……،،
ھرسھب …ھمےرنگیں حکم ئِے دات-ءُ وت شُت ءُ بوپ ءِ سرءَ وپت ءُ پادئِے پرنچائینت اَنت- ءُ بیگاہءَ …برےابل ءِ ھمرائیءَ پہ سئیل ءُ سواد ءَ کوہءَشت، ءُ برےنبُلءِ ھمرائیءَ پہ گْواتءِ ورگ ءَکور ءَ شت- آئی ءَ حکم... بس یک رندےجُمّکءَپہ اگوتی پروشت-گڑا آئی ءَ ھم.... بُستریں کوہءِٹُلّ ءَ بُرت ءُ تیلانک دات-آدگہ ھبرےکہ آئی ءِ نسیب شرّاَت ءُ آچہ مَرگءَ رکّئیتءُنوکیں زندے بنائِےکت-
جُمّک ءِ ردی، سزا ءُ نوکیں زند ءِ بابتءَآدگراں چرائی ءَ جست ءُ پُرس کنگ لوٹ انت، بلے آئی ءِ حکم ھمیش اَت کہ کس چمّن اےبِابتءَ ھچ پئیمیں جست ءُ پرس کت نہ کنت- ءُ اگں کسےءَچشیں گُستاکی کت گڑا آئی ءِھیر نہ بیت-
بس یکرندےایوک ءَ گُلک ءَ پادانی پِرنچگ ءِ نیامءَنرم نرم ءَ پہ دوستی.... اےگُستاکی کت-
"منی ھُدابُند! اگں یکےتراجُمکّ ءِ بابتءَجست بکنت، گڑا آئی ءِ سزا چے بیت؟،،
"آئی ءِ سزا ترْندبیت،، آئی ءَ ھم نرم نرم ءَ پہ دوستی پسّہ دات-
"آئی ءَ ھم بُستریں کوہءِٹُلّءَ تیلانک دئے نا؟،،
آئی ءَ وشّیں رنگےءَچارت ءُ بچکندت-
"گڑاچےکنئے؟ آئی ءَ انگہ وشتریں رنگےءَچارت ءُ بچکندت-
"من آئی ءِسرءَ …انچوپروشاں کہ آئی ءِ ساہ دربئیت،، آئی ءَ ھم وشتریں رنگےءَچارت ءُ بچکندت-
"آئی ءِ سرءَچے جنئے ءُ پْروشئے؟ آئی ءَ پہ داب …جان کشّ اِت ءُ جست کت-
"آئی ءِ سرءَ …اےآسنی بمبوءَ جنان ءُ پرْوشاں،، آئی ءَ اولی رندءَپہ ترْندی زھرگپت ءُ گشت- ءُ وتی کش ءَ ایریں آسنی بمبو آئی ءَ پیش داشت-
گلُک …زاناں چرائیءِزھرگرگءَ، کمّےدل دل کہربوت، کہ گوں سارُک ءَ آئی ءِ گِلّہےکت ءُ ھبر ھبرءِسرا پہ نادلگوشی …آئی ءِ گُڈی ھبرءِرازےپاشک کت-سارک ءَ پہ اھوت سابُک ھال دات-سابک ءَ روزک ھال دات-ءُ روزُک ءَ باریں چونیا شُت ءُ گزّک ھال دات-
گزّک …بنداتءَوَ لپرزگءَلگّت، بلےکم کمءَوتی دل ڈڈ کت ءُ ھیالءَلگّت کہ چشیں لپرزگ …تاکدینءَ؟ ءُ پدا …شت ءُ آدگہ براتےھم ھال دات اَنت-
یک شپے …کہ سئیناں شَوریک کت.... ءُ شپ ءِ وھدے جاہ جت، گڑا آسنی بمبو.... آئی ءِ جند ءَ ماں سرءِتاسُک ءَ
Besam:
@Labzank
telegram.me/Labzank

#_نور_خانءِیات

#شازُل_شئے_کوھی

حال حوال اگست 4, 2017 بلوچی

شئے کوھی

ہئو زندگی ھما کہ پہ تئی واھگءَ مِر انت
پہ آہاں بدوفا انت تئی ساھگانی رنگ

مرچی روچءِ تاریخءُ واقعہءَ من دلا برتگ پرچہ کہ مئے شہرءُ میتگءَ ھمروچ جونانی امبار پیداک انت, چونءَ من جمعہءِ روچءَ شُتگ آں پتءِ ادیرہءَ حاضری داتگءُ نورخانءِ ادیرہ ھم دعا کرتگ آئی سرا گلابءِ ھشکیں پلان شانک داتگ آں, اے جمعہ منی روگ پمشکہ نہ بوت من یک شمبےءَ پیروکءِ لوگءَ جیونی اتکگ آں, من مرچی سہبءِ سرا موبائل پچ کرت چار ات کہ میران رند ءِ پروفائلءَ نور خان ءِ عکس ایر انت من انگت خیال نہ کت, پرچہ کہ میران رند ءِ پروفائلءِعکس ھمروچ بدل بیت, برے یک سنگتے عکسے ایر کنت برے یک زبان زانتءِ برے زھگیں, پدا من چار ات چندن ساچ ءِ نبشتانکءَ گوں نورءِ عکسءَ شئہر کتگ, من نون زانت آں کہ مرچی گُڑا نورءِ رپتگءِ روچ انت, چندن ءِ نبشتگءِ وتی یک جتائے دروشمے من وانت منءَ نورءِ ترانگءَ دور دات.
نور پسنیءِ چراگ بوتگ آ وتی زندءُ اِزمءِ مٹ وت بوتگ.

تئی مہرءِ دگہ تہرےءُ شہرءِ دگہ دوداں
بیا دوست گْورا کن تو کنڈیگ بہ کن مارا

نور خان وھدے وتی پتءِ ادیرہءَ بیاتیں ماں کُل کسانے جنک بچک آئی پشتہ ِشنگءَ بوت ایں, آئی مئے سرا ِٹکیءُ ٹافی شانکءَ دات. پدا مئے گوماں چوگانءِ صوتءَ جتے مارا گُشت ئے شما چُش چوگان بہ کن ات, آخراءَ منءَ توارے کُت گُشت تئی نام شازُل نہ انت تو منی شانتلے ترا پت نیست منءَ پت نیست من تو دوئیں براتءُ گہار آں, آ مدام کہ بیاتئں واپسیءَ منءَ گُشتے برو شانتل پمن آپ بیار, من کہ آپءَ کاورت آئی دستءَ منی سرا ایرءَ کرت گُشت ئے..

"ھے ھدا اے چوراں ماتوئی براتے بہ دئیں” منی واستہ آئیءَ ھمک دہ روپے گون ات, آئی ھر آھگءِ وتی جتائیں رنگے آت, آ مہرءِ ھستی ات, آ سکیں وش تبیں مردمے ات آمردمءَ یکے وھدءَ انچو کندینت مردم چہ کندگءَ دمءَ بُرت, آ گوں کسانءَ کسان گوں مزنءَ مزن آ ھر پڑءَ وتی مٹ وت ات, آ وھدءَ اے گپءَ ما سرپد نہ ات آں , آئی ھمک گپ ھمیش ات بلوچ شُمے راج انت بلوچی شُمے زبان انت بلوچستان شُمے لوگ انت اشانی قدرءَ بہ کن ات, گُشے پیدائشی نیشنلسٹ ئے بوتگ, وانگ بہ بیت لیبءُ گوازی بہ بیت, سازءُزیمل یاقوم پرستی آ بے مٹ بوتگ اے حسابءَ,وھدے کہ آ سازءُ زیملءِ نیمگءَ گامءَ ایرءَ کنت آئیءَ سنگت مجبور کن انت کہ تو نوارے بہ کن.

واھگے دادے بہ دئے
مہرءِ سوگاتے بہ دئے

گُڑا اے نوار کہ کیت ھر مردم مجبور بیت اشیءِ گوش دارگءَ,
ما کہ وھدے وتی دوتکان سیر بہ کنائینت ایں گُڑا ما چاپءَ اوشات ایں ھمے شئر ایرءَ کت

زیمر زیمر چاپ جنکاں
ماپر ماپر گواپ جنکاں

بس شئر ھچ ختم مہ بوتیں ما داں سوب چاپ بہ کت ایں,
آئی نوارءِ ھر شئرءِ ساز چہ دومی شئرءِ سازءِ رنگءَ جتہ اتاں, آئی ھر نوارءِ آواز ساز چہ دومی نوارءِ جتہ اتاں

پرے حالءَ گُلءِ یارا کنءَ انت
آ دردانی شریک دارا کنءَ انت

گُش انت کہ گُشندہ چہ محفلءَ زانگ بیتءُ شائر چہ کتابءَ
وھدے کہ نورخان محفلءَ شئرءِ گُشگءَ کیت آ ھر مردمءَ چار ایت ھماآنی تبءَ ءُ رنگءَ شئر گُش ایت ھر مردمءِ دلءِ رنگءَ سرپد بیت آہاں قدر دنت, یکے وھدءَ مردمان دلگوش کنگءَ انت یکے وھدءَ چاپءَ کنتءُ گوں چاپ والاں گندیت, یکے وھدءَ فریدءَ چاریتءُ گوں ڈول والا تران کنت, سکیں جینیسے مردمے بوتگ,

آئی سر آوازءَ(چاربند)یک رواجے ایر کرت
شہرءِ ھر شررنگءَ بکشائے دلءَ
چو وَ قاضی تئی گریبی گار بیت

ھر شئرءَ کہ پیسرءَگُشتگ, آئیءَ دوارگ گوں دیگہ رنگےءَ گُش ایت, تو ھمے گمان کن ئے کہ من اشی ھُشک اتگ, بلے شئر ھما انت, بلےاشیءِ رنگ گیشتر انت ترا گیشتر دوست بیت,

دوستءُ وتی ساہ آ نیکےنام منءَ
بو کُش بلے مُپتا مہ کن بنام منءَ

آ محفلاں ترندیں شئرءَ چہ ناکوفیض پد گیشتر مشہور کنگءِ رواجءَ داشت.

انچو مہ کن بے سار منءَ
انچو مہ کن بے سار منءَ

آئی شائری ھم وش بوتگ بلے دیانءَ گیشتر وتی زیملءِ نیمگہ داتگ آ یک جوانین شائرے ھم بوتگ,

شائری چہ ھوش ءُ سُدءُ سارءَ بالاانت
ھروڑیں شئیر ے ماگُشتگ بےسما گُشتگ

آ اردوءِ شئر ھم گُشتگ آئی شائری ھم کُتگ
چہرے بدل گئے ہیں رشتے بدل گئے ہیں
کیا کیا بدل گیا ہے کیسے بدل گئے ہیں

آئی بالاد ھمروچ رودان ات آئی فنءَ یک مقامے دات بلوچستاءِ تہءَ
اناگہ یکے روچے موسم مُج بوت بدیں حالے آتک

نور پیچان من تئی پُرسءِ پتّرءَ
گوں سروزءُ زیمرءُ چنگءَ رواں

کہ نورخان دوشی بیران بوتگ.
بلے من ھمے گپ آں انگت سرپد نہ آں کہ چون بیران بوت,

آئی مہرءِ وتئی رنگے ات شازُل

مہروانیں تنگویں براتے ات پمن

شئے_کوھیShah bux Kalmati baloch:
Besam:
@Labzank
telegram.me/Labzank

بلوچی زُبان ءِ دیم روی ءِ ھاتر ءَ پنجگور ءِ معتصم قاضی ءَ کہ مروچاں امریکہ ءَ جامنند انت، یک کسانیں جُھدے بِنا کُتگ۔ پہ بلوچی ءِ یک آن لائن ڈکشنری ویبسائیٹے (www.balochidictionary.com) اڈ کُتگ کہ اے بلوچی گالانی مانا ءُ بِزانتاں گوں آسانیں وڑے ءَ شوھاز کنگ ءِ ھاتر ءَ کارمرد بیت کنت۔

چہ شُما دَزبندی اِنت کہ اے ویبسائیٹ ءِ بابت ءَ وتی دوست ءُ ھمبلاں سرپد بِہ کن اِت داں کہ گیشاں چہ گیش مردُم چہ ایشی پائِدگ چِست بِہ کن اَنت۔ وھدے کہ گیشاں چہ گیش مردُم اے ویبسائیٹ ءَ چار اَنت، آہاں سرپدی رس اِیت کہ ویبسائیٹ ءِ نِزوری چے اَنت ءُ آھان ءَ چے ڈول ھلاس کنگ بِیت۔
Besam:
@Labzank
telegram.me/Labzank

دستونک.
کئے درگهی الله بزانت.
الله سَهی الله بزانت.

تو جنّتی گوں کُرتِناں.
من دوزهی الله بزانت.

باز واجهی بے واجهی.
وت واجهی الله بزانت.

هئیرءُ سواب انت یا گناه.
مئے آگهی الله بزانت.

بے سمبهگ... بے دروریں.
آ سمبهی الله بزانت.

بالاد نزوریں چو کواٹ.
بار لیڑهی الله بزانت.

آدم، هوا هر دو پشل...
دان گَلّهی الله بزانت.
شاه نور کلمتی

(لیڑهی/لیڑو... سمبهی/سمبهیت...)
Besam:
@Labzank
telegram.me/Labzank

دستونک...
من مهرءِ روکیں انگت آسءَ نہ گوْستگاں.
تئی شهرءِ دمکاں مثلِ شُناسءَ نہ گوْستگاں.

تئی مهراں هَنچیں کُنٹگءِ پاداںَ جتگ منی.
هَشت پاس کُتگ اوُ هَشتءِ کلاسءَ نہ گوْستگاں.

بَچ رُستگ انت ستر چہ پِتءَ انگہ کستر انت.
ماهیں جنک چہ مَکّهیں ماسءَ نہ گوْستگاں.

اجگیں نِهال واهگءِ تئی باگءِ دامُنءَ...
دهکانءِ تیزءُ نوک دپیں داسءَ نہ گوْستگاں.

شاه نورءِ مَرگءِ اِلّتءَ لڑّیں ما کئی سرا؟
تئی دیدگانی تیر کہ وتاسءَ نہ گوْستگاں.

شاه نور کلمتی
Besam:
@Labzank
telegram.me/Labzank

(آزمانک,, آسءُپیشّ،، بَرکھا بلوچ)
"چُکّ ءِ سجّہیں نیکی ءُ ھزمت مات ءِ یک شپے ءِ جد وابی ءِ ھمسنکی کت نہ کن اَنت،،
تاجُل وتی استاد ءِ وانینتگیں دَروَنتاں دلءَآران لوگ ءِ نیمگ ءَ روان اَت-نیمروچ ٹاک اَت-بڈّ ءِ کتاب ءُ وانگی آئی ءَ اُشتری بارے سمابیگ ءَ اَت اَنت آدنیگہ چہ وتی لوگ ءَ دیرءُگِستا اَت کہ بُوھے ءَ آئی ءِ شُد ءِ آس دمینگ بندات کت-
"اۃووں ……یکّےماھیگ پچگ اِنت ……چوشیں وشّیں بُو …،،
تاجُل وتی ھُورکیں لاپءَ لتاران، بُوگران وتی لوگ ءِ کنِکّ ءَ رس اِت، بُونزیک تِرآتک، بزاں اےپچوکیں ماھیگانی بوچہ آیانی وتی چُلّءَ بجُگ ءُ تالان بیگءَاَت- آئی ءَ رسگءَبانءِ دروازگ دپءَوتی بگل جول ایرگیتک ءُ تْرانج بست پہ چُلّ ءَ-
"اَمَّلی چہ ماھیگ اَنت؟،،
"وئے تاجل جان تواتکگ ئے! بچّ مرچی گورپچگءَیاں، تو کمے آ کَشتِرءَبئے ندرآں، پنکل لَھڑ اَنت،،
مات میزّان میزان ءَ ھُژّاری ءَ یک یک بوٹی یے اَلکار ءَ کنان آئی ءَ سرپدکنگ ءَ ات،
"تواَنّی بروڈنّءَدم کں، روچءَترا سُھرترّینتگ بچار! من ماھیگاں بْریج آں ترا ءُ تئی پتءَ سبارگ دیاں، شرّ ایں؟!،،
"زیت کن امّلی منءَسکّ شُدءَ گِتگ، بیایک ٹُکّرےمن الکار ءَ کن آں تو دست ءَ دیرکن-،،
آئی ءَ اِشتاپیءَھامگیں ماھیگ ٹُکرّے چست کت-
"توابّابِلّ! پنکل لھڑاَنت تْرینزُک بنت ماراسوچ ئےکمبہ مہ کن......،،
ماتءَھبر دنیگہ دپءَاَت کہ تاجل ءَ ماھیگ الکارتوکءَچگل دات، کپگءَگوں لھڑیں پَنکلاں چِیژّگ کت ءُ تْرینزُک تْرینزک بیت اَنت الکارتوکءَآسے جمبلاسْک بیت، تاجل ماتءَ جت جَبِیرّگے،
"الّا ……ابوّڑے ماتی ……،،
تاجل پھک ابکّہ بوت، ٹیلگ ئِے درآتک اَنت،نہ زانگ ءَ ات کہ چےبیتگ ءُ من چےبہ کناں- روک روک ءَ مات ئِےچاراِت- وھدےکہ آئی ءَ وتی مات اُپّ ءُ آہ ءَ دیّت کہ سریگ ءَ دم پہ سھت وتی چم ءُ دیماں لتارگ ءَ ات گڑا زانت ئِےکہ پنچاں جتگ، آدلاپ بیت، دْرھگ ءُ ھید ھارےءَ آئی سرجمیں بالاد دملّان کت-
"امّاں …امّلی تراچی بوت؟،، آئی ءَ گوں ھشک شتگیں گُٹ ءُ رُتکگیں دیمےمات پُرس اِت-
"آلّڑی دے.... اُودہ ……منی دیم....،، آئی ءِ گالوار چہ سوچک ءُ سوزمانءَ میچل ات-
"چےگپّے …چےبیتگ گُل ستا؟،، تاجل ءَ وتی پت کنورجاہءَ پُترگءَ دیّت دُزّی دزّیءَ درشُت-
آئی پتءَگُل ستاءِدست گِتّ بان ءَ بُرت- آئی لنٹ لرزگ ءَ اَت اَنت-
"یاھُدا! ……جَنےگل ستا! تراچے بیت، من پَردگےنہ تُستگ نہ کپتگاں گوں تئی جَبِیرّگءَ....،،
تاجل ءِ بلُکّ ھم تْرپونزاں وران ھمانگو شُت-
آئی ءِ دیم گرمیں پنکلاں بے وڑی سوتکگ اَت-دیم ءِ کپّے آبلو ءُ تْرامبل بوت-پنکلانی تْرینزُک راستیں چم ءِ توک ءَ شُتگ اَنت-
آیاں بازدرمان دارگ ءُ الاج کت، ترامبل دراہ بیت اَنت بلے گُل ستا ءِ دیم بڈول بوت ءُ راستیں چم پھک کور بوت-
سالےکپّے نہ گْوستگ ات کہ تاجل ءِ پت ءَ مزنیں مھر ءُ مالے دات ءُ پیرنداد ءِ کستریں جنکّ ءِ گوما سیرءُسانگ کت-
Besam:
@Labzank
telegram.me/Labzank

*دستونک*
یکّے اچ مناں سِستگ، چہ ترا جُتا یکّے.
دُرسْ یک هِسابایاں، هرکسی هُدا یکّے.

هرکسی وتی پگرءُ... هرکسی وتی سسّا.
کنت مارا توّابءُ ڑوک جنت ترا یکّے...

مرچی دَزبِگر مارا، ایوکیءِ بازارءَ.
باندا بلکیں دزگِپتیں، مارا تئی وڑا یکّے.

هانیءُ تئی هانگُل، مَہنو منی ماهو..
مارا هنچو دوستءِ تو، دوست بیت ترا یکّے.

ناز تئی ستا کرز انت، هو بلے منی بانُک.
دربگیج آں تئی پئیم ایں،،، دلبرءِ کُجا یکّے.

مرچی من تئی مهرانی لوٹ داشتہ باندا تو...
مئے دلءَ بِہ سمبال کہ پروشی تئی دلءَ یکّے.

هچ دلءَ مکن شاه نور، تو جهانءِ راهبنداں.
درد یکّے بکشیتءُ،،، دارؤءُ دوا یکّے.

*"شاه نور کلمتی"*
Besam:
@Labzank
telegram.me/Labzank

دستونک

چونیں رازے کِسھانی کِسّھے پدّر نہ بیت.
مئے نِگاھاں جلوهانی کِسّھے پدّر نہ بیت.

شے مرید کارستے چونیں داگ پردار اِیت وتءَ.
هر دمان نال اِیت هانی کِسّھے پدّر نہ بیت.

پدّریں اچ مئے نگاهاں گْوستءِ مهرانی بهشت.
تئی گم ءِ هو! دوزهانی کسّھے پدّر نہ بیت.

زندگ ایں یا مُرتگ ایں یا نیم مَرگ ایں کس نزانت.
ُسُهبءُ بیگاه... رولهانی کِسّھے پدّر نہ بیت.

پْروشتگ انت مئے ند سگاریں اهدءِ نوں زوراکیاں.
نالاں شانتُل باگچهانی کِسّھے پدّر نہ بیت.

شاه نور کلمتی
Besam:
@Labzank
telegram.me/Labzank

نشہ انت چرس ءُ شراب انت وت ءَ بہ سمبال اِت

زمانہ باز ھراب انت وت ءَ بہ سمبال اِت


ھمک جوان بدیں آدتانی آماچ انت
اِدا نی زند ازاب انت وت ءَ بہ سمبال ات


تئ یاتاں بستگ ءُ ژانگ مرچی ناچ ءَ ساڑی اَنت
کہ زِرد ءَ چنگ ءُ رباب انت وت ءَ بہ سمبال ات
Besam:
@Labzank
telegram.me/Labzank


روان انت منزل ءَ گرندان ءَ آ دِگہ دنیا
مئے راج انگت ءَ واب انت وت ءَ بہ سمبال ات


نہ انت کسہ ے گونڈیں اے زندگی درویش
اے درد ءُ رنج ءِ کتاب انت وت ءَ بہ سمبال ات

✍••___درویش___••

سما

استاد منھاج مختار

من دیریں شیشگ ءِ کلاتاں
وپتگوں پہ ایمنی
منا پہ کوہ ءُ کوچگاں
پہ سنگتاں زھیر کنت
روچ ءُ شپ جیڑگیں ھمے وڑا
چُکّی گِرّ زرتگوں وتی دل ءَ
رَوَگ کپیت
وتی دیار ءَ جنّتیں
کہ رسترانی ٹولیاں
چو دوزھی کُتہ
سِدَگ کپیت
چہ واھشانی مُچّیاں
مِڑَگ کپیت
دیریں سِستگاں چہ ٹولیاں
گُمان بیت ھمے وڑا


Besam:
@Labzank
telegram.me/Labzank

میر چاکر ء شیھکّ ءِ پسّو پہ میر گوھرام لاشاری ءَ

چہ مُلّا کمالان ءِ منّت ءَ

زیان کت گوھرام گوں وتی بَڈّ ءَ
پہ بلوچی ءِ مِنّگ ءُ سڈّ ءَ
کَدّ اِت چہ نود بندگ اَبُر بستہ
چہ نلی ءَ ءُ تنک دپیں گَٹّ ئے
تو دپ ءَ ہپتاد شائر ءِ مَٹّ ئے
نے کہ پہ دروگ ءِ بندگ ءَ گَٹّ ئے
حق اِت گوں ناحق ءِ پدا گور بات
تئی دپ ءِ چَرّوکیں زبان لِل بات
زی ھما بشّی کوکراں گورتہ
تئی سر ءَ توپانے اَبُر پرشتہ
من ہپت بر ءَ چنڈینتہ تئی بالاد
تو یکبرے ناسینتہ منی بازی
اتکگ اَنت رند ءُ بلہڑی تازی
اے ھما رند ءُ بارگیں بور اَنت
گاھے سوار اَنت ءُ گاھے پادان اَنت
گاھے ماں زین ءَ گاہ در ء زین ءَ
گاھے ماں سوتان اِنت تئی بالاد
گاھے تئی تاواناں شریداراں
گوھرام وتی پیشیگیں براں گیر آر
مئیگ ءُ وتی جنگانی پداں شر چار
پِت تئی نود بندگ مڑاھداریں
ماتو سرکن گوں زرگری سَہتاں
گوش گونا ڈانڈاری کڑولیاں
پاد گونا پادیکّاں دو کُبلیناں
بند کت منی رِنداں ھومرائیناں
شِپت اِش ماں مَلّ ءِ ھیبریں ونگ ءَ
من ترا چو سِیسیگ ءَ ڈھور دات
درکّ اِت چہ گاجان ءِ کَلات ءَ زرت
ساہ اِت ماں مولا ءِ دپ ءَ ساسارت
تیر چہ تئی شوکانی شم ءَ گوست اَنت
کس مَگِندانی نرمگیں جاھاں
جُست بکن باگی آ حسن نوتک
زینب ء کَلّوہی مزار پوتک
پیروز ءِ زھمانی اَسا گُرزیں
اِشتہ تو بوری دِکّہ یے رُمباں
دانکہ منی مولا ءِ دپ ءَ اتکئے
من ترا آہوگے نہ چِت چوشیں
زاناں ترا بیھے گَندگیں مان اِنت
نشتگ ءُ ساڑائے وتی بیلاں
ایر جنئے رِنداں ھومرائیناں
ایر جنئے سیبی ءِ ھُدابنداں
من وتی بیلانی نس ءَ زاناں
کسملیکانی آدت ءُ ھیلاں
رند نہ تتک اَنت گوں موزگی پاداں
داشتگ اَنت لُڈّوکیں جَنی اھداں
چِشّگ ءُ چَپّگ ئِے نہ پَہریزتاں
کُہہ گُرانڈانی اگربیں راستی
شیر مُرگانی داتگیں اھوال
چہ کمانی آزمودگیں بردست
ماسگ ءُ شومّیں پال بَد بیت اَنت
سَیہ زبانانی پَھر ءَ توئے دات اَنت
کوچوی زِر توسیں کھیری آں
بور اِش سول اَنت موزگ اِش دار اَنت
چابُک اِش شِزّی یکزدیں مار اَنت
مُچّ اِتنت مُلّا گوں شے کھیری آں
اتک ءُ منی پُلّیں پتّر ءَ نشت اَنت
دست اِش گوں شاھیں قادر ءَ بست اَنت
پتّر نہ زرت رِنداں شے کھیری ءِ
پُشت اِش ماں دات ءُ چادر اِش چنڈ اِت
دعا اِش منی بیلانی سر ءَ گوند اِت
شالا او رِند ءُ بارگیں بوراں
گوں سر ءُ مندیلاں مہ تَرّات اِت
شما کڑب بہ اِت گوھرام داس باتیں
چونا منی عقل چہ زانگ ءَ رپتیں
رِند گونا تازیاں ھزاریاں
ایر رِتک اَنت ماں برھنگیں ڈنّے
بور اِش گوں چِلّبُرّاں اڑاہینت اَنت
لیڑہ اِش کونڈ بند کت اَنت نیشیں
رِند رِتک اَنت گوں اسپری گواپاں
تَل تَل اِتنت چو واڑھی شاگاں
تو وتی چمّاں زاھر ءَ دیتّاں
کہ تئی دیم ءَ چو ریزوو بیتّاں
کُشت اَنت تئی جونپادیں نمک ریشّاں
شر ھیال کن او شئیر گُشیں گوھرام
شر ھیال کن دَور چو فلک گَرداں
ماں تنوبان اِنت تئی مَلّگی بالاد
تئی تنوباں غرق کن اَنت آھِرّ
دَور ترا چو جَلّکی چَکَرّین اَنت
لُنجمیں دریا اِت بہ پِرّین اَنت
ہپت زِر ءُ ہپتاد کُہہ بگوازینئے
مں پہ وتی گُھار زتک ءَ مُلّوکین ءَ
چہ ھِرات گرانیں لشکرے کاراں
پہ سَرَگ مردی چیدگے بنداں
چہ نلی ءَ پہ جاک اِت گَلّیناں
سر ڈھور بئے ماں گُجرات باگیں
یا ھما مُلکاں کہ گون پشّ اَنت
الّڑووانی شیرگ پِٹّ اَنت
چہ بروتان ءُ برنگنیں ریشّاں
دست اِت پہ دازی ژپّگ ءَ ریش بنت
چو بزّگیں شاتو ءَ زھیر نال بئے
چو کپوت ءَ کوکو کنئے پاساں
مات پرا چُکاں چُکّ پرا ماساں
کائے منی پاد ءِ موزگاں چُکّ ئے
چم جَن ءُ ڈومبانی سوالی بئے
گڑا ترا گاجی کوردپاں کِلّاں
من پرا میران ءَ نوابین ءَ
رند ءِ سردار ءَ سر نتابین ءَ
تو پما گنداوگ وفاہانی


Besam:
@Labzank
telegram.me/Labzank

دروت ءُ دراه بات اِت پلّیں باسکاں
بتل
گَرّ ءَ دو بر گَرّ ءِ نہ بیت
نود بندگ ءَ زَرّ ءِ نہ بیت !
شکاری جان منی هیال ء اے بتل ءِ پژدرانک ءُ کارمرز ایش اِنت :
گَرّ هما پوستی نادراهی اِنت کہ منی هیال ءَ گجر آئی ءَ " جُزام گوش اَنت گوں اے نادراهی ءَ مردم ءِ پوست لَپّڑ ءُ گرّ گرّ بزان زبر بیت ءُ نودبندگ هم بلوچی دپترانی چہ درستاں مستریں داددیوکے بیتگ ءُ نودبندگ ءَ بلوچی "حاتم " گوش اَنت . گڑا آ مردمی ءَ کہ گرّ ءِ نادراهی ءَ گپتگ ءُ چہ گرّ ءِ نادراهی ءَ درد کشّگ ءَ انت آئی درد ءُ نگیگی گیشتر نہ بہ انت ءُ بزان آئی ءَ پدا گرّ ءِ نادراهی نہ گر ایت ءُ چِد بدتر نہ بیت .وهدے کہ نودبندگ ءِ دست مدام پچ اِنت ءُ هچ پکیر ءُ ملنگے ءَ بے هچ نہ کنت گڑا نودبندگ هجبر پولدار ءُ مال دار نہ بیت .
کارمرز : اے بتل هما وهدی کار مرز بیت کہ مردمے بلاهین ءُ هترناکیں کارے کنت ءُ اِے دگہ مردم آئی چہ کار ءَ مکن کن اَنت گڑا کار ءِ کنوک گُش ایت ....بزان منی هال ءُ اهوال چِد گنتر نہ بیت . رئیسی 💐
کــورُشــیں گــال #
لبزانکی مجلس کلمتی کاروان.

یاتانی دپتر

بھر 55

" نادراہ ءِ نادراھی "

دود انسانیت بہ بنت یا اسلامی
بلوچیگ بہ بنت یا در کوم ئے
دودانی تہ ءَ یکے اش انت کہ میتگے ءُ بازارے ءَ
مردمے نادراہ بیت سیاد وارس میتگ ءِ مردم
ھمساھگ نادراہ ءِ چارگ ءَ رو انت
اے دود مرچاں نزور ترّ اتگ
تُشے کہ پشت کپتگ آ پہ امیت یا کہ دومی رسم
پلانی منی چارگ ءَ اتکگ من آئی کماش ءِ چارگ ءَ
رواں بزاں رسمانی بندوک انت
دین ءَ نادراہ ءِ گندوک ءُ دیداربینی چہ پنچ ھکّ ءَ
یک ھکّے گوشتگ (عیادۃ المریض) نادراہ ءِ چارگ
دومی ھساب ءِ روچ ءَ ھم واجہ ھدا چہ بندگ ءَ گلگ
کنت تو منی چارگ ءَ گندُک ءَ پرچا نیاتکگ ئے
بندگ گوش ایت واجہ ھدا من چوں تئی گندگ ءَ
نیاتکگ آں
واجہ ھدا پلانی تئی میتگءَ نادراہ بیتگ
تو چارگانی بیاتکیں ئے من ھمود ءَ ات آں
تو من ءَ دیستگ ات
ھمے چارگ ءُ گندگ ءِ تہ ءَ لھتے بدیں رسم
جوڑ بیتگ
اشاں پھریز کنگ لوٹ ایت
انسانیت ءُ اسلام ءِ رھبندانی ھلاپ انت
نادراہ ءِ چارگ ءَ بازینے روت کمرزانی بند ایت
نادراہ نشت نہ کنت
تکانسر بیت
بزگ میار کنت مھمان نشتگ انت
آ دراج بہ کش ایت ءُ تچک بہ بیت
اے پمّن ائیب ئے

دومی بزگیں نادراہ ءَ دوا ءُ درمان پہ وام بدل کنگ انت
کمرزانی جنوک چلیم چاہ ءُ شربت لھتے نان ءَ ھم نند
ایت
مگربی بلوچستان ءَ من شُت آں گوش گپت انت
انچو ھرچ نادراہ ءِ نادراھی ءِ سر ءَ ھررچ نہ بیت
اینچو کہ چاروکانی ھزمت ءَ لگّ ایت ءُ ھرچ بیت

نادراہ ءِ چارگءِ مستریں مول آئی واستءَ دراھی ءِ
دُوا انت دلبڈی انت تو زوت وش بہ ئے
نادراہ ءِ دل ڈڈ بیت آ زوت وش بیت
مرچاں گیشتر چاروک دلبڈی،کار نہ کن انت
ھمے نادراھی ءِ کسھاں کار انت
پلانی اےنادراھیءَ گور جت شھران اش بُرت
پشتنہ کپت
اے نادراھی ءَ کزا یکے پشت بہ کپ ایت
نادراہ کہ گپّاں اشکنت آ دلءَ کپ ایت
کم کم موشن ڈون بیت نادراھی گیش بوھاں بیت ئے

من ءَ شر یات انت سندھ ءِ وارسے ءَ من ءَ کال کُت
تو کجا ئے من گوشت لوگ ءَ
گوشت ئے تو بیا منی برات زتک نادراہ انت
من پلان نادراہ جاہ ءَ آں سے روچ بیت
من شُت آں نادراہ چار ات
من دیست وارس ءِ گپ چو جنینو انت
نادراہ ءِ کرّءَ ھر چاروکے کیت
آ کسھہ کنت پلانی پلانی نادراہ بیتگ انت
نادراھی ھمے بیتگ پشت نہ کپتگ انت
پلانی ھم گوشتگ مپتین زرّ ھرچ مہ کن ات
پلانی چوش گوشتگ
من نادراہ ءِ چھرگ ءِ تاسراتاں چارگ ءَ آں
من دیست چاردہ سالیں کسانین بچک دل ءَ
کپتگ ءُ کپگ انت موت ءَ چم وت گندگ انت
ءُ ناکو موت ءَ پیش ئے دارگ انت ئے
کلاکے ءَ من ھمد ءَ ات آں
منی تبیت ھمے بانپان ءِ گپّاں ھراب کتگ ات
من ڈنّ ءَ بُرت گوں ڈنّ ءِ برگ ءَ نادراہ ءِ پت
ءُ دومی ناکو رس ات انت
من دراھبات کُت انت
من گوشت پلانی ترا دگہ مردم نہ رس اتگ
یا ترا وتی چُک کُشگی انت
گوشت ئے واجہ گپ چے انت
من گپ جت انت نادراہ ءِ چارگ ءَ روچے ھپتاد
مردم کیت اے تئی شر نُگلیں برات بانپان
کسھہ کنت چوشیں نادراہ پشت نہ کپ انت
تئی چُک کہ ھبراں اش کنت
وت وش نہ بیت دل ءَ کپ ایت
شاباش کن ایشے ءَ ٹیکسی کن ملک ءَ رواں دے
چُک ءَ اد ءَ کش دگہ نادراہ جاھے ءَ بر

پتءَ منی گپ زُرت
دومی شپ ءَ من ءَ کال کُت ئے
واجہ چُک گھتر انت
من چارک ءَ کس ءَ نیلگ ءَ آں
ڈاکٹر ءَ گوشتگ دو روچ ءَ پد چُک ءَ بر لوگ ءَ
چارمی روچ ءَ من گوں نادراہ ءَ ھم گپ جت
نادراہ سھی بیتگ ات من اے کار کتگ انت
منتی گپت
واجہ تئی باز منت
من گوش سلامت بات ئے

ناکو مُرادShah bux Kalmati baloch:
Besam:
@Labzank
telegram.me/Labzank

سھب تئ وش بــات شادمان باتئے.
گوں مناں دلبر ساہءُ جـــــان باتئے

زندگیءَ تئ مھبــــتـــــــاں لوٹ آں
گون مناں شررنگ زان پہ زان باتئے.

مئیت چشیں روچے تو ببئے گســـتاء
تو منی شئرءُ کــــسھـــــــــاں باتئے.

تو پمن بیایاتے مدام دلــــــــــــــبــر
تو منی عشــقءُ مـھــــرءِ شان باتئے.

اف تئ لــــنــٹـاں من بہ چُــــکاتـاں.
مثلءِ چــو شِیــر ءُ شــکَّلاں باتئــے.

من عــزیــز استاں داں وفا دار باں.
تو پمن انـچو مــھـــــربــــان باتئے.

عزیزشادکلانچی


Besam:
@Labzank
telegram.me/Labzank

استاد منظور بسمل است بات ئے داں جہان مانیت

اے پیرزال ءَ را چے سما اِنت؟
کہ زھریں ترنداپ
نرم کنت گُٹّگان جاڑیں
موچ کنت سَیہ تلاریں جگر ءَ
درشیت مجگ ءَ مثال ء گندیم
ءُ ژند کنت بے کراریں ارواہ ءِ لہڑ ءُ جوشاں
کہ زندگی ءِ تلب ہمیش اِنت

اے پیر زال ءَ را چے سما اِنت؟
کہ کدہ ءِ زہر انگہ است اَنت
ہدا زمانگ
زمانگیں اے ہدا کہ دائم
زمانگانی ہساب ءُ دادانی مِنّہ وار اِنت
ازاب ءُ وار اِنت
روان آیان ، گران سندان
بلئے زمانگ کہ شہسوار اِنت
گوں کئے ھوار اِنت؟
کئی توار اِنت؟
کئے پکار اِنت؟
ہمے زمانگ کہ پائدار اِنت؟
ہدا ءِ کہرانی وامدار اِنت
ہدا کہ مہر اِنت
ہدا کہ بنی آدم ءِ پکار اِنت

اے پیر زال ءَرا چے سما اِنت؟
کہ روچ روزی رسیں ہدایے،
روچ آس ءُ جسیں ہدایے
اے روچ گردش کہ گلزمینانی مانزمان اِنت
ڈس ءُ نشان اِنت
مدام جِکّ اِنت
مدام مِکّ اِنت
شپے تہ سہب اِنت
سباہ بیگاہ
سِدوک ہمراہ

اے پیر زال ءَرا چے سما اِنت؟
اے سیاھیں منگڑ کہ مان رتکہ گس ءِ پترکاں
پتینک ءُ پرتک نہ منتہ ہچی
اے سَک مِریں لُولُک ءِ تب ءُ میل رستری اَنت
کافری اَنت
اے ھون چُنسیت زندگی کنت
زالمی کنت
کچین ٹپّ ءَ سچیت ہمینچو
کشان بئے در رچیت ہمینچو
بہ ریچ زہر ءَ تچیت ہمینچو
بدل کن لوگ ءَ بہ بیت ہمینچو
بلئے کجا اینچو لوگ ءُ بندر بدل کنگ بیت
نپاد ءُ بونڈُک چگل کنگ بیت
ہمے کہ منگڑ اجل کنگ بیت
یل کنگ بیت
بگش کہ ھئو سر گچل کنگ بیت

اے پیر زال ءَ را چے سما اِنت؟
کہ نشتگ شپ روچ ریسیت جَلّک
کٹیر ءُ چہر اِنت
ٹپیت ٹپّر
نزانت کہ میش ءَگرک چیلّنت
نہ مانیت پژم ءُ پٹ ءِ نشانے
نہ بیت شیر ءُ پنیر ءُ روگن
اے کہریں ڈکال ءَ کانٹ رودینتہ تول کشتہ
چیا بہ گرادیت گواز پہ مَشک ءُ اینزک ءُ زک
کپن بہ مینیت

اے پیر زال ءَ را چے سما اِنت؟
اے جنتری گردشانی نیام ءَ
رُجنت کوہیں ھیال ءُ واھگ
درشگ بنت کوگیں گمان ءُ واہش
کسے بہ پہمیت تہ جنتر ءَ اِنت
گوں پرشتگیں شاگے ءَ زِر ءَ اِنت
کسے نہ اِنت پوہ تہ رستگار اِنت
میار بار اِنت
مُج ءُ گبار اِنت
بلئے پہ زانت ءُ نزانتی
اے کور ہاریں گردش
بے اوژناگ ءَ پتار ءُ لیپگ کنان روت اِنت
جنان روت اِنت
کئے ءَ سما اِنت؟
کئے اِنت کہ واب اِنت؟
کئے ازاب اِنت؟
سما ءُ واب ءُ ازاب
ہر سئے نہ اَنت پہ وت
نہ اَنت پہ کسّ ءَ

نہ اَنت پہ کس ءَ
زمانگ ءِ چہر گردیں جنتر
زمانگ ءِ آس رشتیں بوجیگ
گراب اینژاب تیر بالیں
وکاب لہڑیں ہوس مانیت
جنان پروشان
پند بران
پیادگیں اے مساپر ءَ
رہگوزے بہ پرسیت
گدان نشینے توار پر کنت
دمے بہ ساسار
سپر بنا اِنت
ہبر بنا اِنت
دور منزل
بلئے اے آبند ءُ آپسرانی
ربیدگ ءُ دود ہمے وڑا اَنت
کسے بہ جلّیت
کسے بہ داریت
ادارکی کسہے بیاریت
سواسی تاہے بہ کنت چیرا سر ءِ بہ وپسیت
بہ جنت کمرزانی یے بہ نندیت
ہچ مہ جیڑیت
کسے دمو کہ بہ بیت بہ جنزیت
سَلا مہ چاریت
مڑا مہ پرسیت
روان دیما
تاں چم کنت کار
اے سیرکیں کپ
سیرگیں گیابان کئیت ورگ ءَ
روان ، جلان ، واب گندان
تاں بئیت منزل
ءُ کئیت منزل

گشنت دیہہ ءُ بلاہ باز اِنت
اے راہ ءُ رنداں
گشنت جِنّ ءُ ملائکانی دوار جاہ اِنت
گشنت گیبی کمک ہم بیت
بلئے اے کامپول ءُ ہڈّ انچو ڈسنت راہ ءِ
کہ آپ ءُ توشگ مہ بیت گارۓ
ناں تیر سوہان جابگ ءَ اَنت
نہ آپ ترمپے ماں کَلّی ءَ ماں
گوزان ، گندان
رم ءُ رمگ
گوتو ءُ گرازاں
تہ بیم زور اَنت
چار اَنت پشتا
نہ راہ ءِ پد است نہ راہ ءِ دیمے
بلئے ھمے جاگہ ءَ کہ سر بئے
ہدائی دستے کمک کاریت
گشئے دگہ توکلے ودی بیت
پدا دگہ سگ ءُ ہاٹی یے کئیت
سپر بنا بیت ، ہبر بنا بیت

اے پیر زال ءَ را چے سما اِنت؟
کہ جنتر ءِ نالگانی پُشت ءَ
زھیر وابیں سباہے ترکیت
سمایے ترکیت
ماہے ترکیت
جاہے ترکیت

اے پیرزال ءَ را چے سما اِنت؟
کہ شہسواریں زمانگ ءِ گم
کجا شپاد اِنت
کجام شہزادی ءِ تماہ انت؟
کہ کوہ ء کاپ اِنت ، ریکنی بیٹ،
جورکان اِنت
ءُ کسہانی مترسیں سیمرگ ءِ چُک
ھر سال وارتگ اَنت اہد ءِ سیہ مار ءَ
چہ شہسوار ءِ سگار ءِ آسیں زِہ ءَ نہ رکیت
کمک بنا بیت
ءُ شہسوار چیلکان ریسیت
ءُ بادشاہ ءِ توامیں رہنیں سپاہاں موکیت
کشیت بلاہ ءَ
ءُ کَٹّیت شہزادی ءَ تلاہیں

اے پیرزال ءَ را چے سما اِنت؟
کہ زہریں ترنداپ
گُٹّگاں نرم کنت جاڑیں
موچ کنت جگر ءَ
درشیت مجگ ءَ
ءُ شہسوار نادراہی جان کَشّے ءَ گوں وپسیت
واب گندیت
بلاہ مرتہ ، من بادشاہاں