آزمانک :
کمک
آزمانکار:
زاھدہ رئیس راجی

مات ءَ مدامی رنگ ءَ کمپان ءِ ڈنی نیمگ ءِ دروازگ کبل جتگ ات کہ چوش مہ بیت ھمسائیگیں زیبل بے در ءِ ٹکگ ءَ گبُرتگ ءَ لوگ ءِ تہ ءَ بَہ پُترایت۔برات یلان ءَ سُہبی کارءَ درکپگ ءِ وھد ءَ چَہ مات ءَ جُست کُتگ ات کہ پری گُل ءِ جان باریں وش انت یادوشی ھم نگیگ بیتگ ءُ مات زینب ءَ وتی دل ءِ سرءَ دَہ من ءِ سنگے ایر کُتگ ات ءُ دروگ بستگ ات کہ دوشی گیگ بیتگ ءُ پاس ئِے نہ جتگ اَت ۔یلان ءِ دل ءَ ات کہ گہارءِ اوتاگ ءَ سربہ جنت بلے مات ءَ گپانی توک ءَ انچوش مان گیشینت کہ آئ ءَ دست ءِ گڑیال چارات کہ بے وھد بَیگ ءِ جار پرینتگ ءَ ات ءُ چَہ لوگ ءَ دیم پہ کارگس ءَ درکپتگ۔پری گُل ھم وتی یکیں برات ءِ توار ءَ چَہ وتی اوتاگ )کوٹی ( ءِ تک ءَ داتگیں درءِ پُشت ءَ اِشکُنگ ءَ ات ءُ دلءَ جیڑگ ءَ ات کہ نوں من وتی برات ءَ ھم دیست نہ کن آں ۔آئ ءِ اسپیتیں پوست نوں سیاہ تراتگ اَت ءُ سیاہ زردوئیگ ءِ نادراھی ءَ نوں انچوش زور جتگ ات کہ روچے دوسے رندءَ ھون شانگ ءَ ات۔ ھون شانگ ءَ رند جان ءَ انچوزیکت ئِے ھم مان نیست ات کہ وتی تھت ءِ کش ءَ ایریں آپ ءِ بوتل ءَ وت چست بہ کنت ءُ آپ وارت بہ کنت۔ پہ ناکامی مات ءِ ودار ءَ نشت ءُ سرئِے سرجاہ ءِ سرءَ تچک کُت۔آ ھیران ات کہ سرکاری نزیکیں نادراھ جاہ ءَ سرجمیں کورس ءِ سُچّن جنگ ءَ رند ھم آئ ءِ دردءَ درمان نہ رس اتگ ات ۔ پیسرءَ تپ ءَ یل نہ داتگ ات ءُ ھرچے کہ وارتگ ات اوکاراتگ بلے نوں چیزے وھد بیتگ ات کہ ھون شانگ بنا کُت ات ئِے۔مات زینب ءَ لوگ ءِ نزیکیں سرکاری نادراہ جاہ ءَ انونگاں ھم دوبر بُرتگ پیش داشتگ ات بلے نوں چَہھما نادراہ جاہ ءِ لہتے دوزواھیں کارمنداں گوشتگ ات کہ ادءَ تو بے پائیدگ ءَ پیداگ ئے ۔باید سول یا جناح ء برو کہ ادءَ سیاسی گلانی دیم داتگیں داکتر ءُ کارمنداں شریں ءُ اسل درمان بہا کُتگ ءُ دونمبر ءِ درمان ادءَ یاورتگ ایر کُتگ انت کہ آھاں زانتگ ادءَ گیشتر نادراہ بلوچ اَنت۔چونائیا ھم آھاں گوشتگ کہ بلوچ کہ زرنگ بیت دزی رندی کنت کُشت ءُ کُشاربنا کنت چوش کہ لیاری گینگوارئیگاں کُتگ پمشکا یا آھاں نشہ بہ دئےبہ کُش یا انچیں وراک ءُ درمان بہ دئے کہ سراش گرانیں نوبتاں بہ کپ ایت۔مات ھیران ات کہ گینگوار ءِ جنگ جدلاں پد بازیں بس ءُ منی بس ھم چَہ اے میتگ ءَ رویا نہ کنگ ءَ اتنت ءُ رکشہ ءِ سرءَ جناح ھسپتال ءَ روچے سے سد کلدار روگ ءُ سے سد کلدار آھگ ءِ زرّ ءِ آھاں جوازہ نہ کنت۔زیبل ءَ کہ بے ایشانی لوگ ءَ آھگ ءَ وش نہ بیتگ ات انچوش ڈنی دروازگ ئِے پچ بَیگ ءَ دیست دمانے ءَرند کہنیں زمانگ ءَ بستگیں سُہریں ھٹّانی کمپان ءِ توک ءَ پُترت۔مات زینب چُل ءَ کنور کنگ ءَ اَت زبیل کش ءَ شُت نشت گپ گپ ءَ گوشگ ءَ لگ ات:“ پری گُل ءِ مات ! دوشی وش نیوز ءِ سرءَ یک پرت ء پرتیں جنینے ءَ وتی گرانیں نادراھی ءِ ھلاج کنائینگ ءَ چَہ بلوچ کوم ءَ کمک لوٹگ ءِ جار پرینتگ۔ ۔ ۔ شما پرچَہ وتی بلوچی چینل ءَ پہ پری گل ءِ ھلاج ءَ انچیں کمکی جارے نہ پرین ئے ؟یلان ءِ پگار انچو وَ نہ انت کہ لوگ ءِ ھرچ ءَ در بہ کنت ۔۔ ۔ گرانیں بلّاں بہ دنت ءُ گہار ءِ ھلاج ءَ ھم بہ کنائین ایت “چَہ زیبل ءِ گپ ءَ مات زینب ءَ چُل ءِ آس جَہل کُت ءُ پگرے ءِ آماچ بیت ۔” وش نیوز ءَ مئے ھال ءَ کئے سہیگ کنت ؟ یلان گیرادارانت یک کلدارے ھم چَہ کسے ءَ پچ نہ گرایت ۔۔۔ “مات زینب ءَ گوں تکانسری ءَ دراہینت۔” من تئ چُک ءَ شری ءِ سرءَ زاناں ۔ ۔ ۔ بلے ورنائیں جنیں چُک ءَ بے ھلاج ءَ ملکموت ءِ دست ءَ دیگ ھم گناہ انت ۔ ۔ ۔ من وتی چُکانی پت ءَ گوش آں کہ یلانءَ سرپد بِہ کنت ۔ ۔ ۔ پدءَ وش نیوز ءِ اھوالکارے منی چُکانی پت ءِ سنگت انت ھم ۔ آ وت جار ءَ پرین ایت ۔ ۔ ۔ دنیا ءَ انسانیت )مردمگری( گار نہ انت “”ناں ناں زبیل چوش مہ کن ۔ ۔ ۔ مئے جنیں چُک ءَ سرجمیں دنیا ءَ وش نیوز ءِ سرءَ گندایت منی سانگبند مارا کلاگاں ھِرّو کن اَنت کہ مردین دنیا ءَ چَہ شُتگ نوں جن چُک ئِے آزات انت کہ ٹی وی ءِ سرءَ بیا انت ۔ ۔ ۔ “” پری گل ء مات ! کجام زمانگ ءَ تو زندگ ئے ؟ کدی تئ سانگبنداں ترا اتکگ دپ ئِے جُستے کُتگ کہ شما مُرتگ ئے یا زندگ ئے ؟پہ ھلاج ءَ کمک لوٹگ ایبے نہ انت اے ملک ءَ گریب وتی لاپ ءَ سیر بہ کنت یا وتی ھلاج ءَ بہ کنائین ایت ۔ ۔ ۔ تو پگر مہ کن منی ماھگل نیٹ ) دامگ ( ءِ سرءَ ھم اے جار ءَ پرینت ایت ءُ کمک دیوکیں مردماں گوں رابطہ )رھوت ( کنت ۔ ۔ ۔ “٭٭٭٭٭٭٭٭٭٭٭٭٭” امّاں ! پری گُل اے ھال ءَ رس اتگ ءُ تو چہ من ءَ چیر پرچَہ داتگ ۔۔ ۔ ۔ من مزنیں زھمے نہ جتگ ات بلے چَہ کارگس ءَ وام وَ زرتگ ات کہ گہار ءِ ھلاج ءَ کنائینت بہ کن آں ۔ ۔ ۔ ۔ “ھما انت کہ زیبل ءِ لوگ واجہ شاہ میر ءَ آئ ءَ گوں گپ جتگ ات آئ ءَ سرترگ ءَ گپتگ ات ۔” ماتی ! وش نیوز یا ھالتاک پری گُل ءِ اکس ءَ گرانتءُ شنگ کن انت ۔ ۔ ۔ منی نازاکیں گہار بید ءِ چَہ نادراہ جاہ ءَ نے ماہ ءَ دیستگ نئیکہ روچ ءَ پدءَ ھم کینگ داریں سیاداں آئ ءِ پاکیں دامن

ءِ سرءَ بُھتام جتگ ۔ ۔ ۔ من نہ لوٹ آں کہ دگہ کسے آئ ءِ سرءَ لنکگے چست بہ کنت ۔ ۔ ۔ تو پریشان مہ بو۔ ۔ ۔ من وتی کارگس ءِ مستر ءَ گوں گپ جن آں ۔ ۔ ۔ آ ھم بلوچے ءُ آئ ءَ پہ وتی ملکی بازیں سیادانی ھلاج ئیگی چَہ درملکی سیاداں کمک لوٹ اتگ ۔ من وڑے کن آں ۔ ۔ ۔ ۔ “٭٭٭٭٭٭٭٭٭٭٭٭٭٭٭٭٭٭٭٭پری گُل جناح ھسپتال ءِ ایمرجنسی ءَ یارگ بیتگ ات ۔ داکتر ءَ ٹیسٹ ءَ رند آئی سی یو ءَ دیم داتگ اَت ۔یلان ءِ دستی گوانکو ءِ سرءَ کارگس ءِ مسترءِ توار ات :” منی سیاد گوشگ ءَ انت کہ چَہ میڈیا ءِ توسط ءَ بانوکے ءِ پہ ھلاج ءَ کمکی جار پرینگ ءَ رند آھاں زرماھے بیت دیم داتگ انت ءُ رند ءَ مالومات)مالومداری ( کنگ ءَ پدر بیتگ کہ آ جنین ءَ زمانگے بیت کہ شومک ءِ نادراھی ءِ ھلاج بیتگ ءُ نوں زرنگ انت بلے نوں کمک ءِ نام ءَ چَہ راج ءَ زر کشگ لوٹ ایت ۔ ۔ ۔ ۔ بازیناں آ دروگ بند ءِ کمک کُتگ پمشکا تئ گہار ءِ ھلاج ئیگی آ تاں ھما وھد ءَ زر دیم دات نہ کن انت کہ تئ گہار ءِ شومک ءِ نادراہ ءِ سرجمیں ریپورٹ مَہ رس انت ءُ گہار ءِ نادراہجاہ ءِ اکس دست مَہ کپ ایت ۔ ۔ ۔ “یلان گوں بے تواری ءَ آئ ءِ گپاں گوش دارگ ءَ ات ءُ وتی ارساں ایر برگ ءِ گرانیں جُہد کنگ ءَ ات۔ دمانے ھاموشی ءَ رند آئ ءَ گن سارتے کش ات ءُ گوں مکینگیں توار ءَ دراہینت:” واجہ! داکترٹیسٹ کنگ ءَ انت ءُ ریپورٹ ھمایانی گورءَانت ۔ ۔ ۔ آھاں گگ ۔۔۔ گوشتگ ۔ ۔کک ۔۔ ۔ ۔ کہ اگں ۔ ۔ ۔ ۔ بیست ءُ چار ساھتانی تہ ءَ ھوش ءَ نَہ اتک گُڑا ۔ ۔۔ ۔ “یلان ءِ دست ءَ چِہ گوانکو کپتگ ات ءُ آئ ءَ دست سرءَ کُتگ گریوگ ءَ ات۔٭٭٭٭٭٭٭٭٭٭٭٭٭٭٭٭٭٭ھلاس



@Labzank
telegram.me/Labzank

*لوگ واجہ ءُ وسُّو ءِ بدگُمانی ءُ منی بزگی ءُ لاچاری*
*رجانک*
ما باز وھد ءَ تاں سئودی ءَ جاہ منند اِت ایں ھمے دور ءَ من ءَ دو مردیں چُک بوت وھد گوزان بوت ءُ ما واتر کُت آتک اِیں وتی گُلیں ڈیھ تُرکی ءَ منی کستریں چُک مزن بوت بلے من ھمد ءَ ھیران اِت آں منی کستریں چُک نہ منی رَنگ ءَ اَت ءُ نہ وتی پِت ءِ نہ زان آں چے ءَ ؟! من گُمان کت اے سئودی ءَ ودی بوتگ ءُ سئودی سکیں گرمیں ملکےبوت کنت اے پمشا سبز ءُ گندُمی رنگے ءُ چُش کہ ما اِنت مے وڑ ءَ سُھر ءُ اسپیت نہ اِنت وھد گوزان بوت منی لوگ واجہ گوش ئے چہ من وت ءَ را کنارا کَش کنان اَت ءُ چہ من روچ پہ روچ دور بہ وان اَت منی ھمساھگ ءُ سیاداں مدام من ءَ جست کت ترا چینکہ چُک ھست ؟من پسو دات دو گُشت اِش یکے و ایش اِنت دومی کج ءَ اِنت من گُشت کہ دوئیں ھمش اَنت ھمد ءَ گوازی ءَ اَنت مردم ھمے سرپد بوت اَنت اے دومی چُک زاناں منی نہ اِنت بَلے منہ دیم ءَ من ھِچ اِش نہ گُشت !!آ دومی چُک چَٹ چہ ما جتا اَنت پھک دگہ رنگے اَت من باااااز جیڑ اِت بلے من ءَ اے جست پسو نہ رس اِت ءُ من دلجم نہ بوت آں !!!!) منی لوگ واجہ ءَ باز رَند ءَ ارادہ کتگ کہ من ءَ بہ کوش ایت بلے زاناں منی روچاں ھست بوتگ ءُ من رَکّ اِتگ آں باز رَند ءَ کہ من شپ ءَ واب بوتگ آں لوگ واجہ ءَ لوٹ اِتگ منی زند ءَ ھلاس بہ کنت ءُ وت ءَ چہ من آجو بہ کنت بلے وار ئِے نہ رَستگ ءُ من بچّ اِتگ آں) من ھچ ءَ سرپد نہ بوتگ آں تاں گُڈ سر ءَ من ئِے ھال داتگ ءُ سرپد کتگ ( ھمے وڑ ءَ یک رندے منی لوگ واجہ سک دلگران ءُ پریشان اَت ءُ چہ لوگ ءَ درآتک ءُ شُت بزاں یک سنگتے گور ءَ شُت آ سنگت ءَ جست کت تو چے ءَ اِینکہ پریشان ئے ؟ھیرانے تئی پیشانی کِرچک اِنت ءُ تئی دیم تھار اِنت پرچا ؟؟!گُڑا منی لوگ واجہ ءَ پسو دنت ءُ گُوش اِیت من ءَ یکے جیڑھے ءَ بے وار کتگ ءُ من نہ زان آں چون بہ کن آں ؟!آ واجہ گوش اِیت من تئی ھرچ وڑیں کُمک ءَ تیار ءُ ساڑی آں تو بس اَمر ءُ ھکم بہ کن منی لوگ واجہ گوش اِیت من وتی لوگی سر ءَ گمان کن آں کہ آئی منی گومادگا کتگ) اے دور ءَ منی لوگ واجہ ءَ ھرچ گمانے ءِ کتگ ءُ منی کوشگ ءِ ناکامیں جھد چینکہ بَراں کتگ من ھچ ءَ سرپد نہ بوتگ اون ءُ رَند ءَ من ءَکہ ھال ئِے دات کہ منی دل تِرکگ ءَ آتک بلے پد ءَ من درگوز کت اوپار کُت پرچا کہ منی زندے ھمسپر ءُ ھمراہ اَت (من ءَ دگہ چُکے ھست کہ ھچ وڑ ءَ مے رنگ ءَ نہ اِنت من گمان کن آںاے دگرے ءِ چُک اِنت !!!آئی دوست ءُ سنگت ءَ گشت بوت کنت شمے دگہ کماش ءُ پیروکیے ءِ رنگ ءَ اِنت لوگ واجہ ءَ پسو دات نہ مے تہ ءَ اے رنگے ھچ وڑیں مردم نیست !آئی ھمبل ءُ دوزواہ ءَ پسو دات اے جیڑہ یک رنگے ءَ ھَل کنگ بیت تو چُش کن وتی اے چکے ءِ ڈی اِن اے ءِ ٹسٹ ءَ بہ کن زانگ بیت شمے چُک اِنت یا دگرے ئِےھیر منی لوگ واجہ رازی بوت ءُ منی ءُ وتی ءُ چُک ءِ ڈی اِن اے ءِ ٹسٹ کنگ بوت ما رپورٹے ودار کت تاں ٹسٹ ءِ رپورٹ آتک ڈاکٹر ءَ مارا گشت کہ اے شمے دوئینانی چُک نہ اِنت!!!!ما ھیران ءُ ھبکہ بوت اِیں ؟اے چوں اے رنگ ءَ چوں بوت کنت ما گشت کہ شمے نادراہ جاھے مشین ھراب اَنت ما دگہ نادراہ جاھے شوت اِیں پد ءَ دومی رَند ءَ ڈی اِن اے ءِ ٹسٹ کنگ بوت اَنت ءُ ڈاکٹر ءَ مارا ھما رنگ ءَ پسو دات کہ ساری ئیں ڈاکٹر ءَ داتگ اَت نوں ما سرپد بوت اِیں کہ مے چُک بدل بوتگ !!!ما اے وھد ءَ ترکی ءَ اِت ایں ھیر ما سئودی ءِ روگ ءِ چِن ءُ لانچ کُت ءُما شُت اِیں سئودی ءَ ءُ ھما نادراہ جاہ ءَ کہ مے اے چُک ودی بوتگ اَت ما پٹ ءُ پول کنگ بِنا کت ھمے روچ ءَ کہ مے چک ودی بوتگ اَت اے روچے درستیں چکاں ریکارڈ چاران کت اَنت نادراہ جاھے سروک ءَ مارا باز کُمک کت !! تاں ھما مردے لوگ ءَشوت ءُ سر بوت اِیں ما وتی چُک ھنچش دیست ما پجاہ آورت اے وھد ءَ دوئیں چک مے ءُ آھانی کساس یازدہ سال ءِ اُمر بوتگ اِت اَنت ما نہ زانت ایشاں کجام وڑ ءَ جتا بہ کن اِین ءُ وتی چُک ءَ گوں وت بہ بَر اِین ءُ آھانی چُک ءَ آھاں بِہ دے ایں ما تاں باز وھد ءَ گوں وتی چُک ءَ نزیکی کت ءُ ھماھانی دوار ءَ جاہ منند بوت اِیں آھرکار ما سوبیں بوتین اِیں
اللہ ءِ رسول)صلی اللہ علیہ وسلم( گوش ایت بدگمانی مہ کن اِت ءُ مدام وشیں گمان بہ کن اِت ءُ بہ دار اِت اللہ پاک مارا ءُ شُمارا چہ بَد گمانی ءَ بہ پھریزات !اے کسہ چہ اَربی اھبارے ءَ رجانک کنگ بوتگ



@Labzank
telegram.me/Labzank

اگاں بے درؤرین ماه چہاردهی لال.
چطور قولیگ نباں پر تو گُُلیں زال.

گلیں زندا گون بچکندان مہ آزار.
مداما نشتگ و بنداں پہ تو گال.

اگاں دنیاء موجیت موسم بیت ڈکال.
بہ گینداں دلبرا دیم ي بهار سال.

گلے چم گنده و صافیں دلے فال.
دلَ چِکیت پہ شیر و شادهی بال.

مہ کن وصفَ گلے دنیاء گهار وار.
فقیر و سادهیں مئی عاشقی چال.

مروچان چوروین آسکانی ي حال.
زهیران ترونگلین مینتگ گورے شال.

شـــاعر: آســــــــکانی بلـــــــــوچ.

آزمانک

گرمیں کمبل

اَررر ترا هور ءَ چَٹ میسینتگ زوت بیا لوگ ءَ سردی ترا کُش اِیت ماهَل ءِ گالوار ءَ دردواری پدر ات
من اشتاپ اشتاپ ءَ پترتاں لوگ ءَ

بزور منی برات ءِ پُچاں برو پَسیل ءَ وتی میسیتگیں پُچاں بَدل کن بیا کہ ترا سردی ءَ چَٹ کُتگ ماهَل ءَ جوڑی یے پچ منی نیمگ ءَ شھار دات ءُ گشت

من ءَ سردی ءَ هَنچو بے وار کُتگ اَت کہ آ گپ کنگ نہ بیت من پُچ بدل کُت اَنت ءُ آتکاں شوک شوک ءَ اِسٹوپ ءِ دیم ءَ نشتاں کمو وت ءَ تاپاں گوں نندگ ءَ من سما کت ماھل کندگ ءَ انت

هاں ترا چے بوت تو کندگ ءَ ئے ترا هیر اِنت ؟ من پہ ھیرانی جست کت

من چوں نہ کند آں تو اِسٹوپ هَنچوش امباز کُتگ گوش ئے اِسٹوپ روک اِنت ماھل ءَ کندان ءَ گپ دیم ءَ برت اے اِسٹوپ ءَ هَپتگے بیت روک نہ کتگ

گڑا اِسٹوپ ءَ روک کن تو وَ گِندگ ءَ ئے منی دنتاناں دِرکَگے بِرِ اِنت انگت ءَ نِشتگ ءُ کَند ئے بهتاور من ءَ سردی ءَ کُشت تو اِسٹوپ پہ پیش دارگ ءَ ایر کُتگ من وتی گالوار برز کت

هِنچو کوکار ءُ جَگّا مہ کن من زاناں اِسٹوپ ایر کنگی چیزے نہ اِنت بلے دار ئے جِند کہ نیست گڑا من چوں روکے بہ کن آں ؟؟ بیا کَمبلے تَلّا پُتِر هَنّی گرم گِرئے . ماھل وت کمبل ءِ تل ءَ تچک ات کمبل ءِ لمبے لیٹینت ءُ گشت ئے

گڑا دار کہ نیست اِسٹوپ ءَ گُوَج ءُ دور بہ دے مُپت ءَ چی ءَ لوگ ءِ بِراه ئے بُرتگ ءُ منی سر ءَ تواز ءَ مہ کن من نیائیں تئی کَمبل ءِ تَل ءَ پہ من دگہ نِپادے تالاں کن من زھر گپت اوں

من تواز ءَ کنَگ ءَ نہ آں پہ َدِل گوشگ ءَ آں بیا زوت ماهَل ءَ کَڈّن کت

اِناں من ءَ لَج کنت گوں تو وپسگ پہ من دگہ نپادے تالان کن من گوں نرمیں گالوارے ءَ گشت

سردی ءُ لَج ؟؟ بیا زوت ماھل ءَ ٹھک دات ءُ گشت

من ءَ سردی ءَ سک بے وَڑ لاچار کُتگ اَت ءُ دومی من ءَ سک لَج هم کنگ ءَ اَت بلے ماهَل ءَ مَرگ دَرآورتگ اَت کہ تو الّم بیا یکجاه وپساں من اوں چم پَرپَٹیناں کُرت آں ماهَل ئے بَگَل ءَ پُتِرتاں ماهَل ءَ کَمبل زُرت ءُ من ءَ شر پَتات ءُ گوں وت ءَ نزیک ئے کُرت ءُ منی لَج کم کم ءَ هلاس بوهان اَت ءُ من دَرّاهینت پووووو زالّم تئی کَمبل ءِ تَل ءَ سک باپ انت باور کن

اَچے! منی کَمبل ءِ تَل ءَ سک گرم اِنت اَلّئے تئی جان چوں سردانت پُٹاں بِچار چو سِنکُر ئے شِکّ ءَ مِک اَنت ماھل ءَ ٹھکے دات ءُ گشت

من گپ ءَ را گونڈ گِراں کُرت ءُ گوشت پُٹ وَ الّم مِک بنت اے بلاهیں سردی ءَ

ماهَل ءَ دست منی دلبند ءِ سر ءَ ایر کنان ءُ لَتاران کُرت ءُ من ءَ سک وش آهگ ءَ اَت ءُ سک کیکِلی هم بوهگ ءَ اَت من بچکندان ءَ دَرّاهینت دست ءَ دور کن من ءَ سک کیکِلی بوهگ ءَ اِنت

ماهَل ءَ گَنتِر زِد کُرت ءُ من ءَ کیکِلی دات بلے اے وهداں من ءَ سک دوست بوهگ ءَ اَت پرچا کہ اے اولی رند اَت کہ ماهَل گوں من یکیں کمبل ءِ تل ءَ ات مود ئے بالِشت ءِ سر ءَ شنگ ءُ شانگ اَت اَنت ءُ کُماریں چَماں پہ نازے نز ءُ پچ کنگ ءَ ات کَتاریں دنتان ئے ماں لُنٹانی شَم ءَ دِرپشگ ءَ اَت اَنت من ءَ هَنچو سما بوهگ ءَ اَت گوش ئے من گوں جَنّتی هُورے ءَ لیب کنگ ءَ اوں .منی جان ءَ دْرهَگ ئے زُرتگ اَت دل دِرکگ ءَ اَت دست بے توکَل اَت اَنت شیر دروشمیں ماهَل ئے هُسن ءُ جمال ءَ من ءَ هَنچوش ژَلّم ژلّم کُرتگ اَت کہ من هِچیزگی نہ اَت آں ،

ماهَل منی ریشاں سمارگ ءَ اَت ءُ دل مانگ اَت کہ من ءَ بوسہ بہ کنت بلے چہ چمان ئے پدر ات کہ بوسگ ءَ لَج ئے کنگ ءَ اِنت پمیشکا برے گَرِدن ئے گپت وتی نیمگ ءَ ژپ اِت ءُ برے گوں ریشاں لیب ئے کت بلے من ءَ دل ءَ نہ مَرِّینت من ماهَل گِپت ماں گَردِن ءَ بِنا کُرت چہ پیشانی ءَ بوسہ تاکہ بهِشتیں جیگ بند ءَ رستاں نوں ماهَل ءِ دل ءَ ٹُپّ ٹُپّے زُرت کہ هِچ بس کنگ ئے نام ئے نہ زانت ءُ زبان ئے گُنگ اَت هِچ گپی تْرانی نہ اَت ،،، من کہ بَهِشتیں جیگ بند ءِ نیمگ ءَ بوسہ کنگ بِنا کُرت داں ماهَل ءَ وتی گَردِن نَز آورت ءُ وتی دست منی دیم ءِ سرا ایر کت انت ءُ گوں مھروان ءُ لرزوکیں توارے ءَ گشت دیم ءَ نہ کِنز ئے

من دپ دُزاں کُرت ءُ پسو دات ،، اِناں شنکوں دیم ءَ نہ کِنز آں باور کن من ءَ وت هیال گُوَر اِنت تئی سرپتگیں پل دروشمیں بدن ءِ کہ پولنگ مہ بیت شالا

من زاناں ترا هیال گُوَر انت بلے تئی نہ بستگیں دست تَچگ ءَ اَنت بهتاور ماھل ءَ بچکند ات ءُ گشت

گڑا منی نہ بستگیں دستاں بہ بند تَچگ ءَ میل اِش من کند ات ءُ پدا جُست کُرت ماهَل ترا گپے بہ گوش آں؟؟

یک گپے پرچا سد گپ بہ گوش گشئے ماھل پہ گوشدارگ ءَ اشتاپی ات

گڑا گوش دار من ماھل ءِ ھیال گیش وتی نیمگ ءَ کت ءُ گپ بندات کت
تو من ءَ بے کِساس دوست بئےتئی مهروانی ءَ من ءَ شِیدا ءُ گنوک کُتگ تئی بچکندگ ءُ شَهد ءُ شِرکِنیں تْران منی دل ءِ تہ ءَ نَکش اَنت هچ رنگ ءَ در کَنگ نہ بنت وهدے من ترا مہ گِند آں منی دل گوش اِیت وَت کُشی بہ کن وهدے من کار ءُ روزگار ءَ روان دل نہ گوش اِیت کار بہ کن برے

برے من تهنا نند آں من ءَ هَنچوش گُمان بیت تو منی دیم ءَ نِشتگ ئے ءُ بچکندگ ءَ ئے
اے دْرست تئی شیردروشمیں شرنگی ءُ مهروانی ءِ سوب اِنت باور کن منی گالوار سک مھروان ات چم ماھل ءِ آسکی دیدگانی تہ ءَ ایر بکتگ اتنت

وت کُشی بہ کن گڑا اے دْرستیں جیڑ ءَ هلاس بنت ماھل ءَ کندان ءَ گپ دیم ءَ برت تو وت ءَ گنوک مکن هِچ نہ بیت من تئی آں دل جم بو اگاں نا گڑا من تو هردو وت کُشی کن اِیں کِسہ هلاس بیت ماھل ءِ چماں چہ مھر جلکشگ ءَ ات

گوس مہ جنت ترا من زانت تو هَنچوش گوش ئے پووو! ٹیمب ءَ بِچار سے بَج بوتگ نوں بوپس من ءَ واب ءَ گپتگ من پہ مھر ءُ شیتانی ماھل ءِ پونز زور ءَ پردات ءُ گشت

هو شپ شُتگ چماں مُچ کن یکیں دمان ءَ واب کپ ئے منی امبازاں ماھل ءَ پہ نازے گشت

ماهَل ءَ من ءَ بگَل کُتگ اَت ءُ دل ءِ بند ءَ داشتگ اَت منی دل نوکی هُبینگ اَت پہ واب ءَ داں یکے ءَ منی دست گپت پاد ءَ ٹیمب ءَ بِچار بے سُد ترا ناکہ کار ءِ گم بِر اِنت ءُ ناکہ منی اِزت ءِ گم بِر اِنت اگاں کار نہ لوٹ ئے من ارباب ءَ گوش آں اے ترندیں گالوار ءُ دست ءِ ژپگ ءَ من گڑاتاں

داں ٹَنڑِیل چو ملکموت ءَ منی سَرُون ءَ اُوشتاتگ چم ئے دَر گُڈِینتَگ اَنت.

راجدار کلگی
@Labzank
telegram.me/Labzank

*وانگ ءِ هُب ءُ واهگ*
✺راجدار کَلّگی✺
هَرکسی همئے هُب ءُ واهگ اِنت من بواناں،، بلے بَژن مئے گیشتریں هِند ءُ دمگاں وانگجاه نیست،، پہ دگنیا ئے پیشدارگ ءَ هست بلے دلوتانی واڈ جوڑ اَنت،، ناکہ ماشٹر ءُ استاد ءِ هست ناکہ وانگجاه ءَ کمراه ءُ کوٹی هست،، ناکہ تَهتگ ءُ تاگ ءُ دریگ هست،، ناکہ کُرشی ءُ ٹیبل هست،، ناکہ دگہ آسراتی یے هست،، ناکہ آپ ءُ چَرکی یے هست،،
هَرکس زانت من اَبید وانگ ءَ سرجم نہ آں آ وانگ نیکراهی یے بہ بیت یاکہ دگنیائی یے بہ بیت،،انسان گریب ءُ بَزگّر ءِ بہ بیت یا کہ اَمیر ءُ دولت مَندے بہ بیت دْرستانی واهِشت همیش اِنت من بواناں منی چم پَچ بہ بنت ءُ من وتئی شَر ءُ گَندگ ءَ بہ پهماں ءُ بہ زاناں من اِنجینیئر ءُ ڈاکٹر ءُ ملاهے جوڑ بہ باں وتئی کوم ءُ راج ءِ راشونی ءَ کُرت بہ کن آں چہ سِل کاری ءُ بَد کاری ءَ وتئی کوم ءُ راج ءَ رکّینیت بہ کناں...
مات ءُ پِتانی هم همئے واهگ ءُ واهِشت اِنت کہ ما اِنچوک تَنگی ءُ تَکلیپی سَگ اِتگ ما وتئی چُک ءَ بوانیناں ءُ شریں ءُ چم پَچیں اِنسانے جوڑ ئے بہ کناں،، بژن ءُ هَزار ایپ ءُ اَرمان کہ مئے بلوچ چاگردے گوگائیں چُک وتئی لاپے شوهازگ ءَ ءُ یک دمانی یے واهِشتے سرجم کنگ ءَ گونی ءُ کِسَگ اِش بَڈا اِنت ماں آهگوٹانی سر ءَ چو مُرگ ءَ پُرّاں پیش کانڈ اَنت ءُ ڈَبُک ءُ ٹینُک چِناں وتئی گُزران ءَ کناں ،، یا پہ چَرس ءُ تریاک ءِ آ تِرّ ءَ ،،
چُک اگاں وانگ ءَ روان اَنت نَدّ ءُ کاپی ءُ کِتاب نیست یاکہ استاد نیست اگاں استاد هست استاداں لَٹّ چو نَدّ ءَ ماں لَنکُکانی شَمّ ءَ کُتگ پیسر ءَ کاپی یے جُست ءَ کن اَنت نوں نودربریں باسک چے کُج ءَ نَدّ ءُ کاپی کار اِیت؟؟ چے پَسّو دنت ... استاد من کاپی شموشتگ سُهب ءَ الّم کاریں ءِ مرچی پهل کن بلے استاد چہ نودربرانی وانینگ ءَ گیشتر گوں لَٹّ ءَ دیم ءَ کِنز اَنت نودربراں اگاں تاکہ ماهی ءَ کاپی گوں مہ بیت استاد چار شیپَلونکے ماں بَڈّے دِراجی ءَ جَنت برو نِند گرک بو بلے هرام بات اگاں استاد یک روچے جُستے کنت تو پرچا نَدّ ءُ کاپی نیار ئے ،، تئی تَنگی ءُ تَکلیپی چی اِنت آلانکہ زانت اے کم دست ءُ گریبیں لوگے ءَ چہ تَالُک دار اِیت بلے جُست ءُ پُرس نیست بس چار لَٹ ماں بَڈّے دِراجی ءَ جنت ءُ گوش اِیت برو گرک بو ،،،
چُک لوگ ءَ کیت وتئی مات ءَ هال دنت اَمّاں مرچی پدا استاد ءَ من ءَ جتگ گوشتگ ئے کاپی کُجیں ،، مات گوں رولاهیں چماں اَرساں پهک کنت ءُ پَسّو دنت..پِت شُتگ پِلانی کِرا مرچی وتئی زَراں گپت ءُ کاریت الّم پر تو نَدّ ءُ کاپی گپت... پِت سَجائیں روچ ءَ مُرت اِنچوک لِچ کاری ءَ روزِنداری آتکگ 300 کَلدار اِنت ،، اے 300 کلدار ءَ اگاں نَدّ ءُ کاپی بہ کنت شپ ءَ بے شام بنت ،،، اگاں هاوند مہ کنت پِت نادراه بہ بیت بزاں تا هما روچے کہ پِت جاندراه ءُ سلامت بہ بیت بزاں چُک شُدّ لاپ اَنت پہ لُنکائے نان ءَ تَلوس اَنت چوشیں نگیگیں جاوراں گڑا گریب ءُ بَزگّر کُج ءَ ونت کنت؟؟
اگاں یکے شپ ءَ بے شام ءَ بوپس اِیت ءُ وتئی چُک ءَ بوانیں اِیت پدا هم چُک ءَ را ڈِگری ماں دست ءَ اِنت کُج ءَ اُگدهی ئے هال شِنگ بہ بیت هَمود اِنت چکاس دنت بلے اَگده کہ پیسر ءَ بها بوتگ اَنت اے گریب ءُ بزگّراں چوں دیاں اُگدهاں؟؟؟
اے نگیگیں جاوراں مارا راج دست گِرگی اِنت اگاں دست نہ گپت گڑا سرجم اِیں راج نِشہ ءُ سِل کاریانی آماچ بیت..
اَبید چہ وانگ ءَ اِنسان نا سرجم اِنت گیشتر جهد بہ کن اِت بوان اِت ،،،
@Labzank
telegram.me/Labzank

ھانی بلوچ

جنین !!

ایشی ءِ بابت ءَ بازیں مردم بازیں چیز گُش اَنت ءُ ہمے جنین آدم کدی جنک ءِ رنگ ءَ وتی فرض ءَ سرجم کنت کدی یک لوگی ییءِ رنگ ءَ کدی ماتءِ رنگ ءَ چہ بہ بگر پیر زالی سُدیک اے دگنیا ءِ رنگ ءَ وت ءَ ہمگرنچ کنت ءُ دگنیا ءِ رنگ ءَ گوں رنگ زور یت زالبول ءِ وہدے جنک ودی بیت گڑا دگنیا ءِ جست ہمے بیت کہ ترا بچک اَست !؟۔اگاں بچک ودی بیت گڑا جنک ءِ کس جُست ءَ ہم نہ کنت ۔بازیں جاہ ءَ انچو گندگ ءَ کئیت وہدے جنین آدم ءِ کُل زَہگ جنک بنت ءُ دگہ چُک ءِ آرگ آئیءِ تاوان ءِ چیدگ بیت ۔بلے آپہ بچک ءِ ہاتر ءَ ہچّ تاوان ءَ کِمار نہ کنت ۔ہمے سوٛب ءَ بازیں ڈاکٹرانی جُست ہم ہمے بیت کہ تئی Family Complete اِنت یا نہ ؟؟۔بزاں کہ خاندان بے بچک ءَ سرجم نہ بیت وہدے جنین آدم ءِ کُل زَہگ بچک بہ بنت ءُ آئی ءَ دگہ چُک ءِ آرگ ءَ تاوان ءِ شون دیگ بیت گڑا آپہ جنک ءَ آرنگ ءَ اَرزشت نہ دنت ءُ وتی چُک ءِ آرگ ءَ ہما ساعت ءَ گڈ سر کنت ہمے بچک بازیں سِلکاری بہ کن انت گڑا دگنیا ءِ چمانی چیر ءَ نہ بنت ،اگاں بنت پدا ہم دگنیا ہمے گُشیت اے بچک انت ہرچی بہ بیت وت شر بنت ۔وہدے جنک کمو بے سُدی ءَ ہم سِلکاری بہ کن اَنت گڈا دگنیا آئیءِ تیوگیں زند ءَ اَنچو کنت کہ تازند آوتی ردی ءَ شر کرت نہ کنت ءُ ناوتی ردی ءَ چہ دروَنت زُرت کنت بلکیں آسروت کشی کنت ۔
بازیں بچک جنکاں کارمرز کن انت وتی وہد گوٛازینگ ءِ واستہ ءُ درٛوگیں مہر ءَ جنکانی عزت ءَ حراب کن انت جنک ءِ گنا ہ ہمے بیت کہ آہمے پگر ءَ ہیر کنت بوت کنت مہر ءُ دوستی ہمے رنگ ءَ بیت بلے جنک پہک ناسرپد انت کہ بچک بدکار ءَ چہ بدکار ءُ سِلکار بہ بیت بلے آانچیں جنک لوٹیت کہ آ پَلگار بہ بیت گڈا اِدا ہما جنک ءِ سرا ظلم نہ انت کہ سِلکاریں بچکاں گوں زند ءِ گوٛازینگ ؟؟۔وہدے بچک جنک ءَ کارمرز کنت گڈا گناہ نہ انت ،بلے جنک مہر بہ کنت مزنیں گناہے زانگ بیت پرچہ اے دگنیا ءَ زالبول ءِ جاہ جتاہ ءُ مردین ءِ ارزشت باز انت ؟؟۔بازیں انچیں مردین ہم گندگ ءَ کئیت آوتی مردی ءَ بس ہمے سرپد بیت کہ منی لوگی ءَ چُک آئورتگ منی کار سرجم بیت نوں آئیءِ کار بندات بیت منی چُک ءِ حیالداری ءُ وتی کار ءَ سرجم دیگ پدا آمردین دگہ جنکاں وتی وہد ءَ گوٛازینگ لوٹ ایت ءُ دگراں کامرز کنت ۔بلے اِدا یک گپے من سرپد نہ بوت آں مردین دائم ءَ پرچہ گوٛشیت منی چُک ءِ حیالداری ءَ بہ کن ؟؟آچلگ جنین بیت درد جنین سگ ایت گڑا مردین پرچہ اے وڑ گش ایت ؟؟
درٛیگتیں چِلگ ءِ درد مردین ءَ بہ سگ اِت اِنت ۔بلے حُدا ءَ ہم گوں جنین ءَ انصاف نہ کرت ۔من مدامی گنداں جنین ءَ چُک بیت گڑا مردین وتی سرا برز کنت گُشیت من ءَ چُک بیتگ ،اگاںچُک نہ بیت گڑا مردین گُشیت منی لوگی ءَ چُک نہ بیت اے درگت ءَ من بازیںجنین دیستگ آں اسپتال ءِ تہءَ چُک ءِ علاجءَ کاینت ءُ انچیں جنین وتی سرجمیں Testءَ کن انت آوانی Test Clear بنت ،اگاں مردین ءِ Test ءِ گُشگ بیت گڑا ہما دمان ءَ مردین وتی نزوری ءَ نہ منّیت ءُ ہچ رنگ ءَ Test نہ کن انت ،بلکیں علاج ءَ گڈسر کنت یا لوگی ءَ ویل کن انت ۔ہمے لہتیں روچءِ گپ اِنت منی کرا زیبا نامیں زالبولے اتک آمحمد بخش بزاں وتی لوگ واجہ ءِ نیمگ ءَ تُرس لرز چارگ ءَ من ءَ گُشیت کہ من ملک ءَ چہ اتکگ آں ءُ بازیں مزنیں اسپتالاں وتی علاج کرتگ بلے ہرکجام اسپتال ءَ بس ہمے گشگ بیتگ کہ چُک دانی (Uterus)ءَ بہ کش اگاں نہ کش اِت گڑا شومُک (Cancer)بیت ۔وہدے من آئیءِ Reports چارِت آں گڑا ہمے رنگ ءَ آئیءِ Uterusکشگ المی ات ۔بلے مردءِ نہ منّگءِ سوب ءَ آزال لاچار اَت منی سک باز تُرسینگ پد آئیءِ لوگ واجہ محمد بخش ءَ من ءَ گشت کہ اسلام ءِ تہا جائز نہ انت۔ اے گپ ءَ گوشدارگ ءَ پد منی دل ءَ گُشت اے مردین ءَ انچیں شہماتے بہ جن کہ آدگہ رند ءَ پگر بہ کنت پدا گپ بہ جنت ۔۔۔۔۔۔اسلام ءِ تہا جنین ءِ کُشگ جائز اِنت ،بلے جنین ءِ علاج کنگ جائز نہ اِنت ؟؟۔من وہدے ترٛندیں گالوار ءَ جُست کرت گڑا چاراں آمرد پشومانی ءَ ہچ نہ گُش ایت اگاں انسان ءَ چُک مہ بیت آ اے وڑ بہ گُشیت گڑا مردم سرپد بوت کنت ،بلے محمد بخش ءِ زیبا دومی لوگی انت ءُ آئیءِ اولی لوگی ءَ چہ آئر ءَ پنچ چُک اَست ءُ زیبا ءَ چہ ہم پنچ ۔۔۔۔۔۔باریں چے وڑ ءَ آئیءَ بزگیں زیبا ءِ Operation کنائینت آ Operation ءَ پد ڈاکٹر ءَ ہمے گشت کہ مارا انچو لگّیت کہ Cancer مہ بیت پمیشکا Biopsyکُرت Biopsyہما چیز ءَ گُش انت وہدے Operationکنگ بیت گڑا آجاہ ءَ کسانیں ٹکرے کشگ ءَ رند آئیءِ Testرا دیگ بیت دانکہ اے چارگ بہ بیت کہ آجاہ ءَ دگہ نادراہی اَست یا نا۔۔۔۔۔۔
ہمے رنگ ءَ بزگیں زیبا ءِ Biopsyکُرت بلے پدردیں گپ ایش اِنت کہ آئیءِ لوگ واجہ ءَ Reportءِ ودار نہ کُرت ءُ ڈاکٹرانی گوٛشگ ءَ پد ہم آوانا ودار نہ کُرت ءُ شُت اَنت ۔آبزگیں زیبا ءِ Reports منی کِرا انت ءُ آئیءِ Reportءِ تہا Ovary Cyst Raptureانت اے انچیں جاہ ءِ غدود کہ مردم ءَ Shockءِ تہا با

رت پدا زوت کُش ایت ءُ ہلاس کنت ۔
اے گپ پدا ہم انچو نہ انت کہ من مزیں گپ بہ جن آں کہ من دگرانی لوگ واجہ ءِ ظلم ءَ ہلاس کن آں ،منی گوما اے وڑیں درٛوگیں گپ نہ بیت پرچا کہ من (Women Organization)جنینانی گَلانی منّوگِر نیاں ،نا آوانی ہمگرنچی کنگ لوٹ آں پرچاکہ مئے جنینانی گَل تیوگیں روچ ننداں پاد کاینت بس ہمے گپاں کن انت کہ مئے زالبولانی سرا آوانی لوگ واجہانی ظلم بوہگ ءَ انت مئے زالبول لب (Dowry)ءِ جیڑہ ءَ سگگ ءَ انت ما ہلاس کن ایں دگہ انچیں وت سریں بازیں گپ جن انت ہمے Organizationبزانکہ گَل کا روتی جاہ بلکیں گیشتر جنینانی نزور کنگ ءِ چیدگ انت پمیشکا من منّوگِر نیاں پرچا کہ من وتی چمّاں دیستگ آں انچیں جنین کہ آملک ءَ چہ اتکگیں بس یکیں توار ءَ کہ ما وت کُشی کنگ لوٹ ایں مئے زند ہلاس انت ،ماناپاک بوت ایں ۔بلے راستی دگہ رنگ ءَ بیتگ آجیڑہ انچیں جیڑہ انت کہ ہلاس بوت کنت بلے مئے Women Organization بس نشتگ انت انچیں جیڑہانی سرا گپ جن انت کہ آوانی دست ءَ بوت نہ کنت اگاں کار کنگ لوٹ انت گڑا ہمے بازیں جیڑہ است کہ آوانی ہلاس کنگ سک ارزان انت آجنین آدم مزنیںکساس ءَ انچیں جیڑہانی درگت ءَ وت کشی کنگ ءَ انت اگاں اے گَل بہ لوٹ اَنت گڑا الم آپہ زالبول ءِ ہاتر ءَ کارکرت کن انت ۔بلے کار کنگ ءِ ہاتر ءَ جہد کنگ لوٹ ایت پرچاکہ مزنیں گپ جنگ سک ارزان اِنت من وَ سک ہبکہ آں زمانگ کجا رستگ بیست ءُ یکمی کرن انت مردم کجا سربوتگ انت سائنس ءَ سک باز بدلی آورتگ بس یکیں بدلی سائنس ءَ ہم آورت نہ کُرت آبدلی جنین ءِ بِستار انت،جنین ہما رنگ ءَ چہ ودی بوہگ تامَرگ مٹ نہ بیت آ اگاں وتی کماش ءِ لوگ ءَ بیت پدا ہم آئیءِ وتی جند ءِ لوگ نہ انت آئیءَ پد لوگ واجہ ءِ لوگ ہم آئیءَ قبرسُدیک سرکنت بلے دیمتر ءَ زانت نہ کن آں کہ قبر آئیءِ گڈسر بیت یانا !۔اے ہم زانت نہ کن آں لپ قبر ءِ تہا آئیءَ تاہیر رسیت یانا !!۔اے بیست ءُ یکمی کرن انت انگت ءَ جنین دائی بلکانی کرا چلگی بنت پدا اے درگتءَ آ انچیں جیڑہانی دیمپان بنت آئیءَ مردم وڑ وڑیں گپ گش انت ۔لہتیں جنین ءَ گُش ایت ایشیءِ سرا جِن جاتوگ اَتکگ ،لہتیں گش ایت کہ ناپاک انت بلے آئیءِ جند ءِ لوگ واجہ آئیءِ سِلّیں بوہ ءَ سگ اِت نہ کنت آئر ءَ ویل کنت پرچاکہ آجنین ءَ وتی پیشاپ (کسانیں پیشاپ)کنگ (Urine)ءِ سما نہ بیت پرچاکہ آچاگردی ظلم ءَ چہ دوچار بیت آ بلک (دائی)چاگرد ،بلکیں آئیءِ جند ءِ لوگ واجہ تیوگین دگنیا ءِ کرا جنین ءِ بِستار نیست اے کجام بیست ءُ یکمی کرن انت کہ مردم Fistula ءَ جَن ءُ جاتوگ سرپد بنت ۔اے ہما Fistulaکہ جنین ءَ پیشاپ کنگ ءِ سما نہ بیت بس ہما نادراہی کہ آبلک ءِ کارست بیت ءُ Operationنیم کلاک ءِ تہا سرجم دیئگ بیت بلے مردم آئیءَ جِن ءُ جاتوگ ،ناپاک، باریں کجا برتگ ءُ سرکرتگ ۔سائنس ءِ زبان ءَ4th Degree Tearsبزانکہ چار بہار ءِ Fistulaاست۔
1۔Vvf(Vesico Vaginal Fistula)2۔Rvf(Recto Vaginal Fistula)Fsb.4.Perineal Tear.3(Fresh Still Birth)
1۔Vvf(Vesicovaginal)اے ہما Fistulaانت کہ وہدے چُک ءِ سر Pelvisبزانکہ ہَڈ ءِ تہا پسّگ ءَ پد زور دیگ ءَ چہ آئیءَBladder مسانہ ءِ ٹُنگ بوہگ ءَ Vvfگُش انت وہدے آٹُنگ بیت گڑا جنین ءَ سما نہ بیت ءُ ہر ساہت ءُ دمان آئیءِ کسانیں پیشاپ در کئیت ۔
2۔دومی Fistulaءَ Rvf(Recto Vaginal Fistula)اے ہما Fistulaانت پیشاپ ءَ گوں ہوار جنین ءِ Stoolبزاں Waste Materialہم ہر ساعت ءُ دمان در کئیت ءُ جنین ءَ سما نہ بیت بلے اے Fistulaءِ تہا بازیں جنین ءَ وت کشی کرتگ پرچاکہ جنین ءِ سِلّیں بوہ آئیءِ لوگ واجہ ءَ گوں سگگ نہ بوہگ ءُ چاگرد ءِ ناپاک گوٛشگ ءَ چہ جنین مجبور کرتگ پدا آسر وت کشی ءَ سر بوتگ ۔
Fistulaءِ سک باز چیدگ بنت کسان سالی ءَ ہاروس کنئگ ءَ ہم بیت کنت کہ جنین ءَ Fistulaبہ بیت پرچاکہ آئیءِ جِسم ءُ ہَڈ نزور بنت بلے مئے کِرا%85درصد کسانیں زَہگ آروس دیئگ بنت اَنچو گُشئگ بیت کہ Fistulaنیزگار (غریب) مردمانی نادراہی انت ۔گڑا Balochistanءِ تہا پرچا %65درصد ءَ اے نادراہی بیت ؟؟اے گپ ءِ پگر کنگ لوٹ ایت !!۔
سیمی Fistula(Perineal Tear)انت اے انچیں Fistulaانت کہ دوجاہ ءَ ہوار کنت بزاں کہ جنین ءِ پشت ءِ جاہ ءُ آئیءِ دیم ءِ جاہ ءَ یک کنت ءُ اے درگت ءَ جنین ءَ مردم ناپاک گش ایت بلے راستی دگہ رنگ ءَ انت اے نادراہی ءِ علاج Operation Perineal Repairبزانکہ جاہاں جتا جتا کنگ ءِ Operationانت بلے انگت ءَ بسیت ءُ یکمی کرن ءَ زالبول ناپاک گوٛشَگ بیت ءُ گڈسر ءَ FSB(Fresh Still Birth)اے ہما چیز انت کہ چِلگی ءِ تہا چُک ءِ مَرگ اے پڑءَ چاگرد گوں جنین ءَ ظلم کنت پرچاکہ اے بیست ءُ یکی کرن من وہدے Operation Theaterءِ تہا Hysterectomyبوہگ ءَ گنداں گڈا آHysterectomyءِ سوب ہم دائی (بلک)ءِ دست بیت Hysterectomyہما Operationءَ گش انت کہ چُک دانی (Uterus)کشئگ بیت من انگت یک نادراہی یے گشتگ بلے وہدے من جنین آ

دم ءِ سرا ظلم ءُ مردین ءِ راستی ءَ بگش آں گڑا اے گپ ءَ کس مکن کُرت نہ کنت کہ جنین ءَ بیست ءُ یکمی کرن ءَ ہم ہچ 'بِستار دیگ نہ بیت ءُ زند ءِ آدینک پدر بیت ۔وہدے توراستی ءَ گندئے گڑا بگش ئے الم بدلی کئیت ۔بلے آبیست ءُ یکمی کرن نہ بیت بوت کنت دگہ زمانگ ءُ کرنے بئیت ۔
@Labzank
telegram.me/Labzank

"بلوچ زالبول ءُ مئے بندیں چاگرد". Samul baloch

اے گپ ءَ ما هچبر چکّ ءُ پد نہ بئیں کہ بلوچ زالبول ماں تاریخ ءِ تک ءُ پهنات ءَ پہ لج ءُ مڑا، شرم ءُ حیا، شعور ءُ غیرت ءَ بے مٹ ءُ بے درور بوتگ اَنت،
بلوچ زالبول وتی لوگ واجهانی لج ءُ میار بوتگ أنت. راستی ءُ تپاکی، عهد ءُ وفا، دودائی ءُ سرمچاری، ڈیه دوستی ءُ میارجلی، راج دوستی ءُ مهمان جلی، آیانی وشیں سوگات پہ وتی مزاریں بچاں بوتگ ءُ لج ءُ حیا ءُ آیانی گرانبهائیں تعلیم پہ وتی جنکاں بوتگ ءُ هست إنت..
البتہ اے گپ تچک اِنت کہ هرکسی وتئ حق ءُ حقوق بنت. بلئے لهتے انچیں کار است کہ مئے چاگرد گیش ءَ چے گیش اشانی منّوک نہ اِنت. چش کہ بلوچ زالبول تامرانی تہا کار بہ کنت ،کارگسانی تہا کار بہ کنت، سوت بگشیت یاکہ سیاست بہ کنت، گڈا مئے چاگرد اشی ءَ یک عیبے سرپد بیت، اشی ءِ مستریں سبب بے علمی اِنت،،،، باریں کد مئے بلوچ راج اے گپ ءَ پوه ءُ سرپد بیت کہ پہ مارا اے یک بلاهیں وشی ءِ بیت کہ مئے بلوچ زالبول وتئ ٹیلنٹ ءَ دنیا ئے دیم ءَ پیش بدار اَنت ءُ وتئ مارشتانی درنگازی ءَ بہ کن اَنت،، بس وتئ دود ءُ ربیدگ ءِ پادمالی ءَ مکن اَنت پرچہ کہ علم ءُ زانت هم کدی اے سکین ند اَنت کہ یک راجے وتی دود ءُ ربیدگاں بہ شموشیت... ءُ اے گپ ءَ هم چک ءُ پد بوّگی نہ اِنت کہ بلوچ زالبول وتئ بلوچی دود ءُ ربیدگ ءِ شان اِنت،

"8 مولمان" کہ زالبولانی میان اوستمانی روچ گشگ بیت کہ کلیں دنیا اے روچ ءِ درگت ءَ تلّواں مزن مزنیں فیناپِلکس ءُ پوسٹراں گوں سمبہینت لبزانی شہسوار گشتانک دیاں ءُ نشتگیں تماشائی کنداں ءُ لگتمالیں زالبولاں اے باور کنائینگ ءِ جہد ءَ کن اَنت کہ شما چو ھدائی مُرگانی وڑا آزات ئے، زالبولاں پہ اے ادارکیں ءُ دیر نہ جلّیں ساعت کرْن ءَ چہ سرا بوؤکیں زلم ءُ زوراکی نیم بیل ء ِواستہ بہشت درْوشم گندگ ءَ کیت، ما اگاں هیرت بہ چاریں گڈا جنین آدم بنیادم ءِ ردوم ءَ بگر داں آئی ءِ انسان بیئگ ءِ ڈُبّہ وتی نزوریں کوپگاں زرتگ پرچا کہ ما آئی ءَ باز درجگّانی تہ ءَ بہر کت کنیں، اے دنیا ءَ آئی ءِ اولی درجہ مات ئیگ اِنت ءُ دومی درجہ گُہار انت کہ آ ئی ءِ ساھگ ھم مات ءِ ساھگ ءِ وڑا سارت ءُ ھونکّ اِنت، اگاں ما نیکراھی ھساب ءَ بچاریں گڈا ھمے زالبول بی بی حوّا ءِ درْوشم ءَ مارا گندگ ءَ کیت کہ انسان ءِ ردوم دیگ ءَ آئی ءِ مزنیں کردے است، منی ھیال ءَ زالبولانی حق جنی ءِ مستریں زمہ وار ھمے نیکراھی طبقہ اِنت پرچا کہ ایشاں زالبولانی سرا بازیں بندش جتگ. اے درگت ءَ وانندہیں زالبول وت جوانیں وڑے ءَ سرپد ءُ زان اَنت، اگاں ما انسانی راجدپتر ءَ بہ چاریں گڈا ھزاراں سال پیسر زالبول وتواک ءُ وتواجھی آئی ءِ میراث بیتگ،
آ زمانگ ءَ مِلکت ءُ میراث ءِ گمان نہ بیتگ، اگاں ما مرچی اے دنیا ءَ اے درْوشم ءَ گندگءَ ایں گڈا اے ھماھانی برکت اِنت کہ من ءُ تو سائنسی آسراتیاں نوش جان کنگ ءَ اِنت،،،
پرچاکہ آ زمانگ ءَ مردین آدم یلہ چر ءُ بے سنچ ءُ سما بیتگ اَنت، دنیا ءِ دیمروہیں بنداتی درْوشم کِشت ءُ کِشاری زالبولاں وتی نازرکیں دستاں گوں سینگار کتگ، آ زمانگاں ھرچ مِلکت ءُ میراث زالبولانی مڈّی زانگ بیتگ، بازیں دور ءُ نوبتانی گوزگ ءَ پد مردین آدماں زالبولانی آزاتیں ھاکمی ءِ سرا قبضہ کتگ ءُ ربیّتی جیڑھانی تہا ءَ مانگیشینتگ کہ روچء مروچی آ ایردست اَنت، اگاں ما دل پہکی ءُ دلسِتکی زالبولاں اے چاگرد ءُ راجمان ءِ بہرے لیکیں گڈا مارا بروبری بنیات ءَ زالبولاں ھما حق ءُ آسراتی دیگ لوٹیت، کہ اے دنیا ءَ مردین آدماں دیگ بیئگ ءَ اِنت گڈا ما انسان دوست گشگ ءِ لائک بیت کنیں۔
بائدیں ما زالبولانی حق ءُ اُگبالانی پادمالی ءَ مہ کنیں، ھر پڈ ءَ زالبولاں وتی ھمکوپگ ءُ ھمراہ بہ لیکیں ءُ گیشتر زالبولانی وانگ ءُ زانگ ءِ نیمگ ءَ دلگوش بہ دئیں پرچا کہ آ دور ءُ زمانگ شُتہ ۔انیگیں دروء ُزمانگ صنعتی ءُ سائنسی دور انت ءُ اے دور مارا بیدے زالبولاں چیر ترّینیت ۔چو کہ کُردانی زالبولاں وتا دنیا ءِ دیم ءَ پہ وتی آجوئی ءِ ھاترا وتارا منّارینتگ ءُ دنیا ء ِدیمروہیں راج آھانی نیمگ ءَ لنکُک چست نہ کناں پرچا کہ کُرد راج ھر تک ء ُپھنات ءَ "سیکولریں" راجے زانگ بیت مرچیگیں دورءَ کُرد راج شنگ ءُ شانگ ءُ بازیں محاذ ءَ جنگ کنگ ءَ انت بلے آھانی زالبول وتی راج ءِ ھر تک ءُ پھنات ءَ ھمکوپگ ءُ ھمگام اَنت ۔بایدیں بلوچ راج ءَ وتی زالبول وتی پجّار ءِ رکینگ ءِ ہاترا چو کُردانی زالبولانی وڑا زند ءِ ہر پڑ ءَ استیں دور ءِ لوٹانی پدا تیار ءُ ساجو کنگی اَنت گڈا دیمروہیں راجانی دیم ءَ ما پہ مڑاہ ءُ شان گشت بکنیں کہ ما ھم سیکولریں سنچ ءُ سمایے ءِ واھند انت۔اے کاراں عملی درْوشم ءَ کنگ المی انت،

سمّل بلوچ
@Labzank
telegram.me/Labzank

✨صلاۃالتّسبیح / تسبیحِ نماز

✍🏽محمد حملی(ھَمُنتِی)

اے ھم یکے چہ نفلی نمازان اِنت کہ چہ اِشی وانگا انسانا زَنڈیں ثوابے رسیت.

🔹اے نمازِ فضیلت:
فضیلتی سک باز اِنت اے بابتا رسول‌اللہ صلی‌اللہ‌علیہ‌وسلم ئا وتی ناکو مِھتر عباسا پہ اے نمازِ وانگا باز سفارش کُت.
ؤ گوشتی: چہ اے نمازِ وانگا پھکیں گناہ معاف کنگ بَنت، چیرکائیں گناہ، ظاھریں گناہ، گونڈیں گناہ، ٹوھیں گناہ، درست چہ اے نمازِ وانگا شودگ بَنت.
ؤ گوشتی: اگہ بیت کَنت ھر روچ اے نمازا بوان اگہ نبوت ھفتگے یک رندے بوانی، اگہ نبوت ماھے یک رندے اگہ نہ گُڑا اَلّم وتی زِندا یک رندے بوانی.

🔹صلاۃ التسبیحِ وانگِ رَھبند:
1- نماز وانوک پیسر چہ ھرچ چیزا چار رکعت نماز تسبیح نیت بکنت.
2- رند چہ "سُبحانک اللّھم..." ؤ "اعوذ بااللہ..." ؤ "بسم اللہ..." الحمدلله..." ؤ سورہ ءِ وانگا ؤ پیسر چہ رکوعا پانزدہ گَشتا «سُبحان اللہ و الحمدللہ و لااِلٰہ الااللہ و اللہ اکبر» ئا بوانیت رندا پہ رکوعا برَوت.
3- ماں رکوعا رند چہ اِشی کہ رکوعِ تسبیحات وانگ بوتَنت، دَہ 10 رند ھمے بُرزِ تسبیح وانگ ببنت.
4- وھدے کہ چہ رکوعا چِست بوت ؤ رند چہ «رَبّنا و لک الحمد» ءِ گوشگا، 10 رند پدا بُرزادی تسبیح وانگ ببَنت.
5- اولی سُجدہ ءِ توکا رند چہ سجدہ ءِ تسبحاتا 10 رند دگہ ھمے تسبیحانا بوانیت.
6- دوئیں سجده‌یانی میانا ھم 10 گَشت اے تسبحاں وانگ لوٹنت.
7- دومی سجدہ ءِ تھا رند چہ سجدہ ءِ تسبحانی گوشگ10 رَند ھمے تسبیح وانگ ببَنت.
8- وھدے کہ دومی سُجدہ تمام بوت، «اللہ اکبر» گوشگ ببیت، نہ باید نماز وانوک چِست ببیت بلکیں وَتی جاھا بنندیت10 رند دگہ ھمے تسبحاں بوانیت.
9- رندا اَبید تکبیرِ گوشگا پہ دومی رکعتا چِست ببیت.
گوں اے حسابا ماں ھر رکعتے 75 بار اے تسبیح وانگ بَنت.
10- ماں گُڈّی سَئیں رکعاتا اے تسبیح ھمے پیما وانگ ببَنت.
11- ماں دوئیں التحیّاتاں پیسر چہ التحیاتِ واگا اے تسبیحانی وانگ ھژدری ؤ لازِم انت، بزاں پیسرا وانگ ببَنت.
12- اگہ ماں یک رُکنے لھتے چہ اے تسبیحاں بے ھیال کنگ بوتَنت گُڑا ماں دگہ رُکنا وانگ بہ بَنت، بزاں اگہ ماں رکوعا تو 8 رند اے تسبیح ونتَنت گُڑا ماں سجدھا 12 رنداِش بواں، آ دگہ جاہ ھم ھمے پیمَنت.

📚سرچَمّگ: احکام و مسائل نماز، تاکدیم: 151، مفتی عبدالغنی محمدی.

⏬بلوچی نبشتانک: ⏬

اَگـاں مـنـی گـپ ءَ کـَـسـے سـرپَـد بـہ بـیـت .
چـہ مـئـے مُـلـک ءِ هَـکـیـمـے اِش جُـسـت کـُـرت : مَـروچـاں شـمـئـے مُـلـک ءِ جـاوَر چـون اِنـت ؟!!!... هَـکـیـم ءَ گـُـوَشـت مَـروچـاں مـئـے مُـلـک چـو کـہ بَـنـدیـگـجـاهـے ءِ مَـسـیـتـے بـوُتـگ ءُ مـردُم مـاں آئـی ءِ تـهـا آدیـنـگ ءِ نُـمـاز ءَ وانَـگءَاَنـت :
نـیـکـمَـرد کـُـوشـوکـے .
بـانـگ دَیـوک ٹـگـے .
نُـمـازی دُزّاَنـت .
بـلـے درُسـتـاں ریـشّ پـراَنـت.
ادَبــی هَـکـیـم
@Labzank
telegram.me/Labzank

(آزمانک,, مات ءِ اعتبار،، حبیبہ پیر جان )

بزّگی، واری، بے سُبارگی، ھمشامی داں مُدّتاں اِشانی ھمراہ اتنت، بزّگیں نور محمد ءُ ماھکان مزنیں مشکلے ءَ گوں شپاں روچ کنگ ءَ اتنت- کسانیں بچکّیں چُکّ اِشاں اسکول ءَ داتگ اتنت- نور محمد ءَ برے دھکان کاری، برے مزدوری، برے یک کارے کت، ماھکان ءَ لوگ ءَ گُد دوچی کت، اَنچو اشانی شپ ءُ روچ گوْزان اتنت-
چُکّ ریّش ءُ بَروتاں کپت اَنت، بلے بزّگ اتنت بے روزگار اتنت- ھمے تہہ ءُ توکاں اناگہ نور محمد بزگ بیمار بوت- داں چرے دنیا ءَ سفر ئِے کت، نوں ماھکان ءُ چکّانی عزانی گیشتر بوت- اناگہ یکروچے اشانی دُور سیادے اتک ءُ ماتی ماھکان ءَ گشت ئِے کہ یک چکّے ءِ پاسپورٹ ءَ جوڑ کن من درملک ءَ بران ئِے-
اندگہ روچ ءَ ماتی ماھکان ءَ وتی دوشتریں چکّ شاہ میر کہ عقلمند ءُ بودناکیں چکّے ات- گشت ئِے وتی پاسپورٹ ءَ جوڑ کن، مئے سیاد فقیر محمد ترا درملک ءَ بارت گوں- مات ءَ بیچارگ ءَ اینگو آنگو شت کمو پنڈ ءُ مور کت، زرّ جنگ شاہ میر ءَ دات کہ بُرو وتی پاسپورٹ ءَ جوڑ کن، پاسپورٹ جوڑ بوت- اشانی نقل دیم دات اَنت، لھتیں وھد ءَ رند ویزا اتک، بلے نوں پہ کرایہ ءَ زر نیست ات-
ماتی ماھکان ءَ وتی بزّگی ءُ لاچاری ءِ دور کنگ ءِ ھاترا وتی گوش ءِ دُرّ بھا کت اَنت ءُ شاہ میر ءَ دیم دات- پرے ھاترا کہ مئے دیم تر ءِ روچ آسُودگ بنت-
شاہ میر ءَ ماہ پہ ماہ زرّ دیم دات- ماھکان ءِ زند آسودگ بوھگ ءَ ات- ماھکان ءَ پہ وت ءَ لوگے اڑکت-شاہ میر یک ءُ دو موکل ءَ اتک ءُ واتر بوت، پدا اتک پہ موکلاں گڑا مات ءَ آروس دات- لھتیں وھد نہ گوْست شاہ میر بدل بوآن بوت- چیاکہ شاہ میر ءِ وسّیگ فاطمہ شُومّ ءُ شیطان دماگیں زالے ات- باریں آئی ءَ چونیں تاویز ءُ جاتُو کت، کہ شاہ میر وتی چہ مات ءَ چٹ بیھال بوت- وتی وسیگ ءِ لوگ ءَ شُت ءُ پہ وتا لوگے بست-
دومی نیمگ ءَ بیچارگیں مات پریشان، دلترک پدا بیمار بوت کہ آئی ءِ دوستیگیں چکّ شاہ میر ءَ آ یلہ دات ءُ وتی لوگ بانک ئِے زُرت-رند تر ءَ شاہ میر ءَ نہ مات ءِ ھال گپت نہ زرّ ئِے دیم دات- ماھکان بیچارگ نیم گنوک بوت ءُ مُرت-
لھتیں مُدّت ءَ پد شاہ میر چہ درملک ءَ کشّگ بوت ءُ ملک ءَ دیم دیگ بوت- لھتیں زرّ ئِے گون ات کہ وسّیگ ءُ آئی ءَ وارت اَنت- میزاں میزان ءَ زرّ ھلاس بوت انت آئی ءَ دگے کار نزانت، دیمترا وسّیگ ءَ چہ لوگ کشّ اِت کہ تو کار نہ کنئے چکّاں لاپ نہ دیئے-
شاہ میر مات ءِ حقّاں گپتگ ات، شاہ میر ءَ مات ءِ اعتبار پرْوشتگ ات، دل ءِ سوک ءَ شاہ میر ءِ سر پہ ھیروئن ءِ بدیں نشہ ءَ کپت، مرچی باندا آ بازاراں کاٹون ءُ کاگد چنت ءُ وتی نشہ ءَ پورا کنت ۔۔۔۔۔Salman
@Labzank
telegram.me/Labzank

Aabed.adam Sh..shabir:
#متاچاں درد چارینتگ کرارءِ سھت تنیگ انت
لگشتگ رنگ اکرارءِ ودارء سھت تنیگ انت

گمءِ شاھیم لونجان انت سرءُبھتاں منی عابد۔۔
زمانگ رنج بکشائیت ھزارءِ سھت تنیگ انت۔۔

Besam:
@Labzank
telegram.me/Labzank

ھجالت
زاھدہ رئیس راجی
آئ ءَ سیمی رند ات کہ چَہ کمپان ءِ مٹ ءَ آپ کشگ ءِ جُہد ءَ بے سوب بَیگ ءَ اَت کہ دم پہ ساھت ءَ یک نہ یک مردمے پیداک ات۔ انوں ھم گونڈوکیں نادل ءَ لئیب لئیب ءَ ھمے نیمگ ءَ سرکش اتگ اَت کہ آئ ءِ چمپل ءُ پادانی توار ءَ گوں ایشی ءِ دست ءِ گلاس لگوشت ءُ جہل کپت۔
نادل تچانی ءَ ایشی ءِ نزیک ءَ اتک ، اشتات ءُ چو مزنیں مردمانی پیم ءَ جُست ئِے کُت کہ چے بیتہ ۔
وتی ھجالتی ءَ چیر دیان ءَ دراہینت ئِے کہ ھمسائیگانی کپودرمٹ ءِ دپیگ ءِ سرءَ پر رتکگ اَتنت اسٹیل ءِ گلاس ءِ دور داتگ ۔
نادل ءَ چَہ زمین ءَ گلاس چست کُت ءُ دیم پہ چَل ءَ روگ ءِ وھد ءَ گوشت کہ ادُّل گلاس ءَ ادءَ ایر مہ کن ، من ءَ آپ لوٹ ایت من وت چَہ چُل ءِ پاٹی ءَ زوران ئِے ۔
آ ھیران ات کہ نادل اگں دوبر اتک ءُ گلاس ءَ وتی جاہ ءَ مہ گندایت پدءَ بازیں جُست پُرسے کنت گُڑا ؟
بلے تُنّ ءِ ھلونگی ءَ نُک ئِےدراتکگ ات ءُ نئیشت ئِے کہ گیشتر بہ جیڑایت ءُ دوبر شُت گلاس ئِے زرت ءُ نوں ایشتاپی ءَ مٹ ءِ دپیگ ءَ پچ کنگ ءَ لگ ات کہ چَہ پدانکاں کسے ءِ ترندیں گامانی توار چست بیت۔ ایشی ءِ جہلیگ جہل ء کپت ءُ بُرزیگ بُرز ءَ ۔ ھما دمان ءَ گلاس ئِے سریگ ءِ تل ءَ چیر دات ءُ وت شُت چُل ءِ پُشتی دیوال ءَ چیر بیت ۔
ساہ ئِے تینزی ءِ سرءَ رویا کنگ ءَ ات ءُ ارس ئِے رچگ ءَ اتنت دل ءَ گریوگ ءُ گوں وت ءَ تران کنگءَ ات کہ ” مات ءَ چے زلورت ات کہ انچو روچ کسی لوگ ءَ پُرساں بہ دارایت نزانت کہ اُردوکیں سمّی بزگ اِنت ۔ ۔ ۔ “
ھمے وھد ءَ گرانیں گام نزیک آیان بیت اَنت ءُ چَہ ڈنی دروازگ ءَ درکپت ۔ دل ئِے دل ءِ جاگہ ءَ اتک ءُ چَہ اسپیتیں پشک ءِ بُش ءَ زانت ئِے کہ اے مستریں ناکو بیتگ کہ انوں ڈنّ ءَ درکپتگ ۔
دوبروتی منزل ءِ نزیک ءَ روگ ءَ پیش جیڑگ ءَ ات کہ نوں تری ھرکسے بئیت آ وتی کار ءَ سرجم کنت بلے اگں اناگہہ کسے بئیت جُست بہ کنت کہ چے کنگ ءَ ئے گُڑا چے کنت ؟
وتی اے جُست ءَ آئ ءَ گنترنزور ءُ پریشان کُت ۔
”یارب تو مارا پرچَہ چوش کُتگ کہ ما انچو مجبور ایں “ آ نوں دل ءَ گریوگ ءَ ات ۔ برے وتی جند ءَ ڈوبارگ ءَ ات ءُ برے مات ءَ یات کنگ ءَ ات کہ چارروچ بیت تروزتک ءِ پُرس نامی ءَ مُلک ءَ شُتگ ۔ آ مات ءِ یکیں ءُ دوستاکیں جنیں چُکے اَت ءُ پیسرءَ مات ھرکج ءَ شُتگ گوں وت ءَ ھمراہ ئِے کُتگ بلے لہتے ماہ بیت کہ مات ءَ گوشتگ کہ نوں تو مزن ئے ھرکج ءَ من ترا بُرت نہ کن آں ۔
انگت آ چْل ءِ پُشتی دیوال ءِ نیمگ ءَ اُشتاتگ ات کہ چم ئِے چُل ءِ پُشت ءِ پسیل ءِ درءِ سرءَ کپت کہ کانگی آئ ءِ سرینگ ءَ اتنت۔
ایشی ءِ جان ءَ انچو زیکت ھم نیست ات کہ کانگیاں بال دات بہ کنت ۔ دمانے آھاں چاران بیت کہ کانگی نوں چداں چست بیتگ ءُ کمپان ءِ کُنڈی درچک ءِ سرءَ شُت نشت انت۔ ھمے دمان ءَ چم ئِے پیسل ءِ پچیں درءَ کپت کہ توکی نیمگ ءَ آپ ءِ پُریں بالٹی یے ایر اَت۔ ایشی ءِ چم روشن بیت انت۔
ھما دمان ءَ پُترت ءُ درءَ کڑی کنگ ءَ رند پسیل ءِ بالٹی ءَ ایریں دزنماز ءِ آپاں دست ءَ کُلک کنان ءُ ورگ ءَ لگ ات ۔ دگہ وھدے بیت انت سک دل ءَ شورئِے کُتگ ات بلے اے ساھت ءَ آئ ءَ اے آپ چَہ جہان ءَ شرکن تر ءُ سپاتریں آپ مارات اَنت۔
تُن ءَ پہ شری پروشگ ءَ رند آئ ءَ سارتیں ساھے زرت ءُ دست دیم شُشت انتءُ زبوکی جت ءُ دیم پہ نشار ءِ اوتاگ ءَ شُت ۔
نشار زیبوک آئ ءِ کسانی ءِ دزگہار ءُ تروزتک ات کہ شش ماہ بیت اے لوگ ءَ سیر کُتگ اَتکگ ات۔ اے لُڈان ءُ روان ات کہ چم ئِے نشار ءِ اوتاگ ءِ کلہوکے پچیں دریگ ءِ سرءَ کپت۔ ایشی ءِ چم درگُڑاتنت ۔ پہ وت ءَ الّم کنگ ءَ دوبرگ چارگ ءَ لگ ات۔
نشار ءِ دیم ءَ مستریں برات اکرم ھم نشتگ ات ءُ آ گوں دلجمی ءَ سُبارگ کنگ ءَ ات۔
ایشی ءِ مجگ ءَ کار نہ کُت۔
مات ءِ ھیال ءَ کپت کہ چَہ پُرساں روگ ءَ پیسرسوج دَیگ ءَ بیتگ کہ ھاسیں روچاں جنین روچگ نہ بنت ، اگں بہ بنت گناہ ءِ رس ایت بلے بہ چار ورگ ءِ وھد ءَ ھچ مردین ءِ چم سرءَ مہ کپ ایت کہ اگں آئ ءَ مالوم بیت کہ تو اے سوب ءَ روچگ نئے آئ ءِ گناہ ھم تئ بڈءَ بنت ۔
Besam:
@Labzank
telegram.me/Labzank

گُشــتـــــن

ھر راز ءَ وتئ سنگت ءَ مہ گُـش،
بیت کنت کہ روچے تئ دشمن بہ بیت
ءُ ھر تکلیف ءَ وتئ دژمن ءَ سر مہ کنت کہ بلکہ یک روچے گوں تو دوست بہ بیت
Besam:
@Labzank
telegram.me/Labzank

آزمانک
ائید ءِ ٹیکی

مرچی چہ گل ءَ منی پاد زمین ءَ نہ اِت اَنت کہ ابّا پیداک اِنت، منی واستا ائید ءِ نوکیں گد ءُ چمپل گون اِنت ئِے. من گوں ھمے ھیالاں تچان ءُ درک بندان آں چہ وانگجاہ ءَ دیم پہ لوگ ءَ روگ ءَ اِت آں.
لوگ ءِ سربوھگ ءَ گوں دروازگ پچ کُت گڑا دیست کہ شدری گوں ملوریں چیدگ ءُ ارسی ئیں چماں من ءَ چارگ ءَ اِنت،، دومی نیمگ ءَ مات ءَ دیوال ءَ تکہ داتگ اَت ءُ دست ئِے سر ءَ اِت اَنت، مئےلوگ چہ مردماں پُر اَت..
من اجب ھیران ءُ پریشان بیت آں کہ گپ چے اِنت. من ءَ لرزگے چیر کپت ءُ ترس ءِ آماچ بیت آں.
" شدری چے بیتگ ءُ شُمارا چون اِنت؟ "من گوں ناشناسیں ترسے ءَ آ جست کت، بلےشدری ءِ گویاک شتگ اَت ءُ بس ارساں زبان پر بوتگ اَت. آ گوں ارسی ئیں چماں بس من ءَ چارگ ءَ اَت.
"منی گھار! ترا چون اِنت کہ تو ھچ نہ گْش ئے؟ "من آ دست ءَ گپت ءُ سُرینان ءُ جست کت. بلے شدری ءِ چمانی نِھنگ ءَ بس ھار ءِ چک ءَ ھار کتگ اَت.
"منی مات چے بیتگ شُما پرچا ھچ نہ گْش اِت پرچا گریوگ ءَ اِت؟ " من مات ءَ جست ءَ اِت آں..
"اماں بہ گْش، ناں! چے بوتگ ؟"
"تئی پت نوں پہ تو ائید ءِ گداں نیار اِیت"
گوں ھمے گپاں مات ءِ چیھالاں آزمان زمین ءَ آؤرت ءُ آئی ءِ سد رگ ءَ چہ رگے ءَ ھم نہ جت.

آسپ یات
@Labzank
telegram.me/Labzank

🌹🌹 *واھشـت ءِ کـپ*🌹🌹

*مورے نہ وارت گوش ءَ تئی پیسک ایت منی دل بزگیں*
مھر ءِ ھلاھوش انت من ءَ ھیسک ایت منی دل بزگیں

*داں وھدے ءَ گموار ات ئے مَرچاں گوش ئے سار ءَ نہ ئے*
تاب تاب وارت چو ھَنڈلاں چیسک ایت منی دل بزگیں

*روچے دوصد رندا بہ بی ھمبیر منی" واھشت ءِ کپ "*
پہ نیادی ءَ دریک دریک کنت دریک ایت منی دل بزگیں

*ھال ءَ دل ئے سر پد نہ انت ھچکس کسی*
مست ءَ چو سر سستگ گوش ئے دریپ ایت منی دل بزگیں

*ٹھک ایت ءُ ٹاکار ایت دل ءِ واھگ پہ گوم*
رُمبے رچ ایت رُمبے تَچ ایت دریچک ایت منی دل بزگیں

*مھر ءِ ھرابیں گواتے ات دل گپت ڈھور بیت سرشکین*
شوھاز ءَ چو پاساں شپی پک ایت منی دل بزگیں.

🦋 *یـاسـین شـوھـاز* 🦋
4/5/2017
🌴 کـورُشـیں گـال 🌴

میریں بلوچ

بیا او منـی میـریں بلـوچ
کَمُّک بـہ کن تـو سمج ءُ سـوچ
دائن مہ بَـے تو شو شک ءُ کروچ
بیـا گیرت ءِ پَشک ءَ بـہ دوچ
زُلـم ءَ چـہ اُنڈال ءَ بـہ کـوچ
اُمـر ءَ را پشـکپتگ دو روچ
میـریں بلـوچ پـر چـہ چُش ئے
دائم چـو سیاہ مار ءَ جُش ئے
وت ماں وت ءَ کُشت ءُ کُش ئے
اِنچـو مـہ کن واجـہ پُرش ئے
مـرد پـہ وتی نام ءَ مہ مِر
شیـر بَـے وتـی ھکّ ءَ بگـر
اے نـوبت ءُ دَورے دگـر
کار ءَ گـوں کانون ءَ بگر
تـرّ اِیت دگـہ رنگـے جہـان
کار ءَ نیـا اَنـت بیھ ءُ کان
زَھــم ءِ بـدل اَسـت اِنـت زبـان
یکـجاہ بئیت پِیــر ءُ جَــوان
کُـربان بـہ کنـت ءَ مال ءُ جـان
گُمـسار بیـت زُلـم ءِ نشـان
وشـنـام بیــت تئـی ھـانـدان
گیشـتـر مـہ کـن مُلّا بیـان

✍شاھر: مُلّا آبابگر کلمتـی
شنگ کار: لبزانکی مجلس کلمتی کاروان


Besam:
@Labzank
telegram.me/Labzank

🌹🌷🌹🌷🌹🌹🌷🌹🌷🌹🌹🌷🌷
رمدان کاٹاریں جتائی ءَ چـہ پـد ائید ءِ وش ءُ شادھانی روچ ءَ شمارا گوں لوگ مردماں مراد بات گُشاں ، مـئے دوا انـت چُشـیں ھزاراں ائید شُمے بہر ءُ نسیب ءَ بات!

🌹🌹🌹🌹🌹🌷🌷🌷🌷🌷🌷🌷


Besam:
@Labzank
telegram.me/Labzank