» دُکتر کِنگ کانگ «

یـک شپـے بال کُـت مــن شُتاں چِین ءَ
کـہ مـن ءَ گوشـتگ چـو منـی دیـن ءَ

پَشُّـما پَرز اِنــت وانـگ ءُ زانـگ
وانـگ ءُ زانــگ تنگـہ ءِ چانـگ

گوشت دل ءَ جھ جَن توھمـے ھیـن ءَ
پـہ ھمـے کار ءَ تـو بـرو چیـن ءَ

مـن شُتاں چین ءَ داں کہ سی سال ءَ
زانـتکار بـوتاں اود ءِ کُلّ ھـال ءَ

اود ءِ راجـانـی گال ءُ گالـبنـداں
دیـن ءُ دنیائی راہ ءُ رھـبنـداں

دپـتر ءَ چیـن ءِ سیاسـت ءَ چیـن ءِ
ورد ءُ پـوشاک ءُ آدت ءَ چیـن ءِ

چاپ ءُ نازینـک ءُ سیـر ءُ سُـرنایاں
کار ءُ بـاران ءُ سَـٹ ءُ سـودایـاں

مـال ءُ مـالــداری ءُ کِشـار کـاری
لیـب ءُ گـوازی ءُ بـور ءُ بـور سـواری

جـاگہاں سَیـلی تـرّ اِتاں شـرّیں
چیـن ءِ دیـوال دیسـت آپـت ءُ ٹـرّیں

چـہ دُرھـیں چیـزاں زانـتکار بـوتاں
داکـتری سـرجـم کُـت سـوار بیـتاں

نـام منی چیـن ءَ دُکتر کِنـگ کانگ ات
ناموں نامدارءُ ھرجاہ شنگ شانگ ات

داں کـہ سی سال ءَ مُلـک ءَ در بوتاں
وھـدے کـہ لـوگ ءَ آتـک ءُ سـر بوتاں

مـولـوی غـوث ءَ دات گُـڑا پَتـوا
ھـچ تُشـے زوراک ءَ نـہ کُـت پَـروا

گـوشت ئے آ اے نام ءَ بـہ مَٹّین ایـت
دومـی آ پاکـیں کلمـہ ءَ بـوان ایـت

کِنگ کانگ نـامـے نـہ انـت مُسلـمانـی
مـئے مُسلـمانـی ءُ ، دیـن ءُ ایـمانـی

کلمـہ ءِ وانـگ پـرز انـت اے رنـگ ءَ
اِشـکتگ مـن کـہ دکـتر کِنـگ کانـگ ءَ

ونـتگ بیجینگ ءَ رنـد ءَ سنکیانـگ ءَ
دُکـترا کُرتگ ، میـر ءَ ھـانگ کانـگ ءَ

بیجینگ ءِ مـردم سکّـیں مُشک وار انـت
مُشک ءَ چـو مال ءُ دلـوت ءَ چـار انـت

دُکـتر کِنگ کانگ ءَ ونـتگ ءُ در بُـرتـگ
دُکـترا مُشـکانـی سـر ءَ ئـے کُـرتـگ

کلمـہ ءَ بـوان اِیـت واجہـیں کِنگ کانگ
بـوشت ایـت یکپاد ءَ ، ءُ بـہ دنـت بانگ

بانـگ ءَ رنـد بگـوش ایـت آ ماں دیـوان ءَ
گـوں دلـے پاکـیں سِـتک ءُ ایـمان ءَ

کـہ مُشک ءِ گـوشت آئـی ءَ ھـرام باتـیں
شـالا آئـی ءَ مـرددہ شـام بـاتــیں

نــی گُـڑا منّـاں مـــن مُسلـمانـے
یـا نـہ مُشـکواریں چیـنـی شیـتانــے

شائر: آبِد آسکانـی
شنگ کار : لبزانکی مجلس کلمتی کاروان

Besam:
@Labzank
telegram.me/Labzank

(آزمانک,, وشگپّ،، عباس علی زیمی )

گنگزار ءَ وتی سنگت براھیم ءِ لوگ ءِ دپ ءَ کاپر ءِ چیر ءَ کمرزانی یے جتگ ات ءُ گوں ھمے سنگت ءَ وش گپّی ءَ دلگوش ات- براھیم ءِ لوگ بانک مھربانو ءَ پہ آئی چلیم پِرکتگ ات ءُ آئی ءِ دیم ءَ ایرکتگ ات- گنگزار ءَ ھمے چلیم ءِ نل دپ ءَ اَت ءُ پُوکّ پُوکّے مان اِت ئِے-اد ءُ آود ءِ گپاں آئی ءَ وتی دو کلاک بباد داتگ ات انت آئی ءِ جند ءِ لوگ چہ ھمے سنگت ءِ لوگ ءَ باز دُور ات- گنگزار ءَ اے ھیال گوْر نہ اَت کہ آئی ءَ پہ یک کسانیں چیزے ءَ وتی لوگ بانک ءِ یک کلوھے پہ وتی ھمے سنگت ءِ لوگ بانک (مھر بانو)ءَ گون ات کہ اے کلوہ سک المّی ات-
برے برے کسانیں چیز پہ کارے ءِ شر کنگ ءَ مزن لیکگ بنت-اے باور ءَ گنگزار ءِ لوگ بانک ءِ دل ءَ کسے ءَ جست بہ کتیں کہ پہ آئی اے چیزّ اے وھد ءَ چہ آئی ءِ ساہ ءَ شر تر اَت-بلے چلیم ءُ وشگّپی ءِ ھیل ءَ باج برتگ ات ءُ ھما کلوہ کہ گنگزار ءَ گون ات، ھیل ءِ ھرجاں بوتگ ات ءُ آ چہ اے گپ ءَ بیھال ات- پرچا کہ بے تامیلی ءُ سرزوری ءُ آئی ءَ وتی لوگی ءِ گپ مان نیارتگ ات ءُ انچیں گپّے لیکیتگت ئِے- چونائی ءَ کلوہ ءِ دست گرگ ءِ وھد ءَ آ سرپد ات کہ اے سک الّمی انت- بلے زوت چہ وتی یات ءَ جتا ئِے کتگ ات-
بازیں بزاں بنی آدم چہ کسانیں ردی ءَ بے تامیلی ءَ یک ٹوھیں پشومانی ءِ گوْرے ءَ کپ ایت ءُ رند ءَ سر سر جنت بلے ھمے ردی ءَ ساپ ءُ سلّا کت نہ کنت-پرچاکہ وھدے، وھدکہ چہ آئی ءِ دست ءَ بہ دلگوش ایت- گڑا آئی ءَ را زُوت دسگرگ مزنیں جنجالے ءَ دؤر دنت-چونائی ءَ ھمک کار ءِ وتی وڑ ءُ پیمے بیت، بزاں کہ باز بر ءَ گوں اشتاپی ءَ کار کنگ نُکس دنت-پمشکا گشگ بوتگ کہ "سگ ءِ اشتاپ گلڑّ ءِ کوکار ایت-،، بلے باز وھداں کارے ءِ زوت کہ کنگ ھم نکس دات کنت-
اد ءَ چلیم ءِ سرکیل ءَ پہ اشکراں چُلّ ءِ سر ءَ روگ ءُ آیگ ءَ دم بُرتگ ات- بلے اے دوئیں سنگتانی وشگپّی ءَ جھوک نہ جتگ ات انت- ءُ آؤد ءَ گنگزار ءِ لوگ بانک ءَ ھمے چیز ءِ رھچاری ءَ دو کلاک گوں گریوگ ءُ پیکگ ءَ گوازینتگ ات ءُ آئی ءِ چم لوگ ءِ در ءَ سکّ ات انت- کہ بلکیں اے دمان ءَ نا آ دمان گنگزار گوں ھمے چیزّ ءَ سربیت- ھمسائگیں جنین آئی ءَ را تسلّا دیگ ءَ ات انت-آ برے گوں ھُدا ءَ رھم ءِ دزبندی ءَ کنگ ءَ ات ءُ برے وتی بچ داد ھُدا ءَ گشگ ءَ ات کہ "داد ھدا،، بچار تئی پت پیداک انت یا ناں؟ من زاناں جاگہ یے نشتگ ءُ وشگپی ءَ انت ءُ من ءَ گوں گمان کولنجے کتگ؟،، -آئی ءَ پہ اے کار ءِ شر کنگ ءَ وتی درستیں جھد کتگ ات انت- بلے نا امیت بوتگ ات- نوں بس ھمے یکیں چیز ءِ باور ءَ وداریگ ات کہ پہ آئی، آئی ءَ وتی چکّانی پت براھیم ءِ لوگ ءَ دیم داتگ اَت-
ودار ءُ لوٹ، ھر دوھیں مروچی یک شور ات انت ءُ گنگزار ءِ لوگ ءَ آئی ءِ لوگ بانک ءَ را بیم ءُ تُرس ءِ آماچ اش کتگ ات- ءُ ھمے چیز ءِ باور ءَ آئی ءَ را انتزار ءِ پنجگاں مان اِش تپاتگ ات- بلے وھدے چرے لوگ ءَ باج برگ ءِ نا امیتی ءَ سرکش ات، گڑا ودار ءَ وتی دیم ترّینت ءُ لوٹ ءَ پاد داشت انت-
اے درستیں تکانسری، گریوگ ءُ پیکگ ءِ بنگپ ھمے کسانیں چیز ات کہ مروچی گنگزار ءِ لوگ بانک ءَ آئی ءِ لوٹ ھست ات- بلے! نوں دمانے ساری ھمے چیز ءُ آئی ءِ ھاجت ءِ نیام ءَ مان نیارتگ ءَ وت ءَ را جاگہ داتگ ات ءُ ایشی ءِ پہ وھد دست نہ کپگ ءَ اَرواھے چہ یک کنٹے ءَ در شتگ ات- لوگ ءِ تہ ءَ یک سے سالی چکّے ءِ مُردگیں جون ایر ات ءُ آئی ءِ کشّ گوْر ءَ میتگ ءِ جنین پُرسیگ ات انت- اے چُکّ سَوَبے گپتگ ات کہ چشیں سَوَب ءَ گوش اَنت کہ چکّ "دو شیراں کپتگ،، ءُ اے چکّ ھمے سَوَب ءِ دیناں شتگ ات- گنگزار ءِ لوگ بانک ءِ گریوگاں لوگ سر ءَ زرتگ ات ءُ آئی ءِ بچ داد ھُدا ءَ وتی پت ءِ شوھاز ءَ دیم ماں براھیم ءِ لوگ ءَ کتگ ات- ۔گنگزار انگت گوں وتی سنگت ءَ وشگپّی ءِ دیوان ءَ ات کہ آئی ءِ ھمے دوازہ سالی بچ داد ھدا ھمے جاگہ ءَ سربوت ءُ وتی پت ءَ را ھال ئِے دات کہ "ابّا! بالاچ بیران بوت- نوں چہ ماسی مھربانو ءَ "پاسپان،، میار، وت بیا-،،


Besam:
@Labzank
telegram.me/Labzank

🌴🌴مھمدبلوچ🌴🌴
زندگی ، چے اِنت؟
زندگی مَرگ ءِ چَپّ اِنت،
اگاں نہ مُرتگ ئے،
گڑا بہ زاں ،
زندگ ئے،
اگاں درد ءَ مار ئے ،
گڑا بہ زاں ،
زندگ ئے،
مُردَگ درد ءَ ھِچ ،
نہ مار ئے ،
اگاں اَنگت ساھ کشّ ئے،
گڑا بہ زاں ،
زندگ ئے،
اگاں گِند ئے،
اگاں کند ئے،
اگاں اشکن ئے،
اگاں گریو ئے،
اگاں زھر گر ئے،
اگاں گَل بہ ئے،
اگاں برانز گِر ئے،
گڑا بہ زاں ،
زندگ ئے،
بلے اگاں گِچین کن ئے،
ءُ وتی دل ءِ تب ءَ،
کن ئے،
گڑا بہ زاں کہ ،
زندگی کنَگ ئے…
اگاں نہ وشیّان ءَ،
وشّ کن ئے،
اگاں نگیگیان ءَ ،
گیگ کن ئے،
اگاں نزوریان ءَ،
واک کن ئے،
گڑا بہ زاں کہ،
زندگی کنَگ ئے…
گڑا زندگی ءَ ،
زندگی کن ایں…

Besam:
@Labzank
telegram.me/Labzank

بلــوچــی بتل

#آدگـہ برے بیتگ کہ جاپَر ءَ ھرے بیتگ

بزانت: مردمے ءِ کہ یک وھـدے ھستیانـی واھُند بہ بیت ءُ پـدا بہ کُٹّ ایت یا ھما ھستی چہ دست ئے بہ روت

پژدر: اے بتل کسّہ چوش انت کہ جاپر نامـیں کوتاہ اگلـیں مردےءَ پِشّی یـے داشتگ ات ھردیں کہ جاگہے سپرے ءَ سر گپت گڈا جنین ءِ سرپد کُت ءُ گوشت کہ پِشّی ءَ پلاں پلاں وھد ءَ اینکس اینکس ورگ بـدئے ـ
ھمی پیئم یک رنـدے جاپر گوں وتی ھر ءَ پہ سپرءَ در کَیت ءُ راہ ءَ اچانگ یاد ءَ کپ ایت کہ من جنین گُشگ ءَ بـے ھال بیتگ آں کہ من پِشّی ءَ ورگ داتگ ءُ دراتکگاں چو مہ بیت کہ جنین دو بر پِشّی ءَ ورگ بہ دنت ـ گوں ھمے ھیال ءَ مردءَ وتی ھر ءَ جنگلے ءَ بست ءُ وت پہ دْرکءُ میدان لوگ ءَ شُت ـ وھدے جنین ءَ اے ھال ءَ دیست جُست ئے کُت ُ ُ تئی ھر کُج انت ءُ ترا ھئیر انت چو میدان ءُ پیداک ئے؟ ُ‘ مـردءَ پسّہ دات ’’ ھر من جنگل ءَ بستگ ءُ اتکگ اں کہ روگ وھد ءَ من تئی ھال دیگ ءَ بـے ھال بیتگ اتاں کہ من پِشّی ورگ داتگ ءُ در اتکگ آں من چار اِت کہ پدءَ واتر مہ کن آں ءُ ترا ھال مہ دئے آں تو دو بر پِشّی ءَ ورگ وارین ئے “ جنین زھر گپت ءُ گْوشت ے ’’ تو سوچ پِشّی ءَ برو ھر ءِ ھال ءَ گر ـ جنگل ءَ داں اے وھد ءَ ھر بلاھے ءَ دِرتگ ـ مرد پدا تچانی ءَ پہ ھر ءَ شُت دیست ئے داں ھر پیسرا ھپتار ءَ وارتگ ءُ پالام کَپتگ ـ مرد ءَ پالام وتی بَڈّا کُت ءُ پشل پشل ءَ لوگ ءَ واتر بیت ـ
یک روچے کاروانے پہ سپر ءَ سر گپت ءُ چو مدامی وڑا آ جاپر ءِ گورا ھم آتک انت ءُ جاپر اِش سلاہ جـت کہ بُریں کارونے ءَ بلے چہ جاپر ءَ پیسر آئی ءِ جنین ءَ پسّو دات کہ ’’ آ دگہ برے بیتگ جاپر ءَ ھرے بیتگ ‘‘


Besam:
@Labzank
telegram.me/Labzank

بلوچی زُبان ءُ ادب ءِ نامداریں ندکار واجہ بیگ محمد بیگل ءِ بیرانی ءَ ماھم بژنیگ ءُ دلپدرد اِیں؛ واجہ بیگل ءِ بیرانی پہ بلوچی ادب ءَ مزنیں تاوانے. بیگل ءَ اَبید چہ میجر موکلر ءِ کتاب ءِ رجانک ءَ کہ بلوچی زبان ءِ بُنرھبند ( گرامر) ءِ سر ءَ اِنت دگہ چار کتاب ھم شنگ کرتگ کہ ایشانی وانگ ءَ پد بلوچی ادب، بلوچ چاگرد، بلوچ راجمان ءُ راجدربری ءِ بازیں پھناتے وانوک ءِ دیم ءَ پدّر بیت. اے چاریں کتابانی نام اِیش اِنت:
۱- شکّل ءُ ماجین
۲ زنڈیں دپار
۳- جوکر
۴- برزخ

داں بلوچی ادب زندگ اِنت؛ بیگل ھم زندگ مان ایت.

Besam:
@Labzank
telegram.me/Labzank

Besam:
" دستونک "

کُلّـیں مردم وت ءَ گوں دلـگوش انـت
زاناں مـرگ ءَ وتـی پـرامـوش انـت

ھـر کس ءَ کـودکـی مِچـوک دپ ءَ
سرجمـیں گـپّ کنـوک ھامـوش انـت

کانـچ ءِ لیـبوک پـہ بَہـا مُچّ انـت
مـردمانـی دل ءَ چیـا پـروش انـت

ھـون ءِ کیپانـی کدّھاں نـوش انـت
انـگت تن ءِ جل ءَ ھلاھـوش انـت

جنـد ءِ لُنٹـانی سوچـگ ءِ جوپ ءَ
کـازی دشـمن چـو منجل ءَ جـوش انت


✍مُبارک کازی

Besam:
@Labzank
telegram.me/Labzank

🌴🌴مھمدبلوچ🌴🌴
🌾راست ءُ دروگ ءِ کسہ🌾
روچے دروگ ءَ گوں راست ءَ گوشت :
بیا رو ایں زِر ءَ اُوژناگ کن ایں…
راست هما کہ ساپ ءُ سَلّہ اَت منّ اِت ئے ءُ آ دوئین شت اَنت...
هما دمان ءَ که راست وتی گُداں کشّ اِیت کہ زِر ءَ ماں بہ دنت ،دروگ راست ئے پوشاکاں دزّ ایِت ءُ تچ ایت ...
چه آ وهد ءَ پَد راست برھنگ انت برھنگی تہ ءَ نہ وشّ اِنت...
ءُ دروگ راست ءِ پوشاکانـی توک ءَ زیبا ءُ ترِپناک اِنت !!..

Besam:
@Labzank
telegram.me/Labzank

"گونڈو ءِ نمدی پہ پِتءَ (1)"

ابّا جان ! دروتءُ دراہ باتئے...من ءَ تئی یاتانی بار ساھت پہ ساھت کوپگءَ اِنت تئی یات گوں من ءَ بندوک اَنت..منا پہ تو سک زھیر کنت..من پہ تو سک گریواں. برے برے کہ من ھمشام باں دُراھیں شپ منی آگہی گوزیت ءُ سُھبءَ وانگجاہ ءَوھدءِ سرا سَر نباں ءُ ماشٹر من ءَ جَنت دُراھیں ھمتبّک منی سرا کَند اَنت من ءَ پشل کن اَنت ءُ پدا من ترا یات کناں ...سَجّہـیں روچ گریواں...
ابّا جان! منی مات گُشیت من وَھدے کسان بیتگ آں تو درمُلکءَ کارءَ شُتگے..پہ لاپءِ شوھازءَ درکپتگے ...من ماتءَ کہ وَھدے تئی اَکس ءِ جُست ءَ کناں آ وتئی دستءَ آزمان ءِ نیمگ ءَ شہاراِیت ءُ پدا گِرویت ءُ ھچ نہ گُشیت..من جست ئِے کناں" زاناں درملک آزمان ءَ اِنت اَمّاں؟ آ من ءَ وتی گرمـیں امبازاں زیر اِیت ءُ سکّ گرویت ءُ من ھم گریواں...

ابّا جان! منی چمپل سِستگ اَنت..منی جان گُد ھم درتگ اَنت مات سک آجز اِنت ..تو کدی کائے..? ابّا جان ! بلئے ھر وھد ءَ کائے منی واستہ چمپل بیار گوں ...
ابّا جان! من ترا ھال دیگ لوٹاں کہ من وانگجاہ ءَ نہ رَوگءَ آں من وانگ یل داتگ..ابّا! من مرچاں ٹامبُلِی چِناں بہا کناں..ابّا! تو بیا! من شمارا وت لاپ دیاں...من نوں مزن بیتگاں کار کناں ..
ابّا! ھر وھـد ءَ کائے ماتءِ واستہ گُشان ایں چادر ے ھم بیار گوں...کہ ماتءِ گُشان آس ءَ سوتکگ..
ابّا! جان مـن تئی وداریگاں چم راہ آں ...

تئی دوستـیگـیں چُک: مـن

Besam:
@Labzank
telegram.me/Labzank

بیگل انگت النور ہوٹل ءَ انت۔
چندن ساچ
ہما زمانگ ءَ کہ من کلانچ ءَ اتاں، نوکی بلوچی وانگ در برتگ ات گڑا ماہتاک بلوچی ہر وہد چہ پسنی ءَ لوٹائینتگ ات۔ ماہتاک بلوچی ءِ تہا یک نامے مدام دیستگ ات۔ آ نام بیگ محمد بیگل ئیگ ات۔ بیگل ءِ چیزانی وانگ من ءَ مُدام وش بوتگ ات۔ پرچا کہ بیگل ءَ وانوک ہچبر ابیتک نہ کتگ ات۔ آئی ءَ برے لیاری ءِ بانکلینک والائیں ماسیانی کسہ کتگ اتنت ءُ برے وتی پرشتگیں پرپٹ ءُ برے دمکاں نشتگیں مردمانی کسہ۔۔۔۔۔ بیگ ءِ وانگ ءَ پد مُدام دل ءَ اومان کتگ ات کہ من ہم کراچی ءَ بہ گنداں۔ اودا ھشت چوک انت۔ بغدادی انت، چاکیواڑہ انت، لیمارکیٹ انت۔ میوہ شاہ کبرستان انت۔ شیرشاہ کبرستان انت۔ اِے درستیں جاہ بیگل ءِ وشیں نبشتانکانی تہا من دیستگ ات۔
پدا کہ وہدے کراچی ءَ اتکاں۔ ہو تہ گنداں لیاری انت، لیمارکیٹ، میوہ شاہ کبرستان، شیرشاہ کبرستان، چاکیواڑہ، بغدادی، ۔۔۔۔۔۔۔۔۔ بَلے فرق ایش ات کہ نوں اِدا مدام تیرانی توار گوشان کپتگ ات۔ آ چاگرد کہ بیگل ءِ نبشتانکانی ہما زمانگ ءِ بہر اتنت۔ بزانکہ سن 2001 ءُ 2003 ءِ آ چاگرد بدل بوتگ ات۔
پدا اِدا دیوان بوت انت۔ من ہمے دیواناں بہر زرت۔ نوں 2006 ات، اِدا استاد صبا دشتیاری ات، میر احمد دھانی ات ءُ دگہ بازیں مردم ہوار اتنت۔ جعمہ ہال لیاری، ملیر ءُ کش ءُ گور ئِے دمگاں دیوان بوتگ ات۔ بَلے من اِے دیواناں بیگل نہ دیستگ ات۔ پدا یک روچے دیوانے ءَ من مردے دیست کہ نزور ات۔ آئی ءَ تہاری ءِ سبب ءَ ونت نہ کُت۔ چماں عاجز ات۔ کمزور ات۔ ہمے مرد بیگل ات۔ بَلے دیوان ءَ من گوں بیگل ءَ دوچار نہ کپتاں۔
پدا بیگل گندگ نہ بوتگ ات۔ یک روچے من لیاری ءَ ھشت چوک ءَ النور ہوٹل ءَ نشتگ اتاں۔ اناگہ ءَ مردے ہوٹل ءَ پترت۔ اے مرد بیگل ات۔ ما شریں وڑے ءَ گند ءُ نند کُت۔ آئی ءَ کلم ءُ کاگد گون اتنت۔ چیزے ءِ نبشتہ کنگ ءَ اتکگ ات۔ ہمدا دو پنڈوک ہم اتک۔ یک کسانیں جنکوے ات ءُ دومی ماسی یے ات۔ بیگل ءَ بیست والا نوٹے کش ات ءُ داتنت کہ 10، 10 کلدار بزور ات۔ جنکو ءَ نوٹ چامپت ات ءُ تتک۔ ماسی ءِ دپ کوش ءَ بوت۔ بیگل ءَ کوکار کُت۔ 10 روپیہ اسکو دے دو۔ بَلے آئی ءَ ہوٹل ءِ دریگ ءَ چہ ڈن، پہ سوکلوئی بیگل ٹاٹا کُت۔ نہیں دوں گی، نہیں دوں گی۔۔۔۔ بیگل جزباتی بوت۔ میں کہتا ہوں اس کو بھی 10 روپیہ دے دو۔۔۔۔۔ بَلے آئی ءَ بیگل ءِ گپ نہ زرت ءُ شُت۔ پنڈوک ءِ اے وڑ کنگ ءَ چہ، بیگل تہ دیراں بے توار بوت۔ پدا کلم ئِے زرت ءُ چیزے نبشتہ کنگ ءَ بوت۔ ما چار ات۔ بیگل ءَ تکانسر مہ کن۔ ما بیگل رخصت کُت۔ مئے وہد ءَ نشتگ ات ءُ نبشتہ کنگ ءَ ات۔
مروچی بزانکہ 12 اپریل 2017 ءَ پدا من لیمارکیٹ ءَ ھشت چوک ءَ کمو گستا گل بلوچستان ہوٹل ءَ نشتگ ات ءُ گوں لہتیں سنگتاں لبزانک ءِ سرا پوتاری کنگ ءَ اتاں۔ تہ منیر ءِ میسج ءَ من ءَ دلپدرد کُت کہ بیگ محمد بیگل بیران بوتگ۔ منیر ءِ میسج ءِ وانگ ءَ پد دل گیمرت۔ بیا کہ بیگ محمد بیگل ءِ وڑیں ہستی ہم بیران بنت؟
پدا من ءَ گمان بوت ناں یار۔۔۔۔ بیگل زندگ انت۔ انگت النور ہوٹل ءَ ہما کرشی ءِ سرا نشتگ ءُ سیاہیں کلم ءَ گوں نبشتہ کنئگ ءَ انت۔۔۔۔۔۔ دوئیں پنڈوک ہر روچ کاینت۔ بیگل آیاں بیستی یے دنت۔ کسان عمریں پنڈوک بیستی ءَ چامپیت ءُ تچیت۔ بیگل کوکار کنت۔ او ترا گشگ ءَ یاں۔ ایشی ءَ ہم دھی یے بدئے گوں۔۔۔ بَلے آ تچیت، ءُ بیگل پدا وتی کسہ ءِ کارستاں نز کاریت۔ ماسی جماعتی بانکلینک والا، یوسف سوریں ماہی والا، سومار چولا والا، گل خان بار والا، اے درست یکجاہ بنت ءُ بیگل ءِ کلم سُران کنت۔۔۔۔۔۔ اِے سفر ہمے وڑا روان کنت ءُ دوئیں پنڈوک ہم ہر روچ کاینت۔۔۔۔۔۔


Besam:
@Labzank
telegram.me/Labzank

*نـــدر پــہ مـعــلـم ءَ*
معـلـم تـو ئے رُژنـا کـُل جـھـان ءَ
چو روچ ءَ ماں ھر جاگھ ءَ شھم گران ءَ

من ءَ دوست انچش کہ ارواہ ءُ جان ءَ
بیان من کناں چوں تئی پھر ءُ شان ءَ

تئی جاگہ بُـرز ءُ بلنـد انت منی جـان
تـو ئے ملـت ئے پـاسـپان ءُ نگھـپـان

کتـگ تو پہ ما نیکـی ءُ پـزل ءُ اِھسـان
ترا ھچ مبـات اے دعا انت گوں رحمان

من ءَ یـات کائینـت تئـی گـپ ءُ گُپتـار
دوئیـں چم مدام مئے تئی راہ ءِ رھچار

زران من ھَمُک وھد پہ تئی گِند ءُ دیدار
چہ تئی دوری ءَ من دل ءَ رنـج ءُ بیمـار

نـزان ئے تـو سـارتی ءُ بَـش ءُ لُـواراں
گـرنـد ءُ گـروکـاں یـا شـپ تھـاراں

ڈل ءُ ڈوک ءُ کـوراں ءُ بـرزیـں تـلاراں
لَپـاش ئے درائیـں تـو ڈَن ء ُ ڈگـاراں

توئے وانت ءُ زانت پیش دار ئے دراھاں
رو ئے دیر سـریں کلگ ءُ ھنـد ءُ جاھاں

تو ئے پیش دار ئے من ءَ رسم ءُ راھـاں
پہ تـو مـن سـدکہ پہ تـو مـن پـداھـاں

نبـاں بے ھیال من تئی وشـیں گپـانـی
بـہ بات سبـز ءُ آبـات تئـی زنـدمـانـی

تـو ئے تـاج سـر دراھگـیں مـردمـانـی
چتور وش انت تئی پنت ءُ شیـرین بیانی

نزانت من تو یات دات من ءَ عِلم ءُ دانش
پہ مـا تـو بلاھـیں کتـگ جھد ءُ کـوشش

چو ھور ءَ زیـاد انت تئـی داد ءُ بکـشش
دپ ءَ تئی مدام گـوارگ انت عِلم ءِ بارش

امـیری تـرا دوسـت دار ایت چو سـاہ ءَ
مقـام برز تر انت تئی چہ استال ءُ ماہ ءَ

بـہ بئے دور چہ ھـر مشـکلات ءُ بـلاہ ءَ
دعـا انـت بـہ بـات ئے تـو رب ءِ پنـاہ ءَ
*محـمـدمـراد امیـری نکھـچ*
*کــورُشــیں گــال*

گـوشکنـد 😄😄😂😂

. مروچـی شُتـوں یک پیلکے ھـونوں دات!
.
.
.
.
.
.
.
.
.
.
.
.

.دو پیلک ھون اِش مان رِتکوں کہ پہ ھوش بیا اوں! نیم کیلو پِستک ءُ دو سیھ جگری کباب اِش ھم گِپت ء من اِشُ وارینت...

ھمے ھون گر ءَ ھم من ءَ چم سُھرے دات ءُ گوشتی یک رندے دگہ ھم من ترا ماں ادا بہ گند آں کُشان اِت ...
من نزانوں پچے مردکو چش گَیـز گِپت ءُ منی چم سُھر دات! !!
😂😂😂😄😄😄
رجانک / ھارون اخلاقی #
لبزانکی مجلس کلمتی کاروان.

کم کم ءَ آشنائیں نگاھاں بدل کن ئے
من چو نہ زاں تو وتی راہ ءَ بدل کن ئے
کازی شیھ نہ بـے تو ستر بـے ءَ شر بہ کن
سر و ھما سر اِنت تو کلاھاں بدل کن ئے

بہ نند ھمگور ءَ منی
بہ چار اَندر ءَ منی
من چینچو رنگ ءَ پرشتگاں
گوں ھچ کس ءَ نہ گوشتگاں
تئی بی وپائی ءِ ھَمُک
من راز، چَہ، راز ءَ چیر دات
من وت نہ زانت چے وڑ ءَ
من چیل ءِ آس ءَ چیر دات
نوں آتکگ گیشیں گم تئی
من موھبتاں ھَتم تئی
نوں گوش بہ دار کِسہ ءَ
کہ چینچو رنگ ءَ بھر بی
چَہ وشّیاں زِبھر بی

برے برے من جیڑ اِتگ
گوں تُستَگیں دل ءَ وتی
من گاراں منزل ءَ وتی
برے برے تئی تْرانَگاں
من رپتگاں زمانگ ءَ
برے برے من دوزہ ءِ
گوں آس ءَ سَنگتی کُتگ
برے برے من جنّت ءَ
کہ ھر کسی وتی کُتگ
اِے دل دَں گوں تو لَگّ اِتگ
من پہ تو چے نہ سِگّ اِتَگ
بہ نند ھمگور ءَ منی
بہ چار اَندر ءَ منی

من داتہ داگ تئی موھبتاں
اِے جان ءُ بند ءُ اِے رَگاں
من شے مرید بوتگاں
تئی درد ءِ تْران ءِ ساھتاں
شراب من زند ءِ بھر کت اَنت
برے برے من چَرْس گوں
کلندریاں کَشّ اِتگ
بہ گوش من پہ تّو چے بدی
چہ اِلّتاں نہ بکش اِتگ
بلے اے راہ گِسَر نہ کت
ترا دل ءَ  چہ در نہ کت
بہ نند ھمگور ءَ منی
بہ چار اَندر ءَ منی

بلے کُلوہ تئی آتکگ اَنت
کہ ما ءُ تو جدا جدا
من ءَ مہ لوٹ نوں پدا
من چَہ تَّرا  چِہ رُکستاں
من کَسّی ءِ اَمانتاں
منارا نام ءُ دپ مہ کن
بلوچی زھگیاں  اِدا
من ءَ شموش تو یل بہ دئے
دگہ تو ھانی ءِ شوھاز
اگاں اے گپ ءَ شاد ئے تو
برو مُراداں بات ئے تو


Besam:
@Labzank
telegram.me/Labzank

گال
مجید عاجز

شکون دیم اِنت زمیں , آزمان چپّی اِنت
بگندئے مرچی تئی سْرومدان چپّی اِنت

من جیڑ اِتہ کہ نبائد منی بہ تْرکّیت دل
تو کند اِتہ کہ پدا تئی گُشان چپّی اِنت

بہ تِنگ بنگیں ملارانی روژناہیاں
کہ ہورکیں تاس ءِ تہا ماہکان چپّی اِنت

ناں رَہ شناس ھدایے , ناں واجہ زَرتُشتے
کَرُتکہ سِتک ءِ مسیت , آسدان چپّی اِنت

کے ءَ کے ءَ ترا شنگینتہ , تاک تاک کُتہ
کُجا کُجا تئی ننگ ءِ قران چپّی اِنت

من ماں اڑاناں گَڑ ءُ مَنجیں جیڑہاں عاجز
نہ گیشّگا اَنت ھبر کہ زبان چپّی اِنت
Besam:
@Labzank
telegram.me/Labzank

تژن ءُ بچکندی دستونک گاریں آستونک ءِ نام ءَ

ندر پہ ظہور شاہ رودبنی ءَ

مجید عاجز

باریں کجا گار اِنت منی
آستونک ءِ تاہ گار اِنت منی

ماں جنّت ءِ بازار ءَ بیا
در گیج دل ءَ گار اِنت منی

ھارے تلاہ ءِ کیمتی
شھر ءِ تہا گار انت منی

دمبرتگاں شوھازگ ءَ
واجہ ھدا گار اِنت منی

مردک منی واب ءَ نئیت
گُشتہ جن ءَ گار اِنت منی

باریں کئی دست ءَ کپیت
درد ءِ دوا گار اِنت منی

لا لا گنی گپّے نہ جنت
ناکو اسا گار اِنت منی

1. لالا گنی.... گنی ابدال

2. ناکو اسا .. عصا بجّار

Besam:
@Labzank
telegram.me/Labzank

Aabed.adam Sh..shabir:
گواتانی نوانء جلیت آسءِ ساھگء مھتل بیت۔۔
اے دل کودکی لیبوکے دروگیں مھریء ھمبل بیت۔۔

نوداں آرتگ ات پیگامے دوشی واھگءِ دنیاء
پُلاں آس اتگ وشبوھے موسم وتسرا تل تل بیت

سوچیت انتزارے پاساں ارسانی ھشیت بستارے۔
اندوہ سرکپیت امروزء سرجاہ بکملیں ترامبل بیت

دھرءِ کسھاں جھندم کن کؤلاناں. بزور سرجم کن۔
یاتاں کودکی گپءُتران دوستی مئےءُتئی ماھل بیت


مھرانی سپر دستائیں'عابد مئے نصیب کوراک انت۔
منزل کہ مُجاں مانریچیت گواتءِدیدگاں کنجل بیت

عابد آدھم
Besam:
@Labzank
telegram.me/Labzank

Besam:
بتل
☀️ اُشتر اگاں کاه وارت گرانیں بار هـم بارت

☀️ مات سینگ زهـگءِ گوانزگ انـت

☀️ زوراکءِ متاه زوراکـیءُ عالم متاه علـم -
☀️ رَمـگ شوانـگ لوٹ ایـت

☀️ کیت روچـے نام ئے باندات اِنـت

☀️ یک چگلے کرگوشک سَـگّ ایـت

@Labzank
telegram.me/Labzank

Besam:
کنـدءُ مـنءَ کنـدین !!

یک سیاسـی لیڈرے نادراهجاه یےءَ شُـت
ڈاکٹرءَ را گُشت ئے - مـن وهـدے گُشتانک دیاں منـی زُبان لِلّ بیتءُ منـی پاد لرزانت - منـی نادراهـی چـی انـت ؟

ڈاکٹر : تو هچ وتءَ پریشان مه کن دروگ بندگءِ وهـدءَ همک مـردم همـے پیمءَ بیت 😄😄😄

@Labzank
telegram.me/Labzank

Besam:
در آخر

ما حرف‌های دشمنانمان را فراموش خواهیم کرد.

اما سکوت دوستانمان را

هرگز

 

#مارتین_لوترکینگ


گڈسر ءَ
وتی دژمنانی گپّاں شموش ایں
بلے دوستانی بـے تـواریءُ هاموشـیءَ هِچ بر بـے هیال نبیں

مارتین لوتر کینگ

Besam:
@Labzank
telegram.me/Labzank

Besam:
💐💐💐💐💐💐💐💐💐💐💐

‌انسان باش ...
ﭼﻪ ﻓﺮقی ﻣﯽ ﮐﻨﺪ
ﺭﻣﻀﺎﻥ ﺑﺎﺷﺪ و ﯾﺎ شعبان
تير باشد و يا آبان
دسامبر باشد و يا ژوئن؟!!
ﻫﺮ ﺭﻭﺯی ﮐﻪ دستی ﺭﺍ ﮔرفتی
دلی ﺭﺍ ﺑﺪﺳﺖ ﺁﻭﺭﺩﯼ
ﺍشکی ﺭﺍ ﭘﺎﮎ ﮐﺮﺩﯼ
ﺍﻧﺴﺎنی !🌹



انسان بـہ بئـــــے.....
پَرک نه کنت
رمزان به بیت یا شابان
تیر به بیت یا آبان
دسامبر به بیت یا ژوئن؟!!!
هما روچ ءَ که نیزگار دست گپت
گریبی دل وتی کُت
ارس ءِ پهک کُت
گـڑا انسـانے ئے.

رجانکار: کادربکش کلمتی


Besam:
@Labzank
telegram.me/Labzank

Besam:
بتل

☀️ پُـرشتگیں باسک نئیت دو بر بنـدءَ

☀️ په دپءِ وش آتکءَ جَـن کسـی یار نه بیـت

☀️ پادءِ پکیر لنگ نه انـت
مُلک هُـدا تنگ نه انـت

☀️ پیر مرداں مـن کپتگ آں جـوگـی
مـن دلبریں ورنایـے نه باں نوکـی

☀️ په مُورءَ شپءِ نمـب توپانے

☀️ په کوریں چمّءَ پِٹّے ارس باز انت

@Labzank
telegram.me/Labzank

<"قــادو مکرانی" > اصل نام قادربخش رند عرف قـادو مکرانی بوتگ. 1839 ء انگزیر وھدے بلوچستان ء سرا ارش کنت بلوچستان ء ھالات نگیگ بنت گڈا قادو مکرانی گوں وتئی ھاندان ء لڈیت ء روت انڈیا ء ریاست گجرات ء کارتیاوار میتگ ء جاہ منند بیت. کارتیاوار ء نواب ء آئی ء زلورت بیت چیاکہ اودا دز و ڈنگ سک باز بیت کہ چاگردء مردماں جنت ء پل انت ء آھاں تکلیف دینت. قادو مکرانی دز و ڈنگاں جنت ء پروشیت ء کمزور کنت اے بابت ء کاتیاوار ء نواب قادو مکرانی ء ھمایت ء کنت. قادو مکرانی برطانیہ سامراج ء نوآبادیانی ء ھلاپ ء جنگ کنت. یک روچے سوشل ورکر پہ مردم شماری ء واست ء قادو مکرانی ء میتگ ء کاینت تاکہ ووٹنگ ء واست ء مردمانی ناماں نبشتہ بکن انت. قادو مکرانی ایشاں جنت ء پروشیت ء ایشانی سازو ساماناں پچ گیپت. گڈا برطانیہ سامراج ء نیمگ ء یک اشتہاری مجرمے قرار دیگ بیت. برطانیہ سامراج کاتیاوار میتگ ء مردماں تنگ کنت کہ قادو مکرانی گرفتار بکن انت ء من ء بدی ات. حکومت برطانیہ اعلان کنت کہ ھرکس قادو مکرانی ء زندگ یامردگ ء منی دست ءبدانت آئی ء لک کلدار ء 81 ایکڑ زمین انعام دیگ بیت قادو مکرانی برطانیہ سامراج ء ھلاپ ء گوریلا جنگ کنت. انڈیا ء ھرچ مردمے کہ برطانیہ فوج ء مخبری ء کنت قادو مکرانی آھاں پونز و گوش کنت بزاں مخبراں نہ کشیت بلکن آھانی پونز و گوشاں بریت ء یلہ دنت. دو انگریز مصنف پالو سنتونی ء فلپ سائیکس وتئی کتاب A History of plastic surgery ء تہا نبشتہ کن انت کہ ڈاکٹر جانسن وتئی کریئر ء تہا 300 مردم ء پونزانی پلاسٹک سرجری ء کنت. بزاں قادو مکرانی بازیں مخبرے پونز و گوش کنت. ھما مردم کہ پونز و گوش کنگ بوتگ انت آھانی کس ء آزیز قادو مکرانی ڈاکو ء گنڈائے قرار دینت بلے جوناگڑھ ء مردم وتئی شعر و نبشتانک یا گیدی کسھانی تہا قادو مکرانی ء اوساپ و تاریپ ء کنت. 1960 ء انڈیا ء چترا تامر کمپنی قادو مکرانی ء نام ء یک گجراتی تامرے جوڑ کنت ء آ تامر ء نام ء قادو مکرانی ایر کنت بزاں اے تامر ء قادو مکرانی ء نام ء ندرکنت. 1966 ء پاکستان فلمز انڈسٹری قادو مکرانی ء نام ء یک تامرے جوڑ کنت ء ایشی ء نام ء "جاگ اٹھا انسان" ایر کنت ء اے تامر ء تہا قادو مکرانی ء مرکزی کردار ادا کار محمد علی ادا کنت. انڈیا ء چیز طبقے مردم گش انت کہ قادو مکرانی گنڈائے بوتگ کہ آئی ء تاجر و مالدار پلیتگ انت ء آھانی مال گریبانی سرا بہر کتگ انت. بلے گجرات ء جونا گڑھ ء مردم گش انت کہ آ یاگی بوتگ ء برطانیہ سامراج ء ھلاپ ء جنگ کتگے. انگریز کیپٹن مسٹر جانسن گشیت کہ یک روچے من ء وتئی کرنل اسکاٹ ء لوگ ء بانک گوں بوتگ ء آپس گاڑی ء سوار بوتگ انت جنگل ء راہ ء سفر ء بوتگ انت کہ اچانک قادو مکرانی منی راہ ء مانتریتگ من ء جست کتگے اے چیاں ترا گون انت ء تو کجا روگائے من جواب داتگ اے کرنل اسکاٹ ء لوگ ء بانک انت من ایشی ء لوگ ء سرکناں. قادو مکرانی جواب داتگ اگاں ترا اے زالبول ھمراہ مہ بوتیں گڈا تئی زندگی ء آخری روچ بوتگ انت بلے ما بلوچ زالبولانی اھترام ء ھمے زالبول ء برکت من ترا بکشیتگ بلے کرنل اسکاٹ ء منی کلہ و پیگاماں بدۓ بگش تو منی لوگ، منی ڈگار منی پورھیں ھاندان تباہ و برباد کتگ منی دپ ء بکپے ترا من نیست و نابود کناں برطانیہ حکومت کارتیاوار ء دمگ ء مردماں سک تنگ کنت گڈا اودے مردم قادو مکرانی ء سلاہ و مشورہ دینت کہ کمے وھد ء تو برو مکران ء وت ء روپوش بکن تاکہ ادے ھالات و جاور سازگار بہ بنت. گڈا قادو مکرانی روت احمد آباد ء ریل گاڑی ء سوار بیت 1887 ء آ کیت کراچی لیاری ء یک ساربانی ء گشیت کہ من ء کرایہ ء سرا مکران ء سرکن. ساربان کہ قادو مکرانی ء گندیت آئی ء دل ء تہا سرکار ء انعامانی لالچ پیداک بیت. ساربان قادو مکرانی ء گشیت شپ ء بے وھد ء یک ٹیمبے بغدادی پولیس اسٹیسن ء پشتی نیمگ ء بیا من ء تو دیم پہ مکران ء سفر کنیں ھمے وھد ء ساربان دو سپاھیگ ھم لوٹئینیت. قادو مکرانی گندیت کہ ساربان ء ھمراھی ء دو سپاھیگ ھم گوں گڈا وتئی زھم ء کشیت دوئیں سپاھیگاں گوں ساربان ء ھوار کشیت ء وت تچیت. کالاکوٹ ء تنگیں دمکاں روگ بیت کہ تہاری ء ماڑی ء برزی نیمگ یک مردمے بلاھیں سنگے دور دنت قادو مکرانی ء سرا لگیت آ بے ھوش بیت ء کپیت سپاھیگ کاینت دزگیر کننتیں. کراچی ء سنٹرل جیل ء بندکنگ بیت 1887 ء آئی ء پاھو دینت ء لاش کلاکوٹ ء کماش درا خان ء دست ء کپیت. ملا گلام نامیں مردے آئی ء کپن ءُدپن کنت ءُ لیاری میوا شاہ کبرستان ءَ کل کنگ بیت.
اے چہ واٹساپءَ کاپی کنگ بیتگ کہ نبشتکارءِ نام نیست کہ کَیا نبشتہ کُتگ


Besam:
@Labzank
telegram.me/Labzank