بان ءَ مھر ءِ آخری درجہ ءَ بارت ءُ سر کنت کہ اِنچو اڑ ءُ مشکلات ءِ باوجود اوں گوں لبزانک ءَ یک ڈول ءَ ھمگرنچ اِنت ـ اگاں مئے پگر ءِ نگاہ مسبت ءُ positive بہ بنت ـ
ساھار ءِ پچ کنگ ءَ گوں مارا اول سرا نظم گِندگ ءَ کا اَنت ـ دُراہ 20 نظم اَنت ـ ایشانی تھا مارا گوں وتی اھد ءِ ساپیں آدینک گِندگ ءَ کا انت کہ اے شاعر ءِ بُنیادی لوٹ بیت ـ نظمانی تہءَ ھمک یک نظمے چاگرد ءِ زندگیں کردار اَنت ـ مئے بلوچی شخصیت آنی رُژنائیں کردار اَنت انچو کہ " بابا قاضی "، تو است باتے دائما " بانک عندلیب ءِ نام ءَ اِنت، علیم دشتی ءِ نام ءَ، کمبر قاضی ءِ نام ءَ، لطیف جوھر ءِ نام ءَ ءُ ھمے پئیم آ دگہ نظم اوں چاگرد ءِ گُمنام ایں بلوچانی زگریں اکّاسی ءَ کن اَنت ـ
بُرز ءَ انچو کہ جاگہ ے ما گْوشتگ اَت کہ بسمل ءِ زند گوں وتی کاراں انچو ناگیگ کُتگ کہ وت یک نظمے ءِ دروشم ءَ وتی کسّہ ءَ چُش گوشیت ـ نظم ءِ عنوان " کار جاہ " اِنت ـ
" وانگ، مُلور ءُ مامانگ
من چی بکناں؟ "
کار جاہ ءِ ماھول ءُ چاگرد ءُ فکٹری ءِ تہءِ مردمانی کردار اوں منظور ءَ پہ اِشارتّـی بیان کتگ اَنت ـ منگڑ، مار ءُ زُوم، گُراگ ءُ گُراز ــ اے لیلُک اَنت ءُ زانگ بیت کہ اے لیلُک پہ بنیادم ءَ سک تاوان دِہ اَنت ـ اِد ءَ بسمل ءَ ھمے علامت پہ ھما مردماں کارمرز کُتگ اَنت کہ مدامی گوں آئی ءَ ماں کارگس ءَ ھمراہ اَنت ـ آیانی برخُرد، گوں منظور ءَ پِیش آھگ چتور اِنت ـ وت بسمل ءِ زبان ءَ بیا گوشدار ئیں ـ
" مار ءُ زُوم
گیگ ءَ وش کن اَنت ءُ ڈَنگ جَن اَنت
یکے اِنگو کشیت کہ بیا
یکے دنت تیلانک برو
کشّ ءُ ڈلانی چاگرد ءَ سر کپت منی
ھچ گیگ نہ گِنداں بے واراں "
ھمے ٹکّر ءِ تہءَ مردم اے اندازہ ءَ سرجم ءَ جَت کنت کہ منظور بسمل ماں دراں ڈیھ ءَ گوں وتی کار ءُ روزگار ءَ چنچو بے وار اِنت ـ ءُ انگت مھلوک منظور بسمل ءِ سرا بُھتام بند اَنت کہ درمُلکاں نشتگ ءُ عئیش کنگ ءَ اِنت ـ عئیش کنوک مارشـتاں گوں لئیب نہ کن اَنت ـ زند ءَ وتی گِھتر کن اَنت ـ وتارا آسودگ کن اَنت ـ نئیکہ چو بسمل ءَ ازاب بنت ـ گوں درداں ھمتران بنت، گوں زھیراں آس ءِ سوداگری ءَ کن اَنت ـ
اے کسانُکیں نظم ءِ تہءَ بسمل ءَ سرجم ءَ وتی کار ءُ روزگار ءِ ھالات بیان کت اَنت دانکہ مردم سرپد بہ بنت کہ بسمل چنچو گوں وتی ھمراھاں ناگیگ اِنت ـ
" گَرّی کُڑیل اَنت ھمراہ ءُ ھمکار منی "
چوناھا یک ساچشت کارے اے الّم ءَ لوٹ اِیت کہ منی ماھول ءَ انچیں وانندہ اِیں مردم بہ بنت ءُ بہ نِند اَنت کہ مدامی علمی باوست بہ بیت، مدام شعری ماھولے بہ بیت ـ یک دومی ءَ گوں بحث ءُ باوست کنگ بہ بیت کہ چَہ ایشی ءَ شاعر ءِ علم ءِ شَـھَارگ گیش بیت ءُ شرتریں ساچشت درشان بکنت ـ پمشکہ بسمل اے چاگرد ءَ ایر جَنت کہ آئی ءِ ھرّوچی ایں ھمراہ علامتی دروشم ءَ بیان کتگ اَنت ئِے ـ
منظور بسمل ءِ گورا نظم ءِ انگت بھتریں نمونگ اوں گِندگ بیت ـ ما پمشکہ نظم " کار جاہ " دیم ءَ آورت دانکہ مردم چہ بسمل ءِ جاوراں آشناہ بہ بنت ـ
اے نظم ءِ تہءَ علامت ءِ پیشدارگ وت یک منّ اِتگیں ازمی فَنّ یے ـ
ما مدام دیستگ کہ بازیں مردمے کہ دراں ڈیھ ءَ روت وتی وطن ءَ بیھال کنت ـ ءُ ھما ماھول ءَ کہ گِند اِیت ءُ نِند اِیت، ھما وڑ وتارا کنت ـ بلے یک احساس مندیں مردمے ھچبر چوش نکنت ـ ما گوشت کنیں کہ منظور بسمل درمُلک ءِ روگ ءَ گوں وتی وطنے بیھال کتگ؟ گڑا اے ھبر پھک رَد اِنت ـ نظم " آس " ءِ اول سراں دلگوش بکن اِت ـ
" اے آس داں کدیگ ءَ روک بیت
اے آس داں کدیگ گنوک بیت
اے آس داں کدیگ ءَ کُلّ ءُ کاپراں بَلُوک بیت ـ "
اے تھل ءُ راستیں جاور اَنت کہ بسمل ءَ بیان کتگ اَنت ءُ منّارینتگ کہ ھچبر بسمل چَہ وتی وطن ءَ سِدُوک نہ اِنت ـ
منظور بسمل ءَ نظم ءِ ھواری ءَ دستونک اوں پربستگ ـ ءُ اے ھبر اوں گوشگ بیت کہ منظور دستونک ءِ منّ اِتگیں شاعرے ـ نظم وتی جاہ ءَ شھکار اَنت بلے دستونکانی تہءَ وتی یک گیشّ اِتگیں درشانے دیم ءَ آورتگ ءُ کامیاب اِنت ـ چیزے بند دلگوش کنیں ـ
" دیدگانی لتارگ ءَ چی بیت
ھچ گِندگ نہ نیت گُبار ءِ تھا "
گُبار، سیاھی ءِ علامت اِنت ـ مردم سرپد اَنت ک سیاھی چی چی ءِ علائم ءَ پیشدار اِیت ـ زلم، کُوری، بے زانگی، ءُ ھمے دابیں وئیلانی بزانت ءَ دَنت ـ مردم ستر وتی چمّاں ساپ بکنت ءُ بچار اِیت ـ دیم ءَ تھارونکی اِنت ـ چمّ شَر اَنت ـ گِند اَنت بلے تھاری ءَ ھچ دیست نکن اَنت ـ اے بند ءِ تہءَ یک physicaly لیکہ ءِ نیمگ ءَ اوں اشارگ ءَ کنت ـ دنز ءُ گُبار ءِ تھا چمانی تہءَ ھاک ءُ بوچّ رَوت ـ گڑ عموماً مردم وتی چمّاں لتار اَنت ءُ ساپ کن اَنت ـ اے شعر ءِ چاگرد ءِ نطقہ ءُ نظریہ " گُبار " اِنت ـ ساچشت کار ءَ گوشتگ کہ چم لتارگی نہ اَنت ـ گُبار ھلاس کنگی اِنت ـ چمّانی ستر لتار دانکہ گُبار اَست ءُ برجاہ اِنت، ھچ نہ بیت ـ مردم بائد اِنت جُھد بکنت ءُ زُلم ءُ کوراسی ءُ بے علمی ءَ گار بکنت ـ مھنت بکنت ـ بلے بسمل وتی راج ءِ نفسیات ءَ شر سرپد اِنت ک

ہ گوشیت تو چمّاں مہ لتار، گُبار ءَ ھلاس بکن ـ یکّیں بند ءِ تہءَ سرھال ءِ سرجم کنگ، اشارہ کنگ، ءُ سکین دَیگ ـ انچیں پُھتہ ایں پگر ءُ لیکہ بیان کَنگ بوتگ اَنت ـ
اِد بچار ـ
بسمل ءِ مھر ءِ ھم سَبکّے بات ـ
دُراھیں دنیا ءِ درد یکّے بات ـ
مرچگیں نوکیں زمانگ ءِ تہءَ دنیا ءِ زانندگیں بنیادم ءَ اے پگر منّ اِتگ کہ انسان گوں دومی انسان ءَ یک بہ بیت ـ بزاں انسان ءِ درد ءُ گم، سکّی ءُ سُوری، یک بہ بنت ـ یا ما اے بہ گْوش ئیں کہ انسانیت ءِ سبکّ ءَ بہ دنت ـ گڑا کجام سبک انسانیت ءِ لوٹ ءَ سرجم کنت ـ جی ھَو ـ تھنا " مھر " اِنت ـ مھر ءِ ھم سبکّ نیست کہ دنیا ءِ درد یک نہ اَنت ءُ نہ بَنت ـ یک بوتین اَنت، مھر ءِ ھم سبک بوتین اَنت گڑا انسانانی درمیان ءَ باز بھتری اَتکگ اَت ـ انسان ءَ یک دومی ءِ ھمکوپگ بوتگ اَنت ـ اِد ءَ اوں منظور بسمل زمانگ ءِ دل کُھت ایں رویـّہ ءَ را رَد کنت ـ ھرکس وتی وڑا انت ـ انسان چہ دومی انسان ءَ دُور تچ اِیت ـ یکے وتارا مستر کنت ـ دومی وتارا زانتکارتر کنت ـ مساوات نیست ـ برابری نیست ـ اے لیکہ اگاں انسان ءِ تہءَ بئیت کہ ما یکّ ئیں گڑا انسان یک زندگ ءُ مِھرآوریں چاگرد ءَ پہ سکون زند ءَ تیلانک دات کنت ـ بلے چوش نہ اِنت ـ بسمل انچیں زندگیں چاگردے ءِ واھگدار اِنت ـ ءُ رَدیں عملاں ایر جَنت ـ زانگ بیت کہ اے شعر چاگردی نقدے ـ شیخ سعدی ءَ انچیں ھبرے کُتگ اَت ـ
بنیادم اعضائ یک دیگرند ـ
کہ در آفرین اِش زی یک گوھرند ـ
منظور بسمل ءَ یکیں بند ءِ تہءَ سرجمیں انسانیت ءِ پیگام ءَ دنت ءُ مھر کنگ ءِ سکین ءَ دَنت ـ اے ھم شعر ءِ مستریں جوانیاں چہ یکّے کہ راست پدّرا بہ بیت ـ شعر ءِ تاسیر چہ چاگرد ءَ چِست بیت یا اثر زور اِیت ـ چاگرد ھما وڑ اِنت ـ ھما وڑ شاعر ءَ بیان کنگی اِنت کہ اے کار منظور بسمل ءَ پہ دانائی کُتگ ـ
یک زندگیں شاعرے ءِ راستیں پجّارے ایش ھم بیت کہ دنیا ءَ بُوان اِیت ءُ سرپد اوں بہ بیت ـ ھاس گوستانک بزاں تاریخ ءِ وانگ اوں سک ھژدری اِنت دانکہ بزانت گوستگیں زمانگ ءَ چی بوتگ ءُ انو چی بوھگ ءَ اِنت ـ زانگ بیت کہ منظور بسمل یک سرپد ءُ وانندہ ءُ دانہ ایں شاعرے ءُ گوستانک زانتے ـ اے بند ءَ دلگوش کن ـ
" نیست داں ابد منتگ ـ
است گار ءُ بیگواہ اِنت ـ "
چیزے کہ زاھر نہ اِنت ـ نیست اِنت ـ منتگ ءُ پشت کپتگ ـ ءُ اسل چیز کہ زاھر کنگی اِنت ـ گار اِنت ـ
انسان پگر نکنت ـ ما سرجمیں گوستانک ءَ بچار ئیں داں ھمے آسرال ءَ سر بئیں کہ زلم ءُ تاریکی گیشتر منتگ ـ فیض احمد ءَ انچیں چیزے گوشتگ اَت ـ
" ان گِنت صدیوں کی تاریک بہیمانہ طلسم ـ "
بے حسابیں زلم ءُ تھاری ماں تاریخ ءَ گوستگ ـ چیزے کہ اَست کنگ بہ بیت، نیست اِنت ـ ءُ چیزے کہ نیست کنگ بہ بیت، اَست اِنت ـ برعکس اِنت ـ ما رُژن ءِ لوٹوک ئیں بلے تھاری ءَ دوست دار ئیں ـ ما مھر ءِ لوٹوک ئیں بلے کینگ ءَ ساڑائیں ـ برعکس اِنت ـ
انسان چوناھا بائد اِنت کہ راست بہ بیت ـ ءُ شاعر گَنتر راست بہ بنت ـ راستی ھمیش اَت کہ منظور بسمل ءَ گوں یک تھرے " سُھلِ مُمتنع " ءِ رِد ءَ پہ انچو جُوانی ءَ بیان کتگ کہ ھمک کس اے بند ءَ پھم اِت کنت ـ
شاعر ءِ زبان ءَ چہ اے ھم بائد اِنت کہ سُبکّ ءُ پُوچکیں ھبر در مئیت ـ سنگین ءُ گران بہ بنت ـ چوناھا عام مردم انچو بہ بیت بلے شاعر دو ھمنچو ـ وت بسمل گوش اِیت ـ
چہ دپ ءَ دربئیت سنگین ایں ھبر ـ
کپتگیں تُکّ ءَ پدا کس چِت نکنت ـ "
ھبر چہ دپ ءَ درکئیت تہ مردمے note کن اَنت ـ شاعر ئیگ ءَ وَ گنتر note کن اَنت ـ
مارا اے دابیں بازیں شعرانی تہءَ انسانیت ءِ ھمک تَک ءُ پِھلو ءَ سبک ءُ سکین دست کپ اِیت ـ زانگ بیت کک بسمل راستی ءُ انسان دوستی ءِ چنچو واھگ دار اِنت ـــــــ
منظور بسمل ءِ گورا مارا سرھال ءُ ھمک گونگیں زند ءِ مضمون دست کپ اَنت ـ چوناھا اے ھم یک منّ اِتگیں ھبرے کہ زانت کاریں شاعر، نوک نوکیں سرھال بوج اِیت ءُ بیان کنت ـ سرھالے ءِ بُنگیج کنگ وت یک مزنیں دانائی یـے لوٹ اِیت ءُ تھنا مزنیں شاعر اے کار ءَ کُت کنت ـ اگاں نا ـ ما کُلّ یـے بچار ئیں پہ مئے گورا تھنا دو سرھال ءُ بُنگپ ءَ ابئید دگہ ھچ نیست ـ عشقیہ شاعری ءُ رزمیہ شاعری ـــ یا ما شعرانی تہءَ عاشقی کنیں یا جَنگ ـــ زند تھنا اے دوئیں چیزانی نام نہ اِنت ـ مرچگیں بنیادم ءَ بازیں آساھش درگیتکگ ـ بازیں راہ ءُ در، بازیں لیکہ ءُ نظریہ درگیتکگ اَنت ـ سائنس ءَ باز دیمروئی کتگ ءُ کنان اِنت ـ زندگی ءِ ھمک تَک ءُ پِھلو ءَ تھنا یک سرپدیں شاعرے بیان کُت کنت ـ انچو کہ مئے گورا منظور بسمل اِنت ـ
ما مُردنی ایں ناز کناں کہ مارا منظور بسمل ے اَست ءُ مئے اھد ءَ زندگ اِنت ـ
گُڈّی ھبر ءِ نیمگ ءَ کایاں ـ بُرزا ھرچی کہ ما گوشت ـ شعرانی کسانُکیں ریسے اَت ـ منظور بسمل ءِ شخصیت ءُ ازمی بالاد چنچو مزن اِنت ـ اے چیز ءَ من گیشّینت نکناں ـ ءُ نا کہ مارا منظور بسمل ساڑاھگی اِنت ءُ بُرز برگی اِنت ـ وت منظور گوش اِیت ـ
" کسّی توسیپ کسّ ءَ بُرز نکنت ـ
جُ

وان ھما اِنت کہ ایرجَنت مارا ــ "
یکبرے ما بیائیں منظور بسمل ءِ ازم ءَ سرجم ءَ بہ پرّیس ئیں ءُ اے کاراں بائد اِنت کہ گَلّ ءُ اِدارہ ءَ اکیڈمی بہ کن اَنت ـ ھاس بلوچستان اکیڈمی ءُ بلوچی اکیڈمی بکن اَنت ـ اے یک فردے ءِ کار نہ اِنت ـ اجتماعی کارے ـ اکیڈمک صورت ءَ اے کار بنت ـ ما بلوچ کہ مروچاں سوشل میڑیا ءَ گوں وابستگی دار ئیں، چَہ ھرّوچی ایں بے سریں ھبراں لَک گِھتر اِنت کہ ما بیا ئیں ءُ وتی مستر ءُ سینئیر ایں لبزانت آنی ازمی بالاداں ریس ءُ پرّیس بکن ئیں ـ باوست مدام بکن ئیں ـ کہ نپ دَے اَنت ـ
پدا گُڈسرا من ءَ منظور بسمل ءِ جِند سک پھل بکنت کہ ما آئی ءِ ازمی بالاد ءِ آ مُکام ءَ سر نہ بوتگان ءُ شَرّیں دابے ءَ ریس ءُ پرّیس کُت نکت ـ
بلوچی زبان ءِ بادشاھیں بسمل گوں بلوچی زبان ءَ گُل ءُ میتاپ بات



Besam:
@Labzank
telegram.me/Labzank
ــ

چِش

سَمّڑاں چُلمبیناں آ کھیب ءُ کرامانی
ماھیں سومری سند اَنت ھچ دل ءَنیاراں من
پُل منی زباد بُوئیں پُلّک اَنت پریانی
دُرّ ءُ کُنّلاں کیدی ، پھک بے کماراں من
چو گُلانی چوٹیل انت ھجگ ءُ نازُکیں سرٹال
لمب ءُ شاھاں چو شِنگیں مھپراں سماراں من
‏ سارتیں ساھگوں ندْر اِنت پاکیں واھگدارانی
پہ گُلاں مرادیگ ءُ دیریں راھچاراں من
کد کدی سید بیارے ھانل ءَ کھیبانی
گل پری ء_ وشاتک ء- سارتیں پل گواراں من


Besam:
@Labzank
telegram.me/Labzank

" تُنّگ ایں وابانی واھُند یے ءِ کِسّہ "

من کدی ھم اے جیڑگ ءِ جھد نہ کتگ کہ گوادر پہ من چی بستارے دار ایت، ءُ نئیکہ اے جیڑگ ءِ جھد کتگ کہ من باتیل ءَ مہ گِند آں منا پرچا واب نئیت.. بلے چیزّے روچ اِنت کہ دل گوْشگ ءَ اِنت تو بہ جیڑ، تو ایوک ءَ چیزّاں ندارہ مہ کن...
من ھمیش اِنت پہ جیڑگ ءِ نیّت ءَ اَنّی باتیل ءِ سرا نشتگ ءُ گوادر ءَ چارگ ءَ یاں. اے کِشک ءَ کہ من سر کَپتگ آں اِشی ءَ " ساد ءِ کَنڑگ " گوْش اَنت، بلے مروچاں ھزار تُرس ءُ بیم ءَ چہ پد، ساد مردمانی دستاں نہ گِپت ءُ سر نہ گیجیت، بلکیں بے تُرس ءُ بیم ءَ، بے رنگیں پدیانکانی سرا، بُرزا سپر کنگ کپ ایت...
دیگر ءِ وھد اِنت، منی دیم ءَ ندارگانی ھچ کَمّی نیست، بلے انگت ھم باریں کجا چہ آؤکیں، سستگ ءُ نہ گیش اِتگ ایں آواز، منا وتی نیمگ ءَ برگ لوٹگ ءَ اَنت. من آزمان ءَ چار آں، ھچ نہ گِند آں پدا جَھل ءَ چار آں.. زیارت ءِ دپ ءَ گاڑی یے اوشتاتگ، کہ آئی ءِ تہ ءَ چہ مردم ایر آیگ ءَ اَنت. یک لوگ یے ءَ جنینے تاپ ءَ داتگیں گُداں مُچ کنگ ءَ اِنت، دو جنک تات ءِ سرا نشتگ ءُ وانگ جاہ ءِ کاراں کنگ ءَ اَنت، گیشتریں بانانی سرا گوْنڈل کانگڈو بال دئیگ ءَ اَنت. مزنیں دگ ءَ بازیں کسّہ یے وت ما وت سر ءُ چیر بئیگ ءَ اِنت..
من چی بہ جیڑ آں...؟ ھچ جیڑگ نہ بئیگ ءَ اِنت.. پدی زِر، دیمی زِر، بوجیگ، درچک، ائید گاہ، ماڈل اسکول درست، گشئے دنز ءُ مُجاں اندیم کُتگ اَنت...
منی اُمر بیست ءُ دو سال اِنت، من دنیگت نزان آں کہ منا ھر شپ، واب ءِ تہ ءَ پرچا یک شادو یے کئیت بچکند ایت ءُ سوکولو دنت ءُ تچیت. آئی ءِ روگ ءَ چہ پد من پاد کایاں منی دیم ءَ یک پیریں سیائیں جنین یے اوشتوک بیت، من کُکّار کن آں.. درست پاد کاینت...
مات، پِت، گھار، برات، تری زتک، ناکو زتک، ھمساھگ، کسان، مزن درست منا گنوکے سرپد بنت، منا سما بیت کہ مئے میتگ ءِ درائیں مات وتی چُکاں منی نام ءَ گِر اَنت ءُ تُرسین اَنت...منا ھر جاہ ءَ روگی بیت من مات ءَ گوْش آں، بلے مرچی کسّی کِرّا نام نہ گِپتگ کہ منا کُجا روگی اِنت... من لوٹ آں کہ لوگ ءَ بُرو آں....
نی اے وڑیں جاوراں مردم کجا اے جیڑ اِت کت کنت کہ گوْادر دنز ءَ گِپتگ یا منی چمّانی میار اِنت.. بلے پدا ھم جیڑگ لوٹ آں..
زیارت سرجم ءَ بُن اِنت، گاڈی ءَ چہ ایر آیوکیں مردم تچان گاڈی ءَ سوار بیت اَنت. جنین اے بری دیوال ءَ ٹَنگ اِتگ ایں سوریں ماھیگاں مُچ کنگ ءَ اِنت، تات ءِ سرا دو نُنک کَش ما کَش وپتگ ءُ گِریوگ ءَ اَنت....

Besam:
@Labzank
telegram.me/Labzank

کسّی توسیپ کسّ ءٰ برز نہ کنت
جوان ھما انت کہ ایر جنت مارا

منــزور بســمل نوکــیں شیــرانی کتاب ساھار

واهشانی پرس

آزمانک

جن ئے ماهگلین من لوٹ آں گوں تو گپے بہ کن آں رئیس ءَ چاه ءَ گلمبے گپت دیم گوں ماهگلین ءَ کت ءُ بچکندگیں دابے ءَ جست کت
هاں باریں چونیں گپے بلکیں تو پہ سلمان جان ءَ دشتارے درگپتگ ماهگلین ءَ هم وتا گیگ ءُ گور کت چہ رئیس ءَ پسو ءِ ودار کت

اناں اناں ماهگلین من پہ سلمان جان ءَ اناں سلمان جان انگت کسان انت پدءَ وانگ ءَ انت بلے
بلے چے گڑا گپ ءَ بہ کن مارا دلمانگو کتگ ماهگلین ءَ پدءَ گپ چہ رئیس ءِ دپ ءَ پچ گپت
ماهگلین من پہ وتا دشتارے درگپتگ من لوٹ آں دگہ سانگے بہ کن آں رئیس کمو پشلو پشلو بیت ءُ گوشت ئے
پیکی ءَ پیراں سری تو دشتارے درگیتک اے امرءَ ترا کے سانگ کنت ماهگلین ءَ رئیس ءِ گپ کمار نہ کت ءُ گوشت
ماهگلین من مسکرءَ نہ کن آں من پہ وتا شر رنگیں ءُ گونڈلکیں جنکوئے درگپتگ رئیس ءَ پدءَ ماهگلین باور کنائینگ ءِ رنگ ءَ گوشت
شررنگ ءُ گونڈلکیں جنین چک بہ مر انت کہ ترا سانگ کن انت تئی بدیں بوه ءَ من پچ ات نہ کن آں ماهگلین ءَ پہ زهر کنکی وتی دیم تاب دات ءُ گپ بد برت
آ کارءَ کہ زر کنت هچ مهرمے شر نہ کنت من تئی ٹیلگانی دیم ءَ گزیر رهمت ءِ جنکو ءَ بانورکنان ءُ کاراں رئیس هم کمے برانز گپت ءُ گوشت ئے
برو پہ منی باریگاں چار جن بگر من ترا نہ داشتگ بلے تو اے گونڈوئیں جنکو ئے هکاں زورئے اللہ ترا گیپت ماهگلین ءَ وتی دست زمین ءَ جت ءُ گوشت
کم بهت من گوں تو چنت سال گوازینت تو من ءَ الکاپیں مهرے نہ دات ءُ نیکہ تو روچے روزگارے ساچ ءُ سینگارے کت کہ مئے دل ءَ گواتے بہ جنت اے زمانگ ءِ جنینانی ساچ ءُ سمبهگاں من گنداں مئے دل هم مان روس ایت رئیس ءَ گرمیں ساهے کش ات ءُ تورناکیں چمے ماهگلین ءِ نیمگ ءَ چار ات
اے هپتیں چک من وسرءَ پیداک کت انت من ترا مهر نہ دات ترا وَ شگرءُ منت نیست من پاد اتکاں وت زان ئے وتیگ ءَ ماهگلین نرنڈان بیت ءُ دراتک
رئیس ءَ هم وتی چادر بڈءَ کت ءُ شت دیگرءِ نمازءِ واستا مسیت ءِ نیمگ ءَ

نمازءَ رند رئیس ءَ دیم گوں گزیرءَ کت ءُ هلوت ءِ داب ءَ گوشت گزیر من ءَ گوں تو گپے هست

گڑا گپ ءَ بہ کن واجہ پرچا وتی لاپ ءَ گوات دیے گزیرءَ پہ مسکرءَ گوشت
کمو آ دیمترءَ رویں رئیس ءَ گزیرءِ دست ءَ گپت ءُ سرءُ رند بیت انت
آ واجہ هیریں هبرے کہ تو من ءُ هورک تهنائیں جاگہ ئے آورتگ گزیرءَ وتی هیرانی درشان کت
هو توئے گزیرءِ هیر انت گپ چوش انت کہ من دلمانگ آں دگہ سانگے بہ کن آں من ءَ تئی کستریں جنک درناز دوست بیت اگاں تو رازیگ بہ بئے منی امر نوں کمک انت پدءَ منی مال ءُ دولت درست تئی جنکوئے نام ءَ بنت رئیس ءَ وتی درستیں گپ یکپاریگی جت انت پر امیتیں نگاهے گزیرءِ نیمگ ءَ چار ات ءُ پسو لوٹ ات
گزیرءِ بهمانگی گیشتر بوت دپ ءِ مشوک ءَ درکنان ءَ گوشت ئے هو بلے واجہ منی جنکو کسان انت پہ تو
رئیس ءَ ده هزار کلدار چہ کیسگ ءَ کش ات ءُ گزیرءِ دست ءِ مچ ءَ دات ءُ تو شور بہ کن باندا من ءَ پکائیں هال ءَ بدئے

گزیر اجبیں شش ءُ پنچے ءَ کپتگ ات رئیس ءَ اگاں من بزیراں چہ مال ءُ دولت ءَ وَ سیر باں اناں اناں چوش من نہ کن آں منی جنکو کسان انت آ گوں وتا جیڑگ ءَ ات پدءَ آئی ءَ رئیس ءِ کتگیں گپ گیر اتک هو رئیس نوں وَ پیر انت دگہ ده ءُ پانزده سال ءَ گیش زندگ نہ بیت پدءَ آئی ءِ چم وتی دیم ءِ کیسگ ءَ کپت انت اے کیسگ ءَ بهہ ٹکاهے مان نہ بیتگ مرچی ده هزار کلدار هو من رئیس ءَ زیراں آئی ءَ هلکٹ جت
ابا من گوں رئیس ءَ سیر نہ کن آں من ءَ کش ئے بہ کش درناز ءِ لنٹ هشک ات انت گوں گریوگی گالوارے ءَ گوشت ئے
شما سیرءِ تیاری ءَ بہ کن ئے من رئیس ءَ هال دیاں گزیرءَ درنازءِ گریوگ کمار نہ کت انت

هاں گزیر تو چے شور کت رئیس ءَ وتی بروت مرزات انت ءُ جست گپت
واجہ من تئی هال دیگ ءَ اتکگ آں من ترا زرتگ منی مال ءُ هک ءَ بدئے ءُ بیا لوگ ءَ بہ گوز گزیرءَ وتی هجالتی چیر دیان ءَ پسو دات
رئیس ءَ دگہ ده هزار گزیر ءِ مچ ءَ دات ءُ گوشت اے تئی دپ ءِ شرکنی انت

کودکیں درنازءِ گریوگ ءُ هیسکارگاں کسی گوشاں مورے ءَ نہ وارت گوش ئے آئی ءِ پریات ءُ زاری بے اسر بیتگ ات انت
آ چو دتک ءَ سمبهینتگ ءُ بانور کتگ ات بلے آئی ءِ ارساں بند بیگ ءِ نام نہ زانت گوش ئے آئی ءِ سینگ ءَ مردماں آسے زوک کتگ ءُ وت ندارگ چارگ ءَ ات انت
یک نیمگے هالو ءُ نازینک چست ات انت ءُ یک نیمگے بزگیں بانور وتی واهشانی پرس ءَ دارگ ءَ ات
دمانے ءَ رند رئیس گوں سالونکی پوشاکاں لوگ ءَ گوست
کودکیں بانور ءِ ارمان ءُ واهگ آپ کنگ ءُ آئی ءَ شیر ءُ شکر کنگ ءُ دیگ بیت انت
سرانی ڈیک ورگ ءَ گوں بانور ءِ تماه چو شیشگ ءَ پرشت ءُ چنڈ چنڈ بیت انت
ساهتے ءَ رند لوگ هالیگ ات رئیس ءَ لوگ ءِ دوئیں دروازگ بند کت انت
رئیس ءِ هوس ءِ اژم برانز گپتگ ات آ بانورءِ ملگوراں سماران ات آئی ءِ دست جهل روان ات آئی ءَ بانورءِ انارکانی سرءَ بد اتگیں ارس سپاه کت انت آئی ءِ ترکتگ ءُ زِبریں دست بانورءِ گلابیں انارکاں چو کنٹگ ءَ لگگ ءَ ات انت
رئیس وتی مستیانی موجاں دلگوش ات ءُ آئی ءِ د

ست انگت جهل روان ات بانورءَ وتی دست سرجاه ءِ نیمگ ءَ راه دات

رئیس ءِ کوکاراں گوں لوگ پدءَ یکبرے چہ مردماں پر ات بلے اے بری رئیس دراج گپتگ ات ءُ بانورءَ شلیں کارچے دست ءَ ات

انام رزا

Besam:
@Labzank
telegram.me/Labzank

ریشوت ءِ شرکینی

یک مردکے بُرت اش
آمیدگیس ءَ پیشی اے مردک نہ ھک ءَ دومی مردک ءِ سرا کپتگ ات " کازی ءِ کِرا برت ءُ پیش اش کت آنت گپ ءُ تران بوت جُست پَد بوت کازی ءَ لوٹ ات ھم ءَ مردکے نہ ھک انت بگوشیت ءِ توار میاری ءِ پئیسلا ھم ءَ ھکدارے ھک بدنت
ھم ءَ نہ ھکیں مردا وتی دوئین دست 👏 چست کت آنت کازی دیست کہ مردک وتی دوئین اے کہ چست کتگ آنت اشی مانا ھمیش انت ترا شریں بنڈلے زَر دائین کازی نہ ھک کہ ھک ءَ دات مردم درتک ءُ شُت آنت ھَرکس ھَرکس بوت کازی ھمے مردک توار کُت گوشت واجہ منی زَراں بدے من نہ ھکین کیس پئیسلا تئی ھک ءَ داتگ ھمے ھاترا کہ تو منا بَنڈلے زَرے اشارا کُت
مردک ءَ جَت کندگے کککککککککک گوشت ءِ شوم من ترا ریشوت نہ منیتگ اے اشارا من کت کہ تو وتی شلوار سیدا بہ کن تئی سامان دیوان ءِ دیم ءَ چو بیگم ءُ جنگی ءِ سُندا لُنجان آنت

نور پلیزھی


Besam:
@Labzank
telegram.me/Labzank

منی ساہ ءُ ارواح زبان انت منی
بلوچی زبان انت ء ُ شان انت منی

توار انت منی مئے زبان مادرے
بلوچی توار ءُ بیان انت منی

زبان مئے نشان انت ءُ مئے لبزوار
بلوچی مئے لبز نشان انت منی

منی جان قربان پہ شھّدیں زبان
بلوچی شکر گال جان انت منی

اگاں راہ ءَ ایل دے پشکپتگ ءِ
بلوچی مئے راہ ءُ روان انت منی

منی تاج ءُ تخت ءُ منی سیم ءُ زر
بلوچی مئے آن ءُ مان انت منی

اگاں پیر بے دست لرزاں تئی
بلوچی جوانیں جوان انت منی

تو دیوان ءَ نندیں تو مجلس کنے
بلوچی مئے گپ تران انت منی

کُجا رند تو بے زبان ءَ تچے
بلوچی زبان انت ءُ وان انت منی

رند بلوچ


Besam:
@Labzank
telegram.me/Labzank

"پدا کایاں "
مِهلبیں سُهبانی سمین سارتیں
چَہ زِرءُ پراهیں کوچگاں کائے
ترانگاں گیج ئےمنا لالءِبیکانی
بارگیں میانء ُنُگرهیں دیمءِ
جَل دمانےءُ دے منا هالاں
دےمنااهوالاں زباد موشءِ
دل منی قہرءُمن دراں ڈیهاں
گریشگ ءَزندءِ سستگیں سیهاں
بیدمن چون اِنت منی مکهیں ماتیگ
تلوس اَنت منی بیلءُگنگلءُ اَمراه
پیرکی دودانی بُنی دوزواه
چون کن اَنت گوازیگ ماں مآهکانیاں
هُلکہاں مِهرءِرُستگیں ورنا
چوں کہیرسولیں ما لَدء َلُڑّاَنت
گِردُکءُسیاه تاکیں کُنرگواشءِ
بوموئیں تلّانی تلوکیں آپ
مهکمیں سِنداتاں چِتورپروش اَنت
مِهترءُمیرانی چوکّ بندین
میشاں اوبالءِچوں کن اَنت آدروه
هلکوءِ ریٹائیں جِنک جُتکءَ
چون جن اَنت چاپءَچوں گُش اَنت نازینک
چم کئ پہ من ارسءُهولُنب اَنت
کئ دلءَ اوپارپرشتگءُ ژند اَنت
دے سلامان بر هما لال ءَ
زند بکشوکیں هلکءِ وش گالءَ
گُش منی ماه دیمءَ کهیبانی
ٹیٹلءُ زیباءَ گنج ءُ سیتانی
بانُک ءَزردءِ ماه ءَ تابانی
جنّتی بےمَٹیں براهءَ هورانی
نِند دلءَجزم بی کہ من پدا کایاں
هَنچوکہ کئیت اِنت گوات سباهانی
"" غلام حسین شوهاز""

Besam:
@Labzank
telegram.me/Labzank

وشکند "چِیگُو" دلجان لعل

وتئی وهدءَچِیگُو تامُرانی سکیں شوکینے اَت چشیں تامرے نیست وتئی دورءُ نوبتاں چِیگُوءَ نه چار اِتگ.
آ وهدی َکسی گِسءَ "Tv"نه بوتگ "سینیما"ءِ دور بوتگ گیشتر مردم تامرانی چارگءَ "سینیما"ءَ شُتگاں ،انڈیائے تامر"مغل اعظم" آ وهدی نوک اتکگ اَت گیشتر مردم "مغل اعظم"تامرءِ وداری اَتاں گڑاں 'چِیگُو' ءَ هال رسیت مرچی شپ "سینیما"ءَ "مغل اعظم" چارگ بیت ، چِیگُو ءِ گس سک دُور بیت چه "سینیما" ءَ چِیگُو "مغل اعظم" تامرءِ چارگءَ مگربءَ کئیت وتا سینیماءَ رسینیت مغل اعظم سینیماءَ پِر بیت داں آسر بیت شپءِ ساهت دوازده بیت مہلوک په وتئی لوگاں سرگراں نو چِیگُو ءَ ائیدے سٹائیت نزاں چون بکناں ایوکءُ تہنا اَت چِیگُوءِ دلءَ جنءُ دِهانی ترس اَت راه هم سک دور ات چُرتےءَ کپتگ اَت تُرسءَ چِیگُوءِ اگل کار کنت داکتر عبدُلءِ گس سینیماءِ پُشتی نیمگءَ اِنت ءُ پرپٹ هم داکترءَ است چونءَ داکتر عبدُلءَ شپانی نیما نه ترسیت نادراهانی هاترا هرجاهءَ روت اگاں مرچی من دروگے بےبنداں آزمان نه کپئیت گڑاں داکتر عبدُلءِ گسءَ روت دروازگءَ ٹُکّ اِیت داکتر وابءَ چه پاد کئیت دروازگءَ پچ کنت جُست کنت ئے، تو کیا لوٹے!تئی نام که اِنت! منی نام چِیگُو اِنت داکتر جلدی بِرے که منی مات ءَ دردےءَ گپتگ داکتر جامگءَ گْورا کنت پرپٹءَ ڑنا کشیت چیگو سوار بیت رهادگ بنت، راهءَ گشان بیت داکترءَ ،چیگو وتی گِسءَ گندیت دلے ایمن بیت ، داکتر بوشت منی گس اش انت داکتر اُوشیت چیگو داکترءَ گُشیت ترا نو اجازت انت ،داکترِ چماں در گُڑینیت زهر گیپت چیگو تو منا گشتگ تئی ماتءَ دردےءَ گپتگ نو تو گشئے اجازت اِنت ،،داکتر ساب گپ اسلہءَ اِش اِنت من بوتگاں سینیما ءَ"مغل اعظم"ءِ چارگءَ وهدے که تامر هلاس بوتگ من چار اِتگ ساهت دوازده اِنت منا گسءِ روگ سک ترس اِتگ همئے واستءَ تئی در ٹُک اِتگ ترا شاباش انت منا لوگءَ رسینتگ
داکتر پرپٹءَ چه هیر کئیت چیگو تچیت.


Besam:
@Labzank
telegram.me/Labzank

بلوچی لبـــــزانک:
"عیسی گل ءِ نوکیں پربندے ،،

جست مکن ھانڈو ءِ حسابانی
ٹانکی ءِ آپ تاں کُجا رستگ

پیسرا گُشتگ ئے ھُدا ٹاپے
تئی سرءِ ٹاپ تاں کُجا رستگ

مئےبچارلاپ چہ شُدءَچنگ انت
تئی بچار لاپ تاں کُجا رستگ

بیا بکن دیم چیر وتی کونڈاں
منجل ءِ باپ تاں کُجا رستگ

ھرکسےکئیت پہ لُردے ماھیگءَ
پٹّے وادآپ تاں کُجا رستگ

من ھما لُکّیں دزریاں انگہ
جی تئی ماپ تاں کُجا رستگ

Besam:
@Labzank
telegram.me/Labzank

😆😀😁😁😳😄😃😆😀😜😁😁

اگـں تــو دیــت یــک مـــردمــے ترا سک چارگ انــت تـئی پجّـاہ آروکــے نـہ انــت ســلام کنگ انــت گـوں تــو کندگ انـت ، مـہ تُرس اے تئی ھٰلک ءِ شورای ءِ گچین کاری ءٰ اں ( اوٹاں) اوشتاتگ

رجانـک : قادربخش کلـمتـی


Besam:
@Labzank
telegram.me/Labzank

بلوچستان
🌹🌹🌹🌹

منی زرد ءُ ھیال ءُ واھگانی ھند ءُ جاگاہ اِنت بلوچستان
منی دود ءُ ربیدگ پگر ءُ سسّا اِنت بلوچستان

منی چمروک ءُ چمشانک چم ءِ سارتی ساہ ءُ ساسار اِنت
مزن پاگیں بلوچ ءِ کوٹ ءُ درگاہ اِنت بلوچستان

ھزار گنجیں تیاب ءُ زر گوں نود ءُ کوش ءُ وش گواتاں
ابد مان بیل ءُ سنگت ھور ءُ ھمراہ اِنت بلوچستان

اے بُرزیں کوہ ءُ گٹ ءُ گَر اد ءَ مِکّ اَنت سالانی
مزار ءُ تنگوئیں بچانی سر جاہ اِنت بلوچستان

اد ءَ ھست سیاہ سوار ءِ پَد کہ مَٹ اَت گوں ھزار مرد ءَ
اد ءَ اَنت چاکر ءِ بادگیر اے کوٹ اِنت ھملے ھوتیں اد ءَ دودا ءِ لیب جاہ انت

ھزار سالی پد ءُ رند اَنت نہ بنت کُھنگ منی چماں
اے آلی انت اے گنگو اِنت اد ءَ رندانی جنگجاہ انت

نشان ایر اَنت اد ءَ میریں نسیر ءِ دود ءُ دابانی
میار ءِ سر ڈگار ءُ پُشت ءُ آپجاہ اِنت بلوچستان

من ءَ شیھیں مرید ءِ ستکگیں بندانی بو ءِ کیت
چو ھانی ءَ گرانمل سک دلواہ اِنت بلوچستان

اے ڈوک ءُ ڈل من ءَ دوست اَنت چو جان ءُ ساہ ءُ ارواہ ءَ
منی چماں گوش ئے چو کوہ ءِ سینا اِنت بلوچستان

منی پت پیرکانی بندری ھنکین ءُ نند ءِ جاہ
تی چم انی اد ءَ سکّ اَنت بچار ڈاہ اِنت بلوچستان

پہ گوم ایر کن وتی پاداں سر ءَ تو شری ءَ سار کن
پہ تو چات ءُ گر ءُ گٹ سک رنگراہ اِنت بلوچستان

امیری ندر ءِ کنت پہ ڈیھ ءِ تنگوئیں بچاں
منی گپ ءُ تران ،زند ،سھب ءُ بیگاہ اِنت بلوچستان

استاد مھمد مراد امیری
َ

Besam:
@Labzank
telegram.me/Labzank

🌴🌴مھمدبلوچ🌴🌴
مرچاں دگنیا ، اشتاپ ءُ تیز رواجی ءِ دگنیا اِنت ، بلے نہ زان ایں کہ دگنیا ھر چینچو اشتاپ تر بہ روت،
مئی اُمبر زوت تر کٹ ایت ءُ ھلاس بیت چُک کہ ھست ایں پہ مزن بیگ ءَ اشتاپ کن ایں،مزن کہ بیت ایں وتی جاندراھی ءَ پہ مال ءِ کَٹگ ءَ ندر کن ایں ،مال ایں کہ کٹ اِت ،سار کن این کہ نادراھیں ءُ مالاں پہ جاندراھی ءَ ندر کن ایں ءُ اے بی آسریں چَھر اَنچش چَھر وارت ءُ ما ھم گوں آئی ءَ چَھر ور ایں.


Besam:
@Labzank
telegram.me/Labzank

(سچکان گچین)
لچّہ کار:مبارک کازی
〰〰〰〰〰〰〰〰〰〰
https://telegram.me/balochtaak

آزمانکّار: منیر مومن
"امانت"
دوشی من بے وهدءَ گِسءَ واتر بوتگ اِت آں. پمشکہ وهدے آۂیءَ منا چہ وابءَ پاد کت تہ من پہ هزار جنجال وتی متّاچ چراۂیءِ گوناپءَ گیشینت اَنت ءُ جُست کُت"زاناں بےوهد اِنت.......؟"
" تو منی سررَند ءُ آدینکاں پرچا چیر د ۂے .......؟" آۂی ءَ پسّہ دات ءُ گوں لنکُکاں سرءَ رَندانءَ ڈنّءَ دراتک.
چَندے ساهت اَنچو واب ءُآگاهیءِ نیامءَ گْوستءُ چِدءُ رند من هم پاداتک ءَ ڈنّءَ شُت آں. ما دوۂیں کہ دیم پہ دیم نِشتیں، آۂیءَ پُرس اِت"مرچاں مردم ترا روک روکءَ پرچا چار انت......؟"
من گُشت کہ "مردم منی تہا تۂی گاریں سررند ءُ آدینکانی شوهازیگ اَنت پمشکہ" آۂیءَ گوں وتی مِیداں لۂیب کنانءَ درّاۂینت"اگاں تو منی لنکُکاں چیر بدی ۂے کڈا چوں بیت."
ءُ من پدا لوگءَ پُترِتاں...........


Besam:
@Labzank
telegram.me/Labzank

من زالبولیں نبشتہ کارے آں #

من زالبولیں نبشتہ کارے آں ،هؤ من وتی ماتی زبانءِ زالبولیں نبشتہ
کارے آں کہ پرے هالا آں، گندگءَ وا منی ند آجو اِنت بلئے منی لنکک سرپداں کہ من کجا چہ بستگ آں،
اے گپ راستے کہ من نبشتہ کناں بلئے دلءِ تبءَ اِناں................
کہ منی پت منی برات منی کٹمءِ ازتءِ کیسگ ٹنگ بیت ءُ آهانی گیرت روب مزن شانی چو ریجوکی چار آنہ ءُ هشت آنہانی وڑا رچان بنت ءُ هاکاں گوں هوار بنت، پدا منی سانگءِ لوٹگءَ اوں کس نئیت کہ اے جنک شریں جنکے نہ اِنت، اشیءِ گمان چو شترانکوئے وڑا شتریت،
منی چاگرد منءَ امریتا پریتمءِ وڑا نبشتہ کنگءَ مکن کنت ءُ داریت،
من عصمت چغتائیءِ وڑا وتی ندءِ لہلہکءَ کش اِت نکناں،
منی دست گوں ریزاں بستگاں کہ من هندوستانءِ تلسی داس بالاچءِ وڑا وتی هیالاں مریچاں،
من پروین شاکرئے رنگءَ لبزاں بہ کتاراں منی برات منءَ گوں وتی سیادیءَ سند اَنت،
من اگن نبشتہ کناں پمن گیشاں چہ گیش سئے بن گپ ءُ سرهالاں، گریبی ءُ گژنگیءِ بن گپ، دودءُ ربیدگءِ بُن گپ، یا کہ لهتیں جنگولیں بامرد بنازیناں ، چدو آ دیم منی دیما دیوالءِ چین سُرپ مان ریتکگ ءُ بستگ،
هبر دار اگں من سیکسءِ سرا یک لبزے نبشتہ کت، هبردار اگن من دگہ شترتگیں لبزے نبشتہ کت، چیاکہ آ دگہ بن گپ ءُ سرهال مردیناں ٹیکہ زرتگ آں،
من یک زالبول ءُ جنکے آں من حدءِ توکءَ بباں،
برے برے من جیڑاں منءَ منی برات پرچہ چو گشیت کہ زیتون همیش انت تو وا نبشتہ کنگائے مئے ازتءِ هیالا بدار،
پدا من کہ ایوک باں منی باتنء نبشتہ کارِ گریت کہ زالبولءِ ند زاناں دلوتے کہ اشکیل کنگ بوتگ ، یا منی براتانی ازت زاناں نوک زرتگیں گرانڈے ءُ گٹورے
کہ کمپانءَ چہ ڈن روت گار بیت،

اے وا سئے بن گپ بوتاں من چو جوهان مشیں گوکءِ وڑا وتی ندءَ همے سئیں بن گپ ءُ سرهلانی گولائیءَ بہ چکریناں،
آ کہ ندکارے آ کہ ندءَ دستءَ کنت تیوگیں دگنیا آئیءِ میتگ ءُ بازار اِنت، ندکارءِ ند چو بالی مرغءَ انت کہ آ توری روچ دراتکءَ نندیت شر کہ روچ ایرهتءَ ، زربارا نندیت شر یا گوریچانءَ ،ءُ چدو آدیم اوں یک گپے است آ گپ ایش اِنت کہ ندکار ایوکءَ ندکار گشگ بیت آ نہ بچکیں ندکار گشگ بیت ناں جنکے،
مئے مردم کدی سرپد بنت کہ آ نبشتہ کار ءِ وجود مارگ بیت گندگ نہ بیت، نبشتہ کار مردمءِ توکءِ مردم اِنت آئیءِ جند نہ اِنت، مئے مردم پرچہ سرپد نہ بنت کہ اردوئے شرابی دستونکانی نامدار تریں نبشتہ کار ریاض خیرآبادیءَ داں مرتگ شتگ شراب ءِ جند بوهـ نہ چتگ،بلئے آئیءِ دستونکاں بچار آئیءِ دستونکانی همک جتک گشءِ شراباں گوں پِر جتگ گندئے انچو گوانڈو ٹونساں گوں چاه ءَ پِرجناں ورنت،
اے وا زلمے ءُ بلاهیں زلمے منی گناه همیش انت کہ من جنک ءُ زالبولے آں،
اگن منی جند شما بستگ بلئے منی هیال وا آجو اِنت،
اے بازار اے میتگ ءِ چیریں درد ءُ مونج چو سیکارچءُ گرزا بنت منی ٹیلگاں چہ بُنءَ کش اَنت ءُ نہال کناں، اگن من اشاں نبشتہ مکناں،
بزاں منی میار همیش انت کہ من جنکے آں، من مردےءِ جن بہ باں هروهدا وتارا چو نواب باهیانءِ دهکان ، دهکان سوالیءِ مادیانءَ بہ سینگاراں پل ءُ شوشنگ بکناں داں منی لوگ واجہ شپءِ نسپءَ گوں شرابءِ مرانٹیں بوهءَ بئیت ءُ چو چناه ءُ کاجاهءِ پیما منءَ دانگ دانگءَ وتی زردیں دنتانانی چیرا دور بدنت ءُ ژیرت ژیرتءَ بوارت،
من پرچہ گنجاتونءِ کسہ ءَ نبشتہ مکناں کہ کجام غم آرا کهبگی پرماهیت ءُ آ دراهیں روچ بازارا یک پادا گولیت، آ کجام درد انت کہ آئیءِ پاداں آٹیگ بکشیت،
من پرچہ زلیہءِ غم ءَ نبشتہ مکناں کہ آئیءِ اُمبر پنجاه سال انت آئیءِ نازاکیں جوانی رمیزانی دپءَ پرے گپءَ دور دئیگ بوتگ کہ ترا پہ سانگ آروکیں بچکاں نزوریں رگ مان بوتگ ، آئیءِ هدامرزی ایں جوانیءِ پُرسءَ من پرچہ وتی ندءَ مگریواهیناں، من وا زالبولے آں زالبولے کہ زالبولءِ غمءَ مزانت گڈا کئے غنی پرواز ـــــ ناگمان ءُ حنیف شریفے بزاناں، من گشاں مردین نبشتہ کار وتی سرا گوں سنگاں بجنت زالبولی چیریں راز ءُ اسراراں سرپد بوت نکنت؟
من پرچہ سنجیءِ هلاهوشاں نبشتہ مکناں کہ هرشپ آ چو بے کدیم ءُ کاهیں بُزءِ پیما پلینگیت بلئے آئیءِ مرد وتارا بچک بازے کنت گوں گوانڈواں سرءُ چیر اِنت،
من پرچہ بزگیں آمنہءِ غمءَ بے غم بباں کہ گندگءَ آ تیوگیں جنینے آئیءَ سانگ ءُ سور کتگ بلئے جنینی اعضاها چہ زبہر اِنت، ءُ آرا داں زندگیں چُک بوت نکنت، ءُ چدومستریں گپ ایش اِنت کہ آئیءِ گیرتمندیں مرد چوں وتی گزرانءَ کنت،
من پرچہ داشتہیں تاجیءَ چہ شموشکار بباں کہ زنڈیں واجہ کارےءِ لوگءَ داشتہی کنت ءُ همے کہ شپءَ آ کاراں هلاس کنت ءُ لوگءَ رواگی بیت واجہ ءِ مزن گردنیں چُک آئیءَ گرنت ءُ آئیءِ آنجگءَ سد ٹکر کن انت آ پہ وتی چورهیں چکاں مجبور انت سهبءَ پدا کارا کئیت،
من پرچہ شست سالی پیریں سمینءِ اے کرداں نبشتہ مکناں کہ گوانڈو ساپیں بچکاں زرءُ کلدار دنتءُ لوٹاهینی ءُ هری ءُ اسپی کنت کہ آئیءِ دلا آئیءِ پیریں مرد جلب هری ڈونڈءِ