پکیر مهمد پکیر کلمتی ۱۹۱۱ءَ ، ڈِگ ملیرءَ پیداگ بیتگ آئیءَ وتی بنگیجی وانگ چہ وتی واجہـیں پِت مُلّا دوست مهمدءَ در بُرتگ کہ میتگ ءِ مکتب ءِ مُلّا ءُ مسیت ءِ پیش امام بیتگ -
پکیر کلمتیءَ ۱۸سال ءِ سندءَ لچّہ کاری بنگیج کرتگ - اے میراس آئیءَ چہ وتی پیریناں رس اِتگ - آئی جند گوشگ پدا ، آئی ءِ دستونکانی دپتر ، چہ هندوستان ءُ پاکستان ءِ سالءَ پیش '' گُلزار مکّران'' نامءَ چاپ بیتگ
ملا پکیرءَ بلوچی ءِ اهدی ، ءُ مروچیگـیں دورءِ دستونک ، دوئینانی تہ ءَ لچّہ کاری کتگ - آئی ءِ دستونک ساده - آسان، ءُ الباریں زبانءَ انت بلے چہ دردءُ سوزمانءَ سرّیچ انت - پکیر دومی کتاب پکیرءِ کچکول نامءَ سال۲۰۱۱ءَ چہ بہارگاه چاپ شنگ جاهءَ چاپ بیتگ

📝 عابـد آسکانی

@Labzank
telegram.me/Labzank

دوشـی تئی هیالانـی تـہ ءَ اِتاں چہ چمّـاں منـی پِٹّے ارس کپـت چہ همے پِٹّ ارس ءَ مـن جُست کُت چے ءَ کپتئے!
گْوشت ئے : آه تئی چمّانـی تہ ءَ دگے یکی هست نی منـی جاه نـہ اِنت .

@Labzank
telegram.me/Labzank

وهـدے کہ دل ءَ پر تو زهیـر کنت آزمـان ءَ یک اِستارے کـپ اِیـت اگاں آزمان بـے اِستار بیـت میار تئیگ اِنـت.

@Labzank
telegram.me/Labzank

نامانی کلمت چہ بوهیرءُ بہادرّیں کلمتیاں نام کپتگ ، یا کلمتی چہ هزار گنجیں کلمتءَ نام دار انت؟ اے چاریں کشکانی کشّگ ءِ نیمون ، دپترانی سرمچار ءُ سرمتابیں راج ، بلوچءِ مڑاه ءُ منگہانی مزار بیمیں ٹِکّ '' کلمتـی'' ءِ باروءَ ، دو گپ پہ ره رواجی ءُ مزرانکی جنگی انت ،
اے گپّءِ تہءَ هچ ڈولیں شَکءُ شَہبوے نیست کہ بلوچانـی اے متُرسءُ کنگریں ٹک پہ وتی گلزمینءُ راجی دودانـی ، رکّینگءُ پہریزگءَ ، همک شرتگءُ توپّان، هارءُ هیروپ، دنزءُ تامور، ءُ لوڈءُ لاٹورانی دیمءَ چو برزیں ماتبندءُ هساراں ، مجّتی مِکّ بوتگ اے گپّءِ شاهدیءُ گواهدیءَ جهانءِ نکشیں دپتر دے انت یا پیرءُ کومپالیں آزمانءِ دیر گندیں چمّ - یا گڑا کلمـتءِ مَستءُ دْریپوکیں ساوڑ کہ مرچی هم زِر ڈنگانـی بیڑءُ ارش ، ءُ شیریں همل کلمتـی ءِ زهر سجّءُ شَهم ءُ شروکانـی جوهرداریں '' جُلّی'' آئیءِ روهوانی تْرسیں '' سیاه '' ءِ تْردگءُ نچّگ ، ءُ گردءُ نبردانی داستان ئے دپءَ هار انت -
میر هملءَ ایوکءَ پہ وتی زباد بوئیں هاکءَ گوں زوراکیں پرتگیزاں جنگ نہ کت بلکیں گوں ایشیءَ هور همل کلمتـیءَ آ ما میاتکانی دیمءَ پہ گُرّ ءُ نہرّ ، هکّل ءُ نہیب گوشت کہ آئیءَ هچ ڈولیں تماهے چہ مرادانی منزلءِ رسگءَ داشت نہ کنت - آ پہ وتی شهدءُ شکلیں زبان ، بـے دروریں پوشاک ، ءُ هزار نازیں دودءُ ربیدگاں وتی ساه ءُ سرءَ هزار رندءَ ندرْ کنت - ایشانی سوداءَ پوّت مرگ لیک ایت نیٹ آئیءَ پہ ایشانی برجاه دارگءَ هنچوش کت - چہ آئیءِ زگرءُ ریٹویں هوناں مرچی هم بلوچ گلزمینءِ تیهُریں کوهءُ لنجیں زِر همک سُہب ءُ بیگہ سُہرءُ کرمز بنت-
کلمتـی چہ کلمتءَ بگر داں کلرشاکءَ ، چہ ملیرءَ بگر داں گڈّاپءَ ، چا کاٹورءَ بگر داں کونکرءَ جلگہیں کراچی، باهوءَ بگر داں دشتءَ ، شاهگانـیں بلوچستان ملکءُ در مُلک ، هر زیدءُ دمگےءَ شنگءُ تالان اِنت اے ٹِکّ سکیں جان سپاهءُ چپا کشّیں ٹکے - هر جاگاهےءَ کہ بندرئے بستگ آ چاگردئے سبزینتگءُ آباد کتگ پہ هزمتءُ دلهنگ دیگءَ جان ئے هجبر نہ دزاتگ - کشارکاری ، مالداری، باپار، ءُ هر جائزیں کارءُ روزگارےءَ تکش اِتگ - باگچہیں ملیرءِ هرچ دلکشیں نهالےءِ رستءُ ردومءِ تہءَ ایشیءِ جانءِ شیرگ ءُ هون اوار انت - کلمتـی چہ بندرءَ بلوچانـی دود پہازیں ٹکے بیتگ آئیءَ وتی لبزءُ دود یک پیمءَ برجاه داشتگ انت - کولءُ لبزءِ پابند بوتگ - چہ باهو دشتیاریءَ بگر داں باگچہیں سِندهـ ءَ کشتءُ کشارءِ کارءَ بلوچانـی سے ٹِکّ کلمتـی، جدگال، ءُ هوت چہ درستیں ٹکاں مرچـی هم دیمءَ تر انت -
📝 عابد آسکانـی

@Labzank
telegram.me/Labzank

دادشاه م ی دُرّا بلوچ

پـہ مـڑاه گْوازینت زنـدگـیں دورے دادشـاه
پـہ پـدی مـرداں گْورتگـیں هـورے دادشـاه

زلـم ءِ ربّـالاں آئـی ءِ نـام ءَ تـوراتـگ
تاجہـان هسـت انت پـہ بـداں جـورے دادشـاه

راجءِ شہمیر انت نام ئے چو شہدءَ شیر کن انـت
مـاں بلـوچ ڈیـهـ ءَ وژبـویں مـورے دادشـاه

روه ئے شادان انـت پـہ وتی مرگ ءَ منگہـیں
هکّ ءِ آزمـان ءَ مـرتگــیں پـورے دادشـاه

گـر پـہ البـارے مُلـبت ءَ چمّے شانـک بـہ دے ایں
پـہ همـک نسـل ءَ بُتـکـیں کـورے دادشـاه

لاگـر انـت راه ئے گهیـپاں شیـری تْـرنـد کـن ات
پـہ مـڑاه لوٹ ایـت چـہ شما گـورے دادشـاه

هـکّ ءِ پـریام ءَ گـوں نـد ءَ دُرّا کـرام کنـت
نسـل ءِ پیـژواک ءَ کـرتگـیں شـورے دادشـاه

@Labzank
telegram.me/Labzank

آزمانـک ....................دل مانگـیءِ یلـیں آس

اسـلم تگـرانـی

چـہ بازیں چم چاری ءُ اوشتـگ ءَ پـد آهاں مـن ءَ ترونـی سُتکگـیں نگنے دات - نگن من زُرت جہلاد اِتاں کہ چمّاں چست کناں درستـیں گْـونـڈوانـی چمّ منـی نگن ءَ سکّ انـت - منـی پُشت ءَ گون اِت انت - رَهے من رَهے گْونڈو مـن باج نـدات اَنـت -
دل مانگـی ءِ یلـیں آس ءَ آ همنچک سوتک انت کہ گپ نہ بیت ، بلے وهـدے کہ مـن سما کُت منـی دست ءِ نگن پاچِن ءَ چامپت -
مـن ءَ انچـیں کانٹے جت ئے کہ روچ ء مرچیگ ءَ مـن ءَ یاد آهگ ءِ هاٹیگ مان نیست ☀️


@Labzank
telegram.me/Labzank

/گـم پہ گِدارے نشتگاں بیا منی دلے بند\

پس اگاں واڑا بستگاں بیا وتی ھَر ءَ بند
سبزیں کڈب من کِشتگاں بیا وتی ھَر ءَ بند

مادگ ءَ پرچا تو یلہ دئے /اَلّے
کُرّگ ءَ گَلیناں پد ءَ کئے
لٹّے جنانی من گُڑا نئے

گونی یے سُورو دو ھزاریں / اَلّے
گَلّہ ءُ ماشاں کج ءَ بیاریں
نشتگیں جند ءَ چہ شِزاریں

سُوجاں نزیر اِیت منی زاریں
گوک ءُ پساں جنگل ءَ چاریں
ھوش تئ پرچیا گاریں

ھُشتر ءُ میشاں بکن لیلام / اَلّے
بلکیں تئ کُٹ اَنت منی وام
رند ءَ تُوری تو ببئے ھمشام

گپ ءُ ھبر بیت مسکر ءَ بیت / اَلّے
میگ ءُ تئ زاری چہ ھَر ءَ بیت
لالو ءِ کاھانی سر ءَ بیت

لالـو پیـشوکانی

@Labzank
telegram.me/Labzank

رجـانـک : ادَبـی هَـکـیـم
هَـمـے وَهـد ءَ کـہ زِنـدَگ اِت گـوں یَـکـدگِـرءَ گـپ رَپ بـہ کـَـن اِت مِـرَگءَ ءُ رَنـد زَهـیـروک ءِ جَـنَـگ کـسـےءِ دَرد ءَ نـہ وارت.
رَدیءِ پَـهـک کـنَـگءِ وَهـدءَ وَتـی بـراهُـنـدَگــیءَ پَـهـک مـہ کـن اِت.
اَگـاں بـراتءَ رَدی یـے کـُـرت تـو وَتـی بـراهُـنـدَگـی ءَ گـار کـنَـگ ءِ پـگـرءَ مـہ کـن وَتـی بـراهُـنـدَگـیءَ دارَگ ءِ پـگـرءَ بـہ کـن.
----») شَـرّیـں کـار بـہ کـن اِت ، هـاوَنـد ءَ شَـرّکـار دوسـت بَـنـت («----

@Labzank
telegram.me/Labzank

گـوَشـکـَـنـد – ادَبـی هَـکـیـم
مَـردے چـہ وَتـی مُـلـک ءَ لَـڈ ءُ بـار کـُـرت ءُ مـاں دگِـے مُـلـکـے شُـت ءُ جَـهـمـنِـنـد بـوُت یَـک روچـے آئـیءَ دیـسـت مَـهـلـوُک ءَ جَـنـازَگے‏ءَ وَتـی لَـنـکـُـکـانـی سَـرءَ چـسـت کـُـرتَـگ ءُ آئـیءَ کـبـرسـتـانءَ بَـرَگءَاَنـت مَـرد هَـبَـکـّـہ بـوُت ءُ سَـوَبءِ جُـسـت کـُـرت مَـهـلـوُکءَ گـوَشـت اِے واجَـہ مـئـے مُـلـکءِ زَهـگـانـی اُسـتـاد بـوُتـگ اِشـیءِ وَپـاداری کـَـنَـگءُ اِزّت بَـکـشَـگ مـئـے پَـرزاِنـت .
دگـے یَـک روچـے مَـردءَ دیـسـت مَـهـلـوُکءَ دگـے یَـک جَـنـازَگے وَتـی سَـرانـی بـانءَ کـُـرتَـگ ءُ آئـیءَ کـَـبـرسـتـانءَ بَـرَگءَاَنـت مَـرد پَـدا هَـبَـکـّـہ بـوُت ءُ جُـسـت کـُـرت مَـهـلـوُکءَ گـوَشـت اِے مَـرد مـئـے مُـلـکءِ هَـجّـامے بـوُتَـگ اِشـیءَ مـئـے مَـردُمـانـی سَـر تـراشـتَـگ اَنـت اِشـیءِ وَپـاداری کـنَـگءُ اِزّت بَـکـشَـگ مـئـے پَـرزاِنـت .
مَـردءَ گـریـوَگـے بُـنـاه کـُـرت مَـهـلـوُکءَ جُـسـت کـُـرت نـوں تـو پَـرچـا گـریـوَگءَئـے ؟!!!... مَـردءَ گـوَشـت شـمـارا کـَـلامـے بـہ جَـنـت آ مَـردُم وَ اُسـتـاد ءُ هَـجّـام اِت اَنـت کـہ شـمـا پـہ لَـنـکـُـک ءُ سَـرءِ بـانءَ چـسـت کـُـرت اَنـت ءُ کـَـبـرسـتـانءَ بُـرت اَنـت ، مـن یَـک سُـنّـت کـَـنوکـے آں گـڑا شـمـا مـنءَ چـیءِ سَـرءَ چـسـت کـن اِت ءُ کـَـبـرسـتـانءَ بَـراِت ?!!!....ههههههه😂😁😄

@Labzank
telegram.me/Labzank

" مئے لوگانی نگھپانی ءَ کَئے کنت "

ما چِداں لڈّ اِتیں دُور شتیں اگاں
مئے لوگانی نگهپانی ء َکئے کنت
کئے کنت دریگ ء ُتاکچهاں گوں گپ
کئے بہ گندیت واب اے پیژگاه ءَ
من ءَ چہ پد
کئے بہ بیت اگاں بہ جیڑیت گوں وت ء َبکنت اِنت جنگ
ماں چِداں چہ لڈّ اتیں دُور شتیں اگاں
مئے کتابانی َاُگده ءَ بزیریت کئے
کئے منی شئر، کسہ ء ُنبشتانکاں جم بکنت ء ُبہ نزاریت
من ءَ دل نہ بنت پُلّ پہ دروهگ ءَ
کتاب پہ سوچگ ءَ
اے پیژگاه ءُ در دریگ پہ اُیوکی
من ءَ دل نہ بنت اے یات ء ُگم، پُشت جَنگ، روگ
ما چِداں چہ لڈاتیں دُور شتیں اگاں
مئے لوگانی نگهپانی ءَ کئے کنت

" اُستاد اے آر داد "
ـــــــــــــــــــــــــــــــــ
@Labzank
telegram.me/Labzank

وازمندگاں عابـد آسکانـی

تو منـی ارواه ءُ ساه ئے مـن پـہ تو وازمندگاں
زنـدمان ءُ زنـد ءِ براه ئے من پـہ تو وازمندگاں

شپ نـہ کنزایـت سْیہ تہاریں ، آتکگ ءُ اردئے کتگ
تو منـی اوستانـی ماه ئے من پہ تو وازمندگاں

منـی هزار گنجـیں مُـراد ءُ واهگانـی منـزل ئے
آجـوی ءِ زنـد ءِ ڈاه ئے مـن پـہ تـو وازمندگاں

تـو منـی چمّانـی روک ئے بـے تو دنـیا ژیمبءَ گر
سْیہ شپـیں کُلّ ءِ سپـاه ئے مـن پـہ تـو وازمندگاں

سُہب ءُ بیگہ هَیر کشّاں ، مـن تئی داد بکشـیں درءَ
مـن گـدا تـو بادشاه ئے مـن پـہ تـو وازمندگاں

بیـد تئی مہر ءَ مـن ءَ گون نیست دگہ هچ مہشرءَ
منـی گُناه ءُ منـی سواب ئے مـن پـہ تـو وازمندگاں

بیکہ تئی همنْیادی ءَ ، دُرگل بہشت هـم جہندم انت
تـو منـی زِنـد متـاه ئے مـن پـہ تـو وازمندگاں

گـوں نگاهے ءَ بـدل کُت ، عابـد ءِ دنـیا ءُ دیـــــن
تـو همـا نیکـیں نگاه ئے ، مـن پـہ تـو وازمندگاں


@Labzank
telegram.me/Labzank

بتل
* هورے که په نودی شل ایت
هر روچ مئے مهمان نه بیت

* ٹپّر وتی بے منت انت
که دائم ماں هاکاں پچ انت

* شپ اگاں هر چنت انت تهار
پیداور انت ماتءُ گوهار

* روچ پہ لنکک چیر نہ بیت
روباه پہ دپ شیر نہ بیت

* آ زهم پر جوهر انت
دستءِ نامرداں بد گوهرانت

* هدا کے دنت لوگ جُستءَ نہ کنت

* کار بکن چو گلامءَ بہ ور چو واجہءَ

* دست مہ دُزّایت دل نه لرزیت

* برات اگاں لیگارءُ پچار ماتیں مهرئے چہ کُلّ عالمءَ زیات انت

* مار هر جاهءَ چوٹ انت بلے وتی هوڈءَ تچک بیت

* لونڈیں سرءَ کلاه نہ براهیت

* دگر دستءَ تپر توار سک وش انت

* روگن بازیءَ کس هرءِ لاپءَ چرپ نہ کنت

* دیوان پہ مرداں وش انتءُ بار پہ لیڑهاں

* دپ کساسءَ دپارءَ دپءَ کن

* دریا بـے ماهیگ نہ بیت

* سوریں آپ ماهیگءَ سگتگ هُشکی آهوگءَ

* روباه وتی هوڈءِ تها گُرّیت

* تولگءَ بـےاولاسگءَ نہ بیت

* وائے وتن هُشکــــــــــیں دار

* لشکر جَت سبزایت لاپ جت نه سبزایت

* نانءِ دیگ سکّ انت
بلے سِلاهءِ جَنَگ هَکّ انت

* لَبّاں کلات تَرّینتگ اَنت
هُشکیں رزا پَشت کپتگ انت

* هَر مَبـے سُرمباں مہ چار
اُشتر ببـے دیر بچار


@Labzank
telegram.me/Labzank

نیم بندگ عابـد آسکانـی

دوشـی آتک جَـت ئے دروازگ
جَـت مـن ودّل ءَ انـدازگ
اے مـرد الّـم ءَ الّـو اِنـــــت
یـا نـہ کَسـتریں ولّـو اِنـــــت
لـازم چـہ دو بـرات ءَ یکّـــــے
نیـست ات منـی دل ءَ دگے شکّے
تـوک ءَ چـہ تـواروں پِـر کُـــــت
نـے کـہ جِنـد وتـی زاهـر کُـت
گْـوشتـوں تـو کـے ئے الّـو ئے؟
یـا نـہ لنـڈریں ولّـــــو ئے؟
گْـوشـت ئے نـہ منـاں ازرائیـل!
شور گِپـت نی منی موجیں ڈیل
پُشـت ءَ کِنـزاِتـاں مـــــن کمّـے
اوشـتـاتـاں پـــــد ءَ پـہ گْـومّـے
گْوشتوں گوں من ات کار هست انت؟
گْوشت ئے هو ترا وار هست انت؟
گْـوشـتوں چـہ کارے آهـر ؟
گْـوشـت ئے تـو وت ءَ کن زاهر!
مـن گْوشت نوک من ءَ چِلّ سال انت
گْـوشت ئے زنـد پـہ تو جنجال انـت
اللہ ءَ مـن ءَ پـــــرمـاتـگ
پـرمـان ئے مـن ءَ اے داتگ
دوستـیں بنـدهـے عابدجاں
دنیا ءَ کتگ سـکّ پریشاں
کار ءُ روزگار ئے نیست انـت
تاهیـر ءُ کـرارئے نیست انت
بنـدایـت شیر سبہ داں بیگہ
بـزکار ءِ ازاب انـت ارواه
پیـش چـہ الّو ءِ آروس ءَ
بیارئے جنّت الفردوس ءَ
نـی تو چے گْوش ئے چی انت شور؟
تہل بـوت دپ منـی چـو کـہ جـَور
زانتـوں کـہ منـی ساه ءَ گیپـت
گْوشتوں ملکمیت چو چوں بیت؟
انگت منـی دل ءَ ارمان هسـت
بازیں چست ءُ ایـر بنـد ءُ بست
سیـر اِنت انشپـی الدوسـت ءِ
بْـرات ءِ مستـریں ، ولـدوست ءِ
دوستـیں بچّ منـی میر عالـی
اوٹ ءَ پاد کیـت اے سالـــــی
مولجاں مشـکت ءَ انت ائید ءَ کیت
بیکہ آئی ءَ مـوتـوں نئیت
درزی ءَ منـی گُد گون انـت
کوش هم داتـگ ءُ نیمون انت
بازیں دگہ کلوکارے هست
ملک ءَ هم رواں واروں رست
چیزے ونـده ءُ واموں پر
مرگ ءَ رند مہ بیت مردم شر
وش وش هـم نیاں نادراهاں
رُکست مـن کناں همراهاں
دپتر شِنگ نـہ انت شیرانـی
کار هست باز دگہ هیرانـی
دیـوانے دگہ بیگیگ انـت
گُشتانکے مـن ءَ دیگیگ انت
لہتے سْیاهگ انت نا سرجـم
رد بنـد اش دیاناں کـم کـم
نـوکـیں لچّهے پِر بستگ
بنـدے ءُ دو بند پشکپتگ
دستونـک ءِ کـڑی یـے کم انت
الکاپ ئے کناں بـے گْوم انت
هست انت اے دل ءَ چنـدے راز
پمیشاں من پریشاناں باز
سْیہ مار دج ایت دلبنـد ءَ
روچـے مـن مـراں سـد رند ءَ
رهن انت گُلزمین ، رهن انت راج
رهن انـت سر منی تہت ءُ تاج
بندیگ انت زبان رسم ءُ دود
گلباگ ءَ کناں چوں من بود
پادوں تچک بنت کبر ءَ چوں
مات ءِ هکّ مـن ءَ وهـدے گوں
کمّے تو مـن ءَ مہلت دے
نیم بندگ مہ کن کاراں مے
گْوشت ئے اے یلـیں براهندگ!
سـرجم چو نـہ بنت نیم بندگ
زنـد ءَ کہ کڑی یـے کم بیت
مرگ ءَ رنـد جڑایت سرجم بیت


@Labzank
telegram.me/Labzank

زانــــــــــت، مــــــــــال ، نـــــنـــــگ
یک رندے زانت ، مالءُ ننگ دوچار کپ انت _ نندءُ نیاد گپءُ تران بوت وهـــــدے دیـــــوان سرجـــــم بوت زانـــــتءَ درّائینت: منءَ اگاں گنــــــــــدگ لوٹـــــے گـــــڑا کــــــــــتـــــابـــــاں به شوهاز، مــــــــــالءَ گــــُشت: مـــــنءَ بادشاهانی درگاهءَ شوهاز . بلے نـــــنـــــگ بے توارات
دوئـــــیں سنگتاں جُست گپت تی گندگءَ کجا بیاایں وتی ڈسءُ نشانءَ بگوش؟ نـــــنـــــگءَ پسو دات: مــــــــــن اگاں یـــــک رنــــــــــدے شُــــــــــت آں پـــــدءَ آتـــــک نه کـــــن آں
@Labzank
telegram.me/Labzank

بیا لانگه دمے گونڈیں، به جن چنگءُ سرے چنڈیں

به بر زردءِ گمے زنڈیں که عمرءَ اهتبارے نیست

چتور داراں دلءِ سرءَ که تردایت چو ترسیں هرءَ

ءُ اے شورینتگیں برّءَ ماں گومسءَ سرمهرے نیست

چه تی عشقءِ گماں زردانءُ بے ارامءُ بے ورداں

گوش اں گوں کئے دلءِ درداں جهانءَ راز دارے نیست

منیب اتکه په مهمانی ماں تئی کُلّءِ دپءَ جانی

دپ ئے دئے لنکهے زهریں اگه وشیں دپارے نیست
مولانا عبدالغنی منیب افشانی
@Labzank
telegram.me/Labzank

سردار گوں وتی چکّ ءَ زھر گپت ءُ گوّشتےاےچونیں باکس ے تو آورتگ یک ٹالے اوں روک نہ بیت
چکّ ءَ دراھینت تو چونیں گّپ کنگائے ابّا من یک یک ءَ دراھیں ٹال روک کتگ انت نوں زرتگ آورتگ
@Labzank
telegram.me/Labzank

گـوَشـکـَـنـد – ادَبـی هَـکـیـم
جَـنـیـنـےءَ گـوانـک جَـت ءُ چـہ نـیـکـمَـردے جُـسـت کـُـرت :
واجَـہ اِے پَـتـوا تـئـی گـوَرا هَـسـت کـہ مـاں تـلـپـزیـون ءِ تـہءَ اَگـاں نـیـکـمَـردے مَـردُمـانءَ آدیـنَـگءِ روچءِ نُـمـازءَ دیَـگءَ بـہ بـیـت ءُ مَـن مـاں وَتـی لـوگءَ آئـیءِ پُـشـتءَ آدِیـنَـگءِ نُـمـازءَ بـہ کـنـاں ؟!!!...نـیـکـمَـردءَ پَـسّـو دات هَـو مَـنـی گـوَرا دگـے یَـک پَـتـوایـے هَـم هَـسـت کـہ تـو اَگـاں وَتـی سـیـاهـیـں بُـرکـَـہءَ پـریـچ ءِ سَـرا دَور بـہ دئـےءِ ءُ پـریـچ ءِ چـاگِـردءَ چَـهـر بُـوَرئـے مـاں لـوگءِ تـہ ءَ تـئـی هَـجّ ءُ اُمـرَه هَـم بَـنـت !!!...


@Labzank
telegram.me/Labzank

رند چه نمازءَ ملاءَ دیم گوں نمازیاں کُت ءُ گوشت : مروچی شما راگوں مردے ءَ آشنا کناں کہ پیسرءَ دُز ءُ شراب وارے بوتگ ءُ ھر وڈیں نشہے کتگ . سِلیں کارے نیست انت کہ آئی ءَ نہ کتگ ۔ انوں ھداءَ  ھدایت کتگ ، آئی ءَ اے سجھیں بدیں پیئل یل داتگ انت ۔

رند ءَ مُلاءَ گوشت : پلانی بیا  نمازیاں بگوش تو چتور توبہ کت ؟

آ مرد چہ وتی جاہ ءَ چست بوت ءُ گوشتی : من اُمرے دزی کت ، گناہ کت ... واجہ ھداءَ منی آبرو نہ برت مناں بے ازت نکت ، اے وھدی کہ من توبہ کتگ اے ملاءَ پہ من آبرو ءُ گیرت نہ ھشتگ 


@Labzank
telegram.me/Labzank
رجانک :سئید رئیسی

(کاگدے چول جنت)

دُور گوات ءِ زِر ءَ کاگدے چول جنت

لبز گوْرماں پُرشنت

آپ بنت کِسّہ ءِ کَرپدانکیں زہیر

چم ارسانی بِرمشاں کجا اِشکننت

بس اے نیام ءَ ابیتکی ے شہمیت

ءُ زیمر پُرشنت

ساہتے اَچ منی پیژگہ ءِ باتن ءَ

چوکہ شہکوریں شاہاپ مَلّیت ءُ روت

وہد جَلّیت ءُ روت

زند بیگانگیں مردمے ءِ وڑا

بیگہاں کئیل کنت

کئیپ ءِ رنگاں گوْپیت ءُ وتا

دَرْپ ے ءَ مان کنت

کاگدے چول جنت ءُ نبشتہ بُجنت

لبز گوْرماں پُرشنت

کِسّہانی تہا کسّے جاگہ نہ کنت

دُور گوات ءِ زِر ءَ کاگدے چول جنت

(خالق ارمان)
شنگ: لبزانکی مجلس کلمتی کاروان

@Labzank
telegram.me/Labzank

اُستاد آبِد آسکانی


ما پرچا چو برباد ایں؟


مَنی بیلاں
مَنی بْراتاں
گُوھاراں
دُتکان ءُ مکّهیں ماتاں
شُما سسّا کُتَگ هِجبَر
شُما هِجبَر هَیال کُرتَگ

کِه ما پَرچا چو بَرباد اِیں؟
چی ءَ پَشتکَپتَگ اِیں پُشت ءَ ؟!
روین ءُ مِنزل ءَ نَه رَس اِیں
وَتی جِند ءِ گُلیں زِید ءَ
چَه کَرناں زور ءِ چَمدار اِیں؟!
جِهان ءِ زِندَگین ءُ آگَهیں راجاں
زُمین ءُ آزمان ءُ زِر وَتی کُرتگ
زُمین اِش پوّت ءَ
باگیں بَهشتے جوڑ کُتَگ مَرچی !

زر ءَ مانشانتَگ اِش لُنجیں
دِل ءَ ئِے دِرّان ءُ بُرّان اَنت
ماں آزمان اِش پَدَگ بَستَگ !
اِے هور ءُ گوات
اِے ماه ءُ روچ
اِے اِستار نیلّیں آزمان ءِ
پَه اِیشاں چُکی لیبُو اَنت
نی بیا کِه مَن تَرا بِہ گُوش آں !
اِے راز ءَ چیر ءُ پِهنامیں
بِه کَشّ گوشانی پُکّیاں

ءُ
گوشدار گوں دل ءِ گوشاں
ما زانت ءُ زانگ ءُ رُژن ءَ چِه ناسَرپَد !
هُنر مَئے مُلکی مُرگے نَه اِنت
اِے وانگجاه
اِے دانِشجاه
اِداره رُژن زانتانی
هُنر جاه سائینس ءُ کَمپیوٹَر
اِے اِنٹرنِیٹ جهانگِیریں
اِے مئیگی چیز نَه اَنت بِیه ءَ
گوں ما سیادی اِش نیست دوُر ءَ !

اِے گون اَنت آگهیں راجاں
کِه ما آیانی چَمدار اِیں

ءُ
مارا

رُژن ءُ زانت ءِ اِے وَڑیں چیزانی جاگاه ءَ
چِلِیم ءُ چَرس ءُ چَنڈوُ گوں !

جَگر شِنگین ءُ پُپ ساڑیں
شراب ءُ بَنگ ءُ تَریاک گوں !
تباهیّانی بُن ءُ بُنیاد
ءُ هِیروِن گوں !
نپَسگیرین ءُ بے پِیریں
پمیشکا ؟!

اَے مَنی هَمبَل
جِهان ءَ مارا رَمبینتَگ
گُشاد گامیں
پَه آیاں اِے جِهاں جنّت
ءُ پہ ما اِے جِهان جُهَندُم
گُڑا
کَلام ءَ دئے اِے تَریاک ءَ
بہ سوچ هپت آس ءَ اِے هِیروین ءَ
چِلیّم ءُ چرس ءُ چَنڈوُاں
بُکُورّا هَپت زر ءِ لُنج ءَ
شراب ءُ بَنگاں جھندم کَن
اَگاں لوٹ ئے کِه هَمگام بہ ئے
گوں دُنیا ءَ وَکاب بالیں
مُراد ءِ مِنزل ءَ سَر بہ ئے
مَه بے مُهتاج هِچ کسّی

گڑا
یَل دئے اِے کورکِشکان ءُ بہ گِر تو مادنیں راه ءَ

َمَنی بیلاں
مَنی براتاں
گوهاراں
دُتکان ءُ مکّهیں ماتاں
شُما سَسّا کُتَگ هِجبَر
شُما هِجبَر هَیال کُرتَگ
کِه ما پَرچا چو بَرباد اِیں؟
چی ءَ پَشتکپتگ اِیں پُشت ءَ
رَوین ءُ مِنزل ءَ نَه رَس اِیں
وَتی جَند ءِ گُلیں زِید ءَ
چَه کَرناں زور ءِ چَمدار اِیں؟

🌺 اُستاد آبِد آسکانی🌺

اے لچہ ءَ اَلّم ءَ وان اِت کہ وانگ ستاہ کرز ایت.

شنگ: لبزانکی مجلس کلمتی کاروان
سرچمگ: رژنائیں دیوان

@Labzank
telegram.me/Labzank