بلوچستان ءِ لھتیں کاھانی نام
1اسپست
2ندگ
3گرامزگ
4بہار
5پترنک
6پیملوک
7کُلمیر
8بون
9دُرگ
10سِبر
11لِکرک
12ڈالکا
13تولھ ہنگور
14کچک پد
15برمشک
16کِک
17گوکی سِرک
18سَتکُل
19گورکاہ
20کاش
21نَل
22بومادران
23کلپورگ
24چرماہنگ
25مارموتک
26ہپوتک
27کرکاوگ
28تُرپشک
29گربُسک
30ہالکو
31لِمپُک
32شِمش
33کُلِّچک
34چرپگ
35ھنارُک
36گربُگنڈ
37سِمسوک
38کلپِر
39سِمسور
40رِگِت
41شِنز
42ترات
43ہوم

44گُراپاد

45ملّیرو

46بَڑاکو

47ھایشک

48سورَگ

49سُورچک

50کَلینگوش

51شَگوشگ

52شِیز

53مورپد

54بیر

55ریم

@Labzank
telegram.me/Labzank

دستونک .. خالق ارمان

شـِیرَگـیں ترانگے مَلارینتگ
وارتگ تـریاک زھـر مـارینتگ

بِرانز مانپـوش اِتگ گـَیابان ءَ
کـُوچـگاں آس ملگُزارینتـگ

جند ءِ وت واجہی ءُ سرداری
دستِ بدواھاں برات وارینتگ

گار ھـرکس وتی پداں جند ءِ
شھر دنـز ءُ مُجاں گُبارینتـگ

ما پہ سمّو گنوگ،مَست ءُ مَلنگ
اِشـک ءِ ارواہ ءَ بَنگ چارینتگ

بیاکہ زیبائیں جَنگے ءَ مرچـاں
دُراھـیں بازار سرمَچارینتـگ

وھـد ءِ زانِشت پَھـمِتگ ارمـان
نِشتہ تگران ءَ ھر نہ چارینتگ
🌴 کــــورُشـــیں گــــال 🌴

@Labzank
telegram.me/Labzank

"تَمردیں دادشاہ"
ھست اَت یک مردے کہ نام ئِے دادشاہ اَت
ماں وتی مُلکءَ شان ئِے برجاہ اَت
ھمدلیں برات ئِے چَندے ھمراہ اَت
نہ چہ کسءَ شکّءُ نہ چہ کسءَ ڈاہ اَت
نَے کسی دَینکار، نَے کہ بدواہ اَت
گیشتریں پِگرئِے زگر اَلّاہ اَت
شیرے اَت بے شَکّ دادشاہ جوانیں
آکل ءُ دانا ءُ مزن شانیں
میر اَلی ھان، شُت مَردءِ جاگاہءَ
پلملءُ نیمّون کہ وراں چاہءَ
من وراں چاہءَ ءُ رواں راہءَ
یک دَمے ساراں بیلء بیگاہءَ
کُرتگ اَت وشّاتک میر کلاتگیرءَ
آرتگ اِش ھُرماگ گوں بستگیں شیرءَ
اِزّت اِش بَکش اِت منگھیں میرءَ
نِشت اَلیھان نی مردءِ دیوانءَ
لَگّ ات اَنت سر چوٹ وت ماں وت ترانءَ
نوکراں نریان بُرت ماں بَنجاہءَ
دات اِش بُنبر ءُ لوسن ءُ کاہءَ
نِشت اَلیھان یک ساھتے شَرّیں
گوھراِش دَرشان کت اَنت درّیں
بوتگ اَنت ھمراہ میر مزن مرّیں
ھالگءُ انگورءُ سروپ انار وشّیں

ترونگلءُ سارتیں آپ دلکَشّیں
مَچّ مُزاتیگیں پہ رِدءُ کتار
مھترءَ دیست اَنت میزریں دسکار
رِد پہ رِد سَد گَنجیں شَگز امبار
مچکدگ نامانی گُلءُ گلزار
آ شریکانی واھیءُ کوکار
ھر گَورءَ مُرگانی رَمءُ کتار
چاراِت ئِے ھر ڈَولءَ کُت ئِے بیچار
منگھیں واجہ بوتگ اَت بے وار
چہ دپ ئِے دانکے دَر نہ کت البار
ماں دلءَ میرءَ کَشّ اتگ پاھار
نیلّگءَ لیڑیگ کُرتگ اَت سردار
گِنداِیت دادشاہءِ ملکءُ میراساں
میر کَپ اِیت کَستءُ کینگءُ آساں
بَژبَشاں گرانیں پگرءُ وَزواساں
پَندلے سازاِیت ماں شپی پاساں
چیزے روچ پِر گوست میر اَلیھانءَ
ھیلھے سازاِت مھتریں جوانءَ
میر پراموش اَت وارتگیں وانءَ
لگّ اِت پہ مندرءِ داسءِ سوھانءَ
کاسدے دیم دات میرءَ میدانءَ
کاگدے نَکش کت چہ گپّءُ ترانءَ
چو نبشت نمدی میر اَلیھانءَ

ھُکم منءَ گون اِنت چہ شاہ سُلتانءَ
لوٹ اں من مالیات چہ شمئے جانءَ
دَہ یکءُ چِلّ یک ھُرماگءُ دانءَ
چو جواب داتگ میریں دادشاہءَ
نَے ترا مَنّاں نَے کہ تئی شاہءَ
نیست دگہ بادشاہ بید چہ اَلّاہءَ
کَس نہ اِنت مئے میر، واجہءُ سردار
نَے دیاں بجّار، نَے بیاں بیگار
چہ پتءُ پیراں ما وتیں سردار
چوں بہ سَگّان ءُ من کناں اوپار
دل منی سِستگ چہ شَتءُ ننگار
گَلّہءُ ھُرماگاں، تو جَن ئے بُنبار؟؟
میر اَلی میریں، شَرّیءَ گوشدار!
انگتءَ کسّی من نیاں وام دار
کَس چُشیں گواھی یے نہ دنت سردار
ما ملام داتگ بوتگیں بیگار
ھال ھمے سر بوت میر اَلیھانءَ
پہ گَزَب چست بوت میر چہ دیوانءَ
یل بہ دنت دادشاہ گوشت ئِے ملکانءَ
گون نہ اِنت وھدے نُکسءُ تاوانءَ
پائدہ نیست اِنت ھچ چُشیں ترانءَ
زور چُشیں مان اِنت ماں کئی جانءَ
کہ مہ دنت مالیات شاہ سُلتانءَ

من گِراں مالیات تئی سرءِ بانءَ
شیر دلیں سردار رَد دات شیتانءَ
کُرتگ ئِے بے سیم شاہ ماں تھرانءَ
بیا دگہ شاھے چِست اِنت ایرانءَ
آ نہ مَنّ اِیت ھچ شاہءُ سُلتانءَ
نَے کہ سردارءَ نَے کہ ایرانءَ
بَے نہ کنت مالیات بِھ وتی جانءَ
بُرز وتی لیک اِیت اِزّتءُ شانءَ
چوش کہ من گِنداں ھُکمءُ پرمانءَ
راہ دنت مارا دُرستاں زندانءَ
ھکم دنت بادشاہ ھاسیں گروبانءَ
لشکرے جم جَن زیت چہ تھرانءَ
آس دئے دادشاہءِ ملکءُ لوگانءَ
جندءَئِے دَزگیر کن، ھور گوں براتانءَ
کَیدءُ بنداں گوں بیاراِش تھرانءَ
جَھ جَتگ شاھی جنگی پوجانءَ
جھل زمینءَ ءُ بُرز ماں آزمانءَ
لشکر سر بوتگ دِرکءُ میدانءَ
گرند کتگ ٹوپاں ھَوری گرندانءَ
میریں دادشاہءِ باگءُ بوستانءَ
لوگاں مانداراِت گوشتگ گروبانءَ
آس دئے اِت مَچّانءُ کِشارانءَ
نِیلّگءِ ھنکینءُ دوارانءَ
لچّھکار: میر اھمد دھانی
نبشتکار: اَلی اِبرَت
پَھل بہ کن اِت اے لچّہ مزنیں لچّھے من سرجمءَ نہ نبشتگ ایشیءِ گیشتریں بھر سَراتکگ

@Labzank
telegram.me/Labzank

اِشکے ٹَپ ْ

چُنت سال پیش گرماۓ روچے ءَ کسان سالیں بَچَکےءَ وتی گُد کشِت ْ انت ءُ کندانءَ کورے ءِ تھا کُپ کت ۔آئی ءِ مات چہ لوگءِ دریگ ءَ آئی ءَچارگ ات ءُ چہ چکءِ وشھالی ءَ گَلءَ بال ات .ھمیےدمانءَ مات ءَ آپ ءِ تھا گانڈوے دیست کہ چکّءِ نیمگ ءَ روگ انت .آئی ءَ کورءِ نیمگ ءَ دِرّک زُرت انت ءُ چُکّی توار جَت .چکّءَ چَک تَرّینت بلے ھمیے دمانءَ گانڈوءَ بچک ءِ پاد دپءَ گِپت اَنت تا آپءِ چیرایی ببارت ، مات ءَ وتی رسینت ءُ چکءِ باسک گِپت انتءُ نہ ھِشتی گانڈو آئی ءَ آپ ءِ چیرا ببارت۔بزگررے کورے نزیکی ءَ روگ ات ، مات ءِ جاکانی اِشکنگ ءَ آئی ءِ کُمّکءَ یھت ءُ گوں کوڈالءَ زربتے گانڈوءِ سرءَ جت ءُ بچکے چہ آئی ءِ دپءَ رَکّینت .
بچکءِ نادراھجاہءَ برت ، دو ماہ رند آئی ءِ ٹَپّ درمان بوت انت . آئی ءِ پادانی سرءَ گانڈوءِ نیشانےءِ پَد ءُ باسکانی سرءَ مات ءِ پِنچانےءِ پد منتگ ات انت .
ھالکارے پہ جست ءُ پرس یھتگ ات ، آئی ءَ بچکءَ چہ لوٹ اِت وتی ٹپاں پیش بداریت .بَچک ءَ شلوارءِ پادک برزءَ جَت انت ءُ پہ ملوریں دلےءَ ٹپےءِ پیش داشت انت ءُ آستیگےءِ لانچ ات انت ءُ پہ پھر ۓ گوشت : اے ٹپ من ءَ سَکّ دوست اَنت ، اے منی ماتءِ اِشکے ٹپّ انت .
پائولو کوئلیو
رجانک : سعيد رئيسي
🌴 کــــورُشـــیں گـــال 🌴
لبـزانکـی مجلـس کلمتی کاروان.

زَپتیں زهیر ــــــــــــــــــــــــــ گُلام هسین شوهاز

روچ گوں هزار رنگیں گماں کیگد منی بیگاه بیت
شپ گوں وتئی زپتیں زهیرءُ تْرانگاں بانگواه بیت

چوں چون گْوز اِیت باریں منی لُنجءُ تہاریں زندگی!
مُرتگ منی زند ءِ چراگ، باریں کدی روژناه بیت

جندوں وتی هیرات کُت من سر وتی کُربان کُت
من هچ نزانتگ کہ منی همبل ، منی بدواه بیت

کج واری ءِ تژن ءَ مجن مارا جہان ءِ دیم ءَ تو
یکّے گریب ءُ وار بیت یکّے اَمیر ءُ شاه بیت

شوهاز مبو تو دلپْروش دنیا ءِ دود اِنت دائمی
گوں بزگر ءُ گوں بـے دَراں مرچاں کے اِنت همراه بیت


@Labzank
telegram.me/Labzank

نـدرْ پہ گُلام هُسین شوهازءَ
ـــــــــــــــــــــــــــــــــــــــــــــ

داں جہان هست اِنـت تو نمیران ئے
وشّـیں مہـرانـی پُلّـیں ساچان ئے

تئـی جتائی ءَ هـر کس اِنـت بژنیـگ
تـو دلان ئے ءُ تـو نمیـران ئـے

📝 میر ناسر کلمتی

@Labzank
telegram.me/Labzank

داں جہان هست اِنت جالبار هست بات
مئے زهیـرانـی یات گار هست بات

موٹل ءُ ماشین ءُ تچـات اَنـت ریل
اُشتر ءِ سیلنگ ءُ مـہار هسـت بات

ریڈو ءُ ٹی وی ، وی سی آر بات انـــــت
ٹیلّـو ءُ ژانگانـی تـــــوار هسـت بات

گوات کن اَنـت کنڈیشن اجب مـــــرچاں
کـوچـگ ءُ زیـدانـی سہـار هســت بـات

دوســت بنـت ما را ٹـریکٹر ءُ ٹـرالـــــی
مئے کلانچ بات ءُ مئـے کـوار هسـت بات

دیـر جنـت مُـرگاناں تُپنگ وزمــــــــــیں
مئے بِٹ ءُ تلکانـــــی شکار هسـت بات

پیـملک سبـز سبـزیں رُد ات بیٹـاں
سُہرو ءُ پرماش ءُ گوهار هست بات

بُولـی ءُ در مُلکـــــی زبان وش انـــــت
مئے بـُن ءُ بیـهی گالـــــوار هسـت بـات

گُشـتگـیں شـوهاز ءِ همـک گال ءِ
کیـسٹ ءُ نژّوکـیں نـوار هسـت بـات

گلام هسین شوهاز


@Labzank
telegram.me/Labzank

گوش دارگ کرزیت

کسّہے پشکپتگیں

میر عمر میر

تو چے بزانئے
اے زندمان ءَ چے پیم پہ من تگرد گْوپتگ
کجام پہنات ءَ واب گیگ اِنت
من شر زاناں
آ گْوانزگی شیک
داتگیں داداں مردمانی
آ کْوهنیں گَردواں چُنت بالاد گْواز کرتگ
منی گْورا اَنت
آ لیب گوازی کہ زور پچ گپتگنت پہ زهگاں
تو چے بزانئے
کہ ماس ءِ مِہراں اے زهگ ءِ چمّاں
شُد ءَ را چُنت رندا بار داتگ
وتا چرے زندمان ءِ چاگرد ءَ گار داتگ
تو چے بزانئے
اے گُژنگیں چم ءِ آشنائی کجام دروازگءَ بہ ٹُکّیت
من شر زاناں
آ تاس دستیں شہاراں ماس ءِ
کہ دنیگہ گوشاں سپر کناننت توار تاسءِ
تو چے بزانئے
اے زندمان ءَ چے پیم پہ من تگرد گْوپتگ
کجام پہنات ءَ واب وش اِنت

@Labzank
telegram.me/Labzank

مردین ھر چے کہ اشکن انت
اے گوش ءَ پترین انت
ءُ آ دگہ گوش ءَ در اش کن انت
بلے جنیں آدماں چہ دوئیں گوشاں ھبراں زیر انت
ءُ چہ دپ اش در کن انت.!!
جرج برنارش شاو.
رجانک / ھـ.اخـلاقـی @
لبزانکی مجلس کلمتی کاروان

🍀🍁 تامور نہ بنت 🍁🍀

شهــــــــــدے چہ : شکّلیں شهجــــــــــو
نمیرانیں سید ظهور شاه هاشمی

زرد بے کچّہ ءُ آریپیں اگاں دور نہ بنت

دل پہ دل پهکی گوں دل پهکیں دلاں هور نہ بنت


تو زمین زور ءُ زمین زور ءُ زمین زور زمین

کہ زمین زور ءُ زمیں زور ، زمین زور نہ بنت


تو کتگ شبرهے ربّال وتی بهبهیں دوست

پہ وتی کِچّہ ءَ کور ئے دگہ چم کور نہ بنت


تو اگاں بُندر ءُ سیادنامی ءُ بهشیز ءِ بُن ئے

لوڑی مانشانگ ءَ اے شکّلیں جو سور نہ بنت


میتگاں هیل اِتگیں شاری ءُ شبدستیں شلی

کُلّی گراناز گلیں، بهبهیں بانور نہ بنت


کینگاں پیتکگ ءُ کَستاں کَتب کجّ کتگ انت

بُنی بد زرد گوں آریپیں سراں هور نہ بنت


مور اِنت وشگپّی ءُ وشمنّی ءِ پیلمور مور اِنت
گواچنی منّ اتگیں پیل کُشیں پیلمور نہ بنت


مُولّیں شهزوری ءِ اوستار ءِ بہ رَنج اَنت کُمیت
زِکّیں زوراکی ءِ بور ، مُجّتی پزّور نہ بنت


بینّگ بد زردی ءِ پہ دود ءُ ربیدگ گپس انت

باج بوهیریں گِلگ گار نہ بنت گور نہ بنت


وش نیاتکانی ، سید گَهدپیں گپساراں مہ تُرس

پہ تئی بوهیری ءُ آریپی ءَ ٹاکور نہ بنت


داگ مُنّار ئے گُلیں دیدگاں چو بے دید ئے

کہ پہ چمکوری ءَ دلکور ءُ سما کور نہ بنت


مورت آتار اِتگیں هونکّیـــــں آدور بنداں

گت مَہ گر شل سریں شِنزّ، زیم سریں آلور نہ بنت


هانی ءُ چاکر ءُ آدینگ ءِ نامانی پد ءَ

گور ءُ دست بستن ءَ بِلّ هور ءُ کلات هور نہ بنت


گلبهار زند ءِ بدیں دود ءُ ربیداں پَلّ اِت

جِکّ نہ بنت گُل نہ بنت ساڑا نہ بنت پیگور نہ بنت


سید ! بد زردی ءِ بے بُندریں باوست بد انت
بیر ءُ بے کَچَّهیں بوهیری ءِ باجبور نہ بنت


کراچی ۲۱ اپریل ۱۹۷۴
""""""""""""""""""""""""""""""
@Labzank
telegram.me/Labzank

بلوچـی زبان '' آب '' سرجمءَ ایش انت : ا ب پ ت ٹ ج چ د ڈ ر ڑ ز ژ س ش ک گ ل م ن و هـ ء ی ے _ ءُ هر گالے تها که ث ح خ ذ ص ض ط ظ غ ق کاینت آ گال بلوچـی بیت نه کنت انوں اے زانگ لوٹ ایت که آ گالے ءَ که چه اے آباں یکے یا دو مان به بیت آ گال بلوچـی یـے نه بیتءُ چُشیں گال گیشتر عربـی بنت - البت دگه باز انچیں گال هست انت که گوں بلوچیءَ پهک هور ترّاتگ انت ءُ چو که بلوچـیءَ کار مرد بنت چُشیں گال ماں بلوچی لچّهاں گیشتر گندگ بنت که ندکار په ایشانی کار مردءَ لاچار انت - په اے رنگیں گالاں نوکیں راه ایش انت که ما ایشاں بلوچـی گالوارءَ نبشتگ بکنیں - انچوش که : '' اِقرار ، عهد ، عشق ، ضد ، رضا '' ءَ باید انت که ما '' اِکرار ، اَهد ، اِشک ، زِد ، رَزا '' نبشتگ بکنیں - دگه لهتیں گال انت که پارسیءَ گوں '' خ ، غ ، ف '' ءَ نبیسگ بنت ، بلے بلوچـیءَ په '' هـ ، گ ، پ '' بنت انچوش که پارسیءَ '' خشت ، مرغ ، گفتار '' بلوچـیء '' َ هِشت ، مُرگ ، گُپتار '' بنت -

سید هاشمـی
۲۶/ اکتوبر 1961
@Labzank
telegram.me/Labzank

︻デ═一 Easa_Rend:
زِندگـی کُـوریں کتابـے گوں منا وانـگ نہ بیت
شپ تھاریں زاناں کندیل مئے سرا پانگ نہ بیت

عاقل ءُ زانتـکار ادیـب ءُ کُل رهـشوناں ادا
کہ بجلّـیت گِرانـیں وهـد ءَ پـہ منا زانگ نہ بیت

تو کہ یل داتگ وتی بُن پیروکی جنگ ءَ لگور
ایر برگ گوں من نُو هچبر ہونی اے چانگ نہ بیت

بُزدلی کنتـیں لگور ءَ دُژمـن ءِ پاداں کپیت
باجوئیں اے میجروک چون گوں منا زانگ نہ بیت

کول ءُ اکرار زیکیں شانتاں گوں شہیداں وارتگیں
مئے بلوچی کول مہر ءِ تُرس ءُ لرز شانگ نہ بیت

@Labzank
telegram.me/Labzank

گوشکنـد 😄
وانگجـاھ ءِ کـارمسـتر ءَ نودربرے کہ نزاناں چی یے کتگ ات چہ وانگ ءَ کـش اِت ئِے کہ داں وتی پـت یا مات ءَ گوں وت نیـار ئے میـا!

نودربر ( دانش آمـوز)، وانگ جاه ءِ کَـش ءِ جـادہ ءَ راھ روگ ءَ اَت چـم ئِے کپـت پہ بلـُکے ءَ کہ روگ ءَ اَت دیم پہ لوگاں.

نودربر ءَ دیم پہ بَلُک ءَ کُـت ءُ گـوشتی: بَلُّک من ءَ وانگ جاه ءِ کارمستر ءَ چہ وانگ ءَ کَشّ اِتگ ءُ گوشتگـی داں وتـی کـسے نیـار ئے! وانگ بے وانگ! نی تو بیا منی مات ءِ جاگہ ءَ! بہ گوش اے زھگ منی چُک انت!
بَلُک ءَ کہ نہ لوٹ ات زھگ چہ آئی ءَ ناسلاھ ( دلرنـج) بہ بیت گوشتی شریں منی چُک!
نودربر پیسر ءُ بَلُک پہ رند ءَ دیم پہ وانگ جاه ءِ کارمستر ءِ کِـرّا! ءُ گوشتی من وتی مات آورتگ. منی مات بیا! 😄
کارمستر ءَ دیم پہ نودربر ءَ کُت ءُ گوشتی! اے اللہ من چوں بہ کناں چہ مروچگیں چُکانی دست ءَ بچہ اے منی مات انت! تو چہ کجـا گپتگ ءُ آورتگ. 😄😂😁😂
رجانک: ھارون اخلاقـی @

@Labzank
telegram.me/Labzank

برو وام کن یا پِنڈ!

مـنءَ جُسـت کُت پَیری مرادجان مات ءَ
کہ بیا شومـّیں بچّ ءَ کُتـــگ مارا چات ءَ

نہ وارت لوگ ءِ ورگاں اے چار بیل انت پُرّیں
گـوں مُشتان ئے مان بسـتگ اوبالیں دُرّیں

اے اشـکـندءَ آسـے کُتـگ روک لـوگ ءَ
دل ءَ مئے وران اِنـت چو دار ءَ ءُ کـوگ ءَ

تو بـرات ئے اے نُکس ءَ نـی مارا اڑینـتگ
پِـت ئے بـزکاریں ماں پـونـز ءَ رسـینتگ

نہ بیت زانگ کہ '' پَیل'' انت یا '' پاس'' انت
اگاں پاس اِنـت اے سال ءَ سیمـی کِلاس اِنت

بہـا کن گْوش ایـت هشتر ءَ یا کہ گـوک ءَ
اگاں نـہ بُنے مَچّ چـہ مچّانـــــی تـوک ءَ

بـرو وام کـن یا پِنڈ ، چو کـہ پکیـراں
مـن زیـراں ، مـن زیـراں ، '' سیدگنج '' ءَ زیراں

📝 عابـد آسکانـی
@Labzank
telegram.me/Labzank

رجـانـک : ادَبـی هَـکـیـم
وَتـی بـراتءَ چـہ وَتـی دِلءِ جُـهـلانـکـی دوسـت بـدار ءُ آئـیءِ رَدیّـاں پَـهِـل ءُ دَرگـوَز بـہ کـن ، اَگـاں آ تـرا پـہ کـارچ بـہ جَـنـت پَـدا هَـم کـَـپَـگءِ وَهـد تـرا آئـیءِ کـوپَـگءِ دارَگ اَزکـارء بـیـت.

@Labzank
telegram.me/Labzank

فایل صوتی از طرف بسام بسمل

گوش دارگ کرزیت