لبزانکی مجلس کلمتی کاروان

بے وسی ءِ موسم ءَ مرگ
چندن ساچ
من ءُ نودان یکیں کلاس ءَ وانگ ءَ اتیں۔ آ کلاس ءِ وانوکتریں نودربر ات۔ من ہر جاہے کہ آ دیستگ ات بے کتاب نہ اَت۔ نودان ءَ سر زمستان سک وش بوتگ ات ءُ سکیں حسن پرست ءُ شیدائیں ورنائے ات۔ آئی ءَ من ءَ یک روچے گشت کہ ترا ہر جنکے کہ دوست بوت گوں آئی ءَ وتی محبت ءِ درانگازی ءَ بہ کن۔ اگاں جنک ءَ ناں کُت ہچ مسئلہ نہ اِنت پرچا کہ آ جنک ترا ہرجاہ گندیت اِے گپ ءَ وَ زانت کہ اِے بچک من ءَ دوست داریت۔
مئے دگہ سنگتے ہست ات ولادیمیر۔۔۔ ولادیمیر ءَ نودان چڑینتگ ات۔ من ہر وہد دیستگ ات کہ نودان ءُ ولادیمیر ءِ نیام ءَ جنگ اَت۔ یک روچے ولادیمیر ءَ گشت اِے کجام عشق انت کہ ایوکا گوں وش رنگیں جنکاں بیت؟ نودان پسہ دات کہ قدرت جوڑ کنوک اِنت، من قدرت ءِ رنگانی شیدائی، اِے شیدا اگاں قدرت ءِ رنگاں مہ چاریت ءُ ستا مہ کنت گڑا چے بہ کنت۔۔۔۔
یک روچے من ءُ نودان کلاس گپتگ ات ءُ ڈیپارٹمنٹ ءِ پدانکاں ائیر کپان اتیں کہ نودان ءَ منی چپیں دست گیپت ءُ گشت، مرزا من ترا گپے بہ گشاں؟ من گشت کہ ہو بہ گش باریں چے گپے؟
پدا نودان اَت کہ گپ ءَ ات ءُ من آئی ءِ دپ ءَ چاران اتاں۔
مرزا، من ءَ مُلوک دوست نہ بوتہ، ناں کہ من ءَ دوست بیت، بَلے یک رندے من ملوک گوں دزگوہارے ءَ بچکندگ ءَ دیست کہ آئی ءِ بچکنداں من ءَ وتی حدا مُرزی ئیں جنّتی ءِ یاتاں پرینیت۔ من دل ءَ ہمے گشت اِے منی جنّتی اِنت کہ پدا پیدا بوتہ، پمیشکا من آئی ءِ دزگوہارے ءَ گشت کہ جنّت ءَ حدا یک نیمگے ہفتاد حُور بہ اوشتارین ایت ءُ دومی نیمگا ملوک ءِ بچکندی ئیں رُوح بہ بیت، من ہفتادیں حورانی جاہ ءَ ملوک ءِ بچکنداں زوراں۔۔۔۔۔ بَلے مُلوک منی گپ ءَ سرپد نہ بوت۔۔۔ ہما اِنت کہ ہرجاہ من ءَ گندیت دیما گیپت، مورک ءَ مُجین ایت، چُش نہ زانت کہ اِے چار روچ ءِ دنیا اینچو نہ کرزیت، باندا موسم بدل بنت، لُک ءُ لوار بیت، تئی زیبائی ءِ پُل گیمرنت کس تئی نیمگا چماں چست ہم نہ کنت ءُ نہ چاریت۔۔۔ زیبائی ءِ سرا ہم مردم گروناک بہ بیت؟
آ کمو بے توار بوت۔۔۔۔ لنٹ ئے گٹ پاتکاں۔۔۔ پدا گپ ءَ بوت۔۔۔۔ نوں من مُلوک دل ءَ بُرتگ، مُلوک ءَ نوں من ہچبر نہ چاراں، من ءَ ملوک وَ دوست نہ بوتگ، آئی ءِ بچکند دوست بوتگنت کہ آیانی تہا جنّتی ءِ معصومیں عکس منی دیما پدر بوتہ، نوں کہ ملوک من ءَ گندیت دیما گپیت گڑا۔۔۔۔ یلہ کن چشیں مٹوکیں مردم ءَ ۔۔۔۔۔۔ مرزا، ملوک ءِ گروناکی ءَ پد۔۔۔ من پدا چم چست نہ کُت ءُ کس نہ چار اِت۔۔۔۔ بَلے بیا کہ دوشی من وابے دیستہ، در واب من کلاسے ءِ تہا گوں نودربراں نشتگ ءُ استاد ءِ لیکچر ءَ گوش دارگ ءَ یاں۔ اناگہ ءَ من ءَ گمان بوت کہ منی پُشت ءَ نشتگیں نودربرانی تہا جنکے من ءَ چارگ ءَ اِنت، من ہنچو پُشت ءَ چک جت تاں من ءُ آ چم پہ چم بوتیں۔۔۔۔ مرزا تو وَ زانئے وابانی تہا ندارگ زوت بدل بنت۔ پدا من سما کناں کہ من ءُ آ شریشے ءِ ساہگ ءَ نشتگ ءُ گپ ءَ ئیں۔ بَلے مئے بُن گپ لبزانک اِنت، زندگی اِنت، وتی دیستگیں وابانی معنا دئیگ اِنت، آئی ءَ زان ئے من ءَ گڈی گپ چے گشت؟
’’من پمیشکا لبزانک واناں کہ من ءَ وتی بے تاہیریں ہستی ءِ شوہاز اِنت۔۔۔۔ اگاں لبزانک مہ بوتیں من وت کُشی کتگ ات‘‘
نوں من ءُ نودان لائبریری ءَ نشتگ اتیں، آ سک ملور ءُ بیچاڑ اَت۔۔۔ منی دیما منیر احمد بادینی ءِ گدار بہشت ءُ دوزحہ اَت ءُ آ اورحان پاموک ءِ گدار اسپیتیں کلات ءَ وانگ ءَ ات۔۔۔ تاں یکے ءَ مارا آستو آستکے سلام دات، اِے ولادیمیر اَت۔۔۔ ولادیمیر ءَ ہم کتابے دست ءَ ات بَلے آئی ءَ وتی کتاب ائیر کُت ءُ موبائل چہ کیسگ ءَ کش ات ءُ موبائل ءَ سر ءُ پُٹ بوت۔۔۔۔۔ دراجیں سہتے ءِ بے تواری ءَ پد ولادیمیر ءَ نودان ءِ سُلُک کنئگ ءِ واستا من ءَ چم کُت ءُ گشت۔ مرزا وتی راستیں نیمگ ءِ ٹیبل ءَ بچار فرشتہ یے اتکگ ءُ نشتگ، چوش مہ بیت کہ مئے دل ءَ گوں وت بہ بارت۔۔۔۔ ولادیمیر ءِ ہمے گپ ءَ گوں نودان پہ زہر پاد اتک ءُ بے تواری ءَ رہادگ بوت ءُ شت۔
پدا نودان ما یونیورسٹی ءَ نہ دیست۔۔۔۔۔۔۔
یک روچے من فیس بُک ءَ عکسے دیست کہ یلہ اَت۔ اِے ہما نودان ءِ عکس اَت کہ یک زمانگے یونیورسٹی ءَ مئے گوما وانگ ءَ ات۔ ہمے عکس ءِ دئیوک ءَ عکس ءِ ہمراہی ءَ لہتیں دانک ہم پوسٹ کتگ ات کہ،
نودان وت کُشی کُت۔۔۔ نودان ءِ وت کُشی ءِ جاہ ءَ مارا دو مردم ءِ نام ءَ کسانیں نمدی یے ہم دز کپتگ کہ ہمے نمدی ءِ بندات چش اِے وڑا اِنت
مڑاہ داریں ولادیمیر ءُ دُریں مرزا۔۔۔۔۔
سلام ءُ دروت
من ءَ بہ بخش اِت کہ من وت ءَ زندگ دارگ ءِ باز جہد کُت۔۔ بَلے زندگی ءَ منی ہمراہ داری نہ کُت۔۔ مرگ زندگی ءِ منزل اِنت۔ من زوت وتی گڈی منزل ءَ سر بُوگی یاں۔ امیت اِنت اِے نمدی شمارا ہما ساعت ءَ سر بیت آ کہ ساعت ءَ من اِے دنیا ءَ نہ باں۔
چونا ءَ منی گورا پہ شما چشیں حاصیں گپے نیست۔۔۔۔۔ بس یک ءُ دو بے سریں دانک پہ شما نبشتہ کناں۔۔۔۔۔۔
ولادیمیر۔۔۔۔ تو من ءَ مُدام شگان جتگ ات کہ نودان ءَ بس گوں وش رنگیں

319 views10:20