؛؛؛؛دستونکّ؛؛؛؛؛
زِرد ءَ مہ جیڑ واھگ ءِ اُپّارگ ءَ شموش
بچکندگ ءِ گَلاں پہ گم ءِ گوْازگءَ شموش

یاتانی اھد واھگ ءِ چہرآپ ءِ ترانگ انت
مھکانی ءِ شپانی دل ءِ نارگ ءَ شموش

کئے بد وپا ءُ کئے پہ وپا ، دل درآمد انت
زند ءَ زرئے تہ زانگ ءُ پجّارگ ءَ شموش

درد ءَ مہ چار، جان ءُ دل ءِ دشمن ءَ بزاں
گِیر آرگ ءَ شموش، گم ءِ مارگ ءَ شموش

ویران بوت پْرشتگیں اھدانی بادگیر
مُرواردانی آرگ ءُ نزّارگ ءَ شموش

تاکہ بہ بیت کیامتی آشوب ءِ دیمپان
او زند ءِ درد! شائریں بیچارگ ءَ شموش

بے مانہی پُرشتگیں وابانی مانا اِنت
یاتانی کُلّ ءِ سارگ ءُ پلگارگ ءَ شموش

،،،،اَتاشات،،،،،
ستمبر1990ءشال

@Labzank
telegram.me/Labzank

*{نمیرانیں استاد عبداللہ روانبد }*
گَزل
ما بلوچیں، ما بلوچیں، ما بلوچ
ما بلوچستان ءِ نوکیں ماہ ءُ روچ

تاک تاک اَنت زند ءِ دپتَر تئی بلوچ
زیر تپاکی رِشتگ ءَ ھُورئے بدوچ

پرچیا از کاروان پَد منتگ ئے
زاھراَنت پیش کنزگءِ مادن چو روچ

ھمبلاں دوشی مزن بانگواہ کُتگ
منزلش گِپت اَنت ءُ آرام اَنت مروچ

روچ درآتکگ تو انگت ءَ وابینگ ئے
شنگ ءُ شانگ انت بار ءُ بـے پکرئے چہ کوچ

کامیابی کار ءُ کوشست ءِ بر اِنت
امب لوٹئے چون؟ کہ تو کِشتگ کروچ

گوھر اِت پَئے ماں زر ءِ لُنج ءَ بہ بُڈ
لعل لوٹ ئے سکّگیں کوھاں بِکوچ

وکت گوازین ئے پہ واب ءُ گِپلت ءَ
کیمتی چیزاں جنس ءَ مکن چو سُتک ءُ سوچ

روم ءُ شام ءِ هسرت ءَ چّی ءَ ورئے
روم ءُ شامی اڈ بکن از چانب ءُ نکوچ

لاگَری اُزری نہ اِنت پہ تازی ءَ
لاگری بہتر بِتچ بل اُزر ءِ پوچ

گوں بلوچی گیرت ءَ میان ءَ بِبند
میش ءِ چم جہلی مَکَن پادا چو کوچ

نی ترا زیب اِیت گْوشگ با پہر ءُ شان
دیم ءِ دیوان ءَ کہ ما ھستین بلوچ

ما بلوچیں، ما بلوچیں، ما بلوچ
ما بلوچستان ءِ نوکیں ماہ ءُ روچ
@Labzank
telegram.me/Labzank


درودان په ترا وانان سحرگاهان رسول الله (ص) کنان درشان بی چارین دل ءآهان رسول الله (ص)
درودءُسدسلام شات اِنت تئی روح ءَ سُبک بالین که دوست ئی مومنان توچه دل ءُجانان رسول الله (ص)
شموشان اَچ وتی جندءَ تئی گون ترانگان شهدین بزان آدرگت ءَ اَچ وت من بیگواهان رسول الله (ص)
هُداءِ رهمت ءِ جمبر تئی یارانی ساهیل اَنت نه وشّی ءِجلین بیر اَنت گون بدواهان رسول الله (ص)
گدائی تئی منا دوست اِنت دلءِمے واهگ ءُ اُوست اِنت گدائی شر تر اِنت تئی چه اُبر شاهان رسول الله (ص)
هدوناکین تئی یوسف په دیداری ترهینوکین تئی مهر اِنت گون مئی هونءُرگءُشاهان رسول الله (ص)

یوسف انیس کلمتی

@Labzank
telegram.me/Labzank

بـے ڪــار اِنــت ھما دل کہ آئی تہ درد مہ بیت
بـے ڪـار اِنت ھما راج کہ آئی تپاکی.مہ بیت
بـے ڪـار اِنت ھما چم کہ آئی تہ ھیا مہ بیت
بـے ڪـار اِنت ھما دوستی کہ آئی تہ ءَ وپا مہ بیت
بے ڪار اِنت ھما دل کہ آئی تہ ھب ءُ واھگ مہ بیت
بے کار اِنت ھما انسان.کہ آئی تہ انسانیت مہ بیت
بے کار اِنت ھما ڈگار کہ.آئی تہ کشار مہ بـیت
@Labzank
telegram.me/Labzank

بلوچی مئے وتی شھدیں زبان اِنت
-------——----------------------------

چونائی ءَ بلوچی شائری ءِ بندات 1950ءَ پیش بیتگ، بلے چِدو پیش دپتری ثبوت دست نہ کپیت، بلے بلوچ ءِ ھما اھدی شائر ھم روچء مرچی نمیران اَنت- آھانی دُرّیں بیان ماں بلوچی دیوان ءُ مراگشاں مروچی ھم پہ پھر ءُ شان گْوشگ بنت- ھمے دُرّیں گُپتار گال مئے بلوچ پھلواناں گوں ساز ءُ زیمل ءَ ماں آروسی دیوان ءُ بلوچی مراگشاں درشان کتگ اَنت- ھمے گوھر کیمتی ئیں گال سینگ بہ سینگ اتکگ ءُ مارا سر بیتگ اَنت- آ وھد ءَ نبشتہ کنوک نہ بیتگ، ھمے دُرّیں پھلواناں وتی کوھیں دلبنداں جاگہ داتگ ءُ نسل در نسل سر کتگ اَنت- بلوچ راجدپتر بہ بیت, مہر ءُ دوستی ءِ داستان بہ بنت یا جنگانی کِسہ ءُ بیان، کھت سالی، مزنیں ھار ءُ ایروپ، گرانیں لڈّ ءُ بوج یا چاگردی اڑ ءُ جنجال بلوچ شائراں ھمک جاورانی سرا وتی اِزمی کمال پیش داشتگ-
ھدامرزی پھلوان ملا کمالان گْوش اِیت کہ مناں یکرندے سردار میر مولداد ءَ لوٹائینتگ ءُ میر مولداد دشتیاری ءِ ھاکم بیتگ- گڑا مناں جست ئِے کتگ کہ توء کمالان ءَ گْوشتگ کہ:
سدنیں بکال چہ بلوچ ءِ ھدّ ءَ در اِنت/
کنّوانی وھد ءَ ملک میران پیسر اَت/
زھم جنیں بیبگر ءِ شکار شاہ ءِ دُکتر اَت/

سدّن مئے پیرُک اِنت، تو گْوش ئے کہ سدّن بکّال چہ بلوچی ءِ ھَدّ ءَ در اَت، منء کمالان ءَ گْوشت کہ واجہ اے شئر منی نہ اِنت- البت اے شئر من گُشتگ، گُڑا جست ئے کت کہ اے شئر کئیگ اِنت؟ من گْوشت ملا پازل ءِ--- گْوشت ئِے اگاں ملا پازل ءَ گْوشتگ گُڑا راستے--
بلوچ دودمان ءَ شائرانی بلاھیں بستارے بیتگ--
(میجر مجید)

@Labzank
telegram.me/Labzank

Ali Juma Zamurani:
(1)🌹زبان 🌹
______________________________
زبان راج ءُ ٹکانی پجار اِنت ءُ ھمک راج چہ وتی ماتی زبانءَ پجارگ ءُ زانگ بیت ءُ ھمک راجءِ زبانءِ وتی یک تب ءُ مئیلے ءُ ھمک راجءَ وتی زبانءِ رھبند وتی زبانءِ تب ءُ مئیل ءُ ھما گال ءُ گالوارانی رھبندءَ گیش ءُ گیوار کتگ اَنت ءُ جھانی مزن دپترءَ (اقوام متحدہ )درستیں زبابانی ھک منّگ بوتگ کہ ھمک راجءَ وتی زبانءَ گپ جنگ ءُ نبشتہ کنگءِ ھک ھست اِنت بلے اَپسوزی گپ اِش اِنت کہ ما وتی زبانءِ رھنبدءِ گیش ءُ گیوارءِ واستءَ ھچ نہ کُتگ نا کہ پیسری میرچاکرءُمیر گھرام لاشاری ءِ دورءَ زبانءِ ھزمت بوتگ ناکہ مٰئے راجءِ ادگہ ھاکمانی دورءَ ھم زبانءِ گیش ءُ گیوارءِ باروا گپ ءُ تراں بوتگ ءُ مئے ھاکم ءُ زانتکار ءُ آلم درست ناتپاکیانی ھرجان بوتگ اَنت ءُ وت مہ وتی کسد ءُ کینگانی تھءَ کپتگ اَنت کہ آیاں زبانءِ باروءَ ھچ کارے نہ کُتگ ءُ نا کہ راجدپترءَ چُشیں نشان ءُ چیدگے دست کپ اِیت کہ مئے راجی ھاکم ءُ کماشاں پہ زبان ءَ چیزے کتگ یا گوشتگ. اے یک گواچنی گپے... !!!!!!!!
1947 یا 1950ءِ دورءَ مئے زانتکاریں ادیب ءُ زبان دوستاں اے ھبر ماراِتگ کہ زبانِ راجانی پجار اِنت ءُ ما ھم یک راجے زانگ بئیں ءُ ما بلوچ اِیں ءُ مئے زبان بلوچی اِنت ءُ یک ڈیھے ھُدابند اِیں کہ درآمداں سے ٹکُرءَ ٹکُر ٹکُر کُتگ ءُ سے ڈیھانی تھءَ ھوار کنگ اے زوراکیں دژمن مئے زبانءِ گاری ءِ رندءَ اَنت.
ھمے ھاترءَ ادیب ءُ زانتکاراں ھمک وھدء.پہ َ زبانءِ راستیں رھبندءِ واستءَ جھد کُتگ بلے ناتپاکی سوبءَ سوبمند نہ بوتگ اَنت کہ پہ وت یک سیاھگے گچین بہ کن اَنت ءُ یک نبشتاری رھبندے سرءَ تپاک بہ کن اَنت. آھرءَسید ھاشمی ءَ بلوچی رھبند ٹھینتگ ءُ نبشتہ کُتگ بلے اُپسوزی گپ اِش اِنت کہ میر گل ھان نسیرءِ دورءَ شالءَ یک دیوانے پہ سیاھگءِ گیش ءُ گیوار واستَ لوٹائینگ بوتگ کہ 33 سی ءُ سے زباں زانتاں بھر زرتگ بلے آیاں ھرکسءَ دومی درآمدانی سیاھگ ءِ گپ کُتگ کہ پہ بلوچی زباں ءِ آباں زورگ بہ بنت بلے بلوچی سیاھگ ءُ راھبندءِ گیش ءُ گیواری گپ نہ بوتگ ءُ دلپدریں گپ اِش اِنت کہ سید ھاشمیءَ رھبند نبشتہ کُتگ ءُ بلوچی راستیں سیاھگ گیشینتگ بلے سید اِش آ دیوانءَ نہ لوٹائینگ پرچہ سید ھاشمی آ دیوانءَ لوٹائینگ نہ بوتگ وت یک جستے ؟
پہ زبانءِ واستءَ بازیں زانتکارءُ ادیب یکجاہ بوتگ اَنت رھبندءِ سرءَ گپ ءُ تران بوتگ بلے بلوچی آب ءُ گال ءُ گالوارانی سرءَ تپاک نہ بوتگ ءُ ھمے نیمون اِش دیمءَ آورتگ کہ رھبند نہ گیش اِتگ ءُ سیدءِ رھبندءَ بازیں تازی آب در کنگ بوتگ کہ مئے نیکراھی مردم نہ منّنت ءُ لھتیں ھند ءُ دمگاں اے آب گوشگ بنت..
مئے زانتکارانی پیسری گپءُ نیمون ھمیش بوتگ کہ رھبند نہ گیش اِتگ رھبند کہ سید ھاشمیءَ گیشینتگ نوں گش اَنت کہ اربی آب زورگ بہ بنت بلے ھمے اربی آب مئے گال ءُ گالوارانی تھءَ نیست اَنت ءُ ما اِش گوشت نہ کنیں ءُ ھنوں مارا کرنے بیت کہ ھمے آبانی سرءَ اَڈتگییں !!!!!!!!
بلے من گوشگ لوٹاں کہ زبانءُ رھبندءَ ھچ میار نیست ءُ زبانءِ سیاھگی رھبند سیدءَ گشینتگ ءُ راست ءُ تچکیں رھبند ھمیش اِنت اگاں بلوچ زبان دوست ءُ زبان زانت ءُ نبشتہ کار ءُ وانوک گوں بلوچی چمانءُ بچار اَنت بلوچی رھبند گیش اِتگ ءُ سک ڈولدار اِنت بلے مارا پیسرءَ بلوچ بوگ لوٹ اِیت. مارا راج دوست بوگ لوٹ اِیت, مارا زبان دوست بوگ لوت اِیت ءُ مارا تپاک بوگ لوٹ اِیت اے چیز کہ مئے تھءَ. بنت مئے درستیں آڈ گیش ءُ گیوار بنت. ءُ مرچگیں وھد ءِ لوٹ ھمیش اِنت کہ مئے راجءِ رھشون ءُ ادیب تپاک بہ بنت کہ راج وت تپاک بیت .دژمناں مئے زمین ءُ مڈی بُرتگ اَنت اگاں ما وتی زبانءُ دود ءُ ربیدگانی پھریز ءَ مہ کنیں اِے زوراکیں زورک مئے زبان ءُ دودءُ ربیدگاں گاری رندءَ اَنت !!!!! (2)دومی بنگپ
بلوچی آب ءُ نبشتانکی رھبند
---------------------*-----------------
بلوچی رھبندءِ سیاھگی لھتیں آب چہ اربی سیاھگءِ آباں زورگ بوتگ ءُ سیاھگ ھم اربی اِنت اے بلوچانی مھر اِنت گوں اربی سیاھگءَ َ کہ ما درست مسلمانیں.بلے لھتیں آب اَنت کہ اے آبانی گالوارمئے گُٹ گلوانی تھءَ نیست ءُ ما گوشت اِش نہ کنیں ءواجہ سیدھاشمیءَ اے آب ق ف ط ظ ح خ ص ض ث ذ ع غ پہ بلوچی رھبندءِ واست ءَ نہ زرتگ اَنت چیاکہ ما اِش گوشت نہ کنیں ءُ ُ اے.آب چہ ٹ ڈ ڑ ژ گ ں. ے پارسی ءُ اردوءسیاھگءِ اَنت کہ بلوچی رھبندءِ واستءَزورگ بوتگ اَنت ءُ پارسی گالانی سیادی گوں بلوچیءَ ھست انت ءُ ءَ ءِ ءُ پہ بلوچیءِ رھبندءِ واستءَ سیدءَ اَڈ کُتگ اَنت کہ مَنّگ بوتگ اَنت بلوچی رھبند سیدءَ گیش ءُ گیوار کُتگ ءُ ھچ اَڈے پش نہ کپتگ. وھدیکہ کسے اربی نبشتہ کنت یا پاکیں کلام پاکءَ وانیت ءُ تلاوت کنت یا نمازاں وانیت آ کلام پاکء ِ ِ گوشتگیں رھبندءُ کانودانی رھبندءَ بوانیت .بلوچی زبانءَ گوں اربی آباں یا زبانءَ ھچ جیڑھے نیست ءُ بلوچی زبان ءِ آبانی واستءَ ھما آب کہ بلوچ راجءِ گال ءُ گالواراں گوشگ

بنت سید ھاشمیءَ زرتگ

اَنت ءُ ھر زبانءِ وتی یک تب ءُ مئیلےھست ءُ بلوچیءِ آب ھمیش اَنت کہ سیدءَ گیش ءُ گیوار کُتگ اَنت. ءُ پہ نامانی واستءَ سیدءَ گوشتگ کم کمءَ بدل کنان اِش کن اِت اگاں ما ناماں بلوچی رھبندءَ نبشتہ کنیں ما گناہ گار نہ بئیں ءُ کرداں ھم اربی ھمے آب پہ وتی رھبندءِ واستءَ نہ زرتگ اَنت ءُ آھم وتی ناماں وتی رھبندءِ سرءَ نبشتہ کن اَنت.
ما ھمے گوشگ لوٹیں کہ ما مسلمانیں مارا گوں اربی زبانءَ ھچ جیڑھے نیست ءُ نا گوں ارباں دژمنی ے ءُ ارب مئے مسلمانیں برات اَنت ءُ آیاں ما سک دوست داریں چیاکہ پاکیں کلام پاک پہ اربی زبانءَ پاکیں ھاوتدءَ ایرگیج کُتگ ءُ مئے پاکیں مھترءُ ربال چہ ارب راجءَ اِنت.. مارا ارب دوست ءُ اسلام مئے دین اِنت ما بلوچ اِیں ءُ مئے وتی دودءُ ربیدگ اَنت مئے زبانءِ وتی رھبندے. ءُ ھرچ راجءَ ھک ھست کہ وتی زبانءَ نبشتہ بہ کنت ءُ گپ بہ جنت. مئے بلوچانی اسلام دوستی اِنت کہ ما اربی سیاھگءِ ھما آب زرتگ اَنت کہ ما اِش گوشت کنیں ءُ مئے گُٹ ءُ گلواں ھمے آیانی گالوار کیت,,
وھدیکہ نماز ءُ نیکراھی ءُ اربی زبانءَ کہ نبشتہ کن ئے یا وتی نمازاں وان اِت اربی رھبندءَ بوان اِش .اربی زبانءَ گوں بلوچیءَ چے کار
نماز ءُ کلام پاک بلوچیءِ تھءَ نہ اَنت آیانی وتی رھبندءُ کانودےءُُ اربی زبانءَ گوں بلوچی زبانءَ ھچ ھمگرنچی نیست ءُ ما مسلمانیں ھما وڑءَ کہ نیکراھی چی گوش اِیت ھما رھبندءَ نماز وانگ بنت ھما رھبندءَ پاکیں کلام پاک وانگ بیت ما مسلمانیں مارا وتی مسلمانی سرءَ پھرءُ شان اِنت کہ ما مسلمانیں ءُ مارا وتی زبانءُ بلوچیءِ سرءَ ھم پھر شان اِنتءُرھبند ھمیش اِنت کہ سید ھاشمیَءَ گیشینتگ ءُ بلوچیءِ دیمرویءَ اگاں کسے لوت اِیت رھبند ھمیش اِنت..
[ ادا من چیزے گیشنگ لوٹاں کہ مارا گوں اربی زبانءَ ھچ اڈ ءُ جنجالے نیست ءُناکہ گوں نیکراھیءَھست ءُ . ھنچش کہ من نبشتہ کتگ کہ ما مسلمانیں ءُ ما وتی مسلمانی ء ِ سرءَ پھرءُ شان کنیں ءُ وتی بلوچی سرءَ ھم ءُ دگہ منی واجھیں برات ءُ مڑاداریں کماشاں نبشتانکءَ جوانی سرءَ بوان اِت ءُ گپانی مجگءَ سرپد بہ بیت ما کدی وتی اَلم ءُ نیکراھیءُ نیکراھاں ھراب نہ گوشیں ءُ نہ کسے مئے نیکراھاں ھراب بہ گوش اِیت چیاکہ اَلم ءُ زانتکار ءُ نیکراہ مئے نیکراھی رھشون اَنت مئے بلوچی دود ءُ ربیدگ اِنت کہ آیانی ازت ءُ اھترامءَ بہ کنیں!!!!!!!

سیمی 3 بلوچی اَدبءِ لوٹ چی اِنت ؟
____________________________
ادبءِ مستریں لوٹ زبان دوستی اِنت ءُ زانت ءُ زانش ءُ جھدکاری ءُ یک رھبندے سرءَ تپاک کنگ اِنت وھدیکہ یک راجے وتی زبانءَ دوست داراِیت وتی دودءُ ربیدگءَ دوست داراِیت ءُ جھدءِ میدانءَ واھگءِ سرءَ وتی جھداں دیمءَ کاراِیت ءُ وتی زبانءِ پلگارگ ءُ ساپ ءُ سلہ کنگءِ جھدءَ کنت آ راج اَلمءَ وتی واھگانی منزلءَ سر بیت اگاں ما بلوچ راج وتی زبانءَ زندگ کنگ لوٹ اِیں گُڑا مارا بلوچ بوگ لوٹ اِیت وھدیکہ ما پہ بلوچی وڑ ءَ ءُ بلوچی زانتءَ وتی سیاھگءِ َبہ چاریں آ ڈولدار گندگءَ کئیت اگاں ما درآمد دوست ءُ ادگے زباناں دوست داریں گُڑا گپ ھما ناتپاکی سرءَ کئیت ءُ آپ ء سر ءُ کشگءِ رندگ بیت!!!!!!!
بازیں واجھیں براتانی گوشگ اِنت کہ علیءَ اگاں شمابلوچی رھبندءَ اَلی نبشتہ کن اِت سک بَڈّول بیت ءُ وش گندگءَ نئیت بلے من ھمے واجھیں براتاں گُشگ لوٹاں کہ شما وتی بلوچی چمان بزوراِت ءُ بلوچی رھبندءَ بچار اِت سک ڈولدار گندگءَ کئیت یا شما زانتءِ چماں بزوراِت ءُ بلوچی رھبندءُ گال ءُ گالوارانی مجگءَ سرپد ءُ زانت کار بہ اِت گڑا,اِے بلوچی رھبند سک زیبناک ءُ ڈولدار ءُ وش گندگ کئیت بلے بلوچ بوگ ءُ زبان دوست بوگ اَلمی اِنت ءُ دومی زبانءِ سرہد بوگءَ زبان زانتی اَلمی اِنت ءُ زبانءِ رھبندءِ گیش گیوار واست ءَ تپاکی زلورت اِنت ءُ اے کارانی واستءَ زبان زانتانی ِ (ماھر لسانیاتانی ) زلورت اِنت کہ آ سیدءِ رھبندءَ سرپد بہ بنت ءُ درست ھمے رھبندءِ سرءَ تپاک بہ کن اَنت ءُ وتی واھگ ءُ بلوچ ءُ بلوچی ءُ بلوچڈیھ دوستیءَ وتی ھون ءُ رگانی تھءَ ھوار بہ کن اَنت گُڑا مئے زبان دیمروی کُت کنت ءُ وتی واھگانی منزلءَ سر بیت منی ھیالءَ بلوچی ادب ءِ لوٹ ھمے چیزاَنت!!!!!!
منی مراد کسی دل آزاری نہ اِنت ءُ بلوچی زبان مئے شمئے درستانی زبان اِنت ءُ ھمےزبان مئے ءُ شمئے پچار اِنت. دوا اِنت کہ بلوچ ءُ بلوچی ءُ بلوچستان.سبز ءُ میزراں باتءُ چہ زوراکیں زورکاں آجو بات ءُ ما وتی واجہ وت باتیں. ھنچش بات،،،

من بلوچی نبشتہ کُت

زبانءِ ازمءِ زیبائیءِ

دھرءِ زالماںَ چَم سُھر کُت


🍁اَلی جُمّا زامرانی🍁

@Labzank
telegram.me/Labzank

دستونک

خالق ارمان


کوکوے زیمَر ءَ دیَگ لوٹاں
لبز پاہو گوْرا دیَگ لوٹاں

تو منی ترانگ ءَ کپئے نہ کپئے
دزگہارے سرا دیَگ لوٹاں

انچیں گپے کہ پیسرا سہی ئے
انچیں ہالے ترا دیَگ لوٹاں

درد پدّر بباں اپوگانی
مہنوے اوُمر ءَ دیَگ لوٹاں

انچیں نیمونے گونیں ارمان ءَ
چم ءُ دل اندرا دیَگ لوٹاں

..............................

@Labzank
telegram.me/Labzank

چراگ ءِ روکی سَماھیں مارا.
دل ءِ گنوکی سَماھیں مارا.

نزانتہ پیشءَ ما اِشکء ِآسر.
ھمیشیں نوکی سماھیں مارا.

بَرانیں رُنگراہءُ گاریں کِشکاں.
تئی سَروکی سماھیں مارا.

اےاَھد ءِ دولّاب بہشتیں زیداں.
چے پیمءَروپی سماھیں مارا.

ھلو پہ ھالو تلاراں تْرشتیں.
کَسے نہ موکی سماھیں مارا.

سمین ءَشیھءِ کنانیں ھمبل.
پہ تو ھُدوکی سماھیں مارا.

(سمین کلمتی)

@Labzank
telegram.me/Labzank

شیشگ ءِ دیوال

قیوم فنا سید

چیزے روچ پیسر زندگی ءَ گوں دپ کپتاں....نوک رستگیں کاڑے ءِ رنگ ءَ وتی درائیں زیبائی ءُ وش رنگی ءِ بھاراں سربار اَت...ھر دویں دست پہ منی گوْر امباز کنگ ءَ پچ ئی کتگ اَت...منی اندر ءِ بے مھاریں عشق ءِ لیڑہ گجّ ءُ لیتار بوت....من اوں وتی دست پچ کت انت , آئی ءِ گور امباز کنگ ءَ درک کت...چیزے گام تچگ ءَ رند بوستگ ءَ کپتاں...کپگ ءَ رند من دیست , منی ءُ آئی ءِ نیام ءَ شیشگ ءِ دیوالے ردان بوت , سر ئی آزمان ءَ رس اِت....سک برز , پراہ ءُ مزن , بہ گوْاز نہ بوت....آ ھما دست ءَ من اے دست ءَ پش کپتاں....یک عمرے ءَ ما یک
دگر ءَ بس چاران کت....دست جت نہ کت...سر سر باز جت , جھد کت بلے ھچ پہ ھچ....گڈ سرا من وتا ھمے امیت ءَ زرت دیوال ءَ جت کہ پروشان ئی ءُ زندگی ءِ دستاں گراں بوسہ دیاں.....گرمیں امبازاں زیراں , آئی ءَ وتی کناں....منیگ انت ءُ بس منیگ انت , ھمے گشان کناں , درائیں دنیا ءَ سرا زیراں....پدا بوستگ ءَ کپتاں...نہ سر پرشت نہ دست پادے در رپت نہ کہ دیما مکّیں شیشگ ءِ دیوال پرشت...بس شیشگ ءِ دیوال ءِآ دست ءَ منی زندگی پرشت , چنڈ چنڈ بوت....چہ ایشی ءَ گیش بدبہتی دگہ چے بوت کنت کہ وتی پرشتگیں زندگی ءِ ھمے چنڈ اوں من یکجاہ کت نہ کت انت....

@Labzank
telegram.me/Labzank

مصدقءَ الم گوش بہ دار اِت
پسنی لبزانکیءُ ازمی تکءَ سرجمیں بلوچستانءَ چہ دیمءَ ترءُ نام دار تر اِنت،من وَ گشاں پسنی بائد اِنت بلوچستانءِ دل گشگ بوتیں۔چہ ازمءُ بودناکی آں سرچکاریں اے بہرگءَ یک ملٹی ٹیلنٹڈ مردمے است اِنت کہ آئیءِ نام مصدق اسلم انت کہ من آئیءَ چہ دوہزار سےءَ چہ بلوچستان یونیورسٹیءِ سوشل ورک ڈیپارٹمنٹءِ سرشونءَ زاناں کہ ما دوئیں یکیں وھدءَ ،یکیں ڈیپارٹمنٹءَ وانگءَ بوتگاں۔۔۔۔۔
بوت چوش کہ من چہ اولی یا دومی روچءَ چہ کلاسءَ دراتکگ ات ءُ کوریڈورءَ روگءَ اتاں تہ یک سبز گونگءُ برز بالادیں بچکےءَ کہ دیوالءَ تِکہ داتگ اتءُ اوشتاتگ ات،منءَ توار کت ئِے،من ھیران بوتاں ءُ چہ وتی کور پہمیءَ جست کت کہ تو بلوچے ئے؟
گشت ئِے:ھئو۔۔۔۔۔من پسو گرداینت کہ پہل کن من ترا پنجاپی یے سرپد بوتگاں۔۔۔۔
نزاناں مصدقءَ منی توکءَ چے دیست یا من آئیءِ اندرءَ چے ماراِت کہ چہ ھما ساھتءَ بہ گر داں روچ مرچی،مئے سنگتی برجاہ اِنت۔۔۔۔
ماں یونیورسٹیءَ مصدق چہ درستاں گیش گوں من ھورءُ ھوار بوتگ،یک عجیبیں سنجیدگیءُ عجیبیں کشش یے ھرچ وھدءَ آئیءِ دیمءِ سرا تالان بوتگ،،،،
ما مدام یکجاگہ ترءُ گرد کتگ۔۔۔۔یکروچے ما دوئیں واجہ صباءِ کارگسءَ شتگیںءُ واجہءَ را سلام دات۔۔۔۔تہ گوں دروازگءِ دپءِ سربوھگءَ واجہ ءَ چم چست کت انتءُ مارا چارانءَ گوں وتی جتاءُ ھاسیں گالوارءَ گشت۔۔۔۔”کیا عجیب زاویہ ہے“
پرچاکہ من سک پٹکءُ مصد سک برز۔۔۔۔۔۔۔۔
کسہ سک باز انتءُ اے جاگہ تنک اِنت۔۔۔۔۔۔۔
مصدق ءِ تہءَ سک باز بودناکیءُ ازم کاری است اِنت،یکیں وھدءَ آ وش نویس یے،عکس کارے،(ترا دیمءَ نادینیتءُ چارانءَ ھمادمانءَتئی عکسءَ گوں گشادیءَجوڑ کنت)وش تواریے(ھرچ گشندہءِءُ مردمءِ توارءُ گیگانیءَ کت کنت)اداکاریءُ دگہ بازیں بودناکی است انت۔۔۔برے برے من جیڑگءُ ھیران بوتگ آں کہ اے یک مردمے کہ باز مردم انت کہ یکجاہ اَنت۔۔۔۔۔۔
متلب آئیءَ را اینچو بودناکیءُ ازم کاری یکیں وھدءَ گون انت بل ئے انگہ پشت کپتگ ،اسلءَ اے آئیءِ وتی نزوریءُ سستی انت۔۔۔۔
یکرندے من ٹی ویءَ پہ آڈیشنءَ گوں تاج محمد تاجل ءَ گپ جتگ ات گشت ئِے بیارے،من برت،بل ئے تاجل ءَ مارا شریں دلگوشی نہ دات پرچاکہ چہ ما پیسر پنجاپی ماتءُ چُکے نشتگ اتنت۔۔۔۔تاجلءَ مصدق سرسری گوں دستانی تبلہءَ آڈیشن گپتءُ وتی سرا چوٹینت کہ تو لے ءَ آؤٹ ئے،ھالانکہ لےءَ آؤٹ نہ ات،بل ئے گپ دگریے ات۔۔۔۔۔من پدا گوں تاجل ماں میزان چوکءَ دچار وارتءُ گوں آئیءَ گلہءُ زاری کت۔۔۔۔۔۔۔
مرچی من تاجلءَ گشگ لوٹاں کہ کج اِنت تئی ھما سبز رنگیں کسانیں گیر بلوچیں گشندہ کہ ماتءِ ھمراہیءَ اتکگ اتءُ تو چراہیءِ سببءَ مصدقءِ دابیں مردم یے پدی جت؟؟۔۔۔۔
ھیر!!!!!
ہمک آتوارءِ شپءَ منی کوٹیءَ زیملی دیوان بوتگ،،من ،مصدق،باقی بلوچ،منورخانءُ دگہ بازیں سنگت بوتگ اَنت،،،جاگہ نہ بوتگ۔۔۔۔۔۔
یک سریائی(شام) بوتگ کہ فارمیسی وانگءَ بوتگ،،مئے دیوان اتکگ،مصدق یے گوش داشتگ،دگہ یک رندے پی ایس او والہاں زیملی دیوانے ماں ہاسٹلءَ ایر کتگ ات،گڑا منی سنگت یے است ات من گوں آئیءَ دزبندی کت کہ مارا اوں موقع دئیگ بہ بیت۔۔۔۔۔۔۔پشتو گاناآں پد مصدقءُ باقی اسٹیجءَ سرکپت انت ءُ مصدقءَ نور خانءِ ھمےگانا الہان کت کہ بیاکہ منءَتئی زھیر کشاں۔۔۔۔۔
شپءِ نیمءَباریں چہ کجام بلاکءَ یک ڈنی ملکءِ مردک کہ چو لاہوتیءَ ات ،اے زالمءَ ہماناچ کت انت،ہما ناچ کت انت کہ من ترا چے بہ گشاں،گڈ سرا ھاکانی تہءَ لتروکی یے جت۔۔۔۔۔۔۔
مصدقءِ توارءِ تہءَ یک عجبیں سوزے،سازے،کشش یے مان اِنت۔۔۔یک انچیں تواریے کہ سنگیں دلاں اوں موم کنت،منی اے گپ آئیءِ اولی پیت بندءِ اھگءَ پد زانگ بیت کہ چے کساسءَ راست اِنت۔۔۔۔۔۔۔منءَ مصدقءِ توار انچوبے وت کتگ کہ من دگہ دنیایےءَ شتگاں۔۔۔۔۔۔
مصدقءَ الم گوش بہ دار اِت۔۔۔۔

@Labzank
telegram.me/Labzank

*زبان نبشت*
زبان بندر ءَ توارانی گْرنچے. ھمے توارانی رد ءُ بند لبزاں ساز اِیت. لبز جوڑ بنت تا مانا دے اَنت. لبز ھوار بنت تہ گپ ءُ ھبر جوڑ بنت. بے توار ءَ نہ مردم ءُ چیزّاناں نام پِر بوت کنت ءُ نہ مارشتاناں دراَنگاز.
چوناھیگا چہ انسان ءِ دپ ءَ بازیں توارے درکیت, بلے زاھر اِنت ما ھما توارانی گپ ءَ ایں کہ ھبر کنگ ءُ گپ جنگ ءَ کامرز بنت. بزاں Speach Sound
اے توارانی بُنزہ وَ چہ انسان ءِ پُپّاں درآؤکیں ھما گوات اِنت کہ مردم دم کشّگ ءِ وھد ءَ لاپ ءِ توک ءَ بارت ئِے ءُ ڈنّ ءَ در ئِے کنت. ھمے گْوات لبزاں در کنت. بلے ھر توار ءِ کشّگ ءَ انسان ءِ نُک (گلُو) ءَ بگر دانکہ لُنٹاں بیا, یک نہ یک جاگھے یا آزھے ھمےگوات ءِ دیم ءَ یک نہ یک رنگے ءَ اڑاند رکاوٹ بیت. ھمے اڑاند توار ءِ سوب جوڑ بیت.
اے توار بند دو بھر ءَ بنت.
1. جْواناب (Consonants) 2. کشّاب (vowels)
1. جْواناب:- ھما توار اَنت کہ اشانی کشّگ ءَ گْوات ءِ جند یک نہ یک جاگھے بند کنگ یا نزّارگ بیت.

2. کشّاب:-
ھما توار اَنت کہ ایشانی کشگ ءَ گوات ھچ جاگہ ءَ بند کنھ یا نزّارگ نہ بیت, اشانی ادائیگی ءِ وھد ءَ لُنٹانی گِردی ءُ پچی چارگ بیت ءُ اے ھبر ھم کہ لِلِّک دپ ءِ کُجام جاگہ ءَ اِنت.
وھدے تو گْوش ئے "بال" تہ دوئیں لُنٹ یکبرے سرجمی ءَ بند بنت ءُ گْوات ءَ دپ ءِ توک ءَ دار اَنت,انچو کہ (ب) ءِ توار ھلاس بیت, تہ دپ پچ بیت ءُ [ آ ] ءِ توار در کَیت. ( آ ) ءِ توار انچو کہ ھلاس بیت, دپ ءِ پچی کم ترّ اِیت ءُ ( ل ) ءِ توار ءِ واستا لِلِّک ءِ سَرُک تُوسک بیت ءُ آرِینک ءِ سر بری نیمگ ءَ لگّ اِیت. ایشانی تہ ءَ ( ب ) ءُ (ل) جْواناب اَنت (یکّے لُنٹاں بند کنت ءُ گْوات ءَ دار اِیت ءُ دومی لِلِّک ءَ تُوسک کنت ءُ گْوات ءَ چہ لِلّک ءِ دوئیں کشاں گْوازین اِیت) ءُ (ب) ءُ (ل) ءِ نْیام ءَ ( آ) ءِ توار کشّابے (کہ ھچ جاگہ گْوات بند نہ بیت)
بلے اے بنیادی بھر ءُ بانگ ءَ رند ھم ھمے توار (جْواناب ءُ کشّاب) وتی ادائیگی ءِ ھساب ءَ بھر کنگ بنت. ءُ ایشی ءِ بھر ءُ بانگ 3 چیز ءِ بُنیاد ءَ کنگ بیت..
1. توار ءِ ادائیگی چہ کجام جاگہ ءَ بوگ ءَ اِنت:- چو کہ لُنٹ, دنتان Place Of Articulation
2. توار ءِ ادائیگی چوں بوگ ءَ اِنت : گْوات سرجمی ءَ بند اِنت یا کمّے پچ اِنت Manner Of Articulation
3. کجام توار ءِ کشگ ءِ وھد ءَ گُٹّ ءِ تار Vocal Cords لرز اَنت ءُ کُجام توار ءِ وھد ءَ نہ لرز اَنت. Voiceless/ Voiced
روان اِنت
*سرشون:- سرامد تاج بلوچ*
نبیسّوک:- *مجیب ولی*

@Labzank
telegram.me/Labzank

گال ---------------------- بشیر شۂزاد

واجہ ءَ سرپد انت اے گُلام ءَ نزانت
باز ئے ونتگ، بلے جند ءِ نام ءَ نزانت

اے بلـوچ ءِ چتوریں پریشانـی انـت
کہ بلـوچـے وتـی آ مکام ءَ نـزانـت

ماڑی ءَ یک شپـے ءَ پـہ مہمانـی یـے
واجہ یـے وپتہ جنـد ءِ گِدام ءَ نزانت

ایشی ءَ گوں شپ ءِ کسّہ ءَ چے کنئے
اے کـہ پُلّانـی وشبوئیں بام ءَ نزانت

پَنـچ وهـد ءِ نمازانـی وانوکـے اے
ءُ وتـی میتگ ءِ پیش امام ءَ نزانـت

پـہ کُجام مَکسد ءَ دست بندئے بشیر
اے تـرا کـہ نزانت تئی سلام ءَ نزانـت

@Labzank
telegram.me/Labzank

بلوچ شاھر نبشتہ کار راجی سروک ابداللہ جان جمالدینی زیگیں روچءَ بیران بیتگ ءُ مروچی سھب 10 ءَ جنازہ ءِ وھد ایر بیتگ بلے سھبءَ ماھلہ دگہ ھادسہ ئے بیتگ سھت ششءَ واجہ ءِ لوگ بانُکءَ اوں اے کوڑہ ایں امروز یل داتگ سھت دہ ھردو ھور نماز جنازہ داتگ انتے
مے دوا اِنت واجہ هدا هدامرزیاں ماں گلباگءَ جاگاه دیات

@Labzank
telegram.me/Labzank

بے وسی ءِ موسم ءَ مرگ
چندن ساچ
من ءُ نودان یکیں کلاس ءَ وانگ ءَ اتیں۔ آ کلاس ءِ وانوکتریں نودربر ات۔ من ہر جاہے کہ آ دیستگ ات بے کتاب نہ اَت۔ نودان ءَ سر زمستان سک وش بوتگ ات ءُ سکیں حسن پرست ءُ شیدائیں ورنائے ات۔ آئی ءَ من ءَ یک روچے گشت کہ ترا ہر جنکے کہ دوست بوت گوں آئی ءَ وتی محبت ءِ درانگازی ءَ بہ کن۔ اگاں جنک ءَ ناں کُت ہچ مسئلہ نہ اِنت پرچا کہ آ جنک ترا ہرجاہ گندیت اِے گپ ءَ وَ زانت کہ اِے بچک من ءَ دوست داریت۔
مئے دگہ سنگتے ہست ات ولادیمیر۔۔۔ ولادیمیر ءَ نودان چڑینتگ ات۔ من ہر وہد دیستگ ات کہ نودان ءُ ولادیمیر ءِ نیام ءَ جنگ اَت۔ یک روچے ولادیمیر ءَ گشت اِے کجام عشق انت کہ ایوکا گوں وش رنگیں جنکاں بیت؟ نودان پسہ دات کہ قدرت جوڑ کنوک اِنت، من قدرت ءِ رنگانی شیدائی، اِے شیدا اگاں قدرت ءِ رنگاں مہ چاریت ءُ ستا مہ کنت گڑا چے بہ کنت۔۔۔۔
یک روچے من ءُ نودان کلاس گپتگ ات ءُ ڈیپارٹمنٹ ءِ پدانکاں ائیر کپان اتیں کہ نودان ءَ منی چپیں دست گیپت ءُ گشت، مرزا من ترا گپے بہ گشاں؟ من گشت کہ ہو بہ گش باریں چے گپے؟
پدا نودان اَت کہ گپ ءَ ات ءُ من آئی ءِ دپ ءَ چاران اتاں۔
مرزا، من ءَ مُلوک دوست نہ بوتہ، ناں کہ من ءَ دوست بیت، بَلے یک رندے من ملوک گوں دزگوہارے ءَ بچکندگ ءَ دیست کہ آئی ءِ بچکنداں من ءَ وتی حدا مُرزی ئیں جنّتی ءِ یاتاں پرینیت۔ من دل ءَ ہمے گشت اِے منی جنّتی اِنت کہ پدا پیدا بوتہ، پمیشکا من آئی ءِ دزگوہارے ءَ گشت کہ جنّت ءَ حدا یک نیمگے ہفتاد حُور بہ اوشتارین ایت ءُ دومی نیمگا ملوک ءِ بچکندی ئیں رُوح بہ بیت، من ہفتادیں حورانی جاہ ءَ ملوک ءِ بچکنداں زوراں۔۔۔۔۔ بَلے مُلوک منی گپ ءَ سرپد نہ بوت۔۔۔ ہما اِنت کہ ہرجاہ من ءَ گندیت دیما گیپت، مورک ءَ مُجین ایت، چُش نہ زانت کہ اِے چار روچ ءِ دنیا اینچو نہ کرزیت، باندا موسم بدل بنت، لُک ءُ لوار بیت، تئی زیبائی ءِ پُل گیمرنت کس تئی نیمگا چماں چست ہم نہ کنت ءُ نہ چاریت۔۔۔ زیبائی ءِ سرا ہم مردم گروناک بہ بیت؟
آ کمو بے توار بوت۔۔۔۔ لنٹ ئے گٹ پاتکاں۔۔۔ پدا گپ ءَ بوت۔۔۔۔ نوں من مُلوک دل ءَ بُرتگ، مُلوک ءَ نوں من ہچبر نہ چاراں، من ءَ ملوک وَ دوست نہ بوتگ، آئی ءِ بچکند دوست بوتگنت کہ آیانی تہا جنّتی ءِ معصومیں عکس منی دیما پدر بوتہ، نوں کہ ملوک من ءَ گندیت دیما گپیت گڑا۔۔۔۔ یلہ کن چشیں مٹوکیں مردم ءَ ۔۔۔۔۔۔ مرزا، ملوک ءِ گروناکی ءَ پد۔۔۔ من پدا چم چست نہ کُت ءُ کس نہ چار اِت۔۔۔۔ بَلے بیا کہ دوشی من وابے دیستہ، در واب من کلاسے ءِ تہا گوں نودربراں نشتگ ءُ استاد ءِ لیکچر ءَ گوش دارگ ءَ یاں۔ اناگہ ءَ من ءَ گمان بوت کہ منی پُشت ءَ نشتگیں نودربرانی تہا جنکے من ءَ چارگ ءَ اِنت، من ہنچو پُشت ءَ چک جت تاں من ءُ آ چم پہ چم بوتیں۔۔۔۔ مرزا تو وَ زانئے وابانی تہا ندارگ زوت بدل بنت۔ پدا من سما کناں کہ من ءُ آ شریشے ءِ ساہگ ءَ نشتگ ءُ گپ ءَ ئیں۔ بَلے مئے بُن گپ لبزانک اِنت، زندگی اِنت، وتی دیستگیں وابانی معنا دئیگ اِنت، آئی ءَ زان ئے من ءَ گڈی گپ چے گشت؟
’’من پمیشکا لبزانک واناں کہ من ءَ وتی بے تاہیریں ہستی ءِ شوہاز اِنت۔۔۔۔ اگاں لبزانک مہ بوتیں من وت کُشی کتگ ات‘‘
نوں من ءُ نودان لائبریری ءَ نشتگ اتیں، آ سک ملور ءُ بیچاڑ اَت۔۔۔ منی دیما منیر احمد بادینی ءِ گدار بہشت ءُ دوزحہ اَت ءُ آ اورحان پاموک ءِ گدار اسپیتیں کلات ءَ وانگ ءَ ات۔۔۔ تاں یکے ءَ مارا آستو آستکے سلام دات، اِے ولادیمیر اَت۔۔۔ ولادیمیر ءَ ہم کتابے دست ءَ ات بَلے آئی ءَ وتی کتاب ائیر کُت ءُ موبائل چہ کیسگ ءَ کش ات ءُ موبائل ءَ سر ءُ پُٹ بوت۔۔۔۔۔ دراجیں سہتے ءِ بے تواری ءَ پد ولادیمیر ءَ نودان ءِ سُلُک کنئگ ءِ واستا من ءَ چم کُت ءُ گشت۔ مرزا وتی راستیں نیمگ ءِ ٹیبل ءَ بچار فرشتہ یے اتکگ ءُ نشتگ، چوش مہ بیت کہ مئے دل ءَ گوں وت بہ بارت۔۔۔۔ ولادیمیر ءِ ہمے گپ ءَ گوں نودان پہ زہر پاد اتک ءُ بے تواری ءَ رہادگ بوت ءُ شت۔
پدا نودان ما یونیورسٹی ءَ نہ دیست۔۔۔۔۔۔۔
یک روچے من فیس بُک ءَ عکسے دیست کہ یلہ اَت۔ اِے ہما نودان ءِ عکس اَت کہ یک زمانگے یونیورسٹی ءَ مئے گوما وانگ ءَ ات۔ ہمے عکس ءِ دئیوک ءَ عکس ءِ ہمراہی ءَ لہتیں دانک ہم پوسٹ کتگ ات کہ،
نودان وت کُشی کُت۔۔۔ نودان ءِ وت کُشی ءِ جاہ ءَ مارا دو مردم ءِ نام ءَ کسانیں نمدی یے ہم دز کپتگ کہ ہمے نمدی ءِ بندات چش اِے وڑا اِنت
مڑاہ داریں ولادیمیر ءُ دُریں مرزا۔۔۔۔۔
سلام ءُ دروت
من ءَ بہ بخش اِت کہ من وت ءَ زندگ دارگ ءِ باز جہد کُت۔۔ بَلے زندگی ءَ منی ہمراہ داری نہ کُت۔۔ مرگ زندگی ءِ منزل اِنت۔ من زوت وتی گڈی منزل ءَ سر بُوگی یاں۔ امیت اِنت اِے نمدی شمارا ہما ساعت ءَ سر بیت آ کہ ساعت ءَ من اِے دنیا ءَ نہ باں۔
چونا ءَ منی گورا پہ شما چشیں حاصیں گپے نیست۔۔۔۔۔ بس یک ءُ دو بے سریں دانک پہ شما نبشتہ کناں۔۔۔۔۔۔
ولادیمیر۔۔۔۔ تو من ءَ مُدام شگان جتگ ات کہ نودان ءَ بس گوں وش رنگیں

جنکاں عشق اِنت۔ اسل ءَ چش نہ ات۔ من پہ وتی زندگ دارگ ءِ واستا ہمے وڑ کتگ ات۔ منی دل ءَ باز گشت کہ من زندگ بہ باں بَلے۔۔۔۔۔۔ اِے واہگ ناسرجم بوت۔۔۔۔
من ءَ گوں ہر شر رنگیں جنک ءَ عشق نہ بوتگ۔۔۔ ناں کہ من مہر کنئگ لوٹ اِتہ۔۔۔ من ءَ بس وہد تیلانک دئیگی اَت۔۔۔۔ شمئے ہمسفر بُوگی ات۔۔ لہتیں یات پش گیجی اَت۔۔۔ بَلے۔۔۔۔۔ حیر۔۔۔۔
مرزا تو اگاں ملوک دیست۔۔۔ گڑا ملوک ءَ منی کلوہاں سر کن۔۔۔ بہ گش نوں تئی بچکندانی شیدائی اِے دنیا ءَ نہ اِنت۔ بچکندئے چرت نہ کندئے پرت۔۔۔ تئی منت شمال ئِے گوات اِنت۔۔
شمئے وتی جہندمی ئیں دوست نودان
ولادیمیر۔۔۔۔
مردم بہ مِرات بَلے بے وس مہ بات۔۔۔۔۔ کہ منی ءُ جنّتی ءِ جتائی ءِ نیام ءَ بے وسیانی موسم اَت ءُ ہمے موسم ہنچیں وہدے ءَ اتک کہ من مرگ ءِ فیصلہ کُت۔۔۔ بے وسیانی موسم ءَ بے وسی ءِ مرگ۔۔۔ وت کُشی اِنت۔۔۔

@Labzank
telegram.me/Labzank

کتاب : دانکانـی گنج ایسپ انیس☝️☝️

دنیا ءِ دیم ءَ مہر مئے ٹک ءُ نشان ببات
تو کہ منی نبئے گڈا آخر زمان ببات
اکرار بستگاں دل ءَ وہد ءِ ندارگ ءَ
سوگند ءِ سر پرشات تئی قول ءُ زبان ببات
دہر ءِ مسافرے آں منی گار پد نہ بنت
پجارئے زانت ءُ زانگ ہمے پد گران ببات
دزموش چوں کنئے وتا ریکانی سر بر ءَ
چنکاں دراتکگ ءِ ترا ہوش ءُ انان ببات
دیدگ گُباریں کشکاں تماہے دگہ نہ بیت
وہد ءِ تہاریں دمکاں چراگے بلان ببات۔۔۔۔۔۔۔دیدگ بشیر

@Labzank
telegram.me/Labzank

💫 پَنت

مردے چو هیال کت که آئی جَنءِ گوش گراں بیتگ انت ءُ په شرّی نه اِشکنت...

لوٹتی په آئیا سمعک/کرّی گوشی بگریت، بلے دیم په دیم وتی جنءَ گُشت نہ کُت که تو کَرّ بوتگئے و ترا گوشیءِ زلورت انت، پمشکا شت ڈاکٹرءِ کرّا ڈاکٹر هال دات .

ڈاکٹرا گوشت په اشی که تو بزانئے تئی جنءِ گوشانی گرانی چه اندازه انت، راهی آسان انت.
تو برو لوگا اے کارا بکن...

پیسرا آئیءِ چار متریءَ بوشت و آئیا توار پر کن، یک چیزّے بلوٹ، اگه نه اشکتی گڑا برو دو متریا تواری کن همے پیم کم کم نزّیک بیاں بو تا که جواب بدات.

شپءَ مردءِ جن کَن‌ورجاهءَ‌ شام جوڑ کنگ ات، مرد ڈنّا ات گوشتی: هنو برابر مئی دوری اندازه چار متر انت نوں چکّاس کناں.

مردا چه وتی جنءَ جست کت: ندروں! شام چی انت؟
جوابے نه اشکتی. چست بوت و یک مترے نزّیکتر شت و هما جستی کت، بلے انگت جوابے نه اشکت.
نزیک‌تر شت و کن‌ورجاهءِ دپا رست پدا وتی جستی کت، بلے جوابے نرست.
اے رندا نزیک‌تر شت و وتی سری گوں جنءِ گوشءَ برابر کرت و گوشتی: ندروں شام چی انت؟!
جنا گوشت: زاناں تو کَرّئے!؟ چارمی رند انت که من گوشاں مُرگ اِنت.


🔹همُک وهدا عیبا مَں دگراں شوهاز مکنیں، برے اِیب مئی وتیگ انت.

@Labzank
telegram.me/Labzank

هر رازءَ وتی سنگتءَ مہ گُش ، بیت کنت کہ روچے تی دژمن بہ بیت ءُ هر تکلیپءَ وتی دژمنءَ مہ رسین کہ بلکیں یکروچے گوں تو دوست بہ بیت ( کہ آ وهدی پشومان بئے)
رازے کہ تو چیر دیگ لوٹے گوں کسءِ مہ گُش اگں چہ نزدیک تریں دوستے بہ بیت ، چیا کہ آ دوستءَ دگہ دوست هستءُ همے پیمءَ آ دگراں

@Labzank
telegram.me/Labzank