55420:
بیا اِت لچہ کاری ءَ دربر ایں
__________
اولی در
شرپمنداں مرچی ما شمارا یک وشّی یے گپے گْوش ایں بلے پیشتر شما بگْوش اِت کہ شُما چِد ءُ پیش لچّہ گْوشتگ ؟اگاں نہ گْوشتگ ما شمارا سرپدی دے ایں
اے گپ ءَ وا سرپد اِت شما کہ چَہ آباں گال ٹاهینگ بنت ‎ءُ چَہ گالاں گالرِد ءُ چَہ گالرِداں بُنگپ یا کسّہ ٹاهینگ بنت همے وڑ نَزم ٹَهیت گوں بنداں
بند گوں مِسرعہ ءُ کاپیہ ءُ ردیفاں ٹاهینگ بنت
مِسرعہ ٹَہ اَنت گوں رُکناں کاپیہ ٹهینگ بنت چَہ مجگ ءَ
نی کہ تو کاپیہ ردیف ءُ رکن کہ زانت اَنت گڑا تو بند ءُ مسرعہ هم ٹاهینت کن ئے وهدے کہ تو ایشاں دربر ئے گڑا الّم لچہ نبیس اِت کن ئے
لچّہ کہ نبیس ئے مردم تئی لچہ ءَ وان اَنت ءُ ترا سوگات دے اَنت آ وهد ءَ تو سک گَل بئے
وشّی بیت نا.؟
نی بیا ما ترا بند ردیف کاپیہ ءِ بابت ءَ سرپد کن ایں
درستاں چہ پیشتر ما ترا ردیف ءِ بابت پُرسیتّیں سرپدی دے ایں بند ءِ گُڈسر ءَ هما همتواریں گال کا اَنت همایاں گْوش اَنت ردیف درور ءَ بچار اِت👇🏻
من وتی هلک ءُ دیاراں چَہ شموشکار نباں
همدلیں سنگت ءُ یاراں چَہ شموشکار نباں
☝🏻دوئیں آباں دلگوش بہ کن دوئینانی گُڈسر ءَ👈🏻 ر اِنت همیشی ءَ آب روی گْوش اَنت نی تی مجگ ءَ یک گپّے کیت کہ 👈🏻دیار ءُ یار کاپیہ اَنت گڑا آ دگراں چے گْوش اَنت
اے گپ دلگوش بدار اِت هما گال کہ آهر ءَ رند پہ رند کا اَنت ایاں رِدیف گْوش اَنت
نی بزاں شما سئے چیز ءَ سرپد بوتگ اِت
کاپیہ
آب روی
ردیف
___
رجانک
@Labzank
telegram.me/Labzank

رم لچہے ندر اِنت

''''''‘'''کُچک ''''''

شپ اِنت
استال اُوھنگ اَنت ماں آزمانءَ
سُرمگیں مَس آں رِیچان کنت تہاری ہرگْورا
بس!
ھُورّکیں دمکـے ءَ
تہنا یک گُژنگیں کُـچکے دپءَ بُرزءَ کنت ءُ چَانگّ اِیت
بلکیں من اِسـتالاں پِـلکّ آں وتی گْژن ءَ تُوسَ آں .....

امام آزاد

@Labzank
telegram.me/Labzank

گشتن

مـن گُشت گوں مـن همدست بئے کہ گُنگاں زبانے جوڈ کنیں ، آئیا دست ماں کَمکَاں کرتنت -
دیم بُرز پہ شالکوٹءِ مُجیں آزمانءَ کرت ، کہکولے جت ءُ گشت ئے !
'' واب گندئے ''
بَلے نوں کم کم ءَ آ وت آگہ بوان اِنت

سید هاشمی

@Labzank
telegram.me/Labzank

.... آسکـــواب انـت ......
سـیدھــاشمــی.
کــــورُشــیں گــــال ...
مـروچـی مجلـس ءَ داد ءُ ھسـاب انـت
بلے دیـوان ءِ مسـتر جـور جـواب انـت

انگـت دلگـران ئے بے نـام ءُ تـوار ئے
ماں کُلّـیں ھُلکـواں تئی بیم ءُ زْراب انـت

اگاں کارے کـہ سـر داں سـر گُنـاہ انـت
پـہ لال ءِ ھــاتــر ءَ کُـرتـگ سـواب انـت

اگـاں مھـــرنـگ پُلـّیں کنــدگـے جَنــت
منـی نــزّ ءَ جھــان چنـگ ءُ رَبـاب انــت

نـہ بیتـگ مـادنیـں راہ ءَ کسـے گــار
نـہ تَـرّاں ھر کس ءَ پھک ءَ جواب انـت

بـزان ئے زنـدمــانـی ملگـــزار انـت
نـہ زان ئے پَتّـو تاھـاپیـں گیـاب انـت

پَمـن زَھــر انت اگـاں مُـلّا ء پیشـوک
کہ آیـانـی وتی راہ چـوٹ ءُ تاب انـت

نـہ تـُرسـاں تِیھُـر ءُ مـاتکــوہ بنــداں
گُـل ءِ واھـگ منـی شِِیلّـیں وکاب انت

مـن کـولیـگاں پـہ کـابُـدگ ءِ کھیبــاں
مَــہ تیمّــار اِت دل ءَ بِلّے ازاب اِنـت

کمــان ءَ پـہ جگــر جــاہ بِـہ تَـرّیـن
دل ءَ بِل گوں شِپیں تیراں کبـاب اِنت

گُـل ءَ ایـر کـُرتـگ دسـتانـی دِل ءَ دیــم
گْـوش ئے رِھل ءِ سر ءَ دُرّیں کتاب انت

ھنـوش ءُ کـدّھـیں چمّـانـی نــدراں
ھ‌ُـدا ءِ بـادشــاھی آسـک واب انـت

منـی ھــانــل پـہ اُمیــت ءَ تئیــگ ءَ
سیـد بے ھـاجت ءُ شـاہ ءِ مواب انـت.
... بلــوردان ـ کسـرکنــد.
.....پشمبے ۳۰ ستمبـر ۱۹۵۴.
🌴 کــــورُشــــیں گــــال 🌴
لبـزانکـی مجلـس کلمتـی کـاروان. 🌱

هر دو برْرات کسان اِت اَنت
هر دو یک هالیگیں کُمبـےءَ چو اُشتر ءَ
جمّاز بوتگ اِت اَنت
اے کش آ کش ءَ لیٹ اِش داتگ اَت
ءُ اے گال اِش دپءَ اِت اَنت
وادو وادو تِرّی وادو وادو ترّی
آ وهدی ایشاں نہ زانتگ کہ چے گُش اَنت
انوں کہ زان اَنت
بلے ترا نہ گُش اَنت

سید هاشمی
@Labzank
telegram.me/Labzank

دستونک ..................پَزل هیات

پکرءِ الماسیں زِهاں بُـن گپتگاں
تْرانگانـی آس ءُ چہر ءَ کپتگاں

من زمستانءِ اے برپیں موسمءَ
تاپـگ ءَ ءُ چـوکـہ تـیـن تپتگاں

ایوک ءُ تهنا ماں دمکاں میتگ ءِ
زی دل ٹُکـّر وتـی وت رُپتگاں

چاکرءَ پچ گپت چہ دستءَ هانل یے
من چو شے ءَ مکّہ ءَ سـر گپتگاں

زاهر ءَ شاداں بَلے ماں باتِـن
بَد نسیبیں جُتک ءِ پیما چُپتگاں

نوں منا شُوهازئے پـر چے زندگی
چہ تئی هنکین ءَ دیریں رَپتگاں

اِشکتگ مہمانے اتکگ تئی گِس ءَ
تو پمیشکہ کاشیں مہپر گوپتگاں

من پَزل چو هُشکیں دارءِ دروشمءَ
سُتکگیں گیابان ءُ پَٹّاں کپتگاں

@Labzank
telegram.me/Labzank

55420:
گندگاں آبادءُ سبزءُ کامران من چهبارا

دل گوشی سیلے روان بَے وَّشوکیں تیابے کنارا
🌹🌹🌹🌹🌹🌹🌹🌹

تامنءَ ساه هست اِنت جانءَ هرگورءَ سهتءُ دمانا

من کناں وَسپءُ بیانءَ گهتریں ملکءُ دیارا
🌾🌾🌾🌾🌾🌾🌾🌾

چهبار مرچی رزینتگ مَے هداے مهربانء

هرگورا نیبگ تیاراَنت گوں هزار تاما په مارا
🌸🌸🌸🌸🌸🌸🌸🌸

چهبار تئی لانچءُ بوجیگ ماں زِراں لُڈّاَنت گوں چولاں

لذّتے گوں اِنت تئی اِے تیابءِ چولانی توارا
🌴🌴🌴🌴🌴🌴🌴🌴

شائرءُ ندکاراں گنداں رِد په رِد گالاں سَجیننت

وسپءُ توسیپءَ کننت تئی بلبلءُ باگءُ بهارا
🌴🌱🍃🍂☘🎄🌲🌳

هَسرتءُ اپسوزے گپ انت که مروچی من جُدایاں

دل منی تنگ اِنت په تئی آ شانتلانی جاکءُ جارا
🦃🕊🦃🕊🦃🕊🦃🕊

تئی جتائی ءَ نوں سرتاج اَرس گواریت چو رگامءَ

هچ نه سهڑیت اِنت منی دل لَم کنت کوهءُ تلارا
💔💘💝💖💕💞💓❣

📝شائر سرتاج راهی چهباری✒
@Labzank
telegram.me/Labzank

دل ءِ هند ءَ نوں درد وائی کنت
ترانگ ءَ بــے وپا ءِ آئـی کنـت

واهگ ءِ دل ئی زهـر آپ کتگ
باریں نوکیں نی چے تباهی کنت

رستری رنجاں گوں هلاهوشاں
انگت ءَ نوکیں درد راهـی کنـت

نوکیں پندل پہ راج ءَ سازان اِنت
راهبر ڈیهہ ءَ گار ءُ سیاهـی کنـت

پِکر زالم مدام شاه ءِ تب انـت
دل منـی تئـی در ءِ گدائی کنـت

مـن مُـدام گراں گور ءِ سوالئیگاں
بلکیں یک رندے ءَ درائی کنـت

دل ئـی زرتـگ وتـا اگول کتـگ
کئے سَبا مـرچاں مَسـکرائـی کنـت

واجہ سَبا دشتیاری

@Labzank
telegram.me/Labzank

روزرد ءُ بام
چو ماتکو ءَ چہ وتی جاه ءَ نہ جُمب انت
دانکہ آیاں وت ءَ یات بیت
تهاری ءُ روژنائی ءِ میانجی ءَ
بـے داراَنت

سید هاشمی
@Labzank
telegram.me/Labzank

نہ زاناں چہ کُجا
دو گال چو وژ بالیں مُرگ ءَ ،
پمّنی زردءَ ایر نند اِیت
کہ باز برءَ
من وت اِش هم نزاناں کہ چے اَنت
بلے ،
اے هم گنجے ، کہ تواِش سرپد بَے ،

سید هاشمی

@Labzank
telegram.me/Labzank

دز نماز
مردماں گُشت '' وتی دیمءَ هون پرچے مالگءَ ئے ؟
منسورءَ گُشت '' من نماز وانگ لوٹاں ''
'' نماز وانگءِ هاترا پاکءُ ساپیں هون در کارانت ''
'' اِشک ءِ نماز هاترا پوچیں آپءَ گوں دزنماز نه بیت ''

رجانک: رهیم مهر بلوچ
@Labzank
telegram.me/Labzank

اِنسان چہ لَنگی ءُ مُنڈی ءُ کـُوری ءُ کـَرّی ءُ گـُنگی نہ کپ ایت ، اَگاں بہ کپ ایت آ پاداتک کنت ، بلئـے چہ بـے اَگلی کپ ایت ءُ پاداتک هَم نہ کنت پرچا کہ آ وَتی پادایَگ ءَ نہ زانت.
ادبی هکیم

@Labzank
telegram.me/Labzank

زِند چَہ کُجا پَہ ڈَنگ بِیت
پَھریز بَلوچ ءِ نَنگ بِیت
نَدکار کِہ بَند اَنت لَچَّھاں
گَپ چَہ شَراب ءُ بَنگ بیت

آ کِہ نَہ وارت بَنگ ءُ شَراب
نَدکار گوَش اَنت آرا ھَراب
تِنگے گِر اَنت ءُ مَست بَنت
ھاک ءَ کَن اَنت مَٹّ پہ تُراب

نَدکار ءُ شائر بَنگی اَنت
کار اِش درُھا بے ڈَنگی اَنت
جاوَر جَتَگ وَیران کُتَگ
میر ءُ کَماش ھَم زَنگی اَنت

جاھے کِہ بَنگ ءُ چَرس بیت
ھَرس ھَم بَدَل پَہ اَرس بیت
بیمِ نَہ بیت ءُ شیر دِلی
ترُسّ ءُ ڈَس ءِ نام تَرسّ بیت

لَھتے کہ وارت بے سار بیت
نوں ھوش ےءِکَیت ھَمواربیت
بَند اِیت ءُ جَنت آ شئر ءُ سَوت
زِند ءَ وتی بے زار بیت

نئے زِندَگ اِنت نئے مُرت کَنت
پَہ ما گُڈا چے کُرت کَنت
وت پہ مَھار ءُ گوَر گِر اِنت
چوں مارا زُرت ءُ بُرت کَنت

ھالیگ چَہ زانت ءَ کِہ تَھ اِنت
اِزلیم چَہ ترُسّ ءَ گیڈَہ اِنت
وَر ءُ مِر کہ وارت مئے وَشتَوار
دریپّ اِیتءُمَست چولیڈَہ اِنت

وَت ھَم نَہ زانت کہ چےگوَش اِیت
زانتے اَگاں کِہ ھست ھُش اِیت
چَمّ مُچّ ءُ وارت چَول ءُ چَپَل
جاکے ماں دیوان ءَ پرُش اِیت

اِے لَھتے مَرد ءِ کارپَد اَنت
گَپّ ءُ نُبِشتاک اِش رَد اَنت
زان اَنت وَت ءَ اُستاد بَلئے
کاراں کِہ چارئے بے جَد اَنت

بَنگی کَدیں پَہ سارِ بَنت
تَریاک ءُ چَرس اَنگارِ بَنت
تَچکیں سیاھَگ راستِ بیت
سَرپَد بَلوچ نَدکارِ بَنت

@Labzank
telegram.me/Labzank

سوت ................. نورمحمد نورل

گوزیت وهد هر کسی
پہ وشی یا بـے وسـی

نہ رهبر ءُ شگو شگے
نہ سیمسراں مگوشگے
چتور منزل ءَ رسـی

هما کہ نیّت ءَ بد انت
هما کہ کار ءُ پد رِد انت
بزاں کہ وت وتا گسّی

سرا چہ سر گوزگ بزانت
هما کہ سر دئیگ بزانت
مُراد ءِ منزل ءَ رسـی


نورل دل ءَ بجزم تو
بکن وتارا اِزم تـــــو
کہ چہ کتگ هما رسی


@Labzank
telegram.me/Labzank

اے آر داد آزمانکی کتاب دریا دیمءَ پیداک انت 🖕👆☝️

دربرجاهے ءِ مستر ءَ ماں هندوستان ءِ کلکتہ ءِ شهر ءَ اے نمدی پیسر چہ نودربران ئے چکاسانی بندات بیگ ءَ  پہ نودربرانی  پت ءُ ماتاں روان داتگ :
آزیزیں پت ءُ ماتاں
شمئے چکّانی چکّاس زیت زیت ءَ بندات بہ انت
من زان آں شما چینچُک ناتاهیر ات کہ شمئے چکّ ماں چکّاساں سوبیں بہ بہ انت .

- بلے شمارا زانگ لوٹ ایت ماں اے نودربرانی تہ ءَ یک ازمگرے هوار اِنت کہ آئی ءَ پہ هساب ءِ زانگ ءَ هاجت نیست انت .

- یک کارگیجے هوار اِنت کہ آئی ءَ پہ راج دپترءُ انگریزی زبان ءِ زانتکار  بیگ ءَ هاجت نیست انت .

- یک سازگرے هوار انت کہ آئی پانگ ءَ برزیں هسابرد ءَ ماں شیمی ءِ وانگی ءَ بستار نیست انت .
- یک لَیبی یے هوار انت کہ پہ آئی ءَ جون ءُ جگس ءِ تیاری ءَ چہ پیزیک ءِ وانگی ءَ گیشتر بستار هست انت .

- اگاں شمئے چکّاں برزیں هسابردے گپت باز جوان ایں بلے اگاں اے وڑ ءَ نہ بیت گڑا آیاں جهل مہ جن ات ءُ آئی ازّت ءَ مہ گر ات .

-  آیاں بہ گوش ات کہ آ پہ مستریں مکسدے ءَ ماں اے دگنیا ءَ آتکگ انت گڑا پرواه نیست انت آیاں چکّاسے هراب کتگ .

- آیاں بہ گوش ات کہ شمئے چُکّ هر هسابردے ماں چکاساں گر انت شمارا اوست بہ انت ءُ آیانی باره ءَ بدیں سسا مہ کن ات .

- مهروانی کن ات اے کاراں بہ کن ات دانکہ شمئے چُکّ گیدی ءَ بہ گِر انت .

 گوں یک چکّاسے آیانی واهگاں ، هاٹی ءُ مزن سمائیاں بیران مہ کن اِت .

- ءُ آسرال ءَ ، مهروانی کن ات کہ شمارا اے سسا مہ بیت تهنا درمانکار ءُ مَندس  دگنیا ءِ آسَراتیں مردم انت ءُ بس .
باز باز ازتمند بات ات
دربرجاه ءِ مستر

@Labzank
telegram.me/Labzank

واجہ اَلی ءِ گُشتن
دُرّیں دانک

☀️ سیرءُ ازگاریءَ چے انسان وتا بـے هیال کنت ءُ نیزگاریءَ چے مردم آئیءَ بیهال کن انت -

☀️ انسانءِ نادراه کنوکیں چیزاں چے یک چیزئے دوستانی جتائی انت -

☀️ اگاں نزوریں مردمےءَ هچ دات نہ کنے گڈا گوں آئیءَ پُر مِہریءَ پیش بیا -

☀️ آ کارئے کہ مردمانی دیما شرّ نہ انت - آئیءَ چیروکائی اُوں مکن-

☀️ تا وهدے لبز تئی دلءَ انت آ تئی گُلام اَنت بلے وهدے آ ڈنّءَ در کایاں تو آئیءِ گُلامے

@Labzank
telegram.me/Labzank

چَلّیں ناہ پِنڈگ نہ لوٹ اِیت

مُرتگیں پُلّ سِندگ نہ لوٹ اِیت

بِسکوٹ ءُ ٹُوس چاۓءِ سرءَ

جوریں دپءَگوں کندگ نہ لوٹ اِیت

شَکّءُآدینک ءَ- چے کن ئے قاضی

کوٹیں سر تئی رَندگ نہ لوٹ اِیت

مبارک قاضی

@Labzank
telegram.me/Labzank

رجـانـک : اَدَبـی هَـکـیـم
مـاں یَـک مُـلـکے اَبـیـد چـہ چَـگ ءُ ٹِـلّ ءِ لَـیـب ءُ گـوازی کـنَـگءَ دگـے کـارءِ کـنَـگ مَـهـن اَت آ مُـلـکءِ اِزلـیـم هَـمُـک روچ مـاں آ مُـلـکءِ کـوُچّـگءُ مَـیـدانـاں وَتـی وَهـدءَ گـوں چَـگ ءُ ٹـلّ ءِ لَـیـب ءُ گـوازیءَ گـوازیـنَـگءَاِت اَنـت پَـمـشـا کـہ مـاں آ مُـلـکءِ تـهـ ءَ مَـهـن کـنَـگءِ کـانـوُد یَـکـپـارُگـی ایـر کـَـنَـگ نـہ بـوُتـگ اَت آ کـانـوُد گـوں یَـک سـابـتـیـں مَـنـانِـکـے ءِ سَـرا کـَـمّ کـَـمّ ءَ ایـر کـنَـگ بـوُتـگ اَت ءُ کـَـسـے ءِ گـُـوَرا پـہ آ کـانـوُد ءِ نـہ مَـنّـگ ءَ ءُ گِـلَـگءُ شِـکـاهَـتءِ کـنَـگءَ هِـچّ مَـنـانِـکـے نـیـسـت اَت .
هَـمـے پَـیـم سـالانـی سـال گـوَسـت ءُ شُـت اَنـت یَـک روچـے مُـلـکءِ سَـردار ءُ نَـوابـاں هَـیـال کـُـرت کـہ مـاں اِے مُـلـکءَ چُـشـیـں کـانـوُدے ایـر کـَـنَـگ ءِ اَزکـار نـہ اِنـت کـہ هَـمُـک کـارءِ کـنَـگ مَـهـن بـہ بَـنـت گـُـڑا مُـلـکءِ سَـردار ءُ نَـوابـاں مُـلـکءِ جـارچـیـانءَ جـارءِ جَـنَـگءَ پَـرمـائـیـنـت اَنـت داں مُـلـکءِ اِزلـیـم ءَ هـال بـہ دے اَنـت کـہ مَـروچـیءَ آدِیـم هَـرچ کـارے کـہ اِزلـیـمءِ دِل بـہ لـوٹ ایـت آ هَـمـا کـارءَ بـہ کـَـن اَنـت جـارچـیـاں مـاں تـیـوَگـیـں مُـلـکءِ تـهـ ءَ جـار جَـت ءُ اِزلـیـم اِش سَـرپَـد کـُـرت اَنـت بـلـئـے اِزلـیـم جـارءِ اِشـکـُـنَـگءَ رَنـد یَـک ءُ یَـک بـوُت اَنـت ءُ پَـدا وَتـی چَـگءُ ٹـلّ اِش زُرت اَنـت ءُ پـہ چَـگ ءُ ٹـلّ ءِ لَـیـب ءُ گـوازیءِ کـنَـگءَ شُـت اَنـت جـارچـیـاں پَـدا آتـک ءُ جـار جَـت کـہ نـوں شُـمـا هَـمُـک کـارءِ کـنَـگءَ آجـو کـنَـگ بـوُتـگ اِت بـلـئـے آیـاں گـوَشـت مـا چَـگءُ ٹـلءِ لَـیـبءَ کـنَـگءَایـں جـارچـیـانءَ ازلـیـمءَ هَـمـا کـار یـات دات اَنـت کـہ آیـانءَ مَـهـن کـنَـگءِ کـانـوُدءَ پـیـش آ کـار کـُـرتَـگ اِت اَنـت بـلـئـے اِزلـیـمءَ جـارچـیـانـی گـَـپ گـوش نـہ داشـت اَنـت ءُ هَـمـا پَـیـمـا چَـگ ءُ ٹـلّ ءِ لَـیـب ءُ گـوازیءَ گـُـلائـیـش بـوُت اَنـت جـارچـیـانءَ چـاراِت کـہ آیـانـی جـارءِ جَـنَـگ بـے نَـپ بـوُت اَنـت رَنـدا آ سَـردار ءُ نـوابـانـی گـوَرا شُـت ءُ گـوَشـت اِزلـیـم شـمـئـے گـپءَ نـہ مَـنّـگءَاَنـت سـردار ءُ نَـواب زَهـر گـپـت اَنـت آیـانءَ گـوَشـت نـوں شُـمـا بـہ رَواِت جـار بـہ جَـن اِت مُـلـکءِ تَـهـ ءَ چَـگ ءُ ٹـلّ ءِ لَـیـب ءُ گـوازی کـنَـگ مَـهـن اِنـت جـارچـیـانءَ شُـت ءُ جـار جَـت سَـردار ءُ نَـوابـانءَ چَـگ ءُ ٹـلّ ءِ لَـیـب ءُ گـوازی کـنَـگ مَـهـن کـُـرتَـگ گـُـڑا مُـلـکءِ تـیـوَگـیـں اِزلـیـم سَـردار ءُ نَـوابـانـی سَـرءَ زَهـر گـپـت اَنـت آیـانءَ یَـکـپـارُگـی سَـردار ءُ نـوابـانـی سَـرءَ اُرُش کـُـرت ءُ مُـلـکءِ سَـردار ءُ نـواب اِش درُهـا کـُـشـت ءُ گـار کـُـرت اَنـت ءُ وَت پَـدا چُـگ ءُ ٹـلّ ءِ لَـیـب ءُ گـوازی کـنَـگءَ لَـگّ اِت اَنـت.
@Labzank
telegram.me/Labzank